བྱང་སེམས་ཀྱི་རྒྱུའི་གཙོ་བོ་གསུམ་བཤད་པ།
གསུམ་པ་བྱང་སེམས་ཀྱི་རྒྱུའི་གཙོ་བོ་གསུམ་ནི།
རྩ་བར། སྙིང་རྗེའི་སེམས་དང་གཉིས་སུ་མེད་བློ་དང༌། །
བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །
ཞེས་ཉན་རང་གཉིས་ཐུབ་དབང་ལས་དང༌། ཐུབ་དབང་བྱང་སེམས་ལས་འཁྲུངས་ན། བྱང་སེམས་དེ་དག་གི་རྒྱུ་གང་ཡིན་ཞེ་ན། བྱང་སེམས་རྣམས་ཆོས་ཅན། ཁྱོད་ཀྱི་རྒྱུ་ཡོད་དེ། འཆད་པར་འགྱུར་བའི་སྙི༷ང་རྗེ༷འི་སེ༷མས་ད༷ང༌། མཐའ་གཉི༷ས་སུ༷་མེ༷ད་པར་རྟོགས་པའི་བློ༷་ཤེས་རབ་ད༷ང༌། ཀུན་རྫོབ་བྱ༷ང་ཆུ༷བ་ཀྱི་སེ༷མས་བསྐྱེད་དང་གསུམ་ནི༷་རྒྱ༷ལ་བའི་སྲ༷ས་པོ་རྣ༷མས་ཀྱི༷་རྒྱུ༷་ཡིན་པའི་ཕྱིར་རོ། །སྙིང་རྗེ་ལ་སོགས་པའི་ཆོས་གསུམ་པོ་འདི་བྱང་སེམས་ཀྱི་རྒྱུ་ཡིན་ཏེ། རིན་ཆེན་འཕྲེང་བ་ལས། དེ་ཡི་རྩ་བ་བྱང་ཆུབ་སེམས། །རི་དབང་རྒྱལ་པོ་ལྟར་བརྟན་དང༌། །ཕྱོགས་མཐའ་གཏུགས་པའི་སྙིང་རྗེ་དང༌། །གཉིས་ལ་མི་བརྟེན་ཡེ་ཤེས་ལགས། །ཞེས་དང༌། རང་འགྲེལ་ལས། ཡང་བྱང་ཆུབ་སེམས་དཔའ་དེ་དག་ཅིའི་ཕྱིར་རྒྱུ་ཅན་ཡིན་ཞེ་ན་སྙིང་རྗེའི་སེམས་དང་གཉིས་སུ་མེད་བློ་དང༌། བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །ཞེས་བྱ་བ་སྨོས་སོ། །དེ་ལ་སྙིང་རྗེ་ནི་བརྩེ་བའམ་འདི་ཉིད་དུ་འཆད་པར་འགྱུར་བའི་རྣམ་པ་དང་རང་གི་ངོ་བོ་ཅན་ནོ། །ཞེས་པ་ནས། བྱང་ཆུབ་སེམས་དཔའ་རྣམས་ཀྱི་གཙོ་བོའི་རྒྱུ་ནི། སྙིང་རྗེ་དང༌། གཉིས་སུ་མེད་པའི་ཤེས་རབ་དང༌། བྱང་ཆུབ་ཀྱི་སེམས་ཞེས་བྱ་བ་ཆོས་གསུམ་པོ་འདི་དག་ཡིན་ནོ། །ཞེས་གསུངས་པའི་ཕྱིར་རོ། །
དབུ་མ་འཇུག་པ་འདིར་གསུངས་པའི་འདིར་བསྟན་ཆོས་གསུམ་དང༌། དབུ་མ་རྒྱན་རང་འགྲེལ་ལས། ཡང་དག་ཤེས་འཚོལ་སྔོན་བཏང་སྟེ། །དོན་དམ་རྣམ་པར་ངེས་གྱུར་ནས། །ལྟ་ངན་འཐིབ་གནས་འཇིག་རྟེན་ལ། །སྙིང་རྗེ་ཀུན་ནས་བསྐྱེད་ནས་སུ། །འགྲོ་དོན་བྱེད་པར་དཔའ་གྱུར་པ། །བྱང་ཆུབ་བློ་རྒྱས་མཁས་པ་ནི། །བློ་དང་སྙིང་རྗེས་བརྒྱན་པ་ཡིས། །ཐུབ་པའི་བརྟུལ་ཞུགས་ཡང་དག་སྤྱོད། །ཅེས་དང༌། ཡང་དག་དད་པའི་རྗེས་འབྲང་བ། །རྫོགས་པའི་བྱང་ཆུབ་སེམས་བསྐྱེད་ནས། །ཐུབ་པའྀ་བརྟུལ་ཞུགས་བླངས་བྱས་ཏེ། །དེ་ནི་ཡང་དག་ཤེས་འཚོལ་བརྩོན། །ཞེས་གསུངས་པ་དང༌། ཆོས་མཆོག་གིས། གང་ཕྱིར་འཇིག་རྟེན་དོན་གཉེར་འདི། །ཐེ་ཚོམ་ལས་ཀྱང་འཇུག་ཕྱིར་རོ། །ཞེས་དང༌། ཉ་ཊཱིཀ་དགོས་སོགས་ཆོས་བཞིའི་སྐབས་ལས།
དབང་རྣོན་ལ་དེ་འདྲའི་དོན་འགྱུར་བསྐྱེད་པ། དབང་རྟུལ་དེ་འདྲའི་ངེས་པ་སྐྱེས་པ། ཞེས་གསུངས་པ་རྣམས་ཀྱིས་འདིར་བསྟན་ཆོས་གསུམ་གྱི་གོ་རིམ་ལ་དཔྱད་པར་བྱའོ། །རང་འགྲེལ་ལས། གཉིས་སུ་མེད་པའི་བློ་ནི། དངོས་པོ་དང་དངོས་པོ་མེད་པ་ལ་སོགས་པ་མཐའ་གཉིས་དང་བྲལ་བའི་ཤེས་རབ་པོ། །ཞེས་གསུངས་པ་ལྟར་འདིར་བསྟན་གཉིས་མེད་ཀྱི་བློ་ཆོས་ཅན། ཁྱོད་ཀྱི་དམིགས་པ་དང་རྣམ་པ་དང་དབྱེ་བ་རྣམས་ཡོད་དེ། ཆོས་དང་གང་ཟག་གཉིས་ཁྱོད་ཀྱི་དམིགས་པ་དང༌། དངོས་པོའམ་ཡོད་མཐའ་སྟེ་རྟག་མཐའ་དང༌། དངོས་མེད་དམ་ཆད་མཐའ་དང་མཐའ་གཉིས་ཀྱིས་སྟོང་པའི་རྣམ་པ་ནི་ཁྱོད་ཀྱི་རྣམ་པ་དང༌། ཁྱོད་ལ་དབྱེ་ན་བྱང་སེམས་ལས་དང་པོ་པའི་སྔོན་དུ་འགྲོ་བའི་སྟོང་ཉིད་རྟོགས་པའི་བློ་གཅིག་དང༌། མོས་སྤྱོད་ཀྱི་སྐབས་ཀྱི་སྟོང་ཉིད་རྟོགས་པའི་བློ་གཅིག་དང༌། ས་ཐོབ་པའི་བྱང་སེམས་ཀྱི་རྒྱུད་ཀྱི་གཉིས་མེད་ཀྱི་བློ་དང་གསུམ་ཡོད་པའི་ཕྱིར་རོ། །འདིར་བསྟན་སེམས་བསྐྱེད་ཆོས་ཅན། ཁྱོད་ཀྱི་དམིགས་པ་དང་རྣམ་པ་དང་ངོ་བོ་དང་དབྱེ་བ་རྣམས་ཡོད་དེ། གཞན་དོན་དང་བྱང་ཆུབ་ཆེན་པོ་གཉིས་ཁྱོད་ཀྱི་དམིགས་པ་དང༌། སེམས་ཅན་ཐམས་ཅད་སྡུག་བསྔལ་ལས་སྒྲོལ་བའི་ཆེད་དུ་བྱང་ཆུབ་ཆེན་པོ་དེ་ཐོབ་པར་འདོད་པ་དེ་ཁྱོད་ཀྱི་རྣམ་པ་དང༌། གཉིས་མེད་ཀྱི་བློ་དང་སྙིང་རྗེ་ཆེན་པོ་གཉིས་ཀྱིས་དྲངས་པའི་དོན་གཉིས་ལ་དམིགས་པའི་ཡིད་ཀྱི་རྣམ་རིག་དེ་ཁྱོད་ཀྱི་ངོ་བོ་དང༌། ཁྱོད་ཀྱི་དབྱེ་བ་ལ་བྱང་སེམས་སྐྱེ་འཕགས་ཀྱི་རྒྱུད་ཀྱི་སྨོན་འཇུག་སེམས་བསྐྱེད་གཉིས་རྣམས་ཡོད་པའི་ཕྱིར་རོ། །
སྐབས་འདིའི་སེམས་བསྐྱེད་ལ་ལམ་མ་ཞུགས་ཀྱི་རྒྱུད་ཀྱི་བུར་ཤུན་གྱི་རོ་ལྟ་བུའི་སེམས་བསྐྱེད་ཡོད་པར་རྗེ་བདག་ཉིད་ཆེན་པོས་གསུངས་སོ། །འདིར་བསྟན་ཆོས་གསུམ་གྱི་ས་མཚམས་དང་གོ་རིམ་འཇོག་ཚུལ་ལ་མཁས་དབང་རྣམས་བཞེད་པ་སྣ་ཚོགས་པ་ཡོད་མོད་མ་སྤྲོས་སོ། །ཟླ་བའི་ལུགས་གཞིར་བཞག་ན་བྱང་སེམས་ལ་སེམས་ཙམ་པར་གྱུར་པའི་བྱང་སེམས་པ་ཡོད་པར་ཐལ། སློབ་དཔོན་ཕྱོགས་གླང་དེ་དེ་ཡིན་པའི་ཕྱིར། རང་འགྲེལ་ལས། གལ་ཏེ་གནས་བརྟན་དབྱིག་གཉེན་དང༌། ཕྱོགས་ཀྱི་གླང་པོ་དང༌། ཆོས་སྐྱོང་ལ་སོགས་པ་བསྟན་བཅོས་རྣམས་ཀྱི་མཛད་པ་པོ་སྔར་བྱོན་ཟིན་པར་གྱུར་པ་དེ་དག་གིས་ཀྱང་ཡི་གེ་ཙམ་ཐོས་པས་འཇིགས་ཏེ། ཟབ་མོ་རྟེན་ཅིང་འབྲེལ་བར་འབྱུང་བའི་དོན་ཕྱིན་ཅི་མ་ལོག་པར་སྟོན་པར་འདི་ཡོངས་སུ་སྤངས་སམཞེ་ན། དེ་སྐད་དུ་སྨྲའོ། །ཞེས་གསུང་སོ། །