ཤེས་རབ་དོན་དམ་གྱི་བསམ་པས་གཞལ་ན་ཐམས་ཅད་མེད་པ་ཉིད་དུ་བསྟན་པ།
སྤྱི་དོན་གཉིས་པ་ཤེས་རབ་དོན་དམ་གྱི་བསམ་པས་གཞལ་ན་ཐམས་ཅད་མེད་པ་ཉིད་དུ་བསྟན་པ་ལ་གཉིས། ཡུལ་མ་གྲུབ་པས་ཡུལ་ཅན་གྱི་ཤེས་པའང་མ་གྲུབ་པས་ན་སེམས་ཙམ་ལས་ཁྱད་པར་དུ་འཕགས་པ་དང་། ཀུན་རྫོབ་སྒྱུ་མ་ལྟ་བུ་ཡིན་ཡང་དོན་དམ་པར་འདིའོ་ཞེས་བྱ་བའི་གནས་ལུགས་མི་འདོད་པས། དབུ་མ་ངོ་བོ་ཉིད་མེད་པ་༼འག༷འ་ཞི༷ག་༽ལས་ཁྱད་པར་དུ་འཕགས་པར་བསྟན་པའོ། །འདིའི་དོན་ནི་ངོ་བོ་ཉིད་མེད་པར་སྨྲ་བ་ཞེས་པ་དབུ་མ་སྤྱིའི་མཚན་ཉིད་ཡིན་པས་སྔ་རབས་པའི་ཐལ་འགྱུར་བ་འགའ་ཞིག་ལྟ་བུ་དོན་དམ་པར་མེད་དགག་ཁོ་ན་འདོད་པ་ལ་གོ་དགོས་ཀྱི། དཔལ་ལྡན་ཟླ་བའི་གསུང་རྣམས་རང་ལུགས་ཚད་མའི་རྒྱབ་རྟེན་དུ་རྗེ་བཙུན་ཉིད་ཀྱིས་འདྲེན་པར་མཛད་པས་དེ་འདྲ་ལ་གོ་མི་རུང་ཞེས་རབ་འབྱམས་པ་ཀུན་དགའ་ཡེ་ཤེས་གསུངས་སོ། །དང་པོ་ནི། བརྟག་པ་དང་པོའི་ལེའུ་ལྔ་པ་ལས་གསུངས་པ། ངོ་བོས་གཟུགས་མེད་མཐོང་བ་པོ། །སྒྲ་མེད་ཐོས་པ་པོ་ཡང་མེད། །དྲི་མེད་སྣོམ་པ་པོ་ཡང་མེད། །རོ་མེད་མྱོང་བ་པོ་ཡང་མེད། །རེག་མེད་རེག་པ་པོ་ཡང་མེད། །སེམས་མེད་སེམས་ལས་བྱུང་བའང་མེད། །ཅེས་པ་འདིས་བདེན་པ་གཉིས་ཆར་སྟོན་པ་རྗེ་བཙུན་གསུངས། ཅེས་གསུངས་ཏེ། རང་གི་བློ་ལ་སྣང་བ་ཐམས་ཅད་ནི་བརྟགས་པ་སྟེ་ངོ་བོས་མེད་ཅེས་པའི་དོན་ཏོ། །དེ་ལ་གཟུགས་ནི་དཀར་པོ་ལ་སོགས་པ་སྟེ་མིག་གི་ཡུལ་དུ་གྱུར་པ་གཟུགས་ཀྱི་སྐྱེ་མཆེད་དོ། །དེ་ལ་རང་བཞིན་མེད་ཅེས་སྦྱར་བར་བྱའོ། །དེ་ལ་རང་བཞིན་ནམ་ངོ་བོའམ་རང་བྱུང་དུ་མེད་པའོ། །ཇི་ལྟར་མེད་ཅེ་ན། གློ་བུར་གྱི་རྐྱེན་ལ་རག་ལས་པའི་ཕྱིར་དང་། འགག་པ་སླར་མི་སྐྱེ་བའི་ཕྱིར་དང་། སྐད་ཅིག་མ་ཙམ་ཡིན་པའི་ཕྱིར་དང་། བྱིས་པས་ཀུན་ཏུ་བརྟགས་པའི་བདག་དང་གཙང་བ་དང་། བདེ་བ་དང་རྟག་པ་མ་གྲུབ་པའི་ཕྱིར་ངོ་བོས་མེད་དོ། །དེ་ལྟར་མདོ་སྡེ་རྒྱན་ལས། རྐྱེན་ལས་བྱུང་བ་རང་གི་ངོ་བོ་མེད་པ་དང་འགགས་པ་སླར་མི་སྐྱེ་བས་རང་གི་བདག་ཉིད་དུའང་། །མེད་པའི་ཕྱིར་དང་སྐད་ཅིག་མ་ཡིན་པས་རང་གི་ངོ་བོ་ལ། །མི་གནས་པའི་ཕྱིར་དང་བྱིས་པས་འཛིན་པ་བཞིན་ཏེ། །མེད་ཕྱིར་དངོས་པོ་ཐམས་ཅད་ངོ་བོ་ཉིད་མེད་འདོད། །ཅེས་གསུངས་སོ། །འབུམ་ལས་ཀྱང་། གཟུགས་ལ་རང་བཞིན་མེད་དེ། གང་ལ་རང་བཞིན་མེད་པ་ནི་བརྗོད་དུ་མེད་པའོ་ཞེས་བྱ་བ་ལ་སོགས་པ་དང་། གཟུགས་རྟག་ཅིང་བརྟན་ལ་ཐེར་ཟུག་མི་འགྱུར་བའི་ཆོས་ཅན་ཞིག་ཡིན་ན་ཐེག་པ་ཆེན་པོ་འདིས་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ཟིལ་གྱིས་མནན་ཅིང་འབྱུང་བར་མི་འགྱུར་ཏེ། གཟུགས་མི་རྟག་ཅིང་མི་བརྟན་ལ་ཐེར་ཟུག་མ་ཡིན་པའི་ཕྱིར་ཐེག་པ་ཆེན་པོ་འདིས་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ཟིལ་གྱིས་མནན་ཅིང་འབྱུང་བ་ཡིན་ནོ་ཞེས་བྱ་བ་ལ་སོགས་པ་གསུངས་སོ། །དེས་ན་རྟོག་པས་བརྟགས་ཤིང་གྲགས་པ་ཙམ་དུ་ཟད་ཅིང་རྟེན་འབྲེལ་ཙམ་སྟེ། དབུ་མ་ལས། རྒྱུ་དང་རྐྱེན་ལས་བྱུང་བ་ཡི། །རང་བཞིན་བྱས་པ་ཅན་དུ་འགྱུར། །ངོ་བོ་ཉིད་ནི་བཅོས་མིན་དང་། །གཞན་ལ་ལྟོས་པ་མེད་པ་ཡིན། །ཞེས་པ་དང་། རྟེན་ཅིང་འབྲེལ་འབྱུང་གང་ཡིན་པ། །དེ་ནི་སྟོང་པ་ཉིད་དུ་བཤད། །ཅེས་གསུངས་སོ། །དེས་ན་ཡུལ་མེད་པས་ཡུལ་ཅན་མི་འབྱུང་སྟེ། མཐོང་བ་པོ་མེད་ཅེས་བྱ་བ་མིག་གི་སྐྱེ་མཆེད་མེད་དོ་ཞེས་བྱ་བའི་དོན་ཏོ། །དེ་ལྟར་གཟུགས་ཀྱི་ཕུང་པོས་བསྡུས་པ་སྐྱེ་མཆེད་བཅུ་དང་ཁམས་བཅུ་ངོ་བོས་མེད་པ་ནི། རེག་པ་པོའང་མེད་ཅེས་པ་ཡན་ཆད་ཀྱིས་བསྟན་ཏོ། །སེམས་མེད་ཅེས་པ་ནི་རྣམ་པར་ཤེས་པའི་ཕུང་པོས་བསྡུས་པ་རྣམ་པར་ཤེས་པའི་ཁམས་དྲུག་དང་ཡིད་ཀྱི་སྐྱེ་མཆེད་དེ་༼ཉོ༷ན་ཡི༷ད་ད༷ང་༽ཀུན་གཞིའི་རྣམ་པར་ཤེས་པའི༼པ༷་འདི༷་༽སེམས་ཀྱིས་བསྡུས་པའི་ཕྱིར་སེམས་ཏེ་དེ་མེད་དོ། །སེམས་ལས་བྱུང་བ་ངོ་བོ་མེད། །ཅེས་ཆོས་ཀྱི་ཁམས་དང་ཆོས་ཀྱི་སྐྱེ་མཆེད་དང་། ཚོར་བ་དང་འདུ་ཤེས་དང་འདུ་བྱེད་ཀྱི་ཕུང་པོའོ། །དེས་ན་རིག་བྱ་རིག་པ་ལ་ལྟོས་ལ། རིག་པའང་རིག་བྱ་ལ་ལྟོས་པས། གཅིག་ཁེགས་པས་གཅིག་འགགས་པས་ན་རང་རིག་པ་ཞེས་བྱ་བ་མེད་པས་སེམས་ཙམ་ལས་ཁྱད་པར་དུ་འཕགས་ཞེས་བྱ་བའི་དོན་ཏོ། །གཉིས་པ་ཀུན་རྫོབ་སྒྱུ་མ་ལྟ་བུ་ཡིན་ཡང་དོན་དམ་དུ་གནས་ལུགས་སུ་མི་འདོད་པས། ངོ་བོ་ཉིད་མེད་པ་ལས་ཁྱད་པར་དུ་འཕགས་པར་བསྟན་པ་ལས། དང་པོར་ཀུན་རྫོབ་སྒྱུ་མ་ལྟ་བུར་བསྟན་པ་ནི། སཾ་པུ་ཊའི་བརྟག་པ་གཉིས་པའི་གཉིས་པ་ལས། དྲི་ཟའི་གྲོང་ཁྱེར་ལྟ་བུ་དང་། །སྒྱུ་མ་སྨིག་རྒྱུ་འདྲ་བ་དང་། །འཕྲོག་པ་ཟླ་བ་སྟེ་རྒྱལ་པོ་སེང་གེ་ཟླ་བའི་གྲོང་ཁྱེར་མཚོ་ནང་དུ་ཤར་བའི་གཟུགས་བརྙན་དང་མཚུངས་པ་དང་། །རྨི་ལམ་རྩེ་བ་ལྟ་བུར་བལྟ། །སྒྱུ་མ་ཇི་བཞིན་ཐམས་ཅད་དུ། །བལྟ་བྱ་ཉིད་དང་རིག་པར་བྱ། །ཞེས་འབྱུང་བས་ན་ཀུན་རྫོབ་ཏུ་ཆོས་ཐམས་ཅད་སྒྱུ་མ་ལ་སོགས་པ་བདག་བྱིན་གྱིས་རླབས་པ་ལས། སྒྱུ་མ་༡སྨིག་རྒྱུ་༢དྲི་ཟ་ཡི། །གྲོང་ཁྱེར་༣དང་ནི་དབང་པོའི་གཞུ༤། །མེ་ལོང་གི་ནི་གཟུགས་བརྙན་དང་༥། །ཆུ་ཟླ་དང་༦ནི་བྲག་ཅ་དང་༧། །རྨི་ལམ་༨མི་ཡོར་༩སྤྲིན་༡༠དང་གློག༡༡། ཆུ་ཡི་ཆུ་བུར་༡༢ཞེས་བྱ་བ། །སྒྱུ་མའི་དཔེ་ནི་བཅུ་དང་གཉིས། །ཞེས་པ་ལྟར་དཔེ་བཅུ་གཉིས་ཀྱིས་གཏན་ལ་དབབ་པའོ། །འོ་ན་སྒྱུ་མ་ལྟ་བུ་ལ་སོགས་པ་ཀུན་རྫོབ་ཡིན་ན། དོན་དམ་པར་གནས་ལུགས་གང་ཡིན་སྙམ་ན། སཾ་པུ་ཊ་ལས། འགྲོ་བ་ཀུན་གྱི་གནས་པ་སྟེ་གནས་ལུགས་ནི། །དངོས་པོ་གང་ལའང་དཔྱད་ན་རྙེད་པར་མི་འགྱུར་ཏེ། །ཐབས་ཤེས་ཀྱི་སྦྱོར་བ་འདུས་པ་སྟེ་ཟུང་འཇུག་གི་ཡེ་ཤེས་ཀྱི་ངོ་བོ་ནི་བསམ་གྱིས་མི་ཁྱབ་བོ། །ཅེས་གསུངས་ཏེ། བསམ་པའི་ཡུལ་ལས་འདས་པ་སྟེ། དོན་དམ་པར་ན་འདི་ལྟ་བུ་ཞིག་གོ་ཞེས་བརྗོད་དུ་མི་བཏུབ་བོ། །དེ་ལ་ངོ་བོ་ཉིད་མེད་པར་སྨྲ་བ་དག་ཆོས་ཐམས་ཅད་ཀྱི་རང་བཞིན་ནི་སྟོང་པ་ཉིད་ཡིན་ནོ་ཞེས་བྱ་བ་ལ་སོགས་པར་འཛིན་པ་དེ་དག་སུན་དབྱུང་བ་སྟེ། འོག་ཏུ་རྒྱས་པར་བརྗོད་པར་བྱའོ། །