དྲི་བ་བཅུ་བཞི་བ་སྦྱོར་ལམ་མཉམ་བཞག་ཡེ་ཤེས་ཀྱིས་ཆོས་ཉིད་མངོན་སུམ་དུ་རྟོགས་པ་ཡོད་དམ་མེད།
དྲི་བ་བཅུ་བཞི་བ་སྦྱོར་ལམ་མཉམ་བཞག་ཡེ་ཤེས་ཀྱིས་ཆོས་ཉིད་མངོན་སུམ་དུ་རྟོགས་པ་ཡོད་དམ་མེད། མེད་ན་ཉ་ཊཱིཀ་ལས་རྣལ་འབྱོར་མངོན་སུམ་དུ་ཁས་བླང་དགོས་ཞེས་གསུངས་པའི་དོན་ཇི་ལྟར་ཡིན་ཞེས་པའི་དྲིས་ལན།
སྦྱོར་ལམ་མཉམ་བཞག་ཡེ་ཤེས་ཀྱིས་ཆོས་ཉིད་མངོན་སུམ་དུ་རྟོགས་པ་ཡོད་དམ་མེད། མེད་ན་ཉ་ཊཱིཀ་ལས་རྣལ་འབྱོར་མངོན་སུམ་དུ་ཁས་བླང་དགོས་ཞེས་གསུངས་པའི་དོན་ཇི་ལྟར་ཡིན་ཞེས་པའོ། །དེའི་ལན་ནི། དེ་ལ་ཆོས་རྗེ་ཉ་དབོན་པའི་བཞེད་པ་དང༌། རྗེ་ཏཱ་ར་ནཱ་ཐ་དང་ས་བཟང་དང་ཀུན་མཁྱེན་ཤེས་རབ་རྒྱལ་མཚན་གྱི་བཞེད་པ་བཤད་པ་གཉིས་ལས། དང་པོ་ནི། ཆོས་རྗེ་ཉའི་ཕར་ཕྱིན་ཡིད་ཀྱི་མུན་སེལ་ལས། སྤྱིའི་ཚུལ་གྱིས་རྟོགས་ན་ནི་སྒྲ་དོན་འཛིན་པའི་རྟོག་པར་འགྱུར་རོ། །དེས་ན་བློའི་ངོ་བོ་ཡང་དག་པའི་དོན་བསྒོམས་པ་ལས་བྱུང་བའི་ཡེ་ཤེས་ཆོས་ཉིད་གསལ་སྣང་ཅན་ཡིན་པས་རྣལ་འབྱོར་མངོན་སུམ་དུ་ཁས་བླང་དགོས་ཏེ། དེ་ཡིན་ན་མངོན་སུམ་ལས་མའདས་ཤིང་དབང་ཡིད་མངོན་སུམ་མིན་པའི་རྒྱུ་མཚན་སླ་ཞིང༌། ཞེས་སོགས་ཆོས་རྗེ་ཉ་དབོན་པའི་ཉ་ཊཱིཀ་ཡིད་ཀྱི་མུན་སེལ་གྱི་སྐབས་དང་པོ་ངེས་འབྱེད་ཡན་ལག་གི་སྐབས་སུ་སྦྱོར་ལམ་མཉམ་བཞག་ཡེ་ཤེས་གསལ་སྣང་ཅན་ཡིན་པར་བསྟན་བཅོས་དུ་མ་ལས་གསུངས་པ་རྣམས་དོན་སྤྱི་དང་བྲལ་བའི་གསལ་སྣང་ཅན་ཡིན་ན་རྟོག་མེད་ནི་ཡིན་ལ། རྟོག་མེད་འཁྲུལ་ཤེས་དང༌། དབང་ཡིད་མངོན་སུམ་མ་ཡིན་པས་ན། དེ་རྣལ་འབྱོར་མངོན་སུམ་ཡིན་ཡང་དེ་རྒྱུད་ལྡན་གྱི་གང་ཟག་འཕགས་པ་དང་མཐོང་སྤང་སྤངས་མི་དགོས་པ་ཡིན་པ་ལྟ་བུར་གསུངས་སོ། །གཉིས་པ་ནི། རྗེ་ཏཱ་ར་ནཱ་ཐའི་སྔོན་མེད་ལེགས་བཤད་དུ། སྦྱོར་ལམ་དེ་ཆོས་ཉིད་ལ་གསལ་སྣང་ནི་ཐོབ་པ་ཡིན་ཞིང༌། མི་རྟོག་པའི་ཚུལ་གྱིས་ཆོས་ཉིད་ཅུང་ཟད་རང་གི་རིག་པ་ཡང་ཡིན་ལ། རྣལ་འབྱོར་མངོན་སུམ་གྱིས་རྟོགས་པ་ནི་མ་ཡིན་པ་དང༌། གཟུང་འཛིན་གྱི་རྣམ་རྟོག་གློ་བུར་བ་རྣམས་རིམ་གྱིས་འགག་པར་འགྱུར་བ་ཡིན་པ་དང༌། གང་མངོན་གྱུར་བ་མ་འགགས་པའི་རྟོག་པ་དེ་དང་དེ་ཡང་མཉམ་བཞག་ཏུ་མི་འབྱུང་མོད་ཀྱི། རྗེས་ཐོབ་ཏུ་དེ་དག་འབྱུང་ཞིང༌། དེ་དག་མ་སྤངས་པའི་སྟོབས་ཀྱིས་མཉམ་བཞག་ཀྱང་ཅུང་ཟད་མི་གསལ་བ་ཡིན་ནོ། །སྦྱོར་ལམ་གྱི་ཡེ་ཤེས་འདི་ཀུན་ཀྱང་མི་རྟོག་པ་སྤྲོས་བྲལ་གྱི་རྣམ་པ་ཅན་ཡིན་པས། བར་བར་ན་རྣམ་པར་རྟོག་པའི་འཛིན་པ་དང་ཅུང་ཟད་འདྲེས་པ་ཡོད་ཀྱང་རང་གི་ངོ་བོ་རྟོག་པ་ནམ་ཡང་མ་ཡིན་ཞིང༌། ཆོས་ཉིད་ཅུང་ཟད་ཙམ་གསལ་ལ་ཅུང་ཟད་མི་གསལ་བ་ནི། དཔེར་ན་སེང་རས་ཀྱིས་གདོང་གཡོགས་ཏེ་དངོས་པོ་ལ་བལྟས་པ་བཞིན་ནོ། །ཞེས་སྦྱོར་ལམ་མཉམ་བཞག་རྣལ་འབྱོར་མངོན་སུམ་མ་ཡིན་པར་ཅུང་ཟད་གསལ་སྣང་དང་བཅས་པའི་རྟོག་མེད་ཡིན་པར་གསུངས་སོ། །འོན་ཀྱང་འདིར་རྟོག་མེད་ཅེས་གསུངས་པ་ནི། རྣམ་འགྲེལ་ལས། རྟོག་པའི་དྲ་བ་རྣམ་བསལ་བས། །གསལ་བ་ཉིད་དུ་སྣང་བ་ཡིན། །ཞེས་དང༌། གསལ་བར་སྣང་བ་ཅན་བློ་གང༌། །དེ་ནི་དེ་ལ་རྟོག་མེད་འདོད། །ཅེས་པའི་སྒྲ་དོན་དང་བྲལ་བའི་རྟོག་མེད་མ་ཡིན་པར་སྦྱོར་ལམ་མཉམ་བཞག་ལ་ཆགས་སྡང་སོགས་རྟོག་པ་མ་ཟད་ཤེས་རབ་ཀྱིས་འདི་ཡིན་འདི་མིན་སྙམ་དུ་སོ་སོར་དཔྱོད་པའི་རྟོག་པ་དང༌། འདུ་ཤེས་ཀྱིས་འདི་སྟོང་ཉིད་དོ་སྙམ་དུ་མིང་དོན་གྱི་མཚན་མར་ཆེད་དུ་འཛིན་པའི་རྟོག་པ་སོགས་མ་ཡིན་པའི་དོན་ཡིན་པར་སྣང་སྟེ། ཐེག་མཆོག་དབུ་མའི་རྩ་འགྲེལ་དུ་ཡིད་ཀྱི་རྣམ་ཤེས་ཉོན་ཡིད་སོགས་གཙོ་སེམས་ལ་དོན་གྱི་ངོ་བོ་ཙམ་ལས་དོན་གྱི་ཁྱད་པར་འདིའོ་སྙམ་པའི་འགྱུ་རྟོག་མེད་པ་ཡིན་པས་རྟོག་མེད་ཡིན་པར་གསུངས་པ་སོགས་རྗེ་བཙུན་རིན་པོ་ཆེའི་ཐེག་མཆོག་དབུ་མ་སོགས་སུ་རྟོག་པ་ཞེས་པ་སྐབས་མང་པོར་འགྱུ་བའི་རྣམ་རྟོག་ལ་བྱེད་པ་མང་བའི་ཕྱིར་རོ། །ས་བཟང་མ་ཏི་པཎ་ཆེན་གྱི་རྒྱུད་བླའི་འགྲེལ་བ་རབ་གསལ་སྣང་བར་མཐོང་ལམ་གྱི་ངོ་བོ་བཤད་པའི་སྐབས་སུ། ཆོས་ཉིད་མངོན་སུམ་གྱིས་གསར་དུ་མཐོང་ཞིང༌། ཞེས་དང༌། བླང་དོར་རབ་གསལ་ལས། མཐོང་བའི་ལམ་དུ་འཕགས་པའི་བདེན་པ་བཞིའི་ཆོས་ཉིད་མངོན་སུམ་དུ་གསར་དུ་མཐོང་བ་ན། གཟུང་འཛིན་གཉིས་ཀ་མེད་པར་རྟོགས་པ་ཡེ་ཤེས་སྐད་ཅིག་བཅུ་དྲུག་རིམ་གྱིས་འཆར། ཞེས་གསུངས་པས་སྦྱོར་ལམ་གྱི་སྐབས་སུ་ཆོས་ཉིད་མངོན་སུམ་དུ་མཐོང་བ་མ་ཡིན་པར་གོ་ནུས་ཏེ། སྦྱོར་ལམ་གྱི་སྐབས་སུ་དེ་མངོན་སུམ་དུ་རྟོགས་ཡོད་ན་མཐོང་ལམ་གྱིས་མངོན་སུམ་དུ་གསར་དུ་མ་རྟོགས་པ་ཡིན་དགོས་ཀྱང་མཐོང་ལམ་གྱིས་གསར་དུ་མངོན་སུམ་དུ་རྟོགས་པར་གསུངས་པའི་ཕྱིར། ཀུན་མཁྱེན་དོལ་པོ་པ་ཤེས་རབ་རྒྱལ་མཚན་གྱི་བཞེད་པ་ནི། གང་གི་ཕར་ཕྱིན་མདོ་ལུགས་མ་ལས། རྒྱལ་ཚབ་མི་ཕམ་མགོན་པོའི་དགོངས་པ་ནི། མདོ་སྡེ་རྒྱན་ལས། དེ་ནས་དེ་འདྲར་འགྱུར་བ་ཡི། །བྱང་ཆུབ་སེམས་དཔའ་མཉམ་བཞག་པས། །ཡིད་ཀྱི་བརྗོད་པ་མ་གཏོགས་པ། །དོན་ཀུན་རབ་ཏུ་མི་མཐོང་ངོ༌། །ཞེས་ཚོགས་ལམ་གྱི་རྗེས་དེ་ནས་དྲོད་ཀྱི་གནས་སྐབས་དེ་འདྲར་འགྱུར་བའི་བྱང་ཆུབ་སེམས་དཔའ་མཉམ་པར་བཞག་པ་དེས་ཡིད་ཀྱི་བརྗོད་པ་རང་དང་སྤྱིའི་མཚན་ཉིད་དུ་སྣང་བར་མཐོང་བ་མ་གཏོགས་པ་གཟུང་བའི་དོན་ཀུན་རབ་ཏུ་མི་མཐོང་བ་ནི་དྲོད་ཀྱི་ཡེ་ཤེས་སོ། །ཞེས་དང༌། དེས་ན་ངེས་འབྱེད་ཡན་ལག་རྣམ་བཞི་པོ་འདི་ནི་རྣམ་པར་རྟོག་པ་མ་ཡིན་ནོ། །ཞེས་དང༌། དེས་ན་དྲན་པ་ཉེར་བཞག་ནས་ངེས་འབྱེད་ཆ་མཐུན་གྱི་བར་གྱི་འཇིག་རྟེན་ལས་འདས་པའི་ཡེ་ཤེས་ཀྱང་མ་ཡིན་ལ་ཡང་དག་པ་མ་ཡིན་པའི་ཀུན་རྟོག་ཁམས་གསུམ་གྱིས་བསྡུས་པའི་སེམས་བྱུང་ཡང་མ་ཡིན་ཞིང༌། འཇིག་རྟེན་ལས་འདས་པའི་ཡེ་ཤེས་རྗེས་མཐུན་པ་ཡིན་པར་གསུངས། ཞེས་གསུངས་ལ། གོང་གི་དེས་ཡིད་ཀྱི་བརྗོད་པ་རང་དང་སྤྱིའི་མཚན་ཉིད་དུ་སྣང་བར་མཐོང་བ། ཞེས་སོགས་ཀྱིས་སྦྱོར་ལམ་མཉམ་བཞག་ཡེ་ཤེས་སྟོང་བ་ཉིད་ལ་དོན་སྤྱི་ཕྲ་མོས་སྒྲིབ་པའི་རྟོག་པ་ཡིན་པར་གྲུབ་པའོ། །འོ་ན་རང་གི་ངོ་བོ་རྟོག་པ་ནམ་ཡང་མ་ཡིན། ཞེས་དང༌། ངེས་འབྱེད་ཡན་ལག་རྣམ་བཞི་པོ་འདི་ནི་རྣམ་པར་རྟོག་པ་མ་ཡིན་ནོ། །ཞེས་སོགས་ཀྱི་དོན་གང་ཞེ་ན། དེའི་སྐབས་ཀྱི་རྟོག་པ་མིན་གསུངས་པ་ནི། ཕར་ཕྱིན་མདོ་ལུགས་མ་ལས། སྐབས་འདིའི་རྟོག་པ་ནི་ཚུལ་བཞིན་མ་ཡིན་པར་མངོན་པར་ཞེན་པའི་བདག་ཉིད་ཡིན། ཞེས་པའི་རྟོག་པ་མིན་པའི་དོན་ཡིན་སྙམ་མོ། དམ་པ་དེ་དག་གི་དགོངས་པ་གཅིག་ཏུ་དྲིལ་ན། ཆོས་རྗེ་ཉ་དབོན་པས་སྦྱོར་ལམ་མཉམ་བཞག་རྣལ་འབྱོར་མངོན་སུམ་ཡིན་པ་ལྟ་བུར་གསུངས་པ་ནི། ཉ་ཊཱིཀ་ལས། ལོ་ཙཱ་པ་ཆེན་པོ་སོགས་བྱང་སེའི་སྦྱོར་ལམ་མཉམ་བཞག་རྣམས་ནི་རྣལ་འབྱོར་མངོན་སུམ་ཡིན་གྱི་དེའི་སྐབས་ན་རྟོག་པ་མེད་གསུང་ངོ༌། །ཞེས་ལོ་ཆེན་སོགས་མཐུན་ཙམ་དང༌། གཞུང་དུ་མར་སྦྱོར་ལམ་མཉམ་བཞག་གསལ་སྣང་འབྱུང་བར་གསུངས་པ་གལ་ཏེ་དོན་སྤྱིའི་མཚན་མ་བྲལ་བའི་དོན་ལ་བྱེད་ན་སྦྱོར་ལམ་མཉམ་བཞག་རྣལ་འབྱོར་མངོན་སུམ་ཁས་བླང་དགོས་པར་འགྱུར་ཞེས་པ་ཡིན་ལ། ཉ་དབོན་པ་རང་གི་དགོངས་པ་ནི། ཕར་ཕྱིན་ཡིད་ཀྱི་མུན་སེལ་གྱི་ཡེ་ཤེས་ཚོགས་ཀྱི་སྐབས་སུ། ཡུལ་ཅན་ཡེ་ཤེས་ཀྱི་ས་མཚམས་འཇོག་ན། ཐེག་ཆེན་ཚོགས་ལམ་དུ་སྤྱིའི་ཚུལ་གྱིས་རྟོགས། སྦྱོར་ལམ་དུ་གསལ་སྣང་སྐྱེས་པའི་ཚུལ་གྱིས་རྟོགས། མཐོང་ལམ་དུ་གསར་དུ། སྒོམ་ལམ་དུ་མཐོང་ཟིན་གོམས།སངས་རྒྱས་སར་སྒྲིབ་པ་ཐམས་ཅད་དང་བྲལ་བས་མཐར་ཕྱིན་པའི་ཚུལ་གྱིས་རྟོགས་སོ། །ཞེས་དང༌། དེའི་སྐབས་གཉིས་པ་ལས། ཆོས་ཉིད་སྔར་མ་མཐོང་བ་གསར་དུ་མངོན་སུམ་དུ་མཐོང་བས་མཐོང༌། དེ་ཁོ་ནའི་དོན་ཚོལ་བས་སམ་བྱང་ཆུབ་ཏུ་བགྲོད་པས་ལམ་མོ། །ཞེས་དང༌། ཆོས་རྗེ་ཉའི་ལྟ་སྒོམ་སྤྱོད་གསུམ་གྱི་དྲིས་ལན་ཡིད་ཀྱི་མུན་སེལ་ལས། ལུང་རིགས་རྣམ་དག་གིས་ཆོས་ཀུན་དེ་ཁོ་ན་ཉིད་དུ་སྤྲོས་བྲལ་སྤྱིའི་རྟོགས་པའི་ཤེས་རབ་གཙོ་བོར་གྱུར་པ་དང༌། དེ་འདྲའི་སྤྲོས་བྲལ་ལམ་སྟོང་ཉིད་ལ་གསལ་སྣང་སྐྱེས་པའི་འཇིག་རྟེན་པའི་སྒོམ་བྱུང་གི་ཤེས་རབ་གཙོ་བོར་གྱུར་པ་དང༌། དེ་འདྲའི་སྤྲོས་བྲལ་ལམ་སྟོང་ཉིད་མངོན་སུམ་དུ་རྟོགས་པའི་འཕགས་པ་སློབ་པའི་ཤེས་རབ་གཙོ་བོར་གྱུར་པ་དེ་རྣམས་ཀྱང་ཡང་དག་པའི་ལྟ་བ་མཚན་ཉིད་པ་ཡིན་ཞིང༌། ཞེས་མཐོང་ལམ་མ་གཏོགས་སྦྱོར་ལམ་ལ་སྟོང་ཉིད་མངོན་སུམ་དུ་རྟོགས་པར་མ་གསུངས་པའི་ཕྱིར་ན་ཉ་དབོན་པ་རང་གི་ཐུགས་དགོངས་ལ། སྦྱོར་ལམ་རྣལ་འབྱོར་མངོན་སུམ་མ་ཡིན་པ་དང༌། སྦྱོར་ལམ་མཉམ་བཞག་ཡེ་ཤེས་ཀྱིས་སྟོང་བ་ཉིད་མངོན་སུམ་དུ་མ་རྟོགས་པར་བཞེད་ཅེས་གསུང་ཚུལ་ཞིག་ཡོད་སྙམ།དེ་ལྟ་མ་ཡིན་ན། རྒྱུད་བླ་མ་ལས། སོ་སོའི་སྐྱེ་བོ་ཕྱིན་ཅི་ལོག ། བདེན་པ་མཐོང་བ་བཟློག་པ་སྟེ།། ཞེས་དང༌། དབུས་མཐའ་ལས། རྗེས་སུ་མཐུན་ལ་ཕྱིན་ཅི་ལོག །ཅེས་དང༌། མཛོད་ལས། མ་མཐོང་མཐོང་ཕྱིར་མཐོང་བའི་ལམ། །ཞེས་སོགས་དང་འགལ་བར་འགྱུར་བར་སྣང་ངོ༌། །འོན་ཀྱང་མཁས་མཆོག་དེ་དག་གི་བཞེད་དགོངས་ནི། ཟབ་ཅིང་རྒྱ་ཆེ་བས་ཇི་བཞིན་དུ་དཔོག་དཀའ་ཡང་རེ་ཞིག་རང་གི་རྣམ་པར་རྟོག་པ་ལ་ཤར་ཙམ་བྲིས་པ་ཡིན་པས་གཟུར་གནས་མཁས་དབང་རྣམས་ཀྱིས་སླར་དཔྱད་པར་བྱའོ། །སྔགས་ཐུན་མོང་མ་ཡིན་པའི་ལུགས་ལ་སོ་སྐྱེས་ལ་སྟོང་ཉིད་མངོན་སུམ་དུ་རྟོགས་པ་ཡོད་དེ། བསྟན་བཅོས་སྙིང་པོ་ངེས་པ་ལས། ལས་དང་པོས་ཀྱང་སྙིང་པོ་ཅུང་ཟད་མཐོང༌། །གསང་སྔགས་ཐུན་མོང་མིན་པའི་ཐབས་ལས་སོ། །ཞེས་དང༌། ལྷན་ཐབས་འོད་བརྒྱ་འབར་བ་ལས། ཉན་རང་འཕགས་པ་དང་གསང་སྔགས་ཀྱི་ཐབས་ཟབ་མེད་ན་བྱང་སེམས་སོ་སྐྱེ་རྣམས་ཀྱིས་དད་པས་རྟོགས་བྱ་ཡིན་གྱི་དངོས་སུ་མཐོང་བ་མེད། ཅེས་གསུངས་ལ། དེ་ལྟར་འཇམ་པའི་དབྱངས་ཐུབ་བསྟན་དགེ་ལེགས་རྒྱ་མཚོས་སྦྱོར་དྲུག་སྤྱི་དོན་དུ་བཤད་དོ། །གཞན་ཡང་མདོ་རྒྱན་རྩ་འགྲེལ་དུ་ཡང༌། ཡང་དག་མིན་རྟོག་ཡང་དག་མིན། །ཡང་དག་མ་ཡིན་མིན་མི་རྟོག ། རྟོག་མིན་མི་རྟོག་མ་ཡིན་པ། །ཤེས་བྱ་ཐམས་ཅད་ཡིན་པར་བརྗོད། །ཡང་དག་མ་ཡིན་པའི་རྟོག་པ་ནི། འཇིག་རྟེན་ལས་འདས་པའི་ཡེ་ཤེས་ཀྱི་རྗེས་སུ་མཐུན་པ་མ་ཡིན་པའི་རྣམ་པར་རྟོག་པ་གང་ཡིན་པའོ། །ཡང་དག་པ་ཡང་མ་ཡིན་ལ་ཡང་དག་པ་མ་ཡིན་པ་ཡང་མ་ཡིན་པ་ནི་དེའི་རྗེས་སུ་མཐུན་པའི་ངེས་པར་འབྱེད་པའི་ཆ་དང་མཐུན་པའི་པར་གང་ཡིན་པའོ། །མི་རྟོག་པ་ནི་དེ་བཞིན་ཉིད་དང་འཇིག་རྟེན་ལས་འདས་པའི་ཡེ་ཤེས་སོ། །རྟོག་པ་ཡང་མ་ཡིན་མི་རྟོག་པ་ཡང་མ་ཡིན་པ་ནི་འཇིག་རྟེན་ལས་འདས་པའི་རྗེས་ལས་ཐོབ་པའི་འཇིག་རྟེན་པའི་ཡེ་ཤེས་ཏེ། ཤེས་བྱ་ཐམས་ཅད་ནི་དེ་ཙམ་དུ་ཟད་དོ། །ཞེས་པའི་སྐབས་ནས་བསྟན་པའི་རྟོག་པ་ལ་ཡིན་མིན་གྱི་མུ་བརྩི་ཚུལ་ཐེག་མཆོག་དབུ་མ་ལས་ཀྱང་བསྟན་པས་ཤེས་པར་བྱ་ཞིང༌། །སྤྱིར་རང་ལུགས་ལ་རྟོག་བཅས་རྟོག་མེད་རྣམ་འགྲེལ་ལྟར་འཇོག་པ་ཡིན་མིན་སོགས་ལ་ཐག་བཅད་མི་སྔ་པར་ལུང་རིགས་ཀྱིས་དཔྱད་པར་བྱའོ། །