ཟབ་ལམ་བདེ་གཤེགས་ཀུན་འདུས་ལས། སྐུ་རྡོ་རྗེའི་ཁྲིད་ཡིག་གི་ཟུར་འདེབས་མཚན་མོའི་རྣལ་འབྱོར་གྱི་ཡིག་ཆུང་། ལོ་ཆེན་དྷརྨ་ཤྲཱི།
ཟབ་ལམ་བདེ་གཤེགས་ཀུན་འདུས་ལས། སྐུ་རྡོ་རྗེའི་ཁྲིད་ཡིག་གི་ཟུར་འདེབས་མཚན་མོའི་རྣལ་འབྱོར་གྱི་ཡིག་ཆུང་བཞུགས། ལོ་ཆེན་དྷརྨ་ཤྲཱི། ན་མོ་གུ་རུ་བུདྡྷ་བོ་དྷི་སཏྭ་བྷྱཿ འདིར་ཟབ་ལམ་བདེ་གཤེགས་ཀུན་འདུས་ཀྱི་རྩ་ཁྲིད་ལས། སྐུ་རྡོ་རྗེའི་སྐབས་ཀྱི་སྤོག་ཆོག་མཚན་མོའི་རྣལ་འབྱོར་སྒོམ་པའི་ཕྱག་བཞེས་ནི་འདི་ཡིན་ཏེ། གང་དུ་སྒོམ་པའི་གནས་འབྱོར་ལྡན་གྱི་མུན་ཁང་ནི། རབ་གསུམ་ཐོག་གི་བར་ཁང་། འབྲིང་ཉིས་ཐོག་གི་སྟེང་ཁང་། ཐ་མ་ཐོག་གཅིག་མའི་མལ་འོག་ཏུ་ས་དོང་བྲུས་པར་ཐོག་ཕུབ་པའི་རླུང་སེང་ཡོད་པ། གྱེན་ལོགས་ལ་དུང་གི་བུག་པ་འདྲ་བའི་རླུང་གི་སྐྱོག་མོ་ཐོག་མཚམས་ལ་ཐུག་པ། གང་ལྟར་ཡང་ཐོག་དཔངས་མཐོ་བ་ཕྱོགས་ཐམས་ཅད་ཞལ་བས་བསྟར་ཞིང་། སྒོ་འཁྱོགས་རིམ་པ་གསུམ་པ། སྐར་ཁུང་ཕྱི་རུབ་ལ་ནང་ཡངས་པ། འབོ་འདེ་སོགས་ཀྱིས་བཀག་ན་ཁབ་མིག་ཙམ་གྱི་སྣང་བའང་མི་རྒྱུག་པ་སྟེ་མུན་ཁང་དངོས་སམ། རྗེས་མཐུན་ཀུན་སྤངས་ཀྱི་གནས་ཕུག་པ་དང་། ཁྱིམ་སོགས་ཇི་ལྟར་རིགས་པ་སྐམ་ཞིང་ས་རླངས་མེད་པ་ལ་སྣང་བ་རྒྱུག་པའི་སེང་ཅུང་ཟད་ཀྱང་མེད་པའི་ཐབས་བྱས་ཏེ། མུན་པ་ཤིན་ཏུ་གནག་པ་ཞིག་དགོས་སོ། །གནས་དེར་སྔོན་འགྲོ་རྒྱས་བསྡུས་ཇི་ལྟར་རིགས་པ་སྔོན་དུ་འགྲོ་བས། སྟན་བདེ་བ་ལ་ལུས་གནད་མ་གཞི་སྐུ་རྡོ་རྗེའི་དཀྱུས་ལྟར་ལས། ཁྱད་པར་མིག་གནད་ཧ་ཅང་མ་ཕྱེ་མ་བཙུམས་ཕྱེད་བཙུམས་ཀྱིས་ལྟ་སྟངས་ཐད་ཀར་མིག་འབྲས་མི་འགུལ་ཞིང་རྫི་མ་མི་རྡེག་པར་བཞག རླུང་གནད་ཀྱི་ཁྱད་པར་འོག་རླུང་ཡིད་ཙམ་བསྐུམས། སེམས་གནད་དངོས་
གཞི་སྐུ་རྡོ་རྗེའི་དཀྱུས་ཀྱི་དམིགས་པ་སོར་བཞག་སྟེ། རིག་པ་ལྟེ་བར་གཏད་ནས་མི་ཤིགས་པའི་ཐིག་ལེ་དམར་ལམ་མེ་བ་དེ་ལ་སེམས་མི་འཕྲོ་བའི་རྟེན་ཙམ་བྱས་ཏེ། ཧ་ཅང་མ་བསྒྲིམས་མ་གློད་པར་རང་བབས་སུ་ཤིག་གེ་བཞག་གོ །དེས་སྐྱོ་ན་རེས་སྐུ་རྡོ་རྗེའི་དམིགས་པ་བཞག་ལ༑ མིག་ཕྱེད་བཙུམས་ཀྱིས་ལྟ་སྟངས་ལས་མིག་འབྲས་གྱེན་དུ་ལྡོག རླུང་རང་བབས་སུ་བཞག སེམས་དུས་གསུམ་གྱི་ཡུལ་གང་ལའང་མི་རྟོག་པར་རང་བབས་སྤྲོས་མེད་ཀྱི་ངང་ནས་ལྟ་སྟངས་གང་དུ་གཏད་པའི་ཐད་ཀའི་བར་སྣང་གི་མུན་པ་ནག་ཐིང་ངེ་བ་དེ་ལ་སེམས་ཆེར་གཏད་ནས་འཇོག་པ་ནི་གནད་དོ། །དེ་ལྟར་དམིགས་པ་གཉིས་པོ་དེ་རེས་འཇོག་ཏུ་བསྒོམས་པས་ཡེ་ཤེས་ཀྱི་སྣང་བའི་སྟོང་གཟུགས་རྣམས་འཆར་བར་འགྱུར་ཞིང་། ཤར་བའི་ཚེ་སྟོང་གཟུགས་གཡོ་བའི་རྗེས་སུ་མིག་གནད་དང་སེམས་མ་འགྱུར་བར་བྱས་ལ། ཇི་ལྟར་མཐོང་བའི་སྟོང་པའི་གཟུགས་བརྙན་དེ་ག་ལ་ལྟ་སྟངས་མི་གཡོ་བར་སེམས་ཆེ་རེ་གཏད་དེ་བཟོ་མེད་ཡེངས་མེད་དུ་བཞག་པས། ཇི་ཞིག་ན་ཡུལ་དང་ཡུལ་ཅན་རོ་གཅིག་པ་ལྟ་བུར་གྱུར་ནས་བླང་རིགས་ངོས་བཟུང་དང་བྲལ་བའི་ངང་ལ་རྩེ་གཅིག་ཏུ་གནས་ཤིང་། རྟག་སྣང་རྣམས་ཀྱང་བརྟན་གསལ་གོང་འཕེལ་དུ་འགྲོ་བར་འགྱུར་རོ། །ཞེས་གསུངས་སོ། །ཚུལ་འདི་ཡང་གཅུང་ཀུན་དགའི་མཚན་ཅན་གྱི་ཞལ་སྔ་ནས་ལྷ་རྫས་བཟང་པོའི་མེ་ཏོག་དང་བཅས་ཏེ་འབད་པ་ཆེན་པོའི་གསུང་གིས་བསྐུལ་བ་དང་། གྲུབ་ཆེན་བློ་ལྡན་ལྷུན་གྲུབ་ཀྱིས་ཀྱང་རིང་མོ་ནས་བསྐུལ་བའི་ངོར་གཉོས་བཙུན་རྨོངས་པ་དྷརྨ་ཤྲཱིས་༧རྗེ་གཏེར་ཆེན་བླ་མ་དམ་པ་ལ་གནང་བ་ཞུས་ཏེ། རྒྱལ་ཟླའི་ཚེས་བཅོ་བརྒྱད་ཀུན་མཁྱེན་ཆེན་པོའི་དུས་མཆོད་ཀྱི་ཉིན་ཟིན་བྲིས་སུ་སྤེལ་བ་དགེ་ལེགས་འཕེལ། བཀྲ་ཤིས།། །།