འཕགས་པ་གཞང་འབྲུམ་རབ་ཏུ་ཞི་བར་བྱེད་པའི་མདོ།
རྒྱ་གར་སྐད་དུ། ཨཱཪྱ་ཨརྴ་པྲ་ཤ་མ་ནི་སཱུ་ཏྲ། བོད་སྐད་དུ། འཕགས་པ་གཞང་འབྲུམ་རབ་ཏུ་ཞི་བར་བྱེད་པའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལན་ད་ཀ་གནས་པའི་ཚལ་ན་དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་བཅོ་ལྔའི་གསོ་སྦྱོང་ཟླ་བ་ཉ་བ་དེ་ཉིད་ཀྱི་ཚེ་དགེ་འདུན་གྱི་མདུན་དུ་གདན་བཤམས་པ་ལ་བཞུགས་སོ། །དེའི་ཚེ་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་སྣམ་ལོགས་ན་རྔ་ཡབ་ཐོགས་ཏེ། བཅོམ་ལྡན་འདས་ལ་གཡོབ་ཅིང་འདུག་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ངས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱལ་པོའི་ཁབ་འདི་ན་དགེ་སློང་གཞང་འབྲུམ་ཅན་མང་པོ་དག་གཞང་འབྲུམ་གྱི་བྲོ་ནད་ཀྱིས་གཟིར་ཏེ། སྡུག་བསྔལ་མི་བཟད་པ་དྲག་པོ་མི་བདེ་བ་ཡིད་དུ་མི་འོང་བའི་ཚོར་བ་མྱོང་བར་གྱུར་ན། བཙུན་པ་བཅོམ་ལྡན་འདས་དེ་དག་ལ་བདག་གིས་ཇི་ལྟར་བསྒྲུབ་པར་བགྱི། དེ་སྐད་ཅེས་གསོལ་པ་དང་། 
བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ 
་ཏོ། །ཀུན་དགའ་བོ་ཁྱོད་ཀྱིས་གཞང་འབྲུམ་སེལ་བའི་མདོ་འདི་ལོང་ཤིག །ཀུན་དགའ་བོ་གང་ལ་ལ་ཞིག་གིས་གཞང་འབྲུམ་སེལ་བའི་མདོའི་མིང་དང་། ཚིག་དང་། ཡི་གེ་ཤེས་ན་དེ་ཇི་སྲིད་འཚོའི་བར་དུ་གཞང་འབྲུམ་གྱི་ནད་ཀྱིས་བཏབ་པར་མི་འགྱུར་རོ། །ཚེ་རབས་བདུན་གྱི་བར་དུ་ཚེ་རབས་དྲན་པར་འགྱུར་རོ། །ཏདྱ་ཐཱ། ཨ་ལནྟེ། ཨ་མ་ལེ།
ཤྭ་ལི་ཙི་ནི་ཀུ་ཤེ་སམྦྷ་བེ་སྭཱ་ཧཱ། ཀུན་དགའ་བོ་འདི་ལྟ་སྟེ། བྱང་ཕྱོགས་ན་རིའི་རྒྱལ་པོ་གངས་ཞེས་བྱ་བ་དེ་ན་སཱ་ལའི་ཤིང་རྣམ་པར་རྒྱལ་བྱེད་ཅེས་བྱ་བ་དེའི་མེ་ཏོག་གསུམ་ཡོད་དེ། གཅིག་ནི་འཕེལ་བ་ཞེས་བྱ། གཉིས་པ་ནི་འཇམ་པ་ཞེས་བྱ། གསུམ་པ་ནི་སྐམ་པོ་ཞེས་བྱ་སྟེ། ཇི་ལྟར་དེ་བསྐམས་པ་དེ་བཞིན་དུ་སེམས་ཅན་རྣམས་ཀྱི་རླུང་གི་འབྲུམ་བུ་བསྐམས་པར་གྱུར་ཅིག །མཁྲིས་པའི་འབྲུམ་བུ་བསྐམས་པར་གྱུར་ཅིག །བད་ཀན་གྱི་འབྲུམ་བུ་བསྐམས་པར་གྱུར་ཅིག །མི་གཙང་བའི་འབྲུམ་བུ་བསྐམས་པར་གྱུར་ཅིག །ཁྲག་གི་འབྲུམ་བུ་བསྐམས་པར་གྱུར་ཅིག །འདུས་པའི་འབྲུམ་བུ་བསྐམས་པར་གྱུར་ཅིག །དེ་བཞིན་དུ་བདག་དང་སེམས་ཅན་ཐམས་ཅད་ཀྱི་བད་ཀན་གྱི་འབྲུམ་བུ་བསྐམས་པར་གྱུར་ཅིག །མི་གཙང་བའི་འབྲུམ་བུ་བསྐམས་པར་གྱུར་ཅིག །ཁྲག་གི་འབྲུམ་བུ་བསྐམས་པར་གྱུར་ཅིག །འདུས་པའི་འབྲུམ་བུ་བསྐམས་པར་གྱུར་ཅིག །སྣའི་འབྲུམ་བུ་བསྐམས་པར་གྱུར་ཅིག །འཕྱང་བའི་འབྲུམ་བུ་བསྐམས་པར་གྱུར་ཅིག །ཏདྱ་ཐཱ། ཤ་མེ་ཤ་མཱ་ནེ། ཤ་མེ་ཤ་མཱ་ནེ་སྭཱ་ཧཱ། ན་བར་མ་གྱུར་ཅིག །རེངས་པར་མ་གྱུར་ཅིག །སྒྲ་འབྱུང་བར་མ་གྱུར་ཅིག །འཛག་པར་མ་གྱུར་ཅིག །སྡུག་བསྔལ་བར་མ་གྱུར་ཅིག །རབ་ཏུ་སྡུག་བསྔལ་བར་མ་གྱུར་ཅིག །ཟག་པར་མ་གྱུར་ཅིག །རབ་ཏུ་ཟག་པར་མ་གྱུར་ཅིག །འདི་ཉིད་དུ་ཟད་པ་དང་། ཡོངས་སུ་ཟད་པ་དང་། མེད་པར་གྱུར་ཅིག །སའི་འོག་ཏུ་སོང་ཤིག །ན་མོ་བྷ་ག་བ་ཏེ། བུདྡྷ་ཡ་ས་ཏྱ་བཱ་ཏཱི་ནྃ། སིདྡྷྱནྟུ་མནྟྲ་པ་དེཿསྭཱ་ཧཱ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ ་ཀུན་དགའ་བོ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །དེ་ལ་ཆོ་ག་ནི་འདི་ཡིན་ཏེ། བཀླགས་པས་གྲུབ་པ་འདི་སྲད་བུ་དམར་པོ་ལ་ལན་བདུན་བཟླས་པ་བྱས་ལ། མདུད་པ་བདུན་བོར་ཏེ་མགུལ་དུ་གདགས་སོ། །འཕགས་པ་གཞང་འབྲུམ་རབ་ཏུ་ཞི་བར་བྱེད་པའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།