ལྷ་མོའི་ཟིན་བྲིས་གསང་སྒྲུབ་བསྙེན་པ་བྱ་ཚུལ།
ན་མོ་ཤྲཱི་དེ་ཝི་ཡེ། །ཕྱི་ལྟར་དབྱངས་ཅན་ནང་ལྟར་ཕག་མོ་སྟེ། །གསང་བ་དུད་སོལ་ལྷ་མོར་ཕྱག་འཚལ་ནས། །དེ་ཡི་གསང་སྒྲུབ་བསྙེན་པ་བྱ་ཚུལ་བཀོད། །རྒྱ་གཞུང་ཉིད་ནས་དྲག་མོ་སྒྲུབ་ཐབས་གསུངས། །འོན་ཀྱང་རང་གཞན་བར་ཆད་ཞི་བའི་ཕྱིར། །བདུད་རྩི་སྨན་གྱི་རྒྱལ་མོ་ཞེས་བྱ་བ། །ལྷ་མོ་ཞི་བར་སྒྲུབ་ཐབས་འདིར་བཀོད་བྱ། །ཞལ་ཐང་ལ་སོགས་རྟེན་རྫས་ཡོད་ན་བཤམས། །མེད་ཀྱང་གཏོར་སྒྲུབ་ཡིན་ཕྱིར་གཏོར་མས་ཆོག །མཎྜལ་གྲུ་བཞི་མདའ་གང་དུག་ཁྲག་དང་། །དུར་སོལ་བྱུགས་སྟེང་རྡུལ་ཚོན་བཀོད་གསུངས་ཀྱང་། །རྡུལ་ཚོན་ཕྲ་སྦོམ་ཀྱག་ཀྱོག་བྱུང་ཤོར་ན། །ཉེས་སྐྱོན་ཆེན་པོ་འབྱུང་བར་གསུངས་པའི་ཕྱིར། །གཞི་སྟེང་འབྲུ་ནག་ཚོམ་བུ་ལྷ་གྲངས་བཀོད། །དེ་ནི་སྟབས་བདེ་ཉེས་སྐྱོན་མེད་པ་ཡིན། །ཀ་ཊོ་རའམ་ཟངས་ལྕགས་སྣོད་གཙང་དུ། །བཤོས་བུ་མར་རྒྱན་དང་བཅས་ཁྲུ་གང་པ། །ལོགས་གསུམ་དེ་ཡི་ཕྱེད་ཙམ་སླེབ་པ་གསུམ། །དེ་རྒྱབ་དེ་བས་ཆུང་བ་བཤོས་བུ་བཞི། །དེ་རྒྱབ་བརྒྱད་དང་དེ་རྒྱབ་བཞི་ཡིས་བསྐོར། །དེ་རྒྱབ་མཐེབ་སྐྱ་མང་པོས་བསྐོར་བར་བྱ། །རྩེ་ཡི་མར་རྒྱན་ནང་དུ་ཧཱུཾ་བྷྱོ་བཀོད། །རྩེ་ལ་གཙོ་མོའི་ཙཀ་ལི་དར་
གདུགས་བཙུགས། །བོང་བུ་བྱ་ནག་ལུག་ནག་ལ་སོགས་པ། །ལྷ་མོའི་མཐུན་རྫ་ས་བསྐང་འབྲས་རྣམས་ཀྱང་བཙུགས། །གཏོར་མ་ཐམས་ཅད་དམར་གཏོར་ཤ་དམར་རྒྱུན། །རྩེ་མོར་ལྷ་བསྐྱེད་སྨད་ནི་མཆོད་པར་བསྐྱེད། །ཞལ་ཐང་ཡོད་ན་དེ་ཉིད་ལྷར་བསྐྱེད་ཆོག །དེ་ཡི་གཡས་གཡོན་བདུད་རྩི་རཀྟ་དང་། །མཐའ་བསྐོར་མཆོད་པ་སྣ་བདུན་བསྐོར་བཤམས་སམ་ཡང་ན་མདུན་དུ་འཕྲེང་དུ་བཤམས་ཀྱང་རུང་། །དེ་ནས་ཡི་དམ་གང་ཡིན་བདག་བསྐྱེད་ནི། །ད་ནངས་སྔོན་དུ་ལན་གཅིག་འདོན་པས་ཆོག །དེ་ནས་རྒྱས་པར་བརྒྱ་རྩའི་གཞུང་ལྟར་དུ། །བསྟོད་པ་ཡན་ཆད་ལས་བྱང་འདོན་པར་བྱ། །ལས་བྱང་མང་ན་བསྙེན་པ་མི་འགྲོ་བས། །ལས་བྱང་བསྡུས་པ་ཙམ་ཞིག་འདོན་པས་ཆོག །སྐུ་མདོག་ཕྱག་མཚན་བསྒོམ་ཚུལ་མི་ཤེས་ན། །བརྒྱ་རྩའི་ནང་གི་མངོན་རྟོགས་རྒྱས་པའམ། །གཅིག་ཤེས་ཀུན་གྲོལ་ནང་ནས་འབྱུང་བ་ལྟར། །མངོན་རྟོགས་དཔེ་ལྟས་བྱས་ལ་གསལ་ཡང་བཏབ། །ལས་བྱང་འདོན་ཚེ་ཧ་ལམ་གསལ་བཏབ་ནས། །བསྙེན་པ་བྱེད་ཚེ་དམིགས་པ་གསལ་བར་བསྒོམ། །དང་པོ་ལྷ་མོའི་ཐུགས་ལས་འོད་འཕྲོས་པས། །རི་རབ་བྱང་ཤར་ཡོངས་འདུས་ཤིང་དྲུང་
དང་། །རྒྱ་གར་དགའ་བ་ཚལ་གྱི་དུར་ཁྲོད་ནས། །ལྷ་མོ་དཔག་མེད་སྤྱན་དྲངས་མདུན་བསྐྱེད་བསྟིམ། །དེ་ནས་རང་ཉིད་ཡི་དམ་ཐུགས་ཀ་རུ། །ཡི་དམ་ས་བོན་ཡི་དམ་སྔགས་ཀྱིས་བསྐོར། །དེ་མཐར་ལྷ་མོའི་སྔགས་ཀྱིས་བསྐོར་བར་བསྒོམ། །རང་གི་ཐུགས་ཀའི་སྔགས་དེ་མི་འཁོར་རོ། །ལྷ་མོའི་ཐུགས་ཀར་སྟེང་དུ་ཟླ་བ་དང་། །འོག་ཏུ་ཉི་མ་གའུ་ཁ་སྦྱོར་དབུས། །ཧཱུྃ་བྷྱོ་མཐིང་ནག་མཐའ་མར་སྔགས་གཡོན་འཁོར། །བདག་གི་ཐུགས་ལས་འོད་ཟེར་ཁ་དོག་ལྔ། །སྟོང་སྐུད་ལྟ་བུར་འཕྲོས་པས་ཞལ་ནས་ཐོན། །ལྷ་མོའི་ཞལ་ཞུགས་ཐུགས་ཀའི་སྔགས་ཕྲེང་ཐིམ། ©།སྔོགས་ཕྲེང་དྲག་ཏུ་འཁོར་བས་ཐུགས་རྒྱུད་བསྐུལ། །དེ་ལས་འོད་ཟེར་ལྕགས་ཀྱུ་ཞགས་པ་ལྟར། །དཔག་མེད་འཕྲོས་པས་རང་བཞིན་གནས་རྣམས་ནས། །ལྷ་མོ་མར་མེ་འདྲ་བའི་འོད་ཀྱི་གཟུགས། །སྤྱན་དྲངས་ལྷ་མོའི་སྤྱི་བོ་ནས་མར་ཐིམ། །ལྷ་མོའི་ཐུགས་ཀའི་སྔགས་ལས་འོད་ཟེར་ནི། །རང་ཉིད་སྔགས་པ་ཁྱིམ་པ་ཡིན་ན་ནི། །ལྷ་མོའི་ལྟེ་བ་ནས་ཐོན་རང་ཉིད་ཀྱིས། །ལྟེ་བ་ནས་ཞུགས་ཐུགས་ཀར་ཐིམ་པར་བསྒོམ། །རང་ཉིད་རབ་ཏུ་བྱུང་བ་ཡིན་ན་ནི། །ལྷ་མོའི་བྷ་ག་ནས་ཐོན་རང་ཉིད་
ཀྱི། །རྡོ་རྗེའི་སྦུབ་ནས་ཞུགས་ཏེ་ཐུགས་ཀར་ཐིམ། །དེ་ནི་མཛའ་ལྟར་བརྟེན་པ་ཞེས་བྱ་སྟེ། །འགྲུབ་སླ་སྙིང་ཉེ་ལུས་དང་གྲིབ་བཞིན་འགྲོགས། །སྡོམ་པ་དམ་ཚིག་གཙང་བའི་གནད་ཆེ་སྟེ། །ལྷ་མོའི་ཚུལ་ཁྲིམས་སྙིང་ཉེ་མ་ཞེས་བྱ། །ལྟེ་བ་ནས་ནི་འོད་ཟེར་འཁོར་བསྒོམ་པ། །སྲིང་ལྟར་བརྟེན་པ་ཡིན་པས་བརྩེ་གདུང་ཆེ། །གསང་གནས་སྦ་སོགས་ངོ་ཚ་སྲུང་ཚུལ་བྱ། །རང་ཉིད་ཡི་དམ་བསྙེན་སྒྲུབ་ཉུང་བ་དང་། །བསྐྱེད་རིམ་མི་གསལ་ཉམས་རྟོགས་དམའི་ན་ནི། །ཐུགས་ཀ་ནས་ནི་ཐུགས་ཀར་འཁོར་བར་བསྒོམ། །ལྷ་མོ་ཉིད་ལ་མ་ཡི་འདུ་ཤེས་བཞག །སྐབས་སུ་ལྷ་མོའི་ནུ་མ་བདག་གིས་ནུས། །དངོས་གྲུབ་འོ་མས་བདག་ལུས་གང་བར་བསྒོམ། །འདི་ནི་འཇམ་ཞིང་མི་ནོན་དོགས་པ་མེད། །འོད་ཟེར་ཕར་དུས་མཆོད་པའི་ཚུལ། །ཚུལ་ལ་བྱུང་དུས་དངོས་གྲུབ་སྩོལ་བའི་ཚུལ། །རྒྱུན་ཆད་མེད་པར་ཀྱི་ལི་ལི་འཁོར་བསྒོམ། །དེ་ནས་འོད་ཟེར་དེ་ཡང་སྔགས་ཕྲེང་གྱུར། །སྔགས་ཕྲེང་སྔོན་ལྟར་འཁོར་བར་བསྒོམ་བྱ་ཞིང་། །དེ་ནས་བསྙེན་པའི་སྔགས་འདི་བཟླ་བ་བྱ། །ཨོཾ་ཧཱུཾ་ཤི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོཿ ཨེ་ཨ་རལླི་ཧཱུྃ་ཛ་ཛཿ བསྙེན་པ་དེ་ནི་སྟོང་ལས་མི་
ཉུང་བཟླས། །།དེ་ཡོན་ལྷ་མོ་སྐུ་མདོག་ནག་མོ་སྟེ། །དེ་ནས་ཞི་བར་བསྒྱུར་ཏེ་སྒྲུབ་པ་ནི། །ལྷ་མོའི་སྤྱི་བོར་པཾ་ཡིག་ལས་བྱུང་བའི། །བུམ་པ་དཀར་པོའི་ནང་དུ་རྡོར་སེམས་ནི། །སྐུ་མདོག་དཀར་པོ་ཆུང་ངུ་གཅིག་བསྒོམ་སྟེ། །ལྷ་མོའི་ཐུགས་ཀའི་ས་བོན་ཧཱུྃ་ཡིག་དེས། །ཟླ་ཚེས་ཟླ་བའི་དཀྱིལ་འཁོར་ཉ་རྒྱས་གྱུར། །དེ་ལས་འོད་ཟེར་ཤངས་བུག་ནས་འཕྲོས་པས། །ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་དང་། །དཔའ་བོ་མཁའ་འགྲོ་རྣམས་ཀྱི་བདུད་རྩིའི་བཅུད། །འཇིག་རྟེན་སྨན་གྱི་ནུས་པ་ཐམས་ཅད་བསྡུས་།་།སྤྱི་བོའི་རྡོར་སེམས་ལ་ཐིམ་རྡོར་སེམས་ལས། །བདུད་རྩིའི་རྒྱུན་བབ་བུམ་པ་ལྟེམས་སེ་གང་། །བུམ་པའི་ཁ་ནས་བདུད་རྩི་འོ་མའི་རྒྱུན། །ལྷ་མོའི་ཞལ་དུ་ཞུགས་པས་སྐུ་ལུས་གང་། །ལྷ་མོའི་བཀྲག་མདངས་ཕུན་སུམ་ཚོགས་པར་གྱུར། །བདུད་རྩིའི་བཅུད་རྣམས་ཐུགས་ཀར་ཟླ་བར་ཐིམ། །ལྷ་མོ་སྐུ་མདོག་དུང་ལྟར་དཀར་བར་གྱུར། །སླར་ཡང་ལྷ་མོའི་ཞལ་ནས་བདུད་རྩི་བབ། །འཁོར་རྣམས་ཀུན་གྱི་ཞལ་ཞུགས་སྐུ་ལུས་གང་། །མ་མོ་འཁྲུག་པའི་ཕྲག་དོག་གདུག་རྩུབ་ཀུན། །ཞི་ནས་འཁོར་ཀུན་སྐུ་མདོག་དཀར་མོར་གྱུར།
སླར་ཡང་ལྷ་མོའི་ཞལ་ནས་བདུད་རྩིའི་རྒྱུན། །ཆུ་བོ་ལྟ་བུ་དཔག་མེད་བབ་པ་ཡིས། །རང་དང་བསྲུང་བྱ་ཀུན་གྱི་ཚངས་བུག་དང་། །ཁ་ནས་ཞུགས་པས་ལུས་ཀུན་ངང་ལྟེམ་གང་། །རླུང་མཁྲིས་བད་ཀན་རིམས་ནད་ཡམས་ནད་དང་། །དམ་ཚིག་ཆག་ཉམས་མ་མོ་འཁྲུག་པ་ཡི། །ཁ་རླངས་གདུག་རྩུབ་ཐམས་ཅད་བ་སྤུ་ཡི། །ཁུང་ནས་རླངས་པ་སྔོ་དམར་ཚུལ་དུ་བུད། །ནམ་མཁར་སོང་ནས་འཇའ་ལྟར་ཡོར་བར་བསྒོམ། །ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ། སརྦ་ཛཱ་ར་ཤཱནྟི་ཀུ་རུ་ཡེ་སྭཱ་ཧཱ། ཞེས་པ་དེ་ལ་ལྔ་བརྒྱ་ཙམ་ཞིག་བཟླས། །དེ་ནི་ཐུན་གཏོར་གཅིག་ནི་བཤམས་བྱས་ཏེ། །ཧ་ཧོ་ཧཱིཙཡི་སྔགས་ཀྱིས་བྱིན་གྱིས་བབས། ། བྷྱོཿ དུར་ཁྲོད་བདག་མོ་དངོས་གྲུབ་ཞལ། །ཞེས་སོགས་བརྗོད་ནས་གཏོར་ཆེན་དྲུང་དུ་ཕུལ། །དེ་ནས་མདུན་གྱི་ལྷ་མོ་དཔོན་གཡོག་རྣམས། །འཁོར་རྣམས་འོད་ཞུ་གཙོ་མོ་ཉིད་ལ་ཐིམ། །གཙོ་མོ་འོད་ཞུ་ཐུགས་ཀའི་ཧཱུྃ་ལ་ཐིམ། །ཧཱུྃ་དེ་རང་གི་སྣ་བུག་གཡོན་པ་ནས། །དབུ་མ་ནས་བརྒྱུད་རྩ་གསུམ་འདུས་མདོར་སོང་། །དེ་རུ་ཆོས་འབྱུང་གྲུ་གསུམ་རྩེ་ཐུར་བསྟན། །ཕྱི་ནག་ནང་དམར་མེ་རླུང་འཚུབ་མའི་ནང་། །པདྨ་ཉི་མའི་སྟེང་དུ་
ཧཱུྃ་དེ་ལས། །ལྷ་མོའི་སྐུར་གྱུར་དེ་ལ་འཁོར་རྣམས་ཀྱི། །གཙོ་མོ་ལ་ནི་གཡས་བསྐོར་ཀྱི་ལི་ལི། །གཙོ་མོའི་སྤྱི་བོར་གསང་བདག་ལ་སོགས་པ། །ཡི་དམ་ཧེ་རུ་ཀ་ཡི་སྐུ་གཅིག་གསལ། །དེ་ལས་འོད་ཟེར་འཕྲོས་པས་དཔོན་མོ་བསྐུལ། །དཔོན་མོས་གཡོག་བསྐུལ་གཡོག་རྣམས་འོད་ཟེར་ནི། །ཕྱིར་འཕྲོས་མ་མོ་རྣམས་ཀྱི་མཐུ་སྟོབས་བསྡུས། །རང་གི་རླུང་བཟུང་དང་འགྲོགས་ཤངས་བུག་ཞུགས། །ཧེ་རུ་ཀ་དང་མ་མོ་རྣམས་ལ་ཐིམ། །བཀྲག་དང་གཟི་མདངས་ཇེ་ཆེར་བསྒོམ་ཞིང་བསྙེན། །དེ་ནས་འཁོར་རྣམས་གཙོ་མོ་ཉིད་ལ་ཐིམ་། །གཙོ་མོ་ཧཱུྃ་ཐིམ་དེ་ཡང་སྤྱི་བོ་ཡི། །ཧེ་རུ་ཀ་ཐིམ་དེ་ཡང་འོད་དུ་ཞུ། །དབུ་མ་ནས་སོང་རང་ཉིད་ཡི་དམ་གྱི། །ཐུགས་ཀའི་ཧཱུྃ་ཐིམ་བདག་ཀྱང་འོད་དུ་ཞུ། །ཧཱུཾ་ཐིམ་དེ་ཡང་སྟོང་པར་ཡལ་བའི་ངང་། །ཉམས་ལེན་ངང་དུ་བཞག་པ་གསང་སྒྲུབ་ཡིན། །དེ་ཡིས་ཐུན་གཅིག་རྫོགས་པར་འགྱུར་བཡིན། །དེ་ལྟར་སྔ་དྲོ་ཉིན་གུང་དགོང་མོ་དང་། །སྲོད་དང་ཐུན་བཞིར་དེ་ལྟར་ཉམས་སུ་ལེན། །དེ་ལྟར་ཞག་བདུན་བཅུ་གཅིག་ཉེར་གཅིག་སོགས། །ཞག་བདུན་ཕན་ཆད་ཡུན་ནི་གང་འདོད་རུང་། །གྲངས་ནི་རབ་ཀྱི་བྱེ་བ་འབྲིང་གི་བདུན་འབུམ་
དང་། །ཐ་མ་འབུམ་ཚོ་གཅིག་ཡིན་ཅི་འགྲུབ་ཆོག །རྟགས་ནི་བུད་མེད་མཚེ་རིས་བཀྲ་བ་དང་། །ངུ་དང་བྲང་རྡུང་སྐུ་འབལ་རྒྱན་ཆ་བཏོག །བྷ་ག་སྟོན་སོགས་ངན་པའི་རྟགས་བྱུང་ན། །དགའ་ཚལ་མའམ་པཀཱིས་མཛད་པ་ཡི། །བསྐང་བའམ་ནི་མ་མོ་འཁྲུག་བསྐང་འདོན། །སྐབས་སུ་ཡིག་བརྒྱ་ཅུང་ཟད་བཟླས་པར་བྱ། །ཕྱི་རྟགས་སྒྲ་འོད་ཟེར་གསུམ་འུར་སྒྲ་དང་། །མེ་འབར་རླུང་ནག་འཚུབ་མ་དངོས་སུ་འོང་། །བོང་ཞོན་ལ་སོགས་འཇིགས་པའི་གཟུགས་རྣམས་མཐོང་། །ནང་རྟགས་བུད་མེད་གཟུགས་མཛེས་རྒྱན་ཆ་ཅན། །རྗེ་མོ་བློན་མོ་མ་སྲིང་ཆུང་མའི་ཚུལ། །དེ་རྣམས་བརྩེ་གདུང་གླུ་གར་རྒྱན་ཆ་ཐོགས། །ཟས་ནོར་རིན་ཆེན་འབྲུ་དང་ནོར་ཕྱུགས་འབུལ། །གསང་རྟགས་ཉམས་རྟོགས་སྐྱེ་དང་མཁའ་ལ་འཕུར། །ནམ་ལངས་ཉི་ཟླ་ཤར་དང་མེ་ཏོག་ཐུ། །དར་ཕྱར་དུང་འབུད་རྔ་རྡུང་ཁྲོམ་ཆོས་བཤད། །གོས་དཀར་དྲི་མེད་གྱོན་རྨིས་འགྲུབ་པ་ཡིན། །དུས་ནི་ཞག་གྲངས་བཞི་བཅུ་ཞེ་དགུ་སྟེ། །སྲོག་ཡིག་འབྲུ་བདུན་མཇུག་ཏུ་སྦྱར་བ་འདིས། །ཞག་པོ་བདུན་གྱིས་འགྲུབ་པར་ཐེ་ཚོམ་མེད། །སྒྲུབ་པ་ཚར་ནས་དངོས་གྲུབ་ལེན་ཆོག་ནི། །གཏོར་མའི་རྩེ་མོར་ལྷོ་མོར་གསལ་བ་
ཡི། །དཔྲལ་མགྲིན་ཐུགས་ཀ་ལྟེ་བ་གནས་བཞི་ནས། །ཨོ་དཀར་ཨཱདམར་ཧཱུྃ་མཐིང་ཧྲིལྗང་གུ། །འོད་ཀྱི་ཐིག་ལེ་རང་གི་གནས་བཞིར་ཐིམ། །དབང་དང་དངོས་གྲུབ་མ་ལུས་ཐོབ་བསྒོམ་ཞིང་། །རྩ་སྔགས་མཇུག་ཏུ་འདི་བཏགསགནས་བཞིར་གཏུག །ཀཱ་ཡ་སིདྡྷི་ཨོ། ཝཱཀྐ་སིདྡྷི་ཨཱཿ ཙིཏྟ་སིདྡྷི་ཧཱུཾ། སརྦ་སིདྡྷི་ཧཱུྃ༔ དེ་ནས་སླར་ཡང་གསོ་བྲན་བྱས། །མདུན་དུ་དམར་གཏོར་ཆེ་ལེགས་བཤམས། །དེ་ལ་དགུགས་གཞུག་གང་དགོས་བྱས། །གོང་གི་རྒྱ་གཞུང་ནས་གསུངས་པའི། །བསྙེན་སྔགས་བསད་སྔགས་སྦྲེལ་མ་དེ་།ཉེར་གཅིག་ཡན་ཆད་ཅི་འགྲུབ་བརྗོད། །ལྷ་མོ་འཁོར་དང་བཅས་པ་ཡི། །དགྲ་བགེགས་ཐམས་ཅད་བཀུག་ཅིང་བསྒྲལ། །ཤ་ཁྲག་ཧབ་ཐོབ་གསོལ་བར་བསྒོམ། །རྩ་སྔགས་བ་ལི་ཁཱ་ཧི་བཏགས། །རྒྱས་པར་བསྐུལ་པ་གང་རུང་འདོན། །བསྡུ་ན་དངོས་གྲུབ་བདག་མོས་ཆོག །གནོད་པའི་ཕྱོགས་སམ་བྱང་ཤར་ཕྱོགས། །འབུལ་རྒྱུ་བསྐུལ་བས་ཆོག་པ་ཡིན། །རྗེས་ཆོག་ཚུལ་དུ་ལས་བྱང་འདོན། །མ་འབྱོར་པ་སོགས་བཤགས་པ་དང་། །ཡིག་བརྒྱ་ཚར་གསུམ་བརྗོད་པར་བྱ། །ལྷ་མོ་ཡེ་ཤེས་པ་རྣམས་ནི། །སྐུ་གཟུགས་ལ་
སོགས་རྟེན་ལ་བསྟིམ། །སྐུ་གཟུགས་ལ་སོགས་མེད་ན་ནི། །རྣལ་འབྱོར་ཁྱོད་ཀྱིས་ཅི་འདོད་པའི། །དོན་ཀུན་བསྒྲུབ་ཅེས་གསུང་བྱོན་ནས། །ལྷ་མོ་དཔོན་གཡོག་འཁོར་དང་བཅས་།བྱང་ཤར་ཕྱོགས་སུ་གཤེགས་བསྒོམ་ཞིང་། །དེ་ཝི་ས་པཱ་རི་ཝཱ་ར་བཛྲ་མུཿ ཞེས་བརྗོད་བསྔོ་སྨོན་བཀྲ་ཤིས་བྱ། །རྨི་ལམ་ཆགས་པ་སྤྱོད་རྨིས་ཤིང་། །བྱང་སེམས་ཉམས་པར་མ་གྱུར་ན། །ལྷ་མོའི་འགྲུབ་རྟགས་ཡིན་པས་བཟང་བ་སྟེ། །ཆགས་པ་སྤྱོད་རྨིས་བྱང་སེམས་ཤོར་བ་དང་། །རྐུབ་དང་མོ་མཚན་སྟོན་རྨིངསགོད་ཁ་སོགས། །ངན་རྟགས་མང་ན་དམ་སྲིའི་གནོད་པ་ཡིན། །ཚིག་མ་རམ་ཕྱེ་གྲོ་ཕྱེ་བོང་བུའི་ཆུ། །བསྲེས་པའི་ལིང་ག་ཆེ་བ་གཅིག་བྱ་སྟེ། །ཤོག་བུར་བུད་མེད་བྱ་མཆུ་ཅན་གཅིག་བྲིས། །སྙིང་གར་དྲི་ཛའི་མཐའ་རུ་འདི་ཉིད་བཀོད། །དམ་སྲི་ལྟེ་ཕུར་ནག་མོ་བྱ་མཆུ་མ་ལ་སོགས་པ་ལྷ་མོ་སྒྲུབ་པ་ལ་བར་དུ་གཅོད་པའི་གནོད་བྱེད་ཐམས་ཅད་གཟུགས་ལིངྒ་འདི་ལ་ཁུག་ཅིག །ཛ་ཧཱུཾ་བཾ་ཧོ༔ ཞེས་བྲི་ཐ་ལ་ཛ་ཁྲམ་བསྐོར། །དྲག་པོའི་སྦྱིན་སྲེག་སྤྱི་ལྟར་ལས། །རང་ཉིད་ཡི་དམ་གསལ་བར་བསྒོམ། །ལྷ་མོའི་ལས་བྱང་བཏོན་ནས་ཀྱང་། །མདུན་དུ་ལྷ་མོ་གསལ་བ་ཡི། །ལྟེ་བར་དམ་སྲི་
ལྟེ་ཕུར་བྱ་མཆུ་ཅན། །ཁོག་སྟོད་བུད་མེད་བྱ་མཆུ་མ། །སྐུ་སྨད་ཕུར་པ་ལྟེ་བར་ཟུག །དེ་ཉིད་བཀུག་སྟེ་ལིང་གར་བསྟིམ། །ཕུར་པ་བཏབ་ཅིང་བསྒྲལ་ལས་བྱ། །ལིངྒ་དུམ་བུ་བརྒྱ་རྩར་གཏུབ། །མེ་ཐབ་ནང་དུ་གཤིན་རྗེ་གཤེད། །འཇིགས་བྱེད་ཚེ་བདག་ཀིང་ཀང་དང་། །ཁྲོ་ཆུ་ལ་སོགས་གང་འདོད་བསྐྱེད། །དེ་ཡི་ཞལ་གདང་མེ་འབར་བས། །དམ་སྲི་རྐང་མཐིལ་སྐྱ་ལྷག་ལྷག །ཞལ་དུ་འཕང་བས་བསྲེག་པར་བསྒོམ། །ཡ་སོགས་སྔགས་ཀྱི་མཇུག་ཏུ་ནི། །གནོད་བྱེད་དམ་སྲི་ལྟེ་ཕུར་ནག་མོ་མཱ་ར་ཡ་ཧཱུྃ་ཕཊ། ཞེས་པ་དེ་ལ་བརྒྱ་རྩ་བསྲེགས། །རྗེས་རྣམས་སྦྱིན་སྲེག་སྤྱི་ལྟར་མཚུངས། །དེ་ཡིས་སྲི་མནན་པ་ཡི། །གོ་ཆོད་ངས་བར་གཞུང་ནས་གསལ། །དེ་ཡིས་སྒྲུབ་པའི་གེགས་སེལ་ཚང་། །གེགས་སེལ་མེད་ཅིང་ཞི་སྒྲུབ་འདི། །བར་ཆད་འབྱུང་དོགས་མི་དགོས་སོ། །དེ་ལྟར་སྒྲུབ་པ་ཚར་ནས་ནི། །རྒྱུན་དུ་སྔགས་སྔོས་ཁཱ་ཧིས་ཆོག །དུས་མཆོད་དགུ་གཏོར་ལ་སོགས་དུས་། །མགོན་པོ་ཞི་སྒྲུབ་ལས་བྱང་ལ། །མ་མགོན་གཉིས་ཀའི་ལས་བྱང་ཚང་། །འོན་ཀྱང་སྒྲུབ་པ་བྱས་པའི་དུས། །བརྒྱ་རྩའི་ལས་བྱང་མང་དྲགས་པས། །ལས་བྱང་ཉུང་དུ་
འདོན་པ་ན། །མངོན་རྟོགས་གོང་གི་རྒྱ་གཞུང་གི །མངོན་རྟོགས་མཚལ་མ་བཏོན་པའི་རྗེས། །ལས་བྱང་ཉུང་ངུ་འདི་བཏོན་ཆོག །གནས་གསུམ་འབྲུ་གསུམ་ཧཱུྃ་ཡིག་ལས། །འོད་ལྷའཕྲོས་འཁོར་བཅས་སྤྱན་དྲངས་གྱུར། བྷྱོཿ རི་རབ་ཆེན་པོའི་ནུབ་བྱང་མཚམས། །གཡུ་མཚོ་མུ་ལེའི༴ སོགས་ནས། གསང་སྔགས་སྲུང་མ་དམ་ཚིག་ཅན། །འཁོར་བཅས་གཤེགས་ཤིང་བཞུགས་སུ་གསོལ། །ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ། ༀ་ཏྲི་ཤ་ཡ་ཛཿཧཱུྃ་བཾ་ཧོ༔ ས་མ་ཡ་ཧཱུཾ། ས་མ་ཡ་ཧོ༔ དཔལ་ལྡན་ལྷ་མོ་དུད་པའི་སོལ་བ་མ་ཁྱོད་ཀྱིས་བདག་ལ་སྐུ་མངོན་སུམ་དུ་སྟོན་ཅིག །སྐུ་མངོན་སུམ་དུ་མི་སྟོན་ན་ཡང་སྔོན་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་སོགས་པའི་སྤྱན་སྔར་ཇི་ལྟར་ཁས་བླངས་དམ་བཅས་པ་བཞིན་དུ། སངས་རྒྱས་ཀྱི་བསྟན་པ་སྲུང་བ་དང་། བདག་ཅག་དཔོན་སློབ་མི་ནོར་འཁོར་དང་བཅས་པ་ལ་ཡམས་ནད་རིམས་ནད་ཀྱི་གནོད་པ་ཐམས་ཅད་ཞི་བ་དང་། ཡིད་ལ་གང་འདོད་པ་ཐམས་ཅད་འགྲུབ་པར་གྱིས་ཤིག །ཨོཾ་ཧཱུཾ་ཤི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ། ཨེ་ཨ་རལླི་ཧཱུྃ་ཛཿ ལྷ་མོའི་ལྕེ་ལ་དམ་ཚིག་བྱིན་པར་བསམས་ལ། ཨོཾ་ཧ་ན་ཧ་ན་
མ་ཏི་ཀྲ་མ་ནི་ཧཱུཾ་ཕཊ༔ བྷྱོཿ ཡང་ཐོག་དྲུག་བརྩེགས་འཕྲུལ་གྱི་ལྡིང་ཁང་ནས། །མ་གཅིག་དཔལ་ལྡན་སོགས་ནས། བདག་གི་བསམ་པའི་དོན་ཀུན་འགྲུབ་གྱུར། ཅིག །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ། ས་པཱ་རི་ཝཱ་ར་བཛྲ་པུལླེ་དྷ་པེ་ཨ་ལོ་ཀེ གནྡྷེ་ནེ་ཝི་དྱ་ཤབྟ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུྃ་ཕཊ༔ ཨོཾ་སཾ་ཤོ་དྷ་ནི་ཧཱུཾ་ཕཊ། ཨོཾ་སྭ་བྷཱ་ཝ་སོགས། སྟོང་པའི་ངང་ལས་གཏོར་མའི་ནང་དུ་ཧ་སེར་པོ་གསེར་གྱི་མདོག་ལྟ་བུ་དེ་ཞུ་བ་ལས་གཏོར་མའི་ཁ་དོག་ངན་པ་ཐམས་ཅད་བཅོམ་ནས་ཁ་དོག་ཕུན་སུམ་ཚོགས་པ། དེའི་སྟེང་དུ་ཧོ་དཀར་པོ་དུང་གི་མདོག་ལྟ་བུ་དེ་ཞུ་བས་དྲི་ངན་པ་ཐམས་ཅད་བཅོམ་ནས་དྲི་ཕུན་སུམ་ཚོགས་པ། དེའི་སྟེང་དུ་ཧཱུྃབཻཌཱུརྱའི་མདོག་ལྟ་བུ་དེ་ཞུ་བས་རོ་ངན་པ་བཅོམ་ནས་རོ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ་ཧ་ཧོ་ཧྲཱིཿ གསུམ། ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ། ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་མ་ཧཱ་ནཱཾ་ས་ཁཱ་ཧི། ཨོཾ་མ་ཧཱ་གོ་རོ་ཙ་ན་ཁཱ་ཧི། ༀ་མ་ཧཱ་བཱ་སུ་ཏ་ཁཱ་ཧི། ཨོཾ་ཨི་དཾ་བ་ལི་གྷིནྡྷ་གྷིཧཱ་པ་ཡ་ཧཱུྃ་ཕཊ། དཔལ་ལྡན་ལྷ་མོ་དུད་པའི་སོལ་བ་མ། འཁོར་ཤན་པ་མ་གསུམ། རིགས་
བཞིའི་མཁའ་འགྲོ། དུར་ཁྲོད་ཀྱི་མ་མོ་བརྒྱད། ཕྲ་མེན་མ་བརྒྱད། སྒོ་མ་བཞི། སྲིད་པའི་མ་མོ་བྱེ་བ་འབུམ་སྡེ་དང་བཅས་པ་ཐམས་ཅད་ལ་དམ་རྫས་བདུད་རྩིའི་གཏོར་མ་འདི་འབུལ་ལོ། །ཡོངས་སུ་བཞེས་ལ། སྤྱིར་སངས་རྒྱས་ཀྱི་བསྟན་པ་སྲུངས། དཀོན་མཆོག་གི་ཆེ་བ་ཕྱུངས། དཔལ་ལྡན་བླ་མའི་ཕྲིན་ལས་སྒྲུབས། སེམས་ཅན་གྱི་བདེ་སྐྱིད་སྤེལ།། ཁྱད་པར་དུ་བདག་ཅག་དཔོན་སློབ་འཁོར་དང་བཅས་པ་རྣམས་ཀྱི། བདུད་དང་བར་ཆད་ཐམས་ཅད་ཞི་བ་དང་། ཚེ་དང་བསོད་ནམས་རྒྱས་པ་དང་། རླུང་མཁྲིས་བད་ཀན་ལས་གྱུར་པའི་ནད་རིགས་ཐམས་ཅད་ཞི་བ་དང་། ཆག་ཆེ་ཉམ་ང་བཀྲ་མི་ཤིས་པ་ཐམས་ཅད་བཟློག་པའི་ཕྲིན་ལས་མཛོད་ཅིག ། བྷྱོཿ རྒྱ་མཚོའི་ཀློང་ནས་མེ་འབར་ཁྱོད། །མཚོ་ནི་སྐེམ་པར་ནུས་མ་སྟེ། །བུད་མེད་ཐམས་ཅད་སོགས་ནས། དཔལ་ལྡན་ལྷ་མོ་ཁྱོད་ལ་བསྟོད། ཐུན་གཏོར་ལ་དགྲ་བགེགས་བཀུག་གཞུག་སོགས་བྱས་ལ། བྷྱོཿ དུར་ཁྲོད་བདག་མོ་དངོས་གྲུབ་ཞལ། །གཏུམ་མོ་འཇིགས་བྱེད་སོགས་ནས། དེ་ལ་ཀུན་གྱི་གྲོགས་གྱིས་ཤིག །ཨོཾ་ཧཱུཾ་ཤི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ་གྷིནྡྷ་བྷིནྡྷ་སརྦ་དུཥྛན་པཀྵ་པཀྟ་པྲ་པུཾ་སཾ་ཕཊ་
སྭཱ་ཧཱ། ཞེས་ཐུན་གཏོར་གཏོར་ཆེན་དྲུང་དུའམ་ཕྱི་རོལ་དུ་ཕུལ། ཞེས་པ་འདི་ནི་ལས་བྱང་བསྡུས་པ་སྟེ། རྗེས་འཇུག་སོགས་ཀྱི་བསྙེན་སྒྲུབ་བྱ་བའི་ཕྱིར། སྒྲུབ་ཐབས་གོ་བདེར་ལས་བྱང་བསྡུས་པར་བཅས། །རཱ་ག་ཨ་སྱས་ངག་ནས་སྨྲས་པ་ལྟར། །དགེ་སློང་བརྩོན་འགྲུས་ཞེས་བྱས་ཡི་གེར་བཀོད། །ཉེས་འགལ་མཆིས་ན་ལྷ་མོ་ཉིད་ལ་བཤགས། །དགེ་བས་སངས་རྒྱས་བསྟན་པ་རྒྱས་པ་དང་། །རྗེས་འཇུག་ཐམས་ཅད་ལྷ་མོའི་སྲུང་ཞིང་སྐྱོབས། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།