འཆི་བ་བརྟག་པ་ཞེས་བྱ་བ།
མརླསཱཅཏྲའངགྭཐ༔ རྒྱ་གར་སྐད་དུ༔ པེ་ཏི་ཏ་ཀི་ལ་སྱ་མི་ཤ་ནཱ་མ༔ བོད་སྐད་དུ༔ འཆི་བ་བརྟག་པ་ཞེས་བྱ་བ༔ བཅོམ་ལྡན་འདས་ཐུགས་རྗེ་ཆེན་པོ་ལ་ཕྱག་འཚལ་ལོ༔ གཉིས་མེད་སྟོན་པས་འགྲོ་ལ་ཕན་གདགས་ཕྱིར༔ མཆོག་གསང་རྒྱུད་ལས་མདོར་བསྡུས་རྣམ་བཤད་པ༔ དེ་ཡི་དོན་རྣམས་རིམ་པ་ཇི་ལྟ་བར༔ རྣམ་པར་ཕྱེ་ནས་བདག་གིས་བསྟན་པར་བྱ༔ སེམས་ཅན་ལུས་རྣམས་སྡུག་བསྔལ་བཞིས་བཅིངས་པས༔ ཐུགས་རྗེ་ཆེ་མཆོག་རྡོ་རྗེ་འཆང་ཆེན་གྱིས༔ འཆི་བའི་སྡུག་བསྔལ་ཉིད་ཀྱི་དུས་ཚོད་དང༔ རྒྱུད་དུ་བཀོད་པའི་ཚིག་དོན་རྒྱ་ཆེ་ཡང༔ འཆི་བ་དག་ནི་གཉིས་ཡིན་ཏེ༔ ༼གདོན་དང་ནད་ལ་སོགས་པ༔ ༽དུས་མ་ཡིན་པར་འཆི་བ་དང༔ འབྱུང་བ་ཟད་དེ་འཆི་བའོ༔ ཇི་ལྟར་གྱུར་ཀྱང་བརྟག་པ་འདིའོ༔ གང་གི་འཆི་བ་བརྟག་པའི་སྐྱེས་བུ་དེས༔ བླ་མ་དཀོན་མཆོག་ལ་ཚོགས་བསགས་པ་སྔོན་དུ་འགྲོ་བས་མཁའ་འགྲོ་དང་ཆོས་སྐྱོང་མཆོད་ལ༔ འཆི་བར་ངེས་པའི་དུས་བརྟག་པ་ལ་གསུམ་སྟེ༔ ཕྱི་ཕུང་པོ་ལ་བརྟག་པ་དང༔ ནང་རླུང་ལ་བརྟག་པ་དང༔ གསང་བ་རིག་པ་ལ་བརྟག་པའོ༔ དང་པོ་ལ་གཉིས་ཏེ༔ གཞན་གྱི་ཕུང་པོ་ལ་བརྟག་པ་དང༔ རང་གི་ཕུང་པོ་ལ་བརྟག་པའོ༔ དང་པོ་ལ་གཉིས་ཏེ༔ དབྱིབས་དང་ཁ་དོག་ལ་བརྟག་པ་དང༔ རྩ་དང་རླུང་ལ་བརྟག་པའོ༔ དང་པོ་ལ་གཉིས་ཏེ༔ ཚེའི་ཡན་ལག་ལ་བརྟག་པ་དང༔ དབང་པོ་ལ་བརྟག་པའོ༔ ཡན་ལག་ནི༔ སེན་མོའི་བཀྲག་ཤོར་ན་ཟླ་བ་དགུའི་ཉིན་ཕྱེད་ན་ནད་ཀྱིས་བཏབ་ན་འཆི་བའོ༔ མིག་གི་མཐའི་སྤྲིས་དཀར་པོ་ཡལ་ན་ཟླ་བ་ལྔ་ན་འཆི་འོ༔ (༥༤)ལྟག་པའི་བདུད་སྒོ་ནས་སྐྲ་ཚོམ་གཅིག་གྱེན་ལ་ལངས་ན་ཞག་ཉི་ཤུ་རྩ་གཅིག་ན་འཆིའོ༔ རྐང་པའི་ལོང་བུ་ཕྱིར་ལོག་ཏུ་འགྱུར་ན་ཟླ་བ་གཅིག་གི་འབྱུང་བ་ཟུག་པའི་དུས་སུ་འཆིའོ༔ སྐྱེས་བུ་ནད་ཀྱིས་བཏབ་པ་ལ་བརྟག་པ་ནི༔ སོ་རྣམས་ཀྱི་རྩ་བར་རྡུལ་དང་དྲེག་པ་ཆགས་ན་འབྱུང་བའི་བདུད་འདུས་པ་ཞེས་བྱ་སྟེ་ཞག་དགུ་ན་འཆིའོ༔ སྣ་ཞོམ་ན་རླུང་གི་སྒོ་འགག་པ་ཞེས་བྱ་སྟེ་ཞག་ལྔ་ན་འཆིའོ༔ རྟག་ཏུ་ཡན་ལག་བརྐྱངས་ན་འབྱུང་བའི་རི་སྙེག་པ་ཞེས་བྱ་སྟེ་ཞག་བདུན་ནའོ༔ ༼འབྱེད་འཛུམ་མེད་པར་༽མིག་འབྲུ་ཚུགས་སུ་བལྟ་ན་རླུང་ཡུལ་ལ་ཤོར་བ་ཞེས་བྱ་སྟེ་ཞག་གསུམ་ནའོ༔ མིག་གི་ཚིགས་འཁྲུལ་ཞིང་༼གློག་གློག་༽ཡུད་ཙམ་གྱེན་ལ་བལྟ་ན་ཆུའི་རྦ་ལོག་པ་ཞེས་བྱ་སྟེ་ཞག་བཅོ་ལྔ་ནའོ༔ འགྲམ་པའི་༼ཤ་ཤོར་༽གཤོང་བུ་བྱུང་ན་སའི་སྒང་རལ་པ་ཞེས་བྱ་སྟེ་ཞག་བཅུ་དགུའི་འབྱུང་བ་ཟུག་པའི་དུས་ན་འཆིའོ༔ དབུགས་ཡང་ཡང་རྒོད་ན་རླུང་གི་གྲངས་འདེབས་པ་ཞེས་བྱ་སྟེ་ཞག་དྲུག་ནའོ༔ སྣ་གཡས་གཡོན་དུ་ཡོ་ན་སྣའི་མན་ཇི་ཀ་ཆད་པ་ཞེས་བྱ་སྟེ་ཞག་བདུན་ནའོ༔ མིག་གི་མཆི་མ་མི་ཐུབ་པར་འཛག་ན་བར་ཆད་པ་ཞེས་བྱ་སྟེ་ཞག་ལྔ་ནའོ༔ འགྲམ་པ་གཡོན་གཤོང་བུར་སོང་ན་བར་ཤ་ཆད་པ་ཞེས་བྱ་སྟེ་ཞག་གཅིག་ནའོ༔ སྭོ་འཐམས་ན་འབྱུང་བའི་ལམ་ཆད་པ་ཞེས་བྱ་སྟེ་ཞག་གསུམ་གྱི་ཉི་མ་ཕྱེད་ནའོ༔ ལྕེ་ལ་སྔར་མེད་པའི་ཐིག་ལེ་ནག་པོ་བྱུང་ན་ཞག་གཉིས་ཀྱི་འབྱུང་བ་ཟུག་པའི་དུས་ནའོ༔ རྣ་བ་ལེབ་མོར་འབྱར་ན་རྣ་བའི་གནམ་འཐེན་ཆད་པ་ཞེས་བྱ་སྟེ་ནམ་ཕྱེད་ནའོ༔ བྲང་གི་ལྷན་སྣ་ཞོམ་ན་ཆུའི་རྐ་ཆད་པ་ཞེས་བྱ་སྟེ་ཟླ་བ་ཕྱེད་ཀྱི་བྱེར་བའི་དུས་ནའོ༔ རྩ་གཉིད་ལོག་མེད་ན་མེའི་ས་བོན་སྟོང་པ་ཞེས་བྱ་སྟེ་ཟླ་བ་ཕྱེད་ཀྱི་མེའི་དུས་ནའོ༔ དེ་དག་ནི་གཞན་ལ་བརྟག་པའོ༔ རྣལ་འབྱོར་པ་རང་གི་དོན་དུ་བརྟག་པ་ནི༔ སྔོན་དུ་བླ་མ་ལ་སོགས་ལ་ཚོགས་བསགས་པ་ལ་བྱའོ༔ དེ་ཡང་ནམ་མཁའི་ཁམས་སུ་ཚེའི་གཟུགས་བརྙན་ཡལ་ལམ་མ་ཡལ་བརྟག་པ༔ བར་སྣང་ཁམས་སུ་གནམ་ས་གཉིས་ཀྱི་འབྲེལ་ཐག་ཆད་དམ་མ་ཆད་བརྟག་པ༔ རི་རབ་ཀྱི་ལོགས་ལ་སེང་གེ་དཀར་མོའི་བབས་སམ་མ་(༥༥)འབབ་བརྟག་པ༔ རི་ཐང་མཚམས་སུ་ལྗོན་ཤིང་གི་སྐེད་པ་ཆག་གམ་མ་ཆག་བརྟག་པ༔ རྒྱ་མཚོའི་གཏིང་དུ་ཆུའི་སྤྲིས་མ་ཡལ་ལམ་མ་ཡལ་བརྟག་པ༔ སའི་གྲོང་ཁྱེར་དུ་དགེ་སྦྱོང་གི་དུད་པ་ཆད་དམ་མ་ཆད་བརྟག་པ༔ རི་རབ་ཀྱི་རྩེ་ལ་མི་འགྱུར་བའི་ཉི་མ་ནུབ་བམ་མ་ནུབ་བརྟག་པ༔ རི་རབ་ཀྱི་ཁོང་སེང་ན་མཁའ་འགྲོ་མའི་རང་སྒྲ་ཆད་དམ་མ་ཆད་བརྟག་པ༔ དཔག་བསམ་གྱི་ཤིང་ལ་འཆི་བདག་གི་བདུད་ལངས་སམ་མ་ལངས་བརྟག་པའོ༔ དང་པོ་ནི་ནམ་དྭངས་པའི་ཚེ་སྔ་དྲོའམ་ཕྱི་དྲོ་ལ་རང་གི་གྲིབ་མའི་སྙིང་ཁར་རྡོའམ་ཤིང་བཙུགས་ལ་མིག་གཏད་དེ་ལངས་ལ་དབྱུག་པའམ་ཕྲེང་བ་བཟུང་ནས༔ ཡན་ལག་བརྐྱངས་པའི་གྲིབ་མ་ལ་བལྟས་ནས་ནམ་མཁར་བལྟས་པས་གཟུགས་བརྙན་འཆར་ཏེ་ཡན་ལག་ཚང་ཞིང་གོས་གྱོན་པའི་ཁ་དོག་ཤར་ན་སྐྱོན་མེད་དོ༔ བར་ཆད་ལ་གསུམ་སྟེ༔ ཆད་ལྷག་ལས་འཆི་བའི་དུས་བཟུང་བ༔ ཁ་དོག་ལས་གདོན་ངོས་བཟུང་བ་དབྱིབས་ལ་བསླུ་བས་བཟློག་གམ་མི་ཟློག་ངོས་བཟུང་བའོ༔ དང་པོ་ནི་ལག་གི་ཕྱག་མཚན་མེད་ན་བརྟེན་པའི་ལྷ་དང་བྲལ་བས་ལོ་བདུན་ན་འཆིའོ༔ ལག་པ་གཡས་མེད་ན་ལོ་ལྔ་ནའོ༔ གཡོན་མེད་ན་གསུམ་ནའོ༔ རྐང་པ་གཡས་པའི་པུས་མོ་མན་ཆད་མེད་ན་ལོ་གཉིས་ནའོ༔ ཐམས་ཅད་མེད་ན་ཟླ་བ་བརྒྱད་ནའོ༔ རྐང་པ་གཡོན་མེད་ན་ལོ་གཅིག་ནའོ༔ མགོ་ཡི་གཡས་ཕྱེད་མེད་ན་ཟླ་བ་དགུ་ནའོ༔ གཡོན་མེད་ན་ཟླ་བ་བདུན་ནའོ༔ རྐེ་ཡན་ཆད་མེད་ན་ཟླ་བ་ལྔ་ནའོ༔ རྐེ་དང་བཅས་པ་མེད་ན་ཟླ་བ་གསུམ་ནའོ༔ རོ་སྟོད་མེད་ན་ཟླ་བ་གཉིས་ནའོ༔ སྨད་མེད་ན་ཟླ་བ་གཅིག་ནའོ༔ ལུས་ཕྱེད་ཚལ་གྱི་གཡས་མེད་ན་ཞག་ཉི་ཤུ་རྩ་དགུ་ནའོ༔ གཡོན་མེད་ན་ཞག་ཉི་ཤུ་རྩ་གཅིག་ནའོ༔ དབྱིབས་ལ་གྲུ་བཞིར་བྱུང་ན་བསླུ་བས་བཟློག་གོ༔ ཟླུམ་པོ་དང༔ ནར་མོ་དང༔ ཟླ་གམ་ཡང་དེ་བཞིན་ནོ༔ རོ་བསྟུམས་པ་ལྟ་བུ་དང༔ གྲུ་གསུམ་ནི་ཐུགས་རྗེ་ཆེན་པོས་ཀྱང་མི་བཟློག་གོ༔ ཁདོག་ནི༔ དཀར་པོ་ལས་དབུས་ནས་ཡལ་ན་ཀླུ་དང་རྒྱལ་པོས་ཟིན་པའོ༔ ནག་པོ་གཡས་ནས་ཡལ་ན་བདུད་དང་མ་མོའོ༔ དམར་པོ་གཡོན་ནས་ཡལ་ན་ཀླུ་བཙན་དང་(༥༦)རྒྱལ་འགོང་ངོ་༔ སྔོན་པོ་རྐང་པ་ནས་ཇེ་ཐུང་ཡལ་ན་ཀླུ་དང་མཚོ་སྨན་ནོ༔ ནག་བན་བུན་དུ་འདུག་ན་མ་མོ་དང་གཤིན་རྗེས་ཟིན་པའོ༔ སེར་བྲེང་བྲེང་ནི་ས་བདག་གོ༔ ཁྲ་ཁྱག་ཁྱུག་ནི་ཤི་འདྲེའོ༔ གནམ་ས་གཉིས་ཀྱི་འབྲེལ་ཐག་ལ་བརྟག་པ་ནི༔ ཉིན་ཕྱེད་དུས་སུ་ཁ་ལྷོར་བལྟས་ལ་གྲུ་མོ་པུས་མོའི་སྟེང་དུ་བཞག་ནས་ལག་ངར་གྱེན་ལ་བསྒྲེངས་པས་ཁ་ཚུར་སྨིན་ཕྲག་ཏུ་བཅངས་པ་ལ་མིག་ཟུར་མཉམ་པར་བལྟས་པས་ལག་ངར་ཤིན་ཏུ་ཕྲ་མོར་འོང་ངོ་༔ དེ་ཉིད་ཆད་ན་ཞག་བཅུ་དགུ་ན་འཆིའོ༔ རི་རབ་ཀྱི་སེངགེ་ཞོན་པའི་མི་ལ་བརྟག་པ་ནི༔ ཉི་ཤར་གྱི་ཤར་ཕྱོགས་སུ་ཆུའི་རྫིངས་ལྟེང་ཀ་ཡོད་པའི་ནུབ་ངོས་ཀྱི་གྱང་ངམ་རྩིག་ངོས་ལ་རང་གི་གྲིབ་མ་ཉིས་བརྩེགས་སུ་འོང་བའི་སྟེང་མ་མེད་ན་ཆུའི་མི་སྟོར་བ་ཞེས་བྱ་སྟེ་ཞག་བཅུ་དྲུག་གི་ཉིན་ཕྱེད་ན་འཆིའོ༔ རི་ཐང་མཚམས་སུ་ལྗོན་ཤིང་གི་རྐེད་པ་ལ་བརྟག་པ་ནི༔ རྩ་རྣམས་ལ་བརྟག་པ་སྟེ་འདིར་མ་བྲིས་སོ༔ རྒྱ་མཚོའི་གཏིང་དུ་ཆུའི་སྤྲིས་ལ་བརྟག་པ་ནི༔ མཚན་མོ་ཆང་མང་པོ་མ་འཐུངས༔ འཁྲིག་པ་མ་སྤྱད༔ གཏམ་མང་པོ་མ་སྨྲས་པའི་ནང་པར་ཉི་མ་རྩེ་ཤར་ལ་ཤར་དུ་བལྟས་ཏེ༔ འཁར་ཕོར་ལ་སོགས་པ་སྣོད་དཀར་ནག་རན་པར་རང་གི་ཆུ་ལ་བརྟག་པ་སྟེ་རླངས་པ་སྔོན་དམར་དུ་བྱུང་ན་ཟླ་བ་ཕྱེད་ན་འཆིའོ༔ ནག་པོ་ཧྲལ་ཧྲོལ་དུ་སོང་ན་ཞག་བཅུ་གཅིག་ནའོ༔ དམར་པོ་ཐིག་ལེ་ཅན་ནི་ཞག་དགུ་ནའོ༔ དེ་མ་ཡིན་པ་ནི་ཚེའི་དུས་མི་བྱེད་དོ༔ ཁ་དོག་ལས་གདོན་བརྟག་པ་ནི་སྔར་དང་འདྲའོ༔ སའི་གྲོང་ཁྱེར་དུ་དུ་བ་ལ་བརྟག་པ་ནི༔ ཉི་མ་རྩེ་ཤར་ན་དྲི་ཆེན་གྱི་རླངས་པ་མེད་ན་ཞག་དགུ་ནའོ༔ རི་རབ་ཀྱི་རྩེ་ནས་ཉི་མ་བརྟག་པ་ནི༔ མིག་གི་འོད་མེད་ན་ཞག་གསུམ་ནའོ༔ རི་རབ་ཀྱི་ཁོང་གསེང་གི་སྒྲ་ལ་བརྟག་པ་ནི༔ སེང་གེའི་ཉལ་ཐབས་ལས་རྣ་བ་ས་ལ་སྦྱར་བས་སྒྲ་འབྱུང་བ་སེམས་ཅན་འགུལ་བ་སྐད་ཤག་ཤག་གྲགས་ན་སྐྱོན་མེད༔ རླུང་གི་སྒྲ་བྱུང་ན་ཞག་བདུན་ནམ་བཅུ་གཅིག་ནའོ༔ སྐད་མེད་ན་ཞག་བཅུ་གཅིག་ནའོ༔ དཔག་བསམ་གྱི་ཤིང་ལ་བརྟག་པ་ནི༔ ལྟག་པའི་བདུད་སྒོ་ན་སྐྲ་ཚོམ་གཅིག་གྱེན་ལ་ལངས་ན་ཞག་བདུན་(༥༧)ནའོ༔ འདི་དག་ཕལ་གྱི་དབང་དུ་བྱས་པ་སྟེ་རྒས་པ་ལུས་ཟུངས་ཟད་པ་རྣམས་ལ་ངེས་པ་མེད་དོ༔ རྣལ་འབྱོར་པས་མོ་དང་དཔྱད་ལ་སོགས་པའི་རྟེན་འབྲེལ་ཐུན་མོང་བ་རྣམས་ཀྱི་སྤྲོས་པ་དང་བྲལ་བར་བྱ་བའི་ཕྱིར་རོ༔ འཆི་བ་བརྟག་པའི་གལ་མདོ་ཞེས་བྱ་བ་སློབ་དཔོན་ཆེན་པོ་འཇམ་དཔལ་བཤེས་གཉེན་གྱིས་མཛད་པ་རྫོགས་སོ༔
སངས་རྒྱས་ཀུན་གྱི་དགོངས་པ་ངེས་པའི་བཀའ༔ སྒྲ་ཚིག་རྟགས་སུ་བཀོད་པ་མ་ཡིན་པར༔ དོན་དམ་སྙིང་པོ་ངེས་པའི་བཀའ་གསང་འདི༔ འབྲས་བུ་ཡང་དག་ངེས་པའི་སྙིང་པོའོ༔ བདག་གི་བག་ཆགས་ཉིད་ཀྱི་ལུས་རྣམས་ནི༔ རི་རབ་ཉིད་ཀྱི་རྡུལ་གྱི་གྲངས་སྙེད་གཅིག་ནས་གཅིག་ཏུ་བླངས༔ ལུས་ཀྱི་ཐ་མ་དྭངས་སྙིགས་འབྱེད་པ་ནི༔ རྒྱ་གར་ནུབ་ཕྱོགས་རིམ་གཉིས་གྲོང་ཁྱེར་དུ༔ བྲམ་ཟེའི་རིགས་མཆོག་ལེགས་ལྡན་སྟོན་པ་དང༔ སྣང་བའི་སྒྲོན་མ་གཉིས་ཀྱི་བུར་སྐྱེས་ཏེ༔ ཤེས་རབ་དད་ལྡན་ཡི་གེའི་རིགས་རྣམས་དང༔ སྒྲ་ཚིག་ཀུན་མཁས་འཇམ་དཔལ་རྣོན་པོས་བཟུང༔ མཁས་པའི་བློ་ལྡན་སྙིང་ཐིག་དོན་རྙེད་ནས༔ གསང་ལུང་ཉིད་དུ་བརྟུལ་བཞུགས་སྤྱོད་པ་མཛད༔ འཇམ་དཔལ་ལུང་བསྟན་སྤྲུལ་པ་ཉིད་དང་མཇལ༔ ཡུན་གྱི་སྒྲིབ་པ་མ་སྦྱངས་གནས་སུ་དག༔ སངས་རྒྱས་སྤྲུལ་པས་དམ་པའི་དོན་དག་གི༔ བཀའ་གསང་སྙིང་པོ་ཐུགས་ཀྱི་དཀྱིལ་ནས་ཕྱུང༔ བདུད་རྩིའི་ཆུ་རྒྱུན་བདག་གི་སྙིང་ལ་བབས༔ མ་རིག་རང་དག་ཡེ་ཤེས་འོད་ཀྱིས་སྦྱངས༔ དཔེར་ན་ཉི་ཤར་མུན་པ་སངས་པ་བཞིན༔ འབུམ་ཚོའི་གྲངས་ལས་རྒྱས་བསྡུས་ཕྱེ་ནས་བསྟན༔ བདག་ནི་སྔོན་ནས་སྦྱངས་པའི་ལས་སད་དེ༔ ཇི་ལྟར་གནས་བཞིན་གོ་བའི་སེམས་བྱུང་ནས༔ བསྟན་པ་དམ་པའི་བདག་པོར་བདག་ཉིད་གྱུར༔ བདག་དང་མཇལ་ནས་བདུན་ཅུ་རྩ་ལྔ་ན༔ སྤྲུལ་པ་པོ་ནི་མི་སྣང་དབྱིངས་སུ་གཤེགས༔ ཚིག་གསུམ་གཏམ་གྱིས་འཁོར་བའི་ཞེན་ཐག་བཅད༔ དེ་ནས་བདག་གི་བློ་ལ་དགོངས་ཤར་བ༔ བསྟན་པ་དམ་པ་འདི་རྙེད་རབ་དྲིན་ཆེ༔ སྟོང་གསུམ་གང་བའི་རིན་ཆེན་རྙེད་(༥༨)གྱུར་ཀྱང༔ ཚེ་གཅིག་ཙམ་སྟེ་ཆུ་བོའི་རྒྱུན་འབབ་འདྲ༔ སྔ་མའི་སྤྱོད་ཡུལ་མིན་པར་ཕྱི་མའི་རྒྱུན་དང་ཕྲད༔ བསྟན་པ་ཉིད་ནི་ཡུན་གྱི་རྫས་དང་ནོར༔ དམ་པ་ཉིད་ཀྱི་དྲིན་ནི་གང་གིས་འཁོར་ཐབས་མེད༔ བདག་གི་ལུས་དང་ངག་དང་ཡན་ལག་ཐམས་ཅད་ནི༔ ལན་སྟོང་བར་དུ་ཉིད་ལ་མཆོད་ཕུལ་ཡང༔ དམ་པའི་བཀའ་དྲིན་རྡུལ་ཆ་ཙམ་མི་འཁོར༔ དེས་ན་དམ་པ་དྲི་མེད་མགོན་ལ་ལུས་སོགས་མཆོད༔ དེ་ལྟར་དམ་པའི་འོག་ཏུ་བདག་ལ་བསམ་ཤར་བ༔ སྐལ་ལྡན་སྙིང་གི་རིགས་མཆོག་གཅིག་མེད་པས༔ སུ་ལའང་མ་བསྟན་འཕངས་པའི་ཡིད་བཞིན་ནོར་མཆོག་འདི༔ སངས་རྒྱས་ཀུན་གྱི་བསྟན་པའི་བཙས་སུ་ནི༔ རྒྱ་ཡིས་བཏབ་སྟེ་སྦ་བར་བློར་ཤར་ནས༔ རྡོ་རྗེ་གདན་གྱི་འོག་ཏུ་སྦས་ནས་བཞག༔ ཕྱི་རབས་སྐལ་བ་ཅན་ལ་སྨོན་ལམ་བཏབ༔ དེ་ལྟར་སྦས་ནས་བདག་ནི་གང་དགར་སྤྱོད༔ འབྱུང་བའི་དྭངས་ཡལ་ཚེ་ཡི་ཐ་མ་ལ༔ རྒྱ་ནག་རིགས་མཆོག་སིང་ཧ་ཉིད་དང་ནི༔ དུར་ཁྲོད་ཆེན་པོ་བསིལ་བ་ཚལ་དུ་ཕྲད༔ སྔོན་གྱི་སྐལ་ལྡན་སྙིང་གི་བུ་གཅིག་པོ༔ བསྟན་པའི་ཡང་སྙིང་བུ་ཡི་བུ་ལ་གཏད༔ འདི་ཉིད་སྙིང་ལ་བརྣོགས་ཏེ་རྒྱས་ཐོབ་ལ༔ སྙིང་པོ་བྱང་ཆུབ་བར་དུ་ཁར་མི་དབྱུང༔ གལ་ཏེ་བསྟན་ཞིང་སྦྱིན་པའི་དུས་བྱུང་ན༔ སྙིང་དང་འདྲ་བ་གཅིག་ལས་མངས་པ་ན༔ མཧཱ་ཀཱ་ལ་ལེགས་ལྡན་ནག་པོ་ཡིས༔ ཚེ་ལ་བར་ཆད་གྱིས་ལ་སྙིང་ཁྲག་ཐང་ལ་སྐྱུགས༔ དེ་ཡི་ཕྱིར་ན་འདི་ཉིད་སྙིང་ལ་ཟུང༔ ང་ནི་འདི་ནས་འབྱུང་བ་རང་དེངས་འོག༔ སུམ་བརྒྱ་ཉི་ཤུ་ལྔ་འདས་ལོ་ཡི་འོག༔ རྒྱ་གར་ནུབ་ཕྱོགས་གསེར་གྱི་མེ་ཏོག་གླིང༔ བརྫུས་ནས་སྐྱེ་ཞིང་སྤྲུལ་པ་དེ་ཉིད་ཀྱིས༔ པད་མ་འབྱུང་གནས་ཨུ་རྒྱན་རྒྱལ་པོའི་རིགས༔ དད་བརྩོན་ལྡན་པ་དེ་དང་ཕྲད་ནས་ནི༔ གསང་སྔགས་སྒྲུབ་སྡེའི་དོན་རྣམས་ངེས་ཤེས་འགྱུར༔
དེ་ནས་ཡང་དག་སྙིང་པོའི་བསྟན་པ་འདི༔ རྣལ་འབྱོར་སྒྲུབ་ལ་བརྩོན་པའི་ཨཱརྱ་དེ་ཝ་ལ༔ དེ་ཉིད་སྣང་བར་གྱུར་ནས་དེ་ཡང་རང་དེངས་སུ༔ དུར་ཁྲོད་འཇགས་མའི་གླིང་དུ་དེ་ཉིད་གྲོལ༔ དེ་ལྟར་བདག་གིས་འདི་ཉིད་ཉམས་བླངས་པས༔ སྣང་བ་ཐམས་ཅད་ཟད་དེ་དེ་ཉིད་བསྒྱུར༔ མིག་གི་སྤྱོད་ཡུལ་འགྱུར་ཏེ་འབྱུང་བ་རང་ཟད་འདིའོ༔ (༥༩)སྒྲ་དང་དྲི་རོ་ཉིད་དང་སྒོ་ལྔའི་ཁ་དོག་དེངས༔ མངོན་ཤེས་ལྡན་ཞིང་འབྱུང་བའི་དགྲ་རྣམས་ཟད༔ ལུས་ལ་སངས་རྒྱས་རྣམས་ཀྱི་སྐུ་ཡི་ཡོན་ཏན་ཤར༔ སྣང་བ་རྣམས་ནི་ཟད་པའི་སར་སྐྱེལ་བས༔ དྲན་ཚོར་ཐམས་ཅད་མི་རྟོག་ཡེ་ཤེས་སོ༔ རྟོགས་པས་སངས་རྒྱས་དང་ནི་ཤེས་རབ་མཉམ༔ དེ་ཉིད་དཔེ་ཡི་ལུང་ལ་ཇི་ལྟར་སྣང་བ་བཞིན༔ བདག་གི་བློ་ལ་དེ་ཡི་སྤྱོད་ཡུལ་དུ༔ སྣང་བ་རྣམས་ནི་ཟབ་ཅིང་རྒྱ་ཆེའོ༔ དེ་ཡི་དོན་རྣམས་དྲིལ་བ་སིང་ཧ་ལ༔ གཏད་ཀྱིས་འབྱུང་བའི་དགྲ་དང་བྲལ་བར་གྱིས༔ སྙིང་ལ་ཕུར་ལ་ཡིད་ལ་རྣམ་པར་དཔྱོད༔ ཅེས་སློན་དཔོན་ཆེན་པོ་འཇམ་དཔལ་བཤེས་གཉེན་གྱིས་གསུངས་སོ༔ གཏད་པའི་རྒྱ་དང་བཅས་པ་རྫོགས་སོ༔