རྫོགས་རིམ་བར་དོ་དྲུག་གི་ཁྲིད་བསྡུས་དོན།

ཟབ་ཆོས་ཞི་ཁྲོ་དགོངས་པ་རང་གྲོལ་གྱི་རྫོགས་རིམ་བར་དོ་དྲུག་གི་ཁྲིད་བསྡུས་དོན་སྙིང་པོར་དྲིལ་བ་བཞུགས་སོ། །

རིག་སྟོང་ཁྱབ་བརྡལ་བླ་མ་ཆོས་ཀྱི་སྐུ། །རིག་རྩལ་འོད་གསལ་བླ་མ་ཞི་ཁྲོའི་ལྷ། །རིག་འཛིན་རྩ་བརྒྱུད་བླ་མའི་ཚོགས་ལ་འདུད། །རིག་པ་རང་གནས་ཡེ་ཤེས་མངོན་གྱུར་ཤོག །དེ་ལ་འདིར་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་རྫོགས་རིམ་བར་དོ་དྲུག་གི་ཁྲིད་ཉམས་སུ་ལེན་པ་ལ། ཐོག་མར་སྔོན་འགྲོའི་རིམ་པ་ལ་གཉིས། རང་རྒྱུད་འདུལ་བ་དང་རང་རྒྱུད་སྦྱོང་བའོ། །དང་པོ་རང་རྒྱུད་འདུལ་བ་ལ་གསུམ། དང་པོ་ནང་སྔ་མོའི་གཏི་མུག་གཉིད་སྐྲོག་ནས་བཟུང་། འཁོར་བའི་སྡུག་བསྔལ་བསྒོམ་པ། འཆི་བ་མི་རྟག་པ་བསྒོམ་པ། དལ་འབྱོར་རྙེད་དཀའ་བསྒོམ་པའོ། །དེ་ཡང་། ཀྱཻ་མ་ཀྱཻ་མ་མི་རྟག༴སོགས་ཏེ། བསྡུ་ན་འཁོར་བ་འདིའི་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་སྡུག་བསྔལ་རྒྱུ་འབྲས་གཉིས་ལ་ཁོལ་མོར་སྤྱོད་པ་ལས་མེད་པས། ད་རེས་འཁོར་བ་འདི་ལས་རྒྱུན་དུ་ཐར་བ་ཞིག་བྱེད་དགོས་ལ། དེ་ཡང་དལ་འབྱོར་འདི་ནི༴སོགས་དལ་འབྱོར་བཅོ་བརྒྱད་དང་ལྡན་པའི་མི་ལུས་ཞིག་མ་གཏོགས་ཐར་བའི་རྟེན་མེད་པས། ད་རེས་ཁོ་ན་ཙམ་འདི་པའི་ལུས་འདིར་དོན་མེད་འཁོར་བའི་ལས་ལ་མི་གཟད་པར་གཏན་གྱི་བདེ་བ་ཞིག་བསྒྲུབ་པ་ལ་འབད་པར་བྱ་དགོས། དེ་ཡང་ལེ་ལོ་ཕྱི་བཞག་གི་དབང་དུ་མི་བཏང་བར། སྤྱིར་སྣོད་བཅུད་ཐམས་ཅད་མི་རྟག་པ་དང་། སྒོས་འཆི་རྐྱེན་མང་ཞིང་གསོན་རྐྱེན་ཉུང་

བ་དང་འཛམ་གླིང་གི་ཚེ་ལ་ངེས་པ་མེད་པས་རང་ནམ་འཆི་ཆ་མེད་ཡིན་པ་དང་། ཤི་ཚེ་ཆོས་མ་གཏོགས་ཟས་ནོར་ལོངས་སྤྱོད་དབང་ཐང་ཆེ་ཐོབ་གང་གིས་ཀྱང་མི་ཕན་པས་ན་ད་ལྟ་མྱུར་དུ་བླ་མའི་བཀའ་བཞིན་ཆོས་ཁོ་ན་ཉམས་སུ་ལེན་པར་ཞེ་དམ་དྲག་པོ་ཡང་ཡང་བྱེད་དགོས། དེ་དག་རྒྱས་པར་ཁྲིད་གཞུང་གཞན་རྣམས་སུ་བཤད་དོ། །གཉིས་པ་རང་རྒྱུད་སྦྱོང་བ་ལ་ལྔ་སྟེ། སྐྱབས་འགྲོ། སེམས་བསྐྱེད། རྡོར་སེམས་བསྒོམ་བཟླས། མཎྜལ། བླ་མའི་རྣལ་འབྱོར་རོ། །དེ་ལ་བློ་ལྡོག་རྣམ་བཞི་འདིས་ཕྱིའི་འཁོར་བ་ལ་བློ་ལྡོག་པ་དུས་ནམ་དུ་ཡང་དྲན་དགོས་སོ། །དང་པོ་སྐྱབས་འགྲོ་ཁམས་གསུམ་རིགས་དྲུག་མཐའ་ཡས༴སོགས་ཆོས་ཡང་དག་པའི་ལམ་དུ་འགྲོ་བར་བྱེད་པ་ཡིན་པས་འདི་མེད་ཐབས་མེད་དེ། གནས་སྐབས་རང་གཞན་འཁོར་བའི་འཇིགས་པ་ལས་སྐྱོབས་ཤིང་མཐར་ཐུག་དོན་གཉིས་མཐར་ཕྱིན་པའི་སངས་རྒྱས་དེ་ཐོབ་པའི་ཐབས་སྟོན་པ་པོ་སངས་རྒྱས། དེ་ཐོབ་བྱེད་ལམ་ཆོས། དེ་བསྒྲུབ་པའི་གྲོགས་དགེ་འདུན་ཡིན་ལ། དེ་དག་གི་ངོ་བོ་རྩ་བའི་བླ་མ་དཀོན་མཆོག་གསུམ་ལ་དངས་འདོད་ཡིད་ཆེས་ཀྱི་དད་པས་སྐྱབས་སུ་བཟུང་སྟེ་བསྒྲུབ་པར་དམ་བཅའ་བའོ། །དེ་ནས་ཀྱཻ་མ་ཆོས་རྣམས་ཐམས་ཅད༴ཞེས་སྐྱེས་བུ་ཆེན་པོའི་ལམ་གྱི་རྩ་བ་ཐེག་ཆེན་སེམས་བསྐྱེད་ཡིན་ཏེ། དེ་མེད་པར་སངས་རྒྱས་ཐོབ་པའི་ཐབས་གཏན་ནས་མེད་པས་ཕ་མ་སེམས་ཅན་ཐམས་ཅད་ཐོབ་བྱ་འབྲས་བུ་སངས་རྒྱས་ཀྱི་ས་ལ་བདག་གིས་འགོད་པར་བྱ་སྙམ་པ་དང་། དེ་ཐོབ་བྱེད་ཀྱི་རྒྱུ་ཕྱིན་དྲུག་གམ་ཚོགས་གཉིས་བསྒྲུབ་པ་ལ་དམ་བཅའ་མི་ཉམས་པར་བཟུང་བ་ནི་སྨོན་འཇུག་གི་སེམས་དང་། དེ་དག་གི་བསླབ་བྱ་སོགས་ལ་བློ་སྦྱང་། རྒྱུད་ལ་སྐྱེ་ངེས་ཤིག་མེད་

ཐབས་ཆག་པས་ནན་ཏན་དུ་རྒྱུད་ལ་སྦྱངས་ཏེ་འཁོར་འདས་ཆོས་ཀུན་བདེན་མེད་སྒྱུ་མའི་འཕྲུལ་སྣང་དུ་ཤེས་པར་བྱ་བ་དོན་དམ་སེམས་བསྐྱེད་ཡིན་པས་བདེན་གཉིས་དབྱེར་མེད་ཚོགས་གཉིས་ཟུང་འཇུག་སོགས་ཀྱི་སེམས་བསྐྱེད། དེ་ལྟར་རྒྱུད་ལ་སྐྱེ་བའི་གེགས་བྱེད་པ་ནི། ཚེ་རབས་ནས་བསགས་པའི་སྡིག་སྒྲིབ་བག་ཆགས་རྣམས་ཡིན་པས་དེ་སྦྱང་བ་ལ་སོ་སོར་ཐབས་སྣ་ཚོགས་ཡོད་ཀྱང་། སྤྱི་གཙུག་པད་ཟླའི༴སོགས་བླ་མ་རྡོ་རྗེ་སེམས་དཔའི་བསྒོམ་བཟླས་བདུད་རྩི་འབེབས་སྦྱོང་འདི་ལས་ལྷག་མེད་པས་སྟོབས་བཞི་ཚང་བའི་སྒོ་ནས་གནད་དུ་འགྲོ་ངེས་རེ་གལ་ཆེན་བྱ་བ་དང་། ཚོགས་གཉིས་རྫོགས་པར་བྱེད་པ་ལ་མཎྜལ་གཙོ་བས་ༀ་བཛྲ་བྷུ་མི༴གཞི་མ་དབང་ཆེན༴དུས་གསུམ་གྱི་བདག་ལུས་ལོངས་སྤྱོད་དགེ་ཚོགས་དང་བཅས་པ་ཆགས་ཞེན་མེད་པར་སྐུ་གསུམ་གྱི་ཞིང་ལ་མཎྜལ་དུ་དམིགས་ནས་འབུལ་བར་བྱ་སྟེ། རྒྱུན་དུ་ཚོགས་བསགས་སྒྲིབ་གཉིས་སྦྱང་བ་ལ་འབད་པ་ནི་རྟོགས་པའི་ཡེ་ཤེས་ཡོན་ཏན་ཐམས་ཅད་སྐྱེ་བའི་ཐབས་མཆོག་ཏུ་གྱུར་པའོ། །ཁྱད་པར་གསང་སྔགས་ལམ་གྱི་རྩ་བ་བླ་མ་ཁོ་ན་ལ་རག་ལས་པས་དེ་ཉིད་བསམ་སྦྱོར་གཉིས་ཀྱི་ལེགས་པར་བསྟེན་ཏེ། ཐོག་མའི་མགོན་པོ་ཆོས་སྐུ༴སོགས་མོས་གུས་དྲག་པོས་སྣང་གྲགས་རྟོག་གསུམ་བླ་མའི་སྐུ་གསུང་ཐུགས་ཀྱི་རོལ་བར་འཆར་ནུས་པའི་སྒྲུབ་པ་བླ་མའི་རྣལ་འབྱོར་གསོལ་འདེབས་དང་མཐར་དབང་བཞི་ལེན་པ་ལ། བླ་མ་ཡབ་ཡུམ་སྤྱི་གཙུག༴སོགས་ལ་འབད་ཅིང་ཐུགས་དབྱིངས་སྤྲོས་མེད་ཀློང་དུ་རང་སེམས་འཛིན་མེད་དུ་བསྲེ་བ་ནི་ཉམས་རྟོགས་ཡོན་ཏན་ཐམས་ཅད་སྐྱེ་བའི་ཐབས་གནད་རྨད་དུ་བྱུང་བ་གཅིག་ཆོག་ཡིན་ནོ། །མཐར་བསྔོ་སྨོན་བྱ། གོང་གི་བརྒྱུད་པའི་གསོལ་འདེབས་ནས་བསྟན་པའི་ཟབ་ཆོས་ཞི་ཁྲོ་དགོངས་པ་

རང་གྲོལ་ལས་ལས་རིམ་བར་དོ་དྲུག་གི་ཁྲིད་འཆད་པ་ལ། ངོ་བོ། ངེས་ཚིག །མཚན་ཉིད། དབྱེ་བ། གནས་ལུགས། སྣང་ལུགས་སོགས་རྣམ་གྲངས་བཅོ་བརྒྱད་ཡོད་པས། རྒྱབ་ཆོས་འཁྲུལ་སྣང་རང་གྲོལ་ལྟར་ཤེས་པར་བྱའོ། །བྱེ་བྲག་བསྡུས་དོན་ཙམ་ལ་ཁྲིད་སོ་སོའི་ཉམས་ལེན་ལ་དྲུག་ལས། དང་པོ་སྐྱེ་གནས་བར་དོ་ལ་ཕྱི་ནང་གི་སྒྲོ་འདོགས་ཆོད་པ། ཐི་བྱ་ཚང་དུ་འཇུག་པ་ལྟ་བུའི་གདམས་ངག་ལ། སྤྱིར་སྐྱེས་ནས་མ་ཤི་བར་དེར་མདོ་སྔགས་ཀྱི་ཆོས་སྤྱི་དང་ཁྱད་པར་བསྐྱེད་རྫོགས་ཀྱི་གནད་ལ་ཐོས་བསམ་བསྒོམ་གསུམ་ཡ་བྲལ་དུ་མ་སོང་བར་བརྩོན་པ་ཐམས་ཅད་ཡིན་ལ། འདིར་དེ་དག་ཐམས་ཅད་ལ་མ་ཡེངས་རྩེ་གཅིག་པའི་ཞི་གནས་ཀྱི་ཏིང་ངེ་འཛིན་དང་། ཆོས་ཀྱི་གནས་ལུགས་ཇི་བཞིན་ཤེས་པའི་ལྷག་མཐོང་གི་ཤེས་རབ་གཉིས་ལྡན་དགོས་པས། དང་པོ་ཞི་གནས་བསྒྲུབ་པ་ལ། དབེན་པའི་གནས་སུ་བྱ་བ་དགུ་ཕྲུགས་སུ་བཏང་ནས་ལུས་རྣམ་སྣང་གི་ཆོས་བདུན་དུ་འཁོད་དེ་མཚན་བཅས་མཚན་མེད་ཀྱི་ཞི་གནས་བསྒོམ་པར་བྱ། དང་པོ་མཚན་བཅས་ལ་མ་དག་པ་ཤིང་བུ་རྡེའུ་དང་། སྨིན་མཚམས་སུ་ཐིག་ལེ་དཀར་འཚེར་སྲན་རྡོག་ཙམ་དང་། སྙིང་དབུས་ཐིག་ལེ་དཀར་སྔོན་གསལ་དྲོད་ཅན་ལ་སེམས་འཛིན་པ་དང་གསུམ་མོ། །དག་པ་ལའང་མདུན་མཁར་རྡོར་སེམས་མཐོ་གང་གསལ་འཚེར་རྒྱན་རྫོགས་པའི་ཐུགས་ཀར་གཏད་པ་དང་། དེ་བཞིན་ཐུབ་དབང་གསེར་མདོག་མཚན་དཔེ་འབར་བ་དང་། སྤྱན་གཟིགས་དཀར་གསལ་ཐུགས་ཀའི་ཧྲཱིཿལ་འཛིན་པ་གསུམ་མོ། ་་་་་་་་་་་་་་་་་་་་་་་རྔུབ་པ་ༀ། གནས་པ་ཨཱཿ། འབུད་པ་ཧཱུྃ་གི་རང་བཞིན་ལ་རིག་པ་ཡེང་མེད་དུ་སེམས་བཟུང་། ཡང་སྲོག་རྩོལ་རླུང་ལའང་གསུམ། ཆོས་བདུན་ས་གནོན་ཅན་རླུང་རོ་བསལ་ནས། རླུང་སྦྱོར་བ་བཞི་ལྡན་དུ་

བཟུང་ལ། རླུང་སེམས་རོ་གཅིག་པར་ལྟེ་འོག་ཏུ་འཛིན་པ་དང་། ཡང་བར་རླུང་བུམ་པ་ཅན་ལ་རླུང་སེམས་དབྱེར་མེད་དུ་བཟུང་བ་དང་། ཡང་རླུང་འཇུག་གནས་དབྱུང་གསུམ་ༀ་སྐུ་ཨཱཿགསུང་ཧཱུྃ་ཐུགས་གསུམ་གྱི་སྒྲ་གདངས་སུ་མོས་པས་རྡོ་རྗེའི་བཟླས་པ་ལ་སེམས་འཛིན་པའོ། །{འདི་ནི་དུས་ནམ་ཡང་བྱས་པས་སྐྱེ་ཚད། }གཉིས་པ་མཚན་མེད་ལ་གསུམ་སྟེ། དང་པོ་ཕྱིའི་ཡུལ་དང་ནང་གི་སེམས་གང་ལ་མ་གཏད་པའི་ཤེས་པ་ཧྲིག་གེར་སེང་ངེ་བའི་ངང་ལ་འཇོག་པ་སྟེ། དེ་ལ་དང་པོ་ཡེངས་མེད་ཀྱི་དྲན་པས་བསྒྲིམ་ཧྲིག་གེར་འཇོག །བར་དུ་རང་ངོ་ཤེས་ཙམ་དུ་གར་གཏད་འདིར་གནས་མེད་པར་ཡངས་པ་ཁྲོལ་ལེར་འཇོག །ཐ་མ་རེས་འཇོག་མི་དགོས་པར་གང་ལྟར་བཞག་ཀྱང་ཡུལ་སྣང་ལ་རྟོག་པ་མེད་པར་ཟང་ཐལ་ལེར་འཇོག །དེ་དག་གི་ཚེ་ཉེས་པ་ལྔ་སྤོང་འདུ་བྱེད་བརྒྱད་བརྟེན་པ་སོགས་ཀྱིས་བྱིང་རྨུག་འཐིབ་གསུམ་འཕྲོ་རྒོད་འཐོར་གསུམ་སོགས་སྐྱོན་དང་བྲལ་བར་བདེ་གསལ་མི་རྟོག་པའི་ཉམས་ལ་འཛིན་ཞེན་མེད་པར་བསྒོམས་པས་བཏང་འགྲོ་བཞག་སྡོད་རང་དབང་ཐོབ་པའི་ཤིན་སྦྱངས་སྐྱེ་བ་ཞིག་དགོས་སོ། །གཉིས་པ་ལྷག་མཐོང་ལ་ཡང་གསུམ་སྟེ། དང་པོ་དེ་ལྟ་བུའི་སེམས་དེ་སྐྱེ་བའི་འབྱུང་ཁུངས། གནས་པའི་འདུག་ས། འགག་ནས་འགྲོ་ས་སོགས་ཡོད་དམ་མེད། དབྱིབས་ཁ་དོག་དངོས་ཡོད་དངོས་མེད་ཇི་ལྟར་ཡིན། དུས་གསུམ་གྱི་རྣམ་རྟོག་དང་གཅིག་གམ་ཐ་དད། ཡོད་ན་སྣོད་བཅུད་ཕུང་པོ་ལྔ་སོགས་གང་ན་ཡོད། མེད་ན་སྐྱེ་བ་སྔ་ཕྱི་འཁོར་འདས་རྒྱུ་འབྲས་སོགས་ཅི་ལས་བྱུང་ཞིབ་པར་དཔྱད་པས་ཆོས་དང་གང་ཟག་ཐམས་ཅད་གཞི་མེད་རྩ་བྲལ་སྤྲོས་པའི་མཐའ་ལས་འདས་པ་ཡོད་མེད་ཡིན་མིན་གང་དུའང་མ་གྲུབ་པའི་གནས་ལུགས་སུ་ངོ་སྤྲད་པར་བྱ། དེ་ལ་མཐའ་བྲལ་བསམ་བརྗོད་ལས་འདས་པའི་ངང་

དེར་སེམས་ཀློད་དེ་མ་བཅོས་པར་བཞག་པས་བློ་འདས་རྟོག་མེད་ཀྱི་ཉམས་མྱོང་། མྱང་བྱ་མྱོང་བྱེད་[གཉིས་བྲལ་]ཀྱི་ཤེས་པ་ཞིག་འབྱུང་། དེ་ཆོས་ཐམས་ཅད་ཀྱི་གནས་ལུགས་རིག་པའི་ཡེ་ཤེས་ངོ་རང་ཐོག་ནས་སྤྲད་པའོ། །དེའི་གཤིས་ལ་བཟང་ངན་སྐྱོན་ཡོན་གང་གིས་སྒྲོ་འདོགས་སུ་མེད་པ་སྟོང་སེང་ངེ་བ་མཁའ་ལྟར་ཁྱབ་ཅིང་བརྡལ་བ་གདངས་ཉི་མ་སྤྲིན་གྱིས་མི་མངོན་པར་བསྒྲིབ་ཀྱང་འོད་ཀྱི་སྣང་བ་བཀྲ་ལམ་མེ་ཡོད་པ་ལྟར། གཤིས་རྟོག་མེད་དམིགས་སུ་མེད་པ་ལས། ཚོགས་དྲུག་གི་སྣང་བ་འགག་མེད་དུ་ུགསལ་བ་དང་། དེ་ལས་ཟེར་མདངས་ལྟར་འཁོར་འདས་བཟང་ངན་རྒྱུ་འབྲས་ཐམས་ཅད་གཤིས་ལ་མེད་བཞིན་སྣང་ཆ་རྟེན་འབྲེལ་འགག་མེད་དུ་འཆར་བའི་ཤེས་རབ་ཐུགས་རྗེའི་རྩལ་དེ་ལ། ངོ་བོ་སྟོང་པ་ཆོས་སྐུ་དང་། རང་བཞིན་གསལ་བ་ལོངས་སྐུ། ཐུགས་རྗེ་འགག་མེད་སྤྲུལ་སྐུ་ཞེས་སྐུ་གསུམ་དུ་ངོ་སྤྲད་ཀྱང་དོན་ལ་དབྱེ་བ་མེད་པ་རང་གི་མྱོང་ཐོག་ནས་ཤེས་དགོས། ཁ་བཤད་ལ་སྟོང་གསལ་འགག་མེད་སོགས་བརྗོད་ཀྱང་ཕྱོགས་སུ་མི་ཉེ་བས་བླ་མའི་མོས་གུས་དང་བརྩོན་འགྲུས་ལ་རག་ལས་ཤིང་། དེ་ལྟར་ཁ་མིན་དོན་ལ་ངོ་འཕྲོད་ན་ནི་ཕྱག་རྫོགས་དབུ་གསུམ་སོགས་ཚིག་གིས་གང་བཏགས་པ་ཐམས་ཅད་དོན་ལ་སྤྲོས་པའི་མཐའ་ལས་འདས་པའི་ཡེ་ཤེས་སུ་གཅིག་པར་མདོ་རྒྱུད་ཀྱི་ལུང་གི་རྒྱབ་སྐྱོར་དང་བཅས་ཏེ་ཐེ་ཚོམ་བཅད་པའོ། །སྤྱི་དོན་གཉིས་པ་རྨི་ལམ་བར་དོར་མུན་ཁུང་དུ་སྒྲོན་མེ་བཏེག་པ་ལྟ་བུའི་གདམས་ངག་ལ། ཉིན་པར་སྒྱུ་ལུས་ཀྱི་ཁྲིད་སྣང་བ་རང་གྲོལ་དང་། མཚན་མོ་རྨི་ལམ་གྱི་ཁྲིད་འཁྲུལ་བ་རང་གྲོལ་དང་། རྗེས་སྣང་འོད་གསལ་གྱི་ཁྲིད་གཏི་མུག་རང་གྲོལ་དང་གསུམ་ལས། དང་པོ་སྒྱུ་ལུས་ལ་མ་དག་པའི་སྣོད་བཅུད་དང་།

དག་པའི་སྐུ་དང་ཞིང་ཁམས་སྦྱང་བ་གཉིས་ལས། དང་པོ་ཕྱི་སྣོད་ནང་བཅུད་ཀྱི་མ་དག་པའི་རྣམ་པའི་འཇིག་རྟེན་འདི་དག་ཐམས་ཅད་དོན་ལ་སྡུག་བསྔལ་ཕྲ་མོ་ཙམ་ཡང་གྲུབ་པ་མེད་བཞིན་དུ་སྒྱུ་མའི་འཕྲུལ་དང་རྨི་ལམ་གྱི་སྣང་བ་དང་འདྲ་བར་སེམས་ཀྱི་བག་ཆགས་ཀྱི་མཐུས་ཀུན་རྫོབ་རྟེན་ཅིང་འབྲེལ་འབྱུང་དུ་གཟུགས་བརྙན་དང་བྲག་ཆ་དང་ཆུ་ཟླ་དང་སྤྲུལ་བ་དང་། སྨིག་སྒྱུ་སོགས་སྒྱུ་མའི་དཔེ་བཅུ་ཇི་ལྟར་འབྱུང་བ་ལས་དོན་ལ་ཡེ་ནས་མ་གྲུབ་པར་རྟོགས་པར་བྱ་བ་ལ། དབེན་པའི་གནས་སུ་གསོལ་འདེབས་དང་བཅས། རང་མདུན་མེ་ལོང་གཡའ་དག་ངོས་སུ་རང་ལུས་གཟུགས་བརྙན་ཤར་བ་ལ་མཛེས་མི་མཛེས་བསྟོད་སྨད་བཟང་ངན་སོགས་གང་བྱས་ཀྱང་དེ་ལ་དགའ་སྡུག་གི་རྟོག་པ་མེད་པ་དེ་བཞིན་དུ་རྒྱུ་རྐྱེན་རྟེན་འབྲེལ་ལས་གྲུབ་པའི་ངང་ལས་ཡང་དག་མིན་ལ་བདག་གིར་འཛིན་པ་འཁྲུལ་བར་ཤེས་ནས་གཟུགས་བརྙན་ལྟར་དགའ་གདུང་ཁྱད་མེད་དུ་སྦྱངས་ཏེ་མཐར་རང་གཞན་སྣོད་བཅུད་ཐམས་ཅད་སྒྱུ་མ་གཟུགས་བརྙན་རྨི་ལམ་ལྟ་བུར་སྦྱང་བར་བྱའོ། །རྒྱུ་རྫས་སྔགས་བསྒྲུབ་པའི་མི་དང་རྒྱུ་རྐྱེན་ཐམས་ཅད་རྐྱེན་འདུས་པའི་སྒྱུ་མ། གཡོ་བའི་རང་བཞིན་རྨིག་སྒྱུ། མེད་བཞིན་གསལ་བ་རྨི་ལམ། སྟོང་བཞིན་གསལ་བ་གཟུགས་བརྙན། གློ་བུར་སྣང་ཙམ་གློག་གམ་ཆུ་བུར། དྲི་ཟའི་གྲོང་ཁྱེར། བསམ་མེད་བརྗོད་པ་བྲག་ཆ། སྣང་བཞིན་སྟོང་པ་ཆུ་ཟླ། དུ་མར་སྣང་བའི་སྤྲིན་དང་། འཁོར་འདས་དབྱེར་མེད་གཉིས་སུ་སྣང་བ་མིག་བཙིར་བས་གཟུགས་གཉིས་སུ་སྣང་བ་མིག་ཡོར་ལྟ་བུའོ། །ཡང་ན་ལུས་ལ་གྲིབ་མ་སྣང་ལྟར་གཉིས་སྣང་ཤར་བར་གསུངས་སོ། །སྤྲུལ་པ་སྣ་ཚོགས་མེད་བཞིན་སྣང་ལ་སྟོན་པ་རྣམས་སོ་མཆན། དེ་བཞིན་དུ་ངག་གྲགས་སྟོང་བྲག་ཆའི་སྒྲ་ལ་སྦྱང་པ་ལ་དབེན་པར་བྲག་ཆ་དེ་བཞིན་གྱི་(གཞན་གྱིས་)རང་ལ་དངོས་སུ་བརྗོད་པར་མོས་ཏེ། རང་གི་སྐྱོན་ཡོན་ཏན་བཟང་ངན་དགའ་སྡུག་རེ་དོགས་མེད་པར་བརྗོད་ནས། དགའ་སྡུག་རེ་དོགས་བྱུང་ན་བྲག་ཆ་རྒྱུ་རྐྱེན་རྟེན་

འབྲེལ་ལས་བྱུང་བ་མ་གཏོགས་བསྟོད་སྨད་མཁན་སུ་འདུག །དེ་བཞིན་བསྟོད་སྨད་སོགས་སྨྲས་ཚད་ཐམས་ཅད་སྒྲ་སྟོང་པ་བྲག་ཆ་གྲགས་པ་ལྟར་ཐག་མ་ཆོད་བར་དུ་སྦྱང་། ཡིད་ཀྱི་རྟོག་ཚོགས་ཐམས་ཅད་ཀྱང་བར་སྣང་སྟོང་བར་རྒྱུ་རྐྱེན་ཚོགས་པས་སྨིག་སྒྱུ་འཆར་བ་ལྟར་ཡུལ་དབང་ཤེས་པ་གསུམ་འཚོགས་པ་ན། བཟང་ངན་དགའ་སྡུག་རེ་དོགས་ཀྱི་རྟོག་ཚོགས་ཤར་ཡང་སྨིག་སྒྱུ་ལ་བྱུང་གནས་འགྲོ་གསུམ་བདེན་པར་མེད་པ་ལྟར་རྟོག་ཚོགས་སེམས་སྣང་ཐམས་ཅད་སྐྱེ་འགག་མེད་པར་ནམ་མཁའི་རི་མོ་ལྟར་རང་ཡལ་རང་གྲོལ་དུ་ཤེས་པས་སྦྱང་བར་བྱའོ། །གཉིས་པ་དག་པའི་སྒྱུ་ལུས་ལའང་། དང་པོ་རང་མདུན་ཤེལ་སྒོའི་ནང་རྡོར་སེམས་སོགས་ཀྱི་སྐུ་གཟུགས་འཆར་བཅུག་ལ། དེ་ལྟར་དུ་རང་ལུས་ཕུང་ཁམས་སྐྱེ་མཆེད་ཐམས་ཅད་མ་དག་པར་སྣང་ཡང་དོན་ལ་ཤིན་ཏུ་ཕྲ་བའི་རླུང་སེམས་སྒྱུ་མའི་ལྷ་སྐུའི་རྣམ་རོལ་དངོས་སུ་ཡེ་ནས་ཡིན་པར་སྣོད་བཅུད་མ་དག་པའི་སྣང་ཞེན་མི་དམིགས་པའི་སྟོང་པར་སྦྱངས་ལ་གཉུག་མའི་རིག་སྟོང་ཡི་དམ་གྱི་རྣམ་པར་བཞེངས་པ་དང་། དེ་ཡང་ཕུང་ལྔ་རིགས་ལྔ་ཁམས་ལྔ། དབང་ཡུལ་སེམས་དཔའ་སེམས་མ་རྟོག་ཚོགས་ཁྲོ་བོ་ཁྲོ་མོའི་རང་བཞིན་ཏུ་ཡེ་ནས་ཡིན་པ་ལ་ངེས་ཤེས་དང་བཅས་པས་གསལ་བཏབ། དེ་བཞིན་གཞན་རྒྱུད་དུ་སྣང་བའི་ཞིང་དང་སེམས་ཅན་ཐམས་ཅད་གཞལ་ཡས་ཁང་དང་ལྷའི་རང་བཞིན་དག་པ་རབ་འབྱམས་འབའ་ཞིག་གི་རྣམ་རོལ་སྣང་གྲགས་རིགས་གསུམ་ལྷ་སྔགས་ཆོས་ཉིད་ཀྱི་རོལ་བ་བཟའ་བཏུང་ཚོགས་འཁོར་འགུལ་བསྐྱོད་སོགས་ཕྱག་རྒྱ་སོགས་བསྐྱེད་པས་སྦྱང་བར་བྱའོ། །སྦས་དོན་རླུང་སེམས་ཀྱི་སྒྱུ་ལུས་ནི། རླུང་སེམས་དབུ་མར་ཐིམ་པ་ལས་འཆི་རིམ་ཇི་བཞིན་དཔེའི་འོད་གསལ་སྟོང་བ་ལས་ཕྲ་བའི་རླུང་སེམས་སྒྱུ་ལུས་སུ་ལྡང་ལ་

མཐར་དེ་ཉིད་གཉིས་སྣང་ཕྲ་མོ་ནུབ་པའི་དོན་གྱིས་འོད་གསལ་དག་པའི་སྒྱུ་ལུས་སུ་དངོས་སུ་ལྡང་ནུས་པ་ན་རྒྱུ་འོད་ཟུང་འཇུག་གི་སྐུ་ཐོབ་པའོ། །གཉིས་པ་རྨི་ལམ་འཁྲུལ་སྣང་རང་གྲོལ་ལ་གསུམ་ལས། དང་པོ་རྨི་ལམ་བཟུང་བ་ལ། ཉིན་སྣང་ཐམས་ཅད་སྒྱུ་མ་དང་རྨི་ལམ་ཁོ་ནར་བསམས་ཏེ་འདུན་པ་སྦྱངས་ཤིང་ཉལ་ཁར་གསོལ་འདེབས་དང་རྨི་ལམ་འཛིན་པའི་འདུན་པ་བཅས། སེངྒེའི་ཉལ་སྟབས་ཀྱིས་རང་ལུས་གནས་ཁང་ཐམས་ཅད་དང་བཅས་གསལ་འོད་ཀྱི་རྣམ་པར་གསལ་བས་མགྲིན་པར་སྐུ་རྟེན་བླ་མ་ཨོ་རྒྱན་ཆེན་པོ་ཚོན་གང་བ་གསལ་སྟོང་ལམ་མེ་བ་ལ་སེམས་གཏད། རྨི་ལམ་གྱི་རྟེན་ལྷ་མགྲིན་པར་བསྒོམ་ན་མཆོག་ཡིན། འོད་གསལ་གྱི་རྟེན་སྙིང་དབུས་བསྒོམ་ན་མཆོག་ཡིན་མཆན། ཡང་ན་རྡོར་སེམས་སོགས་གསལ་ལ་སེམས་གཏད་དེ་གཉིད་པར་བྱ། སད་རེས་བཞིན་ཡང་ཡང་གསལ་བཏབ་ལ་སེམས་མ་ཡེངས་པར་བྱའོ། །རྣམ་ཤེས་བར་དོའི་སྐབས་བྱ་བ་བྱེད་ལས་ཐམས་ཅད་རྨི་ལམ་ཡིན་བསམ་པ་གལ་ཆེ་མཆན། དེ་བཞིན་དུ་མགྲིན་པར་གསུང་རྟེན་ཡིག་འབྲུ་པདྨ་འདབ་བཞིའི་དབུས་སུ་ༀ་དང་། ཕྱོགས་བཞིར་ཨཿདཀར་མདུན་ནུཿསེར་གཡས་ཏཿདམར་རྒྱབ་རཿལྗང་གཡོན་བཞིར་གསལ་ཏེ་དང་པོ་ༀཿལ་སེམས་གཏད། གཉིད་ཕེབ་དུས་ནས་རིམ་པར་ཨཿནུཿཏཿརཿདང་གཉིད་དུས་ༀཿལ་སེམས་གཏད་དེ་བཟུང་ངོ་། །ཡང་མགྲིན་པར་ཐུགས་རྟེན་འོད་ཀྱི་ཐིག་ལེ་དཀར་གསལ་སྒྲིབ་མེད་ལ་བཟུང་སྟེ་སྦྱངས་པ་རྣམས་སོ། །དེ་དག་གིས་མ་ཟིན་ན་ཚོགས་བསྐངས་དང་བཤགས་པ་དབང་ལེན་པ་སོགས་བྱས་ནས་སྦྱང་ངོ་། །གཉིས་པ་ཟིན་ནས་སྤྲུལ་བསྒྱུར་ལ་བསླབས་པ་ནི། དེ་ལྟར་རྨི་ལམ་ཡིན་པར་ཤེས་དུས་བདེན་མེད་སྟོང་གསལ་གྱི་གཟུགས་ཡིན་པར་ཐག་ཆོད་ནས། མི་ཕོད་པ་ལ་ཐོག་བརྫིས། མི་ཆགས་པར་མཆོད་སྦྱིན་དང་གཏོང་ལེན་སོགས་དང་། ཁྱད་པར་རྨི་ལམ་བག་

ཆགས་ཡིད་ལུས་ཀྱི་ཚབ་ཏུ་འོད་གསལ་ལས་སྒྱུ་མའི་ལྷ་སྐུར་བཞེངས་ཤིང་། ཞིང་ཁམས་རྣམས་སུ་ཆོས་ཞུ་བ་དང་། འཇིག་རྟེན་ཁམས་སུ་འགྲོ་དོན་སོགས་མཛད་པ་ལ་རྩལ་སྦྱངས་ཏེ་སླར་ཡང་སད་ཁར་ལུས་རྙིང་པ་དམ་ཚིག་པ་ལ་སྒྱུ་ལུས་སྦྱང་ཞིང་རྨི་ལམ་གྱི་འདུན་པ་ལ་གོམས་པར་བྱ། ཡེ་ཤེས་པའི་ཚུལ་དུ་སྙིང་གར་འཇུག་པར་དངོས་གྲུབ་མོས་པས་སྦྱང་བར་བྱའོ། །གསུམ་པ་གེགས་སེལ་ལ་བཞི་སྟེ་རྨི་ལམ་ཟིན་ཚེ་སད་པ་ནི་སད་འབྱམས་སྟེ། དེ་ལ་རྐང་མཐིལ་དུ་ཐིག་ལེ་ནག་པོ་སྲན་མ་ཙམ་ལ་སེམས་གཏད། ཟིན་ནས་སླར་བརྗེད་འགྲོ་བ་ནི་བརྗེད་འབྱམས་ཏེ། ཉིན་པར་སྒྱུ་ལུས་དང་མཚན་མོ་ཟིན་པ་མི་བརྗེད་པའི་འདུན་པ་དྲག་ཏུ་བཟུང་། གཉིད་ཡལ་ནས་མི་ཕེབས་པ་སྟོང་འབྱམས་ཏེ། སྙིང་དབུས་སུ་ཐིག་ལེ་ནག་པོ་སྣུམ་བརྗིད་ལྡན་པ་ལྷོད་དེ་སེམས་བཟུང་། བག་ཆགས་འཁྲུལ་འབྱམས་འདས་མ་འོངས་ད་ལྟ་དུས་གསུམ་གྱི་བྱ་བྱེད་ཐམས་ཅད་ཕྱོགས་གཅིག་ཏུ་མཐོང་བ་དེ་ཡིན་མཆན། དམ་འདྲེས་སུ་འཁྲུལ་ཏེ་མི་ཟིན་པར་འབྱམས་པ་ལ་སྒྲིབ་སྦྱངས་བསྐང་བཤགས་སོགས་བླ་མར་མོས་གུས་དང་བར་རླུང་སོགས་ལ་སྦྱངས་ཏེ་འཛིན་པས་སེལ་ལོ། །ལར་རྨི་ལམ་འོད་གསལ་གང་ལ་བླ་མར་མོས་གུས། ཉམས་ལེན་གནད་མཐུད། རྟེན་ཐིག་ལེ་མ་ཉམས་པ། སྣོད་བཅུད་སྒྱུ་མར་ཤེས་པ། ཆགས་སྡང་དབང་དུ་མི་གཏོང་བའི་དྲན་པ་དང་ལྔ་ནི་གལ་ཆེ་བའི་དམ་ཚིག་གོ །གསུམ་པ་འོད་གསལ་གཏི་མུག་རང་གྲོལ་ལ། སྤྱིར་འོད་གསལ་ལ་རྣམ་གྲངས་དུ་མ་ཡོད་ཀྱང་བསྡུས་ན་གཞི་ལམ་འབྲས་གསུམ་གྱི་འོད་གསལ་གསུམ་ལ་འདུ་སྟེ། གཞི་སེམས་ཅན་ཐམས་ཅད་ལ་ཡེ་ནས་འོད་གསལ་བའི་རིག་པ་ཡོད་པས་སྙོམས་འཇུག་བརྒྱལ་བ་གཉིད་དུས་སོགས་ལ་སེམས་འགགས་ཏེ་ཆ་འདྲ་རེ་འཆར་ལ་འཆི་

དུས་འབྱུང་ལྔ་ཐིམ་རིམ་གྱི་རླུང་སེམས་རགས་པ་ནས་འགགས་སྟོབས་ཀྱི་སྨིག་སྒྱུ་སོགས་རྟགས་དྲུག་དང་། སྣང་མཆེད་ཐོབ་གསུམ་རྫོགས་ནས་ཉེར་ཐོབ་དངོས་འཆར་བ་དེ་དང་། ལམ་གྱི་སྐབས་སུའང་རླུང་དང་གཏུམ་མོ་སོགས་སྦྱངས་པའི་སྟོབས་ཀྱིས་བདེ་གསལ་མི་རྟོག་པའི་ཉམས་དང་དཔེའི་འོད་གསལ་སོགས་འཆར་བ་རྣམས་དང་། འབྲས་བུའི་སྐབས་ཁྱབ་བྱེད་ཀྱིི་རླུང་བཅས་སྙིང་གར་ཐིམ་པའོ། །རྫོགས་ཆེན་རླུང་སེམས་རང་དངོས་སུ་ཟད་ནས་གཉིས་སྣང་བྲལ་བའི་དོན་གྱི་འོད་གསལ་མཐར་ཐུག་པ་མངོན་དུ་འགྱུར་བ་དང་གསུམ་མོ། །དེ་ཡང་བསྒོམ་བསྒྲུབ་ཉིན་མཚན་ཁ་སྦྱོར་དུ་འགྲོ་ཐབས་ལ། ཉལ་ཁར་བླ་མར་གསོལ་འདེབས་དབང་ལེན་གྱིས་ཐུགས་ཡིད་དབྱེར་མེད་ངང་དུ་བར་རླུང་ཅུང་ཟད་བཟུང་སྟེ། སྙིང་གར་མི་ཤིགས་པའི་ཐིག་ལེ་སྟོང་གསལ་དྭངས་མ་ལྔ་ལྡན་ལ་སེམས་བཞག་དེ་གཉིད་པས། དང་པོ་རྨི་ལམ་ཟིན། བར་དུ་འལ་འོལ་འཛིན་མེད་དུ་ཡལ། མཐར་རླུང་སེམས་སྙིང་དབུས་སུ་ཐིམ་པས་སྟོང་བཞིའི་འོད་གསལ་རིག་པའི་ངང་མ་ཤོར་བར་རྨི་ལམ་མེད་ཅིང་སྣང་བ་མ་འགགས་པར་སད་པ་འབྱུང་། དེའི་ངང་ལས་སླར་སྒྱུ་མའི་ལྷ་སྐུར་ལྡང་བར་བྱའོ། །དེ་ལ་ཕྱིར་སད་དུས་སྦྱང་སྟོབས་དང་གཉིད་དུས་དང་འཆི་དུས་རང་ཤུགས་ཀྱིས་རླུང་སེམས་འགགས་པ་གསུམ་ལ་རིག་སྟོང་འོད་གསལ་དུ་ཆོས་སྐུའི་གཞི་ལ་སྦྱངས། ཡང་སད་དུས་ལྷར་ལྡང་དང་རྨི་ལམ་བག་ཆགས་ཀྱི་ལུས་དང་། བར་དོའི་ཡིད་ལུས་གསུམ་ལ་དྭངས་མའི་རླུང་སེམས་ལས་སྒྱུ་ལུས་སུ་ལོངས་སྐུར་སྦྱངས། ཉིན་དུས་བསྐྱེད་རིམ་དང་། སད་དུས་ལྷར་ལྡང་དང་། བར་དོའི་སྐྱེ་སྲིད་ལེན་པ་གསུམ་ལ་རགས་པའི་གཟུགས་སྐུ་བཞེངས་པས་སྤྲུལ་སྐུར་སྦྱངས་པ་སྟེ་སྐུ་གསུམ་ལམ་ཁྱེར་

བྱེད་ཚུལ་འདི་དག་བླ་མེད་སྤྱིའི་དགོངས་པ་ཡིན་ནོ། །སྤྱི་དོན་གསུམ་པ་བསམ་གཏན་བར་དོའི་ཁྲིད་རིག་པ་རང་གྲོལ་སྒེག་མོས་མེ་ལོང་ལ་བལྟ་བ་ལྟ་བུའི་གདམས་ངག་ལ་མཉམ་རྗེས་གཉིས་ལས། དང་པོ་མཉམ་གཞག་ནམ་མཁའ་སུམ་ཕྲུགས་ཀྱི་གདམས་པ་ནི། ཕྱིའི་ནམ་མཁའ་སྟོང་པ་མཐའ་དབུས་མེད་པའི་དབྱིངས་དང་། ནང་གི་ནམ་མཁའ་སེམས་ཉིད་ཡེ་ནས་སྤྲོས་པའི་མཐའ་དང་བྲལ་བ་སྨྲ་བསམ་ཡུལ་ལས་འདས་པའི་དབྱིངས་དང་། གསང་བའི་ནམ་མཁའ་ཙིཏྟ་རིན་པོ་ཆེའི་སྦུབས་ལ་མིག་སྒོར་འབྲེལ་བའི་འོད་རྩ་ཀ་ཏི་ཤེལ་གྱི་སྦུ་གུ་ཕྱི་ནང་ཟང་ཐལ་སྒྲིབ་མེད་འོད་ཀྱི་ལམ་ནས་དབྱིངས་རིག་སྟོང་གསལ་འཛིན་མེད་དབྱེར་མེད་ངང་དུ་རང་སར་བཞག་པས་འོད་གསལ་རིག་པའི་ཡེ་ཤེས་རང་ཐོག་ཏུ་སྤྲད་པའོ། །དེ་ལ་ལུས་མི་གཡོ། མིག་མི་འགུལ། རླུང་རང་བབས་སུ་སྣང་བ་རང་བབ་རིག་པ་ཅོག་བཞག་གི་ངང་ལ་དྲན་པ་གཏད་མེད་རྣམ་རྟོག་བདག་མེད་དུ་འཇོག་པ་ནི་གནད་ཆེ་ལ། ལྟ་བ་རི་བོ་ཅོག་གཞག །སྒོམ་པ་རྒྱ་མཚོ་ཅོག་གཞག །སྤྱོད་པ་སྣང་བ་ཅོག་གཞག །འབྲས་བུ་རིག་པ་ཅོག་གཞག །རྣམ་པ་བཞི་རུ་གསུངས་སོ། །མཉམ་རྗེས་གང་ལའང་རིག་པ་ཡེངས་མེད་འཛིན་མེད་མ་བཅོས་རང་ཁར་འཇོག་པ་ལས་གཞན་མེད་པར་ཐག་གཅིག་ཐོག་ཏུ་བཅད་པར་བྱའོ། །གཉིས་པ་རྗེས་ཐོབ་རྟོག་ཚོགས་རང་གྲོལ་ལ་སྤྱིར་མཉམ་གཞག་ནམ་མཁའ་ལྟ་བུ། རྗེས་ཐོབ་སྒྱུ་མ་ལྟ་བུ་སོགས་འཇོག་ཚུལ་མང་ཡང་འདིར་རིག་པ་ཡེ་ཤེས་ཁོ་ན་ལས་དབྱེ་བ་མེད་པས་དེ་ལ་བཟང་ངན་གྱི་རྟོག་ཚོགས་གང་ཤར་ཐམས་ཅད་ཡེ་ནས་རང་གྲོལ་དུ་ཡོད་དེ། ད་གཟོད་གྲོལ་མི་དགོས་ཏེ་མ་བཅོས་པར་འཇོག་པ་གནད་རང་གི་ངོ་བོས་རང་གྲོལ་ནས་གཉེན་པོ་མི་དགོས་ཏེ་བཟོ་བཅོས་མི་བྱེད་པ་གནད་ཅེར་

གྱི་ཤར་ཙམ་ན་ཡུལ་མེད་ཟང་ཐལ་དུ་གྲོལ་ཚར་བས་རྟོག་དཔྱོད་མི་ཁོམ་སྟེ་རང་སར་འཇོག་པ་གནད། དེ་ཡང་སྤྲོས་པའི་མཐའ་ཐམས་ཅད་ལས་གྲོལ་ནས་བློས་དཔྱད་འཇོག་མི་དགོས་ཏེ་རྩོལ་མེད་དུ་འཇོག་པ་གནད་ཡིན་ནོ། །དེ་ལྟར་ངོ་བོ་དང་རྩལ་སོ་སོ་མ་ཡིན་ཆུ་དང་རླན་ཉི་མ་དང་ཟེར་གདངས་ལྟར་ཤེས་པའི་གྲོལ་ལུགས་བཞིས་གདེངས་གྲོལ་ཐོག་ཏུ་བཅའ་དགོས་པའོ། །རིམ་པར་གོམས་པའི་ཆ་ནས་གྲོལ་ལུགས་གསུམ་དུའང་གསུངས་སོ། །སྤྱི་དོན་བཞི་པ་འཆི་ཁ་བར་དོ་འཕོ་བ་དྲན་པ་རང་གྲོལ་རྒྱལ་པོའི་བཀའ་ཐམ་བསྐུར་བ་ལྟ་བུའི་གདམས་ངག་ལ། འཆི་ལྟས་བརྟགས་ཏེ་བཟློག་པ་དང་། མ་བཟློགས་ན་འཕོ་བའི་གདམས་པ་བསྒོམ་པ་དང་གཉིས་ལས། དང་པོ་འཆི་ལྟས་མཚན་མ་རང་གྲོལ་ལྟར་དུ་རིང་བ་དང་ཉེ་བ་དང་ཤིན་ཏུ་ཉེ་བའི་རྟགས་རྣམས་ལ་དུས་སུ་ལེགས་པར་བརྟགས་ཏེ་འཆི་རྟགས་བྱུང་ན་ནི་འཆི་བསླུ་འཇིགས་པ་རང་གྲོལ་ལྟར་དང་། ཚེ་སྒྲུབ་འཆི་བསླུ་སོགས་བྱས་ཏེ་བཟློག་གོ །གཉིས་པ་ལ་འཕོ་བ་སྦྱང་ཚུལ་དང་། འཆི་དུས་ལས་ལ་སྦྱར་བ་གཉིས་ལས། དང་པོ་འཕོ་བ་སྦྱང་བ་ལ་ལུས་གནད་སྐྱིལ་ཀྲུང་དྲང་པོ་ས་གནོན་པུས་བཀབ་དཔུང་བརྒྱང་དེ་རླུང་རོ་བསལ་རང་ལུས་སྟོང་གསལ་འོད་ཀྱི་སྙིང་གར་ཧཱུྃ་མཐིང་གསལ་བ་ལས་ཧཱུྃ་དགུ་ཆད་དེ་འཁོར་བའི་སྒོ་བུ་ག་དགུ་པོ་ཐེམ་གྱིས་བཀག །ལུས་དབུས་དྲང་པོར་རྩ་དབུ་མ་དཀར་ལ་སྔོ་བའི་མདངས་ཅན་དྲང་ཞིང་གསལ་བ་མར་སྣེ་ལྟེ་འོག་ཏུ་ཟུག་པ། ཡར་སྣེ་ཚངས་བུག་ཏུ་ཧར་རེ་ཡོད་པ་ཧཾ་གིས་བཀག་པར་གསལ། ལྟེ་འོག་རྣམ་ཤེས་ཀྱི་ངོ་བོ་ཐིག་ལེ་དཀར་འཚེར་འཕར་ལྷང་ལྷང་ཡོད་པ། སྤྱི་བོར་བླ་མ་རྡོ་རྗེ་འཆང་ངམ་འོད་དཔག་མེད་ཀྱི་རྣམ་པར་གསལ་བའི་མཐར་བརྒྱུད་པའི་བླ་

མ་ཐམས་ཅད་ཀྱིས་བསྐོར་བ་ལ་མོས་གུས་དྲག་པོས་འཇའ་ཟུག་མ་སོགས་ཀྱི་གསོལ་བ་བཏབ་རྗེས་ཧིག་བདུན་བདུན་གྱིས་ལྟེ་བ་སྙིང་ག་མགྲིན་པ་སྨིན་མཚམས་སྤྱི་བོའི་ཧཾ་ལ་བསྟིིམས་པའམ་བླ་མའི་ཐུགས་ཀར་བསྟིམས་ལ། སླར་ཡང་མར་ཕབ་སྟེ་ཡང་ཡང་སྦྱང་ངོ་། །གཉིས་པ་ལས་ལ་སྦྱར་བ་ལ་འཆི་དུས་འབྱུང་བའི་ཐིམ་རིམ་དང་། འཆི་ཚེ་འཕོ་ལུགས་རྣམ་ལྔ་དང་། ཤི་རྒྱབ་སྐྱེ་གནས་སྦྱོང་ཐབས་དང་གསུམ་ཡོད་པའི་དང་པོ་ནི། ཕྱིའི་འབྱུང་ལྔ་ཐིམ་པས་ཡུལ་ལྔ་འགག་སྟེ་ལུས་ལྕི་ཞིང་ཁ་སྣ་སྐམ་པ་སོགས་རྟགས་རྣམས་འབྱུང་། ནང་གི་སྣང་བ་དཀར་ལམ་དང་། མཆེད་པ་དམར་ལམ། ཐོབ་པ་ནག་ལམ་གསུམ་བྱུང་། ཞེ་སྡང་གི་རྟོག་པ་སོ་གསུམ། འདོད་ཆགས་ཀྱི་རྟོག་པ་བཞི་བཅུ། གཏི་མུག་གི་རྟོག་པ་བདུན་ཏེ། རང་བཞིན་བརྒྱད་ཅུའི་རྟོག་པ་རླུང་དང་བཅས་པ་འགགས་ཤིང་ཉེར་ཐོབ་སྟོད་ཆར་དུ་བརྒྱལ་ལོ། །སྨད་ཆར་གསང་བ་གཞིིའི་འོད་གསལ་སྟོན་ནམ་གཡའ་དག་པ་ལྟ་བུ་འཆར་བའོ། །གཉིས་པ་དེ་དག་གི་ཚེ་འཕོ་ལུགས་རྣམ་པ་ལྔ་ལས། རབ་འཆི་ཁར་ཆོས་སྐུའི་འཕོ་བ་ནི། སེངྒེའི་ཉལ་སྟབས་སོགས་ཀྱིས་སྐྱེ་འཆི་རྨི་ལམ་གྱི་སྣང་བ་ལྟ་བུར་ཐག་ཆོད་པས་ཐིམ་རིམ་སྐབས་རྟགས་བཞི་དང་སྟོང་པ་བཞི་སོགས་ངོ་ཤེས་བཞིན་གཞིའི་འོད་གསལ་འཆར་དུས་དང་ད་ལྟ་ལམ་གྱི་འོད་གསལ་སྦྱངས་པ་དང་གཉིས་ཀ་མ་བུ་འཕྲད་ལྟར་དབྱེར་མེད་རང་གྲོལ་ཆེན་པོར་བཞག་པས་འཕོ་བའོ། །དེ་ལ་ཕྱི་རྟགས་ནམ་མཁའ་གཡའ་དག་པ་དང་། ནང་རྟགས་ཕུང་པོར་བཀྲག་མདངས་གསལ་བ་དང་། གསང་རྟགས་ཡིག་འབྲུ་སོགས་འབྱུང་ངོ་། །འབྲིང་བར་དོ་ལོངས་སྐུའི་འཕོ་བ་ནི། ད་ལྟར་བསྐྱེད་རྫོགས་ལ་གོམས་པས་འོད་གསལ་ལས་སྒྱུ་ལུས་ཀྱི་སྐུར་བཞེངས་པའམ་ཐོད་རྒལ་གོམ་པས་ཆོས་ཉིད་བར་དོར་རང་སྣང་ལོངས་སྐུར་

ཤེས་པས་གཉིས་མེད་དུ་གྲོལ་བ་སོགས་ཡིན་ལ། དེ་ལ་ཕྱི་རྟགས་འཇའ་འོད་སོགས་དང་། ནང་རྟགས་སྤྱི་བོར་ཆུ་སེར་ཐོན་པ་སོགས་དང་། གསང་རྟགས་སྐུའམ་ཡིག་འབྲུ་བབས་པ་སོགས་འབྱུང་ངོ་། །ཐ་མ་སྐྱེ་སྲིད་རང་བཞིན་སྤྲུལ་སྐུའི་ཞིང་དུ་འཕོ་བ་ནི། འཆི་ཁར་འཕོ་བའི་གདམས་པས་བླ་མའི་ཐུགས་དང་བསྲེས་ཏེ་བདེ་བ་ཅན་སོགས་སུ་སྐྱེ་བ་དང་། བར་དོ་ནས་ངོ་ཤེས་ཏེ་ཡི་དམ་ལྷ་དང་ཞིང་ཁམས་ལ་འཕེན་པ་གཏད་པས་ཞིང་ཁམས་སུ་སྐྱེ་བ་ཡོད་དོ། །དེ་ལ་རྟགས་སྤྲིན་འཇའ་དང་སྣ་བུག་ནས་ཁམས་འཛག་པ་དང་ལུས་ལ་རྟེན་ཕྲ་མོ་སོགས་འབྱུང་ངོ་། །འདི་དག་གི་དུས་ཐམས་ཅད་དུ་འཆི་ཁར་ནོར་རྫས་གཉེན་གྲོགས་ལ་ཆགས་ཞེན་བཅད་དེ་བླ་མ་དཀོན་མཆོག་ལ་དངོས་སམ་ཡིད་ཀྱིས་འབུལ། སྡོམ་གསུམ་གསོ་སྦྱོང་སོགས་བྱས་ཏེ་བླ་མ་དང་མཆེད་གྲོགས་སོགས་ཀྱི་གསལ་འདེབས་མཁན་འཛོམས་ན་རབ། མེད་ཀྱང་རང་གིས་དང་པོ་ནས་གདམས་ངག་རྣམས་ཡིད་ལ་བཞག་སྟེ། ཕྱིའི་ཐིམ་རིམ་ཡོང་དུས་ནས་འཕོ་བའི་དམིགས་པ་སྔར་སྦྱང་དུས་ལྟར་བྱས་ཏེ་རྣམ་ཤེས་ཐིག་ལེ་རླུང་མིག་སེམས་གསུམ་གཅིག་ཏུ་དྲིལ་ཏེ་ཚངས་བུག་ནས་མདའ་འཕངས་པ་ལྟར་བླ་མའི་ཐུགས་ཀར་བསྟིམས་ཏེ་སླར་མ་འཕྲོ་བར་རོ་གཅིག་ཁྱབ་གདལ་ངང་ལ་བཞག་པར་བྱའོ། །དེ་ལ་མཆེད་གྲོགས་སེལ་མེད་པ་གཅིག་གིས་རྣ་བར་འོད་གསལ་དང་ཆོས་ཉིད་བར་དོ་སོགས་གང་དགོས་རང་རང་ཐད་ཀར་ངོ་སྤྲོད་གདབ། ཁྱད་པར་དུ་ཐོས་གྲོལ་ཆེན་མོ་དང་བཏགས་གྲོལ་སོགས་ཡང་ཡང་བཀླགས་པས་མི་གྲོལ་བ་ནི་མི་སྲིད་པ་ལྟ་བུའོ། །ཞོར་བྱུང་སྐད་ཅིག་མའི་འཕོ་བ་ནི་དེ་ལྟར་སྦྱང་ལོང་མེད་པར་གློ་བུར་དུ་ཐོག་དང་རྦབ་ལྟ་བུས་འཆི་བ་ལ། ད་ལྟ་ནས་སྐྲགས་སྔངས་སོགས་གློ་བུར་ཡེད་དེ་བ་ནམ་བྱུང་ལ་དེ་མ་ཐག་སེམས་སྤྱི་

བོར་བླ་མའི་ཐུགས་དང་བསྲེ་བ་ལ་སྦྱངས་ཏེ་གོམས་ན་འཆི་ཚེ་ཡང་བླ་མའི་ཐུགས་ཀར་བསྲེ་འཕོས་སུ་འགྱུར་བའི་ཐབས་ཟབ་བླ་ན་མེད་པའོ། །ཐ་མལ་བ་གང་ཡང་མ་སྦྱངས་བ་དང་དུད་འགྲོ་ལྟ་བུ་སོགས་ལ་སྡིག་བཤགས་སྡོམ་གཟུང་དབང་བསྐུར་སོགས་བྱེད་ཅིང་དམ་རྫས་བྱིན་གྱིས་བརླབས་ནས་འཕོ་རྫས་སོགས་གང་འཛོམས་བྱས་ལ་གློ་གཡས་སར་ཕབ་ཁ་ནུབ་མགོ་བྱང་དུ་བསྟན་ལ་མཚན་དང་གཟུངས་སྔགས་སོགས་བརྗོད་ཅིང་སྤྱི་བོར་སྐྲ་ནས་འཐེན། བཏགས་གྲོལ་བྱེ་སྔགས་སོགས་ཀྱིས་ངན་སོང་དུ་མི་སྐྱེ་བར་ལྷ་མིའི་རྟེན་བཟང་ཐོབ་པ་སོགས་བསླུ་མེད་རྒྱལ་བའི་བཀའ་ལ་ཡིད་ཆེས་པར་བྱའོ། །གསུམ་པ་ཤི་རྒྱབ་སྐྱེ་གནས་སྦྱོང་ཐབས་ལ་གཉིས་ལས། དང་པོ་གར་སྐྱེ་བརྟགས་པ་ལ། འཆི་ཁར་དྲོད་མཆན་གཡས་དང་མགྲིན་པར་འདུས་ན་ལྷ་མིན། སྤྱིར་བོར་ལྷ། མིག་གཡས་གཡོན་དང་སྨིན་ཕྲག་མི། ལྟེ་བར་དུད་འགྲོ། མཚན་མར་ཡི་དྭགས། རྐང་མཐིལ་དམྱལ་བ། རྣ་བར་གནོད་སྦྱིན་དུ་སྐྱེ་རྟགས་དང་། རིགས་དྲུག་གི་སྣང་བ་དངོས་སམ་ཕྱོགས་མཐུན་སྣང་ཚུལ་དང་། ལུས་ཀྱི་གཡོ་བསྐྱོད་ཁའི་ཅ་ཅོ་སེམས་ཀྱི་དགའ་ཕྱོགས་སོགས་ལ་བརྟགས། ཤི་རྒྱབ་ཞག་ལྔ་དྲུག་ཚུན་ལ་ནམ་མཁའ་དྭངས་འཐིབ། སྤྲིན་དཀར་ནག་རྒྱུ་ལུགས། ཁ་ཆར་རླུང་གི་འབེབས་ལུགས། འཇའ་འོད་རྟགས་མཚན་སོགས་ལས་སྐྱེ་གནས་བརྟག་ཐབས་ཐེག་མཆོག་མཛོད་དང་མཚན་མ་རང་གྲོལ་ལྟར་ཤེས་པར་བྱས་ནས་བཟང་པོ་ལ་གྲོགས་དང་ངན་པ་སྦྱོང་ཐབས་ལ་འབད་པར་བྱའོ། །ཉིན་ཚོད་ཀྱི་དུས་ཚོད་བཅུ་གཉིས་ནི་དབུགས་ནམ་ཆད་ན་སང་ཉིན་དེའི་དུས་ཚོད་ནས་ཞག་གཅིག་དུ་བརྩི་དགོས་ལ་བདུན་ཚིགས་ཞེ་དགུ་ཡང་ཚང་བར་དགོས་སོ་མཆན། གཉིས་པ་སྐྱེ་གནས་ངན་པ་སྦྱོང་ཐབས་ལ། འཆི་ཁར་མི་དེའི་སྙིང་ནང་དུ་ཨ་དཀར་པོ་བསམ་

ལ་སྤྱི་བོར་ཁ་གཏད་དེ་ཨཿལོ་གྲངས་དབྱངས་ཀྱིས་བརྗོད་པས་སེམས་ཨའི་རྣམ་པར་ཡར་ཡར་སྤྱི་བོར་སོང་བའི་དམིགས་པ་རང་གཞན་གཉིས་ཀས་བྱས་པས་སྡིག་སྒྲིབ་ཅན་མཐོ་རིས་སུ་འདོང་ངོ་། །ཤི་རྒྱབ་བདུན་གཅིག་ཚུན་རོ་རྩར་ཁྲོ་བོའི་དཀྱིལ་འཁོར་དང་བཅས་པའི་བུམ་པ་བསྒྲུབས་ཏེ། བུམ་པ་སྤྱི་བོར་བཞག་སྟེ་ཨཿལོ་གྲངས་བརྗོད་ནས་བཀྲུས་པས་དམྱལ་བ་ནས་སྟོང་ངོ་། །དེ་བཞིན་མགྲིན་པར་བཞག་སྟེ་བྷྱཿབརྗོད་བཀྲུས་པས་ཡི་དྭགས་དང་། གསང་བར་རྒྱཿབརྗོད་བཀྲུས་པས་བྱོལ་སོང་དང་། མཆན་ཁུང་ཀེཾཿབརྗོད་པའི་བཀྲུས་པས་ལྷ་མིན། སྤྱི་བོར་ཏཾཿབརྗོད་བཀྲུས་པས་ལྷ་དང་། སྙིང་གར་ༀ་ཨཱཿཧཱུྃ་སྭ་ཧ་བརྗོད་པས་བཀྲུས་པས་མིའི་སྐྱེ་གནས་ངན་པ་ལས་དྲངས་ཏེ་མི་ལུས་རིན་པོ་ཆེའམ་ཐར་བ་རྙེད་པར་འགྱུར་རོ། །ཕྱིས་ཞག་བདུན་གཅིག་ནས་ཞེ་དགུ་བར་གང་དགོས་སུ་ཞི་ཁྲོའི་དཀྱིལ་འཁོར་བཞེངས་ཏེ་རིགས་དྲུག་གནས་འདྲེན་སོགས་བྱས་པས་ངན་སོང་དུ་སྐྱེས་ཀྱང་དྲངས་བར་གསུངས་སོ། །སྤྱི་དོན་ལྔ་པ་ཆོས་ཉིད་བར་དོའི་ཁྲིད་མཐོང་བ་རང་གྲོལ་མ་པང་དུ་བུ་འཇུག་པ་ལྟ་བུའི་གདམས་ངག་ལ། བར་དོའི་འཆར་ཚུལ་དང་། དེ་གྲོལ་བྱེད་ཀྱི་གདམས་ངག་བསྒོམ་པ་གཉིས་ལས། དང་པོ་ནི། འཆི་དུས་སེམས་ཕྲ་རགས་ཐམས་ཅད་ཐིམ་ནས་གཞིའི་འོད་གསལ་མངོན་དུ་གྱུར་པ་ལས་སླར་ཡང་མཆེད་པའི་སྣང་བ་ཐམས་ཅད་ཟ་འོག་ཁ་ཕྱེས་པ་ལྟར་འཇའ་འོད་ཐིག་ལེ་འཁྲིགས་པའི་ཀློང་དུ་བསམ་གཏན་གྱི་ཞག་དང་པོ་ནས་རིམ་པར་ཟུང་འཇུག་སྐུ་ཡི་ཚོམ་བུར་འཆར་བ་ལ་ཞག་དང་པོ་ལ་རྣམ་སྣང་ཡབ་ཡུམ་ཀྱི་ཐུགས་ཀའི་ཆོས་དབྱིངས་ཡེ་ཤེས་ཀྱི་རང་འོད་མཐིང་ག་དང་། ལྷ་ཡི་འོད་དཀར་པོ་གཉིས་ཀ་གཤིབ་སྟེ་འཆར་རོ། །དེ་བཞིན་དུ་གཉིས་པར་མི་བསྐྱོད་ཡབ་ཡུམ་གཙོ་འཁོར་དྲུག་གི་གཙོ་བོའི་ཐུགས་

ཀའི་འོད་དཀར་པོ་དང་དམྱལ་བའི་འོད་དུད་ཁ་གཉིས་ཀ་འཆར། གསུམ་པར་རིན་འབྱུང་ཐུགས་ཀའི་འོད་སེར་པོ་དང་མིའི་འོད་སྔོན་པོ། བཞི་པར་སྣང་མཐའི་ཐུགས་ཀའི་འོད་དམར་པོ་དང་ཡི་དྭགས་འོད་སེར་པོ། ལྔ་པར་དོན་གྲུབ་ཐུགས་ཀའི་འོད་ལྗང་གུ་དང་ལྷ་མིན་འོད་དམར་པོ་འཆར། དྲུག་པར་ཡེ་ཤེས་བཞི་སྦྱོར་གྱི་སྣང་བ་རིགས་ལྔ་ཞི་བའི་ལྷ་ཚོགས་ཐམས་ཅད་ཤར་བའི་ཐུགས་ཀའི་འོད་ཀྱི་སྣམ་བུ་མཐིང་དཀར་སེར་དམར་བཞི་བརྩེགས་སྟེང་དུ་འོད་ཟླུམ་རྨ་བྱའི་གདུགས་ལྟར་འཆར། བདུན་པར་རིག་འཛིན་ལྷ་ཚོགས་ཀྱི་ཐུགས་ཀའི་འོད་ཁ་དོག་ལྔ་བསྒྲིལ་དང་། དུད་འགྲོའི་འོད་ལྗང་གུ་གཉིས་འཆར་རོ། །ཞག་བརྒྱད་པ་ནས་རིམ་པར་བཅུ་གཅིག་བར་དུ་བུདྡྷ་ཧེ་རུ་ཀ་དང་བཛྲ་རཏྣ་པདྨ་ཀརྨ་ཧེ་རུ་ཀ་ལ་ཀཽ་སེང་དབང་ཕྱུག་དང་བཅས་པ་འཆར་རོ། །དེ་ནས་ལྷུན་གྲུབ་སྒོ་བརྒྱད་ཀྱི་སྣང་བ་ཀ་དག་ནམ་མཁའ་འདྲ་བ་ལས་སྟེང་དུ་ཞི་ཁྲོའི་ལྷ་ཚོགས་དང་། འོག་ཏུ་རིགས་དྲུག་གི་སྣང་ཆ་འགག་མེད་དུ་ཤར་བ་ཐམས་ཅད་རང་སྣང་རིག་པའི་རྩལ་ལས་བདེན་མེད་དུ་ཤེས་པས་གྲོལ་བར་འགྱུར་རོ། །དེའི་ཚེ་མངོན་ཤེས་ལྔ་དང་རྗེས་དྲན་དྲུག་དང་གཟུངས་སྤོབས་ཏིང་འཛིན་སོགས་དཔག་མེད་འཆར་བར་གསུངས་སོ། །གཉིས་པ་དེ་གྲོལ་བྱེད་ཀྱི་གདམས་ངག་ལ། ད་ལྟ་ལྷུན་གྲུབ་ཐོད་རྒལ་གྱི་སྣང་བ་ལ་སྦྱང་དགོས་ཏེ། དེ་ལ་སྒོ་གསུམ་གྱི་གནད་གཟིར་བ། མངོན་སུམ་རང་ཐོག་གི་གནད་གསུམ་བསྟེན་པ། སྣང་བ་བཞི་ཡི་འཆར་ཚུལ། མཐའ་བརྟེན་གྱི་མན་ངག་དང་བཞི་ལས། དང་པོ་སྒོ་གསུམ་གྱི་གནད་ནི་ལུས་བཞུགས་སྟེང་གསུམ་ལས་མི་འགུལ། ངག་སྨྲ་བཅད་ལས་མི་གཡོ། ཡིད་དབྱིངས་རིག་འབྲལ་མེད་དུ་བྱ་བ་རྣམས་སོ། །གཉིས་པ་སྒོ་ཡུལ་རིག་པའི་གནད་གསུམ་ནི། སྙིང་དབུས་ཙིཏྟ་ཤ་ཡི་

སྒྲོན་མ་དང་འབྲེལ་བའི་རྩ་ཀ་ཏི་ཤེལ་གྱི་སྦུ་གུ་ནས་ཤེས་རབ་རང་བྱུང་གི་སྒྲོན་མ་མིག་རྒྱང་ཞགས་ཆུ་ཡི་སྒྲོན་མའི་སྒོར་སྣང་བས། མིག་སྐུ་གསུམ་གྱི་གཟིགས་སྟངས་གསུམ་དང་མི་འབྲལ་བར་བྱ། ཡུལ་གྱི་དབྱིངས་ནམ་མཁའ་སྟོང་སེང་ལ། ནང་དབྱིངས་རྣམ་པར་དག་པའི་སྒྲོན་མ་མཐིང་སྐྱའི་རྣམ་པ་ཁ་དོག་ལྔ་ལྡན་གྱི་དབུས་སུ་རིག་སྟོང་ཡེངས་མེད་འཛིན་མེད་དུ་འཇོག་པ་དང་། རླུང་གནད་ཁ་ནས་དལ་བར་ཕྱིར་རྒྱུ་བ་ནོན་ཙམ་དུ་རང་བབས་སུ་བཞག་པ་ལས། རིག་པ་རྡོ་རྗེ་ལུ་གུ་རྒྱུད་དབྱིངས་ཀྱི་ར་བར་ཐིག་ལེ་སྟོང་པའི་སྒྲོན་མའི་དབུས་སུ་རེ་དོགས་གཡོ་མཁྲིགས་༼འཕྲུགས་༽མེད་པར་བཞག་པར་བྱའོ། །གསུམ་པ་སྣང་བཞིའི་འཆར་ཚུལ་ནི། དེ་ལྟར་སྦྱངས་པས་དབྱིངས་སྣང་དང་སྟོང་སྒྲོན་ཐམས་ཅད་བཀྲ་ལམ་མེར་མཐོང་བ་ནས་ཆོས་ཉིད་མངོན་སུམ་པའི་མགོ་ཟིན། དེ་ནས་དབྱིངས་ཇེ་གསལ་ཇེ་རྒྱས་སུ་སྨིན་མཚམས་ལས་བྲལ་ཏེ་གར་གཏད་དུ་ལྷ་སྐུ་རྐྱང་བ་རེ་སྣང་ལ་གཡོ་འཁྲིགས་༼འཕྲུགས་༽མེད་པར་སྡོད་ཚེ་ཉམས་གོང་འཕེལ་མགོ་ཟིན། དེ་ནས་ཐིག་ལེ་རེ་རེའི་ནང་དུ་ལྷ་སྐུ་ཡབ་ཡུམ་ཚོམ་བུར་སྣང་བས་གང་སྟེ། གང་སྣང་སྐུ་དང་ཞིང་ཁམས་ལ་སོང་ཚེ་རིག་པ་ཚད་ཕེབ། དེ་ནས་ནང་ཤེས་ཉམས་ཕྱིའི་སྣང་ཉམས་ཐམས་ཅད་རིམ་པར་ཟད་དེ་ལུས་སེམས་སོགས་ཆོས་ཅན་གཉིས་སྣང་ཐམས་ཅད་ཆོས་ཉིད་ཀ་དག་གི་གཞི་ལ་ཟད་ནས་སངས་རྒྱས་མངོན་དུ་གྱུར་བའོ། །བཞི་པ་མཐའ་རྟེན་མི་འགུལ་བ་གསུམ་ལ་གཞི་བཅའ་བ། སྡོད་པ་གསུམ་ཀྱི་ཚད་གཟུང་བ། ཐོབ་པ་གསུམ་གྱི་གཟེར་ཐེབ་པ། གདེངས་ཆེན་བཞི་མཐར་ཕྱིན་པ་བཞི་ལས། དང་པོ་ལུས་བཞུགས་སྟངས་དང་མིག་གཟིགས་སྟངས་དང་། སེམས་

བཟོ་མེད་གསུམ་ལས་མི་འགུལ་བའོ། །གཉིས་པ་ལུས་འགུལ་བསྐྱོད་མེད་པར། རླུང་རང་བབ་དལ་བར། སྣང་བ་འདར་འཁྲིགས་༼འཕྲུགས་༽མེད་པར་སྡོད་པ་གསུམ་མོ། །དེ་ཚེ་ཚད་རྨི་ལམ་གྱིས་འཛིན་པ་དང་། རྟགས་སྒོ་གསུམ་ལ་འཆར་བའི་ཚུལ་ལས་ཤེས་པར་བྱའོ། །གསུམ་པ་ནི་ཕྱིའི་སྣང་བ་དང་། ནང་གི་སྒྱུ་ལུས་དང་། གསང་བ་རླུང་སེམས་ལ་རང་དབང་ཐོབ་པ་འབྱུང་ངོ་། །བཞི་པ་ནི། ཡར་སངས་རྒྱས་ཐོབ་ཏུ་རེ་བ་དང་། མི་ཐོབ་ཀྱི་དོགས་པ་མེད་ལ། མར་ངན་སོང་ལ་ལྟུང་བའི་དོགས་པ་དང་། མི་ལྟུང་བའི་རེ་བ་མེད་པའི་གདེངས་རྙེད་པའོ། །སྤྱི་དོན་དྲུག་པ་སྲིད་པ་བར་དོའི་ཁྲིད་ལས་ཀྱི་འཕྲོ་མཐུད་པ་ཡུར་བ་རྐང་ཆད་པ་ལ་ཝ་འཛུགས་པ་ལྟ་བུའི་གདམས་ངག་ལ་གཉིས་སྟེ། བར་དོའི་རྟགས་དང་། དེ་གྲོལ་བྱེད་ཀྱི་གདམས་པའོ། །དང་པོ་སྲིད་པ་བར་དོའི་རྟགས་ནི། ཆོས་ཉིད་བར་དོའི་སྣང་ཆ་ཡལ་བ་དང་། ཐ་མལ་བའི་རང་ཡུལ་སོགས་སྣང་སྟེ། དེ་ཡང་འབྱུང་བ་བཞིའི་རླུང་ལོག་པའི་འཇིགས་པའི་སྒྲ་བཞི་ནི། ས་གཡོ་རི་ཉིལ། ཆུ་འཁྲུགས་མཚོ་ལུད་པ། མེ་མཆེད་འབར་བ། རླུང་འུར་བ་ཆེན་པོ་འབྱུང་ངོ་། །དུག་གསུམ་གྱི་རང་གཟུགས་ཡ་ང་བའི་གཡང་ས་ཆེན་པོ་འདོད་ཆགས་ཀྱི་རང་གཟུགས་དམར་ཟིང་ངེ་བ། ཞེ་སྡང་གི་རང་གཟུགས་སྐྱ་ཆད་དེ་བ། གཏི་མུག་གི་རང་གཟུགས་ནག་ལམ་མེ་བ་གསུམ་དང་། ངེས་པའི་རྟགས་ཉི་ཟླ་མེད་ལ་སྐྱ་འོད་དེ་བ་དང་། ས་བྱེ་མར་རྐང་རྗེས་དང་ལུས་ཀྱི་གྲིབ་མ་སོགས་མེད་པ། ལུས་རི་བྲག་ཟང་ཐལ་དུ་གང་ལའང་མི་ཐོགས་པ། གར་བསམ་པ་ཙམ་གྱི་སླེབ་པ། ཆུ་ལ་མི་བྱིང་བ། གཏམ་སྨྲས་ཚད་ལ་ལན་མི་འོང་བ་སྟེ་དྲུག་དང་། མ་ངེས་པའི་རྟགས་གནས་ཁང་གྲུ་ཟམ་འཇག་སྐྱ་བཟང་ངན། གྲོགས་འབྱུང་པོ་ཡི་དྭགས་སྣ་ཚོགས། ལུས་མི་རྟག་པ་ཟས་གོས་དྲི་

གསུར་ཙམ། འགྲོ་འདུག་ཡིད་ཡུལ་སྤྱོད་ལམ་སྣ་ཚོགས་འགྱུར་བ་སོགས་མདོར་ན་སྣང་བ་སྐྱིད་སྡུག་བཟང་ངན་ཐམས་ཅད་མི་རྟག་པ་མ་ངེས་པའི་སྣང་བ་སྣ་ཚོགས་འཆར་ཞིང་། མིང་བཞིའི་ཕུང་པོ་གང་ལ་ཐོགས་པ་མེད་པ་མངོན་ཤེས་དང་རྫུ་འཕྲུལ་ཅུང་ཟད་རེ་ཡོད་པ། ལུས་དང་ཆ་བྱད་ཕལ་ཆེར་བར་དོའི་ཕྱེད་སྔ་མ་དང་ཕྱེད་ཕྱི་མའི་རྣམ་པ་འཆར་ལ། ཚེ་ཚད་བདུན་ཕྲག་བདུན་ལ་འཕོ་ངེས་ལ། དེ་ལས་རིང་བ་སྲིད་ཙམ་མོ། ལོ་ལྔའམ་བརྒྱད་ཀྱི་ན་ཚོད་དབང་པོ་ཀུན་ཚང་སོགས་རྒྱས་པར་མཚན་ཉིད་ཉི་ཤུ་ཐེག་མཆོག་མཛོད་སོགས་ནས་གསུངས་པ་ལྟར་ལ། གལ་ཆེ་སྐྱེ་གནས་བརྟགས་ཐབས་འོག་ཏུ་འཆད་དོ། །གཉིས་པ་གདམས་པ་དངོས་ལ། མངལ་སྒོ་དགག་པ་དང་། བདམ་པ་གཉིས་ལས། དང་པོ་མངལ་སྒོ་ངན་པ་དགག་པར་བྱ་བ་ལ། ལས་ཀྱི་དབང་གིས་ཕོ་མོ་ཆགས་པ་སྤྱོད་པ་མཐོང་སྟེ། དེར་དགའ་ནས་འཇུག་འདོད་བྱུང་ན་གང་སྣང་ཡི་དམ་ལྷའི་རྣམ་པར་བསྒོམས་ཏེ་མི་འཇུག་མི་ཆགས་པར་དགག་པ་དང་། ཡང་ན་དེ་ཉིད་བླ་མ་དང་ཡི་དམ་ཡབ་ཡུམ་གྱི་རྣམ་པར་མཇལ་བར་མོས་ལ་གསང་དབང་ཞུ་བ་དང་བདེ་སྟོང་གི་ངོ་བོར་སྦྱངས་ཏེ་དགག་པ་དང་། ཡང་ཆགས་པའི་ཉེས་པས་འཁོར་བར་ལུས་འཛིན་པ་སོགས་དང་བསྲུང་སྡོམ་གྱི་ཕན་ཡོན་སོགས་དྲན་པས་ཕྱོགས་དེར་མི་ཉེ་བས་དགག་པ་དང་། ཡང་གང་སྣང་བར་དོའི་སྣང་བ་མེད་སྣང་སྒྱུ་མའི་འཕྲུལ་གཟུགས་ལ་ཆགས་བྱ་ཆགས་བྱེད་མེད་པར་ངེས་པས་དགག་པ་དང་། ཡང་ན་འཁོར་འདས་བཟང་ངན་གྱི་སྣང་བ་འདི་དག་མེད་བཞིན་སྣང་བ་སྟོང་གཟུགས་སུ་ཡོད་ཀྱང་། དོན་ལ་ཡེ་ནས་གཞི་རིག་སྟོང་འོད་གསལ་གྱི་དབྱིངས་ལས་གཡོ་མ་མྱོང་ཞིང་གང་སྣང་སྐུ་དང་ཞིང་ཁམས་ཡིན་པའི་དོན་དྲན་པས་བཀག་པར་བྱའོ། །དེ་དག་གི་སྐབས་སུ་སྔངས་སྐྲགས་དང་

གཤིན་རྗེ་སོགས་ཀྱིས་བདས་ནས་དབང་མེད་དུ་གབ་པ་སྦས་པ་བཙལ་བས་འཇིགས་པ་སོགས་ཡོད་པས། དེ་ལ་རང་ཉིད་ལུས་མེད་སྟོང་གཟུགས་དེ་ཉིད་ཡི་དམ་ཁྲོ་བོའི་སྐུར་བསྒོམ་པ་དང་། སྐྲགས་སྔངས་འཇིགས་དོན་མེད་དེ། མེད་བཞིན་སྣང་བ་སྒྱུ་མ་རྨི་ལམ་ལྟར་ཤེས་པ་ཟབ་པོ། དེ་དག་དེང་སང་ནས་ཉིན་མོ་དང་གཉིད་སྐབས་སུ་འཆི་ཁ་དང་བར་དོ་ཐམས་ཅད་ངེས་པར་ཤར་བའི་མོས་པ་བྱས་ནས་སྦྱང་བ་གནད་ཆེ། དེང་སང་གཉིད་དང་རྨི་ལམ་སྐབས་ཀྱི་བར་དོར་གྲོལ་མི་གྲོལ་གྱི་ཚད་ཤེས་པར་བྱའོ། །དེ་དུས་ངོ་ཤེས་ན་རང་བཞིན་སྤྲུལ་སྐུའི་ཞིང་སོགས་ལ་འཕེན་པ་བཏང་སྟེེ་འཕོ་བར་བྱའོ། །གཉིས་པ་མངལ་སྒོ་བཟང་པོ་བདམ་པ་ལ། གལ་ཏེ་སྐྱེ་སྲིད་གཅིག་འཛིན་དགོས་ན། སྤྱིར་རིགས་དྲུག་གི་འོད་ལ་བརྟགས་ཏེ་དམྱལ་བའི་འོད་དུད་ཁ་དང་མུན་པར་གླུ་ལེན་པ་དང་། སྡོང་དུམ་ཚིག་པའམ་བལ་ནག་གཡེངས་པ་ལྟ་བུ་མེ་འོད་ཁང་པ་དམར་ནག་སོགས་སུ་མཐོང་། ཡི་དྭགས་ལ་འོད་སེར་པོ་དང་དུད་ཁ་ལྟ་བུ། དུད་འགྲོ་ལ་འོད་ལྗང་ནག་དང་ཁྲག་བཙོ་མ་ལྟ་བུ། ལྷ་མིན་ལ་འོད་དམར་པོ་དང་ནགས་ཚལ་ཁ་ཆར་བབས་པ། ལྷ་ལ་འོད་དཀར་པོ་དང་སྤྲིན་འཁྲིགས་པ་དང་ལྷ་ཁང་། མི་ལ་འོད་སྔོན་པོ་དང་ཁང་བཟང་སོགས་མཐོང་། ལུས་ཀྱང་ལྷ་དང་མི་ནི་དཀར་པོ་མགོ་གྱེན་བསྟན། ལྷ་མིན་བྱོལ་སོང་སྐྱ་བོ་མགོ་འཕྲེད་བལྟ། ཡི་དྭགས་དམྱལ་བ་ནག་པོ་ཐུར་བསྟན་དུ་འཆར། གནས་ཡུལ་དབུས་སོགས་ཕྱོགས་ཙམ་མཐོང་བའང་ཡོད་པས་དེ་དག་ལས་མིའི་སྐྱེ་གནས་འདམ་དགོས་ལ། དེ་ཡང་ཤར་གླིང་ངང་པས་བརྒྱན་པའི་མཚོ་དང་། ནུབ་གླིང་རྟ་དམར་པོས་བརྒྱན་པའི་མཚོ་དང་། བྱང་གླིང་བ་ལང་དང་ཤིང་གིས་བརྒྱན་པའི་མཚོ་དང་། ལྷོ་གླིང་ནི་ཁང་བཟང་གི་

རྣམ་པར་མཐོང་ལ། རིགས་བཟང་ཆོས་རྒྱུད་ལ་ནི་ལྷ་ཁང་ཕྱག་མཚན་སོགས་མཐོང་ནས་དེར་འཇུག་དགོས། ཕ་མ་སོགས་ཆོས་དར་བའི་ཡུལ་དུ་བསམ་བཞིན་ཡི་དམ་ལྷའི་སྐུའམ་ས་བོན་གྱིས་རྣམ་པས་ཕའི་ཞལ་ནས་བརྒྱུད། ཡུམ་མཁའ་གཞལ་ཡས་ཁང་དུ་མོས་ལ་རང་གི་སྦྱངས་འཕྲོ་མཐུད་པ་དང་འགྲོ་བའི་དོན་བྱེད་པར་སྐྱེ་བ་འཛིན་པར་བྱའོ། །དེ་ཡང་འདམ་དབང་མེད་པའི་ནོར་དོགས་སོགས་ཡོད་པའི་རིག་སྟོང་ཡེངས་མེད་ངང་ནས་གང་སྣང་ལྷ་སྐུར་མོས་ཤིང་གཞན་ཕན་བྱང་སེམས་ལ་སྦྱང་འདོམ་བྱེད་པ་ནི་ཞིང་ཁམས་བགྲོད་པ་དང་། སྐྱེ་སྲིད་བཟང་པོར་བརྒྱུད་པའི་གདམས་པ་ཟབ་མོ་ཡིན་ནོ། །སྨྲས་པ། དེ་ལྟར་འཁོར་བར་བློ་ལྡོག་ངེས་འབྱུང་གིས། །སྟོང་དང་སྙིང་རྗེ་ཟུང་འཇུག་ལམ་ལ་སྦྱང་། །འཁོར་འདས་ཡེ་དག་སྐུ་དང་ཡེ་ཤེས་ལས། །ནམ་ཡང་འདའ་མེད་ཉམས་ལེན་སྙིང་པོར་ཟུང་། དགེ་དེས་མཁའ་མཉམ་མ་གྱུར་སེམས་ཅན་ཀུན། །མ་རིག་ཀུན་གཞི་བར་དོའི་རྒྱ་གྲོལ་ནས། །རིག་པའི་ཡེ་ཤེས་བར་མེད་ཁྱབ་བདལ་ངང་། །ཕྱམ་གཅིག་གདོད་མའི་སངས་རྒྱས་མངོན་གྱུར་ཤོག །ཅེས་བར་དོ་དྲུག་གི་ཁྲིད་ཀྱི་ས་བཅད་ཙམ་ལ། གནད་དོན་གལ་ཆེན་རེ་འགས་བརྒྱན་ཏེ། རང་འདྲའི་བླུན་པོའི་དྲན་ཐོ་ཙམ་དུ་དམིགས་ནས་བླ་གཟུགས་པུཎྱའི་མིང་ཅན་གྱི་བྲིས་པ་དོན་དང་ལྡན་པར་གྱུར་ཅིག །དགེའོ། །སརྦ་མངྒ་ལཾ།། །།