འོད་གསལ་རྫོགས་པ་ཆེན་པོའི་ལམ་གནད་ལེགས་པར་སྟོན་པའི་ཟིན་བྲིས་ཐོར་བུའི་སྐོར།
བླ་མ་འཇམ་པའི་དབྱངས་ལ་ཕྱག་འཚལ་ལོ། །འདིར་འོད་གསལ་རྫོགས་པ་ཆེན་པོའི་ལམ་གནད་ལེགས་པར་སྟོན་པའི་ཟིན་བྲིས་སྐོར་ཐོར་བུ་ཞིག་ལ། སྤྱིར་རྫོགས་ཞེས་པ་ནི། རང་བྱུང་ཡེ་ཤེས་འདི་ཉིད་ཡེ་ནས་རྣམ་པར་དག་པའི་བདག་ཉིད་ཅན། སྐུ་དང་ཡེ་ཤེས་རྒྱ་མཚོའི་བདག་ཉིད་དུ་རྫོགས་པ་ནའོ། །ཆེན་པོ་ཞེས་པས་༼དུས་ཀྱི་འོད་གསལ་ལྟ་བུའི་དབྱིངས་ཀྱི་དོན་དམ་ཡིན། དེ་ནི་ཀུན་རྟོག༽ནི། ལམ་ཐམས་ཅད་ལས་གཞན་དུ་འཕགས་པས་ནའོ། །སྤྱིར་ལམ་དུས་སུ་ངོ་སྤྲད་རྒྱུའི་རིག་པ་ནི། རྫོགས་ཆེན་སྐབས་ཀྱི་ནི་གཙོ་ཆེར་གཞི་སྣང་དུས་ཀྱི་རིག་པ་ཡིན་ལ། དེ་ནི་ལྷག་མཐོང་ཐམས་ཅད་ཀྱི་རྒྱལ་པོ་ཤེས་རབ་རིག་ཆ་ནས་ངོ་སྤྲད་དགོས། སྒྱུ་འཕྲུལ་གསང་སྙིང་གི་སྐབས་ན་གཏན་ཚིགས་ལ་བརྟེན་ནས་ངོ་སྤྲད་བྱའི་གནས་ལུགས་ནི་འཆི་དུས་ཀྱི་འོད་གསལ་ལྟ་བུའི་དབྱིངས་ཀྱི་དོན་དམ་ཡིན་ལ། དེ་ནི་ཀུན་རྟོག་ཕྲ་རགས་བཞོན་པ་དང་བཅས་པ་བསྒོམ་སྟོབས་ཀྱིས་མིན་པར་འཆི་སྟོབས་ཀྱིས་ཐིམ་པས་རྣམ་པར་མི་རྟོག་པའི་དབྱིངས་ཤུགས་ཆེ་བའི་འོད་གསལ་འཆར་ལ། རྒྱུད་འདི་དེ་ཆོས་ཐམས་ཅད་ཀྱི་ཡིན་ལུགས་ངོ་འཕྲོད་པའི་ཤེས་རབ་ཀྱིས་ཟིན་པ་མ་གཏོགས་དེ་དང་ཆ་འདྲ་བའི་འོད་གསལ་གྱི་དབྱིངས་མངོན་དུ་བྱེད་པ་ཡིན་ལ། རྫོགས་པ་ཆེན་པོའི་མན་ངག་སྡེའི་སྐབས་སུ་དབྱིངས་དེའི་ཆར་གྱུར་པའི་དབྱིངས་དེ་ཉིད་ངེས་བྱེད་ཀྱི་ཤེས་རབ་རིག་ཆ་ངོ་སྤྲད་པ་ཡིན་ལ། དེ་ཡང་གཞི་དང་གཞི་སྣང་གཉིས་ཀ་ལས་གཞི་སྣང་གི་རིག་པ་ད་ལྟའི་སེམས་འདིའི་སྟེང་གི་རིག་ཆ་དེ་ངོ་སྤྲད་པས། རིག་ཆ་དེ་ནི་ཡེ་ནས་དབྱིངས་ཀྱི་རྒྱལ་ས་ལས་གཡོ་མ་མྱོང་བའི་ལྷག་མཐོང་ཁྱད་པར་ཅན་ཡིན་པས་རྣམ་པར་མི་རྟོག་པའི་དབྱིངས་ལ་འདྲེས་སླ་བ་ཡི་ཁྱད་དོ། །མདོར་ན་རྒྱུད་གསང་བ་སྙིང་པོར་སྤྱི་དོན་མཛོད་ལྡེ་ལས་གསལ་བར་བཤད་ན་འོད་གསལ་གྱི་རྟོགས་པ་དངོས་སུ་རྙེད་ནས་དེའི་ཆར་གྱུར་པའི་ཤེས་རབ་སྐྱེས་པ་སྟེ། ཁོག་གཞུང་ལས། ལྷུན་གྲུབ་ཡེ་ཤེས་སྒྲོན་མེ་ཉིད། །རང་བཞིན་གསལ་བ་སྤྱན་གྱི་མཆོག ། ཅེས་སོ། །ཞེས་གསུངས་པ་ལྟར་ཡིན་ལ། རྫོགས་ཆེན་སྐབས་སུ། རྟོགས་བྱེད་ཤེས་རབ་རིག་ཆ་རྩལ་དུ་བཏོན་ནས་ངོ་སྤྲད་པ་ཉམས་སུ་བླངས་པས་རིག་པ་དབྱིངས་ཀྱི་རྒྱལ་ཁབ་ཏུ་སོན་སླ་བ་ཡིན་ནོ། །སྙིགས་དུས་འདིར་རྫོགས་ཆེན་གྱི་ཆེད་དུ་བྱ་བའི་གདུལ་བྱ་མང་ཟེར་དགོས་ཏེ། ཀུན་བཟང་ཐུགས་ཀྱི་བསྟན་པ་ཤིན་ཏུ་དར་བའི་དུས་སྐབས་སུ་གསུངས་པའི་ཕྱིར་རོ། །དེ་ལ་དོགས་པ་གཞན་དུ་བཀོད་ཟིན། དོགས་པ་དེ་སེལ་ཚུལ་རང་བློར་འཆར་ཚོད་ཙམ་བྲིས་ན། སྙིང་ཐིག་ཕྱི་མའི་བཀའ་བརྒྱད་དཔལ་ཆེན་འདུས་པའི་བསྐུལ་བྱང་ལས། ལོག་རྟོགས་དངོས་པོར་ཞེན་པའི་སེམས་ཅན་རྣམས༔རྒྱུ་འབྲས་ཐེག་པ་གཞན་གྱིས་གདུལ་དཀའ་བས༔རང་བྱུང་ཡེ་ཤེས་རྟོགས་པའི་ཕྲིན་ལས་མཛོད༔ཅེས་པ་ལྟར་ལ། དེའི་དོན་སྐབས་ཀྱི་དབང་གིས་རྒྱལ་བ་སྲས་བཅས་ལ་དྲག་པོའི་ཕྲིན་ལས་མཛད་པར་བསྐུལ་བའི་སྐབས་ཡིན་ནོ། །དེ་ལྟར་ན་འདིའི་རང་བྱུང་ཡེ་ཤེས་རྟོགས་པའི་ཕྲིན་ལས་མཛད་ཡུལ་དེ་ཞི་རྒྱས་དབང་གསུམ་གྱི་ཕྲིན་ལས་ཀྱིས་འདུལ་སྐལ་མ་ཡིན་པར་ཤེས་ཤིང་། གཞན་ཡང་ཞི་སོགས་ཀྱི་ཕྲིན་ལས་ཀྱི་འདུལ་སྐལ་ཡིན་ན། རྒྱུ་དང་འབྲས་བུའི་ཐེག་པ་གཞན་གྱིས་འདུལ་རུང་དུ་འགྱུར་དགོས་ནའང་། དེས་འདུལ་དཀའ་བས་ཞེས་གསུངས་མ་ཐག་པ་ལྟར་ལ། སྤྱིར་དྲག་པོའི་གདུལ་བྱ་ལ་ཞིང་བཅུ་གང་རུང་ཚང་བའམ་ཉམས་པ་བདུན་དང་ལྡན་པ་དགོས་པ་གྲགས་ཆེ་བ་ལྟར་རོ། །གདུལ་བྱ་དེ་ཉིད་ད་ལྟ་འཕྲལ་རྐྱེན་གྱི་དབང་གིས་དེ་འདྲར་འགྱུར་བ་དང་། སྤྱིར་སྔོན་སངས་རྒྱས་སོགས་སྟོན་པ་ཁྱད་པར་ཅན་དང་མཇལ་ནས་གསང་སྔགས་ཀྱི་ཆོས་ལ་འབྲེལ་བ་ཐོབ་པའི་ངོས་ནས་དགེ་ཚོགས་རླབས་པོ་ཆེའི་བག་ཆགས་ལྡན་པ་ཞིག་ཀྱང་དགོས་ཏེ། དཔེར་ན་རུ་ཏྲའི་བྱུང་བ་བཞིན་ནོ། །དེས་ན་ད་ལྟ་ཡང་སེམས་ཅན་ཤིན་ཏུ་མ་རུང་པ་རྒྱུད་ཉོན་མོངས་པས་འཁྲུགས་པ་ཤས་ཆེ་བར་གྱུར་པའི་སྐབས་འདིར། སངས་རྒྱས་ཀྱི་བསྟན་པ་བཤིག་པ་སོགས་དྲག་པོའི་གདུལ་བྱ་ཤིན་ཏུ་མང་བ་མངོན་སུམ་གྱིས་གྲུབ་ལ་འདི་སྐབས་སུ་ཆོས་འཆད་ཉན་བྱེད་པ་སོགས་ཀྱི་སྒོ་ནས་ཞི་སོགས་གསུམ་གྱི་ཕྲིན་ལས་ཀྱིས་རྫོགས་པ་ཆེན་པོ་བསྟན་ཡུལ་གྱི་གདུལ་བྱ་དབང་རྣོན་ཆེས་མང་ཟེར་བ་ཡིན་ཏེ། དྲག་པོའི་ལས་ཀྱིས་རྟོགས་པ་ངོ་འཕྲོད་པའི་གདུལ་བྱ་ཆེས་ཤིན་ཏུ་མང་ཟེར་བ་ཡིན་བྱས་ན་ཅི་འདྲ་དཔྱད། གཞན་ཡང་། དབང་བཞིའི་སྐབས་སུ་ཚིག་དབང་གིས་དྲག་པོའ ི་ལས་ལ་དབང་ཞེས་པ་དང་ཡང་བསྒྲིགས་ན་གོ་རྒྱུ་ཞིག་ཡོད་དམ། མ་འོངས་དུས་ན་དུས་ཀྱི་འཁོར་ལོའི་དུས་བཞིའི་ཕྱི་མའི་བསྟན་པ་འབྱུང་བ་ན། རིགས་ལྡན་དྲག་པོ་འཁོར་ལོ་ཅན་གྱི་དམག་གི་རྟ་རྨིག་གི་འོག་ཏུ་ཤི་བའི་སྲོག་ཆགས་ཀྱང་གྲོལ་ངེས་སུ་གསུངས་པ་དེ་དག་ཀྱང་སྔགས་ཀྱི་ཆེད་དུ་བྱ་བའི་གདུལ་བྱར་ཁས་ལེན་དགོས་པ་བཞིན་ནོ། ༈ །ཀུན་གཞི་དང་ཀུན་གཞིའི་རྣམ་ཤེས་ཀྱི་ཁྱད་པར་ལ་དྲི་བ་གནང་བར་ཚད་ལྡན་ཞིག་ཞུ་ཤེས་དཀའ་ཡང་། ཤེས་ཚོད་ཙམ་ཞུ་ན། སྤྱིར་སྐབས་འདིར་ཀུན་གཞི་དང་མ་རིག་པ་ཞེས་པ་གཉིས་དོན་གཅིག་ལ། དེས་ན་སེམས་ཅན་ཐ་མལ་བ་རྣམས་ལ་སྟོད་གཞིའི་འོད་གསལ་དང་། སྨད་གཞི་སྣང་ཆོས་ཉིད་བར་དོའི་སྣང་བ་འཆར་བའི་སྐབས་སུ་ཡང་། རང་ངོ་མ་ཤེས་པའམ། གནས་ལུགས་མ་ཤེས་པའི་རྨོངས་ཙམ་པ་འདི་ཀ་ཡེ་ནས་འབྲལ་མ་མྱོང་བས་བདག་ཉིད་གཅིག་པའི་མ་རིག་པ་ཞེས་བྱ་ཞིང་། དེ་ཀུན་གཞི་ཡང་ཡིན་ཏེ། རང་ངོ་མ་མཐོང་བ་དང་འཁྲུལ་གཞི་ཡིན་པའི་ཆ་ནས་དེ་ལྟར་བརྗོད་དོ། །བདག་ཉིད་གཅིག་ཅེས་པ་ནི་རིག་པ་ཡེ་ཤེས་དང་ཀུན་གཞིའི་རྨོངས་ཆ་གཉིས་ངོ་བོ་གཅིགརྫས་གཅིག་ཟེར་བ་ལྟ་བུ་མིན་པར་གསེར་དང་གཡའ་བཞིན་ཡེ་ནས་འབྲལ་མ་མྱོང་བའི་ཆ་ནས་དེ་ལྟར་བརྗོད་དོ། །ཡོན་ཏན་མཛོད་དུ་གསུངས་པ་ལྟར། ཀུན་གཞིའི་རྨོངས་ཆ་དེ་ཚུར་ཅུང་ཟད་རགས་པར་གྱུར་པའི་གནས་སྐབས་ན། སྔར་ལས་འཛིན་སྟངས་ཅུང་ཟད་གསལ་ཀྱང་། དཔེར་ན་རྒྱང་རིང་པོ་ནས་མི་མང་པོ་འཚོགས་པ་མཐོང་ཡང་རེ་རེ་ནས་འདིའོ་སྙམ་དུ་འཛིན་སྟངས་ཀྱི་་ཡུལ་དུ་བྱ་མི་ནུས་པ་བཞིན་དུ། རྨོངས་པ་དེས་ཀྱང་གསལ་བར་ཡུལ་ཕྱིན་ཅི་ལོག་ཏུ་འཛིན་མི་ནུས་པའི་སྐབས་ན་ལྷན་ཅིག་སྐྱེས་པའི་མ་རིག་པ་ཞེས་བྱའོ། །དེ་ལྟར་ན་ཀུན་གཞི་འདི་ལ་ཡེ་དོན་གྱི་ཀུན་གཞི། སྦྱོར་བ་དོན་གྱི་ཀུན་གཞི། བག་ཆགས་ལུས་ཀྱི་ཀུན་གཞི་གསུམ་དུ་ཕྱེ་བ་ལས་སྔ་མ་གཉིས་ཀ་བཤད་མ་ཐག་པའི་ཀུན་གཞི་དང་དེའི་རྣམ་ཤེས་གཉིས་ཀའོ། །ཀུན་བཏགས་མ་རིག་པ་ནི་ཆོས་དང་གང་ཟག་གི་བདག་འཛིན་འཁོར་རྩ་མིན་ཕར་ཐེག་ལྟར་ལ་ཐུགཀུན་གཞི་དང་རིག་པའི་ཤན་འབྱེད་ནི། གནད་གསུམ་ཤན་འབྱེད་ལས། ཀུན་གཞི་འཁོར་འདས་ཀུན་གྱི་གཞི་ཡིན་ཏེ༔རྙོགས་མ་ཅན་གྱི་ཆུ་དང་ཁྱད་པར་མེད༔བག་ལ་ཉལ་གྱི་གཏི་མུག་མགོ་རྨོངས་ནས༔ཡེ་ཤེས་རིག་པའི་དྭངས་ཆ་ལྐོག་ཏུ་གྱུར༔ཆོས་སྐུ་རྙོགས་མ་ཅན་གྱི་ཆུ་དང་འདྲ༔གློ་བུར་དྲི་མ་སྤངས་པའི་བདག་ཉིད་ཅན༔རྣམ་གྲོལ་ཡོན་ཏན་ཀུན་གྱི་ངོ་བོ་སྟེ༔ཕྱིན་ཆད་འཁྲུལ་མི་ཤེས་པའི་ཡེ་ཤེས་ཡིན༔དེ་ཕྱིར་ཆུ་དང་རྙོགས་མ་ཕྱེེ་བ་བཞིན༔ལུང་མ་བསྟན་གྱི་ཆ་ལས་ལྡོག་པ་ཡིན༔རང་རིག་ཆོས་སྐུའི་ཀློང་དུ་བཙན་ས་ཟུངས་༔ཡེ་ཤེས་དྲི་མེད་དབྱིངས་ལ་ལྟད་མོ་ལྟོས༔ཀུན་གཞིའི་རྣམ་ཤེས་ཆུ་ནང་ཆབ་རོམ་འདྲ༔ངོ་བོའི་གཤིས་ལ་འཛིན་པའི་རྩལ་ཤར་ཏེ༔གཟུང་བའི་ཡུལ་ལ་ཆགས་པས་ཕར་ཆེར་བསླུ༔དེ་ཕྱིར་གཟུགས་ཚོར་འདུ་ཤེས་ལ་སོགས་པའི༔ཡུལ་སྣང་རང་སྟོང་ཤེས་པའི་ཡེ་ཤེས་ཀྱི༔རྣམ་རིག་ཆོས་སྐུར་འཕོ་བ་སྙིང་ཐིག་གནད༔ཅེས་གསུངས་པ་སོགས་ཀྱི་སྟེང་ནས་ཐུགས་དཔྱད་གནང་བས་འཐུས།
༈ སྤྲུལ་སྐུ་རིན་པོ་ཆེ་ལ་སྙན་སྒྲོན་དུ་གསོལ་བ། ཀུན་མཁྱེན་ཆོས་ཀྱི་རྒྱལ་པོའི་བཞེད་པ་ལྟར་ན། འཁོར་ལོ་ཐ་མའི་མདོ་དང་དགོངས་འགྲེལ་རྒྱུད་བླ་མ་སོགས་ཀྱི་བརྗོད་བྱའི་གཤེགས་སྙིང་དེ་གཉུག་སེམས་ཀྱི་དབྱིངས་ལ་བཞག་པར་མཛད་པ་ལ། དོགས་གཅོད་སྤྱི་དོན་མཛོད་ལྡེར་གནང་བ་ལྟར་ལ་གཟིགས་པས་འཐུས་ལ། རྫོགས་ཆེན་སྐབས་སུ་སྤྱིར་རྫོགས་ཆེན་སྟོན་པ་བཅུ་གཉིས་པོ་ལས། དང་པོ་བཅུ་གཅིག་མཆོག་གི་སྤྲུལ་སྐུར་འདོད་རྒྱུ་ཡིན་མིན་དང་། རྫོགས་པ་ཆེན་པོའི་བསྟན་པ་འདི་ཉིད་སྙིགས་མའི་དུས་སུ་ཤིན་དུ་དར་བར་གསུངས་པའི་རྒྱུད་དང་ཀུན་མཁྱེན་གྱི་དགོངས་པ་དེ་སྒྲ་དྲངས་ཐད་དུ་ཁས་ལེན་དགོས་སམ་མི་དགོས། དགོས་ན་སྙིགས་མ་ཆེར་བདོ་བའི་སྐབས་འདི་ལྟ་བུར་རྫོགས་ཆེན་གྱི་ཆེད་དུ་བྱ་བའི་གདུལ་བྱ་ཆེས་ཆེར་མང་བར་ཁས་ལེན་དགོས་སམ། དགོས་ན། རྫོགས་པ་ཆེན་པོ་ནི་ཐེག་པ་ཆེན་པོ་ལས་ཀྱང་ཆེན་པོ། གསང་སྔགས་རྡོ་རྗེ་ཐེག་པ། དེའི་ནང་ནས་བླ་མེད། དེ་ལ་ཡང་ནང་རྒྱུད་སྡེ་གསུམ་དུ་འཇོག་པ་ལས་ཀུན་གྱི་རྩེ་མོ་ལམ་ཐམས་ཅད་ཀྱི་སྐྱེལ་སོ་མཐར་ཐུག་པ་འདི་ཀའི་ཆེད་དུ་བྱ་བའི་གདུལ་བྱ་ནི་དབང་པོ་རབ་ལས་ཀྱང་ཡང་རབ་མཆོག་གྱུར་ཞིག་དགོས་ན། དེ་ནི་རྒྱུ་དང་སྨོན་ལམ་དགེ་རྩ་ཚོགས་ཀྱི་གསོག་རྒྱབ་ཤིན་ཏུ་ཆེ་བ་ཞིག་ཡིན་ན། སེམས་ཅན་གྱི་སྙིགས་མ་བདོ་བའི་དུས་འདིར་ཐེག་པ་གཞན་གྱིས་གདུལ་དཀའ་ཞིང་། ཐེག་པ་འདིའི་གདུལ་ཞིང་དུ་འགྱུར་ཚུལ་གང་འདྲ་རེད་སྙམ་པ་དང་། གཞིའི་སྐབས་སུ་ཐོག་མའི་སྤྱི་གཞི་ལས་གཞི་སྣང་མཆེད་པའི་སྐབས་སུ་རང་ངོ་ཤེས་པའི་སྐད་ཅིག་ལ་གྲོལ་བའི་ཀུན་ཏུ་བཟང་པོ་དེ་སྙིང་ཐིག་ཕྱི་མའི་རྒྱུད་དུ་སེམས་ཅན་དང་རྒྱུད་ཐ་དད་མེད་པར་གསུངས། མངའ་བདག་ཉང་གི་པདྨའི་ལམ་རིམ་རྩ་འགྲེལ་སོགས་སུའང་དེ་ཀ་ལྟར་གསུང་སྙམ་པ་ཡོད་པ་ལྟར་ན། ཀུན་མཁྱེན་གྱི་གསུང་སྤྱི་དང་ཁྱད་པར་ཕྱོགས་བཅུའི་མུན་སེལ་སོགས་སུ་གསུངས་པ་དེ་ཡང་གཞི་ཡེ་སངས་རྒྱས་པའི་ཁས་ལེན་གྱི་སྟེང་ནས་བཤད་དགོས་པར་སེམས་ཀྱང་། ཀུན་མཁྱེན་གྱི་གསུང་སོགས་ཀྱི་དངོས་བསྟན་ལ་གྲོལ་བ་མཐར་ཐུག་གི་སངས་རྒྱས་ཞིག་བཀའ་བསྩལ་བ་ལྟར་ན། ཐོག་མའི་མགོན་པོ་ཞེས་དང་། སངས་རྒྱས་ཀུན་ལས་སྔར་སངས་རྒྱས། །ཞེས་སོགས་གསུངས་པའི་ཐོག་མ་དང་། སྔར་ཞེས་པའི་ཚིག་ཟུར་དེ་སྔ་མོ་ན་གོ་དགོས་ལ། དེ་ལྟར་བྱས་ན་སངས་རྒྱས་ལ་ཐོག་མ་འདོད་དགོས། དེ་ཀུན་ཏུ་བཟང་པོར་འཇོག་དགོས། དེ་ཡང་སྟོན་པ་ཐུབ་པའི་དབང་པོ་ཡིན་པར་དགོས་པ་སོགས་སུ་གསལ་མོད་ཀྱང་། སྙིང་ཐིག་གི་ཕྱི་མའི་རྒྱུད་སོགས་ལྟར་ན་དེ་སེམས་ཅན་རང་ག་མ་རྒྱུད་གཅིག་ཏུ་གྱུར་པར་ཁས་ལེན་དགོས་པ་ལྟར་མངོན་ཀྱང་། དེ་ཡང་ཁས་ལེན་མི་བདེ་བས་རང་ལུགས་ཇི་ལྟར་འཇོག་དགོས་ཐུགས་བཀོད་གནང་དགོས་པ་དང་། སྤྱིར་གཞིའི་གནས་ལུགས་ལ་ཐོག་མའི་མགོན་པོ་བཞག་ན། ཐོག་མ་དང་སྔོན་སོགས་ཀྱང་ཀ་དག་གི་ཀའི་དོན་རིན་པོ་ཆེས་བཀའ་སྩལ་བ་ལྟར་འཁོར་འདས་ཐམས་ཅད་ཀྱི་འཆར་གཞིའི་ཡིན་ལུགས་མཐར་ཐུག་དེ་ལ་ཐོག་མ་དང་། སྔོན་དང་། ཀ་དང་། དང་པོ་སོགས་སུ་གོ་ཚུལ་དཔྱིས་ཕྱིན་པ་ཞིག་ཡོད་ཅིང་། གོ་བདེ་ཡང་རྒྱུད་དང་ཀུན་མཁྱེན་གྱི་དགོངས་པ་ཟབ་པས་བདག་འདྲའི་བྱིས་བློས་འཇོག་མཚམས་ཁ་ཚོན་གཅོད་མི་ནུས་ཤིང་མི་རུང་བས་ཇི་ལྟར་ཡིན་རྔོ་མ་ཐོགགཞན་གཞི་ཡེ་སངས་རྒྱས་པ་འདི་རྙིང་མའི་རྒྱུད་ཀྱི་འཆད་ཚུལ་ཐུན་མིན་ཡིན་ཞིང་། འདི་ཀ་སྔ་འགྱུར་བཀའ་གཏེར་གང་གི་ཡང་གཞི་ལམ་འབྲས་གསུམ་གྱི་འཆད་ཚུལ་སྔགས་ཀྱི་དགོངས་པ་དང་ཡང་མི་འདྲ་བ་ཡོད་པའི་སྲོག་ཏུ་སྣང་ལ། དེ་ཡང་གཞི་དེ་གློ་བུར་བྲལ་དག་གི་འབྲས་བུ་མཐར་ཐུག་ཏུ་ཁས་ལེན་པ་མིན་མོད། རང་བཞིན་རྣམ་དག་དྲི་མ་འབྲལ་རུང་ཡོན་ཏན་སྐྱེ་རུང་ཙམ་གྱི་རིགས་ནི་ཐེག་ཆེན་གྱི་མདོ་དང་ཕྱི་རྒྱུད་སྡེ་གསུམ་གྱི་སྐབས་སུ་ཡང་ཁས་ལེན་དགོས་པས་དེ་ཙམ་གྱིས་དོན་རྫོགས་པར་མ་མཐོང་ནས། བླ་མེད་ཀྱི་རྒྱུད་སྡེའི་སྐབས་སུ་བཤད་པའི་རང་བཞིན་རྣམ་དག་གི་གནས་ལུགས་དེ་ངོས་བཟུང་ན་སེམས་ཉིད་གཉུག་མའི་ཡེ་ཤེས་གློ་བུར་བའི་དྲི་མའི་ངོ་བོར་སྐྱེ་མ་མྱོང་བ་དེ་ཡིན་ལ། དེ་ལ་ནང་རྒྱུད་གཞན་དུ་འཆད་ཚུལ་མང་དུ་ཡོད་ཀྱང་ཐེག་པ་ཆེན་པོའི་སྐབས་སུ་འདིར་ངོ་བོ་སྟོང་པ་སོགས་གསུམ་དང་ཀ་དག་ལྷུན་གྲུབ་ཟུང་འཇུག་ཏུ་གསུངས་པས་སྟོང་ཆེན་ཀ་དག་གི་དབྱིངས་ངོ་བོ་སྟོང་པའི་ཡེ་ཤེས་ལ་ནི་འཁོར་འདས་ཀྱི་སྤྲོས་པ་གང་ཡང་ཡོད་མ་མྱོང་བའི་རྡོ་རྗེ་ནམ་མཁའི་དཀྱིལ་ལྟ་བུ་ཞིག་ཡིན་པར་མ་ཟད་སྣང་ཆ་ལྷུན་གྲུབ། རང་བཞིན་དག་པའི་ཡེ་ཤེས་དེ་ཉིད་ཀྱང་གཤིས་ཆུའི་རང་བཞིན་ཆབ་རོམ་དུ་མི་གནས་པ་ལྟར་དྲི་མའི་ངོ་བོར་སྐྱེ་མ་མྱོང་བས་ཀུན་གཞི་མ་རིག་པའི་གློ་བུར་གྱི་དྲི་མའི་སྨག་སངས། རིམ་བཞིན་སྐུ་དང་། སྤངས་པའི་ཡོན་ཏན་ཡེ་ཤེས་ཐམས་ཅད་འཆར་མ་རག་ཏུ་ཡོད་པས། གཞི་ཡེ་སངས་རྒྱས་པར་ཁས་ལེན་དགོས་ཞེས་བདག་ཅག་གི་མཁན་པོ་རྡོ་རྗེ་འཆང་ནས་ནན་ཏན་དུ་གསུངས་པས་དཔྱད་བཟོད་འདྲ་ལགས། ༈ རྫོགས་ཆེན་ལམ་གྱི་ངོ་བོ་སྐྱོང་ལུགས་ཀྱི་ཚིག་རྩ་ཞོགབཀའ་སྩལ་བའི་ཞུ་ལན་མཚོན་ཙམ་ནི། སྐབས་འདིའི་ལམ་གྱི་གདུལ་བྱ་ལ་ངོ་སྤྲད་རྒྱུའི་རིག་པ་ནི་གཙོ་ཆེར་གཞི་སྣང་དུས་ཀྱི་སེམས་ཀུན་རྟོག་གི་སྟེང་གི་རིག་པ་དེ་ཡིན་ལ། དེ་ཡང་འཁོར་འདས་ཐམས་ཅད་ཀྱི་ཡིན་ལུགས་ནི་རིག་པ་སྤྲོས་བྲལ་ཉིད། དེ་ངོ་འཕྲོད་པ་གཞིར་བྱས་ནས་བླ་མའི་རྣལ་འབྱོར་མོས་གུས་ཀྱིས་ཐུགས་ཡིད་བསྲེ་བའི་སྟེང་ནས་འདས་པ་དང་མ་འོངས་པའི་རྣམ་རྟོག་གི་རྗེས་དཔྱོད་སྔོན་བསུ་སྤྲོ་བསྡུ་སོགས་བཅས་བཅོས་ཀྱི་སྤྲོས་པ་ཐམས་ཅད་རང་སར་བོར་བའི་ཚུལ་གྱིས་བཞག་པས། འཛིན་ཐག་གི་འཆིང་བ་མེད་པས་རྒྱ་ཡན། སྤྲོས་མཚན་གང་གིས་ཀྱང་ཚུར་བསྒྲིབ་དུ་མེད་ཅིང་། ཕར་ཐལ་བྱུང་དུ་གཅོད་པས་ཟང་ཐལ་ལམ་ཁྲེགས་ཆོད། སེམས་ཁོལ་བུ་ཙམ་གྱི་ཡིན་ལུགས་སའི་བུ་ག་ལྟ་བུ་མ་ཡིན་པར་འཁོར་འདས་ཐམས་ཅད་ལ་ཁྱབ་པའི་གནས་ལུགས་ཡིན་པས་ཁྱབ་གདལ། ཕྲ་རགས་ཀྱི་རླུང་དང་རྟོག་པ་རང་ཞིར་སོང་བས་ཐིམ་ལ། ཀུན་གཞིའི་རྨོངས་ཆའི་སྦུབ་ལས་ཐོན་པས་མ་རྨུག་པའི་ཡེ་ཤེས་སོགས་རྫོགས་ཆེན་གཞུང་ལས་རྡོ་རྗེའི་ཚིག་གིས་བཀའ་སྩལ་བའི་སྟེང་དུ་སླེབ་ནས། བལྟ་བྱ་ཡུལ་དང་ལྟ་བྱེད་ཡུལ་ཅན་གང་ཡང་སོ་སོར་མེད་ཀྱང་བརྗོད་མི་ཤེས་པའི་ཡིན་ལུགས་མྱོང་བ་ནང་ནས་རྙེད། ཤེས་རབ་ཁྱད་པར་ཅན་དེ་ཀའི་སྟེང་དུ་བཞག་པ་དེ་ལ་རྫོགས་ཆེན་རིག་པའི་སྐྱོང་ཚུལ་ཟེར་གསུངས་སྣང་ཤར། འདི་དག་བདག་འདྲའི་བྱིས་པ་མཁས་འདོད་སོགས་ཀྱིས་ཞུས་པ་མིན་པར་ཉིད་ཀྱིས་བཀའ་སྩལ་ནན་དུ་གནང་བ་དགོས་ཆེད་རྟེན་འབྲེལ་ཆེའམ་སྙམ་དུ་གསོལ་བ་ལགས། སླར་ཡང་རྒྱལ་བསྟན་རིན་པོ་ཆེ་སྤྱི་དང་། བྱེ་བྲག་འོད་གསལ་རྡོ་རྗེ་སྙིང་པོའི་བསྟན་པ་རིན་པོ་ཆེ་བཤད་སྒྲུབ་ལས་གསུམ་གྱི་སྒོ་ནས་འཛིན་སྐྱོང་སྤེལ་བའི་ཐུགས་ཁུར་བླ་ན་མེད་པ་བཞེས་ངོས་ནས་བདག་ཅག་གི་མགོན་དུ་སྐུ་ཚེ་བསྐལ་བརྒྱར་བཞུགས་པ་ཁ་ཙམ་མིན་པར་སྙིང་ནས་ཞུ་ན་རེ་འབྲས་དོན་ཐོག་ཏུ་སྨིན་པར་མཛད་དུ་གསོལ།། །།
༈ བླ་མ་གཡུ་ཁོག་བྱ་བྲལ་པས། ཀུན་སློང་དེ་ལ་དགེ་བའི་ཀུན་སློང་དང་མི་དགེ་བའི་ཀུན་སློང་དང་ལུང་བསྟན་དང་གསུམ་ལས། དགེ་བའི་ཀུན་སློང་ལ་ཡང་རང་དོན་དང་གཞན་དོན་གཉིས་ལས། རང་དོན་ཡིད་བྱེད་ཀྱི་བློ་དང་འདྲེས་ན་ཐེག་ཆེན་ལམ་གྱི་དགག་བྱ་ཡིན། འདིར་གཞན་དོན་བསྒྲུབ་པའི་ཀུན་སློང་དགོས། མི་དགེ་བ་ཆགས་སྡང་ཆོས་བརྒྱད་ཀྱིས་ཀུན་ནས་བསླངས་བའི་བསམ་པ་སྤང་དགོས། ལུང་མ་བསྟན་དགེ་མི་དགེ་རང་གཞན་གང་གི་དོན་ལ་མ་དམིགས་པ་ཡིན་པའི་བསལ་ནས་བཅོས་དགོས།
༈ བླ་མ་ཆོས་དབྱིངས་རང་གྲོལ་ཀྱིས། བསྐྱེད་པ་མ་ཧཱ་ཡོ་གས་རིག་འཛིན་རྣམ་བཞིའི་ལམ་བགྲོད་ནས་ཡི་གེ་འཁོར་ལོ་ཚོགས་ཆེན་གྱི་ས་ལ་ཕྱིན་པས་སྣོད་བཅུད་སྐུ་དང་ཡེ་ཤེས་ཀྱི་དཀྱིལ་འཁོར་དུ་འཆར་བར་འདོད་པའོ། །ཨ་ནུ་ཡོ་གས་རྡོ་རྗེའི་ལུས་ལ་གནད་དུ་བསྣུན་པའི་དབྱིངས་ཀུན་ཏུ་བཟང་མོའི་དཀྱིལ་འཁོར། ཐབས་བདེ་བ་ཀུན་ཏུ་བཟང་པོའི་དཀྱིལ་འཁོར། དབྱེར་མེད་སྲས་བདེ་བ་ཆེན་པོའི་དཀྱིལ་འཁོར་གསུམ་གྱི་རང་བཞིན་དུ་ཤེས་པའི་ལམ་ལྔ་མཐར་ཕྱིན་ནས་ལུས་ལས་ཡེ་ཤེས་འཆར་བར་འདོད་པའོ། །ཨ་ཏི་ཡོ་གས་དངོས་གཞི་རིག་པ་རང་ངོ་སྤྲད་པ་ནི་རིག་སྟོང་གཉུག་མའི་ལྟ་བ་དང་མཐུན་པར་ཁྲེགས་ཆོད་ཅོག་བཞག་བཞི་དང་། ཐོད་རྒལ་སྒྲོན་མ་བཞིའི་ཉམས་ལེན་ལ་བརྟེན་ནས། རྗེས་སྣང་ཉམས་ཀྱིས་སྐྱོང་ཚུལ་ལམ་སྣང་བཞི་མཐར་ཕྱིན་ཏེ་ཁྲེགས་ཆོད་ཀྱི་ཡེ་ཤེས་སྙིང་ནས་འཆར་བ་དང་། ཐོད་རྒལ་གྱི་མིག་ནས་ཡེ་ཤེས་འཆར་བ་ཡིན་ནོ། །དགེའོ། ༈ །རྗེ་མི་ཕམ་པས། རྣམ་སྨིན་དང་ནི་བྱེད་པ་དང་། །མྱོང་བ་རྒྱུ་མཐུན་བདག་འབྲས་དང་། །སྐྱེས་བུ་བྱེད་འབྲས་བཅས་ལྔ་ཡིས། །ལས་ཀྱི་འབྲས་བུ་གཞུང་བཞིན་བཤད། །ཞེས་སོ། །དགོངས་ཟངས་ཡེ་ཤེས་རང་གསལ་རྒྱུད་ལས། བླ་མའི་ལུང་བསྟན་ནི་མན་ངག་དྲན་པ་དང་བླ་མ་ལ་མོས་གུས་ཆེ་བ་ལས་ཡོང་ངོ་༔ཡི་དམ་ལུང་བསྟན་ནི་ཕྱི་ནང་གསང་བའི་དབང་རྫོགས་པར་ཐོབ་པ་དང་། ཡི་དམ་གྱི་ལྷ་རྟག་ཏུ་དྲན་པ་ལ་ཡོང་ངོ་༔མཁའ་འགྲོ་མས་ལུང་བསྟན་པ་ནི་དམ་ཚིག་ཆེ་བ་དང་མ་ཉམས་པ་ལ་འོང་ངོ་༔༈ བཻ་རོ་ཙ་ནའི་སྙན་བརྒྱུད་ཕྱི་མ་ལས། །དེའི་དུས་སུ་བདུན་ཚིགས་དང་དགེ་བ་གང་བྱས་ཕན་ཏེ༔དེ་ལ་གཉིས་ཏེ༔གྲོ་ཟན་ལྟར་བ་ལག་ཏུ་ཁྱེར་བའི་དགེ་བ་ནི༔རང་རང་གིས་ད་ལྟ་བྱས་པའི་དགེ་བའོ༔ར་མདའ་ལྟར་ཕྱིར་སྙོགས་པའི་དགེ་བ་ནི༔མི་ན་ནིང་ཤི་བའི་དགེ་བ་ད་ལོ་བྱེད་པ་ལྟ་བུའོ༔སྐྱེལ་མ་ལྟར་བསྡོངས་ནས་འགྲོ་བའི་དགེ་བ་ནི། ཞག་དྲུག་གི་བར་དུ་ཉིན་དང་ནུབ་མོ་ཚུན་ཆོད་ལ་བྱེད་པའོ༔དགེ་བ་བྱེད་པ་ལ་དོན་གསུམ་སྟེ༔དགེ་བ་ཡིན་པས་སྡིག་པ་དང་མ་འདྲེས་པ་དགོས་སོ༔སྡིག་པ་དང་འདྲེས་ན་ལས་ཀྱི་དབང་གིས་གཤིན་པོ་དེ་ཕུང་བར་འགྱུར་རོ། །གཤིན་པོའི་ཟས་སྐལ་ཡིན་པས་སེར་སྣ་མ་ཞུགས་པ་དགོས༔སེར་སྣ་ཞུགས་ན་ལས་ཀྱི་དབང་གིས་གཤིན་པོས་མི་ཐོབ༔གསོན་གཤིན་གྱི་རམ་ཟླ་ཡིན་པས་ཞག་དྲུག་གི་ཉི་ནུབ་ལ་བྱ་དགོས་སོ༔དེ་ལ་མ་བྱས་ན་འཕྲལ་དུ་ཕན་པ་དཀའ་འོ༔གསུངས་སོ༔༈ ཕྱི་ནང་གསང་གསུམ་གྱི་གཟུང་འཛིན་བཤད་པའི་སྐབས། སྤྱིར་གཟུང་འཛིན་ངོས་བཟུང་ནས་ཚུལ་ཇི་བཞིན་གཏན་ལ་ཕེབ། བདག་མེད་རྣམ་གཉིས་ལ་གོ་བ་ལེགས་པོ་ཙམ་ཡང་མེད་པའི་ཁ་ལྟ་སྟོང་སྐད་བྱེད་པ་རྣམས་ཀྱིས། ཕྱི་ནང་གསང་གསུམ་གྱི་ནམ་མཁའ་དང་། གཉན་ས་ཕྱི་ནང་གསང་གསུམ་སོགས་གང་བསམ། གང་བཤད་ཀྱང་། ལྟ་བའི་གདེངས་ཀྱིས་མ་ཟིན། སྒོམ་པའི་ངང་ཤོར། སྤྱོད་པ་ཐོ་ཅོར་སོང་བ་རྣམས་ནི་གཟུང་འཛིན་གྱི་རྒྱ་ལས་འདའ་མ་ནུས་པ་ཡིན་པས་བདག་མེད་ཀྱིས་རྩིས་ཟིན་མེད་པར་བདེན་གྲུབ་ཏུ་འཛིན་པའི་རྟོག་པ་དེ་ཉིད་ལ་ཡུལ་དེ་གསུམ་ལ་ལྟོས་ནས་ཕྱི་ནང་གསང་གསུམ་གྱི་གཟུང་འཛིན་ཞེས་བཏགས་ཀྱང་མི་འགལ་ཏེ། དཔེར་ན་བདག་མེད་ཀྱི་ལྟ་བ་དང་བྲལ་ནས་གསང་བའི་ནམ་མཁའ་དེ་ཉིད་ངས་རྟོགས་སོ། །ཞེས་རང་གིས་ཐག་བཅད། གཞན་ལ་སྨྲ་བ་འདི་བདུད་བཞིའི་ནང་ཚན་སྙེམ་བྱེད་ཀྱི་བདུད་དང་། གཟུང་འཛིན་དངོས་ཡིན་ཚུལ། དེང་སང་གི་ཁ་ལྟ་སྟོང་སྐད་བཤད་པ་རྣམས་ལ་ལྟོས་དང་ཤེས་འོང་ཨ་གསུངས། བྱེ་བྲག་སེམས་ཅན་རྣམས་འཆི་བའི་ཚེ། སྔ་མའི་ལུས་སེམས་འགགས། ཕྱི་མའི་ལུས་སེམས་མ་མཆེད་པའི་བར་དེར། གཞིའི་འོད་གསལ་ཤར་བ་ཡིན་ཀྱང་། ཕལ་བས་ངོ་མི་ཟིན། དེ་ལས་ལྡང་བའི་ཚེ། རྒྱུ་གསུམ་རྐྱེན་བཞིའི་དབང་གིས་འཁོར་བར་འཁྱམས་པ་ཡིན་ཏེ། རྒྱུ་གསུམ་ནི། བདག་ཉིད་གཅིག་པུའི་མ་རིག་པ། །ལྷན་ཅིག་སྐྱེས་པའི་མ་རིག་པ། །ཀུན་ཏུ་བཏགས་པའི་མ་རིག་པ་གསུམ་ཡིན་ལ། དེ་གསུམ་ནི་ཕྱི་ནང་གསང་གསུམ་གྱི་གཟུང་འཛིན་ཡིན་ཚུལ་དང་། མཚན་སྣང་རྨི་ལམ་ལའང་དེ་བཞིན་དུ་སྦྱར་ནས་མང་པོ་གསུངས་ཀྱང་མགོ་མེད་མཇུག་མེད་རེ་མ་གཏོགས་གསུང་ཇི་ལྟ་བ་བཞིན་མི་ངེས་པས་དགོངས་ཆུབ་ཞུ། །
༈ དཔལ་རོལ་བའི་རྡོ་རྗེ་རྣམ་གཉིས་སོགས། །རྩ་བའི་བླ་མ་བཀའ་དྲིན་ཆེ། །ཁྲམ་པ་གཡོ་སྒྱུ་ཅན་གྱི་རྨོངས་བློའི་བུ་གར་བླ་མའི་བྱིན་རླབས་ཀྱི་སྣང་བ་མེ་སྟག་ཙམ་ཞིག་ཤར་བ་རང་གི་ཉམས་ལེན་གྱི་གནད་མདོ་བརྗེད་གསོས་སུ་བཀོད་ན། ཐུགས་སྒྲུབ་གསང་བའི་རྒྱ་ཅན་གྱི་དབང་ཆོག་ཏུ། སེམས་མ་བསྐྱེད་པས་སངས་རྒྱས་མིན༔དེ་ཕྱིར་བྱང་ཆུབ་སེམས་མཆོག་བསྐྱེད༔ཅེས་དང་། བྱང་ཆུབ་སེམས་འགྲེལ་ལས། བྱང་ཆུབ་སེམས་ནི་མ་བསྐྱེད་པར། །སངས་རྒྱས་ནམ་ཡང་མི་ཐོབ་ཅིང་། །འཁོར་བར་རང་གཞན་དོན་འགྲུབ་པའི། །ཐབས་གཞན་ཡོད་པ་མ་ཡིན་ནོ། །ཞེས་གསུངས་པ་ལྟར། རང་གཞན་གྱི་དོན་གཉིས་འགྲུབ་པའི་ཐབས་ཤིག་སྙིང་ནས་འདོད་ན་རྫོགས་བྱང་ཐོབ་དགོས། དེ་ལ་རྣམ་སྣང་མངོན་བྱང་དང་དབུ་མ་རིན་ཕྲེང་། སྣང་བ། འཇུག་པ་སོགས་སུ་གསུངས་པ་ལྟར་བྱམས་པ་དང་སྙིང་རྗེའི་རྩ་བ་ཅན་གྱི་བྱང་སེམས་བསྐྱེད་ནས་རྒྱལ་སྲས་ཀྱི་སྤྱོད་པ་ལ་སློབ་དགོས། དེ་ཡང་སྤྱོད་འཇུག་ཏུ་གསུངས་པ་ལྟར་སེམས་བསྐྱེད་ནས་བསླབ་པ་བསྲུང་དགོས། བསླབ་པ་བསྲུང་བའི་ཐབས་སུ་སེམས་སྲུང་དགོས། སེམས་བསྲུང་བའི་ཐབས་སུ་དྲན་ཤེས་བསྟེན་དགོས། དྲན་ཤེས་བརྟེན་པའི་རྒྱུར་རྒྱུ་འབྲས་ལ་དད་པ་དང་བསླབ་བྱ་ལ་གུས་པ་སོགས་གལ་ཆེ།
དྲན་ཤེས་དང་ལྡན་སེམས་སྦྱོང་གི་སྤྱོད་པ་ལ་སློབ་ཚུལ་ཡང་། བྱང་ཆུབ་སེམས་དཔའི་སྤྱོད་པ་དག ། ཚད་མེད་པར་ནི་གསུངས་པ་ལས། །སེམས་སྦྱོང་བ་ཡི་སྤྱོད་པ་ནི། །ངེས་པར་དེ་སྲིད་སྤྱད་པར་བྱ། །ཞེས་དང་། བསླབ་བཏུས་སུ། བྱང་ཆུབ་སེམས་དཔའི་བསླབ་པ་ནི་འདིར་ཟད་དེ། འདི་ལྟ་སྟེ། སེམས་ཡོངས་སུ་སྦྱོང་བའོ། །ཞེས་དང་། སྤྱོད་ལམ་ཐམས་ཅད་དུ་བྱང་ཆུབ་ཀྱི་སེམས་སྦྱོང་བ་དང་། བྱང་ཆུབ་ཀྱི་སེམས་སྔོན་དུ་འགྲོ་བ་ཞེས་པ་ལྟར། བྱང་སེམས་རྣམས་ཀྱི་སྤྱོད་ལམ་ཐམས་ཅད་དྲན་ཤེས་བག་ཡོད་ཀྱིས་ཟིན་པས་དངོས་སམ་བརྒྱུད་ནས་གཞན་དོན་དང་བྱང་ཆུབ་ཀྱི་རྒྱུར་གྱུར་བ་ལ་བསླབ་དགོས་ཏེ། སྨོན་སེམས་མ་ཉམས་ན་བྱང་སེམས་ཀྱི་བསླབ་བྱ་ཐམས་ཅད་དེར་འདུས་པར་རྒྱལ་པོ་ལ་གདམས་པའི་མདོ་ལས་གསུངས་ཤིང་། སྨོན་སེམས་སྤང་ན་སྡོམ་ལྡན་ལ་རྩ་ལྟུང་དུའང་འགྱུར་བས་ན། འཕྲལ་ལ་གཞན་དོན་དངོས་སུ་ནུས་མ་ནུས་གང་ཡིན་ཀྱང་ཉོན་མོངས་པའི་སས་སྦྱོང་ཞིང་མ་བརྟགས་པར་ཞུགས་པའི་ལྟུང་བ་བཀག་སྟེ་གཞན་ཕན་གྱི་བསམ་པ་ཅི་ནུས་ཀྱིས་མ་ཉམས་པར་བྱེད་དགོས་པའི་ཕྱིར། ལས་དང་པོ་པས་གཞན་དོན་བྱེད་ཚུལ་ཡང་འབྲོམ་གྱིས་གསུངས་པ་ལྟར་ཡིན་ཏེ། བྱང་ཆུབ་སེམས་འགྲེལ་ལས། གཞན་ཕན་ལས་ལ་མཐུ་མེད་ཀྱང་། །དེ་ཡི་བསམ་པ་རྟག་ཏུ་བྱ། །གང་ལ་བསམ་པ་དེ་ཡོད་པ། །དེ་ནི་དེ་ལ་དོན་གྱིས་ཞུགས། །ཞེས་གསུངས་པའི་ཕྱིར་རོ། །དེས་ན་མདོ་སྔགས་ཀྱི་ཉམས་ལེན་ཐོས་བསམ་སྒོམ་པ་གང་ལ་འཇུག་ཀྱང་གནད་བརྒྱ་འགག་གཅིག་དང་རྩེ་བརྒྱ་རྩ་བ་གཅིག་ཏུ་འདུ་བའི་སྲོག་རྩ་ལྟ་བུ་དེ་དྲན་ཤེས་བག་ཡོད་ཀྱིས་དབང་པོའི་སྒོ་བསྡམ་སྟེ་དུས་རྟག་ཏུ་རང་སེམས་ལ་བལྟ་ཞིང་གཞན་དོན་སྒྲུབ་པ་འདི་ཁོ་ན་ཡིན་ནོ་སྙམ་སྟེ། བླ་མ་རྡོ་རྗེ་འཆང་གི་ཞལ་སྔ་ནས། དོན་ལ་རང་སེམས་དགེ་བ་དགེ་བའི་མཆོག ། ཡིན་ཕྱིར་དེ་ཡང་རང་གི་སེམས་ལ་བརྟག ། ཁྱད་པར་དྲན་ཤེས་བག་ཡོད་བརྟན་པོའི་ངང་། །རྒྱུན་དུ་སེམས་ལ་བལྟ་བ་གལ་གནད་ཡིན། །ཟག་བཅས་ཟག་མེད་གང་ལ་བསམ་ཀྱང་རུང་། །བྱང་ཆུབ་སེམས་ཀྱིས་ཟིན་པར་འགྲན་ཟླ་བྲལ། །ཞེས་སྔ་དུས་ཞིག་ནས་བདག་ལ་བརྩེ་བས་གནང་ཡང་ཉམས་ལེན་གྱི་གནད་མདོ་ངོ་འཕྲོད་པ་ནི་ད་ཚོད་ཙམ་དུ་ལུས་སོ། །འདིར་ངེས་པ་འདྲོང་བའི་ཆེད་དུ་གཞུང་དང་གདམས་ངག་མང་པོ་ཕྱོགས་གཅིག་ཏུ་བསྡུ་ན། རྒྱ་མཚོས་ཞུས་པ་ལས། ཀླུའི་བདག་པོ། བྱང་ཆུབ་སེམས་དཔའ་རྣམས་ཀྱིས་ཆོས་གཅིག་གིས་ངན་སོང་ངན་འགྲོ་ལོག་པར་ལྟུང་བར་སྐྱེ་བ་ཡང་དག་པ་གཅོད་དོ། །ཆོས་གཅིག་པོ་གང་ཞེ་ན་འདི་ལྟ་སྟེ། བདག་ཇི་ལྟར་གྱུར་ཅིང་ཉིན་མཚན་རྣམས་འདའ་ཞིང་འདུག་སྙམ་དུ་དགེ་བའི་ཆོས་རྣམས་ལ་སོ་སོར་རྟོག་པ་སྟེ། ཞེས་གསུངས། བཤེས་སྤྲིང་ལས། དབང་ཕྱུག་ལུས་གཏོགས་དྲན་པ་བདེ་གཤེགས་ཀྱིས། །བགྲོད་པ་གཅིག་པུའི་ལམ་དུ་ཉེ་བར་བསྟན། །ཅེས་དང་། ཕན་པའི་གདམས་ངག་དོན་པོ་འདི་ལགས་ཏེ། །ཁྱོད་ཀྱི་ཐུགས་དུལ་མཛོད་ཅིག་བཅོམ་ལྡན་གྱིས། །སེམས་ནི་ཆོས་ཀྱི་རྩ་བ་ལགས་པར་གསུངས། །ཞེས་དང་། སྤྱོད་འཇུག་ཏུ། སེམས་བསྲུང་བརྟུལ་ཞུགས་མ་གཏོགས་པ། །བརྟུལ་ཞུགས་མང་པོས་ཅི་ཞིག་བྱ། །ཞེས་སོགས་དང་། མཉམ་མེད་ཇོ་བོས། དྲན་དང་ཤེས་བཞིན་བག་ཡོད་པས། །དབང་པོའི་སྒོ་རྣམས་རྟག་ཏུ་སྲུངས། །ཉིན་མཚན་དུས་གསུམ་ཡང་དང་ཡང་། །སེམས་ཀྱི་རྒྱུད་ལ་བརྟག་པར་བྱ། །ཞེས་དང་། ཡོན་ཏན་གྱི་མཆོག་ཕན་སེམས་ཆེ་བ་ཡིན། གདམས་ངག་གི་མཆོག་རྟག་ཏུ་རང་སེམས་ལ་བལྟ་བ་ཡིན། གྲོགས་ཀྱི་མཆོག་དྲན་པ་དང་ཤེས་བཞིན་ཡིན། ཞེས་གསུངས་པ་སོགས་བཀའ་གདམས་པའི་གསུང་སྒྲོས་མང་པོ་ཡོད། རྒྱལ་སྲས་ཐོགས་མེད་པས་ཀྱང་། མདོར་ན་གང་དུ་སྤྱོད་ལམ་ཅི་བྱེད་ཀྱང་། །རང་གི་སེམས་ཀྱི་གནས་སྐབས་ཅི་འདྲ་ཞེས། །རྒྱུན་དུ་དྲན་དང་ཤེས་བཞིན་ལྡན་པ་ཡིས། །གཞན་དོན་སྒྲུབ་པ་རྒྱལ་སྲས་ལག་ལེན་ཡིན། །ཅེས་གསུངས་སོ། །དྲི་བ་ལྷག་བསམ་རབ་དཀར་དུ་རྗེ་རིན་པོ་ཆེས། ཁྱོད་བོད་ཀྱི་སྒོམ་ཆེན་རྣམས་ལ་སྒོམ་ཡག་པོ་ཡོད་ཟེར་བ་སྒོམ་རྣམས་ཀུན་གྱི་མགོའམ་ཐོག་མ་རང་དེ་གང་ནས་ཡིན་གསུངས་པ་ལ་རྗེ་བཙུན་བློ་བཟང་ཆོས་རྒྱན་གྱིས་དྲི་ལན་བློ་བཟང་བཞད་པའི་སྒྲ་དབྱངས་ལས། སྒོམ་རྣམས་ཀུན་གྱི་དང་པོའི་འགོ །རྒྱ་གར་སྐད་མཚུངས་རང་རྒྱུད་ལ། །ལེགས་པར་བརྟག་པ་ཡིན་ནོ་ཞེས། །ཟླ་མེད་བླ་མ་མཆོག་དེས་བཞེད། །ཅེས་གསུངས། གྲུབ་ཆེན་སྐལ་ལྡན་རྒྱ་མཚོས། མདོར་ན་ཆོས་མཐུན་གང་བྱ་དེ། །ཆོས་བརྒྱད་དབང་དུ་མི་བཏང་འཚལ། །རྟག་ཏུ་རང་གི་སེམས་ལ་ལྟོས། །ཆོས་ཀྱི་གནད་འགག་འདི་ན་ཡོད། །ཅེས་དང་། དཔལ་སྤྲུལ་རིན་པོ་ཆེས། ཡང་ལྟོས་ཡང་ལྟོས་རང་གི་སེམས་ལ་ལྟོས། ཡང་དང་ཡང་དུ་རང་གི་སེམས་བརྟག་ན། །ཇི་ལྟར་བྱས་ཀྱང་ཡང་དག་ལམ་དུ་འགྲོ། །གདམས་པའི་གནད་བརྒྱ་འདུས་པ་འདི་ཁོ་ན། །ཞེས་དང་། རྡོ་གྲུབ་རིན་པོ་ཆེས། མང་དུ་བརྗོད་པས་ཅི་བྱ་མདོ་དྲིལ་ན། །དྲན་པ་འདྲིས་པའི་དམིགས་པ་ཁོ་ན་ལས། །སྐྱེ་བར་གསུངས་ཤིང་འཕྲིན་གྱི་ཕོ་ཉ་བས། །འཕྲིན་ཚིག་སྐྱོར་དང་སྐུད་མདུད་འདོགས་པ་ལྟོས། དམ་ཆོས་མི་བརྗེད་བྱེད་པའི་འཕེན་པ་བསམ། ཆོས་ཀྱི་གནད་འགག་སྙིང་པོ་མཚན་མར་བཟུང་། །དེ་ཉིད་ཡིད་ཀྱིས་མང་བརྗོད་འདྲིས་སུ་གཞུགཡང་ཡང་དྲན་ཕྱིར་སྲད་བུའི་བརྗེད་བྱང་གདགས། དུས་རྣམས་ཀུན་ཏུ་དབང་པོའི་སྒོ་སྡོམ་ཞིང་། རང་གིས་རང་བརྟགས་རང་ཉིད་རང་གི་བཅོས། ཐབས་ཚུལ་དུ་མས་དམུ་རྒོད་སེམས་ཀྱི་རྟ། །འདུལ་སྦྱོང་བྱས་ཏེ་ལེགས་པའི་ལམ་དུ་གཞུག ། ཅེས་སོགས་ཤིན་ཏུ་མང་། ཆོས་རྒྱལ་བདུད་འཇོམས་བླ་མས་ཀྱང་། གྲོགས་འགྲོགས་པའི་སྲེད་པ་ཆོད་ལ་ཞོག ། གྲོགས་བག་ཡོད་ཤེས་བཞིན་ཟུང་དང་འགྲོགས། །ཞེས་གསུངས་པ་སོགས་ཉམས་ལེན་གྱི་གནད་མཁྱེན་པའི་དམ་པ་རྣམས་གྲོས་མ་བཏབ་ཀྱང་འདི་ལ་ཞལ་འཆམ་པར་འདུགགང་ལ་དྲན་ཤེས་བསྟེན་པའི་གནས་ནི་སྤང་བླང་གི་གནས་སྤྱི་དང་རང་གིས་གང་ཁས་བླངས་པའི་རྣམ་དབྱེ་ཤེས་རབ་ཀྱིས་གཏན་ལ་ཕབ་པ་རྣམས་ཡིན་པས་གནད་མ་ནོར་བ་གལ་ཆེ། གཞན་ཡང་བློ་སྦྱོང་གི་དཀའ་བ་གསུམ་ལ་སློབ་ཚུལ་དང་། སྐྱིད་སྡུག་ལམ་ཁྱེར་གྱིས་འཕྲལ་ལ་གང་ཐུག་སྒོམ་དུ་སྦྱར་རྒྱུ་མི་འོང་སོགས་མདོ་སྔགས་གཉིས་ཀའི་ལམ་རིམ་འདིའི་རྗེས་སུ་འགྲོ་ལྡོག་བྱེད་པར་མཐོང་། དེ་འདྲའི་སེམས་བསྲུང་བརྟུལ་ཞུགས་འོང་བ་ལ། དེ་ལས་འཇིག་རྟེན་སྤང་པའི་ཆོས་ཐམས་ཅད་ཀྱི་ཉིང་ཁུ་ནི་འདི་ཡིན་ཏེ། འདི་ལྟ་སྟེ། གཅིག་པུར་དགའ་བའོ། །ཞེས་སོགས་དབེན་པའི་ཡོན་ཏན་རྣམས་གསུངས། དེ་འདྲའི་བསྲིང་བ་གཉིས་ལྡན་འོང་བ་འདོད་ཆུང་ཆོག་ཤེས་ལ་རག་ལས་པ་ནི། མངོན་པ་མཛོད་དུ། བསྲིང་གཉིས་ལྡན་ཆོག་མི་ཤེས་དང་། །འདོད་ཆེན་ཅན་ལ་མ་ཡིན་ནོ། །ཞེས་སོ། །འདོད་ཆུང་ཆོག་ཤེས་འོང་བ་ནི་དབེན་པར་དྲན་ཤེས་དང་ལྡན་པས་བླ་མ་དཀོན་མཆོག་ལ་དད་མོས་དྲག་པོས་གསོལ་བ་འདེབས་ཤིང་འཁོར་བའི་བདེ་བ་ལ་བྱུར་དུ་བལྟ། ཚེ་འདིའི་སྡུག་བསྔལ་ལ་རྒྱབ་དུ་བལྟ། སྐྱིད་སྡུག་གང་བྱུང་ཡང་བཟོད་པའི་གོ་ཆ་བརྟན་པོར་བགོས་ནས། སྐྱེས་བུ་ཆུང་འབྲིང་གི་ལམ་རིམ་སྐོར་ལ་ལྟ་བསམ་སྒོམ་པ་དཀྲུགས་མར་བྱེད་པ་ལས་ཐབས་གཞན་མ་མཐོང་། དེའི་ངར་འདོགས་སུ་ཡིད་ཆེས་ཀྱི་དད་པས་ཚུལ་ཁྲིམས་གཙང་མ་བསྲུང་པ་སྨོན་ལམ་འགྲུབ་པའི་རྒྱུའི་གཙོ་བོར་བཟུང་ནས་བླ་མ་དཀོན་མཆོག་ལ་ཤི་སྤར་འཐམ་སྟེ་འཕྲལ་ཡུན་གྱི་སྨོན་ལམ་ཤུགས་དྲག་རྒྱུན་དུ་གདབ་པའང་གལ་ཆེ་སྟེ། མདོ་ལས། ཆོས་རྣམས་ཐམས་ཅད་རྐྱེན་ཡིན་ཏེ། །འདུན་པའི་རྩེ་ལ་རབ་ཏུ་གནས། གང་གིས་སྨོན་ལམ་ཅི་བཏབ་པ། །དེ་འདྲའི་འབྲས་བུ་ཐོབ་པར་འགྱུར། །ཞེས་གསུངས་པའི་ཕྱིར་རོ། །དེ་ལྟར་ནུས་ན་ཆོས་བརྒྱད་ཀྱི་གཡུལ་ལས་ཆོས་མགོ་ཐོན་ན་ཐང་། ཁྲི་གུང་ཐང་པས། ཉམས་ལེན་ཀུན་ལས་ཚུལ་ཁྲིམས་གཅེས་པར་བསྲུང་། །གཞུང་ལུགས་ཀུན་ལས་བྱང་ཆུབ་ལམ་རིམ་བལྟ། ཞེས་དང་། ཀུན་མཁྱེན་འཇིགས་མེད་གླིང་པས། བློ་བླ་མར་གཏོད་པ་སྐྱབས་འགྲོ་ཡི་མཐར་ཐུག ། དོན་གཞན་དོན་ལྷུར་ལེན་སེམས་བསྐྱེད་ཀྱི་ངོ་བོ། །དྲན་ཤེས་བཞིན་སྐྱོང་བ་མདོ་སྔགས་ཀྱི་ལམ་ཁྱེར། །ལས་ཤེས་ཤེས་མང་པོའི་ཕེར་ཡོད་དེ་ཞོག་མཛོད། །ཅེས་གདམས་པའི་དོན་ཡང་ལག་ལེན་དུ་ཐེབ་རྒྱུའི་སྐལ་བ་ཐོབ་ན་ཐང་མ་འཕྱུགས་རེམ་རེམ། རྒད་པོ། ཞེས་བདེ་འཛམ་དབེན་ཁྲོད་ཀྱི་རི་སུལ་ན་གབ་པའི་རྒད་པོས་ཆུ་འབྲུག་ལོར་རང་ལ་གདམས་པ་དགེ་ལེགས་འཕེལ། རླུང་རོ་འཕར་ག་མ་འཇོགསྙེ་མ་སྟོང་བ་འགོ་འཕང་མ་མཐོ། དཔང་པོ་གཉིས་ཀྱི་གཙོ་བོ་ཟུང་ཁ་དྲོ་བཀྲ་ཤིས། ཡང་སྨྱོ་ཨ་གཟོབས།། །།