རྟགས་ཡང་དག་གི་གྲངས་ངེས་བཤད་སྐབས་ཀྱི་དོགས་དཔྱོད།
རྟགས་ཡང་དག་གི་གྲངས་ངེས་བཤད་སྐབས་ཀྱི་དོགས་དཔྱོད།
རྟགས་ཡང་དག་ལ་འབྲས་རང་མ་དམིགས་པ་གསུམ་དུ་གྲངས་ངེས་པ་སྒྲུབ་བྱེད་ལ་འབྲེལ་བ་ལ་གཉིས་སུ་ངེས་པའི་རྒྱུ་མཚན་གྱིས་ཡིན་པར་ཐལ། འདོད་ན། མ་དམིགས་པའི་རྟགས་ཡང་དག་ཆོས་ཅན། ཁྱོད་ལ་འབྲས་རང་མ་དམིགས་པ་གསུམ་དུ་གྲངས་ངེས་པར་ཐལ། ཁྱོད་ཀྱི་རྟགས་ཀྱིས་དེ་སྒྲུབ་ཀྱི་རྟགས་ཆོས་ཀྱི་འབྲེལ་བ་ལ་གཉིས་སུ་ངེས་པའི་ཕྱིར། ཁྱབ་སྟེ། རྣམ་འགྲེལ་ལས། དེ་ནི་རྣམ་གསུམ་ཉིད། །མེད་ན་མི་འབྱུང་ངེས་ཕྱིར་རོ། །ཞེས་གསུངས་པའི་ཕྱིར། མ་ཁྱབ་མཚམས་ཀྱི་རྟགས་མ་གྲུབ་ན། མ་དམིགས་པའི་རྟགས་ཡང་དག་ཆོས་ཅན། ཁྱོད་ཀྱི་རྟགས་ཀྱིས་དེ་སྒྲུབ་ཀྱི་རྟགས་ཆོས་ཀྱི་འབྲེལ་བ་ལ་གཉིས་སུ་ངེས་པར་ཐལ། ཁྱོད་ཀྱི་རྟགས་ཀྱིས་དེ་སྒྲུབ་ཀྱི་རྟགས་ཆོས་ཀྱི་འབྲེལ་བ་ལ་བདག་གཅིག་པའི་འབྲེལ་བ་ཡོད་པ་གང་ཞིག དེ་བྱུང་འབྲེལ་གྱི་འབྲེལ་བ་སྟེ་གཉིས་ཡོད་པའི་ཕྱིར། དང་པོ་གྲུབ་སྟེ། བདག་ཏུ་ཚད་མས་མ་དམིགས་པའི་རྟགས་ཀྱིས་སྒྲ་བདག་མེད་དུ་སྒྲུབ་པའི་རྟགས་ཆོས་ཀྱི་འབྲེལ་བ་དེ་དེ་ཡིན་པའི་ཕྱིར། རྟགས་གཉིས་པ་གྲུབ་སྟེ། དུ་བའི་རྟགས་ཀྱིས་དུ་ལྡན་ལ་ལ་རྟག་དངོས་གཉིས་ཀྱིས་སྟོང་པའི་མེ་ཡོད་པར་སྒྲུབ་པའི་རྟགས་ཆོས་ཀྱི་འབྲེལ་བ་དེ་དེ་ཡིན་པའི་ཕྱིར། འདོད་ན། མ་དམིགས་པའི་རྟགས་ཡང་དག་ཆོས་ཅན། ཁྱོད་ལ་འབྲས་རྟགས་དང་རང་བཞིན་གྱི་རྟགས་གཉིས་མེད་པར་ཐལ། སྦྱོར་བ་དེ་སྒྲུབ་ཀྱི་ཁྱོད་དང་སྦྱོར་བ་དེ་སྒྲུབ་ཀྱི་འབྲས་རང་གི་རྟགས་རྣམས་འགལ་བ་ཡིན་པའི་ཕྱིར། མ་གྲུབ་ན། སྦྱོར་བ་དེ་སྒྲུབ་ཀྱི་ཁྱོད་དང་སྦྱོར་བ་དེ་སྒྲུབ་ཀྱི་འབྲས་རང་གི་རྟགས་རྣམས་འགལ་བ་ཡིན་པར་ཐལ། སྦྱོར་བ་དེ་སྒྲུབ་ཀྱི་མ་དམིགས་པའི་རྟགས་ཡང་དག་ལ་དགག་རྟགས་དགོས་པ་དང༌། སྦྱོར་བ་དེ་སྒྲུབ་ཀྱི་འབྲས་རང་གི་རྟགས་ལ་སྒྲུབ་རྟགས་ཡང་དག་གིས་ཁྱབ་པའི་ཕྱིར། དེར་ཐལ། རྣམ་འགྲེལ་རང་འགྲེལ་ལས། གཉིས་ནི་དངོས་པོ་སྒྲུབ་པ་ཡིན་ལ་གཅིག་ནི་དགག་པའིགཏན་ཚིགས་སོ། །ཞེས་གསུངས་པའི་ཕྱིར་ན་དཔྱད། ༈ ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པ་ཚང་བའི་ཞིང་དེ་དེ་འདྲའི་ཤར་ཕྱོགས་ཀྱི་ཞིང་རང་འབྲས་ནས་མྱུག་སྐྱེ་རུང་དུ་སྒྲུབ་པའི་རང་བཞིན་གྱི་རྟགས་ཡང་དག་ཡིན་པར་ཐལ། འདོད་ན། ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པ་ཚང་བའི་ཞིང་ཡིན་ན་རང་འབྲས་ནས་མྱུག་སྐྱེ་རུང་ཡིན་པས་ཁྱབ་པར་ཐལ། ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པ་ཚང་བའི་ཞིང་དེ་དེ་འདྲའི་ཤར་ཕྱོགས་ཀྱི་ཞིང་རང་འབྲས་ནས་མྱུག་སྐྱེ་རུང་དུ་སྒྲུབ་པའི་རང་བཞིན་གྱི་རྟགས་ཡང་དག་ཡིན་པའི་ཕྱིར། འདོད་ན། སྐད་ཅིག་དང་པོ་ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པ་ཚང་བའི་ཞིང་ཡང་ཡིན། སྐད་ཅིག་གཉིས་པར་བྱ་རོག་གིས་འདོར་ངེས་ཡིན་པའི་ཞིང་དེ་ཆོས་ཅན། རང་འབྲས་ནས་མྱུག་སྐྱེ་རུང་ཡིན་པར་ཐལ། ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པ་ཚང་བའི་ཞིང་ཡིན་པའི་ཕྱིར། ཁྱབ་པ་ཁས། འདོད་ན། སྐད་ཅིག་དང་པོ་ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པ་ཚང་བའི་ཞིང་ཡང་ཡིན། སྐད་ཅིག་གཉིས་པར་བྱ་རོག་གིས་འདོར་ངེས་ཡིན་པའི་ཞིང་དེ་ཆོས་ཅན། རང་འབྲས་ནས་མྱུག་སྐྱེ་རུང་མ་ཡིན་པར་ཐལ། རང་གི་འབྲས་བུར་གྱུར་པའི་ནས་མྱུག་ཅིག་གཞི་མ་གྲུབ་པའི་ཕྱིར། མ་ཁྱབ་ན། སྲན་མའི་ས་བོན་ལས་རང་འབྲས་ནས་མྱུག་སྐྱེ་རུང་བར་ཐལ། ཅིའི་ཕྱིར་ཟེར་ན། དེ་ལས་རང་འབྲས་ནས་ཀྱི་མྱུ་གུ་སྐྱེ་མི་རུང་བའི་རྒྱུ་མཚན་དེ་དེའི་འབྲས་བུར་གྱུར་པའི་ནས་མྱུག་གཞི་མ་གྲུབ་པའི་རྒྱུ་མཚན་གྱིས་ཡིན་པར་ཐལ། འདོད་ན། སྐད་ཅིག་དང་པོ་ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པ་ཚང་བའི་ཞིང་ཡང་ཡིན། སྐད་ཅིག་གཉིས་པར་བྱ་རོག་གིས་འདོར་ངེས་ཡིན་པའི་ཞིང་དེ་ཆོས་ཅན། རང་འབྲས་ནས་མྱུག་སྐྱེ་མི་རུང་བར་ཐལ། ཁྱོད་ཀྱི་འབྲས་བུར་གྱུར་པའི་ནས་མྱུག་གཞི་མ་གྲུབ་པའི་ཕྱིར། འདོད་ན། སྐད་ཅིག་དང་པོ་ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པ་ཚང་བའི་ཞིང་ཡང་ཡིན། སྐད་ཅིག་གཉིས་པར་བྱ་རོག་གིས་འདོར་ངེས་ཡིན་པའི་ཞིང་དེ་ཆོས་ཅན། རང་འབྲས་ནས་མྱུག་སྐྱེ་རུང་ཡིན་པར་ཐལ། ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པའི་ཞིང་ཡིན་པའི་ཕྱིར། ཁྱབ་སྟེ། རྣམ་འགྲེལ་ལས། རྒྱུ་ཚོགས་པ་ལས་འབྲས་སྐྱེ་བར། །རྗེས་སུ་དཔོག་པ་གང་ཡིན་པ། །དོན་གཞན་ལ་ནི་མི་ལྟོས་ཕྱིར། །དེ་ནི་རང་བཞིན་ཡིན་པར་བརྗོད། །ཅེས་དང༌། རྟགས་རིགས་མཐའ་དཔྱོད་ལས། དང་པོ་གྲུབ་སྟེ། དེ་དེ་སྒྲུབ་ཀྱི་རང་བཞིན་གྱི་རྟགས་ཡང་དག་ཡིན་པའི་ཕྱིར། ཞེས་གསུངས་པའི་ཕྱིར་ན་དཔྱད། ༈ ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པའི་ཞིང་དེ་དེ་འདྲའི་ཤར་ཕྱོགས་ཀྱི་ཞིང་དེར་རང་འབྲས་ནས་མྱུག་སྐྱེ་ངེས་སུ་སྒྲུབ་པའི་རྟགས་ཡང་དག་མ་ཡིན་པར་ཐལ། འདོད་ན། ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པའི་ཞིང་ཡིན་ན་རང་འབྲས་ནས་མྱུག་སྐྱེ་ངེས་ཡིན་པས་མ་ཁྱབ་པར་ཐལ། འདོད་ན། ཞོག་བྱས་པ་ལ། སྐད་ཅིག་གཉིས་པར་ཆུ་ལོག་གིས་འདེད་ངེས་ཀྱི་དེ་འདྲའི་ཞིང་ཆོས་ཅན་ཟེར་ན། སྐད་ཅིག་གཉིས་པར་ཆུ་ལོག་གིས་འདེད་ངེས་ཀྱི་དེ་འདྲའི་ཞིང་དེའི་རང་འབྲས་ནས་མྱུག་སྐྱེ་ངེས་ཡིན་པར་ཐལ། སྐད་ཅིག་གཉིས་པར་ཆུ་ལོག་གིས་འདེད་ངེས་ཀྱི་དེ་འདྲའི་ཞིང་ཡང་རང་འབྲས་ནས་མྱུག་སྐྱེ་ངེས་ཡིན་པའི་གཞི་མཐུན་པ་ཡོད་པའི་ཕྱིར། ཁྱབ་སྟེ། ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པ་ཚང་བའི་ཞིང་དེ་རང་འབྲས་ནས་མྱུག་སྐྱེ་ངེས་ཡིན་པའི་རྒྱུ་མཚན་འཐད་པའི་ཕྱིར། འདོད་ན། མ་ཁྱབ་མཚམས་ཀྱི་རྟགས་གྲུབ་སྟེ། དེ་འདྲའི་ཞིང་གང་ཡང་རུང་བ་ཞིག་གི་ནང་དུ་སླར་ཡང་སོ་ནམ་གྱི་ལས་ཀ་བྱས་ཏེ་ནས་མྱུག་སྐྱེ་བ་སྲིད་པའི་ཕྱིར། འདོད་ན། ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པ་ཚང་བའི་ཞིང་ཡིན་ན་རང་འབྲས་ནས་མྱུག་སྐྱེ་ངེས་ཡིན་པས་ཁྱབ་པར་ཐལ། དེ་ལ་མ་ཁྱབ་པའི་སྐྱོན་མེད་པའི་ཕྱིར། ཐེ་ཚོམ་ཟ་ཟེར་ན། འོ་ན་ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པ་ཚང་བའི་ཞིང་ཡིན་ན་རང་འབྲས་ནས་མྱུག་སྐྱེ་ངེས་ཡིན་པས་ཁྱབ་མ་ཁྱབ་ཐེ་ཚོམ་ཡིན་པར་ཐལ། འདོད་ན། ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པ་ཚང་བའི་ཞིང་དེ་དེ་འདྲའི་ཤར་གྱི་ཞིང་དེར་རང་འབྲས་ནས་མྱུག་སྐྱེ་ངེས་སུ་སྒྲུབ་པའི་རྟགས་ཡང་དག་ཡིན་མིན་ལ་ཐེ་ཚོམ་ཡིན་པར་ཐལ། སྦྱོར་བ་དེ་སྒྲུབ་ཀྱི་ཕྱོགས་ཆོས་གྲུབ་པ་གང་ཞིག ཁྱབ་པ་གྲུབ་མ་གྲུབ་ལ་ཐེ་ཚོམ་ཡིན་པའི་ཕྱིར། འདོད་ན། དེ་མི་འཐད་པར་ཐལ། ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པ་ཚང་བའི་ཞིང་དེ་དེ་འདྲའི་ཤར་གྱི་ཞིང་དེར་རང་འབྲས་ནས་མྱུག་སྐྱེ་ངེས་སུ་སྒྲུབ་པའི་ཁྱབ་པ་མ་ངེས་པ་ཁས་ལེན་ཐུབ་པའི་ཕྱིར། དེར་ཐལ། རྣམ་འགྲེལ་ལས། ཚོགས་པའི་འབྲས་བུ་ནུས་པ་རྣམས། །འགྱུར་བ་དང་འབྲེལ་འབྲས་བུ་ལ། །མ་ངེས་པ་ནི་ཉིད་ཡིན་ཏེ། །གེགས་བྱེད་པ་དང་སྲིད་ཕྱིར་རོ། །ཞེསགསུངས་པའི་ཕྱིར་ན་དཔྱད། ༈ རང་འབྲས་ནས་མྱུག་སྐྱེ་སྲིད་ན་རང་འབྲས་ནས་མྱུག་སྐྱེ་རུང་བས་ཁྱབ་པར་ཐལ། འདོད་ན། སྐམ་སར་གནས་པའི་ནས་ཀྱི་ས་བོན་ཆོས་ཅན། རང་འབྲས་ནས་མྱུག་སྐྱེ་རུང་ཡིན་པར་ཐལ། རང་འབྲས་ནས་མྱུག་སྐྱེ་སྲིད་པའི་ཕྱིར། མ་གྲུབ་ན། སྐམ་སར་གནས་པའི་ནས་ཀྱི་ས་བོན་ཆོས་ཅན། རང་འབྲས་ནས་མྱུག་སྐྱེ་སྲིད་པར་ཐལ། རྐྱེན་ཆུ་ལུད་སོགས་དང་འཕྲད་ན་སྐྱེ་སྲིད་པའི་ཕྱིར། འདོད་ན། སྐམ་སར་གནས་པའི་ནས་ཀྱི་ས་བོན་ཆོས་ཅན། རང་འབྲས་ནས་མྱུག་སྐྱེ་རུང་མ་ཡིན་པར་ཐལ། རང་འབྲས་ནས་མྱུག་གི་རྒྱུ་ཚོགས་མ་ཚང་བའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། རང་འབྲས་ནས་མྱུག་སྐྱེ་རུང་ཡིན་ན་རང་འབྲས་ནས་མྱུག་གི་རྒྱུ་ཚོགས་ཚང་དགོས་པའི་ཕྱིར། དེར་ཐལ། རང་འགྲེལ་ལས། རུང་བ་ཉིད་ཀྱང་རྒྱུ་ཚོགས་པ་དག་ཁོ་ནས་རྗེས་སུ་དཔོག་པར་བྱེད་དེ། མ་ཚོགས་པ་ལ་ཤིན་ཏུ་ནུས་པ་མེད་པའི་ཕྱིར། ཞེས་གསུངས་པའི་ཕྱིར། འདོད་ན། སྐམ་སར་གནས་པའི་ནས་ཀྱི་ས་བོན་ཆོས་ཅན། རང་འབྲས་ནས་མྱུག་སྐྱེ་རུང་མ་ཡིན་པར་ཐལ། འདོད་ན། སྐམ་སར་གནས་པའི་ནས་ཀྱི་ས་བོན་ཆོས་ཅན། རང་འབྲས་ནས་མྱུག་སྐྱེ་རུང་ཡིན་པར་ཐལ། རང་འབྲས་ནས་མྱུག་སྐྱེ་སྲིད་པའི་ཕྱིར། ཁྱབ་སྟེ། འདིར་ནས་མྱུག་སྐྱེ་རུང་བའི་དོན་དེ་སྐྱེ་སྲིད་པ་ལ་བྱེད་དགོས་པའི་ཕྱིར། དེར་ཐལ། རང་འགྲེལ་ལས། འདིར་རུང་བ་ནི་སྲིད་པའི་དོན་ཡིན་གྱིཁྱབ་པའི་དོན་མ་ཡིན་ནོ། །ཞེས་གསུངས་པའི་ཕྱིར་ན་དཔྱད། ༈ ཡང་རང་འབྲས་ནས་མྱུག་སྐྱེ་རུང་ཡིན་ན་རང་འབྲས་ནས་མྱུག་གི་རྒྱུ་ཚོགས་ཚང་བས་ཁྱབ་པར་ཐལ། འདོད་ན། སྐམ་སར་གནས་པའི་ནས་ཀྱི་ས་བོན་ཆོས་ཅན། རང་འབྲས་ནས་མྱུག་གི་རྒྱུ་ཚོགས་ཚང་བར་ཐལ། རང་འབྲས་ནས་མྱུག་སྐྱེ་རུང་ཡིན་པའི་ཕྱིར། མ་གྲུབ་ན། སྐམ་སར་གནས་པའི་ནས་ཀྱི་ས་བོན་ཆོས་ཅན། རང་འབྲས་ནས་མྱུག་སྐྱེ་རུང་ཡིན་པར་ཐལ། རང་འབྲས་ནས་མྱུག་གི་རྒྱུ་ཡིན་པའི་ཕྱིར། མ་གྲུབ་ན། སྐམ་སར་གནས་པའི་ནས་ཀྱི་ས་བོན་ཆོས་ཅན། རང་འབྲས་ནས་མྱུག་གི་རྒྱུ་ཡིན་པར་ཐལ། རང་འབྲས་ནས་མྱུག་གི་ས་བོན་ཡིན་པའི་ཕྱིར། ཁྱབ་སྟེ། རང་འབྲས་ནས་མྱུག་གི་ས་བོན་ཡིན་པ་ལ་རང་འབྲས་ནས་མྱུག་འབྱུང་རུང་གི་རྒྱུ་ཡིན་དགོས་པའིཕྱིར། དེར་ཐལ། དངོས་པོ་དེ་དང་དེའི་ས་བོན་ཡིན་པའི་ཚད་ཡོད་པའི་ཕྱིར་ན་དཔྱད། ༈ ཡང་རང་འབྲས་ནས་མྱུག་སྐྱེ་རུང་ཡིན་ན་རང་འབྲས་ནས་མྱུག་གི་རྒྱུ་ཚོགས་ཚང་བས་ཁྱབ་པར་ཐལ། འདོད་ན། གང་ཟག་དེ་འཚང་རྒྱ་རུང་ཡིན་པ་ལ་འཚང་རྒྱ་བའི་རྒྱུ་ཚོགས་ཚང་དགོས་པར་ཐལ། རང་འབྲས་ནས་མྱུག་སྐྱེ་རུང་ཡིན་ན་རང་འབྲས་ནས་མྱུག་གི་རྒྱུ་ཚོགས་ཚང་བས་ཁྱབ་པའི་རྒྱུ་མཚན་ཡོད་པའི་ཕྱིར། འདོད་ན། དགེ་རྩ་ཆད་པའི་གང་ཟག་ཆོས་ཅན། འཚང་རྒྱ་བའི་རྒྱུ་ཚོགས་ཚང་བར་ཐལ། འཚང་རྒྱ་རུང་ཡིན་པའི་ཕྱིར། མ་གྲུབ་ན། དགེ་རྩ་ཆད་པའི་གང་ཟག་ཆོས་ཅན། འཚང་རྒྱ་རུང་ཡིན་པར་ཐལ། ཁྱོད་ཀྱི་རྒྱུད་ལ་སངས་རྒྱས་པའི་རིགས་ཡོད་པའི་ཕྱིར། རྟགས་ཁྱབ་གཉིས་ཀ་གྲུབ་སྟེ། རྒྱུད་བླ་མ་ལས། རྫོགས་སངས་སྐུ་ནི་འཕྲོ་ཕྱིར་དང༌། །དེ་བཞིན་ཉིད་དབྱེར་མེད་ཕྱིར་དང༌། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་དང༌། སངས་རྒྱས་ཡེ་ཤེས་སེམས་ཅན་ཚོགས་ཞུགས་ཕྱིར། །ཞེས་གསུངས་པའི་ཕྱིར། འདོད་ན། དགེ་རྩ་ཆད་པའི་གང་ཟག་ཆོས་ཅན། འཚང་རྒྱ་རུང་ཡིན་པར་ཐལ། ཁྱོད་ཀྱི་རྒྱུད་ལ་སངས་རྒྱས་པའི་རིགས་ཡོད་པའི་ཕྱིར། འདོད་ན། དགེ་རྩ་ཆད་པའི་གང་ཟག་ཆོས་ཅན། འཚང་རྒྱ་རུང་མ་ཡིན་པར་ཐལ། འཚང་རྒྱ་བའི་རྒྱུ་ཚོགས་མ་ཚང་བའི་ཕྱིར། ཁྱབ་སྟེ། རང་འགྲེལ་ལས། མ་ཚོགས་པ་ནི་ཤིན་ཏུ་ནུས་པ་མེད་པའི་ཕྱིར། ཞེས་གསུངས་པའི་ཕྱིར་ན་རང་རེའི་ཕར་ཕྱིན་མཐའ་དཔྱོད་ལས། མྱུ་གུ་སྐྱེ་རུང་ཞེས་པ་དང་འཚང་རྒྱ་རུང་ཞེས་པ་གཉིས་ཅུང་མི་འདྲ་བར་སྣང་ངོ༌། །ཞེས་གསུངས་པ་ལྟར་མྱུ་གུ་སྐྱེ་རུང་ལ་རྒྱུ་ཚོགས་ཚང་བས་ཁྱབ་ཀྱང་འཚང་རྒྱ་རུང་ལ་རྒྱུ་ཚོགས་ཚང་མི་དགོས་ཞེས་བཤད་ན་རུང་ངམ་སྙམ་ལ། ཚད་ཊཱིཀ་ཐར་གསལ་དུ་ཡང་དེ་ལྟབུ་ཞིག་གསུངས་སོ། །༈ ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པ་ཚང་བའི་ཤར་གྱི་ཞིང་ཆོས་ཅན། རང་འབྲས་ནས་མྱུག་སྐྱེ་ངེས་ཡིན་པར་ཐལ། འདོད་ན། ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པ་ཚང་བའི་ཤར་གྱི་ཞིང་ཆོས་ཅན། རང་འབྲས་ནས་མྱུག་སྐྱེ་ངེས་མ་ཡིན་པར་ཐལ། འགྱུར་བ་དང་འབྲེལ་བ་ཡིན་པའི་ཕྱིར། མ་ཁྱབ་ན། ཁྱབ་པ་ཡོད་པར་ཐལ། རྣམ་འགྲེལ་ལས། ཚོགས་པའི་འབྲས་བུ་ནུས་པ་རྣམས། །འགྱུར་བ་དང་འབྲེལ་འབྲས་བུ་ལ། །མ་ངེས་པ་ནི་ཉིད་ཡིན་ཏེ། །གེགས་བྱེད་པ་དག་སྲིད་ཕྱིར་རོ། །ཞེས་གསུངས་པའི་ཕྱིར། མ་ཁྱབ་མཚམས་ཀྱི་རྟགས་མ་གྲུབ་ན། ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པ་ཚང་བའི་ཤར་གྱི་ཞིང་ཆོས་ཅན། འགྱུར་བ་དང་འབྲེལ་བར་ཐལ། རང་འབྲས་ནས་མྱུག་སྐྱེ་བ་ལ་འགྱུར་བ་དང་འབྲེལ་བ་ཡིན་པའི་ཕྱིར། མ་གྲུབ་ན། ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པ་ཚང་བའི་ཤར་གྱི་ཞིང་ཆོས་ཅན། རང་འབྲས་ནས་མྱུག་སྐྱེ་བ་ལ་འགྱུར་བ་དང་འབྲེལ་བ་ཡིན་པར་ཐལ། རང་འབྲས་ནས་མྱུག་སྐྱེ་བ་ལ་དཔྱིད་དུས་སུ་ས་བོན་བཏབ་སྟེ། སྟོན་དུས་སུ་ལོ་ཐོག་སྨིན་པ་སོགས་འགྱུར་བ་དང་འབྲེལ་བ་ཡིན་པའི་ཕྱིར། ཁྱབ་སྟེ། དེ་དེའི་དོན་ཡོད་པའི་ཕྱིར་ན་དཔྱད། ༈ རང་ལུགས་ལ་བུ་རོ་ད་ལྟ་བ་དེ་ཁ་ནང་བུ་རམ་གོང་བུའི་སྟེང་དུ་བུར་གཟུགས་ད་ལྟ་བ་ཡོད་པར་སྒྲུབ་པའི་རྟགས་ཡང་དག་ཡིན་མིན་དང་རྟགས་ལྟར་སྣང་ལས་གང་ཡིན་མིན་སོགསགོང་འབྲས་རྟགས་སྐབས་སུ་དཔྱད་ཟིན་པས་དཔྱད། ༈ བུར་རོ་ད་ལྟ་བ་ཆོས་ཅན། ཁྱོད་ཀྱི་རྟགས་ལ་བརྟེན་ནས་ཁ་ནང་བུ་རམ་གོང་བུའི་སྟེང་དུ་བུར་གཟུགས་ད་ལྟ་བ་རྟོགས་པའི་རྗེས་དཔག་སྐྱེས་པ་ཡོད་པར་ཐལ། འདོད་ན། བུར་རོ་ད་ལྟ་བའི་རྟགས་ལ་བརྟེན་ནས་ཁ་ནང་བུ་རམ་གོང་བའི་སྟེང་དུ་བུར་གཟུགས་ད་ལྟ་བ་ཡོད་པར་རྟོགས་པའི་རྗེས་དཔག་གཅིག་དང་ཁ་ནང་བུ་རམ་གོང་བུའི་སྟེང་དུ་བུ་རོ་སྔ་མ་ལ་བུར་གཟུགས་ཕྱི་མའི་ཐོགས་པ་མེད་པའི་ལྷན་ཅིག་བྱེད་རྐྱེན་བྱེད་པའི་ནུས་པ་ཡོད་པར་རྟོགས་པའི་རྗེས་དཔག་གཅིག་དང་རྗེས་དཔག་མི་འདྲ་བ་གཉིས་སྐྱེ་བ་ཡིན་པར་ཐལ། འདོད་ན། བུར་རོ་ད་ལྟ་བའི་རྟགས་ལ་བརྟེན་ནས་ཁ་ནང་བུ་རམ་གོང་བའི་སྟེང་དུ་བུར་གཟུགས་ད་ལྟ་བ་ཡོད་པར་རྟོགས་པའི་རྗེས་དཔག་གཅིག་དང་ཁ་ནང་བུ་རམ་གོང་བུའི་སྟེང་དུ་བུ་རོ་སྔ་མ་ལ་བུར་གཟུགས་ཕྱི་མའི་ཐོགས་པ་མེད་པའི་ལྷན་ཅིག་བྱེད་རྐྱེན་བྱེད་པའི་ནུས་པ་ཡོད་པར་རྟོགས་པའི་རྗེས་དཔག་གཅིག་དང་རྗེས་དཔག་མི་འདྲ་བ་གཉིས་སྐྱེ་བ་མ་ཡིན་པར་ཐལ། དེ་འདྲའི་རྗེས་དཔག་གཉིས་ཅིག་ཅར་དུ་སྐྱེ་བ་མ་ཡིན་པ་གང་ཞིག རིམ་ཅན་དུ་སྐྱེ་བ་མ་ཡིན་པའི་ཕྱིར། རྟགས་དང་པོ་མ་གྲུབ་ན། དེ་འདྲའི་རྗེས་དཔག་གཉིས་ཅིག་ཅར་དུ་སྐྱེ་བ་མ་ཡིན་པར་ཐལ། ཡིད་བློ་རྟོག་པ་རྫས་ཐ་དད་པ་གཉིས་ཅིག་ཅར་དུ་སྐྱེ་བ་མེད་པའི་ཕྱིར། དེར་ཐལ། རྣམ་འགྲེལ་ལེའུ་གསུམ་པ་ལས། རྟོག་གཉིས་ཅིག་ཅར་མཐོང་བ་མེད། །ཅེས་དང༌། འདི་ལྟར་རྣམ་པར་རྟོག་པ་ནི། །རིམ་གྱིས་འཇུག་ཕྱིར་ཡང་དག་རྟོག །ཅེས་གསུངས་པའི་ཕྱིར། རྟགས་གཉིས་པ་མ་གྲུབ་ན། དེ་འདྲའི་རྗེས་དཔག་གཉིས་རིམ་ཅན་དུ་སྐྱེ་བ་མ་ཡིན་པར་ཐལ། ཁ་ནང་བུ་རམ་གོང་བའི་སྟེང་དུ་བུར་གཟུགས་ད་ལྟ་བ་ཡོད་པར་རྟོགས་པའི་རྗེས་དཔག་སྔོན་དུ་སྐྱེས་པ་མ་ཡིན་པ་གང་ཞིག ཁ་ནང་བུ་རམ་གོང་བུའི་སྟེང་དུ་བུར་རོ་སྔ་མ་ལ་བུར་གཟུགས་ཕྱི་མའི་ཐོགས་པ་མེད་པའི་ལྷན་ཅིག་བྱེད་རྐྱེན་བྱེད་པའི་ནུས་པ་ཡོདཔར་རྟོགས་པའི་རྗེས་དཔག་སྔོན་དུ་སྐྱེ་བ་མ་ཡིན་པའི་ཕྱིར་ན་དཔྱད། ༈ ཡང་བུར་རོ་ད་ལྟ་བའི་རྟགས་ལ་བརྟེན་ནས་ཁ་ནང་བུ་རམ་གོང་བུའི་སྟེང་དུ་བུར་རོ་སྔ་མ་ལ་བུར་གཟུགས་ཕྱི་མའི་ཐོགས་པ་མེད་པའི་ལྷན་ཅིག་བྱེད་རྐྱེན་བྱེད་པའི་ནུས་པ་ཡོད་པར་རྟོགས་པ་ན་ཁ་ནང་བུ་རམ་གོང་བའི་སྟེང་དུ་བུར་གཟུགས་ད་ལྟ་བ་ཡོད་པར་རྟོགས་པས་ཁྱབ་པར་ཐལ། འདོད་ན། དེ་ལྟར་ཁྱབ་པའི་རྒྱུ་མཚན་དེ་བུར་རོ་དང་བུར་གཟུགས་གཉིས་ཚོགས་པ་གཅིག་ལ་རག་ལས་པའི་འབྲེལ་བ་གྲུབ་པའི་རྒྱུ་མཚན་གྱིས་འཇོག་དགོས་པར་ཐལ། རྣམ་འགྲེལ་ལས། ཚོགས་པ་གཅིག་ལ་རག་ལས་པའི། །གཟུགས་ལས་སོགས་པ་རོས་རྟོགས་པ། །ཞེས་གསུངས་པའི་ཕྱིར། འདོད་ན། བུར་རོ་ད་ལྟ་བའི་རྟགས་ལ་བརྟེན་ནས་ཁ་ནང་བུ་རམ་གོང་བུའི་སྟེང་དུ་བུ་རོ་སྔ་མ་ལ་བུར་གཟུགས་ཕྱི་མའི་ཐོགས་པ་མེད་པའི་ལྷན་ཅིག་བྱེད་རྐྱེན་བྱེད་པའི་ནུས་པ་ཡོད་པར་རྟོགས་པ་ན་ཁ་ནང་བུ་རམ་གོང་བའི་སྟེང་དུ་བདག་མེད་དུ་གྱུར་པའི་བུར་གཟུགས་རྟོགས་དགོས་པར་ཐལ། བུར་རོ་དང་བདག་མེད་དུ་གྱུར་པའི་བུར་གཟུགས་གཉིས་ཚོགས་པ་གཅིག་ལ་རག་ལས་པའི་འབྲེལ་བ་གྲུབ་པའི་ཕྱིར། འདོད་ན། བུར་རོ་ད་ལྟ་བའི་རྟགས་ལ་བརྟེན་ནས་ཁ་ནང་བུ་རམ་གོང་བུའི་སྟེང་དུ་བུ་རོ་སྔ་མ་ལ་བུར་གཟུགས་ཕྱི་མའི་ཐོགས་པ་མེད་པའི་ལྷན་ཅིག་བྱེད་རྐྱེན་བྱེད་པའི་ནུས་པ་ཡོད་པར་རྟོགས་པའི་རྒོལ་བ་ཡིན་ན་ཁ་ནང་བུ་རམ་གོང་བའི་སྟེང་དུ་བདག་མེད་དུ་གྱུར་པའི་བུར་གཟུགས་ད་ལྟ་བ་ཡོད་པར་རྟོགས་པས་ཁྱབ་པར་ཐལ། འདོད་ན། བུར་རོ་ད་ལྟ་བའི་རྟགས་ལ་བརྟེན་ནས་ཁ་ནང་བུ་རམ་གོང་བུའི་སྟེང་དུ་བུ་རོ་སྔ་མ་ལ་བུར་གཟུགས་ཕྱི་མའི་ཐོགས་པ་མེད་པའི་ལྷན་ཅིག་བྱེད་རྐྱེན་བྱེད་པའི་ནུས་པ་ཡོད་པར་རྟོགས་པའི་རྒོལ་བ་ཡིན་ན་བདག་མེད་རྟོགས་པས་ཁྱབ་པར་ཐལ། དེ་འདྲའི་གང་ཟག་ཡིན་ན་བདག་མེད་དུ་གྱུར་པའི་བུར་གཟུགས་རྟོགས་པས་ཁྱབ་པའི་ཕྱིར། རྟགས་ཁས། ཁྱབ་སྟེ། གང་ཟག་དེས་བདག་མེད་དུ་གྱུར་པའི་བུར་གཟུགས་རྟོགས་ན་བདག་མེད་དང་བུར་གཟུགས་གཉིས་ཀྱི་གཞི་མཐུན་རྟོགས་དགོས་པའི་ཕྱིར། དེར་ཐལ། བདག་མེད་དུ་གྱུར་པའི་བུར་གཟུགས་རྟོགས་ཚུལ་ཡོད་པའི་ཕྱིར་ན་དཔྱད་དགོས་ལ། འདིར་ཁ་ཅིག་གོང་གི་རྣམ་འགྲེལ་གྱི་ལུང་དོན་རྟོགས་དཀའ་སླ་མེད་པའི་ཚོགས་པ་གཅིག་ལ་རག་ལས་པའི་འབྲེལ་བ་གྲུབ་ན་དེ་ལྟར་རྟོགས་དགོས་ཞེས་པའི་དོན་ཡིན་ཟེར་ན། དེ་མི་འཐད་པར་ཐལ། གཟུགས་སྒྲ་དྲི་རོ་སོགས་ལའང་དཀའ་སླའི་རིམ་པ་ཡོད་པའི་ཕྱིར། དེར་ཐལ། གཞུང་ལུགས་རྣམས་ཀྱི་སྐབས་སུ་སྐྱེ་མཆེད་ལྔའི་གོ་རིམ་ལ་དང་པོ་གཟུགས་དང་དེ་ནས་སྒྲ་སོགས་བསྟན་པའི་རྒྱུ་མཚན་ཡོད་པའི་ཕྱིར། ཡང་གོང་རྣམ་འགྲེལ་དུ་གསུངས་པ་ནི་ཚོགས་པ་གཅིག་ལ་རག་པས་ཞེས་རྒྱུ་མཚན་བསྟན་པ་མ་ཡིན་པར་ཚོགས་པ་གཅིག་ལ་རག་ལས་པའི། །གཟུགས་ལ་སོགས་པ་ཞེས་འབྲེལ་སྒྲ་སྦྱར་ཏེ་དེ་སྒྲུབ་ཀྱི་བསྒྲུབ་བྱ་རྟོགས་པ་ན་རོ་ད་ལྟ་བ་དང་ཚོགས་པ་གཅིག་ལ་རག་ལས་པའི་གཟུགས་སོགས་རྟོགས་ནུས་ཞེས་པའི་དོན་དུ་རུང་ངམ་དཔྱད་དགོས་ལ། དེ་ཡང་ཚོགས་པ་གཅིག་ལ་རག་ལས་པའི་གཟུགས་ཆོས་ཅན། རོ་ད་ལྟ་བའི་རྟགས་ལ་བརྟེན་ནས་དེ་སྒྲུབ་ཀྱི་བསྒྲུབ་བྱ་གྲུབ་པ་ན་ཁྱོད་རྟོགས་དགོས་ཏེ་ཟེརནས་སྔ་མའི་ཞིབ་ཆ་ལ་དཔྱད་དོ། །