བཞི་པ། ལས་ལ་སྦྱར་བའི་ལེའུ།
དེ་ལྟར་གེགས་སྤངས་ཏེ་བསྒྲུབས་པས་གྲུབ་པའི་རྣལ་འབྱོར་པ་བདག་གིས་གྲུབ་པའི་རྟགས་རྣམས་མངོན་དུ་བསྟན་པའི་ཕྱིར་ལས་སྦྱོར་གྱི་རིམ་པ་བཤད་པར་བྱའོ། །དེ་ཡང་རྣམ་པ་བཞི་སྟེ། དུག་ཞི་བ་དང་ཕྲན་ཚེགས་བསྟན། །དབང་དུ་བྱ་བ་རྩོད་པ་བཟློག །དེ་ལྟར་རྣམ་བཞིའི་རིམ་པ་བཞིན། །ཞི་རྒྱས་དབང་དང་དྲག་པོར་བཤད། །དེ་ཡང་ཞི་བའི་ཆོ་ག་དུག་ཞི་བ་ལ་སོགས་ཞི་བར་བྱ་བ་ནི། ནད་པ་དེའི་དཔྲལ་བའི་དཀྱིལ་དུ་པདྨ་འདབ་བརྒྱད་མཆོག་ཏུ་དཀར་བའི་ལྟེ་བར་ཧྲཱིཾ་ལས་བདུད་རྩི་དཀར་པོ་བབས་པས་ནད་པ་དེའི་ནད་ཐམས་ཅད་དང་། གདོན་རིམས་ཐམས་ཅད་བཤལ་ཏེ་ནད་གདོན་ལས་ཐར་བར་བསམ་ཞིང་། ཧྲཱིཾ་ཞེས་འབུམ་ཉི་ཁྲི་ལྔ་སྟོང་བཟླས་པས་ནད་ཐམས་ཅད་རབ་ཏུ་ཞི་བར་བྱེད་པའོ། །
གཉིས་པ་རྒྱས་པའི་ཆོ་ག་ལ་ཕྲན་ཚེགས་བསྟན་པ་ནི། བྱིས་པ་བཙས་མ་ཐག་པའི་ལྕེ་ལ་ཙནྡན། ག་བུར། གུར་གུམ། གི་ཝཾ་བཞི་སྦྱར་བས་ཧྲཱིཾ་བྲིས་ལ་དབྱངས་ཅན་མ་ཡི་འཁོར་ལོ་དགུག་གཞུག་བྱས་པས་བློ་རྣོ་བ་ངག་གི་དབང་ཕྱུག་དང་མཚུངས་པར་འགྱུར་རོ། །ཡང་འཆད་པ་ལ་ལྕེ་ལ་འཁོར་ལོ་གསལ་བཏབ་ནས་བཤད་ན་ཉན་པ་པོའི་རྣ་བར་སྙན་ཞིང་ཆོས་ཀྱི་ཚུལ་སྔོན་མི་ཤེས་པའི་ལེགས་བཤད་འཆད་ནུས་པའོ། །ཡང་འགྲེལ་གཏམ་དང་གླེང་བསླང་ལ་སོགས་ཀྱི་ཆོས་ཀྱི་ཚིག་དོན་བྱེད་པས་ན་དབྱངས་ཅན་འཁོར་ལོ་གསལ་བཏབ་ནས་བཤད་ན་སྤོབས་པ་ཐོགས་པ་མེད་ཅིང་ཀུན་གྱི་རྣ་བར་སྙན་པར་འགྱུར་རོ། །དེ་དག་ནི་འཁོར་ལོ་ཁ་དོག་སེར་པོ་འོད་དང་བཅས་པ་བསམ་པར་བྱའོ། །
གསུམ་པ་དབང་གི་ཆོ་ག་སྒྲུབ་པའི་ལས་བརྩམ་པ་ནི། གང་ལ་བྱ་བའི་བསྒྲུབ་བྱ་དེའི་རྣམ་ཤེས་ཀྱི་ངོ་བོ་ཨ་ཐུང་ཚེག་དྲག་ཅན་དོང་ཙེ་བརྩེགས་པ་ལྟ་བུའི་སྣ་དང་དཔྲལ་བའི་དཀྱིལ་ན་བུག་པ་གྲུ་གསུམ་པ་པད་འདབ་བཞི་པའི་ལྟེ་བར་གཏད་པའི་ཧྲཱིཾ་དམར་པོ་ཚེག་དྲག་ཅན་བསམས་ལ། རང་གི་སྙིང་གའི་འཁོར་ལོའི་ཧྲཱིཾ་དམར་པོ་བསམ་པའི་འོད་ཀྱིས་ཧྲཱིཾ་ཨ་ཐུང་ལ་ཕོག་པས་ཚུར་གཅིག་ལ་གཅིག་མཐུད་དེ་རང་གི་སྙིང་གའི་ཧྲཱིཾ་ལ་ཐིམ་པར་བསམས་ལ། ཧྲཱིཾ་ཆེ་གེ་མོ་ཨཱ་ཀཪྵཱ་ཡ་ཧྲཱིཾ་ཛཿ ཞེས་བཟླས་ཏེ་བསམ་པས་ཕོ་མོ་གང་ཡིན་ཡང་ཞག་བདུན་གྱིས་འགུགས་པ་ཉིད་དོ། །
བཞི་པ་དྲག་པོའི་ཚོགས་རྩོད་པ་སྨྲ་བ་ཚར་བཅད་པ་ནི། རང་གི་ལྕེ་འཁོར་ལོ་མཐིང་ག་གསལ་བཏབ་ནས་ཕ་(༣༧)རོལ་པོའི་ཡ་རྐན་ལ་ཟངས། མ་རྐན་ལ་ལྕགས་ཀྱི་འཁོར་ལོ་རྩིབས་བརྒྱད་པ། ལྕེ་སྟེང་གསེར་གྱི་རྡོ་རྗེ་རྒྱ་གྲམ་སྟེ། དེ་གསུམ་གྱི་ལྟེ་བར་ཧྲཱིཾ་ནག་པོ་ཞིག་གིས་མི་འགྱུར་བར་བསྔགས་པར་བསམ་པའི་གྲེ་བར་ཁྲོ་ཆུའི་མཆོད་རྟེན་ནག་པོ་གདུགས་ཆོས་འཁོར་དང་བཅས་པ་མགོ་མཇུག་བཟློག་པས་བཀབ་པར་བསམས་ཏེ། ཆེ་གེའི་ངག་སྟཱམྦྷ་ཡ་ནན་ཞེས་བརྒྱ་རྩ་བརྒྱད་ལ་སོགས་པ་བཟླས་ཏེ། རྩོད་དུས་དམིགས་པ་གསལ་བཏབ་ནས་རྩོད་པས་རྒྱལ་ངེས་སོ། །དེ་གལ་ཤིན་ཏུ་ཆེ་བའི་དབང་དུ་བྱས་པའོ། །རྩོད་པ་ཕལ་དང་ཤག་འགྲན་པ་ལ་རང་གི་ལྕེ་ལ་འཁོར་ལོ་གསལ་བཏབ་པས་རྒྱལ་ངེས་སོ། །ལས་ལ་སྦྱར་བའི་ལེའུ་སྟེ་བཞི་པའོ།། །།
དེ་ནས་དམ་ཚིག་ནི་རྟག་ཏུ་གཙང་སྦྲ་ལ་གནས་ཤིང་རྫུན་མི་སྨྲ། ཤ་ཆང་སྒོག་ཙོང་སྤང་། ཤེས་རབ་ཀྱི་རློམ་པས་གཞན་ལ་མི་སྨོད། བླ་མ་དང་། ཆོས་དང་། ཕྱག་མཚན་ལ་སོགས་པ་མཆོད་པར་འོས་པ་རྣམས་ལ་མི་སྨོད། རྟག་པར་འཕགས་མའི་བསྙེན་སྒྲུབ་ཀྱི་དམ་བཅའ་སྔགས་བརྒྱ་རྩ་རེ་མ་ཆགས་པ་རེ་ཞག་རེ་བཞིན་བཟླ་བར་བྱའོ། །དེ་ལྟར་བྱས་པས་མཚུངས་པ་མེད་པའི་སྙན་ངག །རྩོད་པ་དང་། འཆད་པ་དང་། འཛིན་པ་ལ་སོགས་གང་འདོད་པའི་ཤེས་རབ་ནམ་མཁའ་ལྟ་བུར་རྒྱ་ཆེ་ཞིང་ཉི་ཟླ་ལྟར་གྲགས་པ་འཇིག་རྟེན་ཀུན་ཏུ་མཛེས་ཤིང་ནད་དང་གནོད་པ་མ་ལུས་པ་ཞི་ནས་གནས་སྐབས་དང་མཐར་ཐུག་གི་གོ་འཕང་ཐོབ་སྟེ་རྣམ་པ་ཀུན་མཁྱེན་པའི་ཤེས་རབ་ཐོབ་པར་འགྱུར་རོ། །
དེ་ལྟར་དོན་གཉེར་སྐྱེ་བོའི་ཚོགས་ཀུན་གྱི། །བློ་ཡི་པདྨོ་རྒྱས་བྱེད་མཆོག་གི་ལམ། །འོད་ཀྱི་དྲྭ་བ་བཤད་ལས་གང་ཐོབ་པའི། །དགེ་དེས་འགྲོ་ཀུན་རྣམ་མཁྱེན་ཐོབ་པར་ཤོག །ཚུལ་འདི་གངས་རིའི་ཁྲོད་ཀྱི་སྙན་ངག་མཁན། །བསམ་ཡས་པ་ཡིས་དཔལ་ལྡན་གསང་ཕུའི་གནས། །བློ་གསལ་དགའ་བ་སྐྱེད་པའི་བསྟི་གནས་སུ། །ལེགས་བཤད་སྙིང་པོའི་བཅུད་རྣམས་བསྡུས་ཏེ་བསྟན། །འཕགས་མ་ངག་གི་དབང་ཕྱུག་གི་སྒྲུབ་ཐབས་འོད་ཀྱི་དྲྭ་བ་ཞེས་བྱ་བ། ལུང་དང་རིག་པ་དང་མན་ངག་གི་དོན་ལ་བློའི་པདྨོ་འཛུམ་ཞིང་། སྙན་ངག་དང་སྡེབ་སྦྱོར། མངོན་བརྗོད་ལ་སོགས་པའི་ཚུལ་ལ་མང་དུ་ཐོས་པའི་སྙན་ངག་མཁན་དཔལ་ལྡན་བསམ་ཡས་ཚུལ་ཁྲིམས་བློ་གྲོས་ཀྱིས་དཔལ་གསང་ཕུའི་ཆོས་གྲྭ་ཆེན་པོར་སྦྱར་བའོ། །འདི་བྲིས་དགེ་བས་འཆད་རྩོད་རྩོམ་པ་འཛིན་པའི་དོན་མ་ལུས་པ་ཐོགས་པ་མེད་པར་རིག་པའི་གནས་ལྔ་ལ་མཁས་པར་གྱུར་ཅིག །དགེའོ།། །།