ཟབ་ལམ་བདེ་གཤེགས་ཀུན་འདུས་ལས། མཁའ་འགྲོ་གསང་བ་ཡེ་ཤེས་ཀྱི་རྣལ་འབྱོར་རིམ་བཞིའི་ལམ་ཟབ་མོ་ཉམས་སུ་ལེན་པའི་ཁྲིད་ཡིག་མན་ངག་གསལ་སྒྲོན། རྗེ་བཙུན་མི་འགྱུར་དཔལ་སྒྲོན།
ཟབ་ལམ་བདེ་གཤེགས་ཀུན་འདུས་ལས། མཁའ་འགྲོ་གསང་བ་ཡེ་ཤེས་ཀྱི་རྣལ་འབྱོར་རིམ་བཞིའི་ལམ་ཟབ་མོ་ཉམས་སུ་ལེན་པའི་ཁྲིད་ཡིག་མན་ངག་གསལ་སྒྲོན་ཞེས་བྱ་བ་བཞུགས་སོ། །རྗེ་བཙུན་མི་འགྱུར་དཔལ་སྒྲོན།
ཟབ་ལམ་བདེ་གཤེགས་ཀུན་འདུས་ལས། མཁའ་འགྲོ་གསང་བ་ཡེ་ཤེས་ཀྱི་རྣལ་འབྱོར་རིམ་བཞིའི་ལམ་ཟབ་མོ་ཉམས་སུ་ལེན་པའི་ཁྲིད་ཡིག་མན་ངག་གསལ་སྒྲོན་ཞེས་བྱ་བ་བཞུགས་སོ། །ༀ་སྭ་སྟི། ཟབ་ལམ་བདེ་གཤེགས་ཀུན་འདུས་ལས། མཁའ་འགྲོ་གསང་བ་ཡེ་ཤེས་ཀྱི་རིམ་གཉིས་ཟབ་མོའི་རྣལ་འབྱོར་གྱི་ལམ་རིམ་ཁྲིད་ཡིག་མན་ངག་གསལ་བའི་སྒྲོན་མེ་ཞེས་བྱ་བ། བླ་མ་དང་གར་དབང་མཁའ་འགྲོ་མ་ལ་ཕྱག་འཚལ་ལོ། །རིགས་ཀུན་ཁྱབ་བདག་བདེ་ཆེན་ཧེ་རུ་ཀ །སྲིད་ཞིའི་འཆིང་བ་མ་ལུས་གཅོད་མཛད་པ༑ ༑གར་གྱི་དབང་ཕྱུག་གཏེར་ཆེན་བླ་མ་ལ། །བྱང་ཆུབ་བར་དུ་སྙིང་ནས་སྐྱབས་སུ་མཆི། །ཆོས་དབྱིངས་མཁའ་ལ་ཐུགས་རྗེའི་ཉི་འོད་ཟེར། །འཆར་ལས་པདྨའི་འདབ་སྟོང་རབ་བཞད་པ༑ ༑གང་ཐུགས་འགྱུར་མེད་ཤེས་བྱའི་ཆོས་ཀུན་གཟིགས། །འགྲོ་བ་རྒྱ་མཚོའི་མགོན་ཁྱོད་སྤྱི་བོས་མཆོད། །ཤེས་རབ་སྟོང་པ་བདེ་ཆེན་ཌཱཀི་མ། །གང་གི་རྣལ་འབྱོར་ཟབ་མོའི་རིམ་པ་རྣམས། །གོ་རྟོགས་ཉམས་མྱོང་ཀུན་དང་མི་ལྡན་ཡང། །མོས་པ་ཁོ་ནས་འབྲི་འདོད་གནང་བ་སྩོལ། །སྲིད་པའི་གྲོང་ཁྱེར་ཡ་ངའི་གཡང་ས་ལས། །རྣམ་གྲོལ་སྐུ་བཞིའི་ཐར་པའི་གྲོང་ཁྱེར་དུ༑ ༑བསྐལ་བཟང་མྱུར་བདེར་འཇུག་པ་མན་ངག་གི །ལྷན་སྐྱེས་གསལ་བའི་སྒྲོན་མེ་འདི་ཁོ་ན། །འདིར་མདོ་རྒྱུད་མན་ངག་ཐམས་ཅད་ཀྱི་ཡང་ཞུན་ནམ་སྙིང་པོ། དུས་གསུམ་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ་མཆོག་ཚེ་འདི་ཉིད་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་མངོན་དུ་བྱེད་པའི་མྱུར་ལམ། མཁའ་འགྲོ་གསང་བ་ཡེ་ཤེས་ཀྱི་རྣལ་འབྱོར་
རིམ་བཞིའི་ལམ་ཟབ་མོས་སྐལ་ལྡན་གྱི་སློབ་མ་སངས་རྒྱས་ཀྱི་སར་བདེ་མྱུར་གྱི་སྒོ་ནས་ཁྲིད་པར་བྱེད་པ་ལ་དོན་གསུམ་སྟེ། སྔོན་འགྲོ། དངོས་གཞི། རྗེས་ཀྱི་རིམ་པའོ། །དང་པོ་ལ་གཉིས་ཏེ༑ ཐུན་ལ་འཇུག་པའི་སྔོན་འགྲོ་དང་། ལམ་གྱི་སྣོད་རུང་དུ་བྱེད་པའི་སྔོན་འགྲོ་གཉིས། དང་པོ་ནི། སྤྱི་བོར་བླ་མ་བསྒོམ་སྟེ་འདོད་པའི་དོན་ལ་གསོལ་བ་གདབ་བོ། །གཉིས་པ་ལ་ཐུན་མོང་དང་། ཐུན་མོང་མ་ཡིན་པ་གཉིས། དང་པོ་ནི། དལ་འབྱོར་རྙེད་དཀའ་བསམ་པ། ཚེ་མི་རྟག་པ། ལས་འབྲས་སྨིན་ཚུལ། འཁོར་བའི་ཉེས་དམིགས་ཏེ། ངེས་འབྱུང་གི་བློ་སྦྱོང་བ་དང་། དེ་དང་རྗེས་འབྲེལ་སྐྱབས་སུ་འགྲོ་བ་དང་། སེམས་བསྐྱེད་པའོ།། གཉིས་པ་ནི། འགལ་རྐྱེན་ཞི་བྱེད་རྡོར་སེམས་སྒོམ་བཟླས། ཚོགས་གཉིས་རྫོགས་ཐབས་མཎྜལ། བྱིན་རླབས་མྱུར་འཇུག་བླ་མའི་རྣལ་འབྱོར་ཏེ་སྔོན་འགྲོའི་ཁྲིད་རིམ་དེ་རྣམས་ཡབ་བཀའི་རྩ་ཁྲིད་བཞིན་དམིགས་རྐང་རེ་རེ་ནས་ཞིབ་མོར་བཤད་ཅིང་། རྒྱུད་ལ་མྱོང་བ་ཅི་རིགས་ཐོན་ཐོན་གྱི་བར་དེ་སྲིད་དུ་བསྒོམ། དེ་ནས་དངོས་གཞིའི་ཁྲིད་ལ་འཇུག་ཅིང་། འདི་ནི་སྔོན་དུ་བློ་འབྱོངས་ཟིན་པའི་དབང་དུ་བྱས་ཏེ། དམིགས་པའི་གསལ་འདེབས་ལ་མདོ་འགག་སྙིང་པོར་དྲིལ་ན། དང་པོ་ཐུན་གྱི་སྔོན་འགྲོ་ནི། བསམ་གཏན་ལ་འཚེར་མི་འབྱུང་བའི་གནས་དབེན་པར་སྟན་བདེ་བར་ལུས་གནད་དྲང་པོར་བསྲང་སྟེ། སེམས་རྣལ་དུ་ཕབ། ངག་གནད་རླུང་རོ་དགུ་ཕྲུགས་སམ་གསུམ་ཕྲུགས་སུ་གསལ་ནས་ནད་གདོན་སྡིག་སྒྲིབ་ཐམས་ཅད་སང་གིས་དག་པར་བསམ། དེ་ནི་བཅུད་ལུག་པའི་སྔ་ལོགས་སུ་སྣོད་ལ་བཀྲུ་བཤལ་བྱེད་པ་དང་འདྲ་གསུངས། སེམས་གནད་མཁའ་ཁྱབ་ཀྱི་སེམས་ཅན་ཐམས་ཅད་ཀྱི་དོན་དུ། རྗེ་བཙུན་རྡོ་རྗེ་རྣལ་འབྱོར་མའི་ལམ་ཟབ་མོ་འདི་ཉིད་ཉམས་སུ་བླང་སྙམ་པས། རང་གི་སྤྱི་བོར་པད་ཟླའི་གདན་ལ་རྩ་བའི་བླ་མ་མཚན་དཔེ་གསལ་རྫོགས་སྐྱབས་གནས་ཀུན་འདུས་པའི་ངོ་བོར་བཞུགས་པར་མོས། སྐྱིད་སྡུག་གི་ལེགས་ཉེས་གང་ལ་ཡང་རེ་དོགས་སྤང་བླང་གི་བློ་དང་ཕྲལ་ཏེ་ཅི་མཛད་ཁྱེད་ཤེས་ཀྱི་བློ་གཏད་ལིང་སྐྱུར་གྱི་མོས་གུས་རྩེ་གཅིག་པས། ངག་ཏུ་དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེ་མཁྱེན། བདག་གི་རྒྱུད་བྱིན་གྱིས་
རློབ་ཏུ་གསོལ། ཟབ་ལམ་གྱི་རྟོགས་པ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་རློབ་ཏུ་གསོལ། ཞེས་འདོད་པའི་དོན་ལ་ཞེ་ཐག་པ་ནས་གསོལ་བ་བཏབ་རྗེས་བླ་མ་དགྱེས་པ་ཆེན་པོས་འོད་དུ་ཞུ་ནས་རང་ལ་བསྟིམ་སྟེ་སྤྲོས་བྲལ་བློ་འདས་ཀྱི་ངང་ལ་ཅི་གནས་འཇོག དེ་རྣམས་ཐུན་ཐམས་ཅད་ཀྱི་སྔོན་དུ་འགོ་འཛིན་གྱི་ཚུལ་དུ་གཏོང་བ་ཕྱག་ལེན་ནོ། །གཉིས་པ་ལམ་གྱི་སྣོད་རུང་དུ་བྱེད་པའི་སྔོན་འགྲོ་ལ་ཐུན་མོང་དང་ཐུན་མོང་མ་ཡིན་པ་གཉིས་ལས། དང་པོ་ཐུན་མོང་པ་ནི། འདི་ཉིད་ལས། དང་པོར་འཁོར་བའི་ལས་སྣང་ཞེས་སོགས་ཀྱིས་བསྟན་ཏེ། དེའི་རིམ་ཅུང་ཟད་ཅིག་བཤད་ན་དེ་ཡང་རང་ཅག་རྣམས་ཀྱིས་ཡང་ཡང་རྙེད་དཀའ་ཞིང་རྙེད་ན་དོན་ཆེན་པོ་དང་ལྡན་པའི་རྟེན་ཕུན་སུམ་ཚོགས་པ་མི་ལུས་རིན་པོ་ཆེ་ད་རེས་ལན་གཅིག་རྙེད་པའི་སྐབས་འདིར་གཏན་བདེའི་མདུན་མ་དམ་པའི་ཆོས་ཤིག་མ་བྱས་ན། ཕྱིས་ནས་འདི་ལྟ་བུའི་ལུས་རྟེན་ཁྱད་པར་ཅན་འདི་ཉིད་རྒྱུ་རྐྱེན་དཔེ་གྲངས་གང་ལ་བསམས་ཀྱང་རྙེད་པར་དཀའ་ཞིང་རྙེད་ན་དོན་ཆེན་པོ་དང་ལྡན་པས། ད་རེས་དལ་འབྱོར་ཆུད་ཟོས་དང་སྟོང་ལོག་ཏུ་མ་སོང་བར་སྙིང་པོ་ལོན་པའི་ཆོས་གཤའ་མ་ཞིག་བསྒྲུབ་དགོས་ཏེ། སློབ་དཔོན་ཆེན་པོས། ཡང་ཡང་རྙེད་དཀའ་ཨུ་དམ་ཝ་ར་འདྲ༔ རྙེད་པ་དོན་ཆེན་ཡིད་བཞིན་ནོར་བུ་འདྲ༔ ད་རེས་ཕུན་ཚོགས་རྐྱེན་ཀུན་འཛོམས་དུས་འདིར༔ བརྩོན་འགྲུས་དྲག་པོས་སྲིད་ལས་བརྒལ་བར་མཛོད༔ ཅེས། རྒྱལ་བའི་སྲས་པོ་ཞི་བ་ལྷས། དལ་འབྱོར་འདི་ནི་ཤིན་ཏུ་རྙེད་པར་དཀའ།། སྐྱེས་བུས་དོན་འགྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་བསྒྲུབས་ན། །ཕྱིས་ནས་ཡང་དག་འབྱོར་པ་ག་ལ་འགྱུར། །ཞེས་དང་། འདི་ཉིད་ལས། འདི་འདྲའི་དལ་བ་རྙེད་གྱུར་ནས། །བདག་གིས་དགེ་གོམས་མ་བྱས་ན། །འདི་ལས་བསླུས་པ་གཞན་མེད་དེ། །འདི་ལས་རྨོངས་པ་གཞན་མེད་དོ། །ཞེས་པ་དང་། མགོན་པོ་ཀླུ་སྒྲུབ་ཀྱིས། རྒྱ་མཚོ་གཅིག་ན་གཉའ་ཤིང་བུ་ག་དང་། །རུས་སྦལ་འཕྲད་པ་བས་ཀྱང་དུད་འགྲོ་ལས། །མི་ཉིད་ཆེས་ཐོབ་དཀའོ་མི་དབང་གིས། །དམ་ཆོས་སྤྱོད་ལས་དེ་འབྲས་མཆིས་པར་མཛོད། །ཅེས་གསུངས་སོ༑ ༑དེ་ཡང་དམ་ཆོས་བསྒྲུབ་པའི་རྟེན་དེ་ཡང་ཇི་ལྟ་བུ་སྙམ་ན། འགྲོ་བ་གཞན་གྱི་རྟེན་ལས་
མི་འབྱུང་སྟེ་ཁམས་དྲུག་ལྡན་གྱི་མི་ལུས་རིན་པོ་ཆེ་འདི་ཉིད་དེ། ཙནྡྲ་གོ་མིས། བདེ་གཤེགས་ལམ་བརྟེན་འགྲོ་བ་འདྲེན་པར་ཆས་གྱུར་པ། །སེམས་ཀྱི་སྟོབས་ཆེན་མི་ཡིས་རྙེད་པ་གང་ཡིན་པ། །ལམ་དེ་ལྷ་དང་ཀླུ་ཡིས་མི་རྙེད་ལྷ་མིན་དང་། །མཁའ་ལྡིང་མིའམ་ཅི་དང་ལྟོ་འཕྱེས་མིན། །ཞེས་གསུངས་སོ། །དེས་ན་གྲུ་ཡོད་དུས་ཆུ་བོའི་ཕ་རོལ་དུ་བརྒལ་དགོས་པ་དང་། དཔའ་བོའི་དཔུང་ཚོགས་ཡོད་དུས་ཕ་རོལ་གྱི་དགྲ་སྡེ་འདུལ་བ་དང་། ཆུ་ལུད་དྲོད་གཤེར་འཛོམས་དུས་ས་བོན་ཅི་ཐེབས་བྱེད་དགོས་པ་དང་ཆོས་མཚུངས་པ་བཞིན། རྟེན་ཡང་དག་པར་ཐོབ་པའི་སྐབས་འདིར། ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པར་བྱེད་དགོས་ཏེ། སྤྱོད་འཇུག་ལས། མི་ཡི་གྲུ་ལ་བརྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ།། གྲུ་འདི་ཕྱིན་ཆད་རྙེད་དཀའ་བས། །རྨོངས་པ་དུས་སུ་གཉིད་མ་ལོག །ཅེས་དང་། སྡིག་པ་ཆེན་པོ་མི་བཟད་བྱས་ན་ཡང་། །དཔའ་ལ་བརྟེན་ནས་འཇིགས་པ་ཆེན་པོ་ལྟར། །གང་ལ་བརྟེན་ནས་ཡུད་ཀྱིས་སྒྲོལ་གྱུར་པ། །དེ་ལ་བག་ཅན་རྣམས་ཀྱིས་ཅིས་མི་བསྟེན། །ཞེས་གསུངས་སོ། །གཉིས་པ་འཆི་བ་མི་རྟག་པ་བསམ་པའི་ཁྲིད་ནི། འོ་ན་དལ་འབྱོར་གྱི་ལུས་རྟེན་འདི་ཉིད་ཐོབ་ཏུ་ཟིན་ནས་མི་འཆི་བར་སྡོད་པ་ཞིག་ཡིན་ན་དེ་ཀ་ཡིན་མོད། དེ་མ་ཡིན་རྟག་པའི་ངེས་པ་ཅུང་ཟད་ཙམ་ཡང་མེད་དེ། སྤྱིར་འདུས་བྱས་ཀྱི་ཆོས་ཐམས་ཅད་མི་རྟག་པའི་ཆོས་ཅན་ཁོ་ན་ཡིན་ཏེ། སྐྱེས་པའི་ཐ་མ་འཆི། འདུས་པའི་ཐ་མ་བྲལ། བསགས་པའི་ཐ་མ་འཛད། མཐོན་པོའི་ཐ་མ་ལྟུང་བའི་ཆོས་ཉིད་དང་། དེར་མ་ཟད་སྐྱེས་ཕན་ཆད་ཚེ་རིང་ཐུང་གི་ཁྱད་པར་ཅུང་ཟད་ལས་མ་ཤི་བར་ཚེ་ཐར་དུ་ལུས་པའི་སེམས་ཅན་ནི་སྔར་ཕྱིས་ད་ལྟར་གང་དུ་ཡང་མ་མཐོང་ཞིང་མ་ཐོས་ཐེ་ཚོམ་ཙམ་ཡང་མེད་དེ། རྒྱ་ཆེ་རོལ་པ་ལས། སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་ལྟ་དང་མཚུངས། །སྐྱེས་བུའི་ཚེ་འགྲོ་ནམ་མཁའི་གློག་དང་འདྲ། །རི་གཟར་འབབ་ཆུ་བཞིན་དུ་མྱུར་མགྱོགས་འགྲོ། །ཞེས་དང་། སློབ་དཔོན་ཆེན་པོས། ཚེ་འདི་མི་རྟག་སྟོན་ཀའི་སྤྲིན་དང་འདྲ། །མཛའ་བཤེས་གཉེན་འདུན་ཚོང་
འདུས་མགྲོན་པོ་འདྲ། །འཆི་བདག་བདུད་ནི་དགོང་ཁའི་གྲིབ་སོ་འདྲ། །འཇིག་རྟེན་ཕྱི་མ་སོས་ཀའི་ཉ་བརྡོས་འདྲ། །ཚེ་འདིའི་སྣང་བ་མདང་གི་རྨི་ལམ་འདྲ། །འདོད་ཡོན་ལོངས་སྤྱོད་སྒྱུ་མའི་དགའ་སྟོན་འདྲ། །དོན་མེད་བྱ་བ་ཆུ་ཡི་གཉེར་མ་འདྲ། །ཞེས་དང་། མདོར་ན་སྐྱེས་པའི་ཐ་མ་འཆི་བ་སྟེ༔ འདུས་པའི་ཐ་མ་དེ་བཞིན་འབྲལ་བ་ཡིན༔ བསགས་པ་འཛད་ཅིང་འབྱོར་བ་རྒུད་པའི་རྒྱུ༔ ཞེས་དང་། སློབ་དཔོན་རྟ་དབྱངས་ཀྱིས། ས་འམ་འོན་ཏེ་མཐོ་རིས་ན། །སྐྱེས་ནས་ལ་ལ་མ་ཤི་བ། །འགའ་ཞིག་ཁྱེད་ཀྱིས་མཐོང་བའམ། །ཐོས་སམ་འོན་ཏེ་ཐེ་ཚོམ་ཟ༑ ༑ཞེས་དང་། གང་དུ་ཕྱིན་ཀྱང་འཆི་བས་མི་འཚུགས་པའི། །ས་ཕྱོགས་དེ་ནི་གང་ན་ཡོད་མ་ཡིན། །ནམ་མཁའ་ལ་མེད་རྒྱ་མཚོའི་གཏིང་ནའང་མེད། །རི་བོ་ཀུན་གྱི་ཕུག་ཏུ་ཞུགས་ཀྱང་མེད། །ཅེས་གསུངས་པ་བཞིན། སྤྱིར་སྒྲ་མི་སྙན་པ་མ་གཏོགས་པའི་འགྲོ་བ་གཞན་གྱི་ཚེ་ལ་ཚད་ངེས་པ་མེད་ཅིང་། དེའི་ནང་ནས་ཀྱང་འཛམ་བུ་གླིང་པའི་མི་རྣམས་ཀྱི་ཚེ་ནི་ཤིན་ཏུ་མ་ངེས་པ་ཡིན་ཏེ། དང་པོ་ཚེ་ལོ་དཔག་མེད་ཐུབ་པའང་བྱུང་མོད། མཐར་ལོ་བཅུ་ལ་རིང་མཐའ་བྱེད་དགོས་ཏེ། མཛོད་ལས། འདི་ན་མ་ངེས་མཐའ་མར་ནི། །ལོ་བཅུ་དང་པོ་དཔག་ཏུ་མེད། །ཅེས་གསུངས་པ་བཞིན། དེའི་ནང་ནས་ཀྱང་རྒན་གཞོན་བར་མའི་གོ་རིམ་ཙམ་ཡང་མ་ངེས་པར་ནམ་འཆི་ཆ་མེད། དེ་ཡང་ཚེ་ལ་བསྣོན་པ་མེད་ཅིང་འགྲིབ་པ་དང་བཅས་པས་མྱུར་དུ་འཛད། འཚོ་བའི་རྐྱེན་ནི་ཉིན་སྐར་ཙམ་ལས་ཉུང་། འཆི་བའི་རྐྱེན་ནི་རླུང་ནང་གི་མར་མེ་ལྟར་བུ་ཡུག་འཚུབས་པ་བཞིན། འཆི་རྐྱེན་འདིས་བྱེད་བྱ་བ་མེད། རེས་འགའ་འཚོ་བའི་རྐྱེན་དག་གིས་ཀྱང་བྱེད་པས། དོ་ནུབ་ཙམ་ཡང་མི་འཆི་བའི་གདེངས་མེད་དོ། །འོ་སྐོལ་རྣམས་ཀྱི་ཚེ་འདིའི་སང་གི་སྣང་བ་དང་འཇིག་རྟེན་ཕྱི་མའི་སྣང་བ་གཉིས་སྔོན་ལ་གང་འབྱུང་མི་ཤེས་ཏེ། མི་རྟག་པའི་གཏམ་ལས། ལྟག་ཆུ་ཆད་པའི་རྫིང་བཞིན་དུ། །བསྣོན་མེད་འགྲིབ་པ་དང་བཅས་པས། །ཀུན་ཀྱང་འཆི་བའི་ལམ་ཞུགས་ན། །གློ་བུར་ཚེ་ལ་སུ་ཡིད་རྟོན། །ཞེས་དང་། ཀླུ་སྒྲུབ་ཀྱིས། འཆི་བའི་རྐྱེན་རྣམས་མང་བ་སྟེ། །གསོན་པོ་ཡི་ནི་ཉུང་ཟད་ཅིག །དེ་དག་ཉིད་ཀྱང་འཆི་བའི་རྐྱེན། །དེ་བས་རྟག་ཏུ་ཆོས་མཛོད་ཅིག །ཅེས་དང་། ཀུན་མཁྱེན་ཆོས་
རྗེས། ཚེ་འདི་མི་རྟག་འཇིམ་པའི་བུམ་པ་འདྲ། །སང་དང་འཇིག་རྟེན་ཕྱི་མའི་སྣང་བ་གཉིས།། སྔོན་ལ་གང་འབྱུང་ངེས་པ་མེད་པས་ན། །དེ་རིང་ཉིད་ནས་དམ་པའི་ཆོས་མཛོད་ཅིག །ཅེས་དང་། ཞི་བ་ལྷས། དེ་རིང་ཁོ་ན་མི་འཆི་ཞེས། །བདེ་བར་འདུག་པ་རིགས་མ་ཡིན། །ཞེས་གསུངས་པ་ལྟར། ཕྱི་ནང་སྣོད་བཅུད་ཀྱི་འགྱུར་བ་ཐམས་ཅད་མི་རྟག་པ་ཁོ་ནར་ངེས་ཤེས་བསྐྱེད་ནས། སྐྱོ་ཤས་དྲག་པོས་ཚེ་འདི་སྣང་གི་བྱ་བྱེད་ཐམས་ཅད་ཆུའི་གཉེར་མ་ལྟར་ཟིན་མཐར་མེད་ཅིང་མདོ་དོན་ཆུང་། འཆི་དུས་རྒྱུན་ཆགས་སུ་ཕན་པ་ནི་དམ་པའི་ཆོས་ཁོ་ན་མ་གཏོགས་གང་ཡང་མེད་དེ། ད་ལྟ་ཉིད་ནས་ཕྱི་བཤོལ་དང་ལེ་ལོའི་དབང་དུ་མ་སོང་བར་སྒེག་མོའི་མགོ་ལ་མེ་ཤོར་བའམ། སྡར་མའི་པང་དུ་སྦྲུལ་ཞུགས་པ་ལྟར་འཕྲལ་དུ་སྒྲུབ་པར་གལ་ཆེ་སྟེ། འཕགས་པ་ཀླུ་སྒྲུབ་ཀྱིས། མགོའམ་གོས་ལ་གློ་བུར་མེ་ཤོར་ན། །དེ་དག་བཟློག་སླད་བགྱི་བ་བཏང་ནས་ཀྱང་། །ཡང་སྲིད་མེད་པར་བགྱི་སླད་འབད་འཚལ་ཏེ། །དེ་ལས་ཆེས་མཆོག་དགོས་པ་གཞན་མ་མཆིས། །ཞེས་དང་། དམ་པས། བྲེལ་དོན་ཚར་ནས་ཆོས་ལ་ཕྱིན་ས་མེད། །དྲན་པའི་ཚེ་ན་རྒྱུག་ཅིག་དིང་རི་བ། །ཞེས་དང་། ཡེངས་བའི་བར་ལ་འཆི་བདག་བདུད་ཀྱིས་འཛིན། །ད་ལྟ་ཉིད་དུ་སྒྲུབས་ཤིག་དིང་རི་བ། །ཞེས་གསུངས་སོ། །གསུམ་པ་ལས་འབྲས་སྨིན་ཚུལ་བསམ་པའི་ཁྲིད་ནི། འཆི་བ་རང་བདེན་མོད་ཀུན་གྱི་ལམ་པོ་ཆེ་ཡིན། འོན་ཀྱང་འཆི་བའི་རྗེས་དེ་ཉིད་མེ་ཤི་ཐལ་བ་རླུང་ཁྱེར་ལྟར་སླར་སྐྱེ་བ་ག་ལ་ཡོད་ཆོས་རང་བྱ་མི་དགོས་བསམ་པ་སྙམ་ན། ཤི་ན་སེམས་ན་བུན་ལྟར་ཡལ་ནས་དངོས་མེད་དུ་འགྲོ་ན་དེས་ཆོག་མོད། དེ་ལྟར་མ་ཡིན་ཏེ། མདོ་ལས། ལུས་ཅན་དག་གི་ལས་རྣམས་ནི༑ ༑བསྐལ་བ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབས་པ་ན། །འབྲས་བུ་ཉིད་དུ་སོ་སོར་སྨིན། །ཞེས་པས། ས་བོན་མངར་ཁ་ལ་འབྲས་བུ་སོ་སོར་སྨིན་པ་བཞིན་བདེ་སྡུག་སྣ་ཚོགས་ཀྱི་ལས་ཀྱི་རྒྱུ་ནི། དགེ་དང་མི་དགེ་བ་གཉིས་ལས་གཞན་དུ་མེད། ཐར་འདོད་ཀུན་གྱི་བླང་དོར་གྱི་གནད་མཐའ་དག་མ་ནོར་བར་གལ་ཆེ་སྟེ། སློབ་དཔོན་ཆེན་པོས། ཚེ་རབས་མང་པོར་སྡུག་བསྔལ་རྒྱུར་གྱུར་པའི༔ སྡིག་པས་ཚེ་འདིར་བདེ་བས་ཅི་ཞིག་བྱ༔ ཚེ་
འདིའི་ཡུན་ཐུང་ལོ་ཟླ་འགའ་ཞིག་ཡིན༔ འཇིག་རྟེན་ཕྱི་མར་ཚད་བཟུང་མེད་པའི་ཕྱིར༔ སྐྱེས་བུ་གཞན་དུ་སྡུག་བསྔལ་མི་འབྱུང་བའི༔ བདེ་བའི་ཐབས་སུ་དགེ་སྡིག་བླང་དོར་བྱ༔ ཞེས་གསུངས། དེ་ལྟར་སྡིག་པ་བྱས་པ་སྐྱུར་དབང་ནི་མེད། དགེ་བ་རང་གིས་མ་བྱས་པར་ཁྱེར་དབང་ནི་མེད། དེར་མ་ཟད་ཚེ་འདིར་བསགས་པའི་ནོར་རྫས། མཛའ་བའི་གཉེན་བཤེས། བརྩིགས་པའི་ཁང་ཁྱིམ་སོགས་མངའ་ཐང་ལོངས་སྤྱོད་ཐམས་ཅད་བྱེ་བྲལ་བྱེད་དགོས་པར་མ་ཟད། ལྷན་ཅིག་སྐྱེས་པའི་ཤ་རུས་ཀྱང་བཞག་སྟེ་རྒྱུས་མེད་གཅིག་པུར་འགྲོ་དགོས། དེ་སྐབས་རྗེས་སུ་འགྲོ་བ་ནི་ལས་ཁོ་ན་ལུས་དང་གྲིབ་མ་བཞིན་དུ་རྗེས་སུ་འབྲང་སྟེ། རྒྱལ་པོ་ལ་གདམས་པའི་མདོ་ལས། དུས་ཀྱིས་ཉེན་ཏེ་རྒྱལ་པོ་འགྲོ་གྱུར་ན། །ལོངས་སྤྱོད་མཛའ་དང་གཉེན་བཤེས་རྗེས་མི་འབྲང་། །སྐྱེས་བུ་དག་ནི་གར་གནས་གར་འགྲོ་ཡང་། །ལས་ནི་གྲིབ་མ་བཞིན་དུ་རྗེས་སུ་འབྲང་། །ཞེས་དང་། ཞི་བ་ལྷས། གཤིན་རྗེའི་སྐྱེས་བུས་ཟིན་པ་ལ།། གཉེན་གྱིས་ཅི་ཕན་བཤེས་ཅི་ཕན། །ཞེས་གསུངས་པ་ལྟར། དེས་ན་དགེ་མི་དགེའི་ལས་ལ་རྣམ་གྲངས་མང་ཡང་། མཛོད་ལས། དེ་ལས་ཆེ་ལོང་བསྡུས་ནས་ནི། །དགེ་དང་མི་དགེ་ཅི་རིགས་པར། །ལས་ཀྱི་ལམ་ནི་བཅུར་བཤད་དོ། །ཞེས་གསུངས་པ་བཞིན། ལུས་ཀྱི་ལས་གསུམ། ངག་གི་ལས་བཞི། ཡིད་ཀྱི་ལས་གསུམ་དུ་འདུས། དེ་ལྟར་ལུས་ངག་ཡིད་གསུམ་གྱི་སྒོ་ནས་དགེ་བའི་ལས་ལམ་མཐའ་དག་ཕྲ་ཞིང་ཕྲ་བ་ནས་ཁྱད་དུ་མ་བསད་པ་འཆི་གསོས་ཀྱི་སྨན་བཞིན་དུ་རྒྱུད་ལ་བསྟེན་དགོས་ཏེ། དགེ་བའི་ལམ་ཆུང་ངུ་བསགས་པས་ཀྱང་ནམ་ཞིག་ཆེན་པོར་འགྱུར་ཏེ། སྡུད་པ་ལས། ཆུ་ཡི་ཐིགས་པས་བུམ་པ་དང་པོ་ཐ་མའི་བར། །རིམ་གྱིས་ཉུང་ངུ་ཉུང་ངུས་དེ་ཡོངས་འགེངས་པ་ལྟར། །དེ་བཞིན་དང་པོའི་སེམས་ཀྱང་བྱང་ཆུབ་རྒྱུ་ཡིན་ཏེ། །རིམ་གྱིས་དཀར་པོའི་ཡོན་ཏན་རྫོགས་པའི་སངས་རྒྱས་འགྱུར། །ཞེས་སོ། །དེ་བཞིན་དུ་མི་དགེ་བའི་ལས་ཀྱང་ཆེ་འབྲིང་ཆུང་གསུམ་ཐམས་ཅད་དུག་དང་འདྲེས་པའི་ཁ་ཟས་བཞིན་བག་ཡོད་དང་ལྡན་པས་ཡང་དག་པ་སྤང་དགོས་ཏེ། སྡིག་པ་ཆུང་ངུས་ཀྱང་འགྱུར་སྟོབས་ཀྱི་སྡུག་བསྔལ་ཆེན་པོ་བསྐྱེད། དཔེ་རྩྭ་ཕུང་རི་བོ་ཙམ་ཡང་མེ་སྟག་ཕྲ་མོའི་
རྐྱེན་དང་ཕྲད་ན་འཇོམས་པའི་ཕྱིར་རོ། །ཞི་བ་ལྷས། བསྐལ་པ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་ཀུན་ཀྱང་། །ཁོང་ཁྲོ་གཅིག་གིས་འཇོམས་པར་བྱེད། །ཅེས་དང་། མདོ་ལས། སྡིག་པ་ཆུང་ངུ་བྱས་པས་ཀྱང་། །འཇིག་རྟེན་ཕ་རོལ་འཇིགས་ཆེན་དང་། །ཕུང་ཁྲོལ་ཆེན་པོ་བྱེད་འགྱུར་ཏེ། །ཁོང་པར་སོང་བའི་དུག་བཞིན་ནོ། །ཞེས་དང་། སློབ་དཔོན་ཆེན་པོས། ལས་ནི་ཆུང་ཡང་འབྲས་བུ་རྒྱ་ཆེ་སྟེ། །དགེ་སྡིག་ཆེན་པོ་བསགས་ལ་སྨོས་ཅི་དགོས། །ཞེས་དང་། དམ་པས། ཉོན་མོངས་སྐྱེས་ཚེ་གཉེན་པོས་མ་སླེབས་ན། །ཆོས་ཀྱི་དགོས་པ་སྟོར་རོ་དིང་རི་བ། །ཞེས་གསུངས་སོ། །ལས་འབྲས་ལ་སྤང་བླང་གོ་མ་འཛོལ་བའི་སྒོ་ནས་ཟག་བཅས་ཀྱི་དགེ་བས་ཀྱང་གནས་སྐབས་ཀྱི་བདེ་འབྲས་བསྐྱེད་པ་ཙམ་ལས་མཐར་ཐུག་འབྲས་བུ་འཛད་འགྲོ་བས་དགེ་བའི་ལས་ཐམས་ཅད་བསམ་པ་བྱང་ཆུབ་ཀྱི་སེམས་ཀྱིས་ཟིན་པ་དང་། མི་དགེ་བའི་ལས་ལ་ཅུང་ཟད་གནོངས་འགྱོད་དྲག་པོས་བཤགས་བསྡོམ་འཕྲལ་དུ་བགྱིས་ནས། མཐར་གཉིས་ཀ་འཁོར་གསུམ་རྣམ་པར་མི་རྟོག་པའི་ཤེས་རབ་ཆེན་པོའི་རྩིས་ཀྱིས་ཟིན་པ་གལ་ཆེ་སྟེ། བཞི་བརྒྱ་པ་ལས། བསམ་པ་བྱང་ཆུབ་སེམས་པ་ལ། །དགེའམ་གལ་ཏེ་མི་དགེ་རུང་། །ཐམས་ཅད་དགེ་ལེགས་ཉིད་འགྱུར་ཏེ། །གང་ཕྱིར་ཡིད་དེ་དབང་འགྱུར་ཕྱིར། །ཞེས་དང་། སྤྱོད་འཇུག་ལས། དེང་ནས་བརྩམས་ཏེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་ཆད་པ་དུ་མ་ཞིག །ནམ་མཁའ་མཉམ་པར་རབ་ཏུ་འབྱུང་། །ཞེས་དང་། སྡུད་པ་ལས། ཅི་སྟེ་མཚན་མ་མེད་ན་བྱང་ཆུབ་བསྔོ་བ་ཡིན། ཞེས་གསུངས་པ་བཞིན། རྣམ་དཀར་དགེ་བའི་ལས་ལམ་ཁོ་ན་སྒྲུབ་པ་ལ་སྐྱོ་དུབ་མེད་པ་ཁྱིམ་བདག་སོ་ནམ་བྱེད་པ་ལྟ་བུ་དང་། རླབས་པོ་ཆེའི་དགེ་བ་སྒྲུབ་པ་ལ་མི་ཞུམ་པ་དཔའ་བོ་གཡུལ་དུ་འཇུག་པ་ལྟ་བུ་དང་། བར་མཚམས་མེད་པ་མགལ་མེའི་འཁོར་ལོ་བསྐོར་བ་ལྟར་ཉིན་མཚན་གཉིས་ཀ་དམ་པའི་ཆོས་སྒྲུབ་པ་ལ་སྐད་ཅིག་ཙམ་ཡང་མི་དལ་བར་བསླབ་པའོ། །བཞི་པ་འཁོར་བའི་ཉེས་དམིགས་བསམ་པའི་ཁྲིད་ནི། འོ་ན་མི་དགེ་བའི་ལས་ཀྱིས་
ངན་སོང་གསུམ་དུ་སྐྱེས་ནའང་འཇིགས་རྒྱུ་རང་ཅི་ཡོད་སྙམ་ན། བློ་རྒོད་དེ་འདྲ་མ་བསམ་པ་ཡིན། བསམ་ན་དེ་རྣམས་ཀྱི་སྡུག་བསྔལ་ཉམས་སུ་མྱོང་བ་ལྟ་ཅི་སྨོས། དེ་རྣམས་ཀྱི་གཟུགས་བརྙན་རི་མོར་བྲིས་པ་མཐོང་བའམ་ཐོས་སམ། དྲན་ཡང་རུང་སྟེ་སྡུག་བསྔལ་བསམ་ན་སྙིང་རླུང་ལྡང་བ་ཙམ་དུ་བཟོད་ཐབས་མེད་དོ། །བཤེས་སྤྲིངས་ལས། དམྱལ་བ་བྲིས་པ་མཐོང་དང་ཐོས་པ་དང་། །དྲན་དང་བཀླགས་དང་གཟུགས་སུ་བགྱིས་རྣམས་ཀྱང་། །འཇིགས་པ་སྐྱེ་བར་འགྱུར་ན་མི་བཟད་པའི། །རྣམ་སྨིན་ཉམས་སུ་མྱོང་རྣམས་སྨོས་ཅི་འཚལ། །ཞེས་གསུངས་པ་བཞིན། སྤྱི་མཐུན་ཙམ་དུ་དམྱལ་བ་ལ་དུས་རྟག་ཏུ་ཚ་གྲང་གི་སྡུག་བསྔལ། དུད་འགྲོ་ལ་གླེན་ལྐུགས་དང་སྲོག་གཅོད་ཀྱི་སྡུག་བསྔལ་བསམ་གྱིས་མི་ཁྱབ་པ་ཡོད། བདེ་འགྲོའི་གནས་ནའང་སྡུག་བསྔལ་མེད་པ་མ་ཡིན་ཏེ། སྤྱིར་མི་རྣམས་ལ་སྐྱེ་བ། རྒས་པ། ན་བ། འཆི་བའི་སྡུག་བསྔལ། དེ་བཞིན་དུ་ལྷ་མ་ཡིན་ན་འཐབ་རྩོད་ཀྱིས་རྟག་ཏུ་མནར་ཞིང་། ལྷ་རྣམས་འདོད་ཡོན་ལ་སྤྱད་ཀྱིན་ལན་ཚྭས་ཆུ་འཐུང་བ་བཞིན་ཚིམ་པ་མེད་ཅིང་མཐར་ཡང་ལོ་བདུན་གྱི་བར་དུ་འཆི་འཕོ་ལྟུང་བྱེད་ཀྱི་སྡུག་བསྔལ། ཁམས་གོང་མ་གཉིས་ནའང་རེ་ཞིག་སྡུག་བསྔལ་མངོན་འགྱུར་བ་མེད་ཀྱང་ཁྱབ་པ་འདུ་བྱེད་ཀྱི་སྡུག་བསྔལ་ཁོ་ནར་ངེས་པས། འཇིག་རྟེན་དང་བསམ་གཟུགས་ཀྱི་ཏིང་ངེ་འཛིན་གནས་སྐབས་བདེ་བདེ་ལྟར་སྣང་ཡང་། ལས་ཀྱི་འཕེན་ཤུགས་ཟད་ནས་སླར་ཡང་ངན་སོང་གསུམ་སོགས་སུ་ལྟུང་བ་ལས་མ་འདས་སྟེ། བཤེས་སྤྲིང་ལས། ལྷ་ཡུལ་འདོད་བདེ་ཤིན་ཏུ་ཆེན་པོ་ཡང་། །ཚངས་ཉིད་ཆགས་བྲལ་བདེ་བ་ཐོབ་ནས་ཀྱང་། །མནར་མེད་མེ་ཡི་བུད་ཤིང་གྱུར་པ་ཡིས། །སྡུག་བསྔལ་རྒྱུན་མི་ཆད་པ་བསྟེན་འཚལ་ལོ༑ ༑ཞེས་དང་། འདི་ཉིད་ལས། བརྒྱ་བྱིན་འཇིག་རྟེན་མཆོད་འོས་གྱུར་ནས་ཀྱང་། །སླར་ཡང་ལས་ཀྱི་དབང་གིས་ས་སྟེང་ལྷུང་། །འཁོར་ལོས་ བསྒྱུར་རྒྱལ་ཉིད་དུ་གྱུར་ནས་ཀྱང་། །འཁོར་བ་དག་ཏུ་ཡང་བྲན་ཉིད་དུ་འགྱུར། །དྲན་པ་ཉེར་བཞག་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། །དུད་འགྲོ་གཅིག་ལ་གཅིག་ཟས་ཉམས། །མི་རྣམས་འཚོ་བ་ཐུང་བས་ཉམས། །ལྷ་རྣམས་བག་མེད་པ་ཡིས་ཉམས། །
འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །ཞེས་དང་། རྒྱུད་བླ་མ་ལས། མི་གཙང་བ་ལ་དྲི་ཞིམ་མེད་བཞིན་འགྲོ་ལྔ་དག་ན་བདེ་བ་མེད། །དེ་ཡིས་སྡུག་བསྔལ་རྟག་ཏུ་མི་ཚོན་རྒྱ་ཚྭ་ལ་སོགས་རེག་སྐྱེས་བཞིན། །ཞེས་དང་། རྒྱ་ཆེ་རོལ་པ་ལས། དེ་སྲིད་མ་རིག་དབང་གིས་འགྲོ་བ་རྣམས། །མི་དང་ལྷ་དང་འགྲོ་བ་རྣམ་གསུམ་པོ། །འགྲོ་བ་ལྔ་པོ་དག་ཏུ་མི་མཁས་འཁོར། །དཔེར་ན་རྫ་མཁན་འཁོར་ལོ་བསྐོར་བ་བཞིན། །ཞེས་དང་། སྲིད་གསུམ་རྒ་དང་ནད་ཀྱི་སྡུག་བསྔལ་འབར། །འདི་ན་འཆི་མེད་རབ་འབར་མགོན་མེད་དེ། །སྲིད་ལས་འབྱུང་ཞིང་འགྲོ་བ་རྟག་ཏུ་རྨོངས། །བུམ་པར་ཆུད་པའི་བུང་བ་ཇི་བཞིན་ནོ། །ཞེས་གསུངས་སོ༑ ༑དེས་ན་ཁམས་གསུམ་འཁོར་བའི་གནས་འདི་མཐོ་དམན་གང་དུ་སྐྱེས་ཀྱང་ཟུག་ཟེར་རྒྱུན་མི་ཆད་པའི་ནད་པ་ལྟར་བདེ་བའི་གོ་སྐབས་སྐད་ཅིག་ཙམ་ཡང་མི་འདུག་པས་ནག་ཅན་བཙོན་དོང་ནས་བྲོས་པ་ལྟར་ད་རེས་འདི་ནས་ངེས་པར་ཐར་པ་ཞིག་བྱ་སྙམ་དུ་འཁོར་བ་ལ་ཞེ་ཐག་པ་ཉིད་ནས་ངེས་འབྱུང་དང་སྐྱོ་ཤས་དྲག་པོས་བསྐྱེད་དགོས་ཏེ། སློབ་དཔོན་ཆེན་པོས། འཇིག་རྟེན་བྱ་བར་བརྩོན་ཀྱང་ཟིན་མཐའ་མེད༔ ཆོས་ལ་འབད་ན་ལས་ཐབས་མྱུར་དུ་ཟིན༔ འཁོར་བའི་བྱ་བ་ལེགས་ཀྱང་མཐའ་མར་ཕུང༔ དམ་ཆོས་སྤྱད་པའི་འབྲས་བུ་ཉམས་མི་སྲིད༔ ལས་ཉོན་བག་ཆགས་ཐོག་མ་མེད་དུས་ནས༔ གོམས་ཤིང་རྒྱུད་ལ་བར་མེད་གསོག་པ་སྟེ༔ དེ་ཡི་དབང་གིས་འཁྲུལ་སྣང་འཁོར་བར་འཁྱམས༔ འདི་ཙམ་དུས་ན་ཐར་ཞེས་ཚད་བཟུང་མེད༔ འཆི་བའི་ཚེ་ན་དྲན་ཡང་རབ་ཏུ་ཕྱིས༔ མགོ་བོ་ཆད་ལ་སྨན་གྱི་ཕན་མེད་བཞིན༔ དེ་ཕྱིར་འཁོར་བའི་སྡུག་བསྔལ་ཡོངས་ཤེས་ན༔ ཞི་བའི་ལམ་ལ་ཡང་དག་འཛེགས་པའི་ཕྱིར༔ བྱམས་དང་སྙིང་རྗེས་འགྲོ་ཀུན་རྗེས་སྐྱོང་བཞིན༔ སྟོང་ཉིད་སྙིང་རྗེས་ཟུང་འཇུག་སྒོམ་པར་མཛོད༔ ཅེས་དང་། གྲུབ་ཆེན་མེ་ལོང་རྡོ་རྗེའི་ཞལ་ནས། འཁོར་བའི་སྡུག་བསྔལ་བསམ་མཛོད་ལ། །འབུང་གསུམ་དམ་པའི་ཆོས་ལ་ཐོན། །མི་ལུས་དོན་ལྡན་ཡོང་དེ་མཆི། །ཞེས་གསུངས་པ་རྣམས་ལ་ངེས་ཤེས་བསྐྱེད་ནས་ཚེ་འདི་སྣང་གི་བྱ་བ་བཏང་སྟེ་དལ་འབྱོར་ལ་སྙིང་པོ་ལོན་པའི་ཆོས་ལ་སྙིང་པོར་དྲིལ་ཏེ་འབད་པ་གལ་ཆེའོ། །
ལྔ་པ་ཐེག་པ་སྤྱིའི་རྨངས་རྡོ་སྐྱབས་སུ་འགྲོ་བའི་ཁྲིད་ནི། གནད་ཐེམས་ལས། སྡུག་བསྔལ་དེ་ལས་མཁའ་མཉམ་འགྲོ༔ ཞེས་སོགས་ཏེ། ཚེ་རབས་ཐོག་མ་མེད་པ་ནས་མ་རིག་པའི་མུན་པ་ཐིབས་པོས་ནོན་ཏེ། ལས་ཉོན་བག་ཆགས་ཀྱི་དབང་གིས་འཇིགས་རུང་འཁོར་བའི་བཙོན་དོང་སྡུག་བསྔལ་གྱི་རྒྱ་མཚོ་མེའི་འོབས་དང་འདྲ་བ་འདི་ལས་བསྐྱབ་ནུས་པ་ནི། དཀོན་མཆོག་རིན་པོ་ཆེ་རྣམ་པ་གསུམ་མ་གཏོགས་གཞན་སུ་ཡང་མེད། འཇིག་རྟེན་གྱི་ལྷ་དང་རྒྱལ་པོ་སོགས་ཀྱིས་ཀྱང་གནས་སྐབས་ཀྱི་ཉི་ཚེའི་བདེ་བ་ཙམ་ལས་འཁོར་བ་ལས་སྐྱོབ་པའི་མཐུ་མེད་དེ། རང་ཉིད་ཀྱང་འཁོར་བ་ན་གནས་པའི་ཕྱིར་ཏེ། དཔེ་ནག་ཅན་བཙོན་དོང་ནས་གནས་པ་གཅིག་གིས་གཅིག་སྐྱོབ་མི་ནུས་པ་བཞིན་ནོ། །དེས་ན་བསླུ་བ་མེད་པའི་སྐྱབས་ཀྱི་དཀོན་མཆོག་རིན་པོ་ཆེ་རྣམ་པ་གསུམ་ཁོ་ནར་ངེས་ཏེ། སློབ་དཔོན་ཆེན་པོས། འཁོར་བའི་དཔོན་ནི་ཇི་ལྟར་བཟང་ཡང་བསླུ༔ སྐྱབས་གནས་དཀོན་མཆོག་གསུམ་ལ་བསླུ་བ་མེད༔ ཅེས་དང་། གྲུབ་ཆེན་མེ་ལོང་གིས། འགྲན་ཟླ་མེད་པའི་དཀོན་མཆོག་ལ། །གློ་སྙིང་བྲང་གསུམ་རྒྱུན་དུ་འཁོལ། །བསླུ་མེད་ཅི་བསམ་འགྲུབ་ནས་མཆི། །ཞེས་གསུངས་པས། དཔེར་ན་སངས་རྒྱས་ལ་སྐྱབས། ཆོས་ལ་ལམ། དགེ་འདུན་ལ་གྲོགས་ཞུ་སྙམ་ནས་ཞེ་ཐག་པ་ནས་བསམ་ལ། དབེན་པའི་གནས་སུ་སྟན་བདེ་བ་ལ་ལུས་གནད་བདེ་ལུགས་སུ་བསྲང་།སེམས་རྣལ་དུ་ཕབས་ཏེ། རང་གནས་ཀྱི་ས་ཕྱོགས་འདི་ཉིད་རིན་པོ་ཆེའི་རང་བཞིན་ཅན་གྱི་མིག་མངས་རིས་སུ་བྲིས་པའི་མཐའ་བསྐོར་བ་རྒྱ་ཁྱོན་ཚད་མེད་པའི་ཞིང་ཁམས་རྣམ་པར་དག་པའི་དབུས་སུ། དཔག་བསམ་གྱི་སྡོང་པོ་ཡལ་ག་དང་ལོ་འདབ་མེ་ཏོག་འབྲས་བུ་ཕུན་སུམ་ཚོགས་པ་རབ་ཏུ་རྒྱས་པས་རང་གི་མདུན་གྱི་ནམ་མཁའ་ཁྱབ་པ་དེའི་ཡལ་ག་དབུས་དང་ཕྱོགས་བཞིར་གྱེས་པའི་དབུས་ཀྱི་སྙིང་པོ་ལ་སེང་གེ་བརྒྱད་ཀྱིས་བཏེགས་པའི་ཁྲི་སྣ་ཚོགས་པདྨ་དང་ཉི་ཟླ་བརྩེགས་པའི་གདན་མཐོ་ཞིང་ཡངས་པའི་དབུས་སུ་རྩ་བའི་བླ་མ་མཚན་རྫོགས་རྡོ་རྗེ་འཆང་དམར་པོའི་རྣམ་པ་ཅན་ལ་བརྒྱུད་པའི་བླ་མ་རྣམས་ཀྱིས་བསྐོར་བ་དཀོན་མཆོག་ཀུན་འདུས་ཀྱི་ངོ་བོར་བཞུགས་པར་བསམ། ཕྱོགས་བཞིར་གྱེས་པའི་ཡལ་
ག་བཞི་ལ་སེང་ཁྲི་པདྨ་ཉི་ཟླ་བརྩེགས་པའི་གདན་རེ་གསལ་བའི་མདུན་གྱི་གདན་ལ་ཁྱད་པར་གྱི་སངས་རྒྱས་དཀོན་མཆོག་ཡི་དམ་དཀྱིལ་འཁོར་གྱི་ལྷ་ཚོགས་རྣམས་དང་། གཡས་ཀྱི་གདན་ལ་ཐུན་མོང་གི་སངས་རྒྱས་དཀོན་མཆོག་སྟོན་པ་ཐུབ་པའི་དབང་པོ་སོགས་དུས་གསུམ་གྱི་སངས་རྒྱས་མཆོག་གི་སྤྲུལ་སྐུ་རྣམས། རྒྱབ་ཀྱི་གདན་ལ་ཆོས་དཀོན་མཆོག་རྣམས་གླེགས་བམ་བརྩེགས་པའི་ཚུལ་ཅན། གཡོན་གྱི་གདན་ལ་ཐུན་མོང་གི་དགེ་འདུན་དཀོན་མཆོག་བྱང་ཆུབ་སེམས་དཔའ་དང་། ཉན་རང་འཕགས་པ་རྣམས་དེ་ཐམས་ཅད་ཀྱི་མཐའ་སྐོར་དུ་ཁྱད་པར་གྱི་དགེ་འདུན་དཀོན་མཆོག་མཁའ་འགྲོ་ཆོས་སྐྱོང་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་སྤྲིན་ཕུང་གཏིབས་པ་ལྟར་རང་སྐྱོབ་པའི་ཚུལ་དུ་བཞུགས་པར་བསམ་ལ། རང་དང་ལྷན་ཅིག་ཏུ་མཁའ་མཉམ་གྱི་སེམས་ཅན་དགྲ་གཉེན་དང་ཕྱོགས་རིས་མེད་པ་ཐམས་ཅད་ས་ཆེན་པོའི་དྲེག་པ་ལྟར་འཁོད་དེ། ཐམས་ཅད་ལུས་གུས་པའི་སྒོ་ནས་ཐལ་སྦྱར། ངག་གུས་པའི་སྒོ་ནས་སྐྱབས་འགྲོའི་ཚིག་འུར་དིར་དིར་འདོན། ཡིད་གུས་པའི་སྒོ་ནས་དུས་འདི་ནས་བཟུང་སྟེ་བྱང་ཆུབ་སྙིང་པོ་ལ་མཆིས་ཀྱི་བར་དེ་སྲིད་དུ་རེ་ས་ལྟོས་ས་སྐྱབས་གནས་དམ་པ་ཁྱེད་རྣམས་མ་གཏོགས་མེད་པས་བློ་སྙིང་བྲང་གསུམ་དཀོན་མཆོག་གསུམ་ལ་ལིང་སྐྱུར་གྱི་སྙིང་ཁོང་རུས་པའི་གཏིང་ནས་གདུང་ཤུགས་དྲག་པོས་སྐྱབས་འགྲོ་བྱེད་པར་མོས་ཤིང་། ཁྱད་པར་སེམས་ཅན་ཐམས་ཅད་ལ་སྙིང་རྗེ་ཆེན་པོས་ཀུན་ནས་བསླངས་ཏེ་འཇིགས་རུང་འཁོར་བའི་སྡུག་བསྔལ་འདི་ལས་སྐྱོབ་ཏུ་གསོལ་སྙམ་པས། ངག་ཏུ། ན་མོཿ བདག་སོགས་འགྲོ་ཀུན་བྱང་ཆུབ་བར༔ བླ་མ་སངས་རྒྱས་དམ་པའི་ཆོས༔ ཚོགས་མཆོག་བདེ་གཤེགས་དཀྱིལ་འཁོར་ལྷ༔ མཁའ་འགྲོ་བཅས་ལ་སྐྱབས་སུ་མཆི༔ ཞེས་བརྒྱ་སྟོང་ལ་སོགས་པ་བློ་དང་ཅི་འདྲེས་སུ་འབད་ནས་ཐུན་བསྡུ་བ་ན། སྐྱབས་ཡུལ་རྣམས་ཀྱི་སྐུ་ལས་འོད་ཟེར་འཕྲོས། རང་གཞན་སེམས་ཅན་ཐམས་ཅད་ལ་རེག་པས་སྡིག་སྒྲིབ་ཐམས་ཅད་སྦྱང་། དེ་ཐམས་ཅད་བྱ་བརྒྱ་འུར་རྡོ་གཅིག་གིས་བདས་པ་བཞིན། འོད་ཟེར་དང་འགྲོགས་ཏེ་དག་པའི་ཞིང་ཁམས་དེ་རྣམས་སུ་སོང་། སྐྱབས་ཡུལ་རྣམས་རིམ་བཞིན་འོད་དུ་ཞུ་ནས་རང་ལ་བསྟིམ་སྟེ་མི་དམིགས་
པའི་ངང་ལ་མཉམ་པར་བཞག་ཅིང་། མཐར་དགེ་བ་འདི་ཡི་སྐྱེ་བོ་ཀུན༔ ཞེས་སོགས་ཀྱི་བསྔོ་བ་བྱ། ཉལ་བའི་ཚེ་དམིགས་རྟེན་མ་བསྡུས་པར་དེ་ཉིད་ལ་མགོ་བོ་ཕྱོགས་པས་ཉལ་ལ་མོས་གུས་དུང་ངེ་བའི་ངང་ལ་གཉིད་དུ་འགྲོ་བར་བྱ། གཞན་ཡང་སྐྱབས་འགྲོའི་གོ་དོན་དང་ཕན་ཡོན་བསླབ་བྱ་སོགས་ཀྱང་སྤྲོ་ན་ཇི་ལྟར་རིགས་པར་བཤད་དོ། །དྲུག་པ་ཐེག་ཆེན་གྱི་རྩ་བ་བྱང་ཆུབ་མཆོག་ཏུ་སེམས་བསྐྱེད་པའི་ཁྲིད་ནི། གནད་ཐེམས་ལས། སྐྱབས་སོང་དམན་པའི་ལམ་ཉིད་ལས༔ ཞེས་སོགས་ཏེ། དེ་ཡང་ཕྱོགས་བཅུ་གང་ནས་གཞལ་ཡང་ནམ་མཁའ་ལ་མཐའ་མེད་པ་ལྟར། འཇིག་རྟེན་གྱི་ཁམས་ལའང་མཐའ་མེད་དེ་ཐམས་ཅད་སེམས་ཅན་གྱིས་གོ་མཚམས་མེད་པར་ཁྱབ། སེམས་ཅན་དེ་དག་ཐམས་ཅད་ཀྱིས་རང་གི་ཕ་མ་མ་བྱས་པ་གཅིག་ཀྱང་མེད་དེ་ལན་གྲངས་དཔག་ཏུ་མེད་པ་ཞིག་བྱས་ནས་ཕན་བདེ་ཚད་མེད་པ་བསྒྲུབས། གནོད་པ་ཚད་མེད་པ་ལས་སྐྱོབ་པའི་དྲིན་ཅན་ཤ་སྟག་ཡིན། འདི་ཐམས་ཅད་ཀྱང་འདོད་པ་བདེ་བ་འདོད་ཀྱང་རྨོངས་ཤིང་ཐབས་ལ་མི་མཁས་པར་སྒྲུབ་པ་སྡུག་བསྔལ་ཁོ་ནའི་རྒྱུ་སྒྲུབ། ལག་ལེན་དང་ཞེ་འདོད་ཕྱིན་ཅི་ལོག་ཏུ་གྱུར་པའི་སྨྱོན་པ་ལྟ་བུའི་འདི་རྣམས་སྙིང་རེ་རྗེ་སྙམ་དུ་རྐང་དང་སྙིང་གས་གས་ཙམ་དུ་སྙིང་རྗེ་བསྐལ་ཆེན་གྱི་མེར་འབར་བ་ལྟར་བསྐྱེད། འོ་ན་སྙིང་རྗེ་ཟེར་ནས་བཞག་པས་ཅི་ལ་ཕན། འདི་རྣམས་འཁོར་བའི་སྡུག་བསྔལ་ལས་དྲངས་ཏེ། ཐར་པའི་མཆོག་བླ་ན་མེད་པ་རྣམ་གྲོལ་གཏན་གྱི་བདེ་བ་ལ་འགོད་པར་བྱ། དེའི་ནུས་པ་ད་ལྟ་བདག་ལ་མི་འདུག་པས་འགྲོ་ཀུན་སྒྲོལ་ནུས་པ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཚེ་འདི་ཉིད་ལ་ཅི་ནས་ཀྱང་ཐོབ་པར་བྱ། དེའི་ཆེད་དུ་ཟབ་ལམ་རྡོ་རྗེ་གསུམ་གྱི་རྣལ་འབྱོར་ཉམས་སུ་བླངས་སྙམ་པའི་འདུན་པ་སྐམ་སྐམ་པ་བསྐྱེད་ནས། ངག་ཏུ། བརྒལ་དཀའ་སྲིད་པའི་རྒྱ་མཚོ་ལས༔ དམ་པ་བདག་གིས་བསྐྱེད་པར་བགྱི༔ ཞེས་པའི་བར་བརྒྱ་སྟོང་ལ་སོགས་པ་སྙིང་ཐག་པ་ནས་སེམས་རྒྱུད་དང་ཅི་འདྲེས་སུ་གཏོང་། གཞན་ཡང་དབུགས་འབྱིན་འཇུག་དང་སྦྱར་ནས། སེམས་ཅན་ཐམས་ཅད་ཀྱི་སྡིག་པ་དང་སྡུག་བསྔལ་ཐམས་ཅད་བདག་ལ་སྨིན་པར་གྱུར་ཅིག །བདག་གི་དགེ་བ་དང་
བདེ་བ་ཐམས་ཅད་སེམས་ཅན་རྣམས་ཀྱིས་ཐོབ་ནས་རྒྱུད་ལ་སྨིན་པར་གྱུར་ཅིག་བསམ་ནས་བདེ་སྡུག་གི་གཏོང་ལེན་ཅི་ནུས་སུ་བྱས་མཐར། སེམས་བསྐྱེད་པའི་ཡུལ་སེམས་ཅན། སྐྱེད་པ་པོ་གང་ཟག་རང་ཉིད། སྐྱེད་བྱེད་ཀྱི་ཀུན་སློང་གསུམ་ཀ་མི་དམིགས་པ་འཁོར་གསུམ་རྣམ་པར་མི་རྟོག་པའི་ངང་ལ་ཅི་གནས་སུ་འཇོག་ཅིང་། རྗེས་སུ། བྱང་ཆུབ་སེམས་མཆོག་རིན་པོ་ཆེ༑ ༑མ་སྐྱེས་པ་རྣམས་སོགས་ཀྱིས་བསྔོ་སྨོན་བྱའོ། །གཉིས་པ་ཐུན་མོང་མ་ཡིན་པའི་སྔོན་འགྲོ་ལ་གསུམ་སྟེ། སྡིག་སྒྲིབ་སྦྱོང་བར་བྱེད་པ་རྡོ་རྗེ་སེམས་དཔའི་བསྒོམ་བཟླས། ཚོགས་གཉིས་རྫོགས་པར་བྱེད་པ་མནྜལ། བྱིན་རླབས་མྱུར་དུ་འཇུག་པ་བླ་མའི་རྣལ་འབྱོར་རོ། །དང་པོ་སྡིག་སྒྲིབ་སྦྱོང་བར་རྡོར་སེམས་བསྒོམ་བཟླས་ཀྱི་ཁྲིད་ནི། གནད་ཐེམས་ལས། སྡིག་སྦྱང་ཕྱིར་དུ་ལྷག་པའི་ལྷ༔ རྡོ་རྗེ་སེམས་དཔའི་བསྒོམ་བཟླས་བྱ༔ ཞེས་སོགས་ཏེ། དེ་ཡང་ཟབ་མོ་ལམ་གྱི་ཉམས་རྟོགས་ཁྱད་པར་ཅན་སྐྱེ་བའི་བགེགས་དང་བར་གཅོད་ནི་སྡིག་སྒྲིབ་ཡིན་པས་དེ་སྦྱོང་དགོས། དེ་སྦྱོང་བའི་མཆོག་ནི་རྡོ་རྗེ་སེམས་དཔའི་སྒོམ་བཟླས་ཉིད་གཙོ་བོར་གསུངས་པས། དེ་ཡང་བྱང་ཆུབ་ཀྱི་སེམས་སྔར་བཞིན་དྲན་འདུན་གྱི་ངང་ནས། རང་གི་སྤྱི་བོར་པད་ཟླའི་སྟེང་དུ་ཧཱུཾ་ཡིག་དཀར་པོ་གསལ་འཚེར་འོད་ཟེར་འཕྲོ་བ་ལས་དོན་གཉིས་བྱས་ཚུར་འདུས་ཡོངས་སུ་གྱུར་པ་ལས་བླ་མ་དང་གཉིས་སུ་མེད་པའི་དཔལ་རྡོ་རྗེ་སེམས་དཔའ་སྐུ་མདོག་དུང་ལྟར་དཀར་བ། ནོར་བུ་ཆུ་ཤེལ་ལྟར་དྭངས་ཤིང་འཚེར་བ། ཞལ་གཅིག་ཕྱག་གཉིས་པ་ཞི་ཞིང་འཛུམ་པའི་ངང་ཚུལ་ཅན། ཕྱག་གཡས་རྡོ་རྗེ་ཐུགས་ཀར་འཛིན་ཞིང་། གཡོན་དྲིལ་བུ་དཀུར་བརྟེན་པ། ཡུམ་རྡོ་རྗེ་སྙེ་མ་དཀར་མོ་གྲི་ཐོད་འཛིན་པ་དང་སྙོམས་པར་འཇུག་པ། གཉིས་ཀའང་མཚན་དང་དཔེ་བྱད་ཐམས་ཅད་རྫོགས་ཤིང་རྒྱན་ཆས་བཅུ་གསུམ་གྱིས་སྤྲས་པ། བདེ་སྟོང་གཉིས་སུ་མེད་པའི་ངོ་བོར་བཞུགས་པའི་ཡབ་ཀྱི་ཐུགས་ཀར་ཟླ་བའི་གདན་ལ་རྡོ་རྗེ་དཀར་པོ་རྩེ་ལྔ་པའི་ལྟེ་བར་ཧཱུཾ་ཡིག་དཀར་པོ་རྟག་ཏུ་འཆར་ཞིང་གསལ་བའི་མཐའ་སྐོར་དུ་ཡི་གེ་བརྒྱ་པའི་སྔགས་ཕྲེང་དངུལ་ཆུའི་མདོག་ལྟ་བུས་གཡས་སུ་བསྐོར་བར་བསམ་ལ། དེ་བླ་མ་རྡོ་རྗེ་སེམས་དཔའ་
ཉིད་དཀོན་མཆོག་ཀུན་འདུས་ཀྱི་ངོ་བོར་སྐྱབས་ཡུལ་དུ་བཟུང་བ་རྟེན་གྱི་སྟོབས་དང་། སྔར་བྱས་ཀྱི་སྡིག་ལྟུང་མི་དགེ་བའི་ལས་ཐམས་ཅད་ཁོང་པར་སོང་བའི་དུག་བཞིན་གནོངས་འགྱོད་བྱེད་པ་སུན་འབྱིན་པའི་སྟོབས། ཕྱིན་ཆད་འཆི་བ་སྲོག་ལ་བབས་ཀྱང་མི་དགེ་བ་མི་བགྱིད་སྙམ་པའི་སྡོམ་སེམས་བྱེད་པ་ཉེས་པ་ལས་ལྡོག་པའི་སྟོབས། སྔར་བྱས་ཀྱི་ཉེས་ལྟུང་གི་གཉེན་པོར་རྡོ་རྗེ་སེམས་དཔའི་སྒོམ་བཟླས་བྱེད་པ་གཉེན་པོ་ཀུན་ཏུ་སྤྱོད་པའི་སྟོབས་ཏེ། དེ་ལྟར་སྟོབས་བཞི་ཚང་བའི་སྒོ་ནས་སྤྱི་བོའི་བླ་མ་རྡོ་རྗེ་སེམས་དཔའི་ཉིད་དུས་གསུམ་སངས་རྒྱས་ཐམས་ཅད་འདུས་པའི་ངོ་བོར་བལྟས་ལ། མོས་གུས་ཚད་མེད་པས་མཆི་མ་འཁྲུག་པ་ཙམ་དུ་བསྐྱེད་ནས་ཐུགས་ཀའི་ས་བོན་དང་སྔགས་འཕྲེང་ལ་དམིགས་པ་གཏད་དེ། བླ་མ་རྡོ་རྗེ་སེམས་དཔའ་མཁྱེན་སྙམ་པའི་ངང་ནས་ཡིག་བརྒྱ་གསོལ་འདེབས་ཀྱི་ཚུལ་དུ། ༀ་བཛྲ་སཏྭ་ས་མཱ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་ཝ། སུ་ཏོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོཥྱོ་མེ་བྷ་ཝ། སརྦ་སིདྡྷི་མེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲི་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོཿ བྷ་ག་ཝན་སརྦ་ཏ་ཐཱ་ག་ཏ། བཛྲ་མཱ་མེ་མུཉྩ། བཛྲིར་བྷ་ཝ་མ་ཧཱ་ས་མ་ཡ་སཏྭ་ཨཱཿ ཞེས་བཟླས་ཐུགས་ཀའི་ཧཱུཾ་ཡིག་སྔགས་ཕྲེང་དང་བཅས་པ་ལ་ཡེ་ཤེས་ཀྱི་བདུད་རྩི་འོ་མའི་རྒྱུན་ལྟར་སྐྱ་ཆིལ་ཆིལ་བབས་པ་སྐུའི་དབྱིབས་བརྒྱུད་སྦྱོར་མཚམས་སམ། མཐེབ་སོར་གྱི་རྩེ་ལས་བྱུང་བར་རང་གི་ཚངས་བུག་ནས་ཞུགས་པས་ཕུ་ཆུ་དྲག་པོས་སོལ་བ་བདས་པ་བཞིན་ནད་གདོན་སྡིག་སྡུག་ཐམས་ཅད་རྣག་ཁྲག་དང་། སྲོག་ཆགས་ཕྲ་མོ་དང་། དུད་ཁུ་ལ་སོགས་པའི་རྣམ་པར་དབང་པོའི་སྒོ་དང་། ཁྱད་པར་གཤང་ལམ་ཆུ་ལམ་དང་། བ་སྤུའི་བུ་ག་ཐམས་ཅད་ནས་ཉིལ་ཉིལ་ཕྱིར་འཐོན་པར་བསམ་ལ། སྔགས་བརྒྱ་སྟོང་ལ་སོགས་པ་ཅི་ནུས་བཟླས་པས། རང་ལུས་ཤེལ་སྒོང་འཕྱིས་པ་ལྟར་སྐྱ་སང་སང་སོང་བ་འོད་ཀྱི་རང་བཞིན་ཅན་དུ་གྱུར་པའི་མཐར། མགོན་པོ་བདག་ནི་མི་ཤེས་རྨོངས་པ་ཡིས༔ དམ་ཚིག་ལས་ནི་འགལ་ཞིང་ཉམས༔ བླ་མ་མགོན་པོས་སྐྱབས་མཛོད་ཅིག༔ གཙོ་བོ་རྡོ་རྗེ་འཛིན་པ་སྟེ༔ ཐུགས་རྗེ་ཆེན་པོའི་བདག་ཉིད་ཅན༔ འགྲོ་བའི་དོན་ལ་བདག་སྐྱབས་མཆི༔ སྐུ་གསུང་ཐུགས་རྩ་བ་དང་ཡན་ལག་གི་
དམ་ཚིག་ཉམས་ཆག་ཐམས་ཅད་མཐོལ་ཞིང་བཤགས་སོ། །སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་སྦྱང་ཞིང་དག་པར་མཛད་དུ་གསོལ། ཞེས་གསོལ་བ་བཏབ་པས་རང་ལུས་དྲི་མ་མེད་པའི་ཤེལ་སྒོང་ལྟར་གྱུར་པའི་ཆ་ཐམས་ཅད་དུ་བདུད་རྩི་དེས་སྐྱ་མེར་གྱིས་ཁེངས། ལུས་སེམས་ལ་ཟག་མེད་ཀྱི་བདེ་བས་ཁྱབ་པ་ལ་རྡོ་རྗེ་སེམས་དཔའི་ཐུགས་དགྱེས་པ་ཆེན་པོས་ཞལ་འཛུམ་མཛད་དེ། རིགས་ཀྱི་བུ་ཁྱོད་ཀྱི་སྡིག་སྒྲིབ་ཉེས་ལྟུང་ཐམས་ཅད་དག་པ་ཡིན་ནོ། །ཞེས་གནང་བ་སྦྱིན་ནས་ཡབ་ཡུམ་དགྱེས་པ་ཆེན་པོས་འོད་དུ་ཞུ་ནས་རང་ལ་བསྟིམ་སྟེ༑ འཁོར་གསུམ་ཡོངས་དག་བརྗོད་བྲལ་བདེ་བ་ཆེན་པོའི་ངང་ལ་ལྷོད་ཀྱིས་གློད་ལ་ཅི་གནས་མཉམ་པར་བཞག་ཅིང་། དེ་ལས་དྲི་མ་སྦྱང་པའི་གཞི། སྦྱང་བྱའི་དྲི་མ། སྦྱོང་བྱེད་ཀྱི་ཐབས་ལམ་ཉིད་ཀྱང་འཁོར་གསུམ་རྣམ་པར་མི་རྟོག་པའི་ཤེས་རབ་ཆེན་པོས་རྒྱས་བཏབ་སྟེ་རྩིས་ཟིན་པ་ནི་སྡིག་སྦྱོང་གི་མཆོག་ཡིན་ནོ། །མཐར་དགེ་བ་འདི་ཡིས་མྱུར་དུ་བདག ། རྡོ་རྗེ་སེམས་དཔའ་འགྲུབ་གྱུར་ནས་སོགས་དགེ་བ་བསྔོ། འདི་ཉིད་སྡིག་སྒྲིབ་དག་པའི་རྟགས་མ་བྱུང་གི་བར་སེམས་རྩེ་གཅིག་ཏུ་ནན་གྱིས་བཟླ་དགོས་ཏེ། སློབ་དཔོན་ཆེན་པོས། གཞན་དུ་ཡེངས་པར་གྱུར་ན་ནི༔ བསྐལ་པར་བཟླས་ཀྱང་འབྲས་མི་འབྱིན༔ ཞེས་གསུངས་པས་དམིགས་པ་བཅུན་ལ་མ་ཡེངས་པ་གལ་ཆེའོ། །སྐབས་འདི་དག་ཏུ་སྤྲོ་ན། སྡིག་སྒྲིབ་དག་པའི་རྟགས་དང་ཕན་ཡོན་ཉེས་དམིགས་སྟོབས་བཞིའི་གོ་དོན་སོགས་ཀྱང་བཤད་པར་བྱའོ། །གཉིས་པ་ཚོགས་གཉིས་རྫོགས་པར་བྱེད་པ་མཎྜལ་གྱི་ཁྲིད་ནི། གནད་ཐེམས་ལས། ཚོགས་ཞིང་སྐྱབས་ཡུལ་བཞིན་དུ་བསྒོམ༔ དངོས་སུ་འབྱོར་དང་ཞེས་སོགས་ཏེ། དེ་ཡང་ལམ་ཟབ་མོའི་ལམ་གྱི་མཐུན་རྐྱེན་བསོད་ནམས་དང་ཡེ་ཤེས་ཀྱི་ཚོགས་གཉིས་སྟོབས་སུ་བྱ་བའི་ཐབས་མཆོག་རྨད་དུ་བྱུང་བ་ནི་མཎྜལ་ཉིད་དུ་བསགས་པས། མདུན་གྱི་ནམ་མཁར་བླ་མ་ཡི་དམ་སངས་རྒྱས་ཆོས་དང་དགེ་འདུན་མཁའ་འགྲོ་ཆོས་སྐྱོང་རྣམས་སྐྱབས་ཡུལ་གྱི་སྐབས་ལྟར་གསལ་ཏེ་ཚོགས་ཞིང་ཁྱད་པར་ཅན་དེ་རྣམས་ཀྱི་སྤྱན་ལམ་དུ། ལུས་ཀྱི་ལས་སུ་རིན་པོ་ཆེ་ལ་སོགས་པའི་མཎྜལ་ལེགས་པར་འཕྱིས་ལ། དྲི་བཟང་དང་བ་བྱུང་གིས་ཆུས་
བྱུགས། མེ་ཏོག་ཚོམ་བུ་སོ་བདུན་ནམ། བདུན་ལ་སོགས་པ་བཀོད་ཅིང་ཁ་གསོ། ཡིད་ཀྱི་ལས་སུ་དབང་ཆེན་གསེར་གྱི་ས་གཞི་ལ་བརྟེན་པའི་རི་རབ་གླིང་བཞི་གླིང་ཕྲན་བརྒྱད་གསེར་རི་དང་རོལ་མཚོ་བདུན་ལྕགས་རི་མུ་ཁྱུད། སྟེང་དུ་ཉི་ཟླ་གཟའ་སྐར་སོགས་སྲིད་རྩེ་མན་ཆད་ཁམས་གསུམ་ཡོངས་སུ་རྫོགས་པའི་འཇིག་རྟེན་གྱི་ཁམས་འདི་ལྷ་མིའི་ལོངས་སྤྱོད་ཕུན་སུམ་ཚོགས་པ་མ་ཚང་བ་མེད་པས་ཡོངས་སུ་གང་བར་དམིགས་ཏེ་འབུལ་བ་ཕྱིའི་མཎྜལ། རང་གིས་ཡོངས་སུ་བཟུང་བའི་བུ་དང་ཆུང་མ་འཁོར་དང་ལོངས་སྤྱོད་སོགས་གཅེས་དགུ་མ་ལུས་པ་གཅིག་ཏུ་བསྡུས་ནས་ལྟོས་མེད་དུ་འབུལ་བ་ནང་གི་མཎྜལ། རང་གི་ལུས་འདི་ཉིད་ཡིད་བཞིན་ནོར་བུ་ལྟ་བུ་དགོས་འདོད་མ་ལུས་པ་འབྱུང་བའི་གནས་གཅིག་པུར་གྱུར་པར་དམིགས་ཏེ་ཞེན་འཛིན་མེད་པར་འབུལ་བ་ནི་གསང་བའི་མཎྜལ་ཏེ། དེ་ཐམས་ཅད་ཕྲུགས་གཅིག་ཏུ་འཁོར་གསུམ་ཡོངས་དག་བདེ་བ་ཆེན་པོའི་ངང་ལས་མི་འདའ་བའི་ཤེས་རབ་ཀྱིས་ཟིན་པར་བྱས་ལ། ངག་ཏུ། ཆོས་དབྱིངས་རང་བྱུང་རིག་པའི་རྩལ༔ ཕྱི་ནང་སྣོད་བཅུད་སྣང་སྲིད་ཆོས༔ ཁྱབ་བརྡལ་ཞིང་ཁམས་མཆོད་སྤྲིན་བཅས༔ འཁོར་གསུམ་ཡོང་དག་ཉིད་དུ་འབུལ༔ སརྦ་པུ་ཛ་ར་མ་དྷ་ལ་ཧཱུཾ༔ ཞེས་བརྒྱ་སྟོང་ལ་སོགས་པ་ཅི་ནུས་སུ་ལུས་ངག་ཡིད་གསུམ་ཕྲུགས་གཅིག་གིས་སྙིང་ཐག་པ་ནས་ཕུལ། མྱུར་དུ་སངས་རྒྱས་ཐོབ་པ་དང་ཉམས་རྟོགས་ཁྱད་པར་ཅན་སྐྱེ་བར་གསོལ་བ་གདབ། མཐར་ཚོགས་ཞིང་མཆོད་རྫས་དང་བཅས་པ་འོད་དུ་ཞུ་ནས་རང་ལ་བསྟིམ་སྟེ་འཁོར་གསུམ་རྣམ་པར་མི་རྟོག་པའི་སྤྲོས་བྲལ་བདེ་བ་ཆེན་པོའི་ཀློང་དུ་ཅི་གནས་སུ་མཉམ་པར་བཞག་པར་བྱ། དེ་ནས་དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ཞེས་སོགས་ཀྱིས་དགེ་བ་བསྔོ་ཞིང་ཐུན་མཚམས་རྣམས་སུ་ཡང་ཕྱག་མཆོད་སོགས་སྒོ་དུ་མ་ནས་བསོད་ནམས་ཀྱི་ཚོགས་མཚན་མ་མ་བྱུང་གི་བར་བསག སྤྲོ་ན་སྣོད་བཅུད་ཀྱི་བཀོད་པ་དང་། མཎྜལ་གྱི་ཕན་ཡོན་མཚན་མ་གང་བྱུང་གི་བཤད་པའང་སྐབས་ཐོབ་ཀྱིས་བཤད་དོ། །གསུམ་པ་བྱིན་རླབས་མྱུར་དུ་འཇུག་པ་བླ་མའི་རྣལ་འབྱོར་གྱི་ཁྲིད་ནི། གནད་ཐེམས་
ལས། སྐྱབས་ཀུན་སྙིང་པོ་བླ་མ་ཡི༔ རྣལ་འབྱོར་ལམ་ལ་འཇུག་པར་བྱ༔ ཞེས་སོགས་དང་། འདི་ཉིད་ལས། བདེ་བའི་སྟན་ལ་འདུག་ནས་ལུས་དྲང་པོར་བསྲང༔ སེམས་རྣལ་དུ་ཕབ༔ སྤྱི་བོར་བླ་མ་རྡོ་རྗེ་ཆོས་སུ་སྒོམ་པ་ལ་ཞེས་སོགས་ཏེ། དེ་ཡང་ཟབ་མོའི་ལམ་འདིའི་རྟེན་འབྲེལ་གྱི་གནད་ཐམས་ཅད་འདི་ནས་བསྒྲིག་དགོས་པའི་ཕྱིར། དེའི་སླད་དུ་གསོལ་བ་གདབ་པ་དང་། དབང་བཞི་བླང་བ་གཉིས་ལས། དང་པོ་གསོལ་བ་གདབ་པའི་སླད་དུ། བསམ་གཏན་ལ་ཚེར་མ་མི་འབྱུང་ཞིང་ཡིད་དང་མཐུན་པའི་གནས་དབེན་པར། རང་གནས་དག་པའི་ཞིང་ཁམས་རྒྱ་ཁྱོན་ཚད་མེད་པར་གསལ་བའི་རང་ཉིད་སྟན་བདེ་བར་ལུས་གནད་དྲང་པོར་བསྲང་། སེམས་ཀྱི་གནད་དུག་གསུམ་གང་རུང་གིས་ཀུན་ནས་མ་བསླད་པ་རྣལ་དུ་ཕབ་པའི་ངང་ནས། རང་གི་མདུན་གྱི་ནམ་མཁར་ཡེ་ཤེས་ལྔའི་རང་གདངས་འོད་ལྔའི་འཁྲིགས་པའི་ཀློང་ན་སེང་ཁྲི་པདྨ་ཉི་ཟླའི་གདན་ལ་དྲིན་ཅན་རྩ་བའི་བླ་མ་རྣམ་པ་རྡོ་རྗེ་འཆང་སྐུ་མདོག་དམར་པོ་སྐྱབས་ཡུལ་ལྟར་རམ། ཡང་ན་རྡོ་རྗེ་ཆོས་ཧེ་རུ་ཀ་སྐུ་མདོག་དཀར་ལ་དམར་བའི་མདངས་ཅན། ཞལ་གཅིག་ཕྱག་གཉིས་སྤྱན་གསུམ་ཅུང་ཟད་འཛུམ་ཁྲོ་ཆགས་ཉམས་རྒྱས་པའི་ཚུལ་ཅན། ཕྱག་གཡས་རྡོ་རྗེ་ཐུགས་ཀ་དང་། གཡོན་པ་དྲིལ་བུ་དཀུར་བརྟེན་པའི་མཆན་དུ་ཁ་ཊྭཱཾ་ག་བསྣམས་པ། གཅེར་བུ་རུས་པའི་ཐོར་ཚུགས་བཅིངས་པ་ཐོད་སྐམ་ལྔའི་བརྩེ་ཕན་དང་། རུས་པའི་ཕྱག་རྒྱ་དྲུག་གིས་བརྒྱན་པ། སྐུ་སྨད་ལ་སྟག་ལྤགས་དཀྲིས་པ་ཞབས་གཉིས་གཡས་ཅུང་ཟད་བརྐྱང་པའི་རོལ་བའི་སྟབས་ཅན། སྐུ་ལ་མཚན་བཟང་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་སྤྲས་པ། གསུང་ཡན་ལག་དྲུག་ཅུའི་ཆོས་སྒྲ་སྒྲོག་པ། ཐུགས་ཏིང་ངེ་འཛིན་གྱི་སྒོ་བརྒྱ་ཕྲག་དུ་མ་ལ་སྙོམས་པར་འཇུག་པ། སྐུ་ལས་མུ་མེད་པའི་འོད་ཟེར་མཁའ་ཁྱབ་ཏུ་སྤྲོ་ཞིང་། བདེ་སྟོང་གཉིས་སུ་མེད་པའི་ཡེ་ཤེས་སྒྱུ་མའི་སྐུ་ཅན་སངས་རྒྱས་ཐམས་ཅད་འདུས་པའི་ངོ་བོར་རང་ལ་དགྱེས་ཤིང་བརྩེ་བའི་རྣམ་པར་ལྷམ་མེར་བཞུགས་པའི་མཐའ་སྐོར་དུ་བརྒྱུད་པའི་བླ་མ་རྣམས་དང་ཡི་དམ་སངས་རྒྱས་བྱང་སེམས་ཉན་རང་འཕགས་པ། མཁའ་འགྲོ་ཆོས་སྐྱོང་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་མ་ལུས་ཤིང་ལུས་པ་
མེད་པ་ཐམས་ཅད་མངོན་སུམ་ལྟ་བུར་བཀྲ་ལམ་གྱིས་བཞུགས་པར་བསམ་མོ། །དེ་ཡང་སློབ་དཔོན་ཆེན་པོས། བླ་མ་བདེ་གཤེགས་འདུས་པའི་སྐུ༔ དཀོན་མཆོག་གསུམ་གྱི་རང་བཞིན་ལ༔ ཞེས་དང་། སྡོམ་འབྱུང་ལས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཉིད། །ཅེས་གསུང་པ་ལྟར། བླ་མ་ནི་ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་འདུས་པའི་ངོ་བོ། སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཀུན་འདུས་ཀྱི་རང་བཞིན་ཅན་ཡིན་པར་མ་ཟད། རང་གི་སྣང་ངོར་སངས་རྒྱས་ཀུན་ལས་ཀྱང་ལྷག་ཅིང་བཀའ་དྲིན་ཆེ་སྙམ་དུ་བློ་སྣ་མོས་གུས་སུ་ཧྲིལ་གྱིས་དྲིལ་ནས་ལུས་ཞིང་གི་རྡུལ་སྙེད་ལྟར་སྤྲུལ་ནས་སེམས་ཅན་ཐམས་ཅད་དང་ལྷན་ཅིག་ཏུ་ཕྱག་འཚལ་བ། མཆོད་སྤྲིན་མཐའ་ཡས་པར་སྤྲོས་ཏེ་འབུལ་བ། ཉེས་བྱས་མཐའ་དག་ལ་དུག་འཐུང་བ་ལྟ་བུའི་འགྱོད་སྡོམ་གྱིས་མཐོལ་བཤགས། རྨད་དུ་བྱུང་བའི་མཛད་པ་ལ་རྗེས་སུ་ཡི་རང་བ། གཟུགས་སྐུ་མྱ་ངན་ལས་མི་འདའ་བར་གསོལ་བ་འདེབས་པ། ཆོས་ཀྱི་འཁོར་ལོ་བསྐོར་བར་བསྐུལ་བ། འདིས་མཚོན་བདག་གཞན་གྱི་དགེ་བ་བླ་མེད་བྱང་ཆུབ་ཏུ་བསྔོ་བ་སྟེ། བདུན་རྣམ་དག་གི་དོན་བསམ་བཞིན་དུ། ངག་ཏུ། སྲས་བཅས་རྒྱལ་བ་འཁོར་བཅས་ལ༔ གུས་པས་བཏུད་དེ་ཕྱག་འཚལ་ལོ༔ ཕྱི་ནང་གསང་བ་བླ་མེད་པའི༔ མཆོད་པ་ཀུན་གྱི་ཡང་དག་མཆོད༔ ཚེ་རབས་ཐོག་མེད་ནས་བྱས་པའི༔ སྡིག་པའི་ལས་རྣམས་མཐོལ་ཞིང་བཤགས༔ སེམས་ཅན་ཀུན་ལ་ཕན་མཛད་པའི༔ དགེ་བ་ཀུན་ལ་ཡི་རང་ངོ༔ སངས་རྒྱས་མྱ་ངན་འདའ་བཞེད་གང༔ བསྐལ་པ་རྒྱ་མཚོར་བཞུགས་སུ་གསོལ༔ གདུལ་བྱའི་བསམ་པ་ཇི་བཞིན་དུ༔ ཆོས་ཀྱི་འཁོར་ལོ་བསྐོར་བར་བསྐུལ༔ བསོད་ནམས་གང་ཞིག་བགྱིས་པ་རྣམས༔ ཐམས་ཅད་བྱང་ཆུབ་ཆེན་པོར་བསྔོ༔ ཞེས་ཅི་ནུས་བརྗོད། དེ་ནས་རྗེ་བཙུན་ཆེན་པོས། བླ་མ་ལ་གདུང་བ་བསྐྱེད་ཙ་ན། །ཉམས་དང་བྱིན་རླབས་སྐྱེ་བར་ངེས། །ཞེས་གསུངས་པ་ལྟར། བླ་མ་སྐྱབས་ཀུན་འདུས་པའི་ངོ་བོ་ངེས་ཤེས་བསྐྱེད་ལ་སྐྱོན་རྟོག་གི་བློ་ངན་སྤངས་ཏེ་བཀའ་རྗེས་སུ་དྲན་པས་བློ་སྣ་མོས་གུས་སུ་ཧྲིལ་ཏེ་རེ་ལྟོས་ལིང་སྐྱུར་གྱིས་ངག་ཏུ། སྐྱེ་མེད་སྤྲོས་བྲལ་ཆོས་དབྱིངས་ཕོ་བྲང་དུ༔ རང་
བཞིན་རྣམ་དག་གདོད་མའི་མགོན་པོ་མཆོག༔ ཀུན་བཟང་ཆོས་སྐུ་སྣང་བ་མཐའ་ཡས་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ གསལ་མདངས་འགག་མེད་རྡོ་རྗེ་དབྱིངས་ཀྱི་ཞིང༔ ལྷུན་འགྲུབ་འོད་གསལ་བདེ་ཆེན་སྒྱུ་མའི་སྐུ༔ ལོངས་སྤྱོད་རྫོགས་སྐུ་ཐུགས་རྗེ་ཆེན་པོ་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ གང་འདུལ་དེར་སྣང་ཐུགས་རྗེའི་ཕོ་བྲང་དུ༔ མ་འགགས་རང་ཤར་འགྲོ་འདུལ་སྤྲུལ་བའི་སྐུ༔ ཨོ་རྒྱན་སློབ་དཔོན་པདྨ་འབྱུང་གནས་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ ཐུགས་རྗེ་འགྲོ་བ་འདུལ་བའི་ཕོ་བྲང་དུ༔ ཇི་ལྟ་ཇི་སྙེད་ཆོས་ཀུན་མཁྱེན་ཅིང་གཟིགས༔ སྒྲ་བསྒྱུར་ལོ་ཆེན་བཻ་རོ་ཙ་ན་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ ཟག་མེད་བདེ་ཆེན་རྡོ་རྗེ་ཕོ་བྲང་དུ༔ མཆོག་གི་ས་བརྙེས་མཁར་ཆེན་མཚོ་རྒྱལ་དང༔ མངའ་བདག་ཚངས་པ་ལྷ་ཡི་མེ་ཏོག་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ གསང་ཆེན་སྨིན་གྲོལ་ཆོས་ཀྱི་ཕོ་བྲང་དུ༔ ཟབ་མོའི་ལམ་ལ་སྐལ་ལྡན་འདྲེན་མཛད་པ༔ རིག་འཛིན་བླ་མ་འགྱུར་མེད་རྡོ་རྗེ་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ འཇིགས་བྲལ་ཆོས་དབྱིངས་རྡོ་རྗེའི་ཕོ་བྲང་དུ༔ ཤེས་བྱ་ཀུན་གཟིགས་བཀའ་བབས་ཆོས་ཀྱི་བདག༔ རྒྱལ་སྲས་པདྨ་འགྱུར་མེད་རྒྱ་མཚོ་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ འབྲལ་མེད་བདེ་ཆེན་འཁོར་ལོའི་གཞལ་ཡས་སུ། །མཆོག་གི་ལམ་བཟང་སྟོན་མཛད་བཀའ་དྲིན་ཅན། །རྫོགས་ཆེན་རྣལ་འབྱོར་ཤེས་རབ་སྒྲོལ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་ཅི་ནུས་ཀྱི་རིག་པ་འགྱུར་མ་ཐུབ་ཀྱི་བར་དུ་གསོལ་བ་དྲག་ཏུ་བཏབ། གཉིས་པ་དབང་བཞི་ལེན་པ་ནི། བླ་མའི་སྐུའི་སྤྱི་བོར་ༀ་ཡིག་དཀར་པོ། མགྲིན་པར་ཨཱཿཡིག་དམར་པོ། ཐུགས་ཀར་ཧཱུཾ་ཡིག་སྔོན་པོ་རྣམས་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་ངོ་བོར་བསམ་ལ། ངག་ཏུ། ཞེས་པས་གསོལ་བཏབ་བླ་མ་ཡི༔ གནས་གསུམ་འབྲུ་གསུམ་གནས་པ་ཡི༔ དཀར་དམར་སྔོ་བའི་འོད་ཟེར་འཕྲོས༔ བདག་གི་གནས་གསུམ་ཐིམ་པ་ཡི༔ དབང་བཞི་ཐོབ་ནས་སྒྲིབ་བཞི་སྦྱངས༔ སྐུ་བཞི་མངོན་དུ་གྱུར་པའོ༔ ཞེས་པའི་དོན་ལ་གསོལ་
བ་བཏབ་པས་བླ་མ་ཉིད་དགྱེས་ཤིང་འཛུམ་པའི་གནས་གསུམ་གྱི་ཡི་གེ་གསུམ་ལས་འོད་ཟེར་དཀར་དམར་མཐིང་གསུམ་འཕྲོས། རང་གི་གནས་གསུམ་དུ་རིམ་པར་ཞུ་ཞིང་ཐིམ་པས་ལུས་ནང་གི་འཁོར་ལོ་བཞི་གང་། སྒོ་གསུམ་གྱི་དྲི་མ་བག་ཆགས་དང་བཅས་པ་སྦྱངས། དབང་བཞི་རྫོགས་སུ་ཐོབ། སྐུ་བཞིའི་འབྲས་བུ་མངོན་དུ་ཐོབ་པར་བསམས་ཤིང་། སླར་ཡང་མོས་གུས་གདུང་ཤུགས་དྲག་པོས་ཡིད་ཀྱི་གསོལ་བ་བཏབ་པས་བརྒྱུད་པའི་བླ་མ་རྣམས་དང་སངས་རྒྱས་བྱང་ཆུབ་སེམས་དཔའ་སོགས་འཁོར་དུ་བཞུགས་པ་རྣམས་རྩ་བའི་བླ་མའི་སྐུ་ལ་རིམ་གྱིས་བསྡུས༔ དེ་ཉིད་ཤིན་ཏུ་དགྱེས་པ་ཆེན་པོས་རང་གི་སྤྱི་བོར་བྱོན་ནས་འོད་དུ་ཞུ་སྟེ་རང་ལ་ཐིམ་པས་རང་གི་སྒོ་གསུམ་དང་བླ་མའི་རྡོ་རྗེ་གསུམ་དབྱེར་མེད་ཟུང་འཇུག་བདེ་བ་ཆེན་པོའི་ངང་ལ་ཅི་གནས་སུ་མཉམ་པར་འཇོག་ཅིང་། མཐར་སྐྱེ་བ་ཀུན་ཏུ་ཡང་དག་བླ་མ་དང་ཞེས་སོགས་ཀྱི་བསྔོ་བ་བྱ། དེ་ལྟར་བྱིན་རླབས་ཀྱི་རྟོགས་པ་མངོན་དུ་མ་གྱུར་གྱི་བར་དེ་སྲིད་དུ་འབད་པ་ཆེན་པོས་ཉམས་སུ་ལེན་པ་གལ་ཆེ་སྟེ། ཅིའི་ཕྱིར་ཞེ་ན། འདི་ལ་བརྟེན་ནས་བྱིན་རླབས་དངོས་སུ་ཕེབས་པ་དང་། ཉམས་རྟོགས་རང་ཤུགས་ལ་འཆར་ཞིང་བགེགས་དང་གོལ་ས་ཆོད་པ་སོགས་གསང་སྔགས་རྡོ་རྗེ་ཐེག་པའི་ལམ་གྱི་ཡོན་ཏན་སྐྱེ་བའི་གཞི་ཐམས་ཅད་བླ་མ་དམ་པའི་ཐུགས་རྗེ་ཁོ་ན་ལ་རག་ལས་པའི་ཕྱིར་ཏེ། དེ་ཡང་། བསྐལ་པ་སྟོང་གི་སངས་རྒྱས་ཀྱང་། །བླ་མ་དག་ལ་བརྟེན་ནས་བྱུང་། །ཞེས་དང་། ཉི་མའི་དཀྱིལ་འཁོར་རབ་ཚ་ཡང་། །མེ་ཤེལ་མེད་པར་མེ་མི་འབྱུང་། །ཞེས་གསུངས་སོ། །སྐབས་འདིར་སྤྲོ་ན་བླ་མའི་མོས་གུས་ལམ་ཁྱེར་དང་། བསྟེན་ཚུལ་ཉེས་དམིགས་དང་། ཕན་ཡོན་སོགས་ཀྱང་ཟབ་མོའི་ལུང་རིགས་ཀྱི་ངེས་ཤེས་བསྐྱེད་པའི་གོ་དོན་འབྲེལ་ཆགས་སུ་བཤད་པར་བྱའོ། །དེ་དག་རྣམས་སྔོན་འགྲོའི་རིམ་པའོ། །གཉིས་པ་དངོས་གཞི་ལ། དབང་དང་། དེ་ལས་བྱུང་བའི་གདམས་པ་གཉིས། དང་པོ་དབང་ནི་སྔར་འདི་ཉིད་ཀྱི་དཀྱིལ་འཁོར་དུ་དབང་མ་ཐོབ་ན། ལམ་དངོས་སྒོམ་པའི་སྔོན་དུ་དབང་གིས་རྒྱུད་སྨིན་པར་བྱ་དགོས་ཤིང་། སྔར་ཐོབ་ཟིན་ནའང་། སྡོམ་པའི་ངོ་བོ་གསར་
ཐོབ་མེད་ཀྱང་དམ་ཚིག་གསོ་བ་དང་ཡོན་ཏན་ཡར་ལྡན་དུ་བསྐྱེད་པའི་ཕྱིར། སྐབས་འདིར་བླ་མ་ལ་ཞུ་ུབའམ། མ་འབྱོར་ན་སྡོམ་ལྡན་རང་ཉིད་བླངས་ཀྱང་རུང་སྟེ་འགྲུབ་ན་ལེགས་པ་ཡིན་ནོ༑ ༑གཉིས་པ་དངོས་གཞིའི་གདམས་པ་ལ། རྩ་བའི་མན་ངག་གི་རྣལ་འབྱོར་དང་། ཡན་ལག་གི་རྣལ་འབྱོར་གཉིས། དང་པོ་རྩ་བའི་མན་ངག་གི་རྣལ་འབྱོར་ལ་གནས་པ་རྩ་དག་པར་བྱེད་པ་དྷུ་ཏིའི་རྣལ་འབྱོར། གཡོ་བ་རླུང་དག་པར་བྱེད་པ་གཏུམ་མོའི་རྣལ་འབྱོར། བཀོད་པ་བྱང་ཆུབ་ཀྱི་སེམས་དག་པར་བྱེད་པ་བདེ་བའི་རྣལ་འབྱོར་དང་གསུམ། དང་པོ་གནས་པ་རྩ་དག་པར་བྱེད་པ་དྷུ་ཏིའི་རྣལ་འབྱོར་ལ། སྐུ་བསྐྱེད་པ་ལྷ་སྐུའི་རྣལ་འབྱོར། གསུང་བཟླས་པ་རླུང་སྔགས་ཀྱི་རྣལ་འབྱོར། ཐུགས་འོད་གསལ་ཆོས་ཉིད་ཀྱི་རྣལ་འབྱོར་དང་གསུམ། དང་པོ་སྐུ་བསྐྱེད་པ་ལྷ་སྐུའི་རྣལ་འབྱོར་ནི། ནད་ཐེམས་ལས། དངོས་གཞི་ཉམས་དང་རྟོགས་པའི་རྩལ༔ སྐྱེད་བྱེད་མྱུར་བའི་ལམ་གྱི་སྒོ༔ ཞེས་གསུངས་པས། སྔོན་འགྲོ་ནི་དངོས་གཞིའི་ལམ་གྱི་ཉམས་རྟོགས་དང་། ཡོན་ཏན་སྐྱེད་བྱེད་ཀྱི་སྒོ་ཡིན་པས་སྔོན་དུ་རྒྱུད་ལ་མྱོང་བ་ཅི་རིགས་འཐོན་པར་བཏང་ནས། དངོས་གཞི་ཇི་ལྟར་བསྒོམ་པའི་ཚུལ་ནི། འདི་ཉིད་ལས། རང་ཉིད་ལྷ་མོའི་སྐུ་ཆ་བྱད་ཚང་བ་དྭངས་ཤིང་གསལ་ལ་ཞེས་སོགས་ཀྱིས་བསྟན་ཏེ་དབེན་ཞིང་ཡིད་དང་མཐུན་པའི་གནས་སུ། སྟན་བདེ་བ་ལ་ལུས་གནད་ཆོས་བདུན་དྲང་པོར་བསྲང་བ་གལ་ཆེ་སྟེ། དེའི་རྒྱུ་མཚན་ལུས་གྲོང་ཁྱེར་དང་འདྲ། རྩ་ལམ་སྲང་དང་འདྲ། རྣམ་ཤེས་མི་ཞ་བོ་དང་འདྲ་སྟེ། དེ་ལྟར་བྱེད་པ་བཅིངས་པས་སྲང་སྒོ་ཁེགས་ནས་མི་རྟ་ནང་དུ་ཚུད་འགྲོར་མི་ཐུབ་པ་དང་འདྲ་གསུངས། དེ་ཡང་རྐང་པ་རྡོ་རྗེ་སྐྱིལ་ཀྲུང་ལག་གཉིས་ཁུར་ཚུར་མཉམ་བཞག་རྒལ་ཚིགས་དུང་ཙེ་ལྟར་བསྲང་ནས་སྐེད་པ་ཅུང་ཟད་མདུན་དུ་ཉེ་ཙམ་བྱ། ས་ལ་ལྟོ་བ་འཕུལ། རོ་སྟོད་སྒྱེ་ཞིང་དཔུང་པ་རྒོད་གཤོག་ལྟར་བརྐྱང་། མགྲིན་པ་ལྐོག་མས་ཨོལ་འདུད་ནོན་ཙམ་གྱི་ཡིད་ཙམ་རྒུ་བས་ལྕེ་རྩེ་རྐན་ལ་སྒྲིལ། མིག་འབྲས་མི་འགུལ་ཞིང་རྫི་མ་ཐབ་ཐེབ་མེད་པར་ཐད་ཀར་ཅེ་རེ་བལྟ། དེ་ལྟར་ལུས་ཆ་ཆ་ནས་ཧྲིལ་གྱིས་བཅུན་པས་རྩ་རྣམས་འཆིང་། དེ་ལྟར་
རྩ་འཆིང་བའི་སྟོབས་ཀྱིས་རྩ་བའི་རླུང་ལྔ་སོ་སོའི་གནས་སུ་འཆིང་སྟེ། དེ་ཡང་ཐུར་སེལ་གྱི་རླུང་གསང་བར་འཆིང་། མེ་མཉམ་གྱི་རླུང་ལྟེ་བར་འཆིང་། སྲོག་འཛིན་གྱི་རླུང་སྙིང་གར་འཆིང་། གྱེན་རྒྱུའི་རླུང་མགྲིན་པར་འཆིང་། ཁྱབ་བྱེད་ཀྱི་རླུང་པགས་པའི་མཐར་ཐུག་ཏུ་གནས་པ་དེ་འཆིང་། དེ་ལྟར་རྩ་བའི་རླུང་ལྔ་ཟིན་པས་ཡན་ལག་གི་རླུང་རྣམས་རང་ཤུགས་ལ་འཆིང་།དེ་ཡང་རླུང་སེམས་ཐིག་ལེ་རྣམས་ཐུར་ལ་འབུད་པའི་སྐྱོན་སེལ་ཕྱིར་ལྟ་སྟངས་མཐོ་བ་དགའ་གསུངས། སེམས་ཀྱི་གནད་རང་ཐ་མལ་གྱི་ལུས་འདི་ནམ་མཁའ་ལ་འཇའ་ཡལ་བ་ལྟར་སྦྱངས་ཏེ་མི་དམིགས་པ་ལས་སྐད་ཅིག་གིས་པད་ཉི་དང་རོའི་གདན་ལ་རང་ཉིད་གསང་བ་ཡེ་ཤེས་ཀྱི་མཁའ་འགྲོ་མ་སྐུ་མདོག་པདྨ་རཱ་ག་ལྟར་དམར་ཞིང་འོད་ཟེར་འཕྲོ་བ་བཅུ་དྲུག་ལོན་པའི་ན་ཚོད་ཅན་ཞལ་གཅིག་ཕྱག་བཞི། སྤྱན་གསུམ་དང་ལྡན་པ། གཅེར་བུ་སྐྲ་གྲོལ་ཞིང་འཛུམ་ཁྲོ་ཆགས་ཉམས་རྒྱས་པ། ཐོད་སྐམ་ལྔའི་དབུ་རྒྱན་དང་རློན་པ་ལྔ་བཅུ་དང་མེ་ཏོག་དམར་པོའི་དོ་ཤལ་ཅན་རུས་པའི་ཕྱག་རྒྱ་ལྔ་དང་དྲིལ་གཡེར་གྱིས་བརྒྱན་པ། ཕྱག་དང་པོ་གཉིས་གྲི་ཐོད་ཐུགས་ཀར་སྟེང་འོག་ཏུ་འཛིན་ཅིང་། འོག་མ་གཉིས་ཀྱིས་རལ་གྲི་དང་། ཁ་ཊྭཱཾ་ག་བསྣམས་པ། ཞབས་གཉིས་གཡོན་བརྐྱངས་པའི་སྐྱིལ་ཀྲུང་ཕྱེད་པའི་གར་སྟབས་ཅན། དེ་ལྟར་ཕྱིའི་དབྱིབས་ལྷ་སྐུ་འཇའ་ཚོན་ལྟ་བུ་སྣང་ལ་རང་བཞིན་མེད་པ་ཡེ་ཤེས་སྒྱུ་མའི་སྐུ་ཅན། ནང་སྟོང་ར་འོད་ཀྱི་གོང་བུ་ཅན་དྭངས་གསལ་སྒྲིབ་ཐོགས་མེད་པའི་བདེ་སྟོང་ཟུང་འཇུག་གི་ངོ་བོར་གསལ་བཏབ་སྟེ་བསྒོམས་པ་ནི་དམིགས་སྐོར་དང་པོའོ། །དེ་ལྟར་ལྷ་སྐུར་གསལ་བའི་ལུས་ནད་དྭངས་གསལ་སྒྲིབ་ཐོགས་མེད་པའི་དབུས་དྲང་པོར། རྩ་ཨ་ཝ་དྷཱུ་ཏི་དམར་གསལ་ཆུ་ཤིང་གི་སྡོང་པོ་ལྟར་དྲང་བ་ཏིལ་གྱི་མར་མེ་ལྟར་གསལ་ཞིང་རང་འོད་འཕྲོ་བ། རྒྱ་སྐྱེགས་ཀྱི་ཁུ་བས་བཙོས་པ་ལྟར་དམར་བ་པདྨའི་འདབ་མ་ལྟར་ཤིན་ཏུ་སྲབ་ཅིང་དྭངས་བ་སྟེ་མཚན་ཉིད་བཞི་དང་ལྡན་པ། སྦོམ་ཕྲ་མདའ་སྨྱུག་ཙམ་པ་ཡར་སྣེ་ཚངས་བུག་དང་། མར་སྣེ་ལྟེ་འོག་སོར་བཞིའི་ཐད་དུ་གནས་པ། དེའི་གཡས་སུ་རོ་མ་དམར་མོ་རྡུལ་དང་། གཡོན་དུ་རྐྱང་མ་དཀར་པོ་ཁུ་བས་གང་བ་གཉིས་དབུ་མ་ལས་འདབ་འགྱུར་གྱིས་ཕྲ་བ། ཡར་རྩེ་གཉིས་
དགུག་པ་སྨིན་མཚམས་ནས་སྣ་བུག་གི་ནང་གཉིས་སུ་ཟུག་ཅིང་། དེ་གཉིས་དབུ་མ་དང་ལྷན་ཅིག་གསུམ་གཤིབས་སུ་སོང་བའི་མར་སྣེ་གཉིས་དབུ་མ་ལས་ཅུང་ཟད་རིང་བ་ཡར་ལོག་སྟེ་དབུ་མའི་ནང་དུ་ཚུད་ཅིང་། འཁོར་ལོ་བཞི་སོ་སོའི་ཐད་དུ་རོ་རྐྱང་གཉིས་དབུ་མ་ལ་ཐིམ་པའི་ཚུལ་དུ་ནང་ཁོང་འབྲེལ་བ། དེ་ལས་འཁོར་ལོ་བཞིའི་འདབ་མའི་བུ་གུ་རྣམས་དྭངས་སང་ངེ་བའི་རྣམ་པར་སྐྱེས་པ་སྟེ། དེ་ཡང་སྤྱི་བོ་བདེ་ཆེན་གྱི་འཁོར་ལོ་རྩ་འདབ་སོ་གཉིས། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག་པ། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད། ལྟེ་བ་སྤྲུལ་བའི་འཁོར་ལོ་རྩ་འདབ་དྲུག་ཅུ་བཞི་པ། རྩ་འདབ་ཐམས་ཅད་དྭངས་གསལ་སྦུག་སྟོང་གི་རྣམ་པར་བསྒོམ། དེ་ཡང་རོ་རྐྱང་གཉིས་འདིར་དངོས་སུ་མི་གསལ་ནའང་། དོན་ཐོབ་ཀྱིས་གསུངས་ཤིང་། འཁོར་ལོ་བཞི་གསལ་མ་ཐེབས་ཀྱང་རྩ་གསུམ་གསལ་བཏབ་པ་ཙམ་གྱིས་ཀྱང་དགོས་པ་འགྲུབ་གསུངས། དེ་ལྟར་གསལ་ཐེབས་པ་ན། སྙིང་ག་ཆོས་ཀྱི་འཁོར་ལོའི་དབུ་མའི་ནང་དུ། ཆོས་འབྱུང་དམར་པོ་རྩ་བ་ཕྲ་བ་ཐུར་དང་གདེངས་ཀ་རྒྱས་པ་གྱེན་དུ་ཕྱོགས་པའི་ཟུར་གསུམ་གཡས་གཡོན་དང་མདུན་དུ་བསྟན་པའི་ནང་ཁོང་གི་བར་སྣང་ལ་རང་སེམས་ཧྲཱིཿཡིག་དམར་པོ་ཡུངས་འབྲུ་ཙམ་གསལ་འཚེར་འོད་ཟེར་སྣ་ལྔ་འཕྲོ་བ་ཞིག་གསལ་བཏབ་སྟེ་འདས་མ་འོངས་ད་ལྟར་གྱི་རྣམ་རྟོག་གི་སྤྲོས་པ་ཐམས་ཅད་དོར་ཏེ། ཧྲཱིཿཡིག་གི་རྣམ་པ་ཁོ་ན་རྟག་ཏུ་འཆར་ཞིང་། དེ་ལ་མ་ཡེངས་དྲན་པའི་བྱ་ར་དང་ལྡན་པའི་ས་ལེ་ཧྲིག་གེ་ཡེ་རེ་འཇོག་སྟེ། དེ་ཡང་མདོ་སྡེ་རྒྱན་ལས། དམིགས་ཡུལ་ལ་ནི་སེམས་བཞག་ནས། །དེ་རྒྱུན་རྣམ་པར་གཡེང་མི་བྱ། །ཞེས་དང་། ཡང་དག་སྙིང་པོ་ལས། མར་མེ་རླུང་གིས་མ་བསྐྱོད་བཞིན། །གསལ་ལ་མི་རྟོག་མ་ཡེངས་ཞོག །ཅེས་པ་ལྟར་བསྒོམ་པ་ནི། དམིགས་སྐོར་གཉིས་པའོ། །དེའི་ངང་ལས་རྣམ་རྟོག་ཐོལ་གྱིས་འཕྲོས་ནས་ཡུལ་གྱི་རྣམ་པ་ཝལ་གྱིས་ཤར་ན། དེ་ངོས་ཟིན་པར་བྱས་ནས་དེ་ལས་སྐྱོན་ཡོན་གྱི་རྟོག་བཅོས་ལུ་གུ་རྒྱུད་དུ་མ་སོང་བར་འཕྲོ་རྦད་ཀྱིས་བཅད་ནས་ཤེས་པ་ཧྲིལ་གྱིས་བསྒྲིམས་ནས་ཧྲཱིཿཡིག་གི་སྟེང་དུ་བཟོད་མེད་ཡེངས་མེད་ཀྱི་ཅེ་རེ་འཇོག རྡོར་སེམས་ཐུགས་ཀྱི་སྒྲུབ་པ་ལས། ཡུད་དེ་སེམས་བཞག་
ཧྲིལ་གྱིས་སྒྲིམ༔ མ་བཅོས་མ་བསླད་འགྱུར་བ་མེད༔ ཇི་ལྟར་ནམ་མཁའ་དག་པ་བཞིན༔ མི་རྟོག་མཐའ་དབུས་མེད་པར་ཞོག༔ ཅེས་པ་ལྟར་བསྒོམ་པ་ནི་དམིགས་སྐོར་གསུམ་པའོ།། ཡང་སྒྲིམ་དྲགས་ནས་རིག་པ་གཡེར་ཞིང་འཕྲོ་རྒོད་བྱུང་ན་མ་ཡེངས་དྲན་པའི་བྱ་ར་དང་ལྡན་པས་རང་བབས་སུ་ལྷོད་ཀྱིས་ཁོང་ཀློད་ལ་འཇོག་སྟེ། ཀུན་མཁྱེན་ཆོས་རྗེས། ཆད་པ་ངལ་གསོ་བཞིན་དུ་ལྷོད་ཀྱིས་ཀློད། །ཅི་ཡང་མི་བསམ་ཡིད་ལ་བྱེད་པ་བོར། །ཞེས་གསུངས་པ་ལྟར་བསྒོམ་པ་ནི་དམིགས་སྐོར་བཞི་པའོ། །མདོར་ན་ཧྲིཿཡིག་དམར་པོ་འོད་ཟེར་སྣ་ལྔ་འཕྲོ་བ་དང་རིག་པ་གསལ་རིག་གཉིས་བལྟ་བྱ་དང་ལྟ་བྱེད་ཀྱི་ཚུལ་དུ་སོ་སོར་མི་ལྟ་བར་དབྱེར་མེད་གསལ་ལ་མི་རྟོག་པའི་ངང་དུ་ཀློད་ནས་འཇོག་པ་ནི་གནད་དམ་པ་ཡིན་གསུངས་ཏེ། དེ་ཡང་ཤ་བ་རིས། མཁའ་ལྡིང་རྒྱལ་པོ་སྤྲོ་བསྡུ་མེད་པར་གནས། །ཆུ་ནི་མ་སྙོག་རང་དྭངས་ཉིད་དུ་བཞག །ཇི་ལྟར་མཁས་པས་བ་གླང་སྐྱོང་བ་བཞིན། །བརྟན་གསལ་རྣོ་བ་མར་མེའི་སྙིང་པོ་ལྟོས། །སྒྱུ་མའི་སྐྱེས་བུ་ཆགས་ཞེན་རྩིས་གདབ་བྲལ། །བྱ་ནི་རྟེན་མེད་ནམ་མཁར་གནས་པར་བྱེད། །ཅེས་གསུངས་པ་བཞིན་བསྒོམ་པ་ནི་དམིགས་སྐོར་ལྔ་པའོ། །དེ་ལས་གསལ་བརྟན་གྱི་ཉམས་སྐྱེས་པ་དང་ཧྲཱིཿཡིག་ལས་ཧྲཱིཿའི་སྒྲ་བྲག་ཅ་ལྟར་ལྷང་གིས་བྱུང་བའི་རྐྱེན་གྱིས་ཁམས་གསུམ་སྣོད་བཅུད་ཐམས་ཅད་འོད་དམར་པོར་ལྟེམ་གྱིས་ཞུ་བ་རང་ཉིད་ལྷ་མོར་གསལ་བ་ལ་ཐིམ། དེ་དབུ་མ་ལ། དེ་ཆོས་འབྱུང་ལ། དེ་ཧྲཱིཿཡིག་ལ་ཧྲཱི་ཡིག་ན་ད་ཤིན་ཏུ་ཕྲ་བ་རྟ་རྔ་བརྒྱར་གཤགས་ཀྱི་བར་དང་། མཐར་དེ་ཡང་ནམ་མཁའ་ལ་སྤོས་དུད་ཡལ་བ་ལྟར་མི་དམིགས་པའི་མཐར་ཟབ་ཞི་སྤྲོས་པ་ཐམས་ཅད་དང་བྲལ་བ་འོད་གསལ་སྟོང་ཉིད་ཀྱི་ངང་ལ་རྩེ་གཅིག་ཏུ་མཉམ་པར་འཇོག་སྟེ། རང་ཤར་ལས། རྟག་ཆད་གཉིས་ཀྱི་མཐའ་ལས་འདས། །མཐའ་བཞིའི་དྲི་མ་རང་སངས་ཉིད། །ཅེས་གསུངས་པ་ལྟར་བསྒོམ་པ་ནི་དམིགས་སྐོར་དྲུག་པའོ། །གཉིས་པ་གསུང་བཟླས་པ་སྔགས་ཀྱི་རྣལ་འབྱོར་ལ་གཉིས་ཏེ། རྩ་བའི་མན་ངག་དང་། དེ་ཉིད་མཐའ་བརྐྱང་པའོ། །དང་པོ་རྩ་བའི་མན་ངག་ནི། འདི་ཉིད་ལས། དེ་བསྒོམ་ནས་
སྔར་བཞིན་བསྒོམ་ཞེས་སོགས་ཏེ། གོང་གི་རྗེས་ཞིག་གི་རྣལ་འབྱོར་ལ་ཉམས་མྱོང་ཅི་རིགས་འཐོན་པ་དང་། འོད་གསལ་སྟོང་ཉིད་དེ་ལས་སྐད་ཅིག་གིས་ཆུ་ལས་ཉ་ལྡང་བའི་ཚུལ་གྱིས་སྔར་བཞིན་ལྷ་སྐུར་གསལ་བའི་སྐུ་ལ་རྩ་གསུམ་འཁོར་ལོ་བཞི་སྙིང་གའི་ཆོས་འབྱུང་ཧྲཱིཿཡིག་དང་བཅས་པ་གསལ་བཏབ་སྟེ། དེ་གསལ་ཐེབ་པ་དང་ནང་ནད་གདོན་སྡིག་སྒྲིབ་ཐམས་ཅད་སང་གིས་དག་པར་བསམ་ལ་རླུང་རོ་ལན་གསུམ་བསལ། བརྟན་གཡོ་འཁོར་འདས་ཀྱི་དྭངས་མ་ཐམས་ཅད་རླུང་གི་རྣམ་པར་སྣ་བུག་གཉིས་ནས་རོ་རྐྱང་གི་ལམ་བརྒྱུད་དེ་སོང་བ་ལྟེ་འོག་དབུ་མའི་སྒོར་སླེབ་པར་མོས་ལ། སྟེང་རླུང་ཤར་གྱིས་རྔུབས་པ་ལྟེ་བར་བསྒྱུར་སྟབས་སུ་གནན། འོག་རླུང་བསྐུམ་པས་ཐུར་སེལ་གྱི་རླུང་གྱེན་དུ་མདུང་ཚུགས་སུ་ལངས་པས་འབྱུང་བཞིའི་རླུང་ཐམས་ཅད་འོད་ཟེར་སྣ་ལྔའི་རྣམ་པར་གསང་གནས་སུ་དབུ་མའི་ལམ་བརྒྱུད་དེ་སྙིང་གའི་ཆོ་གའི་ཆོས་འབྱུང་གི་ཧྲཱིཿལ་རྡོ་ཚན་ལ་ཁ་བ་བབས་པ་བཞིན་སིབ་སིབ་བསྟིམ་ལ་ལྟེ་བར་བུམ་ཅན་གཡོ་མེད་ཁ་སྦྱོར་དུ་བཟུང་ནས་ༀ་དྷཱུ་མ་གྷ་ཡེ་ན་མ་སྭཱ་ཧཱ། ཞེས་ལྕེ་མཆུའི་སྦྱོར་བ་ལ་མ་བརྟེན་པར་ཡིད་བཟླས་བྱ་ཞིང་། རླུང་ཅུང་ཟད་མི་བདེ་ན་སླར་རྔུབ་ཆུང་བྱས་གཡས་གཡོན་དབུས་གསུམ་ཐོན་བསྙེན་བྱས་ནས་ཀྱང་བཟུང་། མི་ཐུབ་པ་ན་སྣ་བུག་གཉིས་ནས་དལ་བུས་ཕྲ་ལ་རིང་བའི་ངང་ནས་མཐར་ཤུགས་ཀྱིས་ཕྱིར་སང་གིས་འཕང་དེ་ཡང་རྔུབས་དང་སྒང་དང་གཞིལ་བ་དང་། །མདའ་ལྟར་འཕང་བ་རྣམ་པ་བཞི། །ཞེས་གསུངས་པས། དེ་ལྟར་བུམ་ཅན་སྦྱོར་བ་བཞི་ལྡན་པའི་ངང་ནས་ཡིད་བཟླས་བྱེད་པ་ནི་དམིགས་སྐོར་དང་པོའོ།། ཡང་རིག་པ་བྱིང་ཞིང་རྨོངས་ན་དམིགས་རིམ་དེ་ཉིད་སྤྱི་བོའི་འཁོར་ལོའི་ནང་དུ་བསྒོམ། གཡེར་ཞིང་འཕྲོ་རྒོད་བྱུང་ན་ལྟེ་བའི་དབུ་མའི་འཁོར་ལོའི་ནང་དུ་བསྒོམ་པས་སྐྱོན་སེལ་ཞིང་བོགས་འདོན་དུ་འགྲོའོ། །མཐར་སྔར་བཞིན་ཧྲཱིཿལས་ཧྲཱིཿའི་སྒྲ་བྲག་ཆ་ལྟར་ལྷང་གིས་བྱུང་བའི་རྐྱེན་གྱིས་སྣོད་བཅུད་དང་། ལྷ་སྐུ་ཐམས་ཅད་འོད་གསལ་དུ་བཅུག་ནས་རྣམ་པར་མི་རྟོག་པའི་ངང་ལ་མཉམ་པར་བཞག་ལ་ནན་ཏན་དུ་མི་འདའ་བ་ནི་དམིགས་སྐོར་གཉིས་པའོ། །ཡང་འོད་གསལ་དེ་ལས་སྔར་བཞིན་ལྷ་སྐུར་ལངས་ནས་བསླབ་པའོ། །གཉིས་པ་དེ་ཉིད་ལས་མཐའ་
བསྐྱང་བ་ནི། ཉིན་མཚན་གཉིས་སོ་སོར་ཐུན་བཞིའམ་གསུམ་ལྟ་བུས་དམིགས་རིམ་དེ་ཉིད་ཁོ་ནས་ཉིན་མོ་སྨིན་མཚམས་ཀྱི་དབུ་མའི་ནང་དང་། སྙིང་གར་དབུ་མའི་ནང་དུ་བསྒོམ། མཚན་སྙིང་ག་དང་། ལྟེ་བའི་དབུ་མའི་ནང་དུ་བསྒོམ་པ་ཡིན། ཡང་ཤེས་པ་ཡུལ་ལ་འཕྲོ་ན་གང་ཤར་གང་སྣང་དེ་ཁོ་རང་ངོ་ལ་ཡུད་དེ་གསལ་བར་བཞག །འགྲོ་འོང་ཡེངས་བ་མེད་པར་ས་ལེ་ཧྲིག་གེ་ཧ་རེ་རྗེན་ནེ་ཅི་གནས་སུ་མཉམ་བཞག་གི་རིམ་པ་ལ་བསླབ་པའོ། །གསུམ་པ་ཐུགས་འོད་གསལ་ཆོས་ཉིད་ཀྱི་རྣལ་འབྱོར་ནི། འདི་ཉིད་ལས། ཧྲཱིཿལ་ཧྲཱིཿའི་སྒྲ་བྲག་ཆ་ལྟར་ཞེས་པ་དང་། ཡང་ཧྲཱིཿསྣོད་བཅུད་འོད་དུ་བསྡུས་ནས་ཞེས་པ་གཉིས་ཀྱི་སྐབས་སུ་སོ་སོར་དམིགས་རིམ་བསྟན་པ་བཞིན། འདི་ཉིད་དུའང་རྗེས་ཞིག་འོད་གསལ་སྟོང་ཉིད་ཀྱི་མཐའ་བསྐྱང་པའོ། །དེ་ལྟར་ཉིན་མཚན་གཉིས་སོ་སོར་བར་མེད་དུ་བསླབ་པས་ཉམས་ཀྱི་རིམ་པའང་། དང་པོ་གཡོ་བ། དེ་ནས་ཐོབ་པ། གོམས་པ། བརྟན་པ་མཐར་ཕྱིན་པའི་ཉམས་ལྔ་རྣམས་རིམ་གྱིས་འབྱུང་ཞིང་། དེ་དག་ལ་བླང་དོར་དང་རེ་དོགས་མེད་པར་བསྐྱངས་པས་ཐ་མལ་གྱི་རྣམ་རྟོག་དང་དབང་ཤེས་ཡུལ་ལ་འཇུག་པ་འགགས་ནས་ནང་དུ་ལྡོག་པར་ཉེ་བ་སྟེ། རྩ་བཅིངས་པའི་སྟོབས་ཀྱིས་རླུང་དབུ་མར་ཞུགས་ནས་རླུང་སེམས་ནང་དུ་ཟིན་པའི་ལྟས་སུ་སྟོང་གཟུགས་ཀྱི་སྣང་བ། དུ་བ་དང་། སྨིག་རྒྱུ་དང་། མགལ་མེ་དང་། མར་མེ་དང་། ནམ་མཁའ་སྤྲིན་བྲལ་ལྟ་བུའི་ཉམས་རྣམས་འཆར་ཞིང་། དེ་ལས་རྗེས་ཞིག་གི་འོད་གསལ་དུ་བཅུག་པས་ཕྱི་ནང་གི་འབྱུང་བའི་བསྡུ་རིམ་གྱི་མཐར་ཉི་ཟླའི་འགྲོས་ཀྱི་དགའ་བཞི་དང་དབྱེར་མེད་པའི་བདེ་སྟོང་གི་ཉམས་ཁྱད་པར་ཅན་འཆར་ཞིང་། དེ་ལས་སྣང་བ་དང་མཆེད་པ་དང་ཉེར་ཐོབ་ཀྱི་རིམ་པའི་མཐར་སྒྲིབ་བྱེད་ཀུན་ལས་འདས་པའི་འོད་གསལ་ཆོས་སྐུའི་རང་བཞིན་སྟོང་པ་བཞི་ལྡན་གྱི་སྣང་བ་མཐའ་དབུས་མེད་པར་འཆར་ཞིང་འོད་གསལ་དེ་ལས་ལངས་ཏེ་ལྷ་སྐུ་འཇའ་ཚོན་ནམ། སྒྱུ་མའི་སྐུ་དྭངས་ཤིང་ཐོགས་པ་མེད་པ་རྣམ་སྤྲུལ་དུ་མའི་རོལ་པར་སྤྲོ་བསྡུ་བྱེད་པའི་ཏིང་ངེ་འཛིན་ངང་གིས་འཆར་ཞིང་བསླབས་པའོ། །དེ་དག་ནི་དྷཱུ་ཏིའི་རྣལ་འབྱོར་ཉམས་སུ་ལེན་པའི་རིམ་པའོ། །གཉིས་པ་རླུང་དག་པར་བྱེད་པ་གཏུམ་མོའི་རྣལ་
འབྱོར་ལ་ཁྱད་པར་ཅན་གྱི་སྔོན་འགྲོ་དང་དངོས་གཞིའི་རིམ་པ་གཉིས། དང་པོ་ཁྱད་པར་ཅན་གྱི་སྔོན་འགྲོ་ནི། ཟབ་རྒྱ་ལས། ཁྱད་པར་ཅན་གྱི་སྔོན་འགྲོ་ལ༔ བསྲུང་འཁོར་ཚོགས་བསགས་སྦྱང་བ་བྱ༔ ཞེས་པས། བསྲུང་བའི་འཁོར་ལོ་བསྒོམ་པ། ཚོགས་བསགས་ཉམས་ཆག་བསྐང་བ། ལུས་རྩ་རླུང་གསུམ་སྦྱང་བ་དང་གསུམ་ནི། རང་རིག་ལྷ་སྐུ་ཡུམ་དུ་གསལ་བའི་དམིགས་གནད་ལས་གཞན་མ་རྣམས་ཟབ་རྒྱས་ལས་ཇི་ལྟར་གསུང་པ་བཞིན་འདིར་ཕན་ཚུན་འབྲེལ་ཆགས་སུ་བསྒོམས་ཀྱང་ལེགས་པའི་ཡན་ལག་ཏུ་འགྱུར་མོད་མ་བྱས་ཀྱང་འདི་ཉིད་དུ་ཆད་པས་སྐྱོན་མེད་གསུང་པས། རྒྱས་བསྡུས་ཇི་ལྟར་བསྒོམས་ཀྱང་རུང་ངོ་། །གཉིས་པ་དངོས་གཞི་ལ་བདེ་དྲོད་ཀྱི་གཞི་བཅའ་བ་དང་གཏུམ་མོ་དངོས་བསྒོམ་པ་གཉིས། དང་པོ་བདེ་དྲོད་ཀྱི་གཞི་བཅའ་བ་ནི། འདི་ཉིད་ལས། རང་ཉིད་ལྷ་མོའི་སྐུ་སྟོང་གསལ་ཤེལ་ལྟར་དྭངས་པ་ཞེས་སོགས་ཏེ་རང་ཉིད་སྟན་བདེ་བ་ལུས་གནད་ཆོས་བདུན་བཅའ། དམིགས་གནད་སྔར་ལྟར་ལྷ་མོའི་སྐུ་སྟོང་གསལ་སྒྲིབ་ཐོགས་མེད་པ་འཇའ་ཚོན་ནམ་ཤེལ་ལྟར་དྭངས་པའི་སྐུར་ལམ་གྱིས་གསལ་བའི་སྣ་རྩེར་གཡུང་དྲུང་དམར་པོ་གསལ་འཚེར་ཡང་ཞིང་གཡོ་བ་ཆེ་ཆུང་སྲན་མ་ཙམ་པ་ལྟེ་བར་ཆོས་འབྱུང་དམར་པོ་རྩ་བ་ཕྲ་བ་གསང་གནས་སུ་ཟུག་ཅིང་། གདེངས་ཁ་རྒྱས་པ་གྱེན་དུ་ཕྱོགས་པའི་ཟུར་གསུམ་གཡས་གཡོན་གཉིས་དང་མདུན་དུ་ལྟེ་ཁོང་ལ་བསྟན་པ། དེ་ལྟར་གསལ་བའི་ལུས་ཀྱི་དབུས་སུ་རྩ་གསུམ་སྔར་ལྟར་གསལ་བཏབ་པའི་ཡར་སྣེ་སྤྱི་བོ་དང་མར་སྣེ་ཆོས་འབྱུང་གི་ནང་ཁོང་ལྟེ་འོག་སོར་བཞིའི་ཐད་ཙམ་སླེབས་པའི་དབུ་མའི་ནང་དུ་དམར་ཆའི་དྭངས་མ་ཨི་ཡིག་མེའི་རང་བཞིན་ཆེ་ཆུང་སྲན་མ་ཙམ་འབར་བ་ལ་སེམས་གཏད་དེ་བསྒོམ། དེ་གསལ་ཐེབས་པ་དང་རླུང་རོ་བསལ་ནས་སྟེང་རླུང་རྔུབས་ཏེ། ལྟེ་བར་མནན་འོག་རླུང་གྱེན་དུ་དྲངས་པས་ཐུར་སེལ་གྱི་རླུང་མདུང་ཚུགས་སུ་ལང་པ་ཆོས་འབྱུང་ལ་འཕོག་པས་རྐྱེན་གྱི་ཆོས་འབྱུང་ཉིད་གཡོན་དུ་ཇེ་མྱུར་ཇེ་དྲག་ཏུ་འཁོར་བ་ལ་སེམས་བཟུང་ནས་བུམ་ཅན་གཡོ་མེད་དུ་འཆིང་། དེའི་རྐྱེན་ཨཾ་ལས་མེ་རླུང་ཤུགས་དྲག་ཏུ་འབར་བ་དྷཱུ་ཏིའི་ལམ་བརྒྱུད་དེ་སྣ་སྒོའི་གཡུང་དྲུང་ལ་ཕོག་པས།
དེ་ཉིད་གཡོན་ཕྱོགས་སུ་མགལ་མེའི་འཁོར་ལོ་ལྟར་དྲག་ཏུ་འཁོར་བ་ལ་སེམས་རྩེ་གཅིག་ཏུ་བཟུང་ནས་བུམ་ཅན་སྦྱོར་བ་བཞི་ལྡན་ལ་བསླབ་པར་བྱའོ། །དེ་ཡང་སྔོན་དུ་དྷཱུ་ཏིའི་རླུང་བཟླས་ཀྱི་སྐབས་སུ་རྩ་ལམ་འབྱུང་ཞིང་བུམ་ཅན་གྲུབ་ཟིན་པའམ་གཞན་དག་ཏུ་གྲུབ་ཟིན་པ་ནི་སྨོས་མ་དགོས། དེ་མིན་སྐབས་འདིར་མྱོང་བ་ཅི་རིགས་ཐོན་ཐོན་གྱི་བར་བསླབ་དགོས་ཡོད། གཉིས་པ་གཏུམ་མོ་དངོས་བསྒོམ་པ་ནི། ཟབ་རྒྱ་ལས། དེ་ནས་གཏུམ་མོ་རྣལ་འབྱོར་མ༑ ༑དྲོད་སྐྱེས་དམ་ཚིག་གཏུམ་མོ་ཞེས་སོགས་ཏེ། དྲོད་སྐྱེད་དམ་ཚིག་གཏུམ་མོ། བདེ་དྲོད་སྟོང་ཉིད་དུ་རྒྱས་འདེབས་པ་ཡེ་ཤེས་ཀྱི་གཏུམ་མོ་དང་གསུམ་ལས། དང་པོ་དྲོད་བསྐྱེད་དམ་ཚིག་གི་གཏུམ་མོ་ནི། འདི་ཉིད་ལས། དེ་བསྒོམ་ནས་དྷཱུ་ཏིའི་ནང་གི་ལྟེ་བའི་ཆོས་འབྱུང་གི་ནང་དུ་ཨ་དམར་པོ་ཡུངས་འབྲུ་ཙམ་དང་། སྤྱི་བོའི་ཧཾ་དཀར་པོ་ཞེས་སོགས་ཏེ། དེ་ཡང་ལུས་གནད་རྣམ་སྣང་ཆོས་བདུན་ནམ་མེ་ཐབ་གྲུ་བཅིངས་གཉིས་གང་བདེ་བཅས་ལ་དམིགས་གནད་རང་ལྷ་མོའི་སྐུ་ལ་རྩ་གསུམ་སྔར་ལས་ཁྱད་པར་ཆོས་འབྱུང་ཉིད་ལྟེ་བའི་དབུ་མའི་ནང་དུ་གསལ་བའི་ནང་ཁོང་བར་སྣང་ལ་ཤེས་རབ་ཉི་མའི་ཐིག་ལེ་ཨཾ་ཡིག་དམར་པོ་ཡུངས་འབྲུ་ཙམ་པ་མགོ་གྱེན་བསྟན་ཚྭ་ཞིང་འབར་ལ་ཁད་པ་སྤྱི་བོར་དབུ་མའི་ཡར་སྣེར་ཐབས་ཟླ་བའི་ཐིག་ལེ་ཧཾ་ཡིག་དཀར་པོ་མགོ་ཐུར་བསྟན་གསར་འཚེར་སྣུམ་འདྲིལ་བདེ་བའི་རང་བཞིན་འཇུག་ལ་ཁད་པ། དེ་ལྟར་གསལ་ཐེབས་པ་དང་། རླུང་རོ་ལན་གསུམ་བསལ་བས་ནད་གདོན་སྡིག་སྒྲིབ་ཐམས་ཅད་དག་པར་བསམ་ནས་སྟེང་རླུང་དྲང་པ་རོ་རྐྱང་གི་ལམ་བརྒྱུད་ནས་རྩ་གསུམ་འདུས་མདོར་སླེབས། འོག་རླུང་བསྐུམ་པས་ཐུར་སེལ་གྱི་རླུང་གྱེན་དུ་ལང་པ་དབུ་མའི་སྣེར་ཚུད་དེ། རླུང་གསུམ་གཅིག་ཏུ་གྱུར་པ་དེས་ལྟེ་བའི་ཨཾ་ལ་བུས་པས་ཨཾ་ལས་གཏུམ་མོ་ཡེ་ཤེས་ཀྱི་མེ་ལྕེ་འུར་གྱིས་འབར་ཏེ་ཕྲ་བ་གསལ་ལ་འཚེར་བ། རྩེ་མོ་རྣོ་ཞིང་གློག་འཁྱུག་པ་ལྟ་བུ་སོར་རེ་ཙམ་འབར་བ་དང་། དེ་ནས་ཇེ་རིང་ཇེ་རིང་ལ་སྤར་ནས་བུམ་ཅན་བཟུང་ནས་མེ་ལྕེ་ཧཾ་ལ་རེག་པའི་རྐྱེན་གྱི་མུན་ཁོང་ལ་སྒྲོན་མེ་བཏེགས་པ་བཞིན་རྩ་ལམ་ཐམས་ཅད་ཐོགས་མེད་དུ་ལམ་ལམ་མཐོང་བ་དང་ལུས་ནང་ཐམས་ཅད་མེས་གང་སྟེ་ལྕགས་
ལ་ཞུན་བཏང་བ་བཞིན་དམར་ལམ་ལམ་དྲོད་ཚ་འུར་སྐྱེས་པ་མོས་ནས་མི་དམིགས་ཁོ་ན་ལ་ཤེས་པ་གཏད་དེ་རྩེ་གཅིག་ཏུ་བསྒོམ། དེ་ནས་རླུང་ཐེངས་འགའ་རེ་སོང་ཞིང་དྲོད་མྱོང་བ་སྐྱེས་པ་དང་། སྲོག་ཐུར་ལྟེ་བར་སྔར་བཞིན་བཅིངས་མཚམས་ཁྱད་པར་འོག་རླུང་ལྟེ་བར་ལན་གསུམ་དྲངས་ཏེ་འཆིངས། དེ་ལ་སྟེང་རླུང་རྡབས་པས་དུ་བ་ལྟ་བུའི་རླུང་གཤང་སྒོ་ནས་སྔོ་བུན་བུན་འཐོན་པར་བསམ་ལ། ལག་གཉིས་ཁུ་ཚུར་ས་ལ་བཙུགས་པ་སྐྱིལ་ཀྲུང་གི་ངང་ནས་ལུས་ས་ལ་འདེབས་ཤིང་ས་ལ་ལན་བདུན་བརྩམ་བྱ་ཞིང་། ཡང་རེ་འགའ་མེ་ལྕེ་ཕྲ་ཞིང་དྭངས་པ་ཟངས་ཁབ་ལྟ་བུ་དམར་བྲེངས་སེ་འབར་བ་དང་། རེ་འགའ་ཅི་ཡང་མི་དམིགས་པའི་ངང་ལ་མཉམ་བཞག་བྱ་ཞིང་། དེ་ཀུན་ལ་རླུང་གནད་རེ་དང་སྦྱར་ཏེ་རླུང་བདེ་བར་ཟིན་གྱི་བར་མནན་མི་བདེ་ན་ཐོག་མར་མ་བྱང་བར་ཧ་ཅང་དྲག་པ་རང་མ་ཡིན་པར་གཞི་ནས་ཡང་བཟུང་དམིགས་པ་འཛིན་དུས་རླུང་མི་འཇུག་ཅིང་གསལ་བ་དང་སྟེང་རླུང་རྔུབས་ཏེ་མཆིལ་མའི་རྟ་ལ་བསྐྱོན། གནོན་པ་དང་འོག་རླུང་གྱེན་དུ་འཐེན་ལ་ལྟེ་བར་བུམ་ཅན་ཁ་སྦྱོར་དུ་འཆིང་། དམིགས་པ་གསལ་ཞིང་དྲག་ལ་འཇུར་བ་དང་། ཐུན་ཆུང་ལ་གྲངས་མང་བར་བསླབ། བསྒོམ་ཉམས་བཟང་འཕྲོ་ལ་བཅད། སྒོམ་གྱི་སྣ་མ་འདྲོགས་པར་བསྐྱང་། ཁམས་ངན་ཞིང་མ་ལྕོགས་ན་རེ་ཞིག་ངལ་གསོ་ཞིང་གློད། ལུས་ལ་རྔུལ་བྱུང་ན་དྲོད་འཆོར་བས་གོས་སྲབ་ཏུ་གཏོང་། དེས་མ་ཕན་ན་ཐོ་རངས་ཀྱི་དྲི་ཆུ་གྲང་མོ་རྫ་སོ་མར་གྲང་དུ་བཅུག་པས་ལུས་བཀྲུ་ཞིང་ལྕི་ཐལ་འཇམ་པོས་ཀྱང་བྱུག དེར་མ་ཟད་དམིགས་པ་ཕྱིར་ཤོར་བ་དང་། ངལ་གསོ་ཡུན་རིང་བ་དང་རླུང་དང་ཉི་མས་བརྡུངས་པ་གོས་ཟས་ཐུག་པ་དང་། ལན་ཚྭ་ཆེས་པ་དང་ལུས་ལ་རྔུལ་ཐོན་པའི་སྤྱོད་ལམ་དང་སྐྱ་སྐྱུར་སྔ་སྔོགས་ཁ་ཚྭ་རུལ་གསུམ་སོགས་ཚྭ་ཞིང་རྩུབ་པའི་རིགས་དང་ཉིན་མོ་གཉིད་ཁམས་ཉམས་པ་སྤངས། ཁ་ཟས་འཇམ་ཞིང་བཅུད་ཆེ་བ་རྣམས་བསྟེན། སྤྱོད་ལམ་ཧ་ཅང་འཇུར་བ་རང་མ་ཡིན་པའི་ངང་ནས་བཅག་གིས་བསྣུན། ཉམས་མཐོ་དམན་བདེ་སྡུག་གང་སྐྱེས་ཀྱང་སྤང་བླང་དང་དགག་སྒྲུབ་མི་བྱེད་པར་རང་རྒྱལ་དུ་བསྐྱངས། མཚན་མོ་ཉལ་དུས་རབ་སྐྱིལ་ཀྲུང་། འབྲིང་ཙོག་པུ། ཐ་མ་སྔས་མཐོ་བ་བྱས་ལ་གློ་གཡས་
འོག་ཏུ་བཅུག པུས་བྲང་སྦྱར་བའི་ལུས་གསུམ་ལྟབ་ཀྱིས་ཉལ། དེ་གསུམ་གང་བྱེད་ཀྱང་ལག་པ་མདུན་དུ་བསྣོལ་ནས་ལག་མཐིལ་གཉིས་མཁལ་ཁུང་གཡས་གཡོན་ལ་བཀབ། ལྟེ་བའི་ཨཾ་འབར་བ་ལ་སེམས་གཏད་དེ་བར་རླུང་ཅུང་ཟད་བཟུང་བའི་ངང་ནས་གཉིད་དུ་འགྲོ་བར་བྱ། དེས་གཉིད་ཀྱི་འོད་གསལ་ཟིན་པ་དང་། ཉིན་མོ་བསྒོམ་པའི་དྲོད་ཀྱི་རྒྱུན་དེ་མཚན་མོ་མི་ཡལ་བའི་དགོས་པ་ཡོད། གལ་ཏེ་དྲོད་སྐྱེ་བ་བུལ་ན་ལུས་གནད་ཐབས་ལམ་དུ་གསུངས་པ་ལྟར་གཙུབ་ཤིང་གཙུབ་སྟན་གྱི་འཕྲུལ་འཁོར་ལ་འབད། རླུང་སྔ་མ་བཏང་རྗེས་དེ་མ་ཐག་རྔུབས་ཏེ་རྩོལ་བ་དྲག་པོས་བསྒོམ་མ་བསྒོམ་བར་དུ་ངན་ན་བུམ་ཅན་བཞིའམ་བརྒྱད་དམ་བཅུ་བཞི་སོགས་བཞི་ཚན་རེ་རེ་རིམ་པར་བསྐྱེད་པའི་མཚམས་སུ་ངལ་གསོ་བ་ལས་གང་འདོད་དུ་མི་འཇོག་དམིགས་པའང་ཕྱིར་མ་ཤོར་བ་བྱས་ལ་མི་དམིགས་ཁོ་ན་ལ་ཤེས་པ་གཏད་དེ་དྲོད་ལུས་ཐམས་ཅད་ལ་མ་སྐྱེས་ན་གང་དྲོད་ཆུང་བར་མི་དམིགས་དྲག་ཏུ་བསྒོམ་ཞིང་ལག་མཐིལ་གཉིས་ཀྱིས་མཉེ་བར་བྱའོ། །གཉིས་པ་བདེ་བ་ཆོས་ཀྱི་གཏུམ་མོ་ནི། འདི་ཉིད་ལས། དེ་ནས་རླུང་ཐེངས་རེ་རེ་བཞིན་ཧཾ་ལས་བ་ཐག་ལྟ་བུའི་བྱང་སེམས་ཞེས་སོགས་ཏེ་ལུས་གནད་ཆོས་བདུན་བཅས་ལ་དམིགས་གནད་གཏུམ་མོ་སྦར་བར་སྔར་ལྟར་ལས་ཁྱད་པར་རླུང་ཐེངས་རེ་རེ་བཞིན་གཏུམ་མོའི་མེ་ཆོས་བཞི་ལྡན་གློག་གི་ཟེར་མ་ལྟར་འབར་བ་སྤྱི་བོའི་ཧཾ་ལ་རེག་ཧཾ་ལས་བྱང་སེམས་ཀྱི་རྒྱུན་དྭངས་གསལ་བདེ་བའི་རང་བཞིན་བ་ཐག་ལྟ་བུ་སྐྱ་ནར་གྱིས་བབས་རྩ་ནང་ཐམས་ཅད་གང་ཞིང་འཁོར་ལོ་བཞི་སོ་སོར་སླེབས་པ་ན་དགའ་བ་བཞིའི་ཉམས་སྐྱེས་པར་མོས་ཏེ་མགྲིན་པར་མཆོག་དགའ་དང་སྙིང་ཁར་ཁྱད་དགའ་དང་ལྟེ་བར་ལྷན་སྐྱེས་ཀྱི་དགའ་བ་སྟེ་རེ་རེ་ལ་སོ་སོའི་དགའ་ཆུང་བཞི་བཞི་དང་བཅས་པའི་དགའ་བ་བཞིའི་ཉམས་དངོས་སམ་མོས་པ་རྩེ་གཅིག་ཏུ་བསླབ། དེ་ལ་རྟགས་སྣང་གི་རིམ་པ་ཅུང་ཟད་དེ་མཐོང་བ་དང་གཏུམ་མོ་སྦར་བའི་བར་སྔར་ལྟར་ལས། ཁྱད་པར་བུམ་ཅན་ཁ་སྦྱོར་དེ་ཁ་ལ་སྟེང་རླུང་ལྟེ་བའི་ཨཾ་ལ་རྔུབས་པས་སོལ་མེ་ངར་མ་ལ་མར་གསེར་གྱི་རེག་པ་ལྟར་བདེ་བའི་སྒྲ་དང་བཅས་ཏེ་མེ་ཧར་གྱིས་འབར་བ་སྤྱི་བོའི་ཧཾ་ལ་རེག་པས་བྱང་སེམས་དངུལ་
ཆུ་ལྟ་བུར་ཁྱོར་གྱིས་ཞུ་བ་ལས་བདུད་རྩིའི་རྒྱུན་སྐྱ་ནར་གྱིས་སམ། མུ་ཏིག་གི་དོག་པ་ལྟ་བུར་ཐིག་ཐིག་བབས་པ་ལྟེ་བའི་མེ་དང་འདྲེས་པས་སྡོང་རྩ་མར་ཁུས་བརླན་པ་ལྟར་མེའི་གསོས་བྱས་དེ་ཆེར་འབར་བས་ཟླ་བ་བདུད་རྩིར་ཞུ་བའི་དྭངས་མས་དབུ་མ་གང་། དེ་ལས་རྩ་ཕྲན་ཐམས་ཅད་དུ་ཟག་པས་ལུས་བ་སྤུ་ཡན་ཆད་མེར་གྱིས་གང་བ་ལ་བདེ་བའི་རོས་ཁྱབ་པར་བསམ་ཞིང་བུམ་ཅན་དང་སྦྱར་ཏེ་འབར་འཛག་སྐྲ་ཤད་འཛིངས་པ་ལྟར་རྒྱུན་མི་ཆད་པར་བྱ༑ དེས་ལུས་ལ་བདེ་བ་དང་། སེམས་ཐོག་ཏུ་དགའ་བའི་ཡེ་ཤེས་སྐྱེས་ཚེ་དེ་ཁའི་རང་ཞལ་ལ་བལྟ་ཞིང་ངང་གདངས་བསྐྱངས་ལ་མཉམ་བཞག་བྱ། དེ་ལྟར་བདེ་དྲོད་ཞལ་སྦྱོར་ལ་འབད་པས་ལས་ཀུན་དྭངས་མས་གང་བའི་བདེ་བ་ཁྱད་པར་དུ་སྐྱེས་ཚེ། དེ་ཉིད་རྩོལ་མེད་ཡུན་དུ་གནས་པའི་ཐབས་ནི་སྤྱི་བོའི་ཧཾ་ལས་བྱང་སེམས་ཀྱི་རྒྱུན་དར་དཀར་གྱི་སྐུད་པ་བཞིན། ལྟེ་བའི་བར་དབུ་མའི་ནང་དུ་སྐྱ་བྲེང་གིས་གནས་པར་བསམ་ལ། དེའི་བདེ་བའི་ངང་ལ་སེམས་རྩེ་གཅིག་ཏུ་བཟུང་བའོ། །གསུམ་པ་བདེ་དྲོད་སྟོང་ཉིད་དུ་རྒྱས་འདེབས་པ་ཡེ་ཤེས་ཀྱི་གཏུམ་མོ་ནི། འདི་ཉིད་ལས་དངོས་སུ་མི་གསལ་ཡང་དོན་ཐོབ་ཀྱི་གསུངས་ཏེ། ཟབ་རྒྱ་ལས། བདེ་དྲོད་དབྱེར་མེད་སྟོང་ཉིད་དུ། །ཞེས་སོགས་ཏེ། དེ་ཡང་དམ་ཚིག་དང་ཆོས་ཀྱི་གཏུམ་མོ་བསྒོམས་པས་བདེ་དྲོད་ཀྱི་ཉམས་སྐྱེས་པའི་ཚེ། ལུས་གནད་ཆོས་བདུན་སྤྱི་ལྟར་ལས་ཁྱད་པར་ལག་ངར་བསྲངས་པའི་ཁུ་ཚུར་ཁ་སྤྲུགས་བརླ་སྟེང་དུ་བཞག རླུང་གནད་བུམ་ཅན་ལྟེ་བར་བཟུང་། ཉིན་མོ་སྤྲིན་དང་བསེར་བུ་མེད་ཅིང་། ནམ་མཁའ་དྭངས་པའི་སྐབས་ཁང་ཐོག་ལྟ་བུ་བླ་གབ་མེད་པའི་སར་རླུང་དང་ཉི་མ་སྐྱོབ་པའི་ཐབས་བྱས་ཏེ། སྔ་དྲོ་ཁ་ནུབ་དང་། ཕྱི་དྲོ་ཤར། ས་ཁད་ཡངས་སར་བལྟ། བདེ་ན་ཉིན་གུང་ཁ་བྱང་དུ་ཕྱོགས་པར་མིག་གནད་རྫི་མ་མི་རྡིབ་ཅིང་མིག་འབྲས་མི་འགྱུར་བར་ཤིན་ཏུ་དང་བ་དྲག་པོའི་མིག་གི་བལྟ་སྟངས་སྨིན་མཚམས་ཁྲུ་གང་ཙམ་གྱི་ཐད་ཀའི་ནམ་མཁར་གཏད་པ་ལ་སེམས་མི་འཕྲོ་བའི་རྟེན་ཙམ་བྱ་སྟེ། དུས་གསུམ་གྱི་རྣམ་པར་རྟོག་པའི་སྤྲོས་པ་ཐམས་ཅད་སྤངས་ནས་རླུང་སེམས་ནམ་མཁའ་གསུམ་འདྲེས་པ་ལྟ་བུའི་ངང་ལ་རེས་སྒྲིམ། རེས་གློད་པ་རེ་མོས་ཀྱི་
མཉམ་པར་འཇོག མཚན་མོ་ལུས་གནད་དང་རླུང་གནད་འདྲ་བ་ལས་ཁྱད་པར་ཐད་ཀའི་ལྟ་སྟངས་མིག་ཕྱེད་གདངས་ཀྱི་རྫི་མ་མི་རྡིབ་ཅིང་མིག་འབྲས་དེ་མ་འགུལ་བས་གང་དུ་གཏད་པའི་བར་སྣང་ནག་མཐིང་ངེ་བ་ལ་སེམས་མི་འཕྲོ་བའི་རྟེན་ཙམ་བྱས་ཏེ། སེམས་གནད་སྔར་བཞིན་སྒྲིམ་གློད་རེས་འཇོག་གིས་བསྒོམ། གང་ལྟར་ཡང་ལུས་གནད་ལྟ་སྟངས་བཅུན་ལ་བསྒོམ་ཉམས་བཟང་འཕྲོ་མ་བཅད་དེ་ཐུན་ཆུང་ལ་གྲངས་མང་བས་ཡང་ཡང་བསླབ། དེས་སྐྱོ་ན་སེམས་ཧ་ཅང་མ་སྒྲིམ། ཧ་ཅང་མི་གློད་པར་རང་བབས་སུ་ཤིག་གེ་བཞག་པ་ལ་ངལ་གསོ། དེ་ལྟར་ཉིན་མཚན་གྱི་རྣལ་འབྱོར་གཉིས་གཅིག་ཏུ་དྲིལ་ནས་ཉམས་སུ་བླངས་པས་སེམས་ཟིན་པས་རླུང་ཟིན། དེ་ཟིན་པས་སྟོང་གཟུགས་ཀྱི་འཆར་སྒོ་རྣམས་སྔར་དྷཱུ་ཏིའི་སྐབས་ལས་གསལ་བརྟན་དུ་འགྱུར་ཞིང་དེ་རྣམས་མི་གཡོ་བར་བརྟན་ན་མིག་འབྲས་བསྒྱུར་བ་དང་བར་ཐག་རིང་ཐུང་མ་ངེས་པའི་མཁའ་ལ་འཁྲིད་དེ་རྟགས་སྣང་རྣམས་ལ་ལྟ་སྟངས་གཏད་དེ་མ་ཡེངས་པར་ཅེ་རེ་བལྟ་བ་དང་། སྟེང་འོག་མ་ངེས་པར་ཤུགས་ཕྱུངས་ཏེ། རྟགས་སྣང་མཁའ་ལ་མཐོ་ན་རིམ་གྱིས་ཕབ་སྟེ་ལས་སྣང་གང་རུང་ཞིག་གི་སྟེང་དུ་སེམས་བཟུང་བ་དང་།ཡང་སྟོང་གཟུགས་མིག་གི་ཐད་ཀའི་འོག་ཏུ་འཆར་བ་ལྟ་སྟངས་རིམ་གྱིས་གཏད་དེ་ལས་སྣང་དང་བསྲེས་པས། ལས་སྣང་དེ་ཡང་སྟོང་གཟུགས་སུ་འཆར་ཞིང་། དེ་དག་ལ་སེམས་བཟུང་བས་མ་དག་པའི་ལས་སྣང་འགགས་ནས་སྣང་བ་ཐམས་ཅད་སྟོང་གཟུགས་སུ་འཆར་བ་དང་། དེ་ཡང་མགོ་བོ་དྲང་པོར་བཞག་སྟེ་སྣ་བུག་གཉིས་ཀྱི་ཐད་ཀར་གཏད་དེ་སྟོང་གཟུགས་བཟུང་ན་རླུང་ལྔའི་ཁ་དོག་མཐོང་བ་དང་། ལྟེ་འོག་སྤུ་དཀར་ནག་གི་མཚམས་སུ་བཟུང་ན་བདེ་དྲོད་འཆར་ཞིང་མཐར་དབུ་མ་དང་རྩ་འཁོར་ཐམས་ཅད་མཐོང་བར་བཤད་ཅིང་། དེ་དག་རྣམས་ལ་མ་ཆགས་མི་གཡོ་བར་ལྟ་སྟངས་གཏད་དེ་བོགས་འབྱིན་པར་བྱེད་ཅིང་ཉམས་སུ་བླངས་པས། བརྟན་པ་ན་དེའི་དབུས་སུ་བརྟན་གཡོའི་འཇིག་རྟེན་གྱི་ཁམས་སོགས་དག་མ་དག་གི་སྣང་བ་དཔག་ཏུ་མེད་པ་སྒྲིབ་མེད་གསལ་པོར་མཐོང་ཞིང་། ལུས་སེམས་ལ་བདེ་གསལ་རྣམ་པར་མི་རྟོག་པའི་རང་བཞིན་འོད་གསལ་གྱི་ངང་ཉིད་དུ་གནས་པའི་ཉམས་བཟང་
པོ་དང་། ཟད་པར་གྱི་སྐྱེ་མཆེད་དང་། སྤྱན་དང་མངོན་ཤེས་ལ་སོགས་པའི་ཡོན་ཏན་དཔག་ཏུ་མེད་མཐའ་ཡས་པར་འཆར་བར་གསུངས་སོ། །དེ་དག་རྣམས་ནི་གཏུམ་མོ་ཙཎྜ་ལིའི་རྣལ་འབྱོར་རོ། །གསུམ་པ་བཀོད་པ་བྱང་ཆུབ་ཀྱི་སེམས་དག་པར་བྱེད་པ་བདེ་བའི་རྣལ་འབྱོར་ལ་གསུམ་སྟེ། སྟེང་སྒོ་འཇུ་འདུལ་མན་ངག་ཉི་ཟླ་ཁ་སྦྱོར་དང་། འཁོར་འདས་བསྡུ་ཞུའི་མན་ངག་རྗེས་ཞིག་གི་རྣལ་འབྱོར། དེ་ཉིད་ཐུགས་ཀྱི་འོད་གསལ་དང་མཚམས་སྦྱར་བའོ། །དང་པོ་སྟེང་སྒོ་འཇུ་འདུལ་གྱི་མན་ངག་ཉི་ཟླ་ཁ་སྦྱོར་ནི། འདི་ཉིད་ལས། དེ་ནས་ཡང་ལྷ་མོའི་སྐུ་སྔར་ལྟར་བསྒོམ། རླུང་གཉིས་རྩེ་སྤྲད་པས་ཞེས་སོགས་ཏེ། དེ་ཡང་ལུས་གནད་ཆོས་བདུན་སྤྱི་ལྟར་ལས་དམིགས་གནད་རང་ཉིད་ལྷ་མོའི་སྐུར་གསལ་བའི་སྐུ་ལ་རྩ་གསུམ། ལྟེ་བར་ཆོས་འབྱུང་སྟེང་འོག་གཉིས་སུ་ཨཾ་དང་ཧཾ་ཡིག་བཅས་གཏུམ་མོ་སྦར་བའི་བར་ཆོས་ཀྱི་གཏུམ་མོ་ལྟར་གསལ་ལེགས་པར་བཏབ། དེ་རྣམས་ཐེབས་པ་དང་། རླུང་རོ་བསལ་ལྟེ་བར་སྲོག་ཐུར་གྱི་རླུང་གཉིས་རྩེ་སྤྲད་དེ་བུམ་ཅན་སྦྱོར་བ་བཞི་ལྡན་གྱི་ལྟེ་བའི་གཏུམ་མོ་སྦར། དེ་ལས་གཏུམ་མོའི་མེ་ཆོས་བཞི་ལྡན་གློག་ཁྱུག་པ་ལྟར་དྷཱུ་ཏིའི་ལམ་ནས་སོང་བས་ལུས་ནང་ཐམས་ཅད་མེས་གང་། དེ་ལས་དབང་པོ་དང་བ་སྤུའི་སྒོ་ཐམས་ཅད་ནས་མེའི་འོད་ཟེར་ཕྱོགས་བཅུར་འཕྲོས་པས་གདོན་བགེགས་ཐམས་ཅད་སྲེག་བཅོམ་སྟེ་དྭངས་མ་རྣམས་འོད་གསལ་བར་བྱས་ནས་རང་ལ་བསྡུས། མེ་སྤྱི་བོའི་ཧཾ་ལ་རེག་པས་རྩ་ནང་གི་བྱང་སེམས་ཐམས་ཅད་ཞུ་བ་སྤྱི་བོའི་ཧཾ་ཡིག་ལ་བསྡུས། དེ་ལས་བྱང་སེམས་དར་དཀར་གྱི་སྐུད་པ་བཞིན་སྐྱ་ནར་གྱིས་བབས་པས། སྤྱི་བོ་ལ་སོགས་པའི་འཁོར་ལོ་བཞིར་ཡས་བརྟན་གྱི་དགའ་བཞིའི་འགྲོས་ཀྱི་རིམ་བཞིན་བབས་པས་ལྟེ་བ་ཡན་ཆད་དྭངས་མས་གང་ཞིང་འཁྱིལ་བ་དེ་ལས་དྭངས་མའི་དྭངས་མ། ཡེ་ཤེས་སྙིང་པོའི་ཐིག་ལེ་དཀར་གསལ་ཡུངས་འབྲུ་ཙམ་པ་འོད་ཟེར་འཕྲོ་བ་ཞིག་གསང་བའམ། ཡང་ན་པདྨའི་སྣ་རྩེར་མགལ་མེའི་འཁོར་ལོ་ལྟར་གཡོན་དུ་ཁིར་ཁིར་འཁོར་བས་ལུགས་འབྱུང་གི་དགའ་བཞི་ཉམས་སུ་མྱོང་བའི་མཐར་དངོས་པོ་ལྷན་ཅིག་སྐྱེས་པའི་ཡེ་ཤེས་བདེ་བ་བཟོད་མེད་དུ་སྐྱེས་པར་བསམ་ལ་དེའི་ངང་གདངས་བསྐྱངས་ཤིང་
མཉམ་བཞག་ལ་རྩེ་གཅིག་ཏུ་བསླབ། དེ་ལ་གོམས་འདྲིས་བརྟན་པ་ན། ཀལྤོ་ལས། རྒྱ་མཚོ་རི་རབ་ལོགས་ལ་བཀན། །གླིང་བཞི་དབང་དུ་བསྡུ་བ་དང་། །རོ་འཛིན་ངག་གི་གནས་སུ་སྦྱར། །དབང་པོའི་མཆོག་གི་སྟེང་དུ་བཞག །ངག་སྟོབས་ཧཱུཾ་དྲག་རིང་དུ་དྲངས། །ཞེས་པ་ལྟར། ལུས་གནད་ཆོས་བདུན་ལས། ལག་གཉིས་ཐུགས་ཀར་བསྣོལ། ལྟོ་བ་ཚིགས་པ་ལ་བཅེར། ཉྭ་བཞི་སྒྲིམ་ཞིང་། རྐང་ལག་གི་སོར་མོ་རྣམས་དྲག་ཏུ་བསྐུམ། ལྕེ་རྩེ་རྐན་ལ་གཏད། མིག་བསྒྲད་ནས་གྱེན་དུ་ལྡོག རླུང་གནད་འོག་སྒོ་དྲག་ཏུ་གློད་ཅིང་རླུང་འདྲེན་དྲག་པོས་སྲོག་ཤུགས་ཀྱི་ཕྱིར་བསལ། སེམས་གནད་མིག་ཡིད་རླུང་གསུམ་སྤྱི་བོའི་ཧཾ་ལ་གཏད་དོ། །དྭངས་མའི་དྭངས་མ་ཡེ་ཤེས་སྙིང་པོའི་ཐིག་ལེ་ཉིད་གསང་གནས་སམ་པདྨའི་སྣའམ་སྣ་རྩེར་འཁོར་བ་དེ་ཉིད་ཀྱིས་མཚོན་དྭངས་མ་རྣམས་ལྟེ་བ་ལ་སོགས་པའི་འཁོར་བཞིར་མས་བརྟན་གྱི་དགའ་བཞིའི་འགྲོས་ཀྱི་རིམ་གྱིས་དྲངས་ནས་སྤྱི་བོའི་ཧཾ་ལ་སིབ་སིབ་ཐིམ་པས་ལུགས་ལྡོག་གི་དགའ་བཞི་ཉམས་སུ་མྱོང་བའི་མཐར་རང་བཞིན་ལྷན་ཅིག་སྐྱེས་པའི་བདེ་ཆེན་ཡེ་ཤེས་ཀྱི་རང་རྩལ་འགག་མེད་ཀྱི་རོལ་པར་འཆར་བ་ལ་མི་གཡོ་བར་དེའི་ངང་གདངས་བསྐྱངས་ཤིང་མཉམ་བཞག་ལ་ནན་ཏན་གྱིས་བསླ བས་ཤིང་། དེས་ནི་བྱང་སེམས་བཟུང་ལྡོག་གཉིས་ཀ་བྱེད་པར་འགྱུར་རོ། །གཉིས་པ་འཁོར་འདས་བསྡུ་ཞུའི་མན་ངག་རྗེས་ཞིག་གི་རྣལ་འབྱོར་ནི། འདི་ཉིད་ལས། དེ་ནས་སྣོད་བཅུད་འོད་གསལ་དུ་བཅུག་ནས་ཞེས་སོགས་ཏེ། རང་ཉིད་ལྷ་མིའི་ལྟེ་བའི་ཨཾ་ལས་འོད་ཟེར་འཕྲོས། འཁོར་འདས་ཀྱི་སྣོད་བཅུད་རྣམས་ལ་ཕོག་པས་ཐམས་ཅད་འོད་དུ་ཞུ་ནས་རང་ལྷ་མོར་གསལ་བ་ལ་བསྟིམ། དེ་དབུ་མ་ལ་ཐིམ། དེ་ཡང་ཆོས་འབྱུང་དང་། ཨ་ཧཾ་གཉིས་ལ་རིམ་གྱིས་བསྡུས། དེ་ཡང་ནམ་མཁའ་ལ་འཇའ་ཡལ་བ་ལྟར་འོད་གསལ་སྟོང་ཉིད་ཀྱི་ངང་ལ་བློ་རྩེ་གཅིག་ཏུ་མཉམ་བཞག་བྱ་ཞིང་། འོད་གསལ་དེ་ལས་ལྡང་བ་ན་ཆུ་ལས་ཆུ་བུར་རྡོལ་བ་བཞིན་སྐད་ཅིག་གི་ལྷ་སྐུར་སྔར་ལྟར་ཡང་ཡང་སྦྱོང་ཞིང་བསླབ་པའོ།། གསུམ་པ་གཉིད་འཐུག་གི་འོད་གསལ་དང་མཚམས་སྦྱར་བ་ནི། འོག་ཏུ་ཡན་ལག་གི་སྦྱོར་
བའི་སྐབས་སུ་འཆད་པའོ། །དེ་ནས་ཐུན་རྗེས་རྣམས་སུ་བྱང་སེམས་དབབ་པ། བཟུང་ལྡོག་ཁྱབ་དང་། དེ་ཉིད་རླུང་དང་བསྲེ་ཞིང་དབྱིངས་སུ་བསྐྱལ་བས་རླུང་གི་ཡོན་ཏན་སེམས་ལ་བསྟིམ་པ་རྣམས་ཚང་བ་རེ་བྱས་ན་ལེགས་གསུངས་པས། བྱང་སེམས་དབབ་པ། བཟུང་བ། ལྡོག་ནས་སྤྱི་བོའི་བར་བརྟན་པའི་བར་སྔར་བཞིན་སོང་བ་དང་། དེ་ཉིད་ཁྱབ་པར་དགྲམ་པ་ནི༑ ཀལྤོ་ལས། རྣམ་རོལ་རྒྱ་ཡི་ལུས་ལ་དགྲམ། །ཞེས་པས། ལུས་རྡོར་སྐྱིལ་དྲང་པོར་བསྲང་། རླུང་བུམ་ཅན་ལྟེ་བར་སྲོག་ཐུར་ཁ་སྦྱར་ཏེ་ལག་གཉིས་ཀྱིས་མཐེའུ་ཆུང་དང་། སྲིན་ལག་གཉིས་ཀྱིས་མཆུ། གུང་མོ་གཉིས་ཀྱིས་སྣ། མཛུབ་མོ་གཉིས་ཀྱིས་མིག་མནན། མཐེབ་ཆེན་གཉིས་ཀྱིས་རྣ་བ་རྣམས་བསྡམས་ལ། གྲུ་མོ་གཉིས་བརྐྱང་ནས། ལུས་གཡས་གཡོན་སོ་སོར་དྲག་པོར་ལན་གསུམ་བསྐོར་རྗེས་ལག་གཉིས་བརྐྱང་སྟེ་ཧ་ཞེས་སྒྲ་དང་བཅས་ཏེ་ལུས་ཆ་ཆ་ནས་སྤྲུག་པ་སེང་གེ་རྣམ་རོལ་ལོ། །རླུང་དང་བསྲེ་བ་ནི། དེ་རྗེས་བུམ་ཅན་བདུན་ཙམ་བཟུང་བ་དང་། དེ་དང་ལྷན་ཅིག་སེམས་གནད་དེ་དང་ཅི་འདྲེས་སུ་བསླབ། དེ་ཉིད་དབྱིངས་སུ་བསྐྱལ་ཞིང་རླུང་གི་ཡོན་ཏན་སེམས་ལ་བསྟིམ་པ་གོང་དུ་ཡེ་ཤེས་ཀྱི་གཏུམ་མོར་བཤད་པ་ལྟར་རམ། ཡང་ན་བདེ་དྲོད་ཀྱི་ཉམས་སྐྱེས་པའི་ཚེ། ལུས་གནད་ཆོས་བདུན་དང་། རླུང་གནད་བུམ་ཅན་དང་སྦྱར་ཏེ་དམིགས་གནད་དྲོད་དང་བདེ་བའི་ཡེ་ཤེས་སྐྱེས་པ་དེ་ཁའི་རང་ངོ་ལ་ཅེར་གྱིས་བལྟས་པས། བདེ་དྲོད་ཀྱི་གདངས་མ་འགགས་ལ་དེའི་རང་བཞིན་གང་དུ་ཡང་མ་གྲུབ་ཅིང་ཅིར་ཡང་འཆར་ཞིང་ངོས་བཟུང་ཐམས་ཅད་དང་བྲལ་བའི་བློ་འདས་སྤྲོས་བྲལ་བདེ་བ་ཆེན་པོའི་ཡེ་ཤེས་ལྷག་གིས་འཆར་བ་ན་དེ་ཀའི་ངང་ལ་མཉམ་པར་བཞག་པས་གོང་གསལ་རྣམས་ལ་ཉམས་མྱོང་སྐྱེས་པ་ལ་ཡེ་ཤེས་ཀྱི་རྒྱས་ཐེབས་པར་འགྱུར་ཞིང་རླུང་གི་ཡོན་ཏན་སེམས་ལ་ཐིམ་པས་ཀ་དག་བདེ་བ་ཆེན་པོའི་ཡེ་ཤེས་ལ་འདའ་བར་འགྱུར་རོ། །དེ་དག་རྣམས་ནི་བདེ་བའི་རྣལ་འབྱོར་རོ། །༈ གཉིས་པ་ཡན་ལག་གི་རྣལ་འབྱོར་ལ། དངོས་དང་། ཞར་བྱུང་གཉིས། དང་པོ་དངོས་ལ་གཉིས་ལས། དང་པོའི་ཉིན་མོའི་རྣལ་འབྱོར་ནི། འདི་ཉིད་ལས། རང་ཉིད་ལྷ་མོའི་སྐུར་
གསལ་བའི་སྤྱི་བོར་བདུད་རྩིའི་ཐིག་ལེ་དང་ལྟེ་བར་མེའི་ཐིག་ལེ་ཞེས་སོགས་ཏེ། ཉི་ཟླ་ཁ་སྦྱོར་དང་རྗེས་ཞིག་གི་རྣལ་འབྱོར་ལ་ཉམས་འོག་ཏུ་ཆུག་པ་དང་། རང་ཉིད་ལྷ་མོའི་སྐུར་སྟོང་གསལ་སྒྲིབ་ཐོགས་དང་བྲལ་བའི་ལུས་ཀྱི་དབུས། རྩ་གསུམ་དང་ཆོས་འབྱུང་ཨ་ཧཾ་དང་བཅས་པ་སྔར་བཞིན་གསལ་བ་ལས་ཁྱད་པར་ལག་གཉིས་ཁུ་ཚུར་པུས་མོའི་སྟེང་དུ་བཀབ་སྟེ་རླུང་རོ་བསལ། དེ་ནས་སྲོག་ཐུར་གྱི་རླུང་གཉིས་ལྟེ་བར་བུམ་ཅན་ཁ་ཤས་བཟུང་རྗེས་ལྟོ་བ་ཚིགས་པ་ལ་གཅེར་ཏེ་ཁོང་འདྲེན་དྲག་པོས་སྲོག་གི་རླུང་ཕྱིར་བསལ་བ་དང་ལྷན་ཅིག་གཏུམ་མོའི་མེ་ཧར་གྱིས་སྦར་བ་སྤྱི་བོའི་ཧཾ་ལ་རེག་པར་བསམ་རླུང་ཕྱིར་ཐུབ་ཚད་མནན་ནས་བཟུང་། མི་ཐུབ་ན་ནང་དུ་དྲངས་ལ་དྲག་ཏུ་རྔུབས་པ་དང་ལྷན་ཅིག་སྤྱི་བོའི་ཧཾ་ལས་བདུད་རྩིའི་རྒྱུན་ཕབ་ནས། ལྟེ་བའི་ཨཾ་ལ་བསྟིམ་སྟེ་སྲོག་གི་རླུང་ཐུར་སེལ་ལ་བསྟུན་ནས་བུམ་ཅན་བཟུང་བ་དང་སེམས་ཉིད་ཐད་ཀའི་ནམ་མཁའ་དང་ཤུགས་ཀྱིས་བསྲེས་ཏེ་བློ་འདས་ཆོས་སྐུ་བདེ་བ་ཆེན་པོའི་ཡེ་ཤེས་ལ་འདའ་ཞིང་། མཉམ་བཞག་བྱ། དེ་ལ་ཡང་ཡང་བསླབ་རྗེས། མཐར་ལུས་གནད་སྔར་བཞིན་གྱི་སྟེང་ནས་བུམ་ཅན་བཟུང་ཁྱད་པར་ལྟོ་བ་ཕྱིར་བསྐྱེད་ལ་ལུས་གཡས་གཡོན་རེ་མོས་ཀྱི་གསུམ་གསུམ་བཅུས་རྗེས་ཧལ་ཞེས་སྒྲ་དང་བཅས་ལག་བརྐྱང་སྟེ་ལུས་སྤྲུག་པ་དང་ལྷན་ཅིག་འབེབས་ལན་གསུམ་ཙམ་གྱི་མཐའ་བརྟེན་པ་རེ་བྱའོ། །དེ་ལ་གོམས་འདྲིས་བརྟན་པ་ན། མཉམ་བཞག་ཡེ་ཤེས་དེའི་རྒྱུན་ཐུན་རྗེས་སམ། རྗེས་ཐོབ་ཏུ་བརྐྱང་པ་ནི༑ ལུས་དབང་གི་གནད་ཕལ་ཆེར་འདྲ་བ་ལས། ཅུང་ཟད་རང་བབས་སུ་གློད། རླུང་གནད་འཇམ་རླུང་རང་འགྲོས་སམ། བར་རླུང་སྦྱར་དམིགས་གནད་སྔར་ལྟར་རང་ལྷ་མོར་གསལ་བའི་སྐུ་ལ་རྩ་གསུམ་ཆོས་འབྱུང་ཐིག་ལེ་གཉིས་དང་བཅས་པ་གསལ་བའི་ངང་ནས། ༀ་ལས་གཏུམ་མོའི་མེ་ཟངས་ཁབ་ལྟ་བུ་དམར་བྲེང་གིས་རང་བབས་སུ་འབར་བ་དེ་ལས་ཇེ་རིང་ཇེ་རིང་དུ་སྤར་ནས་སྤྱི་བོའི་ཧཾ་ལ་རེག་པས་དེ་ལས་དར་དཀར་གྱི་རྒྱུན་སྐུད་པ་ལྟ་བུ་སྐྱ་ནར་གྱིས་བབས་པ་ལྟེ་བའི་ཨཾ་ལ་ཐིམ་པས་མེ་ཆུའི་འགྲོས་ཀྱི་འབར་འཛག་སྐྲ་ཤད་འཛིངས་པ་ལྟ་བུའི་ཏིང་ངེ་འཛིན་ལ་སེམས་རྩེ་གཅིག་ཏུ་རྒྱུན་ཆགས་པར་བསྒོམ་པས་བདེ་དྲོད་ཀྱི་ཡེ་
ཤེས་རྩལ་ཁ་ཕྱོགས་མེད་དུ་རྒྱས་ནས་ཉམས་མྱོང་སྲོལ་དུ་ཆུབ་པས་མངོན་སུམ་གཏན་ལ་ཕེབས་པར་འགྱུར་རོ། །གཉིས་པ་མཚན་མོའི་རྣལ་འབྱོར་ནི། ཉིན་པར་བདེ་བའི་རྣལ་འབྱོར་གྱི་རྗེས་ཞིག་སྣོད་བཅུད་འོད་གསལ་སྟོང་ཉིད་དུ་སྦྱངས་ནས་མཉམ་པར་བཞག་སྟེ་བསླབ་པས། ཕྱི་ནང་གི་འབྱུང་བའི་བསྡུ་རིམ་གྱི་དུས་ཀྱི་བདེ་བའི་ཡེ་ཤེས་དང་སྟོང་ཉིད་ལ་མཉམ་པར་བཞག་པའི་དུས་ཀྱི་སྟོང་པའི་ཡེ་ཤེས་ངོས་ཟིན་པར་བྱས་ལ། སྟོང་ཉིད་དེའི་ངང་ལས་ཆུ་དྭངས་པ་ལ་ཉ་ལྡང་བའི་ཚུལ་དུ་སྐད་ཅིག་གི་ལྷ་སྐུར་ཡང་ཡང་ལྡང་བའི་གོམས་སྟོབས་ཀྱིས་མཚན་མོ་གཉིད་ཉལ་ཁར་འདུན་པ་བསྒྱུར་ཙམ་གྱི་རྨི་ལམ་རང་ཤུགས་སུ་ཟིན་རང་ཉིད་འོད་གསལ་དུ་འཇུག་པ་དང་། ལྷ་སྐུར་ལྡང་བ་སོགས་འབྱུང་སྟེ། རྣམ་སྣང་མངོན་སྦྱང་ལས། འཇའ་ཚོན་ལྟ་བུའི་ལུས་འདི་ནི། དེ་ཉིད་གོམས་པས་ཐོབ་པར་འགྱུར། །ཞེས་དང་། སྒྱུ་འཕྲུལ་ལམ་རིམ་ལས། རྨི་ལམ་ནའང་སྒྱུ་མར་མཐོང་། །ཞེས་གསུངས་པ་བཞིན་དེ་ལྟར་འགྱུར་མོད་ཀྱང་། ཉམས་མྱོང་སྐྱེ་སླ་ཞིང་སྐྱེས་པ་སྤེལ་བའི་ཕྱིར། འདི་ཉིད་ལས་རྨི་ལམ་བཟུང་བ་ནི་མགྲིན་པར་པདྨ་དམར་པོ་འདབ་བཞི་པའི་དབུས་དང་ཕྱོགས་བཞི་བཞི་སོགས་ཏེ། དེ་ཡང་ཉིན་མོའི་ཉི་ཟླ་ཁ་སྦྱོར་དང་རྗེས་ཞིག་སྣོད་བཅུད་བསྡུ་བའི་རིམ་པ་ལ་བསླབ། མཚན་མོའི་དུས་ལུས་ཀྱི་གནད་སྤྱོད་ལམ་དལ་བ་བསྟེན་ནས་རབ་སྐྱིལ་ཀྲུང་། འབྲིང་ཙོག་པུ། ཐ་མ་སྔས་མཐོ་བ་ལ་མགོ་བྱང་དུ་ཕྱོགས་པས་ལུས་སུམ་ལྟབ་ཀྱི་གློ་གཡས་འོག་ཏུ་བཅུག་ནས་སེང་གེའི་ཉལ་སྟབས་ཀྱིས་ཉལ། རླུང་གནད་བར་རླུང་དང་སྦྱར། དམིགས་གནད་རྨི་ལམ་འདུན་ཤུགས་དྲག་པོའི་ངང་ནས། རང་ཉིད་ལྷ་མོའི་སྐུ་གསལ་སྟོང་སྒྲིབ་ཐོགས་དང་བྲལ་བ་སྔར་བཞིན་གསལ་བཏབ་པའི་མགྲིན་པར་པད་འདབ་དམར་པོ་འདབ་བཞིའི་དབུས་དང་ཕྱོགས་བཞིར་ཐིག་ལེ་དམར་ཆེ་ཆུང་སྲན་མ་ཙམ་པ་གསལ་འཚེར་འོད་ཟེར་འཕྲོ་བ་ལྔ་ཚོམས་སུ་བསྒོམ། དེ་རྣམས་གསལ་ཐེབས་པ་དང་། འདབ་མ་རྣམས་རིམ་བཞིན་ཐིག་ལེ་ལ་བསྡུས། ཐིག་ལེ་བཞི་པོ་ཡང་རིམ་བཞིན་ཐིག་ལེ་དབུ་མ་ལ་བསྡུས། ཐིག་ལེ་དེའི་འོད་ཀྱི་ནམ་མཁའ་དྭངས་པ་ལ་ཉི་འོད་ཤར་བ་བཞིན་ཕྱི་ནང་སྣོད་བཅུད་ཐམས་ཅད་དྭངས་གསལ་གཡོ་བ་མེད་པའི་ངང་ལ་དྲན་འདུན་གྱི་
ཐིག་ལེ་ལ་སེམས་རྩེ་གཅིག་ཏུ་གཏད་དེ་གཉིད་དུ་འགྲོ་བར་བྱ། གལ་ཏེ་གཉིད་མ་བྱུང་ན་ཡང་བསྐྱར། འཕྲོ་རྒོད་ཀྱིས་གཡེང་ན་རིག་པ་སྒྲིམ་ལྷོད་སྙོམ་ལ་ངང་བསྲིངས་ཏེ་རྨི་ལམ་དང་གཉིད་ཀྱི་བར་རྣམ་རྟོག་གཞན་གྱིས་བར་མ་ཆོད་པར་བྱ། ཅུང་ཟད་རྣམ་རྟོག་གིས་བསྐྱོད་ནའང་མུ་འབྱམས་སུ་མ་སོང་བར། སྐྱེས་མཚམས་ནས། དེ་ལ་སྐྱོན་ཡོན་དང་། སྤང་བླང་བསུ་སྐྱེལ་གང་ཡང་མི་བྱེད་པར་དམིགས་རྟེན་གྱི་ཐིག་ལེ་ལ་སེམས་བརླན་ཏེ་བཞག་པས། སད་དུས་ཀྱི་སྣང་བ་རགས་པ་ནུབ་གཉིད་འཐུག་པོ་རང་མིན་པའི་གཉིད་དང་རྨི་ལམ་གྱི་སྣང་བའི་བར་དེར། རྣམ་རྟོག་སྣང་བ་ར་རི་ཞིག་འབྱུང་བ་དེ་རྨི་ལམ་གྱི་རྒྱུ་ཡིན་པས། དེ་ངོས་ཟིན་པ་བྱས་ན། དེ་ཁབ་མིག་ཏུ་སྐུད་པ་ཚུད་པ་ལྟར་རྨི་ལམ་མུ་འབྱོར་ཞིང་ཟིན་སླ་བར་འགྱུར། དེ་ལས་རྗེས་ཞིག་ན་གཉིད་འཐུག་གི་སྐབས་ཀྱི་སྟོང་པའི་ཡེ་ཤེས་རྨི་ལམ་མེད་པའི་གསལ་སྟོང་ཉིད་ནམ་མཁའི་དབྱིངས་ལྟར་སྣང་བ་ལ། དེའི་རང་རྩལ་བདེ་རླུང་ལྷའི་སྐུར་མངོན་པར་ལྡང་བར་འགྱུར་གསུངས། དེ་ལྟར་རྨི་ལམ་ཟིན་ཅིང་བསྟན་པ་ནི། ཉིན་པར་སྣང་བ་ཐམས་ཅད་རྨི་ལམ་གྱི་དྲན་འདུན་དྲག་པོ་དང་སྦྱར་ཏེ། བདེ་བའི་རྣལ་འབྱོར་གྱི་ཉི་ཟླ་ཁ་སྦྱོར་དང་། རྗེས་ཞི ག་གི་སྣོད་བཅུད་འོད་གསལ་དུ་འཇུག་ཅིང་། དེ་ལས་མེ་ལོང་ནང་གི་གཟུགས་བརྙན་བཞིན་འོད་གསལ་དེ་ལས་ལྷ་སྐུར་ལྡང་བའི་རྣལ་འབྱོར་ཁོ་ན་ལ་རྩེ་གཅིག་ཏུ་བསླབ་ཅིང་། མཚན་མོ་ཉལ་དུས་དོ་ནུབ་གཉིད་འོད་གསལ་དང་། རྨི་ལམ་ལྷ་སྐུ་སྒྱུ་མ་ལྟ་བུར་ལྡང་བར་བགྱིའོ་སྙམ་པའི་དྲན་འདུན་དྲག་པོས་སྔར་བཞིན་མགྲིན་པའི་ཐིག་ལེ་ལ་སེམས་བཟུང་ནས་ཉལ་བས་གཉིད་དང་རྨི་ལམ་གྱི་རྒྱུན་འགགས་ནས་གཉིད་འོད་གསལ་དང་རྨི་ལམ་ལྷ་སྐུ་སྒྱུ་མ་ལྟ་བུར་འཆར་ཞིང་། དེ་ལས་ཉིན་མཚན་གཉིས་བསྲེ་ནུས་ཤིང་ཏིང་ངེ་འཛིན་ལ་རང་དབང་འབྱོར་བས་ཡེ་ཤེས་ཀྱི་སྣང་བ་རབ་འབྱམས་སུ་འཆར་ཞིང་ཐམས་ཅད་ལ་རྒྱས་ཐེབས་པར་འགྱུར་གསུངས། གཞན་ཡང་རྨི་ལམ་གྱི་རྟེན་དེ་ལ། ཉིན་པར་རྨི་ལམ་འདུན་པའི་སྣང་བ་ཐམས་ཅད་ཞི་ཁྲོའི་སོ་སོའི་སྐུ་བསྒྱུར་ཞིང་། དེ་ནས་མང་པོ་སྤེལ་བ་དང་། ཡང་ཐམས་ཅད་གཅིག་ཏུ་བསྡུ་བ་དང་། རེས་འཁོར་བའི་ལས་སྣ་ཚོགས་དང་སྦྱར་ཏེ་ལས་སྣང་སོ་སོར་བསྒྱུར་ཞིང་དེ་ལས་
མང་པོ་སྤེལ་ནས་གཅིག་ཏུ་བསྡུ་བ་དང་། རེས་དག་པའི་ཞིང་ཁམས་བདེ་བ་ཅན་སོགས་དག་ཞིང་རྣམས་སུ་ཐོགས་མེད་དུ་ཕྱིན་ཏེ་སངས་རྒྱས་དང་བྱང་སེམས་རྣམས་ཀྱི་ཞལ་མཇལ་དབུགས་དབྱུང་ལུང་སྟོན་པ་དང་། རེས་རྩ་བའི་བླ་མའི་དྲུང་དུ་ཕྱིན་ནས་ཞལ་མཇལ་ཞིང་གསུང་ངག་གི་བདུད་རྩི་མྱོང་ནས་དེའི་དོན་ལ་བསམ་སྒོམ་གཉིས་ཀྱིས་སྒྲོ་འདོགས་གཅོད་པ་དང་། རེས་འགྲོ་བ་སོ་སོའི་ཞིང་ཁམས་རྣམས་སུ་དེ་དང་དེའི་གཟུགས་སུ་སྤྲུལ་ནས་སོ་སོའི་རེ་བ་སྐོང་ཞིང་དོན་བྱེད་པ་སོགས་རང་གི་བློ་ལ་གང་འདོད་དུ་སྤྲུལ་བསྒྱུར་བྱེད་ཅིང་། ཡང་རེས་འགའ་མེ་ཆུ་གཡང་སོགས་དང་སྲོག་ཆགས་གཅན་གཟན་སོགས་ཀྱིས་མཚོན་འཇིགས་སྐྲག་གི་སྣང་བ་དང་སྦྱར་ཏེ་གང་ཡ་ང་ཟ་དེར་ཐོག་རྫིས་ཀྱི་གཉེན་པོ་སྤྲད་ནས་མེད་སྣང་སྒྱུ་མའི་རང་རྩལ་བརྡོལ་ནས་བདེན་མེད་སྒྱུ་མ་ལྟ་བུ་ལ་འདའ་བར་བསླབ་པའོ། །དེ་ལྟར་ཉིན་པར་སྣང་བ་ཐམས་ཅད་རྨི་ལམ་དང་སྦྱར་ཏེ་དོན་རྣམས་ཉམས་འོག་ཏུ་ཆུབ་པར་བྱས་པའི་དབང་གིས་མཚན་མོ་ཉལ་དུས་རྨི་ལམ་གྱི་འདུན་ཤུགས་དྲག་པོས་དོ་ནུབ་གཉིད་འོད་གསལ་དང་། རྨི་ལམ་ལྷ་སྐུར་ལྡང་བར་བགྱིའོ་སྙམ་པའི་ངང་ནས་སྔར་བཞིན་མགྲིན་པའི་ཐིག་ལེ་ལ་སེམས་གཏད་དེ་རྣམ་རྟོག་གཞན་གྱིས་བར་མ་ཆོད་པར་ཉམས་སུ་བླངས་པས། རེ་ཞིག་ན་རྨི་ལམ་གྱི་རྟེན་དེས་ཉིན་མོ་ཇི་ལྟར་སྦྱང་པའི་དོན་རྣམས། ནམ་མཁར་འཕུར་ཞིང་ས་འོག་ཏུ་འཛུལ་བ་དང་འབྱུང་བ་ལྔ་ལ་རང་དབང་བསྒྱུར་ཞིང་ཐོགས་མེད་དུ་འགྲོ་བ་དང་། དག་པ་དང་མ་དག་པའི་ཞིང་ཁམས་རྣམས་སུ་ཕྱིན་ནས་དེ་དང་དེའི་དོན་རང་གི་བློ་ལ་གང་འདོད་དུ་སྤྲུལ་བསྒྱུར་སྒོ་ནས་བྱེད་པ་རྣམས་ཐོག་མར་འལ་འོལ་དོན་སྤྱི་ཙམ་དུ་འབྱུང་ཞིང་དེ་ནས་ཇེ་གསལ་ཇེ་བརྟན་གྱིས་ཐར་དེ་དག་རྣམས་ཀྱི་དོན་རྣམས་མངོན་སུམ་དུ་ཤེས་ཤིང་ཡང་དག་པའི་སྒོ་ནས་རང་གཞན་གྱི་དོན་གཉིས་བྱེད་པ་སོགས་ཐམས་ཅད་དབང་པོའི་མངོན་སུམ་སྤྱོད་ཡུལ་དུ་གཏན་ལ་ཕེབས་པར་འགྱུར་གསུངས། དེ་རྣམས་ནི་རྨི་ལམ་གྱི་ཞར་བྱུང་ཉེར་མཁོའི་ས་དཔྱད་སྣེ་མཚོན་ཙམ་དུ་བགྱིས་པའོ། །དེ་ལྟར་ཡང་ཡང་བཟུང་ཡང་མ་ཟིན་ན་འབྱམས་པ་ཡིན་པས། དེ་ལ་བཞི་སྟེ། སྟོང་འབྱམས་དང་། སྡུག་འབྱམས་དང་། པད་འབྱམས་དང་། དྲོད་འབྱམས་
སོ༑ ༑ཡང་སྲོད་ལ་མ་ཟིན་ན་འཛིན་དུས་གནད་གསུམ་དང་། སྲབ་མོའི་འོད་གསལ་དང་། གཉིད་འཐུག་གི་འོད་གསལ་གྱི་ཁྱད་པར། གཞན་ཡང་སྒྱུ་ལུས་དང་བྱེད་ཚུལ། འོད་གསལ་དང་བྱེད་ཚུལ། བར་དོ་གསུམ་དང་ཁྱེར་ཚུལ་རྣམས་ཀྱི་མན་ངག་དང་དབྱེ་བ་ནི་བླ་མ་དམ་པའི་ཞལ་ལུང་དང་གོང་མ་རྣམས་ཀྱི་གསུང་རབ་ལས་ཤེས་པར་བྱའོ། །དེ་ལྟར་མན་ངག་དེ་དང་ལྡན་པའི་གང་ཟག་གི་ཉིན་པར་བདེ་བའི་རྣལ་འབྱོར་གྱི་རིམ་པ་སྟེང་སྒོ་འཇུ་འདུལ་ཉི་ཟླ་ཁ་སྦྱོར་དང་རྗེས་ཞིག་འོད་གསལ་དུ་བཅུག་སྟེ་རྣམ་ཐར་བཞི་ལྡན་གྱི་སྟོང་ཉིད་མི་ཤིགས་པའི་ལྷ་སྐུར་ལྡང་བ་ལ་རྣམ་གཡེང་སྤངས་ནས་བསྒོམ་ཞིང་། མཚན་མོ་གཉིད་འོད་གསལ་དང་། རྨི་ལམ་ལྷ་སྐུར་བསྒྱུར། རང་འོད་ཀྱི་རིག་མ་དང་སྙོམས་པར་འཇུག་པའི་སྦྱོར་བ་ལ་བརྩོན་པས་ཞག་སུམ་ཅུ་ཕྲག་དྲུག་སྟེ་ཟླ་བ་དྲུག་གི་བར་དུ་ཉིན་མཚན་གཉིས་ཀ་སྐད་ཅིག་ཀྱང་མི་གཡེལ་བར་ཐ་མལ་གྱི་རྟོག་པ་ཀུན་སྤངས་ཏེ་བསྒོམ་པས་ཀུན་ནས་ཉོན་མོངས་པ་ཕྲ་རགས་ཀྱི་རྟེན་ལས་རླུང་རགས་པ་དང་ཕྲ་བ་རྣམས་ཕལ་ཆེར་མཉམ་རྗེས་ཀུན་ཏུ་ཐིམ་པ་དང་། ཁྱད་པར་དུའང་སྣང་གསུམ་གྱི་སྒྲིབ་པའི་རྟེན་འཕོ་བའི་རླུང་ཕྲ་མོ་རྩའི་འཁོར་ལོ་བདུན་ཙམ་དུ་སྤྱོད་པའང་མཉམ་བཞག་གི་དུས་སུ་འགོག་ནུས་པས་དེའི་ཚེ་ཉི་ཟླའི་འགྲོས་བཅིངས་པའི་སྟོབས་ཀྱིས་རང་ལུས་ཉིད་མི་ཐོགས་པའི་ཆུང་ངུར་བསྡུ་ནུས་པས་ཕྲ་བ་དང་། རེག་ན་ཡང་བ་སོགས་གནས་སྐབས་ཀྱི་རྡོ་རྗེའི་སྐུ་པྲ་ཕབ་བརྒྱད་དང་མཚུངས་པ་ཉིད་དུ་གནས་པར་འགྱུར་ལ། རྟེན་དེ་ལ་རྣམ་གཡེང་ཐམས་ཅད་སྤངས་ནས་ལས་ཀྱི་ཕྱག་རྒྱའམ་ཡེ་ཤེས་ཀྱི་ཕྱག་རྒྱ་གང་ལ་བརྟེན་ཀྱང་རུང་སྟེ་བརྩོན་འགྲུས་བར་མ་ཆད་པའི་ཚོགས་ཀྱི་སྤྱོད་པའི་ཉེ་རྒྱུ་ལ་བརྟེན་ནས་མཆོག་གི་དངོས་གྲུབ་མངོན་དུ་བྱེད་པར་འགྱུར་རོ། །གཉིས་པ་ཞར་བྱུང་བགེགས་སེལ་གནད་ཀྱི་མན་ངག་ནི། ཟབ་རྒྱ་ལས། གཏུམ་མོ་བསྒོམ་པའི་རྣལ་འབྱོར་ལ༔ ཞེས་སོགས་ཏེ་འདི་ལ་བཞི་ལས། དང་པོ་རླུང་ལོག་གི་བགེགས་སེལ་ནི། རླུང་སྦྱོར་སྒོམ་པའི་ཤེས་པ་འཕྱོ་བ། སྙིང་མི་དགའ་རོ་སྟོད་ན་བ་མགོ་ལ་ཟུག་ཟེར་སོགས་སྐྱེ་ན་དེ་བསལ་བ་ནི། རང་ལུས་སྟོང་པར་བསྒོམ་ལ་རླུང་ཐེངས་འགའ་རེ་བསྒོམས་
རྗེས་སྔ་མ་གསུམ་ལ་སྙིང་ཁའི་ཐད་མདུན་རྒྱབ་དང་། མགོ་གཟེར་བ་སོགས་ལུས་ཀྱི་ཆ་ཤས་ན་བ་ལ་གང་ན་སར་བུ་ག་ཧར་བྱུང་དུ་དོད་པ་ལས་རླུང་དང་ནད་རྣམས་ཉི་ཟེར་གྱི་རྡུལ་བཞིན་དུ་བུན་བུན་དྲག་ཏུ་འཐོན་པས་ཕན་ནོ། །འཐོན་པས་ལུས་ནང་སྟོང་སང་སང་སོང་བར་མོས་ལ༑ ལག་གཉིས་ཁུ་ཚུར་མདུན་དུ་བརྐྱང་རྗེས་ཁུ་ཚུར་གྱི་རྒྱབ་ནུ་སྟེང་དང་ལག་ངར་རྩིབ་ལོག་ལ་བརྡེབ་པ་དང་མཉམ་དུ་ཧ་ཐུང་དྲག་ཏུ་བཏོན་པས་ཕན་ནོ། །གཉིས་པ་དྲོད་ཀྱི་བགེགས་སེལ་ནི། གཏུམ་མོ་བསྒོམ་པས་ཕྱི་རུ་དྲོད་འབྱུང་ན་ལྡེ ང་པོ་ཙམ་ལས་བོགས་མི་འབྱུང་བས་དེ་སྡུད་པ་ནི་སྲིན་ཞལ་འབྱེད་འཛུམ་མང་པོ་བྱེད་པས་འདུས་པར་འགྱུར་རོ། །གལ་ཏེ་ཐོག་མར་སྙིང་གར་དྲོད་བྱུང་ན་མྱུར་དུ་ཡལ་འགྲོ་བས། དེ་འབེབས་པའི་གནད་ནི། ལྟེ་འོག་ཏུ་ཁ་སྦྱོར་དྲག་པོ་བསྒོམས་པས་སེལ་ལོ། །གསུམ་པ་ཞར་བྱུང་པདྨ་ཀུན་འདུས་བགེགས་སེལ་ནི། ཆོས་ཀྱི་གཏུམ་མོ་དང་། བདེ་བའི་རྣལ་འབྱོར་བསྒོམ་པས་བདེ་བ་རྒྱས་ནས་ཁམས་འཕོ་བ་སྙམ་བྱས་ན་དེ་བསལ་བ་ལ། ཆགས་སྲེད་བག་ཆགས་ཀྱི་རྒྱུ་ལས་བྱུང་བ་ཡིན་ན་ཆགས་རྟོག་གི་བདེ་བ་ལ་མ་ཆགས་པར་བྱས་ཏེ། བདེན་མེད་དུ་སྦྱང་པས་སེལ། གྲིབ་དང་དམ་སེལ་གྱིས་འཛག་ན་དབང་ཞུ་ཞིང་ཚོགས་འཁོར་སོགས་ཉམས་གྲིབ་སེལ་བའི་ཐབས་ལ་འབད། གྲང་བས་འཛག་པ་དང་ནད་ཀྱིས་འཛག་པ་ན་འཛིན་ལྡོག་དགྲམ་པའི་གནད་ཐབས་ལམ་དུ་བཤད་པ་ལྟ་བུས་བསལ། གང་ལྟར་ཡང་ཐབས་གཅིག་གིས་བསལ་བ་ནི། ཐོག་མར་རླུང་ཁུག་པ་གཅིག་གཉིས་ཙམ་བཟུང་རྗེས་རང་གི་ལུས་ཀྱི་སྤྱི་བོ་ནས་གསང་གནས་ཀྱི་བར་དབུ་མ་དྭངས་གསལ་སྦུགས་སྟོང་གི་རྣམ་པ་ཡང་ཡང་ཁྲོལ་ལེ་བར་བསྒོམས་པས་གསང་བའི་འཁོར་ལོའི་ཐད་དུ་ཧཱུཾ་ཡིག་དམར་པོ་མགོ་བོ་ནང་བསྟན་པ་རྡོ་རྗེ་ནོར་བུའི་བུ་གའི་ཕྱི་ནས་པདྨ་འདབ་མ་རྒྱས་པ་རྩ་བ་བ་ཐག་ལྟ་བུ་དེ་ནོར་བུའི་བུ་གའི་ནང་ནས་ཡར་སོང་བ་ཧཱུཾ་ཡིག་གི་ཞབས་ཀྱུ་དང་འབྲེལ་བར་བསྒོམས་ལ། ལུས་ཉ་བཞི་སྒྲིམ་ཞིང་སོར་མོ་རྣམས་བཀུམ། ལྟེ་བ་ཚིགས་པ་ལ་གཅེར། ལྕེ་ཕུགས་སུ་ལྡོག མིག་སྤྱི་བོར་གཏད། ལག་པ་གཙུག་ཏོར་གྱི་ཕྱག་རྒྱ་སྤྱི་བོར་མགོ་མཇུག་ལྡོག་ལ་བཅའ། ངག་ཏུ་ཧཱུཾ་འདྲེན་དྲག་ལ་རིང་བའི་རླུང་ཕྱིར་བསལ་
ནས་གྱེན་དུ་དྲངས། དེ་དུས་དམིགས་པ་གསང་བའི་ཧཱུཾ་གྱེན་དུ་མདའ་འཕང་པ་ལྟར་སོང་བས། དེའི་ཞབས་ཀྱུ་པདྨའི་རྩ་བ་ནས་འཐེན་པས་འདབ་མ་བུ་གར་མང་ཤོང་སྟེ། རྡོ་རྗེ་རྒྱུ་མའི་ཕྱི་ནང་སློག་པ་བཞིན་སོང་བ་དབུ་མའི་ལམ་བརྒྱུད་སྤྱི་བོའི་སྟེང་དུ་ཧཱུཾ་དང་ནོར་བུའི་ཕྱིར་སློག་པ་གཉིས་སྤྱི་བོར་བརྒྱང་སྟེ་འདུག་པར་བསམ་ལ་རླུང་ཕྱིར་བཟུང་། འདི་ཡང་ཡང་བསྒོམས་པས་འཛག་པའི་རིགས་གང་ཡིན་ཀྱང་ཆོད། ལར་བྱང་སེམས་ཉམས་པའི་རྐྱེན་ཧ་ཅང་ལུས་བྲེལ་བ་དང་། ཧ་ཅང་ཚྭ་བ་དང་། ཧ་ཅང་འཁྱགས་པར་མི་བྱ། འཕོ་ཉམས་བྱེད་པའི་ཚེ་ལུས་འགྱུ ར་བ་དང་འདར་བ་སོགས་ཡེ་མི་བྱ་བར་བཟུང་བས་ཐབས་སླེབས་པ་གནད་ཆེ། གལ་ཏེ་གཤང་གཅི་དང་མཉམ་དུ་འཛག་ན་འདོར་བའི་ཚེ་སོར་མོ་བསྐུམ་མིག་ཡིད་ལྕེ་གསུམ་གྱེན་དུ་ལྟ། ལྟེ་བ་བུམ་ཅན་ཅི་ནུས་བཟུང་རྗེས་འདོར་བས་སེལ། རྨི་ལམ་དུ་འཛག་དོགས་ན་རང་གི་རྡོ་རྗེ་པགས་པས་མགོ་བཏུམ་ལ་ཁོང་པར་སྦས་པས་རྟིང་པ་གཡས་གཡོན་གང་རིགས་ཀྱིས་མནན་ཅིང་རྐང་པ་ཅིག་ཤོས་བརྐྱངས་ནས་ཉལ་བས་མི་འཛག་ཅིང་དེས་མ་ཕན་ན་ཉལ་ཁར་རང་དབང་ཕྱུག་ཆེན་པོ་སྐུ་མདོག་ནག་པོ་རལ་པའི་ཐོར་ཚུགས་ཅན་ལུས་ཐམས་ཅད་ལ་ཐལ་བས་བྱུག་པ་ལིངྒ་གྱེན་དུ་བསྒྲེང་ཕྱག་གཡས་རྨ་བྱའི་སྒྲོ་ཆུན་བཟུང་ནས་རང་གི་མཚན་མ་ལ་ནང་རོལ་དུ་བྱབ་པར་བྱེད་པའི་སྐུར་བསྒོམ་ལ། ༀ་ཧ་རི་ནི་ས་ཏནྟ་ཚུག་ཚུག་སྭཱ་ཧཱ། ཞེས་ཅི་ནུས་བཟླ་སྟེ། རང་གི་རྡོ་རྗེ་པགས་པས་མགོ་བཏུམ་ལ་ཁོང་པར་སྦས་པ་སྔར་བཞིན་རྟིང་པ་གཡས་གཡོན་གང་རིགས་ཀྱིས་མནན་ཅིང་། རྐང་པ་ཅིག་ཤོས་བརྐྱངས་ནས་ཉལ་བས་སེལ་ཏེ་ཤིན་ཏུ་ཟབ། བཞི་པ་མི་རྟོག་པའི་བགེགས་སེལ་བ་ནི། རྣམ་རྟོག་ཐམས་ཅད་མི་རྟོག་པའི་དབྱིངས་སུ་ཐིམ་པས་རང་གཞན་གྱི་སྣང་བ་ཐམས་ཅད་ཅི་ཡང་མེད་པ་འདྲ་བའི་སྣང་བས་འཇིགས་སྐྲག་སྐྱེས་ནའང་སྟོང་པའི་ཉམས་ཏེ་སྣ་རྩེར་ཉི་མའི་དཀྱིལ་འཁོར་བསྒོམས་པས་སེལ་ལོ། །དེ་ལྟར་གེགས་སེལ་བ་བཞི་དང་བདེ་དྲོད་སྟོང་ཉིད་དུ་རྒྱས་འདེབས་ཡེ་ཤེས་ཀྱི་གཏུམ་མོ་རྣམས་ཟབ་རྒྱ་ལས་ཉེར་མཁོའི་ཚུལ་དུ་བླངས་ནས་དཀྱུས་སུ་བྲིས་ཤིང་གཞན་ཡང་ཡབ་བཀའི་རྩ་ཁྲིད་རྡོ་རྗེ་གསུམ་གྱི་རྣལ་འབྱོར་དང་། དེ་ལས་མི་འགྱུར་རྟག་པའི་འབྲས་
བུ་མངོན་དུ་བྱེད་ཚུལ་ལ་དབང་པོ་རབ་ཚེ་འདིར་མཐོང་བའི་ཆོས་ལ། འབྲིང་བར་དོའི་འགྲུབ་ཚུལ། ཐ་མ་ཚེ་ཕྱི་མར་མཆོག་གི་དངོས་གྲུབ་ལ་སྦྱོར་བ། ལེ་ལོ་ཅན་བཙན་ཐབས་འཕོ་བའི་མན་ངག་གིས་མཚམས་སྦྱོར་བ་དང་། དེ་རྣམས་ཀྱི་ཆ་རྐྱེན་ཡན་ལག་ཏུ། གཏུམ་མོ། ཐབས་ལམ། མཚན་མོའི་རྣལ་འབྱོར། རྫོགས་རིམ་ཨ་ཏིའི་མན་ངག་འདི་ཉིད་ཀྱི་ཞར་བྱུང་ངམ། ཕན་ཚུན་འབྲེལ་ཆགས་སུ་བསྒོམ་ནའང་། གནས་སྐབས་སུ་འཇུག་པ་བདེ་ཞིང་གནད་ཚང་ལ་བོགས་འདོན་བགེགས་སེལ་དུ་འགྲོ་བས་འགྲུབ་ན་ལེགས་པར་འགྱུར་གསུངས། དེ་རྣམས་ནི་ཡན་ལག་གི་རྣལ་འབྱོར་རོ། །གསུམ་པ་རྗེས་ཀྱི་རིམ་པ་ནི། ལམ་སོ་སོའི་ཐད་དུ་ཉམས་སུ་མྱོང་བའི་རྟགས་ཚད་དང་ཇི་ལྟར་ཉམས་སུ་མྱོང་བའི་དོན་ལ་རིམ་གྱིས་ངོ་སྤྲོད་པ། གེགས་སེལ་དང་བོགས་འདོན་རྣམས་ནི་གཞན་ལས་ཤེས་པར་བྱ་ཞིང་། ཁྱད་པར་གནད་མཐར་ཐུག་པ་རྣམས་ནི་ཡེ་ཤེས་ཀྱི་སྐུ་ཅན་བླ་མ་དམ་པའི་ཞལ་ལུང་ཁོ་ན་ལས། མོས་དགེའི་མཐུ་ཕུན་སུམ་ཚོགས་པ་ལས་མྱོང་ཞིང་ཤེས་པར་བྱས་ནས་ཡེ་ཤེས་ཀྱི་རྩལ་ཁ་ཕྱོགས་མེད་དུ་རྒྱས་པར་བྱེད་པའི་ཐབས་ཟབ་མོས་ཉམས་སུ་བླངས་པས། ཉམས་རྟོགས་དབྱར་གྱི་མྱུ་གུ་ལྟར་འཕེལ་ནས་མྱུར་བ་ཉིད་དུ་གནས་སྐབས་ཀྱི་འབྲས་བུ་སློབ་པའི་ཟུང་འཇུག་རིན་པོ་ཆེ་རྣམ་པ་བཞིས་བསྡུས་པའི་ས་ལམ་རྣམས་བགྲོད་དེ་མཐར་ཐུག་གི་འབྲས་བུ་མི་སློབ་པའི་ཟུང་འཇུག་པདྨ་གར་གྱི་དབང་ཕྱུག་མཁའ་འགྲོ་གསང་བ་ཡེ་ཤེས་ཀྱི་གོ་འཕང་བླ་ན་མེད་པ་བདེ་བླག་
ཏུ་ཐོབ་པར་འགྱུར་རོ། །༈ ཟབ་ལམ་མཁའ་འགྲོ་མན་ངག་ཡིད་བཞིན་དང་། །རྣམ་གྲོལ་ཕན་བདེའི་ལམ་བཟང 
་ཐར་པའི་སྒོར། །བློ་དམན་འཇུག་བདེའི་ཁྲིད་ཡིག་ཟིན་ཐོ་རུ། །བཀོད་པས་བླ་མ་མཁའ་འགྲོས་དབུགས་དབྱུང་མཛོད། །དེ་ལྟར་མཁའ་སྤྱོད་མྱུར་ལམ་ཟབ་མོའི་དོན། །བདག་ལྟས་གནས་ལུགས་ཇི་བཞིན་རྟོགས་མིན་ཀྱང་། །ལམ་འདིར་འཇུག་ལ་ཕན་སེམས་དང་བས་བྲིས། །ནོངས་པ་གང་མཆིས་མཁའ་འགྲོས་བཟོད་མཛད་གསོལ། །འདི་བྲིས་དགེ་བས་མར་
གྱུར་འགྲོ་བ་ཀུན། །སྒྲིབ་གཉིས་མུན་བཅོམ་ཚོགས་གཉིས་རབ་རྫོགས་ནས། །རྒྱལ་ཀུན་བསྐྱེད་ཡུམ་བདེ་ཆེན་ཌཱཀི་མའི། །གོ་འཕང་དཀའ་བ་མེད་པར་མྱུར་ཐོབ་ཤོག །ཅེས་མཁའ་འགྲོ་གསང་བ་ཡེ་ཤེས་ཀྱི་རིམ་གཉིས་ཟབ་མོའི་རྣལ་འབྱོར་གྱི་ལམ་རིམ་ཁྲིད་ཡིག་མན་ངག་གསལ་སྒྲོན་ཞེས་བྱ་བ་འདི་ནི། དད་སྟོབས་བློ་གྲོས་ཀྱི་དབང་ཕྱུག་སྡེ་པ་ཡང་གྲོང་གནས་འགྱུར་མེད་བསྟན་འཛིན་མཆོག་གྲུབ་ཀྱིས་ནན་ཏན་ཆེན་པོས་བསྐུལ་བ་དང་། དེ་དང་ཉེ་ཆར་བྱ་བཏང་ཀུན་སྤངས་འགྱུར་མེད་རྣམ་གྲོལ་དང་། འགྱུར་མེད་མཐར་ཕྱིན་སོགས་རྡོ་རྗེའི་མཆེད་པོ་འགའ་ཞིག་ལ་ཁྲིད་སྤུང་ཞིག་བགྱིས་སྐབས་ཁྲིད་ཀྱི་དམིགས་རྐང་རྣམས་ཟིན་ཐོར་བཏབ་པ་སླར་ཡང་བྲི་བསྣན་ཅུང་ཟད་བྱས་ཏེ། བཀའ་དྲིན་མཉམ་མེད་རྗེ་བཙུན་བླ་མ་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པ་སོགས་དམ་པ་དུ་མའི་ཞབས་རྡུལ་སྤྱི་བོར་ལེན་ཞིང་བཀའ་དྲིན་གྱིས་འཚོ་བའི་སྨྱོས་བཙུན་རྨོངས་པ་མི་འགྱུར་དཔལ་སྒྲོན་གྱིས་རང་ལོ་སོ་བཞི་ཆུ་ཕོ་བྱི་བའི་ལོ་མཇུག་དབྱུག་ཟླའི་མར་ངོའི་མཁའ་འགྲོ་འདུ་བའི་དུས་ཆེན་ཚེས་བཅུའི་ཉིན་འོག་མིན་ཨོ་རྒྱན་སྨིན་གྲོལ་གླིང་གི་ཉེ་འདབས་མཁའ་འགྲོ་བདེ་ཆེན་གླིང་གི་དབེན་གནས་བསམ་གཏན་གྱི་ཁང་བུར་སྦྱར་བས་ཡི་གེ་པ་ནི་དགེ་བའི་བཤེས་གཉེན་ཨོ་རྒྱན་དཀོན་མཆོག་རབ་བརྟན་གྱིས་བགྱིས་པའོ། །འདིས་ཀྱང་ཀུན་མཁྱེན་རྒྱལ་བའི་བསྟན་པ་རིན་པོ་ཆེ་འདི་ཉིད་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག །བཀྲ་ཤིས།། །