དཔལ་ལྡན་ལྷ་མོ་དུད་སོལ་མའི་གསོལ་མཆོད་ལྷ་མོ་དགྱེས་པའི་དགའ་སྟོན།
དཔལ་ལྡན་ལྷ་མོ་དུད་སོལ་མའི་གསོལ་མཆོད་ལྷ་མོ་དགྱེས་པའི་དགའ་སྟོན་བཞུགས་སོ། །
བྷྱོ༔ རྒྱལ་བའི་བསྐྱེད་ཡུམ་ལྷ་མོ་དུད་སོལ་མ། །སྐུ་གསུང་ཐུགས་ཀྱིས་འཁོར་འདས་ཡོངས་ལ་ཁྱབ། །ཆོས་ཀྱི་དབྱིངས་ལ་གཤེགས་བཞུགས་མི་མངའ་ཡང་། །བདག་སོགས་འགྲོ་བའི་བསོད་ནམས་བསགས་པའི་ཕྱིར། །ཆུ་ཟླ་བཞིན་དུ་གནས་འདིར་སྣང་བར་མཛོད། །སྲིད་གསུམ་ཞབས་ཀྱི་མཐེབ་མོས་གནོན་བྱེད་ཕྱིར། །བཞུགས་པའི་གནས་ལ་ངེས་པ་མ་མཆིས་ཀྱང་། །མྱུར་མགྱོགས་ཕྲིན་ལས་བསྒྲུབ་ཕྱིར་རླུང་འཚུབ་དང་། །རྫུ་འཕྲུལ་ཤུགས་ལྡན་བོང་བུའི་གདན་ལ་བཞུགས། །རང་སེམས་མ་གཅིག་གདོད་ནས་དབྱེར་མེད་ཕྱིར། །ཕྱག་དང་ཕྱག་ཡུལ་
སོ་སོར་མ་མཆིས་ཀྱང་། །མ་བཅོས་སོ་མ་རང་བབ་ལྷག་པ་ཡི། །དོན་དམ་སྐྱེ་བ་མེད་པར་མཇལ་ཕྱག་འཚལ། །སྟོང་གསུམ་འདི་དང་འཇིག་རྟེན་གཞན་དག་ན། །འདོད་ཡོན་ལྔ་དང་རྒྱལ་སྲིད་རིན་ཆེན་བདུན། །ལྷ་མོ་དགྱེས་པའི་མཆོད་པ་ཅི་མཆིས་པ། །བློ་ཡིས་བླངས་ཏེ་ལྷ་མོ་འཁོར་བཅས་མཆོད། །ཁྱད་པར་འབོད་མཆོད་རྟེན་དང་བསྐང་བའི་རྫས། །མ་ཚང་མེད་པ་ཀུན་བཟང་མཆོད་སྤྲིན་བཞིན། །ཏིང་འཛིན་གསལ་བའི་ཡིད་ཀྱིས་མངོན་སྤྲུལ་ཏེ། །དཔལ་ལྡན་ལྷ་མོ་འཁོར་དང་བཅས་ལ་འབུལ། །ཁྱད་པར་དམ་རྫས་བརྒྱན་པའི་གཏོར་མ་
དང་། །བདུད་རྩི་རཀྟ་ཇ་ཆང་ཕུད་རྒོད་སོགས། །སྔགས་དང་ཕྱག་རྒྱས་ཟད་མེད་བྱིན་བརླབས་ནས། །དཔལ་ལྡན་ལྷ་མོ་འཁོར་དང་བཅས་ལ་འབུལ། །མ་གཅིག་ལྷ་མོ་རྒྱལ་བ་ཀུན་གྱི་ཡུམ། །ཕྱི་ལྟར་གང་གའི་ལྷ་མོ་དབྱངས་ཅན་མ། །ནང་ལྟར་ལྷན་སྐྱེས་རྡོ་རྗེ་རྣལ་འབྱོར་མ། །གསང་བ་དཔལ་ལྡན་ལྷ་མོ་དུད་སོལ་མ། །བསླུ་མེད་གཏན་གྱི་བསྐྱབ་ཏུ་མངའ་གསོལ་ལོ། །གསང་བདག་སྤྲུལ་པ་ས་བརྒྱད་སེམས་མའི་ཚུལ། །སྲིད་པའི་ལྷ་མོ་ཡུམ་ཆེན་ཨུ་མ་དེ། །རྣལ་འབྱོར་བདག་གིས་མ་རུ་མངའ་གསོལ་ལོ། །རྟག་ཏུ་བུ་གཅིག་ལྟ་བུར་ཐུགས་རྗེས་སྐྱོབས། །དབང་ཕྱུག་སྲས་མོ་འདོད་ཁམས་དབང་ཕྱུག་མ། །རྣལ་འབྱོར་བདག་གིས་མགོན་དུ་མངའ་གསོལ་ལོ། །མགོན་སྐྱབས་མ་གཡེལ་འཇིག་རྟེན་དབང་བསྡུས་ལ། །བདག་ལ་འདོད་པའི་དངོས་གྲུབ་ཐམས་ཅད་སྩོལ། །ཀླུ་དབང་སྐྱབས་མཛད་དཀར་མོ་དུང་སྐྱོང་མ། །རྣལ་འབྱོར་བདག་གིས་བསྐྱབ་ཏུ་མངའ་གསོལ་ལོ། །ནད་གདོན་འཇིགས་པ་བརྒྱད་དང་བཅུ་དྲུག་ལས། །སྐྱོབས་པར་མཛོད་ཅིག་དབང་བཅུའི་མངའ་བདག་མ། །དྷ་ཤ་གྷི་ཝའི་ཆུང་མ་ཁ་འབར་མ། །རྣལ་འབྱོར་བདག་
གིས་བྲན་མོར་མངའ་གསོལ་ལོ། །བགེགས་རིགས་ཤ་ཟའི་གནོད་པ་བཟློག་པ་དང་། །དགོས་པའི་ལས་རྣམས་ཐོགས་མེད་བསྒྲུབ་པར་མཛོད། །ལྷག་པའི་མཐུ་ཆེན་གཤིན་རྗེའི་སྲས་མོ་ཆེ། །རྣལ་འབྱོར་བདག་གིས་དཔུང་དུ་མངའ་གསོལ་ལོ། །བྱད་ཁ་དྲོད་གཏོང་དུས་མིན་འཆི་བ་སོགས། །སྐག་བཟློག་ཆེན་མོ་ཁྱོད་ཀྱིས་བཟློག་ཏུ་གསོལ། །བཙན་སྐྱ་རྡོ་རྗེ་ཟླ་བའི་མཛའ་སྡེ་མོ། །རྣལ་འབྱོར་བདག་གིས་མཛའ་མོར་མངའ་གསོལ་ལོ། །གདུང་སེམས་མ་ཆུང་རྟག་ཏུ་བརྩེ་བས་སྐྱོང་། །གློ་བུར་ཡེ་འདྲོགས་བར་ཆད་མེད་པར་མཛོད། །ཐུབ་པས་བཀའ་བསྒོས་བསྟན་པ་སྤྱི་སྲུང་མ། །རྣལ་འབྱོར་བདག་གིས་སྲུང་མར་མངའ་གསོལ་ལོ། །བདག་དང་སློབ་མ་བརྒྱུད་པར་བཅས་པ་ཡི། །བསྟན་པ་དར་ཞིང་རྒྱས་པའི་ཕྲིན་ལས་མཛོད། །མེ་ལྷ་རླུང་ལྷ་འགྲུབ་པའི་གྲུབ་ཆེན་མ། །བདག་གིས་སྒྲུབ་སྡེ་མ་རུ་མངའ་གསོལ་ལོ། །རྫུ་འཕྲུལ་སྣ་ཚོགས་ཐོགས་པ་མེད་པ་ཡི། །ངོ་མཚར་དངོས་གྲུབ་དམ་པ་བསྩལ་དུ་གསོལ། །དབྱིངས་ཡུམ་རལ་གཅིག་གྲུབ་པའི་རིག་འཛིན་མ། །རྣལ་འབྱོར་བདག་གིས་བླ་མར་མངའ་གསོལ་ལོ། །མི་མངོན་
དབྱིངས་ནས་དབང་བསྐུར་བྱིན་གྱིས་རློབས། །འཇའ་ལུས་མཁའ་སྤྱོད་འགྲུབ་པའི་དངོས་གྲུབ་སྩོལ། །རྟ་མགྲིན་ཡུམ་ཆེན་པདྨ་གཟི་ལྡན་མ། །རྣལ་འབྱོར་བདག་གིས་བཟུང་མར་མངའ་གསོལ་ལོ། །ཟག་བཅས་ལུས་ཀྱི་དགའ་བདེ་སྦར་ནས་ཀྱང་། །ཟུང་འཇུག་རྡོ་རྗེ་འཆང་ཆེན་འགྲུབ་པར་མཛོད། །རིམས་ནད་འཇོམས་མཛད་བཀྲ་ཤིས་ཤ་བ་རི། །བདག་གིས་ཡི་དམ་མཆོག་ཏུ་མངའ་གསོལ་ལོ། །མི་ནད་ཕྱུགས་ནད་གནོད་པ་ཞི་བ་དང་། །བཀྲ་ཤིས་དགེ་ལེགས་རྒྱས་པར་མཛད་དུ་གསོལ། །ཤིང་གི་ལྷ་མོ་གཟི་བརྗིད་འོད་ཟེར་ཅན། །རྣལ་འབྱོར་བདག་གིས་བརྟེན་པར་མངའ་གསོལ་ལོ། །དུས་ངན་སྙིགས་མའི་ཚ་གདུང་ཅི་བྱུང་ཡང་། །ཁྱེད་ཀྱི་ཐུགས་རྗེའི་བསིལ་གྲིབ་མ་གཡེལ་ཅིག །སྨན་གྱི་རྒྱལ་མོ་བདུད་རྩི་འཆི་མེད་མ། །རྣལ་འབྱོར་བདག་གིས་སྨན་པར་མངའ་གསོལ་ལོ། །ནད་རིམས་བཞི་བརྒྱ་རྩ་བཞིའི་གནོད་པ་རྣམས། །ཞི་བར་མཛོད་ཅིག་སྨན་གྱི་རྒྱལ་མོ་ཆེ་། །དུད་འགྲོ་ཕྱུགས་ཀྱི་བདག་མོ་གཡང་ཤམ་ཅན། །རྣལ་འབྱོར་བདག་གིས་ནོར་ལྷར་མངའ་གསོལ་ལོ། །ཕྱུགས་ལ་གོད་ཁ་ནད་ཡམས་མེད་པ་དང་། །རྐང་བཞི་ཕྱུགས་
ཀྱི་དངོས་གྲུབ་བསྩལ་དུ་གསོལ། །འཕགས་བཞི་བསྐྱེད་མཛད་ས་བརྒྱད་སེམས་མའི་ཚུལ། །བདག་གིས་ལམ་སྟོན་འདྲེན་པར་མངའ་གསོལ་ལོ། །བདག་དང་བདག་ལ་འབྲེལ་ཐོགས་འགྲོ་བ་རྣམས། །བླ་མེད་བྱང་ཆུབ་མཆོག་ཏུ་ལམ་སྣ་དྲོངས། །གཤིན་རྗེའི་ལྕམ་མོ་བདུད་ཀྱི་ཡུམ་གཅིག་མ། །བདག་གིས་ལས་མཁན་ཆེན་མོར་མངའ་གསོལ་ལོ། །བསྟན་དང་བདག་ལ་སྡང་བའི་དགྲ་བོ་རྣམས། །ལོ་ཟླར་མ་འགྱང་ཆེམས་ཆེམ་ཞལ་དུ་གསོལ། །སྟོང་གསུམ་དབང་བསྒྱུར་སྲིད་པའི་རྒྱལ་མོ་ཆེ། །བདག་གིས་མགོན་དང་དཔུང་དུ་མངའ་གསོལ་ལོ། །སྟོང་གསུམ་ལྷ་མིའི་གཡོས་དང་ཁེངས་ལོག་དང་། །ཆག་ཆེན་ཉམ་ང་བསྒྱུར་བའི་ཕྲིན་ལས་མཛོད། །དགྱེས་པ་རྡོ་རྗེའི་སྒོ་བཞི་སྲུང་མ་མཛད། །བདག་གིས་སྒོ་སྲུང་མཆོག་ཏུ་མངའ་གསོལ་ལོ། །ཕྱི་ཡི་བར་ཆད་ནང་དུ་མ་བཏང་ལ། །ནང་གི་དངོས་གྲུབ་ཕྱི་རུ་མ་ཤོར་ཅིག །མདོར་ན་འདི་ནས་བྱང་ཆུབ་མ་ཐོབ་བར། །བདག་གིས་ཆོས་སྐྱོང་མཆོག་ཏུ་མངའ་གསོལ་ལོ། །ནམ་ཡང་བདུད་ཀྱི་བར་ཆད་མི་འབྱུང་ཞིང་། །མྱུར་དུ་རྣམ་མཁྱེན་བྱང་ཆུབ་ཐོབ་པར་ཤོག །ཅེས་པ་རྫོང་མགོ་བླ་མ་ཀུན་
དགའ་ཉི་མས་བསྐུལ་ནས་འཕྲལ་དུ་དགེ་སློང་ཨ་རཱ་གས་སྦྱར་བ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།