འཇམ་དཔལ་གཤིན་རྗེ་ཁྲོ་ཆུ་དུག་གདོང་གི་ལས་མཐའ་ཕྲིན་ལས་ཀུན་འདུས་སྦྱིན་སྲེག་གི་ཆོ་གའི་མན་ངག
འཇམ་དཔལ་གཤིན་རྗེ་ཁྲོ་ཆུ་དུག་གདོང་གི་ལས་མཐའ་ཕྲིན་ལས་ཀུན་འདུས་སྦྱིན་སྲེག་གི་ཆོ་གའི་མན་ངག་བཞུགས་སོ།།
དུསམ།བོདྷམིཇི། ཝེ་ཊནི༔ འཇམ་དཔལ་གཤིན་རྗེ་མེའི་ཐོག་རྒོད་འབར་བ་ལ་ཕྱག་འཚལ་ལོ༔ གཤིན་རྗེ་ཁྲོ་ཆུ་དུག་གདོང་གི་སྦྱིན་སྲེག་ལ་གསུམ་སྟེ༔ སྤྱི་དང་བྱེ་བྲག་ཞལ་ཧོམ་དང་གསུམ་མོ༔་དང་པོ་ནི་གདོན་བགེགས་ཚར་གཅོད་པའམ༔ ཤི་འདྲ་ཆུང་སྲི་གོད་འདྲེ་དང་སྨྱོ་འདྲེ་འདུལ་བ་དང་༔ དགྲ་བགེགས་རྣམས་ཚར་གཅོད་འདོད་ཀྱང་སྦྱིན་སྲེག་བྱ་བར་གསུངས་ཏེ༔ ས་ཆོག་དང་བྲི་ཐིག་བསྲེག་རྫས་ལ་སོགས་མེ་ལྷ་མེ་སྦར་མེ་ཞགས་རྗེས་ཆོག་ཐམས་ཅད་སྤྱི་དང་འདྲ་སྟེ་འདིར་མ་སྨྲས་སོ༔ གཉིས་པ་ནི་དྲག་པོའི་ས་སྣ་ལ༔ གྲུ་གསུམ་མདའ་གང་སུམ་རིམ་ལ་དུག་ཁྲག་གིས་ཆག་ཆག་གདབ༔ ནང་དུ་ཡི་གེ་རེ་དང་གྲུ་གསུམ་གཞན་རྣམས་ལ་མཚོན་ཆ་བྲི་ཞིང་མེ་རིའི་མཚོན་པའོ༔ དུག་ཤིང་རིམ་པ་གསུམ་དུ་
བརྩེགས༔ ཡང་ན་སྔར་གྱི་བྲུབ་ཁུང་དེའི་ཕྱི་ལ་དུག་ཤིང་གྲུ་གསུམ་བརྩེགས་ནས་ཚེར་མས་བཀང་༔ གཡས་སུ་སྨན་དང་རཀྟ་དམར་གཏོར་བཤམས། གཡོན་དུ་གཞི་ནག་སྟེང་དུ་ཡམ་ཤིང་སོར་བརྒྱད་པ་ཁྲག་གིས་སྦག་པ་བདུན་ནམ་ཉེར་གཅིག སྔར་ནས་བྲུབ་ཁུང་ན་ཡོད་པའི་ཟན་ལིང་དེ་དང་། ལིང་ག་དངོས་གཞི་ཤོག་ལིང་དེ་གྲི་ལྕགས་ཀྱི་མཚོན་གྱིས་རྐང་པ་གཡོན་ནས་བསད་སྔགས་བཟླ་ཞིང་གཏུབ་པའི་དུམ་བུ་བརྒྱ་དང་རྩ་བརྒྱད་བྱས་ལ་ཤ་དུམ་རེ་རེ་དང་སྦྲགས་ནས་བཞག་ལ། ཟན་ལིང་དེ་ལྕགས་གཏུན་ནམ་རྡོ་གཏུན་ལྕགས་ལྡེར་རམ་མེད་ན་རྡོ་ཐོག་ཏུ་བསད་སྔགས་བཟླ་ཞིང་ཐོ་བས་ཞིབ་པར་བརྡུང་བའི་ཕྱེ་མ་ཤ་དུམ་དང་ལིང་ག་ཐམས་ཅད་ལ་བཏབ། བྱིན་རླབས་མ་བྱས་པའི་ཆང་རྒོད་དང་ཁྲག་ཆུ་ལ་བསྲེས་པའི་ཕུད་རྒོད་ཀྱང་བཤམས། མདུན་
དུ་མཆན་ནམ་ཚིལ་དང་ཁྲག་ཞག་བསྲེས་པའི་མར་ཁུ་ཅུང་ཟད་བཤམས། དེ་ལ་སླར་འགུགས་གཞུག་དང་མཆོད་པ་བྱིན་རླབས་བྱ། ཁ་ལྔ་སེར་དང་མཁའ་འགྲོ་ལ་གདོང་མི་གཏད་ཅིང་ལྷོའམ་དགྲ་ཕྱོགས་སུ་ཁ་གྱུས་ནས། སྔགས་ཆས་ཀྱིས་བརྒྱན་ལ་མགར་བའི་འདུག་སྟངས་ཀྱིས་གདོང་ལ་རོ་སོལ་བྱུག་ཅིང་། སྔོན་འགྲོ་ཕྱི་རྒྱུད་པ་ལ་གཏོར་མ་འབུལ་ཞིང་བཀའ་བསྒོའོ། །བགེགས་བསྐྲད་མཚམས་བཅད་ལས་བྱང་ལྟར་གུར་ཁང་ལྔ་རིམ་བསྒོམས་ལ། མཆོད་རྫས་བྱིན་གྱིས་བརླབས་ནས། སླར་ཡང་། མཆོད་རྫས་རྣམས་མི་དམིགས་པ་ལས། །ཨ་ལས་ཐོད་པ་ཡངས་ཤིང་རྒྱ་ཆེ་བའི་ནང་དུ། དགྲ་བགེགས་བསྒྲལ་བ་ལས་བྱུང་བའི་ཁྲག་གི་ཡོན་ཆབ། ཞག་གི་ཞབས་བསིལ། དབང་པོ་ལྔའི་མེ་ཏོག །ཤ་ཆེན་གྱི་བདུག་སྤོས། ཚིལ་ཆེན་གྱི་མར་མེ། མཁྲིས་པའི་དྲི་ཆབ། ཙིཏྟའི་ཞལ་ཟས། རྐང་ཆེན་གྱི་གླིང་བུ། མཆོད་རྫས་རྣམས་བསམ་གྱིས་མི་ཁྱབ་པར་གྱུར། ཨོཾ་བཛྲ་ཨགྷཾ་ཨཱཿཧཱུྃ༔ དེ་བཞིན་དུ། པཱདྷཾ་པུབྦེ་དྷཱ་པ་ཨ་ལོ་ཀེ་གནྡྷེ་ནི་ཝི་དྱ་ཨོཾ་བཛྲ་ཤབྡ་ཨཱཿཧཱུྃ༔ ལན་གསུམ། གཞན་ཡང་སྨན་དང་གཏོར་མོ་དུག་ཁྲག་བདུད་རྩིའི་རྒྱ་མཚོ་རྩུབ་འགྱུར་དྲག་པོའི་ཡམ་ཤིང་། ཤ་ཁྲག་གློ་སྙིང་ནང་ཁྲོལ་འབྲུ་བཅུད་སྣ་ཚོགས་ཀྱི་མཆན་སྣ། འདོད་ཡོན་རྒྱ་ཆེན་དང་ལྡན་
པར་གྱུར། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲི་ཋཱ༔ ཨོཾ་ཨཱཿཧཱུྃ་མ་ཧཱ་རཀྟ་ཛྭ་ལ་མཎྜལ་ལ་ཧཱུྃ་བྷིཥྛ༔ ཨོཾ་ཨཱཿཧཱུྃ་མ་ཧཱ་བ་ལིཾ་ཏ་ཧཱུྃ་ཧྲིཋཱ༔ ལན་གསུམ་བྱ། གཞན་ཡང་ལས་བཞི་མེ་མཆོད་སྤྱི་འགྲོ་ལྟར་རྫས་རྣམས་བྱིན་བརླབས། ཐབ་བྲན་ལ་བསངས་སྦྱངས་མེ་སྦར་ལ། སྟོང་པའི་ངང་ལས་མདུན་དུ་མེ་ཐབ་གྲུ་གསུམ་མཐིང་ནག་མེ་རླུང་མཚོན་ཆ་ལྟར་འཁྲུགས་པ། དུག་གི་མེ་རི་མེ་དཔུང་འུར་སྒྲ་ཚག་སྒྲ་དང་བཅས་པ་འབྲུག་ལྟར་ལྡིར་བའི་དབུས་སུ། འཇིག་རྟེན་ཁམས་ཚ་གྲང་རབ་ཏུ་འཁྲུགས་པའི་དབུས་སུ། འོག་ཐམས་ཅད་སྤུ་གྲིའི་ས་གཞི། སྟེང་ཐམས་ཅད་རལ་གྲིའི་གུར་ཁང་། བར་སྣང་ཐམས་ཅད་མཚོན་ཆ་རབ་ཏུ་འཁྲུགས་པ། ཞེས་སོགས་ནས་ལས་བྱང་རྒྱས་པ་གནམ་ལྕགས་གོ་ཆ་ལྟར་བསྐྱེད་ཆོག་སྤྱན་འདྲེན་བཞུགས་གསོལ་ཕྱག་འཚལ་ནས། མཆོད་པའི་བར་གཞུང་ལྟར་བྱ། དེ་ནས་དུ་ཏྲི་ཡ་མ་སོགས་རྩ་སྔགས་ལ། ཨོཾ་བྷྱོ་དྷི་བྲིཀཱ་ཡེ་སྭཱ་ཧཱ། དགྲ་བགེགས་བྱད་མ་ཆེ་གེའི་གཟི་བརྗིད་ཕུན་སུམ་ཚོགས་པ་ཐམས་ཅད་མཱ་ར་ཡ་ཧཱུྃ་ཕཊ༔ ཅེས་ཡམ་ཤིང་དང་། ཨོཾ་ཨཀྵེ་ཡེ་སྭཱ་ཧཱ། དགྲ་བགེགས་བྱད་མ་ཚེའི་འབྱོར་བ་ཕུན་སུམ་ཚོགས་པ་ཐམས་ཅད་མཱ་ར་ཡ་ཧཱུྃ་ཕཊ༔ ཅེས་བདུན་ནམ་ཉེར་གཅིག་འབུལ། ༈ འདི་སྐབས་ལིངྒ་བསྐྱེད་ཆོག་དང་
དམིགས་བྱ་འགུགས་གཞུག །བསྒྲལ་ལས་ཉུང་བ་ཆོས་སྐུ་ཞི་བ་མ་སོགས་དགོས་པ་སློབ་དཔོན་གྱི་ཕྱག་ལེན་ནོ། །མཆན། ༈ དེ་ནས་གཡོན་གྱི་ཧོམ་གཟར་གྱིས་ལིང་རོ་ཤ་དུམ་རེ་དང་ཟན་ལིང་ཤ་དུམ་རེ་བཞག །གཡས་བླུག་གཟར་གྱིས་ཁྲག་བླུག་པ་བཟུང་ལ། ཧཱུྃ། འཇིགས་བྱེད་ཡ་མཱན་ཀ་ནི། །སོགས་བསྟབ་པའི་གཞུང་ཚིག་དེ་འདོན་ནས། གཤིན་རྗེ་འཁོར་བཅས་ཞལ་གྲུ་གསུམ་མེའི་རང་བཞིན་གནམ་ས་ཙམ་གདངས་བའི་ནང་དུ་དགྲ་བགེགས་དངོས་སུ་བསྟབས་པས། ཧྲག་ཧྲག་བསྲེགས་ཤིང་གྱུར་མིད་དུ་བཏང་བར་བསམས་ལ། བསྙེན་སྔགས་ཟློག་སྔགས་བསད་སྔགས་གསུམ་སྦྲེལ་བའི་མཇུག་ཏུ། བྱད་མ་ལྷ་སྲུང་དང་བཅས་པ་ཐམས་ཅད་ཀྱི་སྲོག་སྙིང་རྣམ་ཤེས་དང་བཅས་པ་ཐམས་ཅད་མཱ་ར་ཡ་ཛྭ་ལ་རཾ་རཾ༔ ཞེས་བརྒྱ་དང་ཉེར་བརྒྱད་འབུལ་ཏེ། སྔགས་དང་རྫས་ལ་ལྷག་ཆད་མང་ཉུང་མེད་པར་བྱའོ། །དེ་ནས་མངའ་གསོལ་བྱ་སྟེ། རོལ་མོ་བསྒྲགས་ཤིང་འདི་སྐད་དོ།། ཧཱུྃ༔ ལས་ཀྱི་གཤིན་རྗེ་ནག་པོ་མཐུ་བོ་ཆེ༔ སྐུ་མདོག་མཐིང་ནག་སྲིད་པའི་རྩེ་ལས་མཐོ༔ ལྷ་རྣམས་ཡོངས་ཀྱིས་ཁྱེད་ལ་མངའ་གསོལ་ལོ༔ དབུ་སྐྲ་ཁམ་ནག་སྲིད་པའི་རྩེ་མོར་འབར༔ ཞལ་ཟས་སྦྱིན་སྲེག་མཆོད་པ་འདི་བཞེས་ལ༔ བར་ཆད་རྐྱེན་རྣམས་ཞི་བའི་ཕྲིན་ལས་མཛོད༔ ཅེས་སམ་ཡང་ན་བྱད་ཁ་ཕུར་ཁ་ཟློག་པའི་ཕྲིན་ལས་མཛོད༔ དགྲ་ལ་བྱེད་
ན༔ དགྲ་བོ་བྱད་མ་བསྒྲལ་བའི་ཕྲིན་ལས་མཛོད༔ ཅེས་ཁ་བསྒྱུར་རོ། ཧཱུྃ༔ ལས་ཀྱི་གཤིན་རྗེ་ནག་པོ་མཐུ་བོ་ཆེ༔ བཅོམ་ལྡན་རིགས་གསུམ་མགོན་པོས་མངའ་གསོལ་ལོ༔ སྐུ་གསུམ་ལྡན་ཕྱིར་མཆོད་རྟེན་གསུམ་གྱིས་བརྒྱན༔ ཞལ་ཟས་སྦྱིན་སྲེག་མཆོད་པ་འདི་བཞེས་ལ༔ བར་ཆད་རྐྱེན་རྣམས་ཞི་བའི་ཕྲིན་ལས་མཛོད༔ སྐབས་སུ་གང་བབ་རིགས་འགྲེས། ཧཱུྃ ལས་ཀྱི་གཤིན་རྗེ་ནག་པོ་མཐུ་བོ་ཆེ༔ བཅོམ་ལྡན་རྒྱལ་བ་རིགས་ལྔས་མངའ་གསོལ་ལོ༔ ཐོད་སྐམ་རིགས་ལྔས་དབུ་ལ་བརྒྱན༔ ཞལ་ཟས་སྦྱིན་སྲེག་མཆོད་པ་འདི་བཞེས་ལ༔ བར་ཆད་རྐྱེན་རྣམས་ཞི་བའི་ཕྲིན་ལས་མཛོད༔ ཧཱུྃ༔ ལས་ཀྱི་གཤིན་རྗེ་ནག་པོ་མཐུ་བོ་ཆེ༔ གཟའ་ཆེན་བརྒྱད་ཀྱིས་ཁྱེད་ལ་མངའ་གསོལ་ལོ༔ སྤྱན་དགུ་དམར་ཟླུམ་བར་སྣང་ཁམས་སུ་བསྒྲད༔ ཞལ་ཟས་སྦྱིན་སྲེག་མཆོད་པ་འདི་བཞེས་ལ༔ བར་ཆད་རྐྱེན་རྣམས་ཞི་བའི་ཕྲིན་ལས་མཛོད༔ ཧཱུྃ༔ ལས་ཀྱི་གཤིན་རྗེ་ནག་པོ་མཐུ་བོ་ཆེ༔ འཇོམས་བྱེད་ལས་ཀྱི་གཤིན་རྗེས་མངའ་གསོལ་ལོ༔ སྨ་ར་ཨག་ཚོམ་བསྐལ་པའི་མེ་ལྟར་འབར༔ ཞལ་ཟས་སྦྱིན་སྲེག་མཆོད་པ་འདི་བཞེས་ལ༔ བར་ཆད་
རྐྱེན་རྣམས་ཞི་བའི་ཕྲིན་ལས་མཛོད༔ ཧཱུྃ༔ ལས་ཀྱི་གཤིན་རྗེ་ནག་པོ་མཐུ་བོ་ཆེ སྲོག་གཅོད་ལས་ཀྱི་གཤིན་རྗེས་མངའ་གསོལ་ལོ༔ མཆེ་བ་བཅུ་གཉིས་ཟླ་ཚེས་འབར་བས་གཏམས༔ ཞལ་ཟས་སྦྱིན་སྲེག་མཆོད་པ་འདི་བཞེས་ལ༔ བར་ཆད་རྐྱེན་རྣམས་ཞི་བའི་ཕྲིན་ལས་མཛོད༔ ཧཱུྃ༔ ལས་ཀྱི་གཤིན་རྗེ་ནག་པོ་མཐུ་བོ་ཆེ༔ ཕོ་རྒྱུད་བདུད་པོ་ཡོངས་ཀྱིས་མངའ་གསོལ་ལོ༔ གཡས་པས་དགྲ་སྟས་ཉམས་པའི་སྲོག་རྩ་གཅོད༔ ཞལ་ཟས་སྦྱིན་སྲེག་མཆོད་པ་འདི་བཞེས་ལ༔ བར་ཆད་རྐྱེན་རྣམས་ཞི་བའི་ཕྲིན་ལས་མཛོད༔ ཧཱུྃ༔ ལས་ཀྱི་གཤིན་རྗེ་ནག་པོ་མཐུ་བོ་ཆེ༔ མོ་རྒྱུད་མ་མོ་ཡོངས་ཀྱིས་མངའ་གསོལ་ལོ༔ གཡོན་པས་བྷནྡྷར་ཉམས་པའི་གློ་སྙིང་གསོལ༔ ཞལ་ཟས་སྦྱིན་སྲེག་མཆོད་པ་འདི་བཞེས་ལ༔ བར་ཆད་རྐྱེན་རྣམས་ཞི་བའི་ཕྲིན་ལས་མཛོད༔ ཧཱུྃ༔ ལས་ཀྱི་གཤིན་རྗེ་ནག་པོ་མཐུ་བོ་ཆེ༔ དྲག་པོའི་ཕྲིན་ལས་མཛད་པར་མངའ་གསོལ་ལོ༔ བ་སྤུའི་གསེབ་ནས་རང་འདྲའི་ཁྲོ་ཆུང་འགྱེད༔ ཞལ་ཟས་སྦྱིན་སྲེག་མཆོད་པ་འདི་བཞེས་ལ༔ བར་ཆད་རྐྱེན་རྣམས་ཞི་བའི་ཕྲིན་ལས་མཛོད༔ ཧཱུྃ༔ ལས་ཀྱི་གཤིན་རྗེ་ནག་པོ་
མཐུ་བོ་ཆེ༔ ལྷ་སྲིན་སྡེ་བརྒྱད་འདུལ་ཕྱིར་མངའ་གསོལ་ལོ༔ སྐུ་གསུང་ཐུགས་ལས་ཁྲོ་ཚོགས་དཔག་མེད་འཕྲོ༔ ཞལ་ཟས་སྦྱིན་སྲེག་མཆོད་པ་འདི་བཞེས་ལ༔ བར་ཆད་རྐྱེན་རྣམས་ཞི་བའི་ཕྲིན་ལས་མཛོད༔ ཧཱུྃ༔ ལས་ཀྱི་གཤིན་རྗེ་ནག་པོ་མཐུ་བོ་ཚེ༔ ས་བདག་ཀླུ་གཉན་འདུལ་ཕྱིར་མངའ་གསོལ་ལོ༔ སྐུ་སྨད་དུག་སྦྲུལ་འབར་བའི་ཆུན་པོས་བརྒྱན༔ ཞལ་ཟས་སྦྱིན་སྲེག་མཆོད་པ་འདི་བཞེས་ལ༔ བར་ཆད་རྐྱེན་རྣམས་ཞི་བའི་ཕྲིན་ལས་མཛོད༔ ཧཱུྃ༔ ལས་ཀྱི་གཤིན་རྗེ་ནག་པོ་མཐུ་བོ་ཆེ༔ རྣལ་འབྱོར་ཚེ་སྲོག་བསྲིང་བར་མངའ་གསོལ་ལོ༔ སྲུང་བའི་གུར་ཁང་རྡོ་རྗེ་མེ་རིས་བསྐོར༔ ཞལ་ཟས་སྦྱིན་སྲེག་མཆོད་པ་འདི་བཞེས་ལ༔ བར་ཆད་རྐྱེན་རྣམས་ཞི་བའི་ཕྲིན་ལས་མཛོད༔ ཧཱུྃ༔ ལས་ཀྱི་གཤིན་རྗེ་ནག་པོ་མཐུ་བོ་ཆེ༔ ཉམས་པའི་སྲོག་རྩ་གཅོད་པར་མངའ་གསོལ་ལོ༔ ཁྲོ་ཆུའི་ཕུར་པས་དམ་ཉམས་སྙིང་ལ་གཟིར༔ ཞལ་ཟས་སྦྱིན་སྲེག་མཆོད་པ་འདི་བཞེས་ལ༔ བར་ཆད་རྐྱེན་རྣམས་ཞི་བའི་ཕྲིན་ལས་མཛོད༔ ཧཱུྃ༔ ལས་ཀྱི་གཤིན་རྗེ་ནག་པོ་མཐུ་བོ་ཆེ༔ བྱད་མ་རྦོད་གཏོང་བཟློག་པར་མངའ་གསོལ་ལོ༔ གཤིན་རྗེ་
མ་མོ་དྲེགས་བྱེད་ལས་ལ་འགྱེད༔ ཞལ་ཟས་སྦྱིན་སྲེག་མཆོད་པ་འདི་བཞེས་ལ༔ བར་ཆད་རྐྱེན་རྣམས་ཞི་བའི་ཕྲིན་ལས་མཛོད༔ ཧཱུྃ༔ ལས་ཀྱི་གཤིན་རྗེ་ནག་པོ་མཐུ་བོ་ཆེ༔ ཕྱི་ནང་བར་ཆད་འདུལ་བར་མངའ་གསོལ་ལོ༔ རལ་གྲི་ཆུ་གྲི་འབར་བའི་གཤོག་པ་གཏམས༔ ཞལ་ཟས་སྦྱིན་སྲེག་མཆོད་པ་འདི་བཞེས་ལ༔ བར་ཆད་རྐྱེན་རྣམས་ཞི་བའི་ཕྲིན་ལས་མཛོད༔ ཧཱུྃ༔ ལས་ཀྱི་གཤིན་རྗེ་ནག་པོ་མཐུ་བོ་ཆེ༔ སངས་རྒྱས་བསྟན་པ་བསྲུང་བར་མངའ་གསོལ་ལོ༔ ཐོགས་མེད་རྫུ་འཕྲུལ་བར་སྣང་ཁམས་སུ་རྒྱུག་ཞལ་ཟས་སྦྱིན་སྲེག་མཆོད་པ་འདི་བཞེས་ལ༔ བར་ཆད་རྐྱེན་རྣམས་ཞི་བའི་ཕྲིན་ལས་མཛོད༔ ཧཱུྃ༔ ལས་ཀྱི་གཤིན་རྗེ་ནག་པོ་མཐུ་བོ་ཆེ༔ རྣལ་འབྱོར་དགྲ་བླ་ཆེན་པོར་མངའ་གསོལ་ལོ༔ བསམ་པ་ཙམ་གྱིས་བརྣག་པའི་རུ་ཏྲ་བསྒྲལ༔ ཞལ་ཟས་སྦྱིན་སྲེག་མཆོད་པ་འདི་བཞེས་ལ༔ བར་ཆད་རྐྱེན་རྣམས་ཞི་བའི་ཕྲིན་ལས་མཛོད༔ ཧཱུྃ༔ ལས་ཀྱི་གཤིན་རྗེ་ནག་པོ་མཐུ་བོ་ཆེ༔ བཀའ་ཡི་གཏོར་ལེན་ཆེན་པོར་མངའ་གསོལ་ལོ༔ ཚོགས་ཁང་འགྲིམ་ཞིང་རྣལ་འབྱོར་དྲོད་ཚད་ཉུལ༔ ཞལ་ཟས་སྦྱིན་སྲེག་མཆོད་པ་འདི་བཞེས་
ལ༔ བར་ཆད་རྐྱེན་རྣམས་བཟློག་པའི་ཕྲིན་ལས་མཛོད༔ ཅེས་དང་། གནོད་བྱེད་དགྲ་བོ་བསྒྲལ་བའི་ཕྲིན་ལས་མཛོད༔ ཅེས་སོགས་གང་མོས་ཤམ་བུ་ཁ་བསྒྱུར༔ དེ་ནས་ཕྱི་མཆོད་སྨན་དང་རཀ་རྣམས་རིམ་པར་འབུལ་ཞིང་། ཧཱུྃ༔ དགྲ་བོ་བྱད་མ་རྣམས་ནི་བསྒྲལ་བ་ཡི༔ དམར་ཆེན་ཁྲག་གི་ཡོན་ཆབ་དམ་པ་འདི༔ ལས་ཀྱི་གཤིན་རྗེ་འཁོར་དང་བཅས་ལ་འབུལ༔ ཅེས་ནས། སརྦ་པཱུ་ཙ་ཁཱ་ཧི་ཁཱ་ཧི༔ བར་དུ་ཚང་བར་འདོན་ལ་རིམ་བཞིན་འབུལ༔ དེ་ནས་མེ་ལྷའི་དམར་གཏོར་དེ་བཏེགས་ལ་དུག་ཁྲག་གིས་བྲན་ལ། བདེ་རིམ་སོགས་ལ་ལས་བྱང་ལྟར། ཧཱུྃ་ཕྱི་སྣོད་འཇིག་རྟེན་གཏོར་གཞོང་དུ༔ ནང་བཅུད་སེམས་ཅན་གཏོར་མར་བཤམས༔་ཞེས་པ་ནས། མ་ཧཱ་བ་ལིང་ཏ་ཁཱ་ཧི༔ སོགས་གཏོར་བསྔོས་བྱས་ལ་འབུལ་ལོ། །དམིགས་བྱ་སོགས་མཐུ་སྒྲུབ་ཡིན་ན། ཧཱུྃ༔ ཕྱོགས་ཕྱོགས་དག་ཀྱང་ཕ་ཀི་ན། བསྐུལ་པ་བྱས་ལ། སྟོང་གསུམ་འཇིག་རྟེན་ཁྱབ་པར་རྒྱུག༔ ཞལ་ཟས་སྦྱིན་སྲེག་མཆོད་པ་འབུལ༔ ནད་གདོན་སྡིག་སྒྲིབ་ཚར་ཆོད་ཅིག༔ ཅེས་སོགས་སྐབས་སུ་གང་བབ་བསྒྱུར༔ ཡང་ན་བསྐུལ་རིང་གནམ་ལྕགས་རྔམ་སྒྲ་ལྟར། སྨད་ཆའི་བསྐུལ་པ་བྱས་ལ་གཏོར་མ་མེ་ལ་འཕང་ངོ་༔ དེ་ནས་བསྟོད་པ་བྱ་བ་ནི༔ ཡཱ༔ ཕྱོགས་བཅུར་
ནམ་མཁའ་ཡངས་པའི་དཀྱིལ་འཁོར་ནས༔ པདྨ་ཉི་ཟླའི་གདན་སྟེང་ན༔ སོགས་ནས། སངས་རྒྱས་ཀུན་གྱི་ཞིང་དུ་སྐྱེ་བར་ཤོག༔ ཅེས་པའི་བར་བསྟོད། སྐབས་འདིར་རྐྱེན་བཟློག་ཡིན་ན་མེའི་བརྟུལ་ཞུགས་བྱ་སྟེ། མེ་ལྕེ་ཁ་ལས་སྤྲུལ་པའི་ཁྲོ་བོ་རྣམས། ཕྱག་ན་མཚོན་ཆ་སྣ་ཚོགས་ཐོགས་ནས་མེ་དཔུང་གི་རྟ་ལ་ཆིབས་ནས། བདག་ཅག་འཁོར་བཅས་ཀྱི་ནད་དང་གནོད་པ་མི་མཐུན་པའི་ཕྱོགས་ངན་པ་ཐམས་ཅད་གཞོབ་ཐུལ་བསྲེགས་ནས། ཐལ་བ་རྡུལ་དུ་བརླག་པར་བསམ། མཚམས་གཅོད་ཀྱི་ཚིགས་བཅད་རྣམས་རྩ་སྔགས་སོགས་ཀྱིས་མེ་ཞགས་བརྒྱབ། དེ་ནས་རྗེས་ཆོག་བྱ། རིམ་གྲོ་ཡིན་ན་བཀྲ་ཤིས་བརྗོད། ངེས་པར་དམིགས་བྱ་སོགས་ཀྱི་ལས་སྦྱོར་ཡིན་ན་ཤིས་པ་མི་བརྗོད། སྦྱིན་སྲེག་རང་ཁྱིམ་དུ་མི་བྱའོ།། ༈ གསུམ་པ་ས་སྟེགས་སེར་པོ་གྲུ་གསུམ་བྲུབ་ཁུང་ལྟ་བུའི་ནང་དུ་དུག་ཚེར་གྱིས་བཀང་ནས་ལིངྒ་ཡང་བཞག །ལོགས་གཅིག་ཏུ་ཁུང་བུ་སྤུད་པའི་མཆུ་ཐལ་ཙམ་བྱ། དེའི་སྟེང་དུ་རྫས་ལ་ཁྲོ་ཆུའི་སྐུ་ཞལ་གདངས་བ་ཕྱག་སྤར་མོ་འདེབས་ཚུལ་ཅན། །ནང་སྟོང་པ་བྱོས་ལ་བཞག་ལ། ལས་གཞུང་ལྟར་མེ་དཔུང་གི་ནང་གཤིན་རྗེ་བསྐྱེད་པ་དང་། སྤྱན་འདྲེན་མཆོད་བསྟོད་ལ་སོགས་གཞུང་ལྟར་བྱ། སྲེག་རྫས་ནི་ཡམ་ཤིང་མར་ཁུ་བདུན་ཏེ་ཤིང་སྟག་པའི་ལོ་མའི་ལིང་ག་མ་རྙེད་ན་ཤོག་ལིང་སྟེ། ཟན་ལིང་རེ་ཤ་དུམ་རེ་ཧོམ་གཟར་དུ་རཀྟ་དགང་བླུག་གིས་བྲན་ཏེ། གོང་ལྟར་སྔགས་བརྒྱ་དང་རྩ་བརྒྱད་འབུལ། རིམ་གྲོ་ཡིན་ན་སྔགས་ཀྱི་མཇུག་ཏུ།
ཨོཾ་སརྦ་པཱ་པཾ་ད་ཧ་ན་བཛྲ་ཡེ་སྭཱ་ཧཱ། བདག་ཅག་ཡོན་མཆོད་ལ་གནོད་པའི་བགེགས་ཐམས་ཅད་མཱ་ར་ཡ་ཧཱུྃ་ཕཊ༔ ཅེས་བརྒྱ་རྩ་བརྒྱད་ཀྱིས་ཡུངས་ཀར་འབུལ། གཏོར་མ་ལ་གཏོར་བསྐུལ་བྱ། རྗེས་ཆོག་བྱས་ལ་སྐུ་གཟུགས་དགོན་པའམ། སྒྲུབ་ཁང་ཡིན་ན་དབེན་སར་བཞག་ལ་ཕྱིས་དགོས་དུས་སྤྱད། གྲོང་ནག་ཡིན་ན་ཟོར་དུ་འཕང་སྟེ་བཅག་ནས་རྗེས་མི་མངོན་པར་བྱའོ། །འདི་ནི་དགྲ་བགེགས་ཐམས་ཅད་དང་ཁྱད་པར་དུ་གདོན་རྒོད་ཆུང་སྲི་འདུལ་བ་ལ་ཟབ་བོ། །སྤྲི། དེ་ནས་གཤེགས་གསོལ་དང་བསྡུ་ཆོག་ལས་བྱང་ལྟར་བྱས་ལ། རིམ་གྲོ་ཡིན་ན། དེའི་མལ་དུ་བརྫུས་སྐྱེས་སུ་ལས་ཀྱི་གཤིན་རྗེ་ཡ་མ་རཱ་ཙ་ཆུ་སྲིན་གྱི་གདོང་པ་ཅན་ཁྲོས་པའི་ཆ་བྱད། ཡ་མག་ལ་གནམ་ལ་མ་མགལ་ས། ལྕེ་གློག་ལྟར་དུ་འགྱུ་བ་མཆེ་བ་གངས་རི་ལྟར་གཙིགས་པ། ཁ་ནང་དུ་གནོད་བྱེད་ཐམས་ཅད་བཅུག་ནས་ཐར་བའི་དུས་མེད་པར་བསམས་ལ། འགུགས་གཞུག་བྱས་ལ་ཆུ་སྲིན་གྱིས་གྱུར་གྱིས་མིད་ནས་ས་རིམ་པ་དགུའི་འོག་ཏུ་སོང་བར་བསམས་ལ་རྡོ་རྗེ་རྒྱ་གྲམ་རི་རབ་དང་བཅས་པས་མནན་པར་བསམས་ལ། ལས་བྱང་གི་རྟ་བྲོ་བྱས་ལ་ཐལ་བ་ལམ་རྒྱ་གྲམ་མམ་མཆོད་རྟེན་མ་ཎི་སོགས་ཀྱི་འོག་ཏུ་བླུགས་སོ། །སྲོག་སྒྲུབ་ཆེན་མོ་ཡིན་ན། ཐལ་བ་ཆ་བཞི་བྱས་ལ། ཆ་གཅིག་རི་གཉན་གསུམ་གྱི་རྩེ་ལ་ཕྱར་ན་མྱུར་དུ་ཕུང་། ཆ་གཅིག་མཚོ་ཆུ་གཉན་པོའམ་གཉན་པོའི་གཞུང་དུ་བཏབ། ཆ་གཅིག་ལུང་པ་གསུམ་གྱི་མདོ་རུ་བཏབ་པའམ་མནན། ཆ་གཅིག་དེ་ལ་ཆ་
ཉུང་ངུ་མང་དུ་བྱས་ཏེ། ཟོར་དང་གཏོར་མའི་ནང་དུ་ཅུང་ཟད་རེ་བླུག་སྟེ་འཕང་། ཆ་གཅིག་མནན་པ་བྱེད་པའི་ལིང་ག་དང་མཉམ་དུ་མནན་པ་ལ་སོགས་བྱ། ཡང་ན་ལམ་ཆེན་པོ་དང་། ལམ་བཞི་མདོ་ཟམ་སྔས་ལ་སོགས་པ་དགྲ་ངན་ཞིང་ལྷ་འདྲེ་གདུག་པ་ཅན་གནས་སར་མནན་པའམ་ཕྱར་བ་ལ་སོགས་པ་བྱའོ། །ས་མ་ཡ༔ ཁ་ཐཾ༔ རྒྱ་རྒྱ་རྒྱ༔ ཤམཐཏུ༔ འདི་ལྟར་བྱས་པས་འདོད་པ་ཐམས་ཅད་འགྲུབ་པར་འགྱུར་རོ། །གནུབས་སངས་རྒྱས་ཡེ་ཤེས་ཀྱིས་མཛད་པ། དུར་ཁྲོད་མེའི་རབ་གསལ། མེའི་སྤུ་གྲི་ཞེས་བྱ་བ། སུ་ལ་མ་སྤེལ་བཀའ་རྒྱུ་ཡོད། སྙིང་གི་དྭངས་མ་ཁྲག་ཡིན་ནོ། །ཟབ་བོ༔ སྦས་སོ༔ ཨྠྀི༔ ཞེས་པའི་ཆོ་གའི་འགྲིགས་འདི་བྲམ་ཟེའི་མཆོད་སྦྱིན་ལ་བརྩོན་པ་ལྷུར་ལེན་པའི་སྙིགས་དུས་ཀྱི་སྤྲང་བན་རཱ་ག་ཨ་སྱས་གཞུང་གི་མན་ངག་ཞལ་ཤེས་ཕྱག་ལེན་གྱིས་བརྒྱན་ནས་བྲིས་པའོ། །འདི་ལ་ཉེས་འགལ་མཆིས་ན་འཇམ་དཔལ་ཉིད་ལ་བཤགས་ཤིང་དགེ་བས་བསྟན་པའི་དགྲ་བགེགས་མྱུར་བསྲེགས་ནས། བསྟན་པ་མེ་ལྟར་འབར་ཞིང་རྒྱས་པར་ཤོག །སྤྱི། རིག་འཛིན་ཞང་ཁྲོམ་གཏེར་ཀ་བཅོས་མེད་ལ། །བླ་མའི་ཟིན་བྲིས་འཁྲུལ་མེད་བརྒྱན་བྱས་ནས། །ལག་ལེན་ཁྱེར་བདེ་མ་བུ་གཅིག་སྡོམ་འདི། །སྔགས་གཟུགས་ནེ་ཏྲའི་མིང་གི་ལག་ཆ་ཡིན། །ཨྠྀི༔ དགེའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།