འཆི་བ་བསླུ་བ།
ཁ།བབླ།མཱརྦ།ཧ།རྒ།༔ རྒྱ་གར་སྐད་དུ༔ ཏྲོ་ཏ་ལ་མུ་གྷ་བྷེ་ལ༔ བོད་སྐད་དུ༔ འཆི་བ་བསླུ་བ༔ བཅོམ་ལྡན་འདས་གཞོན་ནུ་ཁྲོ་གཉེར་ཅན་ལ་ཕྱག་འཚལ་ལོ༔ འགྲོ་བ་སྡུག་བསྔལ་རྣམས་ལས་གྲོལ་བར་བྱ་བའི་ཕྱིར༔ འཆི་བའི་སྡུག་བསྔལ་ཤིན་ཏུ་མི་བཟད་དྲག་པོ་རྣམས༔ ཐུགས་རྗེ་ཆེན་པོས་དེ་དག་མ་ལུས་གཟུང་བྱའི་ཕྱིར༔ འཆི་བ་ལས་བཟློག་དུས་ལས་བཤོལ་འདེབས་རྣམ་པར་བཤད་པར་བྱ༔ དེ་ལ་རིགས་ཀྱི་བུ་ཁ་ཅིག་ལ་གོང་གི་འཆི་བའི་རྟགས་བྱུང་བ་དེ་དག་ལས་ལོར་ནུར་བ་དང༔ ཟླ་བར་ནུར་བས་བཟློག་པའི་མན་ངག་ལ༔ སྤྱིར་དྲིལ་ནས་བཟློག་པ་དང༔ བྱེ་བྲག་ཏུ་བཟློག་པའོ༔ དང་པོ་ནི་བར་ཆད་ཀྱི་གདོན་འབྱུང་པོ་རྣམས་ཀྱིས་ཚེ་འདུ་བྱེད་པ་ཡིན་ཏེ༔ ལུས་འབྱུང་བ་ལྔའི་རྟེན་ཡན་ལག་ལྔ༔ དབང་པོ་ལྔ༔ དོན་སྙིང་ལྔ༔ སྣོད་ལྔ༔ རྩ་ཆེན་པོ་ལྔའི་རང་བཞིན་དུ་གནས་པར་༼ལོ་ཟླ་ཉིན་མཚན་གྱི་འཕོ་བས་༽རྐྱེན་གྱིས་བསླངས་ཏེ་འཆི་བ་དང༔ འབྱུང་བ་༼ལོ་གཅིག་ལ་ཟླ་བ་བཅུ་གཉིས་ཀྱི་དུས་སུ༔ འབྱུང་བ་རེས་ཟླ་བ་གཉིས་དབང་ངོ་༔ གཉིས་ཀྱི་སྤྱི་ཁྱབ་ཏུ་གནས༔ ཟླ་བ་གཅིག་ལ་རེ་རེས་ཞག་ལྔ་ལྔ་དབང༔ ལྔ་སྤྱི་ཁྱབ་ཏུ་གནས་༽ནང་འཁྲུགས་པས་འཆི་བ་དང༔ བར་ཆད་གདོན་གྱིས་འཆི་བ་འོ༔ དེའི་རྟགས་སུ་འཆི་ལྟས་འབྱུང་བ་རྣམས་རྟོགས་པའོ༔ དེ་ཡང་བྱུང་མ་ཐག་ཆོ་ག་དང་རིམ་གྲོ་དང་ལྟ་སྤྱོད་ལ་སོགས་(༦༠)པས་བཟློག་གོ༔ འབྱུང་བ་དང་གདོན་གྱིས་གནད་ལ་སླེབ་ནས་མི་བཟློག་གོ༔ དཔེར་ན་མཁར་གྱི་འོག་ཁང་དུ་མེ་སོད་སླ་ཞིང་ཡང་ཐོག་ཏུ་ཤོར་ན་མི་སོད་པ་དང་འདྲའོ༔ འཆི་ལྟས་བྱུང་ནས་སྔོན་དུ་བླ་མ་དཀོན་མཆོག་མཆོད་དེ་ཚོགས་བསགས་པའི་ལས་ཅི་འགྲུབ་བྱའོ༔ དེ་ནས་འབྱུང་བ་འཁྲུགས་པ་ལ་འཁོར་ལོ་དང་འབྱུང་བའི་ཡི་གེས་བཟློག་པ་ནི༔ རྒྱ་ཤོག་གམ་ཏ་ལའི་ལོ་མ་ལ་ཡི་གེ་བྲིའོ༔ དེའང་རླུང་གི་འཁོར་ལོ་རྩིབས་བཞི་པ་དང་ལྔའི་ལྟེ་བ་དང་རྩིབས་ལ་ཡཾ༔ མུ་ཁྱུད་ལ་ཨཱ་ལིའོ༔ དེ་བཞིན་དུ་མེ་ལ་རཾ༔ ས་ལ་ལཾ༔ ཆུ་ལ་ཁཾ༔ ནམ་མཁའ་ལ་ཨེ༔ མུ་ཁྱུད་ལ་ཨཱ་ལི༔ ཁ་དོག་འབྱུང་བ་དང་མཐུན་པར་བྱས་ལ་འབྱུང་བ་སོ་སོའི་ལྷར་བསྐྱེད་དེ༔ དེ་ལ་མཆོད་པ་ལྔ་འབུལ་ཞིང་སྡིག་པ་བཤགས་ལ་རང་གི་འདོད་པའི་དོན་ལ་གསོལ་བ་གདབ་ཅིང་སོ་སོའི་ཡི་གེ་ལོ་གྲངས་བརྗོད་ནས་ལྷ་ལ་བསྟིམ༔ ཁམ་ཕོར་ཁ་སྦྱར་དུ་བཅུག་པ་ཚོན་སྐུད་ལྔས་རྒྱ་གྲམ་དུ་བཅིང་བ་དང༔ ཤིང་སྣ་དང༔ ཆུ་སྣ་དང༔ མེ་སྣ་དང༔ ས་སྣ་དང༔ སེམས་ཅན་རིགས་མི་མཐུན་པའི་ཁའི་རླངས་པ་བསྒྲེས་པའི་ངར་ཟན་དང་བཅས་པ་ལ་མི་གཟུགས་ཁྲུ་གང་བ་བྱས་ཏེ་དབང་པོ་ལྔ་ལ་ཡི་གེ་ལྔ་བྲིས་ལ་གཞུག་གོ༔ གདོན་བསླུ་བའི་རྫས་ནི་ཁམ་སའམ་ངར་ཟན་ལ་བྱས་པའི་ངར་གླུད་ལོ་གྲངས་ཙམ་ལ་ཚོན་རྩིས་འབྱུང་བ་ལྔའི་མདོག་ཏུ་བསྒྱུར་བ་སྔོ་ནག་༼བདུད་༽དང༔ དམར་པོ་༼བཙན་༽དང༔ དཀར་པོ་༼རྒྱལ་པོ་༽དང༔ སེར་པོ་༼གཉན་༽དང༔ ལྗང་གུ་༼ཀླུ་༽དང༔ ཁྲ་བོ་༼ཤི་འདྲེ་༽དག་བྱས་ལ་རང་གི་དྲི་མ་དང་གོས་དུམ་དང་མཆིལ་མ་དང་སྐྲ་སེན་དང་དྲི་ཆུ་བསྲེ་ཞིང༔ བལ་ཚོན་དང༔ དར་སྣ་དང༔ ལྟས་ངན་གྱི་བྱ་༼འུག་པ་སྲིན་བྱ་སོགས་༽སྒྲོ་སྣ་ཚོགས་གླུད་ལ་བཙུག་པའི་མདུན་དུ་གཏོར་མ་ཁ་དོག་དང་མཐུན་པ་རེ་རེ་ངར་ཟན་གྱི་ཆང་བུ་ལོ་གྲངས་རེ་བཞག་ནས༔ དེ་ཐམས་ཅད་སྔགས་དྲུག་གིས་བྱིན་གྱིས་བརླབས་ལ༔ ཚིག་ཏུ༔ ཁྱེར་ཅིག་ཁྱེར་ཅིག་སྟོབས་ལྡན་རྣམས༔ སྲེད་དང་ཆགས་དང་ཞེན་པ་དང༔ དྲན་དང་གཟུང་དང་བསམ་དང་རིག༔ གློད་དང་ཞི་དང་གྲོལ་བར་མཛོད༔ ཅེས་(༦༢)བརྗོད་ནས་གླུད་འཁོར་ལོ་དང་བཅས་པ་ཆུ་ཆེན་པོའི་གཞུང་ལ་བསྐྱལ་ན་ལོ་གསུམ་གྱི་བར་དུ་འཆི་བ་ལས་བཟློག་པར་འགྱུར་རོ༔ འཆི་ལྟས་མ་བྱུང་གི་གོང་དུ་ལོ་གསུམ་གསུམ་ན་རེ་རེ་བྱས་ན་མཆོག་ཏུ་ལེགས་སོ༔
ཁྲམཋཟ།ཐཾ།༔ བདེ་བ་ཆེན་པོ་སྐྱོབ་པའི་ལྷ༔ ཐུགས་རྗེ་ཆེ་ལ་ཕྱག་འཚལ་ལོ༔ བྱེ་བྲག་ཏུ་བཟློག་པའི་ཐབས་ལ༔ རང་གི་བླ་མ་ཡོད་ན་རབ༔ མེད་ནའང་གྲོགས་ཡིད་དང་མཐུན་པ་ཞིག་གིས་འབྱུང་བ་ལྔའི་ས་བོན་གྱི་དབང་པོ་ལྔ་ལ་དབང་བསྐུར་བར་བྱས་ལ༔ དེ་ནས་སེན་མོའི་བཀྲག་མེད་ན་དགེ་སློང་བདུན་ལ་ཆོས་སྟོན་བྱ་ཞིང་ཡོན་དབུལ༔ སྡོམ་ལྡན་ཡིན་ན་བསྐྱར༔ མེད་ནའང་བླང༔ གོས་སེར་པོ་གྱོན་པས་བཟློག་གོ༔ མིག་གི་སྤྲིས་ཡལ་ན་ཚ་ཚ་དཀར་པོ་ལོ་གྲངས་བཏབ་ལ་བསྐོར་བ་བདུན་བྱས་ནས་ཆུ་ཆེན་པོར་དོར་ཞིང་གོམ་པ་ལོ་གྲངས་མ་སོང་བར་ཕྱི་མིག་མི་བལྟ་བར་འོང་ངོ་༔ ལྟག་པའི་སྐྲ་གྱེན་ལ་ལོག་པས་འབྲུ་ནག་པོ་ལ་ཟན་བྱས་ཏེ་ངར་གླུད་ཁྲུ་གང་བཅོས་པའི་སྙིང་ཁར་ལུང་ཏང་གི་རྡོག་པོ་ལོ་གྲངས་དང༔ རང་གི་མིང་བྲིས་པ་བཅུག་ནས་ནག་པོར་བྱས་པའི་སྐྲ་དང་གོས་རང་གི་གོས་རས་ཀྱིས་བྱས་ལ་རང་གི་གནས་ཁང་ནས་གོམ་པ་བརྒྱ་ཉི་ཤུ་རྩ་གཅིག་གི་སར་དོང་ནག་པོ་གྲུ་གསུམ་བྲུས་ཏེ་རཾ་ལོ་གྲངས་བརྗོད་ནས་གླུད་དེ་བསྐྱུར་ལ༔ བདུད་ནག་པོ་ཁྱོད་འདི་ཁྱེར་ཅིག༔ ཁལ་ཆེའོ༔ ཁལ་ཆེའོ༔ ཞེས་ལན་གསུམ་བརྗོད་ནས་དྲི་ཆེན་བཏང་ལ་སས་བྱིབས་ནས་ཕྱི་མིག་མི་ལྟ་བར་འབྲོས་སོ༔ རྐང་པའི་ལོང་མོའི་རྟགས་ལ་ཉི་མ་གྲིབ་ཆུང་ཕེབས་ཙམ་ན་ནུབ་ཏུ་བལྟས་ཏེ་གཅེར་བུར་འདུག་པའི་འཕོངས་སུ་ཁྱི་མཇུག་བཙུགས༔ མདུན་དུ་དྲི་ཆེན་བཏང་ལ་ཁམ་རེ་ཟ་ཞིང་ཁྱི་སྐད་རེ་འདོན་པ་ལན་གསུམ་བྱའོ༔ སྭོའི་རྩ་བར་དྲེག་པ་བྱུང་ན་ར་ལྤགས་གྱོན་ནས་ཤར་དུ་བལྟས་ཏེ་རའི་སྐད་ལན་གསུམ་གདོན་ནོ༔ སྣ་ཞོམ་པས་སྣའི་རྩེ་མོར་ཨ་བསམས་ལ་ཨ་ཉི་ཤུ་རྩ་གཅིག་བརྗོད་ཅིང་ཆུ་སྣ་དགུའི་ཁྲུས་བྱའོ༔ ཡན་ལག་བརྐྱངས་པས་ཡན་ལག་ལ་འབྱུང་བ་ལྔའི་འཁོར་ལོ་སྔར་བཞིན་རྒྱ་སྐེགས་ཀྱིས་བྲིས་ནས་(༦༢)གཟུངས་ཆུས་སྔར་བཞིན་བཀྲུའོ༔ མིག་འབྲུ་ཚུགས་སུ་བལྟ་ན་དགེ་སློང་ལ་ཆོས་སྟོན་བྱ༔ བྱིས་པ་ལོ་གྲངས་བསགས་ལ་སྟོན་མོ་བྱ༔ གོས་དམར་པོ་གྱོན་ནོ༔ འགྲམ་པ་གཤོང་བུར་སོང་ན་སཱཙྪ་སེར་པོ་ལོ་གྲངས་གདབ༔ ཆུ་གཏོར་དང་སྦྱིན་སྲེག་དང་དར་ལྗང་ཁུའི་བ་དན་ལོ་གྲངས་བྱ་ཞིང་ཨེ་ལོ་གྲངས་ལ་བཟླས་སོ༔ དབུགས་རྒོད་ན་བུ་རམ་གྱི་ལྡེ་གུ་ལ་རླུང་གི་སྙིང་པོ་བཟླས་ནས་ཟའོ༔ སྣ་ཡོ་ན་སྣ་རྩེར་ཧཱུྃ་དཀར་པོ་བསམ་མོ༔ མཆི་མ་འཛག་ན་མིག་ཏུ་བྷྲཱུཾ་བསམས་ལ་བཟླས་སོ༔ འགྲམ་པ་གཤོང་གི་སོང་ན་ཀྵྃ་བཟླས་སོ༔ སོ་འཐམས་ན་ཤྒྲ་ཤྷྭཾ་བཟླས་སོ༔ ལྕེ་ལ་ཐིག་ལེ་ནག་པོ་བྱུང་ན་ཧཱུྃ་བསམ་མོ༔ རྣ་བ་འབྱར་ན་ཡུཾ་བསམ་མོ༔ བྲང་གི་ལྷེན་སྣ་ཞོམ་ན་ཡྨྨུྃ་བསམ་མོ༔ རྩ་གཉིད་ལོག་མེད་ན་ཧྨྲུྃ་བསམ་མོ༔ ཡི་གེ་དེ་དག་ངག་ཏུའང་བཟླས་ཤིང་མཚལ་དང་དྲི་བཟང་པོས་བྲི་བར་ཡང་བྱའོ༔ ཚེ་གཟུགས་ཀྱི་ཕྱག་མཚན་མེད་ན་རང་གི་བླ་མ་ལ་ཚོགས་བརྒྱ་རྩ་བྱའོ༔ ལག་པ་གཡས་མེད་ན་འབྲུ་སྣ་བདུན་གྱི་ཕྱེ་ལ་གླུད་ཁྲུ་གང་བ་སེང་གེའི་མགོ་ཅན་ཁ་གདངས་པ་བྱས་ཏེ༔ བྱང་བུ་ལོ་གྲངས་བཙུགས་ནས་བྱང་ཕྱོགས་ཀྱི་ལམ་སང་དུ་བསྐྱལ་ལོ༔ གཡོན་མེད་ན་སྲེ་མོའི་སླུད་པུར་སྟག་ནག་ཕག་ནག་ཁྱི་ནག་གསུམ་གྱི་མཆེ་བ་དང༔ དྲི་ཆུས་སྦྲུས་པའི་ངར་གླུད་བླུགས་ལ་ཆུ་ལ་དོར་རོ༔ རྐང་པ་གཡས་པའི་པུས་མོ་མན་ཆད་མེད་ན་ཉི་མ་ནུབ་ཏུ་ས་སྲོས་དུས་སེང་ལྡེང་ངམ་རྒྱ་ཤུག་གི་མེ་ལོ་གྲངས་བཏང་ངོ་༔ གཡོན་མེད་ན་དཀར་པོའི་གླུད་ཁྲུ་གང་གི་སྙིང་ཁར་སྟག་པའི་བྱང་བུ་ལོ་གྲངས་ཀྱི་ཉ་ག་བྲིས་ལ་བཙུག་ནས་ལྷ་ཁང་འདྲེ་ཅན་དུ་ཐོ་རངས་བསྐྱལ་ལོ༔ མགོའི་གཡས་མེད་ན་ཕུང་ཤུལ་གྱི་ས་སྣ་དགུ་དང་ཤིང་ནག་པོའི་འབྲས་བུ་སྦྱར་ཏེ་གའུ་ནག་པོ་ཁ་སྦྱར་བྱས་པའི་ནང་དུ་རང་གི་སྐྲ་དང་གོས་དུམ་བཅུག་པའི་གའུའི་རྒྱབ་ཏུ་༼ལོ་ཡི་རྒྱལ་པོ་རྟགས་འདི་ཁྱེར་སོགས་༽ལོ་བཅུ་གཉིས་ཀྱི་མིང་གླང་མའི་བྱང་བུ་ལ་བྲིས་པ་བཙུག་སྟེ་ཚེར་མ་སྣ་ཚོགས་ཀྱང་བཙུགས་ནས་ནམ་ཕྱེད་དུས་དུར་ཁྲོད་ཏུ་བསྐྱལ་ལོ༔ གཡོན་མེད་ན་འབྲུ་སྣ་ཉི་ཤུ་རྩ་ལྔའི་ངར་གླུད་ཀྱི་སྙིང་ཁར་མི་རྟ་ཁྱི་གསུམ་གྱི་རུས་པ་གོས་དུམ་གྱིས་གྲིལ་བ་བཅུག་ལ་ཚེས་བཅུ་གཅིག་གི་ནམ་སྲོས་དུས་གོམ་པ་བརྒྱད་ཅུའི་ཕྱིར་དོང་བྲུས་པར་བཅུག་ནས་རང་གི་མིང་ནས་བོས་ཏེ་ངུ་བའི་ཚུལ་ལན་གསུམ་བྱས་ལ་སྦའོ༔ སྐེ་མན་ཆད་མེད་ན་ཤར་ལྷོར་ཚེར་མའི་ཧོམ་ལོ་གྲངས་བྱས་ཏེ་རིམ་གྱིས་བསྲེག་ཅིང་རཾ་ལོ་གྲངས་བརྗོད་དོ༔ སྐེ་དང་བཅས་པ་མེད་ན་ལུས་རོ་སོལ་གྱིས་བྱུགས་ཏེ་སྐྲ་སྤྱི་བོར་བཅིངས་ལ་ཤོག་བུ་སོར་བཞི་ལ་རང་གི་ལོའི་མིང་དང༔ གནམ་ལོའི་མིང་བྲིས་པའི་ཕྱོགས་བཞིར་རཾ་ཡཾ་ལཾ་ཁཾ་བྲིས་པ་རང་གི་སྣ་ལ་བཏགས་ཏེ་གུ་གུལ་གྱིས་བདུག་ཅིང༔ ཚེས་དགུའི་ནམ་ཕྱེད་དུས་ཕྱོགས་བཞིར་རྒྱུག་ཅིང་ཁ་ལ་ཁྱོད་ཁྱེར་ཅེས་འབྲེལ་མེད་པ་མང་པོ་བརྗོད་ནས་ཤོག་བུ་དེ་དུར་ཁྲོད་དུ་སྦའོ༔ སྟོད་ཁོག་མེད་ན་མེ་བཏང་ནས་ལོ་བཅུ་གཉིས་ཀྱི་མིང་བྱང་བསྲེག་གོ༔ སྨད་མེད་ན་དུར་ཁྲོད་དུ་ཕྱིན་ནས་རུས་པ་སྣ་ཚོགས་ཀྱི་དུད་པ་བཏང་ངོ་༔ ལུས་སྤྱིའི་གཡས་མེད་ན་གཙུག་ཏོར་འདོན་པ་ཚྭ་ཚྭ་ལོ་གྲངས་བྱའོ༔ གཡོན་མེད་ན་གོས་དམར་པོ་གྱོན་ཞིང་གཟུངས་གྲངས་མང་འདོན་ནོ༔ གནམ་སའི་འབྲེལ་ཐག་ཆད་ན་དགེ་བ་གྲུབ་ཚད་དང་གསུང་རབ་མང་པོ་ཀློག་གོ༔ སེང་གེའི་མི་བབས་ན་དཀྱིལ་འཁོར་གྱི་ཆོ་ག་ལོ་གྲངས་ཞུའོ༔ རི་ཐང་མཚམས་སུ་ལྗོན་ཤིང་ཆག་ན་དོན་སྣོད་སོ་སོའི་སྨན་སྦྱོར་བྱའོ༔ ཆུའི་རླངས་པ་སྔོ་དམར་བྱུང་ན་ལོ་བཅུ་གཉིས་ཀྱི་གཟུགས་ཁམས་ལ་བྱས་ཏེ་ཁ་དོག་ལྔར་བསྒྱུར་ལ༔ སཙྪ་རེ༔ ངར་གླུད་རེ༔ སྟག་པའི་ཧོམ་རེ་བྱས་ཏེ་ཉི་མ་དམར་ཐག་ཆོད་དུས་བྱང་ཤར་གྱི་དུར་ཁྲོད་དུ་བསྐྱལ་ལོ༔ ནག་པོ་ཧྲལ་ཧྲོལ་ལ་འབྲུ་སྣ་ལྕགས་ཟངས་ཀྱི་ཕྱེ་དང་བཅས་པ་ཕྱོགས་བཞིར་གཏོར་རོ༔ དམར་པོ་ཐིག་ལེ་ཅན་ལ་རང་གི་དྲི་མ་བསྒྲེས་པའི་ངར་གླུད་ལོ་གྲངས་ལ་གཟི་མོ་བྱི་ཐུར་རེ་དང་དར་དམར་པོའི་བ་དན་རེ་བཙུག་སྟེ་རུས་པ་སྣ་ཚོགས་དང་ལྷན་ཅིག་ཤར་གྱི་ལམ་པོ་ཆེར་བསྐྱལ་ལོ༔ དྲི་ཆེན་གྱི་རླངས་མེད་ན་རྟ་ཐོད་ལ་འབྱུང་བའི་ས་(༦༤)བོན་བྲིས་ཏེ་ཉི་མ་མདུང་གང་དུས་ནུབ་ཏུ་བལྟས་ཏེ་རྟ་སྐད་གྲངས་མེད་འདོན་ནོ༔ རྣ་བའི་རླུང་སྒྲ་ལ་ཟས་སྣ་ཚོགས་ཚད་ཀྱི་གཏོར་མ་ལོ་བཅུ་གཉིས་ཀྱི་མིང་དང་བཅས་པ་ནུབ་ཕྱོགས་ཀྱི་སྡོང་པོའི་དྲུང་དུ་བསྐྱལ་ལོ༔ སྐད་མེད་ན་སྙིང་ནང་དུ་ཡཾ་བསམས་ལ་མིག་གྱེན་དུ་བསྒྲད་དེ་འདུག་པའི་སྤྱི་བོར་གཅིག་གིས་གཟུངས་ཆུས་བཀྲུའོ༔ ཤིང་ལོ་ལངས་ན་ཚོགས་དང་དགེ་སྦྱོར་ལ་འབད་དོ༔ ཆོ་ག་དེ་དག་བྱས་ལ་བརྟགས་པས་ལན་བདུན་ནས་ལོ་གྲངས་ཙམ་གྱིས་འཆི་བ་བཟློག་ངེས་སོ༔ འཆི་བ་བསླུ་བའི་མན་ངག༔ སློབ་དཔོན་ཆེན་པོ་ཤྲཱི་སིང་ཧས་མཛད་པ་རྫོགས་སོ༔ རྒྱ་རྒྱ་རྒྱ༔ ལས་ཅན་ཅིག་དང་འཕྲད་པར་ཤོག༔
སངས་རྒྱས་དགོངས་པ་མཐར་ཐུག་ངེས་པའི་ལུང༔ ཟབ་ཅིང་རྒྱ་ཆེ་བཀོད་པ་ཆེན་པོའི་དོན་རྣམས་ལས༔ ངེས་པའི་བཀའ་གསང་ཡོངས་བསྡུས་སྙིང་པོའི་དོན་འདི་ནི༔ དམ་པ་འཇིག་རྟེན་གཡུལ་ངོ་ཐམས་ཅད་བཟློག་མཛད་པའི༔ འཇམ་དཔལ་ཉིད་ཀྱི་སྤྲུལ་པ་དྲི་མེད་ཀུན་གྱི་མགོན༔ ངེས་པའི་སྙིང་པོ་གཅིག་ཏུ་དྲིལ་ནས་ནི༔ གཏི་མུག་འཐུག་པོས་བཅིངས་པ་ཡེ་ཤེས་འོད་དུ་ནི༔ རྣམ་པར་བཀྲོལ་ཏེ་རང་སྣང་ཉིད་སྟོན་བླ་མ་མགོན༔ དྲི་མེད་འཇམ་དཔལ་སྤྲུལ་པ་ཁྱོད་ལ་བདག་ནི་འདུད༔ བདག་གི་གནས་སྐབས་བག་ཆགས་བསགས་པའི་ལུས་འདི་ནི༔ ཤོ་ཥ་རབ་ཏུ་བཀོད་པའི་གླིང་ཞེས་ཡུལ་དུ་ནི༔ རྒྱ་ནག་རིགས་ལ་ཁྱིམ་བདག་དགེ་བ་ལྡན་པའི་ཡིད༔ སྣང་བ་གསལ་བར་བྱེད་པའི་ལྷུམས་སུ་ནི༔ གྲོང་ཁྱེར་ཤོ་འཁྱམས་ནག་པོ་ཞེས་བྱར་བདག་ནི་སྐྱེས༔ དེ་ནས་ལོ་ནི་བཅོ་ལྔ་དག་ན་བྱང་ཆུབ་ཤིང་དྲུང་དུ༔ སློབ་དཔོན་མཁས་པ་ཧསྟི་བྷ་ལ་ལས༔ བདག་གིས་ཡི་གེ་རྩིས་དང་སྒྲ་དང་བསྟན་བཅོས་ཉན༔ ལོ་གསུམ་གྱིས་ནི་མཁས་པའི་སྙན་པ་ཐོབས༔ དེ་ནས་ནུབ་ཕྱོགས་གསེར་གླིང་དག་ཏུ་འགྲོ་སྙམ་ནས༔ རྔ་མོ་སྟོབས་ལྡན་དག་ལ་ཞོན་ནས་ནུབ་ཕྱོགས་ཕྱིན༔ བར་གྱི་ཐང་ཁོབ་སྙུག་ཚལ་འདམ་བུའི་ཁྲོད་དུ་ནི༔ སྒྲ་ཆེན་འཇིགས་པའི་ང་རོ་ནམ་མཁའ་དག་ནས་(༦༥)གྲགས༔ བདག་ནི་དད་པའི་ཤུགས་ཀྱིས་ནམ་མཁར་ཅེར་བལྟས་པས༔ འོད་དཔུང་ཡིད་ལྡན་དཀྱིལ་ན་ཐུགས་རྗེ་ཆེན་པོ་ཉིད༔ འཛུམ་པའི་ཞལ་དང་བདེ་བའི་ཕྱག་རྒྱ་མཛད་ནས་ནི༔ ལུང་བསྟན་འབྲས་བུ་འདོད་ན་སོ་སའི་གླིང་དུ་སོང༔ ཞེས་ཐོས་བདག་ཡིད་རབ་ཏུ་དགའ་བ་ལས༔ བདག་གི་བསམ་པ་ཕྱིར་ལ་འདི་ལྟར་སྐྱེས༔ བདག་ནི་ད་རུང་ན་གཞོན་ལོ་བརྒྱད་བར་དུ་ཡང༔ འབྲས་བུ་ངེས་པའི་གསང་སྔགས་གོ་བྱའི་ཕྱིར༔ གསང་སྔགས་མཐའ་དག་ལ་ནི་གོམས་པར་བྱ་སྙམ་ནས༔ སླར་ལོག་རྒྱ་ནག་ཤར་གྱི་རི་བོ་རྩེ་ལྔ་ལ༔ གདོལ་པའི་སློབ་དཔོན་བྷེ་ལ་ཀིརྟི་ལས༔ གསང་བའི་སྔགས་སུ་གྲགས་པའི་རྒྱུད་སྡེ་དང༔ ལུང་དང་མན་ངག་སྒྲུབ་པའི་ཐབས་རྣམས་ཉན༔ ལོ་བདུན་གྱིས་ནི་བདག་གིས་མ་ལུས་ཤེས༔ སྔ་དྲོའི་གྲོ་ཐོན་རི་བོའི་ཤར་དུ་ཕྱིན༔ ཁྲུས་རྫིངས་དལ་འཇམ་ནང་ན་ཁྲུས་བྱེད་འདུག་པ་ལས༔ བདག་ནི་ཡིད་འགྱུར་སྐད་ཅིག་ཙམ་དུ་དྲན་པ་ཉམས༔ དེ་ནས་དྲན་པ་ཉིད་ནི་སད་ནས་ཡར་ལངས་པས༔ ནམ་མཁར་འོད་དཔུང་དཀྱིལ་ན་ཐུགས་རྗེ་ཆེན་པོ་ཉིད༔ སྣང་བ་འགྱུར་ཏེ་བདག་ལ་ལུང་ཡང་བསྟན༔ དེ་ནས་བདག་གིས་བསམ་པ་ཡང་བཏང་བ༔ འདི་ནས་རྒྱ་གར་ཡུལ་དུ་བསྒྲོད་ཅིང་འགྲོ་བ་ལ༔ འཇིགས་པའི་གཅན་གཟན་ཁྱུང་དང་རིགས་མེད་མོན༔ གདུག་པ་རྣམས་ཀྱིས་ལམ་ནི་གཙེར་སྙམ་ནས༔ ལོ་གསུམ་བར་དུ་རྫུ་འཕྲུལ་སྣ་འགའ་བསྒྲུབས༔ དེ་ནས་རྫུ་འཕྲུལ་སྟོབས་ཀྱིས་ས་ལ་ཁྲུ་གང་དུ༔ རེག་པ་མེད་པར་རླུང་གིས་བསྐྱོད་དེ་ཕྱིན༔ ཉིན་ཞག་དགུ་ན་དུར་ཁྲོད་སོ་སའི་གླིང༔ འཇམ་དཔལ་སྤྲུལ་པ་ཉིད་དང་བདག་མཇལ་ནས༔ ཡུན་གྱི་སྒྲིབ་པ་མ་སྦྱངས་གནས་སུ་དག༔ ཉི་ཤུ་རྩ་ལྔའི་བར་དུ་འབྲས་བུའི་ཡང་ཞུན་རྣམས༔ ཉམས་སུ་བླངས་ཤིང་ཡང་སྙིང་ཞུ་དག་བྱས༔ གསང་བའི་རྒྱུད་དང་མན་ངག་ཡི་གེ་རྣམས༔ དམ་པ་ཉིད་ཀྱིས་ལུང་བསྟན་རྡོ་རྗེ་གདན་ནས་ཕྱུང༔ ཁྱེར་ནས་སླར་ལོག་རྒྱ་ནག་དག་ཏུ་ཕྱིན༔ བྱང་ཆུབ་ཤིང་དྲུང་སངས་རྒྱས་འབྱུང་བའི་གནས༔ ཡང་སྟེང་དག་གི་བྲང་ཁང་སྦྲེལ་མ་རུ༔ གསང་བའི་རྒྱུད་(༦༦)དང་མན་ངག་ལུང་དང་ནི༔ དམ་པས་ལུང་བསྟན་བདག་གིས་སྡེ་བཞིར་ཕྱེས༔ སྡེ་གསུམ་སྤྲོས་བཅས་དོན་དུ་སྡེབས་ནས་ནི༔ ལྷ་ཁང་བྱ་འདབ་འོག་གི་ཀ་བ་བཞི་སྒྲིལ་ནང༔ ཟངས་ཀྱི་སྒྲོམ་བུར་དེ་དག་སྩལ་ནས་ནི༔ ཕྱི་རབས་དོན་དུ་རྒྱ་ཡིས་བཏབ་སྟེ་སྦས༔ ཡང་གབ་སྦས་པའི་སྙིང་ཏིག་སྒྲོན་མ་འདི༔ བདག་གི་སྙིང་དང་གཟུགས་ཀྱི་ཕུང་པོ་བཞིན༔ འབྲལ་བའི་སྐབས་མེད་ལུས་ལ་རྟག་ཏུ་བཅངས༔ དེ་ནས་ནམ་ཞིག་ཤིང་ནགས་འཐུག་པོ་རུ༔ བདག་གིས་གསང་བའི་ཉམས་བསྐྱངས་ལུས་ཀྱི་སྤྱོད་པ་བརྩམས༔ དེ་ནས་ནམ་ཕྱེད་དུས་ཀྱི་ཐུན་གཅིག་རྨི་ལམ་ན༔ བདག་གི་མ་རུ་བྱས་པའི་བུད་མེད་རྒྱན་ལྡན་ཞིག༔ བུ་གཅིག་ལོངས་དང་གསང་བ་ཡང་བསྡུས་སྙིང་པོ་རྣམས༔ བཀྲ་ཤིས་ཁྲི་སྒོའི་ཀ་བའི་འོག་ཏུ་སྦོས༔ རང་རྒྱས་ཐོབ་ལ་བསྟན་པའི་བཙས་སུ་ཞོག༔ དེ་སྐད་ཟེར་བས་ཀ་བའི་དཀྱིལ་དུ་ནི༔ རང་རྒྱས་བཏབ་ནས་འདི་ནི་དེ་རུ་སྦས༔ སྨུག་ནག་འཇིགས་པའི་གཟུགས་ཅན་སྔགས་ཀྱིས་སྲུངས༔ ཨེ་ཀ་ཙ་ཏི་ཁྲོས་མ་རག་གདོང་མ༔ བསྟན་པའི་སྙིང་པོ་འདི་གཏད་བཀའ་འདི་སྲུངས༔ ལུང་དང་མི་ལྡན་བན་འདྲས་འདི་ཁྱེར་ན༔ ཁྱོད་ནི་སྨུག་ནག་སྲོག་ལ་རྔམས་པའི་འཁོར༔ རབ་ཏུ་མི་བསྲུན་ཤ་དང་ཁྲག་འདོད་རྣམས༔ དེ་ཡི་ཤ་དང་ཁྲག་ལ་ལོངས་སྤྱོད་ཀྱིས༔ སྐལ་ལྡན་སྙིང་གི་བུ་དང་འཕྲད་པའི་ཚེ༔ འདི་རྣམས་བྱིན་ལ་ཁྱོད་ཀྱིས་སྟོངས་གྲོགས་གྱིས༔ རྩིས་དང་གཏོ་དང་ཁྲམ་ལ་དཔྱད་རྣམས་ནི༔ རི་བོ་རྩེ་ལྔའི་ཤར་གྱི་དཀྱིལ་ངོས་སྦོས༔ མཆོག་ཏུ་ཟབ་པའི་ཡང་ཟབ་སྙིང་པོའི་ཆོས༔ དཀོན་པའི་རིན་ཆེན་མིག་གི་འབྲས་བུ་འདི༔ ནམ་ཞིག་འབྱུང་བའི་དུས་ནི་བྱུང་བ་ན༔ དད་བརྩོན་ཤེས་རབ་ལྡན་པའི་སྤྱོད་ཡུལ་ལས༔ གཞན་ལ་བཤད་ཅིང་བསྟན་པའི་གནས་མེད་པས༔ རང་གི་སེམས་ལ་རྒྱ་ཡིས་ཐོབས་ལ་བརྣོགས༔ འཆི་བ་ཉིད་ལས་བཟློག་པའི་མན་ངག་འདི༔ བདག་གིས་ཉམས་བླངས་འཆི་དུས་ལན་གསུམ་བཟློག༔ དེ་ཡི་ཕྱིར་ན་ཉམས་སུ་ལེན་པའི་གྲོགས༔ གཞན་ལ་མི་ལྟོས་ཕྱིར་ན་འདི་དག་བྲིས༔ ཨ་ཏིའི་རང་ངོ་སྤྲོས་པ་ཀུན་བྲལ་ཡང༔ སེམས་(༦༧)ཅན་བློ་ཡི་དྲི་མ་མ་ཟད་པར༔ འདི་དག་རྣམས་ཀྱང་ཀུན་རྫོབ་བདེན་པ་འོ༔ དོན་དམ་ཉིད་ལ་སྐྱེ་ཤིའི་སྡུག་བསྔལ་བྲལ༔ ཞེས་ཤྲཱི་སིང་ཧས་གསུངས་སོ༔ རྒྱ་གར་གྱི་མཁན་པོ་བི་མ་ལ་མི་ཏྲས་སྒྲ་རང་འགྱུར་དུ་བསྒྱུར་བའོ༔ རྒྱ་རྒྱ་རྒྱ