ནམ་མཁའ་གསུམ་ཕྲུག་གི་གདམས་པ། འཇིགས་བྲལ་ཡེ་ཤེས་རྡོ་རྗེ།
༄༅། །ནམ་མཁའ་གསུམ་ཕྲུག་གི་གདམས་པ། ནམ་མཁའ་གསུམ་ཕྲུག་གི་གདམས་པ་ལ་ཕྱིའི་ནམ་མཁའ་ནི་བར་སྣང་སྟོང་བའི་དབྱིངས་འདི་ག་རེད། ནང་གི་ནམ་མཁའ་ནི་ལུས་གནད་དང་ལྡན་པས་ཕྱིའི་ནམ་མཁའ་ལ་མིག་འབྲས་ཟུག་སོང་བ་ལྟར་གཏད་ནས་བཞག་པས་ནང་སེམས་ཉིད་རྣམ་པར་མི་རྟོག་པའི་ངང་དུ་ལྷན་ནེར་གནས་པ་དེ་རེད། དེ་ནི་གཞིའི་ཕྱོགས་འགོ་ཙམ་རིག་པ་ལས་ད་དུང་ཀུན་གཞིའི་རྣམ་ཤེས་ཀྱི་ངང་ལས་མ་འདས་པས་ན་རིག་པ་དངོས་གནས་དེ་ནི་མིན། ནང་གི་ནམ་མཁར་འཛིན་པའི་བློ་དང་ཉམས་ཞེན་གྱིས་བསླད་ཡོད་པ་རེད། ཕྱིའི་ནམ་མཁའ་སྣོད་བཅུད་དུ་སྣང་བ་འདི་ཐམས་ཅད་གཏོར་མ་སྡེར་དང་བཅས་པ། ཙི་ཙི་ཚང་དང་བཅས་པ་མེད་འགྲོ་དགོས་པ་མ་རེད། ནམ་མཁའ་སོགས་སུ་འཛིན་པའི་བློའམ་གཏད་སོ་དེ་ཞིག་འགྲོ་དགོས་པ་རེད། གསང་བའི་ནམ་མཁའ་ནི་མི་རྟོག་པའི་ངང་དེ་ལས་རིག་པའི་མཁྱེན་ཆ་སད་ནས་ཉམས་ཞེན་གྱི་ཤུན་པ་དང་བྲལ་བའི་རིག་པ་འོད་གསལ་ཁྱབ་བརྡལ་ཆེན་པོ་རང་ཤར་བའི་ངང་དུ་གནས་པ་དེ་རེད། དེའི་ཚེ་གསང་བའི་ནམ་མཁའ་མངོན་དུ་གྱུར་བ་རེད། སྤྱིར་སོ་སྐྱེ་རང་ག་མའི་དུས་ནས་ཕྱིའི་ནམ་མཁའ་ལ་ཆུ་བུར་མིག་གིས་བལྟས་ནས་མཉམ་པར་བཞག་པས་ནང་དང་གསང་བའི་ནམ་མཁའ་རང་ཤུགས་ཀྱིས་འདྲེན་ནུས་པ་ཡིན་གསུངས། དེས་ན། བསྒོམ་པའི་ཚེ་ན་ཅི་ཡང་མི་བསྒོམ་པ། ནམ་མཁའ་མིག་གིས་མཐོང་བ་ཙམ་གྱིས་ཆོག །ཅེས་བསྒོམ་པའི་ཚེ་ན་ཞེས་པས་ཕྱི་དང་ནང་གི་ནམ་མཁའ་བསྟན། ཅི་ཡང་མི་བསྒོམ་པ་ཞེས་པས་ནམ་ཞིག་མི་བསྒོམ་པའི་དུས་གསང་བའི་ནམ་མཁའ་བསྟན་པ་རེད་ཅེས་གསུངས། འདིའང་ཁྲག་འཐུང་བདུད་འཇོམས་གླིང་པའི་ཞལ་རྒྱུན་འཁྲུལ་མེད་བདག་གི་བླ་མའི་སྙན་བརྒྱུད་ཟིན་བྲིས་སུ་བཏབ་པ་སྟེ་འཇིགས་བྲལ་ཡེ་ཤེས་རྡོ་རྗེས་སོ།། །།