སྤྱིར་རྒྱལ་བའི་བཀའ་ཚད་མ་ལ་དགོངས་འགྲེལ་དུ་བྱས་པ།
༈ སྤྱིར་རྒྱལ་བའི་བཀའ་ཚད་མ་ལ་དགོངས་འགྲེལ་དུ་བྱས་པ་ནི། བསྟན་བཅོས་རྣམས་ཀྱི་མཚན་ཉིད་ཡིན་ཏེ། རྒྱུད་བླ་མ་ལས། གང་ཞིག་རྒྱལ་བའི་བསྟན་པ་འབའ་ཞིག་ལ། །དབང་བྱས་རྣམ་གཡེང་མེད་ཡིད་ཅན་གྱིས་
བཤད། །ཐར་པ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་བླངས། །ཞེས་པས། ས་ཐོབ་ཀྱི་བྱང་སེམས་རྒྱལ་པོ་དགེ་དབང་ལ་རྒྱལ་བ་ཉིད་ཀྱིས་རྗེས་སུ་གནང་བ་སྩལ་པའི་རྟོགས་བརྗོད་འདི་ཡང་། སངས་རྒྱས་ཀྱི་གསུང་རབ་རྣམས་ལ་ཁུངས་སུ་བྱས་པ་རྒྱན་གསུམ་གྱི་ལམ་དུ་དྲངས་ནས་བཀོད་པ་ལས། རང་བཟོ་བྱས་པ་མ་ཡིན་པའི་ཕྱིར། སྡེ་སྣོད་གསུམ་འདི་དང་འདི་ནས་འབྱུང་ངོ་ཞེས་སྨོས་པའི་དགོས་པ། མཐོང་བ་རྣམས་ལ་ཡིད་ཆེས་ཁུངས་བཙུན་གྱི་དད་པ་བསྐྱེད་པས་བསོད་ནམས་མཆོག་ཐོབ་པའི་རྒྱུར་འགྲོ། བཤད་པ་རྣམས་ལ་ཚིག་རིས་མི་མཐུན་པ་ཡོད་ཀྱང་། དོན་མི་འགལ་ཕྱིན་རྒྱལ་བའི་མཛད་པ་བསམ་གྱིས་མི་ཁྱབ་པ་འདི་ལྟ་བུའི་ཆོས་ལ་མངའ་བརྙེས་ཕྱིར། སོར་སྐྱེའི་རྟག་འཛིན་གྱི་བློས་དཔྱད་པར་མི་རིགས་པར་མ་ཟད། ཚིག་ལ་མི་རྟོན་དོན་ལ་རྟོན། གང་ཟག་ལ་མི་རྟོན་ཆོས་ལ་རྟོན། རྣམ་ཤེས་ལ་མི་རྟོན་ཡེ་ཤེས་ལ་རྟོན། དྲང་དོན་ལ་མི་རྟོན་ངེས་དོན་ལ་རྟོན་པས། རྟོན་པ་བཞི་ལྡན་གྱི་གནད་ལའང་མཁས་པར་བྱ་དགོས་སོ། །དེ་བཞིན་གཤེགས་པ་ཁྱེད་སྐུ་ཅི་འདྲ་དང་། །འཁོར་དང་སྐུ་ཚེའི་ཚད་དང་ཞིང་ཁམས་དང་། །ཁྱེད་ཀྱི་མཚན་མཆོག་བཟང་པོ་ཅི་འདྲ་བ། །དེ་འདྲ་ཁོ་ནར་བདག་ཀྱང་འགྱུར་བར་ཤོག །དེ་ལྟར་རྟོགས་བརྗོད་དཔག་བསམ་འཁྲི་ཤིང་གི་གཞུང་དོན་མདོར་བསྟན་ལེགས་
བཤད་དཔལ་གྱི་དུམ་བུ་ལས་འཕྲོས་པའི་གཏམ་དཔག་བསམ་ལྗོན་པའི་འབྲས་བུ་ཞེས་བྱ་བ་འདི་ནི། ས་ཡི་ཚངས་པ་ཆེན་པོ་རྒྱལ་བསྟན་ཡོངས་སུ་རྫོགས་པའི་བཤེས་གཉེན་ཐམས་ཅད་མཁྱེན་གཟིགས་བཀའ་དྲིན་འཁོར་མེད་༧སྡེ་དགེ་བླ་མ་ཁྲི་ཆེན་བྱམས་པ་ཀུན་དགའ་སངས་རྒྱས་བསྟན་པའི་རྒྱལ་མཚན་ནས་ཡང་བསྐྱར་གསུང་བསྐུལ་གནང་བ་གུས་པའི་ཡིད་ཀྱིས་མཆོད་དེ། རང་གི་གམ་དུ་རྒྱུན་བཅར་བསྐང་གསོ་བ་མང་ཐོས་ཆོས་ཀྱི་སྤྱན་ལྡན་ཀོང་པོ་བླ་རྒན་འགྱུར་མེད་གསང་སྔགས་ནས་དཔེ་འཚོལ་གྱི་གྲོགས་དན་དང་རང་སློབ་སྐྱེས་སྦྱངས་ཀྱི་བློ་གྲོས་ཅན་བཅུ་ཕྲག་རིགས་པར་སྨྲ་བ་སྒྲ་རབ་ཁྱུང་བླ་བསྟན་འཛིན་གཡུང་དྲུང་དང་། བློ་གསལ་རིགས་པར་སྨྲ་བ་འཇིགས་མེད་ཀུན་མཁྱེན་གཉིས་ནས་ཤོག་ཏུ་འབེབས་པའི་རྩོལ་བ་བཅས་སྨིན་གླིང་གྲྭ་པའི་ཐ་ཤལ་ཤཱཀྱའི་དགེ་སློང་འགྱུར་མེད་བསྟན་འཛིན་འཕེལ་རྒྱས་པས་རང་གནས་ཞེ་ཆེན་རི་ཁྲོད་དུ་གྲུབ་པར་བགྱིས་པ་སརྦ་མངྒ་ལཾ་ཛ་ཡ་ཏུ། དགེའོ། །དགེའོ། །དགེའོ།