དབེན་གནས་བྱེ་ཐང་ལ་བསྔགས་པ་སྐལ་ལྡན་ཡིད་དབང་འགུགས་པའི་ལྕགས་ཀྱུ།
དབེན་གནས་བྱེ་ཐང་ལ་བསྔགས་པ་སྐལ་ལྡན་ཡིད་དབང་འགུགས་པའི་ལྕགས་ཀྱུ་ཞེས་བྱ་བ་བཞུགས་སོ། །ན་མོ་གུ་རུ་བྷྱ། རྗེ་རྒྱལ་བའི་རྣམ་འཕྲུལ་བླ་མ་མཆོག །དྲིན་སུམ་ལྡན་ངག་གི་དབང་པོ་ལ། །བུ་མོས་གུས་གདུང་བས་གསོལ་བ་འདེབས། །གནས་རི་ཁྲོད་ཟིན་པར་བྱིན་གྱིས་རློབས། །ཕ་གུ་རུས་བྱིན་བརླབས་སྦས་པའི་གནས། །མ་མཁའ་འགྲོ་རང་བཞིན་འདུ་བའི་ཞིང་། །མཚན་སྙན་གྲགས་ཆེ་བ་བྱེ་གླིང་ཐང་། །འདིའི་ཆགས་ཚུལ་འཆད་ལ་དར་ཅིག་གསོན། །ཤར་ཡང་དག་སྒྲུབ་ཕུག་ཞི་བའི་གནས། །ལྷོ་ཉི་ཟླ་རང་བྱོན་རྒྱས་པའི་གནས། །ནུབ་ལྷ་མཚོ་བདུད་མཚོ་དབང་གི་གནས། །བྱང་ཟླ་གམ་གནམ་སྒོ་དྲག་པོའི་གནས། །ཕྱོགས་གནས་ཆེན་བཞི་ཡིས་བསྐོར་བའི་ནང་། །ཕྱི་གངས་དང་དེ་ནང་རྫ་རི་སྟེ། །འོབས་ར་བ་རིམ་པ་གཉིས་ཀྱིས་བསྐོར། །དེའི་དབུས་
འགྱུར་བྱེ་ཐང་གནས་ཀྱི་མཐིལ། །དབྱིབས་མི་ལྤགས་བརྒྱངས་འདྲ་རྒྱང་གྲགས་ཙམ། །ཕུ་བྱང་བསྟན་རྫ་ལུང་ཁ་བྲག་ནས། །གངས་ཆུ་དང་རྫ་ཆུའི་རྒྱུན་གཉིས་བབས། །ཐང་དཀྱིལ་དུ་གཉིས་མེད་གཅིག་ཏུ་འདྲེས། །དེ་ལྷོ་ཕྱོགས་རྒྱ་གར་ཡུལ་དུ་འགྲོ། །ཉིན་རི་རྣམས་མཚོན་ཆ་གཟེང་འདྲ་དང་། །སྲིབ་རི་རྣམས་མེ་ལྕེ་མཆེད་པ་འདྲ། །གཡའ་སྤང་གི་གཤོངས་ན་ཕུར་སྲུང་གི། །བླ་རྟེན་གྱི་མཚོ་མོ་ཆེ་ཆུང་ནི། །མར་ཁུ་དང་ཞག་གི་མཚོ་མོ་ཞེས། །མདོག་གཅིག་ཏུ་མ་ངེས་གྲངས་མང་འཁྱིལ། །ཕྱོགས་བཞི་རུ་སྒྲུབ་ཕུག་དུ་མ་ཡང་། །སྔོན་བྱོན་གྱི་གོང་མས་བསྟེན་ཤུལ་བདོག །ཕུ་བྲག་ཆེན་ལོགས་ལ་རང་བྱོན་ནི། དཔལ་ཆེ་མཆོག་རྡོ་རྗེ་གྲོ་བོ་ལོད། །སྐུ་ཆེ་ཆུང་ཐོག་ཚད་བཞི་ཙམ་པ། །ཆུ་བུར་གྱི་མིག་ལ་མངོན་སུམ་གསལ། །བྱང་གངས་རི་རྩེ་རྒྱལ་མདུན་རོལ་ན།
གནས་ངོ་མཚར་ཆུ་མིག་བརྒྱ་རྩའམ། །ཆུ་ཡན་ལག་བརྒྱད་ལྡན་ཞེས་གྲགས་པའི། །ཉམས་དགའ་ལ་རིག་པ་དྭངས་པའི་གནས། །སྤང་རི་དང་ནེའུ་ཐང་མེ་ཏོག་བཀྲ། །ཆུ་ཡན་ལག་བརྒྱད་ལྡན་ལྷུང་ལྷུང་གི། །སྒྲ་དང་བཅས་སྦྲུལ་ནག་འཁྱུག་འགྲོས་འགྲོ། །ལྷ་སྨན་བཙུན་དགྱེས་བསྐྱེད་སྐྱུང་ཀ་ནི། མཆུ་སེར་པོ་ཅན་དང་སྦབ་ཅེས་བྱ། །སྤུ་རྨ་བྱའི་མཛེས་སྡུག་ལ་འགྲན་དང་། །རི་དྭགས་ཀྱང་ཤ་བའི་ཁྱུ་ཚོགས་མཆིས། །ལུ་མ་དང་ལྟེང་ཀ་སྣ་ཚོགས་ཆབ། ། སྔགས་གུ་རུ་སིདྡྷིའི་རང་སྒྲ་ལྡན། །ལར་བྱེ་ཐང་གངས་ཀྱི་ར་བ་འདིར། །རྗེ་པད་འབྱུང་རིག་འཛིན་ཚོགས་བཅས་ཀྱིས། །ཕྱི་རབས་ཀྱི་གང་ཟག་ལ་དགོངས་ནས། །ཆོས་ཟབ་གཏེར་དཔག་ཏུ་མེད་པ་དང་། །ཁྱད་པར་དུ་དྲག་སྔགས་བཀའ་བབ་ཀྱི། །དཔལ་རིག་འཛིན་ཤཱནྟིཾ་གནྡྷའི་གདུང་། །གནས་འདི་ཡི་བྲག་དཀར་
ལ་སྦས་ཚུལ། །བྱང་ལྷ་བྲག་ལུང་གིས་གསལ་བར་གྲུབ། །ས་བཙན་ཞིང་དགྲ་རྐུན་གཅན་གཟན་མེད། །འབྱུང་འཁྲུགས་ཀྱི་ནད་སེལ་སྨན་སྣ་ཚོགས། །རྩ་བ་དང་སྡོང་པོ་མེ་ཏོག་འབྲས། །རོ་ནུས་དང་ལྡན་པ་བརྒྱ་རྩ་འཁྲུངས། །ཁོ་ར་དང་ཁོར་ཡུག་ཐམས་ཅད་དུ། །དྲི་བསུང་གི་སྤོས་ངད་ཐུ་ལུ་ལུ། །ཆུ་ཤིང་དང་ལོ་མ་དཀའ་ཐུབ་ཟས། །མ་བཏབ་པར་སྐྱེས་པ་རྣམ་མང་ཡོད། །གྲོགས་འདབ་ཆགས་མཐིང་རིལ་ཐི་བྱ་དང་། །སྐད་སྙན་གྱི་བྱེའུ་ཆུང་འཇོལ་མོ་སོགས། །གསུང་སྙན་པའི་གླིང་བུ་ཀྱུ་རུ་རུ། །ཡིད་སྐྱོ་བ་སངས་ཤིང་ངེས་འབྱུང་བསྐུལ། །གཞན་ཆགས་སྡང་ཉོན་མོངས་འཕེལ་བྱེད་པའི། །འདུ་འཛི་དང་སྐྱེ་བོའི་རྒྱུ་འགྲུལ་དབེན། །ནང་ཁ་འདོན་དགེ་སྦྱོར་ངང་གིས་འཕེལ། །ལམ་ལྟ་སྒོམ་སྤྱོད་པའི་བོགས་འདོན་དང་། །རུ་ཤན་དང་གཉན་གཅོད་བྱེད་པ་ལ། །གནས་འདི་ལྷག་དེང་
སང་གང་ནའང་མེད། །རྗེ་པདྨའི་སྦས་ཡུལ་རྩོད་མེད་འདི། །རྒྱ་གར་གྱི་དུར་ཁྲོད་བརྒྱད་དང་མཉམ། །ཕྱོགས་མཐའ་ཀུན་ངམ་གྲོག་གཡང ས་ཆེ། །སྤྲིན་ན་བུན་ཆར་པ་རྒྱུན་དུ་ལྡན། །མཚམས་དམ་པོ་རང་བཞིན་བབ་ཀྱིས་བསྡོམ། །གཞི་བདག་ཀྱང་དཀར་ཕྱོགས་དགེ་བསྙེན་ཆེ། །ཐང་ལྷ་དང་རྡོར་ལེགས་སྨན་བཙུན་མ། །དཔལ་ཟླ་བ་ཆ་ཏི་ལ་སོགས་རྣམས། །ཆོས་སྒྲུབ་པ་པོ་ཡི་གྲོགས་དན་མཛད། །ལར་སྙིང་ནས་དམ་ཆོས་དོན་གཉེར་བ། །བརྒྱ་ལ་ན་རེ་འགའ་མཆིས་སྲིད་ན། །ཚེ་གཅིག་གིས་སངས་རྒྱས་ཐོབ་པའི་གནས། །འདིར་ཕེབས་ཞེས་ཁོ་བོས་གཞེན་བསྐུལ་འདེབས། །འདིར་མཆིས་ཀྱི་རྣལ་འབྱོར དཔོན་སློབ་རྣམས། །རྐྱེན་མི་མཐུན་བར་ཆད་དབྱིངས་སུ་སོལ། །དོན་མཐུན་པའི་ལམ་སྣ་ཆོས་ལ་དྲོངས། །དཔལ་དོན་གཉིས་ལྷུན་གྲུབ་བཀྲ་ཤིས་ཤོག །ཅེས་
པའང་སྦས་ཡུལ་ཡོལ་མོའི་ཡང་ཁྲོད་ཀུན་བཟང་ཆོས་གླིང་གི་ལོ་གསུམ་མཚམས་པ་རྣམས་དམ་བཅའ་མཐར་འཁྱོལ་ནས་རེ་ཞིག་དཔོན་སློབ་ཐམས་ཅད་འཁོར་འདས་རུ་ཤན་གྱི་སྤྱོད་པ་བརྩམ་ཕྱིར་གསང་སྒྲོག་གི་རྩ་ལྟུང་མི་ཕོག་པའི་ལུང་སྟོང་བྱེ་ཐང་གངས་ཀྱི་ར་བར་ལ་ཆུ་འཕྲང་རྣམས་ལ་དོ་ཤི་དོ་ཆད་ཀྱིས་བརྒལ་ནས་སླེབས་སྐབས་ཉེ་གནས་པདྨ་འོད་གསལ་གྱིས་བསྐུལ་ངོར་ཉག་སྤྲང་རྒན་པོ་ཁྲོ་རྒྱལ་རྡོ་རྗེས་བྱེ་ཐང་ཅོག་སྒར་དུ་ས་སྦྲུལ་ཟླ་༥ ཚེས་༢༥ དགེ་བར་བྲིས་པའོ། མངྒ་ལཾ།། །།