བླ་མ་ཡེ་ཤེས་རྒྱ་མཚོའི་ངོར་གདམས་པ། རྡོ་གྲུབ་བསྟན་པའི་ཉི་མ།

༄༅། །བླ་མ་ཡེ་ཤེས་རྒྱ་མཚོའི་ངོར་གདམས་པ། ཡེ་ནས་རྣམ་གྲོལ་ལྷུན་གྲུབ་རིག་པའི་གཤིས། །སྤྲོས་པ་ཀུན་གྱིས་ཡུལ་མིན་ཡེ་ཤེས་ཆེ། །སྙིང་དབུས་གཞོན་ནུ་བུམ་སྐུའི་ཏི་ལ་ཀར། །ཡང་དག་གཉུག་མའི་དྲན་པས་ཕྱག་བགྱིའོ། །གང་ཚེ་ནགས་རིའི་ནང་ན་བྱ་ཝང་ལྟར། །སྙིང་ལ་ཀུན་རྨོངས་མུན་ནག་འཐིབ་བཞིན་དུ། །ཆོས་གཏམ་གྲེ་བའི་ནང་ནས་བྲག་ཆ་ལྟར། །འབབ་པའི་སྤྲང་སྨྱོན་གཞོན་ནུ་འཇིགས་མེད་པ། །རིང་ནས་གོམས་པའི་ཆོས་མིན་སྤྱོད་པ་བརྒྱས། །འཆད་རྩོད་རྩོམ་པའི་གློ་ཞབས་རྡོལ་མཐོང་ཡང་། །གསེར་དང་བོང་བ་མཉམ་པའི་ཡེ་རྒྱམ་དེས། །རྟ་ཆད་ལྕག་གིས་གཞུས་འདྲས་བསྐུལ་མ་མཛད། །ཕ་མེས་རིག་འཛིན་བརྒྱུད་པ་བཟང་མོད་དེ། །བུ་ཕྲུག་ཆོས་མེད་སྐལ་བ་ངན་སྟབས་འདིས། །ཁྱེད་ལ་རྒན་ཉམས་དྲང་པོའི་གདམས་པ་ཞིག །ཐུགས་ལ་འཕྲོད་པའི་ཞུ་བྱར་འབུལ་རྒྱུ་མེད། །འོན་ཀྱང་ཁྱོད་ཐུགས་བཞེད་དོན་སྐོང་བ་དང་། །དཔྱིད་ཀའི་ཉི་མ་རིང་པོ་འཕུལ་བའི་ཕྱིར། །བྱུང་རྒྱལ་གཏམ་གྱི་བསླུ་བྲིད་བརྫུས་མ་འདིས། །ནགས་ཀྱི་ནང་ན་འདུ་འཛི་ཡོ་ལང་འགྱེད། །ཀྱེ་ལགས་ཐེག་མཆོག་རྒྱལ་པོའི་ཆོས་སྐད་འདི། །སྒོམ་ཆེན་སྟོང་གི་མདུན་ན་མར་མེ་བཞིན། །ལམ་ལམ་ཉིན་མཚན་མེད་པར་འབར་མོད་ཀྱི། །དངོས་དང་རི་མོའི་རྣམ་འགྱུར་གང་ཡིན་ཨང་། །གང་གིས་འོད་གསལ་གཉུག་མ་མི་ཤེས་པར། །ལྟར་སྣང་རྟོགས་པའི་ཟབ་ཁྱད་སྟོང་བཏོན་ཀྱང་། །ལྷུན་གྲུབ་སྣང་བཞིའི་ས་རྒྱ་མི་ཆོད་པས། །རྫོགས་ཆེན་བཞེད་ན་འོད་གསལ་ངང་སྒོམ་ཞུ། །སྙིང་དབུས་ལྔ་ལྡན་གཞོམ་མེད་ཐིག་ལེ་རུ། །ནང་གསལ་ཁྱད་ཆོས་དྲུག་ལྡན་བུམ་པའི་སྐུ། །ཀློང་ཆེན་དགོངས་པའི་མེ་ལོང་འོད་པོ་ཆེར། །འཆར་བའི་ཉམས་མྱོང་ཐེག་མཆོག་རྒྱལ་པོ་ཡིན། །གཟོད་ནས་ཀུན་རྟོག་སྤྲོས་པའི་མཚན་མ་རྣམས། །རྟོག་མེད་ནམ་མཁའི་རྡོ་རྗེར་རྣམ་གྲོལ་བས། །གཟུང་འཛིན་གཉིས་སུ་མི་དམིགས་བློ་འདས་དབྱིངས། །དེ་ལྟར་ཤེས་ནས་སེམས་རིག་ལ་ཤན་འབྱེད། །ཀུན་ཏུ་བཟང་པོ་གདོད་ནས་སྟོང་པ་ཉིད། །སྟོང་པའི་ནང་ན་ཤིན་ཏུ་སྟོང་པ་སྟེ། །ཐམས་ཅད་སྟོང་པ་ཁྱབ་གདལ་ཆེན་པོའི་ཀློང་། །སྟོང་དང་མི་སྟོང་སྤྲོས་ཀུན་ཞི་བ་ཡིན། །རྒྱུ་དང་མི་རྒྱུ་སྲིད་པའི་དངོས་སྣང་ཀུན། །འོད་གསལ་ཀློང་ན་ཤིན་ཏུ་མ་སྐྱེས་ཏེ། །རིག་རྩལ་རྟོག་པ་སྨིག་རྒྱུའི་ཕུང་པོ་ལྟས། །འགྲོ་དང་འོང་མེད་སྒྱུ་མ་བཞིན་དུ་སྤྲུལ། །མྱ་ངན་འདས་པའི་རྣམ་གྲོལ་ཁམས་མང་ཡང་། །ཆོས་ཉིད་ཀློང་ན་ཡང་དག་གྲུབ་མེད་དེ། །གཉུག་མའི་ཆོས་སྐུ་མ་བཅོས་ཕྱལ་བ་ལས། །འཇུག་ལྡང་གཉིས་མེད་རྨི་ལམ་བཞིན་དུ་སྣང་། །དེ་ལྟར་ཤེས་ནས་ཡེ་གྲོལ་རྫོགས་པ་ཆེ། །གཞི་མེད་རྩ་བྲལ་ནམ་མཁའ་ལྟ་བུའི་ཀློང་། །རྩལ་གྱི་ཀུན་རྟོག་རང་སྟེང་མ་བཞག་ན། །སྲིད་པའི་ལས་སྣང་གཞན་ནས་ཇི་ལྟར་ལྡོག །སེམས་ཀྱི་རྡོ་རྗེ་མ་བཅོས་ཅོག་བཞག་པས། །གློ་བུར་ཉོན་མོངས་ཤུགས་ཀྱིས་ཟིལ་གནོན་ཕྱིར། །མི་སྒོམ་བསྒྱུར་བའི་ཉེ་ལམ་འབའ་ཞིག་གིས། །སྒོམ་པའི་ཡིད་དཔྱོད་རྒྱབ་ཏུ་བོར་ཞེས་གླེང་། །ཕྱི་རུ་ཡུལ་ལྔའི་རྗེས་སྤྱོད་སྤྲིན་བཞིན་དེངས། །ནང་དུ་འཛིན་པའི་རྣམ་རྟོག་མཁའ་ལྟར་དག །གསང་བ་རིག་སྟོང་ཁ་སྦྱོར་གཉུག་མའི་ཡིད། །ཅེར་གྲོལ་རང་བཞིན་མེད་པའི་ངང་འདིར་གཟིགས། །བླང་དང་དོར་མེད་ཀུན་བཟང་དགོངས་པའི་བབ། །ཕྱོགས་མེད་རིས་མེད་མཉམ་ཉིད་ནམ་མཁའ་ཆེར། །སྤང་དང་སྒྲུབ་མེད་རང་བཞིན་བབ་བཞག་ན། །གཟུང་དང་འཛིན་མེད་ཆོས་སྐུའི་དགོངས་པ་རྙེད། །དང་པོ་བལྟར་མེད་འོད་གསལ་ལྟ་བའི་ངང་། །བར་དུ་སྒོམ་མེད་ཅོག་བཞག་འཁྱིལ་བའི་ཀློང་། །ཐ་མ་བྱར་མེད་ཟང་ཐལ་རིག་པའི་གཤིས། །གཏད་མེད་ངང་ལ་ས་ལམ་རྫོགས་པ་ལགས། །སྣང་བའི་དངོས་ཀུན་ཀུན་བྱེད་རིག་པའི་གདངས། །ཆོས་སྐུའི་རང་གདངས་གཞན་ནས་སུས་འགོག་སྟེ། །ཆོས་སྐུའི་ཀློང་དུ་ཆོས་ཅན་ཉེར་ཞི་བས། །རྩོལ་དང་སྒྲུབ་མེད་སྣང་བ་རྒྱ་གྲོལ་ཡིན། །རྟོག་པའི་འགྱུ་དྲན་གཉུག་མའི་ཆོ་འཕྲུལ་ཏེ། །ཀློང་ཆེན་རིག་རྩལ་གཞན་དུ་ཇི་ལྟར་སྤངས། །འཁྲུལ་བའི་ལས་རླུང་དབྱིངས་སུ་ཐིམ་པ་ན། །མ་འཁྲུལ་རིག་པ་ད་གདོད་སྒྲུབ་ཏུ་མེད། །གང་ལྟར་ཤེས་ན་སྲིད་དང་ཞི་བའི་ཁམས། །སྒྲོ་དང་སྐུར་མེད་ཡོངས་སུ་ཤེས་གྱུར་པ། །དེ་ལྟར་ཤེས་ན་རྣལ་འབྱོར་རྒྱལ་པོ་རྣམས། །རྟོགས་པའི་རྡུལ་ཕྲན་བགྲང་དུ་ཅི་སྟེ་འབྱོན། །གང་མ་ཤེས་པས་བསྟན་བཅོས་ཁྲི་བཀླགས་ཀྱང་། །རྡོ་རྗེ་འཛིན་པའི་ངེས་གསང་མི་རྙེད་པ། །དེ་ཉིད་མ་ཤེས་ཀུན་ཤེས་གཅིག་རྡུགས་འདིས། །རྟོག་མེད་རིག་པའི་ཞལ་ངོ་བསྐུངས་ཀྱིས་དོགས། །བྱས་བྱས་ཟིན་པ་མེད་པའི་ལས་རླུང་རྟ། །བསམ་བསམ་འགྲུབ་དུས་མེད་པའི་ཀུན་རྟོག་བློ། །བསྒོམ་བསྒོམ་རྟོགས་དུས་མེད་པའི་ཡིད་དཔྱོད་སེམས། །ཐམས་ཅད་བཞག་སྟེ་འདིར་ཉལ་སྤྲོ་ལ་བཞུགས། །འཕྲོས་དོན་དུ་ཞུ་བ། །ལར་ཀུན་མཁྱེན་འཇིགས་མེད་གླིང་པའི་ཞལ་ནས། །ང་མིག་འགྲིབ་ན་སོ་རྒས་པ་ལ། །རེ་ཆེ་དང་ཨུ་ཚུགས་མ་མཛད་ཨང་། །ཞེས་གསུངས་པ་ཉིད། །ངེད་ནས་ཀྱང་ང་བློ་རྟུལ་ཁ་ལྕེ་ལྐུགས་པོ་ལ། །འོས་མེད་ཀྱི་ཡུས་ཆེ་མི་མཛད་འཚལ། །ཞེས་འདོན་པ་བསྒྱུར་ཆོག་པས་གཏི་ཐུག་གི་བཀའ་གནང་མི་མཛད་པར་ཞུ། །འོན་ཀྱང་རང་གིས་གོ་ཚོད་དང་སེམས་ལ་ཤར་ལུགས་མདོར་བསྡུས་ཙམ་ཞུ་ན། ཀ་དག་ཁྲེགས་ཆོད་ཀྱི་ལྟ་སྒོམ་སྤྱོད་འབྲས་ཐམས་ཅད་ཧྲིལ་གྱིས་དྲིལ་ན། གཞི་གང་ལ་རྟེན་བཅའ་བ། ལམ་གང་གིས་ཉམས་སུ་བླང་བ། དེ་ལྟར་བསྒོམས་པའི་ལག་རྗེས་འབྱུང་ལུགས་རྣམས་སུ་འདུ་བར་སྣང་ལ། གཞི་ནི་གཉུག་མའི་ཡེ་ཤེས་རང་བྱུང་རིག་པ་ཉིད་ཡིན་ཏེ། ཚིགས་བཅད་སྨྲས་མ་ཐག་པ་རྣམས་སུ་རིག་པའི་ཡིན་ལུགས་མདོ་ཙམ་ཞུས་ཟིན་ལགས། ལམ་ནི་ལྟ་བའི་ཡིན་ལུགས་ཐག་ཆོད་པ་སྔོན་དུ་བཏང་སྟེ་ཐག་ཆོད་ཐོག་དེར་འཇོག་དགོས་པ་ཡིན། །འཇོག་ལུགས་ཀྱང་ཉུང་ལ་གསལ་བར་ཞུས་མ་ཐག་པ་དེ་ཡིན། དོན་རྩར་འོད་གསལ་བའི་ཡེ་ཤེས་དེའི་རྣམ་པ་དེ་ཉིད་མ་བརྗེད་ཙམ་དུ་བསྡད་ན་མ་ཡེངས་མི་སྒོམ་པའི་དོན་ཚང་བ་ཡིན། འོད་གསལ་གྱི་དགོངས་པའི་བབ་ནི། ངོ་བོའི་ཆ་ནས་སྟོང་། རང་བཞིན་གྱི་ཆ་ནས་གསལ། ཐུགས་རྗེའི་གདངས་འགག་མེད་དུ་འཆར་བའི་གནས་ལུགས་སེམས་ཀྱི་རྡོ་རྗེ་ཉིད་དེ། །དེ་ཉིད་དེ་དང་རྣམ་པ་འདྲ་བའི་ལམ་གྱིས་མངོན་དུ་བྱས་ནས། །ཕྱིའི་ཡུལ་དུ་མ་སྤྲོས། །ནང་གི་སེམས་སུ་མ་བཅིང་། བར་གྱི་གནས་ཉམས་ལ་མ་ཞེན་པར། ཧ་རེ། སང་ངེ་ཁྲེས་སེ། སོ་མ་རང་བཞག་ཆེན་པོའི་ཀློང་དུ་བཟོ་བཅོས་མེད་པར་ངང་གིས་གནས་ན་གཟུང་འཛིན་དམིགས་གཏད་ཀྱི་མཚན་མའི་སྤུ་རིས་ཐམས་ཅད་ཆུའི་རི་མོ་ཡལ་བ་ལྟར་རང་གྲོལ་དུ་འགྲོ། སྒོམ་ཆེན་ཟེར་བ་ཁྱིས་རྡོ་བསྙེགས་པ་ལྟ་བུ་ཞིག་མ་ཡིན་པར། རྟོག་ཚོགས་ཅེར་གྲོལ་གྱི་གནད་ལ་མཁས་པས་སེམས་ཀྱི་ཡལ་ས་ཁོ་ནའི་སྟེང་དུ་འཇོག་སྒོམ་བྱེད་པ་ཞིག་གནད་དུ་ཆེ། དེ་ལྟར་བྱས་ན་བཟང་ངན་གྱི་རྟོག་པ་ག་འདྲ་ཞིག་ཤར་ཡང་། དེ་དག་ཐམས་ཅད་རྩིས་མེད་དུ་སོང་ནས་ཐ་མལ་གྱི་ཤེས་པ་འདི་སྒོམ་དུ་ཧྲིལ་གྱིས་འཆར་རྒྱུ་ཡོང་། གཞན་དུ་ན་རྣམ་རྟོག་ཤར་བ་ན་གཡག་སྣ་ཁུ་ཚུར་གྱི་གཉེན་པོས་སླེབས་པ་དང་བསམ་གཏན་གྱི་གནས་ཆ་གྲུང་པོ་ལ་ལྷོད་ཀྱིས་འཇོག་པ་སོགས་ཐུགས་དམ་ཇི་ཙམ་བཟང་ཡང་རང་བཞིན་རྣམ་དག་གི་དྲན་པ་མི་ཟེར་བ་ཡིན། ལར་རྫོགས་པ་ཆེན་པོའི་ལམ་འདིས་བསོད་ནམས་ཀྱི་ཚོགས་འདུམ་ལུགས་ཐམས་ཅད་འོད་གསལ་གཞོན་ནུ་བུམ་སྐུར་གནད་དུ་བསྣུན་པ་ལ་ཐུག་ཅིང་། ཡེ་ཤེས་ཀྱི་ཚོགས་འདུམ་ལུགས་ནི་དེའི་དབྱིངས་དང་ཡེ་ཤེས་དབྱེར་མི་ཕྱེད་པའི་མཉམ་བཞག་ལ་ཐུག་ཡོད་པས་དེ་གཉིས་ཐུགས་དམ་གྱི་སྙིང་པོ། ཨོ་སོ་གསུམ་གྱི་མདོ་སོ། ལུང་པ་ཕུ་དགུའི་མདོ་འགགས་སུ་མཁྱེན་པར་མཛོད་ལ། ཡུལ་ཅན་གྱི་རིག་པ་རྗེན་པར་བྱུང་རྗེས་ཡུལ་ཆོས་ཉིད་ཁྱབ་གདལ་ཆེན་པོའི་ངང་ལ་ཀློད་དེ། སྣང་བ་གདོང་འདེད་ཀྱི་ཉམས་ཤིགས་སེ་བའི་རྒྱུན་སྐྱོངས། ཡུལ་དང་ཡུལ་ཅན་བཤད་མ་ཐག་པའི་དོན་ཡང་ནམ་གཉུག་མའི་དྲན་རིག་གི་སྟེང་དུ་སླེབས་ཀྱང་རུང་། དེ་ཉིད་ཀྱི་ངོ་བོ་ལ་ཅེར་གྱིས་བལྟས་པས་ཆོས་ཉིད་ཀྱི་དྲན་པ་ཡེ་སྟོང་བབ་སྟོང་ཆེན་པོ། གཞི་སྟོང་ཡོངས་སྟོང་གི་རང་བཞིན་ལས་སྐད་ཅིག་ཀྱང་གཡོ་མ་མྱོང་བའི་གནད་ཀྱིས། ཁོའི་ངོ་བོ་ལ་དབྱིབས་དང་ཁ་དོག །རྟགས་དང་མཚན་མ། ངོ་བོ་ངོས་བཟུང་ཐམས་ཅད་ལས་འདས་པས་སྨྲ་བསམ་བརྗོད་མེད་ཆེན་པོར་གཉིས་འཛིན་གྱི་ཀུན་རྟོག་རགས་པ་ནུབ་པའི་རྣམ་ལྡན་དུ་འཆར་བ་ལ། དབྱིངས་དང་ཡེ་ཤེས་གཉིས་ཡུལ་ཡུལ་ཅན་དུ་ཐ་སྙད་སྦྱར་བ་ཡིན་གྱི། རྟོག་གེའི་དཔྱད་སྒོམ་ལ་ཡུལ་ཡུལ་ཅན་འཆར་ལུགས་དང་གཏན་ནས་མི་འདྲ་བར་ཤེས་པར་གྱིས་ཤིག །དེ་དག་ཐམས་ཅད་མདོར་བསྡུ་ན་རིག་པའི་ཡིན་ལུགས་ཤེས་པ་དང་གཅིག །ཤེས་ཐོག་དེར་རྩོལ་མེད་ཀྱི་དྲན་པའི་ངང་ལ་གནས་པ་དང་གཉིས། རྟོག་ཚོགས་ཤར་གྲོལ་དུས་མཉམ་ཐད་ཀར་བཅད་པ་དང་གསུམ། ཀུན་ཏུ་རྨོངས་པ་ཆ་དང་བཅས་པའི་ཞེན་ཡུལ་གཞི་མེད་དུ་མཐོང་བའི་སྒོ་ནས་སེམས་ལ་ཕན་པ་དང་བཞི། ལས་རླུང་འཕྲུལ་རྟོག་དང་བཅས་པ་ཡེ་གྲོལ་ཀ་ནས་དག་པའི་ཆོས་ཉིད་དུ་སྦྱངས་པས་རྟོག་པར་མ་འགྱུས་པ་དང་ལྔ་ཤར་བ་དང་གནས་པ་གང་གི་ཚེ་ཡང་རེ་དོགས་མེད་པའི་ཅོག་བཞག་གི་དྲན་པ་མ་ཉམས་པ་དང་དྲུག །ཁྱི་ལྡོམ་སྐོར་འགྲོས་ལ་སོང་བ་ལྟར་ངེས་མེད་ཀྱི་གླེན་སྒོམ་ཨུ་ཚུགས་ཅན་མ་ཡིན་པར་ལྷུན་གྲུབ་ཕྱོགས་མེད་ཀྱི་དགོངས་པ་ཀློང་དུ་གྱུར་པ་དང་བདུན་པོ་དེ་དག་ཏུ་མི་འདུ་བ་མེད་དོ། །ཞེས་ཆོས་ཀྱི་རྒྱལ་པོ་ཀློང་ཆེན་ཞབས་ཀྱིས་གསུངས་སོ། །

གཞན་ཡང་ལྟ་སྒོམ་གྱི་མན་ངག་སྙིང་བསྒྲིལ་ཚིག་གསུམ་གནད་ལ་འབེབས་པ། ངོ་མཚར་ཚིག་ཆེན་རྣམ་བརྒྱད། རྡོ་རྗེའི་གད་མོ་བཅུ་གཉིས། གྲོལ་ལུགས་གསུམ། ཅོག་བཞག་རྣམ་པ་བཞི། བཞག་ཐབས་ཆེན་པོ་བཅུ་གཉིས་ལ་སོགས་རྒྱ་ཆེར་ན་མཐའ་ཡས་པ་ཞིག་ཡོད་མོད་ཀྱི། མདོ་དོན་གོ་བདེ་བ་ཙམ་ཞིག་བརྗོད་པ་ལགས། སྤྱིར་ཡང་དེང་སང་གི་རྟོགས་ལྡན་པ་རྡོ་རྗེ་ཐེག་པའི་མགོ་མཇུག་ཀྱང་གང་ཡིན་རྔོ་མ་ཐོགས་པ་རྣམས་ཀྱི་ཉམས་མྱོང་འཇང་གི་གཟུགས་པོ་ལྟ་བུ་རྡོ་རྗེ་འཆང་གི་ཉེ་ལམ་མ་ཡིན་པས་མོས་གུས་སྲོག་ཏུ་བཟུང་། དབང་བཞིའི་ཉམས་ལེན་དང་སྦྱར། དམ་ཚིག་ལ་སྙིང་ལྟར་བཙའ། གྲོགས་སུ་བྱང་ཆུབ་ཀྱི་སེམས་རིན་པོ་ཆེ་ཕུར་ཚུགས་སུ་བསམ་པའི་སྒོ་ནས་སྐུ་ཚེ་དོན་ཡོད་པར་མཛད་ན་རང་དྲིན་རང་ལ་ཆེ་བ་ཡིན་ནོ། །སྤྲོས་བཤད་ཚིག་གི་ལོ་འདབ་མི་ཆེ་ཡང་། །དོན་བཤད་ཉམས་ལེན་གདམས་པའི་སྙིང་པོ་འདི། །བསྡུས་བཤད་རྒྱལ་བ་ཁ་བཅིང་ཡིག་ཆུང་དུ། །རྡོ་རོང་གོག་པོ་ཁ་ཤད་དེས་བྲིས་སོ། །ཞེས་པའང་བླ་མ་ཡེ་ཤེས་རྒྱ་མཚོའི་ངོར་རྡོ་སྨད་ཀྱི་བནྡྷེ་གཞོན་ནུ་ཆོས་སྨྲ་བ་འཇིགས་མེད་བསྟན་པའི་རྒྱལ་མཚན་དུ་འབོད་པས་སུག་ལས་སུ་བགྱིས་པ་དགེ་བར་གྱུར་ཅིག། །