བྱིན་རླབས་གཏོར་མའི་བརྡ་དབང་།
བྱིན་རླབས་གཏོར་མའི་བརྡ་དབང་བཞུགས་སོ། །
དེ་ནས་ཞི་ཁྲོའི་དཔལ་གཏོར་བརྗིད་ལྡན་སློབ་བུའི་མགོ་ཐོག་ཏུ་བཞག་ལ། དམིགས་པ་གསལ་གདབ། བརྒྱུད་པའི་གསོལ་འདེབས་བྱས་པའི་རྗེས་སུ། རྡོ་རྗེ་སློབ་དཔོན་གྱིས་འདི་སྐད་དོ། །ༀ་དུས་གསུམ་སངས་རྒྱས་ཐམས་ཅད་ཀྱི། །སྐུ་ཡི་གཟི་བརྗིད་དཔལ་དང་ལྡན། །ཞི་ཁྲོ་གཏོར་མའི་དབང་བསྐུར་བས། །འཆི་མེད་རྡོ་རྗེའི་སྐུ་ཐོབ་ཤོག །ཀཱ་ཡ་ཨ་བྷི་ཥིཉྩ་ༀ། ཡང་དམིགས་པ་གསལ་གདབ་ལ་མགྲིན་པར་བཞག་ལ། ཨཱཿདུས་གསུམ་སངས་རྒྱས་ཐམས་ཅད་ཀྱི། །གསུང་གི་གདམས་པ་ཆོས་སྒྲ་སྒྲོགས། །ཞི་ཁྲོ་གཏོར་མའི་དབང་བསྐུར་བས། །འགག་མེད་གསུང་གི་ནུས་ལྡན་ཤོག །ཝཱཀ་ཨ་བྷི་ཥིཉྩ་ཨཱ། ཡང་དམིགས་པ་གསལ་གདབ་ལ། སྙིང་གར་བཞག་ལ། ཧཱུྃ་དུས་གསུམ་སངས་རྒྱས་ཐམས་ཅད་ཀྱི། །ཐུགས་ཀྱི་འོད་ཟེར་ཡོངས་ལ་ཁྱབ། །ཞི་ཁྲོ་གཏོར་མའི་དབང་བསྐུར་བས། །འཁྲུལ་མེད་ཡེ་ཤེས་རྟོག་པར་ཤོག །ཙིཏྟ་ཨ་བྷི་ཥིཉྩ་ཧཱུྃ། ཡང་དམིགས་པ་གསལ་གདབ་ལ། ལྟེ་བར་བཞག་ནས། སྭཱཿདུས་གསུམ་སངས་རྒྱས་ཐམས་ཅད་ཀྱི། །ཡོན་ཏན་རེ་བསྐང་དངོས་གྲུབ་བདག །ཞི་ཁྲོ་གཏོར་མའི་དབང་བསྐུར་བས། །ཚེ་དཔལ་ལོངས་སྤྱོད་རྒྱས་པར་ཤོག །སརྦ་ཨ་བྷི་ཥིཉྩ་ཏྲཱཾ། ཡང་དམིགས་པ་གསལ་གདབ་ལ་གསང་བར་བཞག་ནས། ཧཿདུས་གསུམ་སངས་རྒྱས་ཐམས་ཅད་ཀྱི། །ཕྲིན་ལས་འགྲོ་དོན་ཐོགས་པ་མེད། །ཞི་ཁྲོ་གཏོར་མའི་དབང་བསྐུར་བས། །ཕྲིན་ལས་རྣམ་བཞི་འགྲུབ་པར་ཤོག །ཀཱ་ཡ་ཝཱཀྐ་ཙིཏྟ་སརྦ་ཨ་བྷི་ཥིཉྩ་ཧ། ཞེས་བརྗོད་ལ་གནས་ལྔར་གཏུག །དབང་དོན་ནི། གཏོར་མ་སྤྱི་བོར་བཞག་པ་བུམ་དབང་། མགྲིན་པར་བཞག་པ་གསང་དབང་། སྙིང་གར་བཞག་པ་ཤེས་རབ་ཡེ་ཤེས་ཀྱི་དབང་། ལྟེ་བར་བཞག་པ་ཚིག་དབང་། གསང་བར་བཞག་པ་རབ་འབྱམས་བཀའ་དབང་ངོ་། །ཞིབ་པར་གཏོར་དབང་རེག་པ་དོན་ལྡན་དུ་གསལ་ལོ། །བྱིན་རླབས་གཏོར་མའི་བརྡ་དབང་། དགོངས་པ་རང་གྲོལ་གྱི་ཆ་རྐྱེན་དུ། དུས་མཐའི་རྣལ་འབྱོར་པ་སུཪྻ་ཙནྟྲས་བྲག་གསུམ་ངོས་ཀྱི་ཡོངས་རྫོངས་སུ་སྦྱར་བའོ།། །།