ཛམ་ལྷ་རིགས་ལྔའི་བསང་མཆོད།
རཱ་ག་ཨ་གསེ།
ཀྱཻ། རི་རབ་ལྷུན་པོའི་བྱང་ཕྱོགས་ལྕང་ལོ་ཅན། །རིན་ཆེན་སྣ་བདུན་བརྩེགས་པའི་གཞལ་ཡས་ནས། །ཛམ་ལྷ་རིགས་ལྔ་ལྷ་མོ་ནོར་རྒྱུན་མ། །འཁོར་བཅས་འདིར་གཤེགས་བསང་དང་མཆོད་པ་བཞེས། །སྐུ་ཡི་ཛམ་ལྷ་དཀར་པོ་འབྲུག་ལ་ཆིབས། །མཁའ་འགྲོ་སྡེ་བཞི་འཁོར་དང་བཅས་པ་ལ། །གཡུ་ཤུག་ཕྱེ་མར་གསུར་གྱི་དུད་པས་བསང༌། །གསུང་གི་ཛམ་དམར་ཞལ་གསུམ་ཕྱག་དྲུག་པ། །ཀུ་རུ་ཀུལླེ་ཡུམ་དང་བཅས་པ་ལ། །འབྲུ་སྣ་ཟས་ཕུད་དྲི་བཟང་དུད་པས་བསང༌། །ཐུགས་ཀྱི་ཛམ་ནག་ཁྲོ་ཞིང་སྒེག་པའི་གཟུགས། །ནོར་ལྷ་མཆེད་བརྒྱད་འཁོར་དང་བཅས་པ་ལ། །དཀར་གསུམ་མངར་གསུམ་བསང་གི་མཆོད་པ་འབུལ། །ཡོན་ཏན་ཛམ་སེར་ཛཾ་བྷི་ནེའུ་ལེ་འཛིན། །ནོར་ལྷ་ཕོ་དགུ་མོ་དགུ་འཁོར་བཅས་ལ། །འབྲུ་སྣ་ཕྱེ་མར་བསང་གི་དུད་པས་བསང༌། །འཕྲིན་ལས་ཛམ་ཁྲ་ཕྱག་ན་ནེའུ་ལེ་འཛིན། །གནོད་སྦྱིན་བྱེ་བ་བདུན་འབུམ་འཁོར་བཅས་ལ། །འབྲུ་སྣ་དར་ཟབ་དྲི་བཟང་དུད་པས་བསང༌། །ནོར་གྱི་བདག་པོ་ལྷ་མོ་ནོར་རྒྱུན་མ། །གསེར་མདོག་མཆོད་སྦྱིན་འབྲས་ཀྱི་ཉེ་མ་འཛིན། །མཆེད་ལྔ་འཁོར་དང་བཅས་ལ་བསང་མཆོད་འབུལ། །ནོར་ལྷ་ཁྱེད་རྣམས་མཆོད་པའི་བྱིན་རླབས་ཀྱིས། །ལོ་ལེགས་ཕྱུགས་རྣམས་འཕེལ་བའི་དངོས་གྲུབ་སྩོལ། །གོད་འདྲེ་གནོད་བྱེད་བཟློག་པའི་འཕྲིན་ལས་མཛོད། །ཅེས་རཱ་ག་ཨ་གསེས་སྦྱར་བའོ། །