བླ་མ་དགོངས་འདུས་གཙོ་དགུ་བཀའ་གཏེར་སྲུང་བའི་དབང་པོ་གཉིས་དང་བཅས་པའི་ཞལ་ཐང་གྲ་ཚར་བཅུ་གཅིག་གི་གཙོ་བོ་སོ་སོའི་ཞལ་བྱང་།
བླ་མ་དགོངས་འདུས་གཙོ་དགུ་བཀའ་གཏེར་སྲུང་བའི་དབང་པོ་གཉིས་དང་བཅས་པའི་ཞལ་ཐང་གྲ་ཚར་བཅུ་གཅིག་གི་གཙོ་བོ་སོ་སོའི་ཞལ་བྱང་། འོད་དཔག་མེད་པ་རྒྱལ་བའི་མཚན་ཐོས་ཤིང་། །དྲན་པས་གྲོལ་བ་སྨོན་ལམ་སྟོབས་ཀྱིས་འཕགས། །དེ་ཉིད་བླ་མ་ཡབ་ཡུམ་སྐུར་བཞེངས་པ། །དཀྱིལ་འཁོར་གཙོ་བོ་པདྨ་བཛྲར་འདུད། །འགྱུར་མེད་བདེ་བ་ཆེན་པོའི་རྡོ་རྗེ་ཡང་། །འཁོར་འདས་དབང་སྡུད་མ་ཆགས་པདྨའི་སྐུ། །ཁྲག་འཐུང་རིགས་ཀྱི་བདག་པོ་དཔལ་ཆེན་པོར། །གུས་པས་འདུད་དོ་དངོས་གྲུབ་རྣམ་གཉིས་སྩོལ། །རི་བོ་ཏ་ལར་པད་ཅན་ཚེ་ལམ་གྱིས། །འཆི་མེད་རིགས་ཀྱི་བདག་པོའི་སྐུར་བཞེངས་ནས། །འཁོར་བ་ཇི་སྲིད་རྡོ་རྗེའི་ལུས་ཀྱིས་འཇུག །བུདྡྷ་ཐོད་ཕྲེང་རྩལ་དང་མཚུངས་པར་ཤོག །གང་འདུལ་འཕྲུལ་མཚན་བཞི་བཅུའི་ཡི་གེ་དང་། །རྨད་བྱུང་སྤྲུལ་པའི་མཚན་བརྒྱད་སྤྲོ་བའི་གཞི། །སྐུ་ལྔ་རིགས་ཀྱི་ཁྱབ་བདག་གདོད་ནས་གྲུབ། །མི་བསྐྱོད་འཇམ་དཔལ་རྡོ་རྗེས་རྗེས་འཛིན་མཛོད། །སྙིང་རྗེ་ཆེན་པོའི་སྤྱན་རས་གཟིགས་པ་ན། །དུས་གསུམ་རྒྱལ་བ་སྲས་བཅས་ཕྲིན་ལས་སྤྲོ། །ཁྱད་པར་མཐའ་འཁོབ་གསལ་བའི་ཉིན་བྱེད་དེ། །པདྨ་དབང་ཆེན་བདག་སོགས་ལམ་སྣ་དྲོངས། །དབུས་འགྱུར་འཆང་དུ་རྡོ་རྗེ་ལྟ་བུ་ཡི། །ཏིང་ངེ་འཛིན་
གྱིས་བདུད་བཞི་རབ་བཅོམ་ནས། །རྒྱལ་བ་ཀུན་གྱི་གསང་བར་ལྷན་ཅིག་ཞུགས། །རིག་འཛིན་ཐོད་པ་རྩལ་དང་དབྱེར་མེད་ཤོག །དཀྱིལ་འཁོར་ཀུན་བདག་པདྨ་ཧེ་རུ་ཀ །འཇིགས་བྱེད་རྡོ་རྗེ་སྲིན་པོའི་གར་བརྒྱ་ཡིས། །མི་སྲུན་གདུག་པ་འདུལ་མཛད་ཆེ་བཙན་མཆོག །དམར་ནག་མེ་ཕྲེང་ཅན་གྱིས་བར་ཆད་སོལ། །འོག་མིན་དུར་ཁྲོད་མེ་རི་འབར་བ་སོགས། །ཕྱི་ནང་གནས་ཡུལ་ཀུན་ཏུ་མངའ་མཛད་པ། །དཔའ་བོའི་དབང་ཕྱུག་མཁའ་འགྲོའི་དྲྭ་བ་སྡོམ། །བཅོམ་ལྡན་སངས་རྒྱས་ཐོད་པ་རྩལ་གྱིས་སྐྱོངས། །སྣང་བ་འགྱུར་མེད་བདེ་བའི་ལྷ་སྐུ་ནི། །རིག་པ་སྤྲོས་བྲལ་སྟོང་པའི་ཡེ་ཤེས་དང་། །སྙོམས་ཞུགས་གཏུམ་ཆེན་ཉི་མ་འབུམ་ཕྲག་གི། གཟི་འབར་དབང་ཆེན་རྟ་ཡི་ཞལ་ཅན་རྒྱལ། །མི་ཟད་རྒྱན་གྱི་འཁོར་ལོའི་གསང་བ་ལ། །སངས་རྒྱས་ཀུན་དང་མཉམ་པ་ཉིད་བརྙེས་པས། །གསང་རིག་གཟུངས་དང་གསང་བ་ཀུན་གྱི་བདག །ཁྲོ་རྒྱལ་གོས་སྔོན་ཅན་གྱིས་ཤིས་པ་སྩོལ། །བདུད་སྡེ་དམ་སྲི་བྱེ་བའི་སྙིང་ཁྲག་ནི། །ཧུབ་གཅིག་གིས་བཏུང་གདུག་པ་ཀུན་བཅོམ་པའི། །རྣམ་རྒྱལ་གད་རྒྱངས་སྲིད་གསུམ་ཁྱབ་པར་སྒྲོགས། །མིག་སྨན་མདོག་འཆང་དབང་ཆེན་ཁྲོས་པས་སྐྱོང་། །དམ་ཉམས་སྲོག་རྩ་དམར་ལ་རོལ་མོད་ཀྱང་། །དམ་ཚིག་ཅན་ལ་བུ་
བཞིན་སྙིང་བརྩེ་བ། །པདྨའི་བཀའ་སྡོད་གཏེར་སྐྱོང་གནོད་སྦྱིན་ཆེ། །བཙན་རྒོད་འབར་བས་སྒྲུབ་པོ་རྟག་ཏུ་སྐྱོངས།། ༈ །།བཀའ་བརྒྱད་གྲ་ཐང་སོ་སོའི་ཞལ་བྱང་ནི། ཞི་བའི་གཙོ་བོ་ལ། ཕུང་ཁམས་སྐྱེ་མཆེད་ལས་དབང་ཡུལ་དང་བཅས། །སྒྱུ་འཕྲུལ་དྲྭ་བ་ལྷ་ཡི་ཕྱག་རྒྱར་བཞེངས། །གདན་གསུམ་འཁོར་འདས་དབྱེར་མེད་དཀྱིལ་འཁོར་བའི། །ཁྱབ་བདག་རྣམ་སྣང་ཡབ་ཡུམ་ཞབས་ལ་འདུད། །གཙོ་བོ་ཆེ་མཆོག་ལ། །དུག་ལྔ་རྒྱན་ཏུ་རོལ་པའི་བདུད་རྩི་ཡིས། །འཁྲུལ་དང་གྲོལ་བའི་དཀྱིལ་འཁོར་ཀུན་སྲོག་གསོ། །ཁྲག་འཐུང་ཡོངས་ཀྱི་ཆེ་མཆོག་དཔལ་ཆེན་པོ། །བདེར་འདུས་འཁོར་ལོའི་མགོན་པོར་ཕྱག་བགྱིའོ། །ཡང་དག་ལ། ཚོགས་བརྒྱད་རུ་དྲར་ཤར་བ་རྟོག་པའི་སྤྲིན། །རུ་ལུའི་དགོངས་པ་ནམ་མཁའི་ལྟོར་ཟོས་པས། །འཁྲུལ་གྲོལ་མཚན་མ་ཡང་དག་ཧེ་རུ་ཀ །མི་གནས་མི་དམིགས་ཐུགས་སུ་ཤར་དེར་འདུད། །འཇམ་དཔལ་ལ། མ་རིག་ཆུ་བོ་བཞི་ཡི་ཤུགས་བཟློག་པའི། །སྟོབས་ཆེན་འཁོར་ལོ་རྣམ་བཞི་དུས་གསུམ་བསྐོར། །འཆི་བདག་གཤིན་རྗེ་འཇོམས་བྱེད་ཧེ་རུ་ཀ །སྐུ་མཆོག་འཇམ་དཔལ་ཁྲོས་པའི་ཞབས་ལ་འདུད། །རྟ་མགྲིན་ལ། རྟ་སྐད་ཐེང་གསུམ་བླངས་པས་ཁམས་གསུམ་གྱི། །གཉིས་རྟོག་གཉིས་མེད་ངང་དུ་ཚར་བཅད་ནས། །སྣང་
གསུམ་དབྱིངས་སུ་དབང་སྡུད་གསུང་གི་ལྷ། །དབང་ཆེན་རྟ་མཆོག་དཔལ་ལ་ཕྱག་བགྱིའོ། །ཕུར་པ་ལ། དངོས་པོར་འཛིན་ཀུན་སྲིད་པའི་ཕུར་བུ་དང་། །དངོས་མེད་དབྱིངས་སུ་ཡེ་ཤེས་མཚོན་ཆེན་གྱིས། །ཐལ་འབྱིན་དམ་སྲིའི་སྙིང་ལ་རྡོ་རྗེའི་མེའི། །ཆར་འབེབས་བདུད་འདུལ་ཕུར་པའི་ལྷ་ལ་འདུད། །མ་མོ་ལ། རྩ་རླུང་བྱང་ཆུབ་སེམས་ཀྱི་དག་པ་ལས། །དབྱིབས་དང་ཡི་གེ་བདེ་ཆེན་འགྲོས་རྫོགས་པས། །རྟག་པའི་རྒྱལ་མོ་ཡོངས་ཀྱི་རྗེ་བཙན་མཆོག །བླ་མེད་ཧེ་རུ་ཀ་ལ་ཕྱག་བགྱིའོ། །རིག་འཛིན་ལ། ནང་རྒྱུད་འཁོར་ལོ་ཀུན་གྱི་མགོན་པོར་བཞུགས། །ལ་ལར་ཏནྟྲ་མཐའ་དག་ཞུ་ཞིང་སྡུད། །གསང་ཆེན་སྤྲོ་བསྡུའི་བྱེད་པོ་རྡོ་རྗེ་ཆོས། །རིག་འཛིན་སློབ་དཔོན་ཐོད་ཕྲེང་རྩལ་ལ་འདུད། །མཆོད་བསྟོད་ལ། མཐུ་སྟོབས་བཟོད་དཀའི་རྡོ་རྗེ་གདེངས་ཙམ་གྱིས། །ཡིད་སྲུབས་དྲེགས་པའི་སྲོག་གི་མངལ་རྒྱ་དྲལ། །རྒྱལ་བ་ཀུན་གྱི་སྟོབས་བཅུ་གཅིག་བསྡུས་པ། །འཇིགས་བྱེད་དྲེགས་པ་ཀུན་འདུལ་ལ་ཕྱག་འཚལ། དྲག་སྔགས་ལ། དོན་དམ་ཡེ་ཤེས་འགྱུར་མེད་མཐུ་གྲུབ་ཅིང་། །ཀུན་རྫོབ་དྲག་སྔགས་དམོད་པའི་ཁ་རླངས་ཅན། །ཀུན་གྱི་ཆེ་བཙན་ཟླ་བྲལ་མིག་སྨན་མདོག །ཁྲག་འཐུང་སྟོབས་ལྡན་ནག་པོར་ཕྱག་བགྱིའོ། །བཀའ་སྲུང་གཙོ་བོ་ལ། རིག་པའི་རྩལ་སྣང་བདུན་བརྒྱ་ཉེར་ལྔའི་
ལྷ། །གང་འདུལ་རྣམ་པར་འཕྲུལ་བ་དང་པོའི་མགོན། །མཐུན་པས་མཐུན་པ་འདུལ་ཕྱིར་དཔལ་གྱི་སྐུ། །གདོད་མའི་ཆེ་མཆོག་ཧེ་རུ་ཀ་ལ་འདུད།། །།