བསྐང་བཤགས་ཉམས་ཆགས་རང་གྲོལ།
སྒྲོལ་མ་འཇིགས་པ་ཀུན་སྐྱོབས་ལས༔ བསྐང་བཤགས་ཉམས་ཆགས་རང་གྲོལ་བཞུགས༔ གུ་རུ་ཨཱརྱ་ཏཱ་ར་ན་མོ༔ སྨྲ་བསམ་བརྗོད་པ་མེད་པའི་དབྱིངས༔ རྒྱལ་ཀུན་བསྐྱེད་ཡུམ་ཀུན་བཟང་མོ༔ རྗེ་བཙུན་འཕགས་མ་སྒྲོལ་མ་ལ༔ དོན་དམ་ལྟ་བའི་ཕྱག་ཀྱང་འཚལ༔ བསྐང་བཤགས་ཉམས་ཆགས་རང་གྲོལ་འདི༔ མ་འོངས་འགྲོ་བའི་དོན་གྱི་ཕྱིར༔ རིག་པའི་བུ་ཆུང་པད་འབྱུང་ངས༔ སྐྱེ་མེད་དབྱིངས་ཀྱི་ཡུམ་ཆེན་མོའི༔ སྒྲུབ་ཐབས་ཉམས་ལེན་གང་ཟག་གི༔ ཉམས་ཆགས་བསྐང་དང་གསོ་བ་དང༔ བཤགས་ཅིང་ཉེས་སྤྱོད་བསྡོམ་འདོད་ན༔ དབེན་པའི་གནས་སུ་ཡོ་བྱད་བསགས༔ དཀྱིལ་འཁོར་མཚན་ལྡན་གཞུང་ལྟར་བྲི༔ ཆོ་གའི་ཆ་ལག་ཚང་བྱས་ནས༔ འདི་ལ་འབད་པ་ཤིན་ཏུ་གཅེས༔ ས་མ་ཡཱ༔ ཧྲཱིཿ པོ་ཊ་ལ་ཡི་གནས་མཆོག་ནས༔ ཏཱ་རེ་ལྷ་མོ་སྒྲོལ་མཛད་ཡུམ༔ ལས་མཛད་རིགས་བཞིའི་ལྷ་མོ་དང༔ འཇིགས་སྐྱོབས་བརྒྱད་དང་བསྲུང་མའི་ཚོགས༔ སྒོ་སྐྱོང་སྤྲུལ་པ་ཡང་སྤྲུལ་བཅས༔ ཐུགས་དམ་བསྐང་ཕྱིར་གཤེགས་སུ་གསོལ༔ དགྱེས་པར་བཞུགས་ལ་གུས་ཕྱག་འཚལ༔ ཕྱི་ནང་གསང་བ་ཡང་གསང་གི༔ དངོས་འབྱོར་ཡིད་སྤྲུལ་མཆོད་པའི་ཚོགས༔ བདག་པོས་བཟུང་དང་མ་བཟུང་ཀུན༔ དཀྱིལ་འཁོར་ལྷ་ཚོགས་རྣམས་ལ་འབུལ༔ གསང་བ་གསུམ་གྱི་དངོས་གྲུབ་སྩོལ༔ ཨོཾ༔ ཐུགས་དམ་བསྐང་བའི་དམ་རྫས་ནི༔ མེ་ཏོག་བདུག་སྤོས་སྣང་གསལ་དྲི༔ ཞལ་ཟས་རོལ་མོ་སྨན་རཀ་གཏོར༔ ཕྱི་ནང་མཆོད་པས་ཐུགས་དམ་བསྐང༔ ཏཱ༔ སྙིང་རྗེ་ཐབས་ཀྱི་རྡོ་རྗེ་ཡིས༔ ཤེས་རབ་ཡུམ་གྱི་མཁའ་གསང་དུ༔ སྣང་སྟོང་ཕྱག་རྒྱའི་བདེ་བ་ཆེ༔ ཏ་ན་མཆོད་པས་ཐུགས་དམ་བསྐང༔ རེ༔ སྒྲོལ་བྱ་གཟུང་འཛིན་མ་རིག་པ༔ སྒྲོལ་བྱེད་རིག་པའི་མཚོན་ཆེན་གྱིས༔ མཉམ་ཉིད་ཡེ་ཤེས་ཀློང་དུ་བསྒྲལ༔ ག་ན་མཆོད་པས་ཐུགས་དམ་ཐུགས་དམ་བསྐང༔ ཏཱཾ༔ བསྐང་བྱ་རིག་རྩལ་ཡེ་ཤེས་ལྷ༔ བསྐང་བྱེད་རང་རིག་རྒྱལ་བའི་ཡུམ༔ ཡེ་རྫོགས་ཐིག་ལེའི་ཀློང་དུ་བསྐང༔ གཉིས་འཛིན་རྟོག་གྲོལ་ཐུགས་དམ་བསྐང༔ སྭཱ༔ གྲོལ་བྱ་མ་རིག་བག་ཆགས་དང༔ གྲོལ་བྱེད་རང་བྱུང་ཆོས་ཀྱི་སྐུ༔ བརྗོད་མེད་མཐའ་བྲལ་ཀློང་དུ་གྲོལ༔ འཁྲུལ་ཞིག་རང་ཤར་ཐུགས་དམ་བསྐང༔ ཧཱ༔ རང་རིག་སོ་མ་ཏཱ་རེ་མ༔ མདངས་རྩལ་ཡེ་ཤེས་ཆེན་པོ་འཕྲུལ༔ སྒྲོལ་མ་རིགས་བཞི་འཇིགས་སྐྱོབས་བརྒྱད༔ ཀུན་ཀྱང་རིག་རྩལ་ཆོ་འཕྲུལ་ཏེ༔ རང་ངོར་གྲོལ་བས་ཐུགས་དམ་བསྐང༔ བཤགས་པ་ནི༔ ཨོཾ༔ བསམ་བརྗོད་མཐའ་བྲལ་ཡེ་ཤེས་དབྱིངས༔ དོན་དམ་རང་བྱུང་ཀུན་བཟང་མོར༔ སེམས་ཉིད་ཆོས་སྐུར་མ་ཤེས་པས༔ མ་རིག་རྟོག་པས་འཁྲུལ་བ་བཤགས༔ ཏཱ༔ རང་གསལ་ཡེ་ཤེས་ལྔ་ཡི་ཀློང༔ འགགས་མེད་རྡོ་རྗེ་ཕག་མོ་ལ༔ གསལ་བ་ལོངས་སྐུར་མ་རྟོགས་པས༔ བག་ཆགས་འཐིབ་པོའི་དབང་སོང་བཤགས༔ རེ༔ ཆོ་འཕྲུལ་ཅིར་ཡང་འཆར་བའི་ངང༔ སྤྲུལ་བསྒྱུར་རྡོ་རྗེ་རྣལ་འབྱོར་མར༔ གང་ཤར་སྤྲུལ་སྐུར་མ་རྟོགས་པས༔ ཉོན་མོངས་འཛིན་པས་བཅིང་བ་བཤགས༔ ཏཾ༔ རྟོགས་ན་སྐུ་གསུམ་སེམས་སུ་འདུས༔ མ་རྟོགས་གཉིས་འཛིན་སྒྲོག་གིས་བསྡམས༔ རང་བྱུང་དཀྱིལ་འཁོར་འཕགས་མའི་ཚོགས༔ ཐ་དད་གཞན་དུ་བཟུང་བ་བཤགས༔ སྭཱ༔ བཤགས་བྱ་ཉོན་མོངས་འཁྲུལ་པའི་ལས༔ བཤགས་བྱེད་སེམས་ཉིད་སྐུ་གསུམ་ལྷ༔ མངོན་སུམ་རང་ངོ་ཤེས་པ་ཡི༔ སྔར་འདས་མ་ཤེས་ནོངས་པ་བཤགས༔ ཧཱ༔ དེ་སྔོན་མ་རིག་རྨོངས་པས་བསྒྲིབ༔ ད་ནི་འཁོར་འདས་ཆོས་རྣམས་ཀུན༔ སེམས་ཉིད་ཆོས་སྐུའི་མཁའ་ཀློང་དུ༔ བཤགས་བྱ་བཤགས་བྱེད་མེད་པར་གྲོལ༔ ས་མ་ཡཱ༔ འདི་ནི་དོན་དམ་བཤགས་པ་སྟེ༔ བསྐལ་པ་འབུམ་གྱི་སྡིག་ལྟུང་ཀྱང༔ འདི་ཡིས་བཤགས་པར་ཐེ་ཚོམ་མེད༔ སྐལ་ལྡན་བུ་རྣམས་ཉམས་སུ་ལོངས༔ དམ་མེད་ལག་ཏུ་ཤོར་ར་རེ༔ བཀའ་གཏེར་བསྲུང་མས་རྒྱ་སྡོམ་ཤིག༔ ད་ལྟ་མ་སྤེལ་ལོ་ཆེན་ཁྱོད༔ རིན་ཆེན་ས་ཡི་གཏེར་དུ་སྦོས༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔