བླ་མའི་རྡོ་རྗེ་གསུམ་གྱི་དམར་ཁྲིད་ཟབ་དོན་ཉིང་ཁུ། ལོ་ཆེན་དྷརྨ་ཤྲཱི།
བླ་མའི་རྡོ་རྗེ་གསུམ་གྱི་དམར་ཁྲིད་ཟབ་དོན་ཉིང་ཁུ་ཞེས་བྱ་བ་བཞུགས་སོ། །ལོ་ཆེན་དྷརྨ་ཤྲཱི། རྒན་པོ་དྷརྨ་ཤྲཱིས་རང་གི་ཉེ་བར་གནས་པ་ཨ་ནནྟ་མ་ཏི་ལ་དགེ་སྦྱོར་གྱི་སྐུལ་མར་སྙིང་ཐག་པ་ནས་གདམས་པའི་མར་ཁྲིད་ཟབ་དོན་ཉིང་ཁུ་ཞེས་བྱ་བ། དུས་གསུམ་རྒྱལ་བ་ཀུན་གྱི་ཕྲིན་ལས་པ། །གཏན་གྱི་སྐྱབས་གཅིག་གཏེར་ཆེན་ཆོས་ཀྱི་རྗེར། །སྙིང་ཁོང་རུས་པའི་གཏིང་ནས་སྐྱབས་སུ་མཆི། །ཡེ་ཤེས་སྤྱན་གྱིས་རྟག་པར་བརྩེ་བས་སྐྱོངས། །ཀྱེ་ཧོ་བསམ་ཤེས་སྐལ་ལྡན་སྙིང་གི་བུ། །ཚེ་འདི་ཡུན་ཐུང་ཕྱི་མར་ཚད་མེད་པས། །ནམ་ཞག་གཏན་བདེའི་འདུན་མ་ལེགས་བསམས་ནས། །དམ་ཆོས་སྙིང་པོ་འདི་ལྟར་ལག་ཏུ་བླང་། །ཤིན་ཏུ་རྙེད་དཀའ་ཨུ་དུམ་ཝཱ་ར་དང་། །རྙེད་ན་དོན་ཆེ་ཡིད་བཞིན་ནོར་བུ་འདྲའི། །དལ་འབྱོར་རྟེན་བཟང་ཐོབ་འདི་དོན་མེད་དུ། །མི་གཏང་དོན་གཉིས་ཕུན་ཚོགས་སྒྲུབ་ལ་འབུངས། །ལུས་འདི་རྟག་པ་མ་ཡིན་ཅིས་ཀྱང་འཇིག །ནམ་འཆི་ཆ་མེད་བསམ་ལ་ཚེ་འདི་ཡི། །ཆགས་སྡང་ཞེན་འཁྲིས་སྤངས་ནས་འཆི་ཆོས་ལ། །བརྩོན་འགྲུས་དྲག་པོས་རྩེ་གཅིག་འབད་པར་བྱ། །མི་རྟག་བསྟན་ཚེ་དཀར་ནག་ལས་འབྲས་དག །ལུས་ཀྱི་གྲིབ་མ་བཞིན་དུ་འཆི་རྗེས་འབྲང་། །དེ་ཕྱིར་དགེ་དང་མི་དགེའི་ལས་དབང་གིས། །ཁམས་གསུམ་འཁོར་བ་མཐོ་དམན་གར་སྐྱེས་ཀྱང་། །སྡུག་བསྔལ་འཁོར་མོས་སྐྱིད་མེད་ཁྱད་པར་དུ། །ངན་འགྲོའི་གཡང་སར་ལྷུང་ན་སྡུག་ཐག་གཅོད། །ཐོག་མེད་དུས་ནས་མནར་ཡུན་དེ་ཙམ་ཡིན། །ད་ནི་སྙིང་ནས་ཐར་པ་འཚོལ་བར་རིགས། །ཉི་ཚེའི་སྐྱབས་ཀྱིས་ཁེ་ཉེན་འཁོར་བར་སྐྱུར། །བསླུ་མེད་གཏན་གྱི་སྐྱབས་གཅིག་གཏེར་བདག་གླིང་། །མཆོག་གསུམ་ཀུན་འདུས་ངོ་བོར་སྐྱབས་སུ་མཆི། །བདག་སོགས་འགྲོ་ཀུན་ཐུགས་རྗེས་བསྐྱབ་ཏུ་གསོལ། །
ཚེ་རབས་དྲིན་གྱིས་བསྐྱངས་པའི་མ་གྱུར་འགྲོ། །འཇིགས་རུང་འཁོར་བའི་སྡུག་བསྔལ་ལས་དྲངས་ནས། །ཞི་བདེ་ཐར་པའི་ལམ་ལ་དགོད་བྱའི་ཕྱིར། །བླ་མེད་བྱང་ཆུབ་སེམས་མཆོག་བརྟན་པར་ཟུང་། །དངོས་གཞིར་གསུམ་ལས་ལྷ་སྐུ་བསྒོམ་པའི་ཁྲིད། །སྟོང་པའི་ངང་ལས་རང་གནས་ཡུལ་འདི་ཉིད། །གདོད་ནས་རྣམ་པར་དག་པའི་སངས་རྒྱས་ཞིང་། །བདག་ལུས་རྣམ་དག་མི་ཤིགས་རྡོ་རྗེ་ཡི། །རང་བཞིན་སྲུང་བའི་འཁོར་ལོས་བཅིངས་པའི་དབུས། །པད་ཟླའི་གདན་ལ་རང་སེམས་སྐད་ཅིག་གིས། །ཆུ་ལས་ཉ་ལྡང་ཚུལ་དུ་སྤྱན་རས་གཟིགས།། དཀར་གསལ་ཞལ་གཅིག་ཕྱག་བཞིའི་དང་པོ་གཉིས། །ཐུགས་ཀར་ཐལ་སྦྱར་གཡས་གཡོན་འོག་མ་གཉིས། །ཤེལ་ཕྲེང་བགྲང་ཞིང་པད་དཀར་སྡོང་བུ་འཛིན། །ཞི་འཛུམ་མཚན་དཔེའི་ལང་ཚོ་རབ་ཏུ་རྒྱས། །དར་དང་རིན་ཆེན་རྒྱན་འཆང་སྐྱིལ་ཀྲུང་བཞུགས། །རང་གི་སྤྱི་བོའི་ཐད་ཀའི་ནམ་མཁའ་ལ། །སེང་ཁྲི་པདྨ་ཉི་ཟླའི་གདན་སྟེང་དུ། །སྐྱབས་གནས་ཀུན་འདུས་དྲིན་ཅན་ཆོས་ཀྱི་རྗེ། །གཏེར་ཆེན་བླ་མ་འགྱུར་མེད་རྡོ་རྗེ་རྩལ། །གོས་དཀར་ལྕང་ལོའི་ཆ་བྱད་གཟི་མདངས་ཅན། །གང་ཞུ་རྩེ་ཟླུམ་གསོལ་ཞིང་ཕྱག་གཉིས་ཀྱི། །ཐབས་ཤེས་ཟུང་འཇུག་རྡོ་རྗེ་དྲིལ་བུ་བསྣམས། །ཞལ་རྒྱན་དཀར་པོ་ཐུགས་ཀའི་ཐད་ཀར་སླེབས། །འཇའ་ཚོན་འོད་ལྔའི་ཟེར་མདངས་འཁྲུག་པའི་དབུས། །ཞབས་གཉིས་རྡོ་རྗེའི་སྐྱིལ་ཀྲུང་དྲང་པོར་བཞུགས། །དེ་ལྟར་གསལ་བཏབ་ཐེབས་ཚེ་གསལ་བའི་ངང་། །ཡུད་ཙམ་སེམས་བཟུང་འཕྲོ་བཅད་དེ་མ་ཐག །ཝལ་གྱིས་བསྒོམས་ལ་ཡང་ཡང་བསླབ་པར་བྱ། །ལྷ་སྐུའི་རྣམ་པར་གསལ་བརྟན་ཉམས་ཤར་ཚེ། །བླ་མའི་སྐུ་ལས་འོད་འཕྲོས་རེག་པ་ཡིས། །སྣང་བ་ཐམས་ཅད་བླ་མའི་རོལ་པར་སད། །དེ་ལས་དམིགས་ཡུལ་རྣམ་པ་ལྷར་གསལ་བ། །གཅིག་ལ་ཤེས་པ་དྲག་གཏད་དེ་ལས་གཞན། །ལྷ་སྐུར་ལམ་ལམ་མོས་པ་ཙམ་གྱིས་བསྐྱངས། །ལྷ་སྐུའི་སྣང་བ་ཀུན་ཀྱང་མེ་ལོང་གི །གཟུགས་བརྙན་ཇི་བཞིན་གསལ་སྟོང་ངང་ལ་བཞག །དེ་ལྟར་བརྩོན་པས་བསྒོམས་ལ་གནས་སྐབས་སུ། །གསལ་སྟོང་ཞེན་བྲལ་ཉམས་མྱོང་བཟང་པོ་འཆར། །མཐར་ཐུག་སྣང་སྟོང་ལྷ་སྐུར་གྲོལ་བར་གྱུར། །ཐུན་སྡུད་ཚེ་ན་སྤྱི་བོའི་བླ་མ་ཉིད། །རང་ལ་ཐིམ་པས་
རང་སེམས་བླ་མ་དང་། །དབྱེར་མེད་ངང་ལ་དར་ཅིག་མཉམ་པར་བཞག །དེ་ཡི་ལྟ་དགོངས་བྱིན་རླབས་དངོས་སུ་འཇུག །༼འཕོ་བ།༽ཡང་ན་རང་ཉིད་འོད་ལྔའི་གོང་བུ་རུ། །འབར་བ་གྱེན་དུ་འཕངས་ཏེ་བླ་མ་ཡི། །ཐུགས་ཀར་ཐིམ་ཞིང་དེ་ཡང་ཇེ་མཐོར་ཡལ། །སྟོང་ཉིད་ངང་ལ་རྒྱས་ཐེབས་མཉམ་པར་བཞག །དེ་ལྟར་སྐྱོང་བས་རིག་པའི་དབང་ཐོབ་ནས། །ཆོས་སྐུ་རང་མལ་ངང་ལ་གནས་པ་དང་། །འཕོ་བའི་ལམ་འབྱོངས་བར་དོའི་གཡང་ས་ཆོད། །ལུས་རྒྱ་བོར་དང་ལྷན་ཅིག་སེམས་གྲོལ་འགྱུར། །༼སྒྱུ་ལུས།༽དེ་ལས་བླ་མའི་སྐུར་ལངས་ཅིར་སྣང་ཀུན།། བདེན་མེད་བུན་ལོང་སོང་བའི་འཆར་སྒོའི་རྩལ། །མ་འགགས་བསམ་མེད་ངང་ལ་གློད་དེ་བཞག །དེ་ཡིས་སྒྱུ་ལུས་སྣང་བ་འབྱོངས་པར་འགྱུར། །༼རྨི་ལམ།༽ ཉལ་དུས་སྙིང་ནང་འོད་ཀྱི་གོང་བུའི་དཀྱིལ། །བླ་མ་ཤིན་ཏུ་ཆ་ཕྲར་བཞུགས་པ་ལ། །ལུས་ཀྱི་སྟོད་སྨད་འདུས་ནས་སྐྲ་རྩེ་ཡི། །ཚད་ཙམ་བླ་མ་འོད་དང་བཅས་པ་ལ། །སེམས་བཟུང་ཉལ་བས་གཉིད་འཐུག་འོད་གསལ་དུ། །གྲོལ་ནས་རྨི་ལམ་བག་ཆགས་སྦྱོང་བའི་མཆོག །དེ་ནི་སྣང་སྟོང་ལྷ་སྐུར་སྒོམ་པའི་ཁྲིད། །གཉིས་པ་ངག་རླུང་བཟླས་པའི་རྣལ་འབྱོར་ནི། །ལྷ་སྐུའི་དམིགས་པ་སྔར་བཞིན་གསལ་བཏབ་ནས། །རང་ལུས་ལྷར་གསལ་སྐུའི་ནང་སྐྲ་རྩེའི་བར། ཁོག་སྟོང་དྭངས་གསལ་སྒྲིབ་ཐོགས་བྲལ་བའི་དབུས། །རྩ་གསུམ་གསལ་ལས་ཁྱད་པར་དབུ་མ་ནི། །དྭངས་ཤེལ་ཀ་བ་བཙུགས་འདྲར་སེམས་གཏད་དེ། །རླུང་རོ་བསལ་རྗེས་སྣོད་བཅུད་ཡོན་ཏན་ཀུན།། རླུང་དང་ལྷན་ཅིག་རྔུབ་ལ་བུམ་པ་ཅན། །སྦྱོར་བ་བཞི་དགུག་ །དགང་། གཞིལ། གཏོང་། མཆན། ལྡན་རླུང་ལ་སེམས་བཟུང་ཞིང་། །རེས་འགའ་ལྡང་འཇུག་གནས་གསུམ་རང་བཞིན་དང་། །སྦྱར་ནས་འབྲུ་གསུམ་རྡོ་རྗེའི་བཟླས་པ་བྱ། །སྐྱོ་ན་བརྟན་གཡོ་སྣོད་བཅུད་སྒྲར་གྲག་ཀུན། །བུང་བ་ཚང་ཞིག་ལྟ་བུའི་སྔགས་སྒྲར་བསམ། །ༀ་གུ་རུ་ཨ་ཀྵ་ར་བཛྲ་སིདྡྷི་ཨཱཿཧཱུྃ། ༀ་མ་ཎི་པདྨེ་ཧཱུྃ༑ ཞེས་སྦྲེལ་གྲག་སྟོང་བྲག་ཆའི་སྒྲ་ལྟ་བུར། །བཟླས་པས་གནས་སྐབས་སྒྲ་ཀུན་གྲག་སྟོང་དུ༑ ༑འཆར་བའི་ཉམས་སྐྱེ་མཐར་ཐུག་གསུང་རྡོ་རྗེ། །གྲག་སྟོང་ནཱ་དའི་དབྱངས་སུ་གྲོལ་བར་འགྱུར། །གསུམ་པ་འོད་གསལ་ཐུགས་ཀྱི་རྣལ་འབྱོར་ནི། །ལུས་གནད་ཆོས་བདུན་མིག་
གནད་ཧད་དེ་བཞག །ངག་རླུང་རང་སོ་སེམས་གནད་ལྷ་སྔགས་ཀྱི། །མཚོན་པའི་འཁོར་ལོས་ཆོས་ཀུན་རང་སེམས་སུ། །ཐག་བཅད་སེམས་ཀྱི་རང་ངོར་ཆེ་རེ་བལྟ། །བལྟས་པས་སྐྱེ་འགག་གནས་གསུམ་དབྱིབས་མདོག་སོགས། །ངོ་བོ་གང་དུ་མ་གྲུབ་རྗེས་མེད་དུ། །ཡལ་བའི་ངང་ལ་ཆེད་འཛིན་མི་བྱ་བར། །གསལ་སྟོང་འཛིན་མེད་ངང་དུ་གློད་ལ་བཞག །དེ་ཡིས་གང་ཤར་རང་གྲོལ་མངོན་གྱུར་ནས། །རྣམ་རྟོག་སྒོམ་གྱི་གྲོགས་སུ་ཤར་ན་ལེགས། །རྟོག་པས་གནོད་ན་གང་ཤར་དེ་ཉིད་ལ། །དགག་སྒྲུབ་མི་བྱ་མ་ཡེངས་གཅེར་གྱིས་ལྟོས། །རྣམ་རྟོག་གཞི་མེད་རྩ་བྲལ་ཀློང་དུ་གྲོལ། །དེ་ཡིས་གནས་སྐབས་རིག་པའི་གཤིས་ལུགས་མཐོང་།། མཐར་ཐུག་རིག་སྟོང་ཆོས་སྐུར་གྲོལ་བར་འགྱུར། །འདིས་མཚོན་དགེ་བས་མཁའ་ཁྱབ་སེམས་ཅན་ཀུན། །ཟབ་ལམ་བླ་མའི་རྣལ་འབྱོར་ལ་བརྟེན་ནས། །རྒྱལ་ཀུན་འདུས་ཞལ་ཁྱབ་བདག་བླ་མ་ཡི། །གོ་འཕང་ཐོབ་ནས་དོན་གཉིས་ལྷུན་གྲུབ་ཤོག །དེ་སྐད་དམར་ཁྲིད་ཟབ་དོན་ཉིང་ཁུ་འདི། །ཉེ་བར་གནས་པ་ཨ་ནནྟ་མ་ཏིའི། །དགེ་སྦྱོར་སྐུལ་མར་དྷརྨ་ཤྲཱིས་བྲིས། །ཚེ་འདི་མི་རྟག་བརྩོན་པས་སྒྲུབས་ཤིག་ཀྱེ། །དགེ་ཞིང་བཀྲ་ཤིས་པར་གྱུར་ཅིག། །།