འཇམ་དཔལ་གཤིན་རྗེ་ཁྲོ་ཆུའི་གཏོར་བསྔོས།
འཇམ་དཔལ་གཤིན་རྗེ་ཁྲོ་ཆུའི་གཏོར་བསྔོས་བཞུགས་པའི་དབུའོ།།
ཡཾ་རཾ་ཀེ་ལས་རླུང་མེ་ཐོད་སྐྱེད་སྟེང་༔ བྷནྡྷའི་སྣོད་དུ་ཤ་ལྔ་བདུད་རྩི་ལྔ༔ ཞུ་ཞིང་ཁོལ་བས་ཟག་མེད་བདུད་རྩིར་གྱུར༔ ཧ་ཧོ་ཧྲཱིཿཡིས་ཁ་དོག་དྲི་རོ་ལྡན༔ ཨོཾ་ཨཱཿཧཱུྃ་གིས་ཡེ་ཤེས་བདུད་རྩིར་གྱུར༔ ཧཱུྃ༔ འོག་མིན་ཆོས་དབྱིངས་ཕོ་བྲང་ནས༔ རྩ་བརྒྱུད་བླ་མ་ཡི་དམ་ལྷ་ཡི་ཚོགས༔ ལྷོ་ཕྱོགས་རིམ་པ་བདུན་གྱི་ས་འོག་ནས ཁྲོ་ཆུ་དུག་གདོང་ལས་གཤིན་དྲུག་དང་བཅས༔ འདིར་གཤེགས་ཉི་ཟླ་པདྨའི་གདན་ལ་བཞུགས༔ མཆོད་པ་སྣ་བདུན་འདོད་པའི་ཡོན་ཏན་ལྔ༔ དམ་རྫ་ས་སྨན་རཀ་གཏོར་མའི་མཆོད་པ་འབུལ༔ རྡོ་རྗེ་འཆང་ཆེན་འཇམ་དཔལ་
གཤིན་རྗེ་དང་༔ ཤིནཾ་གྷརྦ་གུ་རུ་པདྨ་འབྱུང་༔ ཁྲག་འཐུང་ནག་པོ་བཱ་སུ་དྷ་ར་དང༔ སངས་རྒྱས་ཡེ་ཤེས་ཞང་ཁྲོམ་ལ་སོགས་པ༔ རིག་འཛིན་བརྒྱུད་པའི་ཞལ་དུ་བ་ལི་འབུལ༔ ཁྲོ་ཆུ་དུག་གདོང་ཚེ་བདག་སྲོག་བདག་དང་༔ འཆི་བདག་བེ་བྷ་སྭ་ཏ་ཟ་བ་ལྗང་༔ ཡ་མ་རྭ་ཙའི་ཞལ་དུ་བ་ལི་འབུལ དུག་ཏི་ནག་པོ་བདུད་པོ་ལྕམ་དྲལ་སོགས༔ བཀའ་སྲུང་དམ་ཅན་ཞལ་དུ་བ་ལི་འབུལ༔ ཨོཾ་མནྡྲ་ཤཱི༔ ཡ་མཱནྟ་ཀ བྱ་གྷི་ཝཾ༔ བཛྲ་པཱ་ཎི༔ དུ་ཏྲི་ཡ་མ་རཱ་ཙ་ཡ་མ་རཀྵ༔ ཀྲོ་ཏ་པ་ཙ་ར༔ ཀཱ་ལ་རཱུ་པ་ཨ་ཀྲོ་རཱ་༔ ཡ་མ་རཱ་ཙ་ས་མ་ཡ་ཛ་
ཛ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ ཨགྷཾ་སོགས། ཧཱུྃ༔ ཕྱི་ལྟར་འཆི་བདག་་ཚེ་བདག་སྲོག་བདག་གསུམ གཅིག་ཏུ་འདུས་པས་སྐད་ཅིག་ཐལ་བར་བརླགས༔ ནང་ལྟར་རྟ་མགྲིན་ཕྱག་རྡོར་གཤིན་རྗེའི་གཤེད༔ གཅིག་ཏུ་འདུས་པས་སྐད་ཅིག་བཟློག་ཏུ་མེད༔ གསང་བ་ཆོས་སྐུ་ལོངས་སྐུ་སྤྲུལ་སྐུ་གསུམ གཅིག་ཏུ་འདུས་པ་སྟོབས་ཆེན་བསམ་མི་ཁྱབ༔ ཕྱི་པ་ནང་པ་བན་བོན་མུ་སྟེགས་པ༔ དབང་ཕྱུག་མ་གཤིན་ཕྱག་རྡོར་ཕུར་གསུམ་དང་༔ སྡེ་བརྒྱད་ཧོར་སོག་རྒྱ་འཇང་བུད་མེད་སོགས༔ དེ་ཕྱིར་འཇོམས་མཛད་སྤྱི་འཇོམས་ནག་པོ་ཆེ༔ ཕ་ཏོ་ནུས་མཐུ་བྱིན་རླབས་ཆེ་བ་དང་༔ ཕ་ཚན་སྡེ་དཔུང་ཆེ་ཞིང་ལྷག་པར་མྱུར སུས་ཀྱང་འགྲན་གྱི་ཐོགས་མེད་ཐོག་རྒོད་བཞིན༔ རང་ཕྱོགས་བསྲུང་ཕྱིར་བདུད་རྩི་སྨན་གདོང་མ༔ ཕ་རོལ་འཇོམས་ཕྱིར་དུག་གདོང་ནག་པོ་ཆེ༔ ཁྱེད་ལ་ཕྱག་འཚལ་བསྟོད་ཅིང་སྐྱབས་ཞུ་བ༔ བན་བོན་བྱེད་ཁ་དྲོད་གཏོང་གཏད་སེལ་དང་། རླུང་འཁོར་སྦྱིན་སྲེག་ཕྲ་མེན་ངན་སྔགས་དང་༔ ལྷ་སྲིན་སྡེ་བརྒྱད་བགེགས་རིགས་གནོད་པ་ཟློག༔ བདག་ཅག་འཁོར་བཅས་བསྲུང་ཞིང་བསྐྱབ་ཏུ་གསོལ༔ དུས་མིན་འཆི་དང་
ཆག་ཆེན་ཉམ་ང་ཟློག༔ ཕྱི་མ་ངན་སོང་བར་དོའི་འཇིགས་པ་སྐྱོབས༔ མཐར་ཐུག་བླ་མེད་སངས་རྒྱས་ཐོབ་པར་མཛོད༔ སྐྱབས་གཞན་མ་མཆིས་ཐུགས་རྗེའི་ད་གཟིགས་ཤིག ཅེས་པ་དོན་ལྷ་འབུམ་གྱིས་བསྐུལ་བས་༧རཱ་ག་ཨ་སྱས་བྲིས༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།