རབ་བྱུང་གི་ཐ་མ་ཁ་ལ་སྤྱོད་པའི་ཉེས་པ་ལ་དཔྱད་པ་ལོག་འཚོའི་གཉེན་པོ།
༄༅། །རབ་བྱུང་གི་ཐ་མ་ཁ་ལ་སྤྱོད་པའི་ཉེས་པ་ལ་དཔྱད་པ་ལོག་འཚོའི་གཉེན་པོ་བཞུགས་སོ། །ཐམས་ཅད་མཁྱེན་པ་ལ་ཕྱག་འཚལ་ལོ། །ལས་དང་དེ་ཡི་རྣམ་སྨིན་ལ། །མཁྱེན་པ་ཕུལ་བྱུང་བདག་བགྱིས་ནས། །སླར་ཡང་འཇིག་རྟེན་འགྲོ་འདི་ལ། །བླང་དོར་མཆོག་སྟོན་དེར་བཏུད་དེ། །འདི་ན་མྱོས་པར་བྱེད་པའི་རྫས། །ཐ་མ་ཁ་ཞེས་གྲགས་གྱུར་པའི། །ཉེས་པ་གང་ཡིན་དེ་དག་ནི། །མདོར་བསྡུས་པར་ནི་བཤད་པར་བྱ། །དེ་ཡང་འདིར་འཇིག་རྟེན་ན་ཉོན་མོངས་པ་དང་། ལས་དང་། ལས་ཀྱི་འབྲས་བུ་མཐའ་དག་སོ་སོར་འབྱེད་པ་ལ་གཅིག་ཏུ་མཁས་ཤིང་། རང་གིས་གང་ཞིག་བརྙེས་པའི་དོན་དེ་དག་ཀྱང་མ་ནོར་བར་གདུལ་བྱའི་སྐྱེ་བོ་རྣམས་ལ་ཇི་ལྟ་བ་བཞིན་དུ་སྟོན་པར་མཛད་པ་པོ་ནི་ཐམས་ཅད་མཁྱེན་པ་སྟེ་ཡང་དག་པར་རྫོགས་པའི་སངས་རྒྱས་ཉིད་ཡིན་ལ། སངས་རྒྱས་དེས་ཅི་ཞིག་བསྟན་པའི་གསུང་རབ་རིན་པོ་ཆེ་སྡེ་སྣོད་གསུམ་དགོངས་འགྲེལ་དང་བཅས་པ་ཡང་གདུལ་བྱ་རྣམས་ཀྱིས་སྙིང་ཐག་པ་ནས་ཡིད་རྟོན་པའི་གནས་སོ། །དེ་བས་ན་བཅོམ་ལྡན་འདས་ཉིད་དང་། དེའི་རྗེས་སུ་ཞུགས་པའི་གང་ཟག་ཚད་མར་གྱུར་པ་དག་གི་གསུང་ལ་ཡང་རྗེས་སུ་བརྟགས་པར་རིགས་ཏེ། རྒྱུ་མཚན་འདི་ཡིས་ན་ཁོ་བོ་ཅག་གིས་ཀྱང་བཀའ་དང་བསྟན་བཅོས་ཀྱི་གཞུང་དེ་ཉིད་དཔང་པོར་བྱས་ཏེ་འདིར་ཡང་རྣམ་པར་བརྟགས་པ་ཅུང་ཟད་ཅིག་བྱའོ། །དེ་ཡང་འདི་སྙམ་དུ། སྤྱིར་ཉེས་པ་ལ་རང་བཞིན་གྱི་ཁ་ན་མ་ཐོ་བ་དང་རྗེས་སུ་འབྲེལ་བ་དང་། བཅས་པའི་ཁ་ན་མ་ཐོ་བ་དང་འབྲེལ་བ་སྟེ་གཉིས་སུ་ཡོད་པར་གསུངས་ཏེ། དེ་དག་ཀྱང་ཕན་ཚུན་ཁྱབ་མཉམ་གྱི་ཉེས་པར་དམ་འཆའ་ནུས་པ་ནི་མ་ཡིན་མོད་ཀྱང་རགས་པ་ཙམ་དུ་ན། སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་པོ་ཆེའི་ཕྲེང་བ་ལས། འདོད་ཆགས་ཞེ་སྡང་གཏི་མུག་གང་། །དེས་བསྐྱེད་ལས་ནི་མི་དགེ་བ། །མ་ཆགས་མི་སྡང་གཏི་མུག་མེད། །དེས་བསྐྱེད་པ་ནི་དགེ་བའོ། །ཞེས་ཉོན་མོངས་པ་དུག་གསུམ་གང་རུང་གིས་ཀུན་ནས་བསླངས་པའི་ལས་ནི་མི་དགེ་བ་ཡིན་པ་དང་། དེ་ལས་གཅིག་ཤོས་གང་རུང་གིས་ཀུན་ནས་བསླངས་པའི་ལས་ནི་དགེ་བ་ཡིན་པར་གསུངས་ཏེ། རྒྱུ་མཚན་དེའི་ཕྱིར་འདིར་ཐ་མ་ཁར་གྲགས་པ་གང་ཞིག་གི་དུ་བ་བཏུང་བར་བྱེད་པ་ལ་ཡང་རང་བཞིན་གྱི་ཁ་ན་མ་ཐོ་བའི་དབང་དུ་བྱས་ནའང་ཉོན་མོངས་པས་ཀུན་ནས་བསླངས་པའི་མི་དགེ་བའི་ལས་སུ་རིགས་ཏེ། དེ་ཉིད་ཀྱི་དྲི་དང་རོ་ལ་མངོན་པར་ཆགས་པའི་སྲེད་པ་ཉིད་ལྡོག་ཏུ་མི་བཏུབ་པར་བཏུང་བའི་སྦྱོར་བ་ལ་འཇུག་པའི་སེམས་བྱུང་དང་། དེ་དང་ལྷན་གཅིག་ཏུ་གང་ལ་ཉེས་པ་ཡོད་པའི་རང་བཞིན་ལ་རྨོངས་པའི་གཏི་མུག་བག་ལ་ཉལ་བ་དང་ལྡན་པ་དང་། འཇིག་རྟེན་པ་དག་ནི་ཕྲག་དོག་པ་དང་འགྲན་སེམས་པའི་གཞན་དབང་ཅན་གྱི་ཕྱིར། ཕ་རོལ་པོ་དག་ལ་འགྲན་པའི་སེམས་ཀྱིས་ཀྱང་རུང་སྟེ། དེ་དག་ལས་གང་རུང་གིས་སམ། ཐམས་ཅད་དང་ལྡན་པ་ཇི་རིགས་པས་སྦྱོར་བ་འདི་ལ་འཇུག་པར་མཐོང་སྟེ། དེ་བས་ན་ཀུན་སློང་གི་སྒོ་ནས་ཀྱང་ཚུལ་འདི་མི་དགེ་བའི་ལས་སུ་རིགས་སོ། །དེར་ཡང་མ་ཟད་སྦྱོར་བ་རང་གི་སྒོ་ནས་བསམ་ཀྱང་འདི་ཉིད་ལ་བརྟེན་དེ་དམན་པ་གཞན་གྱི་བྲན་ལ་གནས་པ་དག་གིས་ཀྱང་། རང་ཉིད་ཀྱི་སུག་ལས་བྱས་པའི་གླ་རྔན་དུ་ཐོབ་པའི་དངོས་པོ་རྣམས་ཀྱང་དགོས་པ་ཆུང་ཞིང་དགག་བྱ་མང་བའི་བཏུང་བ་འདི་ཉིད་ཀྱི་ཆེད་དུ་འཚོང་ནས་བྱས་པ་དོན་མེད་བགྱིད་པ་དང་། གང་ལ་གཅེས་སྤྲས་བྱེད་པའི་སེར་སྣ་དང་ལྡན་པའི་དབང་གིས་རང་ལ་དངོས་པོ་དེ་ཡོད་བཞིན་དུ་སྦེད་པར་བྱས་ནས་ཕ་རོལ་རིགས་མཐུན་དང་འཕྲད་པའི་ཚེ་བདག་ལ་ཡོད་རེ་ཞེས་དཀོན་མཆོག་དཔང་བོར་བཞག་པའི་མནའ་དང་རྫུན་གྱི་ཚིག་ཀྱང་མང་དུ་སྨྲ་བར་མཐོངས་ཤིང་ཐོས་ལ། གཞན་ལ་ཡོད་ནའང་དེ་ཉིད་ལ་རློམ་པའི་སེམས་དང་། བརྐུ་ཐབས་ཀྱི་སྦྱོར་བ་ལ་གནས་པ་ལ་སོགས་པའི་ཉེས་པ་དུ་མ་ཞིག་བསྐྱེད་པར་བྱེད་པ་ནི་མཐོང་བའི་ཆོས་ལ་ཚད་མས་གྲུབ་མོད། གཞན་དུ་ན་སློབ་དཔོན་ཁ་ཅིག་གཏི་མུག་གིས་ཀུན་ནས་བསླངས་པའི་ལས་དགེ་བ་ཡོང་བར་འདོད་པ་དང་། ཁ་ཅིག་དེ་འདྲ་བ་དེ་སྐྱེ་བའི་གནས་དང་པོ་ཡིད་ཀྱི་རྣམ་ཤེས་ཡིན་ལ། ཉོན་མོངས་པ་བཞི་དང་མཚུངས་པར་ལྡན་པའི་ཡིད་ཀྱིས་ནི་དེ་དྲི་མ་ཅན་དུ་བྱས་པའི་ཕྱིར་དེ་ཉིད་དེའི་བསྐྱེད་རྒྱུ་དངོས་ནི་མ་ཡིན་པས་ན། དུག་གསུམ་གང་རུང་གིས་ཀུན་ནས་བསླངས་པའི་ལས་ཡིན་ན་མི་དགེ་བས་ཁྱབ་པར་འདོད་ཚུལ་སོགས་གང་ཟག་གི་བློ་རིམ་དང་གྲུབ་མཐའི་ཁྱད་པར་གྱིས་རྣམ་པར་གཞག་པ་ཐ་དད་པ་མང་དུ་སྣང་རུང་འདིར་དེ་དག་གི་མཐའ་དཔྱད་སྤྲོ་བར་མི་བྱའོ། །མདོར་ན་རྒྱུ་མཚན་འདི་དག་ཟབ་ཆོས་གཏེར་མའི་ཕྱོགས་ཁས་མི་ལེན་པ་རྣམས་ལ་སྨྲས་པ་ཡིན་གྱིས་གཏེར་ཕྱོགས་ཁས་ལེན་པ་རྣམས་ལ་ནི་སྨོས་མ་དགོས་ཏེ། གཏེར་སྟོན་གུ་རུ་ཆོས་དབང་དང་བདུད་འདུལ་རྡོ་རྗེ་སོགས་དུ་མའི་གཏེར་ལུང་མཐུན་པར། སྤྱིར་མ་འོངས་པའི་དུས་སུ་དུ་རུ་ཁའི་ཡུལ་ནས་བྱུང་བའི་ཁ་ཟས་བཅོ་བརྒྱད་ལྗོངས་འདིར་འབྱུང་བར་འགྱུར་ཚུལ་དང་། ཁྱད་པར་ཐ་མ་ཁར་གྲགས་པ་ནི། རྒྱུ་དེ་སྔོན་གྱི་ལོག་སྨོན་གྱི་སྦྱོར་བ་ལས་བྱུང་བའི་ཕྱིར་དེའི་དྲི་མ་ཚོར་ཚད་ན་རཀ་དམྱལ་བར་སྐྱེ་བ་སོགས་ཉེས་པ་བསམ་གྱིས་མི་ཁྱབ་པ་ཞེས་གསུངས་ཡོད་པའི་ཕྱིར་རོ། །རྒྱུ་མཚན་དེས་ན་འདིས་ཉེས་པ་ནི་ཕལ་ཆེར་དངོས་པོ་རང་གི་རྒྱུའི་སྒོ་ནས་བཞག་པའི་ཕྱིར་དེའི་དུ་བ་བཏུང་བ་དང་ཕྱེ་སྣར་བླུགས་པའང་ཁྱད་པར་ཡོད་པར་མ་མཐོངས་ཏེ། དེ་དག་གང་གིས་ཀྱང་དེའི་དྲི་ཚོར་བར་འགྱུར་བའི་ཕྱིར་རོ། །དེ་ལྟར་ནའང་སེམས་ཅན་གཞན་གྱི་ལོག་སྨོན་གྱི་རྣམ་པར་སྨིན་པ་གཞན་གྱིས་མྱོང་བ་ནི་མི་སྲིད་དོ་སྙམ་དུ་དོགས་ན། དེ་ཡང་མ་ངེས་ཏེ་དེ་འདྲ་བ་རང་གི་རྒྱུ་རྐྱེན་ཐུན་མོང་མ་ཡིན་པ་ཚོགས་པའི་ཕྱིར་རོ། །དེ་ཡང་ཡིན་ཏེ་སྔོན་གྱི་བྱུང་བ་དང་བསྟུན་ནའང་། དྲང་སྲོང་ཀོ་ཏ་མའི་དམོད་པས་བརྒྱ་བྱིན་གྱི་ལུས་ལ་མཚན་མ་སྟོང་བྱུང་བ་མིག་སྟོང་དུ་བསྒྱུར་ཚུལ་སོགས་དང་། ལྷའི་དམོད་པས་ལྷ་མོ་མདངས་ལྡན་མ་སྲིན་པོའི་ཆུང་མར་གྱུར་ཚུལ་སོགས་དང་། བདུད་སྡིག་ཅན་འཇིག་རྟེན་དུ་མིར་སྐྱེས་པ་ན་སྲིད་པའི་བདུད་དུ་འགྱུར་བར་སྨོན་ལམ་བཏབ་པས་སེམས་ཅན་ཐམས་ཅད་ཀྱི་ཐར་ལམ་ལ་བར་ཆད་བྱེད་པའི་བདུད་དུ་གྱུར་པ་སོགས་རྒྱུ་མཚན་དཔག་ཏུ་མེད་པ་དག་གིས་ཤེས་པའི་ཕྱིར་རོ། །དེ་དག་གིས་ནི་རང་རང་གི་རྒྱུ་དེ་དང་དེར་བརྟེན་པའི་ཕྱིར་འདིར་མི་མཚུངས་སོ་ཞེ་ན་མཚུངས་ཏེ། འདིར་ཡང་རྒྱུ་དེ་ཉིད་ལས་བྱུང་བའི་དུ་བ་བཏུང་བ་དང་དེའི་ཕྱེ་མ་སྣར་བླུགས་པའི་ཕྱིར་རོ། །དེས་ན་ཤེས་ལྡན་དག་བསླབ་པས་རྒྱུད་མ་བསྡམས་པ་ཞིག་ནའང་རང་བཞིན་གྱི་ཁ་ན་མ་ཐོ་བ་ཆེན་པོ་དང་ལྡན་པ་འདི་ལྟ་བུ་ལ་ཉེས་པ་མེད་ཅེས་སྨྲ་བ་སྨོས་ཅི་དགོས་ཏེ། ཤིན་ཏུ་བག་དང་ལྡན་པས་སྤང་བར་མཛོད་ཅིག འདིར་སྨྲས་པ། རྒྱལ་བས་འགྲོ་ལ་ཆོས་ཚུལ་རྣམས་བཤད་པ། །ཉེས་པར་གྱུར་ཀུན་སྤང་ཕྱིར་ཉིད་ཡིན་གྱི། །དེ་ལས་གཞན་དུ་དགོས་པ་མ་མཐོང་ན། །ཉེས་པའི་རྩ་བར་གྱུར་ལ་སུ་མི་དོགས། །དམ་པ་རྣམས་ཀྱི་དགོངས་པའི་ལེགས་བཤད་ལ། །རྨོངས་པའི་སྐྱེ་བོས་ལོག་པར་བཟུངས་པའམ། །ཡང་ན་གཟུར་གནས་མིན་གྱུར་ཇི་ལྟར་ཡང་། །ཉེས་ལ་ཉེས་པ་མིན་ཞེས་ཅིའི་ཕྱིར་སྒྲུབ། །གལ་ཏེ་རང་གི་ལས་ངན་སྤང་དཀའ་ཡང་། །རང་ཉིད་ཉོན་མོངས་རགས་ཞེས་སྨྲ་རིགས་ཀྱི། །རྒྱལ་བའི་བསྟན་ལ་འདི་ནི་ཆོས་སོ་ཞེས། །སྨྲ་བའི་རོ་འཛིན་བདུད་ཀྱིས་མ་བསྐུལ་ལམ། །དེ་ལྟར་ན་ཚུལ་འདི་རང་བཞིན་གྱི་ཁ་ན་མ་ཐོ་བ་དང་རྗེས་སུ་འབྲེལ་བར་ལུང་གི་སྤྲོས་པ་དོར་ཏེ་རིགས་པའི་ལམ་ནས་ཅུང་ཟད་ཅིག་དཔྱད་གྲུབ་བོ། །ད་ནི་ཁྱད་པར་དུ་ཐུབ་པའི་བཅས་ལྡན་གྱི་གང་ཟག་གིས་རྫས་འདི་བཏུང་བ་ལ་ཉེས་པ་ཡོད་མེད་ཕྱོགས་ཙམ་གཞལ་བར་བྱ་སྟེ། འདིར་ཡང་སྣ་ལ་བླུགས་པ་ནི་ཁྱད་མེད་ཅིང་དོན་གཅིག་པ་ཉིད་དུ་གཟུང་ངོ་། །དེ་ཡང་སོ་སོར་ཐར་བ་རིགས་བརྒྱད་དང་རྗེས་སུ་འབྲེལ་བའི་བཅས་ཁྲིམས་མཐའ་དག་གི་རྣམ་པར་དབྱེ་བ་ནི་འདིར་སྨོས་སུ་མི་ལྡང་ལ། གང་ལས་བཅོམ་ལྡན་འདས་ཀྱིས་འདུལ་བ་མདོར་བསྟན་པར། ངས་འདུལ་བ་རྒྱ་ཆེར་ནི་བཤད་ན་མདོར་བསྡུས་པ་ནི་སྔོན་ཆད་མ་བཤད་པས། དེང་ཕྱིན་ཁྱེད་རྣམས་ཀྱིས། གང་རུང་བ་དང་ཉེ་ཞིང་མི་རུང་བ་ལས་ལྡོག་པ་ནི་ཀུན་ཏུ་སྤྱོད་ཅིག གང་མི་རུང་བ་དང་ཉེ་ཞིང་རུང་བ་ལས་ལྡོག་པ་ནི་ཀུན་ཏུ་སྤོངས་ཤིག ཅེས་གསུངས་པ་འདིའི་རྗེས་སུ་དཔག་སྟེ་བཅས་ལྡན་ཐུན་མོང་གི་དབང་དུ་བྱས་ན། གོང་སྨྲོས་ལྟར་ཐ་མ་ཁར་གྲགས་པ་འདི་ནི་ཕྱིས་སུ་བྱུང་བའི་ཕྱིར། རྫོགས་པའི་སངས་རྒྱས་འཇིག་རྟེན་དུ་བྱོན་པའི་སྐབས་དེར་འཕགས་ཡུལ་དུའང་ཡོངས་གྲགས་སུ་མེད་པའི་ཕྱིར་འདུལ་བའི་བཅས་པས་དངོས་སུ་མ་ཟིན་མོད། དེ་ལྟར་ནའང་འདུལ་བའི་སྨན་གྱི་གཞིའི་སྐབས་སུ་སྲིན་ཡ་མ་ལ་སོགས་པ་ལ་ཕན་པའི་སྨན་སྣ་ལ་བླུག་པ་དག་ཡོད་པར་དགོངས་པ་དང་། མིག་ལ་ཕན་པའི་སྨན་དུ་བ་བཏང་དགོས་པ་དག་ཀྱང་ཡོད་པར་དགོངས་ནས། དེ་དག་ཕལ་ཆེར་ནད་དེ་དང་དེའི་ཆེད་དུ་བསྟེན་པར་གནང་བ་ལས་འཕྲོས་ཏེ། འདུལ་བ་མདོ་རྩ་བའི་གསོག་འཇོག་གི་སྐབས་སུ་སྣ་ལ་བླུགས་པ་ལ་ནི་ཉེས་པ་མེད་དོ་ཞེས་དེ་རྒྱུན་ཏུ་མ་བསྟེན་ན་ནད་དེ་ལྡང་བར་འགྱུར་བ་དག་གི དེའི་ཆེད་དུ་རྫས་དེ་གསོག་འཇོག་བྱས་པ་ལ་ཉེས་པ་མེད་པར་བཤད་པ་དང་དེ་ལས་ཡང་འཕྲོས་ཏེ་སློབ་དཔོན་ཁྱད་པར་བཤེས་གཉེན་གྱིས་མཛད་པའི་འདུལ་བ་བསྡུས་པ་ལས། ཡོ་བྱད་ཀྱི་དངོས་པོའི་དབང་གིས་དེའི་ཡོངས་སུ་བསྲུང་བ་རྣམས་ཀྱང་རྗེས་སུ་གནང་ངོ་། །འདི་ལྟ་སྟེ། མཆན་ཁུང་དང་སྨན་གྱི་ནལ་ཟེ་དང་། སྨན་གྱི་ཕོར་བུ་དང་། དུད་པ་བཏང་བའི་སྦུ་གུ་ལྕགས་ལས་བྱས་པ་སྲིད་སོར་བཅུ་གཉིས་ཀྱི་ཚད་དང་། སྣར་བླུགས་པ་མཆུ་གཉིས་པ་དང་། ཕུལ་བའི་བཏུང་ཕོར་དང་། ཟ་མ་ཏོག་དང་། རྐང་བརྟེན་དང་། རྐང་བརྙན་དང་། འདི་དག་རིན་པོ་ཆེའི་རང་བཞིན་ལས་བྱས་པ་སྤང་ཞིང་བཅང་བར་བྱའོ། །ཞེས་དང་། མདོ་རྩའི་སྨན་གྱི་གཞིར། གསོ་བའི་ཕྱིར་དུ་བ་བརྔུབ་པར་བྱའོ། །དེ་ནི་སྨན་གཅེའུས་འགྲུབ་བོ། །ལྕགས་ལས་བྱའོ། །སོར་བཅུ་གཉིས་པ་བཟང་པོ་རྣོ་བ་དང་རྩུབ་པར་མི་བྱའོ། །ཞུན་མར་རམ་འབྲུ་མར་གྱིས་བསྐུས་ཏེ་ཤུགས་སུ་གཞུག་གོ །དེ་ནི་ཟུང་ངམ་ཆོས་གོས་ཀྱི་གདངས་བུ་ལ་བཞག་གོ །དྲི་མ་མེད་པར་བྱ་བའི་ཕྱིར་མེར་གཞུག་གོ །སྣར་བླུགས་པའི་ལས་བྱའོ། །དེ་ནི་སྣར་བླུགས་པའི་སྤྱད་ཀྱིས་འགྲུབ་བོ། །མཆུ་གཉིས་པ་མི་རྣོ་བ་བཟང་ངོ་། །དེ་བྱའོ། །ཞེས་ལྕགས་སྦུག་དང་། སྣར་བླུགས་ཀྱང་གནངས་ཏེ་དེ་དག་གི་མཚན་ཉིད་ཀྱང་རྒྱས་པར་བཤད་དོ། །འདི་དག་ལ་མ་བརྟགས་པའི་གང་ཟག་བློ་གྲོས་རྩིང་པ་ཁ་ཅིག་འདུལ་བ་ལས་ཐ་མ་ཁའི་དུ་བ་བཏང་བ་དང་དེའི་ཕྱེ་མ་སྣར་བླུགས་པ་གནང་ངོ་ཞེས་དོན་དང་མི་ལྡན་པའི་ཅལ་ཅོལ་སྒྲོག་པར་བྱེད་པ་དག་ནི་མི་འཐད་པའི་ཚུལ་འོག་ནས་རིམ་བཞིན་འཆད་དོ། །དེས་ན་གནང་བཀག་གི་རིམ་པ་རྣམས་རགས་པར་བཀོད་ནས་ཕྱོགས་མཐུན་བརྩི་བ་ལ། སྤྱིར་འདུལ་བའི་བཅས་ཁྲིམས་རྣམས་ནི་བཅས་པ་རང་རང་གི་གླེང་གཞི་དང་རྗེས་སུ་མཐུན་པར་དགོངས་གཞི་གང་ལ་དགོངས་ནས་བཅས་པ་དེ་མཛད་འདུག་པ་ལ་ལེགས་པར་དཔག་ནས་བཤད་དགོས་ཀྱི་ལྟུང་བ་དེའི་རྣམ་པ་ཙམ་ལ་ནི་ཁྱབ་པ་མེད་པའི་ཚུལ་གཞུང་བླ་མ་དང་། གཞུང་དམ་པ་སོགས་ལས་ཤིན་ཏུ་གསལ་བར་གསུངས་ཤིང་། དེར་ཡང་མ་ཟད་སེམས་ཀྱི་ཀུན་ཏུ་སྤྱོད་པ་ལ་ལྟོས་པའང་ཕལ་ཆེར་འབྱུང་ངོ་། །དེས་ན་བཅས་རྐྱང་དང་རང་བཞིན་གྱི་ཁ་ན་མ་ཐོ་བ་དང་རྗེས་སུ་འབྲེལ་བ་གཉིས་ལས་འདི་ནི་རང་བཞིན་གྱི་ཁ་ན་མ་ཐོ་བ་དང་ཡང་རྗེས་སུ་འབྲེལ་བའི་ཚུལ་གོང་སྨྲོས་ལྟར་ལགས་མོད་ཀྱང་། དེར་ཡང་མ་ཟད་བཅས་རྐྱང་གི་དབང་དུ་ནའང་མྱོས་པར་འགྱུར་བའི་རྫས་ཀྱི་བྱེ་བྲག་སྟེ་ཆང་གི་ཕྱོགས་སུ་གཏོགས་སོ། །དེ་ཡང་ཡིན་ཏེ་ཆང་རང་གི་གླེང་གཞིའི་སྐབས་སུ་དེའི་དགག་པ་ཉིད་མྱོས་པར་གྱུར་པ་ལ་བརྟེན་ནས་བཅས་པའི་ཕྱིར་དང་། དགོངས་གཞི་འདི་ལ་བརྟེན་ནས་ཉོན་མོངས་པ་འཕེལ་བར་འགྱུར་བའི་ཕྱིར་དང་། བསླབ་པ་གཞན་རྣམས་ཀྱང་ཅི་རིགས་པ་འཆལ་བར་འགྱུར་བ་དག་ལ་དགོངས་པའི་ཕྱིར་ཏེ། དེས་ན་དེའི་བྱ་བ་གང་ཡིན་དེ་དག་ཐམས་ཅད་ཐ་མ་ཁ་འདིས་ཀྱང་བྱེད་པའི་ཕྱིར་རོ། །དེ་ཡང་མ་ཟད་མདོག་དང་དྲི་ཙམ་ཆང་དང་འདྲ་ཡང་མྱོས་པར་མི་འགྱུར་བ་ནི་གནང་ངོ་། །མདོག་དང་དྲི་ཆང་དང་མི་འདྲ་ཡང་མྱོས་པར་འགྱུར་བ་ནི་བཀག་གོ །ཞེས་གསུངས་ལ། དེའི་དབང་གིས་ནད་པ་ལ་ཆང་བསྐོལ་རོ་ནུས་མེད་པར་བྱས་པ་གནང་བ་དང་། གཞན་ཡང་ཚར་གྱུར་པ་དང་། ཆང་གི་རྩབ་མོའང་བཏུང་དུ་རུང་བར་གསུངས་པའི་ཕྱིར་རོ། །དེ་ལྟ་ནའང་ཆང་དངོས་ནི་ནད་པ་ལའང་བཏུང་བར་མ་གནང་བ་དེའི་ཕྱིར། །ཐ་མ་ཁའང་གདོང་སྲིན་དང་མིག་ནད་སོགས་ཀྱི་ཆེད་དུའང་བཏུང་མི་རུང་སྟེ་དེ་དེ་ཉིད་ཀྱི་བྱེ་བྲག་ཡིན་པའི་ཕྱིར་རོ། །དེ་ཡང་ཡིན་ཏེ། མདོ་རྩ་བར། རྩ་བ་དང་། སྡོང་བོ་དང་། འདབ་མ་དང་། མེ་ཏོག་དང་། འབྲས་བུ་མྱོས་པར་འགྱུར་བ་རྣམས་ཀྱང་ངོ་། །ཞེས་གསུངས་པའི་བྱེ་བྲག་སྡོང་བོ་དང་། འདབ་མ་དང་འབྲས་བུ་ཅི་རིགས་པ་ལས་བྱུང་བའི་མྱོས་འགྱུར་ཀྱི་རྫས་དེ་དེ་ཡིན་པའི་ཕྱིར། རྒྱུ་མཚན་འདི་ཉིད་འདུལ་བའི་རྣམ་བཤད་གསེར་མདོག་ལས་ཀྱང་བཤད་དེ། ཇི་སྐད་དུ་དེ་ཉིད་ལས། དེ་ལྟར་ཆང་གིས་མྱོས་པར་འགྱུར་བ་ལ་བརྟེན་ནས་བག་མེད་པའི་གཞི་ཆེན་པོ་བྱེད་པར་དགོངས་པ་ལྟར་ན། དུས་དེར་མ་དར་བས་གསལ་ཁ་མ་བྱུང་བ་མ་གཏོགས་ཐ་མ་ཁར་གྲགས་པའི་སྔོ་འདི་ལོ་བརྒྱད་བརྒྱ་ལྷག་ཙམ་ནས་རྒྱ་གར་དང་རྒྱ་ནག་ཏུ་བྱུང་ཞིང་། དེ་ཡང་བུད་མེད་ཅིག་གིས་སྨོན་ལམ་ལོག་པར་བཏབ་པས་མངལ་ཁྲག་ས་ལ་ལྷུང་བ་ལས་སྐྱེས་ཤིང་། བྱེད་རྐྱེན་གྱིས་འབྱུང་པོ་སྙིང་ལ་ཞུགས་ནས་དུ་བ་རྔུབ་དགོས་པ་འདི་གང་ལ་ཡང་ཕན་པ་ཆུང་ཞིང་ནད་སོགས་མང་དུ་བསྐྱེད་པས་དགག་བྱ་ཆེ་བ་ཁྱད་པར་བག་མེད་པའི་གནས་སུ་སྦྱོར་བ་ལ་ཆང་དང་འདྲའོ། །ཞེས་རྒྱལ་དབང་ཐམས་ཅད་མཁྱེན་པས་གསུངས་པ་འདི་ལ་དཔྱོད་ལྡན་ཀུན་གྱིས་བསམ་པར་མཛོད་ཅིག དེ་ལ་ཡང་ཁ་ཅིག་ན་རེ། ཁྱེད་ཅག་གིས་འདི་ནི་རང་བློས་འདོད་ཕྱོགས་སུ་སྦྱར་བ་ཙམ་སྟེ། རྒྱལ་བ་ཉིད་ཀྱིས་སྣ་ལ་བླུགས་པ་དང་། དུད་པ་བཏང་བ་དག་དེ་དང་དེའི་ནད་ལ་ཕན་པའི་ཆེད་དུ་གནང་བའི་ཕྱིར་ཞེ་ན། ཀྱེ་བཞིན་བཟང་ཁྱོད་ཀྱི་རྟགས་དེ་ཡང་མ་ངེས་ཏེ། ཁོ་བོ་ཅག་གིས་འདིར་ནི་རྫས་རང་གི་ངོས་ནས་ཉེས་པ་བསྐྱེད་པའི་རྒྱུ་ཐུན་མོང་མ་ཡིན་པར་བཤད་ཅིང་། དེ་ཉིད་བཏུང་བ་དང་སྣར་བླུགས་པ་དགག་གི སྣར་བླུགས་པ་དང་དུད་པ་བཏུང་བ་ཐམས་ཅད་ནི་དགག་པ་མ་ཡིན་ནོ། །གང་གི་ཕྱིར་ཁྱེད་ཀྱི་ལྟར་སྤྱི་དང་བྱེ་བྲག་མ་ཕྱེ་བར། དུ་བ་བཏང་བ་དང་། སྣར་བླུགས་པ་ཙམ་གནང་བ་ཉིད་ཀྱིས། ཐ་མ་ཁ་བཏུང་བ་ཡང་གནང་བར་འགྱུར་ན། སྤྱིར་གནང་བ་ཡིན་ན་དེའི་བྱེ་བྲག་ཀྱང་གནང་བས་ཁྱབ་པ་ཞིག་འདོད་པར་སྣང་སྟེ། དེ་ལྟར་ན་ཐུབ་པའི་བཅས་ལྡན་གྱི་དགེ་སློང་ཆོས་ཅན། ཁྱོད་ཀྱིས་ཆང་འཐུང་རུང་བར་ཐལ། ཁྱོད་ལ་བཏུང་བ་བཏུང་བར་ཐུབ་པས་གནང་བའི་ཕྱིར། ཁྱབ་པ་ཁས། དེར་ཐལ། དེ་དེའི་སྤྱི་ཡིན་པའི་ཕྱིར་དང་། འདི་ཉིད་དེའི་བྱེ་བྲག་ཡིན་པའི་ཕྱིར། གཞན་ཡང་དེ་འདྲ་བ་དེ་ཆོས་ཅན། ཁྱོད་ཀྱི་སྔ་དྲོ་མི་ཤའང་བཟར་རུང་བར་ཐལ། དུས་དེར་བཟའ་བ་ཟ་བར་ཐུབ་པས་གནང་བའི་ཕྱིར། དེར་ཐལ། དེ་བཟའ་བ་ཡིན་པའི་ཕྱིར་རོ། །དེ་ལ་ཁོ་ན་རེ། དེ་ལྟར་གནང་བའི་བཟའ་བཏུང་དག་ནི་རུང་བ་ཉིད་ཡིན་གྱི། མ་རུང་བའི་དངོས་པོ་དམིགས་ཀྱིས་བསལ་བ་དག་ནི་མ་ཡིན་པའི་ཕྱིར་འདི་དང་མི་མཚུངས་སོ་ཞེ་ན་མཚུངས་ཏེ། འདིར་ཡང་མི་རུང་བའི་དངོས་པོ་ཐ་མ་ཁ་ཉིད་བཏུང་བ་དག་ནི་རུང་བའི་སྨན་གཞན་གྱི་དུ་བ་བཏང་བ་དང་། སྣ་ལ་བླུགས་པ་ནི་མ་བཀགས་པའི་ཕྱིར་རོ། །དེ་བས་ན་རྣམ་པ་ཀུན་ཏུ་ཆོས་ལ་སྡང་བས་ཆོས་སྤང་པའི་ལས་ནི་མཚམས་མེད་པའི་ལས་རྣམས་ཀྱིས་ཀྱང་འགྲན་དུ་མི་བཟོད་པ་ཡིན་པས་ན་ཁ་ནས་གང་ཐོན་ལེགས་བཤད་དུ་མ་རློམས་པར་ངག་གི་མི་དགེ་བའི་ལས་རྣམས་ལ་བརྟག་དཔྱད་ལེགས་པ་ཐོངས་ཤིག འདིར་ནི་ཉེས་པ་དེ་རྣམ་པར་འགོག་པའི་ཆེད་ཙམ་དུ་བརྟག་དཔྱད་མདོ་ཙམ་བགྱིད་གྲུབ་བོ། །དེ་ལ་འདི་སྐད་ཅེས་བྱ་སྟེ། གང་ཞིག་ཐུབ་པའི་བཅས་པ་དང་འབྲེལ་བའི། །སྤང་བླང་གནས་ལ་མ་རྨོངས་བགྱིད་འདོད་ན། །ཐུབ་གསུངས་ཉིད་དང་དེ་ཡི་དགོངས་འགྲེལ་ལ། །ཕྱོགས་རེ་མིན་པའི་ཐོས་བསམ་བགྱིད་མཛོད་ཅིག །རང་གཞུང་ཁོལ་བུ་ཙམ་གྱིས་སྙིང་ཚིམ་ནས། །གཞན་ལ་འཁུ་བའི་བརྗོད་ངག་སྤྲིན་སྟུག་པོས། །རྒྱལ་བསྟན་ཉི་མ་མོག་པོར་བགྱིད་པ་འདི། །ཀྱཻ་མ་སྙིགས་མའི་རང་རྟགས་ལས་གཞན་ཅི། །རྨོངས་རྣམས་ཕྲག་པ་དོག་པའི་གནམ་རུ་ལས། །འཕངས་པའི་ངན་ཚིག་ཉན་ཕྲན་རྩུབས་ཀྱང་བླ། །ལེགས་བཤད་རིང་དུ་བླངས་པའི་མཁས་རྣམས་ཀྱང་། །སྨྲ་བ་འདི་ལ་ཕྱོགས་གང་དེ་ལྟ་མིན། །རྒྱལ་སྲས་ལམ་ལ་ནན་ཏན་བགྱིད་དོ་ལོ། །འགྱོད་མིན་འགྱོད་པ་བསྐྱེད་འདིས་ཅིར་འགྱུར་ཨང་། །གཞན་ལ་ཕན་པའི་སྦྱོར་བར་འཇུག་གོ་ལོ། །འགྲོ་བ་ལམ་ལས་ལྡོག་པ་མ་ཚོར་རོ། །རྒྱལ་བསྟན་སྙིང་པོ་རང་རྒྱུད་གདུལ་བ་ཡིན། །སླད་ནས་གཞན་དོན་ནུས་ཚེ་ཅི་དགར་གྱིས། །རང་རྒྱུད་ཤ་བའི་རྭ་ལྟར་གཟེང་བ་འདིས། །གཞན་རྒྱུད་སྡོམས་པའི་འཆིང་བ་མི་འོང་དོགས། །སྔོན་གོམས་ཐུགས་བསྐྱེད་རླུང་གིས་དྲངས་པ་ཡི། །གཞན་ཕན་ཕྲིན་ལས་འོད་ཟེར་སྟོང་འབར་བའི། །བཤེས་གཉེན་ཉི་མ་མཆོག་དེ་གར་བཞུགས་ཀྱང་། །སྨད་པའི་གནས་མིན་སྲིད་པའི་སྣང་བྱེད་ཡིན། །རང་བཞིན་ཤེས་ནས་དད་པ་སྨོས་ཅི་དགོས། །ཆགས་དང་བཞད་གད་སེམས་ཀྱིས་ཕྱག་འཚལ་ཙམ། །རྒྱལ་སྲས་རྣམས་ལ་གང་གིས་སྨྲས་པ་དེས། །ཐར་བའི་ས་བོན་འདེབས་ཞེས་ཐུབ་དབང་གསུངས། །དེས་ན་འགྲོ་བ་བཀྲི་བའི་ཐབས་ཚུལ་ལ། །ཚིག་ཙམ་གཙོ་བོ་མ་ཡིན་བརྗོད་དོན་དེས། །གདུལ་བྱའི་བློ་སྣང་སྒྱུར་ལ་རག་ལས་ན། །ཚིག་གཉེར་མུ་སྟེགས་གཞུང་ལ་སུ་ཡིད་གཏོད། །མདོར་ན་བདག་བསྟོད་གཞན་ལ་སྨོད་པ་ནི། །རྒྱལ་སྲས་ལམ་ལ་རང་ཉིད་ཞུགས་གྱུར་ཀྱང་། །དེ་ཡི་ལྟུང་བ་ཆེན་པོར་གསུངས་པས་ན། །ཕམ་པའི་གནས་ལ་སྒྲིམས་ཞེས་གསོལ་བ་འདེབས། །འདིར་བཤད་པའང་སྡང་ཞུགས་དབང་གིས་མིན། །སྐྱེ་བོ་ཕལ་ཆེར་བླང་དོར་ལ་རྨོངས་པས། །ལོག་རྟོག་ཚིག་ཕྲེང་སྤེལ་བ་དེ་གཅོད་ཕྱིར། །སྨྲས་འདི་དམ་པ་རྣམས་ཀྱིས་བཟོད་པར་བཞེས། །འདི་ལ་ལེགས་པར་བཤད་པ་ཆ་ཙམ་སྲིད། །དེ་མཆིས་གྱུར་པས་འགྲོ་བ་མཐའ་དག་ཀུན། །རྟག་ཏུ་ཐུབ་པའི་བསླབ་ལ་གུས་བསྐྱེད་དེ། །མ་དག་འཚོ་བ་རིང་དུ་སྤང་བར་ཤོག །ཅེས་སྙིགས་མའི་དུས་ཀྱི་མ་དག་པའི་ལོངས་སྤྱོད་ཐུན་མོང་མ་ཡིན་པ་ཐ་མ་ཁར་གྲགས་པའི་ཉེས་པ་ཕྱོགས་ཙམ་སྨོས་པ་འདི་ནི་མང་དུ་ཐོས་པས་རྒྱུད་ཡོངས་སུ་གྲོལ་པའི་བཤེས་གཉེན་བཀྲ་ཤིས་དོན་གྲུབ་ནས་ལྷ་རྫས་དང་བཅས་ཇི་ལྟར་བསྐུལ་བཞིན། རྒྱལ་བའི་སྲས་པོའི་མིང་གི་ཅོད་པཎ་འཆང་བ་གཞན་ཕན་མཐའ་ཡས་འོད་ཟེར་དུ་འབོད་པས་བསྟན་འགྱུར་རིན་པོ་ཆེའི་བཀླགས་ལུང་བགྱིད་པའི་ཐུན་མཚམས་སུ་ཤར་མར་སྤེལ་བ་མངྒ་ལཾ།། །།