འཁོར་ལོ་བར་པའི་མཚན་ཉིད།
འཁོར་ལོ་བར་པའི་མཚན་ཉིད་ནི། སྟོན་པས་གསུངས་པའི་དམ་ཆོས་གང་ཞིག་ཐེག་པ་ཆེན་པོའི་ལམ་དངོས་ལ་དགོངས་ནས་གཙོ་བོར་བྱང་ཆུབ་སེམས་དཔའ་རྣམས་ལ་ཟབ་མོ་སྟོང་པ་ཉིད་ཀྱི་ཚུལ་ལས་བརྩམས་ཏེ་བསྟན་པ་སྟེ། དེའང་རྒྱ་ཆེར་རོལ་པ་ལས། ཀུན་གཞི་མེད་ཅིང་སྤྲོས་མེད་པ། །སྐྱེ་བ་མེད་ཅིང་འབྱུང་མེད་ལ། །དབེན་ཞིང་རང་བཞིན་སྟོང་པ་ཡི། །ཆོས་ཀྱི་འཁོར་ལོ་རབ་བསྐོར་ཏོ། །བླང་བ་མེད་ཅིང་དོར་མེད་ལ། །མཚན་མ་མེད་ཅིང་མཚན་ཉིད་མེད། །མཉམ་པ་ཉིད་ཀྱི་ཆོས་བསྟན་པའི། །འཁོར་ལོ་སངས་རྒྱས་ཀྱིས་བསྐོར་ཏོ། །ཞེས་གསུངས་སོ། །དེའི་མཚན་གཞི་ནི། ཤེར་ཕྱིན་གྱི་མདོ་སྡེ་ལ་སོགས་པ་རྣམས་སོ། །དེ་དག་ཅིའི་མཚན་ཉིད་མེད་པའི་ཆོས་ཀྱི་འཁོར་ལོ་ཞེས་བྱ་ཞེ་ན། གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་རང་རང་གི་མཚན་ཉིད་ཤིན་ཏུ་དབེན་པའི་སྨྲ་
བསམ་བརྗོད་བྲལ་གྱི་དེ་ཁོ་ན་ཉིད་སྟོན་པར་སྣང་བའི་ཕྱིར་དེ་སྐད་ཅེས་བྱའོ། །དེ་ལ་འཁོར་ལོ་བར་པའི་དངོས་གཞི་ནི། དུས་ལ་བོད་རྣམས་ཀྱི་འཆད་ཚུལ་སྣ་ཚོགས་ཤིག་སྣང་ཡང་། ཁུངས་འདི་ཡིན་གྱི་ངེས་གསལ་མ་མཐོང་བས་ཀྲིག་ཅར་སྨྲ་མ་བཏུབ་ལ། གནས་ནི་གྲོང་ཁྱེར་རྒྱལ་པོའི་ཁབ་ཀྱི་བྱ་རྒོད་ཕུང་པོའི་རིར་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལ་སོགས་ཉན་ཐོས་ཀྱི་འཁོར་བཞིའི་ཚོགས་ཆེན་པོ་དང་། བྱང་ཆུབ་སེམས་དཔའི་དགེ་འདུན་བྱེ་བ་ཁྲག་ཁྲིག་དཔག་ཏུ་མེད་པ་རྣམས་ལ་ཟབ་མོ་སྟོང་པ་ཉིད་ཀྱི་ཚུལ་བསྟན་པས་མངོན་རྟོགས་བརྒྱད་གདུལ་བྱའི་རྒྱུད་ལ་ཇི་ལྟར་སྐྱེ་བའི་རིམ་པ་དོན་བདུན་ཅུ་དང་བཅས་པ་སྦས་དོན་དུ་ཡོད་པ་དེ་ཉིད་དངོས་བསྟན་ཆོས་ཐམས་ཅད་སྟོང་ཉིད་ཀྱི་ཚུལ་དུ་སྒོ་གསུམ་རྣམ་གྲངས་བཅུ་གཅིག་གི་སྒོ་ནས་བསྟན་པར་མཛད་པ་དེ་ཡིན་ནོ། །དེ་ལ་སྦས་དོན་མངོན་རྟོགས་བརྒྱད་ནི། མངོན་རྟོགས་རྒྱན་ལས། ཤེས་རབ་ཕ་རོལ་ཕྱིན་པ་ནི། །དངོས་པོ་བརྒྱད་ཀྱིས་ཡང་དག་བཤད། །རྣམ་ཀུན་མཁྱེན་ཉིད་ལམ་ཤེས་ཉིད། །དེ་ནས་ཐམས་ཅད་ཤེས་པ་ཉིད། །རྣམ་ཀུན་མངོན་རྫོགས་རྟོགས་པ་དང་། །རྩེ་མོར་ཕྱིན་དང་མཐར་གྱིས་པ། །སྐད་ཅིག་གཅིག་མངོན་རྫོགས་བྱང་ཆུབ། །ཆོས་ཀྱི་སྐུ་དང་དེ་རྣམས་བརྒྱད། །ཅེས་པ་ལྟར་དང་། ཡན་ལག་གི་དོན་བདུན་ཅུའང་། དེ་ཉིད་ལས། སེམས་བསྐྱེད་པ་དང་གདམས་ངག་དང་། །ངེས་འབྱེད་ཡན་ལག་རྣམ་བཞི་དང་། །སྒྲུབ་པ་ཡི་ནི་རྟེན་
གྱུར་པ། །ཆོས་ཀྱི་དབྱིངས་ཀྱི་རང་བཞིན་དང་། །དམིགས་པ་དག་དང་ཆེད་དང་ནི། །གོ་ཆ་འཇུག་པའི་བྱ་བ་དང་། །ཚོགས་ནི་ངེས་པར་འབྱུང་བཅས་རྣམས། །ཐུབ་པའི་རྣམ་ཀུན་མཁྱེན་པ་ཉིད། །ཅེས་རྣམ་མཁྱེན་མཚོན་བྱེད་ཀྱི་ཆོས་བཅུ་དང་། མོག་མོག་པོར་བྱེད་ལ་སོགས་དང་། །སློབ་མ་བསེ་རུའི་ལམ་གང་དང་། །འདི་དང་གཞན་པའི་ཡོན་ཏན་གྱིས། །ཕན་ཡོན་ཆེ་བ་མཐོང་བའི་ལམ། །བྱེད་པ་དང་ནི་མོས་པ་དང་། །བསྟོད་དང་བཀུར་དང་བསྔགས་པ་དང་། །བསྔོ་དང་རྗེས་སུ་ཡི་རང་བ། །ཡིད་ལ་བྱེད་པ་བླ་མེད་དག །སྒྲུབ་དང་ཤིན་ཏུ་དག་པ་ཞེས། །བྱ་བ་འདི་ནི་བསྒོམ་པའི་ལམ། །བྱང་ཆུབ་སེམས་དཔའ་མཁས་རྣམས་ཀྱི། །ལམ་ཤེས་ཉིད་ནི་དེ་འདྲར་བཤད། །ཅེས་ལམ་ཤེས་མཚོན་བྱེད་ཀྱི་ཆོས་བཅུ་གཅིག་དང་། ཤེས་པས་སྲིད་ལ་མི་གནས་ཤིང་། །སྙིང་རྗེས་ཞི་ལ་མི་གནས་དང་། །ཐབས་མ་ཡིན་པས་རིང་བ་དང་། །ཐབས་ཀྱིས་རིང་བ་མ་ཡིན་ཉིད། །མི་མཐུན་གཉེན་པོའི་ཕྱོགས་དག་དང་། །སྦྱོར་དང་དེ་ཡི་མཉམ་ཉིད་དང་། །ཉན་ཐོས་ལ་སོགས་མཐོང་བའི་ལམ། །དེ་འདྲ་ཀུན་ཤེས་ཉིད་དུ་འདོད། །ཅེས་{གཞི་ཤེས་མཚོན་བྱེད་ཀྱི་ཆོས་དགུ་དང་། རྣམ་པ་སྦྱོར་བར་བཅས་རྣམས་དང་། །ཡོན་ཏན་སྐྱོན་ནི་མཚན་ཉིད་བཅས། །ཐར་དང་ངེས་འབྱེད་ཆ་མཐུན་དང་། །སློབ་པ་ཕྱིར་མི་}ལྡོག་པའི་ཚོགས། །སྲིད་དང་ཞི་བ་མཉམ་ཉིད་དང་། །ཞིང་དག་བླ་ན་མེད་པ་ནི། །རྣམ་ཀུན་མངོན་རྫོགས་རྟོགས་པ་སྟེ། །འདི་ནི་ཐབས་མཁས་བཅས་པ་ཡིན། །ཞེས་རྣམ་རྫོགས་སྦྱོར་བ་མཚོན་བྱེད་ཀྱི་ཆོས་བཅུ་གཅིག་དང་། དེ་ཡི་རྟགས་དང་རྣམ་འཕེལ་
དང་། །བརྟན་དང་སེམས་ཀུན་གནས་པ་དང་། །མཐོང་ཞེས་བྱ་དང་སྒོམ་པ་ཞེས། །བྱ་བའི་ལམ་ནི་སོ་སོ་ལ། །རྣམ་པར་རྟོག་པ་རྣམ་བཞི་ཡི། །གཉེན་པོ་རྣམ་པ་བཞི་དང་ནི། །བར་ཆད་མེད་པའི་ཏིང་ངེ་འཛིན། །ལོག་པར་སྒྲུབ་དང་བཅས་པ་ནི། །རྩེ་མོའི་མངོན་རྟོགས་་ ཞེས་རྩེ་སྦྱོར་མཚོན་བྱེད་ཀྱི་ཆོས་བརྒྱད་དང་། ་་མཐར་གྱིས་པ། །རྣམ་གསུམ་རྣམ་བཅུ་་ ཞེས་མཐར་གྱིས་པའི་སྦྱོར་བ་མཚོན་བྱེད་ཀྱི་ཆོས་བཅུ་གསུམ་དང་། ་་སྐད་ཅིག་མ། །གཅིག་གིས་མངོན་རྫོགས་བྱང་ཆུབ་པ། །མཚན་ཉིད་ཀྱིས་ནི་རྣམ་པ་བཞི། །ཞེས་སྐད་ཅིག་མའི་སྦྱོར་བ་མཚོན་བྱེད་ཀྱི་ཆོས་བཞི། ངོ་བོ་ཉིད་ལོངས་རྫོགས་བཅས་དང་། །དེ་བཞིན་གཞན་པ་སྤྲུལ་པ་ནི། །ཆོས་སྐུ་མཛད་པ་དང་བཅས་པ། །རྣམ་པ་བཞིར་ནི་ཡང་དག་བརྗོད། །ཅེས་འབྲས་བུ་ཆོས་སྐུ་མཚོན་བྱེད་ཀྱི་ཆོས་བཞི་རྣམས་སོ། །དེ་དག་སྒོ་གསུམ་རྣམ་གྲངས་བཅུ་གཅིག་གི་སྒོ་ནས་བསྟན་པའི་སྒོ་གསུམ་ནི། མགོ་སྨོས་པས་གོ་བ་རྣམས་ཀྱི་ངོར་བསྡུས་ཏེ་བསྟན་པའི་སྒོ། སྤྲོས་པ་ཙམ་གྱིས་གོ་བ་རྣམས་ཀྱི་ངོར་འབྲིང་དུ་བསྟན་པའི་སྒོ། ཚིག་ལ་འཆེལ་བ་རྣམས་ཀྱི་ངོར་རྒྱས་པར་བཤད་པའི་སྒོ་རྣམས་སོ། །རྣམ་གྲངས་བཅུ་གཅིག་ནི། ཤཱ་རིའི་བུ། རབ་འབྱོར། བརྒྱ་བྱིན། ཡང་རབ་འབྱོར། བྱམས་པ། ཡང་རབ་འབྱོར། བརྒྱ་བྱིན། རབ་འབྱོར། བྱམས་པ། རབ་འབྱོར། ཀུན་དགའ་བོ་རྣམས་དང་གོ་རིམ་བཞིན་དུ་དྲི་ལན་སོགས་ཀྱིས་བསྟན་པ་རྣམས་སོ། །དེ་ལྟ་བུའི་བརྗོད་བྱ་རྗོད་བྱེད་མ་ཚང་བ་མེད་པ་ནི། རྒྱས་པར་ཤེར་
ཕྱིན་བྱེ་བ་ཕྲག་བརྒྱ་པ་དང་། འབུམ་པ་སོགས་དང་། འབྲིང་པོ་ཉི་ཁྲི་ལྔ་སྟོང་པ་སོགས་དང་། བསྡུས་པ་བརྒྱད་སྟོང་པ་སོགས་ཡིན་ཞིང་། དེ་དག་ལས་འཕྲོས་པའི་མདོ་སྡེའང་དཔག་ཏུ་མེད་པས་ཕལ་ཆེར་གསུང་གཅིག་ཉིད་དུ་གསུང་མོད་ཀྱང་། དུ་མ་ཉིད་དུ་སོ་སོར་གོ །ཞེས་གསུངས་པ་ལྟར། དུས་དང་གནས་གཅིག་ཉིད་དུ་གསུངས་པ་རྒྱལ་བ་ཉིད་ཀྱི་མཐུས་སྡུད་པ་པོ་རྣམས་ཀྱིས་སོ་སོ་ལ་ཇི་ལྟར་སྣང་ཞིང་གདུལ་བྱ་དང་ཉེ་བར་འཚམས་པའི་སྒོ་ནས་རྒྱས་འབྲིང་བསྡུས་གསུམ་སྣ་ཚོགས་བསྡུས་པ་ཡིན་ནོ། ཁ་ཅིག་གིས་དེ་ལྟར་ན་བཅོམ་ལྡན་འདས་ཀྱིས་ཤེར་ཕྱིན་གྱི་ཆོས་གནས་དང་དུས་གཅིག་ལས་གཞན་དུ་མ་བསྟན་ན། གནས་གཞན་དང་གཞན་དུ་དང་། དུས་གཞན་དང་གཞན་དུ་བསྟན་པར་གསུངས་པ་དག་ཀྱང་ཡོད་པས་ཇི་ལྟར་མི་འགལ་ཞེ་ན་སྐྱོན་མེད་དེ། མདོ་ལས།(ཕལ་པོ་ཆེ།) ཀྱེ་མ་རྒྱལ་སྲས་ཁྱོད་ལྟོས་ཤིག །ཛམྦུའི་གླིང་རྣམས་ཐམས་ཅད་ན། །བདེ་གཤེགས་འདི་ན་བཞུགས་སྙམ་བྱེད། །བདག་ཅག་རྣམས་ནི་འདི་སྙམ་དུ། །རི་རབ་རྩེ་ལ་བདེ་གཤེགས་སྙམ། །འཇིག་རྟེན་ཁམས་ནི་གཞན་ན་ཡང་། །སངས་རྒྱས་ངོ་མཚར་རྨད་རེ་ཆེ། །ཞེས་འབྱུང་བ་ལྟར་དང་། གོང་དུ་སྨྲས་ཟིན་པ་ལྟར། སྐད་ཅིག་བསྐལ་པར་བྱིན་གྱིས་རློབ་པ་སོགས། རྫོགས་པའི་སངས་རྒྱས་ཀྱི་མཐུ་ལ་ལྟ་ཅི་དགོས། བྱང་འཕགས་སོགས་ཀྱི་རྣམ་པར་འཕྲུལ་པའང་བསམ་གྱིས་མི་ཁྱབ་པའི་གནས་ཡིན་པའི་ཕྱིར་དང་། ཁྱད་པར་སངས་རྒྱས་འཕགས་པ་རྣམས་ཤིན་ཏུ་དྲི་མ་མེད་པའི་ཆོས་ཀྱི་
དབྱིངས་རྟག་པ་དམ་པའི་གནས་སུ་མཉམ་པར་བཞག་པ་ལས་ནམ་ཡང་མི་གཡོ་བར། དུས་ཐམས་ཅད་དང་བྲལ་བ་མཉམ་པ་ཉིད་ཀྱི་དུས་གཅིག་ཉིད་དུ་བརྗོད་པ་ཐམས་ཅད་དང་བྲལ་བའི་ཆོས་ཀྱི་འཁོར་ལོ་བསྐོར་བའི་ཚུལ་འདི་ལྟ་བུ་ཇི་ལྟ་བ་བཞིན་མཉན་པའི་སྣོད་དུ་མ་གྱུར་ནའང་། རང་རེ་ཐེག་ཆེན་པ་དག་གིས། ཐེག་ཆེན་འཆད་པའི་སྐབས་སུ་མོས་པ་ཙམ་གྱིས་འདི་བཞིན་དུ་བཤད་ན་ལེགས་པའི་ཕྱིར་རོ། །དེ་ལྟ་ན་བྱ་རྒོད་ཕུང་པོའི་རི་སོགས་ཀྱི་གནས་སྨོས་པའི་ངལ་བས་ཅི་ཞིག་བྱ་ཞེ་ན། འོ་སྐོལ་གླིང་བཞི་པའི་འཇིག་རྟེན་འདིར་བྱིས་པ་མཐའ་གཅིག་ཏུ་འཛིན་པ་ཅན་རྣམས་ཀྱིས་མཐོང་བར་ནི་དེ་ཙམ་དུ་ཟད་པའི་ཕྱིར་མདོ་རྣམས་ལས་ཀྱང་དེ་དག་རྗེས་སུ་འཛིན་པའི་ཕྱིར་དེ་དག་དང་མཐུན་པར་གསུངས་ཤིང་སྣང་ངོ་། །དེ་ལྟ་བུའི་འཁོར་ལོ་བར་པ་བསྐོར་བ་འདིའི་དགོས་པ་ནི་དངོས་སུ་བསྐོར་ཚུལ་བསྟན། ཡུལ་གྱི་གདུལ་བྱ་ངེས་པར་རྒྱུད་གྲོལ་པ་འདི་ལ་ལྟོས་དགོས་པ་རྣམས། དེ་བཞིན་གཤེགས་པའི་ཡུལ་ལ་འཇུག་པ་དང་། རྒྱུད་ནས་སེམས་ཅན་ཐམས་ཅད་ཀྱི་ལྟ་བ་ངན་པའི་སྒྲིབ་གཡོགས་བསལ་ནས་ཆོས་ཐམས་ཅད་ཀྱི་གནས་ལུགས་ཕྱིན་ཅི་མ་ལོག་པར་མངོན་སུམ་དུ་རྟོགས་ནས་མཐའ་གཉིས་སུ་རབ་ཏུ་མི་གནས་པའི་མྱ་ངན་ལས་འདས་པ་ཆེན་པོ་འཐོབ་པའོ། །