རིགས་པས་སྒྲུབ་པ།
དང་པོ་ནི་སྤྱིར་རྒྱལ་བའི་སྲས་ལ་ཁྱོད་ཀྱིས་བཤད་པ་ལྟར་རྒྱལ་བ་དེའི་གསུང་ལས་འཁྲུངས་པའི་ཆ་ནས་སྲས་སུ་བཞག་པ་གཅིག་དང༌། སྤྱོད་འཇུག་ལས། དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །ཞེས་པ་ལྟ་བུའི་ཐེག་ཆེན་གྱི་ཐུན་མོང་མ་ཡིན་པའི་ཐབས་ཀྱི་རིགས་བྱང་ཆུབ་ཀྱི་སེམས་ནི་ཐེག་པ་ཆེ་ཆུང་གི་རིགས་སོ་སོར་འབྱེད་པའི་ཕའི་ས་བོན་ལྟ་བུ་ཡིན་པས་ན་ཕའི་ས་བོན་དང་མཚུངས་པའི་ཐབས་སེམས་བསྐྱེད་ཀྱི་སྒོ་ནས་སྲས་སུ་བཞག་པ་གཅིག་དང༌།
འདི་ནི་དེ་བཞིན་གཤེགས་པ་རྣམས་ཀྱི་རིགས་སུའང་སྐྱེས་པ་སྟེ། །ཞེས་པ་ལྟར་ཐེག་ཆེན་དུ་གྱུར་གྱི་ཤེས་རབ་ཁྱད་པར་ཅན་སྟོང་ཉིད་མངོན་སུམ་དུ་རྟོགས་པའི་ཤེས་རབ་ཀྱི་སྒོ་ནས་རྒྱལ་བའི་སྲས་སུ་བཞག་པ་དང་གསུམ་ཡོད་པས་ན་བྱང་སེམས་རྣམས་རང་རྒྱུའི་རྒྱལ་བའི་གསུང་ལས་སྐྱེས་པའི་སྒོ་ནས་རྒྱལ་བའི་སྲས་སུ་བཞག་ཆོག་པ་འདི་ནི་བདེན་མོད་ཀྱི་ཁོ་བོས་ཐེག་པ་གསུམ་གྱི་མི་སློབ་པ་ཐམས་ཅད་ཀྱི་རྒྱུའི་རྩ་བ་སྙིང་རྗེ་ལ་ཐུག་པར་སྒྲུབ་པའི་ཆེད་དུ་བྱང་སེམས་ལས་སངས་རྒྱས་འཁྲུངས་པར་བསྟན་པ་ཡིན་པས་སྐྱོན་མེད་ལ། སངས་རྒྱས་རྣམས་ནི་བྱང་སེམས་ལས་འཁྲུངས་ཚུལ་ཡང་རྗེས་སུ་འཆད་པ་ལྟར་འཐད་ཅིང་རིགས་པའི་ཕྱིར། ཞེས་པ་ནི་འདི་ནི་བདེན་མོད་ཀྱི་འོན་ཀྱང་ཞེས་པའི་ཚིག་ནུས་ཀྱི་དོན་ནོ། །སངས་རྒྱས་རྣམས་བྱང་སེམས་ལས་འཁྲུངས་ཚུལ་ལམ་རྒྱུ་གཉིས་ཀྱི་སྒོ་ནས་བྱང་ཆུབ་སེམས་དཔའ་རྣམས་བཅོམ་ལྡན་འདས་རྣམས་ཀྱི་རྒྱུར་འགྱུར་བ་ནི་འཐད་ཅིང་རིགས་པ་ཡིན་ཏེ། གནས་སྐབས་ཀྱི་ཁྱད་པར་སངས་རྒྱས་རྣམས་ནི་རང་དང་རྒྱུད་གཅིག་པའི་བྱང་སེམས་ཀྱི་ཉེར་ལེན་གྱི་རྒྱུ་དང༌། ཡང་དག་པར་འཛིན་དུ་འཇུག་པའི་ཁྱད་པར་རང་དང་རྒྱུད་ཐ་དད་པའི་བྱང་སེམས་ཀྱིས་ལྷན་ཅིག་བྱེད་རྐྱེན་བྱས་པ་ལ་བརྟེན་ནས་འཁྲུངས་པ་ཡིན་པའི་ཕྱིར་རོ། །ཞིབ་པར་ན་རང་ལྡོག་ནས་བྱང་སེམས་ལས་འཁྲུངས་པའི་སངས་འཕགས་དང༌། སངས་འཕགས་ཡིན་ན་རང་རྒྱུ་རྒྱུད་གཅིག་དང་ཐ་དད་ཀྱི་བྱང་སེམསགཉིས་ལས་འཁྲུངས་པ་ལ་བཞེད་པའོ། །