གསུམ་པ། གེགས་སེལ་གྱི་ལེའུ།
དེ་ལྟར་སྒྲུབ་པ་བྱེད་པ་ན་གེགས་སེལ་བ་ཤེས་དགོས་པས་ན། དེས་ན་ཐུན་མོང་དང་ཐུན་མོང་མ་ཡིན་པའོ། །དང་པོ་སྤྱིར་གྲགས་པ་དེ་འདི་སྐད་ཐོས་སོ། །སྙིང་རླུང་གི་གེགས་བསལ་བ་དང་། ཆགས་པའི་གེགས་བསལ་བ་དང་། ནོར་(༣༥)འགྲིབ་པའི་གེགས་བསལ་བའོ། །
དང་པོ་ནི། སྤྱིར་སྒོམ་པས་ཤེས་པ་འཕྲོ་ཞིང་རྒོད་པས་གཅིག་ཏུ་མི་ཚུགས་པ་སོགས་བྱུང་ན་སྙིང་གའི་པདྨ་ཅུང་ཟད་ཟླུམ་པ་ལ་དམིགས་པ་གཏད་པས་སེལ་ལོ། །དེས་མ་སེལ་ན་པདྨ་ཟླུམ་པའི་ནང་ན་འཁོར་ལོ་ཡོད་པའི་ཕྱི་ནས་ཁྲོ་བོ་གང་རུང་གི་སྔགས་ཀྱིས་དམིགས་ཏེ་བུམ་སྐུར་བསྡུས་པ་ལྟ་བུ་ལ་དམིགས་པ་གཏད་པས་སེལ་ལོ། །དེས་ཀྱང་མ་སེལ་ན་འཁོར་ལོ་མི་བསྒོམ་པར་སྙིང་གི་རྩེ་ཐུར་དུ་ལྟ་བ་ལ་སྙིང་ནང་དུ་བདུད་རྩིས་ཁེངས་པ་ལ་དམིགས་པ་གཏད་པས་སེལ་ལོ། །དེ་ནས་སྔ་མ་བཞིན་དུ་བསྒོམ་མོ། །
གཉིས་པ་ནི། དེ་ལྟར་བསྒོམས་པས་ཆགས་པའི་གེགས་བྱུང་ན་མེ་ཏོག་ལུག་རུ་དམར་པོའམ། སེར་པོ་བུད་མེད་ཀྱིས་མ་རེག་པ་གྲིབ་སྐམ་བྱས་པ་ལྔའམ་བདུན། དགུ་ཚུན་ཆད་ཆུར་གྲུབ་ཏུ་བཅུག་པའི་ཁུ་བ་ལྟོ་སྟོང་ལ་ལན་གསུམ་མམ་བདུན་བཏང་བས་སེལ་ལོ། །དེས་མ་སེལ་ན་བདུད་རྩི་གྲང་མོ་འཁོར་ལོ་ལས་བབས་པའི་ཆུས་ཁེངས་པར་བསམ། དེས་སེལ་ལོ། །
གསུམ་པ་ནི། དེའི་ཚེ་ནོར་འགྲིབ་པའི་རྟགས་བྱུང་ན། ཐུན་མཚམས་སུ་ནོར་རྒྱུན་མ་སེར་མོ་བུམ་པ་བསྣོལ་བའི་སྟེང་ན་བཞེངས་པ་དར་དང་རིན་པོ་ཆེས་བརྒྱན་ཅིང་། ཕྱག་གཡས་འབྲས་ཀྱི་སྙེ་མ་ཐུགས་ཀར་འཛིན་ཅིང་གཡོན་པས་བུམ་པ་པུས་མོའི་སྟེང་དུ་བརྐྱང་བ་རིན་པོ་ཆེས་གང་བ་འཛིན་པར་བསམ་ཞིང་གཏོར་མ་བཤམས་ལ། ༀ་ཨཱཿཧཱུྃ་གསུམ་གྱིས་བདུད་རྩིར་བསམ་ལ། ༀ་བ་སུ་དྷཱ་རི་བྃ་སྭཱ་ཧཱ། ཞེས་ལྔའམ་བདུན་གྱིས་ཕུལ་བས་མཉེས་པར་བསམ་ཞིང་། ཟས་ནོར་གྱི་དངོས་གྲུབ་སྩོལ་ཅིག །ཅེས་བརྗོད་པས་བར་ཆད་སེལ་ལོ། །དེས་མ་སེལ་ན་རང་ཉིད་ནོར་རྒྱུན་མར་བསམས་པའི་སྙིང་གར་དབྱངས་ཅན་མའི་འཁོར་ལོ་བསྒོམ། དེས་ཀྱང་མ་ཞི་ན་འཁོར་ལོ་ཡང་མི་བསྒོམ་པར་སྙིང་གར་བྃ་ༀ་བ་སུ་དྷཱ་རི་སྭཱ་ཧཱ་ཞེས་པས་བསྐོར་བ་ལ་དམིགས་པ་གཏད་པས་སེལ་ལོ། །
གཉིས་པ་ཐུན་མོང་མ་ཡིན་པའི་གེགས་སེལ་བ་ནི། བླ་མའི་མན་ངག་བརྒྱུད་པ་ལས་འོངས་ཏེ། དེ་ཡང་དང་པོ་ཉིད་ནས་སྒྲུབ་པའི་ཚེ་ཉི་མ་དྲོས་པ་ནས་ནམ་ལངས་པ་དང་ཐོ་རེངས་ཀྱི་བར་ཞི་བའི་དུས་ཏེ་སྙིང་གའི་འཁོར་ལོ་ལས་བདུད་རྩི་དཀར་པོ་དངུལ་ཆུའི་རང་བཞིན་དུ་བབས་པས་སྒྲིབ་པའི་དངོས་པོ་ཀུན་བསལ་བ་ལ་དམིགས་པ་གཏད་དེ་བསྒོམས་པས་གཏི་མུག་གི་སྐྱོན་དང་པོ་ཉིད་ནས་ཞི་བར་བྱ་བ་ཉིད་དོ། །འདི་ལྟར་སྒོམ་པ་མེད་ན་ཅི་ཙམ་བསྒྲུབས་ཀྱང་ཤེས་རབ་ཆེར་མི་འཕེལ་བར་སྔར་གྱི་ཤེས་རབ་ཅུང་ཟད་ཡོད་པའང་འགྲིབ་པར་འབྱུང་སྟེ་གེགས་འདི་བསལ་བ་ལ་མན་ངག་འདི་མཆོག་ཏུ་བཤད་དོ། །ཉི་མ་དྲོས་ཆེན་ནས་གུང་སྨད་ཀྱི་བར་རྒྱས་པའི་དུས་དེར་རང་གི་འོད་ཟེར་སེར་པོ་འཕྲོས། འཇིག་རྟེན་གྱི་ཟས་ནོར་བསྡུས་རང་གི་སྒྲུབ་ཁང་ཁེངས་གཟི་བརྗིད་ཀྱིས་ལུས་ཀྱི་ནང་ཁེངས་པ་ལ་སེམས་བཟུང་བས་ནོར་འགྲིབ་པའི་སྐྱོན་གཏན་མི་འབྱུང་ངོ་། །ཉི་མ་གུང་སྨད་ནས་ནུབ་ཀྱི་བར་དབང་གི་དུས་ཏེ་རང་གི་འཁོར་ལོའི་འོད་ཟེར་དམར་པོ་ལས་བདུད་རྩི་དམར་པོ་བབས་པས་རང་གི་ཉོན་མོངས་པ་ཐམས་ཅད་བསྲེགས་ཤིང་བཤལ་ཏེ་ཉོན་མོངས་པ་ཐམས་ཅད་དང་བྲལ་བར་བསམས་ལ་སེམས་(༣༦)བཟློག །ཉི་མ་ནུབ་ནས་གུང་གི་བར་དྲག་པོའི་དུས་སུ་རང་གི་འཁོར་ལོ་ལས་བདུད་རྩི་སྔོན་པོ་བབས་པས་ལུས་ཁེངས། སྙིང་རླུང་ལ་སོགས་པའི་སྐྱོན་བསལ་ཞིང་སྙིང་ནང་བདུད་རྩིས་ཁེངས་ཏེ་ཆོས་ཐམས་ཅད་མངོན་སུམ་དུ་ཤེས་པའི་ཤེས་རབ་ཀྱིས་ལུས་ངག་ཡིད་གསུམ་རྒྱས་པར་བསམ་པས་སྐྱོན་གང་ཡང་མི་འབྱུང་བ་ཡིན་ནོ། །མན་ངག་འདི་ནི་བླ་མ་ལས་བརྒྱུད་པ་མ་ཉམས་ཤིང་རང་གི་ཉམས་སུ་རྟོགས་པའི་སྟོབས་ཀྱིས། ཤིན་ཏུ་བརྗོད་པར་ཕོངས་ན་ཡང་བློ་དམན་པ་དག་ལ་ཕན་པའི་ཕྱིར་གབ་པ་རྣམས་མངོན་དུ་ཕྱུངས་ནས་ཕྱིན་ཅི་མ་ལོག་པར་བཀོད་པ་ཡིན་ནོ། །གཞན་སྣོད་མིན་རྣམས་ལ་སྦས་ཏེ་བསྟན་པའི་གནས་མེད་པས་སྙིང་གི་གཏེར་དུ་སྦོས་ཤིག །ས་མ་ཡ་ཞེས་གདམས་པའོ། །གེགས་སེལ་གྱི་ལེའུ་སྟེ་གསུམ་པའོ།། །།