དཔེ་རྣམས་བསྡུས་པའི་སྒྲོན་མ།
རྒྱ་གར་སྐད་དུ༔ པྲ་ཀཱ་ཚ་བཱ་བྷེ་ཀ་རཾ༔ བོད་སྐད་དུ༔ དཔེ་རྣམས་བསྡུས་པའི་སྒྲོན་མ༔ བཅོམ་ལྡན་འདས་བྱ་བྲལ་རང་དག་ངང་ལ་ཕྱག་འཚལ་ལོ༔ སརྦ་ཨ་པ་ཡ་པྲ་བྷ་ལོཀྞི༔ ཆོས་ཉིད་སྤྲོས་དང་བྲལ་བའི་ཡེ་ཤེས་དེ༔ སྣ་ཚོགས་ཐབས་ཀྱིས་དེ་ཉིད་མཚོན་པའི་ཕྱིར༔ དཔེ་ཡི་སྒོ་ནས་གཏན་ལ་དབབ་པ་ནི༔ སྟོན་པའི་ལུང་བཞིན་བདག་གིས་བསྟན་པར་བྱའོ༔ ཕྱི་མའི་གང་ཟག་དཔེ་ལ་ཡིད་ཆེས་བྱེད་པའི་དུས་ན་འདི་དགོས་པས༔ འདི་ཉིད་རིགས་ཀྱི་བུ་རྣམས་ཀྱིས་གཟུང་བར་བྱའོ༔ བཀོད་པ་ཆེན་པོའི་རྒྱུད་ལས་ངོ་སྤྲད་པའི་ལེའུ་ཉི་ཤུ་རྩ་དགུ་གསུངས་པ་ཡང་མདོ་ཉི་ཤུ་རྩ་གཅིག་ཏུ་འདུས༔ དེ་ཡང་བདུན་དུ་འདུས༔ དེ་ཡང་ལེའུ་གསུམ་པ་དྲན་པ་གཞི་འཚོལ་གྱི་ལེའུར་བསྡུས་ནས་བསྟན་ཏེ༔ དེ་དག་གི་དོན་རྣམ་པར་བཤད་ན་གཉིས༔ ཕྱི་ཡུལ་ལ་ངོ་སྤྲད་པ་དང༔ ནང་སེམས་ལ་ངོ་སྤྲད་པའོ༔ ཕྱི་ལ་གསུམ་སྟེ༔ སྣང་བ་འོད་ལ་ངོ་སྤྲད་པ་དང༔ དྲན་པ་ཤེས་པ་ལ་ངོ་སྤྲད་པ་དང༔ གཞི་རིག་པ་ལ་ངོ་སྤྲད་པའོ༔ སྣང་བ་འོད་ལ་ངོ་སྤྲད་པ་ནི༔ རིགས་ཀྱི་བུ་ལས་དང་སྐལ་བར་ལྡན་པ་རྣམས་ཀྱིས་གངས་སམ༔ མཚོ་ཆེན་པོའི་གླིང་ངམ༔ ས་ཡི་སྙིང་པོའམ༔ བྲག་སྔོན་པོའི་ཐེམ་པར་ནས་བྱུང་བའི་རིན་པོ་ཆེ་ཟུར་བརྒྱད་པའམ༔ བཅུ་དྲུག་པའམ༔ ཉི་ཤུ་རྩ་གཅིག་པའམ༔ ཉི་ཤུ་རྩ་བརྒྱད་པ་དག་ཤིན་ཏུ་མཆོག་ཡིན་ཏེ༔ དེ་ལྟ་བུ་ཤིན་ཏུ་གསལ་བ་ལ་མ་ཆག་པ་དྲི་མའི་སྐྱོན་གྱིས་མ་གོས་པ༔ ཆེ་བ་ནི་ཁྱི་དཀར་པོའི་མགོ་བོ་ཙམ༔ བྱ་ངང་(༤༥)པའི་སྒོ་ང་ཙམ༔ སོར་བཞི་པའམ༔ གསུམ་པའམ༔ ཚོན་གང་བའམ༔ ཐ་མ་ཡང་སྐྱེས་བུའི་མིག་ཚད་ཙམ་བླངས་ཏེ༔ འདི་ནི་རྡོ་རྗེ་སེམས་དཔའ་གསལ་བྱེད་ཀྱི་མེ་ལོང་ཞེས་བྱ་སྟེ༔ དཔེ་ཐམས་ཅད་ཀྱི་སྔོན་དུ་འགྲོ་བ་ཡིན་ནོ༔ དེ་ལྟར་གསལ་བྱེད་ཀྱི་མེ་ལོང་དེ་ལ་མཆོད་པར་བྱ་སྟེ༔ དེ་ཉིད་སྟོན་པ་རྡོ་རྗེ་འཆང་གི་སྐུ་དྲི་མ་མེད་པར་སྐྱེས་བུའི་བློས་བྱས་ཏེ༔ ཙན་དན་དང༔ ག་བུར་དང༔ གླ་རྩི་ལ་སོགས་དྲི་བཟང་པོའི་སྨན་གྱིས་བྲན་པའི་རྒྱ་མཚོའི་ཆུ་ལ་གཟུངས་སྔགས་མང་པོ་བཟླས་ཏེ་དེ་ཉིད་ཁྲུས་ནས་བཏོན་ལ༔ འཁར་གཞོང་ངམ༔ བསེ་ཕོར་ནང་དུ་དར་ཚོན་སྣ་ལྔས་དྲིལ་ལ་བཞུགས་སུ་གསོལ་ལ༔ ཕྱག་འཚལ་བ་དང༔ མཆོད་པ་འབུལ་བ་དང༔ སྡིགས་པ་བཤགས་པ་ལ་སོགས་པ་ཚོགས་བསགས་པ་ཇི་ལྟར་རིགས་པ་བྱས་ལ༔ དེ་ནས་མཁའ་འགྲོ་དང་ཆོས་སྐྱོང་ལ་གཏོར་མ་རྒྱ་ཆེན་པོ་བྱིན་ལ༔ དེ་ཉིད་དར་ནས་ཕྱུང་ལ་ཟ་འོག་གི་གུར་ཁྱིམ་ཁར་བཞག་སྟེ༔ ཕྱོགས་ཀུན་ནས་སྐལ་བ་དང་ལྡན་པ་ཀུན་གྱིས་བལྟས་ན་དེ་ཉིད་ཁྲ་ལམ་གྱིས་འགྲོ་སྟེ༔ དེ་ཡང་ཕྱི་ནང་མེད་པར་ཟང་ཐལ་བའི་དཔེས་བར་དོའི་སྣང་བ་མཆེད་པ་ངོས་བཟུང་ངོ་༔ དེ་ཡང་ཁ་དོག་དཀར་པོ་བཙལ་ན་དཀར༔ དམར་པོ་བཙལ་ན་དམར༔ དེ་བཞིན་དུ་སེར་པོ་དང་སྔོན་པོ་ལ་སོགས་པ་གང་བཙལ་བའི་མདོག་ཏུ་འགྲོ་ཞིང༔ དེ་དང་བྲལ་ན་རང་གི་ངོ་བོ་ཆུའི་སྙིང་པོ་ལྟ་བུར་རེག་གཟུགས་ཟང་ཐལ་དུ་འདུག་པ་བཞིན་དུ་རིག་པ་ཡང་འབྱུང་བ་ལྔའི་རྐྱེན་དང་བྲལ་ནས་ཉམས་སུ་བླངས་ན་དེ་བཞིན་ནོ༔ དེ་ལྟར་རིག་པ་ཆོས་ཀྱི་སྐུའི་སྙིང་པོ་དྲི་མ་མེད་པ་དེ་ལས་རང་འོད་ཕྱི་ཡི་ཡུལ་དུ་སྣང་བའི་དཔེ་ནི༔ ཡིད་མཐུན་པའི་སྐལ་ལྡན་གཉིས་ནས་གསུམ་ལས་མང་དུ་མི་རུང༔ དེ་ཡང་གནས་ཁང་ཤར་ནུབ་ཕྱོགས་ཕྱེད་པ་ཞིག་ལ་ཤར་དུ་སྐར་ཁུང་གཏད་དེ་ལྷག་མ་རྣམས་བསྒྲིབས་ལ༔ རྗེས་སུ་འཇུག་པའི་སྐལ་ལྡན་གྱི་ཉི་མའི་བཞུར་ལ་བཟུང་སྟེ་འཕྱར་བས་ཕྱིར་མེན་ཤེལ་ལས་འོད་ལྔའི་སྣང་བ་ཤར་ཏེ་ཡོང་བས༔ དེ་ནི་རང་གི་སྣང་བ་ཐམས་ཅད་དུ་ཡོད་པའི་རྟགས་ཀྱིས་མཚོན་པའི་དཔེའོ༔ དེ་ནས་རྗེས་སུ་འཇུག་པ་ཞིག་གི་མིག་གི་སྟེང་དུ་འོད་(༤༦)དེ་ཕོག་པར་བྱས་ལ་ལག་པ་གཅིག་གིས་མིག་ཡ་གཅིག་བཀབ་སྟེ་རྡོ་རྗེ་སེམས་དཔའི་གསལ་བྱེད་ལ་མ་འགུལ་བར་བལྟས་ན༔ གསལ་བྱེད་དང༔ བར་གྱི་འོད་ཀྱི་ཟེར་ཐག་དང༔ ནམ་མཁའི་ཉི་མའི་སྙིང་པོ་གསུམ་དུས་གཅིག་ལ་མཐོང་བ་ནི་སྐུ་གསུམ་གྱི་འབྲེལ་བ་གཏན་ལ་འབེབས་པའི་དཔེར་ཤེས་པར་བྱའོ༔ ཡང་དེ་ལྟར་སྐྱེས་བུ་དེའི་མིག་གཅིག་གི་སྟེང་དུ་མེན་ཤེལ་བཞག་སྟེ་གོང་ལྟར་བལྟས་ན་སྔར་བས་ལྷག་པའི་འོད་ཟེར་གྱི་ཐག་པ་མཐོང་སྟེ༔ དེ་ལས་འོད་ཟེར་ཕྲ་མོ་གྲངས་མེད་པ་འཕྲོ་བ་ཡང་འོང་སྟེ༔ དེ་ནི་སྐུ་ལས་སྐུའི་འོད་ཟེར་སྐུ་ཇི་ལྟར་འཕྲོ་བའི་དཔེ་ཡིན་ནོ༔ ཡང་ཤེལ་དེ་སྐྱེས་བུའི་མིག་གི་སྟེང་དུ་བཞག་ན༔ བལྟས་ཚད་འོད་ཀྱི་སྣང་བར་མཐོང་སྟེ་དེ་ནི་རིག་པ་ནང་གསལ་ཡིན་ནོ༔ ཡང་མཁས་པས་མིག་གི་སྟེང་དུ་བཞག་སྟེ་མར་མེའི་སྣང་བ་ལ་བལྟས་ན་དེ་བཞིན་ཏེ༔ ལོངས་སྐུའི་འོད་གཏན་ལ་ཕབ་ནས༔ ལོངས་སྐུའི་ངོ་བོ་ནི་མར་མེ་དང་འདྲ་བས༔ ཁྱིམ་དུ་དེ་ལྟར་མར་མེ་ལྔའམ་དྲུག་གམ་བརྒྱད་ནས་བཅུ་ལ་སོགས་པ་བསྟན་པ་དེ་བཞིན་ནོ༔ རྒྱལ་བའི་སྐུ་ཡང་དེ་ལྟར་རོ༔ དེ་ནི་སྣང་བ་འོད་ལ་ངོ་སྤྲོད་པ་ཞེས་བྱའོ༔ དྲན་པ་ཡེ་ཤེས་ལ་ངོ་སྤྲད་པ་ནི༔ ཤིན་ཏུ་གནམ་དྭངས་པའི་ཚེ་ཤར་ཕྱོགས་ཀྱི་ཐད་ལ་རས་དཀར་དམར་གྱི་སྣམ་བུའི་སྟེང་དུ་མེ་ལོང་བཞག་སྟེ༔ ཡང་མེན་ཤེལ་མིག་གི་སྟེང་དུ་བཞག་སྟེ་མ་ཡེངས་པར་ཟུར་གྱིས་དེ་ཉིད་ལ་ལྟ་ཞིང་ཐབས་མཁས་པས་གྱེན་ལ་བཏེག་ན་འོད་སྣང་དང་ཐིག་ལེ་འཆར་ཏེ་ཡེ་ཤེས་རང་གི་ངོ་བོ་གཏན་ལ་ཕབ་པའོ༔ ཡང་སྐལ་ལྡན་གྱིས་ནམ་དྭངས་པའི་ཚེ་འཁར་ཕོར་བརྩེགས་མ་ལྔའམ་དགུ་བཙོད་ཆུས་བཀང་སྟེ༔ ཡང་མེན་ཤེལ་གྱི་གོང་ལྟར་བལྟས་ན་ཐིག་ལེའི་ངོ་བོ་ཡང་གཏན་ལ་ཕེབས་སོ༔ ཡང་སྐལ་ལྡན་གྱིས་ནམ་དྭངས་པའི་ཚེ་ཤར་ཕྱོགས་ཀྱི་རྫིངས་ཆུས་བལྟམས་པ་ལ་ནུབ་ནས་གོང་ལྟར་བལྟས་ན་ཡེ་ཤེས་ཀྱི་འོད་གཏན་ལ་ཕེབས་སོ༔ ཡང་འཁར་ཕོར་ཆེ་ཆུང་རིམ་པ་ཅན་ལྔའམ་བདུན་བྱས་ཏེ་དབུས་ནས་སྲོག་ཤིང་གཅིག་ཞབས་ལ་ཆས་སྦྱར་ལ༔ དེ་ལྟར་བརྩེགས་ལ་ནང་ཚོན་ཆུ་མི་མཐུན་པས་བཀང་ལ༔ ཡང་གོང་ལྟར་བལྟས་ན་ཐིག་ལེ་རིགས་མི་མཐུན་པ་བརྩེགས་མར་འཆར་ཏེ་རིགས་ལྔའི་(༤༧)ཐིག་ལེ་གཏན་ལ་ཕེབས་པ་ཡིན་ནོ༔ ཡང་ནམ་དྭངས་པའི་ཚེ་རང་གི་མདུན་དུ་འདོམ་གསུམ་ཙམ་ཚོད་དུ་བར་ཐག་ཀྱང་དེ་ཙམ་ལ་ཤིང་འདོམ་རེ་པ་རེ་ཕྱོགས་བཞིར་བཙུག་སྟེ་དེ་རྣམས་ཀྱི་བར་དུ་དུང་གི་ཕྲེང་བའམ་རུས་པའི་ཕྲེང་བ་བཀྲག་ཆེ་བས་དྲ་བའི་ཚུལ་དུ་སྦྲེལ་ཏེ༔ སྟེང་དུ་ཕྲེང་བའི་དྲ་བ་བྱས་ནས་དེའི་དབུས་སུ་རང་འདུག་སྟེ་ས་གཞི་རྣམས་ཀྱང་མེ་ལོང་དང་འཁར་གཞོང་གི་གཅལ་བཀྲམས་ལ༔ ཡང་མེན་ཤེལ་གྱིས་གོང་ལྟར་བྱས་ན་དྲ་བ་དང་དྲ་བ་ཕྱེད་པ་མཐོང་བར་འགྱུར་རོ༔ དེ་ཡེ་ཤེས་ཀྱི་ཕོ་བྲང་གཏན་ལ་ཕབ་པའོ༔ ཡང་ནམ་དྭངས་པའི་ཚེ་རང་གི་མདུན་དུ་ཤིང་གཅིག་ལ་རྟ་རྔ་ལ་བྱའི་སྒོ་ང་མང་པོ་བརྒྱུས་ཏེ་བར་བར་དུ་དར་སྣའི་ཕུར་ལྕེ་ཡང་བཏགས་ལ་གོང་ལྟར་བལྟས་ཏེ༔ སྐལ་ལྡན་ཅིག་གིས་དེ་དག་སྐབས་སུ་བསྐྱོད་པར་བྱའོ༔ དེས་ནི་བར་དོ་ལ་ཡེ་ཤེས་རླུང་གི་ཐིག་ལེ་གཏན་ལ་ཕེབས་པ་ཡིན་ནོ༔ ཡང་ནམ་དྭངས་པའི་ཚེ་རང་གི་མདུན་དུ་ཟ་འོག་གི་གདིང་བ་བཞག་སྟེ་ཡང་གོང་ལྟར་བལྟས་ན་སྣང་བ་ཁྲ་བོར་མཐོང་སྟེ་དེས་ནི་ཡེ་ཤེས་ཀྱི་རྩལ་གཏན་ལ་ཕབ་པའོ༔ དེ་བཞིན་དུ་དར་གྱི་ཡུག་དམར་པོ་བཏིང་སྟེ་བལྟས་ན་སོ་སོར་རྟོགས་པའི་ཡེ་ཤེས་ཀྱི་འོད་གཏན་ལ་ཕེབས་སོ༔ དེ་བཞིན་དུ་སེར་པོས་མཉམ་པ་ཉིད༔ དཀར་པོས་མེ་ལོང་ལྟ་བུ༔ ལྗང་གུས་བྱ་བ་གྲུབ་པ༔ མཐིང་ཁས་ཆོས་ཀྱི་དབྱིངས་ཀྱི་ཡེ་ཤེས་གཏན་ལ་ཕབ་པ་སྟེ་ཉེ་བར་མཚོན་པའོ༔
ཡང་དར་དེ་དག་དབྱུག་པ་ལ་འཕྱར་ཏེ་བལྟས་ན་ཡེ་ཤེས་རླུང་དང་འདྲེས་པའི་ཚད་གཏན་ལ་ཕེབས་པ་ཡིན་ནོ༔ དེ་དག་གིས་དྲན་པའི་ཡེ་ཤེས་ངོ་སྤྲོད་པའི་དཔེ་ཡིན་ནོ༔ རིག་པ་ལ་ངོ་སྤྲད་པ་ནི༔ ཡང་ནམ་དྭངས་པའི་ཚེ་ཁང་པ་ཕྱེད་ཕུབ་པ་ཁ་ལྷོར་ལྟ་བའི་ནང་དུ་སྐྱེས་བུ་ཞིག་ལ་གོས་ཁ་དོག་དཀར་དམར་གང་ཡང་རུང་བ་ཁ་དོག་གསལ་བ་གྱོན་ཏེ༔ དེ་ལ་རུས་པའི་རྒྱན་བཏབ་ལ་མེ་ལོང་ལ་སོགས་པས་བརྒྱན་ཏེ༔ ཡང་གོང་ལྟར་བལྟས་ན་ནམ་མཁར་སྐུ་འགྲོ་འོང་དང་བཅས་པར་སྣང་སྟེ་རིག་པ་གཞོན་ནུ་བུམ་པའི་སྐུ་གཏན་ལ་ཕེབས་པ་ཡིན་ནོ༔ ཡང་ཁྱིམ་མུན་པ་དང་ལྡན་པ་ཞིག་གི་སྒོ་ཡི་ཉི་མས་ཕོག་པ་ཞིག་ཏུ༔ སྐྱེས་བུ་གོས་ནག་པོ་གྱོན་པ་(༤༨)སྐྲ་སྤྱི་བོར་བཅིངས་པ་ཞིག་ལ་རྒྱན་གདབ་སྟེ༔ གོང་ལྟར་བལྟས་ན་རིག་པ་གཞོན་ནུ་དཔའ་བོ་སྟོབས་ལྡན་གྱི་སྐུ་གཏན་ལ་ཕེབས་སོ༔ ཡང་ཁྱིམ་ཕྱེད་སྣང་གི་སར་སྐྱེས་པའི་རྒྱན་གོང་ལྟར་བྱས་ཏེ་ལུས་ཕྱེད་གྲིབ་མ་ལ་འདུག་པ་ལ་ཕྱེད་སྣང་བ་ལ་བསྟན་ཏེ་འཕྱར་བ་དེ་གོང་ལྟར་བྱས་ན་སྐུ་ཕྱེད་འགྲོ་འོང་དང་བཅས་པ་མཐོང་སྟེ་རིག་པ་ཕྱེད་སྐུ་གཏན་ལ་ཕེབས་པ་ཡིན་ནོ༔ ཡང་ཁྱིམ་སྣང་བ་དང་ལྡན་པ་དེར་སྐྱེས་བུ་རྒྱན་དང་ལྡན་པ་ཕྱེད་ཀྲུང་དུ་འདུག་སྟེ༔ ཡང་གོང་ལྟར་བལྟས་ན་རིག་པ་གཞུག་སྐུ་གཏན་ལ་ཕེབས་པ་ཡིན་ནོ༔ ཡང་སྐལ་བ་དང་ལྡན་པའི་སྐྱེས་བུ་ཐབས་ལ་མཁས་པ་དེས་རས་ལ་ཚོན་བཀྲག་དང་ལྡན་པས་རིགས་ལྔའི་སྐུ་ཡི་འདྲ་འབག་ལེགས་པར་བྲིས་ཏེ་ནམ་དྭངས་པའི་ཚེ༔ རང་གི་མདུན་དུ་སྐུ་བཀྲམ་སྟེ་ཡང་གོང་ལྟར་བལྟས་ན་རིག་པའི་གཟུགས་སྐུ་གཏན་ལ་ཕེབས་པ་ཡིན་ནོ༔ ཡང་དེ་ལྟར་བཀྲམ་པའི་སྟེང་དུ་མེ་ལོང་ཆུང་ངུ་དང་དྲིལ་བུ་གཡེར་ཁ་རྣམས་ཀྱི་གཅལ་དུ་བཀྲམ་སྟེ་བལྟས་ན༔ སྐུ་ལ་ཐིག་ལེས་བརྒྱན་པ་གཏན་ལ་ཕེབས་པ་ཡིན་ནོ༔ ཡང་ཁྱིམ་གྱི་ཤར་གྱི་སྐར་ཁུང་གི་བུག་པ་ནས་མེ་ལོང་བརྒྱུས་པའི་ཕྲེང་བའི་ཐག་པ་འཐེན་ཏེ་བལྟས་ན་ཐིག་ལེའི་ཟེར་ཐག་གཏན་ལ་ཕེབས་པ་ཡིན་ནོ༔ ཡང་དེ་ལས་ཕྲེང་བ་དཀར་པོ་འཐེན་ཏེ་བལྟས་ན་རྣམ་པར་སྣང་མཛད་ཀྱི་ཐུགས་རྗེ་གཏན་ལ་ཕེབས་སོ༔ མཐིང་ཁས་མི་བསྐྱོད་པའོ༔ སེར་པོས་རིན་ཆེན་འབྱུང་ལྡན་ནོ༔ དམར་པོས་སྣང་བ་མཐའ་ཡས་སོ༔ ལྗང་གུས་དོན་ཡོད་གྲུབ་པའི་ཐུགས་རྗེ་གཏན་ལ་ཕེབས་སོ༔ ཡང་ཟངས་སམ་འཁར་གཞོང་ཆེན་པོ་འོ་མས་བཀང་སྟེ་དེ་ཡི་ནང་དུ་མེ་ཏོག་ཁ་དོག་མི་འདྲ་བའི་ཚོམ་བུ་ལྔ་བྱས་ཏེ༔ ཡང་གོང་ལྟར་བལྟས་ན་རྡོ་རྗེ་རིགས་ཀྱི་ཚོམ་བུ་གཏན་ལ་ཕེབས་སོ༔ ཡང་ཟངས་སམ་འཁར་གཞོང་དུ་སྐྱེར་པའི་ཁུ་བས་བཀང་ནས་མེ་ཏོག་གི་ཚོམ་བུ་གོང་ལྟར་བཀོད་དེ་བལྟས་ན༔ རིན་པོ་ཆེའི་རིགས་ཀྱི་ཚོམ་བུ་གཏན་ལ་ཕེབས་སོ༔ ཡང་གཙོད་ཆུས་བཀང་ནས་བལྟས་ན་པདྨ་རིགས་ཀྱི་ཚོམ་བུ་གཏན་ལ་ཕེབས་སོ༔ ཡང་ཙན་དན་གྱི་ལོ་མ་གདུས་པའི་ཁུ་བས་བཀང་སྟེ་བལྟས་ན་ལས་ཀྱི་རིགས་ཀྱི་ཚོམ་(༤༩)བུའོ༔ དེ་བཞིན་དུ་རམ་གྱི་ཁུ་བས་བཀང་སྟེ་བལྟས་ན་དེ་བཞིན་རིགས་ཀྱིའོ༔ ཡང་ནམ་དྭངས་པའི་ཚེ་སྐལ་ལྡན་གྱིས་ལག་གཡས་པས་ཤེལ་གྱི་ལུགས་མའི་སྐུ་བཟུང་སྟེ་ལག་པ་གཡོན་པས་མིག་གཡོན་པའི་སྟེང་དུ་གསལ་བྱེད་བཞག་སྟེ་བལྟས་ན་རྡོ་རྗེ་སེམས་དཔའི་སྐུ་གཏན་ལ་ཕེབས་སོ༔ ཡང་གསེར་གྱི་སྐུ་ཚོན་གང་བ་ལ་བལྟས་ན་རིན་ཆེན་འབྱུང་ལྡན་རང་རྐྱ་བ་མཐོང་བར་འགྱུར་རོ༔
ཟངས་སམ་བྱི་རུའི་སྐུ་ལ་བྱས་ན་སྣང་བ་མཐའ་ཡས་ཀྱི་སྐུ་རང་རྐྱ་བ་མཐོང་བ་ཡིན་ནོ༔ མུ་མེན་གྱི་སྐུ་ལ་བྱས་ན་དོན་ཡོད་གྲུབ་པའི་སྐུ་མཐོང་བ་ཡིན་ནོ༔ ལྕགས་སམ་བཻ་ཌཱུརྻ་ལས་བྱས་པའི་སྐུ་ལ་བལྟས་ན་རྣམ་སྣང་གི་སྐུ་མཐོང་བ་ཡིན་ནོ༔ ཡང་ཤེལ་གཅིག་ལས་གཅིག་བལྟས་ན་རིག་པ་དྲི་མ་དང་བྲལ་བའི་སྐུ་གཏན་ལ་ཕེབས་པའི་དཔེའོ༔ ཡང་རང་གི་མདུན་དུ་རྨ་བྱའི་མདོངས་གཅལ་དུ་བཀྲམ་སྟེ་བལྟས་ན་ཐིག་ཕྲན་རྣམས་གཏན་ལ་ཕེབས་སོ༔ ཡང་ཉི་གྲིབ་མཚམས་སུ་ནུབ་ཕྱོགས་ཀྱི་གྲིབ་མའི་ངོས་ནས་སྐྱེས་བུ་ཞིག་གིས་རྔ་ཡབ་ཆུར་བཅུག་པ་གཡབས་ནས༔ སྐལ་ལྡན་གྱིས་ཤར་ངོས་ནས་བལྟས་ན་འོད་ལྔའི་སྣང་བའི་རང་བཞིན་དུ་མཐོང་སྟེ༔ དེ་ཉིད་ཉམས་སུ་བླངས་ན་འབྱུང་བའི་རྩལ་ནུབ་པའི་ཚེ་དེ་ལྟར་དུ་སྣང་བའི་དཔེའོ༔ ཡང་ནམ་དྭངས་པའི་ཚེ་སྐལ་ལྡན་ཤིང་ཏ་ལའི་སྡོམ་པོའི་རྩར་སོང་སྟེ་གཅིག་གི་དབྱུག་པས་ཏ་ལའི་ལོ་མ་རྣམས་ཕབ་སྟེ་སྐལ་ལྡན་གྱིས་ནུབ་ནས་ཤེལ་གྱིས་གོང་ལྟར་བལྟས་ན༔ འོད་ཀྱི་མེ་ལོང་ནམ་མཁའ་ལ་འབབ་པར་མཐོང་སྟེ༔ དེས་ནི་རིག་པའི་ཡོན་ཏན་གཏན་ལ་ཕེབས་སོ༔ ཡང་ནམ་དྭངས་པའི་ཚེ་ཤར་ཕྱོགས་སུ་བུམ་པ་ཆུ་ཡིས་བཀང་བ་བཟུང་སྟེ་བར་སྣང་ནས་ས་ལ་ཆུའི་རྒྱུན་སྦྲེང༔ སྐལ་ལྡན་གྱིས་ཁ་ཤར་དུ་བལྟས་ནས་བར་དོའི་དབང་གི་ཆུ་བོ་གཏན་ལ་ཕེབས་སོ༔ ཡང་སྐལ་ལྡན་ཞིག་གིས་མདུན་དུ་དར་སྣ་ཚོགས་ལས་བྱས་པའི་ཕྱེ་མ་ཕུར་མས་གཡབ་སྟེ༔ གཅིག་གིས་བལྟས་ན་བར་དོའི་མཆོད་པའི་ལྷ་མོ་རྣམས་གར་བྱེད་པ་གཏན་ལ་ཕེབས་སོ༔ ཡང་རང་གི་མདུན་དུ་སྐལ་ལྡན་རྒྱན་སྣ་ཚོགས་ཀྱིས་བརྒྱན་པ་ཞིག་འདུག་སྟེ་རང་ཡང་རྒྱན་གྱིས་བརྒྱན་ནས་དེ་གཉིས་ཀྱི་སྙིང་ཁར་དར་སྣ་ཚོགས་ཐག་(༥༠)པ་འཐེན་ཏེ་དེའི་མདོ་མདོར་མེ་ལོང་ཡང་བཏགས་ལ་སྐྱེས་བུ་གཉིས་ཀྱིས་ཤེལ་རེ་བཟུང་སྟེ་བལྟས་པས་གཅིག་ལ་གཅིག་འོད་ཀྱི་སྙེ་ཚོན་དུ་མཐོང་སྟེ༔ བར་དོ་ལ་རིགས་ལྔ་ཡབ་ཡུམ་གྱི་བྱང་ཆུབ་ཀྱི་སེམས་རྒྱུན་གཏན་ལ་ཕེབས་སོ༔ ཡང་ནམ་དྭངས་པའི་ཚེ་སྐལ་ལྡན་དེ་གན་རྐྱལ་དུ་ཉལ་ཏེ༔ རང་གི་སྙིང་ཁར་གདུགས་གསེར་གྱི་ཡུ་བ་ཅན་གཅིག་བཟུང་སྟེ་མིག་གཡོན་པས་གསལ་བྱེད་ཀྱིས་བལྟས་ན་རིག་པ་མ་བུ་འབྲེལ་བ་དང་ལྷུན་གྲུབ་ཀྱི་སྣང་བ་གཏན་ལ་ཕེབས་སོ༔ ཡང་ནམ་དྭངས་པའི་ཚེ་གསེར་གྱི་དྲིལ་བུ་གཡེར་ཁའི་ཕྲེང་བ་སྐྱེས་བུ་གཅིག་གིས་སྤྱི་བོར་འཐེན་ཏེ༔ ཡང་སྐལ་ལྡན་གྱིས་བལྟས་ནས༔ དེ་ལ་ཡང་གཅིག་གིས་དབྱུག་པ་དལ་བུས་བརྒྱབ་ཅིང་གོང་ལྟར་བལྟས་ན་རིག་པ་འགྱུ་བ་རླུང་གི་སྒྲ་དང་བཅས་པ་གཏན་ལ་ཕེབས་སོ༔ དེ་རྣམས་ནི་གཞི་རིག་པ་ལ་ངོ་སྤྲད་པའོ༔ དོན་དེ་དག་གསུམ་གྱིས་ཕྱི་ཡུལ་ལ་ངོ་སྤྲད་པས་བར་དོ་ལམ་ལ་བརྟན་པ་ཐོབ་པའི་དགོས་པ་ཡོད་དོ༔ གཉིས་པ་ནང་སེམས་རིག་ལ་ངོ་སྤྲད་པ་ལ་གཉིས་ཏེ༔ བྱ་བྱེད་སེམས་ལ་ངོ་སྤྲད་པས་སྣང་བའི་འདུ་བ་བཅད་པར་བསྟན་པ་དང༔ མི་འགྱུར་བའི་རིག་པ་ལ་ངོ་སྤྲད་པས་འདུག་ཚུལ་ཤེས་པར་བསྟན་པའོ༔ སེམས་ལ་ངོ་སྤྲད་པ་ནི་ཉེར་གཅིག་གཏན་ལ་ཕབ་པས་འདིར་མ་སྤྲོས་སོ༔ རིག་པ་ལ་གཉིས་ཏེ༔ རིག་པར་རང་གི་ངོ་བོ་ལ་སྤྲད་པ་དང༔ རྟགས་ལ་སྤྲད་པའོ༔ རྟགས་ནི་ཐིག་ལེའི་རྟགས་སུ་རང་གི་མིག་གི་ཕུགས་སུ་རང་གི་མཐེབ་མཛུབ་ཀྱིས་དེད་པས་ཐིག་ལེ་མཐེབ་གང་བ་ཞིག་འཆར་ཏེ༔ དབང་གི་བརྡར་དམར་པོ་ཤས་ཆེ་བའི་འོད་དུ་ཤར་བ་དེ་ལུས་ལ་ཐིག་ལེར་གནས་པའི་རྟགས༔ མཚན་མོ་སྦྲིད་པ་དྲག་པོ་བྱུང་བའི་ཚེ་མིག་ནས་མེ་སྟག་དམར་པོ་འཕྲོ་བའི་ཚུལ་འོད་དུ་འཆར་ཏེ་ཤེས་རབ་ཀྱི་རྟགས༔ དབྱིངས་ཀྱི་རྟགས་ཨ་ཐམ༔ ཡེ་ཤེས་ཀྱི་རླུང་གི་རང་སྒྲ་ནི༔ རྣ་བའི་མདུན་ངོས་མཐེབ་མོས་མནན་པས་སྒྲ་འོང་བ་དེ་ཡིན༔ ཡེ་ཤེས་ཀྱི་རྟགས་ནི༔ སྐྱེས་བུ་གཅིག་སྔ་དྲོ་ཤར་དུ་འདུག༔ བར་དུ་བཙོད་ཆུ་བཞག་སྟེ་དེ་ཡི་ནང་དུ་བལྟས་པས་ཆུའི་ནང་དུ་སྔོན་དམར་དུ་(༥༡)སོང་བ་དེ་ཡིན་ནོ༔ ཁའི་རླངས་པ་ཉི་ཟེར་ལ་སྔོན་དམར་དུ་ཡོང་བ་དེ་ཡེ་ཤེས་ཀྱི་རླུང་ཡིན་པའི་རྟགས༔ བ་སྤུ་རྣམས་ཉི་ཟེར་ལ་བསྟན་ན་འོད་འབྱུང་བ་ནི་སྐུའི་རྟགས༔ རིག་པའི་རྟགས་ནི་བཙོད་ཆུའི་ནང་དུ་ཁ་རླངས་འོད་དུ་འབྱུང་བ་དེ་ཡིན་ནོ༔ རིག་པའོ་ངོ་བོ་ལ་གསུམ་སྟེ༔ རིག་པའི་སྐུ་ལ་ངོ་སྤྲད་པ་དང༔ རིག་པ་རང་གི་འདུག་ཚུལ་ལ་ངོ་སྤྲད་པ་དང༔ རིག་པའི་གོམས་ཚད་ལ་ངོ་སྤྲད་པའོ༔ སྐུ་ནི་གསུམ་སྟེ༔ སྤྲུལ་སྐུ་ངོ་སྤྲོད་ཀྱི་མན་ངག་གིས་སྣང་བ་འདི་གཏན་ལ་དབབ་པར་བསྟན་པས་འབྱུང་བའི་གནོད་པ་དང་བྲལ་བར་བསྟན་པ་དང༔ ལོངས་སྐུ་ངོ་སྤྲོད་ཀྱི་མན་ངག་གིས་བར་དོའི་སྣང་བ་གཏན་ལ་ཕབ་པ་སྟེ་སྐྱེ་གཉིས་མཚམས་སུ་མངོན་པར་རྫོགས་པར་བུདྡྷ་བར་བྱེད་དོ༔ ཆོས་སྐུ་ངོ་སྤྲོད་ཀྱི་གདམས་ངག་གིས་གཞི་གནས་ཆེན་པོ་གཏན་ལ་དབབ་པ་སྟེ་འཁོར་འདས་བསྲེས་ཏེ་མྱ་ངན་ལས་འདའ་བར་བྱེད་པའོ༔ རིག་པ་རང་གི་འདུག་ཚུལ་ནི༔ རིག་པ་མངོན་སུམ་གྱི་མན་ངག་ཅེས་བྱ་བ་སྟེ་དཔེ་དང་རྟགས་རྣམས་བྲལ་བར་རབ་ཏུ་གསང་བའི་དོན་དུའོ༔ རིག་པ་གོམས་ཚད་ནི༔ འཁོར་འདས་རུ་ཤན་ཕྱེད་པ་ལ་སོགས་པའོ༔ དེ་ལྟར་དཔེ་དུ་མས་གཏན་ལ་ཕབ་པ་ནི་འདི་ཉིད་ལ་དབང་པོ་འབྲིང་པོ་རྣམས་ཡིད་ཆེས་པའི་དགོས་པ་དང༔ བར་དོ་ངོ་ཤེས་པའི་དགོས་པ་ཡོད་དོ༔ མངོན་སུམ་དུ་གཏན་ལ་དབབ་པ་རྣམས་ནི་ཀུན་གྱི་སྤྱོད་ཡུལ་མ་ཡིན་པས་ཡང་མཛོད་དུ་ཨ་ཐཾ༔ དེའི་ཕྱིར་ན་ངོ་སྤྲད་པ་དང་རྟོགས་པ་ཐོབ་པ་དུས་མཉམ༔ རྟོགས་པ་ཐོབ་པ་དང་ཆོས་༼གྲུབ་མཐའ་གཞན་ལ་༽བོར་༼དེ་༽བ་༼ལ་བརྟག་པ་གཅེས་༽དུས་མཉམ༔ ཆོས་བོར་བ་དང་དབུགས་ཆད་པ་དུས་མཉམ༔ དབུགས་ཆད་པ་དང་སངས་རྒྱས་པ་དུས་མཉམ་པར་བསྟན་ནོ༔ ལྟ་བ་རང་བྱུང་གི་ཡེ་ཤེས་དཔངས་མཐོ་ཡང་དཔེ་དུ་མས་མ་བསྟན་ན་དབང་པོ་འབྲིང་པོ་རྣམས་བྷུད་མི་དྷའོ༔ ཨ་ཏི་ཡོ་ག་རྩོལ་སྒྲུབ་དང་བྲལ་ཡང་གསང་སྔགས་ཀྱི་དབང་དང་བྱིན་རླབས་མ་བྱས་ན་དབང་པོ་ཐ་མ་རྣམས་སྐྱེ་བ་གཅིག་གིས་ཐོགས་པར་མི་འགྱུར་ཏེ༔ སྐྱེ་བ་བརྒྱུད་པར་འགྱུར་རོ༔ ལྟ་བ་སྟོང་པ་ཉིད་རྒྱ་ཆེ་ཡང་རིག་པ་ཚད་ལ་མ་ཕབ་ན་སྤྱི་འབྱམས་ཏེ་དབང་པོ་(༥༢)རབ་ཀྱིས་འདི་ཉིད་ལ་ཡེ་ཤེས་ཀྱི་རྩལ་མི་རྫོགས་སོ༔ དེའི་ཕྱིར་ན་ཡང་མཛོད་ཀྱི་གདམས་པ་བསྟན་པའོ༔ རིག་པའི་ཡེ་ཤེས་དཔེ་དུ་མའི་སྒོ་ནས་གཏན་ལ་ཕབ་པ༔ ངོ་སྤྲོད་རིན་པོ་ཆེའི་འཁོར་ལོ་ཞེས་བྱ་བ༔ སྤྲུལ་པ་པོ་དགའ་རབ་རྡོ་རྗེས་མཛད་པ་རྫོགས་སོ༔ སཱ་མཱ་ཡཱ༔ ན་ར་ཀན༔ རྒྱ་རྒྱ་རྒྱ༔
རྒྱུད་མེད་རྣམ་པར་དག་པའི་སྟོན་པ་རྡོ་རྗེ་འཆང༔ སེལ་མེད་དྲི་མ་དག་པ་ངེས་པའི་བཀའ༔ དེ་དོན་མ་ནོར་བསྡུས་པའི་ཡི་གེ་འདི༔ སངས་རྒྱས་མྱ་ངན་འདས་པའི་རྟེན་དུ་ཡི་གེར་བཏབ༔ བདག་ནི་སྐྱེ་བོའི་རིགས་མེད་ཨུ་རྒྱན་ཡུལ་དུ་ནི༔ དར་མ་སྡེ་ཡི་ལྷུམས་སུ་ཞུགས་པའི་ཚུལ་བསྟན་ནས༔ གསང་སྔགས་གསང་བའི་ཡི་གེ་འདི་དག་བཀོད༔ འཇིག་རྟེན་མུན་པ་རྣམས་ནི་འདི་ཡིས་འོད་དུ་འབར༔ རྒྱུད་དང་མན་ངག་རྣམས་སུ་རབ་ཕྱེ་ནས༔ འཇམ་དཔལ་བཤེས་གཉེན་ཉིད་ཀྱི་རྒྱུད་སྦྱང་ཕྱིར༔ མན་ངག་སྙིང་པོ་རྒྱུད་ཀྱི་གསང་དོན་བཀོད༔ བསྟན་པའི་རྒྱལ་པོ་འདི་ནི་གར་གནས་པར༔ མུན་པ་རང་དག་སྣང་བའི་འོད་དང་ལྡན༔ ཐེག་པའི་ནང་ནས་ཁྱད་འཕགས་ཨ་ཏི་གསང་བ་ཆེ༔ དེ་ཡི་ཚིག་དང་ཡི་གེ་རྒྱུད་དང་མན་ངག་ལུང༔ སྤྱི་ཡི་ལུས་བཞིན་ཕྱི་ཡི་ཡུལ་ཙམ་མཚོན༔ དེ་ལྟར་བཀོད་པའི་ཚིག་ཚོགས་གྲངས་མང་ལ༔ གསང་བའི་མན་ངག་སྙིང་ཏིག་འདི་མེད་ན༔ གཟུགས་ཀྱི་ཕུང་པོ་ཁོང་གི་སྙིང་མེད་འདྲ༔ དེ་ལྟར་ཨ་ཏི་རང་དོན་གཞུང་རྣམས་ལ༔ མཚོན་པར་བྱེད་པའི་ཡི་གེ་འདི་མེད་ན༔ དབང་པོའི་དྭངས་མ་དཔྲལ་བའི་མིག་མེད་འདྲ༔ ཨ་ཏི་སྡེ་དང་གྲངས་བཀོད་ཆོས་རྣམས་ལ༔ བཤད་པར་བྱ་བའི་རྒྱུད་ཆེན་འདི་མེད་ན༔ སྒྱུར་བར་བྱེད་པ་ཁ་ཡི་ལྕེ་མེད་འདྲ༔ བསྟན་པ་འདི་ལས་ཁྱད་པར་ཆེ་བའི་ཐབས༔ གཞན་ནས་སྟོན་རེ་བདག་ནི་ན་ར་ཀན༔
དེ་ཡི་ཕྱིར་ན་ཕྱི་རབས་འཇུག་པ་རྣམས༔ འདི་ལ་གོམས་པར་གྱིས་ལ་མིག་ལྟར་འཚོས༔ འཇམ་དཔལ་ཁྱོད་ཀྱིས་བསྟན་པའི་སྙིང་པོ་འདི༔ བསྟན་པའི་དོན་དུ་སྐལ་དང་ལྡན་ལ་བྱིན༔ སྐལ་བ་དག་དང་མི་ལྡན་བྱུང་སྲིད་ན༔ བསྟན་པའི་བཙས་སུ་རང་རྒྱས་ཐོབ་ལ་སྦོས༔ བདག་ནི་མྱ་ངན་འདའ་སྟེ་གསང་(༥༣)བའི་ཚིག་གསུམ་པོ༔ ཁྱོད་ཀྱིས་ཟུང་ལ་སྙིང་གི་དཀྱིལ་དུ་ཕུར༔ འདི་ནི་སྐལ་མེད་རྣམས་དང་ཐེག་དམན་ལ༔ རླུང་ཕྱོགས་ཙམ་དུ་བརྗོད་པར་མ་བྱེད་ཅིག༔ ཅི་ཕྱིར་སྐྲག་ཅིང་བརྒྱལ་ནས་གསང་སྔགས་ཉིད་སྤོང་བས༔ འདི་ཉིད་བསྐལ་པ་འཇིག་ཀྱང་སྙིང་ལ་རྒྱས་གདབ་བྱ༔ སྙིང་པོ་བྱང་ཆུབ་བར་དུ་ཁ་རུ་དབྱུང་མི་བྱ༔ ཞེས་པ་སྤྲུལ་པ་པོ་དགའ་རབ་རྡོ་རྗེས་གསུངས་པ་རྫོགས་སོ༔ ལས་ཅན་དེ་དང་འཕྲད་པར་ཤོག༔ རྒྱ་རྒྱ་རྒྱ༔