བཞི་པ་སྒྲ་བཤད་པ་ལ་གསུམ།
བཞི་པ་སྒྲ་བཤད་པ་ལ་གསུམ་སྟེ།
སོ་སོར་ཐར་པའི་སྡོམ་པ། དང་པོ་ཐར་པའི་སྡོམ་པ། ཐར་པའི་ཐབས་ཀྱི་སྡོམ་པ་ཞེས་བྱ་སྟེ། པྲ་ཏི་མོ་ཀྵ་ཞེས་སོ། །དེ་ལ་སྒྲ་བཤད་གསུམ་སྟེ། པྲ་ཏི་ཞེས་པ་སོ་སོ་ཡིན་ལ། མོ་ཀྵ་ཞེས་པ་ཐར་པ་ཡིན་པས་སོ་སོར་ཐར་པ་ཞེས་བྱ་སྟེ། ཚུལ་ཁྲིམས་བསྲུང་བའི་གང་ཟག་སོ་སོ་ངན་འགྲོ་དང་འཁོར་བ་ལས་ཐར་བར་འགྱུར་གྱི། གཞན་གྱིས་ཚུལ་ཁྲིམས་བསྲུངས་པས་གཞན་ཐར་པར་མི་འགྱུར་བའི་ཕྱིར་རོ། །པྲ་ཏི་ཞེས་པ་དང་པོ་ཡིན་ལ། མོཀྵ་ཞེས་པ་ཐར་པ་ཡིན་པས་དང་པོ་ཐར་པ་ཞེས་ཀྱང་བྱ་སྟེ། སྡོམ་པ་ཐོབ་པའི་སྐད་ཅིག་དང་པོ་དེ་ཉིད་ཀྱི་ཚེ་ན། སྔར་རང་རང་གི་སྐབས་ཀྱི་སྡོམ་མིན་ཡིན་པ་དེ་ལས་ཐར་པའི་ཕྱིར་རོ། །པྲ་ཏི་ཞེས་པ་ནི་སྒྲའི་རྐྱེན་གྱིས་ཐབས་ཀྱི་དོན་ཏོ། །མོཀྵ་ཞེས་པ་ཐར་པ་ཡིན་པས་ཐར་པའི་ཐབས་ཞེས་པ་སྟེ། དེས་ན་ཐར་པའི་ཐབས་ཀྱི་སྡོམ་པ་ཞེས་ཀྱང་བྱའོ། །སྒྲ་བཤད་དེ་གསུམ་ནི་བམ་པོ་ལྔ་བཅུ་པ་ལས་བཤད་དོ། །སྡོམ་པ་ཐོབ་ནས་སྐད་ཅིག་གཉིས་པ་ཚུན་ཆད་ཀྱི་སྡོམ་པ་དེ་ཡང་སོ་སོ་ཐར་པ་ཡིན་ན་ནི། མཛོད་འགྲེལ་ལས། སྡོམ་པ་ཡང་དག་པར་བླངས་པའི་རྣམ་པར་རིག་བྱེད་མ་ཡིན་པ་སྐད་ཅིག་དང་པོ་དག་ནི་སོ་སོར་ཐར་པ་ཞེས་ཀྱང་བྱ། སོ་སོར་ཐར་པའི་སྡོམ་པ་ཞེས་ཀྱང་བྱ་སྟེ། སྐད་ཅིག་མ་གཉིས་པ་ལ་སོགས་པ་ནི་སོ་སོར་ཐར་པའི་སྡོམ་པ་ཁོ་ན་ཡིན་གྱི་སོ་སོ་ཐར་པ་ནི་མ་ཡིན་ནོ་ཞེས་པ་དང་འགལ་ལོ་ཞེ་ན། སོ་སོ་རང་ཉིད་ཐར་པར་འགྱུར་བའི་སྒྲ་བཤད་ཅན་གྱི་སོ་སོ་ཐར་པ་ཡིན་ཡང༌། དང་པོ་ཐར་པའི་སྒྲ་བཤད་ཅན་གྱི་སོ་སོ་ཐར་པ་ནི་མ་ཡིན་ནོ་ཞེས་པ་སྟེ། སྡོམ་པ་ཐོབ་པའི་སྐད་ཅིག་དང་པོར་ཐར་ཟིན་ནས་ཀྱི་རྗེས་ཞུགས་ཡིན་པའི་ཕྱིར་རོ། །ཞེས་མཚོ་ཊཱིཀ་ལས་སོ། །སོ་ཐར་གྱི་སྡོམ་པ་སྐད་ཅིག་གཉིས་པ་ཕན་ཆད་སོ་སོ་ཐར་བ་མ་ཡིན་ཏེ།མཆིམས་མཛོད་༣༥༧ལས། ཡང་སོ་སོ་ཐར་བའི་སྡོམ་པ་ཐོབ་པའི་སྐད་ཅིག་མ་དང་པོའི་རྣམ་པར་རིག་བྱེད་མིན་པ་ནི་སོ་སོ་ཐར་བ་དང་སྡོམ་པ་དང་བྱ་བའི་ལས་ཀྱི་ལམ་ཞེས་ཀྱང་བྱ་སྟེ། སྡིག་པ་ལས་ཐར་བའི་ཕྱིར་དང༌། ལུས་ངག་སྡོམ་པའི་ཕྱིར་དང༌། ལས་འབྱུང་བའི་སྒོའི་ཕྱིར་རོ། །སྐད་ཅིག་མ་གཉིས་པ་ཕན་ཆད་ནི་སོ་སོ་ཐར་བའི་སྡོམ་པ་ཁོ་ན་ཡིན་གྱི་སོ་སོ་ཐར་བ་ནི་མ་ཡིན་ཏེ།སོ་སོ་ཐར་བའི་དོན་ནི། པྲ་ཏི་མོ་ཀྵ་ཞེས་བྱ་བ་དང་པོ་ཐར་བ་ཡིན་ན་ཐར་ཟིན་པའི་ཕྱིར་རོ། །ཞེས་གསུངས་པའི་ཕྱིར་ཟེར་ན་དང་པོ་ཐར་པའི་སྒྲ་བཤད་ཅན་གྱི་སོ་སོར་ཐར་པ་ནི་མ་ཡིན་པར་མཛོད་འགྲེལ་གྱི་དོན་དེ་ལྟར་མཚོ་ཊཱིཀ་ལས་བཤད་པ་ལྟར་རོ། ། འོན་ཀྱང་མཆིམས་མཛོད་དང་མཛོད་རང་འགྲེལ་གྱི་གོང་འོག་གི་འབྲེལ་ལ་བརྟག་གོ །