གཉིས་པ་རྣམ་དག་བདུན་ནམ་ཡན་ལག་བདུན་པ་ལ་བདུན།དང་པོ་ཕྱག་འཚལ་བའི་ཡན་ལག་ནི།རྣམ་དག་སྐུ་ནི་སྐྱོན་བྲལ་འཁྲུལ་པ།
གཉིས་པ་རྣམ་དག་བདུན་ནམ་ཡན་ལག་བདུན་པ་ལ་བདུན།དང་པོ་ཕྱག་འཚལ་བའི་ཡན་ལག་ནི།རྣམ་དག་སྐུ་ནི་སྐྱོན་བྲལ་འཁྲུལ་པ་མེད། །
ཕུན་ཚོགས་གསུང་དབྱངས་ཤེས་བྱ་མ་ལུས་ཁྱབ། །ཟབ་དང་རྒྱ་ཆེའི་དེ་ཉིད་མཁྱེན་པའི་ཐུགས། །རྡོ་རྗེ་གསུམ་དངོས་དཔལ་ལྡན་བླ་མར་འདུད། །ཞེས་ལས་དང་ཉོན་མོངས་པ་དབང་གིས་བྱུང་བའི་སྡུག་བདེན་གྱི་རྣམ་པར་དག་པའི་སྐུའམ་ཡང་ན་མ་དག་པའི་རྩ་རླུང་ཐིག་ལེ་སོགས་གདོད་ནས་རྣམ་པར་དག་པའི་ཆོས་ཀྱི་དབྱིངས་ཀྱི་སྐུ་ནི་སྐྱོན་ཀུན་དང་བྲལ་ཞིང་སྤྱོད་པ་སོགས་འཁྲུལ་པ་མཐའ་དག་མི་མངའ་བ་སྟེ་མེད་པ་དང༌། ཞེས་པས་སྐུལ་ཕྱག་འཚལ་བ་བསྟན་པ་རེད། གསུང་ལ་ཕྱག་འཚལ་བ་ནི་དོན་གཉིས་ཕུན་སུམ་ཚོགས་པསྒྲུབ་པར་བྱེད་པའི་གསུང་འགག་པ་མི་མངའ་བ་དང་སྙན་ཞིང་འཇེབས་པ་སྟེ་གསུང་དབྱངས་ཡན་ལག་དྲུག་ཅུའི་བདག་ཉིད་ཅན་དེས་ཤེས་བྱ་མ་ལུས་པ་ཐམས་ཅད་ལ་ཁྱབ་པའོ། ། ཐུགས་ལ་ཕྱག་འཚལ་བ་ནི་ཟབ་མོ་སྟོང་ཉིད་ཀྱི་རིམ་པ་དང་རྒྱ་ཆེ་བ་ཀུན་རྫོབ་ཀྱི་རྣམ་བཞག་ཡང་ན་ཟབ་པ་སྟོང་ཉིད་དང་རྒྱ་ཆེ་བ་ལམ་གྱི་རྣམ་བཞག་དེ་ཉིད་ཚུལ་བཞིན་དུ་ཅིག་ཆར་དུ་མཁྱེན་པའི་ཐུགས་དང༌། སྐུ་གསུང་ཡེ་ཤེས་རྡོ་རྗེ་གསུམ་དངོས་ཀྱི་བདག་ཉིད་དཔལ་ལྡན་བླ་མ་ལ་སྒོ་གསུམ་གུས་པ་ཆེན་པོས་འདུད། ཅེས་ཕྱག་འཚལ་བ་ཚིགས་སུ་བཅད་པ་དང་པོའི་བསྟན་དོན་སོང་ཟིན་ནས་གཉིས་པ་ནི།སྒྲིབ་གཉིས་བག་ཆགས་བཅས་པ་གཏན་ནས་སྤངས། །དག་པ་གཉིས་ལྡན་ཡོན་ཏན་ཐམས་ཅད་རྫོགས། །རང་གཞན་དོན་གྱུར་སྐུ་གཉིས་མངོན་མཛད་པ། །འཁོར་འདས་མ་ལུས་སྤྲུལ་བར་མཛད་ལ་འདུད། །ཅེས་ཐར་བ་ཐོབ་པ་ལ་གཙོ་བོ་གེགས་བྱེད་ཀྱི་སྒྲིབ་པ་རྩ་ཉོན་དྲུག་དང་ཉེ་ཉོན་ཉི་ཤུའི་ས་བོན་དང་བཅས་པ་ཉོན་མོངས་པའི་སྒྲིབ་པ་དང༌། བདེན་འཛིན་དང་བདེན་སྣང་གི་བག་ཆགས་ཕྲ་མོ་དངསྣང་གསུམ་འཕོ་བའི་བག་ཆགས་སོགས་ཐམས་ཅད་མཁྱེན་པའི་གོ་འཕང་ཐོབ་པ་ལ་གཙོ་བོ་གེགས་བྱེད་ཀྱི་ཤེས་བྱའི་སྒྲིབ་པ་སྟེ་སྒྲིབ་གཉིས་བག་ཆགས་དང་བཅས་པ་སླར་སྐྱེ་མི་རུང་བའི་ཆོས་ཅན་དུ་བྱས་ཏེ་གཏན་ནས་སྤངས་པ་ཀུན་རྫོབ་ཀྱི་སྤངས་པ་དང༌། དོན་དམ་གྱི་སྤངས་པ་ནི། རང་བཞིནགྱིས་ནི་ཡོངས་དག་ཕྱིར། །ཉོན་མོངས་གདོད་ནས་ཟད་ཕྱིར་རོ། །ཞེས་གསུངས་པ་ལྟར་སྒྲིབ་གཉིས་བག་ཆགས་དང་བཅས་པ་མཐའ་དག་རང་བཞིན་གྱིས་གདོད་ནས་སྤངས་པ་དང༌། རང་བཞིནགྱི་དག་པ་དང་གློ་བུར་རྣམ་དག་སྟེ་དག་པ་གཉིས་ལྡན་གྱི་སྟོབས་བཅུ་དང་མི་འཇིགས་པ་བཞི། མའདྲེས་པའི་ཆོས་བཅོ་བརྒྱད་ལ་སོགས་པའི་ཡོན་ཏན་ཐམས་ཅད་རྫོགས་པ་དང༌།རང་དོན་གཞནདོན་དོན་དམ་སྐུ་དང་ནི། །དེ་ལ་བརྟེན་པའི་ཀུན་རྫོབ་སྐུ་ཉིད་དོ། །ཞེས་གསུངས་པ་ལྟར་རང་དོན་གྱི་སྐུ་ཆོས་སྐུ་དང་གཞན་དོན་གྱི་སྐུར་གྱུར་པའི་ལོངས་སྤྱོད་རྫོགས་པའི་སྐུ་དང་སྤྲུལ་སྐུ་སྟེ་སྐུ་གཉིས་མངོན་པར་མཛད་པ་དང༌། འཁོར་བའི་སེམས་ཅན་མ་ལུས་པ་འདྲེན་པའི་ཆེད་དུ་བྱ་དང་རི་དྭགས།གཟིངས་དང་ཟམ་པ་ལ་སོགས་པའི་རྣམ་པར་སྟོན་པ་དང༌། འཁོར་བ་ལས་འདས་པའི་ཐར་བཐོབ་པའི་ཆེད་དུ་དཔེར་ན་ཉན་ཐོས་ཀྱི་ཐར་བ་འདོད་པ་དག་ལ་ཉན་ཐོས་ལྟར་སྟོན་པ་སོགས་གདུལ་བྱ་གང་ལ་གང་འདུལ་གྱི་དེ་ལ་དེར་མ་ལུས་པ་སྤྲུལ་བར་མཛད་པ་ཉིད་ལ་སྒོ་གསུམ་གུས་པས་འདུད་ཅེས་གསུངས་པ་རེད། དེ་ཡང་བླ་མའི་རྣལ་འབྱོར་ལས། ཆགས་བྲལ་རྣམས་ལ་ཤཱཀྱ་ཐུབ་པརབསྟན། །དཀའ་ཐུབ་ཅན་ལ་དྲང་སྲོང་ཚུལ་འཛིན་ཅིང༌། །ཞེས་གསུངས་པ་ལྟར་གདུལ་བྱའི་ཁམས་དབང་དང་མཐུན་པའི་སྤྲུལ་བ་སྣ་ཚོགས་ཀྱི་སྒོ་ནས་དོན་མཛད་པའོ། །གཡོ་མེད་སེམས་ཀྱིས་བསྟེན་ན་སྐད་ཅིག་ལ། །བྱིན་གྱི་རླབས་པས་བླ་མེད་བྱང་ཆུབ་བམ། །ཡང་ན་འདོད་པ་མཆོག་དང་ཐར་བ་ཡི། །དམ་པ་ངེས་པར་སྦྱིན་མཛད་ཁྱོད་ལ་འདུད། །གཡོ་སྒྱུ་དང་མ་དད་པ་སོགས་མེད་པའི་སེམས་ཀྱིས་དཔལ་ལྡན་བླ་མ་དམ་པ་ལ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ན་སྙིགས་དུས་ཀྱི་ཚེ་ཐུང་སྐད་ཅིག་གཅིག་ལ།བླ་མའི་སྐུ་གསུང་ཐུགས་གསུམ་གྱིས་རང་གི་མ་དག་པའི་ལུས་ངག་ཡིད་གསུམ་དེ་ཉིད་བྱིན་གྱིས་བརླབས་པ་ལ་བརྟེན་ནས་སྔགས་བླ་མེད་ཀྱི་རིགས་ཅན་དབང་པོ་རྣོན་པོ་གང་ཟག་དེ་ནི་བླ་ན་མེད་པའི་ཁ་སྦྱོར་བདུན་ལྡན་གྱི་རྡོ་རྗེ་འཆང་གི་བྱང་ཆུབ་ཐོབ་པར་མཛད་པའམ། ཡང་ན་རང་རང་གི་འདོད་པ་མཆོག་ཏུ་གྱུར་བ་མཆོག་གི་དངོས་གྲུབ་བམ་རྗེས་དྲན་གྱི་སྐབས་ལྟ་བུའི་སྟོང་གཟུགས་ཡེ་ཤེས་ཀྱི་ཕྱག་རྒྱ་ལང་ཚོའི་དཔལ་འཛིན་ཅིང་འདོད་པའི་སྒྱུ་རྩལ་དྲུག་ཅུ་ལ་མཁས་པའི་རིག་མ་མཆོག་གི་བདེ་བ་སྦྱིན་པ་དང༌།ཡང་ན་སྡུག་ཀུན་རགས་པ་ལས་ཐར་བ་ཡི་ཉན་རང་གི་གོ་འཕང་སོགས་དམ་པ་ངེས་པར་སྦྱིན་པར་མཛད་པ་བླ་མ་རྡོ་རྗེ་འཆང་ཆེན་པོ་ཁྱོད་ལ་འདུད་ཅེས་གསུངས་པ་རེད། དེ་རིང་གི་དཔེ་ཁྲིད་མཚམས་འདི་ནས་འཇོག་ན་ཆོག་གི།ལྷན་སྐྱེས་ཟུང་འཇུག་སྲིད་གསུམ་བདེ་ཆེན་དངོས། །དམིགས་མེད་ཐུགས་རྗེས་ཁམས་གསུམ་འགྲོ་ཀུན་སྒྲོལ། །མཁྱེན་བརྩེ་ནུས་པའི་ཡོན་ཏན་ཟད་མི་མངའ། །ཆོས་དབྱིངས་རྣམ་དག་གཡོ་མེད་ཁྱོད་ལ་འདུད། །འོ་དེ་ནས་ཁ་སང་གི་དཔེ་ཁྲིད་མཚམས་ལྷན་སྐྱེས་ཟུང་འཇུག་ཅེས་སོགས་ཀྱི་ཚིག་དོན་ཅུང་ཟད་ཞུས་ན་མཆོག་ཏུ་མི་འགྱུར་བའི་བདེ་བ་ཆེན་པོའི་ཡེ་ཤེས་དང༌། རྣམ་ཀུན་མཆོག་ལྡན་གྱི་སྟོང་གཟུགསལྷན་སྐྱེས་གཉིས་དབྱེར་མེད་ཟུང་དུ་འཇུག་པ་སྲིད་པ་གསུམ་ལས་འདས་ཀྱང་སྲིད་པ་གསུམ་གྱི་རྣམ་པ་འོད་གསལ་བདེ་བ་ཆེན་པོ་ཡེ་ཤེས་དངོས། བདེན་འཛིན་སོགས་སྤྲོས་པས་མཚན་འཛིན་གྱིདམིགས་པ་མེད་པར་སྤྲོས་བྲལ་རྣམ་པར་མི་རྟོག་པའི་ཡེ་ཤེས་ཀྱིས་རྩིས་ཟིན་པའི་བརྩེ་བ་ཐུགས་རྗེས་འདོད་ཁམས། གཟུགས་ཁམས། གཟུགས་མེད་ཁམས་ཏེ་ཁམས་གསུམ་གྱི་འགྲོ་བ་ཀུནལ་ཉེ་རིང་མེད་པར་ཡོངས་སུ་ཁྱབ་པའི་སྒོ་ནས་སེམས་ཅན་ཐམས་ཅད་ཀྱི་སྡུག་བསྔལ་ལས་སྒྲོལབར་མཛད་པ་དང༌།ཁྱབ་བདག་རྡོ་རྗེ་འཆང་གི་ཐུགས་བདེན་གཉིས་ཀྱིས་བསྡུས་པའི་ཆོསཐམས་ཅད་རེས་འཇོག་མེད་པར་མཁྱེན་པའམ་གདུལ་བྱའི་ཁམས་དབང་མོས་པ་དང་མཐུན་པའི་ཇི་ལྟ་བ་བཞིན་དུ་མཁྱེན་པའི་ཡོན་ཏན་དང༌། གདུལ་བྱ་སེམས་ཅན་ཐམས་ཅད་སྡུག་བསྔལ་ལསབསྒྲལ་འདོད་ཁུར་དུ་ཁྱེར་བའི་བརྩེ་བ་སྙིང་རྗེ་ཆེན་པོའི་ཡོན་ཏན་དང༌། སེམས་ཅན་མ་ལུས་པ་སྡུག་བསྔལ་ལས་སྒྲོལ་ནུས་པའི་ཡོན་ཏན་ཏེ་མཁྱེན་བརྩེ་ནུས་གསུམ་གྱི་ཡོན་ཏན་ཟད་པ་མི་མངའ་བའི་ཡོན་ཏན་ཟླ་མེད་དང་ལྡན་པའོ། །ཆོས་ཐམས་ཅད་ཀྱི་གནས་ལུགས་མཐར་ཐུག་ཆོས་ཀྱི་དབྱིངས་དེ་རང་བཞིན་རྣམ་དག་དང་གློ་བུར་རྣམ་པར་དག་པའི་རྣམ་རྟོག་མཚན་མས་གཡོ་བ་མེད་པ་ཕྱག་རྒྱ་ཆེན་པོ་དང་ལྡན་པའི་བླ་མ་རྡོ་རྗེ་འཆང་ཁྱོད་ལ་སྒོ་གསུམ་གུས་པས་འདུད་ཅེས་པའོ། །ཉིད་ཀྱི་ཡེ་ཤེས་གཅིག་གི་རང་སྣང་ལས། །མ་ལུས་རྒྱལ་བ་སྲས་བཅས་སྤྲིན་སྤྲོ་བ། །བདེན་པ་གཉིས་ཀྱི་རྣམ་ཐར་ཆད་མི་མངའ། །སངས་རྒྱས་ཐམས་ཅད་འདུས་པའི་ངོ་བོར་འདུད། །ཁྱབ་བདག་རྡོ་རྗེ་འཆང་གང་ཉིད་ཀྱི་ཐུགས་ཆོས་དབྱིངས་ཡེ་ཤེས་གཅིག་གི་རང་སྣང་ལས་མི་བསྐྱོད་པ་དང༌།རྣམ་པར་སྣང་མཛད། རིན་ཆེན་འབྱུང་ལྡན།སྣང་བ་མཐའ་ཡས། དོན་ཡོད་གྲུབཔ་སྟེ་རྒྱལ་བ་རིགས་ལྔ་སོགས་མ་ལུས་པའི་རྒྱལ་བ་ཀུན་དང་སྲས་བྱང་ཆུབ་སེམས་དཔའ་དངབཅས་པ་ཐམས་ཅད་ནམ་མཁའ་ལས་སྤྲིན་ཁྱབ་པ་ལྟར་སྤྲོ་བའི་སྒོ་ནས་སེམས་ཅན་གྱི་དོན་མཛད་པ་དང༌།ཀུན་རྫོབ་བདེན་པ་དང་དོན་དམ་བདེན་པ་སྟེ་བདེན་པ་གཉིས་ཀྱི་ཆོས་ཐམས་ཅད་དེའི་གནས་ཚུལ་ཇི་ལྟ་བ་བཞིན་དུ་རེས་འཇོག་མེད་པར་ཅིག་ཆར་མངོན་སུམ་དུ་རྟོགས་པའི་རྣམ་ཐར་རྒྱུན་ཆད་མི་མངའ་བ་སྟེ་སངས་རྒྱས་ཐམས་ཅད་འདུས་པའི་ངོ་བོ་འདུད་ཅེས་གསུངས་པ་རེད། །གང་གི་དྲིན་གྱི་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །གང་སྤྱི་སྒྲ་ཡིན་ནའང་སྐབས་འདིར་རྡོ་རྗེ་ཅན་ཞེས་པའི་ཚིག་དང་འབྲེལ་བས་ཁྱབ་བདག་རྡོ་རྗེ་འཆང་ཆེན་པོ་གང་གི་རང་ལ་དབང་སྐུར་རྒྱུད་བཤད་མན་ངག་སྟོན་པ་སོགས་བཀའ་དྲིན་གྱི་མཆོག་ཏུ་མི་འགྱུར་བའི་བདེ་བ་ཆེན་པོའི་ཡེ་ཤེས་ཉིད་སྙིགས་དུས་ཀྱི་ཚེ་ཐུང་སྐད་ཅིག་ཉིད་ལ་བསྐྱེད་པར་མཛད་པའམ་འཆར་བར་མཛད་པ་གངཡིན་པ་བླ་མ་དཔེར་ན་ཡིད་བཞིན་གྱི་ནོར་བུ་རིན་པོ་ཆེ་ལས་དགོས་འདོད་འབྱུང་བ་ལྟ་བུའི་བླ་མ་ལས་མཆོག་ཐུན་མོང་གི་དངོས་གྲུབ་ཐམས་ཅད་འབྱུང་བའི་སྐུ། ཐུགས་བདེ་སྟོང་གི་ཡེ་ཤེས་རྡོ་རྗེ་ཅན་ཏེ་རྡོ་རྗེ་འཆང་གི་སྐུའི་དམའ་ཤོས་ཞབས་ཀྱི་པདྨོ་ལ་སྒོ་གསུམ་གུས་པ་ཆེན་པོས་འདུད་ཅེས་བླ་མའི་སྐུའི་དམའ་ཤོས་ཞབས་ཀྱི་པདྨོ་ལ་ཕྱག་འཚལ་བ་ཡིན་ན་དེས་མཚོན་པའི་བླ་མའི་སྐུ་གསུང་ཐུགས་གསུམ་གྱི་ཡོན་ཏན་ལ་ཕྱག་འཚལ་བས་ན་ཞབས་པདྨའི་གཟུགས་སུ་བཀོད་ནས་དེ་ལ་འདུད་ཅེས་པའོ། །དེ་དང་མཐུན་པར་ད་ལྟའི་ཆར་རྒྱ་གར་གྱི་ཡུལ་སྲོལ་ལའང་བླ་མའི་ཞབས་ལ་མགོ་བོ་གཏུགས་ནས་ཕྱག་འཚལ་བའམ་ཡང་ན་ཞབས་ལ་ལག་པས་རེག་ནས་རང་གི་མགོ་བོར་བཞག་སྟེ་གུས་འདུད་བྱེད་པ་ལྟར་རོ། །གང་གི་དྲིན་གྱི་བདེ་ཆེན་ཉིད་ཅེས་སོགས་དེ་མཁའ་འགྲོ་ཀུན་སྤྱོད་ཀྱི་རྒྱུད་ཚིག་ཡིན་ནོ། །བདག་ནི་སྐྱབས་གནས་གཞན་ཀུན་པས། །བ་སྤུའི་ཁུང་བུ་གཅིག་ལ་ཡང། །ལྷག་པར་ཡང་ནི་དད་ལགས་པ། །རྨོངས་པས་མ་ཡིན་རྒྱུ་དང་བཅས། །སངས་རྒྱས་ཀུན་ལས་ཆེས་ལྷག་པར། །རྒྱུད་སྡེ་ཀུན་ཏུ་རྒྱལ་བས་བསྔགས། །མདོ་སོགས་ཀུན་ཏུ་མཚུངས་པར་གསུངས། །རྒྱལ་བའི་ནན་ཏན་བསྟོད་ལ་འདུད། །བདག་ནི་སྐྱབས་གནས་གཞན་དཀོན་མཆོག་གསུམ་ཀུན་བས་དཔལ་ལྡན་བླ་མ་དམ་པ་ཁྱབ་བདག་རྡོ་རྗེ་འཆང་དེ་ཉིད་ཀྱི་བ་སྤུའི་ཁུང་བུ་ཉག་མ་གཅིག་ལ་ཡངལྷག་པར་ཡང་ནི་དད་ལགས་པ་ཡིན། དེ་ལྟར་དད་པ་ཡང་རྨོངས་པའི་དབང་གིས་མ་ཡིན་པར་རྒྱུ་མཚན་དང་བཅས་པའོ། །རྒྱུ་མཚན་ནི་དཔལ་ལྡན་བླ་མ་དམ་པ་དེ་ཉིད་རང་ལ་དངོས་སུ་དབང་བསྐུར་རྒྱུད་བཤད་མན་ངག་སྟོན་པས་ན་སངས་རྒྱས་ཀུན་ལས་བཀའ་དྲིན་ཆེ་བ་དང་གདུལ་བྱའི་བསོད་ནམས་བསགས་པའི་ཞིང་མཆོག་ཡིན་པས་ན་སངས་རྒྱས་ཀུན་ལས་ཀྱང་ཆེས་ལྷག་པ་ཡིན་པར་བྱ་རྒྱུད་སྤྱོད་རྒྱུད་རྣལ་འབྱོར་རྒྱུད་རྣལ་འབྱོར་བླ་ན་མེད་པའི་རྒྱུད་སྡེ་ཀུན་ཏུ་རྒྱལ་བ་སངས་རྒྱས་བཅོམ་ལྡན་འདས་ཀྱིས་ལན་མང་དུ་བསྔགས་པར་མཛད་པ་དང༌། དེར་མ་ཟད་མདོ་དང་དེའི་དགོངས་འགྲེལ་སོགས་ཀུན་ཏུ་རྒྱུད་སྡེ་རྣམས་དང་མཚུངས་པར་ཡང་ཡང་གསུངས་ཞིང༌། རྒྱལ་བ་སངས་རྒྱས་བཅོམ་ལྡན་འདས་ཀྱིམདོ་རྒྱུད་ཐམས་ཅད་དུ་ལན་གཅིག་ཙམ་མ་ཡིན་པར་ནན་ཏན་ཆེན་པོའི་སྒོ་ནས་ཡང་ནས་ཡང་དུ་བསྟོད་པར་མཛད་པ་དཔལ་ལྡན་བླ་མ་དམ་པ་དེ་ལ་འདུད། དེ་ཡང་དཔལ་ལྡན་བླ་མ་དམ་པ་གང་ཉིད་སངས་རྒྱས་ཀུན་ལས་ཀྱང་ལྷག་པའི་སྤངས་རྟོགས་ཀྱི་ཡོན་ཏན་མངའ་བ་མ་ཡིན་ཀྱང་རང་ལ་དངོས་སུ་དབང་ལུང་མན་ངག་སྟོན་པའི་བཀའ་དྲིན་ཆེ་བས་ན་སྐྱབས་གནས་ཀུན་འདུས་ཀྱི་བདག་ཉིད་ཡིན་པ་དང་སྐྱབས་གནས་གཞན་ཀུན་བས་ཀྱང་བཀའ་དྲིན་ཆེ་བའི་རྒྱུ་མཚན་གྱི་མདོ་རྒྱུད་ཐམས་ཅད་དུ་བསྔགས་བརྗོད་མཛད་པ་རེད། འཇིག་རྟེན་ན་ཕ་མ་དེ་དག་ཧ་ཅང་བཀའ་དྲིན་ཆེ་བ་ཡིན་ཀྱང་དེ་དག་ནི་འཇིག་རྟེན་གྱི་མཚན་སྙན་དང་ཐོབ་མངའ་ཐང་སོགས་ཐོབ་པའི་ཆེད་དུ་བྱམས་བརྩེའི་བཟུང་བ་ཙམ་དང༌།སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་རེས་འཇོག་མེད་པར་བྱམས་སྙིང་རྗེ་བྱང་ཆུབ་སེམས་ཀྱི་བདག་ཉིད་ཡིན་ཡང་རང་ཉིད་སངས་རྒྱས་དང་དངོས་སུ་ཞལ་མཇལ་གསུང་ཐོས་པའི་སྐལ་བ་དང་མ་ལྡན་པ་རེད། ཡིན་ན་ཡང་དཔལ་ལྡན་བླ་མ་དམ་པ་དེ་ཉིད་ཀྱིས་རང་དང་སྐལ་བ་མཉམ་པའི་རང་ཉིད་དངོས་སུ་མཐོང་ཐུབ་པའི་མིའི་ཤ་ཚུགས་ཅན་དུ་བཟུང་ནས་རང་ལ་དངོས་སུ་ཐར་བ་དང་ཐམས་ཅད་མཁྱེན་པའི་གོ་འཕང་ཐོབ་བྱེད་ཀྱི་ཐབས་བླ་ན་མེད་པ་སྟོན་པར་བྱེད་པས་ན་སངས་རྒྱས་ཀུན་ལས་ཀྱང་ཆེས་ལྷག་པར་བཀའ་དྲིན་ཆེ་བ་ཡིན་པ་གཞུང་ལུགས་རྣམས་ཀྱི་སྐབས་སུ་གསུངས་པ་ལྟར་ཡིན་ནོ། །ཕྱོགས་བཅུའི་འདྲེན་པ་སྲས་བཅས་ཀྱིས། །བྱང་སེམས་རྡོ་རྗེ་བཞིན་དུ་བལྟ། །ཐམས་ཅད་ཉིན་རེ་དུས་བཞི་རུ།ཕྱག་འཚལ་མཆོད་ནས་འདི་སྐད་དུ། །བདག་ཅག་དེ་བཞིན་གཤེགས་ཀུན་གྱི། །ཕ་མ་སྟོན་པ་ཁྱོད་ཅེས་སྒྲོག །སྟོན་པ་རྡོ་རྗེ་འཛིན་ཁྱོད་ལ། །སྐྱོབ་པར་བཅས་པས་ཕྱག་འཚལ་ལོ། །རྡོ་རྗེ་འཆང་ཆེན་པོ་ཁྱེད་ལ་ཕྱོགས་བཞི་མཚམས་བཞི་སྟེང་འོག་སྟེ་ཕྱོགས་བཅུའི་འཇིག་རྟེན་ནབཞུགས་པའི་འགྲོ་བ་སེམས་ཅན་ཐམས་ཅད་མཐོ་རིས་དང་ཐར་བར་འདྲེན་པ་སངས་རྒྱས་དང་སྲས་བྱང་ཆུབ་སེམས་དཔའ་བཅས་ཀྱིས་རྩ་བའི་བླ་མ་དེ་ལ་བྱང་སེམས་ལས་རླུང་དབུ་མར་ཞུགས་པའི་བདེ་བ་ཆེན་པོའི་ཡེ་ཤེས་ཀྱི་སྐུའི་རྣམ་འགྱུར་དུ་ཤར་བ་རྡོ་རྗེ་འཆང་ཇི་ལྟ་བ་བཞིན་དུ་བལྟ་བདང༌། ཡང་སངས་རྒྱས་སྲས་བཅས་ཐམས་ཅད་ཀྱིས་ཉིན་རེ་བཞིན་དུ་སྲོད་དང་ཐོ་རེངས་གཉིས་སྔ་དྲོ་ཕྱི་དྲོ་གཉིས་ཏེ་དུས་བཞི་རུ་བླ་མ་ལ་ཕྱག་འཚལ་དང་ཕྱི་གནང་གསང་གསུམ་གྱི་མཆོད་པཕུལ་ནས་རྩ་བའི་བླ་མ་ལ་འདི་སྐད་དུ། བདག་ཅག་དང་དེ་བཞིན་གཤེགས་པ་ཀུན་གྱི་བདེ་བ་ཆེནཔོའི་ཡེ་ཤེས་བསྐྱེད་པའི་ཕ་དང་ཤེས་རབ་སྟོང་བ་ཉིད་བསྐྱེད་པའི་མ་དང༌། ཆོས་སྟོན་པ་པོ་བླ་མརྡོ་རྗེ་འཆང་ཁྱོད་ཡིན་ཅེས་སྒྲོག་པའི་སྒོ་ནས་བླ་མེད་ཀྱི་ཆོས་སྟོན་པ་རྡོ་རྗེ་འཛིན་པ་ཁྱོད་ལ་སེམས་ཅན་ཐམས་ཅད་སྡུག་བསྔལ་ལས་སྐྱོབ་པར་མཛད་པ་སངས་རྒྱས་སྲས་དང་བཅས་པས་ཕྱག་འཚལལོ། །ཞེས་པའོ། །དེ་ཡང་རིགས་ལྡན་པདྨ་དཀར་པོའི་དོན་དམ་བསྙེན་པ་ལས། ཡོན་ཏན་ལྡན་པའི་སྲས་རྣམས་ལ་ནི་འཁོར་བ་འཇོམས། །རང་ལུས་གཙང་བའི་འཇིག་རྟེན་ནས་ནི་ཀུན་ཏུ་སྟོན། །དེ་ནི་བླ་མ་དཔལ་དེ་བླ་མ་དཔལ་ཞེན་མིན། ། དཔག་མེད་སངས་རྒྱས་ཀྱིས་ཀྱང་རྟག་ཏུ་དེ་ལ་མཆོད། །ཕྱོགས་བཅུའི་སངས་རྒྱས་སེམས་དཔས་རྟག་ཏུ་དེ་ལ་འདུད།།ཞེས་དང༌། དཔལ་གསང་བ་འདུས་པའི་ལེའུ་བཅུ་བདུན་པ་ལས། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུདང་གསུང་དང་ཐུགས་རྡོ་རྗེ་གསང་བ་འདུས་པའི་མངོན་པར་དབང་བསྐུར་བའི་སློབ་དཔོན་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་ཐམས་ཅད་ཇི་ལྟར་ལྟ་བར་བགྱི། རིགས་ཀྱིབུ་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་རྣམས་ཀྱིས་བྱང་སེམས་ཀྱི་རྡོ་རྗེ་བཞིན་དུ་ལྟ་བར་བགྱིའོ། །དེ་ཅིའི་ཕྱིར་ཞེ་ན་སློབ་དཔོན་ནི་བྱང་ཆུབ་སེམས་དཔའ་དང་མཉམ་བཞག་རྣམ་པ་གཉིས་སུ་དབྱེར་མེད་པའོ། །ཞེས་དང༌། རིགས་ཀྱི་བུ་མདོར་བསྟན་ན་ཕྱོགས་བཅུའི་འཇིགརྟེན་གྱི་ཁམས་ན་སངས་རྒྱས་དང་བྱང་ཆུབ་སེམས་དཔའ་ཇི་སྙེད་ཀྱང་ཁོད་ཅིང་འཚོར་གྱུར་བ་དེ་དག་ཐམས་ཅད་ཐོས་བསམ་དུ་བསླང་ནས་སློབ་དཔོན་དེ་ལ་དེ་བཞིན་གཤེགས་པ་ཐམས་ཅད་མཆོད་པས་ཡང་དག་པར་མཆོད་ནས་སངས་རྒྱས་ཀྱི་ཞིང་དེ་དག་དུ་འགྲོ་ཞིང་སྔགས་རྡོ་རྗེའི་ཡི་གེ་ཡང་འདི་སྐད་དུ་འབྱིན་ཏོ། །བདག་ཅག་གི་དེ་བཞིན་གཤེགས་པ་ཐམས་ཅད་ཀྱི་ཕའོ། །དེ་བདག་ཅག་གི་དེ་བཞིན་གཤེགས་པ་ཐམས་ཅད་ཀྱི་མའོ། །ཞེས་དང༌། རྡོ་རྗེ་གུར་གྱི་རྒྱུད་ལས། སློབདཔོན་སྟོན་པར་གྱུར་བ་ན། །སངས་རྒྱས་ཀུན་གྱིས་ཕྱག་མཛད་པ། །བདག་ཅག་རྣམས་ཀྱི་ཕ་དང་མ། །འདི་ཉིད་རིག་ལ་བསམ་པར་བྱ། །ཞེས་དང༌། བསྡུས་རྒྱུད་ལས། ཁྱོད་ནི་མ་དང་ཁྱོད་ནི་ཕསྟེ་ཁྱོད་ནི་འགྲོ་བའི་བླ་མ་ཁྱོད་ནི་གཉེན་དང་གྲོགས་བཟང་ཡང༌། །ཞེས་དང༌། མདོ་ཀུན་ལསབཏུས་པ་ལས།ཀུན་དགའ་བོ་གལ་ཏེ་བྱང་ཆུབ་སེམས་དཔའི་ཤིང་རྟའི་ནང་དུ་བཞུགས་ཏེ་འདོད་པའི་ཡོན་ཏན་ལྔས་རྩེ་དགའ་ཞིང་དགའ་མགུར་བྱེད་པ་དེའི་ཤིང་རྟ་འདྲེན་པ་གཞན་མེད་ན་ཀུན་དགའ་བོ་བྱང་ཆུབ་སེམས་དཔའ་དེའི་ཤིང་རྟ་ནི་དེ་བཞིན་གཤེགས་པའི་དབུ་ལ་ཡང་བཀུར་རོ། །ཞེས་གསུངས་སོ། །དེ་ཡང་བླ་མ་དང་རྡོ་རྗེ་འཆང་གཉིས་སུ་མི་ལྟ་བར་བླ་མ་དེ་ཉིད་སངས་རྒྱས་ཀུན་འདུས་ཀྱི་ངོ་བོ་ཡིན་པར་ལྟ་དགོས་པ་ཡིན་ཏེ། བླ་མ་ལྔ་བཅུ་བ་ལས།དེ་བས་སློབ་མ་སྙིང་རྗེ་གཏོང། །ཚུལ་ཁྲིམས་བཟོད་པའི་ཡོན་ཏན་ལྡན། །སློབ་དཔོན་དང་ནི་རྡོ་རྗེ་འཛིན། །ཐ་དད་པར་ནི་མི་བརྟག་གོ །ཞེས་དང༌། ལྷན་ཐབས་འོད་བརྒྱ་འབར་བ་ལས། མོས་གུས་ཇི་ལྟར་བསྒོམ་པ་ནི།དངོས་པོའི་མཚན་ཉིད་ཀྱི་དབང་དུ་བྱས་ན། བླ་མ་དེ་སངས་རྒྱས་བྱང་སེམས་ཀྱི་སྤྲུལ་པ་ཡིན་པ་ཡང་སྲིད། མ་ཡིན་ཐ་མལ་པ་ཡིན་དུ་ཆུག་ཀྱང༌། རྡོ་རྗེ་སློབ་དཔོན་དེའི་སྐུ་གསུང་ཐུགས་ལ་ཡི་དམགྱི་ལྷ་རྣམས་རྗེས་སུ་ཞུགས་པའི་ཚུལ་གྱིས་འགྲོ་དོན་མཛད་པ་ཡིན་པས་སངས་རྒྱས་དངོས་དང་ཁྱད་པར་མེད་པ་ལྟ་བུ་ནི་ཡིན། དེ་མཉེས་ན་སངས་རྒྱས་མཉེས། དེ་ལ་སྡིག་བསགས་ན་སངས་རྒྱས་ལ་སྡིག་བསགས་པར་འགྲོ །དེ་མཆོད་པས་སངས་རྒྱས་ཐམས་ཅད་མཆོད་པའི་ཕྱིར་སློབ་མའི་སྒྲིབ་པ་ཐམས་ཅད་ཟད་པར་འགྱུར་ཏེ། འཇམ་དཔལ་ཞལ་ལུང་ལས། མ་འོངས་རྡོ་རྗེ་འཆང་བསྟེ། །དེ་ལ་བརྙས་བྱེད་སེམས་ཅན་གང། །དེ་ཡིས་ང་ལ་བརྙས་བྱེད་པས། །ངས་ནི་དེ་ཀུན་དུས་སུ་སྤོང། །ཞེས་དང། འདི་ཡི་དོན་ལྡན་འགའ་ཞིག་ལ། །ང་ནི་དེ་ཡི་ལུས་གནས་ཏེ། །སྒྲུབ་པོ་གཞན་ལ་མཆོད་པ་ལེན། །དེ་མཉེས་དེ་ཡིས་རང་གི་རྒྱུད། །ལས་ཀྱི་སྒྲིབ་པ་དག་བྱེད་དོ། །ཞེས་གསུངས། འོན་ཀྱང་མོས་གུས་བསྒོམ་པའི་ཚུལ་ནི་རྩ་བའི་བླ་མ་དེ་ཉིད། དངོས་པོ་ལ་སུ་གང་ཡིན་རུང་སོ་སོ་སྐྱེ་བོའམ། འཕགས་པ་སློབ་པ་ལྟ་བུ་དང། དགེ་བའི་བཤེས་གཉེན་ཕལ་པ་སོགས་སུ་བལྟ་བ་མ་ཡིན། སངས་རྒྱས་དངོས་སུ་བསྒོམ་དགོས་དོན་ལ་སངས་རྒྱས་གཅིག་དང་མང་པོ་ལ་ཁྱད་མེད་ཀྱང༌། མོས་གུས་འཇུག་ཚུལ་ལ་ཁྱད་ཡོད་པས་སངས་རྒྱས་ཀྱང་གཅིག་གམ་གཉིས་ལྟ་བུ་མ་ཡིན། ཕྱོགསབཅུ་དུས་གསུམ་གྱི་སངས་རྒྱས་ཀུན་འདུས་པའི་ངོ་བོ་ཡིན། དེའི་ཕྱིར་ཆོས་དང་དགེ་འདུན་ཀུན་ཡང་འདུས། དེ་བས་ན་བདག་གི་བླ་མ་འདི་དངོས་གནས་ལ་དཀོན་མཆོག་ཀུན་འདུས། བླ་མ་ཉིད་དཀོན་མཆོག་གསུམ། དཀོན་མཆོག་གསུམ་ཉིད་བླ་མ་ཡིན། རང་རེའི་སྣང་ངོ་དང་བསྟུན་ན། དཀོནམཆོག་གསུམ་པས་ཀྱང་བླ་མ་བཀའ་དྲིན་ཆེ། ཕྱོགས་བཅུའི་སངས་རྒྱས་རྣམས་སྤྱིར་ཏ་བཟང་སྟེ། བདག་ལ་ཞལ་མི་སྟོན་གསུང་མི་འབྱོན། སངས་རྒྱས་དང༌། ཡི་དམ་དང༌། བྱང་སེམས་མཁའ་འགྲོཆོས་སྐྱོང་སོགས་དངོས་སུ་བྱོན་ཀྱང་རུང༌། བདག་ལ་དཔལ་ལྡན་བླ་མས་མཛད་པ་ལས་ལྷག་པོམཛད་རྒྱུ་དང་སྟོན་རྒྱུ་མེད། དེ་དག་དངོས་སུ་མཇལ་བའི་སྐལ་བ་མེད་དུས་འདིར། དེ་རྣམས་ཀྱི་མཛད་རྒྱུ་ཐམས་ཅད་བླ་མས་མཛད་པ་ཡིན་བཀའ་དྲིན་རང་ཆེའོ་སྙམ། བླ་མ་སངས་རྒྱས་ཀུན་འདུས་སུ་ཤེས་ནས་ཡོན་ཏན་མཐའ་མེད་པའི་དད་པ་དང༌། བཀའ་དྲིན་ཤིན་ཏུ་ཆེ་བར་ཤེས་པ་གཉིསའཛོམ་ན་མོས་གུས་ཀྱི་ངོ་བོ་གོ་ལུགས་སྒོམ་ལུགས་བཟང་བ་ཡིན། གོ་ཡུལ་བཟང་པོ་དེ་འདྲ་ཞིགཡོད་པའི་ལུགས་བྱས་ཀྱང༌། སྐབས་སྐབས་སུ་མིན་པ་བླ་མ་མི་དྲན་པར་བརྗེད། ལན་རེ་དྲན་པའིསྐབས་ཀྱང་བ་སྤུ་གཡོ་ནུས་པའི་གདུང་ཤུགས་མི་འབྱུང་ན། གོ་བ་ཙམ་ལ་ལུས་པ་ཡིན། ཉམས་རྟོགསའཕྲལ་མར་སྐྱེད་ཐུབ་པ་དེ་མིན། གདུང་ཤུགས་དྲག་པོ་ཐ་མལ་གྱི་སྣང་བ་གཞན་འགོག་ནུས་པ། རིག་པ་བསྒྱུར་ཐུབ་པ་ཞིག་བྱུང་ན། བྱིན་རླབས་འཕྲལ་དུ་འཇུག ཉོན་མོངས་གློ་བུར་དུ་འགག ཡེ་ཤེས་སྐད་ཅིག་གིས་འབེབས། དེ་ལྟ་བུ་ཡང་ཡང་དྲན་པས་རྟག་ཏུ་སྒོམས་པར་འགྲོ། གོམས་པལས་སྐྱོན་ཐམས་ཅད་སྤོང་ཞིང་ཡོན་ཏན་ཐམས་ཅད་སྐྱེ་བ་ཡིན། སངས་རྒྱས་དངོས་སུ་མཐོང་བ་མེད་ན། ཕྱོགས་ཞེན་དང་ཕོ་རུས་དང༌། ཡིད་འོང་གི་གདུང་ཤུགས་ཡོད་ཀྱང༌། ཟག་བཅས་འཇིགརྟེན་པའི་རྣམ་རྟོག་ཡིན་པས་གྲོལ་མི་ཐུབ། དགེ་བཤེས་ཕལ་པ་དང་གྲུབ་ཐོབ་ཕལ་པར་བརྩེ་བའིདད་པ་ཡང་རྣམ་རྟོག་འཇིག་རྟེན་པ་ཀ་ཡིན། སྐྱེ་བོ་བླུན་པོས་བླ་མ་སངས་རྒྱས་ཟེར་བ་ཞིག་ཡོདདེ། དེ་ཡང་མི་ཇོ་བཟང་གཅིག་གམ། སྨད་བུད་གཅིག་གམ། ཟས་ནོར་གྱིས་ཕན་འདོགས་བྱེད་པཞིག་ལ་སངས་རྒྱས་ཟེར་རམ། སངས་རྒྱས་སངས་རྒྱས་ཞེས་པའི་ཚིག་ཙམ་མིན་པ་བློ་རྩེ་བརྟད་འཚམས་ཅི་ཡང་མེད། དེ་འདྲས་སེམས་རྒྱུད་གྲོལ་བ་ལ་ཕན་པ་ཞིག་ཀྱང་མེད་དེས་ན་སངས་རྒྱསཀྱི་ཡོན་ཏན་ཤེས་ནས། དེ་ཉིད་བླ་མ་ལ་ཚང་བའི་མོས་གུས་དགོས་པ་ཡིན། དེ་ལྟར་བླ་མ་སངས་རྒྱས་སུ་ཤེས་པ་སྟེ། དམིགས་ཡུལ་འཇིག་རྟེན་ལས་འདས་པའི་མཆོག སངས་རྒྱས་ལ་དམིགས་པ་ཡིན་པས་ལམ་སྒོམ་པ་ཐམས་ཅད་ཀྱི་སྙིང་པོ་ཡིན། སྤྱིར་སངས་རྒྱས་ཐམས་ཅད་ཀྱི་བྱིན་རླབས་འཇུག སྒོས་སུ་རང་རེའི་བླ་མ་དེ་ལ་ཞུས་པའི་ཡི་དམ་རྣམས་ཀྱི་བྱིན་རླབས་འཕྲལ་རང་ལ་མྱུར་དུ་འཇུག བཀའ་དྲིན་དྲན་པ་མེད་ན། སྤྱིར་བྱས་པ་མི་གཟོ་ཞིང༌། ངོ་ཚ་ཁྲེལ་མེད་དེ་བྱུར་ཆགས་ཉེས་པ་ཐམས་ཅད་ཀྱི་རྩ་བ་ཡིན། བསོད་ནམས་དང་དཔལ་དང་གཡང་དང་དགེ་ལེགས་ཐམས་ཅདཕྱགས་མ་བཏབ་པ་བཞིན་ཉམས་འགྲོ། སྒོས་སུ་ཆོས་ཐོབ་པ་དྲིན་དུ་མི་སེམས་པ་དེ། ཆོས་ལ་ཡངརྩིས་མེད་དད་པ་མེད་པ་ཡིན་པས། འབད་པ་བྱས་ཚད་དོན་མེད་དུ་འགྱུར། ཡང་སྒོས་སུ་རྩ་ལྟུང་དང་པོའི་ཞད་ཀྱིས་གོས་པ་ཡིན་ལ། བཀའ་དྲིན་དྲན་པས་དགེ་ལེགས་ཐམས་ཅད་ཀྱི་གཞིར་འགྱུརཞིང༌། གུས་པ་ཆེན་པོ་རང་ཤུགས་ཀྱིས་སྐྱེ་བ་ཡིན་ནོ། །དེ་ལྟར་ན་སངས་རྒྱས་སུ་ཤེས་པ། བཀའདྲིན་དྲན་ལ། གདུང་ཤུགས་དྲག་པ། ཡང་ཡང་མ་བརྗེད་པར་དྲན་པ་སྟེ་ཁྱད་པར་བཞི་དང་ལྡནཔའི་མོས་གུས་ཡོད་ན་མོས་གུས་ཚད་དུ་ཕྱིན་པ་ཞེས་བྱ། དེས་ན་རྡོ་རྗེ་སློབ་དཔོན་མཚན་ཉིད་དང་ལྡན་པ་ལ། སློབ་མ་དམ་ཚིག་དང་ལྡན་པས་མོས་གུས་དེ་ལྟ་བུའི་སྒོ་ནས་བླ་མ་བསྒོམས་ཤིང་གསོལབ་བཏབ་ན། ཐབས་གཞན་མེད་ཀྱང༌། མཆོག་ཐུན་མོང་གི་འདོད་དོན་ཐམས་ཅད་འགྲུབ་པརའགྱུར་བ་ཡིན་ནོ། །ཞེས་གསུངས་པ་ལྟར་ཐུགས་ལ་བཟུང་རྒྱུ་ཧ་ཅང་གལ་ཆེན་པོ་རེད། །གྲངས་མེད་བསྐལ་བར་རྒྱལ་རྣམས་ལ། །རིན་ཆེན་ཞིང་མཆོག་ཕུལ་བ་བས། །ཁྱོད་ཀྱི་སྐུ་ལ་ཏིལ་མར་གྱིས། །ཐིགས་པས་མཆོད་ནའང་བསོད་ནམས་མཆོག །ཅིའི་ཕྱིར་ཞེ་ན་སངས་རྒྱས་ཀྱི། །ཡེ་ཤེས་མ་ལུས་ཁྱོད་ལས་བྱུང༌།མཆོད་པ་ཐམས་ཅད་སྤངས་ནས་ནི། །རྗེ་བཙུན་ཁྱེད་ལ་མཆོད་ཅིང་འདུད། །དུས་ཀྱི་ཡུན་ཚད་གྲངས་མེད་བསྐལ་བའི་བར་དུ་རྒྱལ་བ་སངས་རྒྱས་བཅོམ་ལྡན་འདས་རྣམས་ལ་རིན་པོ་ཆེ་གསེར་དངུལ་སོགས་ཀྱིས་ཞིང་མཆོག་བཀང་བ་ཕུལ་བ་བས། དཔལ་ལྡན་བླ་མདམ་པ་ཁྱོད་ཀྱི་སྐུ་ལ་ཏིལ་མར་གྱི་ཐིག་པས་མཆོད་ནའང་བསོད་ནམས་མཆོག་ཏུ་གྱུར་པ་རེད།རྒྱུ་མཚན་ཅིའི་ཕྱིར་ཞེ་ན་སངས་རྒྱས་ཀྱི་ཡོན་ཏན་ཡེ་ཤེས་སྟོབས་བཅུ་དང་མི་འཇིགས་པ་བཞི་མ་འདྲེས་པའི་ཆོས་བཅོ་བརྒྱད་སོགས་ཡོན་ཏན་མ་ལུས་པ་ཐམས་ཅད་དཔལ་ལྡན་བླ་མ་དམ་པ་ཁྱོད་ལས་བྱུང་བས་ན་བླ་མ་ལ་མ་ལྟོས་པའི་མཆོད་པ་ཐམས་ཅད་སྤངས་ནས་ནི།ཀུན་གྱི་རྗེ་བོ་སྒོ་གསུམ་ཉེས་སྤྱོད་ལས་བཙུན་པའི་བླ་མ་ཁྱེད་ལ་མཆོད་ཅིང་སྒོ་གསུམ་གུས་པ་ཆེན་པོ་སྒོ་ནསའདུད།། ཅེས་པའོ། །དེ་ཡང་གསང་འདུས་རིམ་ལྔ་ལས་ཀྱང༌། མཆོད་པ་ཐམས་ཅད་ཡོངས་སྤངསནས། །བླ་མ་མཆོད་པ་ཡང་དག་བརྩམས། །དེ་མཉེས་པས་ནི་ཀུན་མཁྱེན་གྱི། །ཡེ་ཤེས་མཆོག་ནི་ཐོབ་པར་འགྱུར། །ཞེས་གསུངས་པ་ལྟར་ཡིན་ནོ། །དེ་ཡང་དཔལ་ལྡན་བླ་མ་དེ་ཉིད་ནི་སངས་རྒྱས་ཐམས་ཅད་ཀྱི་མཛད་པ་འཕྲིན་ལས་འཇུག་པའི་སྒོ་དང་སངས་རྒྱས་ཐམས་ཅད་ཀྱི་སྔོན་སློབ་ལམ་གྱི་གནས་སྐབས་སུ་ཐུགས་བསྐྱེད་པ་ནང་བཞིན་དུ་མངོན་པར་རྫོགས་པར་སངས་རྒྱས་ནས་སེམས་ཅན་ཐམས་ཅད་ཀྱི་དོན་མཛད་པ་རེད།འགྲོ་བའི་དོན་མཛད་པ་ཡང་དུས་ལས་ཡོལ་བ་མེད་པར་འབད་རྩོལ་སོགས་མི་དགོས་པར་རང་བཞིན་ལྷུན་འགྲུབ་ཀྱི་སྒོ་ནས་མཛད་པ་རེད། དཔལ་ལྡན་བླ་མ་དེ་སངས་རྒྱས་དངོས་ཀྱི་སྤྲུལ་བ་ཡིན་ན་འདྲ་གལ་ཏེ་སངས་རྒྱས་དངོས་ཀྱི་སྤྲུལ་བ་མ་ཡིན་དུ་ཆུག་ཀྱང་སངས་རྒྱས་ཐམས་ཅད་ཀྱི་སྐུའི་བ་སྤུ་བུ་ག་ཐམས་ཅད་ཀྱི་བྱིན་གྱིས་རླབས་ནས་འགྲོ་བ་སེམས་ཅན་རང་རང་གི་ཁམས་དབང་མོས་པ་ལྟར་དུས་ལས་ཡོལ་བ་མེད་པར་འགྲོ་བའི་དོན་མཛད་པ་རེད།རང་རང་སོ་སོའི་བསོད་ནམས་མེད་ན་སངས་རྒྱས་དངོས་སུ་བྱོན་ཀྱངམཇལ་བའི་སྐལ་བ་མེད་པ་ཡིན་པ་དེ་བསྟན་བཅོས་མངོན་པར་རྟོགས་པའི་རྒྱན་ལས། ལྷ་ཡི་རྒྱལཔོས་ཆར་ཕབས་ཀྱང༌། །ས་བོན་མི་རུང་མི་འཁྲུངས་ལྟར། །སངས་རྒྱས་རྣམས་ནི་བྱོན་གྱུར་ཀྱང༌། །སྐལ་བ་མེད་པས་བཟང་མི་མྱོང༌། །ཞེས་གསུངས་པ་ལྟར་ཡིན་ནོ། །རྡོ་རྗེ་གསུམ་གྱི་དངོས་གྲུབ་ཚོགས། །ཉིད་ཀྱི་སྐུ་གསུང་ཐུགས་ལ་གནས། །ཁྱེད་ནི་གང་ལའང་མི་གནས་ཏེ། །མཁའ་མཉམ་འོད་གསལ་རྨད་བྱུང་ཆེ། །རྩོད་པའི་དུས་འདིར་རྡོ་རྗེ་སེམས། །དངོས་སུ་མཐོང་བའི་སྐལ་མེད་པས། །སློབ་དཔོན་གཟུགས་ཀྱི་སྒྲུབ་རྣམས་ལ། །བརྩེ་བས་མཆོད་པ་ལེན་ལ་འདུད། །སྐུ་གསུང་ཐུགས་གསུམ་སྟེ་རྡོ་རྗེ་གསུམ་གྱི་དངོས་གྲུབ་ཀྱི་ཚོགས་དེ་ཉིད་གང་ལ་བརྟེན་ནས་བྱུང་བ་རེད་ཅེ་ན་དཔལ་ལྡན་བླ་མ་ཁྱེད་ཉིད་ཀྱི་སྐུ་གསུང་ཐུགས་གསུམ་ལ་བརྟེན་ནས་གནས་པ་ཡིན་ཀྱང་དཔལ་ལྡན་བླ་མ་དམ་པ་དོན་དམ་ཆོས་ཀྱི་སྐུ་གསུང་ཐུགས་ཁྱེད་ནི་གཟུགས་ནས་རྣམ་མཁྱེན་གྱི་བར་ཆོས་ཐམས་ཅད་བདེན་སྣང་འཁྲུལ་བའི་སྒོ་ནས་གང་ལའང་མི་གནས་ཏེ། ཆོས་ཀྱི་སྐུ་དེརེས་འཇོག་མེད་པར་ནམ་མཁའ་ལྟར་བརྟན་གཡོ་ཐམས་ཅད་ལ་ཆ་མཉམ་དུ་ཁྱབ་པ་དང་དེ་འདྲའི་ཆོས་ཉིད་དེ་ནི་རང་བཞིན་འོད་གསལ་དོན་དམ་པའི་ཡོན་ཏན་ཐམས་ཅད་བརྒྱན་པའི་ངོ་མཚར་རྨད་དུ་བྱུང་བ་ཆེན་པོའོ།། བཀའ་བསྡུ་བཞི་བ་ལས། དུས་བཞི་གཉིས་ཀྱི་རབ་དབྱེ་རབ་བཤད་བྱ། །དུས་བཞི་ཆེན་པོ་བསྐལ་དུས་བཟང་ངན་ཏེ། །དུས་བཞི་ཆུང་བ་བསྟན་པའི་བཟང་ངན་ཡིན། །དང་པོའི་ལོ་ནི་ས་ཡ་ཕྲག་བཞི་དང། །སུམ་འབུམ་ཉི་ཁྲིའོ་དེའི་བཅུ་ཆ་ནི། །རྐང་པ་ཞེས་གསུངས་རྐང་པ་གཅིག་དང་གཉིས། །གསུམ་དང་བཞི་ལ་རིམ་བཞིན་རྩོད་ལྡན་དང། །གཉིས་ལྡན་གསུམ་ལྡན་རྫོགས་ལྡན་ཞེས་གསུངས་སོ། །དུས་བཞི་ཆུང་བ་བསྟན་པའི་བཟང་ངན་ནི། །མི་ལོ་ཉི་ཁྲི་གཅིག་སྟོང་དྲུག་བརྒྱའི་བར། །དེ་ཡི་བཞི་ཆ་དུས་བཞི་སོ་སོའི་ཚད། །སྐྱོན་མེད་ཡོན་ཏན་ཚང་བ་རྫོགས་ལྡན་ཆོས། །དེ་ནས་བཞི་ཆ་ཉམས་པ་གསུམ་ལྡན་སྟོད། །ཕྱེད་ཉམས་གྱུར་ན་གསུམ་ལྡན་སྨད་དུ་འགྱུར། །བཞི་གསུམ་ཉམས་པའི་ལྷག་མ་གཉིས་ལྡན་ཡིན། །བཞི་ཆ་གཅིག་ཀྱང་མེད་ན་རྩོད་ལྡན་ཏེ། །ཞེས་གསུངས་པ་ལྟར་སྤྱིར་སངས་རྒྱས་ཀྱི་བསྟན་པ་ཆ་བཞི་བྱས་ཏེ་དེ་ཡོངས་རྫོགས་གནས་པའི་ཚེ་བསྟན་པ་རྫོགས་ལྡན་དང་དེའི་ཆ་གཅིག་ཉམས་ཚེ་གསུམ་ལྡན་དང༌། ཆ་གཉིས་ཉམས་ཚེགཉིས་ལྡན་དང༌། ཆ་གསུམ་ཉམས་ཚེ་རྩོད་ལྡན་ཡིན་པའི་དུས་འདིར་རྡོ་རྗེ་འཆང་ངམ་རྡོ་རྗེ་སེམསདཔའ་དངོས་སུ་མཐོང་བའི་སྐལ་བ་མེད་པས་ཚེ་བླ་མ་རྡོ་རྗེ་སློབ་དཔོན་ནི་རང་རང་སོ་སོའི་སྐལ་བ་དང་མཐུན་པའི་མིའི་བཞིན་ལག་གི་གཟུགས་ཀྱི་རྣམ་པར་བསྟན་ནས་ཆོས་སྒྲུབ་པ་པོ་སྐལ་བ་དང་ལྡན་པ་རྣམས་ཀྱིས་མཆོད་པ་ཕུལ་བ་རྣམས་ལ་ཐུགས་བརྩེ་བས་མཆོད་པ་ལེན་ལ་འདུད།ཅེས་པའོ། །དེ་ཡང་མཐུ་སྟོབས་དབང་ཕྱུག་བིར་ཝ་པའི་ཞལ་ནས། རྩོད་པའི་དུས་འདིར་བདགདོན་དུ། །ཀུན་དང་མཐུན་པར་སྟོན་མཛད་པ། །དེ་ལྟར་ཤེས་ནས་དངོས་ཀུན་གྱིས། །བསྟེན་བྱ་དུས་གསུམ་སངས་རྒྱས་ཀྱི། །དངོས་གྲུབ་བདེ་ཆེན་ཐོབ་པར་འགྱུར། །ཞེས་དང༌། རྡོ་རྗེ་གུར་གྱི་རྒྱུདལས། ང་ནི་རྡོ་རྗེ་སེམས་དཔའ་ཞེས། །ང་ཉིད་སློབ་དཔོན་གཟུགས་སུ་འཛིན། །སེམས་ཅན་ཕན་བཏགས་དམིགས་ནས་ནི། །ཐ་མལ་པ་ཡི་གཟུགས་སུ་གནས། །ཞེས་དང༌།མདོ་ལས། ལྔ་བརྒྱཐ་མར་གྱུར་བ་ན། །ང་ནི་སློབ་དཔོན་གཟུགས་སུ་གནས། །ང་ཡི་མཉམ་དུ་ཡིད་བཅོས་ལ། །དེ་ལྟར་དེ་ལ་གུས་པ་བསྐྱེད། །ཅེས་གསུངས་སོ། །རིགས་ལྔའི་དཀྱིལ་འཁོར་ཡེ་ཤེས་ལྔ། །འགྲོ་བ་འདུལ་ཕྱིར་ཕུང་པོ་ལྔ། །ཚད་མེད་ལྷ་མོ་བཞིའི་དཀྱིལ་འཁོར། །འབྱུང་བཞིར་སྟོན་པ་ཡ་མཚན་རྨད། །སྤྱན་སོགས་ཡང་ནི་སེམས་དཔའ་བརྒྱད། །ཚིགས་སོགས་ཡང་དག་ཁྲོ་བོ་བཅུ། །གཟུགས་སོགས་ཡང་ནི་རྡོ་རྗེ་མ། །ཡེ་ཤེས་སྐུ་ལ་བདག་ཕྱག་འཚལ། །རྡོ་རྗེ་འཆང་ཁྱོད་ཀྱི་སྐུ་ནི་རིགས་ལྔའི་དཀྱིལ་འཁོར་ཏེ་མི་བསྐྱོད་པ་ཆོས་དབྱིངས་ཡེ་ཤེས། རྣམསྣང་མེ་ལོང་ཡེ་ཤེས། རིན་ཆེན་འབྱུང་ལྡན་མཉམ་ཉིད་ཡེ་ཤེས། སྣང་བ་མཐའ་ཡས་སོར་རྟོགསཡེ་ཤེས། དོན་ཡོད་གྲུབ་པ་བྱ་གྲུབ་ཡེ་ཤེས་ཏེ་ཡེ་ཤེས་ལྔ་དང༌། འགྲོ་བ་སེམས་ཅན་ཐམས་ཅད་འདུལ་བའི་ཕྱིར་ཕུང་པོ་ལྔ་སྟེ། རྣམ་ཤེས་ཀྱི་ཕུང་པོ་མི་བསྐྱོད་པ། གཟུགས་ཕུང་སྣང་བ་མཐའཡས། ཚོར་ཕུང་རིན་ཆེན་འབྱུང་ལྡན།འདུ་ཤེས་སྣང་བ་མཐའ་ཡས། འདུ་བྱེད་ཀྱི་ཕུང་པོ་དོནཡོད་གྲུབ་པ་སྟེ་རིགས་ལྔ་དང༌། བྱམས་པ་སོགས་ཚད་མེད་བཞི་དང་དེའི་ངོ་བོ་ལྷ་མོ་བཞིའི་དཀྱིལའཁོར་ནི་ཁྱོད་ཀྱི་སྐུའི་འབྱུང་བཞིར་སྟོན་པ་སྟེ། དེ་ཡང་ས་ཁམས་སྤྱན་མ། ཆུ་ཁམས་མ་མ་ཀི། མེ་ཁམས་གོས་དཀར་མོ། རླུང་ཁམས་དམ་ཚིག་སྒྲོལ་མ་སྟེ་འབྱུང་བ་བཞིའི་ཚུལ་དུ་སྟོན་པ་ཡམཚན་རྨད་དུ་བྱུང་བའོ། །བླ་མའི་སྤྱན་སོགས་ཡང་ནི་སེམས་དཔའ་བརྒྱད་བཞུགས་པ་རེད། དེཡང་བླ་མའི་སྤྱན་ལ་ས་ཡི་སྙིང་པོ་དང༌། སྙན་ལ་ཕྱག་ན་རྡོ་རྗེ། ཤངས་ལ་ནམ་མཁའི་སྙིང་པོ། ལྕེ་ལ་འཇིག་རྟེན་དབང་ཕྱུགལུས་ལ་སྒྲིབ་པ་རྣམ་སེལ། ཡིད་ལ་དེ་བཞིན་གཤེགས་པ་འཇམ་དབྱངས་བཞུགས་པའོ། །ཚིགས་བཅུ་སོགས་གསང་འདུས་ཀྱི་དཀྱིལ་འཁོར་ལྟར་ཡང་དག་པའི་ཁྲོ་བོ་བཅུ་ཡིན་པ་དང༌།བླ་མའི་གཟུགས་སོགས་ཡང་ནི་རྡོ་རྗེ་མ་སྟེ་གཟུགས་རྡོ་རྗེ་མ་སྒྲ་རྡོ་རྗེ་མ་དྲི་རྡོ་རྗེ་མ་རོ་རྡོ་རྗེ་མ་རེག་བྱ་རྡོ་རྗེ་མ་ཆོས་ཁམས་རྡོ་རྗེ་མ་སོགས་ཡེ་ཤེས་ཀྱི་སྐུའི་རང་བཞིན་རྡོ་རྗེ་འཆང་ཁྱོད་ལ་བདག་གི་སྒོ་གསུམ་གུས་པས་ཕྱག་འཚལ་ཞེས་པའོ།།དེ་དག་གི་དོན་ཡང་གསང་བ་འདུས་པའི་རྒྱུད་ལས། སེམས་དཔའ་ཆེན་པོ་ཁྱོད་ཉོན་ཅིག །རྡོ་རྗེ་སློབ་དཔོན་སྐུ་ལ་ནི། །རྒྱལ་བའི་སྐུ་ནི་རིམ་བཞིན་གནས། །དང་པོ་སྐུ་ཡི་རྡོ་རྗེ་ནི། །གཟུགས་ཕུང་ལ་ནི་ཡང་དག་བཞུགས། །དེ་རྗེས་ནམ་མཁའ་རྡོ་རྗེ་ནི། །ཚོར་བ་ཡི་ནི་ཕུང་པོར་བཞུགས། །བཅོམ་ལྡན་གསུང་གི་རྡོ་རྗེ་ནི། ། འདུ་ཤེས་ཀྱི་ནི་ཕུང་པོར་བཞུགས། །ལས་རྣམས་ཀྱི་ནི་རྡོ་རྗེ་ནི། །འདུ་བྱེད་ཀྱི་ནི་ཕུང་པོར་བཞུགས། །བཅོམ་ལྡན་ཐུགས་ཀྱི་རྡོ་རྗེ་ནི། །རྣམ་ཤེས་ཕུང་པོར་ཡང་དག་བཞུགས། །ཡང་འདིའི་ཤ་སོགས་ས་ཁམས་ལ། །བཅོམ་ལྡན་འདས་ཡུམ་སྤྱན་བཞུགས་སོ། །ཁྲག་སོགས་ཆུ་ཡི་ཁམས་ལ་ནི། །བཅོམ་ལྡན་འདས་ཡུམ་མཱ་མ་བཞུགས། །དྲོ་བ་ལ་སོགས་མེ་ཁམས་ལ། །བཅོམ་ལྡན་འདས་ཡུམ་གོས་དཀར་བཞུགས། །མི་བསྐྱོད་ལ་སོགས་རླུང་ཁམས་ལ། །བཅོམ་ལྡན་འདས་ཡུམ་སྒྲོལ་མ་བཞུགས། །དེ་མིག་དབང་པོ་གཉིས་ལ་ནི། །དེ་བཞིན་གཤེགས་པ་ས་སྙིང་པོ། །དེ་ཡི་རྣ་བའི་དབང་གཉིས་ལ། །བདེ་གཤེགས་ཕྱག་ན་རྡོ་རྗེའོ། །དེ་ཡི་སྣ་བུག་གཉིས་ལ་ནི། །དེ་བཞིན་གཤེགས་པ་ནམ་མཁའི་མཛོད། །དེ་བཞིན་གཤེགས་པ་འཇིག་རྟེན་དབང༌། །དེ་ཡི་ལྕེ་ཡི་དབང་ལ་གནས། །དེ་ཡི་ཡིད་ཀྱི་དབང་པོ་ལ། །དེ་བཞིནགཤེགས་པ་འཇམ་དབྱངས་བཞུགས། །ཁམས་བཞིའི་རང་བཞིན་གོང་བུ་ནི། །ལུས་ཞེས་བྱ་བར་བརྟགས་པ་ལ། །སྒྲིབ་པ་ཐམས་ཅད་རྣམ་སེལ་བ། །དེ་བཞིན་གཤེགས་པ་དེ་བཞུགས་སོ། །ལུས་ཀྱི་ཚིགས་ནི་ཐམས་ཅད་ལ། །དེ་བཞིན་གཤེགས་པ་ཀུན་དུ་བཟང༌། །ལུས་ཀྱི་རྩ་རྒྱུས་ཐམས་ཅད་ལ། །དེ་བཞིན་གཤེགས་པ་བྱམས་པའོ། །ལག་པ་གཡས་པའི་རྩ་བར་ནི། །དེ་བཞིན་གཤེགས་པ་གཤིན་རྗེའི་གཤེད། །ལག་པ་གཡོན་པའི་རྩ་བར་ནི། །དེ་བཞིན་གཤེགས་པ་གཞན་མི་ཐུབ། །ཁ་ཡི་པད་མར་བཞུགས་པ་ནི། །དེ་བཞིན་གཤེགས་པ་རྟ་མགྲིན་ནོ། །གསང་བའི་གནས་སུ་བཞུགས་པ་ནི། །དེ་བཞིན་གཤེགས་པ་བདུད་རྩི་འཁྱིལ། །དཔུང་པ་གཡས་པར་བཞུགས་པ་ནི། །དེ་བཞིན་གཤེགས་པ་མི་གཡོ་བ། །དཔུང་པ་གཡོན་པར་བཞུགས་པ་ནི། །དེ་བཞིན་གཤེགས་པ་འདོད་པའི་རྒྱལ། །པུས་མོ་གཡས་པར་བཞུགས་པ་ནི། །དེ་བཞིན་གཤེགས་པ་དབྱིག་པ་སྔོ། །པུས་མོ་གཡོན་པར་བཞུགས་པ་ནི། །དེ་བཞིན་གཤེགས་པ་སྟོབས་པོ་ཆེ། །རང་གི་མགོ་སྟེངས་བཞུགས་པ་ནི། །དེ་བཞིན་གཤེགས་པ་འཁོར་ལོ་སྒྱུར། །རྐང་པའི་འོག་ཏུ་བཞུགས་པ་ནི། །དེ་བཞིན་གཤེགས་པ་གནོད་མཛེས་ཏེ། །ལུས་ནི་འདི་ཉིད་ཀུན་ལ་འདིར། །དེ་བཞིན་གཤེགས་པ་ཐམས་ཅད་བཞུགས། །སྐུ་ཡི་དཀྱིལ་འཁོར་ཞེས་བརྗོད་པ། །རྡོ་རྗེ་སེམས་དཔའ་ཉིད་ཀྱི་སྐུ། །རྡོ་རྗེ་སེམས་དཔའི་དབྱེ་བ་ཡིས། །རྫོགས་པའི་སངས་རྒྱས་མ་ལུས་འདི། །ལུས་པ་མེད་པ་སངས་རྒྱས་སྐུ། །སྐྱེ་བ་འདི་ལ་རྣལ་འབྱོར་པ། །མྱ་ངན་འདས་པ་མྱུར་དུ་འཐོབ། །ཁྱོད་ཀྱི་དགེ་བ་ཡོངས་སྦྱིན་པ། །དེ་བས་རྡོ་རྗེ་སློབ་དཔོན་གྱི། །ལུས་ལ་རྒྱལ་བ་ཐམས་ཅད་བཞུགས། །མཐོང་ན་དོན་ནི་ཡོད་པ་ཀྱེ། །ཕྱི་མའི་དུས་ན་སེམས་དཔའ་ཆེ། ། དེ་བས་སེམས་ཅན་ཐམས་ཅད་ཀྱི། །ལྷ་ཡི་མཆོད་པའི་ཡོ་བྱད་ཀྱིས། །རབ་ཏུ་འབད་དེ་བླ་མ་བསྟེན། །དེ་ནས་མཐོང་བ་དོན་ཡོད་བཅས། །བྱང་ཆུབ་སེམས་དཔའ་གྲགས་པ་ཆེ། །དགའ་ཞིང་མགུ་བས་ཕྱག་བྱས་ནས། །བཅོམ་ལྡན་འདས་ལ་མཆི་མ་བླགས། །གསུང་དང་ཐུགས་ཀྱི་དཀྱིལ་འཁོར་བཞུགས། །ཞེས་གསུངས་པ་ལྟར་རོ། །སྐྱེ་འཆི་ཅན་གྱི་སྐུའོ་ཞེས། །ལོག་པར་བཟུང་བ་གནོང་ཞིང་འགྱོད། །དེ་བས་བསམ་པ་ཐག་པས་བཤགས། །བདག་ཀྱང་ཁྱེད་ལྟར་མངོན་གྱུར་ཅིག །བྱང་ཆུབ་ཕྱོགས་ཆོས་སུམ་ཅུ་བདུན། །བཅོམ་ལྡན་སྐུ་ཡི་ཆ་ཤས་ལགས། །ཅོད་པཎ་རིགས་ལྔ་བ་སྤུ་རྣམས། །དགྲ་བཅོམ་ལགས་ཏེ་དེ་བས་འདུད། །དཔལ་ལྡན་བླ་མ་ཁྱབ་བདག་རྡོ་རྗེ་འཆང་ཆེན་པོས་གདུལ་བྱའི་ངོར་སྐྱེ་འཆི་ཅན་དང་བགྲེས་རྒུད་ཅན་སོགས་སྟོན་ན་ཡང་དོན་དངོས་པོ་གནས་ཚུལ་ལ་བགྲེས་རྒུད་དང་སྐྱེ་འཆི་སོགས་དང་བྲལ་བ་ཡིན་པས་དེ་ལྟར་མ་རྟོགས་པས་སྐྱེ་འཆི་ཅན་གྱི་སྐུ་ཡིན་པའོ་ཞེས་ལོག་པར་བཟུང་བ་དེ་གནོང་ཞིང་འགྱོད་པ་བྱེད་དགོས་ཏེ། བླ་མའི་སྐུའི་སྐྱེ་འཆི་དང་བྲལ་བ་ལ་རང་ཉིད་ཕྱིན་ཅི་ལོག་ཏུ་བཟུང་བ་དེ་བས་ན་བསམ་པ་ཐག་པས་སྒོ་ནས་བཤགས་སོ། །བདག་ཀྱང་སྐྱེ་འཆི་མཐའ་དག་དང་བྲལ་བའི་ཡེ་ཤེས་ཀྱི་སྐུ་མཐར་ཐུག་པ་དཔལ་ལྡན་བླ་མ་དམ་པ་ཁྱེད་ལྟར་མངོན་དུ་གྱུར་བར་ཤོག་ཅིགདཔལ་ལྡན་བླ་མ་དམ་པ་དེ་ཉིད་བྱང་ཆུབ་ཕྱོགས་ཀྱི་ཆོས་སུམ་ཅུ་སོ་བདུན་དེ་དྲན་པ་ཉེ་བར་བཞག་པ་བཞི་དང༌།ཡང་དག་པར་སྤོང་བ་བཞི། རྫུ་འཕྲུལ་གྱི་རྐང་བ་བཞི།དབང་པོ་ལྔ། སྟོབས་ལྔ།བྱང་ཆུབ་ཀྱི་ཡན་ལག་བདུན།འཕགས་པའི་ལམ་ཡན་ལག་བརྒྱད་ཀྱི་བདག་ཉིད་དུ་བཞུགསཔ་དང༌། བྱང་ཆུབ་ཀྱི་ཆོས་སོ་བདུན་ནི་བཅོམ་ལྡན་འདས་ཀྱི་སྐུ་ཡི་ཆ་ཤས་ལགས་པའམ་ཡིན་པ་དང༌།ཁྱེད་ཀྱི་དབུའི་ཅོད་པཎ་ནི་རྡུལ་རྫས་ལས་གྲུབ་པ་མ་ཡིན་པར་རྒྱལ་བ་རིགས་ལྔ་དངོས་ཡིན་པ་དང༌། བ་སྤུ་བྱེ་བ་ཕྲག་གསུམ་རྣམས་ནི་སྤྲུལ་བའི་དགྲ་བཅོམ་པ་བྱེ་བ་ཕྲག་གསུམ་ལགས་ཏེ་རྒྱུ་མཚན་དེ་བས་སྒོ་གསུམ་གུས་པ་ཆེན་པོས་འདུད། དེ་ཡང་རྡོ་རྗེ་མཁའ་འགྲོ་སོ་གཉིས་པའི་རྒྱུད་ལས།སངསརྒྱས་ཀུན་གྱི་རང་བཞིན་སྐུ། །ཡན་ལག་བྱང་ཆུབ་སེམས་དཔའ་དེ། །བ་སྤུ་རྣམས་ནི་དགྲ་བཅོམ་ཉིད། །སྤྱི་གཙུག་རིགས་ལྔ་སངས་རྒྱས་ཏེ། །ཞེས་གསུངས་པ་ལྟར་རོ། །འཇིག་རྟེན་ལྷ་རྣམས་ཁྱོད་ཀྱི་གདན། །སྲིད་གསུམ་བླ་མ་ཁྱོད་ཉིད་ལགས། །ཁྱོད་ནི་དཀོན་མཆོག་གསུམ་ལགས་ཤིང། །རིན་ཆེན་གསུམ་གྱི་བྱེད་པོར་གསུངས། །གཡོ་སྒྱུའི་ཚིག་ཙམ་མ་ཡིན་པར། །དེང་ནས་བྱང་ཆུབ་སྙིང་པོའི་བར། །བསམ་པ་ཐག་པས་སྐྱབས་སུ་མཆི། །ལྷག་པར་དད་པས་ཕྱག་འཚལ་ལོ། །འཇིག་རྟེན་པའི་ལྷ་ཚངས་པ་སོགས་དཀར་ཕྱོགས་ལ་མངོན་པར་མི་དགའ་བ་རྣམས་དབང་མེད་དུ་བཀུག་ནས་ཁྱབ་བདག་རྡོ་རྗེ་འཆང་ཁྱོད་ཀྱི་ཞབས་འོག་མནན་པའི་གདན་དང་འདྲ་ལ། ཁམསགསུམ་མམ་སྲིད་གསུམ་བླ་མ་ནི་དཔལ་ལྡན་བླ་མ་དམ་པ་ཁྱོད་གཅིག་པུ་ཉིད་ལགས་ཏེ། རྡོ་རྗེའཆང་ཁྱོད་ནི་དཀོན་མཆོག་གསུམ་ཀུན་འདུས་པའི་བདག་ཉིད་ལགས་ཤིང༌།དཀོན་མཆོག་རིན་པོ་ཆེ་གསུམ་གྱི་བྱེད་པོ་སྟེ་ཁྱོད་ནི་སྤངས་རྟོགས་མཐར་ཕྱིན་པའི་སངས་རྒྱས་ཐམས་ཅད་ཀྱིས་དང་པོ་སེམས་བསྐྱེད་པ་དང༌། བར་དུ་རྒྱལ་སྲས་ཀྱི་སྤྱོད་པས་གྲོགས་བྱེད་པའི་སྒོ་ནས་བྱེད་པ་པོདང༌། གདུལ་བྱ་སེམས་ཅན་ཐམས་ཅད་ཐུན་མོང་དང་མཆོག་གི་དངོས་གྲུབ་ཐོབ་པར་བྱེད་པ་པོཡིན་པར་མདོ་རྒྱུད་ཀུན་ཏུ་གསུངས་པ་ཡིན་ཏེ། དཔལ་མཆོག་འབྱུང་བ་ཞེས་བྱ་བའི་རྒྱུད་ཀྱི་རྒྱལ་པོ་ལས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་ཡིན། །བླ་མ་རྣམས་ལ་ཕྱག་འཚལ་ལོ། །ཞེས་གསུངས་པ་ལྟར་ཡིན་ནོ། །བླ་མ་ལ་དད་པ་མེད་བཞིན་དུ་ཡོད་པའི་ཚུལ་སྟོན་པ་གཡོ་སྒྱུ་དང་རྒྱུ་མཚན་མེད་པའི་གཞན་གྱི་གཡམ་ལ་རྒྱུག་པ་ཚིག་ཙམ་མ་ཡིན་པར་དུས་དེང་ནས་བཟུང་སྟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྙིང་པོའི་མ་ཐོབ་ཀྱི་བར་དུ་བསམ་པ་སྙིང་ཐག་པས་རང་གཞན་སེམས་ཅན་ཐམས་ཅད་སྲིད་ཞི་འཇིགས་པ་ལས་སྐྱོབས་པའི་སྐྱབས་སུ་མཆི་བ་སྟེ་བསྟེན་པ་དང༌། རྡོ་རྗེ་འཆང་དངོས་རྩ་བའི་བླ་མ་བཀའ་དྲིན་སངས་རྒྱསཀུན་ལས་ཀྱང་ལྷག་པར་ཆེ་བས་སྒོ་གསུམ་དད་པས་ཕྱག་འཚལ་ལོ།། དེ་ཡང་རྡོ་རྗེ་མཁའ་འགྲོ་སོ་གཉིས་པའི་རྒྱུད་ལས། འཇིག་རྟེན་པ་ནི་ཞབས་ཀྱི་གདན། །འོག་ཟུར་གནོད་ཅན་ཚངས་ལ་སོགས། །དེ་དག་ཡོན་ཏན་རང་བཞིན་ལུས། །རྣལ་འབྱོར་ཅན་གྱིས་རྟག་ཏུ་ལྟ། །ཞེས་པའི་དོན་ཡང་ཡིན་ནོ། །དཔལ་ལྡན་བླ་མ་དམ་པ་ལ་རང་ཉིད་དངོས་གྲུབ་ཐོབ་པའི་ཆེད་ཙམ་ཕྱག་འཚལ་བ་མ་ཡིན་པར་འཕགས་པའི་དགེ་འདུན་རྒྱ་མཚོའི་མངའ་བདག་ནི་རྡོ་རྗེ་སློབ་དཔོན་ཡིན་ལ་ཐམས་ཅད་ཀྱིས་སྔོན་དུ་ལྷག་པར་དད་པ་བྱ་དགོས་པ་ཡིན་ཏེ། ཏ་ལ་ལའི་མདོར། དད་པ་སྔོན་འགྲོ་མ་ལྟར་བསྐྱེད་པ་སྟེ། །ཡོན་ཏན་ཐམས་ཅད་བསྲུང་ཞིང་འཕེལ་བར་བྱེད། །མི་དགེ་སེལ་ཞིང་ཆུ་བོ་རྣམས་ལས་སྒྲོལ། །དད་པ་བདེ་བའི་གྲོང་ཁྱེར་མཚོན་པ་ཡིན། །དད་པས་རྟོག་པ་སེལ་ཞིང་སེམས་དད་བྱེད། །ང་རྒྱལ་སྤོང་ཞིང་གུས་པའི་རྩ་བ་ཡིན། །དད་པ་གཏེར་དང་ནོར་དང་རྐང་པའི་མཆོག །ལག་པ་བཞིན་དུ་དགེ་བའི་སྡུད་རྩ་ཡིན། །དད་པས་ཡོངས་སུ་གཏོང་ལ་དགའ་བར་བྱེད། །དད་པས་རྒྱལ་བའི་ཆོས་ལ་རབ་དགའ་བསྐྱེད། །དད་པས་ཡོན་ཏན་ཡེ་ཤེས་ཁྱད་པར་འཕགས། །སངས་རྒྱས་གོ་འཕང་ཐོབ་ཅིང་ཐོབ་པར་བྱེད། །ཅེས་དང༌། ཆོས་བཅུ་བའི་མདོ་ལས། དད་པ་ཐེག་པའི་མཆོག་ཡིན་ཏེ། །དེསནི་འདྲེན་པ་ངེས་པར་འབྱུང། །དེ་ཕྱིར་བློ་དང་ལྡན་པའི་མི། །དད་པའི་རྗེས་སུ་འབྲང་ལ་བརྟེན། །དད་པ་མེད་པའི་མི་དག་ལ། །དཀར་པོའི་ཆོས་རྣམས་མི་སྐྱེ་སྟེ།། ས་བོན་མེ་ཡིས་ཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་དང༌། །མདོ་སྡེ་རྒྱ་ཆེར་རོལ་པར། ཀུན་དགའ་བོ་དད་པ་ལ་བརྩོན་པར་གྱིས་ཤིག །ཅེས་དང། སེང་གེས་ཞུས་པའི་མདོར། དད་པས་མི་ཁོམ་སྤོང་བར་འགྱུར། །ཞེས་གསུངས། འོད་དཔག་མེད་ཞིང་གི་བཀོད་པའི་མདོ་ལས། སངས་རྒྱས་དང་ཆོས་དང་དགེ་འདུན་དང་སློབ་དཔོན་དང་མཁན་པོ་དང། དགེ་བའི་བཤེས་གཉེན་ལ་གུས་པ་དང་བཅས་པ་ནི་སྔོན་དུ་འགྲོའོ།། ཞེས་སོ། །འཕགས་པ་སྡོང་པོ་བཀོད་པའི་མདོར། དད་པ་ཡིད་བཞིན་ནོར་བུ་བུམ་པ་བཟང༌། །འདོད་དགུ་འཇོ་བའི་བཞོན་མཚུངས་པ། །བླ་མ་དང་ནི་སངས་རྒྱས་ལ།། དེ་ལྟ་བས་ན་མགུ་བར་བྱ། །སངས་རྒྱས་དད་པའི་བསོད་ནམས་གང། །སངས་རྒྱས་ཞིང་དུ་སྐྱེ་བར་འགྱུར། །ཞེས་གསུངས།འཕགས་པ་ཡན་ལག་མེ་ཏོག་མཆོག་གི་མདོར། སངས་རྒྱས་ཕྲད་ན་ཤིན་ཏུ་དད། །དད་ནས་ཤིན་ཏུ་གུས་པར་འགྱུར། །གུས་པས་ནན་ཏན་བྱེད་པས་ན། །མྱུར་དུ་བྱང་ཆུབ་ཐོབ་པར་འགྱུར། །ཞེས་སོགས་མང་དུ་གསུངས་སོ། །དེ་ཡང་བླ་མ་རྡོ་རྗེ་སློབ་དཔོན་མ་ཟད་ཚིགས་སུ་བཅད་པ་གཅིག་ཙམཞུས་པའི་བླ་མ་ལ་དད་པ་དང་གུས་པ་བྱེད་དགོས་ཏེ། ཁྱིམ་བདག་དྲག་ཤུལ་གྱིས་ཞུས་པའི་མདོལས། ཚིག་བཞི་པའི་ཚིགས་སུ་བཅད་པ་སུ་ལ་མཉན་ནམ། ལུང་ནོད་དམ། བླངས་པའི་སློབ་དཔོནདེ་ལ་ཆོས་ཀྱི་གུས་པར་བྱའོ། །ཞེས་སོགས་མང་དུ་བསྡུའོ། །དེ་ནས་དད་པའི་ཞིང་ནི་སློབ་དཔོན་ཡིན་པས་བླ་མའི་རྣམ་ཐར་བཤད་པར་བྱ། ཞེས་མདོ་རྒྱུད་དུ་མར་གསུངས་ཏེ། དྲི་མེད་གྲགས་པསཞུས་པའི་མདོ་ལས། རབ་འབྱོར། གང་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱིཁམས་འདིར། རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ། སྦྱིན་པ་བྱིན་ན་བསོད་ནམསམང་དུ་བསྐྱེད་དམ། རབ་འབྱོར་གྱིས་གསོལ་པ། བཅོམ་ལྡན་འདས་མང་ལགས་སོ། །བདེ་བརགཤེགས་པ་མང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། གང་ལ་ལ་ཞིགགིས་བླ་མའི་རྣམ་ཐར་གྱི་ཚིག་བཞི་པའི་ཕྱེད་ཙམ་སྟོན་ན། དེ་བས་བསོད་ནམས་མང་དུ་བསྐྱེད་པར་འགྱུར་རོ། །ཞེས་གསུངས་པ་ལྟར་ནང་ཆོས་ལ་སློབ་སྦྱངས་བྱེད་མཁན་གྱི་མི་སུ་དང་གང་ཡིན་ན་ཆོས་ཚིགས་སུ་བཅད་པ་གཅིག་ཙམ་ཞུས་སའི་བླ་མ་ལ་དད་པས་སྒོ་ནས་ཆོས་ཞུས་དགོས་པ་ལས་དད་པ་དང་མོས་གུས་མེད་ན་བླ་མའི་གསུང་གི་དོན་ཤེས་པར་མི་འགྱུར་བ་དང་ཆོས་ལ་དབུལ་ཕོངས་བར་འགྱུར་ཏེ། བརྒྱད་སྟོང་བ་ལས། མི་ཉན་ན་མི་ཐོས། མ་ཐོས་ན་མི་ཤེས། མ་ཤེས་ན་མི་མཐོང༌།མ་མཐོང་ན་དེའི་དོན་རྟོགས་པར་མི་འགྱུར། དེའི་དོན་མ་རྟོགས་ན་ཆོས་ཀྱི་དབུལ་འཕོངས་བར་འགྱུར་རོ། །ཞེས་གསུངས་པ་ནང་བཞིན་ཡིན་ནོ། །གཉིས་པ་མཆོད་པ་འབུལ་བའི་ཡན་ལག་ལ་ཞིང་མཆོག་ཏུ་སྒྲུབ་པའི་སྒོ་ནས་སྤྲོ་བ་བསྐྱེད་པ་དང༌། མཆོད་པ་འབུལ་བ་དངོས་དང་གཉིས། དང་པོ་ཞིང་མཆོག་ཏུ་སྒྲུབ་པའི་སྒོ་ནས་སྤྲོ་བ་བསྐྱེད་པ་ནི།དམངས་རིགས་ཉིས་སྟོང་བྲམ་ཟེ་གཅིག་དང་མཉམ། །དེ་བཞིན་བྲམ་ཟེ་དགེ་སློང་རྡུལ་མེད་དང། །ཡེ་ཤེས་ལྡན་རྣམས་སྟོང་ཕྲག་གཉིས་གཉིས་སུ། །བསྒྲེས་པའང་སློབ་དཔོན་གཅིག་དང་ཞིང་མཉམ་པར། །གསུངས་ཕྱིར་མགོན་པོ་རྡོ་རྗེ་སློབ་དཔོན་ཁྱོད། །ཞིང་གི་རབ་མཆོག་ཕུལ་དུ་དབྱུང་མེད་པས། །སྲོག་གཅོད་མ་བྱིན་ལེན་སོགས་མི་དགེ་བཅུ་ལ་ལོངས་སྤྱོད་པ་ཐ་མལ་བ་དམངས་རིགས་ཉིས་སྟོང་ལ་བཟའ་བཏུང་སོགས་སྦྱིན་པ་སྦྱིན་པ་དང་བྲམ་ཟེ་རྩ་བཞི་ཆང་ལྔ་བསྲུང་བའི་དམ་བཅའ་དང་ལྡན་པའི་དགེ་བསྙེན་གཅིག་ལ་བསོད་སྙོམས་འབུལ་བ་དེ་གཉིས་ཞིང་མཉམ་པ་དང༌། དེ་བཞིན་དུ་བྲམ་ཟེ་གཉིས་སྟོང་ལ་མཆོད་པ་འབུལ་བ་དང་དགེ་སློང་རྣམ་དག་གཅིག་དང་ཞིང་མཉམ་པ་ཡིན་པ་དང༌། དགེ་སློང་གཉིས་སྟོང་ལ་མཆོད་པ་ཕུལ་བ་དང་ཐེག་དམན་གྱི་མཐོང་སྤང་གི་རྡུལ་དང་བྲལ་ཞིང་མེད་པའི་མཐོང་ལམ་པ་དངཞིང་མཉམ་པ་དང༌། ཐེག་དམན་འཕགས་པ་སྟོང་གཉིས་ལ་མཆོད་པ་ཕུལ་བ་དང་སྟོང་ཉིད་མངོན་སུམ་དུ་རྟོགས་པའི་ཡེ་ཤེས་དང་ལྡན་པ་རྣམས་ལ་མཆོད་པ་ཕུལ་བ་ཡིན་ན་བསོད་ནམས་ཀྱི་ཞིང་མཉམ་པ་ཡིན་པ་དང༌། སྟོང་ཉིད་མངོན་སུམ་དུ་རྟོགས་པའི་ཡེ་ཤེས་དང་ལྡན་པའི་སྟོང་ཕྲག་གཉིས་ལ་མཆོད་པ་ཕུལ་བ་སོགས་སྟོང་ཕྲག་གཉིས་གཉིས་སུ་བསྒྲེས་པ་ནའང་བླ་མ་རྡོ་རྗེ་སློབ་དཔོན་གཅིག་དང་ཞིང་མཉམ་པ་ཡིན་པར་མདོ་རྒྱུད་དུ་མར་ཡང་ཡང་གསུངས་པའི་ཕྱིར་ན་སྲིད་ཞི་འཇིགས་པ་ལས་སྐྱོབས་པའི་མགོན་པོ་རྡོ་རྗེ་སློབ་དཔོན་ཁྱོད་ནི་གདུལ་བྱ་རྣམས་ཀྱི་ཚོགས་བསགས་པའི་ཞིང་གི་རབ་དང༌། མཆོག་དང་ཕུལ་དུ་དབྱུང་བ་མེད་པ་སྟེ་བླ་ན་མེད་པའོ། །དེ་ཡང་རྡོ་རྗེ་གདན་གྱི་རྒྱུད་འགྲེལ་ལས། སངས་རྒྱས་ཞིང་སོགས་ཞིང་རྣམས་ལ། །ཁྱད་པར་དུ་ནི་སྦྱིན་ལ་སྤྱོད། །དམངས་རིགས་སྟོང་ཕྲག་གཉིས་དག་ཀྱང༌། །བྲམ་ཟེ་གཙང་མ་གཅིག་དང་འདྲ། །བྲམ་ཟེ་སྟོང་ཕྲག་གཉིས་དག་ནི། །དགེ་སློང་གཅིག་དང་རབ་ཏུ་སྦྱར། །དགེ་སློང་སྟོང་ཕྲག་གཉིས་དག་ནི། །རྡུལ་མེད་པ་ནི་གཅིག་དང་མཉམ། །རྡུལ་མེད་སྟོང་ཕྲག་གཉིས་དག་ནི། །ཡེ་ཤེས་ལྡན་པ་གཅིག་དང་སྦྱར། །ཡེ་ཤེས་ལྡན་པ་སྟོང་ཕྲག་གཉིས། །སློབ་དཔོན་གཅིག་དང་མཉམ་པར་བརྟག །དེ་ལྟར་སྦྱིན་པའི་ཞིང་བྱས་ནས། །བློ་དང་ལྡན་པས་རྟག་ཏུ་སྦྱིན། །ཞེས་གསུངས་སོ། །རྒྱལ་ཁྱོད་མཉེས་པར་བྱས་ན་ཀུན་མཁྱེན་མཆོག །ཡེ་ཤེས་བླ་མེད་ཐོབ་པར་ཡང་ཡང་གསུངས། །སློབ་དཔོན་རྡོ་རྗེ་སེམས་དཔའ་མཆོད་པ་དེས། །བསོད་ནམས་ཀུན་བྱས་དཀའ་ཐུབ་ཐམས་ཅད་བསྟེན། །རྒྱལ་བ་སངས་རྒྱས་ཀུན་འདུས་ཀྱི་བདག་ཉིད་ཁྱབ་བདག་རྡོ་རྗེ་འཆང་ཆེན་པོ་ཁྱོད་མཉེས་པར་བྱས་ན་ཤེས་བྱའི་ཆོས་ཐམས་ཅད་ཅིག་ཆར་མངོན་སུམ་དུ་མཁྱེན་པའི་ཀུན་མཁྱེན་མཆོག་དང༌། ཡེ་ཤེསབླ་ན་མེད་པ་ཐོབ་པར་མདོ་རྒྱུད་ཐམས་ཅད་དུ་ཡང་ཡང་གསུངས་པ་རེད། དེ་ཡང་གསང་འདུས་རིམ་ལྔ་ལས། མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་པ་ཡང་དག་བརྩམས། །དེ་མཉེསཔས་ནི་ཀུན་མཁྱེན་གྱི། །ཡེ་ཤེས་མཆོག་ནི་ཐོབ་པར་འགྱུར། །བླ་མེད་བྱེད་པ་སློབ་དཔོན་གྱི། །རྡོ་རྗེ་སེམས་དཔའ་མཆོད་བྱས་པས། །དེ་ཡིས་བསོད་ནམས་མ་བྱས་ཅི། །དཀའ་ཐུབ་མ་བསྟེན་གང་ཞིག་ཡོད། །དེ་ཉིད་མི་བཟང་འདོད་པ་ཡིས། །ཤིན་ཏུ་ཡིད་འོང་གང་དང་གང། །ཤིན་ཏུ་ཁྱད་པར་གྱུར་པ་ཉིད། །དེ་དང་དེ་ནི་བླ་མར་འབུལ། །ཞེས་དང༌། བླ་མ་ལྔ་བཅུ་པ་ལས། འདིར་མང་སྨྲས་པས་ཅི་ཞིག་བྱ། །བླ་མ་མཉེས་བྱེད་གང་ཡིན་བྱ། །མི་མཉེས་བྱེད་ཀུན་སྤང་པ་ནི། །དེ་དང་དེ་ལ་འབད་པས་སྤྱད། །དངོས་གྲུབ་སློབ་དཔོན་རྗེས་འབྲང་བར། །རྡོ་རྗེ་འཛིན་པ་ཉིད་གསུངས་ཕྱིར། །ཤེས་ནས་དངོས་པོ་ཐམས་ཅད་ཀྱིས། །བླ་མ་ཡོངས་སུ་མཉེས་པར་བྱ། ། ཞེས་དང༌། རྡོ་རྗེ་སྙིང་པོ་རྒྱན་གྱིརྒྱུད་ལས།དེ་བས་ཐབས་ནི་ཐམས་ཅད་ཀྱིས། །རྡོ་རྗེ་འཛིན་པ་བླ་མ་མཆོག །རྗེས་སུ་མཐུན་པས་མཉེས་པར་བྱ། །དེ་མཉེས་སངས་རྒྱས་ཐམས་ཅད་མཉེས། །ཞེས་གསུངས་སོ། །འདིར་སློབ་དཔོན་རྡོ་རྗེ་སེམས་དཔའ་ལ་ཐ་མ་ཟང་ཟིང་དང་འབྲིང་བཀུར་སྟི་དང་རིམ་གྲོ་བྱེད་པའི་མཆོད་པ་དང༌། རབ་བཀའ་བཞིན་སྒྲུབ་པའི་མཆོད་པ་བྱེད་པ་དེས་སྐྱེས་བུ་ཆུང་ངུས་ལས་འབྲས་ལ་དད་པའིབསོད་ནམས་དང༌། སྐྱེས་བུ་འབྲིང་གིས་བདེན་བཞི་མི་རྟག་བཅུ་དྲུག་རྟོགས་པའི་བསོད་ནམསདང༌། སྐྱེས་བུ་ཆེན་པོས་བྱང་ཆུབ་ཀྱི་སེམས་དང་བསྡུ་པའི་དངོས་པོ་བཞི་ཕ་རོལ་ཏུ་ཕྱིན་པ་དྲུགདང་ཟག་མེད་སྡེ་ཚན་ཉེར་གཅིག་སོགས་བསོད་ནམས་ཀུན་བྱས་པ་མཉམ་པ་དང༌།རྩ་བཞི་ཆངལྔ་བསྲུང་བའི་དགེ་བ་དགེ་བསྙེན་གྱི་དཀའ་ཐུབ་དང༌། བླང་འདས་སུམ་ཅུ་བསྲུང་བའི་དགེ་ཚུལ་གྱི་དཀའ་ཐུབ་དང༌། ཁྲིམས་གཉིས་བརྒྱ་ལྔ་བཅུ་རྩ་གསུམ་བསྲུང་བའི་དགེ་སློང་གི་དཀའ་ཐུབདང༌། བདག་ཡལ་བར་དོར་ནས་གཞན་གཅེས་པར་འཛིན་པའི་སྒོ་ནས་བྱང་ཆུབ་སེམས་ཀྱི་དཀའཐུབ་དང༌། གང་སྣང་ལྷའི་རྣལ་འབྱོར་དུ་ཤར་བའི་བསྐྱེད་རིམ་གྱི་དཀའ་ཐུབ་དང༌། གཟུང་འཛིནགྱིས་བསྡུས་པའི་ཆོས་ཐམས་ཅད་ཆོས་སྐུ་རྣམ་རོལ་དུ་ཤར་བ་རྫོགས་རིམ་གྱི་དཀའ་ཐུབ་དེ་ཐམས་ཅད་ཚུལ་བཞིན་དུ་བསྟེན་པ་དང་འདྲ་བའོ་ཞེས་གསུངས་པ་ཡིན་ནོ། །སྡིག་འཇོམས་སྡུག་བསྔལ་ཞི་མཛད་སྲིད་པ་ཡི། །རྒྱ་མཚོའི་འཇིངས་ལས་སྒྲོལ་མཛད་ལ་ཕྱག་འཚལ། །རང་གིས་ཐོག་མེད་ནས་བསགས་པའི་མི་དགེ་བ་བཅུ་དང་མཚམས་མེད་པ་ལྔ་ལ་སོགས་པ་སྡིག་པ་མི་དགེ་བའི་ལས་ཅི་མཆིས་པ་ཐམས་ཅད་འཇོམས་པར་མཛད་པ་དང་སྡུག་བསྔལ་མ་ལུས་པ་ཞི་བར་མཛད་ཅིང་སྲིད་པ་འཁོར་བ་ཡི་སྡུག་བསྔལ་རྒྱ་མཚོའི་འཇིངས་སྟེ་དཀྱིལ་དང༌། ངམ་ཀློང་ལས་སྒྲོལ་བར་མཛད་པ་དཔལ་ལྡན་བླ་མ་དམ་པ་ལ་སྒོ་གསུམ་གུས་པས་ཕྱག་འཚལ་ལོ།།འདིདག་སྐབས་སུ་མཆོད་པ་འབུལ་བའི་ཡུལ་ཞིང་ཁྱད་པར་ཅན་གསུངས་པ་ཡིན་དེ་ཡང་སློབ་དཔོན་ལ་མཆོད་པ་འབུལ་བ་ཡིན་ན་བསོད་ནམས་ཐམས་ཅད་བསགས་པའི་གོ་ཆོད་པ་དང་དཀའ་ཐུབ་ཐམས་ཅད་བསྟེན་པའི་གོ་ཆོད་པ་ཡིན་པས་སྡིག་པ་ཐམས་ཅད་འཇོམས་ཐུབ་པ་དང་སྡུག་བསྔལ་མ་ལུས་པ་ཞི་བར་མཛད་པ་དང་འཁོར་བ་སྡུག་བསྔལ་གྱི་རྒྱ་མཆོའི་འཇིངས་ལས་སྒྲོལ་ཐུབ་པ་ཡིན་པ་ལ་སོགས་པ་སློབ་དཔོན་དེ་ཉིད་ཞིང་ཁྱད་པར་ཅན་ཡིན་པ་ངོ་སྤྲད་པ་ཡིན་ནོ། །གསང་འདུས་རིམ་ལྔ་ལས། བླ་མེད་བྱེད་པ་སློབ་དཔོན་གྱི། །རྡོ་རྗེ་སེམས་དཔའ་མཆོད་བྱས་པས། །དེ་ཡིས་བསོད་ནམས་མ་བྱས་ཅི། །དཀའ་ཐུབ་མ་བསྟེན་གང་ཞིག་ཡོད། །ཅེས་དང༌། བླ་མ་ཡིས་ནི་སྡིག་པ་འཕྲོག །སློབ་དཔོན་གྱིས་ནི་འཇིགས་པ་སེལ། །སློབ་དཔོན་གྱིས་ནི་སྡུག་བསྔལ་གྱི། །རྒྱ་མཚོ་འཇིངས་ལས་ཕ་རོལ་སྒྲོལ། །ཞེས་གསུངས་པ་ལྟར་བླ་མ་རྡོ་རྗེ་སློབ་དཔོན་དེ་ཉིད་ཞིང་ཁྱད་པར་ཅན་ཡིན་པ་ཧ་གོ་སོང་ན་དེ་ལ་མཆོད་པ་འབུལ་བ་དང་ཕྱག་འཚལ་བ་སོགས་སྤྲོ་བ་སྐྱེ་ཐུབ་པ་དང༌། སྤྲོ་བ་སྐྱེ་ཐུབན་སློབ་དཔོན་ལ་མཆོད་པ་འབུལ་བ་དངོས་དེ་ཡོང་ཐུབ་པ་དང༌། མཆོད་པ་འབུལ་བ་དངོས་སུ་ལགལེན་ཐེབ་པ་ཡིན་ན་བསོད་ནམས་ཀྱི་ཚོགས་རླབ་པོ་ཆེ་གསོག་ཐུབ་པ་ཡིན་པས་རྒྱུ་མཚན་གྱིས་ཐམས་ཅད་མཁྱེན་པ་ཏཱ་ར་ནཱ་ཐས་གདུལ་བྱ་སེམས་ཅན་རྣམས་ལ་ངོ་སྤྲད་པ་ཡིན་ནོ། །ཁྱོད་ལ་རྗེས་མཐུན་གུས་པས་ཡོན་ཕུལ་ན། །རིམས་སོགས་གནོད་པ་མི་འབྱུང་ཕྱོགས་བཅུ་ཡི། །རྒྱལ་བ་ཀུན་ལ་ཕུལ་བར་འགྱུར་བས་ན། །དངོས་གྲུབ་མཆོག་ནི་ངེས་པར་ཐོབ་པར་གསུངས། །བླ་མ་དགེ་བའི་བཤེས་གཉེན་ཁྱབ་བདག་རྡོ་རྗེ་འཆང་ཆེན་པོ་ཁྱོད་ཀྱི་རྟེན་དགེ་ཚུལ་སློང་ཡིན་ན་དེ་དང་རྗེས་མཐུན་པའི་རབ་བྱུང་གི་གོས་རྣམ་གསུམ་སོགས་ལ་སྒོ་གསུམ་གུས་པས་ཡོན་ཕུལ་ན་རིམས་ནད་དང་མི་དང་མི་མ་ཡིན་གྱི་གནོད་པ་ཐམས་ཅད་མི་འབྱུང་བ་དང༌། དེ་ལྟ་བུའི་མཆོད་པའི་ཕན་ཡོན་དེར་མ་ཟད་ཕྱོགས་བཅུའི་རྒྱལ་བ་སངས་རྒྱས་ཀུན་ལ་མཆོད་པ་ཕུལ་བར་འགྱུར་བས་ན་དངོས་གྲུབ་མཆོག་ནི་ངེས་པར་ཐོབ་པ་ཡིན་པར་མདོ་རྒྱུད་ཐམས་ཅད་དུ་གསུངས། དེ་ཡང་གསང་འདུས་རིམ་ལྔ་ལས། དེ་མཉེས་པས་ནི་ཀུན་མཁྱེན་གྱི། །ཡེ་ཤེས་མཆོག་ནི་ཐོབ་པར་འགྱུར། །ཞེས་དང༌།དེ་ཉིད་མི་བཟད་འདོད་པ་ཡིས། །ཤིན་ཏུ་ཡིད་འོང་གང་དང་གང༌། །ཤིན་ཏུ་ཁྱད་པར་གྱུར་པ་ཉིད། །དེ་དང་དེ་ནི་བླ་མར་འབུལ། །གསུངས་པ་ལྟར་རང་ཉིད་ཀྱི་ཡིད་དུ་འོང་བའི་དངོས་པོ་ཅི་མཆིས་པ་དེ་དག་བླ་མ་ལ་མཆོད་པ་ཕུལ་བ་ཡིན་ན་དངོས་གྲུབ་མཆོག་ཐོབ་ཐུབ་པ་ཡིན་པ་དེ་སྔོན་བྱོན་དམ་པ་གོང་མའི་རྣམ་ཐར་ལས་གྲུབ་ཆེན་ས་ར་ཧ་དང་ཨིནྚ་བྷོ་དྷི་སོགས་ཚེ་གཅིག་ལ་མཆོག་གི་དངོས་གྲུབ་ཐོབ་པ་དང༌། གཞན་ཡང་རྗེ་བཙུན་མི་ལ་རས་པ་ཡང་ཚེ་གཅིག་གིས་ཟུང་འཇུག་གི་སྐུ་གྲུབནས་ཁ་སྦྱོར་ཡན་ལག་བདུན་ལྡན་གྱི་ངོར་སངས་རྒྱས་པ་ལ་སོགས་པ་བླ་མ་ལ་མཆོད་པ་འབུལ་བ་དང་གུས་པས་བསྟེན་ན་མཆོག་གི་དངོས་གྲུབ་དེ་ཉིད་ངེས་པར་ཐོབ་པ་དེ་མདོ་རྒྱུད་དུ་མ་ནས་གསུངས་པ་ཡིན། དེ་ཡན་ཆད་དུ་དཔལ་ལྡན་བླ་མ་དམ་པ་ཁྱབ་བདག་རྡོ་རྗེ་འཆང་དེ་ཉིད་མཆོད་པའི་ཞིང་ཁྱད་པར་ཅན་ཡིན་པ་སྒྲུབ་ནས་མཆོད་པ་ལ་སྤྲོ་བ་བསྐྱེད་པ་དེ་སོང་ཟིན་པའོ། །རྗེ་ཐམས་ཅད་མཁྱེན་པ་ཏཱ་ར་ནཱ་ཐའི་གསུངས་བླ་མཆོད་ཀྱི་བཤད་བྱ་རྩ་བ་ནི་རྒྱུད་སྡེ་ལས་གསུངས་པ་རྣམས་ཕྱོགས་གཅིག་ཏུ་བསྡུས་ནས་གསུངས་པ་དེ་སངས་རྒྱས་བྱང་སེམས་རྣམས་དང་སྔོན་བྱོན་སྐྱེས་བུ་དམ་པ་རྣམས་ཀྱི་གསུང་དེ་བྱིན་རླབས་ཀྱི་སྒོ་ཁྱད་པར་ཅན་ཡིན་པས་རྒྱུ་མཚན་གྱི་རྗེ་བཙུན་རིན་པོ་ཆེ་ཁོང་གིས་སྔོན་གྱི་སྐྱེས་བུ་དམ་པ་རྣམས་ཀྱི་གསུང་གི་བརྡའ་ཆད་མ་བསྒྱུར་བར་རང་སོར་བཞག་ན་བྱིན་རླབས་ཀྱི་སྒོ་ཁྱད་པར་འཕགས་པ་ཡོང་ཞེས་གསུངས་པ་རེད།རྒྱུ་མཚན་ནི་སྔོན་བྱོནགྱི་སྐྱེས་བུ་དམ་པ་རྣམས་ཀྱི་གསུངས་རབ་དེ་གཟུངས་ཁྱད་པར་ཅན་དང་ཏིང་ངེ་འཛིན་གྱི་སྒོ་མང་པོས་བྱིན་གྱིས་བརླབས་པའི་གཟུངས་ཁྱད་པར་ཅན་ཞིག་ཡིན་པས་ན་བྱིན་རླབས་ཀྱི་སྒོ་ཡང་ཁྱདཔར་ཅན་འཇུག་ཐུབ་པ་རེད། དེ་ཡང་འཆང་བ་དག་ནི་སྟོན་དམ་ཀློག་ན་ཡང༌། །དེ་ཡི་རྣམ་པར་སྨིན་པའང་བསམ་མི་ཁྱབ། །ཅེས་གསུངས་པ་ལྟར་སྔོན་བྱོན་སྐྱེས་བུ་དམ་པ་རྣམས་དང་ཐམས་ཅད་མཁྱེན་པ་ཏཱ་ར་ནཱ་ཐའི་གསུངས་ཐམས་ཅད་གསུངས་ཁྱད་པར་ཅན་ཡིན་པ་དེ་བཀའ་བརྒྱུད་པའི་སིཏུ་པཎ་ཆེན་རིན་པོ་ཆེ་ཁོང་གིས་དབུས་གཙང་ཕྱོགས་སུ་ཕེབས་པའི་སྐབས་སུ་དབུས་གཙང་ཕྱོགས་ངེས་དོན་གྱི་བསྟན་པ་ཉམས་ཡོད་འདུག་རྒྱུ་མཚན་རྗེ་ཐམས་ཅད་མཁྱེན་པ་ཏཱ་ར་ནཱ་ཐ་ལྟ་བུའི་གསུངས་ཁྱད་པར་ཅན་གྱི་སྒྲ་ཙམ་ཡང་མི་འདུག་ཅེས་གསུངས་པ་ལྟར་ཐམས་ཅད་མཁྱེན་པ་ཏཱ་ར་ནཱ་ཐའི་གསུངས་རབ་ཐམས་ཅད་བྱིན་རླབས་ཀྱི་སྒོ་ཁྱད་པར་ཅན་ཡིན་པ་བཀའ་གདམས་གོང་མ་རྣམས་ཀྱིས་ཡང་ནས་ཡང་དུ་བསྔགས་བརྗོད་མཛད་པ་ལྟར་རེད།