ཡུལ་དགོན་དུ་བསྟན་པ་ཉམས་གསོ་དང་འཆད་གྲྭ་མང་པོའི་མ་ཕྱིའི་སྲོལ་ཡིག་གཏན་འབེབས་བྱས་པའི་བསྐོར་གྱི་རྣམ་ཐར།

ཕྱི་ལོ། ༢༠༠༥ རབ་གནས་ཤིང་བྱ་ལོའི་བོད་ཟླ་བཞི་པའི་ཚེས་མགོར་ཡུལ་དགོན་དུ་གདན་འཁོད་ནས། གྲྭ་རྒྱུན་སློབ་གྲྭ་དབྱངས་ཅན་དགའ་ཚལ་དངོས་སུ་དབུ་ཚུགས་པར་བྱས་ཤིང༌། ཟླ་དེའི་ཚེས་བཅུ་གཅིག་གི་ཕྱི་དྲོར་འབའ་མདའ་བླ་མ་ཐུབ་བསྟན་དགེ་ལེགས་རྒྱ་མཚོའི་བསྡུས་གྲྭའི་སྤྱི་དོན་རིན་པོ་ཆེའི་སྒྲོན་མེའི་ཁྲིད་དབུ་བཟུང་སྟེ་བཤད་གྲྭ་སླར་གསོ་མཛད་ཅིང༌། རྨད་བྱུང་ཐོས་བསམ་གླིང་ཞེས་མཚན་གསོལ་གནང་སྟེ། རྩོད་གྲྭ་གསར་འཛུགས་ཀྱི་བཀའ་དྲིན་བསྐྱངས། ཕྲན་ཡང་དུས་དེར་མགོན་པོ་གང་གི་ཞབས་ཟུང་རིགས་ཀྱི་མེ་ཏོག་ཏུ་ཐོག་མར་ཕོག་པའི་སྐལ་བཟང་གི་དགའ་སྟོན་ཆེན་པོ་མངོན་པར་ཤར་བ་ལགས་སོ། །དེ་སྔོན་དགོན་པའི་གྲྭ་ཤག་རྣམས་སུ་རྒན་རྒོན་ཁྱིམ་པ་དག་འདུག་གནས་སུ་གྱུར་ཏེ། གྲྭ་བ་རེ་གཉིས་ཙམ་ལས་མེད་པ་ལ། དགོན་ནང་དུ་གྲོང་བའི་གནས་ཚང་བྱས་ཏེ་ཞག་འདུག་མི་ཆོག་པ་དང༌། གྲྭ་བ་རྣམས་ཀྱིས་གཟན་ཤམ་ལེགས་པར་བགོ་དགོས་པའི་ཆོས་འདུལ་བ་ལྟར་གྱི་སྒྲིག་ཁྲིམས་བསྡམས་ཤིང༌། སྐྱ་སར་བབས་ཏེ་བསླབ་པ་ཨ་ཞུ་ཡང་ཞུ་བྱེད་མི་རྣམས་ལ་ཡང་ཕམ་པ་འཆབ་བཅས་ཀྱིས་ཉམས་པ་སླར་གསོ་མི་རུང་བ་དང༌། དགེ་འདུན་པའི་གྲྭལ་དུ་འཚོགས་མི་ཉན་པའི་ཚུལ་ཆོས་འདུལ་བ་དཔང་དུ་བཞག་སྟེ་ཡང་ནས་ཡང་དུ་བཀའ་གསུང་ནན་མོ་ཕེབས། སྤྱིར་བཏང༌། བཤེས་གཉེན་རིན་པོ་ཆེ་འདི་ཉིད་དགོན་པ་གང་དུ་འབྱོན་ཡང༌། ཆོས་འདུལ་བ་ལྟར་གྱི་བསྟན་པ་དག་ཐེར་གྱི་ཕྱོགས་དང༌། བཤད་སྒྲུབ་ཀྱི་སྡེ་དགོས་ཚུལ་གྱི་བཀའ་སློབ་སུ་ལ་འཕྲོད་མིན་མ་ལྟོས་པར་རྒྱུན་ཆགས་སུ་གསུངས་པ་ཡིན་ཏེ། བཤེས་གཉེན་རིན་པོ་ཆེ་འདི་ཉིད་ཀྱི་སྡོམ་གསུམ་བསླབ་བྱའི་གཞུང་དུ་ཡང་ཕམ་པའམ་ཕམ་འདྲ་འཆབ་བཅས་ཀྱིས་ཉམས་ན་རབ་བྱུང་གི་སྡོམ་པ་སླར་གསོ་མི་རུང་བ་རྩལ་འདོན་རྒྱ་ཆེན་མཛད་པའི་དགོས་པ་ཡང་ཡུལ་དུས་ལ་གཟིགས་ནས་གསུངས་པའོ། །ལོ་དེའི་སྟོན་ཁ་ནས་དགུན་ཟླ་བར་མའི་སྨད་བར་དུ། གཞན་སྟོང་དབུ་མའི་རྒྱན་ལུང་སྦྱོར་དང་བཅས་པ། རྒྱུ་འབྲས་དབུ་མའི་ཐིགས་ལེ། དབུ་མ་ཡིད་བཞིན་ནོར་བུ། གཞན་སྟོང་སྙིང་བོ། ཚུལ་གཉིས་རྣམ་འབྱེད། ཟབ་དོན་ཉེར་གཅིག་རྣམས་ཀྱི་ཟབ་ཁྲིད་མཛད། ལོ་དེར་ལམ་རིམ་འཛིན་གྲྭ་ལ་གཞན་སྟོང་འཇིགས་མེད་གདོང་ལྔའི་ང་རོ་དང༌། ཏཱ་ར་ནཱ་ཐའི་བཟང་སྤྱོད་འགྲེལ་བའི་བཀའ་ཁྲིད་ཞིབ་རྒྱས་སུ་བསྩལ་ཏེ། རྗེ་བཙུན་ཏཱ་ར་ནཱ་ཐ་ཡབ་སྲས་རྣམས་སྐུ་གྲོངས་པ་ནས་ད་ལྟའི་བར་དུ་མདོ་ཕྱོགས་དབུ་མ་གཞན་སྟོང་གི་ཆོས་བསྐོར་འདི་རྣམས་ལ་འཆད་ཉན་ཉམས་རྒུད་དུ་བསྟུད་མར་ཕྱིན་ནས། ཕལ་ཆེར་ཁྲིད་རྒྱུན་ཙམ་ཡང་མ་ལུས་པར་མ་ཟད། གླེགས་བམ་དུ་བཞུགས་སུ་གསོལ་བ་ལས་གཞུང་བཟང་འདི་འདྲ་བ་དག་གི་མཚན་ཙམ་གླེང་མོལ་བྱེད་པ་ཡང་མེད་པར་གྱུར་ཅིང༌། འཆད་ལུགས་ཀྱང་ཀུན་མཁྱེན་དོལ་པོ་པ་དུས་གསུམ་སངས་རྒྱས་ཡབ་སྲས་དང༌། རྗེ་སྒྲོལ་མགོན་གྱི་གསུང་སྒྲོས་ལ་བསྟུན་སྲོལ་ཉམས་ནས། ངའི་བླ་མའི་གཞན་སྟོང་དང་ཁོའི་བླ་མའི་གཞན་སྟོང་དང༌། དགོན་པ་ག་གེ་མོའི་གཞན་སྟོང་ཟེར་བ་ལྟ་བུ་ཅི་ཡིན་འདི་མིན་མེད་པའི་གནས་སུ་ལྷགས་པ་ན། འཆད་རྩོད་ཟུང་འབྲེལ་གྱི་སྒོ་ནས་གཞན་སྟོང་དབུ་མ་ཆེན་པོའི་ཤིང་རྟའི་སྲོལ་སླར་ཡང་ཕྱེས་པ་ཡིན་ལ། ད་དུང་ཕྱིས་ཀྱི་བླ་མ་སོ་སོའི་ལུགས་ཡིན་ཟེར་བའི་ངག་སྒྲོས་ཐར་ཐོར་དག་བོར་ནས། ཀུན་མཁྱེན་དོལ་བོ་པ་ཡབ་སྲས་དང་རྗེ་སྒྲོལ་བའི་མགོན་པོ་མཆོག་གི་གཞུང་ཁོ་ན་དཔང་བོར་བྱས་ཏེ། ཆོས་སྐད་དང་ཁས་ལེན་ཐམས་ཅད་བྱས་པས། འཕྲིན་ལས་རྣམ་པར་དཀར་བ་ཆེན་པོ་དེ་ཉིད་ཀྱིས་ཇོ་ནང་གི་དགོན་པ་ཐམས་ཅད་ལ་ཁྱབ་པར་གྱུར། དེ་སྔོན་དུ་གཞན་སྟོང་གི་ཆོས་སྐད་མང་བོ་ཞིག་མི་མངོན་པའི་དབྱིངས་སུ་ཡལ་ཟིན་པ་ལྟ་བུ་ལ། བཤེས་གཉེན་རིན་པོ་ཆེ་འདི་ཉིད་ཀྱིས་སླར་ཡང་མི་མངོན་པའི་དབྱིངས་ནས་འཇིག་རྟེན་སྐྱེ་འགྲོའི་བགོ་སྐལ་དུ་མངོན་པར་བྱས་པ་ཡིན་ནོ། །ཨ་སྐྱོང་དགོན་བཤད་གྲྭ་རྨད་བྱུང་ཐོས་བསམ་གླིང་གི་སྒྲིག་ཡིག་གཏན་འབེབས་བཟོས་ཤིང༌། བཤེས་གཉེན་རིན་པོ་ཆེ་ཕྱོགས་ཡར་མར་དུ་ཕེབས་སྐབས་དགོན་སྡེ་མང་པོར་སྒྲིག་ཡིག་དེ་ཉིད་གཞིར་བཟུང་ནས་ཡུལ་དུས་དང་བསྟུན་ཞིང་རིམ་པས་འཐུས་སྒོ་ཇེ་ཚང་དུ་བཏང་ནས། ད་ལྟའི་ཆར་ཇོ་ནང་གི་དགོན་སྡེ་སློབ་གཉེར་རྐང་ཚུགས་པ་ཕལ་ཆེར་གྱི་སྒྲིག་ཡིག་རྣམས་བཤེས་གཉེན་རིན་པོ་ཆེ་ཉིད་ཀྱིས་དངོས་སུ་གཏན་འབེབས་གནང་བའམ། མ་གཞི་འདི་ལ་བྱས་ཏེ་བཟོས་པ་ཤ་སྟག་ཡིན། ཁྱད་པར་དུ་ཇོ་ནང་གི་འཆད་ཉན་གྱི་སྡེ་ཚང་མར་ཉིན་རེ་བཞིན་ཡིག་བརྒྱ་དང་བཟང་སྤྱོད་སྨོན་ལམ་གསུང་སྲོལ་གྱི་དམིགས་དཔེ་བཟང་པོ་ཞིག་ཡོད་པ་དེ་ཡང༌། བཤེས་གཉེན་རིན་པོ་ཆེ་འདི་ཉིད་ཀྱི་ཕྱག་སྲོལ་འཕྲིན་ལས་ཀྱི་འཇུག་པ་ཁོ་ན་ཡིན་པས། འདི་གཅིག་པུའི་རྣམ་པར་དཀར་བའི་དགེ་ཚོགས་ཀྱི་འཕྲིན་ལས་དེ་ཡང་བསམ་གྱིས་མི་ཁྱབ་པ་ཁོ་ནའི་སྤྱོད་ཡུལ་ཡིན། དེ་ཡང་དགག་དགོས་ཁྱད་པར་ཅན་ལ་བརྟེན་ནས་བཞག་པ་ཡིན་ཏེ། ཉིན་མ་རེ་རེ་བཞིན་དུ་གཉེན་པོ་སྟོབས་བཞི་ཚང་བའི་སྒོ་ནས་ཡི་གེ་བརྒྱ་བ་ཉི་ཤུ་རྩ་གཅིག་རེ་བཏོན་པར་བྱས་ན། ཐོས་བསམ་གྱི་ཤེས་རབ་དང་སྒོམ་པའི་ཉམས་རྟོགས་མི་སྐྱེ་བ་ཚང་མ་ལས་སྒྲིབ་ཀྱིས་གནོད་པ་ཤས་ཆེ་བས། ལས་སྒྲིབ་སྦྱོང་བའི་གནད་ཁྱད་པར་ཅན་ཡིན་པ་དང༌། དེང་སང་སོར་བྱང་སྔགས་གསུམ་གྱི་སྡིག་ལྟུང་མང་པོ་འབྱུང་སླ་ལ་བྱུང་དང་འབྱུང་མཁན་ཧ་ཅང་གྲངས་མང་སྟབས། དམ་ཚིག་ཉམས་ཆགས་ཀྱི་སྡིག་ལྟུང་མང་པོ་རྒྱུད་ལ་འགྲོགས་ན་ཐོས་བསམ་སྒོམ་གསུམ་གང་ལ་ཡང་མཐར་མི་ཕྱིན་པའི་བར་ཆད་འཇུག་པས། ཡི་གེ་བརྒྱ་པ་ལ་བརྟེན་ནས་ལས་སྒྲིབ་སྦྱོང་བ་གལ་ཆེ་ཚུལ་དང༌། སྔོན་བྱོན་སྐྱེས་བུ་དམ་པ་ཚོའི་གསུང་ན། ཉིན་རེར་ཡི་གེ་བརྒྱ་པ་ཉི་ཤུ་རྩ་གཅིག་རེ་སྟོབས་བཞི་ཚང་བས་བཟླས་ན་ལྟུང་བའི་འཕེལ་ཁ་ཆད་པར་གསུངས་ཡོད་པ་དང༌། སློབ་དཔོན་དང་སློབ་མའི་རྒྱུད་སྡིག་ལྟུང་ཆེ་ན་བསྟན་འགྲོའི་ལས་དོན་སྨོན་ལམ་ཇི་སྙེད་བྱས་པའི་སྨོན་ལམ་རྣམས་འགྲུབ་དཀའ་བ་དང༌། རྒྱུད་སྡིག་ལྟུང་ཆེན་པོ་དང་རྟག་པར་གནས་པས་འཇིག་རྟེན་དྲེགས་ཤུལ་ཅན་འགའ་རེ་ལས་གཞན་བཅོམ་ལྡན་འདས་ནས་མཁས་གྲུབ་གོང་མ་དག་གིས་དམ་བཞག་བསྟན་སྲུང་རྣམས་ཀྱི་མེལ་ཚེ་བྱ་ར་ལས་འགོངས་ཏེ། མཁའ་འགྲོ་དང་ཆོས་སྐྱོང་གི་སྡོང་གྲོགས་མེད་པར་མ་ཟད། འཁུ་ལྡོག་བཀའ་ཆད་བཀྲ་མི་ཤིས་པ་མང་དུ་འབྱུང་ཚུལ་དང༌། ཇོ་བོ་རྗེ་ཆེན་པོའི་རྣམ་ཐར་ན་ཡང་སྡིག་ལྟུང་འདག་པར་བྱེད་པ་ཡི་གེ་བརྒྱ་པ་འདི་སྐུ་ཚེའི་རྒྱུན་གྱི་ཉམས་ལེན་དུ་བཟུང་ནས་གལ་ཆེ་བར་གསུངས་ཡོད་པ་དང༌། ཆོས་བརྒྱུད་རིས་སུ་མ་མཆིས་པའི་སྔོན་འགྲོ་སྡིག་སྦྱོང་ཡིག་བརྒྱ་ཚད་ལྡན་གལ་ཆེ་བར་སྔོན་ནས་ད་ལྟའི་བར་དུ་གསུངས་ཤིང་ལག་ལེན་ལ་བསྟར་བཞིན་པ་སོགས་དགག་བྱ་དང་དགོས་པའི་རྒྱུ་མཚན་མང་དུ་གཟིགས་ནས་བཞག་པ་ཡིན་པར་གསུངས་སོ། །བཟང་སྤྱོད་སྨོན་ལམ་ནི། བྱང་ཆུབ་སེམས་དཔའི་སྨོན་ལམ་ཐམས་ཅད་ཀྱི་རྒྱལ་པོ་དང༌། སྨོན་ལམ་ཐམས་ཅད་འདུས་པ་ཡིན་པར་མདོ་སྡེ་དང་བསྟན་བཅོས་རྣམས་ཞལ་གཅིག་པར་མང་དུ་གསུངས་པ་དང༌། རྗེ་ཙོང་ཁ་པ་ཆེན་པོའི་ལམ་རིམ་ཆེན་མོ་ལས། ཞིང་དམ་པ་ལ་དགེ་རྩ་བསྐྲུན་པའི་མཐུ་ལས་ལམ་གྱི་རིམ་པ་རྣམས་ལ་བློའི་མཐུ་ཇེ་རྒྱས་སུ་འགྲོ་བས་མཉན་ན་ཚིག་མི་ཟིན། བསམས་ན་དོན་མི་གོ། བསྒོམས་ན་རྒྱུད་ལ་མི་སྐྱེ་བའི་བློའི་མཐུ་ཤིན་ཏུ་ཆུང་བའི་དུས་སུ་ཞིང་གི་མཐུ་ལ་བརྟེན་པ་ནི་མན་ངག་ཡིན་ནོ། །གསུངས་པ་བཞིན། ཐོས་བསམ་སྒོམ་པ་གང་བྱས་ཀྱང་ཞིང་དམ་པ་ལ་ཚོགས་གསོག་སྨོན་ལམ་གྱི་རྒྱབ་རྟེན་ཡོད་པ་ཞིག་གལ་ཆེ་བ་དང༌། བཤད་སྒྲུབ་ཀྱི་སྡེ་ལ་གནོད་པ་རྣམས་ཀྱང༌། བདུད་དང་མུ་སྟེགས་མང་པོས་དེ་མི་ཐུབ། །ཅེས་གསུངས་པ་ལྟར་གནོད་པ་ཀུན་ཞི་ནས་གཞན་གྱི་གནོད་པས་གླགས་མི་རྙེད་པ་དང༌། སྒྲིབ་སྦྱོང་སྨོན་ལམ་ཅི་བགྱིས་པ་ཐམས་ཅད་དགེ་འདུན་པ་མང་པོ་དང་ལྷན་གཅིག་ཏུ་བགྱིས་པས་ནུས་པ་གཞན་ལས་མཐུ་བཙན་པ་དང༌། སྤྱིར་རྗེས་སུ་ཡི་རང་བྱས་ན་དགེ་རྩ་མཉམ་དུ་ཐོབ་པ་དང༌། ཁྱད་པར་དུ། མཛོད་རྩ་བར། དམག་ལ་སོགས་པར་དོན་གཅིག་ཕྱིར། །ཐམས་ཅད་བྱེད་པ་པོ་བཞིན་ལྡན། །ཞེས་པ་ལྟར་མཉམ་གཅིག་ཏུ་བསམ་པ་མཐུན་པས་བྱས་པ་ཐམས་ཅད་དགེ་སྡིག་ཅི་ཡིན་ཡང་བྱེད་པ་པོ་བཞིན་དུ་ལྡན་པས། ཚོགས་ནས་ཆད་མེད་དུ་བཟང་སྤྱོད་སྨོན་ལམ་སོགས་འདོན་པར་མཛད་པ་གནད་ཆེ་ཚུལ་དང༌། དེང་སང་དཔེ་ཆ་པ་ཟེར་དུས་ཁ་ཏོན་དགེ་སྦྱོར་གཡུག་བཞག་མཁན་མང་པོ་འདུག་པས། དམིགས་ལྟོས་ངན་པ་དེ་ལྟ་བུ་ལ་མི་འགྲོ་བ་སོགས་རྒྱུ་མཚན་མང་པོ་ལ་བརྟེན་ནས་རྒྱུན་ཆགས་སུ་བཟང་སྤྱོད་གསུང་སྲོལ་འདི་བཞག་པར་གསུངས་སོ། །གཞན་ཡང༌། རྒྱུན་གསུང་སྦྱོར་དྲུག་སྨོན་ལམ་དང༌། ལྟུང་བཤགས། མདོ་གདུགས་སྒྲོལ་གསུམ། ཆོས་སྐྱོང་གི་བསྐང་པ་སོགས་རྒྱུན་ཆགས་སུ་ཚོགས་ཀྱི་འདོན་པ་ཚིག་བཞི་ཡན་ལ་དགག་དགོས་དམིགས་བསལ་བ་རེ་གཞི་བྱས་ཏེ་བཤེས་གཉེན་རིན་པོ་ཆེ་རང་ཉིད་ཀྱིས་ཐུགས་བཀོད་བྱས་ཏེ་བཞག་པ་ལས། དབུ་མཛད་ཀྱི་ཁ་ནས་ཅི་ཐོན་འདོན་སྲོལ་ཙམ་མ་ཡིན་པར་ཤེས་པར་བྱས་ཏེ། དུས་ཕྱིས་སུ་ཡང་ཕྱག་སྲོལ་འདི་དག་རྒྱུ་མཚན་དང་བཅས་པ་ཧ་གོ་བར་བྱས་ནས། རང་དགར་བསྒྱུར་ཆད་མི་གཏོང་བ་གལ་ཆེན་ཡིན་སྙམ་ནས། བླ་མ་རིན་པོ་ཆེ་མཆོག་གིས་བཀའ་གསུང་རྒྱས་པར་སྔ་ཕྱིར་བྱུང་བ་རྣམས་གནད་བསྡུས་པའི་ཁུལ་གྱིས་འདིར་བཀོད་པའོ། །ལོ་ཙཱ་བ་བྱང་ཆུབ་རྩེ་མོ་ལ་སོགས་མཁས་པ་བརྒྱ་ཤར་ཙམ་ལ་སྨན་བླའི་རྗེས་གནང་མཛད་པའི་ཚེ་ན། ནམ་མཁར་བདེ་གཤེགས་བརྒྱད་གསལ་བར་བྱོན་ནས་གསུངས་པར་ཀུན་མཁྱེན་ཆེན་པོའི་རྣམ་ཐར་དུ་གསལ་བའི། བདེ་བར་གཤེགས་པ་མཆེད་བརྒྱད་ཀྱི་སྔོན་གྱི་དམ་བཅའ་དང་བཅས་པ་འདུས་པའི་སྨན་བླ་མཆེད་བརྒྱད་དང་རིགས་གསུམ་མགོན་པོ་སོགས་ཀྱི་སྨོན་ལམ་ཁྱད་པར་ཅན་ཚིགས་བཅད་བཅུ་གཅིག་གི་བདག་ཉིད་ཅན་དེ་ཉིད་འཕྲིན་ལས་བག་ལ་ཞ་བ་ལྟ་བུར་གྱུར་པ་ལ། སྐབས་དང་སྐབས་སུ་སྨོན་ལམ་དེ་ཉིད་ཚར་གྲངས་བསགས་ཏེ་འདོན་སྲོལ་བཙུགས་སྟེ། སྨོན་ལམ་དེ་ཉིད་ཀྱི་ནང་དུ་སྨན་བླ་མདོ་ཆོག་ལྟ་བུའི་ཆོ་ག་རྒྱས་པའི་དོན་ཡོངས་བསྡུས་ཡོད་ཚུལ་སོགས་ཡང་ཡང་གསུངས་པས། ད་ལྟའི་ཆར་སླར་ཡང་འཕྲིན་ལས་ཀྱི་འོད་དཀར་འཕྲོ་བཞིན་པ་ཉིད་དོ། །བོད་ཟླ་བཅུ་གཅིག་པའི་མཇུག་ནས་ཆོས་མཚམས་བྱས་ཏེ་ཁྲིན་ཏུའུ་ནས། བཀའ་བསྡུ་བཞི་བའི་འགྲེལ་བ་དང༌། དེའི་ཟུར་མཆན། མཁྱེན་གསུམ་པདྨོ་འབྱེད་པའི་ཟླ་ཟེར། གཞན་སྟོང་ཀུ་མུད་འབྱེད་པའི་ཟླ་ཟེར། གཞན་སྟོང་སྐལ་བཟང་མིག་འབྱེད་རྣམས་ཀྱི་དཔེ་དེབ་པར་བསྐྲུན་མྱུར་རྟབ་ཀྱིས་གྲུབ་པར་བྱས་ཤིང༌། དེ་ནས་ལྕམ་མདའ་དགོན་དུ་བྱོན་ནས་བཀའ་བསྡུ་བཞི་བ་ལས་དུས་བཞི་ཆེ་ཆུང་བསྐོར་དང༌། གཞན་སྟོང་བགྲོ་གླེང་ཐེངས་དང་པོའི་དྲི་ལན་དང༌། ཚད་མའི་དཔེ་ཁྲིད་ཅི་རིགས་པ་མཛད་པའི་ཞར་ལ། ཇོ་ནང་ཤམྦྷ་ལའི་ངེས་གསང་གཞན་སྟོང་དབུ་མ་ཆེན་པོའི་བགྲོ་གླེང་གི་རྩོམ་གཞིའི་དྲིས་ལན་རབ་གསལ་སྣང་བ་བརྩམས་སོ། །

དབུ་ཡི་སྐྲ་ལོ་རྣོན་པོའི་སོ་ཁར་གཏུབ་པ་དེ་ཡི་དོན་དགོས་གང་ཡིན་ངོ་སྤྲད་ཅིང༌། །

འཆད་ཉན་གཟུགས་ཀྱིས་བསགས་སྦྱངས་དགེ་སྦྱོར་དོར་བ་དེ་ཡང་མཐར་སྤྱོད་ཁ་རྐྱང་པར་གསུངས་ཏེ། །

ཚོགས་གསོག་སྒྲིབ་སྦྱོང་སྨོན་ལམ་རྣམ་པར་དག་པའི་མཚམས་སྦྱོར་རྒྱུན་ཁྱེར་གལ་ཆེན་གནད་བཟུང་ནས། །

སྤོང་དང་ཀློག་པའི་ཕྱོགས་འཛིན་གཡོན་ལྷུང་བྲལ་བ་དེ་ཡིས་ངེས་དོན་སྙིང་པོ་གསལ་བར་བྱས། །

སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཡུལ་དགོན་དུ་བསྟན་པ་ཉམས་གསོ་དང་འཆད་གྲྭ་མང་པོའི་མ་ཕྱིའི་སྲོལ་ཡིག་གཏན་འབེབས་བྱས་པའི་བསྐོར་གྱི་རྣམ་ཐར་མདོར་བསྡུས་པ་སྟེ་བཅུ་དྲུག་པའོ། །