གཉིས་པ་དགེ་སློབ་མའི་སྡོམ་པའི་མི་མཐུན་ཕྱོགས།
གཉིས་པ་དགེ་སློབ་མའི་སྡོམ་པའི་མི་མཐུན་ཕྱོགས་ནི།
བླངས་འདས་ཉེར་གཉིས་སམ་ཞེ་བརྒྱད་ཡོད་དེ། དགེ་ཚུལ་སྐབས་དང་འདྲ་བ་བླངས་འདས་སོ་དྲུག་དང་མི་འདྲ་བ་རྩ་བའི་ཆོས་དྲུག་དང་རྗེས་མཐུན་ཆོས་དྲུག་སྟེ་ཞེ་བརྒྱད་དོ། །དེ་ལ་རྩ་བའི་ཆོས་དྲུག་ནི། ཁྲིམས་གྲོགས་མེད་པར་གཅིག་པུ་འགྲོ་བ་དང༌། གཅིག་པུ་ཆུ་བོའི་ཕ་རོལ་ཏུ་བརྒལ་བ་དང༌། སྐྱེས་པ་ལ་རེག་པ་དང༌། སྐྱེས་པ་དང་ལྷན་དུ་ཁྲིམས་གྲོགས་མེད་པར་འདུག་པ་དང༌། སྨྱན་བྱེད་པ་དང༌། ཟླ་མོ་དགེ་སློང་མའི་ཁ་ན་མ་ཐོ་བ་འཆབ་པ་དང་དྲུག་གོ །རྗེས་མཐུན་ཆོས་དྲུག་ནི། རང་གི་རིན་པོ་ཆེ་ལ་རུང་བ་མ་བྱས་པར་རེག་པ་དང༌། འདོམས་ཀྱི་སྤུ་བྲེག་པ་དང༌། ས་རྐོ་བ་དང༌། རྩྭ་སོགས་སྐྱེས་པ་གཅོད་པ་དང༌། བྱིན་ལེན་མ་བྱས་པར་ཟ་བ་དང༌། གསོག་འཇོག་བྱས་པ་ཟ་བ་དང་དྲུག་གོ །