གཉིས་པ་དགེ་ཚུལ་གྱི་སྡོམ་པའི་མཚན་ཉིད་བཤད་པ།

གཉིས་པ་དགེ་ཚུལ་གྱི་སྡོམ་པའི་མཚན་ཉིད་བཤད་པ་ལ།

དངོས་དང༌། དགེ་ཚུལ་གྱི་དབྱེ་བ་གཉིས། དང་པོ་ནི། ཇི་སྲིད་འཚོའི་བར་དུ་དངོས་སུ་རྩ་བ་བཞི་ཡན་ལག་དྲུག་ཙམ་སྤང་བར་ཁས་བླངས་པ་ལས་སྐྱེས་པའི་རིགས་གནས་ཀྱི་སོ་ཐར་གྱི་སྡོམ་པ་དེ། དགེ་ཚུལ་གྱི་སྡོམ་པའི་མཚན་ཉིད་ཡིན་ཏེ། མཚོ་ཊཱིཀ་ལས། དགེ་ཚུལ་གྱི་ངོ་བོ་ནི། སྤང་བྱ་བཅུ་སྤོང་བའི་སྡོམ་པ་དང་ལྡན་པའི་གང་ཟག་སྟེ། མཛོད་འགྲེལ་ལས། སྤང་བྱ་བཅུ་སྤོང་བ་ཡང་དག་པར་བླངས་པས་ནི་དགེ་ཚུལ་ཡིན་ནོ། །ཞེས་གསུངས་པའི་ཕྱིར་རོ། །གཉིས་པ་དགེ་ཚུལ་གྱི་དབྱེ་བ་ནི། མཚན་གྱི་སྒོ་ནས་ཕྱེ་ན་དགེ་ཚུལ་ཕ་མ་གཉིས་ཏེ། རྩ་བར། དགེ་ཚུལ་གཉིས་ཀྱིས་ཀྱང་ངོ༌། །ཞེས་དང༌། ཊཱི་ཀ་ལས། དགེ་ཚུལ་གཉིས་ཀྱིས་རིན་ཆེན་རེག ཅེས་སོ། ། གསུམ་པ་དགེ་སློབ་མའི་སྡོམ་པའི་མཚན་ཉིད་ནི། དགེ་ཚུལ་མའི་རྗེས་སུ་སྟེར་འོས་པའི་རྩ་བའི་ཆོས་དྲུག་དང་རྗེས་མཐུན་གྱི་ཆོས་དྲུག་སྤོང་བར་དངོས་སུ་ཁས་བླངས་པ་ལས་སྐྱེས་པའི་རིགས་གནས་ཀྱི་སོ་ཐར་གྱི་སྡོམ་པ་དེ། དགེ་སློབ་མའི་སྡོམ་པའི་མཚན་ཉིད་ཡིན་ཏེ། ཀརྨ་ཤ་ཏམ་ལས། ཆོ་གའི་སྐབས་སུ་ཡང་མཁན་མོ་མིང་འདི་ཞེས་བགྱི་བས་དགེ་སློང་མའི་དགེ་འདུན་ལས་ལོ་གཉིས་སུ་ཆོས་དྲུག་དང་རྗེས་སུ་མཐུན་པའི་ཆོས་དྲུག་ལ་བསླབ་པའི་སྡོམ་པ་གསོལ་ཏོ། །འདི་ནི་གསོལ་བའོ། །ཞེས་དང༌། རྒྱ་ཆེར་འགྲེལ་བ་ལས། དེ་སྤྱད་པའི་དུས་ནི་ལོ་གཉིས་སོ། །ལོ་གཉིས་ལས་ལྷག་ན་ཡང་དེ་ཕྱིན་ཆད་ཉམས་པར་མི་འགྱུར་ལ། དེང་ཕྱིན་ཆད་མི་སྲུང་བར་བྱ་བ་མིན་ནོ། །ཞེས་གསུངས་པའི་ཕྱིར་རོ། ། བཞི་བ་དགེ་སློང་གི་སྡོམ་པའི་མཚན་ཉིད་ལ། དངོས་དང༌། དགེ་སློང་གི་དབྱེ་བ་གཉིས། དང་པོ་ནི། ཇི་སྲིད་འཚོའི་བར་དུ་སྤང་བྱ་བདུན་འཁོར་བཅས་སྤོང་བར་དངོས་སུ་ཁས་བླངས་པ་ལས་སྐྱེས་པའི་རིགས་གནས་ཀྱི་སོ་ཐར་གྱི་སྡོམ་པ་དེ། དགེ་སློང་གི་སྡོམ་པའི་མཚན་ཉིད་ཡིན་ཏེ། མཚོ་ཊཱིཀ་ལས། དགེ་སློང་གི་ངོ་བོ་ནི། སྤོང་བ་བདུན་འཁོར་དང་བཅས་པ་སྤང་བྱ་མཐའ་དག་སྤོང་བའི་སྡོམ་པ་དང་ལྡན་པའི་གང་ཟག་སྟེ། ཊཱི་ཀ་ལས། སྤོང་བ་བདུན་འཁོར་དང་བཅས་པ། ཞེས་དང༌། མཛོད་འགྲེལ་ལས། ལུས་དང་ངག་གི་ལས་སྤང་བར་བྱ་བ་ཐམས་ཅད་སྤོང་བ་ཡང་དག་པར་བླངས་པ་ནི་དགེ་སློང་ཡིན། ཞེས་གསུངས་སོ། །གཉིས་པ་དགེ་སློང་གི་དབྱེ་བ་ནི། རྣམ་འབྱེད་ལས། མིང་གི་དགེ་སློང་དང༌། ཁས་འཆེ་བའི་དང༌། སློང་བའི་དང༌། ཉོན་མོངས་པ་བཅོམ་པའི་དང༌། གསོལ་བ་དང་བཞིའི་ལས་ཀྱིས་བསྙེན་པར་རྫོགས་པའི་དགེ་སློང་དང་ལྔར་ཕྱེ་སྟེ། དགེ་སློང་བཏགས་པ་བ་དང་མཚན་ཉིད་པ་ཅི་རིགས་པའོ། །མཚན་གྱི་སྒོ་ནས་ཕྱེ་ན་དགེ་སློང་ཕ་མ་གཉིས་ཏེ། དགེ་སློང་དང་དགེ་སློང་མ་བསྙེན་པར་རྫོགས་པ་དང༌། ཞེས་སོ། །