བཅོམ་ལྡན་འདས་གཉེན་པོ་ལྷ་བཞིའི་སྒྲུབ་ཐབས་དབང་བསྐུར་དང་བཅས་པ་གྲུབ་གཉིས་དཔལ་སྟེར།
བཅོམ་ལྡན་འདས་གཉེན་པོ་ལྷ་བཞིའི་སྒྲུབ་ཐབས་དབང་བསྐུར་དང་བཅས་པ་གྲུབ་གཉིས་དཔལ་སྟེར་ཅེས་བྱ་བ་བཞུགས་སོ། །
ན་མོ་གུ་རུ་ཧེ་རུ་ཀ་ཀྲོ་དྷ་ཡ། བཅོམ་ལྡན་གཉེན་པོ་ལྷ་བཞི་ལ། །བཏུད་ནས་དེའི་སྒྲུབ་ཐབས་དང་། །བྱིན་རླབས་དབང་བསྐུར་ཟབ་མོ་ནི། །རང་གཞན་འཇུག་བདེའི་དོན་དུ་སྤེལ། སྦྱོར་བ་ཡོ་བྱད་ཀྱི་བཤམས་བཀོད་མཐོང་རྒྱུད་ལྟར་འདུ་བྱས་ནས། ཆོ་ག་དངོས་ལའང་སྔོན་དངོས་རྗེས་གསུམ་ལས། དང་པོ་སྔོན་འགྲོ་ལ་སྐྱབས་སེམས་ནི། བླ་མ་སངས་རྒྱས་འཁོར་དང་བཅས། །ཀུན་ནས་བདག་ལ་དགོངས་སུ་གསོལ། །བླ་མ་དཀོན་མཆོག་གསུམ་རྣམས་ལ། །བྱང་ཆུབ་མ་ཐོབ་བར་དུ་ནི། །སྐྱབས་ཀྱི་མཆོག་ཏུ་བཟུང་བར་བགྱི། །སྔོན་ནས་བསགས་པའི་སྡིག་སྒྲིབ་བཤགས། །འགྲོ་དོན་སངས་རྒྱས་ཐོབ་བྱའི་ཕྱིར། །སྨོན་པའི་བྱང་ཆུབ་སེམས་ནི་བསྐྱེད། །སེམས་ཅན་ཡོངས་སུ་
སྨིན་བྱའི་ཕྱིར། །གསང་སྔགས་སྤྱོད་པ་རླབས་ཆེན་སྤྱད། །དོན་དམ་སྤྲོས་བྲལ་བྱང་ཆུབ་སེམས། །རང་བྱུང་མཐའ་བྲལ་སྟོང་གསལ་བསྒོམ། །ལན་གསུམ་བརྗོད། ཡན་ལག་བརྒྱད་པ་ནི། རང་གི་སྙིང་ཁ་ནས་སྤྲོས་པའི་འོད་ཟེར་གྱིས་དབང་ཆེན་ཧེ་རུ་ཀ་ལ་བླ་མ་རིགས་བདག་གི་རྣམ་པས་དབུར་བརྒྱན་པར་སངས་རྒྱས་དང་བྱང་ཆུབ་སེམས་དཔས་བསྐོར་བ་བཛྲ་ས་མ་ཛཿས་སྤྱན་དྲངས། རྡོ་རྗེ་སློབ་དཔོན་སངས་རྒྱས་དཔལ། སོགས་བརྗོད། བགེགས་བསྐྲད་ནི། ཧཱུྃ། གཉེན་པོ་ལྷ་བཞིའི་ཡོངས་རྫོགས་དཀྱིལ་འཁོར་དུ། །སྣང་སྲིད་རྣམ་དག་ཡེ་ཤེས་ལྷ་ཡི་ཚོགས། །ཀུན་བཟང་ཆོས་ཀྱི་དབྱིངས་ལས་མ་གཡོས་ཀྱང་། །རིག་རྩལ་རྣམ་དག་ཐབས་ཤེས་གཡུང་དྲུང་ལྷ། །
འདི་ལ་ལོག་པར་ལྟ་བའི་དགྲ་དང་བགེགས། །བདུད་སྡེ་དཔུང་བཅས་ཐམས་ཅད་ཕྱིར་དེངས་ཤིག །ཨོཾ་སུམྦྷ་ནི་སོགས་བརྗོད། སྲུང་འཁོར་ནི། ཧཱུྃ། བདག་ཉིད་དབང་ཆེན་ཁྲོ་བོའི་ཐུགས་ཀ་ནས། །དྲག་པོའི་བྱིན་རླབས་མཚོན་ཆའི་འོད་ཟེར་འཕྲོ། །མཚོན་ཆའི་གུར་ཆེན་ཡེ་ཤེས་མེ་དཔུང་འབར། །ཕྱོགས་མཚམས་སྟེང་འོག་ཀུན་ཏུ་ཁྱབ་པར་བསྲུང་། །ཨོཾ་བཛྲ་ཙཀྲ་ཏིཀྵཱ་ཀརྨ་ཀཱི་ལ་ཡ་ཛྭ་ལ་རཾཿ །བྷྲཱུྃ་པྲ་བེ་ཤ་ཡ་ཕཊཿ ཀྱིས་བརྡའ་སྒོ་དབྱེ། ཧཱུྃ་ཧེ་རུ་ཀ་ཨཏི་པུ་ཧོ། པྲ་ཏིཙྪ་ཧོས་བརྡ་ཕྱག་འཚལ། ཧཱུྃ་བཛྲ་ཙིཏྟ་ས་མ་ཡ་ཧཱུྃ། གིས་དམ་བཅའ། བཤགས་པ་ནི། རཏྣ་པདྨ་སཱུརྱ་ཙནྡྲ་མཎྜལ་བཛྲ་ས་མཱ་ཛཿ གཉེན་པོ་ལྷོ་བཞིའི་ལྷ་ཚོགས་བདག་ལ་དགོངས། །སྐུ་གསུང་ཐུགས་ཀྱི་དམ་ཚིག་འགལ་བ་སོགས། །རྩ་བ་ཡན་ལག་ཉམས་ཆགས་མ་ལུས་པ། །སྙིང་ནས་བཤགས་སོ་ཚངས་པའི་དངོས་གྲུབ་སྩོལ། ཡི་གེ་བརྒྱ་པ་བརྗོད། བྱིན་འབེབས་པ་ནི། འཕགས་མཆོག་ཐུགས་རྗེའི་དུས་ལ་བབ། །ཁྱད་པར་སྟོན་པའི་དུས་ལ་བབ། །མཐུ་རྩལ་འབྱུང་བའི་དུས་ལ་བབ། །དངོས་གྲུབ་སྩོལ་བའི+ ། དགྲ་བགེགས་སྒྲོལ་བའི་དུས་ལ+ །ཉམས་ཆགས་སྐོང་བའི+ །མཐུ་ཆེན་མཐུ་རྩོལ་བཅོམ་ལྡན་འདས། །བྱིན་རླབས་དབང་བསྐུར+ །བྱིན་ཆེན་ཕོབ་ཅིག+ །དངོས་གྲུབ་མཆོག་སྩོལ་བཅོམ་ལྡན་འདས། །བཅོམ་ལྡན་འདས་
ཀྱིས་བདག་རྣམས་ལ། །ལས་ཀྱི་འབྲས་བུ་མཆིས་པར་མཛོད། །ཧྲཱི་ཨ་པ་རི་མི་ཏ་ཨཱ་ཡུཛྙཱ་ན་པདྨ་ཀྲོ་དྷ་ཧྱ་གྲཱི་བ་བཛྲ་པཱ་ཎི་ག་རུ་ཌ་ཧཱུྃ་ཕཊ་སྭཱ་ཧཱ། ས་མ་ཡ་ཨ་བེ་ཤ་ཡ་ཨཱ་ཨཱ༔ མཆོད་གཏོར་རྣམས་བྱིན་གྱིས་རླབས་པ་ནི། ཧཱུྃ་ཐུགས་ལས་རཾ་ཡཾ་ཁཾ་འཕྲོས་པས། །ཕྱི་ནང་གསང་བའི་མཆོད་རྫས་ཀྱི། །མ་དག་ཉེས་སྐྱོན་ཀུན་སྦྱངས་ནས། །མི་ཟད་ནམ་མཁའི་མཛོད་དུ་གྱུར། །ཨོཾ་ཨཱཿཧཱུྃ་བཛྲ་དྷུ་པེ་ཧཱུྃ། བཛྲ་པུཥྤེ་ཧཱུྃ། བཛྲ་ཨ་ལོ་ཀེ་ཧཱུྃ། བཛྲ་གྷནྡྷེ་ཧཱུྃ། བཛྲ་གྷནྡྷེ་ཝི་དྱཱ་ཧཱུྃ། བཛྲ་ཤབྡ་ཧཱུྃ། བཛྲ་སརྦ་པཱུ་ཛ་མེ་གྷ་ཧཱུྃ། ཨོཾ་སརྦ་ཏ་ཐཱ་ག་ཏ་པཱུ་ཛཿ མ་ཧཱ་པཉྩ མ་ཧཱ་བྷ་ལིཾ་ཏ། མ་ཧཱ་རཀྟ། ཨ་ཧོ་སུ་ཁ་ས་མ་ཡེ་སྭཱ་ཧཱ། གཉིས་པ་དངོས་གཞི་ལ་རྟེན་བརྟེན་པ་བསྐྱེད་པ་ནི། ཧཱུྃ། ཆོས་རྣམས་ཐམས་ཅད་སྐྱེ་མེད་ཆོས་ཀྱི་དབྱིངས། །ཨོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོཉ་ཧཾ། ཁྱབ་པའི་སྙིང་རྗེ་ཆེན་པོས་སེམས་ཅན་དོན། །དྷརྨ་དྷཱ་ཏུ་བཛྲ་སྭ་བྷ་ཝ་ཨཏྨ་ཀོཉ་ཧཾ། སེམས་ཀྱི་མཚན་ཉིད་ཡི་གེ་ཧཱུྃ་དུ་གྱུར། བཛྲ་ཙིཏྟ་ཧཱུྃ། ཨེ་ཡཾ་ར་ཤ་ཀེཾ་རཾ་བྷྲཱུྃ། ཧཱུྃ་ལས་ཨེ་འཕྲོས་གྲུ་གསུམ་མཐིང་ག་ཨེ། །ཧཱུྃ་ལས་ཡཾ་འཕྲོས་རླུང་གི་དཀྱིལ་འཁོར་སྟེང་། །ཧཱུྃ་ལས་ར་འཕྲོས་ཁྲག་གི་རྒྱ་མཚོར་གྱུར། །ཧཱུྃ་ལས་ཤ་འཕྲོས་ཤ་ཆེན་ས་གཞི་བརྡལ། །ཧཱུྃ་ལས་ཀེཾ་འཕྲོས་རུས་པའི་རི་རབ་བརྩེགས། །ཧཱུྃ་ལས་རམ་འཕྲོས་བསྐལ་པའི་
མེ་དཔུང་འབར། །ཧཱུྃ་ལས་བྷྲཱུྃ་འཕྲོས་བྷནྡྷའི་གཞལ་ཡས་ཁང་། །ཆུ་སྲིན་སྦྲུལ་ཆེན་ཀ་གདུང་ཉ་སྦལ་ཐོག །བྱ་ཁྱུང་བླ་བྲེ་སྦྲུལ་ཕྲན་ཟར་མ་ཚགས། །དེ་དབུས་ཉི་ཟླ་པདྨའི་གདན་སྟེང་ན། །གཟའ་ཀླུ་ས་བདག་ཕོ་མོ་བསྣོལ་མར་བཏིང་། །བྷྲཱུྃ་བི་ཤྭ་བི་ཤུདྡྷེ་ཛྙཱ་ན་ཙཀྲ་བྷྲཱུྃ། །གདན་སྟེང་ཧཱུྃ་བབས་དེ་ཉིད་ཧྲཱིཿདམར་པོ། །ཡོངས་གྱུར་དཔལ་ཆེན་རྟ་མགྲིན་སྐུ་མདོག་དམར། །ཞལ་གཅིག་ཕྱག་གཉིས་ཁྲོ་ཞིང་རབ་ཏུ་གཏུམ། །ཞལ་གདངས་ལྗགོས་འདྲིལ་མཆེ་གཙིག་སྤྱན་གསུམ་བགྲད། །སྨ་ར་སྨིན་མ་དབུ་སྐྲ་དམར་སེར་འབར། །དབུ་གཙུག་རྟ་མགོ་ལྗང་ཀུ་རྟ་སྐད་འཚེར། །ཕྱག་གཡས་རལ་གྲིའི་རྩེ་ལ་མེ་འབར་འཕྱར། གཡོན་པས་ཐུགས་ཀར་སྡིག་མཛུབ་ཞགས་པ་བསྣམས། །དུར་ཁྲོད་ཆས་བརྒྱད་སྦྲུལ་ཆུན་རིན་ཆེན་སྤྲས། །ཞབས་གཉིས་གཡས་བསྐུམ་གཡོན་བརྐྱང་དོར་སྟབས་ཀྱིས། །ཡེ་ཤེས་མེ་དཔུང་འབར་བའི་ཀློང་ན་བཞུགས། །དབུ་གཙུག་བྱ་ཁྱུང་རྒྱལ་པོ་སྐུ་མདོག་ནག །ར་དང་མཆུ་སྡེར་སྒྲོ་གཤོག་རྣོ་ཞིང་འཚེར། །སྤྱན་གསུམ་ཉི་ཟླ་ལྟ་བུར་གསལ་ལ་འཁྱིལ། །རིན་ཆེན་སྤྲུལ་རྒྱན་ཕྱག་གཡས་སྦྲུལ་བཟུང་ཟ། །ར་བར་ཡིད་བཞིན་ནོར་བུའི་ལྟོ་བ་རུ། །པད་ཟླའི་གདན་ལ་བཅོམ་ལྡན་ཚེ་དཔག་མེད། །དཀར་པོ་ཞལ་གཅིག་ཕྱག་གཉིས་ཚེ་བུམ་འཛིན། །གོས་དཀར་ཡུམ་དང་
མཉམ་སྦྱོར་གཉིས་ཀ་ཡང་། །ལོངས་སྤྱོད་རྫོགས་སྐུའི་ཆས་ཀྱིས་རྣམ་པར་བརྒྱན། །གཙོ་བོའི་ཐུགས་ཀར་པདྨ་ཉི་མའི་སྟེང་། །ཕྱག་ན་རྡོ་རྗེ་ཞལ་གཅིག་ཕྱག་གཉིས་པ། །མཐིང་ནག་ཁྲོ་གཏུམ་གཡས་པས་རྡོ་རྗེ་འཕྱར། །གཡོན་པས་དྲིལ་བུ་དཀུར་བརྟེན་རིན་ཆེན་སྤྲུལ། །དུར་ཁྲོད་རྒྱན་རྫོགས་གཡོན་བརྐྱང་ཚུལ་གྱིས་བཞུགས། །སོ་སོའི་གནས་གསུམ་ཡིག་འབྲུ་གསུམ་གྱིས་མཚན། །དེ་ལས་འོད་འཕྲོས་ཡེ་ཤེས་སྤྱན་དྲངས་གྱུར། །སྙན་གསན་ནི། ཧཱུྃ་ཀ་དག་ཆོས་སྐུའི་ཀློང་ཡངས་ནས། །སྐུ་ལྔའི་བདག་ཉིད་ལོངས་སྤྱོད་རྫོགས། །གཉེན་པོ་ལྷ་བཞིའི་ལྷ་ཚོགས་རྣམས། །སྤྲུལ་པའི་གར་གྱིས་དབྱིངས་ནས་བཞེངས། །ༀ་བཛྲ་ས་མ་ཡ་ཧཱུྃ་ཛཿ སྤྱན་འདྲེན་ནི། ཧཱུྃ། །རྣམ་དག་ཆོས་དབྱིངས་མཉམ་ཉིད་ལས། །དབང་ཆེན་ལྷ་ཚོགས་སྐུར་བཞེངས་ལ། །སྲིད་གསུམ་གདུག་པའི་ཚོགས་བསྒྲལ་ཕྱིར། །གནས་འདིར་སྤྱན་འདྲེན་གཤེགས་སུ་གསོལ། །རྩ་སྔགས་ཀྱི་འཇུག་ཏུ། ཨེ་ཧྱ་ཧི་ས་མ་ཡ་ཛཿཧཱུྃ་བྃ་ཧོ་ཧྲཱིང་ཧྲིང་ཛཿ བཞུགས་སུ་གསོལ་པ་ནི། ཧཱུྃ། །དབང་ཆེན་རོལ་པའི་དཀྱིལ་འཁོར་འདིར། །དམ་ཚིག་ཡེ་ཤེས་དབྱེར་མེད་པར། །ཆུ་ལ་ཆུ་བཞག་ཇི་བཞིན་དུ། །དུ་མ་རོ་གཅིག་བརྟན་པར་བཞུགས། །ས་མ་ཡ་ཨ་བེ་ཤ་ཡ་ཏིཥྛ་ཧཱུྃ། ཕྱག་འཚལ་བ་ནི། ཧཱུྃ། །ཆོས་རྣམས་རང་བཞིན་ཡེ་ནས་དག་
རྟོག་འཁྲུལ་འཇིག་རྟེན་སེམས་ཅན་ལ། །སྐུ་གསུང་ཐུགས་ཡོན་ཕྲིན་ལས་སྟོན། །དཀྱིལ་འཁོར་ལྷ་ལ་ཕྱག་འཚལ་ལོ། །ཨ་ཏི་པུ་ཧོ། ན་མ་ཧྲཱིཾ། མཆོད་གཏོར་འབུལ་བ་ནི། ཧཱུྃ། །དབང་ཆེན་ལྷ་ཚོགས་དཀྱིལ་འཁོར་དུ། །བདུག་སྤོས་མེ་ཏོག་མར་མེ་དྲི། །ཞལ་ཟས་སིལ་སྙན་མཆོད་པའི་སྤྲིན། །དབྱིངས་ནས་བཏོན་ཏེ་དབྱིངས་སུ་འབུལ། །ཨོཾ་པ་ན་པོ། པེ་ནུ་སུ་ར་ཏོ། ཏི་པུ་པ་ར་མུཿ སརྦ་ཏ་ཐཱ་ག་ཏ་སིདྡྷི་ས་མ་ཡ་ཧོ། ཨོཾ་བཛྲ་ར་ག་དྷུ་པེ་ཧཱུྃ། པུཥྤེ་ཏྲཾ། ཨ་ལོ་ཀེ་ཧྲཱིཿ གནྡྷེ་ཧོ། ནཻ་ཝི་དྱ་ཨཱ། གྷིཏྟེ་ཤཔྟ་ཨཱཿཧཱུྃ། ཨོཾ། །མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་གཏིབས། །གཟུགས་སྒྲ་དྲི་རོ་རེག་བྱ་ཆོས། །འདོད་ཡོན་ལྔ་ལྡན་མཆོད་པར་བཞེས། །ཨོཾ་སརྦ་པཱུ་ཛ་ས་མ་ཡ་ཧོཿ ཧཱུྃ། །འདོད་ཆགས་ཞེ་སྡང་གཏི་མུག་ཆེ། །ང་རྒྱལ་ཕྲག་དོག་ཉོན་མོངས་ལྔ། །ཡེ་ནས་རིགས་ལྔའི་རང་བཞིན་ཡིན། །སྦྱོར་སྒྲོལ་ཏིང་འཛིན་དམ་མཆོད་བཞེས། །ཧ་ལ་པཉྩ་པུ་ཛ་ཧོཿ ཧཱུྃ། །ཤ་ཁྲག་རུས་པ་རྣམ་པ་གསུམ། །དུག་གསུམ་མཆོད་པ་བླ་ན་མེད། །ཡེ་ནས་སྐུ་གསུམ་རང་བཞིན་ཏེ། །རང་གྲོལ་ཉིད་དུ་མཆོད་པར་བཞེས། །མ་ཧཱ་མཾ་ས། མ་ཧཱ་རཀྟ། མ་ཧཱ་ཀེཾ་ནི་རི་ཏི་ཁ་ཧི། ཧཱུྃ། །རང་བྱུང་གདོད་ནས་རྣམ་པར་དག །རྩ་བརྒྱད་སྟོང་ལ་སྦྱར་བའི་སྨན། །རིགས་ལྔ་
དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔ་སེམས་ཅན་ཀུན་བསྒྲལ་ཕྱིར། །དུག་ལྔ་སེལ་བའི་བདུད་རྩི་ཆེ། །ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧཱིཋཱ༔ ཧཱུྃ། །རྩ་བརྒྱད་ཡན་ལག་སྟོང་སྦྱར་བའི། །ཐུན་མོང་མཆོག་དང་ཁྱད་འཕགས་འདི། །དུས་གསུམ་བླ་མ་ཡི་དམ་ལྷ། །གཉེན་པོ་ལྷ་བཞིའི་ལྷ་ཚོགས་ལ། །བདུད་རྩི་དམ་རྫས་མཉེས་མཆོད་འབུལ། །བརྩེར་དགོངས་དབང་དང་དངོས་གྲུབ་སྩོལ། །ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཧཱུྃ། །ལྕེ་ཡི་དམ་ཚིག་རྡོ་རྗེ་ལ། །རྡོ་རྗེ་ཅན་གྱི་ཧཱུྃ་བསྒོམས་ཏེ། །མཐེབ་སྲིན་ཐབས་ཤེས་ཕྱག་རྒྱ་ཡིས། །མྱོང་ན་དངོས་གྲུབ་མཆོག་ཐོབ་འགྱུར། །ཀཱ་ཡ་སིདྡྷི་ཨོཾ། ཝཀྐ་སིདྡྷི་ཨཱཿ ཙིཏྟ་སིདྡྷི་ཧཱུྃ། སརྦ་སིདྡྷི་ཧཱུྃ། ཧཱུྃ། །དམ་རྫས་རྨད་བྱུང་གཏོར་ཆེན་པོ། །འདོད་ཡོན་ལྔ་ཡི་ཕུང་པོར་འབར། །ཐམས་ཅད་ཚིམ་བྱེད་མཆོད་སྤྲིན་ཆེས། །དབང་ཆེན་ལྷ་ཚོགས་ཐུགས་དམ་བསྐང་། །མ་ཧཱ་བ་ལིཾ་ཏ་ཁ་ཧི། ཧཱུྃ། །རུ་དྲ་བསྒྲལ་བའི་ཁྲག་ཆེན་པོ། །ལྕང་ལོར་བཅས་པའི་བྷཉྫར་བསྐྱིལ། །འཁོར་བ་དབྱིངས་སུ་དག་བྱའི་ཕྱིར། །དཔལ་ཆེན་ཚོགས་ཀྱི་ཞལ་དུ་འབུལ། །མ་ཧཱ་རཀྟ་ཁཱ་ཧི། ཧཱུཾ། །རྒྱུ་གཉིས་རྐྱེན་སྦྱར་འབྲུ་བཅུད་འདི། །དུག་ལྔ་སྨན་གྱུར་དམ་པའི་རྫས། །ཛ་གད་དཔའ་བོའི་བདུད་རྩི་འདིས། །དབང་
ཆེན་ལྷ་ཚོགས་ཐུགས་དམ་བསྐང་། །མ་ཧཱ་པཉྩ་ཨ་མྲྀ་ཏ་ཛ་གད་ཁཱ་ཧི། ཧཱུྃ། །དབྱིངས་རིག་གཉིས་མེད་སྦྱོར་བ་ཡིས། །འཁོར་འདས་གཉིས་སུ་མེད་པར་སྦྱོར། །གཉིས་མེད་རྟོགས་པའི་སྦྱོར་མཆོད་འདིས །དབང་ཆེན་ལྷ་ཚོགས་མཉེས་གྱུར་ཅིག །པདྨོ་ཡོ་གི་ནཱི་ས་མ་ཡ་པྲ་བེ་ཤ་ཡ་ཕཊཿ ཧཱུྃ། །ཡང་དག་དོན་རྟོགས་བློ་ཡིས་ནི། །མ་རྟོགས་སེམས་ཅན་གནས་སུ་བསྒྲལ། །དུས་གསུམ་བདེ་གཤེགས་དེ་ལ་མཉེས། །མཆོག་གི་མཆོད་པ་ཆེན་པོ་བཞེས། །ཨོཾ་མ་ཧཱ་ཤྲཱི་ཧེ་རུ་ཀ་མ་ཏྲཾ་རུ་དྲ་པྲ་བྷཉྩ་ཙཀྲ་ཧཱུྃ་ཕཊཿ པྲ་བེ་ཤ་ཡ་ཕཊཿ ཏི་ཧཱུྃ་ཨེ་ཡཾ་སྥ་ར་ཎ་ཕཊཿ བསྟོད་པ་ནི། ཧྲཱིཿ མཚན་ཙམ་ཐོས་དང་དྲན་པའི་མོད་ཉིད་ལ། །འཆི་བདག་གཡུལ་ལས་རྣམ་པར་རྒྱལ་བའི་ལྷ། །མི་འགྱུར་ཚེ་ཡི་མཆོག་སྦྱིན་ལེགས་སྩོལ་བ། །བཅོམ་ལྡན་གར་གྱི་དབང་པོར་ཕྱག་འཚལ་བསྟོད། །བདེ་བར་གཤེགས་པ་ཀུན་གྱི་གསུང་རྡོ་རྗེའི། །སྒྱུ་འཕྲུལ་འགྱུར་མེད་རོལ་པ་རྟ་མཆོག་དཔལ། །རྒྱལ་བསེན་ལ་སོགས་ལྷ་སྲིན་སྡེ་བརྒྱད་ཀྱིས། །གཉེན་པོ་དབང་ཆེན་དཔལ་ལ་ཕྱག་འཚལ་བསྟོད། །སངས་རྒྱས་ཀུན་པའི། །མཛོད་འཛིན་ཕྱག་ན་རྡོ་རྗེ་འབར་བའི་རྭ། །གདེངས་པའི་མདོ་ལ་གཟའ་ཀླུ་འབྱུང་པོའི་ཚོགས། །ཕྱེ་མར་འཐག་མཛད་ཁྱོད་ལ་ཕྱག༴ མི་བཟད་སྡེར་མོས་ཀླུ་གཉན་ས་
བདག་གིས། །དོན་སྙིང་དྲངས་ནས་ཞལ་དུ་གསོལ་མཛད་པའི། །དུག་ལྔའི་དཔལ་ཀུན་ཡོངས་འཇོམས་ཀ་རུ་ཀ །བྱ་ཁྱུང་རྒྱལ་པོ་ཁྱེད་ལ་ཕྱག་འཚལ་བསྟོད། །ཛཔྲ་བསྐུལ་ནི། དཀྱིལ་འཁོར་གཙོ་མཆོག་ཧེ་རུ་ཀ །ཟག་མེད་བདེ་བའི་ཉམས་ལྡན་ཅན། །སྟོང་ཉིད་སྙིང་རྗེ་ཡུམ་དང་སྦྱོར། །སྐུ་ནི་གར་དགུའི་ཉམས་དང་ལྡན། །དཔལ་དང་དུར་ཁྲོད་ཆས་ཀུན་རྫོགས། །གསུང་ནི་གསང་སྔགས་འབྲུག་སྟོང་ལྡིར། །ཐུགས་ནི་སྒྲོལ་མཛད་སྲོག་དང་བཅས། །འཛབ་ཀྱི་སྐུ་གསུང་ཐུགས་རྒྱུད་བསྐུལ། །ཕཊཀྱིས་སྤྲོས་པས་སྟོང་གསུམ་གང་། །བཟླས་པས་ཡུམ་གྱི་མཁའ་ལ་འཁྱིལ། །གསང་བའི་སྦུབས་ནས་ཐུགས་ཁར་ཐིམ། །མ་གསལ་བར་དུ་བསྐྱེད་ཅིང་བསྒོམ། །མ་འགྲུབ་བར་དུ་མི་གཏོང་ངོ་། །ཛཔྲ་ནི། ཐུགས་ཀར་ཉི་སྟེང་ཧྲཱིཿཡིག་མཐར། །སྔགས་ཀྱི་ཕྲེང་བས་བསྐོར་བ་ལས། །འོད་འཕྲོས་འཕགས་མཆོད་འགྲོ་སྒྲིབ་སྦྱངས། །ཚུར་འདུས་བདག་ཐིམ་བྱིན་གྱིས་བརླབས། །སླར་ཡང་འོད་འཕྲོས་དྲེགས་པ་ཅན། །ཚར་བཅད་ཕྲིན་ལས་ལྷུན་གྱིས་གྲུབ། །སྣོད་བཅུད་སྣང་གྲགས་རྟོག་ཚོགས་ཀུན། །ལྷ་སྔགས་ཡེ་ཤེས་འཁོར་ལོར་གྱུར། །ཧྲཱི་ཨ་པ་རི་མི་ཏཱ་ཨཱ་ཡུཛྙཱ་ན་པདྨ་ཀྲོདྷ་ཧྱ་གྲཱི་བ་བཛྲ་པཱ་ཎི་ག་རུ་ཌ་ཧཱུྃ་ཕཊ་སྭཱ་ཧཱ། །ཞེས་དམིགས་གནད་དང་ལྡན་པས་ཅི་ནུས་དང་། རྣམ་བུམ་ལ་
དམིགས་ཀྱིས་བསལ་བའི་བཟླས་པ་ལས་བུམ་སྒྲུབས་པ་བཅས་ཀྱི་མཐར་མཆོད་ཅིང་བསྟོད་ལ་དངོས་གྲུབ་བླང་བ་ནི། ཧཱུྃ། །ལྷ་དང་རིག་འཛིན་མཁའ་འགྲོ་དགོངས། །འདིར་འདུས་རིག་འཛིན་བདག་ཅག་རྣམས། །སྨིན་གྲོལ་གཉིས་ཀྱིས་རྒྱུད་སྦྱངས་ཤིང་། །བསྐྱེད་རྫོགས་གཉིས་ཀྱིས་ལས་གཞུང་བསྲངས། །བསྙེན་སྒྲུབ་རྣམ་གསུམ་མཐའ་རུ་ཕྱིན། །ལས་དང་ཐུགས་རྗེ་མཐུན་པ་ཡི། །ཞི་རྒྱས་དབང་དྲག་ཡིད་བཞིན་གཏེར། །སྐུ་གསུང་ཐུགས་ཀྱི་དངོས་གྲུབ་སྩོལ། ཨོཾ་ཨཱཿཧཱུྃ་ཀཱ་ཡ་ཝཀྐ་ཙིཏྟ་སིདྡྷི་ཧཱུྃ་ཨཱཿ ཆེ་བ་བསྐྱེད་པ་ནི། ཧཱུྃ། །སྣང་སྲིད་ཐམས་ཅད་གཞལ་ཡས་ཁང་། །གཟུགས་སྣང་ཐམས་ཅད་ཧེ་རུ་ཀ །ཐམས་ཅད་ཐམས་ཅད་བྲན་དུ་འཁོར། །ང་ལས་ཆེ་བཙན་སུ་ཡང་མེད། ཧཱུྃ། །ཆོས་སྐུ་སྐྱེ་མེད་ངང་ཉིད་ལས། གཟུགས་སྐུ་འཇིགས་པའི་ཆ་ལུགས་ཅན། །ཞི་རྒྱས་དབང་དང་མངོན་སྤྱོད་ལས། །བཅོལ་བའི་ཕྲིན་ལས་གྲུབ་པར་མཛོད། །ཧཱུྃ་ཧཱུྃ་ཧཱུྃ་བཛྲ་སརྦ་དུཥྚཾན། ཨོཾ་ཤནྟིཾ། སཱ་པུཥྚིཾ། ཨཱཿཝ་ཤཾ །ཧཱ་མཱ་ར་ཡ་ཕཊཿ སརྦ་སིདྡྷི་ཀུ་རུ་ཧཱུྃ། ཆོད་ཟོར་སརྦ་བཟློག་བྷྱོ༔ གསུམ་པ་རྗེས་ལ་ཚོགས་བྱིན་གྱིས་བརླབ་པ་ནི། ཨོཾ་ཨུཙུཥྨ་བཻ་ཏཱ་ལི་ཀྲོ་དྷ་ནི་སརྦ་དྲ་བྱཾ་སཾ་ཤྭ་དྷ་ནི་ཧཱུྃ་ཕཊ་སྭཱ་ཧཱ། ཚོགས་ཀྱི་ཡོ་བྱད་ཐམས་ཅད་ཀུན། རྃ་ལས་མེས་བསྲེག་ཡྃ་ལས་རླུང་། གཡོས་པས་སྦྱངས་ཤིང་ཁ་གི་ཆུས། བཀྲུས་ཏེ་འདོད་ཡོན་
བདུད་རྩིར་གྱུར། །ཨོཾ་ཨཱཿཧཱུྃ། སྤྱན་དྲངས་ཤིང་སྤྱིར་འབུལ་བ་ནི། ཧཱུྃ། །དབང་ཆེན་ལྷ་ཚོགས་གནས་འདིར་གཤེགས། །གཟུགས་སྒྲ་དྲི་རོ་རེག་བྱ་ཆོས། །འདོད་ཡོན་ལྔ་ལྡན་ཚོགས་མཆོད་ཀྱིས། །ཐུགས་དམ་དབྱིངས་སུ་སྐོང་གྱུར་ཅིག །ཚོགས་དང་པོ་ནི། ཧཱུྃ། །བླ་མེད་མཆོག་གི་མཆོད་སྦྱར་བས། །ཡེ་ཤེས་ལྔ་ཡི་འོད་ཟེར་འཕྲོས། །འདོད་ཡོན་ལྷ་མོས་རབ་བརྒྱན་འབུལ། །དམ་བསྐང་དབང་དང་དངོས་གྲུབ་སྩོལ། ཨོཾ་ན་མཿསརྦ་ཏ་ཐཱ་ག་ཏེ་བྷྱོཿབི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུངྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། བར་པ་ནི། བདག་ཅག་ཉོན་མོངས་དབང་གྱུར་པས། །དབང་ཆེན་ལྷ་ཚོགས་སྤྱན་སྔ་རུ། །ཐུགས་དང་འགལ་བའི་ནོངས་པ་ཀུན། །སྙིང་ནས་བཤགས་སོ་བཟོད་པར་གསོལ། །ཡི་གེ་བརྒྱ་པ་བརྗོད། ཐ་མ་ནི། ཨེ་ནི་ཏྲ་ཛཿ སྐུ་སྟོད་ཁྲོ་བོ་འབར་བའི་གཟུགས། །སྐུ་སྨད་ཕུར་པའི་དཔལ་ལྡན་པ། །ལོག་འདྲེན་དགྲ་བགེགས་སྙིང་ལ་གཟིར། །ལུས་ངག་ཐལ་བའི་རྡུལ་དུ་རློག །རྩ་སྔགས་མཇུག་ཏུ། གནོད་བྱེད་འབྱུང་པོ་སྙིང་ལ་མཱ་ར་ཡ་རྦད། ཅེས་བསྒྲལ། སྟོབས་པ་ནི། དབང་ཆེན་ལྷ་ཚོགས་གནམ་ས་ཙམ། །གདངས་པའི་ཞལ་དུ་དགྲ་བགེགས་ཀྱིས། །ཤ་ཁྲག་རུས་པ་ཚོགས་སུ་འབུལ། །དགྱེས་པར་རོལ་ཞིག་ཁ་རཾ་ཁཱ་ཧིཿ མ་ཧཱ་མཾ་ས་ཁཱ་ཧི། མ་ཧཱ་ཙི་ཏཱ་ཁཱ་ཧི། མ་ཧཱ་བ་སུ་ཏ་ཁཱ་
ཧི། མ་ཧཱ་ཀོ་རོ་ཙ་ན་ཁཱ་ཧི། མ་ཧཱ་ཀེཾ་ནི་རི་ཏི་ཁཱ་ཧི། བྱིན་རླབས་དབང་བསྐུར་གྱི་རིམ་པ་ལ། སློབ་དཔོན་བདག་ཉིད་འཇུག་པ་རྒྱས་པར་བླང་བའམ། རིག་པའི་མེ་ཏོག་དོར་བ་ཙམ་སྔོན་དུ་འགྲོ་བས། སློབ་མ་རྣམས་གྲལ་ལ་འཁོད་པར། གདོན་འགྲོལ་དང་འབྲེལ་ན་གཞན་ནས་འབྱུང་བ་ལྟར་དང་། མ་འབྲེལ་ན་ཁྲུས་བྱས། བགེགས་ཕྲལ་སྲུང་འཁོར་བསྒོམ། རྒྱས་པར་སྟ་གོན་དང་འཇུག་པའི་ཆོས་རྣམས་བཀའ་བརྒྱད་རིག་འཛིན་ཞལ་ལུང་ལྟར་བྱ་ཞིང་། འདིར་སྤྲོས་པ་ཉེ་བར་བསྡུ་བས་འཇུག་པ་དེ་བའི་དབང་དུ་བྱས་ན། མཚམས་སྦྱོར་ཅི་རིགས་པ་ལས། ལོ་རྒྱུས་ཀྱི་ཁྱད་པར། ད་ལམ་འདིར་སྐབས་སུ་བབས་པ་ནི། འཇམ་དཔལ་དབྱངས་དངོས་མངའ་བདག་ཚངས་པ་ལྷ་ཡི་མེ་ཏོག་གི་ཡེ་ཤེས་སྒྱུ་འཕྲུལ་དྲྭ་བའི་རོལ་གར་ལྔ་བརྒྱ་པ་རྣམས་ཀྱི་གཙུག་གི་ནོར་བུ། རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་ངག་དབང་བློ་བཟང་རྒྱ་མཚོ་འམ། རིག་འཛིན་པདྨས་མཚན་གསོལ་རྡོ་རྗེ་ཐོགས་མེད་རྩལ་ཞེས་མཚན་ཉི་ཟླ་ལྟར་ཡོངས་སུ་གྲགས་པ་དེ་ཉིད་ཀྱི་དག་པ་ཡེ་ཤེས་ཀྱི་གཟིགས་ངོར་ཤར་བའི་ཡང་གསང་རྒྱ་ཅན་གྱི་ནང་ཚན་ལྟོ་འགྲོས་བཏེགས་པའི་ཡིད་བཞིན་དབང་རྒྱལ་གྱི་རྒྱ་ཅན་ལས། འཆི་བདག་གི་བདུད་ཀྱི་གཉེན་པོ་བཅོམ་ལྡན་འདས་མགོན་པོ་ཚེ་དཔག་ཏུ་མེད་པ་དང་། སྟེང་གདོན་གཟའི་གཉེན་པོ་ཕྱག་ན་རྡོ་རྗེ། བར་གདོན་རྒྱལ་བསེན་དམ་སྲིའི་གཉེན་པོ་རྟ་མཆོག་རོལ་པ། འོག་གདོན་ཀླུ་
དང་ས་བདག་གི་གཉེན་པོ་རྡོ་རྗེ་ནམ་མཁའ་ལྡིང་སྟེ། དཔལ་རྟ་མཆོག་རོལ་པ་གཉེན་པོ་ལྷ་བཞིའི་དཀྱིལ་འཁོར་དུ་བྱིན་རླབས་དབང་བསྐུར་གྱི་རིམ་པ་ཟབ་མོ་འབུལ་བའི་སྐབས་སུ་བབས་པ་ཡིན། དེ་ལའང་སློབ་དཔོན་གྱི་བྱ་བ་དང་། སློབ་མའི་བྱ་བ་གཉིས་ལས། ཐོག་མར་བདག་ཉིད་ཀྱིས་བགྱི་བར་འོས་བའི་ཆོས་རྣམས་སྔོན་དུ་ལེགས་པར་གྲུབ་ཟིན་ནས། ད་ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལའང་འཇུག་པ་དང་། དབང་དངོས་གཉིས་ལས་ཐོག་མར་འཇུག་པའི་ཆོས་རྣམས་ཞུ་བའི་ཡོན་དུ་དམིགས་ཏེ་མཎྜལ་ཞིག་ཕུལ་མཛོད། དེ་ལྟར་མཎྜལ་ཕུལ་ནས་གསོལ་བ་གདབ་པ་འདིའི་རྗེས་ཟློས་མཛོད། །བླ་མ་སངས་རྒྱས་ཀུན་དང་མཉམ། །སློབ་དཔོན་ལ་ནི་སྐྱབས་སུ་མཆི། །གཉེན་པོ་ལྷ་བཞི་འཁོར་དང་བཅས། །ལྷ་རྣམས་ལ་ཡང་ཕྱག་འཚལ་ལོ། །མྱ་ངན་འདས་པའི་གྲོང་ཁྱེར་དུ། །སློབ་དཔོན་གྱིས་ཀྱང་བདག་གཞུགས་གསོལ། །ལན་གསུམ། དེ་ནས་སྔོན་ཆད་བཅོམ་ལྡན་འདས་གཉེན་པོ་ལྷ་བཞིའི་དཀྱིལ་འཁོར་དུ་མ་ཞུགས་པའམ། ཞུགས་ཀྱང་བསྐྱར་ནས་འཇུག་པའི་མཚོན་བྱེད་དུ་རས་ཡུག་དམར་པོ་རེས་གདོངས་བཅིངས་པའི་མོས་པ་མཛོད། ཨ་ཁཾ་ཝཱི་ར་ཧཱུྃ། དཀྱིལ་འཁོར་གྱི་ལྷ་དང་འཇལ་བའི་ཚེ་ཕྱག་སྟོང་པར་འཇལ་དུ་མི་བཏུབ་པས། ཕྱག་རྟེན་གྱི་སླད་དུ་ཨུ་
དུམྦཱ་ར་ལ་སོགས་པའི་མེ་ཏོག་གི་ཕྲེང་བ་གསར་པ་རེ་ཡང་བྱིན་པའི་མོས་པ་མཛོད། ཨོཾ་པུཥྤེ་རཏྣ་མཱ་ལེ་ཏྲཾ། དེ་ནས་བླ་མ་དང་དཀྱིལ་འཁོར་གྱི་ལྷ་ཚོགས་ཐ་མི་དད་པའི་སྤྱན་སྔར་སྐྱབས་སུ་འགྲོ་བ་དང་སེམས་བསྐྱེད་པ་འདིའི་རྗེས་ཟློས་མཛོད། བླ་མ་སངས་རྒྱས་འཁོར་དང་བཅས། སོགས་ལན་གསུམ། སླར་ཡང་སྡོམ་པ་གསུམ་ཚུལ་བཞིན་དུ་བཟུང་བར་བགྱིའོ་སྙམས་པའི་ཡིད་ཀྱིས་འདིའི་རྗེས་ཟློས་ལན་གསུམ་མཛོད། བདེ་གཤེགས་སྲས་བཅས་བདག་ལ་དགོངས། །རིག་པ་འཛིན་པ་བདག་གིས་ནི། །བྱང་ཆུབ་སྙིང་པོར་མཆིས་ཀྱི་བར། །སོ་སོ་ཐར་དང་བྱང་ཆུབ་སེམས། །རིག་འཛིན་ནང་གི་སྡོམ་པའི་ཚོགས། །མ་ལུས་ཡོངས་སུ་བཟུང་བར་བགྱི། །དེ་ནས་གསང་སྔགས་ནང་གི་སེམས་བསྐྱེད་པའི་སླད་དུ། ཁྱེད་རང་རྣམས་ཀྱི་སྙིང་གར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་ཉ་གང་བའི་སྟེང་དུ་དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་འོད་ཟེར་འཕྲོ་བས་རྒྱས་བཏབ་པར་མོས་ཏེ་དེ་གཉིས་དབྱེར་མེད་དུ་སེམས་བསྐྱེད་སྙམས་པས་འདིའི་རྗེས་ཟློས་མཛོད། ཨོཾ་སརྦ་ཡོ་གཙིཏྟ་ཨུཏྤཱ་ཏ་ཡཱ་མི། དེ་ལྟར་སེམས་བསྐྱེད་པ་དེ་ཉིད་སློབ་དཔོན་གྱིས་ཕྱག་གི་རྡོ་རྗེ་སྙིང་གར་བཞག་ཅིང་། ཨོཾ་སུ་ར་ཏི་ས་མ་ཡ་སྟཱཾ། ཧོ་སིདྡྷ་བཛྲ་ཡ་ཐཱ་སུ་ཁཾ། ཞེས་བརྗོད་པས་བརྟན་པར་བྱས་
པའི་མོས་པ་མཛོད། དེ་ནས་སློབ་དཔོན་གྱིས་དབྱེ་བའི་རྒྱ་དང་བཅས་ཏེ། ཛཿཧཱུྃ་བྃ་ཧོ༔ པྲ་བེ་ཤ་ཡ་ཕཊ། ཅེས་བརྗོད་པས་དཀྱིལ་འཁོར་གྱི་སྒོ་བཞི་ཤག་གིས་བྱེ་བར་གྱུར་པ་ལ། ཤར་སྒོ་ནས་བརྩམས་སྟེ་གཡས་སྐོར་གྱིས་སྒོ་བཞི་སོ་སོར་རིམ་པར་སྐུ་གསུང་ཐུགས་ཀྱི་ཕྱག་བགྱིས་པའི་མོས་པས་འདིའི་རྗེས་ཟློས་མཛོད། ཨོཾ་ན་མ་སྟེ་ཧཱུྃ། ཨོཾ་ན་མཱ་མི་ཧཱུྃ། ཨོཾ་ན་མོ་ན་མ་ཧཱུྃ། ལན་བཞི། དེས་ཕྱི་མཚན་མའི་དཀྱིལ་འཁོར་དུ་འཇུག་པ་སོང་ནས། ནང་ཡེ་ཤེས་ཀྱི་དཀྱིལ་འཁོར་དུ་འཇུག་པའི་སྔོན་འགྲོ་དམ་ལ་བཞག་པ་ནི། གཡོན་པའི་མཐེབ་སྲིན་གྱིས་བདུད་རྩི་བྱིན་ལ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་སྲུང་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ཨོཾ་བཛྲ་པཉྩ་ཨ་མྲྀ་ཏ་ཧ་ན་ཧ་ན་ཨུ་ད་ཀ་ཧཱུྃ་ཕཊ། དེ་ལྟར་དམ་ཚིག་བདུད་རྩི་དེ་ལྕེ་ལ་བཞག་ཀྱང་སྙིང་གི་དཀྱིལ་དུ་འབབས་ནས། དམ་ཚིག་མ་སྲུང་ན་བཛྲ་ཡཀྵ་ཀྲོ་དྷ་ཞེས་བྱ་བའི་སྡིག་པ་མགོ་དགུ་པར་གྱུར་ནས་འདི་ཕྱིའི་སྡུག་བསྔལ་ཐམས་ཅད་བསྐྱེད་པ་དང་། སྲུང་ན་ཡེ་ཤེས་སེམས་དཔར་གྱུར་ནས་དུས་རྟག་ཏུ་བྱིན་གྱིས་རློབས་པ་དང་དངོས་གྲུབ་ཐམས་ཅད་སྟེར་བར་འགྱུར་བ་ཡིན་ནོ། །དེ་ལྟར་དམ་ལ་བཞག་པས་རྒྱུད་བརྟན་པར་བྱས་ནས། ནང་འཇུག་གི་དངོས་གཞི་ཡེ་
ཤེས་དབབ་བའི་སླད་དུ། ཁྱེད་རང་རྣམས་དཀྱིལ་འཁོར་གྱི་ཤར་སྒོར་འཁོད་པའི་མོས་པ་དང་བཅས་ཏེ་ལུས་གནད་སྐྱིལ་ཀྲུང་དྲང་པོར་བསྲངས། ངག་གནད་རླུང་ཁ་སྦྱོར་དུ་འཆིང་། སེམས་ཀྱི་གནད་གཞན་དུ་མ་ཡེངས་པར་དམིགས་པ་འདི་བཞིན་དུ་མཛོད། ཨ་མྲྀ་ཏས་བསངས་སྭ་བྷཱ་བས་སྦྱངས། ཁྱེད་རང་རྣམས་ཀྱི་ཕུང་པོ་ཁམས་དང་སྐྱེད་མཆེད་ཀྱིས་མཚོན་པའི་མ་དག་པའི་སྣང་བ་ཐམས་ཅད་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས་གནས་ཁང་དུར་ཁྲོད་རོལ་བའི་དབུས་སུ་ཉི་ཟླ་པདྨའི་གདན་གྱི་སྟེང་དུ་སེམས་ཉིད་རྣམ་པར་མི་རྟོག་པའི་ཡེ་ཤེས་ཀྱི་ངོ་བོ་ཡི་གེ་ཧྲཱིཿདམར་པོ་ལས་ཁྱེད་རང་རྣམས་སྐད་ཅིག་གིས་དཔལ་རྟ་མཆོག་རོལ་པའི་སྐུར་གྱུར་པ་ནི། སྐུ་མདོག་དམར་པོ་དུས་མཐའི་མེ་ལྟར་འབར། ཞེས་པ་ནས། གཡོན་བརྐྱང་ཚུལ་གྱིས་བཞུགས། ཞེས་པའི་བར་ལས་གཞུང་ལྟར་གསལ་བཏབ། དེ་ལྟར་དུ་གསལ་བའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་ནས་ཡེ་ཤེས་སེམས་དཔའི་ཚོགས་བསམ་གྱིས་མི་ཁྱབ་པ་སྤྱན་དྲངས་ཏེ་སིབ་སིབ་ཐིམ་པས་རྒྱུད་བྱིན་གྱིས་བརླབས་པའི་ཐུགས་མོས་མཛོད། རྩ་སྔགས་མཐར། ས་མ་ཡ་ཨ་བེ་ཤ་ཡ་ཨ་ཨཱ༔ ཞེས་པས་བྱིན་དབབ། དེ་ལྟར་བྱིན་དབབ་པའི་ཡེ་ཤེས་པ་དེ་ཉིད་བརྟན་པར་བྱ་བའི་སླད་དུ་
སློབ་དཔོན་གྱི་ཕྱག་གི་རྡོ་རྗེ་སྤྱི་བོར་རྒྱ་གྲམ་གྱི་ཚུལ་དུ་བཞག་པའི་མོས་པ་མཛོད། སྤྱི་བོར་རྡོ་རྗེ་རྒྱ་གྲམ་དུ་བཞག་ཅིང་། ཏིཥྛ་བཛྲས་བརྟན་པར་བྱ། དེ་ནས་སྔར་བྱིན་པའི་མེ་ཏོག་གི་ཕྲེང་བ་དེ་ཉིད་དཀྱིལ་འཁོར་གྱི་གཙོ་བོ་ལ་ཕུལ་བའི་མོས་པ་དང་བཅས་སྟེ་འདིའི་རྗེས་ཟློས་མཛོད། པུཥྤེ་པྲ་ཏཱི་ཙྪ་ཧོས་མེ་ཏོག་དོར་བ་དེ་ཉིད། དེ་ལྟར་ཕུལ་བའི་མེ་ཏོག་གི་ཕྲེང་བ་དེ་ཉིད་སླར་ཡང་ལྷག་པའི་ལྷས་ཁྱེད་རང་རྣམས་ཀྱི་སྤྱི་བོར་ཅོད་པཎ་གྱི་ཚུལ་དུ་བཅིངས་པའི་མོས་པ་མཛོད། པུཥྤེ་ཨ་བྷི་ཥིཙཱ་ནཱཾ། ཞེས་པས་སྤྱི་བོར་བཞག །ༀ་བཛྲ་པྲ་བེ་ཤ་ཡ་ཕཊ། ཅེས་པས་མ་རིག་པའི་ལིང་ཏོག་དང་མིག་རས་ལྷན་ཅིག་ཏུ་བསལ་བས་རིག་པ་ཡེ་ཤེས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་ཐམས་ཅད་མངོན་སུམ་དུ་མཐོང་བའི་མོས་པ་མཛོད། དེས་འཇུག་པའི་ཆོས་རྣམས་སོང་ནས། ཞུགས་ནས་མངོན་པར་དབང་བསྐུར་བ་ལའང་བཞི་ལས། ཐོག་མར་བུམ་དབང་ཞུ་བའི་ཡོན་དུ་དམིགས་ཏེ་མཎྜལ་ཞིག་ཕུལ་མཛོད། དེ་ལྟར་མཎྜལ་ཕུལ་ནས་གསོལ་བ་གདབ་པ་འདིའི་རྗེས་ཟློས་མཛོད། ཧོ། བདེ་བར་གཤེགས་པ་ཐམས་ཅད་ཀྱི། །གསང་བ་གསུམ་གྱི་བདག་ཉིད་ཅན། །བཅོམ་ལྡན་གཉེན་པོ་ལྷ་བཞི་ཡིས། །བྱིན་གྱིས་བརླབས་ནས་བདག་གི་རྒྱུད། །བུམ་པའི་དབང་གིས་སྨིན་པར་མཛོད། །ཞེས་གསོལ་བ་བཏབ་
པས། སློབ་དཔོན་གྱི་ཐུག་ཀ་ནས་འོད་ཟེར་འཕྲོས། གདན་གསུམ་ཚང་བའི་དབང་གི་ལྷ་ནམ་མཁའ་གང་བ་ཨོ་བཛྲ་ས་མཱ་ཛཿས་སྤྱན་དྲངས། ཨོཾ་སརྦ་ཏ་ཐཱ་ག་ཏ་ཨརྒྷཾ་སོགས་ཀྱིས་མཆོད། ཆོས་སྐུ་ནམ་མཁའ་སོགས་ཀྱིས་བསྟོད། །རྡོ་རྗེ་ཅན་གྱིས་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་སྩལ། །དེང་འདིར་འདི་ལའང་སྩལ་དུ་གསོལ། །ཞེས་གསོལ་བ་བཏབ་པ་ལ་བརྟེན་ནས་དབང་གི་ལྷ་དང་སློབ་དཔོན་ལྷན་ཅིག་པས་རིན་པོ་ཆེའི་བུམ་པ་བདུད་རྩིས་གང་བ་རེ་ཐོགས་ཏེ་དབང་བསྐུར་པའི་མོས་པ་མཛོད། ཧོ། བདེར་གཤེགས་གཉེན་པོ་ལྷ་བཞི་ཡི། །སྐུ་གསུང་ཐུགས་ཡོན་ཕྲིན་ལས་ཀྱིས། །བྱིན་བརླབས་ལྷ་ཡི་བདུད་རྩིའི་ཆུས། །སྐལ་ལྡན་འདི་ལ་དབང་བསྐུར་བས། །ཉོན་མོངས་དྲི་མ་ལྔ་དག་སྟེ། །ཕུང་པོ་རྣམ་ལྔ་གནས་གྱུར་པ། །ཡེ་ཤེས་ལྔ་པོ་མངོན་དུ་བྱས། །མི་བསྐྱོད་ལ་སོགས་རིགས་ལྔ་ཡི། །བག་ཆགས་རྒྱུད་ལ་འགོ་བར་ཤོག །རྩ་སྔགས་མཐར། ཨོཾ་བཛྲ་ཨུ་ད་ཀ་ཨ་བྷི་ཥིཉྩ་ཧཱུྃ། ཞེས་སྤྱི་གཙུག་ཏུ་དབང་བསྐུར་ཞིང་བུམ་ཆུ་སྦྱིན། བྷུདྡྷ་ཨ་བྷི་ཥིཉྩ་ཨོཾ་གྱིས་དཔྲལ་བ་རཏྣ་ཨ་བྷི་ཥིཉྩ་སྭས་རྣ་ལྟགས་གཡས། པདྨ་ཨ་བྷི་ཥིཉྩ་ཨ་ལྟགས་པ། ཀརྨ་ཨ་བྷི་ཥིཉྩ་ཧཱ། ཞེས་རྣ་ལྟགས་གཡོན་དུ་བཞག་ནས་དབང་བསྐུར་རོ། །དེ་བརྟན་པར་བྱ་བའི་སླད་དུ་སྐུ་གསུང་ཐུགས་ཡོན་ཕྲིན་ལས་ཀྱི་དབང་
རྣམས་རིམ་པར་སྩོལ་བྱུང་སྙམ་པའི་མོས་པ་དུང་དུང་མཛོད་ཅིག །ཅེས་བརྡ་སྦྱར་ལ། སྐུའི་དབང་ནི། ཧྲཱིཿ བཅོམ་ལྡན་ཚེ་དཔག་མེད་མགོན་གྱི། །སྐུ་ཡི་བྱིན་རླབས་མ་ལུས་པ། །སྐལ་ལྡན་འདི་ལ་བྱིན་པ་ཡིས། །རྡོ་རྗེའི་སྐུ་རུ་འགྲུབ་པར་ཤོག །ཨོཾ་ཨ་པཱ་རི་མི་ཏ་ཨཱ་ཡུཛྙཱ་ན་ཀཱ་ཡ་ཨ་བྷི་ཥིཉྩ་ཨོ། དཔལ་ཆེན་རྟ་མགྲིན་དབང་རྒྱལ་གྱི། །སྐུ་ཡི་བྱིན་རླབས་མ་ལུས་པ། །སྐལ་ལྡན་འདི་ལ་བྱིན་པ་ཡིས། །རྡོ་རྗེའི་སྐུ་རུ་འགྲུབ་པར་ཤོག །ཨོཾ་པདྨ་ཀྲོ་དྷ་ཧྱ་གྲི་ཝ་ཀཱ་ཡ་ཨ་བྷི་ཥིཉྩ་ཨོཾ། གསང་བདག་ཕྱག་ན་རྡོ་རྗེ་ཡི། །སྐུ་ཡི་བྱིན་རླབས༴ སྐལ་ལྡན་འདི་ལ༴ རྡོ་རྗེའི་སྐུ་རུ༴ ཨོཾ་བཛྲ་པཱ་ཎི་ཀཱ་སྤྲུལ་པའི་བྱ་ཁྱུང་རྒྱལ་པོ་ཡི། །སྐུ་ཡི་བྱིན་རླབས༴ སྐལ་ལྡན་འདི་ལ༴ རྡོ་རྗེའི་སྐུ་རུ༴ ཨོཾ་ག་རུ་ཊ་ཀཱ་ཡ༔ །ཞེས་ཙཀླི་རྣམས་སྤྱི་བོར་འཇོག །གསུང་དབང་ནི། ཧཱུྃ། བདེ་བར་གཤེགས་པ་ཐམས་ཅད་ཀྱི། །ཡན་ལག་དྲུག་བཅུའི་བདག་ཉིད་ཀྱི། །སྒྲ་ནི་ཡིག་འབྲུར་ཤར་བའི་དབང་། །གསུང་གི་རྡོ་རྗེ་འགྲུབ་པར་ཤོག །རྩ་སྔགས་མཐར། ཝཀྐ་ཨ་བྷི་ཥིཉྩ་ཨཱཿ ཞེས་གཟུངས་སྔགས་བྲིས་པ་མགྲིན་པར་བཞག །རྗེས་འབྲེལ་བཟླས་ལུང་གི་སླད་དུ། སློབ་དཔོན་གྱི་ཐུགས་ཀར་ཧྲཱིཿཡིག་གི་མཐར་སྔགས་ཀྱི་ཕྲེང་བས་བསྐོར་བ་ལས་སྔགས་ཕྲེང་གཉིས་པ་བྱུང་། ཁྱེད་རང་རྣམས་ཀྱི་ཞལ་དུ་ཞུགས། སྙིང་གར་ཧྲཱིཿཡིག་གི་མཐར་
གཡས་བསྐོར་དུ་འཁོད་ལས་འགྱུ་བའི་རླུང་ཁམས་ཐམས་ཅད་གྲགས་སྟོང་སྔགས་ཀྱི་འཁོར་ལོ་དག་པར་གྱུར་པའི་མོས་པ་དང་བཅས་ཏེ་སྔགས་འདིའི་རྗེས་ཟློས་ལན་གསུམ་མཛོད། རྩ་སྔགས་ལན་གསུམ་བཟླས་མཐར་ཕྲེང་བ་མགོ་བོར་བཀོད་ལ། བཅོམ་ལྡན་འདི་ལ་རྩལ་ལགས་ཀྱི། །བཅོམ་ལྡན་འདི་ལ་འགོ་བར་མཛོད། །སྔགས་ཀྱི་དངོས་གྲུབ་སྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །རྡོ་རྗེ་སློབ་མ་འདི་རྣམས་ཀྱི་རྒྱུད་བཅོམ་ལྡན་འདས་གཉེན་པོ་ལྷ་བཞིའི་གསང་སྔགས་ཀྱི་བྱིན་རླབས་མ་ལུས་པ་འཇུག་ཅིང་བརྟན་པར་གྱུར་ཅིག །ཐུགས་ཀྱི་དབང་ནི། ཧྲཱིཿ བདུད་རྩིས་གང་བའི་བུམ་པ་དང་། །བྷནྡྷ་པདྨའི་དབང་བསྐུར་བས། །སྐལ་ལྡན་ཡིད་ཀྱི་སྒྲིབ་སྦྱངས་ནས། །ཐུགས་ཀྱི་རྡོ་རྗེ་འགྲུབ་པར་ཤོག །ཧྲཱིཿ ཨཱ་པཱ་རི་མི་ཏ་ཨ་ཡུཛྙཱ་ན་ཙིཏྟ་ཨ་བྷི་ཥིཉྩ་ཧཱུྃ། བདུད་དཔུང་འཇོམས་པའི་རལ་གྲི་དང་། །འཆིང་བྱེད་ཞགས་པའི་དབང་བསྐུར་བས། །སྐལ་ལྡན་ཡིད་ཀྱི་སྒྲིབ་སྦྱངས་ནས། །ཐུགས་ཀྱི་རྡོ་རྗེ་འགྲུབ་པར་ཤོག །པདྨ་ཀྲོ་ཏ་ཧྱ་གྷི་ཝ་ཙིཏྟ༴ ཐབས་མཆོག་རྡོ་རྗེ་རྩེ་ལྔ་དང་། །ཤེས་རབ་དྲིལ་བུའི་དབང་༴ སྐལ་ལྡན་ཡིད་ཀྱི་སྒྲིབ༴ ཐུགས་ཀྱི་རྡོ༴ བཛྲ་པཱ་ཎི་ཙིཏྟ༴ ཀླུ་གདོན་འདུལ་བའི་གཤེད་མ་རུ། །སྤྲུལ་པ་ཐུག་སྤྲུལ་དབང༴ སྐལ་ལྡན་ཡིད་ཀྱི༴ ཐུགས་ཀྱི་རྡོ་རྗེ༴
ག་རུ་ཊ་ཙིཏྟ་ཨ་བྷི༴ ཞེས་ཕྱག་མཚན་རྣམས་སྙིང་གར་གཏུགས། ཡོན་ཏན་གྱི་དབང་ནི། ཧྲཱིཿ གཉེན་པོའི་ལྷ་ཚོགས་ཡོན་ཏན་རྣམས། །ཀུན་འདུས་ཡིད་བཞིན་ནོར་བུ་ཡིས། །རིགས་ཀྱི་བུ་ལ་དབང་བསྐུར་བས། །ཡོན་ཏན་མ་ལུས་ལྷུན་རྫོགས་ཤོག །རྩ་སྔགས་གཤམ་དུ། གུ་ཎ་ཨ་བྷི་ཥིཉྩ་སྭཱ། ཞེས་ནོར་བུ་དབང་གི་གཟུགས་ལྟེ་བར་གཏུགས། ཕྲིན་ལས་ཀྱི་དབང་ནི། བྲུབ་ཁུང་དུ་ལིངྒ་བཤམས་ནས། ཨེ་ལས་གནམ་ལྕགས་ཀྱི་ཁང་སྒྲོམ་འབར་བའི་དབུས་སུ་ཀླུ་གཉན་ས་བདག་གདུག་པ་ཅན་རྣམས་མངོན་སུམ་བཞིན་ཏུ་གསལ་བར་གྱུར། ན་མོ། །དཀོན་མཆོག་གསུམ་ལ་ཕྱག་འཚལ་ལོ། དཀོན་མཆོག་གསུམ་གྱི་བཀའ་བདེན་པ་དང་། ཆོས་ཉིད་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུ་དབང་ཆེན་རྟ་མཆོག་རོལ་པ་གཉེན་པོ་ལྷ་བཞིའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང་། སྤྲུལ་པ་ཡང་སྤྲུལ་ཕྱག་བརྙན་དང་བཅས་པ་རྣམས་ཀྱི་བདེན་པ་དང་། བདེན་པ་ཆེན་པོའི་མཐུ་ལ་བརྟེན་ནས། མ་རུངས་པའི་སེམས་ཅན་བསྒྲལ་བའི་ཞིང་དུ་གྱུར་པ་ཀླུ་གཉན་ས་བདག་གདུག་པ་ཐམས་ཅད་མཚན་མ་རྫས་ཀྱི་རྟེན་འདི་ལ་མཆིས་པར་གྱུར་ཅིག །སརྦ་དུཥྚཱན་ནཱ་ག་བྷུ་མི་པ་ཏི་ས་པ་རི་ཝཱ་ར་ཛཿཧཱུྃ་བྃ་ཧོཿ ཞེས་པས་ཀླུ་གཉན་ས་བདག་བཀུག །ཕུར་པ་གཏད་
ལ། ཧཱུྃ། གང་ཞིག་བཏབ་པ་ཙམ་གྱིས་ནི། །དགྲ་བགེགས་ཐལ་བར་རློག་བྱེད་པ། །གནམ་ལྕགས་ཕུར་བུ་འདི་གཏད་པས། །དྲག་པོའི་ཕྲིན་ལས་མྱུར་འགྲུབ་ཤོག །ཅེས་དང་རྩ་སྔགས་གཤམ་དུ། ཀརྨ་ཨ་བྷི་ཥིཉྩ་ཧཱ། ཞེས་གཏད་པའི་ཕུར་པ་དེ་ཉིད་སངས་རྒྱས་ཐམས་ཅད་ཀྱི་ཕྲིན་ལས་འདུས་པའི་ངོ་བོ་གནམ་ལྕགས་ཀྱི་ཕུར་པ་མེ་འབར་བའི་རྣམ་པར་གྱུར་པ་ཁྱེད་རང་རྣམས་ཡི་དམ་ལྷའི་ང་རྒྱལ་དང་བཅས་ཏེ། ཧྲི་ཨ་པ་རི་མི་ཏ་སོགས་དང་། ༀ་བཛྲ་མ་ཧཱ་ཀྲོ་དྷ་པདྨ་ཀྲོ་དྷི་ཤྭ་རི་བཛྲ་ཀཱི་ལི་ཀཱི་ལ་ཡ་མ་ཧཱ་ཡཀ་ཀཱ་ལ་རཱུ་པ་ཀརྨ་རྃ་རྃ་ཛྭ་ལ་རྃ་ཧཱུྃ་ཕཊ། གནོད་བྱེད་འབྱུང་པོ་མཱ་ར་ཡ་ཕཊ། ཅེས་བརྗོད་བཞིན་ཏུ་ཀླུ་གཉན་ས་བདག་གདུག་པ་ཅན་རྣམས་ཀྱི་སྙིང་གར་བཏབ་པའི་མོས་པ་མཛོད། ཅེས་བརྡ་སྦྱར་ལ་གོང་གི་སྔགས་དང་བཅས་ཏེ་ཕུར་པ་འདེབས་སུ་འཇུག །དེ་ལྟར་བསྒྲལ་བའི་རྟེན་གཞི་ཉིད་ཁྲོ་རྒྱལ་ཆེན་པོའི་སྐུ་ལས་འབར་བའི་ཡེ་ཤེས་ཀྱི་མེས་ལྷག་མེད་དུ་བསྲེག་ཅིང་སྦྱང་བའི་མོས་པ་མཛོད། ལིང་རོ་སྔགས་གཤམ་དུ། ཛྭ་ལ་རཾ། བཏགས་པས་མེ་ཧོམ་ལ་བསྲེག །ཕྲིན་ལས་ཀྱི་དབང་དེས་དུག་གི་དཔལ་བཅོམ་པ་ལ་བརྟེན་སླར་ཡང་ཀླུ་གཉན་ས་བདག་རྣམས་ཀྱི་དྭང་མ་ཡེ་ཤེས་ཀྱི་ངོ་བོ་ཡོངས་སུ་གྱུར་པ་ལས་སོ་སོའི་གཟུགས་བརྙན་གསལ་ལ་མ་འདྲེས་ཤིང་མཐུ་བྱིན་རྫོགས་པར་གྱུར། སརྦ་ནཱ་ག་བྷུ་མི་པ་ཏི་ས་པ་རི་ཝཱ་ར་ཛཿཧཱུྃ་བྃ་
ཧོཿ ཞེས་ཙཀླི་ལ་བསྐྱེད་ཅིང་བསྟིམ། དེ་ལ་བདུད་རྩིའི་མཆོད་ཡོན་ཕུལ་བ་སྔོན་དུ་འགྲོ་བས་ཁྱེད་རང་རྣམས་གཉེན་པོ་སྟོབས་ཀྱི་ལྷར་གསལ་བའི་བྲན་དང་འབངས་སུ་གཏད་པས་སོ་སོའི་སྲོག་གི་ཡང་། སྙིང་ཡི་གེ་ཕུ༔ སོགས་ཀྱི་རྣམ་པས་ཞབས་འོག་གི་གདན་ལ་ཐིམ་ནས་བྱང་ཆུབ་བར་དུ་དམ་ཚིག་ལས་མི་འདའ་བར་གྱུར་པའི་མོས་པ་མཛོད། ཅེས་བརྡ་སྦྱར་ལ། འོ་ཆོལ་ལ་ཀླུ་སྨན་བཏབ་པ་ཨོཾ་ཨཱཿཧཱུྃ་གིས་བདུད་རྩིར་བརླབས་ནས། ཨོཾ་ཧི་ལི་ཧི་ལི་མ་ཧཱ་ཧི་ལི་ཕྲུཾ་ཕུ་སྭཱ་ཧཱ། ཨོཾ་བྷཀྵ་ཡ་བྷཀྵ་ཡ་ས་མ་ཡ་ཏིཥྛ་ཕྲུཾ་ཕུ་སྭཱ་ཧཱ། ཞེས་པས་བསྔོ། ཙཀླི་རྣམས་ཞབས་འོག་ཏུ་དྲངས་ཞིང་། ཧཱུྃ། གཏི་མུག་དབང་གི་དྲེགས་པ་ནི། །ཀླུ་གཉན་ས་བདག་ཚོགས་ཡིན་ཏེ། །དབང་བསྡུས་ཟིལ་གྱིས་མནན་ནས་ནི། །བྲན་དང་ཁོལ་པོ་ཡང་གཡོག་དང་། །འབངས་ཀྱི་ཚུལ་དུ་ཁྱེད་ལ་གཏད། །གཉེན་པོའི་སྒྲུབ་པ་ཡུན་མ་ཐུང་། །བཀའ་དང་དམ་ལ་གནས་པར་འགྱུར། ནཱ་ག་རཱ་ཛ་ས་མ་ཡ་ཕུཿཛ་ས་མཱ་ཡ་པ་ཤཾ་ཀུ་རུ་ཧཱུྃ་ཕཊཿ ཅེས་བརྗོད་ཅིང་། དེ་ལྟར་ན་ཕྱི་བསྐྱེད་པ་ལྷ་ཡི་དཀྱིལ་འཁོར་ལ་བརྟེན་ནས་སྐུ་བུམ་པའི་དབང་བསྐུར་བ་མཐའ་བརྟེན་དང་བཅས་པ་ཐོབ། ལུས་ཀྱི་དྲི་མ་སྦྱངས། ལམ་བསྐྱེད་རིམ་བསྒོམ་པ་ལ་དབང་། འབྲས་བུ་སྤྲུལ་པའི་སྐུ་ཐོབ་པའི་རྟེན་འབྲེལ་བསྒྲིགས་པ་ཡིན་ནོ། །ཞེས་རྟོགས་པ་བསྐྱེད། དེ་ནས་གསང་དབང་ཞུ་བའི་སླད་
དུ་དམིགས་ཏེ་མཎྜལ་ཕུལ། གསོལ་བ་གདབ་པ་འདིའི་རྗེས་ཟློས་ལན་གསུམ་མཛོད། ཧོ། དཀྱིལ་འཁོར་གཙོ་བོ་སློབ་དཔོན་མཆོག །བརྩེ་བས་བདག་ལ་ཉེར་དགོངས་ཏེ། །རྩ་ཁམས་བྱིན་གྱིས་བརླབ་མཛད་པའི། །གསང་བའི་དབང་བསྐུར་སྩལ་དུ་གསོལ། །སྔོན་ཆད་ཀུན་རྫོབ་བྱང་སེམས་ཀྱི་དཀྱིལ་འཁོར་མ་མཐོང་བའི་བརྡར་ཨོཾ་ཨཱཿཧཱུྃ་བརྗོད་ཅིང་མིག་རས་རྣམས་འཆིང་བར་ཞུ། ཞེས་བརྡ་སྦྱར། དེ་ནས་སློབ་དཔོན་དཔལ་རྟ་མགྲིན་དུ་གསལ་བའི་གསང་གནས་ཧཱུྃ་ལས་རྡོ་རྗེ་ཧཱུྃ་གིས་མཚན་པ། ནོར་བུའི་བུ་གར་ཨོཾ་རྩེ་མོར་ཕཊ་དང་བཅས་པ། ཡུམ་པདྨ་གར་དབང་དམར་མོ་པདྨ་དང་བྷནྡྷ་འཛིན་པའི་གསང་གནས་ཨ་ལས་པདྨ་ཨས་མཚན་པ། ༀ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོཉ་ཧཾ། ཡབ་ཡུམ་སྙོམས་པར་ཞུགས་པའི་དགའ་བའི་སྒྲས་རྒྱལ་བ་སྲས་དང་བཅས་པ་སྤྱན་དྲངས་ཞལ་དུ་ཞུགས། ཐུགས་ཀར་རྗེས་ཆགས་ཀྱི་མེས་ཞུ། ཡུམ་གྱི་མཁར་བབས་པ་ཐོད་པའི་བདུད་རྩི་དང་སྦྱར་བ་ལྗགས་ཐོག་ཏུ་བཞག་པར་གྱུར་པའི་ཐུགས་མོས་མཛོད། ཧོ་གཉིས་མེད་སྦྱོར་བའི་བྱང་ཆུབ་སེམས། །མུ་ཏིག་ལྟ་བུར་ཆེས་དཀར་བ། །བདུད་རྩིས་ངག་ལ་དབང་བསྐུར་བས། །རྩ་ཁམས་བདེ་བས་ཁྱབ་པར་ཤོག །ཨོཾ་སརྦ་ཏ་ཐཱ་ག་ཏ་པཉྩ་ཨ་མྲྀ་ཏ་མ་ཧཱ་སུ་ཁ་ཨ་བྷི་ཥིཉྩ་ཧཱུྃ། ཞེས་བྱིན་
པའི་བདུད་རྩི་དེ་ཉིད། ཨ་ཧོ་མ་ཧ་སུ་ཁ། ཅེས་བརྗོད་ཅིང་མྱང་བས་རྩ་ཁམས་ཐམས་ཅད་ཁྱབ་སྟེ་གསལ་སྟོང་ཟུང་དུ་འཇུག་པའི་ཡེ་ཤེས་ཁྱད་པར་ཅན་ཐུགས་བརྒྱུད་ལ་འཁྲུངས་པའི་མོས་པ་དང་བཅས་ཏེ། མིག་རས་རྣམས་ཀྱང་འགྲོལ་བར་ཞུ། དེ་ལྟར་ན་ནང་བྱང་སེམས་སྔགས་ཀྱི་དཀྱིལ་འཁོར་ལ་བརྟེན་ནས་གསང་བའི་དབང་བསྐུར་བ་ཐོབ། ངག་གི་དྲི་མ་སྦྱངས། ལམ་རླུང་དང་གཏུམ་མོ་བསྒོམ་པ་ལ་དབང་། འབྲས་བུ་ལོངས་སྤྱོད་རྫོགས་སྐུ་འགྲུབ་པའི་རྟེན་འབྲེལ་བསྒྲིགས་པ་ཡིན་ནོ། །དེ་ནས་ཤེས་རབ་ཡེ་ཤེས་ཀྱི་དབང་གི་སླད་དུ་མཎྜལ་ཕུལ། གསོལ་བ་གདབ་པ་འདིའི་རྗེས་ཟློས་མཛོད། ཧོ། །ཤེས་རབ་ཡེ་ཤེས་ལས་བྱུང་བའི། །དབབས་ལྡོག་བདེ་བ་ཆེན་པོ་ཡིས། །རླུང་སེམས་བསྲེ་བར་བྱེད་པའི་ཐབས། །གསུམ་པའི་དབང་བསྐུར་སྩལ་དུ་གསོལ། །སྔོན་ཆད་ཕྱག་རྒྱ་བྷ་གའི་དཀྱིལ་འཁོར་མ་མཐོང་བའི་བརྡར་ཨོཾ་ཨཱཿཧཱུྃ་གིས་མིག་དར་རྣམས་འཆིང་བར་ཞུ། དེ་ནས་སློབ་དཔོན་གྱི་ཐུགས་ཀ་ནས་རིག་མ་གཟུགས་དང་ལང་ཚོ་ལྡན་པ་པདྨ་གར་དབང་མའི་ངོ་བོ་ཅན་ཞིག་བྱུང་སྟེ་ཁྱེད་རང་རྣམས་ལ་ཐར་པ་བརྟེན་པར་བསྐུལ་བའི་མོས་པ་མཛོད། ཨེ་མ་མཚན་ལྡན་རིག་མ་འདི། །བསྟེན་ན་ཟག་མེད་བདེ་བ་ཆེས། །འཁོར་ལོའི་མདུད་རྣམས་རབ་གྲོལ་ནས། །ཚེ་འདིར་ཟུང་།
འཇུག་ཐོབ་པར་འགྱུར། །ཨ་ཧོ་སུ་ཁ་བྷཉྫམོཀྵ་ཧོ། དེ་ནས་ཁྱེད་རང་རྣམས་དཔལ་རྟ་མགྲིན་དུ་གསལ་བའི་གསང་གནས་ཧཱུྃ་ལས་རྡོ་རྗེ་ཧཱུྃ་གྱིས་མཚན་པ། ནོར་བུའི་བུ་གར་ཨོཾ་རྩེ་མོར་ཕཊ་དང་བཅས་པ། ཡུམ་པདྨ་གར་དབང་དམར་མོ་པདྨ་དང་བྷནྡྷ་འཛིན་པའི་གསང་གནས་ཨ་ལས་པདྨ་ཨས་མཚན་པར་གསལ་བཏབ་ནས། ཨོཾ་སརྦ་ཏ་ཐཱ་ག་ཏ་ཨ་ནུ་ར་ག་ཎ་བཛྲ་སྭ་བྷཱ་ཝ་ཨཱཏྨ་ཀོཉྩ་ཧཾ། ཞེས་བརྗོད་ཅིང་སྙོམས་པར་ཞུགས་པའི་དྭངས་མ་རྣམས་འཁོར་ལོ་བཞིར་རིམ་བཞིན་ཕབ་པས་ཡས་བབས་ཀྱི་དགའ་བ་བཞི་རྒྱུད་ལ་སྐྱེས། སླར་ཡང་རླུང་འཕོ་བ་མེད་པའི་སྟོབས་དང་ཧཱུྃ་ཞེས་པའི་གདངས་ཀྱིས་གྱེན་ལ་དྲངས་པས་མས་བརྟན་གྱི་དགའ་བ་བཞིའི་ཡེ་ཤེས་ཁྱད་པར་ཅན་ཐུགས་རྒྱུད་ལ་འཁྲུངས་པའི་མོས་པ་དང་བཅས། མིག་དར་རྣམས་ཀྱང་འགྲོལ་བར་ཞུ། དེ་ལྟར་ན་གསང་བ་ཕྱག་རྒྱའི་བྷ་གའི་དཀྱིལ་འཁོར་ལ་བརྟེན་ནས་གསུམ་པའི་དབང་བསྐུར་བ་ཐོབ། ཡིད་ཀྱི་དྲི་མ་སྦྱངས། ཕོ་ཉའི་ལམ་བསྒོམ་པ་ལ་དབང་། འབྲས་བུ་ཆོས་ཀྱི་སྐུ་འགྲུབ་པའི་རྟེན་འབྲེལ་བསྒྲིགས་པ་ཡིན་ནོ། །དེ་ནས་དབང་བཞི་པའི་སླད་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཧོ། གདོད་ནས་དག་པའི་རང་རིག་འདི། །མ་རྟོགས་སེམས་ཅན་འཁོར་བར་འཁྱམས། །དེ་རིང་
མགོན་ཁྱོད་བཀའ་དྲིན་མཐུས། །མངོན་སུམ་རང་ངོ་བསྟན་དུ་གསོལ། །ཞེས་གསོལ་བ་བཏབ་ནས། སྔར་ཁྱེད་རང་རྣམས་ཀྱི་རྒྱུད་ལ་འཁྲུངས་པའི་བདེ་ཆེན་གྱི་ཡེ་ཤེས་དེ་ཉིད་མཚོན་བྱེད་དཔེའི་ཐབས་ལ་བརྟེན་ནས་ངོ་སྤྲད་པས་དོན་དམ་ལྷན་གཅིག་སྐྱེས་པའི་ཡེ་ཤེས་སུ་ངོ་འཕྲོད་དེ་གདོད་མའི་བཙན་ས་ཟིན་པའི་མོས་པ་མཛོད། འཇའ་ཤེལ་དང་མེ་ལོང་བསྟན་ལ། ཧཱུྃ། །སེམས་ཉིད་ཀ་དག་ལྷུན་རྫོགས་དོན། །སྣང་སྟོང་ཟུང་འཇུག་སྒྱུ་མའི་སྐུ། །གཉིས་མེད་འཛིན་གྲོལ་སྤྲུལ་པའི་སྐུ། །ཡང་དག་ངེས་དོན་རྟོགས་པར་གྱིས། ཛྙཱ་ན་པཉྩ་དྷརྨ་ཀཱ་ཡ་ཨ་བྷི་ཥིཉྩ་ཨ་ཨཱ། དེ་ལྟར་ན་དེ་ཁོ་ན་ཉིད་དོན་དམ་བྱང་ཆུབ་སེམས། དབྱིངས་རིག་དབྱེར་མེད་པའི་དཀྱིལ་འཁོར་དུ་ཚིག་གིས་བརྡའ་སྤྲད་པ་ལ་བརྟེན་ནས་དབང་བཞི་པ་ཐོབ། ཀུན་གཞིའི་དྲི་མ་སྦྱངས། ལམ་རྫོགས་པ་ཆེན་པོ་བསྒོམ་པ་ལ་དབང་། འབྲས་བུ་ངོ་བོ་ཉིད་སྐུ་ཐོབ་པའི་རྟེན་འབྲེལ་བསྒྲིགས་པ་ཡིན་ནོ། །རྗེས་ཤིས་པ་བརྗོད། དམ་ཚིག་ཁས་བླངས། གཏོང་རག་གི་མཎྜལ། ལུས་ལོངས་སྤྱོད་དབུལ་བ། དགེ་བ་བསྔོ་བ་རྣམས་སྤྱི་ལྟར་བྱས་ལ་དཔོན་སློབ་རྣམས་ཚོགས་ཀྱི་འཁོར་ལོའི་དགའ་སྟོན་ལ་ལོངས་སྤྱོད་ཅིང་སློབ་མ་རྣམས་རང་གནས་སུ་བཏང་ངོ་། །དེ་ནས་ལྷག་མ་ནི། ཨ་ཀཱ་རོས་བརླབས་ཕེ་ཝཾ། ཞེས་པས་ལྷག་སྡུད་བཀུག་ལ། ཧཱུྃ། །དང་པོ་ཕུད་ཀྱིས་མི་མཆོད་རྒྱུ། །དབང་ཆེན་དཀྱིལ་
འཁོར་ལྷ་ཚོགས་གཉན། །བར་དུ་ལྷག་མས་མི་མཆོད་རྒྱུ། །མ་དང་མཁའ་འགྲོ་ལྷག་ལ་དགྱེས། །ཐ་མ་གཅིག་ཏུ་མི་བསྲེ་རྒྱུ། །ཆོས་ཉིད་ཡེ་ནས་རྒྱུ་འབྲས་གཅིག །དཔལ་གྱི་བཀའ་ཉན་ལྷག་སྡུད་རྣམས། །འདིར་སྤྱོན་ཤ་ཁྲག་མཆོད་གཏོར་བཞེས། །སྔོན་གྱི་དམ་ཚིག་མ་གཡེལ་བར། །བཅོལ་པའི་ཕྲིན་ལས་གྲུབ་པར་མཛོད། ཨོཾ་མ་ཧཱ་ཤྲཱི་ཧེ་རུ་ཀ་ས་མ་ཡ་དེ་ཝཱི་ཀོ་ཊ་སརྦ་བཱ་ལི་ཏ་ཁ་ཁ་ཁཱ་ཧི་ཁཱ་ཧི། ཨོཾ་ཨཱཿཧཱུྃ་ཨུཙྪིཥྚ་བཛྲ་ཨ་བྷིཥྛ་ས་མུ་ཀྭ་མ་ས་མ་ཡ་ཧཱུྃ་ཕཊ༔ ཧཱུྃ་ཧཱུྃ་ཧཱུྃ། ཧྲཱིཿཧྲཱིཿཧྲཱིཿ བྷྱོཿབྷྱོཿབྷྱོཿ ཨ་ར་ལི་ཛཿ ཆད་ཐོ་བྱ་བ་ནི། ཧཱུྃ། སྔོན་ཚེ་འདས་དུས་བསྐལ་པ་དང་པོ་ལ། །འོག་མིན་ཆོས་དབྱིངས་གནས་མཆོག་དམ་པ་རུ། །བཅོམ་ལྡན་དཔལ་ཆེན་ཧེ་རུ་ཀ་དཔལ་གྱིས། །སྣང་སྲིད་མ་མོ་དམ་ལ་བཏགས་པའི་ཚེ། །སོ་སོའི་གཟུགས་བསྟན་དམ་ཚིག་ཁས་བླང་བཞིན། །མཆོད་གཏོར་འདི་བཞེས་བཅོལ་པའི་ཕྲིན་ལས་མཛོད། །བསྐལ་པ་བར་མ་རྒྱ་གར་གནས་ཆེན་དུ། །གྲུབ་པའི་རིག་འཛིན་ཆེན་པོ་བརྒྱད་རྣམས་ཀྱིས། །ཞི་ཁྲོ་རང་རང་དཀྱིལ་འཁོར་ཞལ་ཕྱེས་ནས། །བཀའ་སྐྱོང་ཕོ་རྒྱུད་མོ་རྒྱུད་དམ་བཏགས་ཚེ། །སོ་སོའི་གཟུགས་བསྟན་དམ་ཚིག །མཆོད་གཏོར་འདི་བཞེས༴ བསྐལ་བ་ཐ་མ་ཆོས་འཁོར་བསམ་ཡས་སུ། །པདྨ་འབྱུང་གནས་རྗེས་འབངས་གྲོགས་དགུ་ཡིས། །ཞི་དང་
ཁྲོ་བོའི་དཀྱིལ་འཁོར་ཞལ་ཕྱེས་ནས། །སྣང་སྲིད་དྲེགས་པ་སྡེ་བརྒྱད་དམ་བཏགས་ཚེ། །སོ་སོའི་གཟུགས་བསྟན་དམ་ཚིག །མཆོད་གཏོར་འདི་བཞེས༴ ལྔ་བརྒྱ་ཐ་མ་ཟངས་མདོག་དཔལ་རི་དུ། །ཚེ་དབང་རིག་འཛིན་ཆེ་མཆོག་འདུས་རྩལ་གྱིས། །ཞི་ཁྲོ་སྤྱི་དང་བྱེ་བྲག་ཞལ་ཕྱེས་ནས། །དམ་ཅན་རྒྱ་མཚོ་དམ་ལ་བཏགས་པའི་ཚེ། །སོ་སོའི་གཟུགས་བསྟན་དམ་ཚིག་ཁས་བླང་བཞིན། །མཆོད་གཏོར་འདི་བཞེས་བཅོལ་བའི་ཕྲིན་ལས་མཛོད། བརྟན་མ་སྐྱོང་བ་ནི། ཧཱུྃ། བརྟན་མ་སྐྱོང་མཛད་མ་དང་སྲིང་། །དཔལ་གནས་མ་དང་ཡང་དག་ཤེས། །ཁྱུང་བཙུན་ཀོང་ལྷ་གཡུ་བུན་མ། །མེ་ཏོག་ཟླ་འོད་བྱང་རྒྱལ་མ། །གསེར་ཐང་ཀུན་བཟང་ཤརྙིང་དཔལ། །ཀླུ་མོ་གཟི་འབར་ལ་སོགས་པའི། །བརྟན་མ་བཅུ་གཉིས་གཏོར་མ་ལོང་། །མི་མཐུན་གནོད་པའི་ཚོགས་རྣམས་བཟློག །ཨོཾ་ཨཱཿཧཱུྃ་བཛྲ་ཨ་མྲྀ་ཏ་ཁཱ་ཧི། མ་མ་ཧྲཱིཾ་མ་མ་ཧྲཱིཾ་ཁཱ་ཧི་ཁཱ་ཧི། བྲོ་བརྡུངས་ནི། ཧཱུྃ། །དབང་ཆེན་འཁོར་བཅས་རོལ་པའི་བྲོ། །དམ་སྲིའི་སྙིང་ལ་ཆེམས་སེ་ཆེམ། །ཁྲོ་བོ་ཁྲོ་མོ་རོལ་པའི་བྲོ། །དགྲ་བགེགས་སྙིང་ལ་ཆེམས་སེ་ཆེམ། །ཁྲོ་བོ་རྣམས་ཀྱིས་བྲོ་བརྡུངས་པས། །ཁྲོ་མོ་རྣམས་ཀྱིས་རྒྱས་འདེབས་སོ། །ཤར་དུ་ཞི་བའི་བྲོ༴ ནད་གདོན་བར་ཆད་ཞི་བར་ཤོག །ལྷོ་རུ་རྒྱས་པའི་བྲོ༴
ཚེ་དང་བསོད་ནམ་རྒྱས་པར༴ ནུབ་ཏུ་དབང་གི་བྲོ༴ ལྷ་འདྲེ་མི་གསུམ་དབང་སྡུད་ཤོག །བྱང་དུ་དྲག་པོའི་བྲོ༴ དགྲ་བགེགས་དམ་སྲི་ཞི་བར་ཤོག །རྩ་སྔགས་མཇུག་ཏུ། ཤནྟིཾ། པུཥྚིཾ། པཱ་ཤཾ། མཱ་ར་ཡ་ཕཊ༔ གཏང་རག་ནི། ཧཱུྃ། །དབང་ཆེན་ལྷ་ཚོགས་འཁོར་དང་བཅས། །ཕྱི་ནང་གསང་བའི་མཆོད་པ་འབུལ། །ཉམས་ཆགས་སྡིག་སྒྲིབ་མ་ལུས་བཤགས། །སྐུ་གསུང་ཐུགས་ཀྱི་དངོས་གྲུབ་སྩོལ། །ཡིག་བརྒྱ་བརྗོད། དཀྱིལ་འཁོར་བསྡུ་བ་ནི། སྣོད་བཅུད་གཞལ་ཡས་ཁང་ལ་ཐིམ། །དེ་ཡང་འཁོར་དང་འཁོར་རྣམས་ཀྱང་། །གཙོ་བོར་འདུས་ཤིང་གཙོ་བོ་ཉིད། །སྟོང་པར་གྱུར་ལས་འཇའ་ལྟར་བཀྲ། །སྨོན་ལམ་ནི། དགེ་བ་འདི་ཡིས་འགྲོ་བ་ཀུན། །བསྐྱེད་རྫོགས་རྫོགས་ཆེན་ལམ་བཟང་ལ། །བརྟེན་ནས་ཚེ་འདིར་ཧེ་རུ་ཀའི། །གོ་འཕང་མྱུར་དུ་འགྲུབ་པར་ཤོག །ཤིས་བརྗོད་ནི། རྩ་གསུམ་དཀྱིལ་འཁོར་འཁོར་ལོ་ཡི། །མ་སྨད་ཐུགས་རྗེ་ཆེན་པོའི་མཐུས། །མཆོག་དང་ཐུན་མོང་དངོས་གྲུབ་ཀུན། །ལྷུན་གྱིས་གྲུབ་པའི་བཀྲ་ཤིས་ཤོག །གཞན་ཡང་ཤིས་པར་བརྗོད་པ་ཇི་ལྟར་རིགས་པས་མཐའ་བརྒྱན་པར་བྱའོ། །བཅོམ་ལྡན་གཉེན་པོ་ལྷ་བཞི་ཡི། །སྒྲུབས་ཐབས་བྱིན་རླབས་དབང་བསྐུར་བཅས། །ཤིན་ཏུ་གསལ་བར་བཀོད་པའི་དགེས། །དངོས་གྲུབ་རྣམ་གཉིས་མྱུར་ཐོབ་ཤོག །ཞེས་པའང་གཞུང་རྩ་བར་མན་ངག་ཕྱག་བཞེས་ཀྱི་
བརྒྱན་ཏེ། རང་གཞན་རྣམས་ལ་འཇུག་པ་བདེ་བའི་སླད་དུ་ཤཱཀྱའི་དགེ་སློང་རིག་པ་འཛིན་པ་རྡོ་རྗེ་ཐུགས་མཆོག་རྩལ་ཞེས་བགྱི་བས་བཤད་སྒྲུབ་ཀྱི་ཆུ་གཏེར་ཆེན་པོ་འོག་མིན་གཉིས་པ་དཔལ་ཀཿཐོག་རྡོ་རྗེ་གདན་གྱི་ཆོས་གྲྭ་མཐོང་ན་མངོན་པར་དགའ་བའི་གནྡྷོ་ལའི་རྩེ་མོ་རང་གཤགས་འཆི་མེད་གྲུབ་པའི་དགའ་ཚལ་དུ་སྦྱར་བའི་ཡི་གེ་པ་ནི་བིཀླུ་ཤྲཱི་ལ་སཱ་ག་རས་བགྱིས་པ་ཛ་ཡནྟུ།། ༈ །།བཅོམ་ལྡན་འདས་གཉེན་པོ་ལྷ་བཞི་ལ་བརྟེན་ནས་ཀླུའི་གདོན་དགྲོལ་གྱི་ཆོ་ག་བྱ་ཚུལ་བདུད་རྩིའི་ལྗོན་བཟང་བཞུགས་སོ།། ན་མོ་གུ་རུ་བྷྱ༔ རྒྱལ་བ་ཀུན་གྱི་སྐུ་གསུང་ཐུགས། །གཅིག་བསྡུས་ཁྲག་འཐུང་རོལ་པའི་ལྷར། །བཏུད་ནས་འོག་གདོན་འགྲོལ་བའི་ཚུལ། །བདུད་རྩིའི་ལྗོན་བཟང་འདི་ན་འཁྲུངས། དེ་ལ་གནས་དབེན་པར་སྟེགས་ཀྱི་ཁར་རས་བྲིས་ཀྱི་དཀྱིལ་འཁོར་དང་། དེའི་དབུས་སུ་མཉྫིའི་སྟེང་དུ་བུམ་པ་བཅུད་ལྡན་ཁ་རྒྱན་མགུལ་ཆིངས་ཅན་བཀོད་པའི་ཁ་རྒྱན་གྱི་མདུན་དུ་ལྷ་ཙཀྲ། བུམ་པའི་མདུན་དུ་སྔགས་བྱང་། གཡས་སུ་ཕྱག་མཚན། །གཡོན་དུ་ནོར་བུ་དབང་གི་རྒྱལ་པོའི་གཟུགས་ཀྱི་ཙཀྲ་ལི། ཉེ་ལོགས་ཅི་བདེ་བར། བྲུབ་ཁུང་དུ་ལིངྒ་དང་། སྒྲོལ་གྲི། ཕུར་པ། མེ་ཧོམ་སོགས་དང་། མཐར་སྨན་རཀ་གཏོར་མཆོད་ཀྱིས་བསྐོར་བ་ནི་ཡི་དམ་གྱི་དཀྱིལ་འཁོར་དང་། གཡས་གཡོན་སོགས་གང་རིགས་སུ་ཀླུའི་དཀྱིལ་འཁོར་ནི། གྲུབ་ན་དོགས་གནས་ཀྱིས་བཀྲམས་པའི་ཁར་ནེའུ་གསེང་མཚོན་པའི་སྤང་རྩྭ་སྔོན་ཅན་དྲས་པའི་མཐའ་བསྐོར་དུ་ཤིང་སྣ་གང་འཛོམས་བཀོད་པས་མཛེས་པར་བཙུགས། དར་དམར་པོ་དང་རས་དར་གྱི་འཕན་ལ་སོགས་པས་མཛེས་པར་
བགྱིས་པའི་གཞིར་རྡུལ་ཚོན་གྱིས་པདྨ་འདབ་བརྒྱད་བྲིས་པའི་དབུས་སུ་ཀླུ་གཟུགས་སྦྲུལ་མགོའི་གདེངས་ཀ་ཅན། སྟོད་ལྷའི་ལུས་ཅན་ཐལ་མོ་སྦྱར་བ་སྨད་སྦྲུལ་མཇུག་འཁྱིལ་པའི་རྣམ་པ་ཅན་དང་། འདབ་མ་བརྒྱད་ལའང་ཀླུ་གཟུགས་དེ་ལས་ཆུང་བ་རེ་རེའམ། བཤོས་བུ་སྦྲུལ་དཀྲིས་ཅན་བརྒྱད། དེ་དག་གི་ཕྱོགས་བཞིར་ཀླུ་གདོན་གྱི་གཟུགས་གླང་། སྡིགས་པ། སྦལ་པ། ཆུ་སྲིན་གྱི་མགོ་ཅན་རེའམ་བཤོས་བུ་རེ། མ་གྲུབ་ན་ཟངས་གཞོང་སོགས་སྣོད་གཙང་མར་འབྲས་དཀར་གྱི་ཚོམ་བུ་དགུ་བཀོད་པའི་དབུས་སུ་ཀླུ་གཟུགས་དང་། ཕྱོགས་མཚམས་རྣམས་སུ་བཤོས་བུ་རེ་རེ། གང་ལྟར་ཡང་དེའི་མདུན་དུ་ཟངས་གཞོང་གི་ནང་སྒྲུབ་བྱའི་གླུད་གཟུགས་ཆེ་བ་ཀླུ་སྨན་ཁྲོལ་བུ་དཀར་ཆབ་དང་བཅས་པ། སྣོད་གཞན་གཙང་མ་ཞིག་ཏུ་སྦྲུལ། སྦལ་པ། ལྕང་མོ། ཉ། སྒྲིག་བུ། ཙངས་པ། དུང་། ཆུ་སྲིན། རུས་སྦལ། སྡོམ། སྡིགས་པ། རྟ་བཱ། མགྲོན་བུ། ཉ་ལྕིབས། ཆུ་རྟ། ཆུ་ལུག །ཆུ་ར། སྲམ། ཆུ་བྱ། ཆུ་སྲེག །ཆུ་བྱི་སྟེ་ཀླུ་ནོར་ཉེར་གཅིག་དང་། རིལ་བུ་ཉེར་གཅིག །གླུད་ཆུང་ཉེར་གཅིག །སྣོད་གཞན་ཞིག་ཏུ་འོ་ཆོལ་ཀླུ་སྨན་བཏབ་པ་སྤྲོ་ན་སྐྱོགས་དང་བཅས་པ་བཞག །ཀླུའི་དཀྱིལ་འཁོར་གྱི་སྟེང་དུ་ཁྲུས་བུམ་གྱི་ཁར་སྨུག་ཤད། བལ་བུ། ལྕང་མ། འོམ་བུ། ཀུ་ཤ །རྨ་བྱའི་མདངས་རྣམས་ཕོན་པོར་བསྡམས་པའི་བྱབས་རྫས་སམ། ཡང་ན་རྨ་བྱའི་མདངས་རྐྱང་པས་ཀྱང་འཐུས། སློབ་དཔོན་གྱི་མདུན་དུ་ལས་བུམ། རྡོར་དྲིལ། ཌཱ་མ་རུ། བྱད་ཐག་སྔོ་དམར། གུལ་ཡུངས་སོགས་འོག་ཏུ་མཁོ་བའི་ཡོ་བྱད་རྣམས་ཚོགས་པར་བྱས་ནས། བདག་མདུན་དབྱེར་མེད་ཀྱི་བསྐྱེད་བཟླས་སྔོན་དུ་འགྲོ་བས། རྣམ་བུམ་ལ་དམིགས་ཀྱིས་བསལ་བའི་བཟླས་
པ་ཅི་འགྲུབ་དང་། ལས་བུམ་དུ་སྐད་ཅིག་གིས་ཁྲོ་བོ་བདུད་རྩི་འཁྱིལ་པ་གསལ་བའི་སྐུ་ལས་རྡོ་རྗེ་བདུད་རྩིའི་རྡུལ་ཕྲ་རབ་བབས་པས་བུམ་པ་གང་བར་བསམ་ལ། ཨ་མྲྀ་ཏ། ཅི་ནུས་བཟླས་མཐར་མཆོད་ཅིང་བསྟོད། ཨོཾ་ཨཱཿཧཱུྃ་གིས་དུང་ཆོས་ཀྱི་ཆུ་མཆོད་ཡོན་གྱི་ཚུལ་དུ་ཕུལ་བས་བུམ་པའི་ལྷ་འོད་དུ་ཞུ་བས་བུམ་ཆུ་དང་རོ་གཅིག་ཏུ་གྱུར་པར་བསམ། བདག་འཇུག་རྒྱས་པར་བླངས་བའམ། རིག་པའི་མེ་ཏོག་དོར་བ་ཙམ་གྱིས་འཇུག་པ་སྔོན་དུ་འགྲོ་བས་སློབ་མ་འཇུག་པར་གསོལ་བ་གདབས། ཁྲུས་བུམ། ཨ་མྲྀ་ཏས་བསངས། སྭ་བྷ་ཝས་སྦྱངས། བུམ་པ་མི་དམིགས་སྟོང་པའི་ངང་ལས༔ གཞལ་ཡས་མཚན་ཉིད་རྫོགས་པའི་དབུས་སུ༔ སིཾ་ལས་སེང་གེ་དཀར་མོའི་སྟེང་དུ༔ ཐུགས་རྗེ་ཆེན་པོ་སེང་གེ་སྒྲ་ནི༔ སྐུ་མདོག་དཀར་གསལ་གངས་རི་ལྟ་བུ༔ རིན་ཆེན་པདྨའི་རྒྱན་གྱིས་མཛེས་པ༔ ཞལ་གཅིག་ཕྱག་གཉིས་ཕྱག་གཡས་གདན་གནོན༔ གཡོན་པས་སྡིག་མཛུབ་པུས་མོའི་ཐད་དུ༔ བསྒྲེང་པའི་རྩེ་ལ་སྦྲུལ་དཀར་རབ་དཀྲིས༔ རི་དྭགས་པགས་པས་ནུ་མ་བཀབ་ཅིང་༔ སྐུ་སྨད་དར་དམར་སྟོད་གཡོགས་དང་བཅས༔ ཕྱེད་སྐྱིལ་ཞབས་གཉིས་མངོན་པར་འགྱིང་བའི༔ གནས་གསུམ་འབྲུ་ལས་འོད་ཟེར་འཕྲོས་པས༔ པོ་ཏཱ་ལ་ནས་སྤྱན་འདྲེན་ཛཿཧཱུྃ་བྃ་ཧོཿས་གཉིས་མེད་རྟེན་ལ་བཞུགས་མཛོད༔ ཅེས་དམ་ཚིག་པ་
བསྐྱེད། རིགས་མཆོག་དག་པ་འོད་དཔག་མེད་མགོན་གྱི༔ དྲུང་དུ་འགྲོ་བ་འདུལ་བར་དམ་བཅས་པའི༔ ཐུགས་རྗེ་ཆེན་པོ་འཕགས་པ་སྤྱན་རས་གཟིགས༔ དེང་འདིར་འགྲོ་བའི་དོན་དུ་སྤྱན་འདྲེན་ནོ༔ འགྲོ་བའི་ཉོན་མོངས་སེལ་བར་ཞལ་བཞེས་པའི༔ ཐུགས་རྗེ་བརྩེ་ལྡན་འཕགས་པ་སྤྱན་རས་གཟིགས༔ དེང་འདིར་འགྲོ་བའི་ཉོན་མོངས་གྲིབ་སེལ་ཕྱིར༔ མ་ཐོག་མྱུར་དུ་གནས་འདིར་གཤེགས་སུ་གསོལ༔ བཛྲ་ས་མ་ཡ་ཛ༔ཛས་སྤྱན་དྲངས། ཛཿཧཱུྃ་བྃ་ཧོཿས་བསྟིམས། པདྨ་ཀ་མ་ལ་ཡེ་སྟུགྱིས་གདན་འབུལ། ཨ་ཏི་པཱུ་ཧོཿ པྲ་ཏི་པུ་ཧོས་ཕྱག་བྱ། ཨོཾ་ཨཱརྻ་ལོ་ཀེ་ཤྭ་ར་སེདྷ་ནཱ་ད་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། ཧྲཱིཿ དྲི་མེད་སྐུ་ཡི་མདངས་ཀྱིས་གདོན་ཚོགས་ཞི༔ རྣམ་དག་གསུང་གི་ཟེར་གྱིས་སྒྲིབ་གཉིས་བཀྲུ༔ མཁྱེན་བརྩེས་འགྲོ་ཀུན་སྨིན་ཅིང་གྲོལ་བར་མཛད༔ ཐུགས་ཆེན་སེང་གེ་སྒྲ་ལ་ཕྱག་འཚལ་བསྟོད༔ ཅེས་པས་བསྟོད། ཐུགས་ཀར་ཟླ་བའི་དཀྱིལ་འཁོར་གྱི་དབུས་སུ་ཧྲཱིཿཡིག་གི་མཐར་སྔགས་ཀྱི་ཕྲེང་བས་བསྐོར་བ། དེ་ལས་བདུད་རྩིའི་རྒྱུན་བབས་པས་བུམ་པ་གང་བར་བསམ་ལ། ཨོཾ་ཨཱཿཧྲཱིཿ་སིདྷ་ནཱ་ད་ཧཱུྃ་ཕཊ༔ ཅི་ནུས་དང་། མཐར། ན་མོ་རཏྣ་ཏྲ་ཡཱ་ཡ། ན་མོ་ཨཱརྻ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭ་ཡ། མཧཱ་སཏྭ་ཡ། མཧཱ་ཀ་རུ་ཎི་ཀ་ཡ། ཏདྱ་ཐཱ། ཨོཾ་ཨ་ཀ་ཊེ། བི་ཀ་ཊེ། ནི་ཀ་
ཊེ། ཀཾ་ཊ་ཀཾ་ཊེ། ཀ་རོ་ཊེ། ཀ་རོ་ཊ། བིདྱ་སྭཱ་ཧཱ། ཞེས་པའང་བཟླས། སྔར་བཞིན་མཆོད་ཅིང་བསྟོད་ལ་ནོངས་པ་བཤགས། མཆོད་ཡོན་ཕུལ་ལ། ལྷ་འོད་དུ་ཞུ་ནས་བུམ་ཆུ་བདུད་རྩིའི་རང་བཞིན་དུ་གྱུར་པར་བསམ། དེ་ནས་ཀླུའི་ཡོ་བྱད་རྣམས་ལ་དམིགས་ཏེ། རྡོ་རྗེ་གནོད་སྦྱིན་གྱིས་ཕྱག་རྒྱ་དང་། ཨོཾ་བཛྲ་ཡཀྵ་ཧཱུྃ་གིས་བསངས། རྡོ་རྗེ་མེ་ཡི་ཕྱག་རྒྱ། ཨོཾ་བཛྲ་ཛྭ་ལ་ཨ་ན་ལ་ཧ་ན་ད་ཧ་པ་ཙ་མ་ཐ་བྷཉྫར་ཎ་ཧཱུྃ་ཕཊཿཅེས་དང་། སྭ་བྷཱ་བས་སྦྱངས། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། བཅུད་རྣམས་བདུད་རྩིའི་རྒྱ་མཚོ་ཆེན་པོ་ཀླུ་རྣམས་ཚིམ་ཞིང་ནད་ཀུན་གསོ་བའི་བདེ་བར་སྐྱེད་པར་བྱེད་པའི་བྱེད་ལས་དང་ལྡན་པར་གྱུར། རྡོ་རྗེ་ཐཾསྡམ་པའི་ཕྱག་རྒྱས། ཨ་ཀཱ་རོ་དང་། ནམ་མཁའ་མཛོད་ཀྱི་སྔགས་རྒྱས་བྱིན་གྱིས་བརླབ། མདུན་དཀྱིལ་ལ་དམིགས་ཏེ། ཨ་མྲྀ་ཏས་བསང་། སྭ་བྷ་ཝས་སྦྱང་། སྟོང་པའི་ངང་ལས་མདུན་དུ་བྲག་གསེར་གྱི་བྱ་སྐྱིབས་ཅན་གྱི་འོག་ཏུ། མཚོ། རྫིང་། ལྟེང་ཀ །ཆུ་མིག །ཁྲོན་པ། འབབས་ཆུ། ནེའུ་གསེངས། སྤངས་ལྗོངས། སྐྱེད་ཚལ། ཁང་བཟང་སོགས་ཉམས་དགའ་བའི་ནང་དུ་ཀླུ་རྒྱལ་ཝཱ་རུ་ཎས་གཙོ་བྱས་ཀླུ་ཆེན་བརྒྱད་སྟོད་མི་ལ་སྨད་སྦྲུལ་མཇུག་ཅན། རིན་པོ་ཆེའི་རྒྱན་གྱིས་སྤྲས་པ། ཀླུ་རིགས་གྲངས་མེད་པས་བསྐོར་བར་བསམ་ལ། ལྕགས་ཀྱུའི་ཕྱག་རྒྱ་དང་
བཅས། རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་ཀླུ་རྒྱལ་ཝཱ་རུ་ཎ་ལ་ཀླུ་ཆེན་བརྒྱད་དང་། གཞན་ཡང་འཇིག་རྟེན་གྱི་ཁམས་ཀྱི་ཀླུ་གཉན་ས་བདག་གྲངས་མེད་པའི་འཁོར་གྱིས་བསྐོར་བ་ཟླ་བའི་གདན་ལ་རླུང་གིས་བསྐྱོད་དེ་འུར་སྒྲ་དང་བཅས་བཛྲ་ས་མཱ་ཛཿ ཨོཾ་བ་ཏཱ་ལི་བ་ཏཱ་ལི་མ་ཧཱ་བ་ཏཱ་ལི་ཧཱུྃ་ཧཱུྃ་ཛཿཛཿསྭཱ་ཧཱ། ཕྱག་ན་རྡོ་རྗེའི་མཐུ་སྟོབས་དང་། །རྟ་མགྲིན་དབང་གི་བྱིན་རླབས་ཀྱིས། །གཙོ་བོ་ཀླུ་ཆེན་བརྒྱད་པོ་དང་། །རྒྱལ་རིགས་རྗེ་རིགས་དམངས་རིགས་དང་། །བྲམ་ཟེ་གདོལ་པ་ལ་སོགས་པ། །རི་རབ་རྩེ་དང་རྒྱ་མཚོའི་གཏིང་། །སྟེང་འོག་ཕྱོགས་མཚམས་གང་གནས་ཀླུ། །གནས་འདིར་སྤྱན་འདྲེན་གཤེགས་སུ་གསོལ། །ཨོཾ་ཨཱ་གཙྪ་ཨཱ་གཙྪནཱ་ག་ཨདྷི་པ་ཏཱ་ཡེ་སརྦ་བྷཱུརྦྷུ་པ་ཕྲུ་ཕུ་སྭཱ་ཧཱ། ནཱ་ག་རཱ་ཛ་ས་པ་རི་ཝཱ་ར་ས་མ་ཡ་ཧཱུྃ་ཛཾཿཛ༔ ཛཿཧཱུྃ་བྃ་ཧོཿ ཞེས་པས་མགྲོན་ཐབས་སུ་བཀུག་ནས་གཟུགས་ལ་བསྟིམས། དེ་དག་གི་མཐའ་མར་འོད་ཀྱི་ལྕགས་རིས་བསྐོར་ནས་ལས་མ་གྲུབ་པར་ཕྱིར་འགྲོ་ས་མེད་པར་བསམ་སྟེ། དེ་ནི་ཀླུའི་འཁུ་ལྡོག་མི་འོང་བའི་གདམས་པ་ཡིན་ནོ། །རང་རང་དགྱེས་པ་བསྐྱེད་ནུས་པའི། །ཡིད་ཀྱིས་སྤྲུལ་པའི་གནས་མཆོག་འདིར། །པདྨའི་གདན་ལ་རབ་བཞུགས་ནས། །མཆོད་པའི་ཚོགས་རྣམས་བཞེས་སུ་གསོལ། །པདྨ་ཀ་མ་ལ་ཡེ་སྟི་གྱིས་གདན་ཕུལ། མ་ཧཱ་ནཱ་ག་ཨ་དྷི་པ་ཏ་ཡེ་གྲྀཧྞེ་དཾ་ཨརྒྷཾ་སྭཱ་ཧཱ། དེ་
བཞིན་དུ། པུསྶཾ། དྷུ་པཾ། དཱི་པཾ། གནྡོ་རྣམས་སྦྱར་བས་སྤྱིར་མཆོད། གདེངས་ཀ་ནོར་བུ་འབར་བའི་འོད་ཀྱིས་ནི། །ས་འོག་མུན་པ་མ་ལུས་སེལ་མཛད་ཅིང་། །བསྟན་ལ་རབ་དགའ་མཐུ་སྟོབས་བསམ་མི་ཁྱབ། །ཀླུ་རྒྱལ་འཁོར་དང་བཅས་ལ་བསྟོད་པར་བགྱི། །ཅེས་བསྟོད། བྱེ་བྲག་ཏུ་དཀོར་ཆ་རྣམས། སམྦྷ་ར་ལན་བདུན་རེའི་མཐར། དེ་བཞིན་གཤེགས་པ་བཞིའི་མཚན་བརྗོད་ལ་བསྔོས། ཨོཾ། མཐའ་ཡས་དང་ནི་འཇོག་པོ་དང་། །སྟོབས་ཀྱི་རྒྱུ་དང་རིགས་ལྡན་དང་། །ནོར་རྒྱས་དང་ནི་དུང་སྐྱོང་དང་། །པདྨ་དང་ནི་ཆུ་ལྷ་དང་། རྒྱ་མཚོ་རྒྱ་མཚོ་ཆེན་པོ་དང་། །དཔལ་གྱི་འོད་དང་འོད་པོ་དང་། །ཀླུ་རྒྱལ་གཙུག་ན་རིན་ཆེན་སོགས། །ཀླུ་ཆེན་འཁོར་བཅས་གཏོར་མ་བཞེས། །མཛེས་པའི་དཀར་གསུམ་གཏོར་མ་ནི། །མངར་གསུམ་འོ་མའི་རྒྱ་མཚོ་ཆེ། །རིན་ཆེན་ཕྲེང་བའི་ཐེམ་སྐས་ཅན། །ཀླུ་ཡི་གནོད་པ་སྐྱོབ་བྱེད་པ། །མཐུན་པའི་རྫས་སུ་འདི་གྱུར་ཅིག །བདག་ཅག་འཁོར་དང་བཅས་རྣམས་ལ། །ཀླུ་ལས་གྱུར་པའི་གནོད་པ་ནི། །མཐོང་བའི་དུག་དང་རེག་པའི་དུག །བསམ་ངན་དུག་དང་ཁ་རླངས་དུག །དེ་ལ་སོགས་པའི་དུག་རྣམས་ཀུན། །ཡུད་ཙམ་གཅིག་ལ་ཞི་གྱུར་ཅིག །བདག་བས་གཅེས་པའི་རྫས་ཁྱེར་ལ། །བདག་ལ་གནོད་པར་མ་བྱེད་ཅིག །ཅེས་པས་ཕྲིན་ལས་བཅོལ་བས། ཀླུ་རྒྱལ་
འཁོར་བཅས་དགེས་ཤིང་ཐལ་མོ་སྦྱར་ནས་བཀའ་ཉན་པའི་ཚུལ་གྱིས་འཁོད་པར་བསམ་ལ། སེངྒེ་སྒྲའི་རྩ་སྔགས་དང་གཟུངས་སྔགས་མཐར། ནཱ་ག་རཱ་ཛ་ས་པ་རི་ཝ་ར་སརྦ་དུཁ་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་བཏགས་པ་ལན་བདུན་གྱིས་ཁྲུས་བུམ་གྱི་ཆུ་དང་ཀླུ་སྨན་བསྲེས་པ་ཀླུ་གཟུགས་རྣམས་ལ་སྨྲེང་ཞིང་། ཀླུ་གཉན་ས་བདག་རྣམས་ཀྱི་ནད་དང་སྡུག་བསྔལ་ཐམས་ཅད་ཞི་ནས་ལུས་སེམས་བདེ་བས་ཁྱབ་པར་བསམ། ཆོས་རྣམས་ཐམས་ཅད་རྒྱུ་ལས་བྱུང་། ཞེས་སོགས་ཀྱིས་ཆོས་སྦྱིན་བྱ། དེ་ལྟར་ན་ཆོས་དང་ཟང་ཟིང་གི་སྦྱིན་པ་འདིའི་མཐུ་ལ་བརྟེན་ནས་ཀླུ་གཉན་ས་བདག་གི་རིགས་སུ་གྱུར་པ་ཐམས་ཅད་དང་། བྱེ་བྲག་ཏུ་ཡང་བདག་ཅག་འཁོར་དང་བཅས་པ་ལ་གནོད་ཅིང་ལན་ཆགས་པའི་ཀླུ་གཉན་ས་བདག་ཐམས་ཅད་ཚིམ་ཞིང་མཉེས་པར་གྱུར་ནས། གནོད་པ་དང་གདུག་པའི་བསམ་པ་ཞི་ཞིང་ཕན་པ་དང་ཞི་བའི་བྱང་ཆུབ་ཀྱི་སེམས་དང་ལྡན་པར་གྱུར་ཅིག །ཞེས་སྨོན་ལམ་གདབ། དེ་ནས་དཀྱིལ་འཁོར་ཡོལ་བས་སྒྲིབས། སྒྲུབས་བྱ་རྣམས་མདུན་དུ་འཁོད་པར། ཡན་ལག་དང་ཉིང་ལག་རྣམས་བྱད་ཐག་སྔོ་དམར་གྱིས་བཅིངས་པའི་སྣེ་མོ་ཀླུ་གཟུགས་ལ་གཏད་དེ་འདི་སྐད་ཅེས་མཚམས་སྦྱར་བར་བྱའོ། །འོ། ད་ལམ་འདིར་ཁྱེད་རང་རྣམས་ལ་ཐོག་མར་ཀླུའི་གདོན་དགྲོལ་བྱེད་པའི་སྐབས་སུ་བབ་པ་ཡིན་པས། མདུན་དུ་ཡོད་པའི་ཀླུའི་གཟུགས་བརྙན་ཀླུ་ཆེན་བརྒྱད་འཁོར་དང་བཅས་པར་དངོས་སུ་མོས་ཤིང་། ཁྱེད་
རང་རྣམས་ཀྱང་ཀླུའི་བྱད་དུ་བཅུག་པའི་མཚོན་བྱེད་བྱད་ཐག་སྦྲུལ་སྔོ་དམར་གྱི་རྣམ་པས་ཡན་ལག་དང་ཉིང་ལག་ཐམས་ཅད་བཅིངས་ཏེ་མགུལ་བསྐྱོད་མི་ནུས་པ་དང་། ལུས་ནད་ཀྱི་ཐེབས། །ངག་ལྐུག །ཡིད་མྱོས་ཏེ། མགོན་སྐྱབས་དང་བྲལ་བ་ལ། སློབ་དཔོན་ཁྲོ་བོའི་རྒྱལ་པོ་དཔལ་རྟ་མཆོག་རོལ་པ་གཉེན་པོ་ལྷ་བཞིའི་བདག་ཉིད་ཅན་དུ་བཞུགས་པས་ས་བདག་ཀླུ་གཉན་རྣམས་དཀོར་ཆས་ཚིམ་པར་བགྱིས་ཏེ་བཀའ་བསྒོས་པའི་མོས་པ་མཛོད། ཧྲཱིཿ །ང་ནི་རྟ་མགྲིན་རྒྱལ་པོ་ཡིན། །ང་ནི་ཕྱག་ན་རྡོ་རྗེ་ཡིན། །ང་ནི་བྱ་ཁྱུང་རྒྱལ་པོ་ཡིན། །ང་ནི་ཀླུ་ཡི་གཉེན་པོ་ཡིན། །ཀྱེ། ཀླུ་བརྒྱད་ཟས་སུ་ཟ་བ་ཡིན། །ཀླུ་འབུམ་གདན་དུ་བཏིང་བ་ཡིན། །ཀླུ་ལྔས་དབུ་ལ་བརྒྱན་པ་ཡིན། །ཀླུ་རྣམས་ང་ཡི་བཀའ་ལ་ཉོན། །ཚུར་གཤེགས་ཚུར་གཤེགས་ཀླུ་ཡི་གཙོ། །ཝཱ་རུ་ཎ་སོགས་ཀླུ་ཆེན་བརྒྱད། །སྲས་དང་བཙུན་མོ་གཡོག་འཁོར་བཅས། །སོ་སོའི་བཀའ་ཉན་སྡོད་བྱེད་ཚོགས། །སྤྲུལ་པ་འཛམ་གླིང་ཁྱབ་པར་སྟོན། །གནོད་པའི་སྦྱོར་བ་མི་ལ་གཏོང་། །གདུག་རྩུབ་ནད་དུ་མཛེ་ནད་དང་། །ཞ་བོ་གྲུམ་པོ་ཡན་ལག་གཟེངས། །གདོན་གྱི་བསམ་སྦྱོར་ངན་པས་འཛིན། །ཀླུ་ཡི་གདོན་དུ་གྱུར་པ་ལ། །རྩི་སྨན་འོ་མའི་བདུད་རྩི་འབུལ། །ཁྱེད་ཀྱི་ལུས་སེམས་ཚིམ་གྱུར་ཅིག །ངན་
སེམས་གདུག་རྩུབ་གདོན་འདི་ཁྲོལ། །ཀླུ་གཏོར་རིལ་བུ་གཏོར་མ་འབུལ། །ཁྱོད་ཀྱི་གསོལ་ཟས་དམ་པར་བཞེས། །རྒྱུ་སྦྱོར་གདོན་གྱིས་ཟིན་པ་ཁྲོལ། །ངར་གླུད་རྣམ་ཤེས་ལྡན་པ་འདི། །ཁྱེད་ལ་འདོད་པའི་རྫས་སུ་འབུལ། །རྒྱུ་སྦྱོར་གདོན་གྱིས་ཟིན་པ་ཁྲོལ། །གནོད་དང་ནད་ལས་ཐར་བར་མཛོད། །ཁྲོལ་ཅིག་ཁྲོལ་ཅིག་ཀླུ་ཡི་བུ། །དེ་རིང་མི་འདི་མི་གཏོང་ཞིང་། །དེ་རིང་གདོན་འདི་འགྲོལ་ཡིན། མི་བྱེད། དེ་རིང་ནད་འདི་མི་འགྲོལ་ན། །རྟ་མཆོག་རྒྱལ་པོའི་བཀའ་བཅག་ཅིང་། །ཕྱག་ན་རྡོ་རྗེའི་བཀའ་ཡང་བཅག །བྱ་ཁྱུང་རྒྱལ་པོའི་བཀའ་བཅག་པས། །མཛེ་ནད་སྣ་དགུ་ཁྱེད་ལ་འོང་། །མིག་ནད་མེ་འབར་ཁྱོད་ལ་འོང་། །ལོང་བ་འོན་པ་ཁྱོད་ལ་འོང་། །མཛེ་ནད་ཤུ་བ་ཁྱེད་ལ་འོང་། །བླ་མེད་འབྲས་བུ་ཐོབ་མི་འགྱུར། །འོན་ཀྱང་དེ་ལ་མ་ཐུག་གི། །དེ་རིང་མི་འདི་ཁྱོད་ཀྱིས་ཐོང་། །དེ་རིང་གདོན་འདི་ལྷོད་ཀྱིས་ཁྲོལ། །ཀླུ་ཡི་གདོན་གྱིས་ཟིན་པ་ཁྲོལ། །གཉན་གྱི་གདོན་གྱིས །ས་བདག་གདོན་གྱིས༴ ཀླུ་བདུད་གདོན་གྱིས༴ ཀླུ་བཙན་གདོན༴ ཀླུ་སྲིན་གདོན༴ གཟའ་ཀླུའི་གདོན༴ རྒྱལ་བསེན་གདོན་གྱིས་ཟིན་པ་ཁྲོལ། །ཨོཾ་པྲ་ཏི་རཾ་སྭཱ་ཧཱ། ཕྱི་ནཱ་ག་གུ་ལེ་རཾ་སྭཱ་ཧཱ། ནཱ་ག་རཱ་ཛ་ཧཱུྃ་ཕཊ༔ ཅེས་བརྗོད་ཅིང་། རྩི་སྨན་འོ་མའི་བདུད་རྩི་འབུལ། ཞེས་པའི་ཚིག་བྱུང་རེས་དང་བསྟུན། །
ལས་རྡོར་གྱིས་ཀླུ་སྨན་རེ་ཐུར་མས་བཅུས་སྟེ་གླུད་ཆེ་བའི་ཟངས་གཞོང་ནང་དུ་འབུལ། །དེ་བཞིན་དུ། ཀླུ་གཏོར་རིལ་བུའི་གཏོར་མ་འབུལ། ཞེས་པ་དང་བསྟུན་པའི་རིལ་བུ་རེ་དང་། ངར་གླུད་རྣམས་ཤེས་ལྡན་པ་འབུལ། །ཞེས་པ་དང་བསྟུན་ཏེ་གླུད་ཆུང་རེ་རྣམས་ཟངས་གཞོང་དུ་འབུལ་བ་ལན་ཉེར་གཅིག་གི་བར་བྱ། ནད་པ་མིན་པའི་བསྒྲུབ་བྱ་སྤྱི་འགྲོས་ལ་འོ་ཆོལ་དང་རིལ་བུ་གླུད་དང་བཅས་པ་སྡེབས་སུ་ཕུལ་ཀྱང་མཐུས་སོ། །དེ་ནས་ཁྲུས་བུམ་དུ་རྣམ་རྒྱལ་བུམ་པའི་ཆུ་ཅུང་ཟད་བསྲེས་པ་ཐོགས་ཏེ། དེ་ལྟར་མགྲོན་རྣམས་དཀོར་ཆས་ཚིམ་པར་བགྱིས་ཏེ་བཀའ་བསྒོ་བ་སྔོན་དུ་སོང་ནས། སློབ་དཔོན་གྱི་ཕྱག་ཏུ་བུམ་པ་ཡེ་ཤེས་ཀྱི་བདུད་རྩིས་གང་བ་རེ་ཐོགས་ཏེ་ཁྱེད་རང་རྣམས་ལ་ཁྲུས་བྱས་པ་ལ་བརྟེན་ནས། སྤྱི་བོ་ཚངས་པའི་བུ་ག་ནས་མར་བྱུང་། ལུས་ཀྱི་ནང་ཐམས་ཅད་གང་། ཚེ་འཁོར་བ་ཐོག་མ་མེད་པ་ནས་བསགས་པའི་ནད་གདོན་སྡིག་སྒྲིབ་བག་ཆགས་དང་བཅས་པ་ཐམས་ཅད་བྱང་ཞིང་དག་པར་བྱས། ཁྱད་པར་དུ་ལུས་ལ་གནས་པའི་ཀླུ་གདོན་ཐམས་ཅད་སྦྲུལ་ནག །གཉན་རྣམས་སྡིག་པ། ས་བདག་རྣམས་སྦལ་ལྕོང་། གདོན་ཕྲ་མོ་རྣམས་སཱ་ཀུ་ཙཱིའི་རྣམ་པར་འཐོན་ནས་མདུན་གྱི་གདོན་གཟུགས་སོ་སོར་ཐིམ་པས་ལུས་ངག་ཡིད་གསུམ་ཉེར་འཚེ་དང་བྲལ་བའི་མོས་པ་མཛོད། ཅེས་བརྡ་སྦྱར་ལ། ཇི་ལྟར་བལྟམས་པ། སོགས་ཀྱི་མཐར། ཧྲཱིཿཨ་པ་རི་མི་ཏ་ཨཱ་ཡུཛྙཱ་ན་པདྨ་ཀྲོ་དྷ་ཧྱ་གྲྭྀ་བ་
བཛྲ་པཱ་ཎི་ག་རུ་ཌ་ཧཱུྃ་ཕཊཿ ཅེས་ཡི་དམ་གྱི་སྔགས་དང་། སེང་གེ་སྒྲ་ཡི་རྩ་སྔགས་དང་གཟུངས་སྔགས་མཐར། ན་མོ་བུདྡྷ་ཡ། ནཱ་ག་དུ། ཙནྡྷེ་ཙནྡྷེ་མི་ལི་མི་ལི་མི་ལི། བྷནྡྷ་བྷནྡྷ། ནཱ་ག་ནི་སྭཱ་ཧཱ། ཞེས་ལས་སྦྱོར་གྱི་སྔགས་གཤམས་སུ། རྡོ་རྗེ་སློབ་མའམ། སྦྱིན་པའི་བདག་པོ་འདི་རྣམས་ཀྱི་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབས་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ནད་ཐམས་ཅད་ཤཱནྟིཾ་ཀུ་རུ༴ རིམས་ཐམས་ཅད༴ གྲིབ་དང་མི་གཙང་བ་ཐམས༴ རྨི་ལམ་དང་མཚན་མ་ངན་པ་ཐམས༴ ལྟས་དང་བསྐལ་བ་ངན་པ༴ དུས་མ་ཡིན་པའི་འཆི་བའི་འཇིགས་པ༔ གཟའ་དང་རྒྱ་སྐར་གྱི་གནོད་པ༔ ཀླུ་གཉན་ས་བདག་གི་གནོད་པ་ཐམས་ཅད བཙན་དང་རྒྱལ་བསེན་གྱི་གནོད་པ་ཐམས་ཅད༔ གདོན་དང་བགེགས་དང་ལོག་པར་འདྲེན་པ་ཐམས༴ བར་དུ་གཅོད་པ་དང་མི་མཐུན་པའི་ཕྱོགས་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་དང་། སྤྲོ་ན། འདི་ནི་སྦྱིན་པའི་རང་བཞིན་ཆུ། ཞེས་སོགས་དང་། མཚམས་རྣམས་སུ་སྔགས་སྤེལ་ཚིག་དང་བཅས་པས་བཀྲུ། བུམ་ཆུ་ཅུང་ཟད་གཅིག་ཁར་འཛིན་དུ་བཅུག་ལ། དེ་ནས་བྱབས་པའི་སླད་དུ་སློབ་དཔོན་གྱི་ཕྱག་གི་རྨ་བྱའི་མདངས་ཀྱི་ཐིག་ལེའི་དབུས་སུ་ཟླ་བའི་གདན་ལ་ཧཱུྃཡིག་གི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས། ཁྱེད་རང་རྣམས་ཀྱི་ལུས་ལ་ཕོག་པས་
ནད་གདོན་བར་གཅོད་མི་མཐུན་པའི་ལྷག་མ་ཐམས་ཅད་རྡོ་ཁབ་ལེན་གྱི་ལྕགས་ཕྱེ་བླངས་པ་ལྟར་བསྡུས་སྟེ་ཁ་ནང་གི་ཆུ་ལ་ཐིམ་པ་དེ་ཉིད་ཕྱིའི་རྒྱ་མཚོ་ཆེན་པོར་དོར་པའི་མོས་པ་མཛོད། བཞི་བརྒྱ་རྩ་བཞིའི་ནད་རྣམས་དང་༔ འགལ་རྐྱེན་ཉི་ཁྲི་ཆིག་སྟོང་དང་༔ ཡེ་འདྲོག་སུམ་བརྒྱ་དྲུག་བཅུ་དང་༔ བགེགས་རིགས་སྟོང་ཕྲག་བརྒྱད་ཅུ་སོགས༔ མི་མཐུན་བྱང་ཞིང་དག་གྱུར་ཅིག །ཅེས་དང་། སྔར་བཞིན་སྔགས་སྤེལ་ཚིག་དང་བཅས་པའི། ཤཱནྟིཾ་ཀུ་རུའི་ཚབ་ཏུ། ཨ་པ་ན་ཡེ་སྭཱ་ཧཱ། སྦྱར་བས་བྱབ་རྫས་ཀྱིས་བྱབ་མཐར་ཁ་ནང་གི་ཆུ་ཁྲུས་ཁུའི་གསེབ་ཏུ་འདོར། སླར་ཡང་གནོད་བྱ་དང་གནོད་བྱེད་ཀྱི་འབྲེལ་པ་བཅད་པའི་སླད་དུ། སློབ་དཔོན་དཔལ་རྟ་མཆོག་རོལ་པ་གཉེན་པོ་ལྷ་བཞིའི་བདག་ཉིད་ཅན་གྱི་ཕྱག་ན་ཐོགས་པའི་ཡེ་ཤེས་ཀྱི་རལ་གྲི་མེ་རབ་ཏུ་འབར་བས་བྱད་ཐག་རྣམས་བཅད་དེ། འོད་ཀྱི་རྣམ་པར་གདོན་གཟུགས་རྣམས་ལ་སྤྲད་པས། ཁྱེད་རང་རྣམས་ཀྱི་ལུས་ངག་ཡིད་གསུམ་བདེ་བ་དང་ལྡན་པར་གྱུར་པའི་མོས་པ་མཛོད། ཅེས་བརྡ་སྦྱར་ལ། ཡི་དམ་གྱི་སྔགས་གཤམ་དུ། ལས་སྦྱོར་གྱི་སྔགས་དང་། ཧཱུྃ་ནཱ་ག་རཱ་ཛ་ས་མ་ཡ་ཛཿཛཿ ཤིག་ཤིག །ཁྲོལ་ཁྲོལ། ཆོད་ཆོད། བྱད་ཁྲོལ་ཅེས་བརྗོད་བཞིན་དུ་བྱེད་ཐག་རྣམས་དུམ་བུར་བཅད། ན་ག་རཱ་ཛ་བྱད་ཁྲོལ་ཁྲོལ། ཞེས་པས་སྐུད་རོ་རྣམས་ཀླུ་གཟུགས་ཀྱི་ཕྱོགས་སུ་བསྐྱལ། མ་འབྱོར་པ་དང་སོགས་
ནས། དེ་ཀུན་ཁྱོད་ཀྱིས་བཟོད་མཛད་རིགས། ཞེས་དང་། ཡིག་བརྒྱ་ལན་གསུམ་གྱིས་ནོངས་པ་བཤགས། སྔར་བསྒོམས་པའི་འོད་ཀྱི་ལྕགས་རི་མི་དམིགས་པར་བསམ་ལ། གཏོར་གླུད་རྣམས་ཁ་ཕྱིར་ལ་བསྟན། སྨན་དང་སྔགས་སོགས་བྱིན་རླབས་ཀྱིས། །ནད་དང་ཉེར་འཚེ་ཀུན་སྤངས་ནས། །དྲིན་ལན་དམ་ཚིག་དྲན་གྱིས་ལ། །རང་རང་གནས་སུ་འགྲོ་བར་གྱིས། །ཨོཾ་མ་ཧཱ་ནཱ་ག་ཨ་དྷི་པ་ཏ་ས་པ་རི་ཝཱ་ར་གཙྪས་དཀར་ཕྱོགས་ཀྱི་ཀླུ་རྣམས་གཤེགས། གལ་ཏེ་གདུག་པ་ཅན་ད་དུང་སྡོད་སྲིད་པས། གཞན་ཡང་ལས་ལས་གྲུབ་པ་ཡི། །བཀའ་དང་དམ་ལ་མ་ཐོགས་པའི། །གདུག་པ་ཅན་གྱི་ཀླུ་ཚོགས་ཀུན། །བཀའ་ཡི་ཕམ་ཕབ་འདི་ལོངས་ལ། །སོ་སོ་རང་རང་གནས་སུ་དེངས། ཞེས་དང་། ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི༴ ཆོས་ཀྱི༴ དགེ་འདུན༴ ཆོས་ཉིད་གདོད་ནས་དག་ཀྱང་ཆོས་ཅན་རྟེན་ཅིང་འབྲེལ་འབྱུང་བསླུ་བ་མེད་པའི་བདེན་པ་དང་། ཁྱད་པར་དུའང་བཅོམ་ལྡན་འདས་དཔལ་རྟ་མཆོག་རོལ་པ་གཉེན་པོ་ལྷ་བཞིའི་ལྷ་ཚོགས་བཀའ་སྡོད་ཕྱག་བརྙན་སྤྲུལ་པ་ཡང་སྤྲུལ་དང་བཅས་པ་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་རླབས་ཀྱིས། བསྒྲུབ་བྱ་འདི་རྣམས་ལ་གནོད་ཅིང་འཚེ་བར་བྱེད་པའི་ཀླུ་གཉན་ས་བདག་གི་རིགས་སུ་གྱུར་པ་ཐམས་
ཅད་དང་བགེགས་དང་ལོག་པར་འདྲེན་པའི་ཚོགས་གང་ཡིན་པ་དེ་དག་འདོད་ཡོན་གྱི་དངོས་པོ་ཟད་མི་ཤེས་པ་བྱིན་པ་འདིས་ཚིམ་པར་གྱིས་ལ་སའི་ཕྱོགས་འདིར་མ་གནས་པར་སོ་སོ་རང་གི་གནས་སུ་བདེ་བར་དེངས་ཤིག །གལ་ཏེ་མི་འགྲོ་ཞིང་འདུག་པ་གྱུར་ན་ཁྲོ་བོའི་ཡེ་ཤེས་ཀྱི་རྡོ་རྗེ་མེ་རབ་ཏུ་འབར་བ་འདིས་ཁྱེད་རྣམས་ཀྱི་མགོ་བོ་ཚལ་པ་བརྒྱར་འགས་པར་འགྱུར་ཏ་རེ། ཧཱུྃ གཉེན་པོ་ལྷ་བཞི་ཡོངས་རྫོགས་དཀྱིལ་འཁོར་དུ། །སྣང་སྲིད་རྣམ་དག་ཡེ་ཤེས་ལྷ་ཡི་ཚོགས། །ཀུན་བཟང་ཆོས་ཀྱི་དབྱིངས་ལས་མ་གཡོས་ཀྱང་། །རིག་རྩལ་རྣམ་དག་ཐབས་ཤེས་གཡུང་དྲུང་ལྷ། །འདི་ལ་ལོག་པར་ལྟ་བའི་དགྲ་དང་བགེགས། །བདུད་སྡེ་དཔུང་བཅས་ཐམས་ཅད་ཕྱིར་དེངས་ཤིག །རྩ་སྔགས་མཐར། སུམ་བྷ་ནི། བརྗོད་ཅིང་། གུལ་གུལ་གྱིས་བདུག །ཡུངས་དཀར་གྱིས་བྲབས། རོལ་མོའི་སྒྲ་དྲག་པོ་དང་བཅས་ཏེ་གཏོར་གླུད་རྣམས་ཀླུ་གནས་པའི་སར་ཆུ་མིག་གམ་རྒྱ་མཚོར་འབབས་པའི་ཆུ་ཀླུང་དུ་བསྐྱལ། བྱ་ཁྱུང་གི་ཕྱག་རྒྱ་དང་བཅས། ག་རུ་ཌཱ་ཧཾ་སེ་ཧཾ་སེ་ཙ་ལེ་ཙ་ལེ་སྭཱ་ཧཱ། ཞེས་པས་བདག་སྲུངས་ལ། ཧཱུྃ༔ བདག་ཉིད་དབང་ཆེན་ཁྲོ་བོའི་ཐུགས་ཀ་ནས། །དྲག་པོའི་བྱིན་རླབས་མཚོན་ཆའི་འོད་ཟེར་འཕྲོ། །མཚོན་ཆའི་གུར་ཁང་ཡེ་ཤེས་མེ་དཔུང་འབར། །ཕྱོགས་མཚམས་སྟེང་འོག་ཀུན་ཏུ་ཁྱབ་པར་སྲུངས། །ཨོཾ་བཛྲ་ཙཀྲ་ཏིཀྵཱ་ཀརྨ་ཀཱི་
ལ་ཡ་ཛྭ་ལ་རཾཿ ཞེས་བརྗོད་པས་ཕྱོགས་མཚམས་སྟེང་འོག་ཐམས་ཅད་རྡོ་རྗེའི་ས་གཞི་རྭ་བ་དྲྭ་བ་གུར་བླ་བྲེ་ཡེ་ཤེས་ཀྱི་མེ་རི་མེ་དཔུང་མཚོན་ཆ་སྣ་ཚོགས་པའི་སྲུང་བའི་འཁོར་ལོ་ཡངས་ཤིང་རྒྱ་ཆེ་བ་ཅིས་ཀྱང་མི་ཆོད་མི་ཤིགས་པར་གྱུར་པའི་མོས་པ་མཛོད། དེ་ལྟར་ཕྱི་རོལ་གྱི་ཕྱོགས་ཐམས་ཅད་རྡོ་རྗེའི་སྲུང་བའི་གུར་གྱིས་བཅིངས་ཏེ། སླར་ཡང་ཁྱེད་རང་རྣམས་ཀྱི་སྒོ་གསུམ་ལ་བསྲུང་པར་བྱ་བའི་སླད་དུ། སློབ་དཔོན་གྱི་ཕྱག་ན་ཐོགས་པའི་ཡེ་ཤེས་ཀྱི་རྡོ་རྗེ་དེ་ཉིད་གནས་བདུན་དུ་རེག་པ་ལ་བརྟེན་ནས། རྡོ་རྗེ་དེ་ལས་དེ་འདྲ་བ་དཔག་ཏུ་མེད་པ་བྱུང་སྟེ། ཁྱེད་རང་རྣམས་ཀྱི་ལུས་ལ་རྡོ་རྗེའི་གོ་ཁྲབ་བཞུ་བླུགས་ཀྱི་ཚུལ་དུ་གྱུར་ནས། དེང་ཕྱིན་ཆད་ནད་གདོན་ཉེར་འཚེ་གང་གིས་ཀྱང་གླགས་མི་རྙེད་པར་བསྲུང་བར་བྱས་པའི་མོས་པ་མཛོད། བསྙེན་སྔགས་དང་། ལས་སྦྱོར་གྱི་མཐར། བཛྲ་རཀྵ་རཀྵཿབཏགས་སྟེ། སྤྱི་བོ། མདུན་རྒྱབ། དཔུང་པ་གཡས་གཡོན། དཔྱིའམ་པུས་མོ་གཡས་གཡོན་སྟེ་གནས་བདུན་དུ་རྡོ་རྗེ་རྒྱ་གྲམ་དུ་བཞག་ལ་བསྲུང་། དེ་ལྟར་འགལ་རྐྱེན་ཀླུ་གཉན་ས་བདག་གི་གདོན་གྱིས་བཅིངས་པ་འགྲོལ་བ་སྔོན་དུ་སོང་ནས། སླར་ཡང་ནམ་མཁའ་དང་མཉམ་པའི་ཞེས་སོགས་སེམས་བསྐྱེད་གསལ་གདབ་ནས་མཚམས་སྦྱར་ལ། འཇུག་པ་དངོས་གཞི་དང་བཅས་པའི་དབང་བསྐུར་བ་ལོག་ནས་འབྱུང་བ་ལྟར་བྱའོ། །ཕྱག་ན་པདྨོ་ཞི་དྲག་གིས་ཐུགས་རྗེའི་བདུད་རྩིའི་རོལ་པའི་
བསྲུབས་སྐྱེས་ཕྲིན་ལས་ལྗོན་བཟུང་འདིས། །ཉེར་འཚོའི་ཚ་གདུངས་འཇིལ་གྱུར་ཅིག །ཞེས་པའང་ཀུན་མཁྱེན་ཆེན་པོ་ཉིད་ཀྱི་གསུངས་རྡོ་རྗེའི་ཚིག་རྐང་རྩ་བར་བཟུང་། བཀའ་གཏེར་དག་སྣང་གི་མན་ངག་ཟབ་མོ་དུ་མས་ཟུར་བརྒྱན་ཏེ་རིག་འཛིན་གྱི་བཙུན་པ་རྡོ་རྗེ་ཐུགས་མཆོག་རྩལ་གྱིས་སྦྱར་བའི་དགེ་བས་མཐའ་ཀླས་པའི་འགྲོ་བ་ཐམས་ཅད་འོག་གདོན་གྱི་འཇིགས་པ་ལས་མྱུར་དུ་གྲོལ་བའི་རྒྱུར་གྱུར་ཅིག །སརྦ་དཱ་ཤྲེ་ཡོ་བྷ་བ་ཏུ།། །།