གཉིས་པ་ལྟུང་བ་སྡེ་ལྔའི་ཐུན་མོང་མ་ཡིན་པའི་ཡན་ལག་རང་རང་གི་ངོ་བོ་དང་ལྷན་ཅིག་བཤད་པ།

གཉིས་པ་ལྟུང་བ་སྡེ་ལྔའི་ཐུན་མོང་མ་ཡིན་པའི་ཡན་ལག་རང་རང་གི་ངོ་བོ་དང་ལྷན་ཅིག་བཤད་པ་ལ།

བླང་དོར་རབ་གསལ་ལས། ཕམ་པ་བཞི་དང་ལྷག་མ་བཅུ་གསུམ་དང༌། །སྤང་ལྟུང་སུམ་ཅུ་འབའ་ཞིག་དགུ་བཅུ་དང༌། །སོར་བཤགས་བཞི་དང་ཉེས་བྱས་བརྒྱ་བཅུ་གཉིས། །ལ་སོགས་སྤོང་བ་དགེ་སློང་སྡོམ་པར་གསུངས། །ཞེས་པ་ལྟར་ཕམ་པའི་སྡེ་བཤད་པ། ལྷག་མའི་སྡེ་བཤད་པ། སྤང་ལྟུང་གི་སྡེ་བཤད་པ། སོར་བཤགས་བཤད་པ། བཤགས་བྱའི་ཉེས་བྱས་བཤད་པ་དང་ལྔ། དང་པོ་ཕམ་པའི་སྡེ་ལ་བཞི་ལས། དང་པོ་མི་ཚངས་སྤྱོད་ཀྱི་ཕམ་པའི་སྡེ་ནི། གླེང་གཞི་ནི། བཅོམ་ལྡན་འདས་ཟག་མེད་ཀྱི་ཡེ་ཤེས་ཐུགས་སུ་ཆུད་ནས་དགུང་ལོ་བཅུ་གསུམ་པ་ལ་བབ་པའི་ཚེ་ཡུལ་སྤོང་བྱེད་དུ་དགེ་སློང་བཟང་བྱིན་གྱིས་སྔར་གྱི་ཁྱིམ་ཐབ་ལ་མི་ཚངས་པར་སྤྱད་པ་ལ་བརྟེན་ནས་མི་ཚངས་སྤྱོད་ཀྱི་ཕམ་པ་བཅས་ལ། གཞིའི་ཡན་ལག་ཐུན་མོང་མ་ཡིན་པ་ནི་རང་གི་རྨ་སྒོ་གཉིས་དང༌། གཞན་བུད་མེད་དང་སྐྱེས་པ་དང་དུད་འགྲོ་སོགས་ཀྱི་ ལུས་སྟོད་སྨད་གང་རུང་ཕྱེད་ཡན་ཆད་ཚང་བ་ཤི་བའྀ་རོ་སོགས་ཀྱི་རྨ་སྒོ་གསུམ་གང་རུང་ནད་སོགས་ཀྱིས་མ་ཉམས་པར་དང་པོའི་མཚམས་ལས་འདས་པར་རང་གི་ནོར་བུ་བཅུག་པ་དང༌། རང་གི་ཁ་དང་བཤང་ལམ་དུ་གཞན་གྱི་ནོར་བུ་བཅུག་ནས་རྩོལ་བ་ན་མཐར་ཐུག་རེག་པ་དེ་ལས་བྱུང་བའི་བདེ་བ་ལུས་ཤེས་ཀྱིས་མྱོང་ཞིང་ཡིད་ཀྱིས་བདག་གིར་བྱས་ནའོ། །དེ་ཡང་ཕོ་མོ་སོགས་ཀྱི་ཁྱད་པར་མེད་པར་རང་གི་རྨ་སྒོ་གཉིས་དང་གཞན་ཕོའི་རྨ་སྒོ་གཉིས་དང་མོའི་རྨ་སྒོ་གསུམ་གང་ལ་མི་ཚངས་པར་སྤྱོད་ན་ཕམ་པ་འབྱུང་སྟེ། སྡོམ་གསུམ་དྭངས་གསལ་མེ་ལོང་ལས། རང་གི་རྨ་སྒོ་གཉིས་དང༌། གཞན་དུད་འགྲོ་སོགས་ཀྱི་ལུས་སྟོད་སྨད་གང་རུང་ཕྱེད་ཡན་ཆད་ཚང་བ་ཤི་བའི་རོ་སོགས་ཀྱི་རྨ་སྒོ་གསུམ། ཞེས་སོགས་དང༌། འདུལ་མཛོད་རྒྱ་མཚོའི་བདག་ཉིད་ཀུན་མཁྱེན་མཚོ་སྣ་བས་མཛད་པའི་འདུལ་ཊཱིཀ་ཉི་ཟེར་ལས། ལམ་གསུམ་ལས་གང་ཡང་རུང་བ་ནི་དེར་རོ་ཁའམ་གཤང་བའི་ལམ་དུའོ། །ཞེས་དང༌། རྣམ་ཤེས་ལེན་མྱོང་ཡན་ཆད་ཡིན་པ་སྟེ། སྐྱེས་པ་ཉིད་དང༌། མ་ནིང་ཉིད་དང༌། རོ་ཉིད་དང༌། ཞེས་ཕོའི་རྨ་སྒོ་མ་ཟད་མ་ནིང་དང་རོའི་རྨ་སྒོ་ལ་སྤྱོད་ན་ཕམ་པ་འབྱུང་བར་གསུངས་སོ། །ཡང་འདུལ་བ་མདོ་རྩའི་རྣམ་བཤད་ཟླ་ཟེར་ལས། དགེ་སློང་གི་རང་བསྟེན་པར་བྱ་བ་སྟེ་རང་གི་ཁའམ་བཤང་ལམ་དུ་རང་གི་ཟག་བྱེད་བཅུག་ན་ཡང་ན་སྨད་པ་མེད་དོ་ཞེས་སྦྱར་ཏེ་ཕམ་པར་འགྱུར་རོ། །ཞེས་དང༌། འདུལ་བ་བདུད་རྩིའི་ཉིང་ཁུ་ལས།ལས་དང་པོ་མ་ཡིན་པའི་དགེ་སློང་གིས་མི་དང་མི་མ་ཡིན་པ་དང༌། སྐྱེས་པ་དང༌། བུད་མེད་དང༌། མ་ནིང་དང༌། རང་གཞན་གང་རུང་གི་ཁའམ་གཤང་ལམ་མམ། མོའི་དབང་བོ་སྟེ་རྨའི་སྒོ་གསུམ་གང་རུང་ནད་ལ་སོགས་པས་མ་ཉམས་པར་རང་གི་དབང་པོ་མ་ཉམས་པས་བཅུག་རེག་བདེ་བ་ཉམས་སུ་མྱོང་བར་བྱས་ན་དངོས་གཞིའོ། །ཞེས་རང་གཞན་གྱི་རྨའི་སྒོ་གང་ལ་མི་ཚང་བར་སྤྱོད་ན་ཕམ་པ་འབྱུང་བར་གསུངས་སོ། །ཧ་ཅང་སྙིགས་མའི་དུས་སུ་འདི་ཡང་ཤེས་པར་བྱ་དགོས་སོ། །གཉིས་པ་མ་བྱིན་ལེན་ནི། གླེང་གཞི་རྒྱལ་བོའི་ཁབ་ཏུ་དགེ་སློང་ནོར་ཅན་གྱིས་མ་བྱིན་པར་བླངས་པ་ལ་བརྟེན་ནས་ཕམ་པ་འདི་བཅས་ལ། གཞིའི་ཡན་ལག་ཡུལ་དུས་དེ་བརྐུ་ཡུལ་རྐུ་མཁན་གཉིས་ཀ་ལ་ལྟོས་པའི་དངུལ་ཞོ་གང་ཡན་གྱི་རིན་ཐང་ཚང་བ། གཡོས་སུ་བྱས་པའི་ཁ་ཟས་དང་དུར་ཁྲོད་ཀྱི་རྫས་སོགས་ལྟ་བུ་དམན་པ་མ་ཡིན་པ། བདག་པོ་རང་ལས་ནོར་ཐ་དད་པས་བདག་ཏུ་བཟུང་བ། བསམ་པའི་ཡན་ལག་དེ་ལྟར་ཤེས་བཞིན་དུ་བདག་པོ་དང་གཏན་དུ་འབྲལ་ཏེ་བདག་གིར་བྱེད་འདོད་ཀྱིས། སྦྱོར་བའི་ཡན་ལག་རང་ངམ་བསྐོས་པས་སྦྱོར་བ་གཅིག་གི་ནང་དུ་ཆད་པ་འཇོག་པ་སོགས་མཐུས་དང་རྫས་བཅོལ་བ་དང་བསྐྱིས་ པ་དང་གྲུ་བཙས་གླ་རྔན་སོགས་སྒྱུ་ཐབས་ཀྱིས་མི་སྟེར་བར། མཐར་ཐུག་ གི་ཡན་ལག་རང་ངམ་བཅོལ་ཡུལ་ལ་ཐོབ་བློ་སྐྱེས་པ་ནའོ། །འདིའི་མཐུས་རྐུ་བ་བླ་དཔོན་སོགས་དབང་ཆེ་བ་རྣམས་དང༌། ཕྱི་མ་ཐམས་ཅད་ལ་འབྱུང་ཉེ་ཞིང༌། རང་གི་རྫས་གཞན་གྱིས་བརྐུས་པའང་རང་གི་བློས་བཏང་ཞིང་རྐུན་མས་བདག་ཏུ་བཟུང་བའི་རྗེས་སུ་སླར་བླངས་ནའང་ཕམ་པ་འབྱུང་བའི་གནས་ཡོད་པར་གསུངས་པས་འདི་ལ་ཡང་གཟབ་པར་བྱའོ། །གསུམ་པ་སྲོག་གཅོད་ཀྱི་ཕམ་པ་ནི། གླེང་གཞི་ཡུལ་སྤོང་བྱེད་དུ་ཆུ་ཀླུང་ཡིད་འོང་ལྡན་གྱི་འགྲམ་དུ་དགེ་སློང་རབ་ཏུ་མང་པོས་དགེ་སློང་གསོད་པར་བྱེད་པ་ལ་བརྟེན་ནས་ཕམ་པ་འདི་བཅས་ལ། གཞི་རྒྱུད་ཐ་དད་པའི་མི་དང་མིར་ཆགས་པ་གང་རུང་བསམ་པ་འདུ་ཤེས་མ་འཁྲུལ་བའི་སྒོ་ནས། བསམ་བཞིན་དུ་སྦྱོར་བ་དུག་མཚོན་ངན་སྔགས་སོགས་ཀྱིས་རང་ངམ་གཞན་གསོད་དུ་བཅུག་པ།མཐར་ཐུག་བསད་བྱ་དེ་རང་གི་སྔར་གསོད་སེམས་མ་ལོག་གོང་དུ་ཤི་བ་ནའོ། །བཞི་བ་མི་ཆོས་བླ་མ་སྨྲ་བའི་ཕམ་པ་ནི། གླེང་གཞི་ཉ་བའི་གྲོང་དུ་དགེ་སློང་ལྔ་བརྒྱས་མི་ཆོས་བླ་མ་རྫུན་དུ་སྨྲས་ནས་འོད་མ་ཅན་གྱི་གྲོང་དུ་ཕམ་པ་འདི་བཅས་ལ། གཞི་སྨྲ་ཡུལ་ཆོས་བདུན་ལྡན་ལ་རང་དོན་དུ་ཞི་གནས་ཡན་ཆད་ཀྱི་ཡོན་ཏན་མངོན་ཤེས་སོགས་བསམ་པ་དེ་དག་མ་ཐོབ་པར་ཤེས་བཞིན་དུ་འདུ་ཤེས་བསྒྱུར་འདོད་ཀྱིས། སྦྱོར་བ་དེ་དག་ཐོབ་པོ་ཞེས་པའམ་མངོན་ཤེས་ཀྱི་འབྲས་བུ་ལྷ་དང་ཡི་དྭགས་སོགས་བདག་གིས་མཐོང་ངོ་དེ་དང་གཏམ་བྱས་སོ། །ཞེས་སོགས་ངག་མཚན་ཉིད་ལྔ་ལྡན་གྱིས་སྨྲ་བ་དང༌། གཞན་གྱིས་ཁྱོད་ཀྱིས་དེ་དག་ཐོབ་པའམ་མཐོང་ངམ་ཟེར་བ་ངག་གིས་དང་དུ་བླངས་པ། མཐར་ཐུག་གཞན་གྱིས་དོན་གོ་བ་ནའོ། །དེ་ལྟར་ན་གཞི་བསམ་པ་སྤྱོར་བ་མཐར་ཐུག་གི་ཡན་ལག་ནི་སོར་བཤགས་ཡན་སྦྱོར་དགོས་པར་ཤེས་པར་བྱའོ། །ཡུལ་གྱི་ཆོས་བདུན་ལྡན་ནི། མི་ཡིན་པ། སྨྲ་ཤེས་པ། དོན་གོ་བ། ཤེས་པ་རང་བཞིན་དུ་གནས་པ། མ་ནིང་དང་མཚན་གཉིས་མ་ཡིན་པ་སྟེ་ཐ་སྙད་ལྔ་དང་ལྡན་པ། ལུས་ཐ་མལ་དུ་གནས་པ། རང་ལས་རྒྱུད་ཐ་དད་པའོ། །ངག་མཚན་ཉིད་ལྔ་ལྡན་ནི། ངག་ཡིན་པ། རང་གི་ཡིན་པ། བདག་ཉིད་དང་འབྲེལ་བ། མ་ནོར་བ། གསལ་བར་སྨྲ་བ་ ལྔ་དང་ལྡན་པའོ། །ཕ་རོལ་བོའི་མངོན་སུམ་དུ་སྨྲ་བ་བསྣན་ན་དྲུག་ལྡན་ཟེར་རོ། །འདི་བཞི་དགེ་ཚུལ་ལ་ཕམ་འདྲའི་ཉེས་བྱས་ཡིན་ཏེ། འདུལ་བ་བདུད་རྩིའི་ཉིང་ཁུ་ལས། དགེ་ཚུལ་ལ་ཕམ་པ་དང་འདྲ་བའི་ཉེས་བྱས་སོ། །ཞེས་གསུངས་སོ། །