རྣམ་མཁྱེན་མཚོན་བྱེད་ཀྱི་ཆོས་བཅུ་རྒྱས་པར་བཤད་པ།
རྣམ་མཁྱེན་མཚོན་བྱེད་ཀྱི་ཆོས་བཅུ་རྒྱས་པར་བཤད་པ། གསུམ་པ་ཚིག་དོན་ལ། མཁྱེན་གསུམ་རྒྱས་པར་བཤད་པ། སྦྱོར་བ་བཞི་རྒྱས་པར་བཤད་པ། ཆོས་སྐུ་རྒྱས་པར་བཤད་པའོ། །དང་པོ་ལ། དོན་དུ་གཉེར་བྱ་རྣམ་མཁྱེན་བཤད། དེར་བགྲོད་པའི་ལམ་ཤེས། ལམ་ཤེས་རྣམ་པར་དག་བྱེད་ཀྱི་ཡན་ལག་གཞི་ཤེས་བཤད་པའོ། །དང་པོ་ལ། མཚམས་སྦྱར་བ། ཆོས་བཅུ་རྒྱས་པར་བཤད་པ། སྐབས་བསྡུ་བའོ། །དང་པོ་ནི། ཤེས་བྱ་ཆོས་ཅན། སྔར་བཤད་པ་དེ་ལྟར་བསྡུས་པའི་དོན་ཀུན་བསྟན་ནས། དང་པོར་རྣམ་པ་ཐམས་ཅད་མཁྱེན་པ་ཉིད་བཤད་པར་བཞེད་དེ། སེམས་བསྐྱེད་ལ་སོགས་པ་ཆོས་བཅུའི་ཡུལ་གྱི་ཡུལ་ཅན་མཚོན་པའི་ཕྱིར་དུ་བཤད་པའི་ཕྱིར། ཤེས་བྱ་ཆོས་ཅན། དང་པོར་རྣམ་མཁྱེན་འཆད་པའི་རྒྱུ་མཚན་ཡོད་དེ། མངོན་རྟོགས་ཀྱི་རིམ་པ་ཀུན་མངོན་སུམ་དུ་རྟོགས་འདོད་ཀྱི་གདུལ་བྱས། མཐར་རྣམ་པ་ཐམས་ཅད་མཁྱེན་པ་ཉིད་ཐོབ་པར་བྱ་དགོས་པའི་ཕྱིར། དེ་དགོས་ཏེ། རྒྱན་གྱི་ཆེད་དུ་བྱ་བའི་གདུལ་བྱས་ཆེད་དུ་གཉེར་བྱའི་འབྲས་བུའི་གཙོ་བོ་རྣམ་མཁྱེན་ཡིན་པའི་ཕྱིར། དེར་ཐལ། དེ་འདྲའི་གདུལ་བྱ་
བྱང་ཆུབ་སེམས་དཔའ་བླ་ན་མེད་པའི་བྱང་ཆུབ། འདས་པ་དང་ད་ལྟར་བའི་སངས་རྒྱས་རྣམས་གཤེགས་པའི་རྗེས་སུ་མཐུན་པར་ཐོབ་པར་འདོད་པའི་ཕྱིར། ཤེས་བྱ་ཆོས་ཅན། སེམས་བསྐྱེད་སོགས་ཐོག་མར་འཆད་རིགས་ཏེ། རྣམ་མཁྱེན་བསྡུས་པའི་ཚིག་ལེའུར་བྱས་པ་རྣམ་པར་བཤད་པའི་སྒོ་ནས་ཡུལ་གྱིས་ཡུལ་ཅན་མཚོན་པར་བཞེད་པ་ཡིན་པའི་ཕྱིར།