ཉེར་དགུ་བ་དབེན་པ་ན་འགྲེང་བའི་ལྟུང་བྱེད་འཆད་པ།

ཉེར་དགུ་བ་དབེན་པ་ན་འགྲེང་བའི་ལྟུང་བྱེད་འཆད་པ་ལ།

རྩ་བར། དགེ་སློང་མ་དང་ངོ། །ཞེས་བྱུང༌། འདིའི་དོན་ལ་བཞི་ལས། དང་པོ་གླེང་གཞི་ནི་མཉན་ཡོད་དུ་འཆར་ཀསདགེ་སློང་མ་དང་ལྷན་ཅིག་དབེན་པ་སྐྱབས་ཡོད་པ་ན་འགྲེང་བ་ལས་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་སྔར་ལྟར་རོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་ཁྲིམས་གྲོགསམེད་པར་དགེ་སློང་མ་དང་ལྷན་ཅིག་དབེན་པ་སྐྱབས་ཡོད་པ་ན་གཉིས་ཀ་འགྲེང་བ་ལས་གྱུར་པའི་ལྟུང་བ་དངོས་གཞིའོ། །བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ་གསུམ་ལས། གང་དང་འགྲེང་བའི་ཡུལ་ནི་སྔར་འཁྲུར་འཇུག་གི་སྐབས་སུ་བཤད་ཟིན་པའི་དགེ་སློང་མ་ཆོསབདུན་ལྡན་གྱི་སྟེང་དུ། དགེ་སློང་མ་གཅིག་པུ་ཡིན་པ་སྟེ། ཊཱི་ཀ་ལས། དགེ་སློང་མ་གཅིག་པུཉིད་དང༌། ཞེས་སོ། །གང་དུ་འགྲེང་བའི་གནས་ནི་འདུག་པའི་སྐབས་དང་འདྲའོ། །གང་གིསའགྲེང་བའི་རྟེན་ནི། དགེ་སློང་གཅིག་པུ་ཡིན་པའོ། །གཉིས་པ་བསམ་པའི་ཡན་ལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལ་བའོ། །ཀུན་སློང་ནི་རང་དགར་འགྲེང་བར་འདོད་པ་རྒྱུནམ་ཆད་པའོ། །གསུམ་པ་སྦྱོར་བ་ནི་འགྲེང་བར་ཞུགས་པའོ། །བཞི་བ་མཐར་ཐུག་ནི་འགྲེང་བརྫོགས་པའོ། །ཁ་ཅིག་ན་རེ་འདི་ཡང་བུད་མེད་སྤྱིས་བསྐྱེད་ཡིན་ཏེ། བུད་མེད་གཞན་དང་འགྲེངན་ཡང་ལྟུང་བྱེད་དུ་འགྱུར་རོ་ཞེས་ཟེར་རོ། །དེ་ནི་མི་རིགས་ཏེ། རང་གི་རྣམ་བཤད་ལས། འདིརདགེ་སློང་མ་གཅིག་པུ་ཉིད་བྱེད་པ་པོ་ཉིད་ཡིན་གྱི་བུད་མེད་ཙམ་པོ་གཅིག་པུ་ཉིད་ནི་མ་ཡིན། ཞེས་གསུངས་སོ། །དགེ་སློང་མ་དང་འདུག་པའི་ལྟུང་བྱེད་ནི་ལྟུང་བྱེད་སྔ་མར་འདུས་ཏེ་དབེན་པན་འདུག་པའི་ལྟུང་བྱེད་ནི་བུད་མེད་སྤྱིས་བསྐྱེད་ཡིན་པའི་ཕྱིར་རོ། །ཞེས་མཚོ་ཊཱིཀ་ལས་སོ། །