ལྷ་མོའི་གསོལ་མཆོད།
བྱང་ཆུབ་རྒྱལ་མཚན།
༁ྃ༔ གསུང་ཐོར་བུ་མུ་ཏིག་ཕྲེང་བ་ལས༔ ལྷ་མོའི་གསོལ་མཆོད་ཉུང་ངུར་བསྡུས་པ་བཞུགས་སོ༔ ན་མོ་གུ་རུ་དྷེ་ཝ་ཌཱཀྐི་ནི་ཧཱུྃ༔ གསང་སྔགས་ཟབ་མོའི་བྷ་ག་ཀུན་བཟང་མོ། ཡང་གསང་དངོས་གྲུབ་མཆོག་གཏེར་མཚོ་རྒྱལ་མ། །ཀློང་ཡངས་ཟད་མེད་གཏེར་མཛོད་དབྱངས་ཅན་མ། །མ་རྒྱུད་མཁའ་འགྲོའི་ཚོགས་ལ་འདུད་དོ་མ། །ཁྱེད་ནི་བློ་གྲོས་རྟ་བདུན་རྒྱལ་བའི་མ། །མི་འཛད་ཚ་ཟེར་ཕྱོགས་བཅུར་འགྱེད་པའི་མ། །བདག་བློའི་གེ་སར་ཕྱོགས་བཅུར་བསྐྱེད་ཅིག་མ། །ཁོ་བོས་མ་བསྐང་ཉུང་ངུར་གསོལ་ལོ་མ། །ཞེས་དཔལ་ལྡན་ལྷ་མོ་ལ་ཇི་ལྟར་མཁོ་བའི་ཡོ་བྱད་དམ་རྫས་ཚངས་བར་བསགས་ལ། རྣལ་འབྱོར་པ་སྤྲོས་པ་ལ་དགའ་ན་དམ་པ་རིན་པོ་ཆེས་བྱས་པའི་ལས་བྱང་གི་དབྱངས་བཞིན་རོལ་མོ་བཅས་པས། བྷྱོ༔ མ་གཡོས་བྱང་ཤར་མེ་རླུང་གཏིང་གི་རུང༌། །མ་བཀོད་ཁྲག་མཚོ་རྦ་རླབས་གཡོས་པའི་དབུས། །མ་བརྩེགས་ཐོད་མཁར་དགུ་རིམ་གཞལ་ཡས་ནས། །མ་གཅིག་དཔལ་ལྡན་ལྷ་མོ་རེ་མ་ཏི། །མ་ལུས་བྲན་དང་གཡོག་འཁོར་བཅས་པ་རྣམས། །མ་ཐོགས་གནས་འདིར་མྱུར་དུ་གཤེགས་སུ་གསོལ། །མ་བྱས་ལྷུན་གྱིས་གྲུབ་པའི་གཞལ་ཡས་འདིར། །མ་ཆགས་ཉི་ཟླ་བམ་རོའི་གདན་ལ་བཞུགས། །མ་གྱུར་རྩེ་གཅིག་གུས་པས་ཕྱག་འཚལ་ལོ། །མ་ཉིད་ཐུགས་རྗེ་བརྩེ་བའི་བདག་ཉིད་མས། །མ་གཟིགས་ཡལ་བར་དོར་ན་སུ་ལ་རེ། །མ་འཁྲུགས་འདོད་ཁམས་དབང་ཕྱུག་འཁོར་བཅས་ཀྱིས། །མ་ལྟར་བྱམས་ཤིང་སྲིང་ལྟར་བརྩེ་བར་མཛོད། །མ་གཡེལ་མ་གཡེལ་དཔལ་ལྡན་རེ་མ་ཏི། །མ་འཆུགས་རྣལ་འབྱོར་བདག་གི་གྲོགས་མཛོད་ཅིག །མ་ལ་མཆོད་པ་འབུལ་བའི་ཡོ་བྱད་ནི། །མ་བསླད་མེ་ཏོག་བདུག་སྤོས་དྲི་ཞལ་རོལ། །མ་སྤངས་གཟུགས་སྒྲ་དྲི་རོ་རེག་བྱ་ཆོས། །མ་ཚང་མེད་པའི་སྨན་གཏོར་རཀྟ་འདིས། །མ་མོ་ནག་མོ་འཁོར་བཅས་ཐུགས་དམ་བསྐང༌། །མ་ཉམས་མཁའ་ལྡིང་ཟངས་མཆུ་གསེར་མིག་ལུག །མ་སྲེག་ཙ་ར་ཤ་ཆེན་གསུར་ཆེན་དྲི། །མ་སྦགས་ཤེལ་སྒོང་བདུད་རྩི་རྣམ་ལྔའི་ཚོགས། །མ་ཚོགས་འཁོར་དང་བཅས་པའི་ཐུགས་དམ་བསྐང༌། །མ་འགྲན་རྫུ་འཕྲུལ་ཤུགས་ཆེན་བོང་བུ་དྲིལ། །མ་རུངས་སེང་གེ་སྦྲུལ་གྱི་སྙན་ཆ་ཅན། །མ་བཟོས་མགོ་ཕྲེང་གཡང་གཞི་ནད་རྐྱལ་འདིས། །མ་སྲིང་མཁའ་འགྲོའི་ཚོགས་ཀྱི་ཐུགས་དམ་བསྐང༌། མ་བསྒྲིགས་ཉི་ཟླའི་ལྟེ་རྒྱན་དབུ་རྒྱན་ཅན། །མ་རྩོལ་གླང་ཆེན་ཀོ་རློན་རེ་ལྡེའི་གོས། །མ་བསགས་ནོར་བུ་སྐྱུགས་པའི་ནེའུ་ལེ་འདིས། །མ་དང་སྲུང་མར་བཅས་པའི་ཐུགས་དམ་བསྐང༌། །མ་གྱུར་འགྲོ་བ་གཏོར་མར་སྦྱར་བ་དང༌། །མ་བཅོས་ཆང་དང་མཾ་ས་ཙིཏྟའི་ཁྲག །མ་ནོར་མཆོད་རྫས་རྒྱ་མཚོ་དུ་མ་འདིས། །མ་འཁོར་སྤྲུལ་པར་བཅས་པའི་ཐུགས་དམ་བསྐང༌། །མ་འགྱང་མྱུར་དུ་བསྒྲུབ་པའི་རྣལ་འབྱོར་ལ། །མ་བསྒྲུབས་དངོས་གྲུབ་སྣ་ཚོགས་ཆར་ཕོབ་ཅིག །མ་ཐུབ་ཡིད་ལ་བརྣག་པའི་བསྟན་དགྲ་ཀུན། །མ་བཞག་ད་ལྟ་མྱུར་དུ་སོད་ལ་ཤོག །མ་ཆེན་སྲིན་མོ་ཁྲོས་པ་ལྷ་མོའི་སྐུ། །མ་འགགས་བྷྱོ་དང་ཨ་ར་ལི་ཡི་གསུང༌། །མ་འཛིན་མཐའ་བྲལ་ཕྱོགས་ཀློང་ཡངས་པའི་ཐུགས། །མ་ཡེངས་ལྷ་མོའི་སྐུ་གསུང་ཐུགས་ལ་བསྟོད། ཧཱུྃ༔ མ་ཧཱ་གུ་རུའི་བསྟན་སྲུང་དགོངས་སུ་གསོལ། །མ་རིག་དབང་གིས་མཁའ་འགྲོའི་ཐུགས་དང་འགལ། །མ་བརྩོན་དུས་ཀྱི་མཆོད་པ་ཆགས་པ་དང༌། །མ་གསལ་ཏིང་འཛིན་གཡེལ་བ་མཐོལ་ལོ་བཤགས། །མ་བསྟེན་སྤྱོད་པ་ཚུལ་བཞིན་མ་རྟོགདང༌། །མ་ཤེས་ལེ་ལོ་སོམ་ཉི་ཟོས་པའི་མཐུས། །མ་བཤགས་གསང་དང་སྦ་བར་གྱུར་བ་དང༌། །མ་ཚོར་བསྙེན་པ་གྲངས་ལས་ཆགས་པ་བཤགས། །མ་འབྱོར་དབང་གིས་མཆོད་པ་རྒྱུ་ཆུང་དང༌། །མ་ གཙང ་ཕུད་ཉམས་འགལ་འཁྲུལ་སྣང་ལ་སོགས། །མ་དག་ཉེས་པའི་ཚོགས་རྣམས་ཅི་མཆིས་པ། །མ་དམིགས་ཀློང་ཡངས་ངང་དུ་བཤགས་པར་བགྱི། །ཨེ་མ། མ་བཞིན་སྐྱོང་མཛད་མ་མོའི་བསྐང་བ་འདི། །མ་ནུས་འཁོས་ཆུང་བྱང་ཆུབ་རྒྱལ་མཚན་ཁོས། །མ་ནོར་དད་པས་ཉམས་སུ་ལེན་པ་ལ། །མ་དང་སྐྱེ་བོས་ཧར་རྒད་བྱེད་རྟེན་ཡིན། །མ་བཞུགས་འདས་པ་རྒྱལ་མཚན་སེང་གེ་སོགས། །མ་སོགས་མང་པོའི་བསྟན་བཅོས་བརྩམས་པར་རིག །མ་འགོར་འདིས་ཀྱང་སྐལ་བཟང་ཡིད་འཕྲོག་ནས། །མ་འོངས་རྣལ་འབྱོར་ཐུན་གྱི་དེ་བཞིན་མཛོད། །ཅེས་སྤྲང་པོའི་ཡང་མཐའ་རུ་གྱུར་བ་བྱང་ཆུབ་རྒྱལ་མཚན་གྱིས་ཡོས་ལོ་རྟ་ཟླའི་ཉི་ཤུ་དགུའི་རྨི་ལམ་དག་སྣང་འགའ་ཞིག་ལ་བརྟེན་ནས་སྦྱར་བའོ། །དགེའོ། །