ཟབ་ལམ་བདེ་གཤེགས་ཀུན་འདུས་ཀྱི་ཡན་ལག་གི་རྫོགས་རིམ་དུམ་དུམ་ཁྲིགས་ཀྱི་སྐོར་ལས་ཨ་ཏིའི་ལམ་རིམ་སྙིང་པོའི་དོན་མཆན་བུས་བཀྲལ་བ། ལོ་ཆེན་དྷརྨ་ཤྲཱི།
ཟབ་ལམ་བདེ་གཤེགས་ཀུན་འདུས་ཀྱི་ཡན་ལག་གི་རྫོགས་རིམ་དུམ་དུམ་ཁྲིགས་ཀྱི་སྐོར་ལས་ཨ་ཏིའི་ལམ་རིམ་སྙིང་པོའི་དོན་མཆན་བུས་བཀྲལ་བ་བཞུགས་སོ། །ལོ་ཆེན་དྷརྨ་ཤྲཱི། ༀ་སྭ་སྟི། མི་འགྱུར༵་རང་བྱུང་ཡེ་ཤེས་ཆེ། །རྒྱ་ཆད་ཕྱོགས་ལྷུང་མེད༵་པའི་དབྱིངས། །ཀུན་རྫོགས་རྡོ༵་རྗེ༵་རྩེ་མོའི་དོན། །འཆང་ཕྱིར་དཔལ་ལྡན་བླ་མར་འདུད། །འདིར་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་ཟབ་དོན་ཐུགས་ཀྱི་རྫོགས་རིམ་ཨ་ཏིའི་ལམ་རིམ་སྙིང་པོའི་དོན་རགས་ཙམ་མཆན་བུས་གསལ་བར་བྱ་བ་ལ་གསུམ་སྟེ། ཀླད་དང་། གཞུང་དང་། མཇུག་གི་དོན་ནོ། །དང་པོ་ཀླད་དོན་ཕྱག་ནི། ཨེ་མ་ཧོ༔ ཞེས་ངོ་མཚར་བའོ། །གང་མཚར་ན། མཆོག་ཏུ་མི་འགྱུར་བའི་བདེ་བ་ཆེན་པོ་རང་བྱུང་གི་ཡེ་ཤེས་གཅིག་ཉིད་རོལ་པ་ཅིར་ཡང་བསྒྱུར་བས་གར་གྱི་བདག་པོ་སྟེ་རང་རིག་པའི་ཡེ་ཤེས་ཉིད་དོ། །དེ་ལ་སློབ་དཔོན་ཆེན་པོ་ལ་ཕྱག་འཚལ་ལོ༔ ཞེས་ལྟ་བ་མཇལ་བའི་ཕྱག་འཚལ་མཛད་དོ། །གཉིས་པ་གཞུང་གི་དོན་ལ་བཞི་སྟེ། རང་བཞིན་གཞིའི་གནས་ལུགས། དེ་ལས་ཇི་ལྟར་འཁྲུལ་ཚུལ། འཁྲུལ་པ་གྲོལ་བར་བྱེད་པའི་ལམ། འབྲས་བུ་གྲོལ་ས་བསྟན་པའོ། །དང་པོ་ནི། འཁོར་བ་དང་མྱང་འདས་ཀྱི་ཆོས་མ་ལུས་པ་ཐམས་ཅད་ཀྱི་གདོད་མའི་སྤྱི་གཞི་གནས་ལུགས་རང་བཞིན་གྱིས་རྣམ་པར་དག་པ་བདེ་གཤེགས་སྙིང་པོའི་དབྱིངས་ངོ་བོ་ཀ་དག་རང་བཞིན་ལྷུན་གྲུབ་ཐུགས་རྗེ་ཀུན་ཁྱབ་ཀྱི་ཡེ་ཤེས་གསུམ་འདྲིལ་བའི་ཆོས་ཉིད་ལ་སྐུ་གསུམ་ཡེ་
ནས་རང་ཆས་སུ་བཞུགས་པ་སྟེ། ཆོས་ཀུན་གང་དུའང་རྒྱ་མ་ཆད་ཅིང་ཕྱོགས་སུ་མ་ལྷུངས་པས་གང་ཡང་ཡིན་པ་མིན་པའི་རིག་པ་འདུ་འབྲལ་མེད་པ་ལུ་གུ་རྒྱུད་ཀྱིས་ནི། ཆོས་ཉིད་སྟོང་པ་ཉིད་ཀྱི་ཡུལ་ལ་ཀུན་ཁྱབ་རིས་མེད་ཀྱི་དབྱིངས་བརྡལ་བས། སྟོང་གསལ་རིག་པའི་ཡེ་ཤེས་ཀྱི་རང་བཞིན་གདོད་ནས་འཕོ་འགྱུར་མེད་པའི་བདག་ཉིད་དོ། །དེ་ལྟར་ཡང་དུང་ཡིག་ཅན་ལས། གཞི་རྒྱུད་དངོས་པོའི་གནས་ལུགས་ཏེ། །དེ་ཡི་ངོ་བོ་རང་བཞིན་སྟོང་། །སངས་རྒྱས་ཐམས་ཅད་སྐྱེད་པའི་ཡུམ། །དབྱེ་བ་རྣམ་པ་གསུམ་ཡིན་ཏེ། །ངོ་བོ་རང་བཞིན་ཐུགས་རྗེའོ། །ཞེས་དང་། ཐུགས་ཐིག་ལས། གཞི་གནས་རིག་པ་ངོ་བོ་རང་བཞིན་དང་། །ཐུགས་རྗེ་གསུམ་སྟེ་རྒྱལ་བའི་སྙིང་པོ་ལ། །སྐུ་གསུམ་རང་ཆས་བཞུགས་པར་བཤད་པ་ཡིན།། ཞེས་སོ། །གཉིས་པ་དེ་ལས་ཇི་ལྟར་འཁྲུལ་ཚུལ་ནི། གཞི་དེའི་ངང་ལས་དབྱིངས་སྣང་ཤར་བ་རང་སྣང་དུ་མ་ཤེས་པའི་སྐད་ཅིག་ལ་གཞན་དུ་འཛིན་པའི་སེམས། དཔེར་ན་མཁའ་ལ་སྤྲིན་བཞིན་གློ་བུར་དུ་སྣང་བས་འཁྲུལ་པའོ། །ཇི་ལྟར་ཞེ་ན་འགྱུ་བ་རླུང་གིས་ང་བདག་བྱས་པས་འོད་ལྔ་ལས་ཡུལ་དང་ལུས། རིག་པ་ལས་སེམས་ཀྱི་འཁྲུལ་གཞིར་གྱུར་ནས། ཐིག་ལེའི་དབྱིབས་དང་ཞི་ཁྲོའི་གཟུགས་ཉིད་རང་སྣང་དུ་མ་རིག་པས་དབྱིབས་ལས་སྣོད་དང་གཟུགས་ལས་བཅུད་དེ་བག་ཆགས་རང་གར་འཐས་པའི་ལས་སྣང་ཡུལ་དང་བཅས་པ་ཤར་བའོ། །དེ་ལྟར་འཁྲུལ་དུས་ནའང་སེམས་ཅན་ཀུན་ལ་གདོད་མའི་འོད་གསལ་སྙིང་པོ་ཡེ་ཤེས་གསུམ་ལྡན་སྒྲོན་རིག་ལུག་རྒྱུད་དང་བཅས་པ་ཉིད་འདུ་འབྲལ་མེད་པར་བཞུགས་སོ། །གསུམ་པ་འཁྲུལ་པ་གྲོལ་བར་བྱེད་པའི་ལམ་བཤད་པ་ལ་གསུམ་སྟེ། བགྲོད་པ་གཅིག་པའི་ལམ་ངོས་བཟུང་། དེས་འཁྲུལ་པ་ཇི་ལྟར་གྲོལ་ཚུལ་རྒྱས་པར་བཤད། དེ་ལ་བརྩོན་པས་ཉམས་སུ་བླང་བར་གདམས་པའོ། །དང་པོ་ནི། ལས་སྣང་གི་སྣོད་བཅུད་དེ་ཉིད་སྐུ་དང་ཡེ་ཤེས་སུ་གྲོལ་པར་བྱེད་པའི་ཐབས་སྤྱིར་རྫོགས་པའི་སངས་རྒྱས་ཀྱིས་གདུལ་བྱའི་བློ་ཡི་རིམ་པ་ཆེ་ཆུང་གིས་ཐེག་པའི་རིམ་པའང་མཐོ་དམན་བསམ་ཡས་པ་གསུངས་ཀྱང་། དེ་ཐམས་
ཅད་ཨ་ཏིའི་ཡོ་གའི་ཁང་བཟང་དུ་འཇུག་པའི་སྒོ་སྟེ་དེར་བགྲོད་པའི་ཐེམ་སྐས་བཞིན་འདིའི་ལམ་སྟེགས་སུ་གྱུར་པས་མཐར་ཐུག་གདོད་མའི་ཡེ་ཤེས་གང་རྟོགས་ནས་འབྲས་བུ་ཐོབ་པའི་ཐབས་བགྲོད་པ་གཅིག་ཏུ་གྲུབ་པས་གཏན་ལ་ཕེབས་པའི་ལམ་རྨད་དུ་བྱུང་བ་ནི་ཐེག་ཀུན་རྩེ་མོ་རྫོགས་པ་ཆེན་པོ་ཨ་ཏི་ཡོ་ག་ལྷུན་གྱིས་གྲུབ་པའི་ཐེག་པ་འདི་ཉིད་དོ། །གཉིས་པ་དེས་འཁྲུལ་པ་གྲོལ་ཚུལ་རྒྱས་པར་བཤད་པ་ནི། སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ་ཨ་ཏི་ཡོ་ག་ཡིན་པ་དེའི་ཕྱིར་འདི་ཉམས་སུ་བླང་བ་ལ་གཉིས་ཏེ༑ སྔོན་འགྲོ་དང་། དངོས་གཞིའོ། །དང་པོ་ལའང་ཐུན་མོང་དང་ཐུན་མོང་མ་ཡིན་པ་གཉིས་ལས། དང་པོ་ཐུན་མོང་པ་ནི་འཁྲུལ་པའི་སྣང་བ་འཁོར་བའི་མངོན་ཞེན་གྱི་རྡོས་ཐག་ཚེ་འདིའི་སྤྱོད་ཡུལ་ལ་ཆགས་པ་དང་། སྲིད་པའི་བདེ་བ་ལ་ཆགས་པ་གཉིས་མི་རྟག་པ་དང་འཁོར་བའི་སྡུག་བསྔལ་བསམ་པའི་སྐྱོ་ཤས་ཀྱིས་བཅད་པའི་ངེས་འབྱུང་གིས་བསྐུལ་ཏེ་ཐར་པ་ལ་ཡིད་ཕྱོགས་པར་བྱས་ནས། སྐྱབས་སེམས་བསགས་སྦྱངས་ཀྱི་རིམ་པས་རྒྱུད་སྦྱོང་བར་བྱའོ། །གཉིས་པ་ཐུན་མིན་སྒོ་གསུམ་གྱི་སྔོན་འགྲོ་ནི། ཐལ་འགྱུར་ལས། ལུས་ཀྱི་སྔོན་དུ་འགྲོ་བ་ནི། །རྡོ་རྗེ་སྐྱིལ་ཀྲུང་རབ་བཅས་ཏེ། །ལུས་སྦྱངས་སེམས་ལ་ཕན་པའོ། །ཞེས་པས་ལུས་ཀྱི་སྔོན་འགྲོ་རྡོ་རྗེའི་འདུག་སྟངས་ལ་བསླབ་པ། ངག་ནི་ཧཱུྃ་ཞེས་གནས་པ་ལ། །རྒྱས་གདབ་པ་དང་རྩལ་སྦྱང་པ། །མཉེན་བཙལ་ལམ་དུ་ཞུགས་པ་ཡིས། །ངག་སྦྱངས་སེམས་ལ་ཕན་པ་ཡིན། །ཞེས་པས་ངག་གི་སྔོན་འགྲོར་ཕྱི་སྣང་བ་དང་ནང་ཕུང་པོ་གཉིས་ལ་རྒྱས་གདབ་པ་དང་རྩལ་སྦྱོང་བ་གཉིས་གཉིས་དང་། མཉེན་བཙལ་ཞིང་ལམ་དུ་འཇུག་པ་སྟེ་དྲུག །སེམས་ནི་དང་པོ་བྱུང་ས་དང་། །བར་དུ་གནས་དང་ཐ་མར་འགྲོ། །དེ་ལྟར་གསུམ་ལ་བརྟག་དཔྱད་པས། །སེམས་སྦྱངས་སེམས་ཀྱི་གནས་ལུགས་ཤེས། །ཞེས་པས་ཡིད་ཀྱི་སྔོན་འགྲོར་སེམས་བྱུང་གནས་འགྲོ་གསུམ་ལ་བརྟག་པ་སྟེ། དེ་ལྟར་སྒོ་གསུམ་གྱི་སྔོན་འགྲོ་འབྱོངས་པར་བྱའོ། །གཉིས་པ་དངོས་གཞི་ནི། མུ་ཏིག་འཕྲེང་བ་ལས། ཉམས་བླངས་ཁྲེགས་གཅོད་ཐོད་
རྒལ་ལོ། །ཞེས་པ་ལྟར་གཉིས་ལས། དང་པོ་ཀ་དག་གི་གནས་ལུགས་སྟོན་པ་ཁྲེགས་གཅོད་ཀྱི་ལམ་ནི། བྱུང་གནས་འགྲོ་གསུམ་གྱིས་མཐའ་བདས་པས་ཅི་ཡང་མ་བརྙེས་པར་རྗེན་སང་ངེ་སོང་དུས་གནས་ཆ་དེ་བཞག་ནས། རིག་ཆ་རྗེན་སང་ངེ་བའི་ཟང་ཀ་དེ་ངོས་བཟུང་སྟེ་བསྐྱངས་པའི་གནད་ཀྱིས། སེམས་གཞི་མེད་རྩ་བྲལ་ཀ་དག་ཏུ་གཏན་ལ་ཕབ་ནས། སྣང་སེམས་ཐམས་ཅད་ཡེ་གྲོལ་སོར་བཞག་ཆེན་པོ་ཁྲེགས་གཅོད་ཀྱིས་ཉམས་སུ་ལེན་པ་སྟེ། དེ་ཡང་ད་ལྟར་གྱི་རིག་པ་དྲན་བསམ་བཅོས་བསླད་དང་བྲལ་བའི་ཝལ་ལེ་སང་ངེ་ཆམས་བརྡལ་བ་ཉིད་ཆོས་སྐུ་ཀ་དག་གི་དགོངས་པ་རང་བྱུང་གི་ཡེ་ཤེས་སུ་ངོ་སྤྲོད་པ་ནི་ངོ་རང་ཐོག་ཏུ་སྤྲད་པ་ཞེས་བྱའོ། །སྔ་ཕྱི་དྲན་རྟོག་མེད་པའི་ད་ལྟར་གྱི་རིག་པ་སོ་མ་བཞི་ཆ་གསུམ་བྲལ་གྱི་ངང་ལ་རིག་གེ སང་ངེ་། ཡེ་རེ། ཝལ་ལེ་བསྐྱང་པ་ནི་ཐག་གཅིག་ཐོག་ཏུ་གཅོད་པ་ཞེས་བྱའོ། །རང་ཤར་རང་གྲོལ་རྦ་རླབས་ཆུར་ཐིམ་པ་ལྟར་དྲན་རྟོག་རྗེས་མེད་བྱུང་ཚོར་གཞིར་ཐིམ་པ་ནི་གདེང་གྲོལ་ཐོག་ཏུ་བཅའ་བ་ཞེས་བྱའོ། །གསང་བ་སྒྲ་རྒྱུད་ལས། སྔ་ཕྱི་དྲན་རྟོག་མེད་པ་ཡི། །རིག་གེ་སང་ངེ་སལ་ལེ་བ། །ད་ལྟའི་ཤེས་པ་འདི་ཉིད་ལས། །ཆོས་སྐུ་བཞི་ལྡན་ངོས་བཟུང་ངོ་། །ཞེས་དང་། རང་གིས་གྲོལ་བས་གཉེན་པོ་མེད། །ཅེར་གྱིས་གྲོལ་བས་རང་སར་ཡལ། །ཞེས་སོ། །དེ་ལྟར་གཏན་ལ་ཕབ་པའི་དོན་དེ་ལ་རྫོགས་པ་ཆེན་པོ་མན་ངག་སྡེའི་གནད་ཐམས་ཅད་འདུས་པར་བསྟན་པ་ནི། འདི་ལྟར་མན་ངག་གི་སྡེ་ལ་རྫོགས་པའི་སངས་རྒྱས་ཀྱིས་ཚུལ་གསུམ་དུ་བསྡུས་ནས་གསུངས་པ་སྟེ། ཚིག་གཅིག་ཉམས་སུ་ལེན་པའི་མན་ངག་ངོ་བོ་བློ་བྲལ་མ་འཁྲུལ་བ་ཁ་གཏམ་གྱི་ཚུལ་དུ་གསུངས་པ་དང་། རྒྱུད་ལུང་དང་འབྲེལ་བ་ངོ་བོ་བྱ་བྱེད་བློ་འདས་ལམ་དུ་བྱེད་པ་ཁ་འཐོར་གྱི་ཚུལ་དུ་གསུངས་པ་དང་། རྒྱུད་ནས་བྱུང་བའི་ཚིག་བཀའ་ཐམས་ཅད་ཀྱི་འབྱུང་ཁུངས་སུ་གསལ་ཞིང་ཁྱད་པར་ཆོས་ཉིད་ཀྱིས་བཅད་པ་རྒྱུད་རང་གཞུང་གི་ཚུལ་དུ་གསུངས་པ་དང་གསུམ་གྱི་དོན་ནི། འདིར་བྱུང་ས་དང་བྱུང་མཁན་མེད་པའི་སེམས་ཉིད་གཞི་མེད་རྩ་བྲལ་ངོས་བཟུང་དང་བྲལ་བའི་ངང་དུ་ཅོག་བཞག་བཅོས་བསླད་མེད་པར་བལྟ་བ་ལ་འདུས་པས་དེ་ལྟར་ལྟོས་ཤིག་ཅེས་གདམས་སོ།།
རྒྱུད་རང་གཞུང་དེ་ལ་དབྱེ་ན། ཆོས་ཉིད་ཀྱི་གཤིས་བསྟན་པས་འཁོར་འདས་ཀྱི་མཚམས་ཕྱེད་པ་སྟར་ཀ་གེགས་སེལ་གྱི་ཚུལ་དུ་གསུངས་པ་དང་། སྤྲོས་མེད་གཞི་ལ་ཁྱབ་པས་ལས་བཟང་ངན་ལ་མ་ལྟོས་པར་ཁམས་གསུམ་ཡོངས་གྲོལ་དུ་ཤར་བ་ལྟ་བ་སྒང་དྲིལ་གྱི་ཚུལ་དུ་གསུངས་པ་དང་། ཐོབ་ཏུ་མེད་པས་རེ་བ་གང་ལའང་གདེང་མི་འཆའ་བ་གབ་པ་མངོན་ཕྱུང་གི་ཚུལ་དུ་གསུངས་པ་དང་། སྒྲ་ཚིག་ལས་འདས་པས་གྲུབ་པའི་མཐའ་ལ་མི་གནས་པ་བཤད་པ་རང་གསལ་གྱི་ཚུལ་དུ་གསུངས་པ་དང་བཞིའི་དོན་ནི། འདིར་སེམས་ལ་གནས་པ་དང་གནས་མཁན་མེད་པའི་རྟེན་མེད་གནས་བྲལ་ངོས་བཟུང་དང་བྲལ་བའི་ངང་ལ་བསལ་བཞག་མེད་པར་འཇོག་པ་ལ་འདུས་པས་དེ་ལྟར་ཞོག་ཅིག་ཅེས་གདམས་སོ། །བཤད་པ་རང་གསལ་དེ་ལ་དབྱེ་ན། འཁྲུལ་པ་གཞི་ལ་བཟློག་པ་མན་ངག་སྡེའི་ཚུལ་དུ་གསུངས་པ་དང་། འཁྲུལ་པ་བ་དེད་ཀྱི་ལུགས་དམིགས་སྡེའི་ཚུལ་དུ་གསུངས་པ་དང་། ཉག་གཅིག་སྤྲོས་དང་བྲལ་བས་དུ་མ་ཆ་ཤས་མེད་པ་ཐིག་ལེ་རང་གནད་ལ་ཕེབས་པ་མན་ངག་སྡེའི་ཚུལ་དུ་གསུངས་པ་དང་གསུམ་གྱི་དོན་ནི། འདིར་འགྲོ་ས་དང་འགྲོ་མཁན་མེད་པའི་སེམས་ཉིད་རིག་སྟོང་རྗེས་མེད་ཀྱི་ངང་ལ་ཧར་སང་ངེ་སྐྱེལ་བ་ལ་འདུས་པས་དེ་ལྟར་སྐྱོལ་ཅིག་ཅེས་གདམས་སོ། །ཐིག་ལེ་རང་གནད་དེ་ལ་དབྱེ་ན། ཕྱི་སྐོར་ཐ་སྙད་རྒྱ་ཆེར་སྟོན་པ་ལུས་ལྟ་བུ། ནང་སྐོར་མཐོང་བ་བརྡའི་ཆོས་མིག་དང་འདྲ་བ། གསང་སྐོར་དྲན་བྱེད་གཟུངས་ཀྱི་ཆོས་སྙིང་དང་འདྲ་བ། ཡང་གསང་བླ་ན་མེད་པ་ལུས་ཀུན་རྫོགས་པའི་སྐྱེས་བུ་ལྟ་བུར་སྟོན་པ་དང་བཞི་ཡིན་ལ། དེ་དག་གི་དོན་ཡང་འདིར་རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ལས། རིག་པ་གཞི་ནས་འཕགས་ཏེ་ལམ་དུ་འཇུག་པ་ངོ་ཤེས་པར་བྱ་བའི་ཆེད་དུ་དཔེ་དོན་གྱི་ངོ་སྤྲོད་ལ་སོགས་ཏེ་ངོ་སྤྲོད་ཉི་ཤུ་རྩ་གཅིག་ཤེས་པར་བྱའོ། །ཞེས་པ་ལྟར་གསང་བ་བླ་ན་མེད་པའི་དཔེའི་ངོ་སྤྲོད་བདུན་ཚན་གསུམ་སྟེ་ཉི་ཤུ་རྩ་གཅིག་དང་ཨ་གཏད་དང་ཉི་ཟླའི་རྟགས་ཀྱིས་རིག་པ་རྡོ་རྗེ་ལུ་གུ་རྒྱུད་ངོས་གཟུང་བར་བྱ་བ་དང་། འབྱུང་བ་གནད་འབྱེད་དང་ཐི་བྱ་ཚང་འཇུག་དང་དུས་བཞི་མཉམ་སྦྱོར་ལ་སོགས་པའི་མན་ངག་ཕྱི་འཁྲུལ་གཞི་རྩིས་ཀྱི་སྐོར་
དང་། རྒྱུད་བཅུ་བདུན་སོགས་རྒྱུད་དང་དེ་དག་གི་མན་ངག་གཞུང་ཡིག་སྣ་ལ་སོགས་པ་ནང་བཤད་ཏིག་སྤྲོས་པའི་སྐོར་དང་། བཟོ་ཡིག་སོགས་སྣ་ཚོགས་ཐབས་ཀྱི་སྐོར་དང་། སྒོམ་པ་ལམ་གྱི་སྐོར་སྨིན་གྲོལ་གཉིས་ཀྱི་སྒོ་ནས་གཏན་ལ་དབབ་པར་བྱ་བ་ཡིན་ཞིང་། འདི་དག་གིས་ནི། ཀ་དག་དང་ལྷུན་གྲུབ་གཉིས་ཀའི་དོན་ཅི་རིགས་སུ་སྟོན་པས་ན་བར་གྱི་གསལ་བྱེད་དུའང་ངོས་གཟུང་ངོ་། །གཉིས་པ་ལྷུན་གྲུབ་ཀྱི་ཡེ་ཤེས་མངོན་སུམ་དུ་སྟོན་པ་ཐོད་རྒལ་གྱི་ལམ་ལ་བཞི་ལས། དང་པོ་སྔོན་འགྲོ་རིིག་པའི་སྣ་ཁྲིད་པར་བྱེད་པ་ནི། ལུས་ངག་ཡིད་གསུམ་གྱི་སྤྱོད་པ་སྤྱད་པས་འཁོར་འདས་རུ་ཤན་ཕྱེ་ལ་མི་གཡོ་མི་བརྗོད་མི་རྟོག་པའི་ངང་ལ་རྣལ་དུ་དབབ་པར་བྱ་སྟེ་ཐལ་འགྱུར་ལས། འཁོར་འདས་རུ་ཤན་མ་ཕྱེ་ན། །ཁམས་གསུམ་ལུས་ངག་ཡིད་ཀྱི་ཡང་། །འབྲེལ་པ་ཆོད་པར་མི་འགྱུར་བས། །འཁོར་འདས་རུ་ཤན་དབྱེ་བར་བྱ། །ཞེས་དང་། ཀློང་གསལ་ལས། ལུས་ངག་ཡིད་ཀྱི་འབྱུང་འཁྲུགས་པ། །དེ་དག་གྲོལ་ཕྱིར་རྣལ་དུ་དབབ། །ཅེས་སོ། །གཉིས་པ་དངོས་གཞི་ཟག་མེད་ཀྱི་ཡེ་ཤེས་རྒྱུད་ལ་བསྟེན་པ་ནི། ལྷུན་གྲུབ་ལུས་ཀྱི་དཀྱིལ་འཁོར་དེ་བཞིན་གཤེགས་པའི་གསང་མཛོད་སྒོ་ཕྱེ་ནས་རང་གནས་ཀ་དག་གི་ཡེ་ཤེས་ འོད་གསལ་ལྷུན་གྲུབ་ཀྱི་དཀྱིལ་འཁོར་དུ་ཞལ་བལྟ་བར་འདོད་ན་ལུས་ཀྱི་གནད། ༡ཆོས་སྐུ་༢ལོངས་སྐུ་༣སྤྲུལ་སྐུ་ཡི་རིམ་པ་ཇི་ལྟ་བར་༡སེང་གེ་ཁྱི་ཚུགས་ལྟ་བུ་དང་། ༢གླང་ཆེན་ཉལ་བ་ལྟ་བུ་དང་། ༣དྲང་སྲོང་ཙོག་པུའི་ཚུལ་གྱི་འདུག་སྟངས་གསུམ་པོ་གང་རུང་བཅའ་བ་ལས་མི་འདའ་བར་བྱ་བ་སྟེ། ཀློང་གསལ་ལས། དེ་ཡང་ལུས་ཀྱི་སྐུ་གསུམ་ལས་རྒྱུན་དུ་འདའ་བར་མི་བྱའོ་ཞེས་སོ། །འཆར་བྱེད་སྒོའི་གནད་ནི་ཐལ་འགྱུར་ལས། སྒོ་ནི་སྐུ་གསུམ་མིག་གིས་བལྟ། །ཞེས་པས་ཆོས་སྐུའི་གཟིགས་སྟངས་མིག་གྱེན་ལྡོག །ལོངས་སྐུའི་ཟུར་བལྟ་ཟུར་ཁྲིད། སྤྲུལ་སྐུའི་ཕྱེད་བཙུམ་ཅུང་ཟད་ཐུར་ཕབ་སྟེ་གཟིགས་སྟངས་གསུམ་པོ་རང་རང་གི་འདུག་སྟངས་དང་བསྟུན་ལ་རླུང་དལ་བས་ཕྱིར་འཕངས་ནས་འཆར་གཞི་ཡུལ་གྱི་
གནད་ནམ་མཁའ་སྤྲིན་བྲལ་གྱི་དཀྱིལ་དུ་རིག་པ་མ་ཡེངས་པར་ལྟོས་ཤིག་ཅེས་གདམས་སོ༑ ༑གསུམ་པ་སྣང་བའི་འཆར་ཚུལ་མཐའ་རྟེན་དང་བཅས་པ་ནི། དེ་ལྟར་བལྟས་པས་སྣང་བ་བཞི་རིམ་གྱིས་འཆར་བར་འགྱུར་ཏེ། འཁོར་འདས་གང་དུའང་མ་ཕྱེ་བའི་གནས་ལུགས་ཀ་དག་གི་རིག་པ་སྟོང་གསལ་ཉིད་ལྷག་མཐོང་གི་རང་གདངས་ཐོག་མར་དཀར་ཕྲ་ཕྲོ་ལས་ཕྱི་དབྱིངས་ཀྱི་ཡུལ་ལ་དངོས་སུ་རྡོ་རྗེ་ལུ་གུ་རྒྱུད་དབྱིངས་སྣང་ཐིག་ལེས་བརྒྱན་པའི་རྣམ་པ་ཅན་དུ་གསལ་བར་མཐོང་བ་ནི་རིག་པ་མངོན་སུམ་གྱི་དོན་མཐོང་བ་སྟེ། དེ་ཡང་སྙིང་ནང་གི་དབྱིངས་རྣམ་དག་གི་སྒྲོན་མ་ཉིད་རྩ་དར་དཀར་གྱི་སྐུད་པ་ལྟ་བུའི་ལམ་བརྒྱུད་རྒྱང་ཞགས་ཆུའི་སྒྲོན་མ་མིག་གི་སྒོ་ལས་ཕྱིའི་དབྱིངས་ནམ་མཁར་མེ་ལོང་གི་ངོས་ལ་བྱད་ཤར་བ་ལྟར་འཇའ་ཚོན་འོད་ལྔའི་མུ་ཁྱུད་ཅན་ཐིག་ཕྲན་དང་བཅས་པའི་ནང་དུ་ཐིག་ལེ་སྟོང་སྒྲོན་དམར་ཟླུམ་གསལ་གདངས་ཅན་འཆར་ཞིང་། དེའི་ནང་དུ་རྡོ་རྗེ་ལུ་གུ་རྒྱུད་གསེར་སྐུད་དམ་མུ་ཏིག་གི་ཕྲེང་བ་ལྟ་བུ་འཕར་གཡོ་དང་བཅས་པ་འཆར་བས། དེའི་ངང་ལས་མི་གཡོ་བར་མཉམ་པར་བཞག་པ་ན་ཤེས་རབ་རང་བྱུང་གི་སྒྲོན་མ་ཁོང་ནས་འཆར་བར་འགྱུར་ཞིང་། དབྱིངས་སྣང་དང་པོར་མཐོང་བ་ནས་བཟུང་སྟེ་འཇའ་འོད་ཀྱི་ནང་དུ་ཐིག་ལེ་གསུམ་འབྲེལ་དུ་སྣང་བ་ཚུན་ཆད་ཆོས་ཉིད་མངོན་སུམ་གྱི་སྣང་བའོ། །དེ་ནས་འོད་ལྔ་ཐིག་ལེ་དང་བཅས་པ་ཇེ་བརྟན་དུ་སྣང་ཞིང་། ཟ་འོག་གི་གུར་ཁྱིམ་དང་གྱེན་སྒྲེང་རྩིབ་ཤར་ལྟ་བུ་སོགས་སྨིན་མཚམས་དང་བྲལ་ཏེ། ཞིང་ཁམས་ཀུན་ཏུ་ཁྱབ་པའི་ཐིག་ལེའི་ནང་དུ་ཕྱེད་སྐུ་དང་སྐུ་རྐྱང་སོགས་སྣང་བ་ཚུན་ཆད་ཉམས་གོང་འཕེལ་ལོ། །དེ་ནས་འོད་གསལ་གྱི་སྣང་བ་འབྱམས་ཀླས་པའི་དབྱིངས་ཐིག་ལེ་མུ་ཁྱུད་ལྔ་ལྡན་གྱི་ནང་དུ་རིགས་ལྔ་ཡབ་ཡུམ་སོགས་ཞི་ཁྲོའི་ལྷ་གྲངས་མེད་འཆར་བ་ནི་རིག་པ་ཚད་ཕེབས་སོ། །དེ་ནས་ཕྱིའི་སྣང་བ། ནང་གི་སྒྱུ་ལུས། གསང་བ་རླུང་སེམས་ཟད་པས་འཁྲུལ་སྣང་ལས་གྲོལ་ཏེ་གདེང་བཞི་ཚད་དུ་ཕྱིན་ནས་འཕོ་བ་ཆེན་པོའི་སྐུ་ཆུ་ཟླ་ལྟ་བུས་འགྲོ་བའི་དོན་བྱེད་པ་ནི་ཆོས་ཉིད་ཟད་པའི་སྣང་བའོ། །དེ་ལྟར་ཉམས་སུ་ལེན་
པའི་ཚེ་མི་འགུལ་བ་གསུམ་ལ་གཞི་བཅའ་བ། སྡོད་པ་གསུམ་གྱིས་ཚད་བཟུང་བ། ཐོབ་པ་གསུམ་གྱིས་གཟེར་གདབ་པ། གདེང་བཞིས་གྲོལ་ཚད་བསྟན་པ་སྟེ། མཐའ་རྟེན་བཞིའི་མན་ངག་གིས་གོམས་པར་བྱེད་པའོ། །བཞི་པ་ཁྱད་པར་དུ་འཕགས་པའི་ཆེ་བ་བསྟན་པ་ལ་ལྔ་ལས། དང་པོ་སྣང་བ་བཞི་ལ་སྤྱོད་པའི་གང་ཟག་དེ་གསང་བ་བླ་ན་མེད་པའི་སྨིན་གྲོལ་གྱི་ལམ་འཁོར་བཅས་ཀྱི་བདག་པོ་རྡོ་རྗེ་སློབ་དཔོན་ཆེན་པོར་གྱུར་པའི་ཆེ་བ་ནི། གང་དགོངས་པ་ལྷུན་གྲུབ་ཆེན་པོ་ལ་སྤྱོད་པས་ཡེ་ནས་སྨིན་ཅིང་གྲོལ་ཟིན་རང་ངོ་ཤེས་པ་དེ་ཡིས་སྤྲོས་བཅས། སྤྲོས་མེད། ཤིན་ཏུ་སྤྲོས་མེད། རབ་ཏུ་སྤྲོས་མེད་ཀྱི་དབང་རྣམས་རིག་པའི་ངང་དུ་རྫོགས་པའི་རྩལ་གྱིས་བསྐུར་བ་དང་། རིག་པའི་རྒྱུད་ཆེན་པོ་ལ་རང་དབང་ཐོབ་པའི་ངང་དུ་སྙིང་པོའི་དོན་གཏན་ལ་འབེབས་པའི་རྒྱུད་ཆེན་པོ་བཅུ་བདུན་སོགས་ཐ་སྙད་ཚིག་གི་རྣམ་པར་བསྟན་པ་རྣམས་ཀྱང་རྫོགས་པར་རྟོགས་པ་དེ་ཡིས་ཆོས་ཉིད་རིག་པའི་རྩལ་ལས་མི་འདའ་བའི་སྒོ་ནས་བཤད་པར་བྱ་བ་ཡིན་ཞིང་། དེ་ལྟ་བུའི་རྣལ་འབྱོར་པ་དེ་ནི་ཆོས་སྐུ་ཀུན་ཏུ་བཟང་པོ་དང་། གཟུགས་སྐུ་རྡོ་རྗེ་འཆང་ཆེན་པོའི་དགོངས་པ་དང་དབྱེར་མི་ཕྱེད་པ་ཉིད་དོ། །གཉིས་པ་རྒྱལ་བའི་ཐུགས་ཀྱི་ཞེ་ཕུགས་ཡིན་པའི་ཆེ་བ་ནི། དུས་གསུམ་གྱི་དབྱིངས་སུ་གཤེགས་ཤིང་བཞུགས་པའི་སངས་རྒྱས་ཐམས་ཅད་ཀྱི་ཐུགས་ཀྱི་ཞེ་ཕུགས་ལ་དབྱིངས་རིག་གི་དོན་ཟབ་མོ་འདི་ལས་གཞན་མེད་དོ། །དེའི་ཕྱིར་མདོ་རྒྱུད་ཀུན་གྱི་གནད་འདིར་ཚང་ཞིང་འདུས་པས་ཐམས་ཅད་ཀྱི་ཐུགས་ཡིན་པའི་ཕྱིར་དོན་གོ་རྫོགས་པ་སྟེ་ཐམས་ཅད་ཀྱི་གོ་ཆོད་པའི་དོན་ནོ། །གསུམ་པ་དབྱིངས་རིག་གི་ངང་དུ་འབྲས་ཆོས་ཐམས་ཅད་རྫོགས་པར་བསྟན་པ་ནི་དབྱིངས་རིག་རྣམ་པར་དག་པའི་དཀྱིལ་འཁོར་སྣང་སྟོང་དུ་རང་ཤར་བའི་ཡེ་ཤེས་ཀྱི་འཕྲིན་ལས་ཉིད་འབྲས་ཆོས་ལྔར་མ་འདྲེས་པར་སྣང་བ་སྟེ། ཐིག་ལེ་སྟོང་སྒྲོན་གྱི་ནང་དུ་གསལ་སྟོང་ཞི་ཁྲོའི་སྐུ་རིགས་ལྔ་ཡབ་ཡུམ་གྱི་རྣམ་པར་ཤར་བའི་ཕྱི་སྣང་བའི་ཐབས་ལ་བརྟེན་ནས་ནང་རིག་བདེ་སྟོང་གི་འོད་གསལ་བདུད་རྩིའི་སྨན་མཆོག་ལྟ་བུས་མ་རིག་པའི་ཟུག་རྔུ་སེལ་བར་བྱེད་ཅིང་། དེའི་ཚེ་སྒྲ་
ཐམས་ཅད་ཆོས་དབྱིངས་ཀྱི་རང་སྒྲ་གྲགས་སྟོང་གཞོམ་མེད་དུ་སྒྲོག་པའི་གསུང་དང་། དྲན་རིག་གསལ་ཙམ་ཉིད་ནས་རང་བཞིན་མ་གྲུབ་པའི་རིག་སྟོང་སྤྲོས་བྲལ་གྱི་ཡེ་ཤེས་ཐུགས་ཏེ༑ སྐུ་གསུང་ཐུགས་རྡོ་རྗེ་གསུམ་གྱི་སྣང་ཆ་མ་འགགས་པའི་རྩལ་སྣང་ལམ་དང་འབྲས་བུའི་ཡོན་ཏན་དང་། དེས་འགྲོ་བ་འདུལ་བའི་འཕྲིན་ལས་ཏེ་འབྲས་ཆོས་ལྔ་པོ་གཅིག་འདུས་ཐིག་ལེ་ཆེན་པོར་ཟླུམ་ལ་འཁྱིལ་བས་འཕགས་སོ། །བཞི་པ་དབྱིངས་རིག་གི་ནང་དུ་དངོས་གྲུབ་ཐམས་ཅད་ལྷུན་གྱིས་གྲུབ་པར་བསྟན་པ་ནི། འདས་མ་འོངས་ད་ལྟར་གྱི་དུས་གསུམ་ཀུན་ཏུ་དངོས་གྲུབ་འགྲུབ་པའི་གཞི་དབྱིངས་རིག་འདི་ལས་གཞན་དུ་མེད་དོ། །ངོ་བོ་དངོས་མེད་སྟོང་པ་ཉིད་ཀྱི་དབྱིངས་སུ་རང་བཞིན་སྐུ་དང་ཡེ་ཤེས་གསལ་སྟོང་དུ་སྣང་བ་ལས་ཐུགས་རྗེ་རིག་རྩལ་མ་འགགས་པར་འཆར་བ་འདི་ནི་ངོ་མཚར་ཆེའོ། །ཇི་ལྟར་ན། དེས་ཆོས་སྐུ་ཐིག་ལེ་ཉག་གཅིག་མངོན་སུམ་དུ་སྣང་བས་ས་ལམ་གྱི་རྟགས་ཚད་ཐམས་ཅད་རྫོགས་ཏེ། རིག་པ་རྡོ་རྗེ་ལུ་གུ་རྒྱུད་ཚོམ་བུའི་སྐུར་སྨིན་པས་ཕུང་པོ་ལྷག་མ་མེད་པའི་དབྱིངས་སུ་གྲོལ་བ་ནི་མཆོག་གི་དངོས་གྲུབ་དང་། ཞི་རྒྱས་དབང་དྲག་བཞི་དང་དགུག་བསྐྲད་མནན་པ། གཟིར་བ་ལ་སོགས་ཐུན་མོང་གི་དངོས་གྲུབ་ལས་ཕྲན་ཚེགས་རྣམས་མ་ལུས་པ་ཀུན་ཀྱང་ལས་གང་བྱེད་ཡིད་ཀྱིས་བསམ་ཞིང་དེ་ལ་དབྱིངས་རིག་གཏད་པ་ཙམ་གྱིས་ཐམས་ཅད་ཞར་ལ་འགྲུབ་པར་ཐེ་ཚོམ་མེད་དོ། །ཁྱད་པར་མཆོག་གི་དངོས་གྲུབ་རིག་པ་ཚད་ལ་ཕེབས་པ་ཕྱག་རྒྱ་ཆེན་པོའི་རིག་འཛིན་དང་། ཆོས་ཉིད་ཟད་པ་ལྷུན་གྱིས་གྲུབ་པའི་རིག་འཛིན་ཏེ་མཐོང་སྒོམ་གྱིས་བསྡུས་པ་ལམ་གྱུར་གྱི་འབྲས་བུ་ནི། དབང་པོ་རབ་ཀྱིས་ལོ་གསུམ་དང་། དེར་མ་གྲོལ་ན་འབྲིང་གིས་ལོ་ལྔ་དང་། ཐ་མས་ཀྱང་ལོ་བདུན་དག་ལས་མི་འགྱང་བར་སྣང་བཞི་མཐར་ཕྱིན་ནས་གདོད་མར་གྲོལ་བའི་འབྲས་བུ་འགྲུབ་པ་ལ་སྦྱོར་བར་འགྱུར་ཞིང་། དེར་མ་ཟད་མངོན་སུམ་དང་གོང་འཕེལ་ལ་སྤྱོད་ཕན་ཆད་ཚོགས་སྦྱོར་དང་ཡོན་ཏན་མཚུངས་པས། ཏིང་ངེ་འཛིན་གྲུབ་ཅིང་སྐྱེ་བ་དང་འཇུག་པ་སོགས་ལ་རང་དབང་ཐོབ་པའི་ཕྱིར། རྫུ་འཕྲུལ་གྱི་བཀོད་པ་མཁའ་ལ་བྱ་བཞིན་འཕུར་བ་དང་། ས་ལ་སྦྲུལ་ལྟར་འཛུལ་བ་དང་། ཆུ་ལ་ཉ་བཞིན་མི་བྱིང་
བ་དང་། མི་སྣང་བའི་དངོས་གྲུབ་ལུས་མིས་མི་མཐོང་བ་དང་། རང་གར་གནས་ཀྱི་ས་རུ་དབྱིངས་རིག་འདྲེས་པས་འཇའ་འོད་འཁྱིལ་བ་ལ་སོགས་པའི་རྫུ་འཕྲུལ་དང་། ཉོན་མོངས་པའི་ཕྱོགས་འཇོམས་པའི་སྟོབས་དང་རྨི་ལམ་དག་ཅིང་བདེན་ཚིག་འགྲུབ་པ་སོགས་ཡོན་ཏན་མཐའ་ཡས་པ་འཆར་བར་འགྱུར་རོ། །མདོར་ན་འཁོར་འདས་ཐམས་ཅད་རང་རིག་ལུ་གུ་རྒྱུད་ཀྱི་ཀློང་དུ་ཡིན་ལུགས་དྲི་བྲལ་དུ་ཕྱིན་པའི་འབྲས་བུ་ཆོས་སྐུར་མངོན་པར་སངས་རྒྱས་ཏེ༑ སྣོད་བཅུད་ཀྱི་སྣང་བ་ཐམས་ཅད་སྐུ་གསུམ་གྱི་དབྱིངས་སུ་གྲོལ་བའི་ལག་རྗེས་འགྲོ་བའི་དོན་སྟོང་གསལ་འགག་མེད་ཀྱི་འཕྲིན་ལས་མ་བཙལ་ལྷུན་གྲུབ་ཏུ་ཁྱབ་པའི་མཆོག་དངོས་དུས་རིང་པོར་མི་ཐོགས་པར་ཐོབ་པའི་ཕྱིར་འོད་གསལ་ཡེ་ཤེས་ཀྱི་ལམ་འདི་དང་སུ་ཕྲད་རིགས་ཀྱི་བུ་སྐལ་བ་དང་ལྡན་པ་ཡིན་ནོ། །ལྔ་པ་སྡེ་གསུམ་གྱི་ལམ་གྱི་གནད་ཐམས་ཅད་འདིར་འདུས་པའི་ཆེ་བ་ནི། ཆོས་འདི་ནི་རང་བྱུང་གི་ཡེ་ཤེས་ལ་འཁོར་འདས་སུ་མ་གྲུབ་པས་ཡེ་གྲོལ་སྤང་བླང་ལས་འདས་པར་འདོད་པ་མན་ངག་རྫོགས་པ་ཆེན་པོ་ཤིན་ཏུ་རྣལ་འབྱོར་གྱི་མཐའ་སྟེ་རྩེ་མོར་གྱུར་པའོ། །དེ་ལ་དབྱེ་ན། ཨ་ཏི་བཀོད་པ་ཆེན་པོ་ལས། ཡིད་ཅན་རྣམས་ལ་སེམས་ཀྱི་སྡེ། །ནམ་མཁའ་ཅན་ལ་ཀློང་གི་སྡེ། །རིམ་རྩོལ་བྲལ་ལ་མན་ངག་སྡེ། །ཞེས་སྡེ་གསུམ་ལས། དང་པོ་སེམས་སྡེ་ནི། ངོ་བོ་སྣ་ཚོགས་སུ་སྣང་ཡང་སེམས་ཉིད་གཅིག་གི་རོལ་པ་ལས་མ་འདས་པར་འདོད་པ་སྟེ། དེ་ལ་རྒྱུད་རིག་པའི་ཁུ་བྱུག་ལ་སོགས་པ་ལྔ་ནི། རྩ་རྒྱུད་ཀུན་བྱེད་ལས་བཀོལ་བས་མ་ལྔའམ། ཤྲཱི་སིང་ཧ་དང་བཻ་རོ་ཙ་ནས་དྷ་ཧེ་ནའི་འདུ་ཁང་དུ་བསྒྱུར་བས་སྔ་འགྱུར་ལྔ་ཞེས་གྲགས་པ་དང་། བྱང་ཆུབ་ཀྱི་སེམས་རྨད་བྱུང་སོགས་བཅུ་གསུམ་བི་མ་ལ་དང་གཉགས་ཛྙཱ་ནས་བསམ་ཡས་སུ་བསྒྱུར་བས་ཕྱི་འགྱུར་རམ་བཤད་རྒྱུད་ལས་ཕྱུང་པས་བུ་བཅུ་གསུམ་ཞེས་གྲགས་ཏེ། འགྱུར་དེ་གཉིས་གཅིག་ཏུ་དྲིལ་བས་སེམས་རྨད་བཅོ་བརྒྱད་ཅེས་བཞི་མདུང་གྱུར་དུ་སྨྲ་བའི་རྫོགས་པ་ཆེན་པོ་སེམས་ཀྱི་སྡེ་སྟེ། དེ་རྣམས་ཀྱི་དོན་འདིར་སྣང་སྲིད་སྣོད་བཅུད་ཀྱི་སྣང་བ་ཐམས་ཅད་སེམས་ཉིད་རང་བྱུང་གི་ཡེ་ཤེས་བརྗོད་བྲལ་ཆོས་ཀྱི་སྐུར་ལྟ་
བ་ལ་འདུས་པས། དེའི་ངང་དུ་གསལ་བཞག་མེད་པར་ལྟོས་ཤིག་ཅེས་གདམས་སོ། །གཉིས་པ་ཀློང་སྡེ་ནི། རང་བྱུང་གི་ཡེ་ཤེས་དང་དེའི་ངང་ལ་ཤར་བའི་ཆོས་ཐམས་ཅད་ཡེ་གྲོལ་དག་པ་ཆེན་པོ་ཆོས་ཉིད་ཀུན་ཏུ་བཟང་མོའི་ཀློང་ལས་འགྲོ་ས་གཞན་མེད་པར་སྨྲ་བས་དམིགས་གཏད་བྲལ་བའི་དོན་སྟོན་པ་ནམ་མཁའ་དང་མཉམ་པའི་རྒྱུད་ལྟ་བ་དང་སྤྱོད་པའི་ཀློང་སོགས་ཀློང་དགུས་འབྲས་བུ་ཡེ་གྲོལ་དུ་སྨྲ་བའི་རྫོགས་པ་ཆེན་པོ་ཀློང་གི་སྡེ་སྟེ། དེའི་དོན་འདིར་གང་ལའང་བྱ་རྩོལ་མེད་པའི་ཆོས་ཉིད་ཀྱི་ཀློང་དུ་འཇོག་པ་ལ་འདུས་པས་དེའི་ངང་ལ་མ་བཅོས་པར་ཞོག ཅེས་གདམས་སོ། །གསུམ་པ་མན་ངག་གི་སྡེ་ནི། འཁོར་འདས་སྤང་བླང་དང་བྲལ་བའི་ཡིན་ལུགས་གནད་ཐོག་ཏུ་འབེབས་པའི་ཐབས་ཀྱིས་བློ་འདས་རང་བྱུང་གི་ཡེ་ཤེས་སྐད་ཅིག་གིས་འཆར་བར་བྱེད་པ་རྫོགས་པ་ཆེན་པོ་མན་ངག་གི་སྡེ་སྟེ། དེའི་དོན་འདིར་ཆོས་ཐམས་ཅད་གནས་ལུགས་རང་གསལ་གྱི་ཆོས་ཉིད་མངོན་སུམ་དུ་གཏན་ལ་ཕབ་ནས་འོད་གསལ་ཡེ་ཤེས་ཀྱི་ངང་དུ་སྐྱེལ་བ་ལ་འདུས་པས་དེ་ལྟར་སྐྱོལ་ཅིག་ཅེས་གདམས་སོ༑ ༑ གསུམ་པ་བརྩོན་པས་ཉམས་སུ་བླང་བར་གདམས་པ་ནི། དེ་ལྟར་རྡོ་རྗེ་ཐེག་པའི་རྩེ་མོར་སོན་པས་ཁྱད་འཕགས་མཐར་ཐུག་གི་དོན་ཟབ་མོ་རྫོགས་པ་ཆེན་པོའི་ཆོས་འདི་དང་འཕྲད་པ་ནི་རྙེད་པའི་མཆོག་རབ་ཏུ་རྙེད་པ་ཡིན་པས་ཚེ་འདིའི་བྱ་བ་ཐོངས་ལ་བརྩོན་འགྲུས་དྲག་པོས་ཉམས་སུ་ལོངས་ཤིག་པའོ། །བཞི་པ་འབྲས་བུ་གྲོལ་ས་བསྟན་པ་ནི། གནད་ཀྱི་དབྱིངས་རིག་ཡེ་ཤེས་ཀྱི་སྣང་བ་དཔག་ཏུ་མེད་པ་ལ་སྤྱོད་པ་ནི་ལྷ་སྔགས་མཆོད་སྦྱིན་སོགས་དགེ་སྦྱོར་གཞན་ལས་ཆོས་ཁྱད་པར་དུ་གྱུར་བས་ན་བསོད་ནམས་ཀྱི་ཚོགས་རྣམས་ཀྱི་ནང་ནས་ཡ་ཐ་སྟེ། མཆོག་ཏུ་གྱུར་པ་དང་། དེའི་ངང་ལས་གནས་པས་ཡེ་ཤེས་མི་གཡོ་བའི་ངང་དུ་སེམས་འགགས་ནས་རྣམ་པར་མི་རྟོག་པ་འོད་གསལ་ཆོས་སྐུ་ཆེན་པོའི་དབྱིངས་སུ་སངས་པས་ནི་ཡེ་ཤེས་ཀྱི་ཚོགས་ཕུལ་དུ་བྱུང་བ་ཉིད་འགྲུབ་པར་བྱེད་པས་མཁའ་ལྡིང་གིས་དྲངས་པའི་ཤིང་རྟ་བཞིན་དུ་ཚོགས་གཉིས་
དཀའ་བ་མེད་པར་རྫོགས་ཏེ། གསང་སྔགས་སྤྱི་ལྟར་ན། སྣང་མཆེད་ཐོབ་པ་ཉེར་ཐོབ་ཀྱི་ཡེ་ཤེས་བཞིའི་རིམ་པ་དང་། ཁྱད་པར་ཅན་རྫོགས་ཆེན་ལྟར་ན། མངོན་སུམ། གོང་འཕེལ། ཚད་ཕེབས། ཆོས་ཟད་དེ་ལམ་མཆོག་སྣང་བ་བཞིའི་རིམ་པས་ཚོགས་སྦྱོར་མཐོང་སྒོམ་བཞི་རྫོགས་ཤིང་། དེ་ལྟར་རྫོགས་པས་མཐོང་སྒོམ་གྱིས་བསྡུས་པ་ས་བཅུ་དང་སློབ་པའི་ལམ་བཞིའི་ཡོན་ཏན་ཐམས་ཅད་མ་ལུས་པ་དཀའ་བ་མེད་པར་སྐད་ཅིག་ལ་བགྲོད་པར་བྱེད་ཅིང་། དེའང་དབྱིངས་རང་བཞིན་འོད་གསལ་གྱི་ངོ་བོ་ལ་འཕོ་འགྱུར་རྣམ་དབྱེར་མེད་ཀྱང་གློ་བུར་གྱི་དྲི་མའི་དབང་གིས་ཕྱེ་བས་ཚད་ཕེབས་ཀྱི་ལམ་དུ་ཉོན་ཡིད་ཤེས་པ་དང་སྒོ་ལྔ་བཟློག་པས་རིམ་པར་འཁོར་བ་ལས་བརྒལ་ཞིང་མི་ལྡོག་པ་ཐོབ་ནས་ཞིང་ཁམས་རྣམ་པར་དག དེ་རྗེས་ཀུན་གཞིའི་ཤེས་པ་བཟློག་པས་ཡེ་ཤེས་ཀྱི་ཕར་ཕྱིན་དང་ལྡན་པ་ཆོས་ཉིད་ཟད་པའི་ས་རྫོགས་པ་རྒྱུན་མཐའི་སྐད་ཅིག་མ་ལ་སློབ་ལམ་ཉིད་ཀྱང་བཟློག་པས་ཀུན་གཞི་བག་ཆགས་ཀྱི་ཆ་ཆེས་ཕྲ་བའི་སྒྲིབ་པའང་རྣམ་པར་དག་ནས། སྤངས་རྟོགས་མཐར་ཕྱིན་པའི་འབྲས་བུར་གྲོལ་ཏེ། ལམ་དང་ལམ་གྱི་སྤང་བྱ་ཀུན་ཟད་པས་སེམས་སེམས་བྱུང་། རྟེན་དང་བཅས་པ་དབྱིངས་སུ་གྲོལ་བའི་ཚེ། ཕུང་པོ་ཁམས་སོགས་རྟོག་ཚོགས་རྣམས་རིགས་ལྔ་དང་ཡུམ་ལྔ་སོགས་སངས་རྒྱས་སྐུ་ལྔ་དང་རང་ལུས་གཞལ་ཡས་ཁང་དང་། ཡུལ་སྣང་དང་ཞིང་ཁམས་དང་ཉོན་མོངས་ལྔ་ཡེ་ཤེས་ལྔར་ནི་རྣམ་པར་དག་པས། སྟོབས་བཅུ། མི་འཇིགས་པ་བཞི། མ་འདྲེས་པའི་ཆོས་བཅོ་བརྒྱད་སོགས་གཞི་ལ་གདོད་ནས་བཞུགས་པའི་ཡོན་ཏན་ཐམས་ཅད་མངོན་དུ་གྱུར་ཏེ། སྐུ་དང་ཡེ་ཤེས་འདུ་འབྲལ་མེད་པའི་ངང་དུ་སངས་རྒྱས་ནས་ཐུགས་རྗེ་མཛད་པའི་འཕྲིན་ལས་རྟག་ཁྱབ་ལྷུན་གྱིས་གྲུབ་པའི་བདག་ཉིད་ཆེན་པོར་འཕོ་འགྱུར་མེད་པར་བཞུགས་སོ། །གསུམ་པ་མཇུག་གི་དོན་ལ་བཞི་ལས། དང་པོ་ལམ་མཆོག་འདི་ལས་ཅན་དང་ཕྲད་ནས་འགྲོ་དོན་བྱེད་པར་སྨོན་ལམ་གདབ་པ་ནི། ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་བདག་གི་ཐུགས་ཀྱི་དགོངས་ཉམས་དྲིལ་བའི་བཅུད། ཨ་ཏི་ཡོ་ག་ཐེག་པ་སེམས་ཀློང་
མན་ངག་ཀུན་གྱི་རྒྱུད་དོན་ཐམས་ཅད་གཅིག་ཏུ་དྲིལ་བའི་སྙིང་ཐིག་ཟབ་མོ་འདི། སྐལ་ལྡན་འདི་ལ་སྤྱོད་པའི་ལས་ཀྱི་འཕྲོ་ཅན་གཅིག་སྟེ་སྤྲུལ་པའི་གཏེར་སྟོན་ཆེན་པོ་དང་འཕྲད་པར་ཤོག་ཅིག ཕྲད་ནས་ཀྱང་འགྲོ་བ་མ་ལུས་སྡུག་བསྔལ་ལས་སྐྱོབ་པའི་དཔུང་གཉེན་དམ་པར་ཤོག་ཅིག་ཅེས་པའོ། །གཉིས་པ་མན་ངག་གི་རྫོགས་ཚིག་སྨོས་པ་ནི། གར་དབང་བདེ་གཤེགས་ཀུན་འདུས་ཐུགས་རྗེ་ཆེན་པོའི་མཆོག་དབང་གསུམ་དང་འབྲེལ་བའི་ཡན་ལག་གི་རྫོགས་རིམ་གསུམ་ལས། འདིས་དབང་བཞི་པ་དང་འབྲེལ་བའི་ལམ་མཆོག་ཟབ་དོན་ཐུགས་ཀྱི་རྫོགས་རིམ་སྙིང་པོར་དྲིལ་བ་རྫོགས་སོ། །ཞེས་གཏན་ལ་ཕབ་ཟིན་པའི་དོན་ཏོ། །གསུམ་པ་བཀའ་སྲུང་ལ་གཉེར་གཏད་ཅིང་རྒྱས་འདེབས་པ་ནི། བཀའི་སྲུང་མ་ལྷ་ཆེན་ལྕམ་དྲལ་ལ་ཆོས་འདི་གཉེར་དུ་གཏད་དོ་སྣོད་མིན་ལ་ཟུར་ཙམ་ཡང་མི་བསྒྲག་པར་ཐུབ་པར་སྲུང་བ་དང་། དད་བརྩོན་ཤེས་རབ་དང་ལྡན་པའི་སྣོད་ལྡན་ལ་མི་ནུབ་པར་འཕེལ་བའི་སྟོང་གྲོགས་མཛོད་ཅིག་ཅེས་གཏད་དོ། །འདི་ཉིད་མ་འོངས་པའི་དོན་དུ་གཏེར་དུ་སྦ་བའི་དུས་སུ་ས་མ་ཡ་ཞེས་དམ་ཚིག་གི་གནའ་རྒྱ་དང་། རྒྱ་རྒྱ་རྒྱ། ཞེས་སྐུ་གསུང་ཐུགས་ཀྱི་གཅེས་རྒྱ་དང་། ཚིག་རྒྱུད་གཏེར་དུ་རྒྱས་བཏབ་ནས། གཏེར་གནས་སུ་སྦས་པའི་རྒྱ་དང་། གཏེར་སྲུང་ལ་གཏད་རྒྱ་དང་། གཏེར་སྟོན་ལ་བཀའ་བརྒྱུད་སྨོན་ལམ་གྱི་རྒྱ་དང་། སྐལ་མེད་ལ་གསང་རྒྱ་སྟེ། རྒྱ་བདུན་གྱིས་བཏབ་ནས་གཏེར་དུ་སྦས་པའོ། །བཞི་པ་གཏེར་ནས་སྤྱན་དྲངས་པའི་བཏོན་བྱང་སྨོས་པ་ནི། ལོ་ཙཱ་བ་ཆེན་པོ་བཻ་རོ་ཙ་ནའི་ཡང་སྲིད་སྤྲུལ་པའི་གཏེར་སྟོན་རིག་འཛིན་གཏེར་བདག་གླིང་པས་རབ་བྱུང་བཅུ་གཅིག་པའི་ནང་གི་ལྕགས་སྤྲེལ་ལོ་གྲོ་ཞུན་ཟླ་བའི་ཉེར་དགུ་ལ་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་ཏེ་གདུལ་བྱ་རྣམས་སྨིན་གྲོལ་གྱི་ལམ་ལ་འགོད་པར་མཛད་པའོ། །ཞེས་པ་འདིའང་ཁམས་གནས་འཇིང་བླ་མ་སྟོན་སྒོམ་དགེ་བའི་བཤེས་གཉེན་བྱམས་པ་ཕུན་ཚོགས་རྣམ་རྒྱལ་གྱིས་ཨ་ཏིའི་ལམ་རིམ་སྙིང་པོ་འདི་ལ་འགྲེལ་པ་ཞིག་རྩོམ་དགོས་
ཞེས་རིང་མོ་ནས་གསུང་གིས་བསྐུལ་བ་ཡིད་ལ་གཅགས་ནའང་དུས་ཀྱི་འགྱུར་བ་མི་བཟད་པའི་གཞན་དབང་དུ་ཐལ་བས་ཚིག་དོན་མཐའ་ཆོད་པ་ཞིག་རྩོམ་མ་ཐུབ་རུང་གསུང་ངོ་མ་གཅོག་པའི་ཆེད་དུ་དོན་རགས་ཙམ་མཆན་བུས་བཀྲལ་ནས་ཕུལ་བ་སྟེ། གཉོས་ཀྱི་དགེ་སློང་རྨོངས་པ་དྷརྨ་ཤྲཱིས་སོ། །ཡིག་ཆེན་རྩ་བ་ཡིག་ཆུང་མཆན། །རྒྱ་འབྱེད་ས་བཅད་སེར་འབྱེད་ལུང་། །དམར་འབྱེད་ཁྲིགས་དམིགས་བསྡུས་དོན་ཏེ། །དེ་ལས་འཆད་པོས་སྤྲོས་ཏེ་བཤད།། འདི་ཙམ་གྱིས་ཀྱང་བསྟན་པ་དང་འགྲོ་བ་ལ་ཕན་ཐོགས་པར་གྱུར་ཅིག དགེའོ།། །།