གཉིས་པ་དབྱེ་བ་སོ་སོའི་མཚན་ཉིད་བཤད་པ།
གཉིས་པ་དབྱེ་བ་སོ་སོའི་མཚན་ཉིད་བཤད་པ་ལ།
དགེ་བསྙེན་གྱི་སྡོམ་པའི་མཚན་ཉིད་དང༌། དགེ་ཚུལ་གྱི་སྡོམ་པའི་མཚན་ཉིད་དང༌། དགེ་སློབ་མའི་སྡོམ་པའི་མཚན་ཉིད་དང༌།དགེ་སློང་གི་སྡོམ་པའི་མཚན་ཉིད་བཤད་པ་དང་བཞི། དང་པོ་ལ་མཚན་ཉིད་དངོས་དང༌། དགེ་བསྙེན་གྱི་དབྱེ་བ་དང་གཉིས། དང་པོ་ནི། ཇི་སྲིད་འཚོའི་བར་དུ་རང་གི་སྤང་བྱ་ལྔ་ཙམ་སྤོང་བ་དངོས་སུ་ཁས་བླངས་བ་ལས་སྐྱེས་པའི་རིགས་གནས་ཀྱི་སོ་ཐར་གྱི་སྡོམ་པ་དེ། དགེ་བསྙེན་གྱི་སྡོམ་པའི་མཚན་ཉིད་ཡིན་ཏེ། མཛོད་འགྲེལ་གནད་སྒྲོན་ལས། སྤང་བར་བྱ་བ་ལྔ་པོ་ལས་སླར་ལྡོག་པ་ཡང་དག་པར་བླངས་པས་ནི་དགེ་བསྙེན་གྱི་སྡོམ་པ་དང༌། ཞེས་དང༌། མཚོ་ཊཱིཀ་ལས།གཉིས་པ་དགེ་བསྙེན་གྱི་ངོ་བོ་ལ། ཡོངས་རྫོགས་ཀྱི་དགེ་བསྙེན་གྱི་ངོ་བོ་ནི། སྡོམ་པ་དང་ལྡན་པའི་གང་ཟག་སྟེ། མཛོད་འགྲེལ་ལས། སྤང་བྱ་ལྔ་སྤོང་བ་ཡང་དག་པར་བླངས་པ་ནི་དགེ་བསྙེན་ཡིན་ནོ་ཞེས་སོ། །ཞེས་གསུངས་པའི་ཕྱིར་རོ། །