ཐུགས་སྒྲུབ་བསྙེན་ཐོ།
༈ ཐུགས་སྒྲུབ་བསྙེན་ཐོ་དགེ། །སྭ་སྟི། །ཐུགས་སྒྲུབ་བསྙེན་སྒྲུབ་ལས་གསུམ་རྒྱས་པར་བཏང་ན། ཐོག་མར་སྔོན་འགྲོ་ཟླ་བ་གཅིག་སོགས་ལོང་སྐབས་དང་བསྟུན། མ་མཐའ་འང་སྐྱབས་འགྲོ་ཁྲི། སེམས་བསྐྱེད་ཅི་ནུས། ཡིག་བརྒྱ་ཁྲི། མཎྜལ་རྒྱས་བསྡུས་གང་རིགས་ཁྲི། བླ་མའི་རྣལ་འབྱོར་ཕྱི་སྒྲུབ་གསོལ་འདེབས་བསྡུས་པ་ཁྲི་དང་སྦྲགས་ཏེ་ཕྱག་དེ་མཚུངས་སོང་ནའང་ལེགས། བར་ཆད་ལམ་སེལ་ཀྱང་སྟོང་ཕྲག་ཙམ་གྲུབ་ན་བྱ། ནང་སྒྲུབ་བཛྲ་གུ་རུ་བཞི་འབུམ། གསང་སྒྲུབ་དགོངས་པ་བསྐྱང་བ་ཐུན་ཐམས་ཅད་ཀྱི་མཇུག་ཏུ་བྱ་ཏེ། དེ་ལྟར་སྔོན་འགྲོ་རྣམས་ལེགས་པར་གྲུབ་ནས། དངོས་གཞི་བསྙེན་པའི་སྐབས་འདིར་སྨན་རཀ་གཏོར་གསུམ་ཉེར་སྤྱོད་ཙམ་བཤམས། ཐུན་བཞིའི་ཐོར་ཐུན་ལ་སྔོན་འགྲོ་ཚང་བ་དང་། ལས་བྱང་འབྲིང་པོའམ། རྒྱུན་ཁྱེར། སྔ་ཐུན་ལ་ལས་བྱང་རྒྱས་པ། ཕྱི་ཐུན་ལ་ལས་བྱང་འབྲིང་པོ། ཕྱི་ཐུན་མཇུག་ཏུ་ལས་བྱང་རྒྱས་པ་ལྟར་ཚོགས་ནས་བཀྲ་ཤིས་ཡན། ཆད་བསྟན་གཏོར་བྲོ་རྒྱུན་དུ་མ་གྲུབ་ཀྱང་ཆོག །ཚེས་བཅུ་སོགས་ལ་ངེས་པར་བཏང་། ཚོགས་ཀྱི་མགོའམ། ལྷག་མའི་གང་དུ་ཚེ་རིང་མཆེད་ལྔའི་གཏོར་ཆོག་བསྟོད་པ་ཡན་དང་། ཁ་རག་ཁྱུང་བཙུན་གཏོར་འབུལ་བྱ། སྐོང་བ། འཁྲུགས་སྐོང་། བརྟན་གསོལ་རྣམས་རྒྱུན་དུ་མ་གྲུབ་ན་ཚེས་བཅུ་སོགས་དུས་ཆེན་སྐབས་བྱ། ཁྱད་པར་ཚེས་བརྒྱད་ལ་བསྐང་བ་རྒྱས་པར་བྱ། སྲོད་
ཐུན་ལ་ལས་བྱང་འབྲིང་པོ་བཏང་། དེ་ཡང་ལས་བྱང་འབྲིང་བསྡུས་གང་ཡིན་ཀྱང་བསྟོད་པའི་མཇུག་ཏུ། བྷཾ་བི་ཤྭ་བི་ཤུདྡྷེ་ཧཱུྃཧཱུྃ་ཕཊ་ཛ༔ ཞེས་པས་ཛཔྲ་ཁང་དབྱེ། ཛཔྲ་བསྐུལ་ལ་ལས་བྱང་རྒྱས་པའི་སྐབས། སྣང་བ་མཐའ་ཡས་ལྷ་ཚོགས་དབྱིངས་ནས་བཞེངས༔ སོགས་བསྒྱུར་ལ། ཛཔྲ་དམིགས་རྒྱས་པ་དང་བཅས་བཟླ། འབྲིང་པོ་གཞུང་ལྟར། དེས་གཞན་གཉིས་ཀ་ལ་འགྲེ། ཐུན་བསྡུ་ན་ཚེ་བསྙེན་སྐབས་ཡིག་བདུན་དང་། བཛྲ་གུ་རུ་པདྨ་ཐོད་ཕྲེང་རྩལ། ཧ་རི་ནི་ས་བཅས་ལས་བྱང་འབྲིང་པོ་ལྟར་ཅི་ནུས་རེ་དབྱངས་གསལ་རྟེན་སྙིང་བཅས་བཟླ། དེས་མཚོན་ཏེ་ཡིག་བདུན་སོགས་ཀྱི་སྐབས་གོང་འོག་གི་བསྙེན་པ་རྣམས་མ་ཆགས་ཙམ་བྱ། མཐར་ལས་བྱང་རྒྱས་པ་ལྟར་ན། ཡེ་ཤེས་ལྷ་ཚོགས་སྤྱན་འདྲེན་གཤེགས༔ སོགས་དང་། ཨོཾ་བདེ་གཤེགས་ཡེ་ཤེས་སོགས་བསྟོད་པ། གསོལ་འདེབས་བར་ཆད་ལམ་སེལ། ཨོ་རིག་འཛིན་དཀྱིལ་འཁོར་སོགས་ནོངས་བཤགས༔ ཨོཾ་ཨཱཿཧཱུྃ་སྭཱ་ཧཱ། །སོགས་རིག་པའི་མེ་ཏོག་དོར་ཞིང་མདུན་གྱི་ཡེ་ཤེས་པ་རང་ལ་བསྟིམ་པ་ཡི་གེ་བརྒྱ་པས་བརྟན་པར་བྱ། ཧཱུཾ། །མ་སྐྱེས་སྟོང་པའི་སོགས་བསྡུ་ལྡང་ནས་བཀྲ་ཤིས་བར་བྱ། ལས་བྱང་འབྲིང་པོ་ལྟར་ན། དབྱངས་གསལ་རྟེན་སྙིང་བཟླ་བ་ཡན་གང་ལྟར་ལ། ཡེ་ཤེས་ལྷ་ཚོགས་སོགས་
སྟོང་ཚིག་མཆོད་པ་དང་། གསོལ་འདེབས་བར་ཆད་ལམ་སེལ་མཐར། ཡི་གེ་བརྒྱ་པས་ནོངས་པ་བཤགས། ཛཧཱུྃ་བཾ་ཧོ༔ མདུན་གྱི་ཡེ་ཤེས་པ་རང་ལ་ཐིམ་པར་བསམས་ལ་ཡི་གེ་བརྒྱ་པས་བརྟན་པར་བྱ་ཞིང་། ཧཱུྃ་གསུམ་གྱིས་བསྡུ་བ་ནས་ཤིས་བརྗོད་ཡན་དཀྱུས་ལྟར་བྱའོ། །དེ་ལྟ་བུའི་རིམ་པས་ཨ་མཱ་ར་ཎི་འབུམ་ཕྲག་བཅུ་གཅིག་གམ། ཟླ་བ་གཉིས་ཙམ་གྱི་དབང་དུ་བྱས་ན་འབུམ་ཕྲག་བཞི། ཡི་གེ་བདུན་པ་འབུམ་ཕྲག་བཅུའམ། འབུམ་ཕྲག་བདུན་ནམ། མ་གྲུབ་ན་སྤྱི་བཏང་ལྟར་འབུམ་ཕྲག་བཞི། བཛྲ་གུ་རུ་འབུམ་ཕྲག་བཅུ་གཉིས་ཁ་སྐོང་བཅས་འགྲོ་ངེས་བྱ། དེ་ནས་བསྒྲུབ་པ་དང་དཀྱུས་གཅིག་ཏུ་སྦྲེལ་ན། རྒྱས་པར་སྒྲུབ་ཆེན་ཁོག་དབུབ་ཚུལ་བཞིན་བྱ་བའམ། མ་གྲུབ་ན་རྒྱལ་ཆེན་ཐོ་འཛུག་རྒྱས་པར་བྱ་ཞིང་སྒྲུབ་པ་ལ་འཇུག །གལ་སྲིད་བར་བཞག་དགོས་བྱུང་ན། འདིར་ཡང་སྒྲུབ་པ་མདོར་བསྡུས་ཤིག་ལས་སྦྱོར་བཅས་གྲུབ་ན་ལེགས་པས། ལས་བྱང་འབྲིང་པོའི་དམིགས་གནད་སྦྱར་ཏེ་ཐོད་ཕྲེང་རྩལ་འབུམ་ཕྲག་བཞི་དང་། ཧ་རི་ནི་ས་ཁྲི་གཅིག་བཟླས་ཏེ། ཁ་སྐོང་གི་སྦྱིན་སྲེག་གྲུབ་ན་ལེགས། མ་གྲུབ་ན་ཡིག་བརྒྱ་ཉིན་ཆ་ཤས་ཐུན་མཐུག་ཏུ་བཟླ་ཞིང་། ཚོགས་འཁོར་བརྒྱ་རྩ་དང་། ཆོས་སྲུང་སྐོང་བཤགས་སོགས་གཏོང་རག་གི་མཆོད་པ་རྒྱས་པར་བྱས་ནས་མཚམས་
གྲོལ། སྒྲུབ་པ་ལས་འཇུག་ན་ཟུར་དུ་ཤེས། སྔོན་འགྲོའི་སྐབས་རྒྱལ་ཆེན་ཐོ་འཛུག་བྱ་བའམ། དེ་མིན་ཕྱི་མཚམས་ཙམ་ལ་བརྟེན་ཀྱང་རུང་ཞིང་། བསྙེན་པ་གཟའ་སྐར་བཟང་བའི་མར་ངོའི་ཕྱི་དྲོ་དབུ་ཚུགས་པ་བྱུང་ན་ལེགས་པས། རྒྱལ་ཆེན་ཐོ་འཛུག་བྱ། གྲོལ་རྒྱུ་ཡར་ངོའི་གཟའ་ཚེས་བཟང་པོའི་ཐོར་ཐུན་གྱི་མཇུག་ཏུ་དངོས་གྲུབ་ལེན་ཆོག་རྒྱས་པར་བྱ་ཞིང་ཉི་ཤར་གྲོལ་ལོ། །གཞན་མཚམས་ཀྱི་སྤང་བླང་སོགས་བསྙེན་ཡིག་སྤྱི་འགྲེ་ལྟར་ཤེས་པར་བྱའོ། །