མ་གྲུབ་པའི་གཏན་ཚིགས་བཤད་སྐབས་ཀྱི་དོགས་དཔྱོད།
མ་གྲུབ་པའི་གཏན་ཚིགས་བཤད་སྐབས་ཀྱི་དོགས་དཔྱོད།
རང་ལུགས་ལ་རྟགས་ལྟར་སྣང་གསུམ་འཆད་པའི་གོ་རིམ་ལ་དང་པོ་མ་གྲུབ་པའི་གཏན་ཚིགས་དང༌། དེའི་རྗེས་སུ་འགལ་མ་ངེས་པའི་གཏན་ཚིགས་གཉིས་བཤད་པ་ཡིན་པར་ཐལ། འདོད་ན། དེ་མི་འཐད་པར་ཐལ། འགལ་མ་ངེས་མ་གྲུབ་པའི་གཏན་ཚིགས་ཞེས་བགྲང་དགོས་པའི་ཕྱིར། དེར་ཐལ། གཏན་ཚིགས་དོན་བསྡུས་ལས། གཉིས་པ་རྟགས་ལྟར་ལ་དབྱེ་ན། འགལ་མ་ངེས་མ་གྲུབ་གསུམ་སྟེ། ཞེས་གསུངས་པའི་ཕྱིར། འདོད་ན། འགལ་མ་ངེས་མ་གྲུབ་པའི་གཏན་ཚིགས་ཞེས་བགྲང་བར་མི་འཐད་པར་ཐལ། མ་གྲུབ་པའི་གཏན་ཚིགས་དང༌། དེའི་རྗེས་སུ་འགལ་མ་ངེས་པའི་གཏན་ཚིགས་གཉིས་བཤད་པ་ཡིན་པའི་ཕྱིར། མ་གྲུབ་ན། མ་གྲུབ་པའི་གཏན་ཚིགས་དང༌། དེའི་རྗེས་སུ་འགལ་མ་ངེས་པའི་གཏན་ཚིགས་གཉིས་བཤད་པ་ཡིན་པར་ཐལ། རྟགས་རིགས་ལས། མ་གྲུབ་པའི་གཏན་ཚིགས་དང༌། འགལ་བའི་གཏན་ཚིགས་དང༌། མ་ངེས་པའི་གཏན་ཚིགས་དང་གསུམ། ཞེས་གསུངས་པའི་ཕྱིར་ན་གཏན་ཚིགས་དོན་བསྡུས་དངརྟགས་རིགས་གཉིས་ཀྱི་འཆད་པའི་གོ་རིམ་མི་འདྲ་བའི་རྒྱུ་མཚན་ལ་དཔྱད་དགོས་སོ། །༈ སྦྱོར་སྐོར་གང་རུང་གི་རྟགས་སུ་བཀོད་ཅིང༌། ཕྱོགས་ཆོས་མ་གྲུབ་པའི་གཏན་ཚིགས་དེ་སྦྱོར་སྐོར་གང་རུང་གི་མ་གྲུབ་པའི་གཏན་ཚིགས་ཀྱི་མཚན་ཉིད་ཡིན་པར་ཐལ། འདོད་ན། དེ་མ་ཡིན་པར་ཐལ། སྦྱོར་སྐོར་གང་རུང་གི་རྟགས་སུ་བཀོད་ཅིང༌། ཕྱོགས་ཆོས་མ་གྲུབ་པའི་གཏན་ཚིགས་རྟོགས་ན་མ་གྲུབ་པའི་གཏན་ཚིགས་རྟོགས་དགོས་པའི་ཕྱིར། དེར་ཐལ། སྦྱོར་སྐོར་གང་རུང་གི་རྟགས་སུ་བཀོད་ཅིང༌། ཕྱོགས་ཆོས་མ་གྲུབ་པའི་གཏན་ཚིགས་རྟོགས་ན་སྦྱོར་བ་དེ་སྒྲུབ་ཀྱི་ཕྱོགས་ཆོས་མ་གྲུབ་པ་རྟོགས་དགོས་པའི་ཕྱིར། ཁྱབ་སྟེ། སྦྱོར་བ་དེ་སྒྲུབ་ཀྱི་ཕྱོགས་ཆོས་མ་གྲུབ་པ་རྟོགས་ན་ཕྱོགས་ཆོས་རྟོགས་དགོས་པའི་ཕྱིར། མ་ཁྱབ་ན། ཁྱབ་པ་ཡོད་པར་ཐལ། ཕྱོགས་ཆོས་རྟོགས་ན་ཕྱོགས་ཆོས་ཀྱི་མཚན་ཉིད་ཟུར་གྱི་ཡོད་པ་སོགས་རྟོགས་པ་གང་ཞིག དེ་རྟོགས་པ་ལ་ཡོད་པའི་སེལ་བྱ་དོན་ལ་ལྟོས་ཏེ་མ་གྲུབ་པའི་གཏན་ཚིགས་རྟོགས་དགོས་པའི་ཕྱིར། རྟགས་སླ། གོང་གི་མ་ཁྱབ་མཚམས་ཀྱི་རྟགས་གྲུབ་སྟེ། སྤྱོད་འཇུག་ལས། བཏགས་པའི་དངོས་ལ་མ་རེགཔར། །དེ་ཡི་དངོས་མེད་འཛིན་མི་ནུས། །ཞེས་གསུངས་པའི་ཕྱིར་ན་དཔྱད། ༈ ཡང་ཁྱོད་ཀྱི་རྟགས་ཀྱིས་དེ་སྒྲུབ་ཀྱི་ཤེས་འདོད་ཆོས་ཅན་དེ་གཞི་མ་གྲུབ་ན་ཁྱོད་དེ་སྒྲུབ་ཀྱི་ཆོས་ཅན་གྱི་ངོ་བོ་མེད་ནས་མ་གྲུབ་པའི་གཏན་ཚིགས་ཡིན་པས་ཁྱབ་པར་ཐལ། རྣམ་འགྲེལ་ལས། མ་གྲུབ་སྦྱར་བ་བརྗོད་བྱ་མིན། །ཞེས་གསུངས་པའི་ཕྱིར། འདོད་ན། བདག་ཏུ་ཚད་མས་མ་དམིགས་པ་ཆོས་ཅན། ཁྱོད་རི་བོང་རྭ་བདག་མེད་དུ་སྒྲུབ་པའི་ཆོས་ཅན་གྱི་ངོ་བོ་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། ཁྱོད་ཀྱིས་རྟགས་ཀྱིས་རི་བོང་རྭ་བདག་མེད་དུ་སྒྲུབ་པའི་ཤེས་འདོད་ཆོས་ཅན་འགྲོ་རྒྱུ་མེད་པའི་ཕྱིར། འདོད་ན། བདག་ཏུ་ཚད་མས་མ་དམིགས་པ་ཆོས་ཅན། ཁྱོད་རི་བོང་རྭ་བདག་མེད་དུ་སྒྲུབ་པའི་ཆོས་ཅན་གྱི་ངོ་བོ་མེད་ནས་མ་གྲུབ་པའི་གཏན་ཚིགས་མ་ཡིན་པར་ཐལ། ཁྱོད་རི་བོང་རྭ་བདག་མེད་དུ་སྒྲུབ་པའི་གཏན་ཚིགས་ཡང་དག་ཡིན་པའི་ཕྱིར། དེར་ཐལ། དགག་རྟགས་ཡང་དག་ལ་ཤེས་འདོད་ཆོས་ཅན་གཞི་མ་གྲུབ་པ་བཟུང་ཡང་མ་གྲུབ་པའི་གཏན་ཚིགས་སུ་མི་འགྱུར་བའི་རྒྱུ་མཚན་ཡོད་པའི་ཕྱིར། དེར་ཐལ། རྣམ་འགྲེལ་ལེའུ་བཞི་བ་ལས། དེ་ལྟར་འདོད་པའི་བསྒྲུབ་བྱ་ལ། །གནོད་པ་འགའ་ཡང་མེད་པ་ཉིད། །གཉིས་ཀ་བསྒྲུབ་བྱ་ཉིད་ཡིན་ན། །ཆོས་ཅན་བསྒྲུབ་བྱ་ཉིད་ཡིན་ན། །ཆོས་ཅན་ལ་ནི་གནོད་པ་གང༌། །བསྒྲུབ་པར་བྱ་བས་ཆོས་འགོག་པས། །དེས་ནི་དེ་ལ་གནོད་ཅེས་བརྗོད། །ཅེས་དང༌། རྟགས་རིགས་ལས། དགག་རྟགས་ལ་ཆོས་ཅན་གཞི་མ་གྲུབ་པ་བཟུང་བ་ཡོད་དེ། ཞེས་གསུངས་པའི་ཕྱིར། འདོད་ན། སྦྱོར་བ་དེ་སྒྲུབ་ཀྱི་ཤེས་འདོད་ཆོས་ཅན་གཞི་མ་གྲུབ་ན་དེ་སྒྲུབ་ཀྱི་ཆོས་ཅན་གྱི་ངོ་བོ་མེད་ནས་མ་གྲུབ་པའི་གཏན་ཚིགས་ཡིན་མི་དགོས་པར་ཐལ། འདོད་མི་ནུས་ཏེ། རྣམ་འགྲེལ་ལས། མ་གྲུབ་སྦྱར་བ་བརྗོད་བྱ་མིན། །ཞེས་གསུངས་པའི་ཕྱིར་ན་མ་ཁྱབ། རང་ཉིད་ཡིན་ན་ཡོད་དགོས་པ་ཅན་གྱི་དངོས་པོར་གྱུར་པའི་སྒྲུབ་རྟགས་ཡང་དག་གི་ཤེས་འདོད་ཆོས་ཅན་གཞི་མ་གྲུབ་པ་བཟུང་ན་ཆོས་ཅན་གྱི་ངོ་བོ་མེད་ནས་མ་གྲུབ་པའི་གཏན་ཚིགས་སུ་འགྱུར་ཞེས་པའི་དོན་ཡིན་ཞེ་ན། འོ་ན་བྱས་པ་ཆོས་ཅན། ཁྱོད་ཀྱིས་རྟགས་ཀྱིས་དེ་སྒྲུབ་ཀྱི་ཤེས་འདོད་ཆོས་ཅན་ལ་གཞི་མ་གྲུབ་པ་བཟུང་ན་ཁྱོད་སྦྱོར་བ་དེ་ཆོས་ཅན་གྱི་ངོ་བོ་མེད་ནས་མ་གྲུབ་པའི་གཏན་ཚིགས་ཡིན་པས་ཁྱབ་པར་ཐལ། ཁྱོད་ཡིན་ན་ཡོད་དགོས་པ་ཅན་གྱི་དངོས་པོར་གྱུར་པའི་སྒྲུབ་རྟགས་ཡང་དག་ཡིན་པའི་ཕྱིར། འདོད་ན། བྱས་པ་ཆོས་ཅན། ཁྱོད་དངོས་པོ་ཁོ་ན་མི་རྟག་པར་སྒྲུབ་པའི་ཆོས་ཅན་གྱི་ངོ་བོ་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། ཁྱོད་ཀྱི་རྟགས་ཀྱིས་དངོས་པོ་ཁོ་ན་མི་རྟག་པར་སྒྲུབ་པའི་ཤེས་འདོད་ཆོས་ཅན་གཞི་མ་གྲུབ་པ་བཟུང་བ་གང་ཞིག ཁྱོད་ཡིན་ན་ཡོད་དགོས་པ་ཅན་གྱི་དངོས་པོར་གྱུར་པའི་སྒྲུབ་རྟགས་ཡང་དག་ཡིན་པའི་ཕྱིར། ཁྱབ་པ་ཁས། འདོད་ན། བྱས་པ་ཆོས་ཅན། ཁྱོད་དངོས་པོ་ཁོ་ན་མི་རྟག་པར་སྒྲུབ་པའི་ཆོས་ཅན་གྱི་ངོ་བོ་མེད་ནས་མ་གྲུབ་པའི་གཏན་ཚིགས་མ་ཡིན་པར་ཐལ། ཁྱོད་དངོས་པོ་ཁོ་ན་མི་རྟག་པར་སྒྲུབ་པའི་རྟགས་ཡང་དག་ཡིན་པའི་ཕྱིར། མ་གྲུབ་ན། དངོས་པོ་ཁོ་ན་མི་རྟག་པར་སྒྲུབ་པའི་རྟགས་ཡང་དག་མེད་པར་ཐལ། བྱས་པ་དངོས་པོ་ཁོ་ན་མི་རྟག་པར་སྒྲུབ་པའི་རྟགས་ཡང་དག་མ་ཡིན་པའི་རྒྱུ་མཚན་ཡོད་པའི་ཕྱིར། འདོད་མི་ནུས་ཏེ། དངོས་པོ་ཁོ་ན་མི་རྟག་པར་རྟོགས་པའི་རྗེས་དཔག་ཚད་མའི་རྟེན་དུ་གྱུར་པའི་གཏན་ཚིགས་ཡང་དག་ཡོད་པའི་ཕྱིར། དེར་ཐལ། དངོས་པོ་ཁོ་ན་མི་རྟག་པར་རྟོགས་པའི་རྗེས་དཔག་ཚད་མ་ཡོད་པའི་ཕྱིར། དེར་ཐལ། དངོས་པོ་ཁོ་ན་མི་རྟག་པ་ཡིན་པའི་ཕྱིར་ན་དཔྱད། ཡང་ན་ཤེས་འདོད་ཆོས་ཅན་གཞི་མ་གྲུབ་པ་བཟུང་ན་དེ་སྒྲུབ་ཀྱི་ཕྱོགས་ཆོས་མ་གྲུབ་དགོས་པར་ཐལ། ཚད་མ་མདོའི་རང་འགྲེལ་ལས། ཕྱོགས་ཀྱི་ཆོས་ནི་རྒོལ་བ་དང་ཕྱིར་རྒོལ་བ་གཉིས་ཀ་ལ་ངེས་པར་བཟུང་ངོ༌། །དེ་བཞིན་དུ་མཐུན་པའི་ཕྱོགས་ལ་ཡོད་པ་དང༌། མེད་པ་ཞེས་བྱ་བ་ལ་སོགས་པ་དག་ལ་ཡང༌། ཅི་རིགས་པར་བརྗོད་པར་བྱའོ། །ཞེས་ཅི་རིགས་པའི་དཔེ་དོན་སྦྱར་ཚུལ་ཡོདཔའི་ཕྱིར་ན་དཔྱད། ༈ ཡང་ཁ་ཅིག་དེ་སྒྲུབ་ཀྱི་དགག་རྟགས་ལ་ཤེས་འདོད་ཆོས་ཅན་གཞི་མ་གྲུབ་པ་བཟུང་བ་ཡོད་ཀྱང༌། སྒྲུབ་རྟགས་ཡང་དག་གིས་ཤེས་འདོད་ཆོས་ཅན་གཞི་མ་གྲུབ་པ་བཟུང་ན་ཕྱོགས་ཆོས་མ་གྲུབ་པས་ཁྱབ་ཟེར་ན། རྟོག་ཡུལ་ན་ཡོད་པ་ཆོས་ཅན། ཁྱོད་ཀྱི་རྟགས་ཀྱིས་རི་བོང་རྭ་ཟླ་སྒྲས་བརྗོད་རུང་དུ་སྒྲུབ་པའི་ཕྱོགས་ཆོས་མ་གྲུབ་པར་ཐལ། རྟོག་ཡུལ་ན་ཡོད་པ་དེ་རི་བོང་རྭ་ཟླ་སྒྲས་བརྗོད་རུང་དུ་སྒྲུབ་པའི་སྒྲུབ་རྟགས་ཡང་དག་གང་ཞིག དེ་སྒྲུབ་ཀྱི་ཤེས་འདོད་ཆོས་ཅན་གཞི་མ་གྲུབ་པ་བཟུང་བ་ཡིན་པའི་ཕྱིར། ཕྱི་མ་སླ། དང་པོ་མ་གྲུབ་ན། རྟོག་ཡུལ་ན་ཡོད་པ་ཆོས་ཅན། རི་བོང་རྭ་ཟླ་སྒྲས་བརྗོད་རུང་དུ་སྒྲུབ་པའི་སྒྲུབ་རྟགས་ཡང་དག་ཡིན་པར་ཐལ། རི་བོང་རྭ་ཟླ་སྒྲས་བརྗོད་རུང་དུ་སྒྲུབ་པའི་ཚུལ་གསུམ་གང་ཞིག དེ་སྒྲུབ་ཀྱི་བསྒྲུབ་བྱའི་ཆོས་སུ་བཟུང་རྒྱུ་དེ་སྒྲུབ་པ་ཡིན་པའི་ཕྱིར། ཕྱི་མ་གྲུབ་སྟེ། ཟླ་སྒྲས་བརྗོད་རུང་སྒྲུབ་པ་ཡིན་པའི་ཕྱིར། དེར་ཐལ། དངོས་མེད་དུ་གྱུར་པའི་སྒྲུབ་པ་ཡོད་པ་གང་ཞིག རིགས་པ་མཚུངས་པའི་ཕྱིར། དང་པོ་དེར་ཐལ། གཏན་ཚིགས་དོན་བསྡུས་ལས། དངོས་པོར་ཡོད་པའི་སྒྲུབ་པ་དང་མེད་པའི་སྒྲུབ་པ་གཉིས་སོ། །ཞེས་གསུངས་པའི་ཕྱིར། ཡང་འགའ་དངོས་པོར་གྱུར་པའི་སྒྲུབ་རྟགས་ཀྱི་ཤེས་འདོད་ཆོས་ཅན་གཞི་མ་གྲུབ་པ་བཟུང་ན་མ་གྲུབ་པའི་གཏན་ཚིགས་སུ་འགྱུར་དགོས་ཞེས་པའི་དོན་ཡིན་ཞེ་ན། རི་བོང་རྭ་ཆོས་ཅན། བདག་མེད་དུ་རྟོགས་པའི་ཚད་མ་དངོས་པོ་ཡིན་ཏེ། བདག་མེད་དུ་རྟོགས་པའི་ཚད་མ་དོན་བྱེད་ནུས་པ་ཡིན་པའི་ཕྱིར་ཞེས་པའི་སྦྱོར་བ་དེ་སྒྲུབ་ཀྱི་ཕྱོགས་ཆོས་མ་གྲུབ་པར་ཐལ། སྦྱོར་བ་དེ་སྒྲུབ་ཀྱི་རྟགས་ལ་དངོས་པོར་གྱུར་པའི་སྒྲུབ་རྟགས་བཀོད་པ་གང་ཞིག དེ་སྒྲུབ་ཀྱི་ཤེསའདོད་ཆོས་ཅན་གཞི་མ་གྲུབ་པ་བཟུང་བ་ཡིན་པའི་ཕྱིར་ན་དཔྱད། ༈ ཡང་དེ་སྒྲུབ་ཀྱི་ཤེས་འདོད་ཆོས་ཅན་གཞི་མ་གྲུབ་པ་བཟུང་ན་དེ་སྒྲུབ་ཀྱི་ཕྱོགས་ཆོས་མ་མ་གྲུབ་པས་མ་ཁྱབ་པར་ཐལ། འདོད་ན། ཁྱབ་པར་ཐལ། མ་ཁྱབ་པའི་སྐྱོན་མེད་པའི་ཕྱིར། མ་གྲུབ་ན། ཞོག་བྱས་པ་ལ་རི་བོང་རྭ་ཆོས་ཅན། བདག་མེད་ཡིན་ཏེ། བདག་ཏུ་ཚད་མས་མི་དམིགས་པ་ཡིན་པའི་ཕྱིར། ཞེས་པའི་སྦྱོར་བ་ཆོས་ཅན་ཟེར་ན། བདག་ཏུ་ཚད་མས་མ་དམིགས་པའི་རྟགས་ཀྱིས་རི་བོང་རྭ་བདག་མེད་དུ་སྒྲུབ་པའི་ཤེས་འདོད་ཆོས་ཅན་གཞི་མ་གྲུབ་པ་བཟུང་ཡང་དེ་སྒྲུབ་ཀྱི་ཕྱོགས་ཆོས་གྲུབ་པར་ཐལ། འདོད་མི་ནུས་ཏེ། བདག་ཏུ་ཚད་མས་མ་དམིགས་པའི་རྟགས་ཀྱིས་རི་བོང་རྭ་བདག་མེད་དུ་སྒྲུབ་པའི་ཤེས་འདོད་ཆོས་ཅན་གཞི་གྲུབ་པའི་ཕྱིར། དེར་ཐལ། བདག་ཏུ་ཚད་མས་མ་དམིགས་པའི་རྟགས་ཀྱིས་རི་བོང་རྭ་བདག་མེད་དུ་སྒྲུབ་པའི་ཤེས་འདོད་ཆོས་ཅན་དེ་ལ་རང་རྟེན་ཆོས་དང་ཆོས་ཅན་འབའ་ཞིག་པ་གཉིས་ཡོད་པའི་ཕྱིར། མ་གྲུབ་ན། དེ་ཡོད་པར་ཐལ། བདག་ཏུ་ཚད་མས་མ་དམིགས་པའི་རྟགས་ཀྱིས་རི་བོང་རྭ་བདག་མེད་དུ་སྒྲུབ་པའི་ཤེས་འདོད་ཆོས་ཅན་རང་རྟེན་ཆོས་ཅན་ཡོད་པ་གང་ཞིག དེ་སྒྲུབ་ཀྱི་ཆོས་ཅན་འབའ་ཞིག་པ་ཡོད་པའི་ཕྱིར། རྟགས་དང་པོ་མ་གྲུབ་ན། བདག་ཏུ་ཚད་མས་མ་དམིགས་པའི་རྟགས་ཀྱིས་རི་བོང་རྭ་བདག་མེད་དུ་སྒྲུབ་པའི་ཤེས་འདོད་ཆོས་ཅན་ལ་རང་རྟེན་ཆོས་ཅན་ཡོད་པར་ཐལ། བདག་ཏུ་ཚད་མས་མ་དམིགས་པའི་རྟགས་ཀྱིས་རི་བོང་རྭ་བདག་མེད་དུ་སྒྲུབ་པའི་ཤེས་འདོད་ཆོས་ཅན་དེ་ལ་རི་བོང་རྭའི་སྒྲ་དོན་འཇོག་པའི་ཕྱིར། མ་གྲུབ་ན། བདག་ཏུ་ཚད་མས་མ་དམིགས་པའི་རྟགས་ཀྱིས་རི་བོང་རྭ་བདག་མེད་དུ་སྒྲུབ་པའི་ཤེས་འདོད་ཆོས་ཅན་དེ་ལ་རི་བོང་རྭའི་སྒྲ་དོན་འཇོག་པར་ཐལ། ཚད་མས་མ་དམིགས་པའི་རྟགས་ཀྱིས་རི་བོང་རྭ་མེད་པར་སྒྲུབ་པའི་ཤེས་འདོད་ཆོས་ཅན་ལ་རི་བོང་རྭའི་སྒྲ་དོན་འཇོག་པའི་རྒྱུ་མཚན་ཡོད་པའི་ཕྱིར། དེར་ཐལ། མ་དམིགས་པའི་རྟགས་ཀྱིས་གཙོ་བོ་ཡོད་པ་མ་ཡིན་པར་སྒྲུབ་པའི་ཤེས་འདོད་ཆོས་ཅན་དེ་ལ་གཙོ་བོའི་སྒྲ་དོན་འཇོག་པ་གང་ཞིག རིགས་པ་མཚུངས་པའི་ཕྱིར། རྟགས་དང་པོ་གྲུབ་སྟེ། མདོའི་རང་འགྲེལ་ལས། གཙོ་བོ་ནི་ཡོད་པ་མ་ཡིན་ཏེ། མ་དམིགས་པའི་ཕྱིར། ཞེས་དང༌། རྣམ་འགྲེལ་ལས། སྒྲ་དོན་ཆོས་ནི་རྣམ་པ་གསུམ། །ཞེས་དང༌། འགྲེལ་བཤད་རིན་འཕྲེང་ལས། གཙོ་བོ་རང་མཚན་ཁོ་ན་ཆོས་ཅན་དུ་བྱས་པའི་ཆོས་མ་ཡིན་ཏེ། གཙོ་བོའི་སྒྲ་དོན་གྱི་ཆོས་སུ་ཕྱོགས་གླང་གིས་གསུངས་པས་སོ། །ཞེས་གསུངས་པའི་ཕྱིར་ན་འགའ་ཞིག་སློབ་དཔོན་གྱིས་བཀོད་པའི་གཙོ་བོ་ཆོས་ཅན། ཡོད་པ་མིན་ཏེ། མ་དམིགས་པའི་ཕྱིར་ཞེས་པའི་སྦྱོར་བའི་ཤེས་འདོད་ཆོས་ཅན་ལ་གཙོ་བོའི་སྒྲ་དོན་འཇོག་པ་ལས་གཞན་དག་ལ་མི་འཇོག་ཟེར་ན། འོ་ན་སློབ་དཔོན་གྱིས་བཀོད་པའི་གཙོ་བོ་ཆོས་ཅན། ཡོད་པ་མིན་ཏེ། མ་དམིགས་པའི་ཕྱིར་ཞེས་པའི་སྦྱོར་བའི་ཚུལ་གསུམ་མ་གྲུབ་པར་ཐལ། དེའི་ཤེས་འདོད་ཆོས་ཅན་ལ་གཙོ་བོའི་སྒྲ་དོན་འཇོག་པ་གང་ཞིག གཙོ་བོའི་སྒྲ་དོན་ཡོད་པ་ཡིན་པས་མ་དམིགས་པ་ཡིན་པར་གྲུབ་རྒྱུ་མེད་པའི་ཕྱིར་དང༌། དེ་མི་འཐད་པར་གཙོ་བོར་སྣང་བ་ཆོས་ཅན་དུ་འཇོག་པའི་རྒྱུ་མཚན་ནི་དབུ་མ་སྣང་བ་ལས། གཙོ་བོ་ཉིད་ཆོས་ཅན་དུ་བཟུང་ནས་དགག་དགོས་ཀྱི། དེ་མིན་ན་དེ་རྣམ་འགྱུར་སྣ་ཚོགས་ཀྱི་ཉེར་ལེན་ཡིན་པ་ཁེགས་ཀྱང༌། གཙོ་བོ་རང་ལྡོག་ནས་མི་ཁེགས་པར་འགྱུར་ལ། རྟགས་ཚད་མས་ངེས་པའི་གཞི་ནི་གཙོ་བོར་སྣང་བ་ཉིདལ་བཞེད་དོ། །ཞེས་གསུངས་པའི་ཕྱིར། ༈ དེ་སྒྲུབ་ཀྱི་རྟགས་ཀྱི་ངོ་བོ་མེད་ནས་མ་གྲུབ་པའི་གཏན་ཚིགས་ཡིན་པ་ལ་རྟགས་དེ་གཞི་མ་གྲུབ་པ་དང་རྩོད་གཞི་དེ་རྟགས་དེ་མ་ཡིན་པ་ཞིག་དགོས་ཟེར་ན། དངོས་པོ་ཁོ་ན་ཆོས་ཅན། བྱས་པ་ཁྱོད་མ་ཡིན་པར་ཐལ། བྱས་པ་མི་རྟག་པར་སྒྲུབ་པའི་རྟགས་ཀྱི་ངོ་བོ་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། མ་གྲུབ་ན། དངོས་པོ་ཁོ་ན་ཆོས་ཅན། ཁྱོད་བྱས་པ་མི་རྟག་པར་སྒྲུབ་པའི་རྟགས་ཀྱི་ངོ་བོ་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། ཁྱོད་བྱས་པ་མི་རྟག་པར་སྒྲུབ་པའི་མ་གྲུབ་པའི་གཏན་ཚིགས་གང་ཞིག དེ་སྒྲུབ་ཀྱི་རྟགས་ཀྱི་ངོ་བོ་མེད་ནས་མ་གྲུབ་པའི་གཏན་ཚིགས་ལས་གཞན་མ་གྲུབ་པའི་གཏན་ཚིགས་གང་ཡང་མ་ཡིན་པའི་ཕྱིར། འདོད་ན། གང་ཟག་གི་བདག་དེ་བྱས་པ་མི་རྟག་པར་སྒྲུབ་པའི་རྟགས་ཀྱི་ངོ་བོ་མེད་ནས་མ་གྲུབ་པའི་གཏན་ཚིགས་མ་ཡིན་པར་ཐལ། དངོས་པོ་ཁོ་ན་བྱས་པ་མི་རྟག་པར་སྒྲུབ་པའི་རྟགས་ཀྱི་ངོ་བོ་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། ཁྱབ་སྟེ། དངོས་པོ་ཁོ་ན་བྱས་པ་མི་རྟག་པར་སྒྲུབ་པའི་རྟགས་ཀྱི་ངོ་བོ་མེད་ནས་མ་གྲུབ་པའི་གཏན་ཚིགས་ཡིན་ཞེས་པའི་ཁོ་ནའི་ཚིག་ཕྲད་དེ་གཞན་ལྡན་རྣམ་གཅོད་ཀྱི་ཚིག་ཕྲད་ཡིན་པའི་ཕྱིར་དང༌། ཡང་ན་དངོས་པོ་ཁོ་ན་ཆོས་ཅན། བྱས་པ་ཁྱོད་མ་ཡིན་པར་ཐལ། ཁྱོད་བྱས་པ་མི་རྟག་པར་སྒྲུབ་པའི་རྟགས་ཀྱི་ངོ་བོ་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། ཁྱབ་སྟེ། རྟགས་ཀྱི་ངོ་བོ་མེད་ནས་མ་གྲུབ་པའི་གཏན་ཚིགས་ཡིན་པ་ལ་རྟགས་དེ་གཞི་མ་གྲུབ་པ་དང་རྩོད་གཞི་དེ་རྟགས་དེ་མ་ཡིན་པ་གཉིས་ཆར་གྱི་སྒོ་ནས་འཇོག་པ་ལས་རྟགས་དེ་གཞི་མ་གྲུབ་པ་ཙམ་གྱིས་འཇོག་མི་ཐུབ་པའི་ཕྱིར། མ་གྲུབ་ན། ཚད་མས་མ་དམིགས་པ་ཆོས་ཅན། ཁྱོད་རི་བོང་རྭ་བདག་མེད་དུ་སྒྲུབ་པའི་རྟགས་ཀྱི་ངོ་བོ་མེད་ནས་མ་གྲུབཔའི་གཏན་ཚིགས་ཡིན་པར་ཐལ། ཁྱོད་མེད་པ་ཡིན་པའི་ཕྱིར་ན་དཔྱད། ༈ ཡང་བདག་ཏུ་ཚད་མས་མ་དམིགས་པ་ཆོས་ཅན། རི་བོང་རྭ་བདག་མེད་དུ་སྒྲུབ་པའི་གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། ཁྱོད་ཀྱིས་རྟགས་ཀྱིས་རི་བོང་རྭ་བདག་མེད་དུ་སྒྲུབ་པའི་རྩོད་གཞི་དེ་རྟགས་དེ་དང་འབྲེལ་བ་མེད་པའི་ཕྱིར། དེར་ཐལ། རི་བོང་རྭ་བདག་ཏུ་ཚད་མས་མ་དམིགས་པ་དང་འབྲེལ་བ་མ་གྲུབ་པའི་ཕྱིར། མ་གྲུབ་ན། རི་བོང་རྭ་ཆོས་ཅན། བདག་ཏུ་ཚད་མས་མ་དམིགས་པ་དང་ཐ་དད་ཡིན་པར་ཐལ། བདག་ཏུ་ཚད་མས་མ་དམིགས་པ་དང་འབྲེལ་བ་ཡིན་པའི་ཕྱིར། འདོད་ན། རི་བོང་རྭ་ཆོས་ཅན། བདག་ཏུ་ཚད་མས་མ་དམིགས་པ་དང་སོ་སོ་བའི་ཆོས་ཡིན་པར་ཐལ། བདག་ཏུ་ཚད་མས་མ་དམིགས་པ་དང་ཐ་དད་ཡིན་པའི་ཕྱིར། འདོད་ན། རི་བོང་རྭ་ཆོས་ཅན། ཆོས་ཡིན་པར་ཐལ། བདག་ཏུ་ཚད་མས་མ་དམིགས་པ་དང་སོ་སོ་བའི་ཆོས་ཡིན་པའི་ཕྱིར། འདོད་མི་ནུས་ཏེ། གཏན་མེད་ཡིན་པའི་ཕྱིར། རྩ་བར་མ་ཁྱབ་སྟེ། སྦྱོར་སྐོར་གང་རུང་གི་གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་རྩོད་གཞི་དེ་རྟགས་དེ་དང་བདག་གཅིག་པ་དང་དེ་བྱུང་གི་འབྲེལ་བ་གང་རུང་གྲུབ་མིན་གྱིས་འཇོག་པ་མིན་པར་རྩོད་གཞི་དེ་རྟགས་དེ་ཡིན་མིན་གྱི་སྒོ་ནས་འཇོག་ཟེར་ན། འོ་ན་མིག་ཤེས་ཀྱི་གཟུང་བྱ་ཆོས་ཅན། སྒྲ་རྟག་པར་སྒྲུབ་པའི་གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། དེ་སྒྲུབ་ཀྱི་རྩོད་གཞི་སྒྲ་དེ་ཁྱོད་ཡིན་པར་མ་གྲུབ་པའི་ཕྱིར། འདོད་ན། མིག་ཤེས་ཀྱི་གཟུང་བྱ་ཆོས་ཅན། སྒྲ་རྟག་པར་སྒྲུབ་པའི་གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་མ་ཡིན་པར་ཐལ། སྒྲ་རྟག་པར་སྒྲུབ་པའི་རྒོལ་ཕྱི་རྒོལ་གཉིས་ཀ་ལ་ལྟོས་ཏེ་མ་གྲུབ་པའི་གཏན་ཚིགས་ཡིན་པའི་ཕྱིར། དེར་ཐལ། གཏན་ཚིགས་དོན་བསྡུས་ལས། གཉིས་ཀ་ལ་མ་གྲུབ་པ་ནི། སྒྲ་ཆོས་ཅན། རྟག་སྟེ། མིག་ཤེས་ཀྱི་བཟུང་བྱ་ཡིན་པས་སོ། །ཞེསགསུངས་པའི་ཕྱིར་ན་དཔྱད། ༈ ཡང་མིག་ཤེས་ཀྱི་གཟུང་བྱ་ཆོས་ཅན། ཁྱོད་སྒྲ་མི་རྟག་པར་སྒྲུབ་པའི་གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། འདོད་ན། མིག་ཤེས་ཀྱི་གཟུང་བྱ་ཆོས་ཅན། ཁྱོད་སྒྲ་མི་རྟག་པར་སྒྲུབ་པའི་གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་མ་ཡིན་པར་ཐལ། སྒྲ་ཁྱོད་ཡིན་པའི་ཕྱིར། མ་གྲུབ་ན། སྒྲ་ཆོས་ཅན། མིག་ཤེས་ཀྱི་གཟུང་བྱ་ཡིན་པར་ཐལ། སེམས་ཅན་གྱི་མིག་ཤེས་ཀྱི་གཟུང་བྱ་ཡིན་པ་གང་ཞིག སངས་རྒྱས་ཀྱི་མིག་ཤེས་ཀྱི་གཟུང་བྱ་ཡིན་པའི་ཕྱིར། དང་བོ་མ་གྲུབ་ན། སྒྲ་ཆོས་ཅན། སེམས་ཅན་གྱི་མིག་ཤེས་ཀྱི་གཟུང་བྱ་ཡིན་པར་ཐལ། བ་ལང་སྤྱོད་ཀྱི་མི་རྣམས་དང་འཛམ་བུ་གླིང་གི་མི་རྣམས་ཀྱི་མིག་ཤེས་ཀྱི་གཟུང་བྱ་ཡིན་པའི་ཕྱིར། དེ་ཡིན་པར་ཐལ། ཚད་ཆེན་ལས། སྦྲུལ་རྣམས་མིག་གིས་ཉན་པ་ཡིན། །དེ་ཡང་དེ་ལྟར་གྲགས་པ་ཡིན། །ཞེས་དང༌། མདོ་དྲན་པ་ཉེར་བཞག་ལས། འཛམ་བུ་གླིང་ན་སྦྲུལ་ཉིད་ཀྱི་མིག་གིས་སྒྲ་ཐོས་པ་དེ་བཞིན་དུ་བ་ལང་སྤྱོད་ན་མིག་ཉིད་ཀྱིས་ཐོས་པའོ། །ཞེས་གསུངས་པའི་ཕྱིར། གོང་གི་རྟགས་གཉིས་པ་སྟེ་སྒྲ་སངས་རྒྱས་ཀྱི་མིག་ཤེས་ཀྱི་གཟུང་བྱ་ཡིན་པ་རྟགས་མ་གྲུབ་ན། སྒྲ་ཆོས་ཅན། སངས་རྒྱས་ཀྱི་མིག་ཤེས་ཀྱི་གཟུང་བྱ་ཡིན་པར་ཐལ། གཞི་གྲུབ་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། མདོ་ལས། དེ་བཞིན་གཤེགས་པའི་སྤྱན་གྱིས་ཀྱང་ཆོས་ཐམས་ཅད་གཟིགས་སོ། །ཞེས་གསུངས་པའི་ཕྱིར། འདོད་མི་ནུས་ཏེ། མིག་ཤེས་གཟུང་བྱ་དེ་སྒྲ་མི་རྟག་པར་སྒྲུབ་པའི་གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། དེར་ཐལ། རྟགས་རིགས་ལས། གཉིས་པ་གཞི་རྟགས་ཀྱི་འབྲེལ་བ་མེད་ནས་མ་གྲུབ་པ་ནི། དཔེར་ན། མིག་ཤེས་ཀྱི་གཟུང་བྱ་དེ། སྒྲ་མི་རྟག་པར་སྒྲུབ་པར་བྱེད་པའི་གཞི་རྟགས་ཀྱི་འབྲེལ་བ་མེད་ནསམ་གྲུབ་པའི་གཏན་ཚིགས་ཡིན་པའོ། །ཞེས་གསུངས་པའི་ཕྱིར་ན་དཔྱད། ༈ ཡང་ཆོས་ཅན་གྱི་ཕྱོགས་གཅིག་ལ་རྟགས་དེ་ཡོད་ཀྱང༌། ཕྱོགས་གཅིག་ལ་རྟགས་དེ་མེད་ན་དེ་སྒྲུབ་ཀྱི་ཆོས་ཅན་གྱི་ཕྱོགས་གཅིག་ལ་རྟགས་མེད་ནས་མ་གྲུབ་པའི་གཏན་ཚིགས་ཡིན་པས་ཁྱབ་པར་ཐལ། འདོད་ན། སྒྲ་མི་རྟག་པར་སྒྲུབ་པའི་ཚུལ་གསུམ་ཡིན་པ་ཆོས་ཅན། ཁྱོད་བྱས་པ་སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་པར་སྒྲུབ་པའི་ཆོས་ཅན་གྱི་ཕྱོགས་གཅིག་ལ་རྟགས་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། ཁྱོད་དེ་སྒྲུབ་ཀྱི་ཤེས་འདོད་ཆོས་ཅན་བྱས་པའི་ཕྱོགས་གཅིག་ལ་ཡོད་ཀྱང༌། བྱས་པའི་ཕྱོགས་གཅིག་ལ་མེད་པའི་ཕྱིར། དེར་ཐལ། བྱས་པའི་ཕྱོགས་གཅིག་དངོས་པོ་དང་དོན་བྱེད་ནུས་པ་སོགས་ལ་ཡོད་ཀྱང༌། བྱས་པའི་ཕྱོགས་གཅིག་སྒྲ་དང་མི་རྟག་པ་སོགས་ལ་མེད་པའི་ཕྱིར། དང་པོ་གྲུབ་སྟེ། དངོས་པོ་དང་དོན་བྱེད་ནུས་པ་སོགས་སྒྲ་མི་རྟག་པར་སྒྲུབ་པའི་ཚུལ་གསུམ་ཡིན་པའི་ཕྱིར། གཉིས་པ་གྲུབ་སྟེ། སྒྲ་དང་མི་རྟག་པ་གཉིས་རེ་རེ་སྒྲ་མི་རྟག་པར་སྒྲུབ་པའི་ཚུལ་གསུམ་མ་ཡིན་པའི་ཕྱིར། གོང་དུ་འདོད་ན། སྒྲ་མི་རྟག་པར་སྒྲུབ་པའི་ཚུལ་གསུམ་ཡིན་པ་ཆོས་ཅན། བྱས་པ་སྒྲ་མི་རྟག་པར་སྒྲུབ་པར་བྱེད་པའི་རྟགས་ཡང་དག་ཡིན་པར་སྒྲུབ་པའི་ཕྱོགས་ཆོས་ཡིན་པར་ཐལ། བྱས་པ་སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་པར་སྒྲུབ་པར་བྱེད་པའི་རྟགས་ཡང་དག་ཡིན་པའི་ཕྱིར། མ་གྲུབ་ན། སྒྲ་མི་རྟག་པར་སྒྲུབ་པའི་ཚུལ་གསུམ་ཡིན་པ་དེ་བྱས་པ་སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་པར་སྒྲུབ་པར་བྱེད་པའི་རྟགས་ཡང་དག་ཡིན་པར་ཐལ། བྱས་པ་སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་པར་སྒྲུབ་པར་བྱེད་པའི་རྟགས་ཡང་དག་ཡོད་པའི་ཕྱིར་ན། ཆོས་ཅན་གྱི་ཕྱོགས་གཅིག་ལ་རྟགས་དེ་ཡོད་ཀྱང༌། ཕྱོགས་གཅིག་ལ་རྟགས་དེ་མེད་ན་དེ་སྒྲུབ་ཀྱི་ཆོས་ཅན་གྱི་ཕྱོགས་གཅིག་ལ་རྟགས་མེད་ནས་མ་གྲུབ་པའི་གཏན་ཚིགས་ཡིན་པར་མི་འཇོག་པར་ཆོས་ཅན་དེ་རྟགས་དེ་ཡིན་པར་མ་གྲུབ་པ་ཞིག་དགོས་ཤེ་ན། མཚན་མོ་ལོ་མ་འཁུམས་ནས་ཉལ་བ་ཆོས་ཅན། ལྗོན་ཤིང་སེམས་ལྡན་དུ་སྒྲུབ་པའི་ཆོས་ཅན་གྱི་ཕྱོགས་གཅིག་ལ་རྟགས་མེད་ནས་མ་གྲུབ་པའི་གཏན་ཚིགས་མ་ཡིན་པར་ཐལ། ལྗོན་ཤིང་སེམས་ལྡན་དུ་སྒྲུབ་པའི་ཆོས་ཅན་དེ་ཁྱོད་ཡིན་པར་གྲུབ་པའི་ཕྱིར། མ་གྲུབ་ན། མཚན་མོ་ལོ་མ་འཁུམས་ནས་ཉལ་བ་ཆོས་ཅན། ལྗོན་ཤིང་སེམས་ལྡན་དུ་སྒྲུབ་པའི་ཆོས་ཅན་དེ་ཁྱོད་ཡིན་པར་གྲུབ་པར་ཐལ། ལྗོན་ཤིང་སེམས་ལྡན་དུ་སྒྲུབ་པའི་ཆོས་ཅན་གྱི་སྟེང་དུ་འགོད་ཚུལ་དང་མཐུན་པར་གྲུབ་པའི་ཕྱིར། དེར་ཐལ། འབའ་མདའ་བླ་མའི་རྟགས་རིགས་རྩོམ་འཕྲོ་ལས། མཚན་མོ་ལོ་མ་འཁུམས་ནས་ཉལ་བའི་རྟགས་ཀྱིས་ལྗོན་ཤིང་སེམས་ལྡན་དུ་སྒྲུབ་པའི་རྟགས་དེ་ཆོས་ཅན་ལྗོན་ཤིང་གི་སྟེང་དུ་འགོད་ཚུལ་དང་མཐུན་པའང་ཡིན། ཞེས་གསུངསཔའི་ཕྱིར་རོ། །༈ ཡང་མཚན་མོ་ལོ་མ་འཁུམས་ནས་ཉལ་བ་དེ་ལྗོན་ཤིང་སེམས་ལྡན་དུ་སྒྲུབ་པའི་ཆོས་ཅན་གྱི་ཕྱོགས་གཅིག་ལ་རྟགས་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། འདོད་ན། མཚན་མོ་ལོ་མ་འཁུམས་ནས་ཉལ་བ་དེ་ལྗོན་ཤིང་སེམས་ལྡན་དུ་སྒྲུབ་པའི་ཆོས་ཅན་གྱི་ཕྱོགས་གཅིག་ལ་རྟགས་མེད་ནས་མ་གྲུབ་པའི་གཏན་ཚིགས་མ་ཡིན་པར་ཐལ། ལྗོན་ཤིང་ལ་མཚན་མོ་ལོ་མ་འཁུམས་ནས་ཉལ་མི་ཉལ་གཉིས་ཡོད་པས་མི་ཉལ་བ་ཁས་ལེན་ཐུབ་པ་དེ་མ་ཡིན་པའི་ཕྱིར། དེར་ཐལ། ལྗོན་ཤིང་དེ་མཚན་མོ་ལོ་མ་འཁུམས་ནས་ཉལ་བ་ཡིན་པའི་ཕྱིར། མ་གྲུབ་ན། ལྗོན་ཤིང་དེ་མཚན་མོ་ལོ་མ་འཁུམས་ནས་ཉལ་བ་ཡིན་པར་ཐལ། ལྗོན་ཤིང་ལ་མཚན་མོ་ལོ་མ་འཁུམས་ནས་ཉལ་བ་ཡོད་པའི་ཕྱིར། མ་ཁྱབ་ན། འོ་ན་ལྗོན་ཤིང་མཚན་མོ་ལོ་མ་འཁུམས་ནས་ཉལ་བ་ཡིན་ན་ལྗོན་ཤིང་ཡིན་ན་མཚན་མོ་ལོ་མ་འཁུམས་ནས་ཉལ་བ་ཡིན་པས་ཁྱབ་པར་ཐལ། འདོད་ན། མདུན་གྱི་དམ་བཅའ་བ་མཚན་མོ་ཉལ་བ་མ་ཡིན་པར་ཐལ། མདུན་གྱི་དམ་བཅའ་བཡིན་ན་མཚན་མོ་ཉལ་བས་མ་ཁྱབ་པའི་ཕྱིར་ན་དཔྱད། ༈ ཡང་ལྗོན་ཤིང་སེམས་ལྡན་མ་ཡིན་པར་ཐལ། འདོད་ན། ལྗོན་ཤིང་སེམས་ལྡན་ཡིན་པར་ཐལ། ལྗོན་ཤིང་ལ་སེམས་ཡོད་པའི་ཕྱིར། མ་གྲུབ་ན། ལྗོན་ཤིང་ལ་སེམས་ཡོད་པར་ཐལ། ལྗོན་ཤིང་ལ་ཚད་མ་ཡོད་པའི་རྒྱུ་མཚན་ཡོད་པའི་ཕྱིར། མ་གྲུབ་ན། ལྗོན་ཤིང་ལ་ཚད་མ་ཡོད་པར་ཐལ། བུམ་པ་ལ་ཚད་མ་ཡོད་པ་གང་ཞིག རིགས་པ་མཚུངས་པའི་ཕྱིར། དང་པོ་མ་གྲུབ་ན། བུམ་པ་ལ་ཚད་མ་ཡོད་པར་ཐལ། བུམ་པ་ལ་ཡོད་པར་རྟོགས་པའི་ཚད་མ་ཡོད་པའི་ཕྱིར། རྟགས་ཁྱབ་གཉིས་ཀ་གྲུབ་སྟེ། བསྡུས་གྲྭའི་སྤྱི་དོན་ལས། བུམ་པ་ལ་ཚད་མ་ཡོད་པ་གང་ཞིག དེ་ལ་རང་གི་གཞལ་བྱ་ལ་གསར་དུ་མི་བསླུ་བའི་རིག་པ་མེད་པའི་ཕྱིར། དང་པོ་གྲུབ་སྟེ། བུམ་པ་ལ་ཡོད་པར་རྟོགས་པའི་ཚད་མ་དང༌། དངོས་པོར་རྟོགས་པའི་ཚད་མ་ཡོད་པའི་ཕྱིར་ཏེ། རྣམ་མཁྱེན་ཡོད་པའི་ཕྱིར། ཞེས་གསུངས་པའི་ཕྱིར། འདོད་ན། ལྗོན་ཤིང་ལ་ཚད་མ་ཡོད་པར་ཐལ། འདོད་ན། ལྗོན་ཤིང་ལ་སེམས་ཡོད་པར་ཐལ། ལྗོན་ཤིང་ལ་ཚད་མ་ཡོད་པའི་རྒྱུ་མཚན་ཡོད་པའི་ཕྱིར་ན་དཔྱད། ༈ ཡང་རྩོལ་བྱུང་དེ་སྒྲ་མི་རྟག་པར་སྒྲུབ་པའི་ཆོས་ཅན་གྱི་ཕྱོགས་གཅིག་ལ་རྟགས་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། འདོད་ན། རྩོལ་བྱུང་དེ་སྒྲ་མི་རྟག་པར་སྒྲུབ་པའི་ཆོས་ཅན་གྱི་ཕྱོགས་གཅིག་ལ་རྟགས་མེད་ནས་མ་གྲུབ་པའི་གཏན་ཚིགས་མ་ཡིན་པར་ཐལ། རྩོལ་བྱུང་དེ་སྒྲ་མི་རྟག་པར་སྒྲུབ་པའི་གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། མ་ཁྱབ་ན། དེ་སྒྲུབ་ཀྱི་མ་གྲུབ་པའི་རྟགས་ལ་མ་གྲུབ་པའི་གཏན་ཚིགས་བཅུ་བཞིའམ་བཅོ་ལྔ་དབྱེ་བར་མི་འཐད་པར་ཐལ། ཆོས་ཅན་གྱི་ཕྱོགས་གཅིག་ལ་རྟགས་མེད་ནས་མ་གྲུབ་པའི་གཏན་ཚིགས་རྣམས་གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་སུ་འདུས་པའི་ཕྱིར། མ་ཁྱབ་མཚམས་ཀྱི་རྟགས་གྲུབ་སྟེ། སྒྲ་དེ་རྩོལ་བྱུང་ཡིན་པར་ཁས་ལེན་མི་ཐུབ་པའི་ཕྱིར། གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་ཞེས་པའི་གཞི་རྟགས་ཀྱི་འབྲེལ་བ་དེ་རྩོད་གཞི་དེ་རྟགས་དེ་ཡིན་པ་ཙམ་ལས་འབྲེལ་བ་མཚན་ཉིད་པ་ལ་མི་བྱེད་པའི་ཕྱིར་ན་དཔྱད། ༈ ཡང་རྩོལ་བྱུང་ཆོས་ཅན། སྒྲ་མི་རྟག་པར་སྒྲུབ་པའི་ཆོས་ཅན་གྱི་ཕྱོགས་གཅིག་ལ་རྟགས་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། འདོད་ན། རྩོལ་བྱུང་ཆོས་ཅན། སྒྲ་ཁྱོད་མ་ཡིན་པར་ཐལ། འདོད་ན། སྒྲ་ཆོས་ཅན། རྩོལ་བྱུང་ཡིན་པར་ཐལ། སྐྱེས་བུའི་རྩོལ་བ་ལས་བྱུང་བ་ཡིན་པའི་ཕྱིར། མ་གྲུབ་ན། སྒྲ་ཆོས་ཅན། སྐྱེས་བུའི་རྩོལ་བ་ལས་བྱུང་བ་ཡིན་པར་ཐལ། སྐྱེས་བུས་ལས་བསགས་པ་ལས་བྱུང་བ་ཡིན་པའི་ཕྱིར། མ་གྲུབ་ན། སྒྲ་སྐྱེས་བུས་ལས་བསགས་པ་ལས་བྱུང་བ་ཡིན་པར་ཐལ། འཇིག་རྟེན་གྱི་སྣོད་བཅུད་ཐམས་ཅད་སྐྱེས་བུས་ལས་བསགས་པ་ལས་བྱུང་བ་ཡིན་པའི་ཕྱིར། དེར་ཐལ། མཛོད་རྩ་བ་ལས། ལས་ལས་འཇིག་རྟེན་སྣ་ཚོགས་སྐྱེས། །ཞེས་དང༌། མཛོད་འགྲེལ་མངོན་པའི་རྒྱན་ལས། སྣོད་བཅུད་ཀྱི་འཇིག་རྟེན་སྣ་ཚོགས་པ་དེ་དག་སུས་བྱས་པ་ཡིན་སྙམ་ན། གཙོ་བོ་དང་དབང་ཕྱུག་སོགས་ཀྱིས་བྱས་པ་མ་ཡིན་གྱི། སེམས་ཅན་རྣམས་ཀྱི་ལས་དགེ་བ་དང་མི་དགེ་བ་སྣ་ཚོགས་ལས་སྣོད་བཅུད་ཀྱི་འཇིག་རྟེན་བཟང་ངན་སྣཚོགས་པ་འདི་སྐྱེས་པ་ཡིན་པས་སོ། །ཞེས་གསུངས་པའི་ཕྱིར་ན་དཔྱད། ༈ ཡང་རྩོལ་བྱུང་དེ་སྒྲ་མི་རྟག་པར་སྒྲུབ་པའི་ཆོས་ཅན་གྱི་ཕྱོགས་གཅིག་ལ་རྟགས་མེད་ནས་མ་གྲུབ་པའི་གཏན་ཚིགས་ཡིན་པའི་རྒྱུ་མཚན་དེ་སྒྲ་ལ་རྩོལ་བྱུང་ཡིན་མིན་གཉིས་ཡོད་པའི་རྒྱུ་མཚན་གྱིས་ཡིན་པར་ཐལ། འདོད་ན། རྩོལ་བྱུང་ཆོས་ཅན། ཁྱོད་བུམ་པ་མི་རྟག་པར་སྒྲུབ་པའི་ཆོས་ཅན་གྱི་ཕྱོགས་གཅིག་ལ་རྟགས་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། བུམ་པ་ལ་ཁྱོད་ཡིན་མིན་གཉིས་གྲུབ་པའི་ཕྱིར། དེར་ཐལ། བུམ་པ་ལ་རྩོལ་བྱུང་མ་ཡིན་པ་ཡོད་པའི་ཕྱིར། དེར་ཐལ། སངས་རྒྱས་ཚེ་དཔག་མེད་ཀྱི་བུམ་པ་དེ་ཡིན་པའི་ཕྱིར་དང༌། དེ་བཞིན་དུང་སྒྲ་དང་རྔ་སྒྲལའང་རྩོལ་བྱུང་མིན་པ་ཡོད་པའི་ཕྱིར་རོ། །༈ རྟོག་བྲལ་མ་འཁྲུལ་བའི་རིག་པ་དེ་ཟླ་བ་གཉིས་སྣང་གི་དབང་ཤེས་མངོན་སུམ་ཡིན་པར་སྒྲུབ་པའི་རྟགས་ཀྱི་ཕྱོགས་གཅིག་ལ་ཆོས་ཅན་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། འདོད་ན། ཟླ་བ་གཉིས་སྣང་གི་དབང་ཤེས་རྟོག་བྲལ་ཡིན་ཡང་མ་འཁྲུལ་བའི་རིག་པ་མ་ཡིན་པར་ཐལ། རྟོག་བྲལ་མ་འཁྲུལ་བའི་རིག་པ་དེ་ཟླ་བ་གཉིས་སྣང་གི་དབང་ཤེས་མངོན་སུམ་ཡིན་པར་སྒྲུབ་པའི་རྟགས་ཀྱི་ཕྱོགས་གཅིག་ལ་ཆོས་ཅན་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། འདོད་ན། ཟླ་བ་གཉིས་སྣང་གི་དབང་ཤེས་ཆོས་ཅན། རྟོག་མེད་འཁྲུལ་ཤེས་ཡིན་པར་ཐལ། འདོད་ན། ཟླ་བ་གཉིས་སྣང་གི་དབང་ཤེས་ཆོས་ཅན། ལོག་ཤེས་ཡིན་པར་ཐལ། རྟོག་མེད་འཁྲུལ་ཤེས་ཡིན་པའི་ཕྱིར། འདོད་མི་ནུས་ཏེ། ཟླ་བ་གཉིས་སྣང་གི་དབང་ཤེས་ཀྱི་འཛིན་སྟངས་ཀྱི་ཡུལ་ཡོད་པའི་ཕྱིར། དེར་ཐལ། ཟླ་བ་གཉིས་སྣང་གི་དབང་ཤེས་ཀྱི་འཛིན་སྟངས་ཡུལ་ཟླ་བ་གཉིས་འཇོག་པ་གང་ཞིག ཟླ་བ་གཉིས་ཡོད་པའི་ཕྱིར། དང་པོ་མ་གྲུབ་ན། ཟླ་བ་གཉིས་སྣང་གི་དབང་ཤེས་ཀྱི་འཛིན་སྟངས་ཡུལ་ལ་ཟླ་བ་གཉིས་འཇོག་པར་ཐལ། ཟླ་བ་གཉིས་འཛིན་པའི་དབང་ཤེས་ཀྱི་འཛིན་སྟངས་ཡུལ་ལ་ཟླ་བ་གཉིས་འཇོག་པའི་རྒྱུ་མཚན་ཡོད་པའི་ཕྱིར། དེར་ཐལ། བུམ་པ་གཉིས་འཛིན་པའི་དབང་ཤེས་ཀྱི་འཛིན་སྟངས་ཡུལ་བུམ་པ་གཉིས་འཇོག་པའི་ཕྱིར། རྟགས་གཉིས་པ་མ་གྲུབ་ན། ཟླ་བ་གཉིས་ཡོད་པར་ཐལ། ཟླ་བ་བཅུ་གཉིས་ཡོད་པའི་ཕྱིར། དེར་ཐལ། ལོ་གཅིག་ལ་ཟླ་བ་བཅུ་གཉིས་དང་ཞག་གི་དབང་དུ་བྱས་ན་ཞག་སྐོར་སུམ་བརྒྱ་དྲུག་ཅུཡོད་པའི་ཕྱིར་ན་དཔྱད། ༈ རྟོག་བྲལ་མ་འཁྲུལ་བའི་རིག་པ་དེ་ཟླ་བ་གཉིས་སྣང་གི་དབང་ཤེས་མངོན་སུམ་ཡིན་པར་སྒྲུབ་པའི་རྟགས་ཀྱི་ཕྱོགས་གཅིག་ལ་ཆོས་ཅན་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། འདོད་ན། ཟླ་བ་གཉིས་སྣང་གི་དབང་ཤེས་རྟོག་བྲལ་མ་འཁྲུལ་བའི་རིག་པ་མ་ཡིན་པར་ཐལ། རྟོག་བྲལ་མ་འཁྲུལ་བའི་རིག་པ་དེ་ཟླ་བ་གཉིས་སྣང་གི་དབང་ཤེས་མངོན་སུམ་ཡིན་པར་སྒྲུབ་པའི་རྟགས་ཀྱི་ཕྱོགས་གཅིག་ལ་ཆོས་ཅན་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། འདོད་ན། ཟླ་བ་གཉིས་སྣང་གི་དབང་ཤེས་ཆོས་ཅན། རྟོག་བྲལ་མ་འཁྲུལ་བའི་རིག་པ་ཡིན་པར་ཐལ། མངོན་སུམ་ཚད་མ་ཡིན་པའི་ཕྱིར། མ་གྲུབ་ན། ཟླ་བ་གཉིས་སྣང་གི་དབང་ཤེས་ཆོས་ཅན། མངོན་སུམ་ཚད་མ་ཡིན་པར་ཐལ། ཚད་མ་གང་ཞིག རྗེས་དཔག་ཚད་མ་ཡིན་པའི་ཕྱིར། ཕྱི་མ་སླ། དང་པོ་མ་གྲུབ་ན། ཟླ་བ་གཉིས་སྣང་གི་དབང་ཤེས་ཆོས་ཅན། ཚད་མ་ཡིན་པར་ཐལ། གསར་རྟོགས་ཀྱི་བློ་ཡིན་པའི་ཕྱིར། མ་གྲུབ་ན། ཟླ་བ་གཉིས་སྣང་གི་དབང་ཤེས་ཀྱིས་ཡུལ་མ་རྟོགས་པར་ཐལ། འདོད་ན། ཟླ་བ་གཉིས་སྣང་གི་དབང་ཤེས་ཀྱིས་ཟླ་བའི་ཁ་དོག་མ་རྟོགས་པར་ཐལ། འདོད་ན། དུང་སེར་སྣང་གི་དབང་ཤེས་ཀྱིས་དུང་གི་དབྱིབས་མ་རྟོགས་པར་ཐལ། ཟླ་བ་གཉིས་སྣང་གི་དབང་ཤེས་ཀྱིས་ཟླ་བའི་ཁ་དོག་མ་རྟོགས་པའི་རྒྱུ་མཚན་ཡོད་པའི་ཕྱིར། འདོད་མི་ནུས་ཏེ། དུང་སེར་སྣང་གི་དབང་ཤེས་དུང་གི་དབྱིབས་ལ་མ་འཁྲུལ་བས་འདོད་པའི་དོན་ཐོབ་པར་སློབ་དཔོན་རྒྱལ་དབང་བློས་བཞེད་པའི་ཕྱིར། དེར་ཐལ། དེས་མཛད་པའི་འགྲེལ་བ་ལས། དེ་ལྟ་མོད་ཀྱང་སེར་པོ་ལ་འཁྲུལ་དབྱིབས་ལ་མ་འཁྲུལ་བས་འདོད་པས་དོན་ཐོབ་པའི་ཕྱིར། མངོན་སུམ་ཉིད་དུ་རྣམ་པར་བཞག་སྟེ། ཞེས་གསུངས་པའི་ཕྱིར། རིགས་པས་ཀྱང་གྲུབ་སྟེ། མོ་ཊ་དང་གྲུ་སོགས་སུ་ཞུགས་ཏེ་འགྲོ་བ་ན་ལམ་ཁར་ཡོད་པའི་ལྗོན་ཤིང་དང་ཁང་པ་སོགས་འགྲོ་བར་སྣང་ཡང༌། དེ་དག་གི་ཁ་དོག་གང་ཡིན་སོགས་རྟོགས་ཐུབ་པ་མངོན་སུམ་གྱིས་གྲུབ་པའི་ཕྱིར་ན་དཔྱད། ༈ ཡང་མངོན་སུམ་ཡིན་ན་རྟོག་བྲལ་མ་འཁྲུལ་བའི་རིག་པ་ཡིན་པས་ཁྱབ་པར་ཐལ། སྤྱིར་རྟོག་བྲལ་མ་འཁྲུལ་བ་རིག་པ་དེ་སྔོ་འཛིན་དབང་མངོན་དེ་མངོན་སུམ་ཡིན་པར་སྒྲུབ་པའི་རྟགས་ཡང་དག་ཡིན་ཡང་ཟླ་བ་གཉིས་སྣང་གི་དབང་ཤེས་མངོན་སུམ་ཡིན་པར་སྒྲུབ་པའི་རྟགས་ཀྱི་ཕྱོགས་གཅིག་ལ་ཆོས་ཅན་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། འདོད་ན། སྔོ་འཛིན་དབང་མངོན་ཆོས་ཅན། རྟོག་བྲལ་མ་འཁྲུལ་བའི་རིག་པ་ཡིན་པར་ཐལ། འདོད་ན། སྔོ་འཛིན་དབང་མངོན་ཆོས་ཅན། མ་འཁྲུལ་བའི་རིག་པ་ཡིན་པར་ཐལ། རྟོག་བྲལ་མ་འཁྲུལ་བའི་རིག་པ་ཡིན་པའི་ཕྱིར། འདོད་ན། སྔོ་འཛིན་དབང་མངོན་ཆོས་ཅན། མ་འཁྲུལ་བའི་རིག་པ་མ་ཡིན་པར་ཐལ། འཁྲུལ་བའི་རིག་པ་ཡིན་པའི་ཕྱིར། དེར་ཐལ། ཀུན་རྫོབ་སྣང་བའི་ཕྱིར། ཁྱབ་སྟེ། བདེན་གཉིས་གསལ་བའི་ཉི་མ་སོགས་ལས་རྣམ་མཁྱེན་ལ་ཀུན་རྫོབ་ཀྱི་ཆོས་རྣམས་མི་སྣང་བ་སྒྲུབ་ཚུལ་ཡོད་པའི་ཕྱིར་དང༌། ཡང་ན་སྔོ་འཛིན་དབང་མངོན་ཆོས་ཅན། འཁྲུལ་བའི་རིག་པ་ཡིན་པར་ཐལ། ཕྱི་རོལ་དོན་དུ་གྲུབ་པར་སྣང་བའི་ཕྱིར། དེར་ཐལ། རང་ལུགས་ལ་སྔོན་འཛིན་དབང་མངོན་སོགས་ལ་ཕྱི་དོན་སྣང་བའི་རྒྱུ་མཚན་གྱིས་མངོན་སུམ་གྱི་མཚན་ཉིད་ལ། རྟོག་བྲལ་མ་འཁྲུལ་བའི་རིག་པ་ཙམ་གྱིས་མི་ཆོག་པར་རྟོག་པ་དང་བྲལ་ཞིང་འཕྲལ་རྐྱེན་གྱིས་མ་འཁྲུལ་བའི་གསར་དུ་མི་བསླུ་བའི་ཤེས་པ་དེ་འཇོག་དགོས་པའི་ཕྱིར། དེར་ཐལ། ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་ལས། མངོན་སུམ་ཚད་མ་དང༌། རྗེས་དཔག་ཚད་གཉིས། དེ་གཉིས་ཀའི་མཚན་ཉིད་རིམ་བཞིན། རྟོག་པ་དང་བྲལ་ཞིང་འཕྲལ་རྐྱེན་གྱིས་མ་འཁྲུལ་བའི་གསར་དུ་མིབསླུ་བའི་ཤེས་པ་དང༌། ཞེས་གསུངས་པའི་ཕྱིར་ན་དཔྱད། ༈ དེ་སྒྲུབ་ཀྱི་གཞི་རྟགས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་ན་དེ་སྒྲུབ་ཀྱི་རྩོད་གཞི་དང་རྟགས་གཉིས་ཀར་ཆོས་གཅིག་བཀོད་པས་ཁྱབ་པར་ཐལ། འདོད་ན། ཀ་བུམ་གཉིས་ཆོས་ཅན། ཀ་བུམ་གཉིས་མི་རྟག་པར་སྒྲུབ་པའི་གཞི་རྟགས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། འདོད་ན། ཀ་བུམ་གཉིས་ཆོས་ཅན། ཀ་བུམ་གཉིས་མི་རྟག་པར་སྒྲུབ་པའི་གཞི་རྟགས་ཐ་དད་མེད་ནས་མ་གྲུབ་པའི་གཏན་ཚིགས་མ་ཡིན་པར་ཐལ། ཁྱོད་ཀྱི་རྟགས་ཀྱིས་ཀ་བུམ་གཉིས་མི་རྟག་པར་སྒྲུབ་པའི་རྩོད་གཞི་དང་རྟགས་གཉིས་ཀར་ཆོས་གཅིག་བཀོད་པ་མ་ཡིན་པའི་ཕྱིར། དེར་ཐལ། དེ་སྒྲུབ་ཀྱི་རྩོད་གཞིར་ཆོས་གཅིག་མ་བཀོད་པའི་ཕྱིར། མ་གྲུབ་ན། ཀ་བུམ་གཉིས་ཆོས་ཅན། ཁྱོད་ཀྱི་རྟགས་ཀྱིས་ཀ་བུམ་གཉིས་མི་རྟག་པར་སྒྲུབ་པའི་རྩོད་གཞིར་ཆོས་གཅིག་བཀོད་པ་མ་ཡིན་པར་ཐལ། ཁྱོད་ཀྱི་རྟགས་ཀྱིས་ཀ་བུམ་གཉིས་མི་རྟག་པར་སྒྲུབ་པའི་རྩོད་གཞིར་ཀ་བུམ་གཉིས་འཇོག་དགོས་པ་གང་ཞིག ཀ་བུམ་གཉིས་ཆོས་གཅིག་མ་ཡིན་པའི་ཕྱིར། རྟགས་སླ། འདོད་ན། ཀ་བུམ་གཉིས་ཆོས་ཅན། ཁྱོད་ཀྱི་རྟགས་ཀྱིས་ཀ་བུམ་གཉིས་མི་རྟག་པར་སྒྲུབ་པའི་རྩོད་གཞིར་ཆོས་གཅིག་བཀོད་པ་ཡིན་པར་ཐལ། ཁྱོད་ཀ་བུམ་གཉིས་མི་རྟག་པར་སྒྲུབ་པའི་གཞི་རྟགས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། ཁྱབ་སྟེ། དེ་སྒྲུབ་ཀྱི་གཞི་རྟགས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པ་ལ་དེ་སྒྲུབ་ཀྱི་རྩོད་གཞི་དང་རྟགས་གཉིས་ཀར་ཆོས་གཅིག་བཀོད་པ་ཞིག་དགོས་པའི་ཕྱིར། དེར་ཐལ། རྣམ་འགྲེལ་ལས། ཆོས་ཅན་གཏན་ཚིགས་དངོས་གྱུར་ནི། །ཤེས་བྱེད་ཉིད་དུ་མ་གྲུབ་ཕྱིར། །ཞེས་གསུངས་པའི་ཕྱིར། ཀ་བུམ་གཉིས་ཆོས་ཅན། ཁྱོད་ཀ་བུམ་གཉིས་མི་རྟག་པར་གཞི་རྟགས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། ཁྱོད་ཁྱོད་ཀྱི་རྟགས་ཀྱིས་ཀ་བུམ་གཉིས་མི་རྟག་པར་སྒྲུབ་པའི་གཞི་རྟགས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། མ་གྲུབ་ན། ཀ་བུམ་གཉིས་ཆོས་ཅན། ཁྱོད་ཁྱོད་ཀྱི་རྟགས་ཀྱིས་ཁྱོད་མི་རྟག་པར་སྒྲུབ་པའི་གཞི་རྟགས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། ཁྱོད་བདག་མེད་ཡིན་པའི་ཕྱིར། ཁྱབ་སྟེ། རྟགས་རིགས་མཐའ་དཔྱོད་ལས། ཁྱོད་ཁྱོད་ཀྱི་རྟགས་ཀྱིས་ཁྱོད་མི་རྟག་པར་སྒྲུབ་པར་བྱེད་པའི་གཞི་རྟགས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། ཁྱོད་བདགམེད་ཡིན་པའི་ཕྱིར། ཞེས་གསུངས་པའི་ཕྱིར་ན་དཔྱད། ༈ མི་རྟག་པ་ཆོས་ཅན། སྒྲ་མི་རྟག་པར་སྒྲུབ་པའི་རྟགས་ཆོས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། འདོད་ན། སྦྱོར་བ་དེ་སྒྲུབ་ཀྱི་རྟགས་དང་བསྒྲུབ་བྱའི་ཆོས་གཉིས་ཀར་ཆོས་གཅིག་བཀོད་ན་རྟགས་ཆོས་ཐ་དད་མེད་ནས་མ་གྲུབ་པའི་གཏན་ཚིགས་སུ་འགྱུར་བས་ཁྱབ་པར་ཐལ། འདོད་ན། བྱས་པ་ཆོས་ཅན། རྟགས་ཆོས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། སྦྱོར་བ་དེ་སྒྲུབ་ཀྱི་རྟགས་དང་བསྒྲུབ་བྱའི་ཆོས་གཉིས་ཀར་ཁྱོད་བཀོད་པ་ཡིན་པའི་ཕྱིར། དེར་ཐལ། སྦྱོར་བ་དེ་སྒྲུབ་ཀྱི་རྟགས་སུ་བཀོད་པ་གང་ཞིག སྦྱོར་བ་དེ་སྒྲུབ་ཀྱི་བསྒྲུབ་བྱའི་ཆོས་སུའང་བཀོད་པའི་ཕྱིར། རྟགས་རེ་རེ་ནས་གྲུབ་སྟེ། བདག་མེད་ཡིནཔའི་ཕྱིར། ༈ ཡང་མི་རྟག་པ་ཆོས་ཅན། སྒྲ་མི་རྟག་པར་སྒྲུབ་པའི་རྟགས་ཆོས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། འདོད་ན། སྒྲ་ཆོས་ཅན། མི་རྟག་པ་ཡིན་ཏེ། མི་རྟག་པ་ཡིན་པའི་ཕྱིར་ཞེས་པའི་སྦྱོར་བའི་རྟགས་ཆོས་གཉིས་ཐ་དད་ནས་མེད་པར་ཐལ། མི་རྟག་པ་དེ་སྒྲ་མི་རྟག་པར་སྒྲུབ་པའི་རྟགས་ཆོས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། འདོད་ན། སྒྲ་ཆོས་ཅན། མི་རྟག་པ་ཡིན་པར་ཐལ། མི་རྟག་པ་ཡིན་པའི་ཕྱིར་ཞེས་པའི་ཐལ་འགྱུར་གྱི་རྟགས་ཆོས་གཉིས་ཐ་དད་ནས་མེད་པར་ཐལ། སྒྲ་ཆོས་ཅན། མི་རྟག་པ་ཡིན་ཏེ། མི་རྟག་པ་ཡིན་པའི་ཕྱིར་ཞེས་པའི་སྦྱོར་བའི་རྟགས་ཆོས་གཉིས་ཐ་དད་ནས་མེད་པའི་རྒྱུ་མཚན་ཡོད་པའི་ཕྱིར། རྟགས་ཁས། འདོད་ན། སྒྲ་ཆོས་ཅན། མི་རྟག་པ་ཡིན་པར་ཐལ། མི་རྟག་པ་ཡིན་པའི་ཕྱིར་ཞེས་པའི་ཐལ་འགྱུར་གྱི་རྟགས་གསལ་གཉིས་ཐ་མི་དད་ཡིན་པར་ཐལ། སྒྲ་ཆོས་ཅན། མི་རྟག་པ་ཡིན་པར་ཐལ། མི་རྟག་པ་ཡིན་པའི་ཕྱིར་ཞེས་པའི་ཐལ་འགྱུར་གྱི་རྟགས་ཆོས་གཉིས་ཐ་དད་ནས་མེད་པའི་ཕྱིར། འདོད་ན། སྒྲ་ཆོས་ཅན། མི་རྟག་པ་ཡིན་པར་ཐལ། མི་རྟག་པ་ཡིན་པའི་ཕྱིར་ཞེས་པའི་ཐལ་འགྱུར་གྱི་རྟགས་གསལ་གཉིས་ཐ་མི་དད་མ་ཡིན་པར་ཐལ། སྒྲ་ཆོས་ཅན། མི་རྟག་པ་ཡིན་པར་ཐལ། མི་རྟག་པ་ཡིན་པའི་ཕྱིར་ཞེས་པའི་ཐལ་འགྱུར་གྱི་རྟགས་གསལ་གཉིས་ཕན་ཚུན་ཐ་དད་ཡིན་པའི་ཕྱིར། མ་གྲུབ་ན། སྒྲ་ཆོས་ཅན། མི་རྟག་པ་ཡིན་པར་ཐལ། མི་རྟག་པ་ཡིན་པའི་ཕྱིར་ཞེས་པའི་ཐལ་འགྱུར་གྱི་རྟགས་གསལ་གཉིས་ཕན་ཚུན་ཐ་དད་ཡིན་པར་ཐལ། རྟག་པ་ཡིན་པར་ཐལ། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་གྱི་རྟགས་གསལ་གཉིས་ཀ་ཕན་ཚུན་ཐ་དད་ཡིན་པ་གང་ཞིག རིགས་པ་མཚུངས་པའི་ཕྱིར། རྟགས་དང་པོ་གྲུབ་སྟེ། ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་ལས། རྟག་པ་ཡིན་པར་ཐལ། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་རྟགས་གསལ་གཉིས་ཀ་ཐ་མི་དད་མ་ཡིན་པར་ཐལ། ཁྱོད་ཀྱིརྟགས་གསལ་གཉིས་ཀ་ཕན་ཚུན་ཐ་དད་ཡིན་པའི་ཕྱིར། ཞེས་གསུངས་པའི་ཕྱིར་ན་དཔྱད། ༈ ཡང་མི་རྟག་པ་དེ་སྒྲ་མི་རྟག་པར་སྒྲུབ་པའི་རྟགས་ཆོས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། འདོད་ན། མི་རྟག་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཆོས་ཐ་དད་ནས་མེད་པར་ཐལ། མི་རྟག་པ་དེ་སྒྲ་མི་རྟག་པར་སྒྲུབ་པའི་རྟགས་ཆོས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པའི་གཏན་ཚིགས་ཡིན་པའི་ཕྱིར། འདོད་ན། མི་རྟག་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཆོས་ཐ་དད་མ་ཡིན་པར་ཐལ། མི་རྟག་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཆོས་ཐ་དད་ནས་མེད་པའི་ཕྱིར། འདོད་མི་ནུས་ཏེ། མི་རྟག་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཆོས་ཐ་དད་ཡིན་པའི་ཕྱིར། དེར་ཐལ། མི་རྟག་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཆོས་གཉིས་དངོས་མིང་སོ་སོ་བའི་གོ་བྱ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། གཅིག་ཡིན་ན་མིང་ཡང་གཅིག་ཡིན་དགོས་པའི་ཕྱིར། དེར་ཐལ། གཏན་ཚིགས་དོན་བསྡུས་ལས། གཅིག་དང་ཐ་དད་ལ་མཚན་ཉིད་ནི་རིམ་པ་ལྟར། ཆོས་གང་མིང་གཅིག་ལ་བརྟེན་ནས་དོན་སྤྱི་གཅིག་ཏུ་འཆར་དུ་རུང་བ་དང༌། ཞེས་གསུངས་པའི་ཕྱིར། མ་ཁྱབ་མཚམས་ཀྱི་རྟགས་གྲུབ་སྟེ། མི་རྟག་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཞེས་པའི་བརྗོད་པའི་སྒྲ་དང༌། མི་རྟག་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་བསྒྲུབ་ཆོས་ཞེས་བརྗོད་པའི་སྒྲ་གཉིས་སོ་སོ་བ་ཡིན་པ་རྣ་ཤེས་ཚད་མས་མངོན་སུམ་གྱིས་གྲུབ་པའི་ཕྱིར་དང༌། ཡང་ན་མི་རྟག་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཆོས་གཉིས་དངོས་མིང་སོ་སོ་བ་ཡིན་པར་ཐལ། མི་རྟག་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཞེས་པའི་བརྗོད་པའི་སྒྲ་དེ་མི་རྟག་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཀྱི་དངོས་མིང་ལས་གཞན་གྱི་དངོས་མིང་མིན་པ་དང༌། མི་རྟག་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་བསྒྲུབ་ཆོས་ཞེས་བརྗོད་པའི་སྒྲ་དེ་མི་རྟག་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་བསྒྲུབ་ཆོས་ཀྱི་དངོས་མིང་ཡིན་པ་ལས་གཞན་གྱི་དངོས་མིང་མ་ཡིན་པའི་ཕྱིར། འདོད་ན། མི་རྟག་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཆོས་གཉིས་ཐ་དད་ཡིན་པར་ཐལ། འདོད་ན། མི་རྟག་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཆོས་ཐ་དད་ནས་ཡོད་པར་ཐལ། མི་རྟག་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཆོས་ཐ་དད་གཉིས་ཐ་དད་ཡིན་པའི་ཕྱིར། འདོད་ན། མི་རྟག་པ་ཆོས་ཅན། སྒྲ་མི་རྟག་པར་སྒྲུབ་པའི་རྟགས་ཆོས་ཐ་དད་མེད་ནས་མ་གྲུབ་པའི་གཏན་ཚིགས་མ་ཡིན་པར་ཐལ། ཁྱོད་ཀྱི་རྟགས་ཀྱིས་སྒྲ་མི་རྟག་པར་སྒྲུབ་པའི་རྟགས་ཆོས་ཐ་དད་ནས་ཡོད་པའི་ཕྱིར། འདོད་མི་ནུས་ཏེ། རྟགས་རིགས་ལས། དང་པོ་རྟགས་ཆོས་ཐ་དད་མེད་ནས་མ་གྲུབ་པ་ནི། དཔེར་ན། མི་རྟག་པ་དེ་སྒྲ་མི་རྟག་པར་སྒྲུབ་པར་བྱེད་པའི་རྟགས་ཆོས་ཐ་དད་མེད་ནས་མགྲུབ་པའི་གཏན་ཚིགས་ཡིན་པའོ། །ཞེས་གསུངས་པའི་ཕྱིར་ན་དཔྱད། ༈ ཡང་ཐ་དད་མེད་ནས་མ་གྲུབ་པའི་གཏན་ཚིགས་གསུམ་པོ་དོན་ལ་ལྟོས་ནས་མ་གྲུབ་པའི་གཏན་ཚིགས་ཡིན་པར་ཐལ། དོན་ལ་ལྟོས་ནས་མ་གྲུབ་པའི་གཏན་ཚིགས་བརྒྱད་འདྲེན་པའི་སྐབས་སུ་དེ་གསུམ་རེ་རེ་ནས་བགྲང་བའི་ཕྱིར། འདོད་ན། མི་རྟག་པ་ཆོས་ཅན། ཁྱོད་སྒྲ་མི་རྟག་པར་སྒྲུབ་པར་བྱེད་པའི་དོན་ལ་ལྟོས་ནས་མ་གྲུབ་པའི་གཏན་ཚིགས་ཡིན་པར་ཐལ། ཁྱོད་སྒྲ་མི་རྟག་པར་སྒྲུབ་པར་བྱེད་པའི་རྟགས་ཆོས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། འདོད་ན། མི་རྟག་པ་ཆོས་ཅན། ཁྱོད་སྒྲ་མི་རྟག་པར་སྒྲུབ་པར་བྱེད་པའི་དོན་ལ་ལྟོས་ཏེ་མ་གྲུབ་པའི་གཏན་ཚིགས་མ་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་བློ་ལ་ལྟོས་ནས་མ་གྲུབ་པའི་གཏན་ཚིགས་ཡིན་པའི་ཕྱིར། མ་གྲུབ་ན། མི་རྟག་པ་ཆོས་ཅན། ཁྱོད་སྒྲ་མི་རྟག་པར་སྒྲུབ་པར་བྱེད་པའི་བློ་ལ་ལྟོས་ནས་མ་གྲུབ་པའི་གཏན་ཚིགས་ཡིན་པར་ཐལ། ཁྱོད་སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། ཁྱབ་སྟེ། ཤེས་འདོད་མེད་ནས་མ་གྲུབ་པའི་གཏན་ཚིགས་དེ་བློ་ལ་ལྟོས་ནས་མ་གྲུབ་པའི་རྟགས་ཀྱི་དབྱེ་བ་ཡིན་པའི་ཕྱིར། དེར་ཐལ། རྟགས་རིགས་ལས། བློ་ལ་ལྟོས་ནས་མ་གྲུབ་པའི་གཏན་ཚིགས་ལ། ཤེས་འདོད་མེད་ནས་མ་གྲུབ་པ་དང༌། ཐེ་ཚོམ་ཟ་ནས་མ་གྲུབ་པའི་གཏན་ཚིགས་དང་གཉིས། ཞེས་གསུངས་པའི་ཕྱིར། འདོད་ན། མི་རྟག་པ་ཆོས་ཅན། ཁྱོད་སྒྲ་མི་རྟག་པར་སྒྲུབ་པར་བྱེད་པའི་དོན་སྟེང་ནས་ཕྱོགས་ཆོས་མ་གྲུབ་པའི་གནད་ཀྱིས་མ་ཡིན་པར་སྐབས་བབ་ཀྱི་རྒོལ་བའི་བློ་སྐྱོན་དབང་གིས་སྒྲ་མི་རྟག་པར་སྒྲུབ་པའི་ཕྱོགས་ཆོས་མ་གྲུབ་པའི་གཏན་ཚིགས་སུ་སོང་བ་ཡིན་པར་ཐལ། ཁྱོད་སྒྲ་མི་རྟག་པར་སྒྲུབ་པར་བྱེད་པའི་བློ་ལ་ལྟོས་ནས་མ་གྲུབ་པའི་གཏན་ཚིགས་ཡིན་པའི་ཕྱིར། ཁྱབ་སྟེ། དེ་དེའི་དོན་ཡིན་པའི་ཕྱིར། འདོད་ན། མི་རྟག་པ་ཆོས་ཅན། ཁྱོད་སྒྲ་མི་རྟག་པར་སྒྲུབ་པར་བྱེད་པའི་དོན་སྟེང་ནས་ཕྱོགས་ཆོས་མ་གྲུབ་པའི་གནད་ཀྱིས་མ་ཡིན་པར་སྐབས་བབ་ཀྱི་རྒོལ་བའི་བློ་སྐྱོན་དབང་གིས་སྒྲ་མི་རྟག་པར་སྒྲུབ་པའི་ཕྱོགས་ཆོས་མ་གྲུབ་པའི་གཏན་ཚིགས་སུ་སོང་བ་མ་ཡིན་པར་ཐལ། ཁྱོད་སྒྲ་མི་རྟག་པར་སྒྲུབ་པར་བྱེད་པའི་དོན་ལ་ལྟོས་ཏེ་མ་གྲུབ་པའི་གཏན་ཚིགས་ཡིན་པའི་ཕྱིར། ཁྱབ་སྟེ། སྐབས་བབ་ཀྱི་རྒོལ་བའི་བློ་སྐྱོན་དབང་ཙམ་གྱིས་མ་ཡིན་པར་དོན་སྟེང་ནས་ཕྱོགས་ཆོས་མ་གྲུབ་པའི་གནད་ཀྱིས་མ་གྲུབ་པའི་གཏན་ཚིགས་སུ་སོང་བ་དེ། དོན་ལ་ལྟོས་ཏེ་མ་གྲུབ་པའི་གཏན་ཚིགས་ཀྱི་དོན་ཡིན་པའི་ཕྱིར། མ་ཁྱབ་མཚམས་ཀྱི་རྟགས་གྲུབ་སྟེ། རྟགས་རིགས་མཐའ་དཔྱོད་ལས། དང་པོ་ལ། གཞི་མ་གྲུབ་པའི་དབང་གིས་མ་གྲུབ་པ་དང༌། གཞི་རྟགས་ཀྱི་འགྲེལ་བ་མེད་ནས་མ་གྲུབ་པ་དང༌། ཕྱོགས་གཅིག་ལ་ལྟོས་ཏེ་མགྲུབ་པ་དང༌། ཐ་དད་མེད་ནས་མ་གྲུབ་པ་དང་བཞི། ཞེས་གསུངས་པའི་ཕྱིར་ན་དཔྱད། ༈ འདུས་བསགས་དེ་མིག་སོགས་གཞན་དོན་བྱེད་པར་སྒྲུབ་པའི་ཤེས་འདོད་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། འདོད་ན། འདུས་བསགས་ཆོས་ཅན། མིག་སོགས་གཞན་དོན་བྱེད་པར་སྒྲུབ་པའི་ཤེས་འདོད་མེད་ནས་མ་གྲུབ་པའི་གཏན་ཚིགས་མ་ཡིན་པར་ཐལ། མིག་སོགས་གཞན་དོན་བྱེད་པར་སྒྲུབ་པའི་ཕྱོགས་ཆོས་ཡིན་པའི་ཕྱིར། མ་གྲུབ་ན། འདུས་བསགས་ཆོས་ཅན། མིག་སོགས་གཞན་དོན་བྱེད་པར་སྒྲུབ་པའི་ཕྱོགས་ཆོས་ཡིན་པར་ཐལ། མིག་སོགས་གཞན་དོན་བྱེད་པར་སྒྲུབ་པའི་འགལ་རྟགས་ཡིན་པའི་ཕྱིར། མ་གྲུབ་ན། འདུས་བསགས་དེ་མིག་སོགས་གཞན་དོན་བྱེད་པར་སྒྲུབ་པའི་འགལ་རྟགས་ཡིན་པར་ཐལ། འགྲེལ་བཤད་རིན་འཕྲེང་ལས། དང་པོ་ནི། མིག་སོགས་ཆོས་ཅན། གཞན་དོན་བྱེད་དེ། འདུས་བསགས་ཡིན་པའི་ཕྱིར། ཞེས་གསུངས་པའི་ཕྱིར། འདོད་ན། འདུས་བསགས་ཆོས་ཅན། མིག་སོགས་གཞན་དོན་བྱེད་པར་སྒྲུབ་པའི་ཕྱོགས་ཆོས་ཡིན་པར་ཐལ། མིག་སོགས་གཞན་དོན་བྱེད་པར་སྒྲུབ་པའི་འགལ་རྟགས་ཡིན་པའི་ཕྱིར། འདོད་ན། འདུས་བསགས་ཆོས་ཅན། མིག་སོགས་གཞན་དོན་བྱེད་པར་སྒྲུབ་པའི་ཕྱོགས་ཆོས་མ་ཡིན་པར་ཐལ། མིག་སོགས་གཞན་དོན་བྱེད་པར་སྒྲུབ་པའི་མ་གྲུབ་པའི་གཏན་ཚིགས་ཡིན་པའི་ཕྱིར། མ་གྲུབ་ན། འདུས་བསགས་ཆོས་ཅན། མིག་སོགས་གཞན་དོན་བྱེད་པར་སྒྲུབ་པའི་མ་གྲུབ་པའི་གཏན་ཚིགས་ཡིན་པར་ཐལ། མིག་སོགས་གཞན་དོན་བྱེད་པར་སྒྲུབ་པའི་ཤེས་འདོད་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། དེར་ཐལ། གཏན་ཚིགས་དོན་བསྡུས་ལས། ཤེས་འདོད་མེད་ནས་མ་གྲུབ་པ་ནི། མིག་སོགས་ཆོས་ཅན། གཞན་དོན་ཙམ་ཞིག་བྱེད་དེ། འདུས་བསགས་ཡིན་པས་སོ། །ཞེས་པ་ལྟ་བུའོ། །ཞེསགསུངས་པའི་ཕྱིར་ན་དཔྱད། ༈ ཡང་མིག་སོགས་ཀྱིས་གཞན་དོན་ཙམ་ཞིག་བྱེད་པ་ཡིན་པར་ཐལ། གཏན་ཚིགས་དོན་བསྡུས་ལས། མིག་སོགས་ཆོས་ཅན། གཞན་དོན་ཙམ་ཞིག་བྱེད་དེ། འདུས་བསགས་ཡིན་པས་སོ། །ཞེས་གསུངས་པའི་ཕྱིར། འདོད་ན། མིག་སོགས་ཀྱིས་རང་དོན་མི་བྱེད་པར་ཐལ། མིག་སོགས་ཀྱིས་གཞན་དོན་ཙམ་ཞིག་བྱེད་པ་ཡིན་པའི་ཕྱིར། ཁྱབ་སྟེ། གཞན་དོན་ཙམ་ཞིག་བྱེད་ཅེས་པའི་ཙམ་སྒྲས་གཅད་བྱ་ངོས་འཛིན་རྒྱུ་ཡོད་པའི་ཕྱིར། འདོད་ན། མིག་སོགས་ཀྱིས་རང་དོན་མི་བྱེད་པར་ཐལ། མིག་སོགས་ཀྱིས་གཞན་དོན་ཙམ་བྱེད་པ་གང་ཞིག དེའི་ཙམ་སྒྲས་རང་དོན་བྱེད་པ་བཅད་པ་ཡིན་པའི་ཕྱིར། འདོད་ན། དམ་བཅའ་བའི་མིག་གིས་རང་དོན་མི་བྱེད་པར་ཐལ། མིག་གིས་རང་དོན་མི་བྱེད་པའི་རྒྱུ་མཚན་ཡོད་པའི་ཕྱིར། འདོད་ན། ཉན་ཐོས་ཀྱི་མིག་གིས་ཀྱང་གཞན་དོན་ལས་རང་དོན་མི་བྱེད་པར་ཐལ། དམ་བཅའ་བའི་མིག་གིས་གཞན་དོན་ལས་རང་དོན་མི་བྱེད་པའི་རྒྱུ་མཚན་ཡོད་པའི་ཕྱིར། འདོད་ན། ཉན་ཐོས་ཀྱིས་གཞན་དོན་བསྒྲུབས་པ་ཡོད་པར་ཐལ། ཉན་ཐོས་ཀྱི་མིག་གིས་གཞན་དོན་ཁོ་ན་བསྒྲུབས་པ་ཡིན་པའི་ཕྱིར། འདོད་མི་ནུས་ཏེ། ཉན་ཐོས་ཀྱིས་རང་དོན་འབའ་ཞིག་ལས་གཞན་དོན་མི་བྱེད་པས་ཁྱབ་པའི་ཕྱིར། དེར་ཐལ། རྒྱལ་སྲས་ལག་ལེན་ལས། རང་དོན་འབའ་ཞིག་བསྒྲུབས་པའི་ཉན་རང༌། །ཞེས་གསུངས་པའི་ཕྱིར་ན། འདིར་གསུངས་པའི་རང་དོན་གཞན་དོན་དང་གོང་དུ་བཤད་པའི་གཞན་དོན་ཙམ་ཞིག་ཅེས་པའིགཞན་དོན་མི་འདྲའམ་དཔྱད། ༈ སྒྲ་ལ་ཐེ་ཚོ་ཟ་བའི་རྒོལ་བ་ལ་བྱས་པ་དེ་སྒྲ་མི་རྟག་པར་སྒྲུབ་པའི་ཆོས་ཅན་གྱི་ངོ་བོ་ལ་ཐེ་ཚོམ་ཟ་ནས་མ་གྲུབ་པའི་གཏན་ཚིགས་ཡིན་པར་ཐལ། འདོད་ན། སྒྲ་ལ་ཐེ་ཚོམ་ཟ་བའི་རྒོལ་བ་ལ་སྒྲ་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར་ཞེས་པའི་སྦྱོར་བ་དེ་སྦྱོར་བ་ལྟར་སྣང་ཡིན་པར་ཐལ། སྒྲ་ལ་ཐེ་ཚོ་ཟ་བའི་རྒོལ་བ་ལ་བྱས་པ་དེ་སྒྲ་མི་རྟག་པར་སྒྲུབ་པའི་ཆོས་ཅན་གྱི་ངོ་བོ་ལ་ཐེ་ཚོམ་ཟ་ནས་མ་གྲུབ་པའི་གཏན་ཚིགས་ཡིན་པའི་རྒྱུ་མཚན་འཐད་པའི་ཕྱིར། འདོད་ན། སྒྲ་ལ་ཐེ་ཚོམ་ཟ་བའི་རྒོལ་བ་ལ་སྒྲ་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར་ཞེས་པའི་སྦྱོར་བ་དེ་སྦྱོར་ཡང་དག་མ་ཡིན་པར་ཐལ། སྒྲ་ལ་ཐེ་ཚོམ་ཟ་བའི་རྒོལ་བ་ལ་སྒྲ་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར་ཞེས་པའི་སྦྱོར་བ་དེ་སྦྱོར་བ་ལྟར་སྣང་ཡིན་པའི་ཕྱིར། འདོད་ན། སྒྲ་ལ་ཐེ་ཚོམ་ཟ་བའི་རྒོལ་བ་ལ་སྒྲ་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར་ཞེས་པའི་སྦྱོར་བ་དེ་སྦྱོར་བ་ཡང་དག་ཡིན་པར་ཐལ། སྒྲ་ལ་ཐེ་ཚོམ་ཟ་བའི་རྒོལ་བ་ལ་སྒྲ་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར་ཞེས་པའི་སྦྱོར་བ་དེ་སྦྱོར་བ་ཡང་དག་ཏུ་སོང་བའི་རྒོལ་བ་ཡོད་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། སྦྱོར་བ་དེ་དང་དེ་སྦྱོར་བ་ཡང་དག་ཡིན་མིན་དེ་སྦྱོར་བ་ཡང་དག་ཏུ་སོང་བའི་རྒོལ་བ་ཡོད་མེད་ལ་ལྟ་དགོས་པའི་ཕྱིར། དེར་ཐལ། སྦྱོར་བ་དེ་དང་དེ་སྦྱོར་བ་ཡང་དག་ཡིན་པའི་ཚད་ཡོད་པའི་ཕྱིར། མ་ཁྱབ་མཚམས་ཀྱི་རྟགས་མ་གྲུབ་ན། སྒྲ་ལ་ཐེ་ཚོམ་ཟ་བའི་རྒོལ་བ་ལ་སྒྲ་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར་ཞེས་པའི་སྦྱོར་བ་དེ་སྦྱོར་བ་ཡང་དག་ཏུ་སོང་བའི་རྒོལ་བ་ཡོད་པར་ཐལ། བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་ཕྱིར་རྒོལ་ཡང་དག་གང་ཡང་རུང་བ་ཞིག་ཡོད་པའི་ཕྱིར། དེར་ཐལ། སྒྲ་ལ་ཐེ་ཚོམ་ཟ་བའི་རྒོལ་བ་དང༌། བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་ཕྱིར་རྒོལ་གཉིས་ཀ་ལ་ཐུན་མོང་དུ་བཀོད་པའི་སྒྲ་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར་ཞེས་པའི་སྦྱོར་བ་འགོད་པ་ཡོད་པའི་ཕྱིར། མ་ཁྱབ་ན། ཁྱབ་པ་ཡོད་པར་ཐལ། དེ་འདྲའི་སྦྱོར་བ་དེ་སྒྲ་ལ་ཐེ་ཚོམ་ཟ་བའི་རྒོལ་བ་ལ་སྒྲ་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར་ཞེས་པའི་སྦྱོར་བ་ཡིན་པ་གང་ཞིག་སྦྱོར་བ་དེ་སྦྱོར་བ་ཡང་དག་ཏུ་སོང་བའི་རྒོལ་བ་ཡོད་པའི་ཕྱིར། དང་པོ་མ་གྲུབ་ན། སྒྲ་ལ་ཐེ་ཚོམ་ཟ་བའི་རྒོལ་བ་དང༌། བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་ཕྱིར་རྒོལ་གཉིས་ཀ་ལ་ཐུན་མོང་དུ་བཀོད་པའི་སྒྲ་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར་ཞེས་པའི་སྦྱོར་བ་ཆོས་ཅན། སྒྲ་ལ་ཐེ་ཚོམ་ཟ་བའི་རྒོལ་བ་ལ་སྒྲ་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར་ཞེས་བཀོད་པའི་སྦྱོར་བ་ཡིན་པར་ཐལ། སྒྲ་ལ་ཐེ་ཚོམ་ཟ་བའི་རྒོལ་བ་དང༌། བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཕྱིར་རྒོལ་ཡང་དག་གཉིས་ལ་བཀོད་པའི་སྦྱོར་བ་ཡིན་པའི་ཕྱིར། རྟགས་གཉིས་པ་གྲུབ་སྟེ། སྦྱོར་བ་དེ་འགོད་ཡུལ་གྱི་བྱས་རྟགས་ཀྱིས་སྒྲ་མི་རྟག་པར་སྒྲུབ་པའིཕྱིར་རྒོལ་ཡང་དག་དེ་དེ་ཡིན་པའི་ཕྱིར་ན་དཔྱད། ༈ མཚན་མོའི་རྒྱ་མཚོའི་སྐྱ་རྫས་མཐོང་ནས་དེ་དུ་བ་ཡིན་མིན་ལ་ཐེ་ཚོམ་ཟ་བའི་རྒོལ་བའི་ངོར་དུ་བ་མཚན་མོའི་རྒྱ་མཚོར་མེ་ཡོད་པར་སྒྲུབ་པའི་རྟགས་ཀྱི་ངོ་བོ་ལ་ཐེ་ཚོམ་ཟ་ནས་མ་གྲུབ་པའི་གཏན་ཚིགས་ཡིན་པར་ཐལ། འདོད་ན། དུ་བ་ཆོས་ཅན། མཚན་མོའི་རྒྱ་མཚོའི་སྐྱ་རྫས་མཐོང་ནས་དེ་དུ་བ་ཡིན་མིན་ལ་ཐེ་ཚོམ་ཟ་བའི་རྒོལ་བའི་ངོར་མཚན་མོའི་རྒྱ་མཚོར་མེ་ཡོད་པར་སྒྲུབ་པའི་རྟགས་ཀྱི་ངོ་བོ་ལ་ཐེ་ཚོམ་ཟ་ནས་མ་གྲུབ་པའི་གཏན་ཚིགས་མ་ཡིན་པར་ཐལ། དེ་འདྲའི་རྒོལ་བས་མཚན་མོའི་རྒྱ་མཚོར་ཆོས་ཅན། མེ་ཡོད་དེ། དུ་བ་ཡོད་པའི་ཕྱིར་ཞེས་པའི་སྦྱོར་བའི་རྟགས་ཀྱི་ངོ་བོ་ལ་ཐེ་ཚོམ་མི་ཟ་བའི་ཕྱིར། དེར་ཐལ། དེ་འདྲའི་རྒོལ་བས་མཚན་མོའི་རྒྱ་མཚོར་ཆོས་ཅན། མེ་ཡོད་དེ། དུ་བ་ཡོད་པའི་ཕྱིར་ཞེས་པའི་སྦྱོར་བའི་རྟགས་དུ་བའི་ངོ་བོ་རྟོགས་པའི་ཕྱིར། དེར་ཐལ། མཚན་མོའི་རྒྱ་མཚོའི་སྐྱ་རྫས་མཐོང་ནས་དེ་དུ་བ་ཡིན་མིན་ལ་ཐེ་ཚོམ་ཟ་ན་དེ་འདྲའི་རྒོལ་བས་དུ་བ་མ་རྟོགས་པས་ཁྱབ་པ་མེད་པའི་ཕྱིར། འདོད་ན། དུ་བ་དེ་མཚན་མོའི་རྒྱ་མཚོའི་སྐྱ་རྫས་མཐོང་ནས་དེ་དུ་བ་ཡིན་མིན་ལ་ཐེ་ཚོམ་ཟ་བའི་རྒོལ་བའི་ངོར་མཚན་མོའི་རྒྱ་མཚོར་མེ་ཡོད་པར་སྒྲུབ་པའི་རྟགས་ཀྱི་ངོ་བོ་ལ་ཐེ་ཚོམ་ཟ་ནས་མ་གྲུབ་པའི་གཏན་ཚིགས་མ་ཡིན་པར་ཐལ། སྐབས་ཀྱི་རྒོལ་བས་དེ་སྒྲུབ་ཀྱི་རྟགས་ཀྱི་ངོ་བོ་དེ་རྟོགས་པའི་ཕྱིར། འདོད་མི་ནུས་ཏེ། རྟགས་རིགས་ལས། རྟགས་ཀྱི་ངོ་བོ་ལ་ཐེ་ཚོམ་ཟ་ནས་མ་གྲུབ་པའི་གཏན་ཚིགས་ནི། དཔེར་ན། མཚན་མོའི་རྒྱ་མཚོར་སྐྱ་རྫས་མཐོང་ནས་དེ་དུ་བ་ཡིན་མིན་ལ་ཐེ་ཚོམ་ཟ་བའི་རྒོལ་བ་ལ་དུ་བ་དེ། མཚན་མོའི་རྒྱ་མཚོར་མེ་ཡོད་པར་སྒྲུབ་པར་བྱེད་པའི་རྟགས་ཀྱི་ངོ་བོ་ལ་ཐེ་ཚོམ་ཟ་ནས་མ་གྲུབཔའི་གཏན་ཚིགས་ཡིན་པའི་ཕྱིར། ཞེས་གསུངས་པའི་ཕྱིར། ༈ ཡང་ཤེས་འདོད་མེད་ནས་མ་གྲུབ་པའི་གཏན་ཚིགས་ཡིན་ན་ཤེས་འདོད་ཆོས་ཅན་སྐྱོན་མེད་མེད་པས་ཁྱབ་པར་ཐལ། འདོད་ན། དངོས་པོ་ཆོས་ཅན། དོན་བྱེད་ནུས་པ་མི་རྟག་པར་སྒྲུབ་པའི་ཤེས་འདོད་མེད་ནས་མ་གྲུབ་པའི་གཏན་ཚིགས་མ་ཡིན་པར་ཐལ། ཁྱོད་ཀྱི་རྟགས་ཀྱིས་དོན་བྱེད་ནུས་པ་མི་རྟག་པར་སྒྲུབ་པའི་ཤེས་འདོད་ཆོས་ཅན་སྐྱོན་མེད་ཡོད་པའི་ཕྱིར། མ་གྲུབ་ན། དངོས་པོ་ཆོས་ཅན། ཁྱོད་ཀྱི་རྟགས་ཀྱིས་དོན་བྱེད་ནུས་པ་མི་རྟག་པར་སྒྲུབ་པའི་ཤེས་འདོད་ཆོས་ཅན་སྐྱོན་མེད་ཡོད་པར་ཐལ། དོན་བྱེད་ནུས་པ་དེ་དེ་ཡིན་པའི་ཕྱིར། དེར་ཐལ། དོན་བྱེད་ནུས་པ་དེ་སྒྲུབ་ཀྱི་རྩོད་གཞིར་བཟུང་བ་གང་ཞིག དོན་བྱེད་ནུས་པ་དངོས་པོ་ཡིན་པར་ངེས་ནས་དོན་བྱེད་ནུས་པ་མི་རྟག་པ་ཡིན་མིན་ལ་ཤེས་འདོད་ཞུགས་པའི་རྒོལ་བ་ཡོད་པའི་ཕྱིར། འདོད་ན། དངོས་པོ་ཆོས་ཅན། དོན་བྱེད་ནུས་པ་མི་རྟག་པར་སྒྲུབ་པའི་ཤེས་འདོད་མེད་ནས་མ་གྲུབ་པའི་གཏན་ཚིགས་མ་ཡིན་པར་ཐལ། ཁྱོད་ཀྱི་རྟགས་ཀྱིས་དོན་བྱེད་ནུས་པ་མི་རྟག་པར་སྒྲུབ་པའི་ཤེས་འདོད་ཆོས་ཅན་སྐྱོན་མེད་ཡོད་པའི་ཕྱིར། འདོད་ན། དངོས་པོ་ཆོས་ཅན། དོན་བྱེད་ནུས་པ་མི་རྟག་པར་སྒྲུབ་པའི་མ་གྲུབ་པའི་གཏན་ཚིགས་མ་ཡིན་པར་ཐལ། དོན་བྱེད་ནུས་པ་མི་རྟག་པར་སྒྲུབ་པའི་ཤེས་འདོད་མེད་ནས་མ་གྲུབ་པའི་གཏན་ཚིགས་མ་ཡིན་པ་གང་ཞིག གཞན་བཅུ་བཞི་བོ་གང་ཡང་མ་ཡིན་པའི་ཕྱིར། འདོད་ན། དངོས་པོ་ཆོས་ཅན། དོན་བྱེད་ནུས་པ་མི་རྟག་པར་སྒྲུབ་པའི་རྟགས་ལྟར་སྣང་མ་ཡིན་པར་ཐལ། དོན་བྱེད་ནུས་པ་མི་རྟག་པར་སྒྲུབ་པའི་མ་གྲུབ་པའི་གཏན་ཚིགས་མ་ཡིན་པ་གང་ཞིག དེ་སྒྲུབ་ཀྱི་འགལ་རྟགས་དང་མ་ངེས་པའི་གཏན་ཚིགས་གཉིས་པོ་གང་ཡང་མ་ཡིན་པའི་ཕྱིར། དང་པོ་ཁས། ཕྱི་མ་སླ། འདོད་ན། དངོས་པོ་ཆོས་ཅན། དོན་བྱེད་ནུས་པ་མི་རྟག་པར་སྒྲུབ་པའི་རྟགས་ཡང་དག་ཡིན་པར་ཐལ། དོན་བྱེད་ནུས་པ་མི་རྟག་པར་སྒྲུབ་པའི་རྟགས་སུ་བཀོད་པ་གང་ཞིག དེ་སྒྲུབ་ཀྱི་རྟགས་ལྟར་སྣང་མ་ཡིན་པའི་ཕྱིར། འདོད་མི་ནུས་ཏེ། དངོས་པོའི་རྟགས་ཀྱིས་དོན་བྱེད་ནུས་པ་མི་རྟག་པར་སྒྲུབ་པའི་ཕྱིར་རྒོལ་ཡང་དག་མེད་པའི་ཕྱིར། དེར་ཐལ། དངོས་པོའི་རྟགས་ཀྱིས་དོན་བྱེད་ནུས་པ་མི་རྟག་པར་སྒྲུབ་པའི་རྗེས་ཁྱབ་ཚད་མས་ངེས་ནས་བསྒྲུབ་བྱ་ལ་ཤེས་འདོད་ཞུགས་པའི་རྒོལ་བ་མེད་པའི་ཕྱིར། མ་གྲུབ་ན། དངོས་པོའི་རྟགས་ཀྱིས་དོན་བྱེད་ནུས་པ་མི་རྟག་པར་སྒྲུབ་པའི་རྗེས་ཁྱབ་ཚད་མས་ངེས་ནས་བསྒྲུབ་བྱ་ལ་ཤེས་འདོད་ཞུགས་པའི་རྒོལ་བ་མེད་པར་ཐལ། གང་ཟག་དེས་དངོས་པོའི་རྟགས་ཀྱིས་དོན་བྱེད་ནུས་པ་མི་རྟག་པར་སྒྲུབ་པའི་རྗེས་ཁྱབ་ཚད་མས་ངེས་ན་དངོས་པོ་མི་རྟག་པ་ཚད་མས་ངེས་དགོས་པའི་ཕྱིར། རྟགས་སླ། ཁྱབ་སྟེ། དངོས་པོ་མི་རྟག་པ་ཡིན་པར་ཚད་མས་ངེས་ནས་དོན་བྱེདནུས་པ་དངོས་པོ་ཡིན་མིན་ལ་ཤེས་འདོད་ཞུགས་པའི་རྒོལ་བ་གཞི་མ་གྲུབ་པའི་ཕྱིར་རོ། །༈ ཡང་བྱས་པ་མ་རྟོགས་པའི་གང་ཟག་གིས་བྱས་པ་རྟགས་སུ་བཀོད་ན་བྱས་པ་དེ་སྒྲུབ་ཀྱི་སྔ་རྒོལ་ལ་ལྟོས་ནས་མ་གྲུབ་པའི་གཏན་ཚིགས་འགྱུར་བས་ཁྱབ་པར་ཐལ། བྱས་པ་མ་རྟོགས་པའི་གང་ཟག་ཡིན་ན་གང་ཟག་དེས་རྩོད་གཞིར་འགྲོ་རྒྱུ་དེ་བྱས་པ་ཡིན་པར་མ་རྟོགས་པས་ཁྱབ་པའི་ཕྱིར། ཁྱབ་སྟེ། སྒྲ་བྱས་པ་མ་རྟོགས་པའི་གང་ཟག་གིས་སྒྲ་ཆོས་ཅན། མི་རྟག་སྟེ། བྱས་པ་ཡིན་པའི་ཕྱིར་ཞེས་པའི་སྦྱོར་བ་བཀོད་ན་སྦྱོར་བ་དེ་སྒྲུབ་ཀྱི་ཕྱོགས་ཆོས་མ་གྲུབ་པས་ཁྱབ་པའི་ཕྱིར། འདོད་ན། མི་རྟག་པ་མ་རྟོགས་པའི་གང་ཟག་གིས་མི་རྟག་པ་རྟགས་སུ་བཀོད་ན་མི་རྟག་པ་དེ་སྒྲུབ་ཀྱི་སྔ་རྒོལ་ལ་ལྟོས་ནས་མ་གྲུབ་པའི་གཏན་ཚིགས་ཡིན་དགོས་པར་ཐལ། བྱས་པ་མ་རྟོགས་པའི་གང་ཟག་གིས་བྱས་པ་རྟགས་སུ་བཀོད་ན་བྱས་པ་དེ་སྒྲུབ་ཀྱི་སྔ་རྒོལ་ལ་ལྟོས་ནས་མ་གྲུབ་པའི་གཏན་ཚིགས་ཡིན་དགོས་པའི་ཕྱིར། འདོད་ན། དམ་བཅའ་བས་བཀོད་པའི་སྒྲ་ཆོས་ཅན། བདག་མེད་ཡིན་ཏེ། མི་རྟག་པ་ཡིན་པའི་ཕྱིར་ཞེས་བཀོད་པའི་སྦྱོར་བ་ཡིན་ན་སྦྱོར་བ་དེ་སྒྲུབ་ཀྱི་ཕྱོགས་ཆོས་མ་གྲུབ་པས་ཁྱབ་པར་ཐལ། དམ་བཅའ་བས་མི་རྟག་པ་མ་རྟོགས་པའི་ཕྱིར། འདོད་ན། དམ་བཅའ་བས་མི་རྟག་པ་རྟགས་སུ་བཀོད་པའི་སྦྱོར་བ་ཡིན་ན་སྦྱོར་བ་དེ་སྒྲུབ་ཀྱི་ཕྱོགས་ཆོས་མ་གྲུབ་པས་ཁྱབ་པར་ཐལ། འདོད་ན། དམ་བཅའ་བས་མི་རྟག་པ་རྟགས་སུ་བཀོད་པའི་སྦྱོར་བ་ཡིན་ན་སྦྱོར་བ་ཡང་དག་མ་ཡིན་པས་ཁྱབ་པར་ཐལ། དམ་བཅའ་བས་མི་རྟག་པ་རྟགས་སུ་བཀོད་པའི་སྦྱོར་བ་ཡིན་ན་སྦྱོར་བ་དེ་སྒྲུབ་ཀྱི་ཕྱོགས་ཆོས་མ་གྲུབ་པས་ཁྱབ་པའི་ཕྱིར། འདོད་ན། དམ་བཅའ་བ་ལ་མི་རྟག་པ་རྟགས་ཡང་དག་ཏུ་སོང་བའི་སྦྱོར་བ་འགོད་རྒྱུ་མེད་པར་ཐལ་ལོ་ཞེ་ན་དཔྱད། ༈ ཡང་མིག་ཤེས་ཀྱི་གཟུང་བྱ་དེ་སྒྲ་རྟག་པར་སྒྲུབ་པའི་རྒོལ་ཕྱིར་རྒོལ་གཉིས་ཀ་ལ་ལྟོས་ནས་མ་གྲུབ་པའི་གཏན་ཚིགས་མ་ཡིན་པར་ཐལ། མིག་ཤེས་ཀྱི་གཟུང་བྱ་དེ་སྒྲ་རྟག་པར་སྒྲུབ་པའི་གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། དེར་ཐལ། རྟགས་རིགས་ལས། མིག་ཤེས་ཀྱི་གཟུང་བྱ་དེ་སྒྲ་རྟག་པར་སྒྲུབ་པར་བྱེད་པའི་གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་ཡིན་པའོ། །ཞེས་གསུངས་པའི་ཕྱིར། འདོད་ན། མིག་ཤེས་ཀྱི་གཟུང་བྱ་དེ་སྒྲ་རྟག་པར་སྒྲུབ་པའི་གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་མ་ཡིན་པར་ཐལ། མིག་ཤེས་ཀྱི་གཟུང་བྱ་དེ་སྒྲ་རྟག་པར་སྒྲུབ་པའི་རྒོལ་བ་ལ་ལྟོས་ནས་མ་གྲུབ་པའི་གཏན་ཚིགས་ཡིན་པའི་ཕྱིར། མ་གྲུབ་ན། མིག་ཤེས་ཀྱི་གཟུང་བྱ་དེ་སྒྲ་རྟག་པར་སྒྲུབ་པའི་རྒོལ་བ་ལ་ལྟོས་ནས་མ་གྲུབ་པའི་གཏན་ཚིགས་ཡིན་པར་ཐལ། མིག་ཤེས་ཀྱི་གཟུང་བྱ་དེ་སྒྲ་རྟག་པར་སྒྲུབ་པའི་རྒོལ་ཕྱིར་རྒོལ་གཉིས་ཀ་ལ་ལྟོས་ནས་མ་གྲུབ་པའི་གཏན་ཚིགས་ཡིན་པའི་ཕྱིར། དེར་ཐལ། གཏན་ཚིགས་དོན་བསྡུས་ལས། གཉིས་ཀ་ལ་མ་གྲུབ་པ་ནི། སྒྲ་ཆོས་ཅན། རྟག་སྟེ། མིག་ཤེས་ཀྱི་བཟུང་བྱ་ཡིན་པས་སོ། །ཞེས་པ་ལྟ་བུའོ། །ཞེས་གསུངས་པའི་ཕྱིར་ན། གཏན་ཚིགས་དོན་བསྡུས་སུ་མ་གྲུབ་པའི་གཏན་ཚིགས་བཅུ་བཞི་འདྲེན་སྐབས་གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་མ་བགྲང་བ་ནི་གཞི་རྟགས་ཀྱི་འབྲེལ་བ་མེད་ནས་མ་གྲུབ་པ་རྒོལ་ཕྱིར་རྒོལ་གཉིས་ཀ་ལ་ལྟོས་ནས་མ་གྲུབ་པའི་གཏན་ཚིགས་སུ་བསྡུས་པ་ཡིན་ཏེ། གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གོ་དོན་ནི་རྩོད་གཞི་དེའི་སྟེང་དུ་རྟགས་དེ་འགོད་ཚུལ་ལྟར་མ་གྲུབ་པ་ཡིན་པ་གང་ཞིག རྒོལ་ཕྱི་རྒོལ་གཉིས་ཀས་སྒྲ་མིག་ཤེས་ཀྱི་བཟུང་བྱར་ཚད་མས་མ་གྲུབ་པའི་རྒྱུ་མཚན་གྱིས་ཡིན་ནམ་སྙམ་ལ། གུང་ཐང་རྟགས་རིགས་ལས་ཀྱང་དེ་ལྟར་གསུངས་སོ། །འོན་ཀྱང་གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་དེ་དོན་ལ་ལྟོས་ནས་མ་གྲུབ་པའི་གཏན་ཚིགས་དང༌། རྒོལ་ཕྱིར་རྒོལ་གཉིས་ཀ་ལ་ལྟོས་ནས་མ་གྲུབ་པའིགཏན་ཚིགས་དེ་རྒོལ་བ་ལ་ལྟོས་ནས་མ་གྲུབ་པའི་གཏན་ཚིགས་ཡིན་པས་དཔྱད།