བསྟོད་པའི་སྐོར།
བསྟོད་པའི་སྐོར།
བསྟོད་སྨོན་བཀྲ་ཤིས་ཆོས་དུང་དཀར་པོ། བློ་གྲོས་བཟང་པོས་ཤེས་བྱའི་དཀྱིལ་འཁོར་ཁྱབ། །དཔལ་ལྡན་སྐུ་གསུམ་གསང་བའི་རྒྱ་མཚོ་ཆེ། །སྐལ་བཟང་འཇུག་ངོགས་ཀླུ་དབང་རོལ་བའི་གནས། །མཐའ་ཡས་ཡོན་ཏན་རིན་ཆེན་གཏེར་དུ་གྲུབ། །ཐུགས་རྗེ་ཆེན་པོའི་རྣམ་སྤྲུལ་བྱེ་བ་ཡི། །ཞིང་ཁམས་རབ་འབྱམས་ཆུ་ཀླུང་ཟླ་བརྙན་ལྟར། །གང་ལ་གང་འདུལ་སྤྲུལ་བའི་འོད་སྟོང་གསལ། །བསྟན་འགྲོའི་དོན་ཆེན་མཛད་ལ་གུས་ཕྱག་བགྱི། །རྨད་བྱུང་བརྩེ་བས་འགྲོ་ལ་ཉེར་དགོངས་ནས། །གང་སྐུ་མི་འགྱུར་རྡོ་རྗེའི་ཁམས་བརྟན་པའི། །ཚེ་མཐའ་ཡས་པའི་ངོ་བོར་རྟག་བཞུགས་ཏེ། །ཟབ་རྒྱས་ཆོས་ཀྱི་དགའ་སྟོན་སྤེལ་བར་སྨོན། །བསེ་ཚང་བློ་བཟང་དཔལ་ལྡན་མཆོག་དགུང་གྲངས་བརྒྱད་ཅུར་ཕེབས་པའི་གྱ་སྟོན་ལ་དད་གུས་ཀྱི་སྒོ་ནས་དཔལ་ལྡན་རྒྱལ་བ་ཇོ་ནང་གི་ཆོས་བརྒྱུད་དུ་གཏོགས་པའི་མགོ་ལོག་པ་དངོས་གྲུབ་དཔལ་གྱིས་ཕུལ་བའོ། །ལྷག་བསམ་རྡུལ་མང་བརྩེགས་པའི་བྲག་དཀར་གྱི། །ཁ་བའི་སྲོལ་རྒྱུན་ཚད་ལྡན་འདབ་སྟོང་བཞད། །བོད་ཇའི་གསོལ་སྐྱེམས་འདོད་འཇོའི་དགའ་ཚལ་གླིང༌། །གངས་ལྗོངས་བོད་པའི་སྤུན་ཟླ་མགྲོན་ལ་ཕེབས། །ངག་དབང་དངོས་གྲུབ་དཔལ་ནས། རྒྱལ་བསྟན་ཡོངས་རྫོགས་རྒྱ་ཆེ་རྒྱ་མཚོ་འཁྱིལ་བའི་གངས་ལྗོངས་ཀྱི། །བསོད་ནམས་བྱེ་བས་བསྐྲུན་པའི་བླ་རུང་ཆོས་ཀྱི་ཞིང་ས་ལ། །མི་འདོད་ཉེར་འཚེའི་རྒུད་པ་ཇི་སྙེད་ཐམས་ཅད་ཡོངས་ཞི་ནས། །མི་ནུབ་ཐུབ་བསྟན་འཛིན་པའི་གན་མཛོད་གནས་སུ་འགྱུར་བར་སྨོན། །ཞེས་དངོས་གྲུབ་དཔལ་ནས་སེམས་སྐྱོ་ལྷང་ངེ་བ་ཞིག་གིས་བདག་རྐྱེན་བྱས་ནས་སྨྲས་པའོ། །སྡེ་སྣོད་གསུམ་གྱི་འཆད་ཉན་འགྲོ་ལ་སྤེལ། །ས་གསུམ་རྨོངས་བའི་མུན་པ་ཀུན་ནས་འཇོམས། །ཀརྨ་གསེར་ལྡན་འཛིན་མའི་ཕྱོགས་མཐར་རྒྱས། །བསྟན་པ་རིན་ཆེན་དར་རྒྱས་མཛད་ལ་གུས། །དངོས་གྲུབ་དཔལ་ནས་དད་གུས་ཀྱིས་བྲིས་པའོ། །ཐུབ་དབང་བསྟན་པའི་ལྷ་ལམ་ཡངས་པོ་རུ། །ཟླ་བ་བཞིན་དུ་མཁས་པའི་ཏོ་ཀེར་མཆོག ། དྲན་པ་ཡེ་ཤེས་དུས་ཀྱི་མཐར་ཡང་ནི། །དད་ཤེས་ཁང་བུར་ད་དུང་འཚོ་ཞིང་བཞུགས། །ལོ་ཡི་དྷྲུ་བ་ཕྱི་ཕྱིར་དེད་པ་ན། །བགྲང་བྱ་སྟོང་རྩའི་འཕགས་པའི་ཡུལ་དབུས་སུ། །སྨྲ་བའི་རྒྱུ་སྐར་བྱེ་བའི་ཁ་ལོ་བ། །སྨྲྀ་ཏིའི་འོད་དཀར་རི་བོའི་སྤོ་རུ་འཕོས། །ཆུ་ཤེལ་ཆ་རྫོགས་ཉ་ཚེས་ཟླ་བ་ཡིས། །ཁྲི་གདུགས་ཟེར་མདངས་བཅུད་དུ་གཞིབ་པ་ལྟར། །མཁས་པའི་མདུན་ནས་མཁས་པའི་ངང་ཚུལ་དག། གུས་རྟག་དར་གྱིས་གཙུག་གི་ནོར་བུར་བླངས། །ལུང་གི་བརྗོད་པ་བསམ་པས་གཏིང་དཔོག་པ། །བསམ་དོན་བསྒོམས་པས་གྲུབ་པའི་ས་འཛིན་ཆེ། །ངོ་མཚར་འཕྲུལ་གྱི་རྣམ་ཐར་གཏམ་གྱི་ཚོམས། །ཇོ་བོ་ཁྱེད་ནི་འཕགས་ཡུལ་སྒྲོན་མེ་ཡིན། །གདོང་དམར་ཡུལ་དུ་སྤྲིན་ནག་ལང་ལོང་གིས། །རྒྱལ་བསྟན་ཉིན་བྱེད་རེ་ཞིག་ཡིབ་པ་ན། །ལྷོ་ཡི་ཕྱོགས་ནས་ལྷར་ཡང་འཕྲོས་པ་ཡི། །ཀུན་གྱི་ཐོག་མ་སྨྲྀ་ཏི་ཛྙཱ་ནར་གྲགས། །ཁ་བ་ཅན་དུ་ཤིང་རྟ་ཆེན་པོ་ཞིག། གསེར་གྱི་ཕ་བོང་སྒོ་ཁར་བྱོན་ནའང༌། །བ་གླང་སྔོན་བཞག་བ་རྗེས་འཚོལ་བའི་གཏམ། །ཁྱེད་ཉིད་ཙམ་ལ་བྱུང་བའི་གཏམ་རྒྱུད་མིན། །ཁུར་གྱིས་ལྕིད་པའི་བཀའ་དྲིན་དེ་ནི་དབུ་ནག་སྐྱེ་འགྲོས་གསུབ་ཏུ་མེད་པའི་ཐུགས་བསྐྱེད་ཡིན། །འཛད་མཐའ་བྲལ་བའི་གང་གསུང་ཟེར་ནི་བྱིས་པས་མི་དཔོག་དམ་པ་དག་ཀྱང་བག་ཚའི་ཡུལ། །བྱིན་རླབས་འགྲོ་ལ་ཕན་པའི་སྨན་ནི་དངོས་འཛིན་གཅོང་ནད་ས་བོན་དང་བཅས་གཞོམ་པའི་གཉེན། །ཁྱེད་ཀྱི་གསང་གསུམ་ལྕེ་བརྒྱར་སྤྲུལ་ཡང་ཆ་དང་རྡུལ་ཙམ་བརྗོད་པར་ནུས་པའི་གནས་སུ་ཅི། །རྒྱུ་སྐར་འགྲན་པའི་པཎ་གྲུབ་གྲངས་མེད་ཅིག། ཤེལ་ཕྲེང་བསྟར་བཞིན་ནུབ་རིར་ཡིབ་པ་ལས། །ཀུན་དའི་ཡིད་རབ་སྐྱོ་བའི་མ་མ་ནི། །སྨྲ་བའི་མཚོན་ཆ་ཁྱེད་ལས་སུ་ཞིག་འོས། །ཁྱེད་ལ་ཇོ་བོར་བརྗོད་དེ་མི་དང་ལྷ་ཡི་གཙུག་ན་འཕགས་པའི་ནོར་བུ་ཞིག ། ཁྱེད་ལ་སྨྲྀ་ཏི་ཐོགས་ཏེ་དྲན་དང་ཡེ་ཤེས་དཔག་མེད་དུ་མའི་གན་མཛོད་ཅིག ། ཁྱེད་ལ་ཛྙཱ་ནར་གསོལ་ཏེ་ཤེས་རབ་རྣམ་དག་ཡང་དག་གཟིགས་པའི་སྤྱ ན་ཡངས་པ། །ཁྱེད་ལ་ཀིརྟི་ཞེས་བྱ་འཇིག་རྟེན་གསུམ་ན་དོན་དང་ལྡན་པའི་གྲགས་པ་འབར། །གངས་ལྗོངས་ཡུལ་གྲུ་རྒྱ་མཚོའི་ཟབ་ཡངས་ལ། །ལུས་ཅན་འདྲེན་པའི་རྒྱལ་བསྟན་གྲུ་བོ་ཆེ། །ལས་ངན་རླབས་ཀྱིས་ཕྱོགས་སུ་སྟོར་བ་ན། །མཉན་པ་ཁྱེད་ཀྱིས་སླར་ཡང་ཤིང་རྟ་དྲངས། །ཁྱེད་ནི་སྒྲ་ཚད་བརྗོད་ཚེ་ཚིག་དང་རིགས་པའི་བྱེད་པོ་ལྟར། །ཁྱེད་ནི་སྐད་གཉིས་སྨྲ་སྐབས་ལོ་ཙཱ་ཆེན་མོ་འཇིག་རྟེན་མིག ། ཁྱེད་ནི་སྙིང་རྗེའི་རང་གཟུགས་གཡོ་མེད་བྱམས་པའི་ཏིང་འཛིན་ཅན། །ཁྱེད་ལ་རྗེས་དྲན་བྱེད་དོ་གསོལ་འདེབས་དབྱངས་ཀྱི་འོ་དོད་འབོད། །དངོས་གྲུབ་དཔལ་ནས། སྐྱེ་མེད་ཀ་དག་རིག་པའི་རང་རྩལ་ལསཿ ཀློང་མདངས་འགག་མེད་རིག་པའི་རོལ་རྩལ་ལཿ ཀུན་རྟོག་རྒྱུ་བའི་རི་མོ་སྣ་ཚོགས་བཀྲཿ འཇིག་རྟེན་བདེན་རྫུན་ཡོ་ལང་མིག་འཕྲུལ་བཞིནཿ རྫུན་མའི་འཇའ་ཚོན་ཡིད་གཏད་གང་ཡང་མེདཿ དོན་དེ་སེམས་ལ་བཟུང་ནས་བཏང་སྙོམས་མཛོདཿ སྣང་ཙམ་ཆོས་ལས་བདེན་དོན་འཚོལ་ན་ལེགསཿ ཨོ་རྒྱན་མཁའ་འགྲོའི་གསང་བའི་བརྡ་གསང་ལཿ གང་ཤར་རང་གྲོལ་ཡེ་རྫོགས་ཆེན་པོའོཿ ཨེ་བཾཿགྱང་སྤྲུལ་མཆོག་དབྱིངས་ལ་དངོས་གྲུབ་དཔལ་ནས་རྩེད་མོར་གུས་ཕུལ།