གཏན་ཚིགས་ལྟར་སྣང་བཤད་སྐབས་ཀྱི་དོགས་དཔྱོད།
གཏན་ཚིགས་ལྟར་སྣང་བཤད་སྐབས་ཀྱི་དོགས་དཔྱོད།
གཏན་ཚིགས་ལྟར་སྣང་མེད་པར་ཐལ། གཞི་གྲུབ་ན་རྟགས་ཡང་དག་ཡིན་པས་ཁྱབ་པའི་ཕྱིར། འདོད་ན། གཏན་ཚིགས་ལྟར་སྣང་དེ་ལས་གཞན། །ཞེས་པའི་གཞུང་གི་བརྗོད་བྱ་མ་གྲུབ་པར་ཐལ། གཏན་ཚིགས་ལྟར་སྣང་མེད་པའི་ཕྱིར། འདོད་ན། གཏན་ཚིགས་ལྟར་སྣང་དེ་ལས་གཞན། །ཞེས་པའི་གཞུང་ཆོས་ཅན། གཞུང་རྣམ་དག་མ་ཡིན་པར་ཐལ། ཁྱོད་ཀྱི་བརྗོད་བྱ་མ་གྲུབ་པའི་ཕྱིར། ཁྱབ་སྟེ། བསྡུ་བ་ལས། དོན་མེད་དོན་ལོག་ཅེས་གསུངས་པའི་ཕྱིར། འདོད་ན། གཏན་ཚིགས་ལྟར་སྣང་དེ་ལས་གཞན། །ཞེས་པའི་གཞུང་ཆོས་ཅན། ཁྱོད་ཀྱི་བརྗོད་བྱ་གྲུབ་པར་ཐལ། ཁྱོད་གཞུང་རྣམ་དག་ཡིན་པའི་ཕྱིར། འདོད་ན། གཏན་ཚིགས་ལྟར་སྣང་ཡོད་པར་ཐལ། གཏན་ཚིགས་ལྟར་སྣང་དེ་ལས་གཞན། །ཞེས་པའི་གཞུང་གི་བརྗོད་བྱ་གྲུབ་པའི་ཕྱིར། ཁྱབ་སྟེ། གཞུང་དེའི་བརྗོད་བྱ་ལ་གཏན་ཚིགས་ལྟར་སྣང་འཇོག་དགོས་པའི་ཕྱིར་ན། གཞུང་དེའི་བརྗོད་བྱ་ལ་སྦྱོར་བ་གང་ཡང་རུང་བའི་གཏན་ཚིགས་ལྟར་སྣང་འཇོག་ཟེར་ན། འོ་ན་སྦྱོར་བ་གང་ཡང་རུང་བའི་གཏན་ཚིགས་ལྟར་སྣང་ཆོས་ཅན། ཚུལ་གསུམ་ལས་གཞན་ཡིན་པར་ཐལ། གཏན་ཚིགས་ལྟར་སྣང་དེ་ལས་གཞན། །ཞེས་པའི་གཏན་ཚིགས་ལྟར་སྣང་ལ་ཁྱོད་འཇོག་དགོས་པ་གང་ཞིག དེ་ལས་གཞན་ཞེས་པའི་དེ་སྒྲའི་བསྙེག་གཞི་ལ་ཚུལ་གསུམ་འཇོག་དགོས་པའི་ཕྱིར། དང་པོ་ཁས། ཕྱི་མ་དེར་ཐལ། དེ་སྒྲའི་བསྙེག་གཞི་འཇོག་རྒྱུ་ཡོད་པའི་ཕྱིར་ན་དཔྱད། ༈ ཡང་གཏན་ཚིགས་ལྟར་སྣང་མེད་ཀྱང་སྦྱོར་བ་དེ་སྒྲུབ་ཀྱི་གཏན་ཚིགས་ལྟར་སྣང་ཡོད་པར་ཐལ། འདོད་ན། བྱས་པ་ཆོས་ཅན། སྦྱོར་བ་དེ་སྒྲུབ་ཀྱི་གཏན་ཚིགས་ལྟར་སྣང་ཡིན་པར་ཐལ། འདོད་ན། བྱས་པ་ཆོས་ཅན། སྦྱོར་བ་དེ་སྒྲུབ་ཀྱི་ཚུལ་གསུམ་མ་ཡིན་པར་ཐལ། སྦྱོར་བ་དེ་སྒྲུབ་ཀྱི་གཏན་ཚིགས་ལྟར་སྣང་ཡིན་པའི་ཕྱིར། འདོད་ན། བྱས་པ་ཆོས་ཅན། སྦྱོར་བ་དེ་སྒྲུབ་ཀྱི་ཚུལ་གསུམ་མ་ཡིན་པ་མི་འཐད་པར་ཐལ། སྦྱོར་བ་དེ་སྒྲུབ་ཀྱི་ཚུལ་གསུམ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། སྦྱོར་བ་དེ་སྒྲུབ་ཀྱི་ཚུལ་གསུམ་ཡིན་པ་དང་སྦྱོར་བ་དེ་སྒྲུབ་ཀྱི་ཚུལ་གསུམ་མ་ཡིན་པ་གཉིས་འགལ་བ་ཡིན་པའི་ཕྱིར། མ་གྲུབ་ན། སྦྱོར་བ་དེ་སྒྲུབ་ཀྱི་ཚུལ་གསུམ་ཆོས་ཅན། ཁྱོད་ཡིན་པ་དང་མ་ཡིན་པ་གཉིས་འགལ་བ་ཡིན་པར་ཐལ། ཁྱོད་ཡིན་པ་སྲིད་པའི་ཤེས་བྱ་ཡིན་པའི་ཕྱིར། གོང་གི་མ་ཁྱབ་མཚམས་ཀྱི་རྟགས་མ་གྲུབ་ན། བྱས་པ་ཆོས་ཅན། སྦྱོར་བ་དེ་སྒྲུབ་ཀྱི་ཚུལ་གསུམ་ཡིན་པར་ཐལ། སྦྱོར་བ་དེ་སྒྲུབ་ཀྱི་གཏན་ཚིགས་ཡང་དག་ཡིན་པའི་ཕྱིར། དེར་ཐལ། གཞི་གྲུབ་པའི་ཕྱིར། ཁྱབ་སྟེ། བསྡུས་གྲྭའི་ཟུར་དཔྱད་ལས། གཞི་གྲུབ་ན་རྟགས་ཡངདག་ཡིན་པས་ཁྱབ་པའི་ཕྱིར་རོ། །ཞེས་གསུངས་པའི་ཕྱིར། ༈ ཡང་རྟགས་ལྟར་སྣང་ཡོད་པར་ཐལ། རྟགས་ལྟར་སྣང་གི་མཚན་ཉིད་ཡོད་པའི་ཕྱིར། མ་གྲུབ་ན། རྟགས་ལྟར་སྣང་གི་མཚན་ཉིད་ཡོད་པར་ཐལ། གཏན་ཚིགས་དོན་བསྡུས་ལས། རྟགས་སུ་བཀོད་ཅིང༌། ཚུལ་གསུམ་མ་ཚང་བ། ཞེས་གསུངས་པའི་ཕྱིར་ན་ཁ་ཅིག་སྦྱོར་བ་དེ་སྒྲུབ་ཀྱི་གཏན་ཚིགས་ལྟར་སྣང་ལ་དགོངས་ཤེ་ན། སྦྱོར་བ་དེ་སྒྲུབ་ཀྱི་གཏན་ཚིགས་ལྟར་སྣང་ཡོད་པར་ཐལ། འདོད་ན། སྦྱོར་བ་དེ་སྒྲུབ་ཀྱི་གཏན་ཚིགས་ལྟར་སྣང་མེད་པར་ཐལ། གཞི་གྲུབ་ན་སྦྱོར་བ་དེ་སྒྲུབ་ཀྱི་གཏན་ཚིགས་ཡང་དག་ཡིན་པས་ཁྱབ་པའི་ཕྱིར། ཁྱབ་སྟེ། རྟགས་ལྟར་སྣང་མེད་པའི་རྒྱུ་མཚན་དེ་གཞི་གྲུབ་ན་རྟགས་ཡང་དག་ཡིན་པས་ཁྱབ་པའི་རྒྱུ་མཚན་གྱིས་ཡིན་པའི་ཕྱིར། དེར་ཐལ། རྟགས་ལྟར་སྣང་མེད་པའི་རྒྱུ་མཚན་ཡོད་པའི་ཕྱིར་ན་དཔྱད་དགོས་ལ་རང་ལུགས་རྟགས་རིགས་སུ་འདི་ལྟར་གསུངས་ཏེ། སྦྱོར་བ་གང་ཡང་རུང་བའི་རྟགས་ལྟར་སྣང་ཡིན་ན་རྟགས་ལྟར་སྣང་ཡིན་མི་དགོས་ལ། སྦྱོར་བ་གང་ཡང་རུང་བའི་རྟགས་ཡང་དག་ཡིན་ན་རྟགས་ཡང་དག་ཡིན་དགོས་པ་ནི། གཙོ་ཆེ་ཆུང་དང་གསུང་རབ་ཀྱི་བརྡ་ཆད་ཀྱི་དབང་གིས་ཡིན་ནོ། །ཞེས་གསུངས་སོ། །༈ ཡང་དེ་སྒྲུབ་ཀྱི་རྟགས་ལྟར་སྣང་ཡིན་ན་དེ་སྒྲུབ་ཀྱི་ཚུལ་གསུམ་མ་ཡིན་པས་ཁྱབ་པར་ཐལ། འདོད་ན། གཞལ་བྱ་ཆོས་ཅན། སྒྲ་རྟག་པ་ཡོད་པར་སྒྲུབ་པའི་ཚུལ་གསུམ་མ་ཡིན་པར་ཐལ། སྒྲ་རྟག་པ་ཡོད་པར་སྒྲུབ་པའི་རྟགས་ལྟར་སྣང་ཡིན་པའི་ཕྱིར། དེར་ཐལ། སྒྲ་རྟག་པ་ཡོད་པར་སྒྲུབ་པའི་བསྒྲུབ་བྱ་མ་གྲུབ་པའི་ཕྱིར། གོང་དུ་འདོད་མི་ནུས་ཏེ། གཞལ་བྱ་དེ་སྒྲ་རྟག་པ་ཡོད་པར་སྒྲུབ་པའི་ཚུལ་གསུམ་ཡིན་པའི་ཕྱིར། མ་གྲུབ་ན། གཞལ་བྱ་ཆོས་ཅན། སྒྲ་རྟག་པ་ཡོད་པར་སྒྲུབ་པའི་ཚུལ་གསུམ་ཡིན་པར་ཐལ། སྒྲ་རྟག་པ་ཡོད་པར་སྒྲུབ་པའི་ཕྱོགས་ཆོས་གང་ཞིག སྒྲ་རྟག་པ་ཡོད་པར་སྒྲུབ་པའི་རྗེས་ཁྱབ་ཡིན་པའི་ཕྱིར། རྟགས་རེ་རེ་ནས་གྲུབ་སྟེ། སྒྲ་ཆོས་ཅན། རྟག་པ་ཡོད་པ་ཡིན་ཏེ། གཞལ་བྱ་ཡིན་པའི་ཕྱིར། ཞེས་པའི་སྦྱོར་བའི་ཕྱོགས་ཆོས་དང་རྗེས་ཁྱབ་གྲུབ་པའི་ཕྱིར། ཟུར་དང་པོ་སླ། ཟུར་གཉིས་པ་མ་གྲུབ་ན། སྒྲ་ཆོས་ཅན། རྟག་པ་ཡོད་པ་ཡིན་ཏེ། གཞལ་བྱ་ཡིན་པའི་ཕྱིར། ཞེས་པའི་སྦྱོར་བའི་རྗེས་ཁྱབ་གྲུབ་པར་ཐལ། དེ་སྒྲུབ་ཀྱི་སྦྱོར་བའི་རྟགས་གཞལ་བྱ་དེ་དེ་སྒྲུབ་ཀྱི་སྦྱོར་བའི་བསྒྲུབ་བྱའི་ཆོས་རྟག་པ་ཡོད་པ་དང་འབྲེལ་ཞིང༌། དེ་སྒྲུབ་ཀྱི་སྦྱོར་བའི་མཐུན་ཕྱོགས་རྟག་པ་ཡོད་པ་ཁོ་ན་ལ་འགོད་ཚུལ་དང་མཐུན་པ་ཡོད་པ་ངེས་པ་ཡིན་པའི་ཕྱིར། རྟགས་དང་པོ་མ་གྲུབ་ན། གཞལ་བྱ་ཆོས་ཅན། ཁྱོད་རྟག་པ་ཡོད་པ་དང་འབྲེལ་བ་ཡིན་པར་ཐལ། ཁྱོད་རྟག་པ་ཡོད་པ་དང་ཐ་དད། རྟག་པ་ཡོད་པ་མེད་ན་ཁྱོད་མེད་དགོས་པའི་ཕྱིར། གོང་གི་རྟགས་གཉིས་པ་མ་གྲུབ་ན། གཞལ་བྱ་ཆོས་ཅན། དེ་སྒྲུབ་ཀྱི་སྦྱོར་བའི་མཐུན་ཕྱོགས་རྟག་པ་ཡོད་པ་ཁོ་ན་ལ་འགོད་ཚུལ་དང་མཐུན་པ་ཡོད་པ་ངེས་པ་ཡིན་པར་ཐལ། ཁྱོད་རྟག་པ་ཡོད་པ་ཁོ་ན་ལ་ཡོད་པར་ངེས་པ་ཡིན་པའི་ཕྱིར། མ་གྲུབ་ན། གཞལ་བྱ་ཆོས་ཅན། ཁྱོད་རྟག་པ་ཡོད་པ་ཁོ་ན་ལ་ཡོད་པར་ངེས་པ་ཡིན་པར་ཐལ། ཁྱོད་ཡིན་ན་རྟག་པ་ཡོད་པ་ཡིན་པས་ཁྱབ་པའི་ཕྱིར་ན་དཔྱད།