རྗེ་བཙུན་མ་གཟའ་ཐམས་ཅད་ཀྱི་ཡུམ་རིག་པ་ཆེན་མོའི་དཀྱིལ་འཁོར་དུ་སློབ་མ་དབང་བསྐུར་བའི་ཆོ་ག་ཕན་བདེའི་ཉི་མ། ངག་དབང་ལེགས་གྲུབ།

རྗེ་བཙུན་མ་གཟའ་ཐམས་ཅད་ཀྱི་ཡུམ་རིག་པ་ཆེན་མོའི་དཀྱིལ་འཁོར་དུ་སློབ་མ་དབང་བསྐུར་བའི་ཆོ་ག་ཕན་བདེའི་ཉི་མ་ཞེས་བྱ་བ་བཞུགས་སོ། །ༀ་སྭ་སྟི་པྲ་ཛ་བྷྱཿ རྒྱལ་བ་ཀུན་ཡུམ་ཤེས་རབ་ཕར་ཕྱིན་མ། །འཇིག་རྟེན་དགེ་ལེགས་སྒྲུབ་ཕྱིར་གཟའ་རྣམས་ཀྱི། །ཡུམ་དུ་ཟློས་པའི་རིག་པ་ཆེན་མོ་དང་། །དབྱེར་མེད་རྗེ་བཙུན་བླ་མ་གཙུག་ཏུ་མཆོད། །གང་གི་དཀྱིལ་འཁོར་མཆོད་པའི་མན་ངག་ནི། །འཇམ་མགོན་བླ་མས་གསལ་བར་ཕྱེས་མོད་ཀྱང་། །དབང་གི་ཆོ་ག་གཞན་ལ་ལྟོས་པ་ལས། །མེད་ཕྱིར་བརྒྱུད་པའི་ཕྱག་བཞེས་བཞིན་དུ་འདྲི། །འདིར་རྣལ་འབྱོར་གྱི་དབང་ཕྱུག་ཆེན་པོ་འགྲན་ཟླ་དང་བྲལ་བ། །མཁས་པ་རྣམས་ཀྱི་གཙུག་གི་ནོར་བུ། །དཔལ་བིརྦ་པའི་གསུང་གི་མན་ངག་འཛམ་བུའི་གླིང་གི་རྒྱན་དམ་པ་སློབ་དཔོན་ཞི་བ་འཚོ་ལས་བརྒྱུད་དེ། འཁོན་ནཱ་གནྟཱ་རཀྵི་ཏ་ལ་སོགས་པ་འཁོན་གདུང་གོང་མ་རྣམས་ལ་བཀའ་བབས་པའི་རྗེ་བཙུན་མ་རིག་པ་ཆེན་མོའི་རས་བྲིས་ཀྱི་དཀྱིལ་འཁོར་དུ་དབང་བསྐུར་བ་ལ་སྟ་གོན་དང་དངོས་གཞི་གཉིས་ལས། དང་པོ་ནི་གནས་ཡིད་དུ་འོང་བར་སྟེགས་བུ་རས་བཟང་པོས་བཀབ་པའི་སྟེང་དུ། མཎྜལ་ལ་དྲིའི་ཐིག་ལེ་དང་མེ་ཏོག་གི་ཚོམ་བུ་ལྷ་གྲངས་བཞིན་བཀོད་པ་མཉྫའི་སྟེང་དུ་བཤམ། དེའི་འོག་ཏུ་ས་ལྷའི་ཚོམ་བུ་མཆོད་གཏོར་དང་བཅས། མཐའ་སྐོར་དུ་དཀྱིལ་འཁོར་གྱི་སྤྱི་མཆོད་མཚམས་འཛིན་གྱི་མེ་ཏོག་དང་། ཆུ་གཉིས་ཉེར་སྤྱོད་ལྔ་གཡས་སྐོར་དུ་གྲུ་བཞི་བཤམ་ཞིང་། དེའི་ཕྱི་རོལ་དུ་སྒོས་མཆོད་སྤོས་མར་མེ་ཞལ་ཟས་གསུམ་ལྷ་གྲངས་དང་མཉམ་པའམ་ཅི་འབྱོར་བ་བཤམ། གསུམ་པ་མཆོད་ཆོག་ཏུ་གཟའ་བརྒྱད་སོ་སོའི་མཎྜལ་དང་ཉེར་སྤྱོད་བཤད་པ་བཞིན་འབྱོར་ན་དགོས་མོད། དབང་བསྐུར་གྱི་སྐབས་སུ་ན་ཕལ་ཆེར་སྤྱི་འགྲོ་འདི་ཙམ་གྱིས་ཆོག་པར་མཛད། ཤར་དུ་དཀྱིལ་འཁོར་བའི་གཏོར་མ་དང་ལྷོར་ཆ་གསུམ་གཏོར་མ་དང་། ལོགས་ཤིག་ཏུ་སྔོན་འགྲོའི་གཏོར་མ་དང་། སློབ་མ་སྟ་གོན་ལ་དགོས་པའི་ཡོ་བྱད་རྣམས་ཚོགས་པར་བྱ། སློབ་དཔོན་གྱི་མདུན་དུ་བུམ་པ་གཉིས་ལ་ནང་རྫས་ཉེར་ལྔ་ཁ་རྒྱན་མགུལ་ཆིངས་སོགས་སྤྱི་ལྟར་དང་། རྡོ་རྗེ་དྲིལ་བུ་འདུ་བྱས་ལ་གྲུབ་ན་ཐེག་པ་ཆེན་པོའི་གསོ་སྦྱོང་བླངས། སྟན་ལ་འཁོད་དེ་སྔོན་འགྲོའི་གཏོར་མ་ཆབ་ཀྱིས་བྲན། ༀ་ཨ་མྲྀ་ཏེ་ཧཱུྃ་ཕཊ་ཅེས་པས་བསངས། ༀ་སྭ་བྷ་ཝ་སོགས་ཀྱི། སྟོང་པར་སྦྱངས། ༀ་ཨཱཿཧཱུྃ་ལན་གསུམ་གྱིས་བྱིན་གྱིས་བརླབ་ནས། གཡོན་པའི་ཁུ་ཚུར་གྱི་སྟེང་དུ་གཡས་པའི་གྲུ་མོ་བཞག་པའི་མཛུབ་མོ་ལྕགས་ཀྱུ་ལྟར་བཀུག་པ་བསྐོར་ཞིང་། ༀ་བྷུ་མི་པ་ཏི་ས་པ་རི་ཝཱ་ར་ཨཱ་ཀཪྵ་ཡ་ཛཿ ཞེས་དང་། ནམ་མཁའ་མཛོད་ཀྱི་ཕྱག་རྒྱ་དང་བཅས། ༀ་བྷུ་མི་པ་ཏི་ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་སོགས་ལན་གསུམ་གྱིས་བསྟོད་ནས། གནས་བདག་གཞི་བདག་ལ་སོགས་པ་འབྱུང་པོའི་ཚོགས་ཐམས་ཅད་ལ། འདོད་ཡོན་ལྔ་དང་ལྡན་པའི་གཏོར་མ་འདི་སྦྱིན་ནོ། །ཚིམ་པར་གྱིས་ལ་དཀར་པོའི་ཕྱོགས་ལ་དགའ་བ་རྣམས་ཀྱིས་གྲོགས་གྱིས་ཤིག །ནག་པོའི་ཕྱོགས་ལ་དགའ་བ་གསང་སྤྱོད་ལྟ་བ་མི་དབང་བ་རྣམས་ཀྱང་། གནོད་པའི་སེམས་ཞི་ནས་བྱང་ཆུབ་ཀྱི་སེམས་དང་ལྡན་པར་གྱིས་ལ་སའི་ཕྱོགས་འདིར་མ་གནས་པར་གཞན་དུ་སོང་ཤིག །ཅེས་དང་། ཨ་མྲྀ་ཏེ་སོགས་བརྗོད་ཅིང་རྡོ་རྗེ་གསོར་དྲིལ་བུ་དྲག་ཏུ་དཀྲོལ་ལ་གཏོར་མ་གཙང་སར་དོར། བསང་སྦྱངས། སྟོང་པའི་ངང་ལས་ༀ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ༀ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །གདུག་སྤོས། མར་མེ། དྲི་མཆོག །ཞལ་ཟས། རོལ་མོ་རྣམས་དྭངས་ཤིང་ཐོག་པ་མེད་པ་ནམ་མཁའི་མཐའ་ཀླས་པར་གྱུར། ༀ་བཛྲ་ཨརྒྷཾ་སྭཱ་ཧཱ། ༀ་བཛྲ་པཱ་དྱཾ། ༀ་བཛྲ་པུཥྤཾ། དྷཱུ་པཾ། དཱིཔཾ་གནྡྷཾ། ནཻ་ཝི་དྱཾ། ༀ་བཛྲ་ཤབྡ་སྭཱ་ཧཱ། ཞེས་པའི་མཐར་རྡོ་རྗེ་དྲིལ་བུ་བསིལ་ཞིང་དྷརྨ་ར་ཎི་ཏ་སོགས་ལན་གསུམ་བརྗོད་པས་མཆོད་པ་རྣམས་བྱིན་གྱིས་བརླབས་སོ། །བདག་བསྐྱེད་ནི་སྐྱབས་འགྲོ་སྤྱི་ལྟར་ཅི་ནུས་དང་། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་རྗེ་བཙུན་རིག་པ་ཆེན་མོའི་བསྒོམ་བཟླས་ལ་འཇུག་པར་བགྱིའོ། །ཞེས་ལན་གསུམ་གྱིས་སེམས་བསྐྱེད། ༀ་ཨ་མྲྀ་ཏེ་ཧཱུྃ་ཕཊ་ཅེས་པ་ལན་གསུམ་གྱིས་བདག་དང་གནས་དང་རྣལ་འབྱོར་བསྲུངས་ལ། རང་གི་སྙིང་གར་པདྨ་དང་ཟླ་བའི་སྟེང་དུ་ཧཱུྃ་དཀར་པོ། དེ་ལས་འོད་ཟེར་འཕྲོས་པས་སེམས་ཅན་ཐམས་ཅད་ཀྱི་དོན་བྱས་ཏེ། ཕྱོགས་བཅུའི་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་མདུན་གྱི་ནམ་མཁར་ༀ་བཛྲ་ས་མཱ་ཛཿ ཞེས་པས་སྤྱན་དྲངས་ནས། ན་མོ་གུ་རུ་བྷྱཿ ན་མ་སརྦ་བུདྡྷ་བིདྡྷི་ས་ཏྭ་བྷྱཿ ཞེས་པས་ཕྱག་བྱས་ནས། ༀ་གུ་རུ་སརྦ་བུདྡྷ་བོ་ས་ཏྭ་ཨརྒྷཾ་པྲ་ཏི་ཙྪ་སྭཱ་ཧཱ་ནས་ཤབྡ་པྲ་ཏིཙྪ་ཡེ་སྭཱ་ཧཱའི་བར་གྱིས་མཆོད། རྡོ་རྗེ་ཐལ་མོ་སྦྱར་ཏེ། དཀོན་མཆོག་གསུམ་ལ་བདག་སྐྱབས་མཆི་སོགས་ལན་གསུམ་གྱིས་རྒྱུད་དག་པར་བྱས་ནས། སེམས་ཅན་ཐམས་ཅད་བདེ་བ་དང་སོགས་ཀྱིས་ཚད་མེད་པ་བཞི་བསྒོམ། ༀ་ཤུ་ནྱ་ཏཱ་སོགས་ཀྱིས། ཕྱི་ནང་གི་ཆོས་ཐམས་ཅད་སྟོང་པར་སྦྱངས། སྟོང་པའི་ངང་ལས་པྂ་ལས་པདྨ་དང་། རྂ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ལས་སྣ་ཚོགས་རྡོ་རྗེའི་ལྟེ་བ་ལ་ཧཱུྃ་གིས་མཚན་པ། ཧཱུྃ་ལས་འོད་ཟེར་ཕྱོགས་བཅུར་འཕྲོས་པས་རྡོ་རྗེའི་ས་གཞི། ར་བ། དྲྭ་བ་གུར་བླ་བྲེ་ཡེ་ཤེས་ཀྱི་མེ་འབར་བ་དང་བཅས་པའི་སྲུང་བའི་འཁོར་ལོའི་དབུས་སུ་པདྨ་དང་ཟླ་བའི་སྟེང་དུ་ཧཱུྃ་དཀར་པོ་ལས་རང་ཉིད་བཅོམ་ལྡན་འདས་མ་གཟའ་ཐམས་ཅད་ཀྱི་ཡུམ་སྐུ་མདོག་སྟོན་ཟླ་ལྟར་དཀར་བ་ཞལ་གསུམ་ཕྱག་དྲུག་མ། རྩ་ཞལ་དཀར་པ། གཡས་ཞལ་གནག་པ། གཡོན་ཞལ་དམར་བ། ཞལ་རེ་རེ་ལ་སྤྱན་གསུམ་གསུམ་མངའ་བ། ཕྱག་དང་པོ་གཉིས་ཀྱིས་ཆོས་འཆད་ཀྱི་ཕྱག་རྒྱ་མཛད་པ། གཡས་ཀྱི་གཉིས་པ་ན་རྡོ་རྗེ། གསུམ་པ་ན་མདའ། གཡོན་གྱི་གཉིས་པ་ན་པདྨ། །གསུམ་པ་ན་གཞུ་བསྣམས་པ། རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། དར་སྣ་ཚོགས་ཀྱི་ན་བཟའ་ཅན། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའོ། །དེའི་དཔྲལ་བར་ༀ་དཀར་པོ། མགྲིན་པར་ཨཱཿདམར་པོ། ཐུགས་ཀའི་སྟེང་དུ་ཧཱུྃ་སྔོན་པོ། དབུས་སུ་ཟླ་བའི་སྟེང་དུ་ཧཱུྃ་དཀར་པོ། དེ་ལས་འོད་ཟེར་འཕྲོས་པས་རང་བཞིན་གྱི་གནས་ནས་རྗེ་བཙུན་མ་རིག་པ་ཆེན་མོ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ༀ་བཛྲ་ས་མཱ་ཛཿ ཛཿཧཱུྃ་བྂ་ཧོཿ སླར་ཡང་ཐུགས་ཀའི་ཧཱུྃ་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་ༀ་བཛྲ་ས་མ་ཛཿ དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། དེ་བཞིན་གཤེགས་པ་རྣམས་ཀྱིས་བུམ་པའི་ཆུས་སྤྱི་བོ་ནས་དབང་བ སྐུར་པས། ལུས་ངག་ཡིད་ཀྱི་དྲི་མ་སྦྱངས་ཏེ་ཆུའི་ལྷག་མ་ཡར་ལུད་པ་ལས་རྣམ་པར་སྣང་མཛད་ཀྱིས་དབུར་བརྒྱན་ཞེས་ཡན་ལག་བཞིས་ལྷར་བསྐྱེད་ནས། བཟླས་པ་བྱ་བ་ནི། ཐུགས་ཀར་ཟླ་བའི་སྟེང་དུ་ཧཱུྃ་གི་མཐའ་མར་སྔགས་ཀྱི་ཕྲེང་བས་གཡས་སུ་བསྐོར་བའི་འོད་ཀྱིས་རང་གི་སྡིག་སྒྲིབ་དང་། ནད་དང་བར་དུ་གཅོད་པ་ཐམས་ཅད་སྦྱངས། འོད་ཟེར་ཕྱིར་འཕྲོས་པས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་རྒྱུད་བསྐུལ། དེ་རྣམས་ཀྱི་ཡེ་ཤེས་དང་བྱིན་བརླབས་ཐམས་ཅད་འོད་ཀྱི་རྣམ་པར་རང་ལ་ཐིམ་གཟའ་དང་རྒྱུ་སྐར་དང་། གདོན་དང་འབྱུང་པོའི་ཚོགས་ཐམས་ཅད་ཀྱི་གདུག་པའི་སེམས་ཞི་བར་བྱས་པར་བསམ་པ་ལ། ༀ་སརྦ་བེ་དྱཻ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་པ་ཅི་ནུས་སུ་བཟླའོ། །མཐར། ༀ་བྷ་ག་ཝཱ་ཏཱི་སརྦ་བིདྱཻ་ཨརྒྷཾ་པྲ་ཏིཙྪ་སྭཱ་ཧཱ། པཱ་དྱཾ་ནས། ཤབྡ་པྲ་ཏིཙྪ་སྭཱ་ཧཱའི་བར་གྱིས་མཆོད། བཅོམ་ལྡན་འདས་མ་གཟའ་རྣམས་ཀུན། །འདུལ་ཕྱིར་རྒྱལ་བ་གཟའ་རྣམས་ཀྱི། །ཚུལ་དུ་བསྐྱེད་མཛད་ཐུགས་རྗེ་ཅན། །ཡུམ་ཆེན་ཁྱོད་ལ་ཕྱག་འཚལ་ལོ། །དངོས་དང་ཡིད་ཀྱི་རྣམ་སྤྲུལ་པའི། །ཀུན་ཏུ་བཟང་པོའི་མཆོད་སྤྲིན་གྱིས། །བཅོམ་ལྡན་འདས་མ་ཁྱེད་མཆོད་ཀྱིས། །བདག་ལ་གཟའ་རྣམས་དགྱེས་པར་མཛོད། །ཅེས་བསྟོད་ཅིང་གསོལ་བ་གདབ། དམ་ཡེ་ཕྱེ་བ་ནི་མ་བཤད་དོ། །སྟ་གོན་དངོས་ལ་བཞི་ལས་ས་ལྷ་སྟ་གོན་ནི། ཚོམ་བུ་བསང་སྦྱངས། སྟོང་པའི་ངང་ལས་པྂ་ལས་པདྨ་དང་ཨ་ལས་ཟླ་བའི་སྟེང་དུ་བྂ་ལས་སའི་ལྷ་མོ་སྐུ་མདོག་སེར་མོ་ཞི་བའི་ཆ་ལུགས་དང་། རྒྱན་གྱིས་བཀླུབས་པ། ཕྱག་གཉིས་ཀྱི་རིན་པོ་ཆེའི་བུམ་པ་ཐུགས་ཀར་འཛིན་པ། དེའི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུྃ། རང་གི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་ས་འོག་ནས་སའི་ལྷ་མོར་འཁོར་དང་བཅས་པ་ༀ་བཛྲ་ས་མཱ་ཛཿ ཛཿཧཱུྃ་བྂ་ཧོཿ སླར་ཡང་ཐུགས་ཀའི་ཧཱུྃ་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་ༀ་བཛྲ་ས་མཱ་ཛཿ དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་བ་སྩལ་དུ་གསོལ། དེ་བཞིན་གཤེགས་པ་རྣམས་ཀྱིས་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས་རིན་ཆེན་འབྱུང་ལྡན་གྱིས་དབུར་བརྒྱན་པར་བསམ། དེ་ལ། ༀ་པྲི་ཐི་ཝི་དེ་ཝཱི་ས་པ་རི་ཝ་ར་ཨརྒྷཾ་པྲ་ཏིཙྪ་སྭཱ་ཧཱ་ནས། ཤབྡའི་བར་མཚམས་ན་སྔགས་འདི་བཞིན་སྦྱར་བས་མཆོད། གཏོར་མ་ཆུས་བྲན་ལ། བསང་སྦྱངས། སྟོང་པའི་ངང་ལས། ༀ་ལས་རིན་པོ་ཆེའི་སྣོད་དུ་གཏོར་མ་འདོད་ཡོན་ལྡ་དང་ལྡན་པ་བདུད་རྩིའི་རྒྱ་མཚོ་ཆེན་པོར་གྱུར། ༀ་ཨཱཿཧཱུྃ་ལན་གསུམ་གྱིས་བྱིན་རླབས། ༀ་པྲི་ཐི་ཝཱི་དེ་ཝི་ས་པ་རི་ཝཱ་ར་ༀ་ཨ་ཀཱ་རོ་སོགས་ལན་གསུམ་ལ་མཆོད་སྦྱིན་སེ་གོལ་གཏོགས་པ་དང་བཅས་པས་ཕུལ། སྤོས་དང་རྡོར་དྲིལ་འཛིན་ལ། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ཏེ་དཀྱིལ་འཁོར་འདྲི། །ཞེས་ལན་གསུམ་གསོལ། རིག་པ་འཛིན་པ་ཁྱོད་དཀྱིལ་འཁོར་གྱི་ལས་ཅི་བདེ་བར་གྱིས་ཤིག །ཅེས་གནང་བ་བྱིན་པར་བསམས་ལ། ལག་པ་གཡས་ས་ལ་རེག་སྟེ། ༀ་བཛྲ་མུཿ སའི་ལྷ་མོ་ས་དེ་ཉིད་ལ་ཐིམ་ཞེས་བརྗོད། ལྷ་སྟ་གོན་ནི། མཆོད་པ་རྣམས་བྱིན་རླབས་གོང་ལྟར་ལ་དྷ་རྨ་ར་ཎི་མི་དགོས། ཚོམ་བུ་བསང་སྦྱངས། སྟོང་པའི་ངང་ལས་པྂ་ལས་པདྨ་དང་རྂ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ལས་སྣ་ཚོགས་རྡོ་རྗེའི་ལྟེ་བ་ལ་ཧཱུྃ་གིས་མཚན་པ། ཧཱུྃ་ལས་འོད་ཟེར་ཕྱོགས་བཅུར་འཕྲོས་པས་རྡོ་རྗེའི་ས་གཞི། ར་བ། དྲྭ་བ་གུར་བླ་བྲེ་ཡེ་ཤེས་ཀྱི་མེ་འབར་བ་དང་བཅས་པའི་སྲུང་བའི་འཁོར་ལོའི་དབུས་སུ། པྂ་ལས་པདྨ་དང་རྂ་ལས་ཉི་མའི་སྟེང་དུ་ཧཱུྃ་ལས་སྣ་ཚོགས་རྡོ་རྗེའི་ལྟེ་བར་བྷྲཱུྂ་ལས་རིན་པ་ཆེ་སྣ་ཚོགས་ལས་གྲུབ་པའི་གཞལ་ལས་ཁང་པ་གྲུ་བཞི་པ། སྒོ་བཞི། ཕྱི་ནས་རིམ་པ་བཞིན་དུ་སྔོ་སེར་དམར་ལྗང་དཀར་བའི་རྩིག་པ་རིམ་ལྔ་དང་ལྡན་པ། དེའི་སྟེང་དུ་རིན་པོ་ཆེའི་ཕ་གུ་སེར་པོས་བསྐོར་བ། དེའི་སྟེང་དུ་རིན་པོ་ཆེའི་བྲེ་ཕུལ་གྱི་སྟེང་དུ་གསེར་གྱི་ཀ་རགས་བཞིའི་ཕྱི་ངོས་སུ་ཆུ་སྲིན་གྱི་ཁ་ནས་བྱུང་བའི་དྲྭ་བ་དང་དྲྭ་བ་ཕྱེད་པ་དང་དྲིལ་བུ་དང་། ཟླ་བ་རླུང་གིས་བསྐྱོད་པ་དང་། མེ་ཏོག་གི་ཕྲེང་བ་དང་། རྔ་ཡབ་ནོར་བུའི་ཡུ་བ་ཅན་འཕྱང་བ། དེའི་སྟེང་དུ་བྱ་འདབ་ལས་ཐུར་དུ་འཕྱང་བའི་མདའ་ཡབ་དང་། སྟེང་དུ་ལངས་པའི་རིན་པོ་ཆེའི་དྲ་མིག་སེང་མའི་པུ་ཤུད་བསྐོར་བ། རྩིག་པའི་ཕྱི་རོལ་དུ་འདོད་ཡོན་གྱི་སྣམ་བུ་དམར་པོ་ལ་གནས་པའི་མཆོད་པའི་ལྷ་མོ་བཅུ་དྲུག་གིས་མཆོད་པ་བྱེད་པ། སྒོ་དང་སྒོ་ཁྱུད་ཀྱི་མཚམས་དང་གྲྭ་བཞིར་ཟླ་བ་ཕྱེད་པ་ལ་གནས་པའི་རྡོ་རྗེས་མཚན་པ། ནང་ཀ་བ་བརྒྱད་དང་ལྡན་པའི་སྟེང་དུ་རྡོ་རྗེའི་གདུང་ཟླུམ་པོ་དང་། དེའི་སྟེང་དུ་རྩིག་པ་ཟླུམ་པོ་ཕ་གུ་དྲྭ་བ་དྲྭ་ཕྱེད་མདའ་ཡབ་པུ་ཤུ་དང་བཅས་པའི་སྟེང་དུ་རྡོ་རྗེའི་གདུང་བཞིས་མིག་མང་རིས་སུ་བྲེས་པའི་དབུས་སུ་གཙང་ཁང་གྲུ་བཞི་པའི་རྣམ་པ་ཅན་ཕ་གུ་སོགས་དང་བཅས་ཤིང་སྟེང་ཐོག་ལེགས་པར་ཕུབ་པའི་རྩེ་མོ་རྡོ་རྗེ་ཕྱེད་པ་དང་ནོར་བུ་རིན་པོ་ཆེའི་ཏོག་གིས་སྤྲས་པ། སྒོ་བཞིའི་སྟེང་གི་ཐད་སོར་ཀ་བ་བཞི་བཞིས་བཏེགས་པའི་རྟ་བབས་བང་རིམ་བཞི་དང་ལྡན་པའི་རྩེ་མོར་པདྨ་ལ་གནས་པའི་ཆོས་ཀྱི་འཁོར་ལོ་དང་། གདུགས་དང་། གཡས་གཡོན་དུ་རི་དྭགས་ཕོ་མོ་དང་བཅས་ཤིང་སྣམ་བུ་སོ་སོ་ལ་རྒྱལ་མཚན་དང་། བ་དན་ལ་སོགས་པའི་རྒྱན་ཐམས་ཅད་ཀྱིས་བརྒྱན་པའི་གཞལ་ཡས་ཁང་གི་ལྷ་སྣམ་ཤར་དཀར། ལྷོ་སེར་། ནུབ་དམར། བྱང་ལྗང་། དབུས་ཀྱང་དཀར་བའི་སྟེང་དུ་སྣ་ཚོགས་པདྨ་འདབ་མ་བརྒྱད་པའི་ལྟེ་བར་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་དཀར་པོ་ཡོངས་སུ་གྱུར་པ་ལས་བཅོམ་ལྡན་འདས་མ་གཟའ་ཐམས་ཅད་ཀྱི་ཡུམ་སོགས་ནས་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའོ། །ༀ་སརྦ་བི་དྱཻ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་པས་རང་འདྲའི་ཡེ་ཤེས་པ་སྤྱན་དྲངས་ནས། ཛཿཧཱུྃ་བྂ་ཧོས་བསྟིམ། ཚུལ་འདི་འོག་མ་ཀུན་ལ་འགྲེ་ཤེས་པར་བྱས་ལ། དེའི་མདུན་དུ་ༀ་ལས་བྱུང་བའི་གཟའ་ཉི་མ་ལུས་སིན་དྷུ་རའི་ཕུང་པོ་ལྟར་ཤིན་ཏུ་དམར་བ་ལག་པ་གཉིས་ན་པདྨའི་སྡོང་བུ་འཛིན་པ་དང་བཅས་པས་བཅོམ་ལྡན་འདས་མ་ཐལ་མོ་སྦྱར་ཏེ་བཀའ་ནོད་པའི་ཚུལ་དུ་གནས་པ། ཞི་བའི་བཞིན་ཅན་ཤིན་ཏུ་མཛེས་པ་ལོ་སུམ་ཅུ་ལོན་པའི་ཆ་ལུགས་ཅན། རྟས་དྲངས་པའི་ཤིང་རྟའི་སྟེང་ན་གནས་པ། ཉི་མའི་དཀྱིལ་འཁོར་གྱི་དབུས་ན་བཞུགས་པ། ༀ་མེ་གྷོ་ལྐཱ་ཡ་སྭཱ་ཧཱ། ཛཿཧཱུྃ་བྂ་ཧོཿ འདབ་མ་བརྒྱད་ལ། ཤར་དུ་ༀ་ལས་བྱུང་བའི་གཟའ་ཟླ་བ་གངས་རིའི་ཕུང་པོ་ལྟར་དཀར་བ། ལག་པ་གཉིས་ན་ཀུ་མུ་ཏའི་སྡོང་བུ་འཛིན་པ། ཆགས་པའི་ཉམས་ཅན་ཤིན་ཏུ་མཛེས་པ་ལོ་བཅུ་དྲུག་ལོན་པའི་ཆ་ལུགས་ཅན། ངང་བས་དྲངས་པའི་ཤིང་རྟའི་སྟེང་ན་གནས་པ། ཟླ་བའི་དཀྱིལ་འཁོར་གྱི་དབུས་ན་བཞུགས་པ། ༀ་ཤི་ཏཱྂ་ཤ་བྷེ་སྭཱ་ཧཱ། ཛཿཧཱུྃ་བྂ་ཧོཿ མེའི་མཚམས་སུ་རྂ་ལས་བྱུང་བའི་མིག་དམར་རྒྱ་སྐྱེག་ལྟར་དམར་བ་ལག་པ་གཡས་ན་གྲི་གུག གཡོན་ན་མི་མགོ་རློན་པ་འཛིན་པ། མིག་དམར་ཞིང་མི་འཛུམ་པ། ལུས་ཐུང་བ་ལོ་ཉི་ཤུ་རྩ་གཉིས་ལོན་པའི་ཆ་བྱད་ཅན་ར་སྐྱེས་ལ་ཞོན་པ། ༀ་རཀྵ་ཨཾ་ག་ཀུ་མ་ར་ཡ་སྭཱ་ཧཱ། ཛཿཧཱུྃ་བྂ་ཧོཿ ལྷོར་བྷེ་ལས་བྱུང་བའི་གཟའ་ལྷག་པ་མརྒ་ཏ་ལྟར་ལྗང་གུ་ལག་པ་གཉིས་ནས་མདའ་གཞུ་འཛིན་པ། ཞི་བའི་བཞིན་ཅན་ཤིན་ཏུ་མཛེས་པ་ལོ་སུམ་ཅུ་རྩ་བཞི་ལོན་པའི་ཆ་བྱད་ཅན་དར་སྣ་ཚོགས་ཀྱི་ན་བཟའ་ཅན། པདྨའི་སྟེང་ན་བཞུགས་པ། ༀ་བུདྡྷ་ཡ་སྭཱ་ཧཱ། ཛཿཧཱུྃ་བྂ་ཧོཿ བདེན་བྲལ་དུ་བྲྀ་ལས་བྱུང་བའི་ཕུར་བུ་གསེར་ལྟར་སེར་བ། ལག་པ་གཉིས་ན་ཕྲེང་བ་དང་སྤྱི་བླུགས་འཛིན་པ། ཐུགས་རྗེ་ཅན་ལ་བཅུ་དྲུག་ལོན་པའི་ཆ་བྱད་ཅན་གླང་པོ་ཆེའི་སྟེང་ན་གནས་པ། ༀ་པྲྀ་ཏ་སྤ་ཏ་ཡེ་སྭཱ་ཧཱ། ཛཿཧཱུྃ་བྂ་ཧོཿ ནུབ་ཏུ་ༀ་ལས་པ་ཝ་སངས་ཤེལ་ལྟར་དཀར་བ་ལག་པ་གཉིས་ན་ཕྲེང་བ་དང་སྤྱི་བླུགས་འཛིན་པ། ཤ་རྒྱས་པ་བཞད་ཅིང་འཛུམ་བའི་བཞིན་ཅན་ལོ་ལྔ་བཅུ་རྩ་ལྔ་ལོན་པའི་ཆ་བྱད་ཅན་པདྨའི་སྟེང་ན་བཞུགས་པ། ༀ་ཨ་སུ་རོདྟ་མཱ་ཡ་སྭཱ་ཧཱ། ཛཿཧཱུྃ་བྂ་ཧོཿ རླུང་དུ་ཤཾ་ལས་བྱུང་བའི་སྤེན་པ་མིག་སྨན་ལྟར་གནག་པ། ལག་པ་གཉིས་ན་ཕྲེང་བ་དང་དབྱུ་གུ་འཛིན་པ་སྐྲ་ཟད་པ་རྐང་པ་འཐེང་ཞིང་འཇིགས་པ། ཁྱིའི་པགས་པའི་སྨད་གཡོགས་ཅན། ལོ་ལྔ་བཅུ་ལོན་པའི་ཆ་ལུགས་འཛིན་པ་སྦྲུལ་ལ་ཞོན་པ། ༀ་ཀྲྀཥྞ་ཝརྞ་ཡ་སྭཱ་ཧཱ། ཛཿཧཱུྃ་བྂ་ཧོཿ བྱང་དུ་རྂ་ལས་བྱུང་བའི་སྒྲ་གཅན་དམར་ནག་ལྟེ་བ་མན་ཆད་གནག་པ། ལག་པ་གཉིས་ན་ཉི་ཟླ་འཛིན་པ། སྤྲིན་ཁ་དོག་ལྔའི་སྟེང་ན་གནས་པ། ༀ་ཨ་མྲྀ་ཏ་པྲི་སཱ་ཡ་སྭཱ་ཧཱ། ཛཿཧཱུྃ་བྂ་ཧོཿ དབང་ལྡན་དུ་ཀྂ་ལས་བྱུང་བའི་མཇུག་རིང་ལྷོ་དུད་སྤྲིན་གྱི་མདོག་ཅན་ལག་ན་སྦྲུལ་ཞགས་དང་རལ་གྲི་འཛིན་པ། རིད་ཅིང་འཇིགས་པ་སྐྲ་སྟེང་དུ་བརྫེས་པ། བྲག་གི་སྟེང་ན་བཞུགས་པ། ༀ་ཛྱོ་ཏི་དེ་ཧ་བེ་སྭཱ་ཧཱ། ཛཿཧཱུྃ་བྂ་ཧོཿ སྒོ་བཞིར་པདྨ་དང་ཟླ་བའི་གདན་རེ་རེའི་སྟེང་དུ་ཤར་སྒོར་རྗེ་བཙུན་སངས་རྒྱས་བཅོམ་ལྡན་འདས་སྐུ་མདོག་སེར་པོ་ཕྱག་གཉིས་ཆོས་འཆད་ཀྱི་ཕྱག་རྒྱ་ཅན། སྤྲུལ་སྐུ་རབ་ཏུ་བྱུང་བའི་ཆ་ལུགས་ཅན་རྡོ་རྗེའི་སྐྱིལ་ཀྲུང་གིས་བཞུགས་པའོ། །ༀ་བུདྡྷ་ཡ་སྭཱ་ཧཱ། ཛཿཧཱུྃ་བྂ་ཧོཿ ལྷོ་སྒོར་ཕྱག་ན་རྡོ་རྗེ་སྔོན་པོ་གཡས་རྡོ་རྗེ་ཐུགས་ཀར་དང་། གཡོན་དྲིལ་བུ་དཀུར་བརྟེན་པ། རིན་པོ་ཆེའི་རྒྱན་དང་དར་གྱི་ན་བཟའ་ཅན། སེམས་དཔའི་སྐྱིལ་ཀྲུང་གིས་བཞུགས་པ། ༀ་བཛྲ་དྷ་ར་ཡ་སྭཱ་ཧཱ། ཛཿཧཱུྃ་བྂ་ཧོཿ ནུབ་སྒོར་འཇིག་རྟེན་དབང་ཕྱུག་དཀར་པོ་གཡས་མཆོག་སྦྱིན་དང་གཡོན་པདྨ་དཀར་པོ་བསྣམས་པ། རིན་པོ་ཆེའི་རྒྱན་དང་དར་གྱི་ན་བཟའ་ཅན། སེམས་དཔའི་སྐྱིལ་ཀྲུང་གིས་བཞུགས་པ། ༀ་པདྨ་དྷ་རཱ་ཡ་སྭཱ་ཧཱ། ཛཿཧཱུྃ་བྂ་ཧོཿ བྱང་སྒོར་འཇམ་པའི་དབྱངས་གུར་གུམ་གྱི་མདོག་ཅན་རལ་གྲི་དང་པུ་སྟི་འཛིན་པ། རིན་པོ་ཆེའི་རྒྱན་དང་དར་གྱི་ན་བཟའ་ཅན། སེམས་དཔའི་སྐྱིལ་ཀྲུང་གིས་བཞུགས་པ། ༀ་ཀུ་མ་རཱ་ཡ་སྭཱ་ཧཱ། ཛཿཧཱུྃ་བྂ་ཧོཿ དཀྱིལ་ཁོར་གྱི་ཕྱི་རོལ་གྱི་ཕྱོགས་བཞིར་རིན་པོ་ཆེའི་ཁྲི་རེ་རེའི་སྟེང་དུ་ཤར་དུ་ཡུལ་འཁོར་སྲུང་ལྗང་གུ་པི་ཝང་འཛིན་པ། ལྷ་ཡི་གོས་དང་གོ་ཆས་བརྗིད་པ། ༀ་བྷི་ཏ་རཱཥཌཱ྅྅྅་ཡ་སྭཱ་ཧཱ། ལྷོར་འཕགས་སྐྱེས་པོ་སྔོན་པོ་རལ་གྲི་འཛིན་པ། ལྷའི་གོས་དང་གོ་ཆས་བརྗིད་པ། ༀ་བི་རུ་ཊ་ཀཱ་ཡ་སྭཱ་ཧཱ། ཛཿཧཱུྃ་བྂ་ཧོཿ ནུབ་ཏུ་མིག་མི་བཟང་དམར་པོ་སྦྲུལ་ཞགས་འཛིན་པ། ལྷའི་གོས་དང་གོ་ཆས་བརྗིད་པ། ༀ་བི་རུ་པཀྵ་ཡ་སྭཱ་ཧཱ། ཛཿཧཱུྃ་བྂ་ཧོཿ བྱང་དུ་རྣམ་ཐོས་སྲས་སེར་པོ་རིན་པོ་ཆེས་མཚན་པའི་བེ་ཅོན་དང་ནེའུ་ལེ་འཛིན་པ། ལྷའི་གོས་དང་གོ་ཆས་བརྗིད་པ། ༀ་ཀུ་བ་ར་ཡ་སྭཱ་ཧཱ། ཛཿཧཱུྃ་བྂ་ཧོཿ བྱང་ཤར་དུ་གཟའ་རྣམས་རང་རང་གི་ཆ་ལུགས་ཀྱི་འཁོད་པར་གྱུར། ༀ་སརྦ་གྲ་ཧཱ་ནཱ་མ་སྭཱ་ཧཱ། ཛཿཧཱུྃ་བྂ་ཧོཿ ཤར་ལྷོར་ཁྱིམ་བཅུ་གཉིས་དང་རྒྱུ་སྐར་རྣམས་འཁོད་པར་གྱུར། ༀ་སརྦ་དྭི་ད་ཤ་ར་ཤི་ནཱཾ་སྭཱ་ཧཱ། ཛཿཧཱུྃ་བྂ་ཧོཿ ༀ་སརྦ་ནཀྵ་ཏྲཱ་ནཱ་མ་སྭཱ་ཧཱ། ཛཿཧཱུྃ་བྂ་ཧོཿ ལྷོ་ནུབ་ཏུ་གནོད་པའི་ཚོགས་རྣམས་འཁོད་པར་གྱུར། ༀ་སརྦ་ཨུ་པ་ཏྲ་བེ་བྷྱཿསྭཱ་ཧཱ། ཛཿཧཱུྃ་བྂ་ཧོཿ ནུབ་བྱང་དུ་ཡང་རྗེ་བཙུན་མ་རིག་པ་ཆེན་མོ་ཉིད་བཞུགས་པར་གྱུར། ༀ་སརྦ་བིདྱཻ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཛཿཧཱུྃ་བྂ་ཧོཿ ཞེས་རེ་རེ་ནས་བསྐྱེད་བསྟིམ་བྱ། འཇམ་མགོན་ས་པཎ་གྱི་མཆོད་ཆོག་ཏུ་རྗེ་བཙུན་མ་ནུབ་བྱང་དང་དབུས་གང་རུང་དུ་བསྐྱེད་པ་ལྟ་བུ་ལས་གནས་གཉིས་ཀར་བསྐྱེད་པ་མི་གསལ་ཡང་། ལྷན་ཐབས་སུ་འདི་བཞིན་ཡོད་པ་དགོས་པ་ཆེ་བ་ཞིག་ཡོད་སྲིད་སྙམས་ནས་བཀོད་པ་ཡིན་ལ། བྱང་ཤར་གྱི་གཟའ་རྣམས་ནི་ཉི་མ་སོགས་གཟའ་ཆེན་རང་རྒྱུད་པ་བརྒྱད་དང་གཟའ་ཕྲན་གྱི་རིགས་རྣམས་ཡིན་པར་ངེས་ཏེ། དབུས་ཀྱི་གཟའ་ཆེན་རྣམས་སྤྲུལ་པ་ཡིན་པར་གཙོ་མོའི་བསྟོད་པའི་ཚིག་གི་ནུས་པས་ཤེས། དེ་ན་འདུལ་བྱ་འདུལ་བྱེད་ཀྱི་གོ་བས་ཆ་ལུགས་ཀྱང་དབུས་མ་རྣམས་དང་མཐུན་པས་བསམ་པར་ཆོག །ཁྱིམ་བཅུ་གཉིས་ནི་ལུག་གླང་སོགས་རང་རང་གི་གཟུགས་བརྙན་ཅན་དུ་བསམ། རྒྱུ་སྐར་ཉེར་བརྒྱད་ཀྱི་མངོན་རྟོགས་གཞན་ནས་འབྱུང་བ་ལྟར་ཡིན་ཀྱང་། སྐབས་འདིར་ཁ་དོག་སྣ་ཚོགས་པ། ལྷ་མོའི་བརྒྱན་དང་གོས་ཅན། ཐལ་མོ་སྦྱར་བ་སྟན་ནང་ཚང་ཅན་ལ་འཁོད་པར་མོས་པས་འཐུས། གནོད་པ་རྣམས་ནི་ལྷའི་གདོན་སོགས་གདུགས་དཀར་ནས་བཤད་པ་རྣམས་ཡིན་པས་ཆ་ལུགས་མ་ངེས་པར་བསམ་པས་ཆོག་གོ །དེ་ནས། རང་གི་སྙིང་གའི་ཧཱུྃ་ལས་དཀྱིལ་འཁོར་གྱི་ལྷ་ཚོགས་སྤྲོས། སོ་སོ་ལ་ཐིམ་པར་གྱུར། ཛཿཧཱུྃ་བྂ་ཧོཿ རྒྱས་པར་སྤྲོ་ན་གོང་ལྷར་སོ་སོའི་སྔགས་ཀྱིས་བསྟིམ། དེ་ཐམས་ཅད་ཀྱི་དཔྲལ་བ ར་ༀ། མགྲིན་པར་ཨཱ༔ ཐུགས་ཀར་ཧཱུྃ། རང་གི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་རང་བཞིན་གྱིས་གནས་ནས་གཟའ་ཡུམ་གྱི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའི་ཚོགས་དཔག་ཏུ་མེད་པས་བསྐོར་བ་ༀ་བཛྲ་ས་མཱ་ཛཿ ཛཿཧཱུྃ་བྂ་ཧོཿ སླར་ཡང་ཐུགས་ཀའི་ཧཱུྃ་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་ༀ་བཛྲ་ས་མཱ་ཛཿ དེ་བཞིན་གཤེགས་པ་ཐམས་ཅད་ཀྱི་འདི་ལ་མངོན་པར་དབང་བསྐུར་བ་སྩལ་དུ་གསོལ། དེ་བཞིན་གཤེགས་པ་རྣམས་ཀྱིས་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས་གཙོ་མོ་ལ་རྣམ་པར་སྣང་མཛད། འཁོར་རྣམས་ལ་རྡོ་རྗེ་སེམས་དཔས་དབུར་བརྒྱན་པར་བསམ། གནས་གསུམ་བྱིན་བརླབས་མན་ཆད་མཆོད་ཆོག་ཏུ་མི་འབྱུང་མོད་ལྷན་ཐབས་སུ་ཡོད་པས་བཀོད་པའོ། །མཆོད་པ་གོང་དུ་བྱིན་གྱིས་བརླབས་ཟིན་པས། ཐལ་མོ་སྦྱར་ཏེ། རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཇི་སྙེད་ཡོད་པ་དང་། །བདག་གི་གུས་པས་བཤམ་པ་འདི། །ཇི་སྙེད་རྒྱལ་ཡུམ་སྲས་དང་བཅས། །དེ་སྙེད་རྣམས་ལ་བདག་འབུལ་ན། །ཐུགས་རྗེ་མངའ་བ་ཁྱེད་རྣམས་ཀྱིས། །ཅི་བདེ་བར་ནི་བཞེས་ནས་ཀྱང་། །སེམས་ཅན་དོན་ཀུན་མཛད་དུ་གསོལ། །ༀ་བྷ་ག་ཝ་ཏཱི་སརྦ་བིདྱཻ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་པུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དང་སོགས། ཞབས་བསིལ་ནས་རོལ་མོའི་བར་དུ་འདོན་པ་བསྒྱུར་ལ་དབུལ། དེ་བཞིན་དུ་རབ་འབྱམས་རྒྱ་མཚོ་དཔག་མེད་ན། ཅོད་པན་ཇི་སྙེད་སོགས་དང་། ༀ་བྷ་ག་ཝ་ཏྭི་སརྦ་བི་དྱཻ་ས་པཱ་རི་ཝཱ་ར་པ་ཊ་པཱུ་ཛ་མེ་གྷ་སོགས་ཀྱིས་སོ་སོའི་སྐུ་མདོག་མཐུན་པའི་དར་གྱི་ཅོད་པན་རེ་དང་། བ་དན་སྙེད། པ་ཏྂ་ཀ །གོས་བཟང་ཇི་སྙེད། ཝ་སྟྲ་ཞེས་པ་དག་ཀྱང་བསྒྱུར་ལ་སོ་སོའི་སྐུ་མདོག་དང་མཐུན་པ་རེ་ཕུལ་བར་བསམ་མོ། །བསྟོད་པ་ནི། རྡོ་རྗེ་དྲིལ་བུ་འཛིན་པས། བཅོམ་ལྡན་འདས་མ་གཟའ་རྣམས་ཀུན། །གདུལ་ཕྱིར་རྒྱལ་བ་གཟའ་རྣམས་ཀྱི། །ཚུལ་དུ་བསྐྱེད་མཛད་ཐུགས་རྗེ་ཅན། །ཡུམ་ཆེན་ཁྱོད་ལ་ཕྱག་འཚལ་ལོ། །ཡང་དག་སངས་རྒྱས་བསྟན་པ་ལ། །མ་ལུས་གཟའ་རྣམས་ལེགས་འགོད་ཕྱིར། །དེ་དག་ཐུགས་ཀྱི་སྲས་སུ་ནི། །བསྐྲུན་མཛད་ཁྱོད་ལ་ཕྱག་འཚལ་ལོ། །སྤྲོས་མེད་ནམ་མཁའི་རང་བཞིན་དུ། །པད་ཉི་སྲུང་བའི་འཁོར་ལོའི་དབུས། །རིན་ཆེན་ལས་གྲུབ་བདེ་གཤེགས་གནས། །གཞལ་མེད་ཁང་ལ་ཕྱག་འཚལ་ལོ། །དེ་དབུས་སྣ་ཚོགས་པདྨ་ཡི། །ལྟེ་བར་ཟླ་བའི་སྟེང་དུ་ཧཱུྃ། །ཡོངས་སུ་གྱུར་ལས་འཁྲུངས་པའི་སྐུ། །ཡུམ་ཆེན་ཁྱོད་ལ་ཕྱག་འཚལ་ལོ། །སྟོན་ཟླའི་མདོག་ཅན་ཞལ་གསུམ་པ། །གཡས་ཞལ་གནག་ཅིང་གཡོན་ཞལ་དམར། །སྤྱན་གསུམ་ཅུང་ཟད་འཛུམ་པ་ཅན། །ཡུམ་ཆེན༴ ཕྱག་དྲུག་དང་པོ་གཉིས་ཀྱིས་ནི། །ཆོས་འཆད་གཡས་ན་རྡོ་རྗེ་མདའ། །གཡོན་ན་པདྨ་གཞུ་འཛིན་པའི། །ཡུམ་ཆེན༴ དབུ་སྐྲ་ཐོར་ཚུགས་ལྷག་མ་གྲོལ། །ཞབས་གཉིས་རྡོ་རྗེའི་སྐྱིལ་ཀྲུང་མཛད། །འདོམ་གང་འོད་ཀྱིས་རབ་མཛེས་མ། །ཡུམ་ཆེན༴ །མཚན་དང་དཔེ་བྱད་ནོར་བུས་བརྒྱན། །སྣ་ཚོགས་དར་གྱི་ལྷབ་ལྷུབ་ཅན། །རྣམ་སྣང་མཛད་ཀྱིས་དབུ་བརྒྱན་པ། །ཡུམ་ཆེན༴ དངོས་དང་ཡིད་ཀྱིས་རྣམ་སྤྲུལ་པའི། །ཀུན་ཏུ་བཟང་པོའི་མཆོད་སྤྲིན་གྱིས། །བཅོམ་ལྡན་གཟའ་ཡུམ་ཁྱེད་མཆོད་ཀྱིས། །བདག་ལ་གཟའ་རྣམས་དགྱེས་པར་མཛོད། །ཅེས་གཙོ་མོའི་བསྟོད་པ་འདི་ས་པཎ་གྱིས་མཛད་ཅེས་ལྷན་ཐབས་ལས་འབྱུང་ངོ་། །འཁོར་རྣམས་ལ། ལི་ཁྲིའི་མདོག་མཚུངས་རབ་མཛེས་ཤིང་། །ཤིང་རྟའི་སྟེང་ན་ཉི་དཀྱིལ་བཞུགས། །པདྨ་དམར་པོའི་སྡོང་བུ་འཛིན། །གཟི་བརྗིད་མཐའ་ཡས་ལ་ཕྱག་འཚལ། །ཀུནྡྷ་ལྟར་དཀར་ཟླ་བ་ནི། །བསིལ་ཟེར་བྱེད་པའི་དབུས་ན་བཞུགས། །ཀུ་མུ་ཏ་ཡི་སྡོང་བུ་འཛིན། །ཞི་མཛད་དེ་ལ་ཕྱག་འཚལ་ལོ། །མིག་དམར་པདྨ་རཱ་གའི་མདོག །ར་སྐྱེས་ཞོན་ཞིང་ཁྲོ་ཚུལ་ཅན། །གྲི་གུག་དང་ནི་མི་མགོ་འཛིན། །མཐུ་ཆེན་དེ་ལ༴ གཟའ་ལྷག་མ་རྒད་ལྟར་ལྗང་ཞིང་། །པདྨ་ལ་གནས་ཞི་བའི་སྐུ། །མཛེས་ཤིང་རབ་སྒེག་མདའ་གཞུ་འཛིན། །བདེ་མཛད་དེ་ལ༴ དྲང་སྲོང་ཕུར་བུ་གསེར་མདོག་ཅན། །གླང་ཆེན་སྟེང་ན་རོལ་པས་བཞུགས། །བགྲང་ཕྲེང་རིལ་བ་སྤྱི་བླུགས་འཛིན། །ཐུགས་རྗེ་ཅན་ལ༴ པ་སངས་གངས་རིའི་མདོག་མཚུངས་པ། །པདྨ་ལ་གནས་བཞད་པའི་ཞལ། །ཤེལ་ཕྲེང་དང་ནི་རིལ་བ་འཛིན། །ཕན་མཛད་དེ་ལ༴ སྤེན་པ་མིག་སྨན་ལྟར་གནག་ཅིང་། །ལྟོ་འཕྱེ་ལ་ཞོན་འཇིགས་པའི་གཟུགས། །ཕྲེང་བ་དང་ནི་དབྱུ་གུ་འཛིན། །མཐུ་ཆེན་དེ་ལ༴ ལྷ་མིན་དབང་པོ་སྒྲ་གཅན་ནི། །སྐུ་མདོག་དམར་ནག་འཇིགས་ཆེན་པོ། །ཕྱག་གཉིས་ཉི་མ་ཟླ་བ་འཛིན། །སྟོབས་ཆེན་དེ་ལ༴ །ཏོག་ནི་བྲག་རིའི་སྟེང་ན་བཞུགས། །ཁ་དོག་སྐྱ་སངས་དྲག་པོའི་གཟུགས། །རལ་གྲི་དང་ནི་སྦྲུལ་ཞགས་འཛིན། །གཏུམ་ཆེན་དེ་ལ༴ མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པ་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང་། །དེ་བཞིན་གཤེགས་ལ་ཕྱག་འཚལ་ལོ། །སྟོབས་པོ་ཆེ་ལ་དྲག་ཤུལ་ཆེ། །རིག་སྔགས་རྒྱལ་པོ་དགེ་བ་པོ། །གདུལ་དཀའ་མ་ལུས་འདུལ་མཛད་པའི། །རྡོ་རྗེ་བསྣམས་ལ། སྐྱོན་གྱིས་མ་གོས་སྐུ་མདོག་དཀར། །རྫོགས་སངས་རྒྱས་ཀྱི་དབུ་ལ་བརྒྱན། །ཐུགས་རྗེའི་སྤྱན་གྱིས་འགྲོ་ལ་གཟིགས། །སྤྱན་རས་གཟིགས་ལ༴ །གཞོན་ནུའི་སྐུ་ལུས་འཆང་པ་པོ། །ཡེ་ཤེས་སྒྲོན་མེ་རབ་ཏུ་གསལ། །འཇིག་རྟེན་གསུམ་གྱི་མུན་སེལ་བ། །འཇམ་པའི་དབྱངས་ལ༴ རྒྱལ་བའི་བསྟན་པ་ལེགས་སྲུང་བའི། །ཡུལ་འཁོར་སྲུང་དང་འཕགས་སྐྱེས་པོ། །མིག་མི་བཟང་དང་རྣམ་ཐོས་སྲས། །འཁོར་དང་བཅས་ལ༴ །སྔོན་གྱི་ལེགས་སྤྱོད་ལས་གྲུབ་ཅིང་། ། མཐུ་དང་རྫུ་འཕྲུལ་མཐའ་ཡས་པ། །རང་རང་ཕྱོགས་དང་དུས་སྐྱོང་པའི། །རྒྱུ་སྐར་རྣམས་ལ་ཕྱག་འཚལ་ལོ། །བསྟོད་པར་འོས་པ་ཐམས་ཅད་ལ། །སོགས་ཀྱིས་བསྟོད། འཁོར་གྱི་བསྟོད་པ་ཕལ་ཆེར་གྲྭ་ལྔའི་དཀྱིལ་ཆོག་ལས་བཏུས་པའོ། །གཏོར་མ་རྣམས་ཆབ་གྱིས་བྲན། བསངས་སྦྱངས། རྡོ་རྗེ་བསྟམས་པའི་རྒྱ་འདེགས་པའི་ཚུལ་དང་བཅས། །ༀ་ཨཱ་ཀ་རོ་སོགས་ལན་གསུམ་གྱིས་བདུད་རྩིའི་རྒྱ་མཚོ་ཆེན་པོར་བསམ། ནམ་མཁའ་མཛོད་ཀྱི་ཕྱག་རྒྱ་དང་བཅས། ༀ་སརྦ་བིདྱཻ་སརྦ་བུདྡྷ་བོ་དྷི་ས་ཏྭཱ་ནཱཾ། སརྦ་གྲ་ཧ། ནཀྵ་ཏྲ། སརྦ་བྷུ་ཏི་བྷྱཿ ཨི་དཾ་བ་ལིཾགྲྀ་ཧྞ་ས་མ་ཡ་ཧཱུྃ་ཧཱུྃ་ཕཊ། ཅེས་ལན་གསུམ་གྱིས་གཙོ་འཁོར་ཐམས་ཅད་ལ་དབུལ། ༀ་བྷ་ག་ཝ་ཏཱི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ་ནས་ཤབྡ་པྲ་ཏིཙྪ་སྭཱ་ཧཱའི་བར་གྱིས་མཆོད། བཅོམ་ལྡན་འདས་མ་གཟའ་རྣམས་ཀུན། །འདུལ་ཕྱིར་རྒྱལ་བ་གཟའ་རྣམས་ཀྱི། །ཚུལ་དུ་བསྐྱེད་མཛད་ཐུགས་རྗེ་ཅན། །ཡུམ་ཆེན་ཁྱོད་ལ་ཕྱག་འཚལ་ལོ། །བསྟོད་པར་འོས་པ་སོགས་ཀྱིས་བསྟོད། བཅོམ་ལྡན་འདས་མ་འཁོར་དང་བཅས་པས་བདག་དང་སེམས་ཅན་ཐམས་ཅད་གཟའ་དང་རྒྱུ་སྐར་དང་། གདོན་དང་འབྱུང་པོའི་གནོད་པ་ཐམས་ཅད་ལས་སྲུང་བ་དང་ཞི་བར་མཛད་དུ་གསོལ། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་མ་ལུས་པ་སྩལ་དུ་གསོལ། ཞེས་འདོད་དོན་གསོལ། ཆ་གསུམ་གཏོར་མ་སྤྱི་ལྟར་ལ་ཕྱོགས་འབྱུང་གཉིས་ཀྱི་མགོར་འབྲུ་གསུམ་ལན་གསུམ་རེ་བརྗོད་པས་བྱིན་གྱིས་བརླབས། བདེན་བ་དར་གྱི་སྔོན་དུ་ཨ་མྲྀ་ཏ་བཟླ་གཞན་པ་འདྲའོ། །སྙན་གསན་དབབ་པ་ནི། སྤོས་དང་བཅས་པའི་རྡོར་དྲིལ་འཛིན་པས། བཅོམ་ལྡན་འདས་མ་གཟའ་རྣམས་ཡུམ། །རིག་པའི་རྒྱལ་མོར་ཕྱག་འཚལ་བསྟོད། དཀྱིལ་འཁོར་ཐུགས་རྗེའི་བདག་ཉིད་ཅན། །མགོན་པོ་བདག་ནི་འདྲི་བར་འཚལ། །སློབ་མ་རྣམས་ལ་བརྩེ་བ་དང་། །ཁྱེད་ལ་མཆོད་པ་བྱ་བའི་ཕྱིར། །བཅོམ་ལྡན་བདག་ནི་གུས་པ་ལ། །དེ་བས་བཀའ་དྲིན་མཛད་པར་འོས། །འགྲོ་བ་འཁོར་ལོའི་དོན་མཛད་པའི། །སངས་རྒྱས་བདག་ལ་དགོངས་སུ་གསོལ། །འབྲས་གནས་བྱང་ཆུབ་སེམས་དཔའ་དང་། །སྔགས་ཀྱི་ལྷ་གཞན་གང་ལགས་དང་། །འཇིག་རྟེན་སྐྱོང་བའི་ལྷ་རྣམས་དང་། །གང་ཡང་འབྱུང་པོ་མཐུ་ཆེན་དང་། །གང་སུ་རྡོ་རྗེའི་སྤྱན་ལྡན་རྣམས། །བདག་ལ་དགོངས་པར་མཛད་དུ་གསོལ། །རིག་པ་འཛིན་པ་བདག་གིས་ནི། །རིག་པ་ཆེན་མོའི་དཀྱིལ་འཁོར་འདི། །འགྲོ་བ་དག་ཕྱིར་བདག་འབྲི་བས། །བདག་དང་སློབ་མར་བཅས་པ་ལ། །ཐུགས་རྗེས་ཐུགས་དཔག་མཛད་ནས་ཀྱང་། །དཀྱིལ་འཁོར་པར་བཅས་ཐམས་ཅད་ཀྱིས། །ཐུགས་རྗེས་དགོངས་ཏེ་གནང་བར་མཛོད། ཅེས་ལན་གསུམ་གྱིས་སྙན་གས ན་ཕབ་པའི་མཐར། རིག་པ་འཛིན་པ་ཁྱོད་གཞན་དོན་རྒྱ་ཆེ་བར་གྱིས་ཤིག །ཅེས་གནང་བ་བྱིན་པར་བསམ་མོ། །བུམ་པ་སྟ་གོན་ནི་རྣམ་རྒྱལ་བུམ་པའི་སྟེང་དུ་མཆོད་ཡོན་གཟུངས་རྡོར་བཅས་བཞག་ལ། བསང་སྦྱང་། སྟོང་པའི་ངང་ལས་པྂ་ལས་པདྨ་དང་། ཨ་ལས་ཟླ་བའི་གདན་གཉིས་ཀྱི་སྟེང་དུ་བྷྲཱུྂ་ལས་རིན་པོ་ཆེའི་བུམ་པ་གཉིས་ཡངས་ཤིང་རྒྱ་ཆེ་བ་ལྟོ་བ་ལྡིར་བ། ཞབས་ཞུམ་པ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། ལྷ་རྫས་ཀྱི་གོས་ཀྱིས་མགུལ་པ་བཅིངས་པ། དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་བཅུད་སྣ་ཚོགས་ཀྱིས་ཡོངས་སུ་གང་བའི་རྣམ་རྒྱལ་བུམ་པར་སྣ་ཚོགས་པདྨ་འདབ་མ་བརྒྱད་པའི་ལྟེ་བར་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་དཀར་པོ་ཡོངས་སུ་གྱུར་པ་སོགས་ནས་སོ་སོ་ལ་ཐིམ་པར་གྱུར། ཛཿཧཱུྃ་བྂ་ཧོཿ ཞེས་པའི་བར་གོང་བཞིན་ལ། སྒོ་ཞེས་པའི་ཚིག་རྣམས་དོར་ལ། ཕྱོགས་བཞིར་པདྨ་དང་ཟླ་བའི་གདན་རེ་རེའི་སྟེང་དུ་ཤར་དུ་རྗེ་བཙུན་སངས་རྒྱས་བཅོམ་ལྡན་འདས་སོགས་དང་། ལྷོར་ཕྱག་ན་རྡོ་རྗེ་སོགས། ནུབ་ཏུ་འཇིག་རྟེན་དབང་ཕྱུག་སོགས། བྱང་དུ་འཇམ་པའི་དབྱངས་སོགས་བརྗོད། དེ་དག་གི་ཕྱི་རོལ་གྱི་ཕྱོགས་བཞིར་རིན་པོ་ཆེའི་ཁྲི་སོགས་བརྗོད་པ་མ་གཏོགས་གཞན་འདྲའོ། །ལས་བུམ་དུ་པདྨ་དང་ཉི་མའི་སྟེང་དུ་ཧཱུྃ་ལས་ཁྲོ་བོ་བདུད་རྩི་འཁྱིལ་པ་སྐུ་མདོག་ལྗང་གུ་ཞལ་གཅིག་ཕྱག་གཉིས་པ་གཡས་སྣ་ཚོགས་རྡོ་རྗེ་དང་། གཡོན་དེས་ཡུ་བ་བྱས་པའི་དྲིལ་བུ་དཀུར་བརྟེན་པ་ཅུང་ཟད་ཁྲོས་པའི་ཉམས་ཅན། དར་གྱི་ཤམ་ཐབས་དང་། རིན་པོ་ཆེས་སྤྲས་པ། ཞབས་སེམས་དཔའི་སྐྱིལ་མོ་ཀྲུང་གིས་བཞུགས་པ། དེ་ཐམས་ཅད་ཀྱི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུྃ། རང་གི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་ནས་གཟའ་ཡུམ་གྱི་ལྷ་ཚོགས་བདུད་རྩི་འཁྱིལ་པ་དང་བཅས་པ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་སོགས་ནས། གཙོ་མོ་ལ་རྣམ་པར་སྣང་མཛད། འཁོར་རྣམས་ལ་རྡོ་རྗེ་སེམས་དཔའ། བདུད་རྩི་འཁྱིལ་པ་ལ་དོན་ཡོད་གྲུབ་པས་དབུར་བརྒྱན་ཞེས་བརྗོད། ༀ་བྷ་ག་ཝ་ཏི་སརྦ་བིདྱཻ་ས་པའི་རི་ཝཱ་ར་རེ་རེའི་མགོར་སྦྱར་བའི་ཨརྒྷཾ་པྲ་ཏཱིཙྪ་སྭཱ་ཧཱ་ནས་ཤབྡ་པྲ་ཏཱིཙྪ་སྭཱ་ཧཱ་བར་དང་། དྷརྨ་ར་ཎིི་ཏ་སོགས་བརྗོད། བཅོམལྡན་འདས་མ་གཟའ་རྣམས་ཀུན་སོགས་དང་། བསྟོད་པར་འོས་པ་སོགས་དང་། འཇིགས་པའི་ཧཱུྃ་སྒྲ་སོགས་ཀྱིས་བསྟོད། བདག་གི་ཞལ་ནས་འོད་ཟེར་དམར་པོ་བྱུང་། གཟུངས་ཐག་ལ་ཞོན་ཏེ་སོང་། བུམ་ནང་གི་ལྷ་ལ་ཕོག་པས་བདག་གི་དབང་དུ་འདུས་ཤིང་། བ་སྤུའི་བུ་ག་ནས་བདུད་རྩི་རྒྱུན་འཛག་པས་བུམ་པ་གང་བར་བསམས་ལ། རྣམ་རྒྱལ་ལ། ༀ་སརྦ་བིདྱཻ་སོགས་སྔགས་ཚང་མ་དང་། ལས་བུམ་ༀ་ཨམྲྀ་ཏེ་ཧཱུྃ་ཕཊ་ཅེས་པ་རྣམས་ཅི་ནུས་རེ་བཟླ། གོང་ལྟར་མཆོད་ཅིང་བསྟོད། བཅོམ་ལྡན་འདས་མ་འཁོར་དང་བཅས་པས་སོགས་གོང་ལྟར་གསོལ་བ་གདབ། ཡིག་བརྒྱ་ལན་གསུམ་དང་མ་འབྱོར་པ་སོགས་ཀྱི་མཐར། ༀ་ཨཱཿཧཱུྃ་མཆོད་ཡོན་ཕུལ་བའི་རྐྱེན་གྱིས་ཡེ་ཤེས་པ་གཤེགས། དམ་ཚིག་པ་ཞུ་བ་ལས་བུམ་པའི་ཆུ་བདུད་རྩིའི་རང་བཞིན་དུ་གྱུར་ཅེས་བརྗོད། སློབ་མ་སྟ་གོན་ནི། ཚོམ་བུའི་དཀྱིལ་འཁོར་ཡོལ་བས་བསྒྲིབས་ཏེ་སློབ་མ་རྣམས་སྒོ་དྲུང་དུ་ཁྲུས་བྱས། གྲལ་ལ་འཁོད་པ་ལ་མེ་ཏོག་བཀྱེ་བསྡུ་གྲུབ་ནས་སེམས་བསྐྱེད་གསལ་གདབ་ལ། དེ་ཡང་རྒྱལ་བ་ཐབས་མཁས་ལ། ཐུགས་རྗེ་ཆེན་པོ་དང་ལྡན་པ། དེ་ཉིད་ཀྱིས་གདུལ་བྱའི་ཁམས་དང་མཐུན་པར་དམ་པའི་ཆོས་ཀྱི་བདུད་རྩི་བསམ་གྱིས་མི་ཁྱབ་པ་ཞིག་སྤྲོ་བར་མཛད་པ་ཐམས་ཅད་ཀྱང་ཐེག་པ་ཆེ་ཆུང་གཉིས་སུ་འདུ་ལ། ཐེག་ཆེན་ལའང་ཕ་རོལ་དུ་ཕྱིན་པ་དང་སྔགས་ཀྱི་འཇུག་སྒོ་གཉིས་སུ་ཡོད་ཅིང་། ཕྱི་མ་ལའང་རྒྱུད་ཐ་དད་ཀྱི་ཚིག་ཟིན་པ་ལྟར་གྲུབ་པའི་སློབ་དཔོན་རྣམས་ཀྱིས་རྒྱུད་སྡེ་གཉིས་དང་གསུམ་དུ་བསྒྲུབ་དང་། བཞི་དང་ལྔ་སོགས་སུ་ཕྱེ་བ་སྟེ་འཇོག་ཚུལ་དུ་མ་ཞིག་མཛད་མོད། ཡོངས་སུ་གྲགས་པ་རྒྱུད་སྡེ་བཞིར་བཞེད་བའི་ལུགས་ལྟར་ན། འདིར་རིག་སྔགས་འཆང་གི་སྡེ་སྣོད་ཐམས་ཅད་ཀྱི་གཞིའམ་རྩ་བ་ལྟ་བུར་གྱུར་པ་བྱ་བའི་རྒྱུད་ཡིན། དེའང་རིགས་དྲུག་ཏུ་ཡོད་པ་ལས་དེ་བཞིན་གཤེགས་པའི་རིགས་ཀྱི་རྒྱུད་ཡིན། དེ་ལའང་དུ་མ་ཞིག་ཡོད་པ་ལས་འདིར་གཟའ་ཐམས་ཅད་ཀྱི་ཡུམ་གྱི་གཟུངས། སློབ་དཔོན་རྣལ་འབྱོར་གྱི་དབང་ཕྱུག་དཔལ་ལྡན་བིརླུ་པའི་ཞལ་སྔ་ནས་བཀྲལ་ཞིང་། ཟ་ཧོར་གྱི་པཎྜི་ཏ་ཆེན་པོ་ཞི་བ་འཚོ་ནས་འཁོན་ནཱ་གེཎྡྲ་རཀྵི་ཏ་ལ་བརྒྱུད་དེ་འཁོན་གདུང་རབས་གོང་མ་རྣམས་ལ་བཀའ་བབས་པའི་རྗེ་བཙུན་མ་རིག་པ་ཆེན་མོའི་དཀྱིལ་འཁོར་དུ་སྤྱོད་བརྒྱུད་དང་མཐུན་པའི་ཆོ་གས་མངོན་པར་དབང་བསྐུར་སྒྲུབ་པར་བྱེད་པ་ལ་སྟ་གོན་དང་དངོས་གཞི་གཉིས་ཀྱི་དང་པོ་ལའང་ས་གཞི་རུ་ཡོད་པ་ལས། ས་ལྷ་དང་། ལྷ་དང་། བུམ་པ་སྟ་གོན་གསུམ་ནི་ཁོ་བོས་སྔོན་དུ་ལེགས་པར་གྲུབ་ཟིན་པ་ཡིན། ཁྱེད་རྣམས་ཀྱི་ངོ་སྐལ་དུ་གྱུར་པ་སློབ་མ་སྟ་གོན་ལ་ཆོས་བཅུ་བཞི་ཡོད་པ་ལས། དང་པོ་ལུས་ཀྱི་བྱ་བ་ཁྲུས་བྱས། ཕྱག་དང་འཇུག་པའི་ཡོན་ཕུལ་ནས་རང་རང་གི་གྲལ་ལ་སྙིམ་པ་མེ་ཏོག་དང་བཅས་པས་འཁོད་དེ། སློབ་དཔོན་ལ་རྗེ་བཙུན་གཟའ་ཐམས་ཅད་ཀྱི་ཡུམ་རིག་པ་ཆེན་མོ་དངོས་ཡིན་སྙམ་པས་སྟ་གོན་གྱི་ཆོས་རྣམས་ཞུ་བའི་ཡོན་དུ་མཎྜལ་ཕུལ་མཛོད། དེ་ལྟར་མཎྜལ་ཕུལ་ནས་གཉིས་པ་རྣ་བ་གཏད་བར་བསྐུལ་བར་ནི། རྟོག་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་དང་ལྡན་པ་ཉོན། །བརྗེད་ངས་བློ་ལ་རྡོ་རྗེ་སེམས་སོགས་དང་། །བདེ་བར་གཤེགས་པ་རྣམས་ཀྱི་བྱིན་མི་རློབས། །ཞེས་གསུངས་པ་ལྟར། ཆོས་ཀྱི་ཚིག་དོན་ལ་ཡིད་མི་གཏོད་པ་སྣོད་ཁ་སྦུབས་ལྟ་བུའི་སྐྱོན་དང་། ཡིད་གཏད་ཀྱང་ངན་པ་དང་ཤེས་བཞིན་གྱིས་མི་འཛིན་པ་སྣོད་ཞབས་རྡོལ་ལྟ་བུའི་སྐྱོན་དང་། དྲན་པ་ཤེས་བཞིན་གྱིས་བཟུང་ཡང་རྣམ་བཤད་རིག་པ་ལས། ང་རྒྱལ་དང་ནི་མ་དད་དང་། །དོན་དུ་གཉེར་པ་མེད་ཉིད་དང་། །ཕྱི་རོལ་རྣམ་གཡེང་ཡིད་བསྡུས་དང་། །སྐྱོ་བས་ཉན་པའི་དྲི་མ་ཡིན། །ཞེས་འབྱུང་བ་ལྟར་དྲི་མ་དྲུག་པོ་གང་རུང་དང་ལྡན་པ་ནི་སྣོད་དྲི་མ་ཅན་གྱི་སྐྱོན་ཏེ་སྣོད་ཀྱི་སྐྱོན་གསུམ་སྤངས་ནས་གཞན་ཕན་བྱང་ཆུབ་སེམས་དང་ལྡན་པས་ལེགས་པས་གསན་འཚལ་ཞེས་པའི་དོན་ཡིན། གསུམ་པ་མྱང་འདས་ཀྱི་བསམ་པ་བརྟན་པོ་བསྐྱེད་དུ་གཞུགས་པ་ནི། སྔགས་ཀྱི་དངོས་གྲུབ་དོན་གཉེར་གང་། །དཀྱིལ་འཁོར་འདི་ནི་གཞུགས་པར་བྱ། །བསོད་ནམས་འདོད་པ་དེ་ལས་གཞན། །བདག་གཞན་འཇིག་རྟེན་ཕ་རོལ་གཉེར། །དད་པ་ཆེན་པོ་ལྡན་པ་དག །འཇིག་རྟེན་ཕ་རོལ་ལ་དམིགས་ནས། །བློ་ལྡན་དཀྱིལ་འཁོར་གཞུང་བྱ་སྟེ། འདི་ཡི་འབྲས་བུ་གཉེར་མི་བྱ། །གལ་ཏེ་འདི་འབྲས་དོན་གཉེར་ན། །འཇིག་རྟེན་ཕ་རོལ་འགྲུབ་མི་འགྱུར། །འཇིག་རྟེན་ཕ་རོལ་ལ་དམིགས་ནས། །འབད་པ་མེད་པ་འདི་འབྲས་འགྲུབ། །ཞེས་གསུངས་ཏེ། དེའི་དོན་ནི་དཀྱིལ་འཁོར་དུ་བཞུགས་པའི་སྐབས་ཀྱི་དོན་ཚེ་འདིར་ཚེ་རིང་བ་དང་ཕྱི་མ་ལྷ་མིའི་གོ་འཕང་ཙམ་དང་། འཁོར་བ་སྤངས་པའི་ཉན་རང་ཙམ་དོན་དུ་གཉེར་བའི་སྒོ་ནས་མ་ཡིན་པར་གཞན་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ་བའི་སླད་དུ་དཀྱིལ་འཁོར་འདིར་བཞུགས་ལ་དབང་བླངས་ཏེ་དམ་ཚིག་ལ་སྲུང་སྡོམ་བགྱི་སྙམ་པར་མཛོད། བསམ་པ་དེ་ལྟ་བུ་ཞིག་སྐྱེས་ན་ཚེ་འདིའི་ནད་གདོན་ཞི་བ་དང་ཕྱི་མ་ལྷ་མའི་གོ་འཕང་ཞར་བྱུང་བ་ཡིན་ནོ། །བཞི་པ་ཁྱད་པར་ཅན་གྱི་དོན་ཞུ་བའི་སླད་དུ་བླ་མ་དང་རྗེ་བཙུན་མ་གཟའ་ཐམས་ཅད་ཀྱི་ཡུམ་རིག་པ་ཆེན་མོ་གཉིས་སུ་མེད་པར་བཞུགས་པ་ལ་སྐྱབས་སུ་འགྲོ་བ་དང་སེམས་བསྐྱེད་པ་དང་། རིགས་འཛིན་སྔགས་ཀྱི་དམ་ཚིག་རྣམས་ཀྱང་སྩལ་དུ་གསོལ་སྙམ་པས་སྙིམ་པ་མེ་ཏོག་དང་བཅས་པའི་ཐལ་མོ་སྦྱར་ཏེ་འདིའི་རྗེས་ཟློས། ལན་གསུམ་མཛོད། དགའ་ཆེན་ཁྱོད་བདག །སོགས་ལན་གསུམ་ལྔ་པ་སྔགས་ཀྱི་ཐེག་པ་ལ་སྤྲོ་བ་བསྐྱེད་པ་འདི་ལ་གསན་པས་ཁྱད་པར་གདའ་སྟེ། བུ་ཚུར་ཐེག་པ་ཆེན་པོ་ཡི། །ཁྱོད་ནི་ཚུལ་ཆེན་སྣོད་ཡིན་ཏེ། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བའི་རྫོགས་སངས་རྒྱས། །འགྲོ་ལ་ཕན་ཕྱིར་བཞུགས་པ་ཀུན། །དེ་དག་ཀུན་གྱིས་གསང་སྔགས་ཀྱི། །ཆོ་ག་བཟང་པོ་འདི་མཁྱེན་ཏེ། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་ཚད་མེད་བརྙེས། །གསང་སྔགས་སྦྱོར་བ་མཉམ་མེད་དོ། །ཤཱཀྱ་སེང་གེ་སྐྱོབ་པ་ཡིས། །དྲག་པོ་ཆེན་པོ་བདུད་ཀྱི་སྡེ། །སྟོབས་ཆེན་དག་ཀྱང་དེས་བཅོམ་སྟེ། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་གསུངས་ཏེ། དེའི་དོན་ནི་ཁྱེད་རྣམས་ལ་བུ་ཞེས་ཉེ་བའི་ཚིག་གིས་བོས་ཏེ། ཁྱེད་རྣམས་ཆེན་པོ་བདུན་དང་ལྡན་པའི་ཐེག་ཆེན་གྱི་ཆོས་ཀྱི་སྣོད་ཡིན་ལ། ཐེག་ཆེན་ལའང་རྒྱུ་འབྲས་གཉིས་ལས་མཆོག་ཏུ་གྱུར་པ་རྡོ་རྗེ་ཐེག་པ་ཁོ་བོས་ཁྱོད་ལ་བསྟན་པར་བྱ་སྟེ། རྡོ་རྗེ་ཐེག་པ་འདིར་ནི་སྤྱིར་དུས་གསུམ་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ་ཡིན་ཞིང་། ཁྱད་པར་དུའང་འོ་སྐོལ་རྣམས་ཀྱི་སྟོན་པ་ཤཱཀྱའི་རྒྱལ་པོ་འདི་བསྐལ་པ་དཔག་ཏུ་མེད་པའི་སྔོན་རོལ་དུ་སྔགས་ཀྱི་ལམ་ལ་བརྟེན་ནས་བདུད་བཏུལ་ཞིང་འོག་མིན་དུ་སངས་རྒྱས་སུ་ཟིན་ཀྱང་འཇིག་རྟེན་པ་རྣམས་དྲང་བའི་ཕྱིར་དུ་སངས་རྒྱས་པའི་ཚུལ་བསྟན་པ་ཡིན་པས་ཆོས་ཀྱི་བུར་གྱུར་པ་ཁྱེད་རྣམས་སྔགས་ཀྱི་ཐེག་པ་ལས་བློ་གྲོས་གཞན་དུ་མི་འགྱུར་བ་གྱིས་ཤིག །ཅེས་པའི་དོན་ཡིན་ནོ། །དྲུག་པ་རྒྱུན་བཤགས་སྔོན་དུ་འགྲོ་བའི་སེམས་བསྐྱེད་པའི་སླད་དུ་དམིགས་པ་འདི་བཞིན་མཛོད། མདུན་གྱི་ནམ་མཁར་བླ་མ་དང་གཉིས་སུ་མེད་པའི་རྗེ་བཙུན་མ་གཟའ་ཐམས་ཅད་ཀྱི་ཡུམ་རིག་པ་ཆེན་མོའི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བསྐོར་བར་མོས་ནས། དེ་དག་གི་སྤྱན་སྔར་བདག་དང་མཐའ་ཡས་པའི་སེམས་ཅན་རྣམས་འཁོད་ནས་སྡིག་པ་བཤགས་པ་ལ་སོགས་པའི་ཡན་ལག་བདུན་པ་བགྱིད་སྙམས་པས་འདིའི་རྗེས་ཟློས་ལན་གསུམ་མཛོད། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་ཚེ་ཐོག་མ་མེད་པ་ནས་ད་ལྟའི་བར་དུ་འདོད་ཆགས་དང་ཞེ་སྡང་དང་གཏི་མུག་གི་དབང་གིས་ལུས་དང་ངག་དང་ཡིད་ཀྱི་སྒོ་ནས་སྡིག་པ་མི་དགེ་བའི་ལས་བགྱིད་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བ་དེ་དག་ཐམས་ཅད་སོ་སོར་བཤགས་ཤིང་ཡང་མི་བགྱིད་དོ། །ཞེས་ལན་གསུམ། འཁོར་འདས་དུས་གསུམ་གྱི་དགེ་རྩ་ལ་དགའ་ཞིང་། ཕྲག་དོག་མེད་པར་རྗེས་སུ་ཡི་རང་བར་བགྱིའོ། །སྙམས་པས་འདིའི་རྗེས་ཟློས། ཕྱོགས་བཅུ་ན་བཞུགས་པའི་སོགས་ནས་དགོངས་སུ་གསོལ། བདག་མིང་འདི་ཞེས་བགྱི་བས་སོ་སོའི་སྐྱེ་བོ་དང་འཕགས་པ་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་དང་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་དགེ་བའི་རྩ་བ་དེ་དག་ཐམས་ཅད་ལ་དགའ་ཞིང་ཡི་རངས་བར་བགྱིའོ། །ཞེས་ལན་གསུམ། ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་ལ་སོགས་པ་ཆོས་ཀྱི་འཁོར་ལོ་བསྐོར་བར་མི་མཛད་པ་དེ་དག་ལ་སེམས་ཅན་གྱི་དོན་དུ་ཆོས་ཀྱི་འཁོར་ལོ་བསྐོར་བར་གསོལ་བ་གདབ་པར་བགྱིའོ་སྙམ་པས་འདིའི་རྗེས་ཟློས། དགོངས་སུ་གསོལ་དང་གང་དག་ཕྱོགས་བཅུའི་འཇིག་རྟེན་གྱི་ཁམས་ན་སངས་རྒྱས་བཅོམ་ལྡན་འདས་ལྷ་དང་མི་རྣམས་ཀྱི་སྟོན་པ་སྲས་དང་བཅས་པ་ཆོས་ཀྱི་འཁོར་ལོ་བསྐོར་བར་མི་མཛད་པ་དེ་དག་ལ་སེམས་ཅན་ཐམས་ཅད་ཀྱི་དོན་དུ་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་སོ་ལན་གསུམ། ཕྱོགས་བཅུའི་འཇིག་རྟེན་གྱི་ཁམས་ན་སངས་རྒྱས་ཡོངས་སུ་མྱ་ངན་ལས་འདའ་བར་བཞེད་པ་དེ་དག་ཡོངས་སུ་མྱ་ངན་ལས་མི་འདའ་བར་གསོལ་བ་འདེབས་སོ་སྙམ་པས་འདིའི། དགོངས་སུ་གསོལ་དང་། གང་དག་ཕྱོགས་བཅུའི་འཇིག་རྟེན་གྱི་ཁམས་ན་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདའ་བར་བཞེད་ལ་དེ་དག་ཡོངས་སུ་མྱ་ངན་ལས་མི་འདའ་བར་གསོལ་བ་འདེབས་སོ་ལན་གསུམ། རྡོ་རྗེ་ཐེག་པའི་དཀོན་མཆོག་གསུམ་ལ་དུས་ད་ནས་བཟུང་སྟེ་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་ཞིང་དེའི་བསླབ་བྱ་ལ་སློབ་སྙམ་པས་འདིའི། དགོངས་སུ་གསོལ། བདག་མིང་འདི་ཞེས་བགྱི་བས་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་རྐང་གཉིས་རྣམས་ཀྱི་མཆོག སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཆོས་ལ་ཚོགས་ཀྱི་མཆོག་དགེ་འདུན་ལ༴ གསང་སྔགས་དང་རིགས་སྔགས་དང་ཡི་དམ་གྱི་ལྷ་དང་བླ་མ་དམ་པ་རྣམས་ལ། ལན་གསུམ། བདག་གཞན་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱའོ་སྙམ་པས་འདིའི། དགོངས་སུ་གསོལ་དང་། བདག་མིང་འདི་ཞེས་བགྱི་བ་ནས་སེམས་ཅན་མ་བསྒྲལ་བ་རྣམས་བསྒྲལ་བ་དང་། མ་གྲོལ་བ་རྣམས་གྲོལ་བར་བགྱི་བ་དང་། དབུགས་མ་ཕྱིན་པ་རྣམས་དབུགས་འབྱུང་བ་དང་ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདས་པར་བྱ་བའི་ཕྱིར་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཇི་ལྟར་བྱང་ཆུབ་ཆེན་པོ་སྨོན་པའི་སེམས་བསྐྱེད་པ་དེ་བཞིན་དུ་བདག་གིས་ཀྱང་སེམས་བསྐྱེད་པར་བགྱིའོ། །ལན་གསུམ། དེའི་ཆེད་དུ་སེམས་ཅན་གྱི་དོན་རྒྱ་ཆེན་པོ་བསྒྲུབས་ཅིང་རྡོ་རྗེ་ཐེག་པའི་ཐབས་ཚུལ་རྣམས་ལ་རིམ་པ་བཞིན་དུ་བསླབ་པར་བགྱིའོ་སྙམ་པས་འདིའི་རྗེས་ཟློས་ལན་གསུམ་མཛོད། དགོངས་སུ་གསོལ་དང་། བདག་མིང་འདི་ཞེས་བགྱི་བས་འདས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བྱང་ཆུབ་ཀྱི་སྤྱོད་པ་ལ་ཇི་ལྟར་བསླབ་པ་དང་། མ་བྱོན་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཇི་ལྟར་སློབ་པར་འགྱུར་པ་དང་། ད་ལྟར་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཇི་ལྟར་བསླབ་པ་དེ་བཞིན་དུ་བདག་གིས་ཀྱང་བྱང་ཆུབ་སེམས་དཔའ་རྣམས་ཀྱི་བསླབ་པར་བྱ་བ་ལ་བསླབ་པར་བགྱིའོ། །ལན་གསུམ། སྨོན་འཇུག་བརྟན་པའི་ཕྱིར་དུ་འདིའི་རྗེས་ཟློས། ཇི་ལྟར་དུས་གསུམ་མགོན་པོ་རྣམས་སོགས་ནས། སོ་སོར་བརྟན་པོ་བཟུང་བར་བགྱི། ལན་གསུམ། དེ་ལྟར་བགྱིས་པའི་དགེ་བའི་རྩ་བ་དེས་བདག་དང་སེམས་ཅན་ཐམས་ཅད་ཀྱིས་རྣམ་པ་ཐམས་ཅད་མཁྱེན་པའི་སངས་རྒྱས་ཀྱི་གོ་འཕང་ཐོབ་པར་གྱུར་ཅིག་སྙམ་པས་འདིའི། འཇམ་དཔལ་དཔའ་བོས་སོགས་ནས། རབ་ཏུ་བསྔོ། ལན་གསུམ། ཞེས་རྒྱུད་དག་པར་བྱས་ནས་བདུན་པ་སེམས་བསྐྱེད་པའི་སློབ་མ་ལ་བར་ཆད་བསྲུང་བའི་སླད་དུ་སློབ་དཔོན་གྱི་རྡོ་རྗེ་དང་བཅས་པའི་དྲི་ཆུའི་ཁྱེད་རང་རྣམས་ཀྱི་སྤྱི་བོར་རེག་ཅིང་། ༀ་ཨམྲྀ་ཏེ་ཧཱུྃ་ཕཊ་ཅེས་བརྗོད་ཅིང་། སློབ་དཔོན་གྱི་ཐུགས་ཀ་ནས་ནས་འོད་ཟེར་བྱུང་སློབ་མ་རྣམས་ཀྱི་སྤྱི་བོར་ནས་ཞུགས་པས་མ་དག་པ་སྡིག་སྒྲིབ་སྦྱང་བར་བསམ། འདིར་སློབ་དཔོན་གྱི་རྡོ་རྗེ་ཕྱིར་བསྔམས་གུང་མི་གཉིས་སྤྲེང་སྟེ་སློབ་མའི་སྙིང་ཁར་གཏད་ཅིང་། ༀ་སརྦ་བིདྱཻ་ཧཱུྃ་ཧཱུྃ་ཕཊ་ཕཊ་སྭཱ་ཧཱ་ཞེས་བརྗོད་པའི་རྐྱེན་གྱིས་ཁྱེད་རང་རྣམས་སྐད་ཅིག་གིས་རྗེ་བཙུན་མ་རིག་པ་ཆེན་མོ་སྐུ་མདོག་སྟོན་ཟླ་ལྟར་དཀར་བ་ཞལ་གསུམ་ཕྱག་དྲུག་མ། རྩ་ཞལ་དཀར་བ། གཡོན་ཞལ་དམར་བ། ཞལ་རེ་རེ་ལ་སྤྱན་གསུམ་གསུམ་མངའ་བ། ཕྱག་དང་པོ་གཉིས་ཀྱི་ཆོས་འཆད་ཀྱི་ཕྱག་རྒྱ་མཛད་པ། གཡས་ཀྱི་གཉིས་པ་ན་རྡོ་རྗེ། གསུམ་པ་ན་མདའ། གཡོན་གྱི་གཉིས་པ་ན་པདྨ། གསུམ་པ་ན་གཞུ་བསྣམས་པ། རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། དར་སྣ་ཚོགས་ཀྱི་ན་བཟའ་ཅན། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་སྐུ་ཅན་དུ་གྱུར་པ་ལ་སློབ་དཔོན་གྱིས་དྲིའི་ཆུ་ཁྱེད་རང་གི་གནས་གསུམ་དུ་རེག་ཏེ་ༀ་ཨཱཿཧཱུྃ་ཞེས་བརྗོད་པས་དཔྲལ་བར་ༀ་ལས་འཁོར་ལོ་ༀ་གྱིས་མཚན་པ། མགྲིན་པར་ཨཱཿལས་པདྨ་ཨཱཿཡིས་མཚན་པ། ཐུགས་ཀར་ཧཱུྃ་ལས་རྡོ་རྗེ་སྔོན་པོ་ཧཱུྃ་གིས་མཚན་པ་རྣམས་ལམ་གྱིས་བྱུང་བར་མོས་པ་མཛོད། བརྒྱད་པ་ཁྱེད་རང་རྣམས་ཀྱི་ལུས་ངག་ཡིད་གསུམ་ལྷའི་སྐུ་གསུང་ཐུགས་ཀྱི་ངོ་བོར་བྱིན་གྱིས་བརླབས་པ་དེ་མཆོད་ཡུལ་དུ་བཟུང་བ་ཡིན་པས་སློབ་དཔོན་གྱི་མེ་ཏོག་དབུ་ལ་ཕུལ་ཏེ་མཆོད་པའི་མོས་པ་མཛོད། ༀ་བཛྲ་པུཥྤེ་ཨཱཿཧཱུྃ་ཞེས་དང་། བདུག་སྤོས་ཤངས་ལ། དྷུཔྤེ། མར་མེ་སྤྱན་ལམ་དུ། ཨ་ལོ་ཀེ །དྲིའི་བྱུགས་པ་ཐུགས་ཀར། གནྡྷེ། ཞལ་ཟས་ལྗགས་ལ་ཕུལ་ཏེ། ༀ་བཛྲ་ནཻ་ཝི་དེ་ཨཱཿཧཱུྃ། ཞེས་པས་མཆོད་ནས། དགུ་པ་དངོས་གྲུབ་ཀྱི་མཚན་ལྟས་བརྟགས་པའི་ཕྱིར་སོ་ཤིང་སྤྱིན་པ་ནི། སོ་ཤིང་ལས་བུམ་གྱི་ཆུ་དང་ཨམྲྀ་ཏས་བསང་། སྭ་བྷ་ཝས་སྦྱངས། སྟོང་པའི་ངང་ལས་ཧཱུྃ་ལས་བྱུང་བའི་སོ་ཤིང་སོར་བཅུ་གཉིས་པ་རྩེ་མོར་མེ་ཏོག་གི་ཅོད་པན་དང་བཅས་པ་རྡོ་རྗེ་སློབ་མ་རྣམས་ཀྱི་དངོས་གྲུབ་ཀྱི་མཚན་ལྟས་བརྟགས་པའི་ནུས་པ་དང་ལྡན་པར་གྱུར། ༀ་ཨཱཿཛི་ཧཱ་བཾ་ཝརྡྷ་ནི་སྭཱ་ཧཱ། ཞེས་པས་བྱིན་གྱིས་རླབས་པ་དེ་ཁྱེད་རྣམས་ཀྱི་ཕྱག་ཐལ་མོ་སྦྱར་བའི་བར་དུ་དངོས་གྲུབ་ཀྱི་མཚན་མ་བརྟགས་པའི་སླད་དུ་བྱིན་པར་མོས་པ་མཛོད། ཞེས་དང་གོང་གི་སྔགས་བརྗོད་ཅིང་བྱིན། དེས་སོ་དྲུད་བས་རྩེ་མོའི་མེ་ཏོག་ལས་འོད་ཟེར་བྱུང་བ་ཞལ་ནས་བརྒྱུད་དེ་ཁོང་པར་སོང་ནས་ཚེ་ཐོག་མ་མེད་ནས་བསགས་པའི་སྡིག་པ་དང་སྒྲིབ་པ་ཐམས་ཅད་སྨན་པ་མཁས་པས་སྐྱུགས་སྨན་བཏང་བ་བཞིན་སྐྱུགས་པར་མོས་ཏེ། དཀྱིལ་འཁོར་གྱི་ཤར་ཕྱོགས་སུ་དྲི་བཟང་གི་མཎྜལ་ཁྲུ་གང་གྲུ་བཞི་པ་མེ་ཏོག་གི་ཚོམ་བུ་ལྔ་བཀོད་པའི་སྟེང་དུ་ཁྱེད་རང་རྣམས་ཁ་ཤར་རཾ་བྱང་དུ་ཕྱོགས་པས་ༀ་བཛྲ་ཧ་ས་ཧ་ཞེས་བརྗོད་ཅིང་ཐལ་མོ་ཁ་ཕྱེས་ལ་ལྟོས་པ་མེད་པར་དོར་ཤིག །དེ་ལྟར་དོར་བས་རྩེ་མོ་ཤར་དུ་བསྟན་ན་ཞི་བ། ལྷོར་མངོན་སྤྱོད། ནུབ་ཏུ་དབང་། བྱང་དུ་རྒྱས་པ། མཚམས་རྣམས་སུ་ཕྱོགས་ན་བུམ་པ་བཟང་པོ་ལ་སོགས་པའི་དངོས་གྲུབ་ཕྲན་ཚེགས། འོག་ཏུ་ཕྱོགས་ནས་འོག་གི་དངོས་གྲུབ། སྟེང་ངམ་རང་དང་བླ་མ་ལ་བལྟས་ན་མཆོག་འགྲུབ་བོ། །ཞེས་བརྗོད། བཅུ་པ་རྨི་ལམ་གསལ་པོ་འབྱུང་བ་དང་སྒོ་གསུམ་གྱི་དྲི་མ་སྦྱངས་བའི་ཕྱིར་ཁྱོར་ཆུ་སྦྱིན་པ་ནི། དུང་ཆོས་སུ་དྲི་བཟང་སྦྱར་བ། ༀ་ཨ་མྲྀ་ཏེ་ཧཱུྃ་ཕཊ་ཞེས་ཉེར་གཅིག་གིས་བྱིན་གྱིས་རླབས་ནས། ༀ་ཧྲཱིཿབི་ཤུདྡྷཿསརྦ་དྷརྨཿསརྦ་པཱ་པཾ་ནིཤྩ་སྱཱ་སཾ་ཤོདྷ་ཡ་བ་ཀ་ཝཱན་ཨ་པ་ན་ཡེ་ཧཱུྃ་ཞེས་པའི་གཡས་པའི་ཁྱོར་བར་ལན་གསུམ་སྦྱིན། བཅུ་གཅིག་པ་བར་ཆད་བསྲུང་བའི་སླད་དུ་སྲུང་སྐུད་སྦྱིན་པ་ནི། བུམ་ཆུ་གཏོར་བསངས་སྦྱངས། སྟོང་པའི་ངང་ལས་ཧཱུྃ་ལས་བྱུང་བའི་སྲད་བུ་དམར་པོ་སློབ་མའི་ལུས་ཚད་དང་མཉམ་པའི་སུམ་བསྒྲིལ་བྱས་པར་རྡོ་རྗེའི་མདུད་པ་གསུམ་གྱིས་བཏབ་པ་རྡོ་རྗེ་སློབ་མ་རྣམས་ཀྱི་སྒོ་གསུམ་གྱི་བར་ཆད་སྲུང་བའི་ནུས་པ་དང་ལྡན་པར་གྱུར་། སློབ་དཔོན་གྱི་སྙིང་གིའི་ཧཱུྃ་ལས་འོད་ཟེར་འཕྲོས་སྟ་གོན་གྱི་ལྷའི་ཐུགས་ཀ་ནས་ཡེ་ཤེས་ཀྱི་སྲད་བུའི་ཚོགས་སྤྱན་དྲངས་ཏེ་དམ་ཚིག་གི་སྲད་བུ་ལ་ཐིམ་པར་བསམ་ལ། ༀ་ཨ་མྲྀ་ཏེ་ཧཱུྃ་ཕཊ་ལན་གསུམ་བཟླས་པས་བྱིན་གྱིས་རླབས་ནས་གཙོ་བོའི་སྔགས་ཀྱིས་དཔུང་པ་གཡོན་དུ་ཉིས་སྐོར་གྱིས་འཆིངས། ལས་བུམ་གྱི་ཆུས་གཏོར་ལ། ཡི་གེ་བརྒྱད་པའམ། ༀ་སརྦ་བུདྡྷ་མེ་྄རཀྵཿརཀྵ་ཀུ་རུ་ཧཱུྃ། ཅེས་དང་། སརྦ་བུདྡྷ་ཨདྷིཥྛ་ན་ཨདྷིཥྛི་ཏེ་སྭཱ་ཧཱ། ཞེས་བརྗོད། བཅུ་གཉིས་པ་རྨི་ལམ་མི་འཁྲུགས་པའི་ཕྱིར་ཀུ་ཤའི་སྔས་སྦྱིན་པ་ནི་བསངས་སྦྱངས། སྟོང་པའི་ངང་ལས་དྷིཿདང་ཧ་ལས་བྱུང་བའི་ཀུ་ཤ་ཆེ་ཆུང་རྩ་བ་དང་རྩེ་མོ་མ་ཉམས་པ་རྡོ་རྗེ་སློབ་མ་རྣམས་ཀྱི་རྨི་ལམ་མི་འཁྲུགས་པར་བྱེད་པའི་ནུས་པ་དང་ལྡན་པར་གྱུར་ཞེས་པས་བྱིན་གྱིས་རླབས་པའི་ཀུ་ཤ་ཆུང་བ་སྔས་ཀྱི་དོན་དུ་དྷིཿཞེས་པས་ལག་པ་གཡས་དང་ཆེ་བ་སྟན་གྱི་དོན་དུ་ཧ་ཞེས་པས་གཡོན་དུ་སྦྱིན་ནོ། །བཅུ་གསུམ་པ་ཆོས་ཟབ་མོ་བཤད་པའི་སྒོ་ནས་སྤྲོ་བ་བསྐྱེད་པ་ནི། འཇིག་རྟེན་དུ་ནི་ཀུན་མཁྱེན་དག །ཨུ་དུམ་ཝཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་སེམས་ཅན་མཉམ་མེད་དོན། །བླ་མེད་བྱེད་པར་ནུས་པ་ཡིན། །བསྐལ་པ་བྱེ་བ་དུ་མ་རུ། །སྔོན་ཆད་སྡིག་པ་བྱས་པ་གང་། །དཀྱིལ་འཁོར་འདི་འདྲ་མཐོང་མ་ཐག །དེ་དག་ཟད་པར་འགྱུར་ཡིན་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །གང་གིས་སྤྱོད་པ་མཆོག་འདི་ལ། །བློ་གྲོས་ཤིན་ཏུ་མི་གཡོ་ན། །སྡུག་བསྔལ་ཐམས་ཅད་འབྱུང་བ་ཡི། །ངན་འགྲོ་དེ་ཡིས་གཅོད་པར་འགྱུར། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་བ། །བདག་ཉིད་ཆེན་པོ་ཀུན་གྱིས་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པ། །དེ་ཕྱིར་ཁྱེད་རྣམས་ཐེག་ཆེན་དུ། །སང་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བས་ན། །རང་བྱུང་སྐལ་པ་ཆེན་པོ་བ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་ཉིད་དུ་འགྱུར། །ཞེས་གསུངས་ཏེ། དེའི་དོན་ནི་འཇིག་རྟེན་ན་ཨུ་དུམ་ཝཱ་རེའི་མེ་ཏོག་དཀོན་པ་ལྟར་སངས་རྒྱས་བྱོན་པ། བྱོན་ནས་ཆོས་གསུངས་པ། གསུང་པའི་བསྟན་པ་ལ་གནས་པ། །བསྟན་པའི་རྗེས་སུ་བདག་གཞན་འཇུག་པ་ཡོད་པ་རྣམས་དཀོན། དེའི་ནང་ནས་ཀྱང་གསང་སྔགས་ཀྱི་ཐེག་པ་དང་མཇལ་བ་ཤིན་ཏུ་དཀོན་ཞིང་། དཀོན་པ་དེ་ཡང་ཕན་ཡོན་ཆེན་པོ་དང་ལྡན་པ་ཡིན་ཏེ། དཀྱིལ་འཁོར་དུ་ཞུགས་ཏེ་དབང་བླངས་ནས་དམ་ཚིག་ལ་བསྲུང་སྡོམ་དང་ལམ་ལ་འབད་པར་བྱས་ན་བརྩོན་འགྲུས་བསྟན་པའི་བྱེ་བྲག་གིས་ཚེ་འདི་འམ་བར་དོའི་སྐྱེ་བ་བདུན་ནམ། བཅུ་དྲུག་ཚུན་ཆད་ན་འབྲས་བུ་འགྲུབ་པར་གསུངས་པས། མཐའ་ཐུགས་ཀྱི་འབྲས་བུ་ལ་ཉེ་ཞིང་གནས་སྐབ་ལས་ཀྱི་འབྲས་བུ་ཚེ་འདིར་ཚེ་རིང་པ་དང་ནད་དང་སྡུག་བསྔལ་ཞི་བ་ལ་སོགས་པའང་སྩོལ་སྒྲུབ་ལོགས་ནས་མི་དགོས་པར་ཞར་ལས་འབྱུང་བའི་ཚུལ་གྱིས་བསྒྲུབས་པ་ཡིན་རྙེད་དཀའ་བ་ལ་ཕན་ཡོན་ཆེ་བའི་གསང་སྔགས་ཀྱི་ཐེག་པ་དང་མཇལ་བ་འདི་སྐལ་པ་བཟང་བ་ཡིན་སྙམ་དུ་ཤེས་པའི་སྒོ་ནས་ལམ་ལ་འབད་པ་དང་དམ་ཚིག་ལ་སྲུང་སྡོམ་ཚུལ་བཞིན་དུ་བགྱི་སྙམ་པར་གྱིས། བཅུ་གཅིག་པ་རྨི་ལམ་བརྟགས་ཅིང་ངན་ན་བསྲུང་བ་ན། དོ་ནུབ་ཉལ་བའི་ཚེ་ན་ཉོན་མོངས་པ་དུག་གསུམ་གྱི་རྟོག་པ་སྤངས་ལ་ལྷ་དང་བླ་མ་ཡིད་ལ་དྲན་པའི་སྒོ་ནས་གློ་གཡས་ས་ལ་ཕབ་སྟེ། མགོ་ཤར་རམ་བྱང་དུ་སྟོན་ལ་ཉོལ་ཞིག །ལུང་སྟོན་པའི་རྨི་ལམ་འབྱུང་བར་འགྱུར་རོ། །དེ་ཡང་རྨི་ལམ་བཟང་བའི་ལྟས་ནི། སྤྱི་རྒྱུད་ལས། རྨི་ལམ་སངས་རྒྱས་མཐོང་ན་ནི། །ཡོན་ཏན་རྒྱ་མཚོ་མངོན་སུམ་བཞིན། །མཆོད་རྟེན་དང་ནི་སྐུ་གཟུགས་མཐོང་། །དེ་ལ་མཆོད་པ་བརྩམ་པ་དང་། །ཞེས་དང་ཁྱད་པར་མདོ་སྡེ་ཀློགས་པ་དང་། ཞེས་སོགས་གསུངས་པ་ལྟར། དེ་བཞིན་གཤེགས་པའི་སྐུ་གཟུགས་དང་། མཆོད་རྟེན་མཐོང་བ། དམ་པའི་ཆོས་ཀྱི་གླེགས་བམ་ལག་ཏུ་ཐོག་པ། འཕགས་པའི་དགེ་འདུན་གྱི་ལྔའི་དབུས་སུ་བཞུགས་པ། རང་གི་བླ་མ་དང་མཇལ་བ། དེ་ལས་ཆོས་ཉན་པ་ཉི་ཟླ་ཤར་བ། རྒྱལ་པོར་དབང་བསྐུར་བ་རྟ་གླང་པོ་ཆེ་ཞོན་པ་ལ་སོགས་པ་བྱུང་ན་བཟང་བ་ཡིན་པས་ཞེན་པ་མེད་པའི་དགའ་བ་སྒོམ་ཞིང་དགའ་སྟོན་བྱ། གལ་ཏེ་ངན་པ་ཡང་འབྱུང་སྲིད་དེ་དེའི་ལྟས་ནི། རྒྱ་སྐྱེག་གྱི་རི་ལ་འཛེགས་པ་ཀ་ར་ཝི་རའི་མེ་ཏོག་འཐུ་བ་མཆོད་སྡོང་དང་བྱེ་མ་དང་ཐལ་ཕུང་ལ་འཛེགས་པ། སྤྲེའུ་བོང་བུ་ཞོན་ནས་ཁ་ཕྱིར་ཕྱོགས་ཏེ་འགྲོ་བ་ཆུས་ཁྱེར་བ་སྐྲ་བྲེག་པ། ལུས་ལ་ཏིལ་མར་གྱི་བྱུག་པ་ལ་སོགས་པ་བྱུང་ན་ཅུང་ཟད་ངན་པ་ཡིན་པས་གཉིད་སད་མ་ཐག་ཏུ་ཆོས་ཐམས་ཅད་རྨི་ལམ་གྱི་སྣང་བ་དང་ཁྱད་པར་མེད་དོ། །དོན་ལ་གྲུབ་པ་ཅི་ཡང་མེད་ཅེས་བདེན་མེད་ཀྱི་སྦྱང་བས་རྒྱས་འདེབས་པ་དང་གཙོ་བོའི་སྔགས་དང་ལས་ཐམས་ཅད་པ་བརྒྱ་རྩ་བརྒྱད་བཟླ་བ་དང་ཞི་བའི་སྦྱིན་སྲེག་བླུགས་པ་ལ་སོགས་པའི་རྨི་ལམ་ངན་པ་བཟློག་པའི་ཐབས་ལ་འབད་པར་བྱ་དགོས་པ་ཡིན་ནོ། །དེ་རྣམས་ཀྱིས་སློབ་མ་སྟ་གོན་གྱི་ཆོས་རྣམས་སོང་ནས་འདིའི་དངོས་གཞི་སང་ཉིན་འབྱུང་བ་ཡིན་ནོ། །ཞེས་བརྗོད་ལ་སློབ་མ་རང་གནས་སུ་གཏང་ངོ་། །རྗེས་ནི་མཆོད་པ་རྣམས་ཁ་གསོས་ལ་བསང་སྦྱང་བྱིན་གྱིས་བརླབ། མཆོད་བསྟོད། འདོད་དོན། གསོལ་གདབ། ཡིག་བརྒྱ་ནོངས་པ་བཟོད་གསོལ་བཅས་གོང་གི་བུམ་ཆོག་ལྟར་བྱས་ལ། རྡོ་རྗེ་དྲིལ་བུ་འཛིན་པས་མཐེའུ་ཆུང་སྦྲེལ། མཛུབ་མོ་བརྐྱངས་ཏེ་རྩེ་སྤྲད་པ་སྤྱི་བོར་བཟློག་ཅིང་། ༀ་བཛྲ་བེ་གཱ་ཀྲ་མ་ཧོཿ སྟ་གོན་གྱི་ལྷ་རྟེན་དང་བརྟེན་པར་བཅས་པ་ནམ་མཁར་བཞུགས་པར་གྱུར། རང་གི་དཔྲལ་བར་ༀ་སོགས་ཀྱིས་བསྲུང་བ་དང་། བསྔོ་བ་བཀྲ་ཤིས་བཅས་བྱ་བ་ནི་སྟ་གོན་ནོ། །གཉིས་པ་དངོས་གཞི་ནི། སྔར་གྱི་ཚོམ་བུའི་ཤུལ་དུ་འདིའི་རས་བྲིས་རབ་གནས་ཅན་ཞལ་ཤར་དུ་ཕྱོགས་པར་བཀྲམ་པའི་མཐར་མཆོད་གཏོར་སྟ་གོན་ལྟར་ལས། ཆ་གསུམ་ཕྱི་རོལ་དུ་བཏང་བའི་དབང་དུ་བྱས་ནས་འདིར་བཤམ་མི་དགོས། སློབ་མ་ལ་དགོས་པའི་རིན་ཆེན་སྲོག་ཞུ། རྩ་ཆིངས། དར་དཔྱངས་བཅས་དང་། ཤོག་བུ་ལ་མཚལ་གྱིས་བྲིས་པའམ་པར་བཏབ་པའི་རྡོ་རྗེ་དྲིལ་བུ་ཆུང་ངུ་རེ། མིག་རས། མེ་ཏོག་གུ་གུལ་དཀར་པོ། ཉེར་སྤྱོང་ཚན་པ་ལྔ། མིག་ཐུར། མེ་ལོང་། འབུད་དུང་། འཁོར་ལོ། པུསྟི། དྲིལ་བུ་སོགས་འདུ་བྱས་ལ་སྔོན་འགྲོའི་གཏོར་མ་མཆོད་པ་བྱིན་རླབས། བདག་བསྐྱེད་རྣམས་གོང་བཞིན་དང་། མདུན་བསྐྱེད་ནི་རས་བྲིས་བསང་སྦྱང་ནས་ཐུགས་ཀར་ཧཱུྃ་ཞེས་གནས་གསུམ་བྱིན་གྱིས་བརླབ་པའི་བར་འདྲ། དེ་ནས་ནམ་མཁའི་སྟ་གོན་གྱི་ལྷ་ལ་མཚན་སྔགས་རེ་རེ་ནས་སྦྱར་བའི་ཆུ་གཉིས་ཉེར་སྤྱོད་ཀྱིས་མཆོད་ལ་ཛཿཧཱུྃ་བྂ་ཧོཿམདུན་བསྐྱེད་ལ་བསྟིམ། ཆོ་ག་ཞག་སྦྲེལ་བྱེད་ན་དངོས་གཞི་གཉིས་པ་མན་ཆད་ལ་འདི་མི་དགོས་སོ། །གང་ལྟར་ཡང་རང་གི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་སོགས་ནས་རྡོ་རྗེ་སེམས་དཔའ་དབུར་བརྒྱན་ཞེས་པའི་བར་དང་། མཆོད་བསྟོད་རྒྱས་པ་སྟ་གོན་བཞིན་བྱས་ལ་མདུན་བསྐྱེད་ལ་དམིགས་ཏེ་ལྷ་སོ་སོའི་སྔགས་ཅི་ནུས་བཟླས་པའི་མཐར་རྟེན་དང་བརྟེན་པར་བཅས་པའི་དཀྱིལ་འཁོར་བ་ཐམསཅད་བརྟན་པར་བཞུགས་སུ་གསོལ། བརྟན་པར་བཞུགས་ནས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་བརྗོད། སྐབས་འདིར་གཟའ་ཡུམ་གྱི་གཟུངས་ཤེས་རབ་སྙིང་པོ་འདོན། ཁང་པའི་ཕྱི་རོལ་ལམ་དཀྱིལ་འཁོར་དང་ཡོལ་བས་ཆོད་པའི་སར་སྟེགས་ཀྱི་ཁར་གཏོར་མ་ཆ་གསུམ་ཞལ་ཟས་མ་གཏོགས་པའི་ཆུ་གཉིས་ཉེར་སྤྱོད་བཅས་བཤམས་ལ། འདས་གཏོར་ལྟར་བྱིན་གྱིས་རླབས་ཏེ་ཕྱོགས་སྐྱོང་འབྱུང་པོ། བགེགས་རྣམས་ལ་སྤྱི་ལྟར་བ་སྔོན་ནས་གཏོར་མ་རྣམས་གཙང་སར་དོར་རོ། །སྒོ་དྲུང་དུ་ཉེ་རེག་ཕྲེང་བ་བཞིན་བྱ་བའམ། མ་གྲུབ་ན་ཆུས་ཁ་བཤལ་ཙམ་བྱས་ལ་ནང་དུ་ལོག །དྲིལ་བུ་བསིལ་ཤིང་ཡིག་བརྒྱ་བཟླ་བ་དང་བཅས་པས་དཀྱིལ་འཁོར་པ་གསུམ་བྱས་པའི་མཐར། ཤར་སྒོ་ནས་མ་འབྱོར་པ་དང་ཉམས་པ་སོགས་ཀྱིས་བཟོད་པར་གསོལ་ཏེ་ཕྱག་བྱའོ། །དབང་བསྐུར་ཞག་སྦྲེལ་དགོས་ན་དངོས་གཞི་གཉིས་པ་མན་ཆད་ལ་སྐབས་འདིར་བུམ་པ་སྟ་གོན་ལྟར་སྒྲུབ། བདག་འཇུག་ནི། ལས་བུམ་གྱི་ཆུས་ཁྲུས་བྱ་ཞིང་། ཇི་ལྟར་བསྟམས་པ་སོགས་ནས་ཤྲཱི་ཡེ་ཧཱུྃ་ཞེས་པའི་བར་དང་། ༀ་བཛྲ་བྷུ་མི་སོགས་ནས་བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་ལ་དཀྱིལ་འཁོར་དུ་འཇུག་པའི་ཆོས་རྣམས་ཞུ་བའི་ཡོན་དུ་འབུལ་བར་བགྱིའོ་སོགས་དང་། དགའ་ཆེན་ཁྱོད་བདག་སོགས་ཀྱིས་གསོལ་བ་གདབ་པ་ནས་བཟུང་སློབ་མ་ལ་ཇི་ལྟར་བསྐུར་བའི་དབང་རྣམས་བདག་འཇུག་གི་ཚུལ་དུ་བླངས་ཏེ། སློབ་དཔོན་ཞེས་པའི་གནས་སུ་གཙོ་མོ་ཞེས་དང་། ཁྱེད་རང་རྣམས་ཞེས་པའི་ཚབ་ཏུ་རང་ཉིད་ཅེས་བསྒྱུར་པ་མ་གཏོགས་འདྲའོ། །དེ་ནས་རྡོ་རྗེ་དྲིལ་བུ་འཛིན་པས། བདེན་པ་གང་གིས་ཡེ་ཤེས་མཆོག །ཤེས་རབ་ཐབས་བདག་དཀྱིལ་འཁོར་གྱི། །བདེན་པ་དེ་ཡིས་མགོན་པོ་ཁྱོད། །འདོད་པ་བདག་ལ་ཡོངས་རྫོགས་མཛོད། །ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཡང་དག་འབྱུང་། །དེ་བཞིན་དེ་ཉིད་ངེས་པར་འབྱུང་། །བདེན་པ་དེ་ཡིས་དཀྱིལ་འཁོར་ནི། །གཟུགས་བརྙན་གསལ་བར་སློབ་མ་རྣམས། །ཀུན་གྱིས་སྒྲིབ་མེད་མཐོང་བར་ཤོག །ཅེས་བདེན་པའི་སྟོབས་ལན་གསུམ་བརྗོད། འདས་གཏོར་ཆབ་ཀྱིས་བྲན་ལ་སྟ་གོན་གྱི་སྐབས་ལྟར་མདུན་བསྐྱེད་ལ་ཕུལ། དེ་ནས་དཀྱིལ་འཁོར་ཡོལ་བས་བཅད་ལ་སློབ་མ་རྣམས་ཁྲུས་བྱས་མེ་ཏོག་བཀྱེ་བསྡུ་གྲུབ་པ་དང་། སློབ་དཔོན་གྱིས་སེམས་བསྐྱེད་གསལ་འདེབས་དང་། འདིར་གཟའ་ཐམས་ཅད་ཀྱི་ཡུམ་རྗེ་བཙུན་མ་རིག་པ་ཆེན་མོའི་དཀྱིལ་འཁོར་དུ་དབང་བསྐུར་བ་ལ་སྟ་གོན་དང་དངོས་གཞི་གཉིས་ལས་དངོས་གཞི་སྐབས་ཡིན། དེ་ལ་གཟུངས་འདིའི་ངོ་བོ་བྱ་རྒྱུད་དུ་བཞེད་ཀྱང་། དབང་གི་བབས་སྤྱོད་རྒྱུད་དང་མཐུན་པ་ཡིན་ཏེ། སྤྱོད་རྒྱུད་ཐམས་ཅད་ཀྱི་རྩ་བ་རྣམ་སྣང་མངོན་བྱང་ལས་ཆུ་དབང་དང་། ཐུར་མ་དང་། མེ་ལོང་དང་། ཆོས་བཤད་པའི་རྗེས་གནང་ཙམ་ཞིག་ལས་མ་གསུངས་ཀྱང་། བརྒྱུད་པའི་ཕྱག་བཞེས་ལ། ཡེ་ཤེས་ཐིག་ལེའི་ལུང་བཞིན་ཕྱག་རྡོར་དབང་བསྐུར་བའི་རྒྱུད་ནས་བསྟན་པའི་ཅོད་པན་དང་། རྡོ་རྗེ་དྲིལ་བུ་དང་། མིང་གི་དབང་རྣམས་དང་། སྔགས་ཀྱི་བཟླས་ལུང་དང་། དམ་ཚིག་བསྒོ་པ་བཅས་ཁ་བསྐངས་པ་མཛད་པ་ལ། སློབ་དཔོན་གྱི་བྱ་བ་འོས་པ་རྣམས་ནི་སྔོན་དུ་ལེགས་པར་གྲུབ་ཟིན་པ་ཡིན། ཁྱེད་རྣམས་ཀྱི་ངོ་སྐལ་དུ་གྱུར་པ་སློབ་མའི་བྱ་བ་ལ་འཇུག་པ་དང་བསྐུར་བ་གཉིས་ལས། དང་པོ་ནི། སློབ་དཔོན་ལ་རྗེ་བཙུན་མ་རིག་པ་ཆེན་མོའི་དངོས་ཡིན་སྙམ་པའི་མོས་གུས་དང་ལྡན་པའི་སྒོ་ནས་དཀྱིལ་འཁོར་དུ་འཇུག་པའི་ཆོས་རྣམས་ཞུ་བའི་ཡོན་དུ་མཎྜལ་ཞིག་འབུལ་བ ར་ཞུ། མེ་ཏོག་དང་བཅས་པའི་ཐལ་མོ་སྦྱར་ཏེ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། དགའ་ཆེན་ཁྱོད་བདག་སོགས། སློབ་དཔོན་གྱི་ཐུགས་ཀ་ནས་བདུད་རྩི་འཁྱིལ་པ་བསམ་གྱིས་མི་ཁྱབ་པ་སྤྲོས་ཏེ་དབང་ལེན་པ་ལ་བར་དུ་གཅོད་པའི་བགེགས་དང་ལོག་འདྲེན་ཐམས་ཅད་རྒྱང་རིང་དུ་བསྐྲོད་པར་མོས་པ་མཛོད། ཅེས་དང་ལས་བུམ་གྱི་ཆུ་འཐོར་ཞིང་ༀ་ཨམྲྀ་ཏེ་ཧཱུྃ་ཕཊ་ཅེས་བརྗོད། སླར་ཡང་གུ་གུལ་དཀར་པོས་བདུག་སྟེ་སྦྱངས་པའི་མོས་པར་མཛོད། ཧཱུྃ་ཧཱུྃ་ཞེས་བརྗོད་ཅིང་བདུག་སྤོས། དེ་ནས་སྔོན་ཆད་རྗེ་བཙུན་མའི་དཀྱིལ་འཁོར་དུ་མ་ཞུགས་པའི་བརྡར། རས་ཡུག་དམར་པོ་རེས་གདོང་བར་བཅིང་མོས། ༀ་ཙཀྵུ་བནྡྷ་ཝ་ར་མ་ནཱ་ཡ་ཧཱུྃ། ཞེས་པས་མིག་རས་དང་། དཀྱིལ་འཁོར་གྱི་ལྷ་དང་མཇལ་བ་ན་ཕྱག་སྟོང་པས་མཇལ་དུ་མི་བཏུབ་པས་ཕྱག་རྟེན་གྱི་སླད་དུ་མེ་ཏོག་ཕྲེང་བ་རེ་ཡང་བྱིན་པར། ཨཱ་ཁཾ་ཝཱི་ར་ཧཱུྃ། ཞེས་པས་སྦྱིན། རྒྱུན་བཤགས་སྔོན་དུ་འགྲོ་བའི་སོགས་ནས་རབ་ཏུ་བསྔོ་ཞེས་པའི་སྟ་གོན་ལྟར་རམ། དེ་ཙམ་མི་ནུས་ན། དཀོན་མཆོག་གསུམ་ལ་བདག་སྐྱབས་མཆི་སོགས་ལན་གསུམ་གྱིས་ཆོག །བདེན་གཉིས་སེམས་བསྐྱེད་པའི་སླད་དུ་ཁྱེད་རང་རྣམས་ཀྱི་སྙིང་གར་ཀུན་རྗོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་ཉ་གང་བ་ལྟ་བུ། དེའི་སྟེང་དུ་དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་འོད་ཟེར་འཕྲོ་བ་དང་བཅས་པ་ཞིག་གསལ་བཏབ་ནས། དེ་གཉིས་དབྱེར་མེད་དུ་སེམས་བསྐྱེད་སྙམ་དུ་མོས་པ་མཛོད། དེ་ཉིད་བརྟན་པའི་སླད་དུ་སྙིང་གར་རྡོ་རྗེ་བཞག་སྟེ། སུ་ར་ཏི་ས་མ་ཡ་སྟྭཾ་ཧོཿ སིདྡྷི་བཛྲ་ཡ་ཐཱ་སུ་ཁཾ། ཞེས་བརྗོད། སེམས་བསྐྱེད་པ་དེ་དང་། འོག་ནས་འབྱུང་བའི་གསང་སྔགས་ཀྱི་ཀུན་དུ་སྤྱོད་པ་རྣམས་དཀྱིལ་འཁོར་དུ་མ་ཞུགས་པ་ལ་མ་སྨྲ་ཞིག་ཅེས་གསང་བར་གདམས་པ་ནི། རྡོ་རྗེ་སྤྱི་བོར་བཞག་སྟེ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་རབ་ཏུ་ཞུགས་ཀྱི། དེ་བཞིན་གཤེགས་པ་ཐམས་ཅད་ཀྱི་གསང་ཆེན་དམ་པ་འདི་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་མ་ཞུགས་པ་རྣམས་ཀྱི་མདུན་དུ་སྨྲ་བར་མི་བྱ་སྟེ་མ་དད་པ་རྣམས་ལའང་མ་ཡིན་ནོ། །ཞེས་གསང་བར་གདམས་པ་དང་བཅས་པ་ནི་ཕྱིའི་འཇུག་པ་ཡིན། ནང་གི་འཇུག་པ་ལ་སློབ་དཔོན་གྱི་ལག་གི་རྡོ་རྗེ་ལ་འཇུས་ཏེ་དཀྱིལ་འཁོར་དྲུང་དུ་ཁྲིད་པར་མོས་ཏེ་དཀྱིལ་འཁོར་གྱི་ཕྱོགས་ལ་མགོ་བོ་དུད་ཙམ་དང་བཅས་པས་འདིའི་རྗེས་ཟློས་མཛོད། ཧཱུྃ་ཛཿཧཱུྃ་ཞེས་པས་དཀྱིལ་འཁོར་གྱི་ཤར་སྒོར་བཞག་པའི་མོས་པ་མཛོད། གནས་དེ་ཉིད་ནས་དཀྱིལ་འཁོར་གྱི་ལྷ་ཚོགས་རྣམས་ཀྱི་སྐུ་གསུང་ཐུགས་ལ་ཕྱག་བྱས་པར་མོས་ཏེ་ཐལ་མོ་གནས་གསུམ་དུ་སྦྱར་ཏེ་འདིའི་རྗེས་ཟློས་མཛོད། ༀ་ན་མ་སྟེ་ཧཱུྃ། ན་མ་མི་ཧཱུྃ། ན་མོ་ན་མ་ཧཱུྃ། ཞེས་ཕྱག་བྱས་ནས། ནང་འཇུག་གི་དངོས་བཞི་ཡེ་ཤེས་དབབ་པ་ཞུ་བའི་ཡོན་དུ་མཎྜལ་འབུལ་བར་ཞུ། དེ་ནས་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། དེ་བཞིན་གཤེགས་པ་ཐམས་ཅད་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་ནས་དམིགས་པ་འདི་བཞིན་དུ་མཛོད། ཁྱེད་རང་རྣམས་ཀྱི་སྤྱི་བོར་ཟླ་བའི་དཀྱིལ་འཁོར་གྱི་སྟེང་དུ་རཾ་ཡིག་དཀར་པོ་ཞིག་གསལ་བཏབ། དེ་ལས་འོད་ཟེར་བསམ་གྱིས་མི་ཁྱབ་པ་འཕྲོས། སྤྱི་བོ་ནས་ཞུགས་པས་ལུས་ཀྱི་ནང་ཐམས་ཅད་གང་བས་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་དག་ཅིང་ལུས་འོད་ཀྱི་རང་བཞིན་དུ་གྱུར་པ་ལས་རྗེ་བཙུན་མ་རིག་པ་ཆེན་མོའི་སྐུ། ཐུག ས་ཀར་ཟླ་བའི་དཀྱིལ་འཁོར་གྱི་སྟེང་དུ་ཧཱུྃཿཡིག་དཀར་པོ་ཞིག་དང་བཅས་པ་གསལ་བཏབ་ནས། སློབ་དཔོན་གྱི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་པས་མདུན་བསྐྱེད་ཀྱི་ལྷ་རྣམས་ཀྱི་ཐུགས་ཀར་ཕོག་པས་དེ་རྣམས་ཀྱི་ཐུགས་ཀ་ནས་འོད་ཟེར་ཕོ་ཉ་ལྟ་བུ་བསམ་གྱིས་མི་ཁྱབ་པ་འཕྲོས་པས། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ་ཏེ་ཐུགས་ཀ་ནས་ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོ་ཧཱུྃ་ཡིག་བསམ་གྱིས་མི་ཁྱབ་པ་བྱུང་སྟེ་ཁྱེད་རང་རྣམས་ཀྱི་སྙིང་གའི་ཧཱུྃ་ལ་ཐིམ་པར་མོས། དེ་བཞིན་དུ་མདུན་བསྐྱེད་དང་སློབ་དཔོན་གྱི་ཐུགས་ཀ་ནས་དེ་འདྲ་བ་བསམ་གྱིས་མི་ཁྱབ་པ་བྱུང་སྟེ་ཁྱེད་རྣམས་ཀྱི་སྙིང་གའི་ཧཱུྃ་ཡིག་ལ་ཐིམ་པས་སངས་རྒྱས་ཐམས་ཅད་ཀྱི་ཆོས་སྐུའི་ངོ་བོར་བྱིན་གྱིས་བརླབས་པར་མོས་པ་མཛོད། ཅེས་དང་ལག་པ་གཉིས་རྡོ་རྗེ་བསྡམས་པ་ལས་གུང་མོ་གཉིས་བསྒྲེང་བ་སློབ་མའི་སྤྱི་བོར་རེག་ཅིང་ༀ་སརྦ་བིདྱཻ་ཧཱུྃ་ཧཱུྃ་ཕཊ་ཕཊ་སྭཱ་ཧཱ་ཞེས་མང་དུ་བརྗོད་པ་ལས་རོལ་མོ་སོགས་མི་དགོས་སོ། །དེ་ཉིད་བརྟན་པའི་ཆེད་དུ་སྤྱི་བོར་རྡོ་རྗེ་རྒྱ་གྲམ་དུ་བཞག་སྟེ། ཏིཥྛ་བཛྲ་ཞེས་བརྗོད། དཀྱིལ་འཁོར་ལ་གསོལ་བ་གདབ་པ་ནི། སློབ་དཔོན་ཤར་སྒོར་ལངས་ཏེ་རྡོ་རྗེ་དྲིལ་བུ་འཛིན་པས། རྣམ་དག་དཀྱིལ་འཁོར་འདི་རུ་ནི། །བདག་གི་སློབ་མ་གཞུག་པར་བགྱི། །ལྷ་ཡི་རིགས་ཀྱི་རིམ་པ་དང་། །བསོད་ནམས་ཇི་ལྟར་དེ་ལྟ་ཤོག །འདི་ཡི་དངོས་གྲུབ་ཇི་འདྲར་འགྱུར། །རིགས་ནི་གང་གི་སྣོད་དུ་འགྱུར། །བསོད་ནམས་མཐུ་ཡང་ཅི་འདྲ་བར། །དེ་འདྲ་དཀྱིལ་འཁོར་དུ་གྱུར་ཅིག །ཅེས་ལན་གསུམ་གྱིས་གསོལ་བ་གདབ་པ་སྔོན་དུ་འགྲོ་བས་དཀྱིལ་འཁོར་ལ་མེ་ཏོག་དབུལ་བ་ནི། དཀྱིལ་འཁོར་བ་རྣམས་ཀྱང་སངས་རྒྱས་ཀྱི་ཡེ་ཤེས་གཅིག་གི་རྣམ་འཕྲུལ་ཡིན་པས་ངོ་བོ་ལ་བཟང་ངན་མེད་མོད་རང་གིས་ལས་བསགས་པའི་ལྷ་ཞིག་ལ་འབབ་པར་ཤོག་ཅིག་སྙམ་པས་རིམ་པར་བྱོན་ཏེ། ༀ་པྲ་ཏཱིཙྪ་བཛྲ་ཧོཿཞེས་གསུང་ཞིང་མེ་ཏོག་འབུལ་བའི་ཚུལ་མཛོད་ཅེས་མེ་ཏོག་འདོར་དུ་གཞུག །དེ་ཉིད་སློབ་དཔོན་གྱིས་བླངས་ནས་ཁྱེད་རྣམས་ཀྱི་སྤྱི་བོར་བཞག་སྟེ་བྱིན་གྱིས་བརླབས་པའི་མོས་པ་མཛོད། ༀ་པྲ་ཏི་གྲྀ་ཧྞ་བཛྲ་ས་མ་ཡ་ཧཱུྃ་ཞེས་པས་མེ་ཏོག་ཕྲེང་བའི་དབང་བསྐུར་ནས། རིག་པ་ཆེན་མོ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛོད། །ཕྱེ་བས་ཐམས་ཅད་མཐོང་འགྱུར་བའི། །རྡོ་རྗེའི་མིག་ནི་བླ་ན་མེད། །ཧེ་བཛྲ་པཱ་ཤྱ། ཞེས་པས་མིག་རས་དང་མ་རིག་པའི་ལིང་ཏོག་དུས་མཉམ་དུ་བསལ་ནས་དཀྱིལ་འཁོར་ལ་བལྟ་བར་བསྐུར་བ་ནི། དཀྱིལ་འཁོར་བཟང་པོ་འདི་ལ་ལྟོས། །ད་ནི་དད་པ་རབ་ཏུ་སྐྱེད། །ཁྱོད་ནི་སངས་རྒྱས་རིགས་སུ་སྐྱེས། །སྔགས་དང་ཕྱག་རྒྱས་བྱིན་གྱིས་བརླབས། །འགྲོ་བའི་ཕུན་ཚོགས་དངོས་གྲུབ་ཀྱང་། །ཐམས་ཅད་ཁྱེད་ལ་མངོན་དུ་འགྱུར། །དངོས་གྲུབ་ཕྱིར་ན་དམ་ཚིག་སྲུང་། །གསང་སྔགས་དག་ལའང་བརྩོན་པར་གྱིས། །ཞེས་བལྟ་བར་བསྐུལ་ནས། དཀྱིལ་འཁོར་གྱི་ལྷ་ངོ་བསྟན་པ་ནི། འདི་ན་རྗེ་བཙུན་མ་རིག་པ་ཆེན་མོའི་དཀྱིལ་འཁོར་བཞུགས་པ་ཡིན་ཏེ། ཕྱི་རོལ་དུ་མེ་རི་རབ་ཏུ་འབར་བས་བསྐོར་བའི་སྲུང་བའི་འཁོར་ལོའི་ནང་དུ་སྣ་ཚོགས་པདྨ་དང་ཉི་མའི་དཀྱིལ་འཁོར་གྱི་སྟེང་དུ་སྣ་ཚོགས་རྡོ་རྗེའི་སྟེགས་བུ་ལ་གནས་པའི་ཐར་པ་ཆེན་པོའི་གཞལ་ཡས་ཁང་གྲུ་བཞི་སྒོ་བཞི་རྟ་བབས་བཞིས་མཛེས་པ། སྟེང་ཐོག་རིམ་པ་གསུམ་དུ་ཕུབ་ཅིང་རྒྱན་ཐམས་ཅད་ཀྱིས་བརྒྱན་པ། མཚན་ཉིད་ཐམས་ཅད་ཡོངས་སུ་རྫོགས་པའི་ལྷ་རྣམས་ཕྱོགས་ཀྱི་མདོག་ཅན་གྱི་དབུས་སུ་སྡོང་བུ་ཅུང་ཟད་དང་བཅས་པའི་སྣ་ཚོགས་པདྨ་འདབ་མ་བརྒྱད་པའི་ལྟེ་བར་ཟླ་བའི་དཀྱིལ་འཁོར་ལ་སོགས་པ་སོ་སོའི་གདན་དང་བཅས་པ་ནི་རྟེན་གཞལ་ཡས་ཁང་པ་ཡིན་ལ། དབུས་སུ་རྗེ་བཙུན་མ་རིག་པ་ཆེན་མོ་སྐུ་མདོག་སྟོན་ཟླ་ལྟར་དཀར་བ་ཞལ་གསུམ་ཕྱག་དྲུག་མ། དེའི་མདུན་དུ་གཟའ་ཉི་མ་དམར་པོ་བཀའ་ནོད་པའི་ཚུལ་དུ་གནས་པ། འདབ་མ་བརྒྱད་ལ་ཤར་དུ་ཟླ་བ་དཀར་པོ། ཤར་ལྷོར་མིག་དམར་པོ་ལྷོར་གཟའ་ལྷག་ལྗང་གུ། ལྷོ་ནུབ་ཏུ་ཕུར་བུ་སེར་པོ། ནུབ་ཏུ་པ་ཝ་སངས་དཀར་པོ། ནུབ་བྱང་དུ་སྤེན་པ་ནག་པོ། བྱང་དུ་སྒྲ་གཅན་དམར་ནག །བྱང་ཤར་དུ་འཇུག་རིངས་དུད་སྤྲིན་གྱི་མདོག་ཅན། ཤར་སྒོར་སངས་རྒྱས་བཅོམ་ལྡན་འདས་སྐུ་མདོག་གསེར་བཙོ་མ་ལྟ་བུ། ལྷོ་སྒོར་ཕྱག་ན་རྡོ་རྗེ་སྔོན་པོ། ནུབ་སྒོར་འཇིག་རྟེན་དབང་ཕྱུག་དཀར་པོ། བྱང་སྒོར་འཇམ་དཔལ་གུར་གུམ་གྱི་མདོག་ཅན། ཕྱིའི་ཁོར་ཡུག་ལ་ཤར་དུ་ཡུལ་འཁོར་སྲུང་ལྗང་གུ། ལྷོར་འཕགས་སྐྱེས་པོ་སྔོན་པོ། ནུབ་ཏུ་མིག་མི་བཟང་དམར་པོ། བྱང་དུ་རྣམ་ཐོས་སྲས་སེར་པོ་བྱང་ཤར་དུ་གཟའ་རྣམས་དང་། ཤར་ལྷོར་ཁྱིམ་དང་རྒྱུ་སྐར་རྣམས་དང་། ལྷོ་ནུབ་ཏུ་གནོད་པ་རྣམས་དང་། ནུབ་བྱང་དུའང་རྗེ་བཙུན་མ་ཉིད་བཞུགས་པ་ནི་བརྟེན་པ་ལྷ་སྟེ། མདོར་ན་རྗེ་བཙུན་མ་གཟའ་ཐམས་ཅད་ཀྱི་ཡུམ་རིག་པ་ཆེན་མོའི་དཀྱིལ་འཁོར་པ་དང་མངོན་སུམ་དུ་མཇལ་སྙམ་དུ་མོས་པ་མཛོད། དེ་འཇུག་པའི་ཆོས་རྣམས་གྲུབ། ཞུགས་ནས་མངོན་པར་དབང་བསྐུར་བ་ལ་གཉིས་ལས། དང་པོར་རྡོ་རྗེ་སློབ་མའི་དབང་ཞུ་བའི་ཡོན་དུ་མཎྜལ་ཕུལ་མཛོད། དེ་ནས་གསོལ་བ་འདེབས་པ་འདིའི་རྗེས་ཟློས་མཛོད། བྱང་ཆུབ་རྡོ་རྗེ་སོགས་ལན་གསུམ། ཞེས་གསོལ་བ་བཏབ་ནས་དམིགས་པ་འདི་བཞིན་དུ་མཛོད། དཀྱིལ་འཁོར་གྱི་ཤར་ཕྱོགས་སུ་ཁྲུ་དོ་ཙམ་སྤགས་པའི་དབང་སྟེགས་ཀྱི་དཀྱིལ་འཁོར་གྲུ་བཞི་རྟ་བབས་དང་བྲལ་བ་དཀར་དམར་ནག་པའི་ར་བ་རིམ་པ་གསུམ་དང་ལྡན་པའི་ནང་དུ་པདྨ་འདབ་མ་བརྒྱད་པར་བཀྲ་ཤིས་རྟགས་ཀྱིས་མཛེས་པའི་དབུས་སུ་ཤིང་སྟན་ཟླ་བའི་དཀྱིལ་འཁོར་དང་བཅས་པའི་སྟེང་དུ་བླ་བྲེ། གཡས་སུ་གདུགས། གཡོན་དུ་རྒྱལ་མཚན་མཐའ་སྐོར་དུ་དུང་དང་། འཕན་དང་། མེ་ཏོག་གི་ཕྲེང་བ་ལ་སོགས་པ་མཆོད་པའི་ཚོགས་ཀྱིས་གང་བའི་སྟེང་དུ་ཧཱུྃ་དཀར་པོ་ལས་ཁྱེད་རང་རྣམས་རྗེ་བཙུན་མ་རིག་པ་ཆེན་མོ་སྐུ་མདོག་སྟོན་ཟླ་ལྟར་དཀར་བ་ཞལ་གསུམ་ཕྱག་དྲུག་མ། རྩ་ཞལ་དཀར་བ། གཡས་ཞལ་གནག་པ། གཡོན་ཞལ་དམར་བ། ཞལ་རེ་རེ་ལ་སྤྱན་གསུམ་གསུམ་མངའ་བ། ཕྱག་དང་པོ་གཉིས་ཀྱིས་ཆོས་འཆད་ཀྱི་ཕྱག་རྒྱ་མཛད་པ། གཡས་ཀྱི་གཉིས་པ་ན་རྡོ་རྗེ། གསུམ་པ་ན་མདའ། གཡོན་གྱི་གཉིས་པ་ན་པདྨ། གསུམ་པ་ན་གཞུ་བསྣམས་པ། རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། དར་སྣ་ཚོགས་ཀྱི་ན་བཟའ་ཅན། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དེའི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རྗེ་བཙུན་མ་རིག་པ་ཆེན་མོའི་རྣམ་པར་ཨཱོཾ་བཛྲ་ས་མ་ཛཿ ཛཿཧཱུྃ་བྂ་ཧོཿ ཁྱོད་རྣམས་ལ་ཐིམ། སློབ་དཔོན་གྱི་ཐུགས་ཀའི་ས་བོན་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་སངས་རྒྱས་དང་བྱང་ཆུབ་སེམས་དཔའ། ལྷ་དང་། དྲང་སྲོང་རིག་པ་འཛིན་པའི་ཚོགས་དང་བཅས་པ་མདུན་གྱི་ནམ་མཁར་ༀ་བཛྲ་ས་མ་ཛཿ དེ་ལ་སློབ་དཔོན་གྱིས་ༀ་པཉྩ་ཀུ་ལ་ས་པ་རི་ཝཱ་ར་ཨརྒྷཾ་ནས་ཤབྡ་པྲ་ཏི ཙྪ་སྭཱ་ཧཱའི་བར་གྱིས་མཆོད་ནས། དེ་རྣམས་ཀྱི་ཁྱེད་རྣམས་ལ་རྒྱལ་བར་གྱུར་ཅིག །རྒྱལ་བར་གྱུར་ཅིག་ཅེས་བརྗོད་པ་དང་། སློབ་དཔོན་དཀྱིལ་འཁོར་གྱི་ལྷ་ཚོགས་དང་བཅས་པས་རྣམ་པར་རྒྱལ་བའི་བུམ་པ་བཏེགས་ཏེ་མེ་ཏོག་གི་ཆར་ཕབ་ཅིང་བཀྲ་ཤིས་ཀྱིས་མངའ་གསོལ་བའི་མོས་པ་མཛོད། ཅེས་དང་མཆོད་གཡོག་པས་བུམ་པ་འདེགས། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ་ཞེ་ཤཱོ་ཀ་གསུམ་གྱི་མཐར། རྡོ་རྗེ་སློབ་མ་རྣམས་སྤང་བྱ་མི་མཐུན་པའི་ཕྱོགས་ཐམས་ཅད་ལས་རྒྱལ་ནས་ཤིན་ཏུ་བཀྲ་ཤིས་པར་གྱུར་ཅིག །ཅེས་བརྗོད། དེ་ནས་ནམ་མཁར་བཞུགས་པའི་དབང་གི་ལྷ་ལ་གསོལ་བ་འདེབས་པ་འདིའི་རྗེས་ཟློས་མཛོད། །བཅོམ་ལྡན་དེ་བཞིན་གཤེགས་པ་ཀུན། །བཅོམ་ལྡན་བདག་ཉིད་ཆེན་པོ་རྣམས། །ཐུགས་རྗེའི་རང་བཞིན་ཅན་རྣམས་ཀྱི། །ཁྱེད་ཀྱིས་བདག་ལ་དབང་བསྐུར་སྩོལ། །ཞེས་གསོལ་བ་བཏབ་པས། སྐུར་བྱེད་ནམ་མཁའི་དཀྱིལ་འཁོར་པ་རྣམས་དང་སློབ་དཔོན་ལྷན་ཅིག་པས་བུམ་པ་ཡེ་ཤེས་ཀྱི་བདུད་རྩིས་གང་བ་ཐོགས་ཏེ་སྤྱི་བོ་ནས་དབང་བསྐུར་བའི་མོས་པ་མཛོད། ཇི་ལྟར་བལྟམས་པ་སོགས་ནས་ཤྲཱི་ཡེ་ཧཱུྃ་ཞེས་གསུང་ཞིང་དབང་བསྐུར་བས་ཚེ་རབས་ཐོག་མ་མེད་པ་ནས་བསགས་པའི་སྡིག་སྒྲིབ་བག་ཆགས་དང་བཅས་པ་ཐམས་ཅད་དག་ནས་རྗེ་བཙུན་མའི་སྐུར་བརྟེན་པར་བྱས་པའི་མོས་པ་མཛོད། དེ་ལ་སློབ་དཔོན་གྱི་ༀ་བཛྲ་པུཥྤེ་ཨཱཿཧཱུྃ་སོགས་ནས་ནཻ་ཝི་དྱེ་ཨཱཿཧཱུྃ་ཞེས་མཆོད་པ་དང་བཅས་པ་ནི་ཆུའི་དབང་ངོ་། །ཅོད་པན་གྱི་དབང་ཞུ་བའི་སླད་དུ་ནམ་མཁར་བཞུགས་པའི་ལྷ་ལ་གསོལ་བ་འདེབས་པ་འདིའི་རྗེས་ཟློས་མཛོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཞེས་དང་། སྐུར་བྱེད་ནམ་མཁའི་དཀྱིལ་འཁོར་པ་རྣམས་དང་སློབ་དཔོན་ལྷན་ཅིག་པས་རིན་པོ་ཆེའི་རྩེ་ཕྲན་རེ་ཐོགས་ནས་དབང་བསྐུར་བའི་མོས་པ་མཛོད། ཐོར་ཅོག་ཅོད་པན་གྱིས་བརྒྱན་པའི། རིན་ཆེན་རྩེ་ཕྲན་དམ་པ་དང་། །དར་དཔྱངས་དབང་བསྐུར་སྦྱིན་པར་བྱ། །སངས་རྒྱས་དབང་བསྐུར་རབ་སྒྲུབ་ཕྱིར། །བུ་ཡིས་ཡང་དག་གུས་པས་ཟུངས། །ༀ་སརྦ་ཏ་ཐཱ་ག་ཏ་རཏྣ་མུ་ཀུ་ཊ་ཨ་བྷི་ཥིཉྩ་ཧཱུྃ་ཞེས་པས་ཅོད་པན་བཅིངས་ལ། སླར་ཡང་མེ་ཏོག་གི་ཕྲེང་བ་དང་དར་དཔྱངས་ཀྱང་བྱིན་པའི་མོས་པ་མཛོད། ༀ་སརྦ་ཏ་ཐཱ་ག་ཏ་པུཥྤཾ་མཱ་ལ་པ་ཊ་ལཾ་ཨབྷི་ཥིཉྩ་ཧཱུྃ། དེ་ལ་ༀ་བཛྲ་པུཥྤེ་སོགས་ལྔས་མཆོད་པ་དང་བཅས་པ་ནི་ཅོད་པན་གྱི་དབང་ངོ་། །རྡོ་རྗེ་དྲིལ་བུའི་དབང་ཞུ་བའི་སླད་དུ་གསོལ་བ་འདེབས་པ་འདིའི་རྗེས་ཟློས་མཛོད། དེ་བཞིན་གཤེགས་པ་ཐམས་ཅད་ཀྱི་སོགས་ཞེས་གསོལ་པས། བསྐུར་བྱེད་ནམ་མཁའི་དཀྱིལ་འཁོར་དང་སློབ་དཔོན་ལྷན་ཅིག་པས་དཀྱིལ་འཁོར་གྱི་གཙོ་མོའི་ཐུགས་ཀ་ནས་ཡེ་ཤེས་ཀྱི་རང་བཞིན་རྡོ་རྗེ་དང་དྲིལ་བུ་ནས་འབྲས་ཙམ་རེ་བྱུང་སྟེ། ཁྱེད་རྣམས་ཀྱི་ཕྱག་གཡས་དང་གཡོན་གྱི་སྲིན་ལག་གི་རྩ་བར་བྱིན་པའི་མོས་པ་མཛོད། ༀ་མ་ཧཱ་བཛྲ་ཧཱུྃ་ཨ་བྷི་ཥིཉྩ་ཞེས་པས་རྡོ་རྗེ་དང་། ༀ་བཛྲ་གྷ་ཎྜེ་ཨཿཨ་བྷི་ཥིཉྩ་ཞེས་པས་དྲིལ་བུ་བྱིན། དེ་ལྟར་ན་རྡོ་རྗེ་དྲིལ་བུ་ནས་འབྲས་ཙམ་པ་ནི་གསང་བའི་དབང་སྟེ་ཁྱོད་རྣམས་ཀྱི་རྒྱུད་ལ་སྙིང་རྗེ་དང་སྟོང་པ་ཟུང་དུ་འཇུག་པའི་ཡེ་ཤེས་ཀྱི་རྟོགས་པ་རྒྱུད་ལ་སྐྱེས་ཤིང་། དེ་བཞིན་གཤེགས་པ་ཐམས་ཅད་ཀྱི་ཕྱག་མཚན་གྱི་དབང་ཐོབ་པའི་མོས་པ་མཛོད། དེ་ལ་ༀ་བཛྲ་པུཥྤེ་སོགས་ལྔས་མཆོད་དང་བཅས་པ་ནི་རྡོ་རྗེ་དང་དྲིལ་བུའི་དབང་ངོ་། །མིང་གི་དབང་ཞུ་བའི་སླད་དུ་གསོལ་བ་འདེབས་པ་འདིའི་རྗེས་ཟློས་མཛོད། དེ་བཞིན་གཤེགས་པ་སོགས། ཞེས་གསོལ་བ་བཏབ་ནས། སྐུར་བྱེད་ནམ་མཁའི་དཀྱིལ་འཁོར་དང་སློབ་དཔོན་ལྷན་ཅིག་པས་མིང་གི་དབང་བསྐུར་བའི་མོས་པ་མཛོད། རྡོར་དྲིལ་ལྷན་ཅིག་ཏུ་སྤྱི་བོར་དཀྲོལ་ཏེ་ༀ་སརྦ་བིདྱཻ་ནཱ་མ་ཞེས་བརྗོད། དེ་ལ་ༀ་བཛྲ་པུཥྤེ་སོགས་ལྔས་མཆོད་པ་དང་བཅས་པ་ནི་མིང་གི་དབང་ངོ་། །གཉིས་པ་རྡོ་རྗེ་སློབ་དཔོན་གྱི་དབང་ཞུ་བའི་ཡོན་དུ་མཎྜལ་འབུལ། དེ་ནས་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། གང་གི་བདག་ཉིད་ཁྱོད་དྲིན་ལས། །རང་དང་གཞན་དོན་ནུས་གྱུར་པ། །རྡོ་རྗེ་སློབ་དཔོན་གྱི་ནི་དབང་། །ཐུགས་རྗེའི་གཏེར་གྱི་བདག་ལ་སྩོལ། །ཞེས་གསོལ་བ་བཏབ་ནས་གོང་དུ་སྨོས་པའི་དབང་སྟེགས་ཀྱི་སྟེང་དུ་ཁྱེད་རང་རྣམས་ཐུབ་པ་རྣམ་པར་སྣང་མཛད་བྱང་ཆུབ་མཆོག་གི་ཕྱག་རྒྱ་ཅན་རྒྱན་ཐམས་ཅད་ཀྱིས་བརྒྱན་པ། རྡོ་རྗེ་སྐྱིལ་ཀྲུང་གིས་བཞུགས་པའི་དཔྲལ་བར་ༀ། མགྲིན་པར་ཨཱཿཐུགས་ཀར་ཧཱུྃ་གིས་མཚན་པ། སྟེང་དུ་བླ་བྲེ་གཡས་གཡོན་དུ་གདུགས་དང་རྒྱལ་མཚན་ལ་སོགས་པ་མཆོད་པའི་ཡོ་བྱད་བསམ་གྱིས་མི་ཁྱབ་པས་བསྐོར་ཏེ་བཞུགས་པ་ལ། སྐུར་བྱེད་ནམ་མཁའི་དཀྱིལ་འཁོར་དང་། སློབ་དཔོན་ལྷན་ཅིག་པས་ཆུ་དང་ཅོད་པན་གྱི་དབང་བསྐྱར་ནས་བསྐུར་བའི་མོས་པ་མཛོད། རྣམ་རྒྱལ་བུམ་པ་སྤྱི་བོར་བཞག་སྟེ། དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་ཀུན་གྱི་ཕྱག་བྱས་པ། །སངས་རྒྱས་ཀུན་གྱི་གསང་གསུམ་རྒྱ། །གནས་ལས་བྱུང་བ་སྦྱིན་པར་བྱ། །ༀ་བཛྲ་བྷ་ཝ་ཨ་བྷི་ཥིཉྩ་ཧཱུྃ་ཞེས་བརྗོད། རྒྱས་པར་སྤྲོན། བུམ་ཆུ་འཐོར་ཞིང་ལྷ་སོ་སོའི་སྔགས་ལ་ཨ་བྷི་ཥིཉྩ་ཞེས་བཏགས་པ་བརྗོད་པ་ནི་ཆུ་དབང་ངོ་། །སློབ་དཔོན་གྱི་ལག་པ་གཉིས་རྡོ་རྗེ་བསྡོམས་པ་ལས་གུང་མོ་གཉིས་བསྒྲེང་བ་དེ་བཞིན་གཤེགས་པའི་རིགས་ཀྱི་དམ་ཚིག་གི་ཕྱག་རྒྱ་ཁྱེད་རྣམས་ཀྱི་སྤྱི་བོར་བཞག་སྟེ། ༀ་སརྦ་ཏ་ཐཱ་ག་ཏོ་བྷ་ཝ་ཨ་བྷི་ཥིཉྩ། ཞེས་དབང་བསྐུར་བས་སྤྱི་བོར་རྡོ་རྗེ་སེམས་དཔས་དབུ་བརྒྱན་པའི་མོས་པ་བྱ་བ་ནི། ཅོད་པན་གྱི་དབང་ངོ་། །དེ་ལ་ༀ་སུ་པྲ་ཏིཥྛ་བཛྲ་ཡེ་སྭཱ་ཧཱ། ཞེས་སློབ་དཔོན་དཀྱིལ་འཁོར་པ་དང་བཅས་པས་རབ་ཏུ་གནས་པར་བྱས་པའི་མོས་པ་མཛོད། སློབ་དཔོན་གྱིས་མངའ་དབུལ་གྱི་ཚུལ་དུ་ༀ་བཛྲ་པུཥྤེ་སོགས་ལྔས་མཆོད་ནས། རྗེས་སུ་གནང་བ་མདོར་བསྡུས་ཏེ་སྤྱིན་པ་ནི། དེ་རིང་རྡོ་རྗེ་སློབ་དཔོན་གྱུར། །སྔགས་དང་རྒྱུད་རྣམས་འཛིན་གྱུར་པའི། །སངས་རྒྱས་བྱང་ཆུབ་སེམས་དཔའ་དང་། །ལྷ་རྣམས་ཀུན་གྱི་བཞེད་པ་ཡིན། །ཞེས་ཏེ་དེའི་དོན་ནི་ཁྱེད་རྣམས་སྔགས་རྒྱུད་མན་ངག་འཛིན་པའི་རྡོ་རྗེ་སློབ་དཔོན་ཆེན་པོར་སངས་རྒྱས་དང་བྱང་ཆུབ་སེམས་དཔའ་དཀྱིལ་འཁོར་གྱི་ལྷ་ཚོགས་རྣམས་ཀྱིས་མཐུན་པར་བཞེད་པ་ཡིན་ཞིང་། བུ་སྡུག་པ་ལྟར་ཡོངས་སུ་དགོངས་པའི་ཕྱིར། དེང་ཕྱིན་ཆད་སེམས་ཅན་རྣམས་ལ་སྙིང་བརྩེའི་སྒོ་ནས། རྡོ་རྗེ་སློབ་དཔོན་གྱི་ལས་སུ་བྱ་བ་རྣམས་ཚུལ་བཞིན་དུ་སྒྲུབས་ཏེ། སེམས་ཅན་གྱི་དོན་རྒྱ་ཆེན་པོ་གྱིས་ཤིག་ཅེས་པའི་དོན་ཡིན་ནོ། །སྐབས་འདིར་ཅོད་པན་སོགས་བསྡུའོ། །མཐའ་རྟེན་ལ་ཟོག་མར་སྔགས་ཀྱི་བཟླས་ལུང་ནི། སློབ་དཔོན་ལ་མོས་གུས་བྱས་པས་སློབ་དཔོན་གྱི་ཐུགས་ཀའི་ས་བོན་གྱི་མཐར་སྔགས་ཀྱིས་བསྐོར་བ་ལས་སྔགས་ཕྲེང་གཉིས་པ་བྱུང་ཞལ་ནས་འཐོན། ཁྱེད་རྣམས་ཀྱི་ཞལ་དུ་ཞུགས། ཐུགས་ཀར་ཧཱུྃ་ཡིག་གི་མཐར་འཁོད་པའི་མོས་པ་བྱས་ཏེ་མེ་ཏོག་དང་བཅས་པའི་ཐལ་མོ་སྦྱར་ཏེ་འདིའི་རྗེས་ཟློས་ལན་གསུམ་མཛོད། ༀ་སརྦ་བི་དྱཻ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་དང་དེ་ལྟར་བྱས་པའི་དང་པོར་རྒྱུད་བྱིན་གྱིས་རླབས། གཉིས་པས་དཔྱོད་དུ་བྱས། གསུམ་པས་བརྟན་པར་བྱས་པ་མོས་ནས་དྲིན་ལན་གྱིས་ཚུལ་དུ་མེ་ཏོག་གཏོར་ནས་འདིའི་རྗེས་ཟློས་མཛོད། བཅོམ་ལྡན་བདག་ལ་སྩལ་ལགས་ཀྱིས། །བདག་ལ་འགོ་པར་མཛད་དུ་གསོལ། །ཞེས་ལན་གསུམ། སློབ་དཔོན་གྱིས་ཀྱང་མེ་ཏོག་གི་ཕྲེང་བ་སྔགས་ཀྱི་རང་བཞིན་དུ་བྱས་ཏེ་ཁྱེད་རྣམས་ཀྱི་དབུ་ལ་བཞག་པའི་མོས་པ་མཛོད། །བཅོམ་ལྡན་འདི་ལ་སྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །ཞེས་ལན་གསུམ་བརྗོད། རྗེས་སུ་གནང་བ་ནི། མིག་ཐུར་རམ་མེད་ན་རྡོ་རྗེ་ལ་ༀ་སརྦ་བིདྱཻ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་པས་མངོན་པར་བསྔགས་པའི་བྲི་ལས་བྱུང་བའི་ཤེས་རབ་ཀྱི་ཕ་རོལ་ཏུ་ཕྱིན་མའི་རང་བཞིན་ཅན་གྱི་ཐུར་མས་ཁྱེད་རྣམས་ཀྱི་སོགས་དང་། ཐུར་མ་མེད་ན་ཧཱུྃ་ལས་བྱུང་བའི་ཡེ་ཤེས་ཀྱི་རྡོ་རྗེས་ཁྱེད་རྣམས་ཀྱི་མིག་གི་ཐད་ཀར་བྱུགས་པས་མ་རིག་པའི་ལིང་ཐོག་བསལ་ནས་སེམས་ཅན་གྱི་དོན་ལ་འཇུག་པའི་མཐུ་དང་ལྡན་པར་བྱས་པ་ཡིན་སྙམ་དུ་མོས་པ་མཛོད། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་ལིང་ཐོག་བསལ་བ་ལྟར། །བུ་ཁྱོད་ཀྱི་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ༀ་བཛྲ་ནེ་ཏྲ་ཨ་ཧ་ར་ཊ་ཧྲཱིཿཔྲཾ། ཞེས་པས་སེམས་ཅན་གྱི་དོན་ལ་འཇུག་པའི་མཐུ་དང་ལྡན་པར་བྱས་ནས་ཆོས་ཅན་གྱི་སྣང་བ་ཐམས་ཅད་མེ་ལོང་ནང་གི་གཟུགས་བརྙན་ལྟར་ཤེས་པའི་སྒོ་ནས་སེམས་ཅན་གྱི་དོན་གྱིས་ཤིག་ཅེས་ཤེས་པའི་སླད་དུ་ཨ་ལས་སྐྱེས་པའི་མེ་ལོང་བསྟན་ཏེ། ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོགས་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་འབྱུང་། །ངོ་བོ་ཉིད་མེད་གནས་མེད་པ། །དེ་ལྟར་ཆོས་རྣམས་ཤེས་གྱིས་ལ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སྐྱོབ་པའི་སྲས་སུ་སྐྱེ། །ཞེས་པ་དེ་དག་ནི་ཆོས་བཤད་པའི་རྗེས་གནང་ངོ་། །དེ་ནས་ༀ་བཛྲ་ཧེ་མཱ་ཞེས་པས་ཞབས་ཀྱི་འོག་འཁོར་ལོ་བྱིན་ཏེ་སེམས་ཅན་འཁོར་བ་ལས་དྲངས་ཤིག་ཅེས་པའི་དོན་ཡིན། འདྲེན་ལུགས་ཇི་ལྟར་བྱེད་ཅེ་ན་ༀ་བཛྲ་བྷ་གྷ་རཾཿ ཞེས་པས། ཕྱག་གཡས་སུ་དུང་བྱིན་ཏེ། དུང་བུས་ལ་སེམས་ཅན་འཁོར་དུ་སྡུས་ཤིག་ཅེས་པའི་དོན་ཡིན། འཁོར་དུ་བསྡུས་ནས་ཅི་བྱེད་ཅེ་ན། ༀ་བཛྲ་གྷཎྜེ་ཨཱཿ ཞེས་པས་ཕྱག་གཡོན་དུ་དྲིལ་བུ་བྱིན་ཏེ་ཆོས་ཀྱི་སྒྲ་སྒྲོགས་ཤིག་ཅེས་པའི་དོན་ཡིན། ཆོས་ཇི་འདྲ་ཞིག་གི་སྒྲ་སྒྲོགས་ན་ཨཱཿཞེས་པས་ལག་དར་གྱི་སྟེང་དུ་རྒྱུད་ཀྱི་གླེགས་བམ་བྱིན་ཏེ་འདིའི་སྒྲ་སྒྲོགས་པར་གྱིས་ཤིག་ཅེས་པའི་དོན་ཡིན་པས་ན། དེ་ལྟར་ངེས་པའི་སྒོ་ནས་དུང་འབུད་པ་དང་། དྲིལ་བུ་འཁྲོལ་བ་དང་གླེགས་བམ་ཀློག་པའི་ཚུལ་མཛད་དོ ། །ཅེས་དང་། དེང་ནས་བརྩམས་ཏེ་སེམས་བསྐྱེད་པ། །ཙམ་གྱིས་ཆོས་ཀྱི་འཁོར་ལོ་བསྐོར། །ཁྱེད་ཀྱིས་ཐེ་ཚོམ་དོགས་མེད་པར། །ཡིད་གཉིས་མེད་པའི་སེམས་ཀྱིས་སུ། །ཆོས་ཀྱི་དུང་ནི་བླ་མེད་པ། །དྲི་མེད་ཀུན་ཏུ་གང་བར་གྱིས། །སྔགས་སྤྱོད་ཚུལ་གྱི་ཆོ་ག་ཡིས། །སྐྱེ་བོ་རྣམས་ལ་རྟག་ཏུ་ཤོད། །དེ་ལྟར་བྱས་ན་སངས་རྒྱས་ལ། ཕན་འདོགས་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཡང་། །ཁྱོད་ལ་རྟག་ཏུ་བསྲུང་བར་མཛོད། །ཅེས་པ་ན་ཆོས་བཤད་པའི་རྗེས་གནང་ངོ་། །དེ་ནས་ཁྱེད་རྣམས་རྗེ་བཙུན་མའི་ང་རྒྱལ་གྱིས་གདུགས་དཀར་པོ་གསེར་གྱི་ཡུ་བ་ཅན་རེ་ཐོགས་ཏེ་དཀྱིལ་འཁོར་ལ་བསྐོར་བ་ལན་གསུམ་བྱས་པའི་རྗེས་སུ་ཤར་སྒོ་ནས་གདུགས་གཡས་ལོགས་སུ་བཞག་སྟེ་ལུས་ཀྱི་ཕྱག་བྱས་པའི་མཐར་སློབ་དཔོན་གྱིས་ཁྱེད་རང་རྣམས་དཀྱིལ་འཁོར་བ་ལ་ཕུལ་བར་མོས་ཏེ་དབུ་དུད་ཙམ་རེ་མཛོད། སྔགས་དང་རྒྱུད་རྣམས་འཛིན་འགྱུར་པའི། །སློབ་མ་འདི་ནི་འབུལ་བ་ལགས། །ཞེས་ཕུལ་བས་དཀྱིལ་འཁོར་པ་ཐམས་ཅད་ཀྱིས་མགྲིན་གཅིག་ཏུ་ད་ནི་དཀྱིལ་འཁོར་སློབ་དཔོན་གྱུར། སྔགས་དང་རྒྱུད་རྣམས་འཛིན་འགྱུར་བ། །སངས་རྒྱས་བྱང་ཆུབ་སེམས་དཔའ་དང་། །ལྷ་རྣམས་ཀྱི་ནི་ཀུན་གྱིས་བསྐུར། །སེམས་ཅན་རྣམས་ལ་སྙིང་བརྩེའི་ཕྱིར། །ཁྱོད་ཀྱིས་དཀྱིལ་འཁོར་ཆོ་ག་བཞིན། །ནན་ཏན་བསྐྱེད་དེ་དྲི་བར་བྱོས། །སྒྲུབ་པ་པོ་རྣམས་རྒྱུད་ལ་སྦྱོར། །ཞེས་དབུགས་ཕྱུང་བའི་མོས་པ་མཛོད། །དེ་ལྟར་དབང་ཐོབ་ནས་བསྲུང་རྒྱུའི་དམ་ཚིག་ནི་འདི་རྣམས་ཡིན་ནོ་ཞེས་ངོ་ཤེས་པར་བྱ་བའི་ཕྱིར་དམ་ཚིག་བསྒོ་བཞི་རྣམ་སྣང་མངོན་བྱང་ལས། དེ་རིང་ཕྱིན་ཆད་བུ་ཁྱོད་ཀྱིས། །དམ་པའི་ཆོས་དང་བྱང་ཆུབ་སེམས། །སྲོག་གི་ཕྱིར་ཡང་ད་ཕྱིན་ཆད། །ཡོངས་སུ་བཏང་བར་མི་བྱའོ། །ཁྱོད་ཀྱིས་སེར་སྣ་དག་དང་གང་། །སེམས་ཅན་གནོད་པ་མི་བྱའོ། །དམ་ཚིག་འདི་དག་སངས་རྒྱས་ཀྱི། །བརྟུལ་ཞུགས་བཟང་པོ་ཁྱོད་ལ་བཤད། །ཇི་ལྟར་རང་གི་སྲོག་བསྲུང་བ། །དེ་ལྟར་ཁྱོད་ཀྱིས་འདི་དག་བསྲུང་། ཞེས་གསུངས་ཏེ་སྤྱོད་པའི་རྒྱུད་འདིར་དམ་པའི་ཆོས་དང་བྱང་ཆུབ་ཀྱི་སེམས་སྤོང་བ་དང་། སེར་སྣ་དྲག་པོས་ཆོས་དང་ཟང་ཟིང་མི་སྟེར་བ། སེམས་ཅན་ལ་གནོད་པར་འགྱུར་བའི་བྱ་བ་སྟེ་རྩ་བའི་ལྟུང་བ་བཞི་པོ་འདི་དག་སྲོག་ལ་བབ་ཀྱང་སྤྱད་པར་མི་བྱའོ། །གཞན་ཡང་བྱ་རྒྱུད་དང་ཐུན་མོང་བའི་དམ་ཚིག་རྣམས་ཀྱང་སྲུང་དགོས་ཏེ། གང་ཞེ་ན་གསང་བ་སྤྱི་རྒྱུད་ལས་ཤེས་རབ་ཕ་རོལ་ཕྱིན་བཀླག་ཏེ། །དམ་ཚིག་འདི་དག་བསྒོ་བར་བྱ། །དེ་རིང་ཕྱིན་ཆད་ཁྱེད་རྣམས་ཀྱི། །སངས་རྒྱས་ཆོས་དང་དགེ་འདུན་དང་། །བྱང་ཆུབ་སེམས་དཔའ་རྣམས་དང་ནི། །རིག་སྔགས་གསང་སྔགས་ཚིག་རྣམས་ལ། །དད་པ་རབ་ཏུ་བརྟན་པར་བྱ། །རྟག་པར་ཕྱག་རྒྱ་ཆེན་པོ་ལ། །ཁྱད་པར་དུ་ཡང་མོས་པར་བྱ། །དམ་ཚིག་ཅན་དང་མཛའ་བོ་དང་། །བླ་མ་ལ་ཡང་གུས་པར་བྱ། །ལྷ་རྣམས་ཀུན་ལ་སྡང་མི་བྱ། །དུས་མཚམས་དག་ཏུ་མཆོད་པར་བྱ། །སྟོན་པ་གཞན་གྱིས་གཞུང་མི་མཆོད། །རྟག་ཏུ་གློ་བུར་མགྲོན་མཆོད་བྱ། །སྲོག་ཆགས་རྣམས་ལ་བྱམས་པའི་སེམས། །རབ་ཏུ་བརྟན་པར་ཉེ་བར་བཞག །ཐེག་པ་ཆེ་ལ་དགའ་རྣམས་ཀྱི། །བསོད་ནམས་དག་ལ་ནན་ཏན་བསྐྱེད། །བཟླས་བརྗོད་བྱེད་ལ་འབད་པ་ཡིས། །གསང་སྔགས་རྒྱུད་ལས་བསྟན་པ་ཡི། །དམ་ཚིག་རྣམས་ཀྱང་བསྲུང་བ་བྱ། །དམ་ཚིག་མེད་པ་རྣམས་ལ་ནི། །སྔགས་དང་ཕྱག་རྒྱ་མི་སྦྱིན་མོ། །གསང་སྔགས་རྒྱུད་ལ་ལེགས་པར་བསྲུང་། །དེ་ཡང་བདག་གི་བསྲུང་བར་བྱ། །ཞེས་གསུངས་པའི་དོན་ལ་གཉིས་ཏེ། དང་པོ་སྤྱིའི་དམ་ཚིག་གསུམ་གྱི་དང་པོ་ནི། ཐེག་ཆེན་གྱི་དཀོན་མཆོག་གསུམ་པོ་དུས་ཐམས་ཅད་དུ་མི་བཏང་ཞིང་། སྐྱབས་འགྲོའི་བསླབ་བྱ་རྣམས་ཀྱང་གཟུང་བར་བྱའོ། །གཉིས་པ་ནི། བྱང་ཆུབ་སེམས་དཔའ་རྣམས་དང་། དེའི་སྡེ་སྣོད་དུ་གསུངས་པའི་ཚུལ་ཁྲིམས་གསུམ་ལ་སོགས་པའི་བསླབ་པ་ལ་དད་ཅིང་གུས་པ་དང་ཡང་དག་པར་བསླབ་པོ། །གསུམ་པ་ནི། རིགས་སྔགས་སྟེ་ལྷ་མོ་དང་། གསང་སྔགས་ལྷ་ཕོ་སྟེ་དེ་གཉིས་ཀྱིས་བསྡུས་པའི་ལྷ་ཚོགས་ལ་བཟང་ངན་དང་མཆོག་དམན་དུ་འཛིན་པའི་མ་དད་པ་སྤངས་ཏེ་དད་པ་དང་གུས་པ་རབ་ཏུ་བརྟན་པར་བྱའོ། །འདི་གསུམ་ལ་སྤྱིའི་དམ་ཚིག་ཏུ་འཇོག་པའི་རྒྱུ་མཚན་ཡོད་དེ་དབང་ཐོབ་པའི་གང་ཟག་དང་། མ་ཐོབ་པའི་གང་ཟག་བྱ་རྒྱུད་ལ་འཇུག་པའི་སྔོན་དུ་ལམ་ཐུན་མོང་བ་ལ་སྤྱོད་པ་དག་གིས་ཀྱང་དམ་ཚིག་འདི་གསུམ་ལ་བསླབ་དགོས་པའི་ཕྱིན་རོ། །གཉིས་པ་དབང་གི་དམ་ཚིག་བཅུ་གསུམ་གྱི་དམ་ཚིག་དང་པོ་ནི། དུས་རྟག་པར་ཕྱག་རྒྱ་ཆེན་པོ་སྟེ་རང་གི་འདོད་པའི་ལྷ་ལ་ལྷ་གཞན་ལས་ལྷག་པའི་གུས་པ་བྱ་ཞིང་། ལྷ་བསྒྲུབས་པས་མ་གྲུབ་ན་དེ་ལ་ཁྲོ་བས་སྤོག་ཆོག་སོགས་བྱར་མི་རུང་ངོ་། །གཉིས་པ་ནི། དམ་ཚིག་ཅན་ཏེ་དབང་ཐོབ་པའི་གང་ཟག་དང་། གསུམ་པ་ནི། མཛའ་བོ་སྟེ་སངས་རྒྱས་ཀྱི་བསྟན་པ་ལ་ཞུགས་པའི་གང་ཟག་དང་། བཞི་པ་ནི། བླ་མ་སྟེ་རང་ལ་དབང་དང་། རྒྱུད་དང་། མན་ངག་སྟེར་བའི་གང་ཟག་གོ །དེས་ན་དེ་རྣམས་ལ་ཤིན་ཏུ་གུས་པར་བྱ་ཞིང་། བརྙས་པ་དང་། སྨོད་པ་དང་། ཐོ་འཚམས་པ་ལ་སོགས་མི་བྱའོ། །ལྔ་པ་ནི། དབང་དང་ནོར་རྒྱས་པ་ལ་སོགས་པའི་ཕྱིར་གནོད་གནས་ལ་སོགས་པ་བསྒྲུབས་པས་མ་གྲུབ་ན་ལྷ་ལ་ཁྲོས་ཤིང་ཞེ་སྡང་བའི་སེམས་མི་བྱའོ། །དྲུག་པ་ནི། ཆོས་བརྒྱད་ལ་སོགས་པའི་དུས་མཚམས་བཟང་པོ་ལ་འདོད་པའི་ལྷ་དང་དཀོན་མཆོག་ལ་མཆོད་པ་རྒྱ་ཆེར་བྱའོ། །བདུན་པ་ནི། དབང་ཕྱུག་དང་ཁྱབ་འཇུག་ལ་སོགས་པའི་སྟོན་པ་གཞན་གྱི་གཞུང་ནས་འབྱུང་བ་ལྟར་མི་མཆོད་ཅིང་། དེ་དག་གི་མན་ངག་དང་རྣལ་འབྱོར་སོགས་ལ་ཉམས་ལེན་མི་བྱའོ། །བརྒྱད་པ་ནི། དུས་རྟག་ཏུ་གློ་བུར་དུ་འོང་པའི་མགྲོན་ལ་ཁ་ཟས་དང་། གནས་མལ་ལ་སོགས་པའི་མཆོད་པ་ཅི་འགྲུབ་བྱ་སྟེ་བསོད་ནམས་ལྷག་པར་ཆེ་བའི་ཕྱིར་རོ། །དགུ་པ་ནི། སྲོག་ཆགས་ཆེ་ཕྲ་ཐམས་ཅད་ལ་བྱམས་པའི་སེམས་རབ་ཏུ་བརྟན་པོས་ཕན་པ་ཁོ་ན་བྱའོ། །གནོད་པའི་ལས་རྣམ་པ་ཐམས་ཅད་དུ་མི་བྱེད་པའི་སྡོམ་སེམས་འཆང་ངོ་། །བཅུ་པ་ནི། ཐེག་པ་ཆེན་པོ་གསང་སྔགས་ལ་ཞུགས་པའི་གང་ཟག་བྱང་ཆུབ་ཀྱི་སྤྱོད་པ་ལ་དགའ་བ་རྣམས་ཀྱི་བསོད་ནམས་འཕེལ་བའི་ཐབས་བཟླས་བརྗོད་དང་སྡོམ་པ་བཟུང་བ་སོགས་ལ་ནན་ཏན་བསྐྱེད་དོ། བཅུ་གཅིག་པ་ནི། བཟླས་བརྗོད་བྱེད་པ་ལ་འབད་པའི་རྣལ་འབྱོར་པས་བཟླས་པའི་སྤྱོད་ལམ་སྤང་བླང་རྒྱུད་ནས་གསུངས་པ་དང་ལྡན་པས་བཟླ་དགོས་སོ། །བཅུ་གཉིས་པ་ནི། གསང་སྔགས་སོ་སོའི་རྒྱུད་དམ་ཚིག་གསུམ་བཀོད་ལ་སོགས་པ་ན་བསྟན་པའི་དམ་ཚིག་རྣམས་ཀྱང་སྲུང་དགོས་སོ། །བཅུ་གསུམ་པ་ནི། དམ་ཚིག་མེད་པ་སྟེ། དབང་བསྐུར་མ་ཐོབ་པའམ། ཐོབ་ཀྱང་ཉམས་པ་རྣམས་ལ་གསང་སྔགས་ཀྱི་ཆོ་ག་ཞིབ་མོ་དང་། རྒྱུད་དང་མན་ངག་རྣམས་རབ་ཏུ་གསང་ཞིང་སྦ་བར་བྱའོ། །མཇུག་གི་ཚིག་རྐང་གཉིས་ནི། དེ་ཐམས་ཅད་བདག་ཉིད་ཀྱིས་ཉམས་སུ་བླང་རྒྱུའི་དམ་ཚིག་ཏུ་རྟོག་པར་བྱའོ་ཞེས་མཇུག་སྡུད་ཀྱི་དོན་ནོ། །དེ་ལྟར་ཤེས་པར་བྱས་ནས་དབང་གི་གནས་སྐབས་སུ་ཐོབ་པའི་དམ་ཚིག་དང་སྡོམ་པ་ལ་སྲུང་བསྡོམས་ཚུལ་བཞིན་དུ་བགྱིད་སྙམས་པས་འདིའི་རྗེས་བཟློས་ལན་གསུམ་མཛོད། གཙོ་བོས་ཇི་ལྟར་སོགས་དང་། གཏང་རག་གི་མཎྜལ། དེང་ནས་སོགས་སྤྱི་དང་འདྲའོ། །རྗེས་ཆོག་ལ་མ ཆོད་པ་རྣམས་ཁ་གསོས་ལ་བསང་སྦྱངས་བྱིན་གྱིས་རླབས་མཆོད་བསྟོད་འདོད་དོན་གསོལ་གདབ་བཅས་བུམ་སྐྱེད་ལྟར་བྱ། ཡིག་བརྒྱ་ལན་གསུམ་དང་། མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ་ཕྱོགས་བཅུ་ན་བཞུགས་སོགས་ཀྱིས་རས་བྲིས་ལ་བརྟན་བཞུགས་བྱ། གནས་གསུམ་བསྲུང་བ་དང་། བསྔོ་བ་ཤིས་བརྗོད་རྒྱས་པར་བྱའོ། །གལ་ཏེ་རྡུལ་མཚོན་ལ་བརྟེན་ནས་བསྐུར་ནས་སའི་ཆོ་ག་དང་ཐིག་ཚོན་གྱི་བྱ་བ་སོགས་ཁོ་བོས་བསྒྲིགས་པའི་ཨ་ར་པ་ཙ་ན་ལྷ་ལྔའི་དཀྱིལ་ཆོག་གིས་རྟོགས་ནུས་ཤིང་ལྷ་སྔགས་ཙམ་བསྒྱུར་དགོས་པ་ནི་ཁྱད་པར་རོ། །སྨྲས་པ། འཇིག་རྟེན་དར་རྒུད་བྱེད་པ་གཟའ་སྐར་རྣམས། །འཕགས་མའི་ཐ་ཚིག་རྡོ་རྗེའི་ཁོར་ཡུག་ལས། །གཞར་ཡང་མི་འདའ་དེ་ཕྱིར་ཡུམ་སྲས་ཀྱི། །དཀྱིལ་འཁོར་བསྙེན་དང་མཆོད་ལ་ཅིས་མི་བརྩོན། །འོན་ཏང་འཇུག་ཅིང་མངོན་པར་དབང་བསྐུར་བའི། །ཆོག་གཞུང་རང་རྐྱ་ཐུབ་པ་མི་སྣང་བ། །སྔགས་གྲྭའི་སྲོལ་དང་བརྒྱུད་པའི་གསུང་སྒྲོས་ལས། །འཇམ་དབྱངས་ལྷ་ལྔའི་དབང་དང་མཐུན་ཞེས་འབྱུང་། །དེ་བཞིན་གཡར་ཁྲལ་ཙམ་མིན་ལྷག་བསམ་གྱིས། །སྡེབས་པའི་དགེ་བས་འགྲོ་རྣམས་རྫོགས་ལྡན་གྱི། །དུས་སྟོན་གསལ་པར་རོལ་ཞིང་སྒྲིབ་བྲལ་དབྱིངས། །ཐམས་ཅད་རིག་པའི་ཡེ་ཤེས་སྒྲུབ་གྱུར་ཅིག །ཅེས་རྗེ་བཙུན་མ་གཟའ་ཐམས་ཅད་ཀྱི་ཡུམ་རིག་པ་ཆེན་མོའི་དཀྱིལ་འཁོར་སློབ་མ་དབང་བསྐུར་བའི་ཆོ་ག་ཕན་བདེའི་ཉི་མ་ཞེས་བྱ་བ་འདི་ནི་སྔོན་ཆད་བརྒྱུད་པའི་ཕྱག་བཞེས་ཀྱིས་ཨ་ར་པ་ཙ་ན་ལྷ་ལྔའི་དབང་ཆོག་ལ་ཕྲི་བསྣན་ཁ་བསྒྱུར་གང་དགོས་མཛད་པ་ལས་དཀྱིལ་ཆོག་རང་རྐྱ་ཐུབ་པ་མེད་པར་བརྟེན། དབང་རྒྱུན་ཡང་ཤིན་ཏུ་དཀོན་པས་ཁོ་བོ་སྤྲང་བཙུན་ངག་དབང་ལེགས་གྲུབ་ཀྱིས་ཀུན་གཟིགས་འཇམ་དབྱངས་བླ་མའི་ཞབས་དྲུང་དུ་འབད་པ་ཆེན་པོས་ཞུས་པའི་རྗེས་སུ། སྔགས་གྲྭ་ཆེན་པོ་གོང་དཀར་རྡོ་རྗེ་གདན་གྱི་སྒྲུབ་མཆོད་རྣམས་ཀྱི་ངག་འདོན་ཐོ་ཆུང་ཞིག་འདུག་པ་དང་། འཇམ་དབྱངས་ལྷ་ལྔའི་དཀྱིལ་ཆོག་སྔ་ཕྱི་རྣམས་ལ་བརྟེན་ནས་མདོ་སྨད་ཤར་ཁམ་ལྷ་མོ་བུར་ཆས་པའི་ལམ་བར་རྣམས་སུ་བྲིས་པའོ། །འདིའི་ཡན་ལག་ཏུ་གཟུངས་ནས་བཤད་པའི་ཕན་ཡོན་དུ་གཉེར་བས་མཆོད་ཆོག་ཉམས་སུ་ལེན་པར་འདོད་ན་འཇམ་དབྱངས་ས་པན་གྱི་གསུང་རབ་ཤིན་ཏུ་གསལ་མོད། །ངག་འདོན་ལྟབས་བདེའི་དབང་དུ་བྱས་ན་ཞུ་ཆེན་ཚུལ་ཁྲིམས་རིན་ཆེན་གྱིས་མཛད་པའི་ཡིག་ཐོག་ནས་ལེགས། །འོན་ཀྱང་དེར་སྔགས་མ་ཧཱ་བིདྱཻ་ཞེས་ཡོད་པ་ན་ི ཀྲྀ་ཡས་མུཙྪར་ཡང་སྣང་མོད་གཟུངས་འདི་ལ་བརྟེན་པ་ཡིན་མིན་དང་། རྒྱ་གར་གྱི་དཔེ་ལ་ཅི་ཡོད་བརྟགས། གཟུངས་འགྱུར་སྔ་ཕྱི་གཉིས་དང་། ཆོས་རྗེ་ཁུ་དཔོན་གྱིས་སརྦ་བིདྱཻ་ཞེས་བཤད་པ་གཙོ་བོར་བྱ། བོད་སྐད་དུ་རིག་པ་ཆེན་མོར་གྲགས་པ་དང་ཡང་མི་འགལ་ཏེ། སརྦ་ཞེས་པ་མང་ཚིག་གིས་ཆེ་བ་ལ་རང་ཁྱབ་ཅིང་གཞི་མཐུན་དུ་རུང་བས་སོ། །ཡིག་ཆ་སྤར་མར་མདུན་བསྐྱེད་ཀྱི་གཙོ་མོ་ལ་ཡེ་ཤེས་པ་གཞུག་པ་ཆད་འདུག་པ་འདི་བཞིན་དགུག་བསྟིམ་བྱེད་དགོས་ལ། མཆོད་རྫས་དངོས་འཛིན་ཡིག་ཆུང་རྗེ་ཀུན་གཟིགས་བླ་མས་མཛད་ཡོད་པ་དེར་བལྟའོ། །དབང་གི་བརྒྱུད་པ་ནི། རྫོགས་པའི་སངས་རྒྱས། རྣམ་འབྱོར་གྱི་དབང་ཕྱུག་བི་རཱུ་པ། མཁན་ཆེན་ཞི་བ་མཚོ། མཁན་པོ་ཀླུའི་དབང་པོ་སྲུང་བ། རྡོ་རྗེ་རིན་ཆེན། ཤེས་རབ་ཡོན་ཏན། ཚུལ་ཁྲིམས་རྒྱལ་པོ། རྡོ་རྗེ་གཙུག་ཏོར། དགེ་སྐྱབས། དགེ་མཐོང་། མཁན་པོ་ཐལ་པོ། ཤཱཀྱ་བློ་གྲོས། ཤེས་རབ་ཚུལ་ཁྲིམས། མཁན་པོ་དཀོན་མཆོག་རྒྱལ་པོ། ས་ཆེན་ཀུན་དགའ་སྙིང་པོ། སློབ་དཔོན་བསོད་ནམས་རྩེ་མོ། རྗེ་བཙུན་གྲགས་པ་རྒྱལ་མཚན། འཇམ་དབྱངས་ས་པན་འཕགས་པ་རིན་པོ་ཆེ། ཤར་པ་ཤེས་རབ་འབྱུང་གནས། རྡོ་རྗེ་འོད་ཟེར། ཨེ་བ་འཇམ་དབྱངས། བག་སྟོན། གཞོན་ནུ་ཚུལ་ཁྲིམས། བླ་མ་ཚུལ་ཁྲིམས་རྒྱལ་མཚན། ཀུན་མཁྱེན་པ། ནམ་མཁའ་འོད་ཟེར། ལོ་ཆེན་ཤེས་རབ་རིན་ཆེན། རྡོ་རྗེ་གདན་པ་ཀུན་དགའ་རྣམ་རྒྱལ། བསོད་ནམས་རྒྱ་མཚོ། ཚེ་དབང་བཀྲ་ཤིས། ཨོ་རྒྱན་རྒྱལ་པོ། བསོད་ནམས་རྒྱལ་པོ། ཚུལ་ཁྲིམས་བཀྲ་ཤིས། དགེ་བའི་དབང་པོ། ཕྲིན་ལས་རྣམ་རྒྱལ། བསོད་ནམས་མཆོག་ལྡན། མང་ཐོས་རིན་ཆེན་རྒྱ་མཚོ། སྙན་མཁར་སློབ་དཔོན་ངག་དབང་། ཀུན་དགའ་ཆོས་དར། ཀུན་དགའ་བསྟན་དར། ཀུན་དགའ་དབང་རྒྱལ། གོང་དཀར་པོ་ཏཱ་ལས་མཁན་ཆེན་ཚུལ་ཁྲིམས། ལྷ་བཙུན་ཡེ་ཤེས་དོན་འགྲུབ་བསྟན་པའི་རྒྱལ་མཚན། དེ་གཉིས་ཀ་ལས་ཀུན་གཟིགས་བླ་མ་འཇམ་དབྱངས་མཁྱེན་བརྩེའི་དབང་པོ་བཀའ་དྲིན་གཞལ་དུ་མེད་པ་གང་ཞིག་ཞལ་སྔ་ནས་བདག་ལ་སྩལ་པའོ། །ཕྱི་འགྱུར་གྱི་བརྒྱུད་པ་ལྟར་ན། རྫོགས་པའི་སངས་རྒྱས། རྡོ་རྗེ་གདན་སར། བ་རི་ལོ་ཙ་བ། ས་ཆེན་མན་འདྲའོ། །དཀྱུས་སུ་བཤད་ཚོད་ལྟར་དུ་དངོས་སྔ་ཞག་གཅོད་ཀྱི་ལུགས་སུ་བྲིས་ཡོད་མོད། ཞྭ་ལུ་བ་སོགས་སྔགས་གྲྭ་ཕལ་མོ་ཆེར་དཀྱིལ་འཁོར་ཆུང་གྲས་རྣམས་དངོས་སྟ་སྦྲེལ་མ་མཛད་པ་ཤས་ཆེ་ལ། ལྷག་པར་རྡོ་རྗེ་གདན་པའི་ཕྱག་བཞེས་སུ་དབང་བསྐུར་ཐམས་ཅད་ལ་དངོས་སྟ་སྦྲེལ་མ་ཁོ་ན་གནང་བས་དེའི་ཚུལ་ནི། སློབ་དཔོན་གྱིས་ལྷག་གནས་དང་པོ་གསུམ་ཚར་བ་དང་རྗེས་ཆོག་བྱས་ཏེ། དཀྱིལ་འཁོར་བྲི་བའམ་རས་བྲིས་བཀྲམ་ལ་དངོས་གཞི་སྒྲུབ་མཆོད་ལ་འཇུག །སློབ་མ་དབང་བསྐུར་གྱི་འགོར་རྨི་ལམ་བརྟག་ཅིང་སྲུང་བ་ཙམ་མ་གཏོགས་སྟ་གོན་གྱི་ཆོས་རྣམས་ཚང་བར་བྱས་ལ། དེས་སློབ་མ་སྟ་གོན་གྱི་ཚོག་གྲུབ་པ་ལགས། དངོས་གཞི་དབང་བསྐུར་བའི་ཆོ་ག་ལ། གཟུངས་འདིའི་ངོ་བོ་བྱ་རྒྱུད་དུ་བཞེད་ཀྱང་ཞེས་པ་མན་ཆད་སྤེལ་བས་ཁྱབ། ཡང་མཁན་ཆེན་ངག་དབང་ཆོས་གྲགས་སོགས་ཀྱི་གསུངས་ལས། རྨི་ལམ་བརྟག་པ་ནི། ཆོས་ཐམས་ཅད་བསམ་པའི་རང་གཟུགས་ཡིན་པས། དཀྱིལ་འཁོར་གྱི་ཁང་པ་འདི་ཉིད་དུ་ཀུ་ཤའི་སྔས་སྟན་ལ་གཉིད་ལོག་པས། ཡིད་ལ་འདོད་པའི་དངོས་གྲུབ་དང་མཐུན་པའི་རྨི་ལྟས་རེ་ཡང་བྱུང་བའི་མོས་པ་མཛོད་ཅེས་འབྱུང་བ་བཞིན་གོང་དཀར་རྡོ་རྗེ་གདན་པའི་གསུང་རྒྱུན་ལའང་དེ་བཞིན་འབྱུང་བ་ལྟར་བརྗོད་ཀྱང་ལེགས་ཏེ་ས་བཅད་ཚང་པ་དང་། ནམ་མཁའི་ཁ་དོག་བརྟག་པ་མ་བྱུང་ནའང་སྣ་ཚོགས་མཐོང་ཞིང་བརྗོད་སྲོལ་འདུག་པས་མཚོན་ནོ། །ཞེས་པའང་བཱ་གིནྡྲས་པའོ། །ཤུ་བྷམ་སྟུ་སརྦ་ཛཱ་ག་ཏྲཾ། །དགེའོ།། །།