དྲི་བ་བཅུ་བཞི་པ་ནི།རང་ལུགས་ལ་འདུན་ལྡན་སེམས་བསྐྱེད་ཀྱི་རྣམ་བཞག་འཐད་པ་ཡིན་མིན་དང་སེམས་བསྐྱེད་ཉེར་གཉིས་སློབ་ལམ་ཡིན་མིན་སོགས་གང་འཐད་པ་ཡིན་ཞེས་པའི་ལན།
དྲི་བ་བཅུ་བཞི་པ་ནི།རང་ལུགས་ལ་འདུན་ལྡན་སེམས་བསྐྱེད་ཀྱི་རྣམ་བཞག་འཐད་པ་ཡིན་མིན་དང་སེམས་བསྐྱེད་ཉེར་གཉིས་སློབ་ལམ་ཡིན་མིན་སོགས་གང་འཐད་པ་ཡིན་ཞེས་པའི་ལན།
རང་ལུགས་ལ་འདུན་ལྡན་སེམས་བསྐྱེད་ཀྱི་རྣམ་བཞག་འཐད་པ་ཡིན་མིན་དང་སེམས་བསྐྱེད་ཉེར་གཉིས་སློབ་ལམ་ཡིན་མིན་སོགས་གང་འཐད་པ་ཡིན་ཞེས་པའོ། །དེའི་ལན་ནི། འདུན་ལྡན་སེམས་བསྐྱེད་ཀྱི་རྣམ་བཞག་འཐད་པ་ཡིན་ཏེ། སེམས་བསྐྱེད་དུ་གྱུར་པའི་འདུན་པ་དང་དེ་མཚུངས་ལྡན་གྱི་སེམས་བསྐྱེད་གཞན་ཡོད་པའི་ཕྱིར་ཏེ། ཉ་ཊཱིཀ་ལས། གཞན་དོན་དུ་བྱང་ཆེན་ལ་འདུན་པ་དེ། སེམས་བསྐྱེད་དངོས་སུ་བློ་གྲོས་མི་ཟད་པའི་མདོར་བཤད། ཞེས་དང༌། ཤནྟི་ཡང་དང་པོ་སེམས་བསྐྱེད་ཉིད་ཡིན་ལྷག་མ་གྲོགས། ཞེས་དང༌། མདོ་སྡེ་རྒྱན་གྱི་རྣམ་བཤད་ཐེག་ཆེན་རབ་གསལ་སྣང་བ་ལས། བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་དང་པོ་མོས་པ་ལས་བྱུང་བའམ་ཐེག་པ་ཆེན་པོ་ལ་འདུན་པ་དང་མཚུངས་པར་ལྡན་པ། ཞེས་གསུངས་སོ། །སེམས་བསྐྱེད་ཉེར་གཉིས་སློབ་ལམ་མ་ཡིན་པར་སྣང་སྟེ། གོང་དུ་བཤད་པ་ལྟར་སེམས་བསྐྱེད་ཉེར་གཉིས་ལས་ཐ་མ་གཉིས་ལ་སངས་རྒྱས་ཀྱི་སས་བསྡུས་ཡོད་པ་དང༌།སངས་རྒྱས་ཀྱི་ས་ལ་ངོ་བོའི་སྒོ་ནས་རང་ལ་བྱང་ཆུབ་ཐོབ་འདོད་མེད་ཀྱང་སྔར་སློབ་པའི་སའི་སེམས་བསྐྱེད་ཀྱི་རྫས་རྒྱུན་གྱུར་བའི་སངས་རྒྱས་ཀྱི་རྒྱུད་ཀྱི་ལམ་དེ་དག་སེམས་བསྐྱེད་དུ་བཞག་ཚུལ་ཡོད་པའི་ཕྱིར་རོ། །