འགལ་རྟགས་བཤད་སྐབས་ཀྱི་དོགས་དཔྱོད།

འགལ་རྟགས་བཤད་སྐབས་ཀྱི་དོགས་དཔྱོད།

དེ་སྒྲུབ་ཀྱི་ཕྱོགས་ཆོས་གྲུབ་ཅིང༌། རྗེས་སུ་འགྲོ་ལྡོག་གི་ཁྱབ་པ་ཕྱིན་ཅི་ལོག་ཏུ་ངེས་པ་ཡིན་ན་དེ་སྒྲུབ་ཀྱི་འགལ་རྟགས་ཡིན་པས་ཁྱབ་པར་ཐལ། འདོད་ན། མཉན་བྱ་ཆོས་ཅན། སྒྲ་རྟག་པར་སྒྲུབ་པའི་འགལ་རྟགས་ཡིན་པར་ཐལ། སྒྲ་རྟག་པར་སྒྲུབ་པའི་ཕྱོགས་ཆོས་གང་ཞིག སྒྲ་རྟག་པར་སྒྲུབ་པར་བྱེད་པའི་རྗེས་སུ་འགྲོ་ལྡོག་གི་ཁྱབ་པ་ཕྱིན་ཅི་ལོག་ཏུ་ངེས་པ་ཡིན་པའི་ཕྱིར། འདོད་ན། མཉན་བྱ་ཆོས་ཅན། སྒྲ་རྟག་པར་སྒྲུབ་པའི་འགལ་རྟགས་མ་ཡིན་པར་ཐལ། སྒྲ་རྟག་པར་སྒྲུབ་པའི་མ་ངེས་པའི་གཏན་ཚིགས་ཡིན་པའི་ཕྱིར། མ་གྲུབ་ན། མཉན་བྱ་ཆོས་ཅན། སྒྲ་རྟག་པར་སྒྲུབ་པའི་མ་ངེས་པའི་གཏན་ཚིགས་ཡིན་པར་ཐལ། སྒྲ་རྟག་པར་སྒྲུབ་པའི་ཐུན་མོང་མ་ཡིན་པའི་མ་ངེས་པའི་གཏན་ཚིགས་ཡིན་པའི་ཕྱིར། དེར་ཐལ། གཏན་ཚིགས་དོན་བསྡུས་ལས། མ་ངེས་པའི་རྟགས་ལ་ཐུན་མོང་མིན་པ་དང༌། ཐུན་མོང་གི་མ་ངེས་པའི་རྟགས་གཉིས་ཏེ། ཞེས་པ་ནས། དབྱེ་ན་དང་པོ་ལ། མཐུན་ཕྱོགས་ལ་ཡོད་ཀྱང་མ་མཐོང༌། མེད་ནས་མ་མཐོང༌། མི་མཐུན་ཕྱོགས་ལ་ཡོད་ཀྱང་མ་མཐོང༌། མེད་ནས་མ་མཐོང་བ་བཞི་སྟེ། རིམ་པ་བཞིན་དཔེར་ན་སྒྲ་མི་རྟག་སྟེ་མཉན་བྱ་ཡིན་པས་སོ། །རྟག་སྟེ། མཉན་བྱ་ཡིན་པས་སོ། །ཞེས་གསུངས་པའི་ཕྱིར། འདོད་ན། མཉན་བྱ་ཆོས་ཅན། སྒྲ་རྟག་པར་སྒྲུབ་པའི་མ་ངེས་པའི་གཏན་ཚིགས་ཡིན་པར་ཐལ། འདོད་ན། མཉན་བྱ་ཆོས་ཅན། སྒྲ་རྟག་པར་སྒྲུབ་པའི་མ་ངེས་པའི་གཏན་ཚིགས་མ་ཡིན་པར་ཐལ། སྒྲ་རྟག་པར་སྒྲུབ་པའི་འགལ་རྟགས་ཡིན་པའི་ཕྱིར། མ་གྲུབ་ན། མཉན་བྱ་ཆོས་ཅན། སྒྲ་རྟག་པར་སྒྲུབ་པའི་འགལ་རྟགས་ཡིན་པར་ཐལ། སྒྲ་རྟག་པར་སྒྲུབ་པའི་ཕྱོགས་ཆོས་གང་ཞིག དེ་སྒྲུབ་ཀྱི་རྗེས་སུ་འགྲོ་ལྡོག་ཕྱིན་ཅི་ལོག་ཏུ་ངེས་པ་ཡིན་པའི་ཕྱིར། ཁྱབ་སྟེ། གཏན་ཚིགས་དོན་བསྡུས་ལས། འགལ་མ་ངེས་མ་གྲུབ་གསུམ་སྟེ། མཚན་ཉིད་ནི་རིམ་པ་ལྟར། ཕྱོགས་ཆོས་གང་ཞིག རྗེས་སུ་འགྲོ་ལྡོག་ཕྱིན་ཅི་ལོགཏུ་ངེས་པ་དང༌། ཞེས་གསུངས་པའི་ཕྱིར་ན་དཔྱད། ༈ སྤྱིར་རྟགས་སུ་བཀོད་པ་ཐམས་ཅད་རྟགས་ཡང་དག་དང༌། རྟགས་ལྟར་སྣང་གཉིས་སུ་ངེས་པ་ཡིན་པར་ཐལ། འདོད་ན། བྱས་པ་ཆོས་ཅན། རྣམ་མཁྱེན་མི་རྟག་པར་སྒྲུབ་པའི་རྟགས་ཡང་དག་དང་རྟགས་ལྟར་སྣང་གང་རུང་ཡིན་པར་ཐལ། རྣམ་མཁྱེན་མི་རྟག་པར་སྒྲུབ་པའི་རྟགས་སུ་བཀོད་པ་ཡིན་པའི་ཕྱིར། འདོད་ན། བྱས་པ་ཆོས་ཅན། རྣམ་མཁྱེན་མི་རྟག་པར་སྒྲུབ་པའི་རྟགས་ཡང་དག་དང་རྟགས་ལྟར་སྣང་གང་རུང་མ་ཡིན་པར་ཐལ། རྣམ་མཁྱེན་མི་རྟག་པར་སྒྲུབ་པའི་རྟགས་ཡང་དག་མ་ཡིན་པ་གང་ཞིག རྣམ་མཁྱེན་མི་རྟག་པར་སྒྲུབ་པའི་རྟགས་ལྟར་སྣང་ཡང་མ་ཡིན་པའི་ཕྱིར། དང་པོ་མ་གྲུབ་ན། བྱས་པ་ཆོས་ཅན། རྣམ་མཁྱེན་མི་རྟག་པར་སྒྲུབ་པའི་རྟགས་ཡང་དག་མ་ཡིན་པར་ཐལ། རྣམ་མཁྱེན་དུ་ངེས་ནས་རྣམ་མཁྱེན་མི་རྟག་པ་ཡིན་མིན་ལ་ཤེས་འདོད་ཞུགས་པའི་རྒོལ་བ་མེད་པའི་ཕྱིར། དེར་ཐལ། རྣམ་མཁྱེན་བྱས་པ་ཡིན་པར་ངེས་པའི་རྒོལ་བ་ཡིན་ན་རྣམ་མཁྱེན་ངེས་པས་ཁྱབ་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། གང་ཟག་དེས་རྣམ་མཁྱེན་རྟོགས་ན་རྣམ་མཁྱེན་མི་རྟག་པ་ཡིན་པར་རྟོགས་པས་ཁྱབ་པའི་ཕྱིར། མ་གྲུབ་ན། རྣམ་མཁྱེན་རྟོགས་ན་རྣམ་མཁྱེན་མི་རྟག་པ་ཡིན་པར་རྟོགས་པས་ཁྱབ་པར་ཐལ། རྣམ་མཁྱེན་རྟོགས་ན་ཆོས་ཐམས་ཅད་རྟོགས་དགོས་པའི་ཕྱིར། དེར་ཐལ། རྣམ་མཁྱེན་རྟོགས་ན་རྣམ་མཁྱེན་ཀྱི་དམིགས་རྣམ་རྟོགས་དགོས་པའི་ཕྱིར། མ་གྲུབ་ན། རྣམ་མཁྱེན་ཆོས་ཅན། ཁྱོད་རྟོགས་ན་ཁྱོད་ཀྱི་དམིགས་རྣམ་རྟོགས་དགོས་པར་ཐལ། ཤེས་པ་ཡིན་པའི་ཕྱིར། ཁྱབ་སྟེ། སྔོན་འཛིན་མིག་ཤེས་རྟོགས་ན་སྔོན་པོ་རྟོགས་པས་ཁྱབ་པའི་རྒྱུ་མཚན་ཡོད་པའི་ཕྱིར། མ་གྲུབ་ན། སྔོན་འཛིན་མིག་ཤེས་ཆོས་ཅན། ཁྱོད་རྟོགས་ན་སྔོན་པོ་རྟོགས་པས་ཁྱབ་པར་ཐལ། ཁྱོད་དང་སྔོན་པོ་གཉིས་ལྷན་ཅིག་དམིགས་ངེས་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ལྷན་གཅིག་དམིགས་ངེས་ཞེས་པའི་དམིགས་པ་དེ་གཅིག་རྟོགས་ན་ཅིག་ཤོས་ཀྱང་རྟོགས་པའི་དོན་དུ་སྦྱར་བའི་ཕྱིར། དེར་ཐལ། ཉ་ཊཱིཀ་ལས། ལྷན་གཅིག་པ་ནི་དུས་གཅིག དམིགས་པ་ནི་རྟོགས་པ། ངེས་པ་ནི་ཁྱབ་པ་སྟེ། དུས་གཅིག་ཏུ་རྟོགས་པས་ཁྱབ་ཅེས་པ་སྟེ། གཅིག་རྟོགས་ན་གཅིག་རྟོགས། གཅིག་མ་རྟོགས་ན་གཅིག་ཤོས་ཡང་མི་རྟོགས་པས་ཁྱབ་པས་སོ། །ཞེས་གསུངས་པའི་ཕྱིར། མ་ཁྱབ་མཚམས་ཀྱི་རྟགས་གྲུབ་སྟེ། རྣམ་ངེས་ལས། ལྷན་ཅིག་དམིགས་པ་ངེས་པའི་ཕྱིར། །སྔོ་དང་དེ་བློ་གཞན་མ་ཡིན། །ཞེས་གསུངས་པའི་ཕྱིར། གོང་གི་རྟགས་གཉིས་པ་མ་གྲུབ་ན། བྱས་པ་ཆོས་ཅན། རྣམ་མཁྱེན་མི་རྟག་པར་སྒྲུབ་པའི་རྟགས་ལྟར་སྣང་མ་ཡིན་པར་ཐལ། རྣམ་མཁྱེན་མི་རྟག་པར་སྒྲུབཔའི་རྟགས་ལྟར་སྣང་གསུམ་པོ་གང་ཡང་མ་ཡིན་པའི་ཕྱིར། རྟགས་སླའོ། །༈ འགལ་རྟགས་ལ་སྦྱོར་བའི་སྒོ་ནས་དབྱེ་ན་འབྲས་རང་མ་དམིགས་པའི་འགལ་རྟགས་གསུམ་ཡོད་པར་ཐལ། འདོད་ན། འགལ་རྟགས་ལ་འབྲས་རང་མ་དམིགས་པའི་འགལ་རྟགས་གསུམ་མེད་པར་ཐལ། འགལ་རྟགས་ལ་རང་བཞིན་གྱི་འགལ་རྟགས་དང༌། འབྲས་བུའི་འགལ་རྟགས་གཉིས་ལས་མ་དམིགས་པའི་འགལ་རྟགས་མེད་པའི་ཕྱིར། དེར་ཐལ། གཏན་ཚིགས་དོན་བསྡུས་ལས། དབྱེ་ན་དང་པོ་ལ། རང་བཞིན་འགལ་བ་དང༌། འབྲས་བུ་འགལ་བ་གཉིས་སམ། ཞེས་གསུངས་པའི་ཕྱིར། འདོད་ན། སྦྱོར་བ་དེ་སྒྲུབ་ཀྱི་འགལ་རྟགས་ཡིན་ན་སྦྱོར་བ་དེ་སྒྲུབ་ཀྱི་རང་བཞིན་འགལ་རྟགས་དང་འབྲས་བུའི་འགལ་རྟགས་གང་རུང་ཡིན་པས་ཁྱབ་པར་ཐལ། འདོད་ན། ཤིང་མེད་པ་ཆོས་ཅན། ཤིང་གིས་དབེན་པའི་བྲག་རྫོང་དུ་ཤ་བ་ཡོད་པར་སྒྲུབ་པའི་རང་བཞིན་འགལ་རྟགས་དང་འབྲས་བུའི་འགལ་རྟགས་གང་རུང་ཡིན་པར་ཐལ། ཤིང་གིས་དབེན་པའི་བྲག་རྫོང་དུ་ཤ་བ་ཡོད་པར་སྒྲུབ་པའི་འགལ་རྟགས་ཡིན་པའི་ཕྱིར། དེར་ཐལ། ཤིང་མེད་པ་དེ་ཤིང་གིས་དབེན་པའི་བྲག་རྫོང་དུ་ཤ་བ་ཡོད་པར་སྒྲུབ་པའི་ཕྱོགས་ཆོས་གང་ཞིག དེ་སྒྲུབ་ཀྱི་རྗེས་སུ་འགྲོ་ལྡོག་གི་ཁྱབ་པ་ཕྱིན་ཅི་ལོག་ཏུ་ངེས་པ་ཡིན་པའི་ཕྱིར། འདོད་ན། ཤིང་མེད་པ་ཆོས་ཅན། ཤིང་གིས་དབེན་པའི་བྲག་རྫོང་དུ་ཤ་བ་ཡོད་པར་སྒྲུབ་པའི་རང་བཞིན་འགལ་རྟགས་དང་འབྲས་བུའི་འགལ་རྟགས་གང་རུང་མ་ཡིན་པར་ཐལ། ཤིང་གིས་དབེན་པའི་བྲག་རྫོང་དུ་ཤ་བ་ཡོད་པར་སྒྲུབ་པའི་རང་བཞིན་འགལ་རྟགས་མ་ཡིན་གང་ཞིག ཤིང་གིས་དབེན་པའི་བྲག་རྫོང་དུ་ཤ་བ་ཡོད་པརསྒྲུབ་པའི་འབྲས་བུའི་འགལ་རྟགས་ཀྱང་མ་ཡིན་པའི་ཕྱིར་ན་དཔྱད། ༈ ཡང་བྱས་པ་ཆོས་ཅན། སྒྲ་རྟག་པར་སྒྲུབ་པར་བྱེད་པའི་ཆོས་ཀྱི་ངོ་བོ་སྒྲུབ་པའི་འགལ་རྟགས་ཡིན་པར་ཐལ། འདོད་ན། བྱས་པ་ཆོས་ཅན། སྒྲ་རྟག་པར་སྒྲུབ་པའི་ཆོས་ཀྱི་ངོ་བོ་སྒྲུབ་པའི་འགལ་རྟགས་མ་ཡིན་པར་ཐལ། སྒྲ་རྟག་པར་སྒྲུབ་པའི་ཆོས་ཀྱི་ངོ་བོ་འགོག་པའི་འགལ་རྟགས་ཡིན་པའི་ཕྱིར། དེར་ཐལ། དེ་སྒྲུབ་ཀྱི་ཆོས་ཀྱི་ངོ་བོ་འགོག་པའི་འགལ་རྟགས་ཡོད་པའི་ཕྱིར། དེར་ཐལ། གཏན་ཚིགས་དོན་བསྡུས་ལས། ཆོས་ཀྱི་ངོ་བོ་དང༌། ཁྱད་པར་དང༌། ཆོས་ཅན་གྱི་ངོ་བོ་དང༌། ཁྱད་པར་འགོག་པའི་འགལ་རྟགས་བཞི་སྟེ། ཞེས་གསུངས་པའི་ཕྱིར། འདོད་ན། བྱས་པ་ཆོས་ཅན། སྒྲ་རྟག་པར་སྒྲུབ་པའི་ཆོས་ཀྱི་ངོ་བོ་འགོག་པའི་འགལ་རྟགས་མ་ཡིན་པར་ཐལ། སྒྲ་རྟག་པར་སྒྲུབ་པའི་ཆོས་ཀྱི་ངོ་བོ་འགོག་པའི་རྟགས་ཡང་དག་ཡིན་པའི་ཕྱིར། མ་གྲུབ་ན། བྱས་པ་ཆོས་ཅན། སྒྲ་རྟག་པར་སྒྲུབ་པའི་ཆོས་ཀྱི་ངོ་བོ་འགོག་པའི་རྟགས་ཡང་དག་ཡིན་པར་ཐལ། སྒྲ་རྟག་པ་འགོག་པའི་རྟགས་ཡང་དག་ཡིན་པའི་ཕྱིར། མ་གྲུབ་ན། བྱས་པ་ཆོས་ཅན། སྒྲ་རྟག་པ་འགོག་པའི་རྟགསཡང་དག་ཡིན་པར་ཐལ། སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་པའི་ཕྱིར་ན་དཔྱད། ༈ འདུས་བསགས་ཆོས་ཅན། མིག་སོགས་འདུས་པ་མ་ཡིན་པའི་ཡུལ་ཅན་གཞན་དོན་སྒྲུབ་པར་བྱེད་པའི་འགལ་རྟགས་ཡིན་པར་ཐལ། འདོད་ན། འདུས་བསགས་ཆོས་ཅན། མིག་སོགས་འདུས་པ་མ་ཡིན་པའི་ཡུལ་ཅན་གཞན་དོན་སྒྲུབ་པར་བྱེད་པའི་ཕྱོགས་ཆོས་ཡིན་པར་ཐལ། མིག་སོགས་འདུས་པ་མ་ཡིན་པའི་ཡུལ་ཅན་གཞན་དོན་སྒྲུབ་པར་བྱེད་པའི་འགལ་རྟགས་ཡིན་པའི་ཕྱིར། འདོད་ན། འདུས་བསགས་ཆོས་ཅན། མིག་སོགས་འདུས་པ་མ་ཡིན་པའི་ཡུལ་ཅན་གཞན་དོན་སྒྲུབ་པར་བྱེད་པའི་ཕྱོགས་ཆོས་མ་ཡིན་པར་ཐལ། མིག་སོགས་འདུས་པ་མ་ཡིན་པའི་ཡུལ་ཅན་ཁྱོད་ཡིན་པར་གྲུབ་མེད་པའི་ཕྱིར། མ་གྲུབ་ན། མིག་སོགས་འདུས་པ་མ་ཡིན་པའི་ཡུལ་ཅན་ཆོས་ཅན། འདུས་བསགས་མ་ཡིན་པར་ཐལ། མེད་པ་ཡིན་པའི་ཕྱིར། དེར་ཐལ། འདུས་པ་མ་ཡིན་པའི་ཡུལ་ཅན་ཞེས་པའི་དོན་དེ་སྐད་ཅིག་དུ་མ་འདུས་པའང་མ་ཡིན། རྡུལ་དུ་མའང་འདུས་པ་མ་ཡིན་པའི་རྣམ་འགྱུར་སྣ་ཚོགས་ལོངས་སྤྱོད་པའི་ཡུལ་ཅན་དེ་འཇོག་དགོས་པ་གང་ཞིག དེ་ལ་གྲངས་ཅན་པས་འདོད་པའི་བདག་ཤེས་རིག་གི་སྐྱེས་བུ་ལས་གཞན་འཇོག་རྒྱུ་མེད་པའི་ཕྱིར་རོ། །༈ ཡང་འདུས་མ་བྱས་ཆོས་ཅན། དངོས་གྱུར་གྱི་ནམ་མཁའ་རྟག་པར་སྒྲུབ་པའི་འགལ་རྟགས་ཡིན་པར་ཐལ། དངོས་གྱུར་གྱི་ནམ་མཁའ་རྟག་པར་སྒྲུབ་པའི་ཆོས་ཅན་གྱི་ངོ་བོ་སྒྲུབ་པའི་འགལ་རྟགས་ཡིན་པའི་ཕྱིར། འདོད་ན། འདུས་མ་བྱས་ཆོས་ཅན། དངོས་གྱུར་གྱི་ནམ་མཁའ་རྟག་པར་སྒྲུབ་པའི་འགལ་རྟགས་མ་ཡིན་པར་ཐལ། དངོས་གྱུར་གྱི་ནམ་མཁའ་རྟག་པར་སྒྲུབ་པའི་མ་ངེས་པའི་གཏན་ཚིགས་ཡིན་པའི་ཕྱིར། མ་གྲུབ་ན། འདུས་མ་བྱས་ཆོས་ཅན། དངོས་གྱུར་གྱི་ནམ་མཁའ་རྟག་པར་སྒྲུབ་པའི་མ་ངེས་པའི་གཏན་ཚིགས་ཡིན་པར་ཐལ། དངོས་གྱུར་གྱི་ནམ་མཁའ་རྟག་པར་སྒྲུབ་པའི་ཕྱོགས་ཆོས་གང་ཞིག དངོས་གྱུར་གྱི་ནམ་མཁའ་རྟག་པར་སྒྲུབ་པའི་ཁྱབ་པ་རྣལ་མ་དང་ཕྱིན་ཅི་ལོག་གང་དུ་མ་ངེས་པ་ཡིན་པའི་ཕྱིར། ཕྱི་མ་དེར་ཐལ། འདུས་མ་བྱས་ཡིན་ན་རྟག་པ་ཡིན་པས་མ་ཁྱབ་མ་ཡིན་པས་མ་ཁྱབ་པའི་ཕྱིར། འདོད་ན། འདུས་མ་བྱས་ཆོས་ཅན། དངོས་གྱུར་གྱི་ནམ་མཁའ་རྟག་པར་སྒྲུབ་པའི་མ་ངེས་པའི་གཏན་ཚིགས་ཡིན་པར་ཐལ། དངོས་གྱུར་གྱི་ནམ་མཁའ་རྟག་པར་སྒྲུབ་པའི་ཕྱོགས་ཆོས་གང་ཞིག དངོས་གྱུར་གྱི་ནམ་མཁའ་རྟག་པར་སྒྲུབ་པའི་ཁྱབ་པ་རྣལ་མ་དང་ཕྱིན་ཅི་ལོག་གང་དུ་མ་ངེས་པ་ཡིན་པའི་ཕྱིར། འདོད་ན། འདུས་མ་བྱས་ཆོས་ཅན། དངོས་གྱུར་གྱི་ནམ་མཁའ་རྟག་པར་སྒྲུབ་པའི་མ་ངེས་པའི་གཏན་ཚིགས་མ་ཡིན་པར་ཐལ། དངོས་གྱུར་གྱི་ནམ་མཁའ་རྟག་པར་སྒྲུབ་པའི་འགལ་རྟགས་ཡིན་པའི་ཕྱིར། དེར་ཐལ། རྟགས་རིགས་ལས། དཔེར་ན་བྱེ་བྲག་པས་སངས་རྒྱས་པ་ལ་དངོས་གྱུར་གྱི་ནམ་མཁའ་རྟག་པརསྒྲུབ་པ་ལ་འདུས་མ་བྱས་བཀོད་པ་ལྟ་བུའོ། །ཞེས་གསུངས་པའི་ཕྱིར་ན་དཔྱད། ༈ ཡང་བྱེ་བྲག་པས་སངས་རྒྱས་པ་ལ་བཀོད་པའི་ནམ་མཁའ་ཆོས་ཅན། དངོས་པོ་ཡིན་ཏེ། འདུས་མ་བྱས་ཡིན་པའི་ཕྱིར་ཞེས་པའི་སྦྱོར་བ་དེ་འགལ་རྟགས་ཀྱི་སྦྱོར་བ་ཡིན་པར་ཐལ། འདོད་ན། སྦྱོར་བ་དེ་སྒྲུབ་ཀྱི་ཕྱོགས་ཆོས་གྲུབ་པར་ཐལ། སྦྱོར་བ་དེ་འགལ་རྟགས་ཀྱི་སྦྱོར་བ་ཡིན་པའི་ཕྱིར། འདོད་ན། བྱེ་བྲག་པས་སངས་རྒྱས་པ་ལ་བཀོད་པའི་ནམ་མཁའ་ཆོས་ཅན། དངོས་པོ་ཡིན་ཏེ། འདུས་མ་བྱས་ཡིན་པའི་ཞེས་པའི་སྦྱོར་བ་དེ་སྒྲུབ་ཀྱི་ཕྱོགས་ཆོས་མ་གྲུབ་པར་ཐལ། སྦྱོར་བ་དེའི་རྟགས་དེ་སྔ་རྒོལ་ལ་ལྟོས་ནས་མ་གྲུབ་པའི་གཏན་ཚིགས་ཡིན་པའི་ཕྱིར། དེར་ཐལ། སྔ་རྒོལ་བྱེ་བྲག་པས་ནམ་མཁའ་འདུས་མ་བྱས་ཡིན་པར་མ་གྲུབ་པའི་ཕྱིར། ཁྱབ་སྟེ། སྔ་རྒོལ་ལ་ལྟོས་ནས་མ་གྲུབ་པའི་གཏན་ཚིགས་ཀྱི་དོན་ཡོད་པའི་ཕྱིར། མ་ཁྱབ་མཚམས་ཀྱི་རྟགས་གྲུབ་སྟེ། བྱེ་བྲག་པས་ནམ་མཁའ་མ་རྟོགས་པའི་ཕྱིར། མ་གྲུབ་ན། རྟགས་རིགས་མཐའ་དཔྱོད་ལས། བྱེབྲག་པས་ནམ་མཁའ་མ་རྟོགས་པས། ཞེས་གསུངས་པའི་ཕྱིར་ན་དཔྱད། ༈ འདུས་བསགས་ཆོས་ཅན། མིག་སོགས་གཞན་དོན་སྒྲུབ་པར་བྱེད་པའི་འགལ་རྟགས་ཡིན་པར་ཐལ། འདོད་ན། འདུས་བསགས་ཆོས་ཅན། མིག་སོགས་གཞན་དོན་སྒྲུབ་པར་བྱེད་པའི་ཕྱོགས་ཆོས་ཡིན་པར་ཐལ། མིག་སོགས་གཞན་དོན་སྒྲུབ་པར་བྱེད་པའི་འགལ་རྟགས་ཡིན་པའི་ཕྱིར། འདོད་ན། མིག་སོགས་ཆོས་ཅན། འདུས་བསགས་ཡིན་པར་ཐལ། འདོད་ན། གཙོ་བོ་འདུས་བསགས་ཡིན་པར་ཐལ། མིག་སོགས་འདུས་བསགས་ཡིན་པའི་ཕྱིར། ཁྱབ་སྟེ། མིག་སོགས་ཞེས་པའི་སོགས་ཁོངས་ནས་ཤེས་བྱ་ཉེར་གསུམ་བཏོན་ནས་ཉེར་བཞི་ཆོས་ཅན་དུ་འཛིན་པ་ཡིན་པའི་ཕྱིར། དེར་ཐལ། རྟགས་རིགས་ལས། མིག་སོགས་ཞེས་པའི་སོགས་ཁོངས་ནས་ཤེས་བྱ་ཉེར་གསུམ་བཏོན་ནས་ཉེར་བཞི་ཆོས་ཅན་དུ་འཛིན་པ་ཡིན་ནོ། །ཞེས་གསུངས་པའི་ཕྱིར། འདོད་ན། གཙོ་བོ་འདུས་བསགས་ཡིན་པར་ཐལ། མིག་སོགས་འདུས་བསགས་ཡིན་པའི་ཕྱིར། རྟགས་ཁྱབ་ཁས། འདོད་ན། གཙོ་བོ་ཆོས་ཅན། ཡོད་པར་ཐལ། འདུས་བསགས་ཡིན་པའི་ཕྱིར། འདོད་མི་ནུས་ཏེ། ཚད་མ་མདོའི་རང་འགྲེལ་ལས། གཙོ་བོ་ལ་སོགས་པ་ནི་ཡོད་པ་མ་ཡིན་ཏེ། མ་དམིགསཔའི་ཕྱིར། ཞེས་གསུངས་པའི་ཕྱིར་ན་དཔྱད།