སྒྲུབ་བསྙེན་ལས་སྦྱོར་རས་པ་གསལ་སྟོང་གིས་ཁ་བསྐང་བ།
ཟབ་ཆོས་བཀའ་འདུས་ཟུར་ཡིག་ལས༔ གསང་བདག་གདུག་པ་དམ་འདོགས་ཀྱི༔ སྒྲུབ་བསྙེན་ལས་སྦྱོར་ཟུར་དུ་གབ༔ ལས་ཅན་གཅིག་གིས་འདི་ན་སྤེལ༔ སྒྲུབ་པའི་གཞུང་བསྲང་བསྙེན་ཚར་དུས༔ སྒྲུབ་བསྙེན་ལས་སྦྱོར་འདི་ལ་འབུངས༔ གསང་བདག་རྣལ་འབྱོར་ཧེ་རུ་ཀས༔ གསལ་དག་བརྟན་གསུམ་གདེང་ལྡན་གཅེས༔ དེ་ནས་སྒྲུབ་པའི་བསྙེན་པ་ནི༔ ཧཱུྃ༔ བདག་ཉིད་རྡོ་རྗེ་གཏུམ་པོ་ཡི༔ ཐུགས་ཀར་པདྨ་ཉི་ཟླའི་སྟེང༔ ཡེ་ཤེས་སེམས་དཔའ་ཚོན་གང་བ༔ རྒྱན་མེད་བཻཌཱུར་མདོག་ལྟ་བུ༔ དེ་ཡི་ཐུགས་ཀར་ཉི་དཀྱིལ་ནི༔ སྲན་མ་ཕྱེད་པ་ཙམ་གྱི་སྟེང༔ སྲོག་ཡིག་སྤུས་བྲིས་ལྟ་བུར་གསལ༔ དེའི་མཐར་རྩ་བའི་སྔགས་ཀྱིས་བསྐོར༔ རྒྱལ་མཆོད་འགྲོ་བའི་སྡིག་སྒྲིབ་སྦྱངས༔ རྒྱལ་བསེན་གཟའ་ཀླུ་ས་བདག་སྡེ༔ མ་རུངས་ནག་ཕྱོགས་དམ་ལ་བཞག༔ མ་ཡེངས་མི་བསྒོམ་འཛབ་འདི་བགྲང༔ ཧཱུྃ་ཧཱུྃ་ཧཱུྃ༔ ཨོཾ་བཛྲ་པཱ་ཎི་ཙནྜ་མ་ཧཱ་རོ་ཥ་ཎ་ཧཱུྃ་ཕཊ༔ ཅེས་པ་མ་ཡེངས་གྲངས་འཁྱོལ་ན༔ ཚེ་འདིར་མི་མཐུན་གཡུལ་ལས་རྒྱལ༔ མཐར་ཐུག་གསང་བའི་བདག་པོ་ཡི༔ གསང་གསུམ་མི་ཟད་རྒྱན་འཁོར་ལ༔ དབང་འབྱོར་འབྲས་བུ་གཡུར་དུ་ཟ༔ ས་མ་ཡཱ༔ དེ་ནས་ལས་ལ་སྦྱོར་བ་ནི༔ ཧཱུྃ༔ བདག་ཉིད་གསང་བདག་རྡོ་རྗེ་འཛིན༔ རྒྱལ་ཀུན་མཐུ་བྱིན་གཅིག་བསྡུས་པའི༔ སྐུར་གསལ་ཐུགས་ཀར་པད་ཉིའི་སྟེང༔ ཧཱུྃ་མཐིང་ལས་ནི་འོད་ཟེར་འཕྲོས༔ ཁྲོ་མཚོན་མེ་དཔུང་ལྕགས་སྡིག་དང༔ བྱ་ཁྱུང་སྒྲོལ་བྱེད་རྣམ་པ་རུ༔ སྟེང་འོག་ཕྱོགས་མཚམས་ཀུན་ཏུ་ནི༔ ཆར་སྤྲིན་རླུང་གིས་གཏོར་བཞིན་ཁྱབ༔ བདག་ཅག་དཔོན་སློབ་བསྲུང་བྱ་ལ༔ བསམ་ངན་སྦྱོར་རྩུབ་སྦྱར་བའི་དུག༔ བན་སྔགས་བོན་གྱིས་བྲུབ་དང་མནན༔ བསྲེགས་འཕང་ཟོར་ལས་སྡེ་བརྒྱད་གཏད༔ གཟུགས་ཅན་གཟུགས་མེད་བྱད་མ་མཁན༔ མི་ཕྱུགས་སྲིད་ལ་འཚེ་བ་ཡི༔ དམ་སྲིའི་རིགས་གྱུར་གང་ཡང་རུང༔ མིང་གི་ལྷག་ཙམ་མེད་པ་རུ༔ བརླག་མཛད་མནན་གཏད་བཅིངས་པ་ཀུན༔ རྩྭ་སྦུར་མེར་འཕྲད་གྲོལ་བར་མཛོད༔ ཧཱུྃ་ཧཱུྃ་ཧཱུྃ༔ ཨོཾ་བཛྲ་པཱ་ཎི་ཙནྜ་མ་ཧཱ་རོ་ཥ་ཎ་ཧཱུྃ་ཕཊ༔ ཕ་རོལ་གྱི་སྣང་སྲིད་ལྷ་སྲིན་སྡེ་བརྒྱད་བན་སྔགས་བོན་གྱི་བྱད་མ་ལྷ་སྲུང་གིས་བདག་ཅག་དཔོན་སློབ་བསྲུང་བྱ་མི་ནོར་འཁོར་དང་བཅས་པའི་ལུས་ངག་ཡིད་གསུམ་བྲུབ་པ་དང་། བཅིངས་པ་དང་། མནན་གཏད་བྱད་དུ་བཅུག་པ་ཐམས་ཅད་ཕྱེ་ཕྱེ་ཁྲོལ་ཁྲོལ་མ་མ་རཀྵ་ཀུ་རུ་ཡེ་བྷྲུཾ་སྭཱཧཱ༔ ཞེས་པ་བརྒྱ་སྟོང་ཁྲི་འབུམ་གནད་དང་བསྟུན༔ མནན་གཏད་གང་ཡང་མི་གྲོལ་མེད༔ དགྲ་འདྲེ་བྱད་མས་འཚེ་མི་སྲིད༔ ཟབ་པའི་ཡང་ཟབ་མཐར་ཐུག་ཡིན༔ ཡེ་ཤེས་མཁའ་འགྲོའི་སྙིང་གི་ཁྲག༔ ཨ་ཙར་སྟངས་དཔྱལ་ཐུགས་བཅུད་ཆོས༔ མ་འོངས་འགྲོ་བའི་དོན་ཆེད་དུ༔ ཏཱ་རེ་མི་འགྱུར་དགའ་ཚལ་དུ༔ བྲག་དམར་མདའ་སྒྲོའི་དབྱིབས་རྫོངས་སུ༔ མི་ཤིགས་རྒྱས་བཏབ་
གཏེར་དུ་སྦས༔ དྲང་སྲོང་སྨུག་ནག་ལྷ་བཙན་ཟུང༔ སྲུང 
་མར་བསྒོས་ཤིང་གཉེར་དུ་གཏད༔ མ་འོངས་སུམ་ཅུ་ཁ་རལ་དུས༔ སྟངས་དཔྱལ་ཟུང་གི་སྲས་གཅིག་འབྱུང༔ བྷ་དྲའི་མཚན་ཅན་རིག་པ་འཛིན༔ སྐལ་ལྡན་དེ་དང་འཕྲད་པར་ཤོག༔ དམ་མེད་ལོག་ལྟ་ཅན་ལ་གསང་རྒྱ༔ དད་ལྡན་སྐྱེས་བུས་ལོངས་སུ་སྤྱོད་རྒྱ༔ ཕུན་སུམ་ཚོགས་པ་ལྔ་ཡི་རྒྱ༔ ཅེས་པ་འདིའང་ཡབ་རྗེ་རིན་པོ་ཆེ་བསམ་གཏན་ཡེ་ཤེས་གླིང་པས་ཏཱ་རེ་མི་འགྱུར་དགའ་ཚལ་ནས་གདན་དྲངས་པའི་བརྡ་ཡིག་ལ་སློབ་འབངས་སུ་གྱུར་པའི་རས་མིང་གསལ་སྟོང་གིས་དག་སྣང་རི་མོའི་ལམ་དུ་ཏཱ་རེ་མི་འགྱུར་ལྷུན་གྱིས་གྲུབ་པའི་དགའ་ཚལ་དུ་རྟེན་འབྲེལ་བཟང་པོས་མཚམས་སྦྱར་ནས་ཡིག་རིས་སུ་བཀོད་པས་འགྲོ་རྣམས་གསང་བདག་དཔའ་བོའི་གོ་འཕང་ཐོབ་པའི་རྒྱུར་གྱུར་ཅིག༔ སརྦ་མངྒ་ལམ་ཛ་ཡནྟུ༔